На Го́споди, воззва́х:стихи́ры му́ченика 3 и проро́ка 3.

Стихи́ры му́ченика, глас 4.

Подо́бен: Я́ко до́бля:

Страда́лец до́блественный,/ во́ин непобеди́м/ Ду́хом Святы́м показа́лся еси́,/ низложи́в бори́теля/ му́дростию слове́с твои́х/ и дел твои́х, му́дре, терпели́вными явле́ньми./ Те́мже прия́л еси́ венцы́ побе́дныя/ и с вы́шними ли́ки сочета́лся еси́,/ великому́чениче Фео́доре.

Боже́ственный столп был еси́/ благоче́стия, пребога́те,/ злочести́вых ка́пищ возгнуша́вся,/ и овча́ всесоверше́нно,/ и заколе́ние благоприя́тно/ закла́вшемуея тебе́ ра́ди, чи́сте приво́дим/ просла́вльшему святу́ю твою́ па́мять/ и чуде́с сокро́вище тя су́щим в ми́ре/ дарова́вшему, Фео́доре.

На крест воздвижен,/ и пло́ти стру́жеме,/ и о́стрыми стре́лами уязвля́емь,/ и на дре́ве протяза́емь,/ и мечи́ усека́емь,/ и вся́кими хитростьми́ боле́зней окружа́емь,/ непрекло́нен и непобеди́м яви́лся еси́/ си́лою на Кресте́ Пригвожде́ннаго,/ сла́ва му́чеников, Фео́доре.

И́ны стихи́ры проро́ка, глас 8.

Подо́бен: Что вас нарече́м:

Име́я житие́ равноа́нгельно,/ со А́нгелы, Богоявле́ние, бесе́дуеши я́ве./ Те́ми у́бо я́же па́че ума́/ просвеща́я ум,/ образо́в чу́дных очище́ние,/ вели́ких тайн открове́ние,/ проро́ческое провеща́ние,/ духо́вное возновле́ние,/ моли́ спасти́ся душа́м на́шим.

А́нгел яви́лся еси́ зе́млен,/ на земли́ Небе́сныя собесе́дники име́в,/ зри́тель преми́рных виде́ний быв,/ свети́льник мы́сленный, свет облиста́ющ,/ масли́на, псало́мски рещи́, плодови́та,/ Богоде́йственно иска́пающи благочести́вым еле́й,/ моли́ спасти́ся ду́шам на́шим.

Наде́емаго обоже́ния наслажда́лся,/ я́ко проро́к и́стиннейший Бо́жий,/ и я́сно присносу́щныя насыща́яся сла́дости,/ и сла́ву неизглаго́ланную ви́дя,/ и доброты́ венцы́ укра́шен,/ о нас, пою́щих тя, моли́/ приле́жно, Богоприя́тне,/ спасти́ся душа́м на́шим.

А́ще есть пост, Сла́ва, и ны́не, Богоро́дичен и́ли Крестобогоро́дичен (пи́саны в 18-й день). А́ще ли несть поста́, пое́м и самогла́сен свята́го. Сла́ва, глас 8:

Бо́жиих даро́в я́ко тезоимени́та/ и того́ насле́дника блаже́нства вси восхва́лим, ве́рнии,/ и ублажи́м по достоя́нию Фео́дора, до́бляго великому́ченика,/ вселе́нныя побо́рника,/ мо́лится бо Христу́ Бо́гу о ду́шах на́ших.

И ны́не, пра́здника, глас то́йже:

И́же на Херуви́мех носи́мый и пева́емый от Серафи́м,/ днесь в Боже́ственное святи́лище по зако́ну прино́сим,/ на ста́рческих, я́ко на пре́столе, седи́т рука́х/ и от Ио́сифа прие́млет дары́ Боголе́пно,/ я́ко супру́г го́рличищ,/ нескве́рную це́рковь и от язы́к новоизбра́нныя лю́ди,/ голуби́на же два, птенца́,/ я́ко Нача́льник Ве́тхаго же и Но́ваго./ Е́же к Нему́ обеща́ния Симео́н коне́ц прие́м,/ благосло́вя Де́ву Ма́рию Богоро́дицу,/ страсте́й о́бразы, и́же из Ней, провозгласи́/ и от Него́ проша́ше отпуще́ния, вопия́:/ ны́не отпусти́ мя, Влады́ко, я́коже пре́жде возвести́ ми,/ я́ко ви́дех Тя, Первове́чнаго Све́та/ и Спа́са Го́спода христоимени́тым лю́дем.

На стихо́вне стихи́ры, глас 2.

Подо́бен: До́ме Евфра́фов:

Две́ри Небе́сныя, отве́рзитеся,/ Христо́с бо в це́рковь/ я́ко Младе́нец/ Мате́рию Де́вою/ Бо́гу и Отцу́ прино́сится.

Стих: Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром.

Угль, проявле́йся/ Боже́ственному Иса́ии, – Христо́с,/ я́ко клеща́ми,/ рука́ми Богоро́дицы/ ны́не ста́рцу дае́тся.

Стих: Свет во открове́ние язы́ков/ и сла́ву люде́й Твои́х Изра́иля.

Стра́хом же и ра́достию/ на рука́х Влады́ку/ Симео́н держа́,/ живота́ проша́ше разреше́ния,/ поя́ Богома́терь.

Сла́ва, глас 5:

Днесь возсия́ па́че денни́цы/ че́стная па́мять страстоте́рпца Христо́ва,/ ве́рных сердца́ неви́димо просвеща́ющи/ и о́блаки душ отгоня́ющи/ де́йством и благода́тию Ду́ха./ К нему́же, мучениколю́бцы, воззове́м:/ ра́дуйся, и́же ве́рным я́влься Богодарова́нная благода́ть/ и чуде́с мно́жества простира́я к тебе́ притека́ющим, Фео́доре блаже́нне./ Христа́ непреста́нно моля́, не оскуде́й/ ве́чных благ получи́ти/ ве́рою соверша́ющим всечестну́ю па́мять твою́.

И ны́не, пра́здника, глас то́йже:

Ве́тхий де́ньми, младе́нствовав пло́тию,/ Ма́терию Де́вою в це́рковь прино́сится,/ Своего́ зако́на исполня́я обеща́ние./ Его́же Симео́н прии́м, глаго́лаше:/ ны́не отпуща́еши с ми́ром, по глаго́лу Твоему́, раба́ Твоего́,/ ви́деста́ бо о́чи мой спасе́ние Твое́, Святы́й.

Тропа́рь му́ченика, глас 4:

Воинствосло́вием и́стинным, страстоте́рпче,/ Небе́снаго Царя́ воево́да предо́брый был еси́, Фео́доре,/ ору́жиями бо ве́ры ополчи́лся еси́ мудренно,/ и победи́л еси́ де́монов полки́,/ и победоно́сный яви́лся еси́ страда́лец./ Те́мже тя ве́рою/ при́сно ублажа́ем.

Сла́ва, и ны́не, пра́здника.

Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды – Христо́с Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,/ да́рующаго нам воскресе́ние.

На у́трени

На Бог Госпо́дь: тропа́рь пра́здника, два́жды.

Сла́ва, му́ченика: И ны́не, пра́здника.

По 1-й стихоло́гии седа́лен, глас 3.

Подо́бен: Красоте́ де́вства:

От Де́вы Тя воплоще́нна, Христе́, ра́дуяся, подъя́т свяще́нный Симео́н, –/ ны́не отпуща́еши, – вопия́, – раба́ Твоего́, Влады́ко./ А́нна же непорочная, проро́чица и сла́вная,/ ны́не испове́дание и пе́ние прино́сит Тебе́./ Мы же, Жизнода́вче, вопи́ем Ти:/ сла́ва та́ко благоволи́вшему.

Сла́ва, и ны́не, то́йже.

По 2-й стихоло́гии седа́лен, глас 8.

Подо́бен: Свире́лей па́стырских:

Роди́лся еси́ на земли́, Собезна́чальный Отцу́,/ прине́слся еси́ в це́рковь, Непостижи́мый,/ ра́дуяся же, ста́рец на ру́ки Тя восприя́т, зовы́й:/ ны́не отпуща́еши, его́же посети́л еси́ по глаго́лу Твоему́,/ благоизво́ливый спасти́, я́ко Бог, род челове́ческий.

Сла́ва, и ны́не, то́йже:

Кано́н пра́здника, со ирмосо́м на 6, и святы́х два, на 8.

Кано́н му́ченика, глас 8.

Песнь 1

Ирмо́с: Колесницегони́теля фарао́ня погрузи́,/ чудотворя́й иногда́/ Моисе́йский же́зл, крестообра́зно порази́в/ и раздели́в мо́ре,/ Изра́иля же, беглеца́, пешехо́дца спа́се,/ песнь Бо́гови воспева́юща.

Боже́ственными я́ве све́тлостьми удобря́лся,/ страда́льческим ве́нцем священноукраша́емь/ и сла́вою облиста́емь Святы́я Тро́ицы,/ хва́лящия тя помина́й, вели́кий в му́ченицех Фео́доре.

