На вече́рни пое́м Блаже́н муж: 1-й антифо́н. На Го́споди, воззва́х: стихи́ры на 8, глас 1.

Подо́бен: Всехва́льнии му́ченицы:

Иу́до всехва́льне/ твое́ веща́ние изы́де,/ я́коже мо́лния, в концы́ всея́ земли́, му́дре,/ помраче́нныя ле́стию безбо́жия,/ к Све́ту наставля́я невече́рнему,/ и́мже ны́не сия́я,/ испроси́ душа́м на́шим ве́лию ми́лость.

Иу́до чу́дный,/ Христо́ва колесни́ца я́ко быв,/ и́дольскую горды́ню низложи́л еси́,/ плен же та́йно Сло́вом Бо́жиим плени́л еси́/ к жи́зни нетле́нней, сла́вне,/ е́юже наслажда́яся ны́не,/ испроси́ душа́м на́шим мир и ве́лию ми́лость.

Иу́до, апо́столе Христо́в,/ учени́к быв вопло́щшагося Бо́га на́шего,/ от Него́же, я́ко овча́ посреде́ волко́в,/ вои́стинну посла́лся еси́,/ сло́вом твои́м сих претворя́я злоче́стие ко благоче́стию/ и Боже́ственному разуме́нию Святы́я Тро́ицы./ Те́мже восхваля́ем тя.

Сла́ва, глас 8:

И́же Боже́ственнаго Ду́ха я́сно благода́ть прие́м,/ свяще́ннаго ли́ка апо́стольска соприча́стник быв, Иу́до апо́столе,/ тем носи́мое с Небесе́ иногда́ дыха́ние о́гненное/ о́гненным язы́ком вдохну́в,/ язы́ческое терно́вное попали́л еси́ безбо́жие./ Христа́ Бо́га, пропове́дниче, моли́/ спасти́ся душа́м на́шим.

И ны́не: Ца́рь Небе́сный:

Вход. Проки́мен дне. И чте́ния три.

Собо́рнаго Посла́ния Иу́дина чте́ние (глава́ 1):

Иу́да, Иису́су Христу́ раб, брат же Иа́кову,/ су́щим о Бо́зе Отце́ освяще́нным, Иису́с Христо́м соблюде́нным зва́нным:/ ми́лость вам, и мир, и любы́ да умно́жится./ Возлю́бленнии, вся́ко тща́ние творя́ писа́ти вам о о́бщем спасе́нии ва́шем,/ ну́жда ми бы́сть писа́ти вам,/ моля́ подвиза́тися о преда́нней ве́ре святы́м еди́ною./ Привнидо́ша бо не́цыи челове́цы, [дре́вле предуста́вленнии на сие́ осужде́ние,] нечести́вии,/ Бо́га на́шего благода́ть прелага́ющии в скве́рну/ и еди́наго Влады́ки Бо́га и Го́спода на́шего Иису́са Христа́ отмета́ющиися./ Воспомяну́ти же вам хощу́, ве́дущим и вам еди́ною сие́,/ я́ко Госпо́дь лю́ди от земли́ Еги́петския спасе́, последи́ неве́ровавшия погуби́./ А́нгелы соблю́дшия своего́ нача́льства, но оста́вльшия свое́ жили́ще,/ на суд вели́каго дне у́зами ве́чными под мра́ком соблюде́./ Я́коже Содо́ма и Гомо́рра и окре́стныя их гра́ды,/ подо́бным их о́бразом преблуди́вша и ходи́вша в след пло́ти ины́я,/ предлежа́т в показа́ние, огня́ ве́чнаго суд подъе́мше./ Та́кожде у́бо и си́и, со́ния ви́дяще, пло́ть у́бо скверня́т,/ госпо́дьства же отмета́ются, сла́вы же ху́ляще [не трепе́щут]./ Михаи́л же Арха́нгел, егда́, со диа́волом разсужда́я, глаго́лаше о Моисе́ове телеси́,/ не сме́яше суда́ навести́ ху́льна, но рече́:/ да запрети́т тебе́ Госпо́дь./ Си́и же, ели́ка у́бо не ве́дят, ху́лят:/ ели́ка же по естеству́, я́ко безслове́сная живо́тная, ве́дят,/ в сих скверня́тся.

Собо́рнаго Посла́ния Иу́дина чте́ние (глава́ 1):

Горе́ им, я́ко в пу́ть Ка́инов ходи́ша,/ и в ле́сть Валаа́мовы мзды пролия́шася, и в пререка́нии Корре́ове погибо́ша./ Си́и су́ть в любва́х ва́ших скверни́тели, с ва́ми яду́ще,/ без боя́зни себе́ пасу́ще, о́блацы безво́дни, от ветр преноси́ми,/ древеса́ есе́нна безпло́дна, два́жды уме́рша, искорене́на./ Во́лны свире́пыя мо́ря, воспеня́юще своя́ стыде́ния,/ зве́зды преле́стныя, и́мже мрак тьмы́ во ве́ки блюде́тся./ Проро́чествова же и о сих седмы́й от Ада́ма Ено́х, глаго́ля:/ се прии́дет Госпо́дь во тьма́х святы́х [А́нгел] Свои́х/ сотвори́ти суд о всех/ и изобличи́ти всех нечести́вых о всех де́лех нече́стия их, и́миже нече́ствоваша,/ и о всех жесто́ких словесе́х их, я́же глаго́лаша на́нь гре́шницы нечести́вии./ Си́и су́ть ропотницы́ , укори́тели, ча́сть поро́чна,/ в по́хотех свои́х ходя́ще, нече́стием и законопреступле́нием,/ и уста́ их глаго́лют прего́рдая,/ чудя́щеся ли́цам по́льзы ра́ди.

Собо́рнаго Посла́ния Иу́дина чте́ние (глава́ 1):

Вы же, возлю́бленнии, помина́йте глаго́лы, преждерече́нныя от апо́стол Го́спода на́шего Иису́са Христа́./ Зане́ глаго́лаху вам,/ я́ко в после́днее вре́мя бу́дут руга́тели, по свои́х по́хотех ходя́ще и нече́стиих./ Си́и су́ть отделя́юще себе́ от еди́ности ве́ры/ и су́ть теле́сни, Ду́ха не иму́ще./ Вы же, возлю́бленнии, свято́ю ва́шею ве́рою назида́юще себе́, Ду́хом Святы́м,/ и моля́щеся, са́ми себе́ в любви́ Бо́жией соблюда́йте,/ жду́ще ми́лости Го́спода на́шего Иису́са Христа́, в жи́знь ве́чную./ И о́вех у́бо ми́луйте, разсужда́юще,/ о́вех же стра́хом спаса́йте, от огня́ восхища́юще./ Облича́йте же с боя́знию, ненави́дяще и я́же от пло́ти оскверне́ную ри́зу./ Могу́щему же сохрани́ти вы без греха́ и без скве́рны/ и поста́вити пред сла́вою Свое́ю непоро́чны в ра́дости,/ Еди́ному прему́дрому Бо́гу и Спа́су на́шему/ [Иису́сом Христо́м Го́сподем на́шим] сла́ва и вели́чие, держа́ва и вла́сть/ пре́жде всего́ ве́ка, и ны́не,/ и во вся ве́ки, ами́нь.

На стихо́вне стихи́ры, глас 4.

Подо́бен: Дал еси́ зна́мение:

Прия́л еси́, апо́столе,/ над де́моны непобеди́мую вла́сть и си́лу/ и о и́мени Христо́ве нача́ла тьмы́ отгони́ти,/ проше́л еси́ зе́млю, просвеща́я, я́ко со́лнце,/ и вся страны́ науча́я,/ и пе́рвое, сла́вне, Христо́во пропове́дал еси́/ спаси́тельное прише́ствие.

Стих: Во всю зе́млю изы́де веща́ние их/ и в концы́ вселе́нныя глаго́лы их.

Пе́рвей бла́гости/ и есте́ственному и пребоже́ственному житию́ подо́бяся,/ муж был еси́ благ, Иу́до, по существу́,/ и брат Госпо́день имену́емь,/ нра́ва твоего́ благода́тию/ и обы́чая красото́ю,/ Христо́в показа́лся еси́ учени́к и́скренний.

Стих: Небеса́ пове́дают сла́ву Бо́жию,/ творе́ние же ру́ку Его́ возвеща́ет тве́рдь.

Орга́н, до́бре соста́влен,/ Боже́ственным окормле́нием,/ апо́столе Иу́до,/ язы́ком зва́нию ты вве́рился еси́,/ к позна́нию Христо́ву наставля́я словесы́ и дея́нии,/ вся просвети́л еси́/ испове́дати и́стинное Иису́са Божество́,/ Спа́са душ на́ших.

Сла́ва, глас 2:

Ре́вности Боже́ственныя испо́лнен,/ апо́столе Иу́до досточу́дне,/ ревну́я, поревнова́л еси́ Бо́гу Вседержи́телю,/ и Боже́ственных тя чуде́с испо́лнена показа́,/ стра́нную бо ре́вность име́я,/ де́йствием нрав стяжа́л еси́./ Те́мже Вы́шний сый, с Вы́шними ли́ки вселя́емь,/ моли́ся, Богови́дче, Сло́ву, Христу́ Бо́гу на́шему,/ дарова́ти нам ве́лию ми́лость.

И ны́не, Богоро́дичен: О, чудесе́ но́ваго:

Тропа́рь, глас 1:

Христо́ва тя сро́дника, о Иу́до, ве́дуще и му́ченика тве́рда,/ свяще́нно восхваля́ем, пре́лесть попра́вша и ве́ру соблю́дша./ Те́мже, дне́сь всесвяту́ю твою́ па́мять пра́зднующе,/ грехо́в разреше́ние моли́твами твои́ми прие́млем.

Ин тропа́рь, глас то́йже:

Чистоту́ душе́вную и житие́ непоро́чно стяжа́в,/ Пречи́стаго Све́та, нам прибли́жшагося, быв по пло́ти брат и учени́к,/ благоче́стия пропове́дник и язы́ком учи́тель и́стинный,/ Иу́до всехва́льне,/ моли́ Христа́ Бо́га,/ да спасе́т ду́ши на́ша.

НА У́ТРЕНИ

На Бог Госпо́дь: тропа́рь апо́стола, два́жды. Сла́ва, и ны́не: Гаврии́лу веща́вшу:

По 1-й кафизме седа́лен, глас 2:

Улови́в язы́ки апо́стол сла́вный/ и научи́в концы́ земны́я Тебе́ кла́нятися со Отце́м и Ду́хом, Христе́ Бо́же,/ того́ ра́ди утверди́ Це́рковь Твою́/ и ве́рным низпосли́ благослове́ние Твое́,/ еди́не Ми́лостиве и Человеколю́бче.

Сла́ва, и ны́не, Богоро́дичен:

Боже́ственнаго естества́ о́бщницы бы́хом Тобо́ю, Богоро́дице Присноде́во:/ Бо́га бо нам воплоще́нна родила́ еси́./ Те́мже Тя по до́лгу вси благоче́стно велича́ем.

По 2-й кафизме седа́лен, глас 4:

Лучу́, я́ко со́лнце, пра́вды испусти́ тя Христо́с/ просвети́ти всю зе́млю, апо́столе сла́вный Иу́до:/ Боже́ственными твои́ми моли́твами озаря́еши/ и Боже́ственным све́том невече́рним всех просвеща́еши,/ ве́рою соверша́ющих святу́ю па́мять твою́.

Сла́ва, и ны́не, Богоро́дичен:

Упова́ние непосты́дное наде́ющихся на Тя,/ еди́на, ро́ждшая па́че естества́ пло́тию Христа́, Бо́га на́шего,/ Того́ со святы́ми апо́столы моли́ пода́ти вселе́нней очище́ние прегреше́ний/ и всем нам пре́жде конца́ жития́ исправле́ние.

По полиеле́и седа́лен, глас 8.

Подо́бен: Прему́дрости:

Мре́жею сло́ва возве́д из глубины́ неразу́мия боголе́пно, язы́ки приве́л еси́ ве́рою/ и, я́ко исто́чник сый вод духо́вных, вселе́нную всю напои́л еси́ благода́тию./ Те́мже и спа́сшиися тобо́ю, Богогла́се,/ я́ко дру́га тя бли́жняго Христо́ва ублажа́ем, апо́столе Иу́до, вопию́ще ти:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сная пою́т Тя, Благода́тная, Ма́ти Безневе́стная,/ и мы славосло́вим неизсле́дованное Твое́ рождество́, Богоро́дице,/ моли́ спасти́ся душа́м на́шим.

Степе́нна, 1-й антифо́н 4-го гла́са. Проки́мен, глас 4: Во всю зе́млю изы́де веща́ние их: Стих: Небеса́ пове́дают сла́ву Бо́жию: Вся́кое дыха́ние: Ева́нгелие от Иоа́нна, зача́ло 67.

По 50-м псалме́ стихи́ра, глас 1:

Во всю зе́млю изы́де твое́ спаси́тельное веща́ние,/ Богови́дче апо́столе,/ и просвети́ ду́ши заблу́ждшия,/ и Христу́ приведе́ челове́ки, просвеще́нныя благода́тию./ Те́мже моли́ дарова́ти душа́м на́шим/ мир и ве́лию ми́лость.

Кано́н Богоро́дицы со ирмосо́м на 6 и апо́стола на 8, его́же краегране́сие: Пе́ти Иу́ду Богови́дца тщу́ся. Творе́ние Феофа́ново, глас 5.

Пе́снь 1

Ирмо́с: Коня́ и вса́дника в мо́ре Чермно́е,/ сокруша́яй бра́ни мы́шцею высо́кою/ Христо́с истрясе́, Изра́иля же спасе́,/ побе́дную пе́снь пою́ща.

Таи́нниче Небе́сных, Иу́до всему́дре,/ учениче́ Спа́сов и о́бщниче и́стинный жи́зни,/ язы́к мой подви́гни и сло́во упра́ви на пе́ние твое́, всеблаже́нне.

Влеки́й Спа́сов яре́м, апо́столе,/ и бразду́ секи́й, и обновля́я благода́тию, се́мя се́ял еси́/ и мног плод прине́сл еси́ призва́вшему, пресла́вне.

Сло́ва вопло́щшагося обре́т Учи́теля/ и Сего́, Богови́дче, луча́ми просвеща́емь,/ был еси́ свет вторы́й,/ пе́рваго сия́ньми сообразу́яся, досточу́дне.

Богоро́дичен: Ве́ра да пове́дуется то́кмо, а не сказа́ние,/ е́же па́че ума́ чуде́с, Богороди́тельнице Пречи́стая,/ Непостижи́маго Бо́га Сло́ва родила́ еси́, оболче́на в челове́чество.

Катава́сия по уста́ву.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, еди́не Бла́же и Человеколю́бче.

Взя́тся учени́к Христо́вых благоле́пие превы́ше вся́каго вели́чества:/ си́и бо бы́ша Ему́ дру́зи же и сво́йственнии, и сро́дницы,/ и сосне́дницы, и та́ин сказа́тели.

Иу́до, бра́тия твоя́ тя похваля́ют, бра́та я́вльшася/ и непщу́ема я́вльшагося пло́тию Сло́ва Преве́чнаго, от Присносу́щнаго возсия́вшаго,/ от нерожде́на Роди́теля.

Умертви́в на земли́ твоя́ у́ды, пожи́л еси́ с жи́знию всех Христа́, пребога́те,/ и живоно́сныя жи́зни всей вселе́нней провозве́стник ты был еси́,/ глаго́лы живо́тныя пропове́дая.

Богоро́дичен: Се Ты па́че всех, Чи́стая, ублажи́лася еси́,/ превозшла́ еси́ всех свя́тостию,/ всех превознесла́ся еси́/ и всех яви́лася вы́шши Небе́сных сил, Ма́ти Бо́жия бы́вши.

Конда́к, глас 2.

Подо́бен: Вы́шних ища́:

Па́влу я́влься собесе́дник, апо́столе,/ с сим нам про́поведь возвести́л еси́ Боже́ственныя благода́ти,/ тайноглаго́льниче Иу́до блаже́нне./ Сего́ ра́ди вопие́м ти:/ не преста́й моля́ся о всех нас.

Седа́лен, глас 8.

Подо́бен: Прему́дрости:

Ро́ждшагося Влады́ки и бра́та бы́вша всем избра́нным, Иу́до блаже́нне, брат был еси́/ и от Него́ апо́стол во вся концы́ посла́лся еси́, прему́дре,/ сло́во ве́ры всем всева́я и просвеща́я во тьме́ неве́дения рабо́тающая лука́вому мироде́ржцу./ Сего́ ра́ди вопие́м ти:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника или́ Богоро́дичен:

Я́ко Всенепоро́чная Неве́сто Творцу́, я́ко Неискусому́жная Ма́ти Изба́вителю,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и Вы́шняго прича́стия сподо́би/ и Све́та невече́рняго моли́твами Твои́ми.

Пе́снь 4

Ирмо́с: Боже́ственное Твое́ разуме́в истоща́ние прозорли́во,/ Авваку́м, Христе́, со тре́петом вопия́ше Тебе́:/ во спасе́ние люде́й Твои́х/ спасти́ пома́занныя Твоя́ прише́л еси́.

Вели́кий Спа́сов апо́стол явле́ния Ду́ха сподо́блен/ и возлю́блен бы́сть, зре́ния Его́ зарю́ и добро́ту ви́дев.

Благода́ти сый испо́лнен и даро́в, от Бо́га пода́нных, апо́столе,/ на спаси́тельное приста́нище тя песносло́вящия наставля́й.

Си́лою непобеди́мою Ду́ха Пресвята́го огражда́емь, служи́телю неизрече́нных,/ лука́вствия отгоня́еши ду́хи сло́вом благода́ти.

Богоро́дичен: Несказа́нно заче́нши, Всенепоро́чная, Творца́ Твоего́ и Бо́га,/ моли́ спасти́ ны от бед/ и душе́вное спасе́ние пода́ти пою́щим Тя, Влады́чице.

Пе́снь 5

Ирмо́с: Одея́йся све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,/ я́ко еди́н Благоутро́бен.

Зако́на оста́вль се́ни, и́стины о́браз све́тло пропове́дал еси́,/ са́мую и́стину стяжа́в наста́вника.

Сло́ва повеле́ние исполня́я, апо́столе, язы́ки вся, уче́нии твои́ми науча́я, обте́кл еси́,/ и сих крестя́ Тро́ическим призыва́нием.

До́ждь небе́сный, я́ко роса́ свы́ше, Боже́ственное веща́ние твое́, Богопропове́дниче,/ мглу разори́ многобо́жия еди́наго Бо́га пропове́данием.

Богоро́дичен: Умертви́ стра́сти моя́, Богороди́тельнице,/ и ду́шу мою́, умерщвле́нную грехо́вными сластьми́, возста́ви,/ Ма́ти и́стиннаго Воскресе́ния.

Пе́снь 6

Ирмо́с: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́/ и от тли возведи́ мя,/ я́ко Благоутро́бен.

Виде́ния уче́нием, жития́ дея́ньми све́тло, Христо́в апо́столе, сия́я,/ су́щия во глубине́ неве́дения просвети́л еси́.

Посыла́еши всем челове́ком све́тлое и уче́ния Ду́ха испо́лнено посла́ние,/ священноявле́нне пречу́дне.

Богови́дец веща́ет Небе́сная,/ я́коже слове́сную не́кую Бо́жию сла́ву пове́дая/ нас ра́ди пло́тию Я́вльшагося и чудесы́.

Богоро́дичен: Пресвята́я Влады́чице Богома́ти,/ изба́ви мя тли и страсте́й смуще́ние утоли́,/ исто́чник безстра́стия ро́ждшая.

Конда́к, глас 2.

