...
Мінея Місячна,  Лютий

Вересень * Жовтень * Листопад * Грудень * Січень * Лютий * Березень * Квітень * Травень * Червень * Липень * Серпень * Богородичний додаток

Лютий

← В 20-й день В 22-й день →

День 1234567891011121314151617181920212223242526272829

В 21-й день

ТранслітераціяЦерковнослов’янськаУкраїнська

Пра́зднование Пресвяте́й Богоро́дице в честь Ея ико́ны, имену́емыя Козельща́нския

На вече́рни

На Го́споди, воззва́х: стихи́ры на 8, глас 1:

Ове́лие чу́до,/ на ме́сте необита́емом бла́го дать Бо́жия спаси́тельная излива́ется:/ че́стный о́браз Богома́тере/ мно́гими зна́мени ями исцеле́ний/ ди́вно прославля́ется./ Весе́лися, оби́тель Козельща́нская,/ ра́дуйтеся, лю́дие христоимени́тии,/ возопии́м ве́рно Цари́це Богои́збранной Отрокови́це:/ Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.

Ди́вны Твоя́ та́йны, Богоро́дице,/ я́ко зало́г любве́ к ро́ду христиа́нскому,/ да́рствуеши свяще́нную ико́ну Твою́,/ Небе́сной благода́ти испо́лнену,/ сла́ва Твоя́ Боголе́пная, Богоподо́бными сия́ющи чудесы́,/ свы́ше бо призира́вши на нас, Влады́чице,/ и ми́лостию Свое́ю гре́шныя покрыва́вши./ Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.

Черто́г зрим укра́шенный, храм Твой, Богоро́дице,/ в не́мже непреста́нно покланя́ющеся живоно́сному о́бразу Твоему́,/ ра́дуемся, земноро́днии, о Боже́ственней Твое́й сла́ве крася́щеся:/ те́мже лику́юще и прославля́юще Тя,/ ча́ем ми́лости Твое́й бога́тыя/ и благода́рственная пе́ния воспева́ем./ Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.

Сла́ва, глас 2:

Ки́ими похвала́ми укра́сим пресве́тлый пра́здник Влады́чицы на́шея,/ украси́вшия оби́тель сию́ чудотво́рным о́бразом Свои́м;/ се Цари́ца Богоотрокови́ца прии́де,/ и Той досто́йную честь возда́ти не́мощно,/ сей есть дар многоце́нный Засту́пницы ми́ра,/ недоразумева́емая и непостижи́мая/ днесь содева́ются Тобо́ю, Влады́чице Богоблагода́тная, стра́шная та́инства,/ се мо́ре чуде́с неисчерпа́емое/ и врачева́ние безме́здное стра́ждущим ду́шами и телесы́,/ с ни́миже и мы возопии́м:/ ра́дуйся, Ра́досте на́ша,/ изба́ви нас от вся́каго зла и душетле́нных страсте́й/ и печа́лей и ве́чнующаго пла́мене муче́ния.

И ны́не, глас 8:

Прииди́те, вси тружда́ющиися и обреме́неннии грехи́ мно́гими,/ возвели́чим Ма́терь Емману́илеву, Держа́вную Цари́цу Богоро́дицу,/ па́че Го́рних умо́в возвели́чившую род христиа́нский./ Прииди́ те припаде́м к чудотво́рному о́бразу Засту́пницы на́шея/ и омы́ем ду́ши слеза́ми покая́ния./ Се бо за беззако́ния на́ша лю́те стра́ждем, от Бо́га нака́зуеми,/ со стра́хом и любо́вию принесе́м моли́твы на́ша и возопии́м Благослове́нней:/ ра́дуйся, Ма́ти Бо́жия,/ ра́дуйся, Еди́на Ма́ти милосе́рдия,/ к покая́нию заблу́дших призыва́ющая,/ ра́дуйся, Спору́чнице спасе́ния гре́шных,/ Сы́на Своего́ Бо́га на́шего на ми́лость преклоня́ющая./ Ра́дуйся, одея́ние че́стное, весь мир Свои́м омофо́ром покрыва́ющая./ Ра́дуйся, Благода́тная, Неве́сто Неневе́стная.