Испо́лнь све́та, испо́лнь Боже́ственный благода́ти,/ нам возсия́ свяще́нная па́мять че́стных по́двиг твои́х,/ пресве́тлыми све́тлостьми озаря́ющи всех, благоче́стно тя почита́ющих,/ му́чениче страстоте́рпче Фео́доре.

И́дольстей одержа́щи бу́ри челове́чество,/ свяще́нный му́ченик, окормля́емь Креста́ Божественно́ю благода́тию, небу́рно преплы́в,/и в при́станища дости́же Небе́сная, ра́дуяся.

Богоро́дичен: Две́ре Бо́жия, покая́ния две́ри ми, Де́во, отве́рзи,/ помышле́ньми Боже́ственными ду́шу мою́ просвети́/ и страсте́й отжени́ тя́жкия о́блаки,/ я́ко да почита́ю, радуяся, и должно́ ублажа́ю Тя.

Кано́н проро́ка, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Че́рмное мо́ре,/ я́ко Еди́н сла́вно просла́вися.

Име́я Светода́вца, твоя́ послу́шающа мольбы́,/ просвеще́ние ми пода́ждъ, Заха́рие, проро́че пречу́дный.

Укра́шен добро́тами Боже́ственныя красоты́,/ А́нгелов доброты́ зри́ши душе́вною чистото́ю.

Испо́лнен святы́ни ангелоподо́бныя све́тлости я́ко сый, Богому́дре,/ соглаго́лющия А́нгелы и просвеща́ющия име́л еси́,/ Богопости́жне.

Богоро́дичен: Разреши́ся кля́тва Е́вы прама́тере, Всенепоро́чная,/ Христа́ бо ро́ждши, благослове́ньми мир обогати́ла еси́.

Ин. Песнь 3

Ирмо́с: Утвержде́н в нача́ле Небеса́ ра́зумом/ и зе́млю на во́дах основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́,/ Еди́не Человеколю́бче.

Я́ко лев, дерзну́в, посреди́ суди́ща стал еси́,/ возвеща́я спаси́тельное сло́во, досажда́я злочести́вым, пропове́дая и́стину/ и облича́я лжу безбо́жия, Фео́доре.

Мучи́тель, уди́влься твоему́ му́жеству, му́дре,/ ско́тскою я́ростию подви́гся, жи́лами волу́ями неща́дно ураня́ет тя, Фео́доре,/ ме́рзким истука́нным сокруше́ние соде́лавша.

Му́жеским по́мыслом я́звеныя ка́пли,/ я́ко во́лны морски́я, Богому́дре, отри́нул еси́,/ Креста́ бла́годатию укрепля́емь/ и венцено́сец Боже́ственнаго Ду́ха си́лою явля́яся.

Богоро́дичен: Сотвори́ вои́стинну Тебе́ вели́чие и́же от Тебе́ рожде́йся Госпо́дь,/ и ро́ди вси Тя, Бо́жию Ма́терь, сла́вят.

Ин

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь,/ несть пра́веден, па́че Тебе́, Го́споди.

Вы́шняя благода́ть тебе́ осени́/ промышле́ния несказа́ннаго Боже́ственно окормле́ние,/ святы́ми А́нгелы науча́ющи, прему́дре блаженне, и просвеща́ющи.

Боже́ственней бла́гости наказу́яся,/ научи́лся еси́, пребога́те, я́ко пречи́ст, плодови́т жи́ти Бо́жественным свяще́нием/ во гра́де всеосвяще́ннем.

Стена́ незы́блема,/ утвержде́ние лю́дем Богому́дрым был еси́, Го́споди,/ и ду́шам спасе́ние,/ я́коже дре́вле провозвести́ проро́к чу́дный.

Богоро́дичен: Рождество́ нетле́нно и пречи́сто, Богоро́дице,/ Твое́ чревоноше́ние мир изба́ви от тли и сме́рти,/ Спа́са бо родила́ еси́, Сло́во Присносу́щное.

Конда́к и и́кос пра́здника.

Седа́лен му́ченика, глас 8.

Подо́бен: Прему́дрости:

Боже́ственное всеору́жие восприи́м и и́дольскую лесть низложи́в,/ А́нгелы воздви́гл еси́ восхвали́ти по́двиги твоя́,/ Боже́ственною бо любо́вию ум распали́в, на о́гненную смерть до́блественно дерзну́л еси́./ Те́мже тезоимени́тно прося́щим тя дае́ши Боже́ственная дарова́ния, страстоте́рпче Фео́доре./ Сего́ ра́ди вопие́м ти:/ моли́ Христа́ Бо́га прегреше́ний оставле́ние дарова́ти/ пра́зднующим любо́вию па́мять твою́.

Сла́ва проро́ка, глас 3.

Подо́бен: Красоте́ де́вства:

Впряжены́ колесни́цы ви́дел еси́,/ пра́вимы руко́ю всех Бо́га, безпло́тныя слуги́,/ Заха́рие чу́дне,/ с ни́миже ра́дуяся, я́ко проро́к приснопа́мятный,/ моли́ напра́витися к пути́ Боже́ственнаго ра́зума/ ве́рою несомне́нною соверша́ющим па́мять твою́ всесвяще́нную.

И ны́не, пра́здника, глас 1.

Подо́бен: Лик А́нгельский:

Сый со Отце́м на престо́ле святе́м,/ прише́д на зе́млю, от Де́вы роди́ся/ и Младе́нец бысть, ле́ты Сый неопи́сан./ Его́же прии́м Симео́н на ру́ки, ра́дуяея, глаго́лаше:/ ны́не отпуща́еши, Ще́дре, возвесели́в раба́ Твоего́.

А́ще есть пост, Сла́ва, и ны́не, Богоро́дичен; а́ще среда́ или́ пято́к, Крестобогоро́дичен. Пи́саны в 28-й день.

Ин. Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог,/ Ты мое́ ра́дование,/не оста́вль не́дра О́тча/ и на́шу нищету́ посети́в./ Тем с проро́ком Авва́кумом зову́ Ти:/ си́ле Твое́й сла́ва, Человеколю́бие.

Име́я Христа́ внутрь себе́, блаже́нне, веща́юща,/ Ликини́еву горды́ню низложи́л еси́ словесы́ му́дрыми./ Се вои́стинну, му́чениче, обличи́л еси́ премно́гое безу́мие/ и де́лы пресла́вными зря́щия удиви́л еси́,/ страда́льче доблему́дренне Фео́доре.

Пове́шен быв беззако́нием мучи́теля, и ногтьми́ истерза́емь,/ и обагре́н ка́плями, му́чениче, непра́ведно излива́емых крове́й твои́х,/ умерщвле́ния дебельства́ и тли совле́кл еси́ ри́зы, преблаже́нне Фео́доре.

Богоро́дичен: Лука́вое грехо́в мои́х рукописа́ние Боже́ственным копие́м, Пречи́стая, расто́ргни,/ пробо́дшим Боже́ственная ре́бра вочелове́читися из Тебе́, Де́во, восхоте́вшаго,/ и в кни́зе мя написа́ти спаса́емых моли́ся,/ без ума́ от Бо́га уда́льшася.

Ин

Ирмо́с: Из горы́ приосене́нныя, Сло́ве, проро́к,/ Еди́ныя Богоро́дицы,/ хотя́ща воплоти́тися Богови́дно усмотри́/ и со стра́хом славосло́вяще си́лу Твою́.

Еди́но у́бо просвеща́тельное существо́ чести́, в со́лнцех же тре́х определя́емо,/ в су́щая проше́ствиями мно́жимо,/ я́ве науча́еши, всеблаже́нне.

Колесни́ца Бо́жия быв, проро́че, колесни́цы зря разли́чны А́нгельския,/ обходи́ти вся сподо́бился еси́, со благочи́нием иду́щия.

С вященноле́пно многосве́тлый све́щник,/ о́браз зри́ши Боже́ственнаго светозаре́ния,/ смотря́еши же, всеблаже́нне, Всеви́дца,/ И́мже вся́ческая спаса́ются.

Богоро́дичен: О́браз Твоего́ чи́стаго Рождества́ Богови́днии проро́цы проначерта́ют,/ многови́дно прообрази́вше и разли́чно гада́ньми Богому́дрии.

Ин. Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чу́ждая тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Просвеща́емь заре́ю, му́чениче, Боже́ственнаго Ду́ха и распаля́емь Христо́вою любо́вию,/ опаля́еме пло́ти неради́л еси́, ни ощути́л еси́ боле́зни, ни вмени́л еси́ му́ки,/ Небе́сными наде́ждами пита́емь.

И́го Влады́ки нося́ на вы́и преле́гкое,/ о́лова тя́готою, страстоте́рпче преблаже́нне, отягче́н,/ не преклони́лся еси́ отню́д, ни поколеба́лся еси́,/ ни́же победи́лся еси́, во́ине до́блий Фео́доре.

С Небесе́ пригласи́в тя Преблаго́е Сло́во, де́рзостна сотвори́,/ Его́же си́лою го́рькия боле́зни претерпе́л еси́ беззако́ннующих, му́чениче Христо́в,/ и му́ки и ну́жную, сла́вне, смерть.