Подо́бен: Тве́рдыя:

Тве́рдым умо́м избра́н учени́к ты яви́лся еси́/ и столп необори́м Це́ркве Христо́вы,/ язы́ком пропове́дал еси́ сло́во Христо́во,/ ве́ровати глаго́ля во Еди́но Божество́;/ от Него́же просла́вився, прия́л еси́ дар исцеле́ний,/ цели́ти неду́ги притека́ющих к тебе́,/ апо́столе Иу́до всехва́льне.

И́кос:

И́стиннаго благоче́стия пропове́дника и держа́внаго и́стины побо́рника досто́йно восхва́лим,/ я́ко подо́бника Христу́ и свиде́теля:/ стра́сти бо Его́ на те́ле му́жески прия́т,/ я́ко учени́к Словесе́ и апо́стол, Иу́до всехва́льный.

Пе́снь 7

Ирмо́с: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:/ Бо́же, благослове́н еси́.

Богови́дна ссу́щием Божества́ бы́вша,/ вси Иу́ду воспое́м, согла́сно пою́ще:/ Бо́же, благослове́н еси́.

Духодви́жимый и Богодухнове́нный язы́к твой мир обрати́ Христо́вым пропове́данием,/ Ему́же вси пое́м:/ Бо́же, благослове́н еси́.

Дае́т тебе́ Небе́сное насле́дие Госпо́дь и престо́л пресве́тел,/ на не́мже почива́я, боже́ственне пое́ши:/ Бо́же, благослове́н еси́.

Богоро́дичен: Усты́ и ра́зумом Тя Богоро́дицу Влады́чицу пропове́дуем, веселя́щеся:/ Бо́га бо родила́ еси́, Ему́же вси пое́м:/ Бо́же, благослове́н еси́.

Пе́снь 8

Ирмо́с: Тебе́, Вседе́телю,/ в пещи́ о́троцы, всеми́рный лик спле́тше, поя́ху/ дела́ вся́кая, Го́спода по́йте/ и превозноси́те во вся ве́ки.

Бога́тство язы́к и царе́й по́честь,/ благозва́ние восприя́л еси́, вопия́, апо́столе:/ вся дела́ Госпо́дня, Го́спода по́йте и превозноси́те во вся ве́ки.

Всю зарю́ Уте́шителеву, блаже́нне, прия́л еси́ соше́дшую, зовы́й, сла́вне:/ вся дела́ Госпо́дня, Го́спода по́йте и превозноси́те во вся ве́ки.

Ве́щи тле́нныя возненави́дев, Небе́сных сла́ву производи́л еси́,/ пребыва́ющую ве́дый, апо́столе, те́мже вопия́л еси́:/ вся дела́ Госпо́дня, Го́спода по́йте и превозноси́те во вся ве́ки.

Богоро́дичен: Прииди́те, добро́ту Иа́ковлю воспои́м,/ Мари́ю Пречи́стую, согла́сно пою́ще:/ вся дела́ Госпо́дня, Го́спода по́йте и превозноси́те во вся ве́ки.

Пе́снь 9

Ирмо́с: Иса́ие, лику́й:/ Де́ва име́ во чре́ве/ и ро́ди Сы́на Емману́ила,/ Бо́га же и Челове́ка, Восто́к и́мя Ему́,/ Его́же велича́юще, Де́ву ублажа́ем.

Облиста́вся, сла́вне, светоли́тий Ду́ха заре́ю,/ чуде́с блиста́ния па́че естества́ всем испуща́еши, я́ко учени́к Емману́илев,/ Его́же велича́юще, тя, Богови́дче, ублажа́ем.

Со А́нгельскими чи́нми предстоя́ще, богови́днии самови́дцы/ и зри́тели Единоро́днаго, пло́тию обнища́вшаго нас ра́ди,/ Сего́ приле́жно ны́не моли́те спасти́ ду́ши на́ша.

Богоро́дичен: Я́ко ро́ждши, Пречи́стая, тва́ри Соде́теля, по всему́ Роди́теля но́сиши нача́ло,/ несравни́тельно име́я превзя́тие и превознесе́нно./ Те́мже Рождеству́ Твоему́ покланя́ющеся, Тя прославля́ем.

Свети́лен.

Подо́бен: Ду́хом во святи́лищи:

Тече́ние кра́сных твои́х ног, Иу́до апо́столе, возврати́в к ше́ствию Небе́сному,/ возше́л еси́, ра́дуяся,/ и, Тро́ице предста́в, во Отце́ ви́диши Сы́на и Ду́ха Боже́ственнаго./ Сего́ ра́ди ве́рою пресвяще́нную твою́ и Боже́ственную пра́зднуем па́мять.

Сла́ва, и ны́не, Богоро́дичен:

Стра́шнаго испыта́ния воспомина́ю час,/ мно́жество злых дел мои́х ужаса́ет и устраша́ет мя,/ но уще́дри, Пречи́стая, те́плою Твое́ю моли́твою и да́ждь ми спасе́ние:/ ели́ка бо хо́щеши, мо́жеши.

На хвали́тех стихи́ры на 4, глас 5.

Подо́бен: Преподо́бие о́тче:

Манове́нием Боже́ственным повину́яся, преблаже́нне,/ воплоще́нное Сло́во всем пропове́дал еси́,/ нам уподо́бльшася без преложе́ния,/ Сего́ быв че́стен учени́к,/ Сему́ быв брат по пло́ти,/ Того́ сла́вы сподо́блься,/ я́ко чист, зре́ти Боже́ственным умо́м./ Те́мже почита́ем тя, Иу́до Богогла́се,/ и па́мять твою́ соверша́ем, ве́рно вопию́ще ти:/ Христа́ моли́ всегда́/ дарова́ти вселе́нней единомы́слие,/ мир и ве́лию ми́лость.

Го́ру, иска́пающую сла́дость Боже́ственнаго ра́зума,/ апо́столе Иу́до, тя имену́ем;/ ми́рную реку́, устреми́вшуюся от духо́вных невеще́ственных исто́чник,/ и безбо́жия изсуша́ющую мо́ря,/ и напоя́ющую та́йно благочести́вых се́рдца и помышле́ния;/ трубу́ доброгла́сну, глася́щую Сло́ва Боже́ственное явле́ние,/ мир избавля́юща./ Его́же ны́не моли́, Ему́же помоли́ся всегда́/ дарова́ти вселе́нней единомы́слие,/ мир и ве́лию ми́лость.

Блаже́нне Иу́до,/ бра́тия твоя́ тя восхвали́ша,/ Бо́жия бра́та я́вльшася/ и бы́вша Ду́ха прия́телище боголе́пно./ Его́же светлостьми́ чи́сто просве́щся,/ у́гль яви́лся еси́, ле́сть попаля́я,/ ве́рныя же вся просвеща́я чи́стых уче́ний сия́ньми./ Те́мже почита́ем тя,/ я́ко незаходи́мую денни́цу,/ и соверша́ем твою́ па́мять святу́ю,/ ве́рно вопию́ще ти:/ Христа́ моли́ всегда́ дарова́ти вселе́нней единомы́слие,/ мир и ве́лию ми́лость.

Сла́ва, глас 2:

Оста́вив земна́я,/ после́довал еси́ Христу́/ и, зна́менався дохнове́нием Свята́го Ду́ха,/ по́слан быв от Него́ в язы́ки поги́бшия/ обраща́ти челове́ки во свет Богоразу́мия,/ апо́столе Иу́до,/ и, сконча́в по́двиги Боже́ственныя твое́я стра́сти/ и мук разли́чных,/ ду́шу твою́ Христу́ пре́дал еси́./ Того́ моли́, всеблаже́нне,/ дарова́ти нам ве́лию ми́лость.

И ны́не: Спаси́ от бед:

Славосло́вие вели́кое. И отпу́ст.

НА ЛИТУРГИ́И

Блаже́нны апо́стола, пе́сни 3-я и 6-я. Проки́мен, глас 8: Во всю зе́млю изы́де веща́ние их: Стих: Небеса́ пове́дают сла́ву Бо́жию: Апо́стол в посла́нии Иу́дином, зача́ло 77. Аллилуия, глас 1: Испове́дят Небеса́ чудеса́: Ева́нгелие от Иоа́нна, зача́ло 48. Прича́стен: Во всю зе́млю изы́де веща́ние их и в концы́ вселе́нныя глаго́лы их.

 

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1:

Приспе́ де́нь све́тлаго торжества́,/ мона́шествующии, собери́теся, собо́ри:/ дне́сь увенча́ем пе́сньми похва́льными блаже́ннаго Паи́сия,/ преподо́бных верхо́вника, мона́шествующих красоту́/ и по́стников тве́рдое основа́ние.

Преподо́бне о́тче Паи́сие,/ от пеле́н освяще́н Бо́гу был еси́,/ и, благода́ти я́влься испо́лнен,/ чудесы́ мир озари́л еси́,/ и мона́шествующим началово́ждь был еси́,/ и ны́не моли́ся Христу́/ спасти́ся душа́м на́шим.

Преподо́бне о́тче Паи́сие,/ твоя́ всечестна́я па́мять/ весели́т мона́шествующих ли́ки/ и к ре́вности твои́х Боже́ственных по́двигов/ воздвиза́ет вся челове́ки,/ те́мже моли́ся Христу́ о душа́х на́ших.

Преподо́бне о́тче наш Паи́сие,/ ты на земли́, я́ко безпло́тен, пожи́л еси́,/ мно́гим воздержа́нием пло́ть умертви́л еси́,/ и де́монов полки́ погуби́л еси́,/ и ны́не прише́л еси́ к Све́ту невече́рнему,/ иде́же со А́нгелы лику́я,/ Христа́ непреста́нно моли́ о душа́х на́ших.

Сла́ва, глас 8:

Мона́хов мно́жества,/ наста́вника тя почита́ем, о́тче наш Паи́сие,/ твое́ю бо стезе́ю вои́стинну пра́во ходи́ти позна́хом:/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

На стихо́вне стихи́ры, глас 2.

Подо́бен: До́ме Евфра́фов:

От Еги́пта возсия́л еси́,/ Боже́ственная заря́,/ вселе́нную просвети́л еси́,/ блаже́нне Паи́сие/ уго́дниче Христо́в всеизря́дне.

Стих: Честна́ пред Го́сподем/ сме́рть преподо́бных Его́.

Весели́ся, пусты́не,/ красу́йся, горо́ Нитри́йская,/ я́ко в тебе́ процвете́/ Небе́сный граждани́н,/ Богоблаже́нный Паи́сий.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся и лику́й,/ мона́шествующих мно́жество,/ я́ко предпосла́вшее Христу́/ в по́стницех вели́каго Паи́сия,/ моли́твенника о душа́х на́ших.

Сла́ва, глас 3:

Прииди́те, вси ве́рнии,/ поревну́им доброде́телей преподо́бнаго Паи́сия/ и уви́дим, ка́ко сей подвиза́ся:/ еди́ною в седми́це ядя́ше,/ и по гора́м, я́ко еле́нь, скача́,/ ра́йския добро́ты иска́ше,/ ю́же ны́не обре́т,/ нас к себе́ призыва́ет./ Ему́же усе́рдно после́дующе, бра́тие,/ вся земна́я оста́вим,/ и пло́ти пристра́стие возненави́дим,/ да моли́твами его́ прии́мем/ от Христа́ Бо́га ве́лию ми́лость.

И ны́не, Богоро́дичен, глас то́йже:

Прииди́те, вси ве́рнии,/ у́зрим пресла́вное чу́до:/ ка́ко Бог Неви́димый воплоти́ся/ и яви́ся я́ко Челове́к,/ ка́ко же, Ма́терию Де́вою носи́м,/ во Еги́пет прии́де,/ и кре́постию Свое́ю и́долы низложи́,/ и свети́льники преподо́бныя сотвори́,/ Его́же пою́т А́нгели непреста́нными гла́сы,/ Жизнода́вца Го́спода, спаса́ющаго род наш.

Тропа́рь пи́сан на вели́цей вече́рни

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 8:

Прииди́те, вси ве́рнии,/ прииди́те, по́стников честно́е сосло́вие,/ дне́сь соста́вим благоле́пное торжество́,/ дне́сь ликовству́им та́инственно,/ в Боже́ственней па́мяти отца́ на́шего Паи́сия,/ и пе́сненно его́ воспои́м,/ похваля́юще по́стника Христо́ва,/ пусты́ннаго граждани́на:/ сей бо, ре́вность Боже́ственную в се́рдце прие́м,/ тле́нная и привре́менная и́стинно презре́/ и, а́ки паучи́ну и уме́ты, сия́ вмени́,/ да приобря́щет Христа́, и Ца́рствие Его́,/ и Боже́ственная о́ная,/ и́хже о́ко не ви́де, ниже́ у́хо когда́ слы́ша./ Его́же моли́твами, Христе́ Бо́же,/ спаси́ ду́ши на́ша, я́ко Человеколю́бец.

Ра́дуйся, Еги́пте ве́рный,/ ра́дуйся, Нитри́йская горо́ Богоизбра́нная,/ воспита́вши граждани́на Небе́снаго,/ Паи́сия Богоно́снаго./ Сей бо прему́дростию Свята́го Ду́ха украси́вся,/ вся́ко поще́ние в доброде́тельном житии́ свое́м показа́,/ сей свети́ло душ на́ших яви́ся,/ чуде́с заре́ю и дел зна́меньми/ просия́в мы́сленно во вся концы́./ Те́мже и мы того́ хода́тая приводя́ще,/ про́сим умоли́ти Христа́/ спасти́ся душа́м на́шим.

Кто изрече́т от земноро́дных/ чу́дное твое́ житие́,/ преподо́бне о́тче Паи́сие,/ или́ кий язы́к изочте́т боле́зни трудо́в твои́х?/ ты бо Самаго́ Го́спода подража́я,/ на Кресте́ пригвожде́ннаго и во гро́бе положе́ннаго,/ заключи́лся еси́ в пеще́ре, а́ки во гро́бе,/ и, а́ки ко кресту́ пригвожда́я себе́,/ те́сный и приско́рбный пу́ть на земли́ ше́ствовал еси́./ Ны́не же дости́г к широте́ Небе́сней и весе́лию ве́чному,/ со Христо́м ца́рствуеши,/ Его́же приле́жно моли́,/ е́же и нам прича́стником бы́ти Ца́рствия Небе́снаго.

Сла́ва, глас то́йже:

Преподо́бне о́тче Паи́сие,/ позо́р был еси́ А́нгелом и челове́ком:/ А́нгелы бо терпе́нием твои́м удиви́л еси́,/ челове́ки же ужаси́л еси́,/ я́ко вели́ко вре́мя без пи́щи пребы́л еси́./ Те́мже и виде́ния сподо́бился еси́ Сама́го Иису́са,/ от Него́же ве́лию благода́ть чуде́с прие́м,/ показа́лся еси́ преподо́бных верх и по́стников основа́ние/ и, дом Единосу́щныя Тро́ицы быв,/ Сию́ я́сно пропове́дал еси́,/ всех научи́в в Трие́х Ли́цах неразде́льно сла́вити Еди́наго Бо́га,/ Его́же моли́, преподо́бне,/ е́же просвети́ти и спасти́ ду́ши на́ша.

И ны́не, Богоро́дичен: Ца́рь Небе́сный:

Вход. Проки́мен дне и чте́ния (зри 28 июня).

На лити́и стихи́ры, глас 1:

Наста́, Богоно́се Паи́сие,/ светоно́сный твой пра́здник,/ и озаря́ет мона́шествующих ли́ки,/ и безсме́ртием облагоуха́ет;/ те́мже дне́сь, ве́рнии, соше́дшеся,/ воспева́ем и ублажа́ем любо́вию по́двиги твоя́/ и моли́твенника тя ко Христу́ предлага́ем/ о душа́х на́ших.

Глас 3: Прииди́те, вси ве́рнии,/ да пра́зднуем све́тло/ всечестну́ю па́мять отца́ на́шего Паи́сия:/ дне́сь бо раздае́т нам да́ры безсме́ртныя,/ и исполня́ет весе́лия духо́внаго,/ и облагоуха́ет всех воне́ю Свята́го Ду́ха./ Дне́сь А́нгели игра́ют,/ восприе́мше всесвяту́ю его́ ду́шу,/ и апо́столи с му́ченики и преподо́бными ликовству́ют,/ и вселе́нная вся све́тло торжеству́ет./ Те́мже и мы, ве́рою соше́дшеся,/ псало́мски рука́ми воспле́щим/ и пе́сньми похва́льными увенча́им всеблаже́ннаго,/ моля́ще его́ приле́жно/ моли́тися о душа́х на́ших.

Сла́ва, глас 8:

На хвалу́ поте́кл еси́ Госпо́дню,/ блаже́нне Паи́сие,/ посто́м и моли́твами на всяк де́нь а́ки умира́я,/ но́выя по́двиги изобрета́я,/ ра́вное страда́льцем терпе́ние показу́я./ Сего́ ра́ди распали́л еси́ ве́рных сердца́ любо́вию Христо́вою:/ кто бо, слы́шав безме́рное твое́ ноше́ние,/ душе́ю не умили́ся,/ или́ кто не удиви́ся,/ е́же к ни́щим твоему́ милосе́рдию,/ к скорбя́щим утеше́нию,/ к гре́шником попече́нию?/ Всех боголе́пно покая́нию научи́л еси́/ и вселе́нную всю доброде́тельми озари́л еси́./ Те́мже дне́сь всечестну́ю твою́ па́мять соверша́ющим/ пода́ждь нам да́ры невеще́ственныя,/ да вси тя любо́вию почита́ем и ублажа́ем.

И ны́не, Богоро́дичен, глас то́йже:

О Ма́ти Блага́я, Госпоже́ Богоро́дице Де́во,/ не отри́ни нас, смире́нных рабо́в Твои́х,/ принося́щих недосто́йныя моли́твы пред пречи́стою Твое́ю ико́ною,/ бу́ди те́плая Хода́таица о нас, гре́шных, к Сы́ну Твоему́,/ изба́ви нас от всех бед и искуше́ний,/ да, спаса́еми Тобо́ю, вы́ну вопие́м Ти:/ ра́дуйся, Блага́я Врата́рнице,/ две́ри ра́йския нам отверза́ющая.

На стихо́вне стихи́ры, глас 5.

Подо́бен: Ра́дуйся:

Ра́дуйся, свяще́ннейший у́ме,/ Боже́ственнаго виде́ния при́сно наслажда́яйся/ и ра́йския добро́ты смотря́яй,/ а́нгельским собесе́дуяй ликостоя́нием,/ Паи́сие преподо́бне:/ житие́ бо сие́ на земли́ вои́стинну пра́ведно пожи́в,/ показа́лся еси́ чистоты́ нескве́рное зерца́ло,/ от Ду́ха Свята́го просвеща́емь,/ от Боже́ственнаго светоявле́ния Христо́ва науча́емь./ Те́мже моли́ся дарова́ти душа́м на́шим/ мир и ве́лию ми́лость.

Стих: Честна́ пред Го́сподем/ сме́рть преподо́бных Его́.

Ра́дуйся, чистоты́ Боже́ственное сокро́вище,/ сосу́де Бо́жий избра́нный,/ от чре́ва ма́терня освяще́нный:/ ты бо был еси́ столп светови́ден,/ доброде́телию утвержде́н, и о́блак, осеня́ющ/ и предводя́й и́же во Еги́пте но́ваго Изра́иля, по́стников собо́р./ И ны́не со А́нгелы лику́я,/ Христа́ моли́, преподо́бне,/ дарова́ти душа́м на́шим/ мир и ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, по́стников Боже́ственная похвало́,/ преподо́бных верхо́вниче,/ скорбя́щих Боже́ственное утеше́ние,/ Нитри́йския го́ры украше́ние/ и всея́ вселе́нныя вели́кий свети́льниче,/ просвеща́я мирски́я концы́ доброде́тельми и чудесы́/ и вся преводя́ к высоте́ Боже́ственнаго виде́ния;/ ра́дуйся, и́же, по Па́влу вели́кому,/ на Небеса́ восхище́н был еси́ в рай/ и, неизрече́нная о́ная узре́в,/ к жела́нию тех мно́гия привле́кл еси́./ Те́мже ны́не Христа́ моли́,/ Христу́ помоли́ся, преподо́бне,/ дарова́ти душа́м на́шим/ мир и ве́лию ми́лость.