На стихо́вне, стихи́ры, глас 6:

Я́ко звезда́ пресве́тлая/ посреде́ ико́н Твои́х святы́х, Богоро́дице,/ че́стный о́браз Твой Козельщанский/ путево́дствует во спасе́ние лю́дей,/ сия́я чудесы́ многоразли́чными,/ и несть такова́го, и́же зре́нием святы́ни Твое́й не умили́тся./ Те́мже исцеле́ние прия́т и деви́ца Мари́я/ в тя́жцем неду́зе свое́м неисце́льнем,/ егда́ душею скорбя́щею и се́рдцем сокруше́нным/ припа́дши со слеза́ми к пречи́стей ико́не сей,/ моли́твенно воззва́ к Тебе́,/ Утеше́нию стра́ждущих, по́мощи прося́щи,/ и а́бие исцеле́вши благода́рственно возопи́ с весе́лием Благода́тней:/ ра́дуйся, всех скорбя́щих Ра́досте.

Стих: Помяну́ и́мя Твое́/ во вся́ком ро́де и ро́де.

Егда́ принесена́ бысть/ чудотво́рная ико́на Твоя́, Влады́чице, во град Москву́,/ я́ко ре́ки многово́дный, потеко́ша к ней лю́дие,/ с ве́рою и моли́твою́ к Тебе́ в неду́зех свои́х,/ и прие́млюще исцеле́ния ди́вная, просла́виша Тя, Богоро́дицу./ Егда́ же возвращена́ бысть ико́на сия́ в ме́сто свое́,/ тогда́ и зде моля́щийся с ве́рою и лю́бовию обрето́ша в ней,/ я́ко мо́ре неисчерпа́емое благода́ти,/ ве́лию по́мощь и утеше́ние от Тебе́, Всеблага́я Ма́ти.

Стих: Слы́ши, Дщи, и виждь/ и приклони́ у́хо Твое́.

Велича́ем Тя, Пречи́стая Богоро́дице Мари́е, немо́лчными гла́сы,/ свята́я оби́тель Красноѓрская,/ Богосве́тлыми луча́ми озаря́емая/ от благода́тныя ико́ны Твоея исходя́щими./ Прославля́ет Тя и вся Русская страна́,/ в ну́ждах и напа́стех иму́щи в Тебе́ ско́рую Помо́щницу/ и от враг ви́димых и неви́димых Всемо́щную Засту́пницу.

Сла́ва, глас 8:

Стра́нни и прише́льцы су́ще в стране́ сей земно́й:/ отвсю́ду бе́дами и печа́льми обурева́еми,/ боле́зньми и страстьми́ угнетаеми,/ к Тебе́ прибега́ем, о Ма́ти Бо́га Вы́шняго,/ помяни́, Де́во Всенепоро́чная, е́же стяжа́ла еси́ ста́до Твое́,/ и отве́рзи две́ри милосе́рдия Твоего́,/ Ма́терним дерзнове́нием Бо́га умоля́ющи,/ да проба́вит ми́лость Свою́ веду́щим Тя я́ко Засту́пницу усе́рдную,/ я́ко Благ и Человеколю́бец Госпо́дь.

И ны́не, глас то́йже:

В день пра́здника на́шего воструби́м духо́вною цевни́цею,/ торжеству́й, оби́тель свята́я, иму́щи Держа́вную Помо́щницу/ в ско́рбех многомяте́жна́го жития́ на́шего,/ и кре́пкое заступле́ние в напастех,/ незри́мую Наста́вницу, ко спасе́нию путево́дствующую,/ и о всем ми́ре Молебницу те́плую./ О Госпоже́ Цари́це и Влады́чице,/ умиле́нною душе́ю смире́нно мо́лим Тя,/ приклони́ у́хо Твое́ к моле́нию гре́шных раб Твои́х,/ усе́рдно призыва́ющих Тя,/ и сподо́би нас ра́йских селе́ний прича́стники бы́ти,/ да безконе́чно славосло́вим Тя,/ Еди́ну Чи́стую и Препросла́вленную.

Тропа́рь, глас 4:

Весели́ся, земле́ Полтавская/ и все́ Оте́чество на́ше правосла́вное:/ се бо я́ко светоза́рное со́лнце,/ яви́ся пречу́дная ико́на Твоя́, Преблагослове́нная Богома́ти,/ мир озаря́ющи мно́жеством чуде́с Твои́х,/ те́ми у́бо обрета́ем, я́же на земли́, вся блага́я и поле́зная,/ и су́щих, я́же на Небеси́, сокро́вищ сподобля́емся./ Сего́ ра́ди вопие́м Ти:/ ра́дуйся, Похвало́ на́ша приснопокланя́емая,/ спаси́ ны, моля́щийся Тебе́,/ еди́ная Наде́ждо и Ра́дование ве́чное пою́щих Тя.

И Засту́пнице усе́рдная:

На у́трени

По 1-м стихосло́вии седа́лен, глас 3:

Блажи́м Тя, Богоро́дицу,/ яви́вшую нам чу́дный о́браз Твой Козельща́нский,/ от него́же Боже́ственная вода́ жи́зни непреста́нно истека́ет лю́бящим Тя и моля́щимся,/ ю́же вкуша́ющий жа́жды смертоно́сныя избавля́ются.

Сла́ва, и ны́не, глас то́йже:

А́нгелов Сла́досте, скорбя́щих Ра́досте,/ христиа́н Предста́тельнице и ве́ры Правосла́вныя Утвержде́ние Ты еси́, Ма́ти Госпо́дня,/ заступи́ нас и изба́ви ве́чных мук.

По 2м стихосло́вии седа́лен, глас 4:

Любо́вию, Чи́стая, Твою́ святу́ю ико́ну почита́ющим/ и Тя, и́стинную Ма́терь Бо́жию, согла́сно возвеща́ющим и ве́рою покланя́ющимся Ти,/ Храни́тельница яви́лася еси́ и держа́вное Предста́тельство,/ отвраща́ющи вся́кое лю́тое дале́че сих я́ко вся мо́гущая.

Сла́ва, и ны́не, глас то́йже:

Дом Твой сей освяти́ Твое́ю благода́тию, Пречи́стая Богома́ти,/ я́ко в ски́нии слове́сней, в Тебе́ живе́т Еди́н Препросла́вленный Госпо́дь,/ прославля́яй ико́ну Твою́, Всепе́тая Де́во, чудесы́.

По полиелеи седа́лен, глас 8:

Вои́стину ум всяк не дости́гнет ко изглаго́ланию/ мно́гаго мно́жества щедро́т Твои́х, благода́тная Богоро́дице Де́во,/ я́ко и ма́лое мо́ление, в Бо́жественнем хра́ме Твое́м приноси́мое,/ любе́зно прие́млеши и ско́ро проше́ния исполня́вши:/ цельбоно́сная бо ико́на Твоя́ прозре́ние источа́ет/ и всем боля́щим здра́вие подае́т,/ и злых ду́хов отгна́ние приходя́щим ве́рою и прося́щим Твоего́ посеще́ния./ Темже неусы́пными моли́тва ми Твои́ми призри́ на сле́зы стра́ждущих,/ мо́лим Тя, сподо́би всех нас с чи́стою со́вестию грехо́в оставле́ние улучи́ти,/ живо́т наш в покая́нии сконча́ти/ и неосужде́нно ста́ти одесну́ю Небе́снаго Бо́га Отца́,/ да хва́лим Тя, я́ко Благослове́нную Ма́терь Живота́, и благослови́м/ и, превознося́ще, покланя́ем Ти ся во ве́ки со все́ми Небе́сными Си́лами.

Сла́ва, и ны́не, то́йже.

По 50-м псалме́ стихи́ра, глас 6:

Днесь благода́ть Свята́го Ду́ха нас собра́/ во свяще́нное жили́ще,/ под кров Твой, Богоро́дице, прибега́ющия ве́рою:/ мо́лим Тя,/ я́ко Помо́щницу всем нам благонаде́жну,/ соблюда́й и покрыва́й нас чрез все житие́,/ дару́й нам све́том Твои́м ходи́ти,/ о́гненный стре́лы врага́ угаси́,/ и в час сме́ртный предста́ни,/ сподо́би нас улучи́ти Ца́рствие Сы́на Твоего́,/ да вси, глас Арха́нгела Гаврии́ла восприи́мше, рцем:/ ра́дуйся, Благода́тная Мари́е, Госпо́дь с Тобо́ю:/ ра́дуйся, Благослове́нная в же́нах,/ я́ко Спа́са родила́ еси́ душ на́ших.

Кано́н пра́здника, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отрыгну́ Цари́це Ма́тери,/ и явлю́ся светло́ торжеству́я,/ и воспою́, ра́дуяся, То́я чудеса́.

А́нгел вопия́ше Тебе́, Де́во Чи́стая: ра́дуйся!/ Мы же, что Ти принесе́м, Блага́го Царя́ Блага́я Ма́ти,/ я́ко яви́ла еси́ нам в сия́ после́дняя времена́ сокро́вище неоску́дное –/ чудотво́рную ико́ну Твою́ на освяще́ние и исцеле́ние душ и теле́с на́ших.

Ты буди́ нам утвержде́ние и в бе́дах ско́рое заступле́ние,/ Цари́це Небесе́ и земли́,/ на Тебе́ наде́емся, непреста́нно моля́ще Твою́ благосты́ню.

Сла́ва:

Я́ко стра́ждущей Мари́и ско́ро яви́ла еси́ ве́лию ми́лость Твою́, Пречи́стая Де́во,/ та́кожде не отступа́й, Милосе́рдая Богома́ти, и от нас,/ бла́годатное утеше́ние в бе́дах и злоключениих су́щим подающи,/ да Тя при́сно велича́ем.

И ны́не:

Я́же Бо́га Сло́ва челове́ком/ пресла́вным Твои́м Рождество́м соедини́вшая, Де́во Богоневе́сто,/ утоли́ церко́вныя собла́зны/ и пода́ждь мир ми́рови, я́ко Блага́я.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия духо́вно утверди́,/ в Боже́ственней Твое́й сла́ве/ ве́нцев сла́вы сподо́би.

Бога́тство духо́вное неиждива́емое дарова́ла еси́ рабо́м Твои́м,/ Жизнь ро́ждшая, Пренепоро́чная Чи́стая Де́во,/ ико́ну Твою́ свяще́нную,/ прославле́ние светло́ пра́зднующе, ве́рнии,/ избавля́емся от вся́ких бед и ско́рбных обстоя́ний.

Свята́я Влады́чице Пречи́стая Бо́га на́шего Ма́ти,/ всех Творца́ неизрече́нно ро́ждшая,/ моли́ всегда́ бла́гость Его́ страсте́й нас изба́вити/ и оставле́ние грехо́в нам дарова́ти.

Сла́ва:

Не оскуде́й, Пренепоро́чная Де́во, моли́твами Твои́ми/ и сохрани́ ста́до Твое́, е́же собра́ти благоизво́лила еси́,/ Ма́ти Пастыренача́льника Го́спода Иису́са Христа́,/ да ни еди́на поги́бнет от ове́ц Твои́х.

И ны́не:

О Богоблаже́нная Де́во,/ простри́ всеблагомо́щную десни́цу Твою́,/ во е́же по́мощи на и́збранном пути́ жития́ и́ноческаго,/ вве́рившим спасе́ние свое́ оби́тели Твое́й/ и моли́ся приле́жно Сы́ну и Бо́гу Твоему́ спасти́ся ста́ду Твоему́ невреди́му.

Седа́лен, глас 4:

Ри́торов глаго́лы не довле́ют воспе́ти по достоя́нию,/ о Ма́ти Бо́га на́шего,/ ди́вная чудеса́ и неисчисли́мая благодея́ния Твоя́ от ико́ны се́я явля́емая,/ мы же во смире́нии се́рдца та́йно веща́ем Ти, А́нгелов Честне́йшей:/ ра́дуйся, Бла́годатная,/ пребу́ди, Милосе́рдая, с на́ми неотсту́пно во ве́ки.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спа́се зову́щия:/ сла́ва, Христе́, си́ле Твое́й.

Кий ум пости́гнути возмо́жет си́лу благода́тных исцеле́ний,/ исходя́щую от ли́ка Твоего́ свята́го,/ в Боже́ственнем сем хра́ме пребыва́ющаго,/ слепе́ц бо Иоа́нн, подо́бно ева́нгельскому слепцу́,/ ве́рою кре́пкою и моли́твою непрестаю́щею/ взыва́ше к Тебе́, Многоми́лостивой Цели́тельнице, да отве́рзутся о́чи его́,/ и исцеле́н быв а́бие и узре́в свет, умиле́нно возопи́:/ сла́ва си́ле Твое́й, Го́споди.

Озари́, Всепе́тая Де́во, чи́стшая све́тлостей со́лнечных,/ слепоству́ющий ум наш ра́зумом и́стиннаго Богове́дения,/ да не поги́бнем лю́те во гресе́х на́ших:/ по́мыслы благоче́стия сердца́ на́ша просвети́,/ да, спа́сшися Тобо́ю, ра́достно возгласи́м:/ сла́ва си́ле, сла́ва и милосе́рдию Твоему́, Го́споди, Благоде́телю Всеблаги́й.

Сла́ва:

Чу́до бя́ше зре́ти,/ ка́ко и́нокиня оби́тели се́я, зело́ разсла́блена,/ сподо́бися лобыза́ти цельбоно́сную ико́ну Твою́, Ма́ти Божия,/ во мгнове́ние о́ка ощути́в кре́пость теле́сную и соверше́нное здра́вие, со умиле́нием вопия́ше:/ сла́ва си́ле, сла́ва снизхожде́нию Твоему́, Го́споди Преми́лости́ве.

И ны́не:

Мо́лим Тя, я́же пре́жде век и́збранная в Ма́терь Го́спода,/ исцели́ разсла́бленныя грехо́м ду́ши на́ша,/ оживи́ росо́ю покая́ния серде́чнаго и моли́твы сле́зной,/ укрепи́ в сердца́х рабо́в Твои́х ве́ру и́стинную и любо́вь нелицеме́рную,/ да сподо́бимся по́двигом до́брым по́двизатися,/ ве́ру непоро́чну соблюсти́,/ житие́ ми́рно сконча́ти, хваля́ Го́спода:/ сла́ва долготерпе́нию Твоему́, Спа́се наш.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и роди́ла еси́ безле́тнаго Сы́на,/ всем воспева́ющим Тя/ мир подава́ющая.

Ни ум А́нгельский, ниже́ язы́к челове́ческий возмо́жет изрещи́/ мно́жества зна́мений ди́вныя по́мощи Твое́я, Пренепоро́чная Влады́чице,/ подава́емый ро́ду челове́ческому в ну́ждах душе́вных и теле́сных:/ благодея́ния Твоя́ па́че зве́зд небе́сных сия́ют во все́м ми́ре Твое́м./ Те́мже у́бо приими́ благода́рственная моле́ния сия́ недосто́йная,/ не преста́нно сла́вимая Го́рними Си́лами, Богоневе́стная Де́во.

Коль чу́дны дела́ Твоя́, Го́споди,/ се бо, я́ко со́лнце, ми́рови возсия́ пречестна́я ико́на Преблагослове́нныя Ма́тере Твое́й,/ ве́рных мы́сли просвеща́ющи велича́ющих Тя, Христе́, при́сно.

Сла́ва:

Сей святы́й день ра́достный, Богому́дреннии,/ прииди́те пе́сньми и пе́нии духо́вными воспое́м светло́,/ ны́не всеблаголе́пно зря́ще храм Пречи́стыя ико́ною светови́дною украша́ем,/ я́ко пребыва́ние сла́вы Присноде́вы зде яви́ся./ Мо́лим Ти ся приле́жно, Богороди́тельнице,/ я́ко су́щей с на́ми Твое́ю благода́тию озари́тися нам.

И ны́не:

Ны́не Не́бо и земля́ весели́тся/ и чини́ А́нгелов и челове́ков собра́ние,/ изря́дно пра́зднующе, воспои́м Христа́, дарова́вшаго нам Боже́ственное наслажде́ние?/ о́браз Свой свяще́нный и Пречи́стыя Ма́тере Свое́я.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Не́я Ро́ждшаго ся Бо́га сла́вим.

Досто́йно есть велича́ти Тя, Богоро́дицу,/ дарова́вшую пречи́стый о́браз Свой в по́мощь и Боже́ственное заступле́ние/ святе́й оби́тели сей от враг ви́димых и неви́димых.

Досто́йно есть велича́ти Тя,/ Я́же в Вы́шних Престо́лу Живонача́льныя Тро́ицы в моли́твах о нас предстоя́щая,/ от А́нгел воспева́емую Де́ву Пречи́стую/ и от земны́х я́ко Богоневе́стную Ма́терь при́сно прославля́емую.

Сла́ва:

Велича́ем Тя, Пресвята́я Де́во,/ и почита́ем светоно́сный о́браз Твой,/ его́же во утвержде́ние оби́тели се́я положи́ла еси́,/ да пребу́дет непрекло́нна в век ве́ка от смяте́ния е́ресей.

И ны́не:

Всей земли́ Русстей возсия́/ свы́ше да́нный благоче́стно покланя́емый о́браз Твой че́стный,/ Богои́збранная Отрокови́це,/ и Боже́ственною благода́тию покрыва́ется оби́тель Богома́терня, ве́рно Бо́га прославля́ющая.

Конда́к, глас 3:

Боголе́пно во смире́нии красу́ется оби́тель Красного́рская,/ осеня́емая и спаса́емая преди́вным о́бразом Влады́чицы Пречи́стыя,/ Небесе́ и земли́ Цари́цы Богоро́дицы,/ от него́же исто́чники благода́ти и ча́ша чуде́с оби́льно излива́ются,/ и усе́рдно притека́ющий исцеле́ния ве́рою прие́млют,/ и неве́рнии ве́рою кре́пкою сердца́ исполня́ют/ и мы, раби́ Твои́, Богома́ти, благода́рив вопие́м Ти:/ ра́дуйся, Предста́тельство христиа́н непосты́дное и оби́тели Твое́й красото́ и ра́дование.

И́кос:

Высоту́ Небе́снаго жития́ и сла́вы присносу́щныя Боже́ственное осия́ние/ дару́й рабо́м Твои́м, любоблагоутро́бная Ма́ти Де́во Марие,/ и сподо́би соверши́ти пресла́вное торжество́ во све́те добродея́ний/ и помышле́ний, духо́вно сия́ющих,/ свы́ше бо облагода́тствовала еси́ живоно́сный о́браз Твой, Богои́збранная Неве́сто,/ и, я́ко луча́ ми со́лнечными, чуде́сными зна́мениями согре́вавши сердца́/ благоче́стно почита́ющих и ве́рою покланя́ющихся,/ я́коже Тебе́ Самой су́щей с на́ми, святе́й ико́не Твое́й,/ ю́же неви́димо со стра́хом окружа́ют от Небе́с лик А́нгел святы́х:/ сия́ у́бо, я́коже луна́ по́лная пресве́тлая в но́щи,/ отго́нит тьму боле́зней и скорбе́й,/ и́же жела́нием серде́чным умиле́нно притека́ют ко благосе́рдию Твоему́,/ ра́дующеся о Боже́ственней благода́ти, велича́ют Тя, зову́ще:/ ра́дуйся, предста́тельство христиа́н непосты́дное и оби́тели Твоея́ красото́ и ра́дование.

Песнь 7

Ирмо́с: Не послужи́ша тва́ри Богому́дрии/ па́че Созда́вшего,/ но о́гненное преще́ние му́жески попра́вите,/ ра́довахуся пою́ще:/ препе́тый отце́в Госпо́дь и Бог благослове́н еси́.

Да сликовству́ет церко́вной све́тлости любо́вию Боже́ственною/ А́нгельское во́инство, Богому́дренно воспева́юще:/ благослове́н еси́ в хра́ме сла́вы Твое́я, Го́споди.

Па́че вы́шних ликостоя́ний вознесла́ся еси́, Влады́чице,/ еди́на бы́вши Ма́ти Вседе́теля,/ те́мже у́бо ра́дующеся, взыва́ем:/ благослове́нна Ты еси́ в же́нах, Всенепоро́чная Влады́чице.

Сла́ва:

Це́рковь земноро́дных торжеству́ющи ра́дует ся,/ зрящи Боже́ственную ико́ну Ма́тери Госпо́дней,/ и единому́дренно воспева́ет:/ благослове́нна еси́ Ты, Влады́чице Пречи́стая,/ просвети́ ны све́том Сы́на Твоего́.

И ны́не:

По́честь и поклоне́ние вознося́щи Тебе́, де́вственная Похвало́,/ о Тебе́ ра́дуется, Благода́тная, вся́кая тварь,/ А́нгельский собо́р и челове́ческий род, досто́йно взыва́ющи:/ благослове́нна еси́ Ты, Влады́чице, Де́во Неискусобра́чная.

Песнь 8

Ирмо́с: О́троки благочести́вый в пе́щи,/ Рождество́ Богоро́дичо спасло́ есть:/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Луча́ми све́та у́мнаго освеща́ем,/ Боже́ственный дом Твой осеня́ет ны́не всех о́блаком Ду́ха Свята́го/ и освяща́ет ве́рныя, согла́сно пою́щия:/ благослови́те, вся дела́ Госпо́дня, Го́спода.

Честь и сла́ву стяжа́вше священнопи́санный о́браз/ Богоро́дицы и Предве́чнаго Богомладе́нца Христа́ Жизнода́вца,/ со благогове́нием притеце́м, ве́рнии, воспева́юще:/ благослови́те, вся дела́ Госпо́дня, Го́спода.

Благослови́м Отца́, и Сы́на, и Свята́го Ду́ха – Го́спода.

Умиле́нно про́сим Тя, Влады́чице,/ освяти́ Боже́ственною благода́тию Твое́ю нас, моля́щихся,/ и ополче́ньми непобеди́мыми А́нгел Свои́х огради́ оби́тель Твою́,/ враго́в свире́пство покаря́ющи, да благослови́м Го́спода во ве́ки.

И ны́не:

Це́рковь Свою́ обручи́вшаго Себе́ Кро́вию че́стною/ Боже́ственнаго Младе́нца Иису́са Христа́ и Пречи́стыя Ма́тере Его́/ свяще́нное изображе́ние любе́зно лобыза́ем и мо́лим,/ сподо́би нас, Христе́ Спа́се, воскресе́ние улучи́ти вопию́щих:/ благослове́н еси́, Го́споди, во ве́ки.

Песнь 9

Ирмо́с: Всяк земноро́дный,/ да взыгра́ется Ду́хом просвеща́емь,/да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Богонача́льным манове́нием свята́я ико́на Твоя́, Влады́чице,/ от лет дре́вних храни́мая,/ ны́не, я́ко ча́ша, благода́ть Твою́ оби́льно излива́ющая,/ есть достоя́ние оби́тели Твое́й,/ те́мже благоче́стно прославля́юще Тя, Богоро́дице, досто́йно велича́ем.

Я́коже дре́вле во́лны морски́я и бу́рю уста́вила еси́, Богоро́дице,/ егда́ чу́дный о́браз Твой, ше́ствоваше по Ру́сскому мо́рю ко бре́гу Оте́чества на́шего,/ та́ко и ны́не мо́лим Тя, Богоневе́сто,/ укроти́ во́лны неве́рия, е́ресей и раско́лов,/ да Тя, Бо́жию Ма́терь, испове́дающе, Це́рковь во ве́ки велича́ет.

Сла́ва:

Из ро́да в род храни́мая святы́ня –/ о́браз сей че́стный,/ мо́лим Тя, Цари́це Преблага́я,/ да бу́дет во освяще́ние и исцеле́ние и спасе́ние душ и теле́с на́ших,/ да Тя во ве́ки велича́ем.

И ны́не:

При́зри благосе́рдием Твои́м, Всепе́тая Де́во, на лю́ди Твоя́,/ цельбоно́сному о́бразу Твоему́ покланя́ющияся, я́коже Тебе́ Само́й,/ на нем изображе́нной, Ма́тери Госпо́дней и Предве́чному Младе́нцу Твоему́,/ Его́же любо́вию объя́ла еси́ на пречи́стых ру́цех Твои́х,/ моли́, да сохрани́т оби́тель сию́ неврежде́нну, да Тя во ве́ки веко́в велича́ем.

Свети́лен, глас 8:

День светлопра́зднственный и весе́лия испо́лненный яви́ся днесь:/ воспо́йте Го́сподеви песнь хвале́бную в це́ркви преподо́бных,/ я́ко благоволи́ Госпо́дь в людех Свои́х/ просла́вити чу́дную ико́ну Ма́тере Свое́й, исцеле́ния всем источа́ющую,/ коль стра́шна дела́ Твоя́, Христе́,/ и кто возмо́жет изрещи́ милосе́рдие Твое́.

Сла́ва, и ны́не:

Небе́сная пою́т Ти, обра́дованная Ма́ти Богоневе́стная,/ и мы славосло́вим неизсле́дованныя Твоя́ ми́лости, Богоро́дице,/ те́мже моли́ спасти́ся ду́шам на́шим.

На хвали́тех стихи́ры, глас 8:

Крест Твой всечестны́й и́маши/ в десни́це Твое́й воздви́жен, Христе́ Бо́же,/ на не́мже распя́лся еси́,/ и его́же целу́ем на ико́не Твое́й./ Той есть свет и живо́т су́щих во тьме,/ и́мже изба́ви всех от бед,/ и всех скорбя́щих от собла́зн лука́ваго,/ моли́твами Богоро́дицы и спаси́ всех нас, Спа́се наш.