Богоро́дичен: Пребыва́ти мя цела́, непрело́жна стоя́ния лу́чшаго,/ но пра́ве ше́ствующа и Богоуго́дная де́юща, Блага́я, умоли́,/ Блага́го ро́ждши Сло́ва, нас безеловеси́я изба́вльшаго.

Ин

Ирмо́с: От но́щи неве́дения/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.

Чи́стым се́рдцем и ума́ прови́дя острото́ю страсть Спа́сову,/ достоле́пно блажи́тся.

Преесте́ственно святы́й ра́дуйся, Сио́не,/ проро́к пред повелева́ет,/ гряде́т Царь твой, пра́веден и спаса́яй кро́тостию.

Проро́ков сла́ва,/ Богоглаго́ливых муже́й благоле́пие/ мир озаря́ет проро́чества светло́стию.

Богоро́дичен: Де́вы Рождество́м обнови́в нас, свободй пе́рвых согреше́ний,/ нас ра́ди быв Челове́к.

Ин. Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Страсть Безстра́стнаго вообража́я, распя́лся еси́, сла́вный му́чениче,/ пригвозди́вся на дре́ве, преблаже́нне, и подо́бник Влады́це был еси́,/ разреши́вшаго Кресто́м челове́ческия стра́сти во́лею.

Пове́шен, я́ко а́гнец, на дре́ве, и стре́лами состре́лян, блаже́нне,/ и оче́с зени́цы избоде́н, и уязвле́н по всему́ телеси́,/ уязви́л еси́ враго́в сердца́ копием боле́зней твои́х.

Пото́пы безме́рных мук,/ ко хра́мине припре́вшеся, му́чениче, твое́й души́, не поколеба́ша се́я:/ на недви́жимем бо ка́мени утверди́ся просия́вшаго от Де́вы/ и челове́ческий род просве́щшаго.

Богоро́дичен: Мари́е, всего́ ми́ра Госпоже́,/ я́ко Го́спода всех ро́ждши, вра́жия рабо́ты мя изба́ви,/ и того́ муче́ния исхи́ти, и спаси́ мя,/ на Тя несомне́нно упова́ющаго.

Ин. Ирмо́с то́йже.

Сый проро́ческаго испо́лнь вдохнове́ния, бу́дущих ра́зума па́че естества́ научи́вся,/ по́слан был еси́ пропове́дати благода́ть бу́дущую,/ день же креста́ ве́домый Го́сподеви, Богоприя́тне.

Ра́зумом духо́вным укра́шен,/ даро́в су́щих па́че ума́ сподо́бился еси́,/ А́нгельская явле́ния, и чи́ны, и веща́ния, и сла́вы ви́дев, пребога́те,/ чу́дным науча́ющия и Боже́ственным та́йнам.

Свещу́ доброде́телей стяжа́в, просвеще́нием Богоразу́мия сия́еши,/ таи́нственную провозвеща́я свещу́,/ е́юже па́че словесе́ Сло́ва воплоще́ние я́вится Боголе́пне от Сио́на,/ Заха́рие, проро́че Богоприя́тне.

Богоро́дичен: Поста́вивый Не́бо пока́за Тя Не́бо слове́сное, Богоро́дице,/ доброту́. Иа́ковлю возлюби́в,/ и из чре́ва Твоего́ Божества́ Со́лнце возсия́ пло́тски,/ и мир уясни́л есть благода́тию.

Конда́к, глас 2.

Подо́бен: Вы́шних ища́:

Му́жеством души́ в ве́ру оболки́йся/ и глаго́л Бо́жий, а́ки копие́, в ру́ку взем,/ врага́ победи́л еси́, му́чеников преве́лий Фео́доре,/ с ни́ми Христу́ Бо́гу моля́ся не преста́й о всех нас.

И́кос:

Страда́льцев пресве́тлую доброту́,/ прииди́те вси, пе́сненными венцы́, ве́рнии, Фео́дора венча́ем,/ дар бо Бо́жий вели́к ми́ру яви́ся сия́ньми чуде́с,/ врага́ бо победи́в Велиа́ра страда́нии че́стными,/ одождя́ет вме́сто кро́вных ка́плей исцеле́ний то́ки,/ с си́ми у́бо все́ми ра́дуется Христу́ и дае́т мир неоску́ден./ Тем вопие́м Ему́:/ моли́ непреста́нно о всех нас.

Ин. Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пе́щи ра́дованною ного́ю,/ я́ко во цве́тнице, лику́юще, поя́ху:/ благослове́н еси́ Бо́же оте́ц на́ших.

Глаго́лаше, ра́дуяся вели́чия Вседержи́телева,/ те́мже уди́вльшеся, зря́щий, пре́лести оста́виша мучи́тельство/ и ве́рою вопия́ху:/ благослове́н еси́, Бо́же оте́ц на́ших.

Плени́цами прему́дрых твои́х слове́с, преблаже́нне,/ ра́дуяся, улови́л еси́ из глубины́ неразу́мия приступа́ющия/ и Боже́ственны му́ченики соде́лал еси́, Фео́доре, пою́щия:/ благослове́н еси́, Бо́же оте́ц на́ших.

В темни́це к дре́ву тя свя́зана А́нгел свят, прише́д, разреши́,/ дерзнове́ние дая и укрепля́я тя велегла́сно вопи́ти, Фео́доре:/ благослове́н еси́, Бо́же оте́ц на́ших.

Богоро́дичен: Ме́не, жи́вша в ле́ности/ и презре́вша святы́я Твоя́ зако́ны и честны́я Твоя́, Христе́, за́поведи,/ уще́дри и спаси́ Ро́ждшия Тя ра́ди,/ я́ко Благоде́тель Бог и Многоми́лостив.

Ин

Ирмо́с: О́троцы евре́йстии в пе́щи/ попра́ша пла́мень дерзнове́нно/ и на росу́ огнь преложи́ша, вопию́ще:/ благослове́н еси́, Го́споди Бо́же, во ве́ки.

По всей земли́ твое́, проро́че, изы́де веща́ние Богодохнове́нное/ и глаго́л твои́х си́ла, вопи́ющих:/ благослове́н еси́, Го́споди Бо́же, во ве́ки.

Весь вы́шними заря́ми просвеще́н,/ бу́дущая ви́дел еси́, я́ко су́щая./ Те́мже, пребога́те, вопия́л еси́:/ благослове́н еси́, Го́споди Бо́же, во ве́ки.

Богоро́дичен: Пе́сньми почита́ю Тя, Де́во, поче́тшую род челове́ческий,/ безче́стием лю́тым пе́рвее осужде́нный:/ благослове́н, Всечи́стая, Плод Твоего́ чре́ва.

Ин. Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасены́, сия́ ви́дев,/ Творцу́ и Избави́телю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Све́тло подвиза́вся, врага́ победи́л еси́,/ и потре́бль во́инства его́ ору́жии ве́ры./ Те́мже побе́дным ве́нцем увя́злся еси́, поя́ Влады́це:/ о́троцы, благослови́те, свяще́ницы, воспо́йте,/ лю́дие, возноси́те во вся ве́ки.

По распя́тии, сла́вне, по стра́сти блаже́нней,/ по безме́рных ра́нах, блаже́нне,/ Бо́гу вы́ю твою́ приклони́л еси́, му́чениче му́дре,/ ме́чем че́стная глава́ твоя́ усечена́ бысть,/ зовы́й Влады́це:/ о́троцы, благослови́те, свяще́ницы, воспо́йте,/ лю́дие, превозноси́те во вся ве́ки.

Свяще́нное, Фео́доре, и многострада́льное те́ло твое́ исто́чник исцеле́ний ве́рным бысть,/ из него́же почерпа́ют благоче́стное притека́ющий разреше́ние страсте́й и ду́ты спасе́ние,/ вопию́ще Влады́це:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Богоро́дичен: Умерщвле́нную оживи́, па́дшую возста́ви,/ уязвле́нную ду́шу мою́ исцели́,/ ум мой умири́,/ напа́стей во́лны укроти́, Де́во, и вопию́ща мя спаси́:/ о́троцы, благослови́те, свяще́нницы, воспо́йте,/ лю́дие, превозноси́те Го́спода во вся ве́ки.

Ин

Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/и превозноси́те во вся ве́ки.

Сио́не, горо́, гра́де святы́й, ра́дуйся зело́, –/ Боже́ственный Заха́рия, А́нгелов собесе́дник, повелева́ет, –/ и ты весели́ся, Иерусали́ме, во вся ве́ки.

Заха́рие проро́че, красу́йся, испо́лньшаяся ви́дя словеса́,/ я́же предглаго́лал еси́, Ду́хом просвеща́емь,/ Го́спода пою́щим и превознося́щим Его́ во ве́ки.

Посреди́ гор присе́нных ви́дел еси́ стоя́щия А́нгелы,/ и́же над все́ми промы́шленное науча́ющия тя, сла́вный проро́че,/ песносло́вящия Христа́ во ве́ки.

Богоро́дичен: Ра́дуйся, престо́ле огнезра́чный Госпо́день,/ ра́дуйся, две́ре невеще́ственнаго сия́ния,/ ра́дуйся, о́блаче ле́гкий, я́же Со́лнце Пра́вды возсия́вшая ми́ру,/ Чи́стая Богороди́тельнице.

