НА ВЕЧЕ́РНИ

На Го́споди, воззва́х:пое́м стихи́ры, глас 4.

Подо́бен: Дал еси́ зна́мение:

Красоту́ пресве́тлую, доброде́тель име́я, о́тче,/ весь мир проте́кл еси́,/ я́ко пчела́ Богоразу́мия ме́д пречи́стый в сердца́ влага́я/ ве́рующим во Еди́наго Христа́, на зе́млю прише́дшаго/ и обожи́вшаго челове́ки за ми́лость безчи́сленную и мно́гое снизхождение.

Кро́ток му́дростию,/ Бо́жия любве́ испо́лнен,/ правове́рными уче́нии преукра́шен, Кири́лле блаже́нне,/ гра́ды же и страны́ уловля́я Бо́гом, блаже́нне,/ прои́де просвеща́я благода́тию не у спаси́тельное прие́мш разуме́ние,/ сего́ ра́ди тя чтим святы́ми пе́снми.

Житие́ твое́ без поро́ка/ и живо́т достохва́лен/ и смерть же честна́ пред Бо́гом бы́сть вся́ческим,/ Ему́же в ру́це, о́тче, ду́шу предаде́/ просветле́нну исправле́нием./ Те́мже тя мо́лим/ о нас к Нему́ помоли́ся/ обрести́ ми́лость ве́рно хва́лящим тя.

Сла́ва, и ны́не, Богоро́дичен.

На стихо́вне стихи́ры свято́му, глас 8:

Чи́стая духо́вная святы́х па́мять,/ все́льшися в чи́сте се́рдцы твое́м,/ всеблаже́нне Кири́лле, преподо́бне о́тче,/ и ду́ховом лука́вым стра́шна тя прогони́теля пока́за,/ но и сокрове́нным неду́гом врача́./ Те́мже, дерзнове́ние име́я к Человеколю́бцу Бо́гу, неосла́бно моли́ся/ и от душе́вныя нас скве́рны и теле́сныя свободи́.

Сла́ва, и ны́не, Богоро́дичен.

По Ны́не отпуща́еши:тропа́рь, глас 4:

От пеле́н приле́жно Прему́дрость сестру́ себе́ сотвори́в, Богогла́се,/ пресве́тлую ви́дев, я́ко деви́цу чи́сту,/ ю́же прие́мь, приведе́,/ я́ко мони́сты златы́ми, се́ю укра́сив свою́ ду́шу и ум,/ и обре́теся я́ко други́й Кири́лл, блаже́нне,/ ра́зумом и и́менем, му́дре.

НА У́ТРЕНИ

На Бог Госпо́дь: тропа́рь свято́му два́жды.

Сла́ва и ны́не, Богоро́дичен.

По 1-м стихосло́вии седа́лен, глас 1.

Подо́бен: Лик А́нгельский:

Бо́жиими мольба́ми просвети́в се́рдце твое́,/ просветова́ ду́шу Богодохнове́нными уче́нии,/ и ны́не же прии́де на Све́т Невече́рний./ Тем днесь светоно́сную па́мять твою́ пра́зднуем весе́лием се́рдца, пресла́вне Кири́лле.

По 2-м стихосло́вии седа́лен в Окто́ихе.

На полиеле́и велича́ние:

Велича́ем тя,/ святы́й равноапо́стольный Кири́лле,/ вся Слове́нския стра́ны уче́ньми свои́ми просвети́вшаго/ и ко Христу́ приве́дшаго.

По полиеле́и седа́лен, глас 4:

Прииди́те, просвети́теля на́шего велегла́сно хвала́ми почти́м:/ той бо язы́ки Слове́нския, гла́дом сло́ва Бо́жия погиба́вшия,/ ма́нною уче́ния Богому́драго напита́,/ и преложе́нием благове́стия сы́на Громо́ва на сро́дную им бесе́ду,/ я́ко луче́ю со́лнечною просвети́,/ от нея́же и мы озаре́ние прие́мше, благода́рственно воззове́м:/ ра́дуйся, Кири́лле присносла́вный.

Сла́ва, и ны́не, Богоро́дичен.

Степе́нна, 1-й антифо́н 4-го гла́са. Проки́мен, глас 4: Свяще́нницы Твои́ облеку́тся в пра́вду,/ и преподо́бнии Твои́ возра́дуются.Стих: Услы́шите сия́ вси язы́цы, внуши́те вси, живу́щии по вселе́нней. Вся́кое дыха́ние: Ева́нгелие святи́тельское.

По 50-м псалме́ стихи́ра, глас 6:

Апо́столом единонра́вныя,/ иера́рхов удобре́ние,/ язы́ков Слове́нских просвети́тели и те́плыя засту́пники,/ прииди́те, празднолю́бцы,/ похва́льными пе́нии воспое́м, глаго́люще:/ ра́дуйся, Кири́лле,/ Богосло́вия трубо́ златокова́нная,/ та́инство Святы́я Тро́ицы подо́бием со́лнечным уясни́вый,/ и тем злоху́льная уста́ Агаря́нская загради́вый;/ ра́дуйся и ты с ним, Мефо́дие,/ единому́дренно подвиза́выйся,/ моли́твами и зна́мении тому́ споспе́шествуя,/ и ны́не, отцы́ всеблаже́ннии,/ не преста́йте моля́щеся о нас Христу́ Бо́гу,/ ве́рою и любо́вию вас велича́ющих.

Кано́н в Окто́ихе и свято́му, глас 4.

Песнь 1

Ирмо́с:Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

К ча́ши прему́дрости Боже́ственная твоя́ уста́ приложи́в,/ напита́ся спаси́тельнаго пития́,/ ра́зумом свет явля́я язы́ком,/ и секи́ра, посека́ющая неприя́зненну вся́ку лесть.

Просвети́в тя, я́ко свети́ло,/ Светода́вец Христо́с Бог наш всему́ ми́рови яви́ тя учи́теля/ и посла́ учи́ти те́мныя Кни́гами Законоу́чными язы́ки за́падныя.

Святы́й Дух от пучи́ны извлече́ Бо́жиим сло́вом/ всему́ ми́ру учи́теля благове́рия, му́дре, драги́й би́сер,/ Бо́жия зако́на Кни́гами, блаже́нне, язы́ки освяти́.

Богоро́дичен: Кра́сный ум преиме́ Небе́сным си́лам,/ Бо́жий бо Твой бысть храм душе́вный,/ егда́ во чре́ве понесла́ еси́ Бо́га на́шего Де́ва, горо́ пресвята́я.

Песнь 3

Ирмо́с:С высоты́ снизше́л еси́ во́лею/ на зе́млю/ превы́шше вся́каго нача́ла,/ и смире́нное возне́сл еси́ из а́да преиспо́дняго/ естество́ челове́ческое:/ несть бо свят, па́че Тебе́, Человеколю́бче.

Сло́вом и се́рдцем и язы́ком Христа́, Сы́на Божия, пропове́да,/ прему́дрость же и си́лу и Сло́во вопло́щшееся, блаже́нне,/ струя́ми при́точными посрами́в триязы́чники.

Цевни́ца при́точна свя́та вои́стинну яви́ся, блаже́нне Кири́лле,/ глас нам спасе́ния святы́м зву́ком духо́вным бряца́я прекра́сно,/ лесть прогна́л еси́.

О у́ме о́гненный, о доброгла́сна трубо́,/ о сла́вию песни́вый, о ла́стовице златоглаго́ливая,/ о язы́че сла́ждший ме́да в при́тчах,/ Кири́лле прему́дре, всех нас помяни́.

Богоро́дичен: Сове́том О́тчим Безнача́льный Сын/ я́ко Сло́во в ложесна́ Твоя́ осене́нием Свята́го Ду́ха, Богоро́дице, всели́ся/ и пло́тию роди́ся из Тебе́, спаса́я ду́ши на́ша.

Седа́лен, глас 8.

Подо́бен: Прему́дрости:

Я́ко заря́, просвети́в всю зе́млю,/ еретики́ го́ниши, взыска́я на восто́це и за́паде и се́вере и ю́зе:/ триязы́чники исправля́еши, пропове́дая страна́м,/ язы́ки свои́ми им глаго́ля и Кни́ги предая́./ Ри́ма же доше́д, ту те́ло свое́ положи́, блаженне,/ в ру́це Госпо́дни ду́шу свою́ преда́в:/ благове́рия учи́телю, моли́ Христа́ Бо́га грехо́в оставле́ние пода́ти/ чту́щим любо́вию святу́ю твою́ па́мять.

Песнь 4

Ирмо́с:Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный,/ Нетле́нною Дла́нию, и спасе́ зову́щия:/ сла́ва, Христе́, си́ле Твое́й.

Други́й Авраа́м преселе́нием, блаже́нне, был еси́ от оте́чества,/ жела́нием Прему́дрости бо́льшия, я́ко златы́ми мони́сты украси́лся еси́,/ луча́ми пресве́тлыми зело́ облиста́яся.

Копие́м слове́с твои́х я́ко За́мврия пронзи́л еси́,/ Мадиа́нстей е́реси приложи́вшася го́рько,/ теле́снаго о́браза отмета́ющихся яви́вшагося во пло́ти Иису́са.

Равносу́щную пропове́дал еси́ Свята́го Ду́ха си́лу Отцу́ и Сы́ну Трисо́лнечнаго Све́та,/ И́мже Бо́жии быва́ем по пода́нию сы́нове Све́ту и и́стии насле́дницы.

Богоро́дичен: Изба́вльшеся пе́рваго осужде́ния Ада́мова Тобо́ю, Деви́це,/ обрето́хом ра́дость неизглаго́ланную,/ благослове́ние бо всем родила́ еси́, Сы́на Бо́жия в наш о́браз.

Песнь 5

Ирмо́с:Ны́не возста́ну,– проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы,/ и к Све́ту У́мному вознося́й Моего́ Божества́.

Ма́стию свое́ю укра́сившуся тебе́, блаже́нне, до́бре,/ благода́ть излия́ся во устна́х твои́х, духовному́дре,/ и нече́ствующих глубину́ изсуши́ наводне́ну словесы́ твои́ми.

Стоя́ше кре́пко, посо́бствуя по ве́ре, му́дре,/ льсти претыка́ния посека́я сло́вом твои́м,/ равня́я ве́рным Боже́ственную стезю́,/ наставля́я во град Христо́в послу́шливыя.

Преплыва́юще ди́вно бе́здну твои́м сло́вом и при́тчами,/ Кири́лле блаже́нне,/ от зимы́ мра́зныя благо́ю ве́рою в тишину́ Вы́шних оби́телей вшел еси́.

Богоро́дичен: Спаса́я челове́ки, Отце́ви ра́вен Сын Челове́к быва́ет:/ из Тебе́, Пречи́стая, плоть прие́м и земна́я Бо́гови сотвори́в/ и Небе́сному Ца́рствию челове́ки соде́лал есть.

Песнь 6

Ирмо́с:Приидо́х в глубины́ морски́я,/ и потопи́ла мя есть бу́ря мно́гих грехо́в:/ но я́ко Бог из глубины́ возведи́ живо́т мой,/ Многоми́лостиве.

Сонм мертви́тся, приложи́вшся Агаря́ном,/ я́ко зми́и, живу́щим,/ в при́тчах твои́х Трисо́лнечнаго и Еди́наго Божества́ си́лою у́бо изнемога́я.

Я́ко и́збра́нна стрела́ яви́ся еретико́м враго́м,/ я́тая в те́ле святе́м, я́коже проро́чески пи́шется,/ храня́щаяся Божество́м и состреля́ющая враги́.

Возлюби́в из млада́ Прему́дрость,/ сестру́ себе́ прия́л ю еси́/ и, умудри́вся Бо́гом, блаже́нне, яви́лся еси́ фило́соф.

Богоро́дичен: Иезекии́ль Тя врата́ ви́де,/ и́миже про́йде Еди́н Бог Вы́шний,/ ложесна́ свята́я Твоя́ проше́д пло́тию, Пречи́стая,/ и не отве́рста оста́вил есть их.

Конда́к, глас 2.

Подо́бен: Тве́рдыя и Богогла́сныя:

Тве́рдым и Богодохнове́нным уче́нием/ просвеща́я мир пресве́тлыми заря́ми,/ обтече́, я́ко мо́лния вселе́нную, Кири́лле блаже́нне,/ разсева́я пресве́тлое Бо́жие сло́во,/ на за́паде, и се́вере, и ю́зе, мир просвеща́я чудесы́.

И́кос:

Пресве́тлое житие́ возлюби́в, му́дре,/ заря́ми Трисо́лнечнаго Божества́ освеще́н,/ прои́де, я́ко мо́лния, вселе́нную,/ се́верную и ю́жную просвети́в страну́,/ за́падным же свет незаходи́м возсия./ Те́мже и мне, мрак грехо́вный прогна́в, блаже́нне,/ свы́ше испроси́ посла́ти благода́ть духо́вную:/ и́маши бо дерзнове́ние к Бо́гу непреста́нно моли́тися за вся, мир просвеща́я чудесы́.

Песнь 7

Ирмо́с:Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся пою́ще:/ препе́тый отце́в Госпо́дь и Бог благослове́н еси́.

Слове́сными пища́льми, блаже́нне,/ призыва́я о́вцы в огра́ды святы́я,/ му́дрыми при́тчами, красото́ю и сла́стию слове́с твои́х.

Не устраши́ся, учи́телю, во́ински еди́н вни́ти в полк жидо́вский,/ всех же наро́д их столп му́дростию разве́рзе,/ я́ко и Он Ханаа́нский проро́ческими при́тчами.

Тебе́ дарова́ исто́чника знамена́на всем пра́вей ве́ре, блаже́нне,/ воды́ сладото́чныя напая́юща всегда́ сы́ны благове́рия/ и исполня́юща, я́ко реку́, тече́нием Це́рковь Госпо́дню.

Богоро́дичен: Небе́с ши́ршую соде́я Бог, Браконеиску́сная,/ в ложесна́ Твоя́ всели́вся, Пречи́стая,/ те́мже молю́ Ти ся стужа́юща мя прегреше́ния/ изба́ви широто́ю покая́ния моего́.

Песнь 8

Ирмо́с:О́троки благочести́выя в пещи́,/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

К Све́ту преложи́вся, свет яви́ся вня́тию е́же от Бо́га, о фило́софе,/ ин бо обре́теся Па́вел доброде́тельми, прете́к всю зе́млю в язы́цех,/ со́лнца светле́е сия́я, сло́вом уче́ния твоего́ вопия́:/ Го́спода по́йте, дела́, и превозноси́те Его́ во вся ве́ки.

Я́коже прето́ржеся сонм евре́йский острото́ю слове́с твои́х, блаже́нне,/ в гра́дех Се́верских в Коза́рех приложи́ся к тебе́./ Ты бо мно́жество посече́, учи́телю святы́й,/ я́ко Голиа́фа Дави́д, в пога́нех.

Вели́ка тя опло́та и твердь земля́ Панно́нская иму́щи, блаже́нне,/ заблужде́ния ерети́ческая ру́шит Кни́гами и триязы́чников, кре́пко науче́на тобо́ю,/ те́мже тя, учи́теля му́драго, помина́юще при́сно, Христа́ прославля́ем.

Богоро́дичен: Кни́гами уче́ний святы́х проро́к, Де́во,/ Богоро́дицу Тя ве́рою пропове́даем,/ Ты бо роди́ Отроча́, Ве́тхаго де́ньми, я́ко но́ва Челове́ка,/ те́мже Тя, Пресвята́я, пое́м и превозно́сим.

Песнь 9

Ирмо́с:Е́ва у́бо неду́гом преслуша́ния/ кля́тву всели́ла есть:/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́,/ тем Тя вси велича́ем.

Я́ко свети́ло, тя че́стно Христо́с возложи́,/ бле́щущася в конца́х, му́дре, в венци́ церко́внем,/ Его́же ра́ди до сме́рти подвиза́ся,/ умножа́я ве́рных воспита́ние ра́зумом и гове́нием.

Па́влу Боже́ственному учени́к был еси́,/ его́же де́тели после́дуя,/ про́йде до край за́падных, сло́во разсева́я в язы́цех (в Као́не),/ и в Ри́ме дух свой в ру́це Бо́гу своему́ предаде́.

Я́ко со́лнце на земли́ возсия́, учи́телю,/ всю́ду при́тчами, луча́ми Богогла́сия, просвеща́я,/ пою́щия тя ве́рою и о ра́це стоя́щих твоего́ те́ла,/ помяни́, блаже́нне, своя́ ученики́.

Богоро́дичен: Луча́ми Твоего́ све́та, Пречи́стая,/ ду́шу мою́ ны́не просвети́/ лежа́щу в ро́ве ги́бельнем,/ воздви́гни, враги́ сокруша́ющи,/ оскорбля́юща при́сно души́ мое́й и на грехи́ мя побужда́юща.

Свети́лен:

Я́ко свети́льника тя Христо́с ми́рови показа́/ и учи́теля вселе́нней, преблаже́нне Кири́лле, Солу́нская о́трасле,/ тем и нам, помина́ющим честну́ю твою́ па́мять,/ от Него́ про́сим ми́лость.

Сла́ва:

Пред Бо́гом сконча́л еси́ житие́ свое́, свя́те,/ Кни́гам бо внима́я любому́дренно и те́ми просвещая ду́шу свою́,/ яви́лся еси́ испо́лнен Бо́жияго ра́зума/ учи́тель Слове́нский, Кири́лле достохва́льне.

И ны́не, Богоро́дичен.

На хвалитех стихи́ры, глас 8:

Кири́лле, сла́вне учи́телю,/ добро́те научи́ Моравля́ны свои́ми глаго́лы Бо́га благодари́ти,/ прелага́я на Слове́неск язы́к от Гре́ческа зако́н Госпо́день,/ и научи́ пра́вде Его́./ Тем ны́не, ра́дующеся, Слове́нстии народи́ сла́ву Бо́гу возсыла́ют.

Кто мо́жет испове́дати чудеса́ Госпо́дня,/ я́же сотвори́ сла́вным Свои́м Кири́ллом:/ от я́да Сарацы́нска избави́ и,/ от се́ти же го́рькия исто́рже и,/ разврати́вшим в Коза́рех ве́ру Госпо́дню уста́ заключи́ язы́ком его́,/ услади́ во́ды го́рькия и ди́вная и́на тьма́ми соде́я.

Сла́ва, глас 8:

О сла́дкий учи́телю Кири́лле,/ о ти́хая бесе́до,/ о милосе́рдное се́рдце и у́ме прему́дрый,/ о глаго́лы, сла́ждшии ме́да,/ о стра́ны прелета́я, я́ко оре́л,/ о вторы́й Па́вле и учени́че Петро́в,/ в его́же гра́де изво́ли почи́ти,/ помяни́ ны гре́шныя ко Го́споду,/ моли́твами твои́ми спаси́ нас.

И ны́не, Богоро́дичен.

Славосло́вие вели́кое и отпуст.

НА ЛИТУРГИ́И

Блаже́нны свята́го пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Апо́стол ко Евре́ем, зача́ло 318. Аллилу́ия, глас 2: Свяще́нницы Твои́ облеку́тся в пра́вду,/и преподо́бнии Твои́ возра́дуются. Евангелие от Матфе́я зача́ло 11. Прича́стен: В па́мять ве́чную:

Ве́дати же подоба́ет, а́ще прилучи́тся в понеде́льник Поста́, то на Литурги́и пое́м: Да испра́вится моли́тва моя́: пото́м трисвято́е, проки́мен. И Апо́стол, и аллилу́ия, и Ева́нгелие. И Литурги́я по́стная.