В сей день отдае́тся пра́здник Сре́тения Госпо́дня. А́ще же не случи́тся в сей день отда́ние пра́здника, пое́тся си́це:
На Го́споди, воззва́х: стихи́ры, глас 2.
Подо́бен: Егда́ от Дре́ва:
Зако́ном повину́яся нас ра́ди плоть на земли́ прие́мшаго/ и страсть честну́ю, му́чениче, претерпе́вшаго,/ Богоблаже́нне, любо́вь соблю́л еси́ я́же к бли́жнему,/ зако́на глави́зну су́щу и проро́ков./ Те́мже и блаже́нную кончи́ну прия́л еси́,/ Исто́чнику любве́ ны́не, о Ники́форе, предстоя́.
Прекланя́еши вы́ю Бо́гу,/ Ему́же вся прекланя́ются коле́на,/ му́чениче чу́дне, во главу́ посека́емь/ и разлуча́емь от до́бляго твоего́ теле́се,/ Христу́ же, всех Главе́, соединя́емь чисте́йшим умо́м./ Его́же ны́не све́ту приближа́яся,/ испроси́ нам, Ники́форе,/ всем просвеще́ние, хваля́щим тя.
Струя́ми крове́й твои́х, мудре,/ за Христа́ излия́нными,/ зе́млю освяти́л еси́/ ду́хом же ду́хи возвесели́л еси́ Безпло́тных сил/ и му́чеников стада́ вся просвети́л еси́,/ с си́ми соединя́лся, блаже́нне,/ я́ко добль ору́жник,/ я́ко непобеди́мый му́ченик,/ и о нас Бо́гу моля́ся.
Сла́ва, глас 6. Иоа́нна мона́ха:
Показа́л еси́ всем я́ве, страда́льче Ники́форе,/ я́ко бли́жняго не любя́й ни Влады́ку возлюби́ти мо́жет,/ те́мже у́бо самого́ чи́сте возлюби́л еси́ Саприки́я бли́жняго./ Отсю́ду и к Боже́ственному впери́лся еси́ жела́нию/ и ду́шу твою́ положи́л еси́ по Христо́ве испове́дании и ве́ре./ Саприки́й же злоимени́тый, неприми́рну к тебе́ не́нависть стяжа́в,/ отме́тник показася и Влады́ки Христа́,/ Ему́же ны́не ты предстоя́,/ моли́ спасти́ся душа́м на́шим.
И ны́не, Богоро́дичен и́ли Крестобогоро́дичен.
Подо́бен: Всю отложи́вше:
Ору́жие, я́коже рече́ Симео́н, се́рдце Твое́ про́йде,/ Пречи́стая Влады́чице,/ егда́ узре́ла еси́ из Тебе́ Возсия́вшаго/ неизрече́нным сло́вом,/ от беззако́нных я́ко осуждена́ возноси́ма на Крест,/ о́цтом и же́лчию напоя́емаго,/ ре́бра же пробода́ема,/ и ру́це и но́зе пригвожда́емы/ и, рыда́ющи, восклица́ла еси́, ма́терски вопию́щи:/ что сие́, Ча́до сладча́йшее, но́вое та́инство?
Тропа́рь му́ченика, глас 4:
Му́ченик Твой, Го́споди, Ники́фор,/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.
Кано́н свята́го, его́же краегране́сие: Сла́внаго в страстоте́рпцех Ники́фора пе́сньми пою́. Творе́ние Феофа́ново. Глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йскии крестообра́зно порази́в/ и раздели́в мо́ре;/ Изра́иля же, беглеца́, пешехо́дца, спа́се,/ песнь Бо́гови воспева́юща.
Воздвиза́ема жите́йскаго мо́ря волну́ющься лю́те душе́вный кора́бль напа́стьми и страстьми́,/ ми́ра Вино́вниче,/ к тишине́ глубо́цей, я́ко Благоде́тель, преложи́,/ му́ченика, Христе́, мольба́ми.
Разу́мною мы́слию, прему́дре, мы́сленней души́ гне́ва страсть благоче́стно покори́л еси́/ и к бли́жнему прите́кл еси́ Саприки́ю, тща́ся премени́ти, чу́дне,/ зако́ном Спа́совым повину́яся.
Тро́ичен: Равномо́щную, Единоесте́ственную, и Сопресто́льную, и Единосу́щную,/ Трисия́нную зарю́ Еди́наго Божества́ испове́дающе, чтим в Тре́х Ли́цех,/ неразде́льно пропове́дающе Сло́во со Отце́м и Ду́хом.