Ин. Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/и чре́во Твое́ бысть простра́ннейшее Небе́с;/ тем Тя, Богоро́дицу,/ А́нгелов и челове́к чинонача́лия велича́ют.

Освяти́л еси́, Богому́дре мучениче, сам себе́/ поже́ршемуся А́гнцу и Бо́гу на́шему,/ возвы́сився, я́ко всесожже́ние благово́нно, к Нему́,/ и свяще́нно возложе́ние, и соверше́нна и чиста́ благоприя́тна же́ртва./ Те́мже тя восхваля́ем и по до́лгу ублажа́ем.

Я́ко у́тро, я́ко день светоза́рен, яви́лся еси́, Фео́доре, со́лнце,/ све́тлыми твоего́ страда́ния луча́ми и чудесы, всеблаже́нне, подсо́лнечную благоче́стно просвеща́я/ и отгоня́ тьму пре́лести и страсте́й на́ших, Фео́доре.

Совокупи́лся еси́ со А́нгелы пло́тию,/ безпло́тныя враги́ побе́ждь,/ и со страда́льческими ли́ки весели́шися всегда́,/ и с ни́ми Боже́ственную песнь Тро́ице возглаша́вши, Фео́доре треблаже́нне,/ свети́льниче це́ркве и страстоте́рпцев удобре́ние.

Земля́ положе́нием твоего́ честна́го, Фео́доре, телесе́ освяща́ется,/ Не́бо же ра́дуется, дух твой свяще́нный стяжа́в;/ всегда́ челове́цы, па́мять твою́ че́стную творя́ще,/ моле́бно про́сим тя мо́литвенника о нас, преблаже́нне.

Богоро́дичен: Боголюби́вая Де́во,/ Блага́го моли́ спасти́ мя от скверн всех,/ я́звы се́рдца моего́ омы́вши покая́нием чи́стым и пла́чем сле́зным,/ да Тя ублажа́ю и велича́ю, Пренепоро́чная.

Ин

Ирмо́с: Тя, Неискусобра́чную Ма́терь Бо́га Вы́шняго,/ Тя, па́че ума́ ро́ждшую сло́вом вои́стинну Бо́га,/ вы́шшую Пречи́стых сил,/ немо́лчными славословле́нии велича́ем.

Вся́ко чу́вство оста́вив,/ уму́ Боже́ственному и чисте́йшему, всему́дре, светоно́сен предстои́ши,/ о ми́ре моли́твы творя́./ Те́мже вси тя, Заха́рие, блажи́м.

Глаго́лом после́дующе твои́х у́стен, Богоявле́ние,/ Го́спода призыва́ем./ И́мже спа́саеми, я́ко и́стины тя проро́ка и пропове́дника, Заха́рие,/ благоче́стно блажи́м.

Ми́лостива соде́лай твои́ми моли́твами Вла́дыку,/ свяще́нный и благознамени́тый пра́здник твой, Богодохнове́нне,/ ве́рою соверша́ющим и тя любо́вию чту́щим,/ я́ко проро́ка и Богоглаго́льника и́стиннейша.

Богоро́дичен: Бе́здну чуде́с Тя и дарова́ний, Богоро́дице, пучи́ну, Чи́стая, веду́ще и я́ве зна́юще,/ в Твое́ предста́тельство, наде́ющеся, притека́ем/ и спе́шно к Твоему́ кро́ву прибега́ем.

Свети́лен му́ченика.

Подо́бен: Ду́хом во святи́лищи:

Полки́ враго́в и де́монов на́глости до конца́ низложи́л еси́/ и кончи́ну прия́л еси́, Фео́доре блаже́нне, ве́ры ра́ди Зижди́теля твоего́,/ я́ко свиде́тель и́стины, спаса́вши всех от вся́ких скорбе́й и вреда́ чужда́го.

Сла́ва, и ны́не, пра́здника.

На стихо́вне стихи́ры пра́здника, глас 1.

Подо́бен: Всехва́льнии:

Я́ко вои́стинну пресве́тлый/ Бо́жий ковче́г, Чи́стая,/ очище́ние днесь Христа́ прине́сши,/ в це́рковь вно́сит/ и че́стно полага́ет/ на ру́ки Симео́на Богому́драго,/ те́мже освяти́шася/ святы́х ны́не свята́я/ и Еди́ному Свято́му сра́дуются.

Стих: Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром.

Просла́вися днесь,/ Христа́ Симео́н, я́ко угль,/ Боголе́пно прие́м,/ и облобыза́ет, очи́щь устне́,/ испове́дается же, и ра́дуется,/ и про́сит отпуще́ния./ Того́ у́бо вси, благоче́стно/ ны́не ублажа́юще,/ немо́лчными пе́сньми почита́ем.

Стих: Свет во открове́ние язы́ков/ и сла́ву люде́й Твои́х Изра́иля.

Дверь одушевле́на, Чи́стая Де́ва/ днесь Царя́ и Го́спода,/ Его́же внутрь име́яше,/ в це́рковь вно́сит, две́рьми входя́ща,/ дре́вле та́йно затворе́нными на земли́./ Те́мже, лику́юще пред лице́м Ея́ вси,/ Боже́ственными пе́сньми Ту восхва́лим.

Сла́ва, святаго, глас 8:

Страда́льческий соста́вив по́двиг,/ на пре́лесть му́жествовал еси́, Фе́одоре:/ огневеща́нным язы́ком твои́м посрами́л еси́ Ликини́ево безчелове́чество./ Те́мже и, со А́нгелы ра́дуяся, блаже́нне,/ моли́ Христа́ Бо́га,/ я́ко да Ми́лостив бу́дет нам в день Су́дный.

И ны́не, пра́здника, глас 5:

Испыта́йте писа́ния,/ я́коже рече́ во Ева́нгелиих Христо́с Бог наш,/ в них бо обрета́ем Того́, ражда́ема/ и пелена́ми повива́ема, в я́слех полага́ема/ и мле́ком пита́ема,/ обреза́ние прие́млюща и Симео́ном носи́ма,/ не мне́нием, ни привиде́нием, но и́стиною ми́рови я́вльшася,/ к Нему́же возопии́м:/ Преве́чный Бо́же, сла́ва Тебе́.

На литурги́и

Блаже́нны пра́здника, песнь 8-я и свята́го, песнь 6-я. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́ти ми ся к Тебе́. Апо́стол к Тимофе́ю, зача́ло 292. Аллилу́ия, глас 4: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится. Ева́нгелие от Матфе́я, зача́ло 36. Прича́стен: В па́мять ве́чную бу́дет пра́ведник:

На ма́лой вече́рни

Стихи́ры на 4, глас 4:

Житие́ непоро́чно яви́л еси́, святи́телю Са́вво,/ и к Престо́лу Госпо́дню, прехва́льне, доше́л еси́,/ пома́зався архиере́йским ми́ром/ и быв па́стырь слове́сна́го ста́да./ Тем тя ублажа́ем благочести́вно пе́сньми/ и всесвяще́нную твою́ соверша́ем па́мять.

Зна́меньми и чудеса́ми тебе́ Влады́ка просла́ви,/ треблаже́нне Са́вво:/ прого́ниши бо ду́хи/ и врачу́еши стра́сти,/ ду́ши же ве́рных просвеща́вши,/ притека́ющих к свято́му твоему́ гро́бу,/ А́нгелов равностоя́телю,/ архиере́ом сопресто́льне,/ апо́столом единонра́вне,/ благове́рия побо́рниче,/ моли́твенниче о ду́шах на́ших.

Благочести́ваго ко́рене блага́я о́трасль,/ от не́я же прозябе́ цвет благоуха́нный,/ мо́щи бо твоя́ проявля́ют доброде́тели,/ ихже мы облагоухающе,/ восхваля́ем Бо́га, тебе́ просла́вльшаго,/ Са́вво достоблаже́нне,/ моли́ся Господе́ви о душа́х на́ших.

Сла́ва, глас 1:

Свя́те и святи́телю всеблаже́нне Са́вво!/ посеща́й ста́до твое́/ и соблюда́й с невреди́мо от волко́в напада́ющих,/ загражда́я им злокова́рная уста́,/ я́ко да в ми́ре воспева́ем сла́ву твою́.

И ны́не, чудотво́рней ико́не, или́ Богоро́дичен.

На стихо́вне стихи́ры, глас 2:

Яви́лся еси́ от млады́х ногте́й, Богоно́се,/ освяще́н сосу́д, Са́вво,/ и жили́ще Пресвята́го и Животворя́щаго Ду́ха.

Стих: Свяще́нницы Твои облеку́тся в пра́вду,/ и преподо́бнии Твои́ возра́дуются.

Ра́дуйся, святи́телей похвале́, о́тче Савво,/ свяще́нником сла́ва,/ пра́вило мона́хом,/ бе́льцем украше́ние/ и Це́ркве утвержде́ние.

Стих: Блаже́н муж, боя́йся Го́спода,/ в за́поведех Его́ восхощет зело́.

Приими́ ны́не пе́ние/чад твои́х, о́тче святи́телю Са́вво, лю́бящих тя,/ и подава́й серде́чная проше́ния сла́вящим тя.