Сла́ва, глас 8:

Кто изглаго́лет Боже́ственную теплоту́ души́ твоея́,/ блаже́нне Паи́сие,/ или́ кто изочте́т боле́зни трудо́в твои́х?/ Вельми́ бо Христо́вою любо́вию уязви́лся еси́,/ те́сный и приско́рбный ра́достно ше́ствовал еси́ пу́ть,/ в гора́х и пеще́рах живы́й/ во бде́ниих, моли́твах и слеза́х,/ ты а́нгельское житие́ на земли́ вои́стинну показа́л еси́/ и мно́жество мона́шествующих ко Христу́ приве́л еси́,/ с ни́миже ны́не и со А́нгелы лику́еши,/ со апо́столы и проро́ки водворя́ешися,/ с му́ченики и по́стники весели́шися/ и со все́ми пра́ведными предстои́ши Христу́ Бо́гу,/ Его́же моли́, преподо́бне,/ е́же просвети́ти и освяти́ти ду́ши на́ша.

И ны́не, Богоро́дичен, глас то́йже:

Ра́дуйся, чистоты́ сокро́вище;/ ра́дуйся, Невеще́ственнаго Све́та чи́стое жили́ще;/ ра́дуйся, глави́зно спасе́ния на́шего;/ ра́дуйся, проро́ков исполне́ние;/ ра́дуйся, апо́столов пропове́дание;/ ра́дуйся, му́чеников похвало́, Всенепоро́чная;/ ра́дуйся, подви́жников и мона́хов украше́ние и спасе́ние ве́рных.

На благослове́нии хле́бов тропа́рь преподо́бнаго, два́жды, и Богоро́дице Де́во: еди́ножды. А иде́же не́сть всено́щнаго бде́ния, на вели́цей вече́рни по Ны́не отпуща́еши: глаго́лем тропа́рь еди́ножды. Сла́ва, и ны́не, Богоро́дичен воскре́сен.

Тропа́рь преподо́бнаго, глас 1:

Пусты́нный жи́тель, и в телеси́ А́нгел,/ и чудотво́рец показа́лся еси́, Богоно́се о́тче наш Паи́сие:/ посто́м, бде́нием и моли́твою/ Небе́сная дарова́ния прие́м,/ исцеля́еши неду́жныя и ду́ши ве́рою притека́ющих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

НА У́ТРЕНИ

На Бог Госпо́дь: тропа́рь два́жды. Сла́ва, и ны́не, Богоро́дичен: Гаврии́лу веща́вшу:

По 1-м стихосло́вии седа́лен, глас 4:

Зва́нию Го́спода твоего́ после́довал еси́,/ мир отве́рг и вся, я́же в ми́ре кра́сная, всеблаже́нне Паи́сие,/ претерпе́л еси́ пусты́нное озлобле́ние усе́рдно,/ полки́ же отрази́л еси́ де́монов му́жественне./ Те́мже твою́ и па́мять при́сно пе́сньми восхваля́ем ве́рно.

Сла́ва, и ны́не, Богоро́дичен:

Зва́нию Сы́на Твоего́, Влады́чице, после́дующе преподо́бных мно́жество/ и Твое́ю си́лою укрепля́еми, Пречи́стая,/ победи́ша кре́пко вра́жия полки́ и мо́лятся при́сно о душа́х на́ших.

По 2-м стихосло́вии седа́лен, глас 5:

По́стника Госпо́дня пе́сньми почти́м,/ я́ко умертви́вша вся прило́ги страсте́й/ воздержа́нием и тве́рдым терпе́нием вои́стинну,/ и посрами́вша зело́ противобо́рца врага́ и всю его́ горды́ню,/ и ны́не моля́щася Го́сподеви поми́ловатися душа́м на́шим.

Сла́ва, и ны́не, Богоро́дичен:

По́стники Твое́й чистоте́, Госпоже́, подража́юще,/ посто́м и моли́твами от страсте́й очища́ются,/ и, де́вство держа́ще, от Тебе́, Богоро́дице, освяща́ются,/ ку́пно же с Тобо́ю и мо́лятся, Пречи́стая, о душа́х на́ших.

По полиеле́и седа́лен, глас 8:

От утро́бы Бо́гу освяти́лся еси́, преподо́бне,/ и, на ра́мена крест твой взем, Христу́ усе́рдно после́довал еси́,/ посто́м и моли́твами разсе́кл еси́ мо́ре страсте́й,/ победи́в вра́жия полки́./ Те́мже и к ре́вности люде́й воздвиза́я,/ собра́в мона́шествующих мно́жества, па́стырь им был еси́/ и пусты́ню Нитри́йскую гра́ды сотвори́л еси́, Паи́сие преподо́бне./ Моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко еди́ну в жена́х Благослове́нную/ и де́вам похвалу́ и украше́ние,/ в бране́х непреобори́мую по́мощь,/ немощны́м утвержде́ние и ско́рое посеще́ние в печа́ли су́щим/ иму́ще Тя, Богоневе́стная Де́во,/ дне́сь в пречестно́м Твое́м хра́ме мольбы́ на́ша к Тебе́ прино́сим,/ я́ко да мо́лиши Христа́ Бо́га согреше́ний оставле́ние дарова́ти/ благоче́стно покланя́ющимся пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 8: Преподо́бне о́тче Паи́сие: зри Сла́вник на вели́цей вече́рни.

Кано́н Богоро́дицы со ирмосо́м на 6 и преподо́бнаго на 8, глас 4, его́же краегране́сие без Богоро́дичных: Пою́ по́двиги Паи́сия Вели́каго.

Пе́снь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Прииди́те, воспои́м вси Богому́драго Паи́сия,/ отце́в верхо́вника, преподо́бных красоту́,/ по́стников основа́ние, покая́ния пропове́дника,/ и душа́м на́шим засту́пника и храни́теля необори́ма,/ и всех ве́рных утвержде́ние.

От блага́го ко́рене добр плод позна́лся еси́, блаже́нне,/ от христолюби́вых роди́телей прозя́бл еси́ Боже́ственная ве́твь,/ нося́щая кра́сныя плоды́ доброде́телей,/ и́миже ве́рных сердца́ благоуха́л еси́/ и пе́ти научи́л еси́ Бо́жия чудеса́.

Ю́ну ти су́шу о́троку и осироте́вшу от отца́,/ ма́ти твоя́, блаже́нне, ору́жием печа́ли пробода́шеся;/ а́бие же А́нгел Госпо́день во сне предста́ ей и се́тование разреши́/ и тебе́, я́ко свяще́нное приноше́ние, да́ти Бо́гу благовести́,/ ку́пно же и научи́ пе́ти Бо́жия чудеса́.

Богоро́дичен: Ю́на Отроча́ ражда́ется нам из Де́вы Ма́тере,/ Ада́ма дре́внейшее, Бог Сый Преве́чный и Соде́тель вся́ческих./ Восхоте́в вообрази́тися в чужде́е,/ мир от тли изба́ви,/ и собо́р по́стников совокупи́ Небе́сным си́лам,/ и пе́ти научи́ всех Боже́ственная Его́ чудеса́.

Пе́снь 3

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Позна́н был еси́ от пеле́н освяще́н Бо́гу, Паи́сие преподо́бне,/ и, взем твой крест, к Нему́ поте́кл еси́ те́пле/ жи́тельством непоро́чным, и воздержа́нием, и жития́ све́тлостию./ Сего́ ра́ди всели́лся еси́ во оби́тели Небе́сныя,/ помяни́ у́бо и нас, тя помина́ющих и пою́щих:/ венце́в сла́вы сподо́би.

Оте́чество твое́, сла́вне, Еги́пет просвети́ся честны́м рождество́м твои́м,/ Нитри́йская гора́ освяти́ся сла́вным житие́м твои́м,/ вся же вселе́нная, чудя́щися, хва́лит па́че есте́ственныя по́двиги твоя́,/ вси же тя ку́пно моли́твенника ко Христу́ предлага́ем, блаже́нне Паи́сие.

Ди́вно показа́л еси́ твое́ поще́ние, Паи́сие, еди́нощи в седми́це яды́й,/ сим те́ло твое́ смиря́я и по́мыслы души́ укроща́я;/ к сему́ же и нищету́ самово́льную Христа́ ра́ди стяжа́в,/ от всех жите́йских свобо́ден пребы́л еси́,/ доброде́тельми же обогати́лся еси́./ Те́мже и нас, обнища́вших до́брыми де́лы, моли́твами твои́ми обогати́/ и венце́в сла́вы сподо́би.

Богоро́дичен: Ди́вная вели́чия на Тебе́ Госпо́дь сотвори́, Де́во Чи́стая./ Сего́ ра́ди пое́м Твое́ рождество́ и сла́вим из Тебе́ рожде́ннаго я́ко Бо́га же и Челове́ка,/ Его́же моли́ приле́жно с преподо́бными отцы́ и со все́ми святы́ми/ поми́ловати ду́ши на́ша.

Седа́лен, глас 8:

Красоты́ мирски́я измла́да, преподо́бне, возненави́дев,/ еди́наго Христа́ от се́рдца возлюби́л еси́/ и, Тому́ все́ю душе́ю прилепи́вся,/ я́ко безпло́тен, на земли́ пожи́л еси́ с пло́тию,/ сла́ву же мимотеку́щую и бога́тство нивочто́же вмени́в,/ Небе́сное бога́тство восприя́л еси́ и сла́ву ве́чную./ Те́мже и ублажа́ем свято́е твое́ успе́ние и, сие́ торжеству́юще, вопие́м ти:/ Богоблаже́нне о́тче наш Паи́сие, моли́ Христа́ Бо́га/ согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́/ и я́ко Младе́нца дои́ши Зижди́теля и Го́спода./ Те́мже, А́нгельский и челове́ческий род, досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Пе́снь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ сла́ва, Христе́, си́ле Твое́й.

В кре́пости свое́й враг преве́тхий,/ твоея́ души́ не моги́й кре́пости поколеба́ти,/ ухищря́ет любоиме́нием тебе́ улови́ти:/ а́бие явля́ется христолюби́вому кня́зю во о́бразе А́нгела прелука́вый,/ мно́жество зла́та и сребра́ тебе́ да́ти повелева́яй./ Ты же, сие́ отри́нув, врага́ посрами́л еси́, при́сно поя́:/ сла́ва, Христе́, си́ле Твое́й.

И я́ко побежде́н бы́сть враг/ и ктому́ уже́ не моги́й прибли́житися к тебе́,/ оба́че, я́ко лев сый, рыка́яй и иски́й кого́ поглоти́ти,/ похи́ти два твоя́ ученика́ во иуде́йское нече́стие:/ о́ваго у́бо, я́ко про́ста, сло́вом улови́:/ еще́ не приити́ Месси́и – Христу́;/ о́ваго же, увы́, и обре́затися, и единому́дрствовати со иуде́и сотвори́/ скверна́выя ра́ди жены́, неве́дущия пе́ти:/ сла́ва, Христе́, си́ле Твое́й.

Го́спода Бо́га милосе́рдию подража́я, преподо́бне,/ прише́дшаго в мир гре́шныя спасти́,/ приле́жно взыска́вый а́гнцы твоя́/ и обреты́й, а́бие исхи́тил еси́ я от па́губнаго во́лка и Христо́ву ста́ду сочета́л еси́,/ всем подая́ о́браз покая́ния и всем повелева́я при́сно пе́ти:/ сла́ва, Христе́, си́ле Твое́й.

Богоро́дичен: Господороди́тельнице, Госпоже́ Цари́це,/ Блага́го Бо́га ро́ждши и Сама́ Блага́я су́щи,/ Ты мне предста́ни в час сме́ртный,/ и изба́ви мя от руки́ бесо́вския,/ и от го́рьких мыта́рств, и вся́каго ина́го муче́ния/ и сподо́би мя одесну́ю ста́ти Сы́на Твоего́,/ со все́ми избра́нными Его́, в Де́нь Су́дный,/ моли́твами Твои́ми, Чи́стая.

Пе́снь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Име́я наставля́ющую тя Бо́жия Ду́ха си́лу,/ в непроходи́мой пусты́ни живы́й,/ скача́, я́коже еле́нь, по гора́м, жела́л еси́, о́тче, ра́йския добро́ты./ Сего́ ра́ди не дал еси́ сна твои́ма очи́ма, блаже́нне Паи́сие, ни ве́ждома дрема́ния,/ до́ндеже сподо́бился еси́ пра́ведных селе́ния,/ е́же угото́ва Бог лю́бящим Его́.

Посто́м предочи́стився и ума́ чистото́ю просвети́вся,/ восхище́н был еси́ в рай,/ узре́л еси́ селе́ния пра́ведных и оби́тели святы́х/ и пи́щи Небе́сный вкуси́л еси́./ Те́мже и нам, сла́вящим па́мять твою́, прича́стником бы́ти о́ныя моли́ся.

А́нгелов мно́жество ви́дено бы́сть,/ сохраня́ющих ученики́ твоя́, и́же, тобо́ю наставля́еми,/ а́нгельское на земли́ подража́ху житие́ и попира́ху си́лу вра́жию,/ с ни́миже ны́не почива́я во Ца́рствии Небе́снем, блаже́нне Паи́сие,/ моли́ся Христу́ спасти́ся душа́м на́шим.

Богоро́дичен: А́нгелов святе́йшая вои́стинну яви́лася еси́, Влады́чице,/ я́ко на Него́же они́ зре́ти не мо́гут,/ Ты Сего́ родила́ еси́ и я́ко Младе́нца на руку́ Твое́ю носи́ла еси́./ Те́мже моли́ Его́, я́ко Сы́на Твоего́ и Бо́га на́шего,/ о чту́щих Тя при́сно, с Паи́сием блаже́нным.

Пе́снь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

И́же во отце́х вели́кий Ефре́м,/ слы́шав Боже́ственный свы́ше глас, пове́дающ пресла́вная о тебе́, блаже́нне,/ а́бие вожделе́ ви́дети тя./ Ско́ро у́бо потече́ ко Еги́пту/ и, я́ко прии́де и обре́те тя,/ вельми́ удиви́ся Боже́ственней твое́й све́тлости и Ду́ха благода́ти,/ те́мже благодаря́ще и сла́вяще Бо́га,/ ку́пно же и моля́шеся с тобо́ю о душа́х на́ших.

Смире́н, незло́бив, прост, кро́ток и молчали́в был еси́, о́тче,/ па́че челове́ка вои́стинну./ Сего́ ра́ди Кро́ткому Па́стырю – Христу́, я́ко овча́ незло́биво, усе́рдно после́довал, еси́/ и, я́ко А́нгел, Тому́ послужи́в,/ ны́не со А́нгелы весели́шися на земли́ кро́тких./ Помина́й нас, чту́щих тя, Паи́сие блаже́нне.

Иису́са сла́дкаго жела́я при́сно насыща́тися кра́сныя добро́ты,/ в гора́х и в пеще́рах заключи́лся еси́,/ во мно́гих по́двизех и нищете́ живы́й./ Прии́де тебе́ Госпо́дь, и ума́лена тя зело́ возвели́чи,/ и, обнища́вша во́льне Его́ ра́ди,/ вельми́ тя обогати́ Небе́сным Ца́рством, иде́же ны́не с Ним ца́рствуеши./ Моли́ся приле́жно и нам в Ца́рствие Небе́сное вни́ти.

Богоро́дичен: Иису́са Сла́дкаго ро́ждшая, Отрокови́це Богороди́тельнице,/ Иису́са Всеще́драго и Человеколюби́ваго,/ Иису́са еди́наго Благоутро́бнаго,/ Того́ моли́, Влады́чице ми́ра, с по́стники и преподо́бными,/ поми́ловати ду́ши на́ша.

Конда́к, глас 8:

От мла́да зва́нию Го́спода твоего́ после́довал еси́ усе́рдно, блаже́нне,/ вся, я́же в ми́ре кра́сная, Его́ ра́ди оста́вив./ Крест твой на ра́мена взем,/ всели́лся еси́ в пусты́ню,/ и, та́мо а́нгельски пожи́в,/ те́ло твое́ посто́м и моли́твами изнури́л еси́,/ и мно́гим пу́ть был еси́ ко спасе́нию,/ вся возводя́ к Боже́ственней высоте́,/ Паи́сие преподо́бне,/ отце́в и по́стников тве́рдое основа́ние.

И́кос:

Прииди́те, Богоизбра́ннии мона́шествующих собо́ри,/ похва́лим ны́не и пе́сньми почти́м/ свяще́нную па́мять пречу́днаго отца́, блаже́ннаго Паи́сия, взыва́юще ему́ такова́я:/ ра́дуйся, боголюби́вых роди́телей рожде́ние;/ ра́дуйся, от са́мых пеле́н свяще́нное Бо́гу приноше́ние./ Ра́дуйся, я́ко ми́ра сего́ вся кра́сная оста́вил еси́;/ ра́дуйся, я́ко к жесто́кому житию́ себе́ напра́вил еси́./ Ра́дуйся, я́ко вся уме́ты бы́ти вмени́л еси́;/ ра́дуйся, я́ко еди́наго то́кмо Христа́ возлюби́л еси́./ Ра́дуйся, вся се́ти вра́жия до конца́ разруши́вый;/ ра́дуйся, терпе́нием по́двигов твои́х А́нгелы удиви́вый./ Ра́дуйся, я́ко те́ло твое́ посто́м и бде́нием удручи́л еси́;/ ра́дуйся, я́ко ду́шу твою́ моли́твою и ума́ чистото́ю просвети́л еси́./ Ра́дуйся, безмо́лвия и пусты́ни люби́телю;/ ра́дуйся, по́стников и мона́хов Богому́дрый учи́телю./ Ра́дуйся, Паи́сие преподо́бне, отце́в и по́стников тве́рдое основа́ние.

Пе́снь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Язы́к челове́ч не мо́жет изрещи́ по́двиги твоя́, блаже́нне,/ па́че бо естества́ подвиза́лся еси́,/ мно́гажды и надо́лзе без пи́щи пребыва́я./ Сего́ ра́ди, я́ко вели́кое со́лнце, просия́л еси́ во вся ми́ра концы́,/ и ны́не со А́нгелы лику́я на Небесе́х,/ помина́й нас, чту́щих пречестну́ю па́мять твою́.

Вели́к по́стник вои́стинну показа́лся еси́, преподо́бне:/ а́лчбою бо и жа́ждою томи́л еси́ пло́ть твою́,/ жела́я наслади́тися Небе́снаго Хле́ба – Христа́,/ Его́же ны́не, о́тче Паи́сие, насыща́яся,/ и нам прича́стником бы́ти О́наго моли́ся.

Еди́ницу Трисвяту́ю песносло́вил еси́,/ Отца́, и Сы́на, и Ду́ха Всесвята́го, Тро́ицу Неразде́льную,/ от Нея́же де́йство чуде́с прия́л еси́,/ е́же исцеля́ти неду́ги разли́чныя и прогоня́ти ду́хи лука́вые,/ те́мже па́мять твою́ почита́ем, досточу́дне.

Богоро́дичен: Еди́наго от Тро́ицы Христа́ родила́ еси́ нам, Всесвята́я Де́во Богороди́тельнице,/ и Того́ млеко́м пита́ла еси́, всем пи́щу даю́щаго,/ и на руку́ Твое́ю носи́ла еси́, вся нося́щаго,/ и на святы́х и преподо́бных почива́ющаго,/ и вся Тебе́ ра́ди, Чи́стая, освяща́ющаго.

Пе́снь 8

Ирмо́с: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Лю́ди, неве́дущия Святы́я Тро́ицы,/ науча́емы же от не́коего ста́рца почита́ти дво́ицу,/ ты, блаже́нне, воображе́нием ко́шниц с тремя́ ушесы́/ научи́л еси́ та́инству Святы́я Тро́ицы,/ сказу́я и я́сно пропове́дуя всем,/ я́ко Еди́н Бог в Трие́х Ли́цах неразде́льно сла́вится во ве́ки.