Богоро́дичен: Ум Небе́сный Твое́ та́инство непости́жное разуме́ти и́стинно не мо́жет, Всепе́тая:/ Отцу́ бо Сопресто́льный, во чре́во Твое́ всели́вся,/ из Тебе́ роди́тися благоволи́, во двою́ естеству́ познава́емь.
Песнь 3
Ирмо́с: Утвержде́й в нача́ле Небеса́ ра́зумом/ и зе́млю на во́дах основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.
Ники́фор про́зван быв, при де́лех яви́ся победоно́сец,/ пре́лести бо мрак, благода́ти све́том разори́в, отгна́, зовы́й:/ несть свят, па́че Тебе́, Еди́не Человеколю́бче.
Умерщвле́нному тебе́ ра́ди ве́ровав Влады́це,/ самово́льно к сме́рти притека́вши, во́льныя Его́ возжела́в ме́ртвости,/ я́ко победоно́сец му́ченик, Боже́ственною си́лою укрепля́емь.
На земли́ подви́жник, на Небесе́х вене́чник, уго́дник Христо́в Ники́фор показа́ся я́ве,/ с Безпло́тными чи́нми зовы́й:/ несть свят, па́че Тебе́, Еди́не Человеколю́бче.
Тро́ичен: От ума́ вели́каго Отца́ устре́мльшееся Сло́во, исходя́ща же и Свята́го Ду́ха,/ просвеща́еми ве́рно Богодохнове́нными повеле́нии,/ испове́даем вси несозда́нное Еди́но Божество́.
Богоро́дичен: Неискусобра́чно от Отца́ пре́жде век Ро́ждшагося, во чре́ве Твое́м заче́нши, Де́во,/ породила́ еси́ нам Бо́га, вку́пе и Челове́ка,/ в ко́емждо естестве́ соверше́нна, неразде́льна.
Конда́к, глас 1.
Подо́бен: Лик А́нгельский:
Любве́ сою́зом связа́вся, Ники́форе,/ разру́шил еси́ я́ве зло́бу не́нависти/ и ме́чем во главу́ твою́ усече́н был еси́,/ му́ченик Боже́ственный вопло́щшагося Спа́са,/ Его́же о нас моли́, пою́щих сла́вную па́мять твою́.
Седа́лен, глас 1.
Подо́бен: Ка́мени запеча́тану:
Багряни́цу твои́ми кровьми́ омочи́л еси́, и се́ю я́ко во́ин оде́явся непобеди́мь,/ и, я́коже скиптр, крест держа́, восте́кл еси́ от земли́ к Небесе́м,/ Ники́форе блаже́нне,/ Царю́ вся́ческих предстои́ши./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.
Сла́ва, и ны́не, Богоро́дичен:
Ру́це Твой Боже́ственнии,/ и́миже Созда́теля понесла́ еси́, Де́во Пречи́стая,/ вопло́щшагося благосты́нею, просте́рши,/ умоли́ Его́ изба́вити нас от искуше́ний, и страсте́й, и бед,/ хваля́щих Тя любо́вию и вопию́щих:/ сла́ва Все́льшемуся в Тя,/ сла́ва Проше́дшему из Тебе́,/ сла́ва Изба́вльшему нас Рождество́м Твои́м.
Крестобогоро́ дичен: Зря́щи Тя, Христе́, Всенепоро́чная Ма́ти мертва́ на Кресте́ просте́рта, вопия́ше:/ Сы́не Мой, Собезнача́льне Отцу́ и Ду́ху,/ что неизрече́нное Твое́ сие́ смотре́ние,/ и́мже спасл еси́ пречи́стых рук Твои́х, Ще́дре, созда́ние?
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты моя́ Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авва́кумом зову́ Ти:/ Си́ле Твое́й сла́ва, Человеколю́бие.
Боже́ственную жизнь, о Ники́форе, получи́л еси́,/ Боже́ственныя зари́, блаже́нне, сподо́бився,/ Боже́ственным све́том светови́дно ны́не озаря́еши/ творя́щия па́мять твою́, Богомудре, и ве́рою вопию́щия:/ си́ле Твое́й сла́ва, Человеколю́бче.