Сла́ва, глас 6:

Излия́ся благода́ть во устна́х твои́х,/ преподо́бине о́тче святи́телю Са́вво,/ и был еси́ па́стырь Христо́вы Це́ркве,/ уча́ словесныя о́вцы/ ве́ровати в Тро́ицу Единосу́щную/ во еди́ном Божестве́.

И ны́не, чудотво́рней ико́не, или́ Богоро́дичен.

Тропа́рь пи́сан на вели́цей вече́рни

На вели́цей вече́рни

Блаже́н муж, 1-й антифо́н

На Го́споди, воззва́х: стихи́ры на 8, глас 1:

О, ди́вное чу́до,/ исто́чник чу́до дея́ний,/ от гро́ба твоего́ возсия́ют святы́я мо́щи твоя́,/ святи́телю Христо́в, Са́вво преподо́бие./ Тем, чуде́с све́тлостьми просвети́в твоя́ ча́да ве́рная/ и и́стребив страсте́й омраче́ние, святи́телю,/ Христа́ Бо́га моли́/ дарова́ти нам ве́лию ми́лость.

Преподо́бие о́тче Са́вво,/ испроси́ я́же к Бо́гу моли́твами твои́ми/ Це́ркви утвержде́ние,/ иера́рхи покры́ моли́твою́ твое́ю,/ спобори́ Се́рбскому наро́ду твоему́/ и всем правосла́вным христиа́ном, притека́ющим к ра́це моще́й твои́х/ и светло́ творя́щих пра́зднство успе́ния твоего́, свя́те, мо́лимся.

Весели́ся и ра́дуйся, христоимени́тая Патриархи́е Се́рбская,/ такова́ име́вши святи́теля и пропове́дника благода́ти./ Воспои́м, ве́рнии, Дави́да иму́ще ликоначальника:/ свяще́нницы бо Твой облеку́тся в пра́вду,/ и преподо́бнии Твой возраду́ются,/ прося́ще у Христа́ ми́ра и ве́лия ми́лости.

И́ны стихи́ры святаго, глас 4:

О́тче Богоуго́дниче Са́вво,/ наказа́тель священни́ков и всея́ страны́ Се́рбския,/ звезда́ пресветла́я,/ осиява́ющая чудеса́ми вся ве́рныя,/ тя бо Бог пре́жде избра́ от ю́ности, о́тче,/ па́стыря о́вцам слове́сным./ Те́мже преподо́бных лик тя восприя́т,/ с ни́мже моли́ ста́ду твоему́ да́ти оставле́ние грехо́в/ и спасе́ние ве́чное.

Гроб твой де́ржит че́стное те́ло, а́ки бога́тство,/ обогаща́ющее чудеса́ми всех,/ и́же ве́рно притека́ют к тебе́,/ блаже́нне святи́телю Са́вво,/ име́ющему о́бласть вяза́ти и разреша́ти, преподо́бие,/ разреши́ вся согреше́ния/ пра́зднующим светло́ твое́ успе́ние/ и Ца́рствия Небе́снаго сподо́би их мо́литва́ми твои́ми.

Прииди́те, ве́рных собери́,/ псало́мски восплещи́те рука́ми,/ печа́льных утеши́теля, отча́янных засту́пника,/ Боже́ственнаго Са́вву воспева́юще,/ похвалу́ земли́ Се́рбския,/ всего́ свяще́нства украше́ние,/ ре́ку ми́лости вои́стину,/ Боже́ственнаго Христо́ва смире́ния ревни́теля,/ подаю́щаго ми́ру ве́лию ми́лость.

Доброде́тельми светло́ процве́л еси́,/ я́ко ма́слина плодови́та, в до́му Бо́жий,/ ту́чами твои́х пречи́стых моли́тв./ Отону́дуже себе́ свещу́ вжег светло́,/ вшел еси́ в Небе́сныя оби́тели/ иде́же воздаде́ся тебе́ вене́ц воздая́ния:/ не дал бо еси́ сна свои́ма очи́ма,/ ни ве́ждома свои́ма дрема́ния,/ донде́же усну́л еси́ сном о́бщим,/ преподо́бие святи́телю Са́вво./ Христу́ мо́лися дарова́ти ду́шам на́шим мир и ве́лию ми́лость.

Сла́ва, глас 8:

Весели́ся и ра́дуйся днесь, Се́рбская страно́,/ красу́йся и лику́й, вели́кая це́ркви, Патриархи́е Се́рбская,/ ди́вна в пра́вде, в не́йже лежи́т свята́я ра́ка,/ иму́щая дар благода́тнаго исцеле́ния./ Святи́телю вели́кий Са́вво,/ ты бо, смире́нием стяжа́в целому́дрие,/ твои́ми моли́твами дае́ши посо́бие/ к побежде́нию супоста́тов свои́х и наро́дных,/ тебе́ бо Христо́с пока́за вели́кое свети́ло Се́рбскому ро́ду,/ ты ему́ похвала́, ты защище́ние;/ твой гроб безме́здна врачба́ предлежи́т,/ к нему́ же приходя́щий слепи́и ве́рою просвеща́ются,/ хроми́и, влеку́щеся, ска́чуще, отхо́дят,/ неду́жнии исцеля́ются,/ бесну́ющии бе́сов избыва́ют./ Тем и мы днесь вси, почита́юще че́стное твое́ успе́ние,/ мо́лим тя, преподо́бие о́тче,/ ми́ру испроси́ и ду́шам на́шим ве́лию ми́лость.

И ны́не, пра́здника, глас 5:

Ветхий де́ньми младе́нствовав пло́тию,/ Ма́терию Де́вою в це́рковь прино́сится,/ Своего́ зако́на исполня́я обеща́ние./ Его́же Симео́н прии́мь, глаго́лаше:/ ны́не отпуща́еши с ми́ром,/ по глаго́лу Твоему́, раба́ Твоего́,/ ви́деша бо о́чи мой спасе́ние Твое́, Святы́й.

Проки́мен дне, чте́ния святи́тельская три.

На литии́ стихи́ры самогла́сны, глас 6:

Возсия́ днесь, я́ко со́лнце,/ и, я́ко мо́лния, возблиста́, о́тче, веща́ние твое́,/ и, я́коже гром, возгреме́ с Небесе́,/ име́л бо еси́ свы́ше вдохнове́ние и́стинно;/ ны́не же честны́я мо́щи твоя́/ неугаси́мыя лучи́ чуде́с испуща́ют/ от гро́ба, я́ко от черто́га светла́,/ просвеща́юще ду́ши пою́щих тя.

Пресла́вно просла́вися свята́я це́рковь,/ в не́йже поло́жены бы́ша честны́я мо́щи твоя́,/ к ним же лю́ди благове́рнии притека́юще,/ неисце́льным страсте́м прие́млют исцеле́ния/ о и́мени твое́м, святи́телю Са́вво,/ моли́ Христа́ Бо́га,/ да спасе́т ду́ши на́ша.

Святи́телей удобре́ние, Са́вво прему́дре,/ сто́лпе и утвержде́ние Це́ркве,/ Богосло́вия труба́ златоко́ванная,/ Тро́ицы побо́рниче,/ благоче́стия законопи́сче,/ нам, пра́зднующим че́стное успе́ние твое́,/ те́мже лобыза́ем че́стный гроб твой/ и мо́лимся тебе́,/ святи́телю Христо́в, Са́вво пребога́те,/ испроси́ па́стве твое́й грехо́в оставле́ние/ и всех нас добре́ сохрани́,/ да вси ублажа́ем тя.

Сла́ва, глас 8:

На́ста светоно́сный день, чудотво́рца,/ архиеписко́па Се́рбскаго Са́ввы, па́мять./ Прииди́те, соше́дшеся, пра́зднуем светло́,/ соста́вим ли́ки и похвала́ми почти́м./ Ра́дуйся, Симео́не, ко́рене благоче́стия;/ ра́дуйся, Са́вво святи́телю, первопресто́льный ро́да на́шего;/ ра́дуйся, Симео́не первовенча́нный, блага́я ве́тве;/ ра́дуйся, Са́вво вторы́й, лозо́ и́стинная,/ принося́щая нам цвет весе́лия;/ ра́дуйся, честны́й свети́льниче Се́рбския земли́,/ источа́еши бо́ чудеса́,/ излива́вши исцеле́ния/ и мо́лишися о ду́шах на́ших.

И ны́не, чудотво́рней ико́не, глас то́йже:

Егда́ просвеща́шеся Се́рбский наро́д:

На стихо́вне стихи́ры, глас 8:

Что тя нарече́м, святи́телю Са́вво?/ звезду́, озаря́ющую поднебе́сная,/ ми́ра ли красова́ние всечестно́е,/ озаря́ющее лю́ди луча́ми веле́ний благове́рия,/ ересе́й же тьму отгоня́ющее./ Моли́, преподо́бие, от тли и бед изба́витися/ ве́рою творя́щим святу́ю па́мять твою́.

Стих: Свяще́нницы Твои облеку́тся в пра́вду,/ и преподо́бнии Твой возра́дуются.

Что тя нарече́м, святи́телю Са́вво?/ ре́ку ли, излива́ющую исцеле́ния незави́стно/ всем, ве́рою приходя́щим к твоему́ свято́му гро́бу,/ и́ли исто́чник, источа́ющ уче́ния медото́чная во вся концы́/ и ве́рныя просвеща́ющ./ Моли́ся, преподо́бие, спасти́ся ду́шам на́шим.

