Стихи́ры, глас 4.

Подо́бен: Дал еси́ зна́мение:

Неве́сту нетле́нну,/ укра́шену тя Ду́хом Святы́м, ве́дяще,/ соверша́ем па́мять твою́ святу́ю,/ му́ченице страстоте́рпице,/ и, покланя́ющеся благоче́стно/ моще́м и святе́й ра́це,/ здра́вие почерпа́ем страсте́м на́шим всегда́,/ Акили́но всехва́льная,/ ве́рою тя почита́юще.

Дар принесла́ еси́,/ твои́х удо́в терза́ния,/ Жениху́ твоему́, всечестна́я./ Те́мже, черто́гов тя пресве́тлых сподо́бив,/ просвеща́ет све́том Боже́ственныя сла́вы Пресу́щный,/ Ему́же предстои́ши, ра́дующися,/ о нас приле́жно моли́,/ ве́рно сла́вящих/ твое́, Акили́но, страда́ние.

Жела́нием, прехва́льная,/ одержи́ма Зижди́теля твоего́,/ Того́ страда́ния пло́тию изобрази́ла еси́,/ вся́ко треволне́ние боле́зней претерпе́вши./ И ны́не живе́ши на Небесе́х,/ неболе́зненную сла́ву/ и вене́ц нося́щи неувяда́емый/ и ви́дящи, е́же зрят а́нгельстии чи́ны,/ Акили́но Богодохнове́нная.

И́ны стихи́ры, глас 8.

Подо́бен: О, пресла́внаго чудесе́:

О́тче Трифи́ллие сла́вне,/ слеза́ми мно́гими/ освеща́емь изря́дно,/ к пе́рвому Вино́внику до́брых возлете́л еси́/ и столп светови́ден яви́лся еси́,/ просвеща́я всех словесы́ и чудесы́,/ приступа́ющих к тебе́/ мы́слию всегда́ благопоко́рною./ Тем тя чтим и ублажа́ем.

О́тче свяще́нне Трифи́ллие,/ ты воскри́лием риз че́стно,/ я́ко Ааро́н вторы́й укра́шен,/ святы́х свята́я ны́не зри́ши,/ внутрь быв вторы́я катапета́смы./ О, чи́стаго твоего́ па́че ума́ сия́ния,/ святи́телей Боже́ственное удобре́ние,/ ему́же приобщи́лся еси́.

Име́яй ду́шу ми́лостиву,/ и чист по́мысл,/ и се́рдце нестро́потно,/ и ве́ру нескве́рную,/ и любо́вь нелицеме́рную,/ святи́тельства, о́тче, досто́инство,/ лико́м оте́ческим вчиня́емь че́стно./ Те́мже почита́ем тя свяще́нными пе́сньми/ и благоче́стно вси ублажа́ем и восхваля́ем.

Сла́ва, и ны́не, Богоро́дичен:

Ра́дуйся, душ просвеще́ние,/ согреша́ющих проще́ние,/ неради́вых исправле́ние./ Ра́дуйся, утеше́ние и ра́дость,/ скорбя́щих Помо́щнице./ Ра́дуйся, Блага́я, немощны́х душ исцеле́ние./ Ра́дуйся, примире́ние к Бо́гу и Хода́таице,/ Серафи́м всех я́ко су́щи святе́йши, Чи́стая.

Крестобогоро́дичен:

Тя ви́дящи, пригвожда́ема/ на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ увы́ Мне,– вопия́ше,– Ча́до сла́дкое,/ ра́ны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли всех изба́вивый милосе́рдием Твои́м?

Тропа́рь, глас 4:

А́гница Твоя́, Иису́се, Акили́на/ зове́т ве́лиим гла́сом:/ Тебе́, Женише́ мой, люблю́/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стра́жду Тебе́ ра́ди,/ я́ко да ца́рствую в Тебе́,/ и умира́ю за Тя, да и живу́ с Тобо́ю;/ но, я́ко же́ртву непоро́чную, приими́ мя, с любо́вию поже́ршуюся Тебе́./ Тоя́ моли́твами,/ я́ко Ми́лостив, спаси́ ду́ши на́ша.

Тропа́рь святи́теля, глас то́йже:

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ Я́же веще́й И́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Трифи́ллие,/ моли́ Христа́ Бо́га/ спасти́ся душа́м на́шим.

Кано́н Окто́иха еди́н и святы́х два, на 8. Кано́н святы́я, творе́ние Ио́сифово, его́же краегране́сие: Приими́ пе́ние, добротвори́вая Акили́но. Глас 8.

Песнь 1

Ирмо́с: Посе́ченый несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́,/ и непроходи́мое про́йде Изра́иль,/ песнь же вспева́шеся:/ Го́сподеви пои́м, сла́вно бо просла́вися.

Препросла́влена, Христу́, Жениху́ твоему́,/ на Небесе́х вои́стинну, ра́дующися, предстои́ши./ Те́мже тя на земли́ благоче́стно сла́вящия моли́твами твои́ми воспросла́ви, честна́я,/ и себе́ прича́стники сотвори́, Го́сподеви пою́щия:/ сла́вно бо просла́вися.

В тя все́льшися, благода́ть Ду́ха твою́ ду́шу чи́сту, сла́вная, соверши́,/ и ра́нами те́ла красне́йши была́ еси́./ Те́мже тя Жени́х душ, чи́сту до конца́ нетле́нну су́щу,/ Себе́ обручи́, прехва́льная.

Зиме́ ле́стней, земны́я концы́ испо́лншей дре́вле лю́те,/ испо́лнена су́щи Ду́ха, я́ко му́ченица неле́стная Го́спода Вседержи́теля,/ дости́гла еси́ весну́ жи́зненную и побе́ду взяла́ еси́ победи́тельную,/ Акили́но сла́вная, Богому́драя, досточу́дная.

Богоро́дичен: И́же Безнача́льному Отцу́ ссу́щный вни́де во утробу́ Твою́, Челове́к быв,/ и спасе́ ны, зло́бою прекло́ншияся/ и ле́стию врага́ порабоще́нныя, Мари́е Богоневе́сто./ Сего́ ра́ди ве́рою Тя и любо́вию ублажа́ем.

Ин кано́н свята́го Трифи́ллия, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Хвалу́ Бо́гу ве́рою принесе́м вси,/ Своего́ уго́дника украси́вшему доброде́тельми многообра́зными/ и втора́го Моисе́я воздви́гшему.

Ты, возше́д на го́ру доброде́телей, Боже́ственный зако́н прия́л еси́, о́тче Трифи́ллие,/ и скрижа́лию по́мысла добро́ту души́ твоея́ уясни́л еси́.

Ты, разу́мно, преподо́бне, благоуха́я, яви́лся еси́,/ душе́вное бо исцеле́ние всем прозя́бл еси́,/ я́коже теле́сным, о́тче, богодохнове́нно бы́лие я́влься ве́рным.

Богоро́дичен: Жи́зни исто́чник была́ еси́, Де́во Чи́стая Ма́ти,/ Нача́льника и Го́спода ро́ждши, Жизнь вся́ческих,/ ороша́ющи ве́рою славосло́вящих тя.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Истка́ла еси́ ри́зу све́та благода́тию, сла́вная,/ кро́вию твое́ю, Акили́но му́ченице, свяще́нно обагри́вши.

Уязви́лася еси́ любо́вию Боже́ственною я́ве, всечестна́я,/ те́мже тве́рдо я́звы же и боле́зни лю́тыя претерпе́ла еси́.

Всю тя освяти́ Изба́витель, честна́я, Госпо́дь,/ все́ю кре́постию Сего́, Акили́но, от души́ возлюби́вшу.

Богоро́дичен: Неве́сту Тя безневе́стну и чи́сто, Чи́стая, селе́ние Иису́сово,/ святе́йшу Херуви́м ве́мы.

Ин

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Возсия́ све́тло, я́коже со́лнце ми́ру, па́мять твоя́, святи́телю,/ и просвеща́ет сердца́ на́ша, ве́рно соверша́ющих сию́ благода́тию.

Сад быв Боже́ственнаго Ду́ха, грозд Боже́ственный прозя́бший,/ и ве́ры вино́ нам, ве́рным, мы́сленно раствори́л еси́.

Меч взем Боже́ственныя благода́ти, на́глость посе́кл еси́ велиа́ра/ и добль показа́лся еси́ нам победоно́сец Христо́в, свяще́нне.

Богоро́дичен: Ни язы́к земноро́дных, ни ум безпло́тен возмо́жет рождество́ Твое́ сказа́ти:/ па́че естества́ бо и ума́, Богоро́дице, Зижди́теля породи́ла еси́.

Конда́к святи́теля, глас 8.

Подо́бен: Взбра́нной:

Изря́дством жити́я чистоту́ де́вства прие́м, Трифи́ллие,/ первопресто́льник показа́лся еси́ Левкуси́и/ и яви́лся еси́ тем провозвести́тель и Богоразу́мия наста́вник./ Сего́ ра́ди ра́достно взыва́ем ти:/ ра́дуйся, святи́телей украше́ние.

Седа́лен святы́я, глас 8.

Подо́бен: Прему́дрости:

Доброде́телей осия́вшися Боже́ственным све́том,/ страда́льческим украси́лася еси́, пресла́вная, честна́я, венце́м/ и, красна́ добро́тами бы́вши, ве́рою всех Влады́це уневе́стилася еси́/ вои́стинну, нескве́рная, нетле́нная./ Те́мже Небе́сным сподо́билася еси́ черто́гом, до́бре пострада́вши/ и льсти́ваго победи́вши, Акили́но Богому́драя,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва свята́го, глас 3.

Подо́бен: Боже́ственный ве́ры:

Ре́вность ве́ры име́я, преблаже́нне, прозя́бл еси́ плоды́ зре́лы:/ враго́в бо посрами́л еси́ полки́ и диа́вола, Трифи́ллие, уби́л еси́./ О́тче преподо́бне, Христа́ Бо́га моли́ дарова́ти нам ве́лию ми́лость.

И ны́не, пра́здника или́ Богоро́дичен:

Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

Крестобогоро́дичен:

Нескве́рная А́гница Сло́ва, нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Го́рдаго зми́я ты не́мощию те́ла низложи́ла еси́,/ воева́вши све́тло и томи́телей на́глость потреби́вши.

Муче́ния све́тлостию и де́вства Боже́ственными добро́тами, Акили́но,/ была́ еси́ Влады́це неве́ста изря́дная.

Тече́ния крове́й твои́х многобо́жия огнь погаси́ша,/ чуде́с же струи́ челове́ков омыва́ют неду́ги.

Богоро́дичен: Дрема́нием уны́ния мя сон грехо́вный, Отрокови́це, пости́же,/ бо́дренною моли́твою Твое́ю возста́ви мя к покая́нию.

Ин

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче.

Сосу́д вои́стинну пречи́ст показа́лся еси́, преблаже́нне святи́телю,/ и Боже́ственный Дух в тя всели́ся.

Просве́щся Боже́ственным Ду́хом, ум преста́вил еси́ к Вы́шним/ и на пре́лесть, о́тче, подвиза́лся еси́ кре́пко.

Я́коже а́гнцы, упа́сл еси́ слове́сныя твоя́ о́вцы, преблаже́нне,/ и Христу́ приве́л еси́ словесы́ твои́ми.

Богоро́дичен: Необори́мую сте́ну Тя и держа́вную наде́жду, Богоро́дице,/ ве́рнии, стяжа́хом в напа́стех при́сно.

Песнь 5

Ирмо́с: От но́щи неве́дения,/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.

Волну́емей, я́коже свирепе́ющуся мо́рю, ле́сти иногда́,/ яви́лася еси́ окормля́ема, Акили́но му́ченице, Христо́вою благода́тию.

Смотря́ющи, муче́нице, к венце́м,/ подъя́ла еси́ тве́рдо растерза́ния удо́в твои́х и ну́ждную смерть.

Светоявле́нно украси́лася еси́, сопоста́ты са́мыя уди́вльши,/ кра́сною твое́ю добро́тою и душе́вным воста́нием.

Богоро́дичен: Изба́вленнии вси прароди́тельнаго осужде́ния рождество́м Твои́м,/ ра́дуйся, Тебе́ приглаша́ем, Обра́дованная Препе́тая.

Ин

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Боже́ственною благода́тию, му́дре, оде́явся держа́вно, сла́вне,/ врага́ низложи́л еси́ си́лу/ и вене́ц от Бо́га прия́л еси́ досто́йно, я́ко таи́нник, Трифи́ллие.

На Небо́ возве́д души́ твоея́ о́чи, сла́вне,/ Боже́ственных позна́л еси́ уче́ний бе́здну, о́тче,/ челове́ком открыва́я Тро́ическое сия́ние.

Все ору́жие взем, священноявле́нне, Бо́жие,/ посрами́л еси́ собо́рно вра́жие му́жество/ и, уче́нии Боже́ственными главу́ сокруши́в, ве́чно ра́дуешися.

Богоро́дичен: Воплоще́нна из Тебе́, Богороди́тельнице, ве́рнии, позна́хом,/ без се́мене Сы́на рожде́нна, Бо́га и́стинна и Челове́ка естество́м./ Те́мже Тя сла́вим.

Песнь 6

Ирмо́с: Ио́ну в ки́те, Го́споди,/ еди́наго всели́л еси́,/ мене́ же, свя́заннаго мре́жами вра́жиими,/ я́ко от тли о́наго, спаси́.

После́довати Христо́вым сла́вным вожделе́ла еси́ страда́нием, де́во,/ и мужему́дренно претерпе́ла еси́ бие́ния/ и расторга́ния свята́го твоего́ телесе́.

Многови́дныя боле́зни претерпе́ла еси́,/ огня́ же небрегла́ еси́ боле́зни./ Те́мже, Акили́но, и боле́зни на́ша вся облегча́еши моли́твами твои́ми.

Смотря́я свы́ше, чудя́шеся лик А́нгельский, сла́вная де́во, терпе́нию твоему́,/ ка́ко безпло́тныя враги́ с пло́тию побежда́ла еси́ благода́тию.

Богоро́дичен: Да бог челове́к бу́дет, Бог ви́ден бысть Челове́к, Де́во,/ из Твои́х ложе́сн несказа́нно ро́ждся,/ и е́же бе, пребы́в неизме́нен.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Я́коже Ено́х, преста́вился еси́ ду́хом от земны́х ты к Небе́сным/ и нетле́ния прия́л еси́ по достоя́нию, блаже́нне, вене́ц.

Левкуси́я тя име́ утвержде́ние, о́тче,/ и па́стыря, и таи́нника благода́ти,/ я́ко светоно́сно со́лнце, просвеща́юща мир чудесы́.

Непоколеби́мое Це́ркве основа́ние,/ все́ми мя кова́рствы врага́ коле́блема,/ души́ моея́ хра́мину моли́твами твои́ми, о́тче, ны́не утверди́.

Богоро́дичен: Вы́шши Го́рних сил и святе́йши еси́, Всенепоро́чная,/ па́че естества́ вме́щши Невмести́маго Сло́ва во утро́бе Твое́й.

Конда́к, глас 2.

Подо́бен: Вы́шних ища́:

Де́вства твоего́ добро́тами предочи́стивши ду́шу твою́,/ на высоту́ муче́нием востекла́ еси́, Акили́но всечестна́я,/ любо́вию Жениха́ твоего́ Христа́ уязви́вшися,/ Ему́же со А́нгелы предстои́ши, веселя́щися,/ с ни́миже не преста́й моля́ся о всех нас.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Телеси́ стра́ждущу, Богому́драя, неради́ла еси́,/ смотря́ющи су́щая та́мо воздая́ния, и свет, и сла́ву, Акили́но,/ и Бо́жию красоту́, и Боже́ственное весе́лие.

Нескве́рно нося́щи те́ло и се́рдце, Го́сподеви соедине́но,/ пред суди́щем, чи́стая, мучи́телей предста́ла еси́,/ неразуме́юща мучи́теля облича́ющи, Богому́драя.

Ми́ра измени́ла еси́ тле́ннаго преми́рныя ра́ди жи́зни нетле́нныя,/ и вре́менныя пи́щи пребыва́ющею, де́во,/ и теле́сным обру́чником безсме́ртнаго Жениха́.

Тро́ичен: Пе́сньми Боже́ственное Единонача́лие, Тричи́сленное у́бо Ли́цы пресла́вно,/ естество́м же про́сто су́ще, почита́ем, вопию́ще:/ Го́споди Бо́же, благослове́н еси́ во ве́ки.

Ин

Ирмо́с: Те́лу злато́му прему́дрыя де́ти не послужи́ша,/ и в пла́мень са́ми поидо́ша,/ и бо́ги их обруга́ша,/ среди́ пла́мене возопи́ша, и ороси́ я А́нгел:/ услы́шася уже́ уст ва́ших моли́тва.

О́бразу страсте́й воздержа́нием разу́мно не поклони́лся еси́/ и не опали́ теле́сная пещь, о́тче, ро́су твою́./ Ду́ха же испо́лнився Свята́го, де́рзостне взыва́л еси́:/ благослове́н еси́, Го́споди, Бо́же оте́ц на́ших.

Па́стырь перводе́телен показа́лся еси́ кре́пок Левкуси́и, му́дре,/ и приве́л еси́ Влады́це твоему́ мно́жество люде́й, всепло́дне./ Те́мже ве́рно про́сим:/ предстоя́, моли́ся о ста́де твое́м Бо́гу, изба́витися вся́кия тли.

Живы́й исто́чник слез твои́х, му́дре и пресла́вне, всех удивля́ет:/ исцеле́ний бо струя́ми при́сно богатя́щеся, Трифи́ллие,/ и твои́х моще́й благода́ть пое́м и глаго́лем:/ благослове́н еси́, Го́споди, Бо́же оте́ц на́ших.

Богоро́дичен: Приста́нище тве́рдо, Предста́тельнице стра́шная и стена́ необори́мая/ в ну́ждах бе́дствующим, обурева́емым в ско́рбех,/ Я́же к Сы́ну Твоему́ мольбы́, Богоро́дице, иму́щи,/ от многообра́зных искуше́ний спаса́й рабы́ Твоя́.

Песнь 8

Ирмо́с: Богоглаго́ливии о́троцы в пещи́/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Просвеще́на сия́нием чистоты́ и обагре́нии кро́вными испещре́нна,/ предстои́ши, Акили́но деви́це, Христу́ Бо́гу на́шему.

Чи́ста же́ртва принесла́ся еси́, и приноше́ние пресве́тло,/ и я́ко благово́нный фимиа́м, Акили́но Богому́драя, Христу́ Бо́гу на́шему.

Неду́ги разли́чныя челове́ком цели́т и отгоня́ет де́монский вред/ свято́е те́ло твое́, Акили́но, во гро́бе, пресла́вная, лежа́щее.

Богоро́дичен: Нетле́нное Сло́во, па́че сло́ва тле́ния нас вся́каго избавля́юща, родила́ еси́,/ сего́ ра́ди Тя вси, Де́во, сла́вим.

Ин

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.

Спасе́ния путь всем отве́рзл еси́, му́дре, су́щим в Левкуси́и,/ пе́рвое сед на престо́ле церко́внем ве́рно,/ от Боже́ственнаго сия́ния, сла́вне, сий, святи́телю, прии́м досто́йно.

Прибега́ющия ве́рно к ра́це твое́й, священноявле́нне,/ от бед изба́вити и искуше́ний врага́/ моли́ Благоде́теля Христа́ неоску́дно.

Удиви́шася, му́дре, а́нгельстии ли́цы твоему́ поще́нию,/ и де́монская мно́жества тре́пет прия́ша вели́к, и вся́ко зда́ние ужасе́ся,/ челове́ческий же род почита́ет тя досто́йно.

Богоро́дичен: Не забу́ди гла́са, Предста́тельнице стра́шная, моли́твенник Твои́х,/ но от вся́кия боле́зни моли́твами Твои́ми и вся́каго преще́ния исхи́ти,/ преклони́т бо Твое́ Ма́тернее Бо́га моле́ние.

Песнь 9

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

На Кресте́ пригво́ждшемуся Спа́су де́ва сраспя́тся нра́вом пра́вым/ и зми́еву главу́ попра́вши. Красна́ добро́та твоя́ и вели́ко твое́й души́ благоро́дие, пребога́тая,/ богови́дно, Акили́но, ны́не явле́нно бысть.

Совоку́пльшися с ли́ки Безпло́тных и с му́ченическими собо́ры, прехва́льная,/ о нас всех Бо́га моли́.

Пресла́вная твоя́ па́мять всех созыва́ет ра́достно, Акили́но,/ пе́ти твоя́ сла́вныя, му́ченице, боле́зни и страда́ния.

Богоро́дичен: Глас Тебе́ а́нгелов, Пречи́стая, вопие́м:/ ра́дуйся, спасе́ние всех челове́ков/ и сла́вных му́ченик Боже́ственное венча́ние.

Ин

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Мы́сленное о́ко на высоту́ взем, позна́л еси́ Тро́ическую зарю́/ и, земны́я осия́в, му́дре,/ обогати́л еси́ всех Боже́ственным просвеще́нием боголе́пно./ Тем тя по достоя́нию в пе́снех велича́ем.

Свети́льник показа́лся еси́, всеблаже́нне, мы́сленный левкуси́ем,/ обходя́ окре́стныя страны́, му́дре,/ и Христо́вым позна́нием, я́ко луча́ми одушевле́нными, украси́в свяще́нными боголе́пно,/ и ле́сти ми́ра а́бие избавля́я.

Ны́не, ве́рнии, собра́вшеся, мо́лим тя, о́тче, при́сно моли́ти Христа́:/ я́ко да гла́да, и иноплеме́нников па́губы,/ и вся́кия беды́ изба́вит нас, я́ко си́лен,/ да тя по достоя́нию в пе́снех велича́ем.

Богоро́дичен: Несказа́ннаго чревоноше́ния неизрече́нное рождество́ ко́е сло́во ска́жет земноро́дных?/ Младе́нец бо бе и Бог рожде́йся;/ ро́ждшая же Раба́ и Ма́ти рожде́ннаго Сы́на, Богоро́дице./ Тем Тя пое́м и рождество́ Твое́.

НА ВЕЧЕ́РНИ

На Го́споди, воззва́х: стихи́ры на 6, глас 1.

Подо́бен: О, ди́вное чу́до:

О, ди́вное чу́до!/ неве́дущии и́стины просвеща́ются,/ и немощни́и душе́ю укрепля́ются,/ весели́ся, гра́де Москва́,/ возопии́м, ве́рнии, приходя́ще ко хра́му Бо́га и Спа́са на́шего,/ преподо́бнии отцы́, ра́дуйтеся,/ хода́тайством ва́шим Госпо́дь/ подае́т ми́ру ве́лию ми́лость.

О, ди́вное чу́до!/ кора́бль в пучи́не бу́рею не потопля́ется,/ и по обе́ту устрое́ние оби́тели быва́ет,/ весели́ся, гра́де Москва́,/ возопии́м, ве́рнии, преподо́бных Андрони́ка, Са́вву и Алекса́ндра иму́ще предста́телей,/ всеблаже́ннии отцы́, ра́дуйтеся,/ моли́твами ва́шими Госпо́дь/ подае́т ми́ру ве́лию ми́лость.

Ди́вны дела́ Твоя́, Го́споди:/ хотя́й вообрази́тися ико́нным писа́нием/ и от земли́ к Не́бу ум наш возвести́,/ яви́л еси́ святы́я иконопи́сцы,/ богодохнове́нными сия́ющия чудесы́,/ преподо́бнии Дании́ле и Андре́е, ра́дуйтеся,/ ико́нами ва́шими Госпо́дь/ подае́т ми́ру ве́лию ми́лость.

И́ны стихи́ры, глас 4:

Егда́ в пра́здник Све́тлаго Воскресе́ния/ преподо́бнии Дании́л и Андре́й/ боже́ственныя ико́ны созерца́ху,/ тогда́ ра́дости и све́тлости исполня́хуся,/ ум вознося́ще к Боже́ственному све́ту,/ иде́же ны́не ликовству́юще,/ моли́те о душа́х на́ших.

Егда́ хотя́ше Дании́л/ жития́ земна́го разреши́тися,/ узре́ возлю́бленнаго ему́ Андре́я,/ пре́жде преста́вльшагося к Бо́гу,/ призыва́юща его́ в Небе́сное блаже́нство,/ тогда́ в ра́дости дух свой Го́споду предаде́,/ Ему́же ны́не ку́пно, отцы́ преподо́бнии, предстоя́ще,/ моли́те о душа́х на́ших. Прему́дрости тала́нт умно́живше, пребога́тии,/ ра́дости сподо́билися есте́ Го́спода своего́,/ Ему́же ны́не предстоя́ще,/ сою́зом любве́ связу́еми/ и испо́лнены благода́тию Боже́ственнаго све́та,/ моли́те о душа́х на́ших. 

Сла́ва, глас 6:

Естество́м неопи́санный Бог/ милосе́рдия ра́ди безме́рнаго/ отце́м, проро́ком, патриа́рхом и царе́м/ в се́нех и о́бразех явля́шеся,/ ны́не же благоизво́ли на всечестны́х ико́нах/ преподо́бными иконопи́сцы изобража́тися,/ поне́же по́честь ико́нная на первообра́зная прехо́дит,/ и ра́ди такова́го изображе́ния/ трисвята́я песнь Пресвяте́й, и Единосу́щней, и Животворя́щей Тро́ице/ на земли́ прино́сится.

И ны́не, Богоро́дичен.

Вход. Проки́мен дне. И чте́ния преподо́бническая.

На стихо́вне стихи́ры, глас 2.

Подо́бен: До́ме Евфра́фов:

От Царьгра́да к Москве́/ со сла́вою прино́сится Спа́сов о́браз,/ в мо́ри чудеса́ творя́,/ моли́твами преподо́бнаго Андрони́ка/ освяща́ется Ру́сская земля́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дом Спа́са воздви́гл еси́,/ Андрони́че пресла́вне,/ те́мже и всели́ся в тя Спас/ со Отце́м и Святы́м Ду́хом,/ сотворя́я дом в души́ твое́й.

Стих: Честна́ пред Го́сподем/ смерть преподо́бных Его́.

Победи́тель муже́й нарече́ся,/ победи́тель страсте́й яви́ся,/ Андрони́к да восхва́лится днесь,/ той бо мо́лит Спа́са Христа́/ изба́витися нам страсте́й.

Сла́ва, глас и подо́бен то́йже:

От оте́чества и оби́тели свята́го Се́ргия/ бя́ше блаже́нный Андрони́к/ и на Небесе́х обрете́ оби́тель ку́пно с ним,/ иде́же мо́лится ко Пресвяте́й Тро́ице/ спасти́ся душа́м на́шим.

И ны́не, глас и подо́бен то́йже:

О, сла́дкаго Твоего́ гла́са,/ Ма́ти Христа́ моего́!/ О, чу́дныя любве́ и Твоего́ посеще́ния, Влады́чице!/ О, неизрече́ннаго Твоего́ обеща́ния,/ е́же с на́ми пребыва́ния.

Тропа́рь, глас 2:

Плоды́ доброде́телей на земли́ прине́сше,/ преподо́бнии отцы́,/ в Небе́сных черто́зех ны́не благоуха́ете, я́ко ра́йстии цве́ти,/ и лице́м к лицу́ зри́те Пресвяту́ю Тро́ицу,/ Ю́же дерзнове́нно моли́те/ спасти́ся душа́м на́шим.

Ин тропа́рь, глас 8:

От ю́ности свое́й, преподо́бнии отцы́ Андрони́че и Са́вво,/ в пусты́ни всели́стеся Се́ргия вели́каго,/ того́ житию́ после́дующе,/ плоды́ смире́ния и послуша́ния возрасти́ли есте́,/ сего́ ра́ди сподо́бившеся бы́ти строи́тели и первонача́льники/ обе́тныя оби́тели святи́теля Алекси́я,/ с ни́мже испроси́те у Христа́ Бо́га ве́рным лю́дем здра́вие и спасе́ние/ и душа́м на́шим ве́лию ми́лость.

Ин тропа́рь, глас 1:

Безмо́лвие от ю́ности возлюби́в,/ на го́ру Ма́ковец прише́л еси́, Андрони́че блаже́нне,/ оби́тель о́бщаго жития́ устро́ил еси́ в земне́м гра́де Москве́,/ во оби́тели Небе́снаго гра́да ны́не ликовству́еши,/ моли́ся Христу́ Бо́гу/ спасти́ся душа́м на́шим.

И ны́не, Богоро́дичен по гла́су тропаря́.

НА У́ТРЕНИ

На Бог Госпо́дь: тропа́рь, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4:

Свети́льницы пресве́тлии и́стины Христо́вы,/ мир просвети́сте по́двиги и труды́ ва́шими,/ отцы́ преподо́бнии, моли́те Бо́га и Спа́са на́шего/ спасти́ся душа́м на́шим.

Сла́ва, и ны́не, Богоро́дичен:

Де́во Всенепоро́чная, Я́же Пресу́щнаго Бо́га ро́ждшая,/ со преподо́бными Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.

По 2-м стихосло́вии седа́лен, глас 8:

Услы́шавше сло́во Ева́нгельскаго уче́ния, отреко́стеся плотски́х дел Христа́ ра́ди/ и духо́внии яви́стеся лю́дем води́телие,/ мона́хом же о́браз пра́вости, преподо́бнии отцы́,/ моли́те ми́лостиваго Бо́га и Спа́са на́шего/ грехо́в оставле́ние пода́ти/ чту́щим любо́вию святу́ю па́мять ва́шу.

Сла́ва, и ны́не, Богоро́дичен:

Се Тебе́ ро́ди родо́в сла́вят, я́коже прорекла́ еси́, Отрокови́це,/ Созда́теля бо всех была́ еси́ пала́та и Боже́ственный храм,/ в не́мже всели́ся Вы́шний и пло́тию обложи́ся, да спасе́т нас.

По полиеле́и седа́лен, глас 6:

Егда́, преподо́бнии, к Боже́ственному жела́нию ум свой впери́сте,/ тогда́ оста́вили есте́ вся до́лу влеку́щая мудрова́ния/ и, я́ко до́брии и блази́и раби́, да́нный вам от Го́спода тала́нт/ по́двиги и труды́ свои́ми во сто крат умно́жили есте́./ Сего́ ра́ди бога́тство неотъе́млемое на Небесе́х стяжа́вше, отцы́ преподо́бнии,/ моли́те Спа́са Христа́ пода́ти нам ве́лию ми́лость.

Сла́ва, и ны́не, Богоро́дичен:

Пречи́стая Ма́ти Христа́ моего́,/ Хода́таице, и Засту́пнице, и кре́пкая Помо́щнице ро́ду челове́ческому,/ бу́ди и нам Хода́таица и Моли́твенница к Сы́ну Своему́ и Бо́гу на́шему,/ я́ко да при́зрит на свято́е ме́сто сие́,/ е́же и возложе́но есть в похвалу́ и честь пречи́стаго о́браза Его́.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 105. (Зача́ло же 43-е чти на моле́бне).

По 50-м псалме́ стихи́ра, глас 6:

Преподо́бнии отцы́,/ сою́зом любве́ связу́емии,/ приими́те моле́бных рук на́ших воздея́ние/ и, я́коже до́брии и блази́и раби́ Госпо́дни,/ моли́те Христа́ Спа́са мир просвети́ти/ по́двиги, тру́ды и моли́твами ва́шими.

И́на стихи́ра по 50-м псалме́, глас 6.

Подо́бен: Егда́ преставле́ние:

Егда́ Дании́л разболе́ся/ и в коне́чном дыха́нии бысть,/ ви́де своего́ спо́стника Андре́я во мно́зе сла́ве,/ с ра́достию призыва́юща его́ в ве́чное блаже́нство и реку́ща:/ о Дании́ле, наста́вниче мой!/ Блаже́н путь, в онь же и́деши, бра́те, днесь,/ я́ко угото́вася тебе́ ме́сто поко́я./ Но, о спо́стниче мой!/ моли́ся приле́жно Влады́це Христу́,/ да поми́лует тя и в коне́чный час сме́ртный.

Кано́н, сло́жен от жити́й преподо́бнаго Епифа́ния Прему́драго и священнои́нока Пахо́мия Логофе́та. Глас 8.

Песнь 1

Ирмо́с: Ди́вному Бо́гу вели́чия принесе́м,/ и великоле́пно с на́ми/ да воспое́т земля́ и не́бо/ я́сно сла́ву Его́.

Припев: Преподо́бнии отцы́, моли́те Бо́га о нас.

Андрони́че преподо́бне, по́мощь пода́й уму́ моему́/ просла́вити тя сло́вом,/ да и про́чии ви́дят сла́ву, е́юже украси́ тя Бог на земли́.

Возлюби́л еси́ Боже́ственное безмо́лвие па́че молвы́ челове́ческия,/ молча́ние па́че слове́с,/ кро́тость па́че де́рзости, Андрони́че блаже́нне.

От ю́ности, преподо́бне Андрони́че,/ кро́ткаго учи́теля благоразу́мный учени́к яви́ся,/ во вся́цем воздержа́нии, моли́тве и безмо́лвии пребыва́я.

Богоро́дичен: Исцели́, Благода́тная, я́звы души́ мое́й,/ уврачу́й попече́нием те́плым,/ ны́не проше́ния услы́ши и Сама́ заступи́.

Песнь 3

Ирмо́с: Утверди́ мя, Го́споди, си́лою кре́стною/ и да́руй мне се́рдце чи́стое,/ да о Тебе́ хвалю́ся, Бла́же.

Прови́дев преподо́бный Се́ргий твое́ послуша́ние,/ повеле́ ти еди́ному жи́ти в ке́ллии,/ зело́ бо возлюби́л еси́ безмо́лвие, Андрони́че блаже́нне.

В но́щех воздвига́ше ру́це твоя́ во свята́я/ и благословля́ше Го́спода, преподо́бне Андрони́че,/ днем же в послуша́ниих пребыва́л еси́.

Зря святы́й Се́ргий доброде́тель, в тебе́ множа́щуюся, преподо́бне Андрони́че,/ зело́ Бо́га моля́ше,/ да да́рует ти кре́пость до конца́ соверши́ти тече́ние.

Богоро́дичен: Искорени́ бесо́в лука́вства, о Помо́щнице,/ разруши́ по́мыслы страсте́й,/ очи́сти се́рдце и моли́твы дар возгре́й.

Седа́лен, глас 4:

Жите́йское мо́ре мно́гими по́двиги воздержа́ния и труды́ преплы́вше,/ ко приста́нищу Свята́го Ду́ха дости́гли есте́, преподо́бнии отцы́ и богому́дрии,/ моли́те и нам Того́ благода́ть стяжа́ти.

Сла́ва, и ны́не, Богоро́дичен:

Тебе́, Ма́ти сла́дкаго моего́ Христа́, Хода́таицу предлага́ем, раби́ Твои́,/ Ты бо еси́ всем спаси́тельное упокое́ние, и очисти́лище,/ и благоути́шное приста́нище обурева́емым во гресе́х.

Песнь 4

Ирмо́с: Я́ко Петру́, ру́ку простры́й в по́мощь/ и мене́ поми́луй/ и спаси́, я́ко Человеколю́бец.

Се, что добро́ или́ что красно́,/ но е́же жи́ти бра́тии вку́пе,–/ сие́ помышля́я во уме́ свое́м, Андрони́к рече́:/ а́ще бу́дет уго́дно Бо́гу, се мо́жет и на де́ло произвести́.

От запреще́ния Твоего́, Го́споди, побе́гнут во́ды,/ от гла́са гро́ма Твоего́ убоя́тся,–/ си́це моля́шеся святи́тель Алекси́й,/ да изба́вится морска́го волне́ния и належа́щия ско́рби.

Егда́ обеща́ся святи́тель Алекси́й це́рковь созда́ти,/ преста́ мо́ре от волне́ния своего́/ и в тишину́ ве́лию преложи́ся.

Богоро́дичен: Отврати́ нахожде́ния го́рьких бесо́в,/ прожени́ их Твои́ми моли́твами, Де́во,/ ны́не си́лу пода́й на моли́тву/ и кре́пость на по́двиг, о Ма́ти.

Песнь 5

Ирмо́с: У́тренюет дух мой к Тебе́, Бо́же,/ зане́ свет повеле́ния прише́ствия Твоего́,/ и́миже у́бо озари́ ум наш, Влады́ко,/ и наста́ви на стезю́ жи́зни.

Не возбраня́й, его́же ви́диши могу́ща пасти́ ста́до Христо́во, сан прия́ти,–/ рече́ святи́тель Алекси́й преподо́бному Се́ргию,/ си́це прозрева́я Андрони́ка блаже́ннаго.

Обре́тше ме́сто близ Я́узы реки́, иде́же монасты́рь созда́ти,/ преподо́бный Андрони́к с ра́достию помышля́ше в себе́:/ сей поко́й мой во век ве́ка,/ зде вселю́ся, я́ко изво́лих и́  .

Преподо́бный Се́ргий, благослови́в оби́тель Спа́сову, рече́:/ Го́споди, при́зри с Небесе́, и виждь, и посети́ ме́сто сие́,/ его́же благоизво́ли созда́ти во сла́ву свята́го и́мене Твоего́.

Богоро́дичен: Низпосли́ нам благода́ть Твою́, Влады́чице,/ моли́твами на Не́бо возведи́,/ щедро́т испо́лни, Всеблага́я,/ и к Сы́ну ми́лости проле́й.

Песнь 6

Ирмо́с: Ри́зу мне пода́ждь све́тлу,/ одея́йся Све́том, я́ко ри́зою,/ Многоми́лостиве, Христе́ Бо́же наш.

Созда́л еси́ це́рковь прекра́сну во И́мя Го́спода Бо́га и Спа́са на́шего, преподо́бне Андрони́че,/ да благословя́т Го́спода вси раби́ Госпо́дни,/ стоя́щии во хра́ме Госпо́дни.

До́бре управля́я ста́дом множа́щимся,/ преподо́бный Андрони́к по́двиги вя́щия приима́ше на ся,/ коего́ждо, я́ко о́тец, наказу́я и о́бще соглаше́ние в бра́тии творя́.

Запреща́я и моля́,/ воставля́я на неви́димыя враги́ и тя́готы всех нося́,/ преподо́бный Андрони́к бя́ше о́бразом кро́ток,/ кро́ткаго учи́теля благоразу́мный учени́к.

Богоро́дичен: Ду́шу мою́, Богоро́дице, грехо́м омраче́нную,/ ны́не очи́сти, Пречи́стая,/ све́та испо́лни, Пресве́тлая,/ сле́зы пода́й, Милосе́рдая.

Конда́к, глас 3:

Вас мо́лим, преподо́бнии отцы́ на́ши,/ те́лом почива́ющия на земли́,/ ду́хом же Бо́жию престо́лу предстоя́щия:/ моли́теся о гра́де Москве́/ и о всех, почита́ющих честну́ю па́мять ва́шу.

И́кос:

Ка́ко воспои́м вас, преподо́бнии отцы́,/ Андрони́че, Са́вво и Алекса́ндре, всечестни́и игу́мени,/ Дании́ле и Андре́е, изя́щнии иконопи́сцы,/ или́ ки́я благодаре́ния и хвалы́ принесе́м в па́мять ва́шу?/ Вы бо есте́ при́снии Небе́снии хода́таи, и покрови́телие, и моли́твенницы о гра́де Москве́/ и о всех, почита́ющих честну́ю па́мять ва́шу.

Песнь 7

Ирмо́с: Подража́тели трие́х Твои́х, Го́споди, отроко́в сотвори́ ны,/ сопротивля́ющияся греху́,/ и огнь страсте́й попира́ющия, и пою́щия:/ благослове́н еси́, Бо́же оте́ц на́ших.

Бра́тству умножа́вшуся премно́гу,/ бысть монасты́рь вели́к, сла́вен благода́тию Бо́жиею/ и строе́нием доброде́тельна му́жа Андрони́ка, воспева́вшему:/ благослове́н еси́, Бо́же оте́ц на́ших.

Процве́л еси́, я́ко крин, посреде́ бра́тии, преподо́бне Андрони́че,/ прине́сл еси́ плоды́ доброде́телей,/ сего́ ра́ди да́рует ти Бог благода́ть чуде́с, пою́щему:/ благослове́н еси́, Бо́же оте́ц на́ших.

Разуме́в е́же ко Го́споду свое́ исхожде́ние, преподо́бный Андрони́к/ вручи́ па́ству своему́ ученику́, Са́вве и́менем,/ в доброде́телех зело́ сия́ющу,/ и, наказа́в о по́льзе, ко Го́споду оты́де, поя́:/ благослове́н еси́, Бо́же оте́ц на́ших.

Богоро́дичен: В Го́рняя, Пречи́стая Де́во, се́рдце напра́ви,/ си́лу к мо́литве пода́й,/ ум собери́ и Сама́ в чистоте́ сохрани́.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Почита́ем бысть преподо́бный Са́вва/ от вели́ких князе́й и все́ми людьми́/ ра́ди вели́ких его́ доброде́телей и чу́днаго и изря́днаго жити́я.

Наипа́че умно́жися ста́до доброде́тельных учени́к преподо́бнаго Са́ввы,/ муже́й вели́ких, че́стных,/ от ни́хже мно́зи произведе́ни бы́ша на игу́менства,/ о́ви же на епи́скопства.

Не́мощь душе́вную на́шу исцели́ ны́не, преподо́бне Са́вво,/ я́коже не́когда по отше́ствии к Бо́гу свободи́л еси́ от блу́дныя стра́сти священнои́нока Ефре́ма.

Богоро́дичен: Свободи́ от теле́сных страсте́й, о Влады́чице,/ в покая́ние дух приведи́,/ обрати́ помышле́ние к Не́бу и грехо́вных дел отврати́.

Песнь 9

Ирмо́с: Неви́димаго зра́ком Боже́ственным прие́мшая,/ Неискусобра́чная Де́во и Ма́ти,/ пе́сньми Рождество́ Твое́ велича́ем.

Ста́рец Андре́й, иконопи́сец преизря́дный,/ всех превосходя́щий в прему́дрости зе́льне и седи́ны честны́ име́я,/ подписа́нием чу́дным свои́ма рука́ма/ украси́ в па́мять оте́ц свои́х це́рковь Спа́са Христа́.

Не оста́вите нас си́ры, преподо́бнии Дании́ле и Андре́е,/ но моли́те Бо́га, Творца́ и Худо́жника ми́ра,/ да просла́вит ико́ны ва́ша чудесы́.

О́тче Алекса́ндре преподо́бне,/ муж доброде́телен, мудр и изря́ден зело́ был еси́,/ по́мощь пода́й, не оста́ви посеща́ти чад твои́х моли́твами свои́ми.

Богоро́дичен: Ра́дуйся, прино́сим Ти, Чи́стая,/ ра́дуйся, преподо́бных оте́ц огражде́ние кре́пкое,/ нас на моли́тву ско́ро возста́ви и в беда́х помози́.

Свети́лен:

По́двиги и труды́ у́бо пе́рвее до́бре искуси́вшеся,/ второ́е умноже́нием тала́нта на Небеса́ возшли́ есте́, преподо́бнии отцы́,/ иде́же, све́тле осиява́еми, предстоя́ще Спа́су Христу́,/ моли́теся те́пле о пою́щих вас.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на боже́ственную руку́ Пребога́тое Сло́во, непреста́нно и неизме́нно.

На хвали́тех стихи́ры, глас 4:

Да́нный вам от Го́спода тала́нт умно́живше,/ преподо́бнии отцы́,/ о земны́х бы́ли есте́ ве́рни,/ в Небе́сных ны́не поста́влени,/ моли́те спасти́ся душа́м на́шим.

Да́нный вам тала́нт не скры́вше в зе́млю,/ преподо́бнии отцы́,/ но сотвори́сте еди́ным тала́нтом мно́гия,/ внидо́сте в ра́дость Го́спода своего́,/ моли́те о душа́х на́ших.

Да́нный вам от Го́спода тала́нт обогати́сте,/ преподо́бнии отцы́,/ и мно́гия лю́ди по́двиги и труды́ ва́шими/ ко све́ту Богоразу́мия приведо́сте,/ моли́те спасти́ся нам.

Сла́ва, глас 8:

Преподо́бнии отцы́,/ поучи́вшеся день и нощь в зако́не Госпо́дни,/ сподо́бистеся до́брии и блази́и раби́ бы́ти,/ и ны́не плод ва́ших трудо́в венцы́ вам процвете́,/ дерзнове́ние иму́ще ко Христу́ Спа́су на́шему,/ испроси́те нам очище́ние и ве́лию ми́лость.

И ны́не, глас то́йже:

Ма́терь Бо́жию Тя вси ве́мы,/ ро́ждшую па́че ума́:/ от Тебе́ бо Безле́тный в ле́то воплоща́ется,/ Невмести́мый во чре́ве вмеща́ется./ О, неизрече́ннаго снизхожде́ния!/ О, е́же о нас исполне́ния смотре́ния,/ вознесе́ бо естество́ пе́рстное на Не́бо Человеколю́бец Спас,/ Его́же моли́, Всенепоро́чная,/ поми́ловати и спасти́ нас.

Славосло́вие вели́кое и отпу́ст.

На Литурги́и слу́жба преподо́бническая по уста́ву. На моле́бне Ева́нгелие от Матфе́я, зача́ло 43.

Моли́тва

О преподо́бнии и Богоно́снии отцы́, па́стырие и учи́телие и неле́ностнии наста́вницы на́ши! О земны́х небре́гше, в зе́млю кро́тких всели́лися есте́, из нея́же израсти́ли есте́ плоды́ доброде́телей; тле́нныя тала́нты не сокро́виществовавше, нетле́нныя тала́нты преумно́жили есте́ во сто крат и мно́жае; челове́ческия сла́вы теку́щия не иска́вше, возда́ли есте́ сла́ву Бо́гу и Спа́су всех и сего́ ра́ди прославля́етеся ны́не на Небесе́х в Це́ркви перворо́дных. Моли́те Человеколю́бца Спа́са Христа́, да просвети́т ны, помраче́нныя, покая́нием, да освяти́т ны, гре́шныя, си́лою, наи́тием и де́йствием благода́ти Свята́го Ду́ха, чрез достопокланя́емыя ико́ны подае́мою, да поми́лует ны, немощны́я, моли́твами ва́шими и предста́тельством Пренепоро́чныя Его́ Ма́тере и сподо́бит узре́ти сла́ву пречи́стаго ли́ка Своего́ во Ца́рствии Небе́снем. Ами́нь.