Сия́еши, Христо́вым му́чеником совоку́плься,/ разори́л бо еси́ лесть многобо́жную,/ ме́чем усече́н быв во главу́ твою́,/ и кро́вными тече́нии твои́ми всю потопи́л еси́ и́дольскую пре́лесть, Влады́це зовя́:/ си́ле Твое́й сла́ва, Челове́колюбче.
И́же зако́нов Твои́х не сохрани́в Саприки́й,/ Твоея́ обнажа́ется, Спа́се, Боже́ственныя благода́ти/ и, враго́м плещи́ пода́в, Твои́х му́ченик лиша́ется сла́вы окая́нный./ Те́мже, Твоему́ пра́ведному уди́вльшеся промышле́нию, зове́м:/ си́ле Твое́й сла́ва, Человеколю́бче.
Тро́ичен: Свет Оте́ц Безнача́льный и всех вино́вный,/ Свет Сло́во, Свет Дух Святы́й,/ от Отца́, я́коже от исто́чника,/ пре́жде всех век неизрече́нно сия́ющее Трисо́лнечное Божество́/ во Еди́ном Существе́, и си́ле, и сла́ве познава́ется.
Богоро́дичен: Всего́ в Тебе́ обновля́ет челове́ка весь, всему́, Пречи́стая, соединя́емь,/ Оте́ческих недр не оста́вль и в Твою́ утро́бу всели́тися изво́лив,/ И́же бога́тством милосе́рдия во́лею обнища́в и обогати́в мир Божество́м.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чу́ждая тьма, окая́ннаго?/ Но обрати́ мя и к све́ту за́поведей Твои́х/ пути́ моя́ направи, молю́ся.
Тече́ньми твои́х крове́й церко́вный рай напои́л еси́,/ разделя́емыми в нача́ла четверочи́сленная, блаже́нне, доброде́телей Боже́ственных,/ от ни́хже ду́шам, о Ники́форе, почерпа́ем Боже́ственная дарова́ния.
Се́ятель зло́бы злопомне́нием окая́ннаго восхити́,/ бла́гости же и ми́ра Вино́вник привлече́ вме́сто о́наго/ Боже́ственным световиде́нием укра́шена Ники́фора, Богому́драго му́ченика.
Освяща́ется, Спа́се, Твое́й вольне́й стра́сти подо́бяся,/ из ребр бо Твои́х Богому́дрый ка́плями окропле́н,/ свои́х крове́й Тебе́ то́ки приноша́ет, ме́чем посека́емь, к Тебе́ гряды́й.
Тро́ичен: Спасе́ния основа́ние правосла́вие ве́дуще,/ Собезнача́льна Отцу́ Сло́ва и Свята́го Ду́ха/ пропове́дуем в Тре́х Ли́цех Еди́но Нача́ло, Еди́но Существо́,/ Еди́ну во́лю, Еди́но де́йство.
Богоро́дичен: Мы́сленно научи́ся проро́ков собо́р Твои́м та́йнам,/ Небесе́ бо дверь на земли́ Влады́ка Тя показа́,/ и из Тебе́, Де́во, вопло́щься, Пра́вды Со́лнце,/ су́щим во тьме возсия́.
Песнь 6
Ирмо́с: Бе́здна грехо́в и прегреше́ний бу́ря мя смуща́ет/ и во глубину́ ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Управи́телю, и спаси́.
Исцели́ сокруше́ние души́ мое́й, Ники́форе Богому́дре,/ и, страсте́й мрак разори́в,/ отжени́ заря́ми су́щия в тебе́ Божественныя све́тлости,/ моля́ Избави́теля Христа́, блаже́нне.
Бу́рю и́дольскаго треволне́ния, страда́льче Ники́форе, кре́стным ветри́лом/ и дыха́нии духо́вными ти́хо преплы́в, му́чениче непобеди́ме,/ в приста́нище ти́хое Христо́во дости́гл еси́.
Пострада́л еси́ му́ченически и вои́стинну победоно́сец был еси́,/ кова́рствия благомо́щно разори́в зми́ева,/ и, страсте́м я́ко о́бщник, блаже́нне, быв Влады́ки,/ ны́не по достоя́нию спросла́вился еси́.
Богоро́дичен: Ужаса́ются мы́сленнии А́нгельстии чи́ни, дивя́щеся,/ со Отце́м Су́щаго пре́жде век и Ду́хом из чре́ва Твоего́ пло́тски Младе́нца ражда́ема зря́ще,/ Богороди́тельнице Пречи́стая.
Конда́к, глас 3.