Стих: Честна́ пред Го́сподем/ смерть преподо́бных Его́.

Прииди́те, торжеству́им светло́ па́мять святи́теля Са́ввы чудотво́рца./ Преста́вися бо от земли́ к невеще́ственным оби́телем,/ иде́же зрит доброту́ неизрече́нную,/ а́нгельским ли́ком собесе́дник быв./ Те́мже, со апо́столми и му́чениками лику́я,/ о́тче наш, Са́вво пребога́те,/ моли́ся приле́жно Христу́ Бо́гу/ о чтущих ве́рою святу́ю па́мять твою́.

Сла́ва, глас 5:

Благода́ть Свята́го Ду́ха/ де́йствует в раце́ моще́й твои́х/ на тех, и́же с ве́рою притека́ют,/ испуща́ют бо оне ми́ро благово́нное/ и подава́ют неду́гов исцеле́ние./ Те́мже, преосвяще́нне святи́телю Са́вво,/ име́я дерзнове́ние к Бо́гу/ и со Безпло́тными лику́я на Небесе́х,/ моли́ся спасти́ся ста́ду твоему́ от вся́ких бед.

И ны́не, пра́здника, глас 6:

На рука́х ста́рческих во дне́шний день,/ я́ко на колесни́це херуви́мстей,/ восклони́тися благоизво́ливый, Христе́ Бо́же,/ и нас, пою́щих Тя,/ страсте́й мучи́тельства изба́ви/ и спаси́, я́ко Человеколю́бец.

Тропа́рь святаго, глас 4:

Исправле́ние ве́ры и о́браз кро́тости,/ и я́коже сад посреде́ ра́я,/ преподо́бными де́лы твои́ми мир просвеща́еши,/ сего́ ра́ди к честне́й ра́не моще́й твои́х любо́вию прикаса́емся,/ лобыза́ем их и ве́рно вопие́м:/ предста́ни в по́мощь воспева́ющим па́мять святу́ю твою́ и светоно́сную,/ святи́телю о́тче Са́вво пребога́те, мо́лимся,/ Христу́ Бо́гу моли́ся/ спасти́ся ду́шам на́шим.

Сла́ва, и ны́не, чудотво́рней ико́не, глас 4: Днесь светло́ красу́ется: или́ Богоро́дичен, гла́са.

На у́трени

На Бог Госпо́дь: тропа́рь свята́го два́жды. Сла́ва, и ны́не, пра́здника.

По 1-м стихосло́вии седа́лен, глас 1:

Плоды́ слове́сныя принося́, му́дре Са́вво, Го́сподеви,/ восхваля́вши Его́ со архиере́йми и преподо́бными./ Те́мже с ни́ми и ра́дуешися в земли́ живы́х,/ зане́ сла́ву их возлюби́л еси́./ Сего́ ра́ди, о́тче свяще́нне,/ непреста́й моли́ти Царя́ Небе́снаго за весь наро́д Се́рбский,/ Еди́наго Человеколю́бца.

Сла́ва, и ны́не, пра́здника, глас 3:

От Де́вы Тя воплоще́нна, Христе́, ра́дуяся, подъя́т свяще́нный Симео́н,/ ны́не отпуща́еши, вопие́т, раба́ Твоего́, Влады́ко./ А́нна же, непоро́чная проро́чица и сла́вная,/ ны́не испове́дание и пе́ние прино́сит Тебе́./ Мы же, Жизнода́вче, вопи́ем Ти:/ сла́ва та́ко Благоволи́вшему.

По 2-м стихосло́вии седа́лен свята́го, глас 3:

Ми́лостивому Христо́ву уго́днику, незлоби́вому и кро́ткому,/ вси тебе́ зове́м, приле́жно моля́щеся:/ разреши́ междоусо́бную страсте́й на́ших брань,/ разруши́ злочести́вая ага́рянов кова́рства и покори́ их, присноблаже́нне,/ вся́ческих же искуше́ний изба́ви любо́вию воспева́ющих тя.

Сла́ва, и ны́не, пра́здника, глас 8:

Роди́лся еси́ на земли́, Собезнача́льный Отцу́,/ прине́слся еси́ в це́рковь, Непостижи́ме./ Ра́дуяся же, ста́рец на ру́ки Тя восприя́т, зовы́й:/ ны́не отпуща́еши, его́же посети́л еси́, по глаго́лу Твоему́,/ благоизво́ливый спасти́ я́ко Бог род челове́ческий.

По полиеле́и седа́лен свято́му, глас 8:

Пропове́дует, о́тче, твоя́ чудеса́ ны́не Се́рбская Патриархи́я и вся́ка страна́ оте́чествия,/ я́ко от боле́зней и скорбе́й избавля́вши вся, Богоблаже́нне Савво,/ пита́телю вдови́ц, и си́рых, аки оте́ц,/ помо́щник в ско́рбех всеизря́ден,/ пла́чущих утеше́ние,/ па́стырь и наста́вник блужда́ющим, Са́вво преподо́бие,/ изба́ви нас от бед моли́твами твои́ми,/ прося́ у Христа́ Бо́га прегреше́ний оставле́ние/ ве́рою и любо́вию чту́щим святу́ю па́мять твою́.

Сла́ва, и ны́не, чудотво́рней ико́не, глас 4: Пречи́стый о́браз Твой: Та́же, степе́нна, 1-й антифо́н глас 4:

Проки́мен глас 4:

Свяще́нницы Твои облеку́тся в пра́вду,/ и преподо́бнии Твои́ возра́дуются.

Стих: Та́мо возращу́ рог Да́видови, угото́вах свети́льник пома́занному моему́. Вся́кое дыха́ние: Ева́нгелие от Матфе́я, зача́ло 10.

По 50-м псалме́ стихи́ра, глас 6:

Ду́ха Свята́го благода́ть/ излия́ся во твои́х устна́х, о́тче,/ и был еси́ па́стырь Христо́вы Це́ркве,/ уча́ слове́сныя о́вцы/ ве́ровати в Тро́ицу во еди́ном Божестве́.

Кано́н святаго, глас 8. Катава́сия пра́здника.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ израильтя́нин вопияше:/ Изба́вителю и Бо́гу на́шему пои́м.

Боже́ственными заря́ми и свяще́нными светосия́ньми/ при́сно мою́ ду́шу озари́, о́тче,/ сла́вяща твой пра́здник, иера́рше.

Из коре́не блага́го блажа́йшая о́трасль прозя́бл еси́,/ Бо́жия ра́зума вода́ми напая́емь./ Тем и плод благоуха́нен яви́лся еси́ житие́м свои́м от ю́ности,/ веселя́я сердца́ и ду́ши пою́щих тя.

Возлюби́в му́дрости нача́ло, страх Бо́жий,/ и за́поведем его́ при́сно поуча́яся,/ насади́лся еси́, аки дре́во, при исхо́дищих вод духо́вных,/ от ни́хже, о́тче, напая́емь,/ плод Христу́, Са́вво, прине́слся еси́ пресла́дкий.

Всесве́тлую тя звезду́ Мы́сленное Со́лнце пока́за,/ све́тлость твои́х доброде́телей просвети́ зе́млю на́шу,/ святи́телю Христо́в, о́тче Савво.

Чистото́ю любве́ одержи́мь,/ благоро́дием души́ поработи́л еси́ плотолю́бие,/ тем ны́не, венцы́ чистоты́ прие́мля, со А́нгелми у Христа́ весели́шися,/ Его́же моли́ за нас, о́тче Са́вво.

Житие́, при́сно очище́нно и чи́сто/ и скве́рне несмеше́нно, яви́в,/ показа́лся еси́ на земли́ Христо́в свяще́нный сосу́д,/ прему́дре Са́вво блаже́нне.

Богоро́дичен: Со Отце́м Сый Единоро́дный/ земны́я обожи́, Чи́стая,/ за мно́гая щедро́ты, я́ко Бог Преблаги́й.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты ме́не утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бие.

Сын дне и све́та яви́лся еси́, святи́телю, труда́ми твои́ми,/ ны́не же во све́тлостех святы́х я́сно сия́еши благода́тию.

Свети́льник души́ свое́й слеза́ми украша́я/ и ра́но у́тренюя ко Христу́/ рук свои́х просте́ртием в моли́твах,/ свое́ те́ло, мы́сленнаго Амали́ка, умертви́л еси́/ и на го́ру безстра́стия возше́л еси́.

Путь нечести́ваго искуше́ния обличи́л еси́ всем прельще́нным,/ приве́д их к Сло́ву Пастыренача́льнику,/ я́ко па́стырь слове́сный и спаси́тельный.

Безстра́стия любо́вию подстрека́емь,/ пло́тская взыгра́ния изсуши́л еси́,/ ду́шу же свою́ Бо́жественными сия́ньми просвети́л еси́,/ те́мже мо́лимся и нам улучи́ти свет разу́мный, о́тче Са́вво.