И́же мона́хом был еси́ наста́вник/ и па́стырь овца́м на па́жити Бо́жия сло́ва,/ сугу́бу благода́ть от Го́спода прия́л еси́, Паи́сие,/ и венцы́ нетле́нны и ве́чную ра́дость;/ и ны́не лику́я, в весе́лии пое́ши Го́спода во вся ве́ки.

Кто изрече́т по́двиги твоя́, о всеблаже́нне Паи́сие!/ Ты бо, безпло́тен, пожи́л еси́ на земли́/ и ны́не преше́л еси́ к Небе́сным во гла́се ра́дования, к Трисо́лнечному Све́ту,/ иде́же во Отце́ зри́ши Сы́на и Ду́ха Всесвята́го, Тро́ицу во Еди́нице,/ Е́йже покланя́ющеся, вси пое́м во вся ве́ки.

Богоро́дичен: Кто изрече́т на Тебе́ бы́вшее стра́шное та́инство, о Богороди́тельнице!/ Ты бо еди́на яви́лася еси́ во всех ро́дех Де́ва и Ма́ти,/ Бо́га Сло́ва ро́ждши, де́вствуеши па́ки./ Те́мже вси преподо́бнии к Тебе́ прибега́ют/ и, де́вство держа́ние, от Тебе́, Влады́чице, усыновле́ния ча́ют.

Пе́снь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

А́нгельскому житию́ поревнова́л еси́, всеблаже́нне:/ равноа́нгельно в Нитри́йстей горе́ пожи́л еси́/ и Святе́й Тро́ице в коне́ц угоди́л еси́./ Тем и равноа́нгельну по́честь от Бо́га сподо́бился еси́ прия́ти:/ ны́не со апо́столы, му́ченики, преподо́бными и со все́ми пра́ведными лику́я,/ помина́й нас, чту́щих пречестну́ю па́мять твою́.

Го́ры и хо́лмы да взыгра́ют,/ и все мно́жество мона́шествующих да воспле́щет дне́сь,/ я́ко наста́ нам светоно́сный твой пра́здник, всеблаже́нне Паи́сие,/ испо́лнь ра́дости и весе́лия духо́внаго,/ испо́лнь благоуха́ния и просвеще́ния./ И ны́не, иму́ще тя поще́ния пра́вило и законополо́жника, ра́дуемся.

От раб недосто́йных приими́ хвалу́, преподо́бне Паи́сие,/ и жития́ сего́ непостоя́нную пучи́ну да́руй нам немяте́жно прейти́,/ и моли́тву о нас к Бо́гу сотвори́,/ че́стно почита́ющих твою́ па́мять,/ и одержа́щих и жду́щих нас зол изба́ви,/ да во ве́ки тебе́ вели́чием.

Богоро́дичен: О́крест Тебе́ предстоя́т преподо́бных ли́ки, Пресвята́я Богоро́дице,/ я́ко сы́нове дне, от Тебе́, и́стинныя Ма́тере Све́та, усыновле́ни/ и, Твое́ю сла́вою крася́щеся, хва́лят Тя немо́лчными гла́сы./ И́хже моли́твами и уго́дника Твоего́ Паи́сия, поми́луй нас, недосто́йных раб Твои́х,/ и от всех злых свободи́, и Ца́рствия Небе́снаго сподо́би,/ да во ве́ки Тебе́ велича́ем, Чи́стая.

Свети́лен:

От Нитри́йския пусты́ни возсия́в, вселе́нную просвеща́еши,/ мона́хов мно́жества ра́дуются о твое́й па́мяти/ и Еги́пет торжеству́ет, о Паи́сие Богоно́се,/ не преста́й у́бо моли́тися о душа́х на́ших.

Сла́ва, и ны́не, Богоро́дичен:

О́блак ле́гкий еси́, Чи́стая,/ на не́мже седя́, прии́де во Еги́пет Вседержи́тель Госпо́дь/ и свети́льники преподо́бныя соде́ла,/ с ни́миже моли́ся, Влады́чице, спасти́ся нам.

На хвали́тех стихи́ры на 4, глас 8:

Прииди́те, праздниколю́бцы и по́стников сосло́вие,/ дне́сь похва́льными пе́сньми увенча́им Богоно́снаго Паи́сия,/ и́стиннаго по́стника Христо́ва,/ мона́шествующих звезду́, па́стырей похвалу́,/ наста́вника заблу́ждших,/ гре́шников вели́кое прибе́жище, и к Бо́гу спору́чника,/ и всех скорбя́щих Боже́ственное утеше́ние,/ к нему́же ве́рою возопии́м:/ о всеблаже́нне, преподо́бных верхо́вниче и по́стников похвало́!/ Ны́не, со А́нгелы лику́я,/ Христа́ Бо́га моли́/ поми́ловати и спасти́ ду́ши на́ша.

Что тя нарече́м, Паи́сие досточу́дне?/ А́нгела ли, во пло́ти су́ща,/ я́ко а́нгельски на земли́ пожи́л еси́;/ по́стника, я́ко се́дмьдесят дней без пи́щи пребы́л еси́;/ страда́льца, я́ко па́че естества́ подвиза́лся еси́;/ апо́стола, я́ко мно́жество мона́шествующих Христу́ приве́л еси́;/ Богови́дца, я́ко Сама́го Го́спода я́ве ви́дел еси́;/ граждани́на Небе́снаго, я́ко, еще́ в те́ле живы́й,/ на Небеса́ восхище́н был еси́ в рай./ Мно́га твоя́ имена́ и бо́льшая дарова́ния,/ моли́ спасти́ся душа́м на́шим.

Ка́ко тя ублажи́м, Паи́сие преподо́бне,/ или́ ки́я пе́сни тебе́ принесе́м?/ Я́ко от Самаго́ Христа́ ублажи́лся еси́,/ разу́мно же и красно́ всех ве́рных научи́л еси́,/ я́ко Па́вел, вопия́:/ ны́не вре́мя благоприя́тное к по́двигом духо́вным,/ ны́не де́нь спасе́ния,/ да никто́же яви́тся лени́в,/ да никто́же яви́тся лука́в,/ да не вне пребу́дет черто́га Небе́снаго./ Но, о всеблаже́нне о́тче,/ пре́жде да́же не затворя́тся две́ри о́наго,/ моли́ся приле́жно Христу́,/ е́же всем нам вни́ти покая́нием в Ца́рство Небе́сное.

Сла́ва, глас 8:

Ра́дуйся и весели́ся, Еги́пте ве́рный,/ в тебе́ бо процвете́ преподо́бных мно́жество./ Красу́йся и лику́й, Це́рковь Бо́жия,/ уясни́вшися свяще́нными по́двиги Паи́сия ди́внаго./ Сей у́бо челове́к естество́м,/ А́нгел же житие́м бы́сть,/ имя́ше у́бо по естеству́,/ па́че же естества́ подвиза́ся./ Тому́, вси ве́рнии, припа́дающе,/ про́сим умоли́ти Христа́,/ е́же спасти́ ду́ши на́ша.

И ны́не, глас то́йже:

И́же на Херуви́мех носи́мый/ и пева́емый от Серафи́м,/ дне́сь в Боже́ственное святи́лище по зако́ну прино́сим,/ на ста́рческих, я́ко на престо́ле, седи́т рука́х/ и от Ио́сифа прие́млет да́ры боголе́пно,/ я́ко супру́г го́рличищ,/ нескве́рную Це́рковь и от язы́к новоизбра́нныя лю́ди,/ голуби́на же два птенца́,/ я́ко Нача́льник Ве́тхаго же и Но́ваго./ Е́же к Нему́ обеща́ния Симео́н коне́ц прие́м,/ благословя́ Де́ву Мари́ю Богоро́дицу,/ страсте́й о́бразы, И́же из Нея́, провозгласи́/ и от Него́ проша́ше отпуще́ния, вопия́:/ ны́не отпусти́ мя, Влады́ко,/ я́коже пре́жде возвести́ ми,/ я́ко ви́дех Тя, Первове́чнаго Све́та/ и Спа́са Го́спода христоимени́тым лю́дем.

НА ЛИТУРГИ́И СЛУ́ЖБА ВСЯ ПРЕПОДО́БНИЧЕСКАЯ

Кано́н преподо́бному Паи́сию Вели́кому

Тропа́рь, глас 2:

Боже́ственною любо́вию от ю́ности распала́емь, преподо́бне,/ вся кра́сная, я́же в ми́ре, возненави́де,/ Христа́ еди́наго возлюби́л еси́,/ сего́ ра́ди в, пусты́ню всели́ся,/ иде́же сподо́бися Боже́ственнаго посеще́ния,/ Его́же неудо́бь зре́ти и а́нгельскима очи́ма,/ паде́, поклони́ся./ Вели́кий же Дарода́тель, я́ко Человеколю́бец, рече́ к тебе́:/ не ужаса́йся, возлю́бленный Мой,/ дела́ твоя́ уго́дна Мне,/ се даю́ тебе́ дар:/ о ко́ем-ли́бо гре́шнице помо́лишися,/ отпу́стятся ему́ греси́./ Ты же в чистоте́ се́рдца твоего́ возгоре́ся,/ прие́м во́ду и прикосну́ся Неприкоснове́нному,/ умы́ но́зе Его́/ и, во́ду пив, да́ром чуде́с обогати́ся,/ боля́щия исцеля́ти, бе́сы от челове́к отгоня́ти/ и гре́шники от му́ки моли́твою свое́ю избавля́ти./ О преподо́бне о́тче Паи́сие,/ молю́ тя, да умо́лиши и о мне,/ я́коже тебе́ Бог обетова́,/ и́бо от сих гре́шник пе́рвый аз е́смь,/ да даст ми Госпо́дь вре́мя покая́ния/ и прости́т мое́ согреше́ние,/ я́ко Благи́й и Человеколю́бец,/ да со все́ми и аз воспою́ Ему́: аллилу́ия.

Сла́ва, и ны́не, Богоро́дичен.

Кано́н, глас 6.

Пе́снь 1

Ирмо́с: Помо́щник и Покрови́тель/ бы́сть мне во спасе́ние,/ Сей мой Бог,/ и просла́влю Его́,/ Бог отца́ моего́,/ и вознесу́ Его́,/ сла́вно бо просла́вися.

И́же вся умудря́ющему Бо́гу/ моли́ся, преподо́бне о́тче, о рабе́ свое́м,/ да отве́рзет ми устне́ недосто́йнии/ и дви́гнет ми язы́к недоуме́нный,/ тесноту́ же и худогла́сие, о́тче,/ разве́рзи благода́тною и́же в тебе́ Свята́го Ду́ха/ к пе́нию чуде́с твои́х.

Начну́ у́бо достохва́льное и душеполе́зное житие́ твое́ от младе́нства,/ и́же дре́вле Еги́пет вели́каго во проро́цех произнесе́ Моисе́я,/ и́же к Бо́гу присвое́нием и вели́кими чудесы́ просла́вися,/ та́ко и ны́не втори́цею просла́влен показа́ся Еги́пет/ тебе́ ра́ди, о́тче Паи́сие,/ честны́м и́менем твои́м и мно́гими доброде́тельми обогати́ся,/ е́же дарова́ тебе́ Госпо́дь,/ Его́же моли́, да спасе́т ду́ши на́ша.

В Ца́рство Небе́сное вшед у́зким путе́м и приско́рбным/ по за́поведи Влады́ки своего́ Христа́, преподо́бне о́тче Паи́сие,/ широ́кий и простра́нный пу́ть возненави́дев,/ распростра́ньшийся мрак ума́ моего́ отжени́,/ да возмогу́ ма́лое мое́ моле́ние принести́ в пречестну́ю па́мять твою́.

Богоро́дичен: Дух сокруше́н пода́ждь ми, Блага́я,/ смире́нно се́рдце, уму́ же чистоту́,/ и житию́ исправле́ние, и прегреше́нием оставле́ние.

Пе́снь 3

Ирмо́с: Утверди́, Го́споди,/ на ка́мени за́поведей Твои́х/ подви́гшееся се́рдце мое́,/ я́ко еди́н Свят еси́ и Госпо́дь.

Ка́меню ве́ры – Петру́ апо́столу – уподо́бился еси́,/ распя́тся ми́рови во всей жи́зни свое́й, преподо́бне Паи́сие,/ и но́зе свой невозвра́тно к Небе́сному ше́ствию упра́вил еси́,/ и Го́рняго Иерусали́ма дости́гл еси́,/ со святы́ми предстоя́ Святе́й Тро́ице,/ моли́ о мне еди́наго Блага́го Человеколю́бца.

Благочести́ваго ко́рене пресве́тлая о́трасль,/ тебе́ избра́ Госпо́дь,/ А́нгел рече́ ма́тери твое́й:/ сей Бо́гу уго́ден./ Ты же, от младе́нства крест свой взем,/ невозвра́тным путе́м Тому́ после́дова/ и возраста́ше ле́ты и ра́зумом, ку́пно и благода́тию Бо́жиею./ Моли́ да́ти ми отпуще́ние грехо́в.

О Влады́ко Го́споди, Иису́се Христе́,/ кто не удиви́тся Твоему́ человеколю́бию,/ егда́ прии́де жела́ние преподо́бному/ и́ноческое житие́ получи́ти к де́ланию за́поведей Твои́х,/ Твое́ю благода́тию, я́ко а́гнец непоро́чен, изведе́ся в пусты́ню,/ и дости́же слове́сных ове́ц,/ и введе́ся к па́стырю, блаже́нному Па́мве,/ и облече́ся в и́ноческий о́браз,/ в не́мже утверди́ и мене́, Го́споди,/ моли́твами преподо́бнаго Паи́сия, к де́ланию за́поведей Твои́х.

Богоро́дичен: Лю́тых мя мук, и тьмы́ кроме́шныя, и гее́нны/ Твои́ми моли́твами свободи́, Де́во,/ и́маши бо во́лю и си́лу, Го́спода ро́ждшая, Еди́наго Преблага́го.

Седа́лен, глас 2:

Ду́шу связа́в любо́вию Христо́вою/ и земна́я возненави́дев вся, му́дре,/ водвори́лся еси́, о́тче преподо́бне, в пусты́нях и гора́х,/ разу́мнаго дре́ва вкуси́в, сла́вне,/ а́нгельски просия́л еси́./ Те́мже и мрак проше́д пло́ти своея́,/ тьму́ отгна́л еси́ бесо́в, Паи́сие, и́нокующим пе́рвый,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Ско́рый покро́в, и по́мощь, и ми́лость покажи́ на ра́бе Свое́м, Чи́стая,/ и во́лны укроти́ су́етных помышле́ний,/ и па́дшую мою́ ду́шу возста́ви, Богоро́дице,/ вем бо, вем, я́ко мо́жеши, ели́ко хо́щеши.

Пе́снь 4

Ирмо́с: Услы́ша проро́к/ прише́ствие Твое́, Го́споди, и убоя́ся,/ я́ко хо́щеши от Де́вы роди́тися/ и челове́ком яви́тися, и глаго́лаше:/ услы́шах слух Твой и убоя́хся,/ сла́ва си́ле Твое́й, Го́споди.

Законострада́льческое житие́ от мя́гких ногте́й восприе́м, Богому́дре Паи́сие,/ да́же до конца́ пребы́л еси́, я́ко Боже́ственен до́блественник,/ вене́ц прия́л еси́ побе́ды от всех Ца́рствующаго,/ моли́твами свои́ми избавля́ти от му́ки гре́шники,/ от них же пе́рвый есмь аз, не забу́ди мене́.

Иму́ще тя моли́твенника кре́пка, блаже́нне Паи́сие,/ и обе́щника  печа́льным,/ предста́теля, и побо́рника, и хода́тая благоче́стна,/ от вся́ких спаса́емся бед, напа́стей и обстоя́ний.

Ве́лию суде́б бе́здну име́яй, Той тебе́ рече́:/ се бо даю́ ти дар,/ да вся, е́же про́сиши от Отца́ Моего́ во И́мя Мое́, да́стся тебе́,/ о ко́ем-ли́бо гре́шнице помо́лишися, оста́вятся греси́ того́;/ сего́ ра́ди припа́даю тебе́, о́тче Паи́сие, име́я бе́здну согреше́ний,/ да отпу́стит твои́ми моли́твами, и́же тебе́ обетова́,/ я́ко Благ и Человеколю́бец.

Богоро́дичен: Глаго́л провеща́й,/ егда́ пра́во и́мам суди́тися, Богороди́тельнице, к Сы́ну Твоему́, Пренепоро́чная,/ да обря́щу Тя тогда́ прибе́жище и заступле́ние,/ мук всех избавля́ющи.

Пе́снь 5

Ирмо́с: От но́щи у́тренююща,/ Человеколю́бче,/ просвети́, молю́ся,/ и наста́ви и мене́/ на повеле́ния Твоя́,/ и научи́ мя, Спа́се,/ твори́ти во́лю Твою́.

Посто́м удруча́я те́ло свое́, о́тче Паи́сие,/ иногда́ по причаще́нии Те́ла и Кро́ви Христо́вы,/ я́ко А́нгел, се́дмьдесять дней без пи́щи теле́сныя пребы́л еси́,/ Боже́ственную держа́ву неизрече́нную име́я/ и возмо́г в себе́ живо́тную содержа́ти си́лу благода́тию,/ па́че пи́щнаго укрепле́ния,/ сла́ва держа́ве Твое́й, Го́споди.

Я́ко Иоа́нн Крести́тель, у́зким и приско́рбным путе́м ходи́ти производи́л еси́,/ но той на Иорда́не, узре́в Зижди́теля своего́,/ устраши́ся и вопия́ше:/ не сме́ю приступи́ти, се́но, Огню́;/ ты же, о́тче Паи́сие,/ в пусты́ни иногда́ я́вльшагося Го́спода/ не моги́й пречи́стаго лица́ Его́ зре́ти,/ паде́, тре́петом одержи́м./ Он же ти рече́:/ не устраша́йся, сию́ пусты́ню напо́лню спо́стники тебе́./ С ни́миже мо́лим тя, о́тче:/ не забу́ди нас, моли́твенник твои́х, поми́лованным бы́ти.

Аз бо в нача́ле моя́ пред Тобо́ю зрю согреше́ния/ и о мои́х беззако́ниих молю́ Твое́ милосе́рдие,/ да прости́ши и покры́еши благоутро́бием Твои́м мно́жество грехо́в мои́х/ и да́ждь ми про́чее жи́зни сея́ вре́мя безгре́шно проводи́ти,/ да, удо́бь на спасе́ния стезю́ поте́к,/ безпреткнове́нно к до́брому концу́ дости́гну Твое́ю по́мощию,/ кроме́ бо Твоея́ по́мощи и наставле́ния ничто́же соверши́ти,/ и ми́лость у тебе́ получи́ти кто мо́жет.

Богоро́дичен: Ра́бское приношу́ Ти моле́ние, неразу́мный аз,/ и к Твоему́ прибега́ю благоутро́бному милосе́рдию,/ не отврати́ мене́, Чи́стая, посра́млена.

Пе́снь 6

Ирмо́с: Возопи́х всем се́рдцем мои́м/ к Ще́дрому Бо́гу,/ и услы́ша мя/ от а́да преиспо́дняго/ и возведе́/ от тли живо́т мой.

Безду́шная тва́рь, Иорда́н, своего́ Творца́ устыде́ся, вопия́ше:/ не могу́ Безгре́шнаго омы́ти./ Святы́й же ви́де Го́спода,/ прие́м во́ду, прикосну́ся Неприкоснове́нному,/ умы́ но́зе Его́ и, пив во́ду,/ прия́ дар цели́ти неду́ги и прогони́ти от челове́к бе́сы,/ сего́ ра́ди и мы припа́даем тебе́, о́тче:/ моли́твами твои́ми поми́луй нас от вся́ких бесо́вских наведе́ний.

По сло́ву Го́спода на́шего Иису́са Христа́/ обрето́хом тя, о́тче Паи́сие, вели́кое прибе́жище, и засту́пника,/ и те́пла моли́твенника о гресе́х на́ших,/ я́коже пе́рвее не отве́рже и́нока преста́вльшася и христиа́нства отчужди́вшася,/ и во глубину́ а́дову па́губным безве́рием низве́дся,/ и, егда́ ощути́вся, прите́кша к тебе́,/ да умо́лиши Всеми́лостиваго./ Ще́дрый же Госпо́дь яви́ся тебе́ и глаго́ла:/ уго́дниче Мой, добро́ е́сть Мое́й любви́ подо́бяся, пече́шися о гре́шных,/ изволя́яй му́ки прия́ти за их избавле́ние.

Принесе́ся моли́тва твоя́ и сле́зы к Бо́гу,/ я́ко благово́нный фимиа́м и же́ртва непоро́чна и благоприя́тна,/ и мене́ не забу́ди хода́тайством твои́м ко Пресвяте́й Богоро́дице,/ сле́зы умиле́ния да́си ми,/ омы́й грехо́в мои́х бе́здну,/ изба́ви мя от сме́ртныя глубины́,/ и ненаде́ющимся пода́ждь ве́лию ми́лость,/ и прости́ им согреше́ния.

Ве́сь недоуме́нием одержи́м е́смь,/ егда́ прииму́ во уме́ той час стра́шный испыта́ния Судии́ и Бо́га,/ и пла́чуся, и се́тую, и рыда́ю, помина́я бе́здну зол мои́х./ Те́мже спаси́, Человеколю́бче, моли́твами Твоего́ уго́дника преподо́бнаго Паи́сия/ и изба́ви мя му́ки, я́ко Благоутро́бен.

Богоро́дичен: От се́рдца стена́ния приноша́ю Ти, Пренепоро́чная,/ Твое́ прося́ благопребы́тное заступле́ние./ Поми́луй всестра́стную мою́ ду́шу,/ умилосе́рдися, Ма́ти Многоми́лостиваго Бо́га,/ изба́вити мя Суда́ и е́зера о́гненнаго.

Конда́к, глас 2:

Жите́йских молв оста́вль,/ безмо́лвное житие́ возлюби́л еси́,/ Крести́телю подо́бяся все́ми о́бразы,/ с ни́мже тя почита́ем,/ о́тче отце́в Паи́сие.

И́кос:

Христо́в глас услы́шав, ше́ствовал еси́ во след Того́ за́поведей,/ наг жития́ быв,/ отве́рг попече́ния, и вся стяжа́ния, и име́ния,/ и бра́тии свои́х, и любве́ ма́тере, Богоно́се Паи́сие,/ еди́н в пусты́нях Бо́гови бесе́дуя ра́зумом,/ дарова́ния прия́л еси́,/ е́же ми посли́, в пе́снех пою́щему, отце́в нача́льниче Паи́сие.

Пе́снь 7

Ирмо́с: Согреши́хом, беззако́нновахом,/ непра́вдовахом пред Тобо́ю,/ ниже́ соблюдо́хом,/ ниже́ сотвори́хом,/ я́коже запове́дал еси́ нам,/ но не преда́ждь нас до конца́,/ отце́в Бо́же.

Мно́гих грехо́в испо́лнен аз/ и твоя́ моли́тва, я́ко кади́ло благово́нно, испра́вися, о́тче,/ бе́здну грехо́в мои́х потреби́,/ и буя́ющее мо́ре зла́го жития́ иссуши́,/ и напое́ние гне́вное отжени́,/ и целому́дренный ум моли́твами твои́ми утверди́, о́тче Паи́сие.

Наста́вника тя и моли́твенника те́пла иму́ще и ско́раго помо́щника,/ я́ко сте́ну тве́рду, и забра́ло недви́жимо, и воево́ду кре́пка и непобеди́ма, мо́лим тя:/ не забу́ди моли́твенник твои́х,/ избавля́я от вся́кия печа́ли и наве́т вра́жиих.

О, чу́до ве́лие,/ во еди́н от дней седя́щу ти, о́тче Паи́сие, в пеще́ре,/ бы́сть ти глас, глаго́ляй:/ мир тебе́, возлю́бленному Моему́ уго́днику./ Ты же, возста́в со стра́хом и тре́петом одержи́м,/ паде́, поклони́ся и рече́:/ се раб Твой, Го́споди./ Сего́ ра́ди мо́лим тя:/ моли́ Человеколю́бца, да спасе́т ду́ши на́ша.

Да́ждь ми, Христе́, ра́зум и терпе́ние,/ е́же не осужда́ти согреша́ющих с киче́нием фарисе́йским,/ но, я́ко мытаре́во покая́ние, приими́,/ и, я́ко блу́днаго сы́на, Бо́же, ве́чери Твоея́ до́стойна мя яви́,/ моли́твами преподо́бнаго Паи́сия,/ и грехо́в проще́ние ми да́руй.

Богоро́дичен: Возни́кни, о стра́стная душе́, возста́ни, окая́нная,/ бий из глубины́ в пе́рси/ и испусти́ слез исто́чники,/ да тя поми́лует, окая́нную, Милосе́рдая Ма́ти Христа́ Бо́га.

Пе́снь 8

Ирмо́с: Его́же во́инства Небе́сная сла́вят/ и трепе́щут Херуви́ми и Серафи́ми,/ вся́ко дыха́ние и тва́рь,/ по́йте, благослови́те/ и превозноси́те во вся ве́ки.

Благода́рно приноси́мое тебе́ пе́ние сие́ не пре́зри, о́тче Паи́сие,/ но па́че приими́ и ра́дости духо́вныя испо́лни,/ да без закосне́ния поклоню́ся твоему́ о́бразу,/ иде́же е́сть напи́сан, исцеле́ния всем подава́ющ.

Всепреподо́бному житию́ поревнова́в Богоуго́дных оте́ц,/ и́же от ве́ка пожи́вших, о́тче Паи́сие, во смире́нии и по́стничестве Христа́ ра́ди,/ всю жи́знь свою́ му́ченически сконча́л еси́,/ и от бесо́в нападе́ния мно́го претерпе́л еси́, и сих победи́в./ Сего́ ра́ди молю́ тя, о́тче:/ бу́йство, я́рость и небреже́ние моли́твами твои́ми отри́ни от мене́.

Влады́ко Христе́ Бо́же Всеще́дрый,/ и́миже ве́си судьба́ми,/ да́ждь ми ненави́дети дея́ния лука́ваго,/ Ты бо еси́ Бог наш, реки́й:/ проси́те, и прии́мете./ Да́ждь любо́вь от всея́ души́ моея́,/ моли́твами преподо́бнаго отца́ Паи́сия, твори́ти во́лю Твою́ спаси́тельную.

Молю́тися: на мне, гре́шнем, долготерпи́, Влады́ко,/ и не посецы́ мене́, я́ко непло́дное дре́во, посече́нием сме́ртным, во о́гнь отсыла́я,/ но плодоно́сна мя сотвори́,/ моли́твами преподо́бнаго умоле́н быва́я,/ вре́мя покая́ния ми да́ждь, я́ко Человеколю́бец.

Богоро́дичен: Струи́ низпосли́ слез и стена́ния от души́ сотвори́ ми, Чи́стая,/ внегда́ припа́дати Твоему́ покро́ву,/ я́ко да обря́щу разреше́ние грехо́в мои́х Твое́ю ми́лостию.

Пе́снь 9

Ирмо́с: Е́же ра́дуйся от А́нгела прии́мшая/ и ро́ждшая Созда́теля Своего́,/ Де́во, спаси́ Тя велича́ющия.

Ско́рый помо́щник был еси́, преподо́бне, еще́ в жи́зни сей,/ иногда́ у преподо́бнаго ста́рца ученику́ в преслуша́нии уме́ршу/ и веде́ну во ад,/ он же припа́даше, прося́,/ да умо́лиши Всеще́драго о ученице́ его́./ Ты же, я́ко ско́рый послу́шник и любве́ храни́тель,/ наде́жду возложи́ ко Всеще́дрому Бо́гу,/ простре́ся на моли́тву,/ и Той, Многоми́лостив и во обе́тех нело́жный,/ во́лю к боя́щимся Его́ сотвори́/ и, моли́тву твою́ услы́шав, изведе́ ду́шу от а́да./ Того́ ра́ди и аз, недосто́йный, припа́дая, молю́ тя:/ о́тче преподо́бне, моли́твами твои́ми изба́ви мя му́ки и огня́ негаси́маго.

Бы́вша мя бесо́м смех, челове́ком уничиже́ние,/ пра́ведным рыда́ние, А́нгелом плач,/ оскверне́ние возду́ху, и земли́, и вода́м,/ те́ло окаля́х и ум оскверни́х па́че сло́ва дея́ньми,/ аз враг Бо́гу бых./ Увы́ мне, согреши́х!/ Моли́твами преподо́бнаго Паи́сия прости́ мя.

Я́ко впады́й в разбо́йники и уя́звен,/ так и аз впадо́х от мно́гих грехо́в,/ и уя́звена ми е́сть душа́,/ к кому́ прибе́гну пови́нный аз,/ то́кмо к Тебе́, Милосе́рдому душа́м Врачу́,/ приими́ моле́бника те́пла преподо́бнаго Паи́сия/ и моли́твами его́ изле́й на мя вели́кую Твою́ ми́лость.

Богоро́дичен: Прегреше́ния моя́ умно́жишася,/ преще́нию и Суду́ досто́ин, Чи́стая,/ припа́дая, зову́ Ти:/ пре́жде конца́ пода́ждь ми очище́ние, и умиле́ние, и нра́вом исправле́ние.

 

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 4,

Подо́бен: Зва́нный свы́ше:

Егда́ манове́нием Бо́жиим распали́вся, Богому́дре,/ тогда́ во след Бо́га ду́хом возревнова́л еси́,/ земны́х всех возгнуша́вся,/ Небе́сных благ возжела́л еси́,/ всего́ себе́ Бо́гови предложи́,/ Его́же ра́ди пресе́льник бы́сть от до́му своего́ и оте́чества,/ я́коже вторы́й Авраа́м./ С ни́мже Христа́ Бо́га моли́,/ Его́же и возлюби́,/ спасти́ и просвети́ти ду́ши на́ша.

Егда́ раче́ние Боже́ственное/ на́йде на тя, пребога́те,/ тогда́ богоразсу́дное и благомы́сленное/ от мирски́х к Бо́гу возведе́/ и к су́щим ми́ра я́ко к не су́щим не приобщи́ себе́,/ но, я́ко уме́ты, вся попра́в,/ и все свое́ тща́ние предложи́/ домо́м Бо́жиим в созида́ние и убо́гим в пропита́ние,/ расточи́ име́ние свое́ до́бре,/ тем Ца́рствию Небе́сному насле́дник бы́сть,/ с Безпло́тными водворя́яся,/ Христу́ Бо́гу моли́ся/ спасти́ и просвети́ти ду́ши на́ша.

Егда́ виде́ние Бо́жие осия́ тебе́, блаже́нне,/ тогда́ услы́ша глас Боже́ственный,/ показу́ющ ти богоугото́ванное ме́сто,/ на не́мже оби́тель воздви́же/ возлю́бленнаго ученика́ Бо́жия Сло́ва,/ сели́тву и́ноком сотвори́л еси́,/ в не́йже облече́ся в присножела́емое ти ангелоле́пное подо́бие,/ иде́же сосу́д Ду́ху Свято́му обре́теся/ чи́стаго ра́ди жития́ твоего́,/ Его́же де́йствием све́тло укра́шен,/ о нас моли́ся,/ спасти́ и просвети́ти ду́ши на́ша.

И́ны стихи́ры, глас 2.

Подо́бен: Ки́ими похва́льными венцы́:

Ки́ими духо́вными пе́сньми/ воспое́м преподо́бнаго Варлаа́ма?/ И́же, за любо́вь нас ра́ди Распе́ншаго Себе́ на Кресте́,/ устрани́в себе́ от ми́ра,/ ду́шу свою́ кресту́ пригвозди́,/ плотска́я мудрова́ния обузда́л еси́,/ чи́стое зерца́ло бы́сть,/ тем свети́льник пресве́тел вселе́нней дарова́ся,/ освяще́н Ду́хом Святы́м,/ Ему́же, о́тче, за ны моли́ся,/ дарова́ти нам мир и ве́лию ми́лость.

Ки́ими духо́вными устна́ми/ восхва́лим духо́внаго сего́ отца́?/ Той бо в тле́нней пло́ти/ Безпло́тных житию́ подража́я,/ нетле́нную жи́знь прия́т,/ тем нетле́нен обре́теся по преставле́нии мно́гих лет,/ духо́вными исцеле́нии одари́ ве́рою пою́щих того́,/ о ни́хже Христа́ мо́лит,/ пода́ти мир ми́рови и ве́лию ми́лость.

Ка́я светоно́сная пе́ния/ принесе́м блаже́нному Варлаа́му?/ Де́лателю виногра́да Христо́ва,/ мы́сленнаго рая́ гро́зду пресла́дкому,/ собесе́днику А́нгелом,/ бесо́м прогони́телю,/ ревни́телю святы́м и пра́ведным,/ и́ноком наста́внику, си́рым пита́телю,/ исто́чнику чуде́с неоскудева́емому/ и моли́твеннику о душа́х на́ших.

Сла́ва, глас 8:

Преподо́бне о́тче,/ ты земну́ю сла́ву я́ко тле́нну оста́вль,/ оте́чество и благоро́дие нивочто́же вмени́в,/ еди́наго же Христа́ от души́ возлюби́л еси́,/ Его́же ра́ди в да́льних и чужди́х страна́х всели́ся,/ усе́рдно Тому́ после́довал еси́,/ те́мже сосу́д Свято́му Ду́ху бы́сть,/ к Нему́ же дерзнове́ние име́я,/ о́тче Варлаа́ме,/ моли́ Христа́ Бо́га за чту́щия тя лю́ди,/ пода́ти мир ми́рови/ и душа́м на́шим ве́лию ми́лость.

И ны́не, Богоро́дичен: Ца́рь Небе́сный:

Вход. Проки́мен дне. И чте́ния 3 преподо́бническая (зри 28 июня).

На лити́и стихи́ры, глас 7:

Прииди́те, празднолюбе́знии лю́дие,/ соста́вльше лик, дави́дскими пе́сньми воспое́м Христа́, глаго́люще:/ ди́вен в сла́ве, творя́й чудеса́,/ удивля́яй святы́х Свои́х,/ усе́рдно Тому́ рабо́тающих/ и сла́вящих Того́ я́ко Бо́га,/ И́же в Тро́ице Еди́наго,/ я́коже и сего́ уго́дника Своего́ Варлаа́ма,/ я́ко втора́го Богови́дца, дарова́,/ и́ноком наста́вника, бесо́м прогони́теля,/ о нас Бо́гу моля́щагося,/ да нас поми́лует в де́нь испыта́ния.

Блаже́нне о́тче Варлаа́ме,/ бла́го бы́сть души́ твое́й,/ я́ко блаже́нство Бо́жие насле́дова,/ се́яв бо слеза́ми в жи́зни сей,/ ра́достию на Небесе́х пожа́л еси́ рукоя́ти Небе́сныя./ Тем, любо́вию соше́дшеся,/ па́мять твою́ пра́зднующе, вопие́м ти:/ Богому́дре о́тче наш,/ проси́ нам у Христа́ мир и ве́лию ми́лость.

Ду́ху Свято́му прия́телище бы́сть, Варлаа́ме,/ равноа́нгельнаго ра́ди жития́ твоего́,/ в живоно́сную ме́ртвость облече́ся,/ повину́в пло́ть ду́хови,/ тем от земны́х преста́вися к Небе́сным,/ безконе́чный поко́й прия́т от трудо́в свои́х,/ сон бо че́стен пред Бо́гом сме́рть преподо́бных Его́.

Сла́ва, глас 5:

Ра́дуйся, свята́я Це́рковь Бо́жия,/ стяжа́вши мо́щи, освяще́нныя Святы́м Ду́хом,/ чу́днаго отца́ Варлаа́ма,/ от ни́хже тече́т струя́ во́ды животеку́щия,/ омыва́ющи душе́вныя вре́ды и теле́сныя./ Тем, соше́дшеся, любо́вию вопие́м к нему́:/ ра́дуйся, вселюбе́зный о́тче, па́стырю предо́брый;/ ра́дуйся, и́же по́двигом до́брым подвиза́выйся во вре́менней жи́зни сей;/ ра́дуйся, благи́й ра́бе,/ вше́дый в ра́дость Го́спода своего́,/ у Него́же проси́ нам мир и ве́лию ми́лость.

И ны́не, Богоро́дичен: Храм и две́рь еси́:

На стихо́вне стихи́ры, глас 4.

Подо́бен: Дал еси́ зна́мение:

Дал еси́ зна́мение боя́щимся Тебе́, Го́споди,/ уго́дника Твоего́ Варлаа́ма,/ и́бо той, Боже́ственный Твой Крест/ на ра́мо свое́ взем,/ после́дова Тебе́ преподо́бне и пра́ведне./ Полки́ бесо́вския победи́,/ мы́сленно на тех вооружи́вся,/ побе́ду от Тебе́ прии́м,/ распя́таго на Кресте́ нас ра́ди,/ Иису́се Всеси́льне и Спа́се душ на́ших.

Стих: Честна́ пред Го́сподем/ сме́рть преподо́бных Его́.

Дал еси́ достоя́ния зна́мение, Го́споди,/ уго́дника Твоего́, блаже́ннаго Варлаа́ма,/ он бо, любве́ ра́ди Твоея́,/ расточи́ име́ние свое́/ в созда́ние домо́в Твои́х Боже́ственных/ и в ру́ки вложи́ ни́щих,/ тем и прия́ше его́ в ве́чныя кро́вы,/ в нерукотворе́нныя хра́мы,/ иде́же земля́ кро́тких, Го́споди,/ Иису́се Всеси́льне и Спа́се душ на́ших.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дал еси́ терпе́ния зна́мение, Го́споди,/ блаже́ннаго Твоего́, Христе́, Варлаа́ма,/ той бо, упова́нием на Тя ду́шу огради́в,/ по́прище жития́ сего́ немяте́жно преи́де,/ душетле́нных разбо́йник не устраши́вся,/ Твое́ю по́мощию укрепля́емь,/ Вы́шняго гра́да ра́достне дости́г,/ иде́же святы́х жили́ща,/ Иису́се Всеси́льне и Спа́се душ на́ших.

Сла́ва, глас 6:

Преподо́бне о́тче Варлаа́ме,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду трудо́в твои́х,/ де́монская разори́л еси́ по́лчища,/ и А́нгельския дости́гл еси́ чи́ны,/ и́хже житию́ непоро́чно поревнова́л еси́,/ дерзнове́ние име́я ко Го́споду Бо́гу,/ мир испроси́ душа́м на́шим.

И ны́не, Богоро́дичен: Творе́ц и Изба́витель:

Тропа́рь, глас 3:

И́же к доброде́телем прилежа́нием взыгра́ния пло́ти обузда́л еси́,/ благи́ми нра́вы ду́шу свою́ украси́в,/ от земны́х Христу́ превозведе́ ум свой,/ тем от Него́ исцеле́нием струя́ незави́стна яви́ся,/ притека́ющим ве́рою к тебе́ и любе́зно зову́щим:/ Варлаа́ме, о́тче наш,/ моли́ Христа́ Бо́га,/ да спасе́т ду́ши на́ша.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Гроб Твой, Спа́се:

Наста́ светоно́сная па́мять блаже́ннаго Варлаа́ма дне́сь,/ созыва́ющи све́тло всепра́зднственныя ли́ки духо́вно пою́щих Боже́ственныя пе́сни/ и ве́рно чту́щих вселюбе́зную его́ па́мять,/ раздае́т бо цельбоно́сныя его́ да́ры на спасе́ние душ и теле́с на́ших.

Сла́ва, и ны́не, Богоро́дичен:

Всех Творца́, и Бо́га, и Соде́теля, Всенепоро́чная, Чи́стая,/ Ду́хом Боже́ственным в ложесна́х зача́т, без истле́ния родила́ еси́,/ Его́же славосло́вяще, Тя воспева́ем, Де́во,/ я́ко пала́ту Царя́ и ми́рови заступле́ние.

По 2-м стихосло́вии седа́лен, глас 4.

Подо́бен: Вознесы́йся:

И́же на земли́ лега́нием отсе́кл еси́ го́рдаго по́мысла сла́ву всепа́губную,/ пресве́тлым же смире́нием пове́ргл еси́ на зе́млю/ и́же в рай пу́ть запе́ншаго./ Тем, отложи́в ве́тхость душетле́нную,/ в но́ваго челове́ка, обновля́ющагося ду́хови, облече́ себе́,/ и, ве́сь Боже́ственен быв,/ Христа́ моли́ спасти́ ду́ши пою́щих тя.

Сла́ва, и ны́не, Богоро́дичен:

В кров Твой, Богоро́дице Пречи́стая Де́во, прибега́ющих мольбу́ прии́мши,/ о нас не преста́й моля́щи Человеколю́бца,/ спасти́ся рабо́м Твои́м.

По полиеле́и седа́лен, глас 8.

Подо́бен: Прему́дрости:

Многомяте́жнаго ми́ра непостоя́нную суету́, я́ко прах, вмени́в,/ доброде́тельми, я́ко ри́зою, оде́ян,/ вни́де в Небе́сный черто́г Боже́ственнаго бра́ка,/ иде́же с ли́ки святы́х веселя́ся,/ приобща́ешися неизрече́нней све́тлости Пребезнача́льныя Тро́ицы,/ от Нея́же прие́м неисче́тная чудеса́,/ исцеля́еши неду́ги любо́вию пра́зднующих всесвяту́ю па́мять твою́.

Сла́ва, и ны́не, Богоро́дичен:

Я́ко Всенепоро́чная Неве́ста Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще/ и де́монов игра́лище, в ра́зуме бы́вша,/ потщи́ся от сих злоде́йствия мя изба́вити,/ све́тло жили́ще доброде́тельми соде́лавши, Светода́тельная и Нетле́нная,/ разжени́ о́блак страсте́й и Вы́шняго прича́стия сподо́би/ и све́та невече́рняго моли́твами Твои́ми.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6, зри сла́вник на стихо́вне.

Кано́н Благове́щению Пресвяты́я Богоро́дицы, глас 4, со ирмосо́м на 6 и свято́му о́ба кано́на, на 8. Кано́н преподо́бнаго Варлаа́ма, глас 1.

Пе́снь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая проти́вныя сотре́,/ изра́ильтяном пу́ть глубины́ новосоде́лавшая.

Творя́й пресла́вная, Христе́, и ди́вная,/ очи́стив мно́гая моя́ согреше́ния,/ осия́й в души́ мое́й свет ра́зума моли́твами уго́дника Твоего́ Варлаа́ма,/ да в па́мять его́ принесу́ духо́вную пе́снь.

Твои́х даро́в исправле́нии ве́сь мир обогати́ся,/ от присносу́щнаго исто́чника моще́й твои́х/ прие́млюще духо́вная от неду́г исцеле́ния,/ те́мже ра́достною душе́ю, блаже́нне, тя почита́ем.

Твоя́ моли́твы взыдо́ша, о́тче, на Не́бо,/ две́ри ра́йския отверзо́ша ти,/ Престо́лу Госпо́дню предста́виша тя,/ иде́же с ли́ки святы́х А́нгел сла́виши Тро́ицу Несозда́нную.

Богоро́дичен: Воспое́м, вси ве́рнии, Преди́вную Де́ву,/ Христа́, Присносу́щнаго Живота́, вселе́нней возсия́вшу/ и ра́дости вся́кия мир испо́лнившу.

Ин кано́н, глас 6, его́же краегране́сие от нача́ла седмы́я пе́сни до конца́ девя́тыя пе́сни у кра́сных слов, кроме́ Богоро́дичнов.

Пе́снь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.

Слез твои́х и воздыха́ний я́ко испо́лнено житие́ твое́, о́тче,/ разсмотри́в земну́ю сла́ву и че́сть, я́ко не су́шу презре́л еси́,/ Христа́ еди́наго возлюби́л еси́/ и Тому́ после́дова в преподо́бии и пра́вде.

Сло́во Бо́жие, ева́нгельски рече́нное, во ум прие́м,/ бога́тство тле́нное оплева́в, нетле́нное блаже́нство насле́дова,/ иде́же святы́х ли́ки непреста́нно веселя́тся.

В сие́ песносло́вие внят, о́тче Варлаа́ме,/ моли́, о́тче, Изба́вителя, я́ко оте́ц чадолюби́в,/ оставле́ние грехо́в на́ших дарова́ти нам,/ сла́вящим па́мять твою́.

Богоро́дичен: Преми́лостиваго Бо́га, Всемилосе́рдая Ма́ти Де́во Мари́е,/ умоли́, Влады́чице, я́ко Сы́на Своего́ и Бо́га,/ бу́дущих мук изба́вится/ и́же ма́лое сие́ любо́вию прине́сшему.

Пе́снь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.

Да вкорени́тся в тя зача́ло прему́дрости – страх Госпо́день,/ хра́мы Бо́жия премно́ги созида́л еси́,/ к ни́щим ми́лование неща́дно име́л еси́/ и сего́ ра́ди в нерукотворе́нных хра́мех при́сно ра́дуешися.

Непрело́жно рабо́тати Бо́гови возжела́л еси́,/ всю свою́ плотску́ю во́лю до конца́ умертви́л еси́/ и, я́ко А́нгел быв, а́нгельскую жи́знь, блаже́нне, насле́дова.

Не восхоте́, блаже́нне, земны́я сла́вы,/ но со Христо́м бы́ти изво́лив,/ дом и сро́дник свои́х оста́вил еси́,/ тем ны́не со А́нгелы на Небесе́х ликовству́еши.

Богоро́дичен: Зна́юще, благоче́стно пропове́даем Тя вои́стинну Бо́жию Ма́терь,/ Тобо́ю нам Созда́тель прибли́житися сподо́би.

Ин

Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Жела́я, блаже́нне, Присносу́щный Свет,/ сна свои́ма очи́ма не дал еси́, ни поко́я телеси́,/ до́ндеже получи́л еси́ непрестае́мую о́ную блаже́нную ра́дость.

Слез твои́х тече́нием, мно́жеством воздыха́ний/ пучи́ну страсте́й преплы́л еси́,/ окормля́емь Святы́м Ду́хом, приста́нища Небе́снаго дости́гл еси́.

Мое́ неисправле́ние и сла́бость нра́ва,/ грехопа́дну ду́шу прови́дев, блаже́нне,/ наста́ви мя покая́ния путе́м,/ да, тобо́ю исправля́емь, воспою́ твою́ па́мять.

Богоро́дичен: Спасти́ восхоте́в челове́ка на поле́зное, я́ко Человеколю́бец, Госпо́дь/ в Твою́ всели́ся утро́бу, Богома́ти, неопи́санно.

Седа́лен, глас 8.

Подо́бен: Прему́дрости:

Скоромину́щее жития́ сего́ и тле́ющее бога́тство, я́ко прах, вмени́л еси́,/ на духо́вную жи́знь преложи́л себе́ и, на враги́ боре́ние поста́вив,/ взыгра́ния пло́ти умертви́л еси́,/ всем я́ко Боже́ствен быв, от Бо́га обогати́ся пресла́вных чуде́с дарова́нием,/ Его́же моли́, Варлаа́ме, грехо́в оставле́ние дарова́ти нам,/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Предста́тельнице ве́рным, Богороди́тельнице,/ скорбя́щим ра́досте, пла́чущим Уте́шительнице,/ И́же от Тебе́ ро́ждшагося. Бо́га па́че естества́, Влады́чице, моли́/ изба́вити настоя́щих зол и бу́дущих мук/ и́же Тебе́, Богоро́дицу, и́стинно испове́дающих.

Пе́снь 4

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися,/ Сла́ва си́ле Твое́й, Го́споди.

Огне́м любве́ Бо́жия распали́вся, о́тче,/ я́ко добр купе́ц, вся своя́ оста́вив,/ в чужи́х страна́х прише́льствова, взыску́я Бо́га,/ Его́же обре́т, искупи́л еси́ Ца́рство Небе́сное.

Проразуме́в бу́дущая, я́ко настоя́щая,/ не пощаде́ пло́ти своея́ во умерщвле́ние по́мысла,/ но, враг быв телеси́ своему́,/ вмести́лище бы́сть Свято́му Ду́ху.

Воздержа́нием кра́йним пло́ть умертви́в,/ ду́шу свою́ оживи́л еси́./ Тем я́ко к жи́зни рачи́тель прия́т Небе́сное Ца́рство.

Богоро́дичен: Неизрече́нно зачала́ еси́, Богоневе́сто, Спа́са и Го́спода,/ избавля́ющаго нас от лю́тых,/ и́же Тя вои́стинну призыва́ющих.

Ин

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Упова́нием, е́же на Бо́га, вооружи́ себе́,/ в броня́ пра́вды облече́ся,/ ору́жием моли́тв твои́х пресе́кл еси́ де́монская по́лчища, блаже́нне.

Влады́це всех и Бо́гу на Небесе́х предстои́ши,/ те́мже твое́ свято́е те́ло, во гро́бе лежа́ще,/ ве́рно тя чту́щим да́рует исцеле́ние.

На умоле́ние раб твои́х приклони́ у́хо твое́, блаже́нне,/ и изба́ви от настоя́щих бед и скорбе́й ве́рныя лю́ди,/ во бране́х посо́бие тем да́руя.

Богоро́дичен: Изба́ви настоя́щих бед, и напа́стей,/ и собла́зн, Влады́чице, рабо́в Свои́х, и тьмы́ грехо́вныя,/ я́коже Свет ро́ждшая нам Невече́рний.

Пе́снь 5

Ирмо́с: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.

Провозсия́вшему на Кресте́ нас ра́ди во́лею, блаже́нне, я́ко после́дова,/ со страстьми́ и похотьми́ распе́н себе́ ми́рови,/ тем, я́ко вне ми́ра быв, свет ми́ру был еси́.

Я́ко Богопросвеще́нный рачи́тель святы́х,/ во и́мя Госпо́дня ученика́ прече́стен дом воздви́гл еси́,/ в не́мже тобо́ю Бог при́сно сла́вим е́сть.

Невестоводи́тель благоприя́тен бы́сть, о́тче:/ и́ноков ду́ши, я́ко неве́сты чи́сты, Бо́гови приведе́,/ с ни́миже о нас моли́ся непреста́нно.

Богоро́дичен: Поро́ждшая Свет, И́же от Отца́ пре́жде век возсия́вшаго,/ просвети́ ду́шу мою́, грехо́вным мра́ком омраче́нную,/ да при́сно сла́влю Твою́ бла́гость.

Ин

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Стезю́ Небе́сную ше́ствовав,/ те́сным путе́м и приско́рбным простра́нство Небе́сное дости́гл еси́,/ отону́дуже пресла́вными чудесы́ всех удивля́еши.

В блаже́нство бу́дущее взира́я,/ слеза́ми лани́ты своя́ омочи́в, свет безстра́стия был еси́,/ те́мже тя, блаже́нне, воспева́ем.

Богода́нная ти благода́ть прослу́та всем сотвори́ тебе́,/ известву́я коне́ц достоприя́тия моли́тв твои́х,/ те́мже, о́тче, моли́ спасти́ пою́щих тя.

Богоро́дичен: Ма́ти Бо́жия Де́во, души́ моея́ лю́тую я́зву исцели́,/ серде́чную боле́знь утоли́ и ра́дости испо́лни,/ да при́сно сла́влю Тя, раб Твой, Богороди́тельнице.

Пе́снь 6

Ирмо́с: Обы́де нас после́дняя бе́здна,/ не́сть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощствующих и исправле́ние.

В бе́здну щедро́т Бо́жиих пове́рг себе́, Богому́дре,/ жите́йских молв пучи́ну препла́вая, духо́вными ве́тры обурева́ем,/ на он пу́ть бу́дущаго ве́ка, блаже́нне, всели́лся еси́.

Боже́ственною укрепля́емь си́лою,/ вся кова́рства лука́ваго победи́л еси́,/ тем, я́ко окрила́тев умо́м ,/ ду́хом на Не́бо возлете́л еси́, чу́дне.

Благонра́вие твое́ душе́вное и незло́бивое мудрова́ние/ и́ноков ду́ши к Бо́гу приведе́,/ и́хже, я́ко оте́ц чадолюби́вый, посеща́ти не оста́ви.

Богоро́дичен: Глас Арха́нгелов вопие́м Ти, Влады́чице Богоро́дице:/ ра́дуйся, Две́ре Бо́жия непроходи́мая;/ ра́дуйся, О́блаче, е́же Пра́вды Со́лнце нам возсия́.

Ин

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Сла́ву, ю́же от челове́к, презре́в, Варлаа́ме, Бо́жию взыска́л еси́,/ тем со А́нгелы пребыва́я,/ ра́дости наслажда́ешися непрестаю́щия.

Зако́ну Бо́жию поуча́яся,/ тяготу́ и вар дневны́й поне́сл еси́,/ тем ра́вну мзду прия́т от Бо́га,/ и́же от нача́ла ве́ка до конца́ труди́вшихся.

Благода́рно вопие́т оби́тель твоя́, Богому́дре,/ сожи́теля и совсе́льника тя име́я,/ и, хва́лящися, созыва́ет всех на испове́дание чуде́с твои́х.

Богоро́дичен: Отча́яния бе́здна глубины́ грехо́вныя в пучи́ну а́да низведе́ ду́шу мою́,/ от нея́же изми́, Влады́чице,/ ру́ку ми по́мощи подаю́щи,/ я́коже Петро́ви Бог и Сын Твой.

Конда́к, глас 8.

Подо́бен: Взбра́нной:

Я́ко звезда́ светоза́рная,/ от Вели́каго Новагра́да прише́д,/ в чужи́х, я́ко в за́падных страна́х, за́йде,/ от восто́к чуде́с, я́ко со́лнце, возсия́,/ те́мже, и́же во тьме́ и се́ни сме́ртней, в неду́зех лежа́щий,/ свет исцеле́ния от Тебе́ прие́млюще,/ с на́ми, ча́ды твои́ми, непреста́нно вопию́т ти:/ ра́дуйся, Богому́дре Варлаа́ме, о́тче наш.

И́кос:

Христо́вых повеле́ний послу́шатель быв нело́жный,/ непоро́чным житие́м твои́м святы́х А́нгел удиви́л еси́,/ те́мже и мы, зря́ще прему́дрых твои́х трудо́в исправле́ния, ра́достне вопие́м ти:/ ра́дуйся, чи́стый сосу́де Свята́го Ду́ха;/ ра́дуйся, А́нгелов собесе́дниче и бесо́в прогони́телю;/ ра́дуйся, сто́лпе пресве́тлый и свети́ло целому́дрия;/ ра́дуйся, похвало́ оте́честву твоему́ и Вели́кому Новугра́ду;/ ра́дуйся, я́ко моли́твами твои́ми сопроти́вныя побежда́ются;/ ра́дуйся, ве́рным лю́дем похвало́ и утвержде́ние./ Те́мже моли́твами твои́ми сохрани́ ны от враг ненаве́тны, да зове́м ти:/ ра́дуйся, Богому́дре Варлаа́ме, о́тче наш.

Пе́снь 7

Ирмо́с: Тебе́, у́мную, Богоро́дице, пе́щь,/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Тебе́, Го́сподеви моли́тву творя́щу/ и Пречи́стую Его́ Ма́терь со слеза́ми моля́щу,/ глас А́нгельский с Небе́с слы́шан бы́сть,/ показу́ющ ти, блаже́нне, Бо́жие на ме́сте сем благоволе́ние.

В поще́ниих непрекло́нное, во искуше́ниих неосла́бное,/ в терпе́ниих неотсту́пное име́л еси́ стяжа́ние,/ тем нетле́нными венцы́ от Бо́га венча́лся еси́.

Непреста́нно моли́, Варлаа́ме о́тче наш, о ста́де свое́м,/ его́же трудолю́бно собра́л еси́,/ и спаси́ и́же тя на моли́тву призыва́ющих и плоды́ принося́щих любо́вию.

Богоро́дичен: Ка́пля благоче́стная, Я́же от Тебе́ Ро́ждшаяся,/ мир освяти́, Богоро́дице Де́во,/ ка́плю ми ми́лости источи́,/ освяща́ющи ду́ши и помышле́ния земны́х.

Ин

Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Творцу́ всех и Бо́гу благоуго́ден яви́ся,/ доброде́тельми, я́ко крила́ми, на Не́бо возлете́/ и та́мо Трисо́лнечным Све́том просвеща́ешися, при́сно веселя́ся.

Преоби́дев тле́нная бога́тства, Небе́сная стяжа́л еси́,/ те́мже и́же ве́рою ко гро́бу твоему́ притека́ющим/ подае́ши ско́рое исцеле́ние.

И ниже́ жи́ти кроме́ Христа́ изво́лил еси́,/ но всю свою́ ду́шу в Того́ любо́вь простре́,/ у Него́же насле́дил еси́ жела́нное тебе́ блаже́нство.

Богоро́дичен: Раби́ Твои́, Влады́ко,/ на моли́тву Чи́стую Ма́терь Твою́ предлага́ем,/ от вся́каго обстоя́ния лю́ди Твоя́ изба́ви, пою́щия:/ оте́ц на́ших Бо́же, благослове́н еси́.

Пе́снь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода/ и превозноси́те во вся ве́ки.

В пещи́ искуше́ния, я́ко зла́то, искуси́вся, о́тче,/ чистоте́ храни́тель бы́сть,/ с не́ю же Бо́га узре́в, со А́нгелы ликовству́еши.

Со́весть твоя́, о́тче, зерца́ло бы́сть бу́дущих,/ тем, земны́х возгнуша́вся, на Небе́сная потща́лся еси́,/ и́хже получи́в, помина́й пою́щих тя.

Ни́щих ми́лованием и странноприя́тием неоску́дным Авраа́му в ло́но дости́гл еси́,/ от Боже́ственных же сокро́вищ исто́чник чуде́с, о́тче, излива́еши.

Богоро́дичен: Еди́на су́щи Блага́я,/ Преблаго́е Сло́во умоли́ приле́жно/ настоя́щаго гне́ва и паде́ния всем изба́вится, Богоро́дице Чи́стая, мо́лимся.

Ин

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

От священнонача́льника Вели́кия Це́ркве я́ко благослове́н быв,/ обе́ты Бо́гови возда́л еси́,/ во ангелоле́пное подо́бие облече́ себе́, богоуго́дно поживе́,/ наста́вник быв и́ноком.

Виногра́да Христо́ва пресла́док грозд был еси́, Богому́дре,/ изгнете́н боле́зньми и труды́,/ сла́дость от свята́го твоего́ гро́ба источа́еши ве́рно чту́щим тя.

Сказа́ иногда́ настоя́телю оби́тели твоея́ не получи́ти ему́ Небе́снаго Ца́рствия,/ а́ще не сотвори́т ми́лости убо́гим,/ он же, сотвори́в тобо́ю повеле́нная,/ проще́ния получи́ о согреше́ниих его́.

Богоро́дичен: Храм Тя, Влады́чице, Бо́жий ви́дяще, вопие́м:/ ви́ждь озлобле́ния на́ша/ и в хра́ме Твое́м руце́ нечи́стей, дви́жимей на мольбу́, пода́ждь по́мощь.

Пе́снь 9

Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная;/ и ны́не на нас напа́стей свире́пеющую угаси́ти, мо́лимся, пе́щь,/ да Тя, Богоро́дице,/ непреста́нно велича́ем.

Ум свой поста́вил еси́ влады́ку, облада́юща по́мыслы,/ тем, я́ко царя́ страсте́м, Христо́с венча́л тя е́сть нетле́нным дарова́нием,/ пресели́вшуся от земны́х на Небе́сная.

Блаже́нство нетле́нно прия́т,/ я́ко а́нгельское поживе́ житие́, о земны́х небре́г,/ к Го́рним преста́вися, Варлаа́ме,/ предста́тель к Бо́гу бу́ди о нас, тя блажа́щих.

И́же твою́ па́мять усе́рдно творя́щим,/ настоя́щих бед, о́тче, изба́ви и бу́дущих изми́ мук,/ да тя, я́ко те́пла засту́пника, ублажа́ем при́сно.

Богоро́дичен: Спа́са Изба́вителя, Бо́га всех и Го́спода, ро́ждши,/ нам пло́тию прибли́жившагося,/ спаси́, Пречи́стая, призыва́ющих Тя от бед, Влады́чице.

Ин

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Ни в ины́х да́льних страна́х пребыва́ние,/ ни чужезе́мных озлобле́ния, устраши́ тебе́, о Богому́дре;/ на вся́ко показа́в потща́ние, блага́я она́ Небе́сная восприя́л еси́.

От многопреле́стнаго жития́ сего́ к ве́чным оби́телем преста́вися,/ в за́поведех бо Госпо́дних де́нь и но́щь поуча́яся,/ ре́ки чуде́с и по сме́рти пролива́еши ве́рно, блаже́нне, чту́щим тя.

От гре́шнаго твоего́ раба́,/ от скве́рныя души́ приими́ сие́ моле́ние, Варлаа́ме о́тче,/ не возгнуша́йся, но отра́ду испроси́ нам в Де́нь Су́дный.

Богоро́дичен: Взыва́ем вси Тебе́, и́стинней Ма́тери Бо́жией:/ прогне́вавшия рабы́ изба́ви належа́щих зол и ве́чных мук,/ Еди́на Ты к Сы́ну Своему́ дерзнове́ние и́маши.

Свети́лен:

Све́том Христо́вым по вселе́нней просия́в, я́ко со́лнце,/ чудесы́ ве́сь мир просвеща́еши,/ тем, я́ко Христо́в во́ин непобеди́м,/ безпло́тных враго́в ополче́ния до́блественне низложи́л еси́,/ на Небесе́х мзду прия́т трудо́в свои́х, Варлаа́ме о́тче наш,/ Христа́ моли́ спасти́ся душа́м пою́щих тя.

Сла́ва, и ны́не, Богоро́дичен:

Прему́дрость соста́вную, и Сло́во Присносу́щное,/ и Врача́ всем – Христа́ ро́ждши, Де́во,/ гное́ния и я́звы души́ моея́ исцели́ лю́тыя и многовре́дныя/ и се́рдца моего́ уста́ви стра́стныя помышле́ния.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́вных Твои́х чуде́с, Бо́же,/ и́миже ве́си прославля́ти святы́я Своя́,/ я́коже показа́ и сего́ уго́дника Своего́ Варлаа́ма,/ и́же не́когда сомня́щимся лю́дем о нем,/ о ме́ртвеннем телеси́,/ и сего́ нетле́нна яви́, я́ко жи́ва, за мно́го лет,/ его́же одари́ чуде́с зна́меньми,/ но сла́ва человеколю́бию Твоему́,/ творя́щему пресла́вная и ди́вная.

О, пресла́внаго чудесе́,/ блаже́нне Варлаа́ме,/ ты в ме́ртвеннем свое́м те́ле,/ святы́х А́нгел подража́в,/ кре́стным зна́мением безпло́тныя враги́ победи́л еси́./ Тем сосу́д Свято́му Ду́ху бы́сть/ и со А́нгелы водворя́ешися,/ я́ко тех возлюби́л еси́, единонра́вне,/ помина́й нас, тя сла́вящих.

О, пресла́внаго чудесе́,/ Варлаа́ме, преди́вный о́тче,/ я́коже пре́жде сме́рти,/ си́це и по преставле́нии,/ я́ко жив, предста́ настоя́телю оби́тели твое́я,/ претя́ ему́ не получи́ти Небе́снаго Ца́рствия,/ а́ще не отве́рзет убо́гим ми́лости./ Тем, ско́ро сотвори́в повеле́нная тобо́ю,/ получи́ от Бо́га ми́лость/ моли́твами твои́ми, свя́те.

Сла́ва, глас то́йже:

Мона́хов мно́жества,/ наста́вника тя почита́ем, о́тче наш Варлаа́ме,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое. Ектении́ и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода,/ в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную:

Тропа́рь, глас 4:

Кири́лла равноапо́стольнаго язы́к,/ защити́в, обнови́л еси́/ и Патриа́рха Евфи́мия благослове́ние Тро́йческое, преднача́в,/ испо́лнил еси́./ Твои́м бо трудо́м болга́ром/ па́ки вня́тным их язы́ком благоче́стие воспропове́дася,/ и тобо́ю пе́рвее нача́т Про́мысл Тро́йческий –/ де́ло освобожде́ния ро́да Болга́рскаго./ Сего́ ра́ди тя почита́ем,/ Паи́сие блаже́нне,/ и любо́вию соверша́ем честну́ю па́мять твою́.

Конда́к, глас 8.

Подо́бен: Взбра́нной:

Во бра́нь вступи́л еси́ не ору́жием,/ но кни́жицею ма́лою, блаже́нне,/ ника́коже устраши́вся си́лы враго́в,/ но, заже́г свети́льник посреде́ сме́ртныя тьмы́,/ победи́л еси́ в коне́ц за лю́ди твоя́./ Сего́ ра́ди вопие́м ти:/ ра́дуйся, Паи́сие о́тче,/ денни́це све́тлая болга́рскаго но́ваго дне.

 

На МА́ЛОЙ ВЕЧЕ́РНИ

На Го́споди, воззва́х: стихи́ры, глас 8:

Прииди́те, ве́рнии,/ восхва́лим зе́млю Старицкую,/ я́же возрасти́ му́жа наро́чита,/ прему́драго и кро́ткаго святи́теля И́ова,/ пе́рваго в Патриа́рсех Русских Бо́гом избра́ннаго.

Да почте́тся оби́тель Старицкая,/ дом Пресвяты́я Богоро́дицы,/ иде́же И́ов приснопа́мятный,/ еще́ юн сый,/ постриже́ние и́ноческое прия́т/ и, соверша́я по́двиги и труды́,/ наста́вник до́брый и́ноком яви́ся.

Красу́йся, гра́де Москво́,/ прие́мый мона́хов нача́льника,/ И́ова преподо́бнаго,/ мно́гия труды́ сла́вы ра́ди Бо́жия зде поне́сшаго/ и архиере́йским са́ном почте́ннаго.

Сла́ва, глас то́йже:

Пресла́вно избра́ние твое́ бы́сть,/ в Патриа́рха Русскаго возводя́щее тя./ Та́кожде благохва́льно/ и служе́ние твое́ первоиера́ршее,/ во всем во́ли Бо́жия испо́лненное./ Те́мже вои́стину о тебе́ сбы́стся/ первосвяти́теля вселе́нскаго прорече́ние:/ да бу́дет сей архиере́й Иису́сов/ неугаси́мый свети́льник ве́ры.

И ны́не, пра́здника илй Богоро́дичен, глас то́йже:

Влады́чице, приими́моли́твы раб Твои́х,/ и изба́ви нас/ от вся́кия ну́жды и печа́ли.

На стихо́вне стихи́ры, глас 2.

Подо́бен: До́ме Евфра́фов:

Учи́телен и смире́н быв,/ во вся́цем де́ле Бо́жием иску́сен,/ до́брый па́стырь яви́лся еси́/ па́стве всерусстей,/ И́ове первосвяти́телю.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

О па́стве Русстей попече́ние име́я,/ су́щия в печа́ли утеша́л еси́,/ та́же и мзду пра́ведную за труды́ храмозда́тельства воздава́я,/ от гла́да мно́гия изба́вил есй,/ первоиера́рше И́ове.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Умно́жил еси́ па́ству Це́ркве Русския,/ И́ове, ότче богому́дре,/ дости́г попече́нием оте́ческим/ да́же до преде́лов Каре́льских и Астраха́нских,/ та́же и зе́млю Сиби́рскую хра́мы Бо́жиими украси́л еси́.

Сла́ва, глас то́йже:

Тя́жкая лише́ния и изгна́ния претерпева́я,/ святи́телю И́ове,/ испове́дник Правосла́вныя ве́ры показа́лся еси́,/ сме́рти же не убоя́вся,/ лжеиме́ннаго царя́ ана́феме пре́дал еси́.

И ны́не, пра́здника или́ Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н.

На Го́споди, воззва́х: а́ще пра́здник, стихи́ры пра́здника 3 и свята́го 5.

А́ще кроме́ пра́здника, стихи́ры свята́го на 8, глас 1:

Позна́им, бра́тие, сло́во проро́ка:/ вознесо́х избра́ннаго от люде́й Мои́х,/ и уразуме́им, я́ко избра́ Госпо́дь раба́ Своего́,/ святе́йшаго И́ова пресла́внаго,/ пасти́ ста́до слове́сное Це́ркве Русския на па́жити спаси́тельней/ и вознесе́ и́мя его́ в род и род,/ да мо́лится о душа́х на́ших.

Аз пе́рвенца положу́ его́, высока́ па́че царе́й земны́х,/ рече́ проро́к./ Сие́ сбы́стся в житии́ твое́м, святйтелю И́ове прему́дре,/ ты бо яви́лся еси́ пе́рвенец Патриа́рхов Русских,/ благода́тию Бо́жиею превознесе́н быв высоко́ па́че владьік земных,/ да мо́лишися о стране́ на́шей.

Еле́ем святы́м Мои́м пома́зах его́,/ глаго́лет проро́к./ Сего́ ра́ди благода́ти испо́лнен/ и мно́гими плоды́ Ду́ха Свята́го укра́шен,/ по́двиг первосвяти́тельский соверши́л еси́, святи́телю,/ да мо́лишися о умире́нии душ на́ших.

И́стина Моя́ и ми́лость Моя́ с ним,/ рече́ проро́к о му́же пра́веднем./ Та́ко и ле́та служе́ния И́ова святе́йшаго/ бы́ша испо́лнена ми́лости и и́стины духо́вныя./ Те́мже просвети́ся моли́твами его́ земля́ Русская/ и Це́рковь Христо́ва утверди́ся.

Сла́ва, глас 6:

Прииди́те, правосла́вных собо́ри,/ восхва́лим пόдвиги первоизбра́ннаго Патриа́рха Русскаго/ и из глубины́ души́ ему́ возопии́м:/ о избра́нниче Бо́жий,/ еле́ем любве́ Госпо́дни пома́занный,/ ми́лостию же и и́стиною Его́ осия́нный,/ услы́ши лю́ди твоя́/ и вознеси́ за ны моли́твы твоя́ ко Го́споду.

И ны́не, пра́здника или́ Богоро́дичен: Кто Тебе́ не ублажи́т:

Вход. Проки́мен дне. И чте́ния.

При́тчей чте́ние (главы́ 3 и 8):

Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те прему́дрость, и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же е́сть ка́мений многоце́нных, все же честно́е недосто́йно ея́ е́сть./ Долгота́ бо дней и ле́та живота́ в десни́це ея́, в шу́йце же ея́ бога́тство и сла́ва./ От уст ея́ исхо́дит пра́вда, зако́н же и ми́лость на язы́це но́сит./ Послу́шайте у́бо Мене́, о ча́да, честна́я бо реку́: и блаже́н челове́к, и́же пути́ Моя́ сохрани́т;/ исхо́ди бо Мои́, исхо́ди живота́, и уготовля́ется хоте́ние от Го́спода./ Сего́ ра́ди молю́ вас и предлага́ю Мой глас сыново́м челове́ческим:/ я́ко Аз прему́дрость устро́их, сове́т и ра́зум, и смысл Аз призва́х./ Мой сове́т и утвержде́ние, Мой ра́зум, Моя́ же кре́пость./ Аз мене́ лю́бящия люблю́, и́щущии же Мене́ обря́щут благода́ть./ Разуме́йте у́бо, незло́бивии, кова́рство, ненака́зании же, прилага́йте сердца́./ Послу́шайте Мене́ и па́ки, честна́я бо реку́: и отве́рзу от усте́н пра́вая,/ я́ко и́стине поучи́тся горта́нь Мой, ме́рзки же предо Мно́ю устны́ лжи́выя./ С пра́вдою вси глаго́лы уст Мои́х: ничто́же в них стро́потно, ниже́ развраще́нно./ Вся пра́ва су́ть разумева́ющим и про́ста обрета́ющим ра́зум./ Научу́ бо вас и́стине, да бу́дет о Го́споде наде́жда ва́ша и испо́лнитеся Ду́ха.

Премудрости Соломо́новы чте́ние (главы́ 10, 6, 8 и 9):

Уста́ пра́веднаго ка́плют прему́дрость, устне́ же муже́й му́дрых ве́дят благода́ть./ Уста́ му́дрых поуча́тся прему́дрости, пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т и во благи́х свои́х плод пра́вды обы́мет./ Свет пра́ведным всегда́, и от Го́спода обря́щут благода́ть и сла́ву./ Язы́к му́дрых до́брая све́сть, и в се́рдце их почи́ет му́дрость./ Лю́бит Госпо́дь преподо́бная се́рдца, прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю, пре́жде да́же разуме́ти ю, и удо́бь у́зрится от лю́бящих ю./ У́треневавый к ней не утруди́тся, и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи, и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́, и возлюби́х ю, и поиска́х от ю́ности моея́./ И взыска́х неве́сту привести́ себе́, я́ко всех Влады́ка возлюби́ ю./ Таи́бница бо е́сть Бо́жия хи́трости и обрета́тельница дел Его́./ Труды́ ея́ су́ть доброде́тели: целому́дрию же и ра́зуму та учи́т, пра́вде и му́жеству,/ и́хже потре́бнее ничто́же е́сть в житии́ челове́ком./ А́ще же и мно́гаго иску́сства жела́ет кто, ве́сть дре́вняя и бы́ти хотя́щая разсмо́трит./ Све́сть изви́тия слове́с и разреше́ния гада́ний, зна́мения и чудеса́ проразуме́ет, и сбытия́ време́н и лет;/ и всем сове́тник е́сть благ, я́ко безсме́ртие е́сть в ней и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся Ему́, и рех от всего́ се́рдца моего́:/ Бо́же отце́в и Го́споди ми́лости, сотвори́вый вся сло́вом Твои́м/ и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет мир в преподо́бии и пра́вде./ Да́ждь ми Твои́х престо́лов приседя́щую прему́дрость и не отлучи́ мене́ от όтрок Твои́х, я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́ и от Престо́ла сла́вы Твоея́,/ да су́щи со мно́ю, научи́т мя, что благоуго́дно е́сть пред Тобо́ю,/ и наста́вит мя в ра́зум, и сохрани́т мя в сла́ве свое́й./ Помышле́ния бо сме́ртных вся боязли́ва, и погреши́тельна умышле́ния их.

Прему́дрости Соломо́новы чте́ние (главы́ 4,6, 7 и 2):

Похваля́ему пра́веднику, возвеселя́тся лю́дие:/ безсме́ртие бо е́сть па́мять его́, я́ко от Го́спода познава́ется и от челове́к, и уго́дна Го́сподеви душа́ его́./ Возлюби́те у́бо, о му́жие, му́дрость и поживете́, восхощи́те ея́ и нака́зани бу́дете: нача́ло бо ея́ любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих./ Я́ко Той му́дрости наста́вник е́сть, и му́дрых испра́витель, и вся́кому смы́слу и де́лу хитре́ц./ И всем смы́слом научи́т му́дрость: е́сть бо в ней дух разу́мен и свят, и сия́ние све́та присносу́щнаго, и о́браз бла́гости Бо́жия./ Та дру́ги Бо́жия и проро́ки устроя́ет./ Благоле́пнейши же е́сть со́лнца и па́че вся́каго сотворе́ния звезд, све́ту сосужда́ема обрета́ется пе́рвейши./ Та угожда́ющих ей от боле́зней изба́ви и наста́ви на стези́ пра́выя./ Даде́ им ра́зум име́ти свят и сохрани́ я от ловя́щих, и по́двиг кре́пок подаде́ им./ Да разуме́ют вси, я́ко си́льнее всего́ е́сть благоче́стие;/ и никогда́же премо́жет зло́ба му́дрости, ниже́ пре́йдет злы́я облича́ющи суд./ Реко́ша же в себе́, помы́сливше непра́ведно: наси́льствуем пра́ведному/ и не пощади́м преподо́бства его́, ни усрами́мся седи́н ста́рости многоле́тны./ Бу́дет бо нам кре́пость зако́н, и улови́м пра́веднаго, я́ко неуго́ден нам е́сть,/ и проти́вится дело́м на́шим, и поно́сит нам отпаде́ние зако́на, и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий и о́трока Госпо́дня себе́ имену́ет./ Бы́сть нам на обличе́ние помышле́нием на́шим и тя́жек нам е́сть,/ и ви́дим, я́ко неподо́бно ины́м житие́ его́ и измене́ны стези́ eгo./ В поруга́ние вмени́хомся ему́, и удаля́ется от путе́й на́ших, я́ко от нечисто́т, и блажи́т после́дняя пра́ведных./ Уви́дим у́бо, а́ще словеса́ его́ и́стинна су́ть, иску́сим, я́же сбыва́ются ему́./ Руга́нием и му́кою истя́жем его́, да разуме́ем кро́тость его́,/ и иску́сим беззло́бство его́, сме́ртию безобра́зною осу́дим его́, бу́дет бо посеще́ние от слове́с его́./ Сия́ помы́слиша и прельсти́шася: ослепи́ бо я зло́ба их,/ и не разуме́ша та́ин Бо́жиих и не разсуди́ша, я́ко Ты еси́  Бог Еди́н,/ живота́ име́яй и сме́рти вла́сть, и спаса́яй во вре́мя ско́рби, и избавля́яй от вся́каго зла./ Щедр, и ми́лостив, и дая́ преподо́бным Свои́м благода́ть, и Свое́ю мы́шцею го́рдым противля́яся.

На лити́и стихи́ры, глас 8:

Прииди́те, правосла́вных собо́ри,/ пресла́внаго отца́ на́шего, святи́теля И́ова, почти́м,/ пе́рваго во Патриа́рсех Русских,/ и, припа́дающе ко святы́м моще́м его́,/ со умиле́нием воззове́м:/ о пречу́дне уго́дниче Бо́жий,/ свя́те И́ове пресла́вне,/ жезл Патриа́рхов Русских вознеси́,/ и́бо испо́лнися на тебе́ проро́ческое сло́во:/ положу́ в век ве́ка се́мя его́/ и престо́л его́, я́ко дни́е Не́ба.

Сла́ва, и ны́не, пра́здника или Богоро́дичен: Влады́чице, приими́:

На стихо́вне стихи́ры, глас 2:

Подо́бен: До́ме Евфра́фов:

От ю́ности возлюби́л еси́ / мона́шеское житие́, преподо́бне,/ и, во оби́тели честна́го Успе́ния Богома́тере пожи́в,/ и́ноческия по́двиги подъя́л еси́.

Стих: Восхва́лятся преподо́бнии во сла́ве/ и возра́дуются на ло́жах свои́х.

Во оби́тели Пресвяты́я Де́вы/ навы́к кни́жному уче́нию/ и мона́шескому послуша́нию,/ до́брый и́нок явйлся еси́,/ пресла́вне И́ове преподо́бне.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Моли́твою и чистото́ю жития́ твоего́/ муж изве́стен яви́лся еси́,/ сего́ ра́ди наста́вник до́брый мона́хов соде́лался еси́,/ о́тче наш, И́ове свя́те.

Сла́ва, глас 8:

С любо́вию восхва́лим, бра́тие,/ преподо́бнаго отца́ на́шего И́ова,/ труды́ и по́двиги от ю́ности подъя́вша/ и во святи́тельстей степе́ни ты́я преумно́живша.

И ны́не, пра́здника или́ Богоро́дичен: Безневе́стная Де́во:

Тропа́рь, глас 5:

Правосла́вия побо́рниче,/ ве́ры Христо́вы испове́дниче,/ первоиера́рше Це́ркве Ру́сския,/ святи́телю о́тче И́ове,/ за ны Христа́ Бо́га моли́,/ ве́ру оте́ческую утверди́ти,/ грехо́в оставле́ние нам дарова́ти/ и пода́ти ми́ру ве́лию ми́лость.

Ин тропа́рь, глас 3:

Да торжеству́ет Це́рковь Христо́ва/ и да ра́дуется град Москва́,/ я́ко возсия́ свети́льник земли́ Русския,/ во испове́дании И́стины непоколеби́мый И́ов Патриа́рх,/ его́же моли́твами, Го́споди,/ вся собла́зны ми́ра сего́ и е́реси искорени́,/ лю́ди во благоче́стии наста́ви/ и утверди́ в Правосла́вии.

НАУ́ТРЕНИ

На Бог Госпо́дь: а́ще пра́здник, тропа́рь пра́здника два́жды. Сла́ва, свята́го. И ны́не, пра́здника.

А́ще кроме́ пра́здника, тропа́рь свята́го два́жды. Сла́ва, и ны́не, Богоро́дичен.

По 1м стихосло́вии седа́лен, глас 2:

Па́ству твою́ не забу́ди, о́тче свяще́ннейший,/ окормля́я сию́ в дни благи́я,/ та́кожде во дни скорбе́й и печа́ли.

Сла́ва, и ны́не, пра́здника или́ Богоро́дичен:

Под кров Твой, Де́во Свята́я, прибега́юще,/ не убои́мся озлобле́ний вра́жиих во ве́ки.

По 2-м стихосло́вии седа́лен, глас 2:

Моли́ся о лю́дех твои́х,/ свя́те И́ове первосвяти́телю,/ да избе́гнем искуше́ний лю́тых/ и враго́в наше́ствия.

Сла́ва, и ны́не, пра́здника или́ Богоро́дичен:

Спаси́ нас, Пресвята́я Де́во Чи́стая,/ от вся́кия ну́жды и па́губнаго отча́яния.

По полиеле́и седа́лен, глас 5:

Хвалу́ ти прино́сим, свя́те И́ове,/ иера́рше пресла́вный,/ я́ко до́бре упа́сл еси́  ста́до слове́сных ове́ц твои́х,/ устроя́я то ко спасе́нию./ Те́мже моли́твами твои́ми и ны́не не оста́ви нас,/ пра́зднующих святу́ю па́мять твою́.

Сла́ва, глас то́йже:

Благода́тне торжеству́йте, мона́хов мно́жества/ и и́ноцы оби́тели Новоспа́сския,/ сла́вный бо игу́мен ваш и сподви́жник,/ первосвяти́тель всерусский И́ов,/ я́ко оте́ц чадолюби́вый, пред Го́сподем предстои́т/ и мо́лится о е́же спасти́ся всем нам.

И ны́не, пра́здника или́ Богоро́дичен, глас то́йже:

При́зри на моле́ния на́ша, Де́во Чи́стая,/ и вся печа́ли отжени́,/ ра́дость ве́чную нам да́рующи.

По 50м псалме́ стихи́ра, глас 6:

Егда́ поставле́ние твое́ на престо́л Патриа́рший бы́сть,/ свя́те И́ове, па́стырю пречу́дне,/ тогда́ вся земля́ Русская ра́довашеся,/ и лю́дие, зря́ще добро́ту лица́ твоего́, умиля́хуся,/ благочести́вый же ца́рь Фео́дор со цари́цею Ири́ною че́сть тебе́ воздава́ху./ С ни́миже и мы глаго́лем:/ И́ове пресла́вне, оте́ц и богомо́лец бу́ди нам.

А́ще пра́здник, кано́н пра́здника со ирмосо́м на 6 и свята́го на 8.

А́ще кроме́ пра́здника, кано́н Богоро́дицы со ирмосо́м на 6 и кано́н свята́го на 8

Кано́н свята́го, глас 8.

Пе́снь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́ пешехо́дца спасе́,/ пе́снь Бо́гови воспева́юща.

По́мощь да́ждь ми, Христе́ Бо́же,/ с любо́вию просла́вити иера́рха богому́драго, И́ова всеблаже́ннаго,/ зе́млю Ру́сскую в Правосла́вней ве́ре утвержда́юща/ и лю́ди ея́ к го́рнему Иерусали́му путево́дствующа.

В дре́внем гра́де Ста́рице ро́ждшуся ти, блаже́нне Иоа́нне,/ я́ко благода́ти тезоимени́та нареко́ша тя роди́телие,/ от ни́хже христиа́нскому благоче́стию навы́кл еси́./ Сего́ ра́ди вои́стину благода́ть во избы́тце излия́ся на тя, святи́телю.

Христу́ рабо́тати пла́менне вожделе́в,/ о́браз и́ноческаго жития́ суете́ мирсте́й предпоче́л еси́, блаже́нне,/ те́мже и оби́тель Пресвяты́я Богоро́дицы я́ко ме́сто по́двигов твои́х избра́л еси́.

Богоро́дичен: Ма́ти Бо́жия Пречи́стая,/ при́зри све́тлым όком Твои́м на лю́ди Русския/ и, я́коже во дни святи́теля И́ова Патриа́рха,/ всем посо́бствуй, о Благода́тная.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Госпо́дни за́поведи усе́рдно исполня́я/ и послуша́ние доброразсу́дное ста́рцу показу́я,/ угото́вал есй, όтче И́ове, ду́шу твою́ во оби́тель Ду́ху Свято́му,/ Его́же стяжа́ти и нас моли́твами твои́ми сподо́би.

Ревни́тель и́ноческих трудо́в и по́двигов во оби́тели быв,/ зва́ния мона́шескаго удосто́ился еси́, блаже́нне,/ в не́мже и́менем И́ова нарече́н,/ дре́внему пра́веднику тезоимени́т и подо́бен де́лом яви́лся еси́.

И́нока предо́бра, в де́лех послуша́ния утвержде́нна,/ восхваля́ем тя усе́рдно, преподо́бне И́ове пресла́вне.

Богоро́дичен: Ма́ти Бо́жия, и́ноческий чин возлюби́вшая,/ в не́мже и вели́кия свети́льники яви́вшая,/ умоле́на бу́ди смире́нием сих, моли́твами и труды́.

А́ще пра́здник, конда́к и икос пра́здника.

Седа́лен,глас 1:

Па́стыря моли́твенна, учи́тельна, благоразсу́дна/ яви́ тя Влады́ка Христо́с./ Те́мже мо́лимся ти, свя́те И́ове,/ сподо́би нас дар моли́твы, ума́ просвеще́ние/ от Го́спода сла́вы прия́ти.

Сла́ва, и ны́не, пра́здника или́ Богоро́дичен:

Засту́пница ми́лостивая нам бу́ди/ во вся дни живота́ на́шего, Пречи́стая Де́во,/ на Тя бо наде́жду возлага́ем,/ да не поги́бнем, гре́шнии раби́ Твои́.

Пе́снь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Мно́гими ле́ты во оби́тели тружда́ющуся ти, преподо́бне,/ и и́ноческия обе́ты усе́рдно исполня́ющу,/ призре́ Госпо́дь на тя с высоты́ святы́я Своея́/ и игу́мена оби́тели тя поста́ви,/ к служе́нию вя́щшему предуготовля́я Тя.

Кро́тость, смире́ние, милосе́рдие и любы́/ су́ть тве́рдая основа́ния твоего́ по́двига и́ноческаго, свя́те./ Си́ми изря́дно сия́я,/ богому́дрый игу́мен яви́лся еси́.

Доброде́тельми мно́гими укра́шен,/ вои́стину добр и́ноком наста́вник показа́лся еси́, о́тче,/ путеводствуя сих сло́вом и де́лом./ Те́мже нас, в доброде́телех уббгих,/ твойми моли́твами к Ца́рствию Небе́сному упра́ви.

Богоро́дичен: В дни нестрое́ний и ско́рби,/ егда́ подви́жется ве́ра и упова́ние христиа́н,/ неотсту́пною защи́тою Твое́ю/ соблюди́ расточе́нныя о́вцы ста́да Сы́на Твоего́, Пречи́стая.

Пе́снь 5

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя е́сть чужда́я тьма́, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Возвели́чил еси́, Го́споди, Це́рковь Русскую,/ введя́ сию́ в чин Патриа́рший/ избра́нием пе́рваго Патриа́рха Русскаго, свята́го И́ова достосла́внаго,/ его́же с любо́вию воспева́ем.

Изволе́нием Бо́жиим первосвяти́тель Русския Це́ркве поста́влен бе,/ преподо́бне о́тче И́ове,/ те́мже и досто́йное украше́ние и сла́ва тоя́ яви́лся еси́.

Возра́довася па́ства Русская,/ ви́дящи тя досто́йна первосвяти́теля,/ вои́стину отца́ ми́лостиваго и печа́льника изря́днаго.

Богоро́дичен: Ма́ти Бо́жия!/ Избра́нник Твой вои́стину бе святи́тель И́ов,/ я́ко, еще́ ему́ о́троку су́щу,/ во оби́тели Твоего́ Успе́ния, я́же в Ста́рице, благоче́стию навы́че,/ та́кожде и в хра́ме Твоего́ Успе́ния гра́да Москвы/ Патриа́ршаго са́на удосто́ися.

Пе́снь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Мно́ги по́двиги ко просвеще́нию инове́рных люде́й земли́ Ру́сския/ подъя́л еси́, свя́те И́ове,/ и́стине Христо́вой сих науча́я/ и в доброде́телех укрепля́я.

Возвесели́теся дне́сь, зе́мли Каза́нския, Астраха́нския и Сиби́рския,/ име́юще своего́ изря́днаго ревни́теля благове́стия/ и усе́рднаго предста́теля пред Бо́гом, И́ова всеблаже́ннаго.

Ликовству́йте ны́не, преде́лы Каре́льския и ины́я страны́ полу́нощныя,/ почита́юще святи́теля И́ова,/ кла́сы ве́ры Правосла́вныя в вас возрасти́вшаго.

Богоро́дичен: Обогати́ся земля́ Русская/ явле́нием честны́х ико́н Твои́х, Пресвята́я Де́во,/ И́ову святи́тельствующу,/ и ны́не проба́ви ми́лость Твою́ почита́ющим их.

Конда́к, глас 7:

В годи́ну лю́тых искуше́ний/ многострада́льному И́ову подо́бяся,/ в же́ртву жи́ву и непоро́чну/ себе́ Христу́ прине́сл еси́,/ обрати́в па́ству к покая́нию,/ терпели́ве И́ове святи́телю,/ моли́ и нам за вся благодари́ти Го́спода/ и всегда́ воздава́ти/ сла́ву Бо́гови.

Пе́снь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.

Всеве́дец Госпо́дь предугото́ва тя, первосвяти́телю,/ я́ко стра́жа неусы́пна земли́ Ру́сския во времена́ сму́тная,/ во е́же сохрани́ти ве́ру пра́вую и благоче́стие, подвиза́я всех взыва́ти:/ благослове́н еси́, Бо́же оте́ц на́ших.

Ре́вностию о ве́ре распаля́ем и любо́вию к оте́честву горя́,/ самозва́ннаго лжеца́ и изме́нника небоя́зненно обличи́л есй, святи́телю,/ ве́рныя же научи́л еси́  взыва́ти:/ благослове́н еси́, Бо́же оте́ц на́ших.

О нра́вах до́брых и благоче́стии во кли́рицех и миря́нех при́сно ревну́я, блаже́нне,/ повеле́л еси́  мно́гия свяще́нныя кни́ги печа́тати,/ да сло́во Бо́жие всех дости́гнет./ Те́мже и нас, соверша́ющих па́мять твою́, во благоче́стии утверди́, во е́же пе́ти:/ благослове́н еси́, Бо́же оте́ц на́ших.

Богоро́дичен: Не устраши́ тебе́, святи́телю, я́рость вра́жия,/ егда́ изме́нницы нечести́вии, я́ко зве́рие ди́вии,/ совлеко́ша с тебе́ ри́зы свяще́нныя./ Ты же, боле́знуя се́рдцем о па́стве свое́й, взыва́л есй:/ спаси́ и утверди́ Правосла́вие, Влады́чице Богоро́дице,/ благослове́нная во ве́ки.

Печнь 8

Ирмо́с: На горе́ святе́й просла́вльшася/ и в купине́ огнем Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Острозре́нный ра́зум,/ благозву́чен глас, па́че сла́вия,/ красоту́ добро́тную и ина́я дарова́ния/ даде́ ти, святи́телю, Влады́ка Госпо́дь./ Вои́стину сосу́д избра́н,/ запечатле́н Бо́жиими дарова́ньми, яви́лся еси́.

Страда́льцу дре́внему/ не то́чию тезоимени́т быв, о́тче преподо́бне,/ но и ве́рностию Го́споду, та́кожде и испове́данием ве́ры/ подо́бник изря́дный тому́ яви́лся еси́.

Был еси́ вои́стину оте́ц и богомо́лец люде́й твои́х,/ от напа́стей сих заступа́яй,/ сего́ ра́ди и́мя твое́ просла́вися/ во всем оте́честве Русстем, блаже́нне И́ове.

Богоро́дичен: Ма́ти Бо́жия Пречи́стая,/ ско́рби при́сных рабо́в Твои́х ве́си,/ по́мощь незри́мую и тве́рдую нам низпосли́ моли́твами избра́нника Твоего́,/ первосвяти́теля Русскаго, И́ова достосла́внаго.

Пе́снь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

За́поведь Госпо́дню о милосе́рдии/ до́бре испо́лнил еси́, святи́телю./ Сего́ ра́ди о всех приходя́щих к тебе́/ милосе́рдовал еси́ изря́дно.

Хра́ми Бо́жии во мно́зех граде́х/ тобо́ю, святи́телю, поста́влени бы́ша,/ украша́ющии и освяща́ющии зе́млю Ру́сскую,/ в ни́хже и дне́сь безкро́вная же́ртва о всех и за вся прино́сится Влады́це.

Богому́драго святи́теля и до́браго де́лателя на ни́ве Госпо́дней/ ве́мы тя, свя́те И́ове,/ те́мже и служе́ние твое́ высо́кое велича́ем.

Богоро́дичен: Ты еси́  прибе́жище на́ше, Богора́дованная Влады́чице,/ лю́дие бо Русстии и́мут Тя Путеводи́тельницу ко спасе́нию/ и словесы́ святи́теля И́ова взыва́ют:/ Ма́ти Бо́жия, спаси́ Правосла́вие.

Свети́лен:

Пе́рвенствуяй в Патриа́рсех Русских,/ И́ове, пречу́дне о́тче наш,/ Ты испове́дник ве́ры Правосла́вныя тверд и непоколеби́м яви́лся есй./ Те́мже мо́лим Тя:/ Це́рковь и страну́ Русскую укрепи́ и па́ству твою́ поми́луй.

Сла́ва, и ны́не, пра́здника или́ Богоро́дичен:

К Тебе́ простира́ем моле́бныя ру́це, Влады́чице,/ всех нас огради́/ моли́тв ра́ди и предста́тельством первоиера́рха Русскаго И́ова,/ пресла́внаго отца́ на́шего.

На хвали́тех, а́ще праздник, стихи́ры пра́здника 3 и свята́го 3.

А́ще кроме́ пра́здника, стихи́ры свята́го на 4, глас 2.

Подо́бен: До́ме Евфра́фов:

Преподо́бен и незло́бив,/ терпели́в и милосе́рден,/ вои́стину архиере́й Бо́жий/ был еси́, свя́те И́ове,/ моли́ спасти́ся душа́м на́шим.

Просвеще́нием Христо́вым/ зело́ обогати́вшагося/ и ра́зум и́стинный стяжа́вшаго,/ восхваля́ем тя,// όтче наш И́ове пребога́те.

Це́рковь Ру́сская возвели́чися,/ егда́ Сердцеве́дец Госпо́дь/ досто́йна тя Патриа́ршаго чи́на яви́/ и ве́рна стра́жа Правосла́вия показа́,/ достохва́льне И́ове.

Пресла́вна кончи́на и све́тлость лица́ твоего́/ свиде́тельство свя́тости твоея́ бы́сть./ Сего́ ра́ди я́ко уго́дника Бо́жия тя почита́ем/ и усе́рдно, хва́ляще, про́сим:// род Русский, о́тче наш И́ове, не забу́ди.

Сла́ва, глас 8:

Сле́зно моли́лся еси́  ко Го́споду,/ первосвяти́телю И́ове,/ о е́же Це́ркви Русстей/ при́сно в Правосла́внем ца́рстве пребыва́ти/ и госуда́рю Русскому ле́та мно́га/ во здра́вии и благоче́стии ца́рствовати,/ да не воздви́гнет миродержи́тель тьмы́ ве́ка сего́/ сму́ты в земли́ на́шей,/ да ве́рнии в житии́ ти́хом поживу́т/ и ца́рство Русское  / благоути́шно и непоколеби́мо да пребу́дет.

И ны́не, пра́здника или́ Богоро́дичен.

На Литурги́и слу́жба святи́тельская.

Моли́тва

О пресла́вне о́тче наш И́ове, пе́рвенец во Патриа́рсех Русских и ве́рный испове́дниче Христо́в! Во дни святи́тельства твоего́ му́дро Це́рковь Русскую пасл еси́, лю́ди просвеща́я и утвержда́я сло́вом Христо́вы ве́ры, хра́мы и оби́тели созида́я, та́же Це́рковь Русскую укрепля́я от мо́ря до мо́ря и да́же до грани́ц Сиби́рских. Тверд муж и испове́дник Правосла́вныя ве́ры яви́лся еси́, о́тче, во времена́ попуще́ния Бо́жия, та́же поруга́ние и изгна́ние подъе́м, во оби́тели пусты́нней, иде́же и чин и́ноческий прия́л еси́, ду́шу твою́ в ру́це Бо́жии све́тло пре́дал еси́. Не преста́й, свя́тче Бо́жий, первосвяти́телю Христо́в, лю́ди земли́ твоея́ укрепля́ти ве́ру Правосла́вную кре́пко держа́ти и во смире́нии пребыва́ти. Град сто́льный Москву́ сохрани́ и от нахожде́ния лю́тых изба́ви. О святи́телю прети́хий и прему́дрый! Сподо́би и нас све́тлости ра́ди жития́ твоего́ смиренному́дрию поуча́тися, да та́ко живу́ще, ми́рный коне́ц сподо́бимся прия́ти и Ца́рствие Христа́ Сы́на Бо́жия получи́ти сла́вными и ми́лостивыми моли́твами твои́ми. Ами́нь.

Тропа́рь, глас 5:

Правосла́вия побо́рниче,/ ве́ры Христо́вы испове́дник был еси́,/ первоиера́рше Це́ркве Ру́сския,/ святи́телю о́тче И́ове,/ за ны Христа́ Бо́га моли́:/ ве́ру оте́ческую утверди́ти,/ грехо́в оставле́ние нам дарова́ти/ и пода́ти ми́ру ве́лию ми́лость.

Конда́к, глас 6:

Свети́льник Це́ркве Ру́сския/ и па́стырь до́брый яви́лся еси́,/ святи́телю о́тче И́ове,/ моли́твою твое́ю ко Го́споду/ храни́ зе́млю Русскую/ и спаси́ ду́ши на́ша.