Подо́бен: Де́ва днесь:
Впери́вся, сла́вне, Госпо́днею любо́вию/ и Сего́ сла́вный Крест на ра́мо взем, посрами́л еси́ диа́воли ко́зни,/ пострада́л еси́ да́же до сме́рти/ и и́стины яви́лся еси́ победоно́сец,/ ору́жник и таи́нник Бо́жия благода́ти.
И́кос:
Па́влово я́ве уче́ние возлюби́л еси́/ и в персех твои́х, сла́вне, насади́л еси́, вопия́:/ любо́вь не безсту́дствует,/ сия́ Зижди́теля Челове́ка соверше́нна нам дарова́;/ любве́ ра́ди вся претерпе́:/ гво́здие и Крест, о́цет и оплева́ния,/ копне́м прободе́н бысть в ре́бра свята́я, и́миже источи́ нам кровь и во́ду Богоде́льную./ Его́же возжела́в, яви́лся еси́ победоно́сец,/ и зва́нием ору́жник, и таи́нник Бо́жия благода́ти.
Песнь 7
Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пе́щи ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Смерть бысть тебе́, Ники́форе, отше́ствие от су́щих зде,/ блаже́нне, к Небеси́ же и на Небе́сная возше́л еси́,/ ны́не лику́я, со А́нгелы пое́ши:/ благослове́н еси́, Бо́же оте́ц на́ших.
Укрепля́емь страстьми́ Вседержи́теля,/ не́мощи превозвы́шенное о́ко и превзя́тую бровь низве́ргл еси́ на зе́млю, Богому́дре,/ взыва́я Созда́телю твоему́:/ благослове́н еси́, Бо́же оте́ц на́ших.
Путь свиде́тельства твоего́ Ники́фор теки́й соверши́,/ разшири́в се́рдце де́йством Боже́ственнаго Ду́ха,/ ны́не усе́рдно взыва́ет Ти, Влады́ко:/ благослове́н еси́, Бо́же оте́ц на́ших.
Тро́ичен: Ума́ пе́рваго и безнача́льнаго,/ ро́ждшаго Сло́во Собезнача́льное безстр́стно и безде́тно/ и произве́дша Всесвята́го Ду́ха,/ Тя, Отца́ веду́ще, взыва́ем:/ благослове́н еси́, Бо́же оте́ц на́ших.
Богоро́дичен: Обо́я была́ еси́, Де́вома́ти, Богороди́тельнице Чи́стая,/ во чре́ве заче́нши Бо́га несказа́нно,/ из Тебе́ воплоща́ема, во обо́их зра́цех познава́ема,/ Богому́жно на земли́ пожи́вшаго.
Песнь 8
Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасены́, сия́ ви́дев,/ Творцу́ и Избави́телю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Зна́менався благода́тию Спа́са, самозва́н ты к подвиго́м му́жески отлучи́лся еси́/ и, побе́ду взем на сопроти́вныя, му́чениче Христо́в,/ победи́тельными укра́сился еси́ венцы́,/ Боже́ственне воспева́я:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Освяти́вся водо́ю, Ники́форе, и Ду́хом/ и му́ченическими обагре́н кровьми́/ стяжа́л еси́ я́ко му́ченик и́стинный Христа́ Бо́га светови́дную све́тлость, всеблаже́нне,/ в не́йже ны́не взыва́вши:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Тро́ичен: Со Безпло́тными чи́нми/ в Трие́х Ипоста́сех Еди́н бла́гости исто́чник приснотеку́щий,/ нерожде́но, безнача́льно и пресоверше́нно Божество́,/ соде́тельное и Царя́ всех, о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Богоро́дичен: Святе́йши Ты была́ еси́, Богоро́дице Всепе́тая, преми́рнаго А́нгельскаго чи́на,/ сих бо родила́ еси́ Соде́теля и Го́спода от де́вственна неискусобра́чна чре́ва/ во дву существа́х несли́янно, непревра́тно,/ во Еди́ней же Ипоста́си Бо́га воплоще́нна.
Песнь 9
Ирмо́с: Ужасе́ся о сем Не́бо,/ и земли удиви́шася концы́,/ я́ко Бог яви́ся челове́ком пло́тски/и чре́во Твое́ бысть простра́ннейшее Небе́с:/ тем Тя, Богоро́дицу,/ А́нгелов и челове́к чинонача́лия велича́ют.
Преста́вился еси́, я́ко жени́х, украси́вся оде́ждами, истка́нными от кро́ве муче́ния,/ Боже́ственный све́тлости ко прича́стию украси́вшаго, сла́вне/ и, удобри́вшаго на Кресте́ стра́стию честно́ю всех Благоде́теля,/ о Ники́форе преблаже́нне.
Привле́клся еси́ Влады́ки добро́тами,/ и́хже ничто́же красне́йше, сла́вне,/ и Того́ тща́ся наслади́тися непреста́нный и благоле́пныя све́тлости,/ ме́чем отсещи́ твою́ главу́ поуща́л еси́ мучи́тели,/ разжига́емь любо́вию, о Ники́форе, Го́спода твоего́.
Светло́ на лесть, му́чениче Христо́в, до́блествовав и сию́ победи́в, я́ко победи́тель,/ вене́ц прия́л еси́ твое́й главе́ дарова́ний, сла́вне,/ и ны́не лику́еши му́ченически с му́ченическими ли́ки, всеблаже́нне Ники́форе,/ у престо́ла всех Царя́.
Тро́ичен: От нерожде́нна Отца́ Боголе́пно Сы́на рожде́нна сла́вяще/ и Ду́ха Пра́ваго, пре́жде век исхо́днаго,/ Три Ипоста́си чтим пресу́щныя и нача́льныя Тро́ицы, соедине́нный еди́нством неслия́нным,/ Богосло́вяще велича́ем.
Богоро́дичен: Яви́лася еси́, о Де́во, Ма́ти Божий,/ па́че естества́ ро́ждши пло́тию Преблаго́е Сло́во,/ Его́же Оте́ц отры́гну от се́рдца Своего́ пре́жде всех век, я́ко Благ./ Его́же ны́не и теле́с превы́шша разуме́вшем,/ а́ще и в плоть облече́ся.
Свети́лен.
Подо́бен: Не́бо звезда́ми:
Тезоимени́т показа́лся еси́ побе́ды, о Ники́форе,/ любо́вию и муче́нием победи́в мучи́тели./ Те́мже и побе́ды вене́ц прия́л еси́ от Го́спода.
Богоро́дичен: Держа́вным Твои́м покро́вом от враго́в наве́та/ нас, Чи́стая, Твоя́ рабы́, сохраня́й вся невреди́мы,/ Тя бо стяжа́хом Еди́ну прибе́жище в ну́ждах.
Ука́з о отда́нии пра́здника Сре́тения Госпо́дня
Подоба́ет ве́дати, а́ще прилучи́тся отда́ние Сре́тения пре́жде неде́ли мытаря́ и фарисе́я в седми́це в ко́йлюбо день, кроме́ неде́ли. Ве́чер по обы́чной кафи́зме, на Го́споди, воззва́х: стихи́ры пра́здника на 6, пое́мыя на са́мый пра́здник. Сла́ва, и ны́не, пра́здника, самогла́сен. А́ще в пято́к ве́чера, Сла́ва, пра́здника: И ны́не, Богоро́дичен настоя́щаго гла́са. Проки́мен дне, вхо́да и чте́ния несть. На стихо́вне стихи́ры пра́здника со стихи́ их. Сла́ва, и ны́не, пра́здника. По трисвято́м тропа́рь пра́здника. Та́же ектения́ и отпу́ст. На повече́рии по трисвято́м конда́к пра́здника. Полу́нощницу пое́м, по обы́чаю, с кафи́змою и с тропари́ обы́чными.
На у́трени, на Бог Госпо́дь: тропа́рь пра́здника три́жды. По обои́х кафи́змах седа́льны пра́здника и чте́ния. Кано́н пра́здника, со ирмосо́м на 14: ирмо́с по два́жды. Катава́сия, то́йже ирмо́с. По 3-й пе́сни седа́лен пра́здника, два́жды. По 6-й пе́сни конда́к и и́кос пра́здника и чте́ние в про́логе. На 9-й пе́сни Честне́йшую: не пое́м, но пое́м припе́вы пра́здника, я́коже и на са́мый пра́здник. Свети́лен пра́здника, два́жды. На хвали́тех стихи́ры пра́здника на 4: Сла́ва, и ны́не, самогла́сен пра́здника, посе́м славосло́вие вели́кое. По трисвято́м тропа́рь пра́здника, еди́ножды. Та́же ектении́, и отпу́ст, и обы́чное исхожде́ние в притво́р, и час 1-й. На часе́х тропа́рь и конда́к пра́здника.
На Литурги́и: Блаже́нны: песнь 9-я со ирмосо́м на 6. По вхо́де тропа́рь пра́здника. Сла́ва, и ны́не, конда́к пра́здника. Проки́мен, аллилу́йя и прича́стен пра́здника. Апо́стол и Ева́нгелие дне.
ЗРИ Свята́го же прилучи́вшагося пое́м слу́жбу на повече́рии или́ ка́ко настоя́тель изво́лит.
А́ще ли прилучи́тся отда́ние пра́здника Сре́тения Госпо́дня в неде́лю, пре́жде неде́ли мытаря́ и фарисе́я.
В суббо́ту ве́чера на ма́лой ве́черни стихи́ры воскре́сны, по обы́чаю. На стихо́вне стихи́ра воскре́сна еди́на и пра́здника стихо́вна с припе́вы вели́кия вече́рни: Сла́ва, и ны́не, пра́здника. Тропа́рь воскре́сен. Сла́ва, и ны́не, пра́здника.
На вели́цей вече́рни по предначина́тельном псалме́ пое́м Блаже́н муж: кафи́зму всю. На Го́споди, воззва́х: стихи́ры воскре́сны 3, и восто́чен, Анато́лиев, еди́н, и пра́здника 6, пое́мыя на са́мый пра́здник. Сла́ва, пра́здника: И ны́не, Богоро́дичен 1-й гла́са. На лити́и стихи́ры пра́здника. Сла́ва, и ны́не, пра́здника. На стихо́вне стихи́ры воскре́сны. Сла́ва, и ны́не, пра́здника. На благослове́нии хле́бов тропа́рь, Богоро́дице Де́во: два́жды, и пра́здника, еди́ножды, и чте́ние в посла́ниих Апо́стольских.
На у́трени, на Бог Госпо́дь: тропа́рь воскре́сен, два́жды: Сла́ва, и ны́не, пра́здника. По обо́их кафи́змах седа́льны воскре́сны с Богоро́дичны их, и чте́ние во Ева́нгелии толково́м, и полиеле́й, и тропари́, А́нгельский собо́р: ипакои́ гла́са и чте́ние. Степе́нна и проки́мен гла́са. Вся́кое дыха́ние: Ева́нгелие воскре́сно, и про́чее воскре́сно, и до кано́на. Кано́н воскре́сен со ирмосо́м на 4, и Богоро́дице на два, и пра́здника на 8. Катава́сия пра́здника: Су́шу глубородительную, зе́млю: По 3-й пе́сни конда́к пра́здника, и и́кос, и седа́лен пра́здника, два́жды. По 6-й пе́сни конда́к воскре́сен и и́кос и чтем проло́г. На 9-й пе́сни пое́м Честне́йшую: Свети́лен воскре́сен. Сла́ва, и ны́не, пра́здника. На хвали́тех стихи́ры воскре́сны 4 и пра́здника со Сла́вным на 4 со стихи́ пра́здничными. Сла́ва, стихи́ра Ева́нгельская: И ны́не, Преблагослове́нна еси́, Богоро́дице Де́во: и Славосло́вие вели́кое. По трисвято́м тропа́рь воскре́сен то́чию. Ектении́, и отпу́ст, и оглаше́ние Студи́тово, и исхожде́ние обы́чное в притво́р, и час 1-й. На часе́х тропа́рь воскре́сен: Сла́ва, пра́здника: И ны́не, Богоро́дичен часо́в. По трисвято́м конда́к пра́здника, и коне́чный отпу́ст: та́кожде и на про́чих часе́х глаго́лем тропари́ и кондаки́.
ЗРИ На Литурги́и: Блаже́нны гла́са на 6, и пра́здника песнь 9-я на 4. По вхо́де тропа́рь воскре́сен, и пра́здника: Сла́ва, конда́к воскре́сен: И ны́не, конда́к пра́здника. Проки́мен гла́са, и пра́здника. Апо́стол, и Ева́нгелие неде́ли ряд, и пра́здника. Прича́стен: Хвали́те Го́спода с Небе́с, хвали́те Его́ в Вы́шних. Други́й прича́стен пра́здника: Ча́шу спасе́ния прииму́ и И́мя Госпо́дне призову́.
Прилучи́вшаго же ся свята́го рядова́го в сию́ неде́лю слу́жбу пое́м на повече́рии, или́ ка́ко настоя́тель изво́лит.
Ука́з о празднице Сре́тения Госпо́дня.
А́ще в кой день Сре́тение бу́дет или́ в кой день прилучи́тся отда́ние его́.
ЗРИ А́ще ли пра́здник Сре́тения прилучи́тся в неде́лю блу́днаго, и́ли в понеде́льник, и́ли во вто́рник мясопу́стныя неде́ли, и отдае́тся пра́здник в пято́к тоя́же неде́ли, поне́же в неде́лю мясопу́стную отда́ния не быва́ет. А́ще ли прилучи́тся Сре́тение Госпо́дне в сре́ду, или́ в четверто́к, или́ в пято́к, или́ в суббо́ту мясопу́стныя неде́ли, и отдае́тся во вто́рник сы́рныя неде́ли. А́ще ли случи́тся в неде́лю мясопу́стную или́ в понеде́льник сы́рныя неде́ли, и отдае́тся в четверто́к тоя́же неде́ли. А́ще ли случи́тся во вто́рник или́ в сре́ду сыропу́стныя неде́ли, и отдае́тся в суббо́ту тоя́же неде́ли. А́ще ли случи́тся в четверто́к сы́рный, или́ в пято́к, или́ в суббо́ту, и отдае́тся в неде́лю сыропу́стную. А́ще ли Сре́тение бу́дет в неде́лю сыропу́стную, тогда́ пра́зднуем еди́н день.
ЗРИ А́ще случи́тся отда́ние Сре́тения Госпо́дня в неде́лю фарисе́еву, или́ блу́днаго, или́ сыропу́стную:
В суббо́ту на ма́лой вече́рни стихи́ры воскре́сны гла́са, по обы́чаю. На стихо́вне стихи́ра воскре́сна и пра́здника стихо́вна вели́кия вече́рни.
На вели́цей вече́рни: на Го́споди, воззва́х: стихи́ры воскре́сны 3, и Трио́ди 3 и пра́здника со Сла́вным 4. Сла́ва, Трио́ди: И ны́не, Богоро́дичен 1-й гла́са. А́ще ли храм Сре́тения: И ны́не, пра́здника. На лити́и стихи́ры пра́здника и Трио́ди хвали́тныя, кроме́ Славна́: Сла́ва, Трио́ди: И ны́не, пра́здника. На стихо́вне стихи́ры воскре́сны. Сла́ва, Трио́ди: И ны́не, пра́здника. На благослове́нии хле́бов тропа́рь, Богоро́дице Де́во: два́жды, и пра́здника, еди́ножды. На Бог Госпо́дь: тропа́рь воскре́сен, два́жды. Сла́ва, и ны́не, пра́здника. По кафи́змах седа́льны воскре́сны, и Богоро́дичны их, и чте́ние, и пое́м поли́елей, псало́м: Хвали́те и́мя Госпо́дне: и други́й псало́м: Испове́дайтеся Го́сподеви:
ЗРИ А́ще ли неде́ля блу́днаго, или́ сыропу́стная: пое́м и 3-й псало́м: На ре́ках Вавило́нских: со аллилу́иею, и про́чее воскре́сно, и до кано́на. Кано́н воскре́сен на 4, и Трио́ди на 4, и пра́здника на 6. Катава́сия пра́здника. По 3-й пе́сни конда́к и седа́лен Трио́ди: Сла́ва, и ны́не, пра́здника. По 6-й пе́сни конда́к пра́здника и и́кос. На 9-й пе́сни пое́м Честне́йшую: Свети́лен воскре́сен, Сла́ва, Трио́ди: И ны́не, пра́здника. На хвали́тех стихи́ры воскре́сны, 4 и пра́здника со Сла́вным 4. Сла́ва, Трио́ди. И ны́не, Преблагослове́нна еси́:
А́ще ли неде́ля сыропу́стная: И по стихи́рах пра́здника глаго́лем припе́вы Воскресни́, Го́споди Бо́же мой: и пое́м самогла́сну стихи́ру Трио́ди дне. Сла́ва, и́ну стихи́ру: И ны́не, Преблагослове́нна еси́: и по отпу́сте, Сла́ва, и ны́не, стихи́ра Ева́нгельская и час пе́рвый.
На часе́х тропа́рь воскре́сен: Сла́ва, пра́здника: И ны́не, Богоро́дичен часо́в. По О́тче наш: конда́к пра́здника, и Трио́ди, пременя́юще, глаго́лем.
На Литурги́и: Блаже́нны гла́са на 4, и Трио́ди песнь 3-я на 4 и пра́здника 9-я на 4. По вхо́де тропа́рь воскре́сен и пра́здника: Сла́ва, конда́к Трио́ди. И ны́не, пра́здника. Проки́мен дне, и пра́здника. В суббо́ту у́бо мясопу́стную отда́ние Сре́тения не быва́ет, та́кожде и в неде́лю мясопу́стную.
ЗРИ А́ще ли отда́ние Сре́тения Госпо́дня случи́тся во вто́рник или́ в четверто́к сы́рныя неде́ли, и пое́м си́це:
Ве́чер на Го́споди, воззва́х: стихи́ры пра́здника на 6. Сла́ва, и ны́не, пра́здника. На стихо́вне Трио́ди самогла́сен дне, два́жды, и му́ченичен с припе́вы обы́чными. Сла́ва, и ны́не, пра́здника. Тропа́рь пра́здника и отпу́ст. Рядова́го же свята́го слу́жбу пое́м на повече́рии, или́ ка́ко настоя́тель изво́лит.
На у́трени, на Бог Госпо́дь: тропа́рь пра́здника, три́жды. По кафи́змах седа́льны пра́здника. Кано́н пра́здника со ирмосо́м на 14. А иде́же трипе́снец, пое́м пра́здника со ирмосо́м на 6, и Трио́ди на 8. По 3-й пе́сни седа́лен Трио́ди, пи́сан по 2-й кафи́зме. Сла́ва, и ны́не, пра́здника. По 6-й пе́сни конда́к пра́здника и и́кос. На 9-й пе́сни пое́м Честне́йшую: Свети́лен пра́здника, два́жды. На хвали́тех стихи́ры пра́здника на 4. Сла́ва, и ны́не, пра́здника. На стихо́вне Трио́ди самогла́сен дне, два́жды, и му́ченичен. Сла́ва, и ны́не, пра́здника. Тропа́рь пра́здника, ектения́ и отпу́ст.
На Литурги́и: Блаже́нны пра́здника, песнь 9-я на 6. По вхо́де тропа́рь пра́здника. Сла́ва, и ны́не, конда́к пра́здника. Проки́мен, аллилу́ия и прича́стен пра́здника. Апо́стол и Ева́нгелие дне. В сре́ду же и в пято́к отда́ние Сре́тения не быва́ет.
А́ще ли отда́ние Сре́тения в суббо́ту сыропу́стную:
В пято́к сы́рный ве́чера на Го́споди, воззва́х: стихи́ры пра́здника, 3: и отце́в, 3. Сла́ва, отце́в: И ны́не, пра́здника. Проки́мен дне, и паремия́, и по ней проки́мен: Да упова́ет Изра́иль на Го́спода: На стихо́вне Трио́ди самогла́сен дне, два́жды, и му́ченичен. Сла́ва, отце́в: И ны́не, пра́здника. Тропа́рь отце́в: Сла́ва, и ны́не, пра́здника.
На у́трени, на Бог Госпо́дь: тропа́рь пра́здника, два́жды. Сла́ва, отце́в: И ны́не, пра́здника. По кафи́змах седа́льны пра́здника. Кано́н пра́здника со ирмосо́м на 8 и отце́в на 6. Катава́сия пра́здника. По 3-й пе́сни конда́к, и и́кос отце́в, и седа́лен их, два́жды: Сла́ва, и ны́не, пра́здника. По 6-й пе́сни конда́к пра́здника и и́кос. На 9-й пе́сни пое́м Честне́йшую: Свети́лен пра́здника: Сла́ва, отце́в: И ны́не, пра́здника. На хвали́тех стихи́ры пра́здника, 3 и отце́в, 3. Сла́ва, отце́в: И ны́не, пра́здника. Славосло́вие вели́кое. Тропа́рь отце́в. Сла́ва, и ны́не, пра́здника, и обы́чное исхожде́ние в притво́р, и час пе́рвый, и коне́чный отпу́ст.
На Литурги́и: Блаже́нны пра́здника, песнь 9-я на 4 и отце́в песнь 6-я на 4. По вхо́де тропа́рь пра́здника и отце́в. Сла́ва, конда́к отце́в. И ны́не, конда́к пра́здника. Проки́мен пра́здника и отце́в. Апо́стол и Ева́нгелие дне и отце́в: Аллилу́йя пра́здника и отце́в. Прича́стен пра́здника и отце́в.