Благоро́дием высо́к, доброду́шием изя́щен/ и ра́зума му́дростию удивле́н был еси́, сия́я чи́стото́ю,/ я́ко цвет, украси́вся, Са́вво о́тче, све́тлым смире́нием.

Правове́рно, преподо́бие, Це́рковь Христо́ву упасл еси́,/ отгнав ерети́ческия пле́велы,/ ны́не же во Вы́шних водворя́ешися, преблаже́нне.

Богоро́дичен: Разу́мно в купине́ огнепа́льней ви́де Тя Моисе́й,/ я́сно образу́ющей Бо́га, хотя́ща роди́тися из Тебе́ неизрече́нно, Богоро́дице Присноде́во.

Седа́лен, глас 8:

Украша́лся прему́дростию ра́зума,/ низложи́л еси́ горды́ню плотски́я тя́готы/ и был еси́ оби́тель Ду́ха Пресвята́го,/ непреста́нно простира́лся раз́умом к лю́бящему Тя./ Тем, ре́вностию Божественно́ю разгара́яся, сла́вне,/ яви́лся еси́ сиро́там и убо́гим утвержде́ние/ и А́нгелом собесе́дник, Са́вво,/ моли́ Христа́ Бо́га грехо́в оставле́ние по́дати/ чту́щим любо́вию святу́ю па́мять твою́.

Сла́ва, и ны́не, пра́зднику, глас 4:

На горе́ Сина́йстей дре́вле ви́де Моисе́й за́дняя Божия/ и то́нкий Боже́ственный глас сподо́бися во мра́це и ви́хре слы́шати;/ ны́не же Симео́н воплоще́ннаго Бо́га непрело́жне нас ра́ди на ру́ки прия́т/ и ра́достно тща́шеся ити́ от су́щих зде к животу́ ве́чному./ Те́мже вопия́ше:/ ны́не отпуща́еши раба́ Твоего́, Влады́ко.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Предве́дый Бог, блаже́нне, твоея души́ красоту́ и ра́зума чистоту́/ священнопропове́дника мудра́ и учи́теля пока́за тя.

Ду́хом просвеще́н сын, су́щия во тьме пре́лести просвеща́вши/ и твои́м сла́дким поуче́нием сыны́ дне соверша́вши, святи́телю Са́вво.

От тем звере́й изба́вил еси́, ста́до твое́ растерзати и́щущих,/ но ты, я́ко бодр архипа́стырь, и ны́не ревну́еши о сохране́нии ро́да и оте́чества твоего́.

Руко́ю вели́каго архиере́я Се́рбскаго Арсе́ния/ и освяще́ннаго собо́ра прие́млеши пома́зание архиере́йства/ и, Ду́хом воздвиза́емь, о́тче Са́вво,/ и па́стырь ро́ду Се́рбскому и оби́тели твое́й столп был еси́.

Мир утверди́ся в оби́тели твое́й, иера́рше,/ и в твое́м ро́де и епи́скопстве моли́твами твои́ми,/ мо́лися приле́жно в ми́ре утверди́тися ми́ру, святи́телю Са́вво.

Твои́ роди́телие бы́ша рачи́тели и те́пли подража́тели Христу́ Бо́гу,/ Ему́же созда́ша храм прекра́сный во и́мя пресла́внаго Вознесе́ния Госпо́дня./ Те́мже в хра́ме Его́ те́ло свое́ полага́вши,/ аки во дворы́ Спа́са своего́.

Богоро́дичен: Име́я Тя Помо́щницу, кого́ у́боюся когда́ и́ли страшу́ся?/ Кто же, хотя́ ско́рбная навести́ рабу́ Твоему́,/ не устраши́тся Тебе́, Пречи́стая, и не па́дает на но́зе?

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир подаждь нам,/ Человеколю́бче.

Прильпе́ любо́вию душа́ твоя́ ко Го́споду, святи́телю блаже́нне,/ те́мже те́ло твое́ че́стное/ в честнем хра́ме Его́ нетле́нно во мно́гая ле́та соблюде́ся.

Просла́ви тя Госпо́дь, Са́вво пребога́те,/ и те́ло твое́ соблюде́ на мно́гая ле́та нетле́нно,/ явля́я тя о́бщника рабо́м Свои́м,/ и́хже и по сме́рти досто́йно соублажа́ешися, блаже́нне.

Красота́ гове́ния твоего́, е́же ко Го́споду,/ привлече́ благода́ть благоле́пию души́ твоея́, свяще́нне,/ и возведе́ тя вели́кому ро́ду Се́рбскому отца́,/ и архипа́стыря пока́за тя, преподо́бие.

Пе́сньми почти́л еси́ па́мять иера́рха Са́ввы пе́рваго/ и хвала́ми, я́ко досто́йно, ублажи́л еси́ того́./ Ны́не же сам, иера́рше Са́вво, прича́ствуеши похвала́м его́/ и по сотворе́нию твоему́ к бли́жнему восприе́млеши.

Приноси́мое аки че́стное возноше́ние Бо́гу пе́рвопрестольником Се́рбским Са́ввою/ твое́ священно́е па́стырства возведе́ние,/ я́ко пасу́щу ти Госпо́дни лю́ди, Са́вво святи́телю, преподо́бием и крото́стию.

Возлюби́л еси́, архиере́е, свяще́нныя мужи́ пе́сньми восхваля́ти,/ я́ко рачи́тель доброты́ их и подража́тель дея́ний Боголюбе́зных.

Богоро́дичен: Низложи́, Влады́чице, враго́в моих шата́ние,/ Тя бо и́мам и Предста́тельницу, и наде́жду, и по́мощь кре́пкую,/ Ты мя соблюди́, Чи́стая, наве́та вра́жия и ла́яния их.

Песнь 6

Ирмо́с: Моли́тву пролию ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя

Возвы́шенное смире́ние, чистоту́ ума́,/ любо́вь нелицеме́рну, ве́ру и наде́жду име́я и́стинну, Са́вво всесла́вне,/ Тро́ицы яви́лся еси́ жили́ще.

Се, прему́дре, Ду́ха благода́тию быва́вши наста́вник слове́сных ове́ц,/ и́хже приво́диши к же́ртвеннику доброде́телей.

Патриа́ршее седа́лище украси́ся тобо́ю,/ тя бо, прехва́льне, у́чит Дух Святы́й/ и тебе́ па́стыря руко́ю святи́тельскою соверша́ет.

Весь у́бо ум впери́в к высоте́,/ земна́я же ни во что же вмени́в,/ смире́нием, достоблаже́нне Са́вво, высо́кая восприя́л еси́.

Хвала́ми да почти́м треблаже́ннаго отца́,/ и́же Небе́сная возжела́в, земна́я же оста́вив,/ усе́рдно потече́, я́ко еле́нь на исто́чник,/ после́довав стопа́м роди́телей свои́х.

Святи́тельства пра́вило святи́телем показа́лся еси́,/ де́тельнаго же подписа́ние./ Сло́во Твое́ обре́те о́браз виде́ния,/ Богосло́вия же твоего́ преде́л уче́нию яви́ся.

Богоро́дичен: Сло́во О́тчее,/ предочи́стившися, о Чи́стая, Ду́хом слове́снаго естества́,/ на благодея́ние родила́ еси́.

Конда́к, глас 8:

Я́ко архиере́ем сопресто́льник/ и святи́телем изря́дный побо́рник был еси́, святи́телю Са́вво,/ сохраня́яй оте́чество, оби́тель, град же и лю́ди, почита́ющия тя ве́рою/ и че́стным твои́м моще́м покланя́ющияся,/ да велегла́сно тебе́ вопи́ем:/ ра́дуйся, Са́вво Богому́дре.

И́кос:

От чре́ва мате́рия хва́лит освяще́ннаго святи́теля Госпо́дня вся страна́ Се́рбская,/ преподо́бнаго Са́вву, своему́ оте́честву утвержде́ние,/ прие́мшаго благода́тныя да́ры Боже́ственныя сла́вы,/ к нему́ же притека́ем вси с ве́рою/ и любе́зно целу́ем ра́ку моще́й его́./ Те́мже мы, недосто́йнии и гре́шнии,/ наде́ющеся на моли́твы твоя́, святи́телю,/ я́же ко Влады́це и Пречи́стей Его́ Ма́тери,/ жела́ем, аки пси, прия́ти насыще́ние от крупи́ц,/ па́дающих от тра́пезы господе́й свои́х,/ и е́же в День су́дный улучи́ти облегче́ние соде́янных ра́ди зол,/ да велегла́сно тебе́ вопие́м:/ ра́дуйся, Са́вво Богому́дре.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, но́юще:/ отце́в Бо́же, благослове́н еси́.

Процве́л еси́, я́ко фи́никс, во дво́рех Бо́жиих/ и до́лжным сном преподо́бных усну́л еси́,/ сего́ ра́ди гроб твой быва́ет наслажде́ние нам,/ и сам, пропове́дниче Са́вво, показу́еши чу́до ви́дящим./

Самово́льне оста́вил еси́, о́тче наш Са́вво, вся сла́вная, и сро́дная, и подру́жная,/ после́довав Христу́ Бо́гу, по Ева́нгельскому глаго́лу.