Се ча́ша жи́зни, преиспо́лненная даро́в Свята́го Ду́ха?/ свяще́нная ико́на Влады́чицы./ Вкуси́те и ви́дите, коль ве́лия ми́лость Засту́пницы./ По хоте́нию бо Своему́ мощна́ есть и твори́ти я́ко су́щи всех Влады́чица./ Сы́тость Твои́х похва́л, Де́во,/ благочести́вым ве́рным отню́д не быва́ет:/ жела́нием бо жела́ние при́сно Боже́ственное и духо́вное прие́млюще,/ я́ко Ма́терь Бо́жию велича́ем.

Новоявле́нное чу́до яви́ нам мы́сленный Боже́ственный сад,/ в не́мже благода́ти прозябóша плоды́,/ от ни́хже я́дше, живи́ бу́дем,/ жа́ждущий любо́вию Богоро́дицы наслади́мся./ Лику́й, вселе́нная, услы́шавши,/ просла́ви со А́нгелы Щедрода́тельницу/ Спа́са Бо́га на́шего Ма́терь Пречи́стую, Моли́твенницу непосты́дную;/ Той моли́твами, Ми́лостиве Спа́се,/ пода́ждь нам Ду́ха Свята́го,/ Пода́теля благода́ти от Отца́ Тобо́ю происходя́ща.

Пала́то одушевле́нная Христо́ва,/ ве́рным же стено́, и покро́ве и держа́во,/ Тобо́ю оби́тель Твоя́, Богома́ти, утвержда́ется и прославля́ется,/ Твое́ю помо́щию правове́рнии лю́ди спаса́ются,/ Тобо́ю хва́лимся при́сно,/ Твое́ю благода́тию сохраня́ем ся, Пречи́стая,/ от гла́да и па́губы, от нахожде́ния проти́вных и междоусо́бный бра́ни,/ и от мно́го разли́чных боле́зней, и от напра́сный сме́рти./ Покры́й и ны́не, Госпоже́ Ма́ти Присноде́во,/ чту́щих Тя омофо́ром ми́лости Твое́й/ и не преста́й всегда́ да́рующи нам согреше́ний оставле́ние,/ Боже́ственное заступле́ние и ве́чное ра́дование.

Сла́ва, глас 8:

О, пресла́внаго чудесе!/ Зело́ стра́ждущая отрокови́ца Мари́я/ в неисце́льнем неду́зе свое́м,/ объе́м рука́ми святу́ю ико́ну Твою́, Пречи́стая,/ воздыха́нии серде́чными вопия́ше к Тебе́, Влады́чице,/ та́йно веща́я Ма́тери всех скорбя́щих тя́жкая страда́ния своя́./ О, ве́лия ве́ра твоя́,/ буди́ ти по глаго́лу твоему́./ Се здра́ва еси́!/ Те́мже благодаре́нии непреста́нными возопи́й безме́здной Цели́тельнице:/ ра́дуйся, Ра́досте на́ша,/ ра́дуйся, ско́рая Помо́щнице моля́щимся Тебе́,/ ра́дуйся, А́нгелов Сла́во и челове́ков Похвале́;/ ра́дуйся, Боже́ственное Утеше́ние ро́ду христиа́нскому,/ благода́ть Свою́ и ми́лость по ве́ре явля́ющая.

И ны́не, глас 2:

Преблагослове́нна еси́, Богоро́дице Де́во,/ Рождество́м Твои́м дарова́вшая нам жизнь ве́чную./ Препросла́вленно и превознесе́нно есть святе́йше́е и́мя Твое́ в род и род./ Ве́лия и пресла́вна чудеса́ Твоя́,/ любо́вь несказа́нна к ро́ду челове́ческому./ Свы́ше бо призира́яй Госпо́дь на смире́ние па́дшаго созда́ния Своего́,/ всели́ся в пречи́стое чре́во Твое́,/ и Кре́стными страда́нии Свои́ми и сме́ртию/ искупи́л ны есть от рабо́ты вра́жия./ И ны́не Богоприя́тными моли́твами Твои́ми, Ма́ти Бо́жия,/ и непобеди́мою си́лою Креста́ Сы́на Твоего́/ спаси́ ду́ши на́ша.

 

Прпdбнагw nц7A нaшегw тімоfeа, и4же въ сmмв0лэхъ:

И# и4же во с™hхъ nц7A нaшегw є3vстafіа, ґрхіепcкопа ґнтіохjйскагw.

На ГDи, воззвaхъ, стіхи6ры, глaсъ }.