Вопло́щшагося Сло́ва слуга́ был еси́, Са́вво Богогла́се,/ мно́гия бо лю́ди изба́вил еси́ безеловесия́,/ я́ко Боже́ственный учени́к Возсия́вшаго.

Тле́нная оста́вив, треблаже́нне, восприя́л еси́ нетле́нная,/ насыща́йся Боже́ственныя све́тлости во дворех Го́спода на́шего, Са́вво прему́дре.

Лю́дие твой, о́тче, и ча́да Ду́хом Святы́м порожде́нна,/ жа́лостная оста́вльше, ра́достная тебе́ воспева́ют пе́ния, вопию́ще:/ не оста́ви нас, свя́те, в ра́дости Го́спода твоего́,/ моля́ о ду́шах на́ших.

Насле́довав, я́ко сын возлю́бленный, оте́ческую му́дрость и доброде́тель,/ прие́мник был еси́ Бо́жественнаго престо́ла,/ стопа́м Евангели́ста после́дуя.

Богоро́дичен: Свы́ше Тебе́ глас ра́достно возопи́, А́нгел, Богоро́дице,/ неизрече́нное Влады́ки возвеща́я Тебе́ зача́тие.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Вразумля́л еси́ неразу́мный,/ обраща́л еси́ прельще́нный,/ совраща́ющияся же, о́тче, спасл еси́,/ привед их к Бо́гу, пою́щия:/ благослове́н еси́, Го́споди Бо́же оте́ц на́ших.

Ны́не лице́ Христо́во созерца́й, ты, о Са́вво,/ сою́зу бо теле́сному разре́шшуся,/ соедини́лся еси́ с твои́м жела́нием.

Твое́ сло́во уподо́бися вои́стинну реце́, о Са́вво,/ наводня́ющей свои́м тече́нием сю́ду и сю́ду,/ злосла́вных же ухищре́ния отвраща́ющей.

Хору́гвь Христо́ва, христиа́ном хвала́, по апостолу́, о́тче Са́вво, взыва́л еси́,/ ничи́м же хваля́ся, то́кмо о Кресте́ Го́спода на́шего Иису́са Христа́.

Кро́ткое и молчали́вое нра́ва твоего́ восприи́м, Госпо́дь, блаже́нне,/ поста́ви тя па́стыря лю́дем Свои́м,/ на кого́ бо призира́ет, аще не на кро́ткаго, и молчали́ваго,/ и трепе́щущаго слове́с Его́.

Уста́ вдови́ц благослови́ша тя,/ заступле́ния твоего́ сподо́бльшися, иера́рше блаже́нне,/ ты бо благоугожда́л еси́ Бо́гу по непоро́чному Ио́ву,/ изыма́вшему оби́димыя от наси́лия.

Богоро́дичен: Боголе́пная Де́во,/ озло́бленную мою́ ду́шу грехо́м/ ублажи́ бла́гостию ро́ждшагося от Тебе́ Го́спода Бо́га.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Я́ко свет, я́ко све́щник,/ я́ко вели́кое со́лнце, я́ко мо́лния, Христо́вы Це́ркве возсия́л еси́,/ и ве́рных ра́зумы просвети́л еси́,/ и в невече́рняя места́ всели́лся еси́,/ поя́ трисвяты́ми гла́сми Тро́ицу Несозда́нную.

Во́здух у́бо освяти́ся благово́нием моще́й твои́х, Са́вво блаже́нне, Христо́в святи́телю,/ Це́рковь же и оби́тель твоя́ Патриархи́я, веселя́щися, вопие́т:/ благосло́вен Бог оте́ц на́ших.

Пло́тию ми́ра кро́ме быв, святи́телю,/ и в прекра́сных чи́на своего́ обита́я,/ обогаща́вши род наш творе́нием све́тлым./ Те́мже па́мять твою́ ве́рою соверша́ем на земли́, Са́вво прему́дре.

Ца́рский цвет Це́ркви цвете́т, Крест и́стинный,/ ты же, святи́телю Са́вво досточу́дне, вземь той крест,/ поте́кл еси́ ца́рским путе́м, вопия́:/ благослови́те, вся дела́ Госпо́дня, Го́спода.

Земля́ те́ло твое́ блаже́нное скрыва́ет,/ я́ко исцеле́ния точа́щее ве́рным,/ не́бо же дух со и́збранными от ве́ка но́сит,/ Боже́ственными сия́ньми озаре́н вои́стину.

Красно́ у́бо Це́рковь весели́тся в па́мяти твое́й, о святи́телю треблаже́нне Са́вво,/ Се́рбский же ро́дове стека́ются, пра́зднственная тебе́ принося́ще/ и восхваля́юще Христа́, тебе́ просла́вльшаго.

Богоро́дичен: Де́во Преблаженная,/ ублажа́ем Тя, ро́ди челове́честии,/ я́ко роди́ла еси́ Спаси́теля душ на́ших.

Свети́лен свята́го:

Чу́днаго и сла́внаго святи́теля Са́вву вели́каго,/ прииди́те, Се́рбстии ро́ди и собо́ри, пе́сньми Боже́ственными/ и свяще́нными гла́сми восхва́лим,/ я́ко сопресто́льна Патриархи́и Се́рбской/ и а́нгельским чи́ном сослуже́бника.

Сла́ва, святаго:

Сла́вно краси́тся днесь светоза́рное Се́рбское торжество́,/ и́же во све́те сла́вы Бо́жия предстоя́, святи́телю Са́вво блаже́нне,/ помяни́ нас, хваля́щих твою́ па́мять.

И ны́не, пра́здника:

Ду́хом во святи́лищи предста́в, ста́рец/ на руки́ восприя́т зако́на Влады́ку, вопия́:/ ны́не соуз мя пло́тских разреши́,/ я́коже рекл еси́, с ми́ром,/ ви́дех бо очи́ма открове́ние язы́ков и Изра́илю спасе́ние.

На хвали́тех стихи́ры свято́му на 6, глас 6:

Руко́ю вели́каго архиере́я Се́рбскаго, Арсе́ния,/ ку́пно со судо́м освяще́ннаго Собо́ра/ прие́млеши пома́зание архиере́йское/ и, Ду́хом воздвиза́емь, о́тче Са́вво,/ полага́ешися в па́стыря Се́рбскому ро́ду и Патриархи́и.

От тем звере́й, и́щущих разтерза́ти ста́до твое́,/ Се́рбский род изба́вил еси́,/ я́ко бодр архипа́стырь,/ сохраня́я старе́йшинство свое́.

Мир умири́ся, иера́рше, твои́ми моли́твами./ Проси́ и нам утверди́тися в ми́ре/ моли́твами твои́ми, святи́телю.

Свои́м роди́телем те́плый рачи́тель/ и подража́тель был еси́,/ ти́и бо созда́ша прекра́сный храм/ во и́мя пресла́внаго Вознесе́ния Госпо́дня,/ те́мже в то́мже хра́ме полага́ешися,/ аки во дворы́ Спа́са своего́.

Просла́ви тя Госпо́дь, Са́вво пребога́те,/ и те́ло твое́ соблюде́ на мно́гая ле́та нетле́нно,/ тем бо был еси́ о́бщник рабо́м Его́,/ подража́я им житие́м,/ сего́ ра́ди соублажа́ешися с ни́ми и по сме́рти.

Красота́ гове́ния твоего́ ко Го́споду/ привлече́ благода́ть благоле́пия души́ твое́й, свяще́нне,/ и поста́ви тя быти Се́рбскому ро́ду/ отца́ архипа́стыря и святи́теля.

Сла́ва, глас 1:

Днесь све́тло красу́ется святе́йшая Патриархи́я Се́рбская/ в па́мяти треблаже́ннаго отца́ Са́ввы,/ днесь и мы, обстоя́ще и облобыза́юще ра́ку его́,/ аки Боголюби́вая его́ ча́да,/ и хва́ляще его́, вопием:/ ди́вен Бог во святы́х Свои́х,/ в церква́х благослови́м Тя, Го́споди.

И ны́не пра́здника, глас 5:

Испыта́йте Писа́ния,/ я́коже рече́ во Ева́нгелиих Христо́с Бог наш,/ в них бо обрета́ем Того́ ражда́ема/ и пелена́ми повива́ема,/ в ясле́х полага́ема/ и мле́ком пита́ема,/ обреза́ние прие́млюща и Симео́ном носи́ма,/ не мне́нием, ни привиде́нием,/ но и́стиною ми́рови явльшася,/ к Нему́ же возопие́м:/ преве́чный Бо́же, сла́ва Тебе́.

Славосло́вие вели́кое и отпу́ст.

На литурги́и

Блаже́нны от кано́на пра́зднику и свято́му. Тропари́ и кондаки́ пра́зднику и свято́му. Про́кимен, глас 7: Честна́ пред Господем смерть преподо́бных Его́. Стих: Что возда́м Го́сподеви о всех, я́же воздаде́ ми. Апо́стол ко Евре́ем, зача́ло 318. Аллилу́ия, глас 2: Свяще́нницы Твои́ облеку́тся в пра́вду, и преподо́бнии Твои́ возра́дуются. Евангели́е от Иоа́нна, зача́ло 36, от полу́. Прича́стен: В па́мять ве́чную бу́дет пра́ведник: