На ма́лой вече́рни
На Го́споди, воззва́х: стихи́ры на 4, глас 4.
Подо́бен: Званный свы́ше:
Боже́ственнаго разуме́ния прии́м, Симео́не, сия́ние,/ о́чи просвети́в твой серде́чнии,/ е́реси мрак отве́ргл еси́,/ Правосла́вия же ве́ру я́ко хору́гви воздви́гл еси́,/ и от князя тьмы лю́ди твоя́ исхи́тил еси́,/ и благоче́стием сих просвети́л еси́,/ твою́ па́мять досто́йно сла́вим,/ моля́ще моли́твами твои́ми Иису́са Человеколю́бца/ спасти́ и просветити ду́ши на́ша.
Ца́рствующего все́ми, Царя́ Христа́,/ я́ко силе́н во́ин/ проти́вныя ве́ре низложи́л еси́,/ и лю́ди твоя́ невреди́ми от сих соблю́л еси́,/ и всем, и́же в житии́ доброде́тели, о́тче оби́лен,/ я́ко ма́слина многоплодови́та вои́стинну яви́лся еси́./ И ны́не ма́стию ми́ра твоего́ освяща́еши,/ твою́ па́мять, Симео́не, поющи́я,/ и моля́щия моли́твами твои́ми Иису́са Человеколю́бца/ спасти́ и просвети́ти ду́ши на́ша.
Присносу́щаго жития́ све́тлости/ и е́же со А́нгелы пребыва́ния, Симео́не, воспомина́я,/ све́тлых жития́, о́тче, избежа́в,/ крест твой восприе́м, Распе́ншемуся тебе́ ра́ди после́довал еси́,/ и в пусты́ни поста́ тече́ние соверши́л еси́,/ ны́не же во све́тлостех святы́х весели́шися./ Тем твою́ па́мять досто́йно сла́вим,/ моля́ще Иису́са Человеколю́бца/ спасти́ и просвети́ти ду́ши на́ша.
Сла́ва, глас 5:
Преподо́бне о́тче,/ глас Ева́нгелия Госпо́дня услы́шав,/ мир оста́вил еси́,/ бога́тство и сла́ву в ничто́же вмени́в,/ те́мже всем вопия́л еси́:/ возлюби́те Бо́га и обря́щете благода́ть ве́чную,/ ничто́же предпочти́те па́че любве́ Его́,/ да егда́ прии́дет в сла́ве Свое́й,/ обря́щете поко́й со все́ми святы́ми./ Его́же моли́твами, Христе́, сохрани́ и спаси́ ду́ши на́ша.
И ны́не, Богоро́дичен:
Тебе́ мо́лимся я́ко Бо́жией Ма́тери,/ Благослове́нная,/ моли́ о спасе́нии душ на́ших.
На стихо́вне стихи́ры, глас 3.
Подо́бен: До́ме Евфра́фов:
Бога́тство на земли́, ра́дуяся, разда́в,/ ны́не ве́село на Небесе́х прие́млеши,/ Симео́не, воздая́ние.
Стих:Честна́ пред Го́сподем/ смерть преподо́бных Его́.
Сла́ву с сы́ном презре́вше тле́нную,/ Боже́ственныя сла́вы вове́ки сподо́бистеся,/ и́деже ны́не о нас мо́литеся.
Стих:Восхва́лятся преподо́бнии во сла́ве/ и возра́дуются на ло́жах свои́х.
Изба́вите отцы́,/ ко Христу́ моли́твами ва́шими,/ от вся́ких бед и озлобле́ний ва́шу па́мять почита́ющих.
Сла́ва, глас 8:
Царя́ всех, Христа́ Бо́га, любо́вию,/ ду́ши своя́ уязви́вше,/ ца́рствия красоты́ оста́вивше,/ ни́жняя вся я́ко не су́щая премину́вше,/ Ева́нгельски Тому́ после́довали есте́./ И до́бре подвиза́вшеся в пусты́ни,/ смире́нием и воздержа́нием бесо́вския полки́ уничижи́ли есте́,/ те́мже безконе́чныя жи́зни сподо́бившеся,/ с Небе́сными ли́ки ны́не весели́теся./ С ни́миже, Богоно́снии отцы́ Симео́не и Са́вво,/ Спа́су всех моли́теся/ умири́ти мир и спасти́ ду́ши на́ша.
И ны́не, Богоро́дичен:
Кров Твой, Богоро́дице Де́во,/ врачевство́ есть духо́вное,/ вонь бо прибега́юще от душе́вных неду́г избавля́емся.
Тропа́рь пи́сан на велицей вече́рни
Сла́ва, и ны́не,
Богоро́дичен: Тя хода́тайствовавшую:
На вели́цей вече́рни
Блаже́н муж: 1-й антифо́н.
На Го́споди, воззва́х: поста́вим стихо́в 8
пое́м стихи́ры, глас 5.
Подо́бен: Ра́дуйся по́стников:
Ра́дуйся, Симео́не блаже́нне,/ ра́зумом Тро́ицы озари́вся,/ и лю́ди твоя́ к Ней ве́рою просвети́л еси́,/ и си́лою Креста́ укрепля́емь,/ душегуби́тельныя е́реси низложи́л еси́,/ и це́ркви святы́я воздви́гл еси́,/ сла́вити же вопло́щшагося Сы́на,/ ра́вна Отцу́ и Ду́ху научи́л еси́,/ пра́вдою и ми́лостию украша́яся,/ и все́ми де́лы Боже́ственными обогаща́емь яви́лся еси́./ И ны́не со Безпло́тными, ра́дуяся, предстои́ши,/ с ни́ми же Христо́ви моли́ся/ душа́м на́шим пода́ти ве́лию ми́лость.
Ра́дуйся, Симео́не Богоно́се,/ и́стинною любо́вию уязви́вся,/ нас ра́ди на земли́ стра́нствовавшаго/ и от Де́вы вопло́щшагося, Христа́ Бо́га,/ Ца́рствия кра́сная преоби́дел еси́,/ ро́да же и чад учужди́вся,/ челове́ки удиви́л еси́ устране́нием ми́ра,/ бе́сы посрами́л еси́ смире́нием твои́м,/ А́нгельския ли́ки ра́дости испо́лнил еси́./ С ни́миже водворя́яся, све́та исполня́яся Боже́ственнаго/ и пребога́таго наслажда́яся сия́ния,/ Христови, о́тче, моли́ся/ дарова́ти ми́рови ве́лию ми́лость.
Преподо́бне о́тче Симео́не досточу́дне,/ горы́ Афо́на доше́д/ и ревни́тель быв в ней постя́щимся,/ ю́ношески в ста́рости подви́гся воздержа́нием и моли́твами,/ зело́, ду́шу твою́ обнови́в, и ту́чами сле́зными напои́в сию́,/ Тро́ическую благода́ть в ней посе́яв и возрасти́в,/ и кра́сное Тоя́ ны́не яви́лся еси́ прия́телище:/ ны́не же ра́ка твоя́ яви́ся испо́лнь Святаго Ду́ха,/ ми́ро исцеле́ния излива́ющи,/ ю́же мы, лю́дие твои́, обстоя́ще, блаже́нне,/ моли́твами мо́лимся Христу́ Бо́гу,/ дарова́ти нам ве́лию ми́лость.
И́ны стихи́ры о ми́роизли́тии его́, глас 2, самогласны:
Ми́ро благово́нно,/ я́ко река́ Ду́ха благода́тию наводня́ема,/ ра́ка моще́й твои́х я́ве источа́ет,/ и бе́сов полки́ мы́сленно погружа́ет,/ благочести́вых же люде́й стра́сти и че́рность очища́ет,/ и душ скве́рну омыва́ет,/ и сердца́ весе́лием напая́ет/ тебе́, о́тче, предстоя́щих и моля́щихся ко Го́споду:/ моли́твами твои́ми изба́витися душетле́нных томле́ний.
Плотско́е роди́тельство/ в духо́вное сыно́вство повину́в,/ твоему́ сы́ну, ю́ноши,/ в ста́рости послушли́в в пусты́ни, Симео́не, яви́лся еси́./ Те́мже и во гро́бе, я́ко жив сый, послу́шал еси́,/ посла́ние его́ любо́вию прие́м,/ ми́ро от моще́й твои́х источи́л еси́,/ и́же ве́рою че́рплюще богати́мся./ Тем сердца́ и ду́ши освяща́юще,/ вас просла́вльшаго Христа́ велича́ем,/ я́ко ди́вна во святы́х Свои́х.
Источи́вый во́ду из су́ха ка́мене,/ существо́ естества́ претворя́яй я́коже хо́щет,/ и́же всея́ тва́ри Госпо́дь кре́постию,/ и стенопи́санное твоего́ о́браза подо́бие/ из суха́го ва́ра мироточи́во, Симео́не, о́тче, яви́л есть./ И я́ко дре́вле непокори́ваго Изра́иля,/ благопокори́выя лю́ди твоя́ удивля́ет,/ зна́меньми же и чудесы́ прославля́ет пред ни́ми,/ я́ко Моисе́я Своего́ уго́дника.
Сла́ва, глас 6:
Всечестны́й пра́здник святы́я твоея́ па́мяти,/ Симео́не о́тче всеблаже́нне,/ любо́вию собра́вшеся, досто́йно ублажа́юще, глаго́лем:/ ра́дуйся, благоче́стия нача́ло люде́й твои́х,/ из ни́хже те́рние е́реси искорени́в,/ Правосла́вныя ве́ры ло́зу насади́л еси́;/ ра́дуйся, Тро́ицы побо́рниче, це́рквей воздвиже́ние,/ и ни́щих богати́телю;/ ра́дуйся, смире́ния о́бразе и стра́нствия учи́телю,/ и́же теку́щее ца́рство отри́нув,/ по́стнически в пу́стыни пожи́л еси́,/ и ны́не со А́нгелы у Христа́ весели́шися,/ к Нему́же о нас с ни́ми моли́ся,/ спасти́ся душа́м на́шим.
И ны́не, Богоро́дичен:
Кто Тебе́ не ублажи́т,/ Пресвята́я Де́во,/ кто ли не воспое́т Твоего́ пречи́стаго рождества́,/ безде́тно бо от Отца́ возсия́вый Сын Единоро́дный,/ То́йже от Тебе́, Чи́стыя, про́йде,/ неизрече́нно вопло́щся,/ естество́м Бог сый,/ и естество́м быв челове́к нас ра́ди,/ не во двою́ лицу́ разделя́емый,/ но во двою́ естеству́ несли́тно познава́емый./ Того́ моли́, Чи́стая, Всеблаже́нная,/ поми́ловатися душа́м на́шим.
Вход. Проки́мен дне. Чте́ния (зри стр. 339–340).
На лити́и стихи́ры, самогла́сны, глас 4:
Блаже́н еси́ вои́стинну, Симео́не о́тче досточу́дне,/ ты бо и́стинное соверше́ние Ева́нгельски подража́в,/ бога́тство разда́л еси́ тре́бующим,/ и взем крест твой, Богоно́се,/ сим Уча́щему после́довал еси́,/ земны́ми Небе́сная измени́в,/ тле́нными сла́ву нетле́нную возме́здил еси́, ра́дуяся,/ и ны́не со А́нгельскими ли́ки на Небесех сца́рствуеши Христу́ Бо́гу./ Его́же моли́, преподо́бне,/ вся́кия собла́зни зми́евы изба́витися/ на земли́ твою́ па́мять творя́щим.
Та́йными на Небеси́ блиста́ньми/ Пресве́тлыя Тро́ицы озаря́ем, Симео́не присноблаже́нне,/ прича́стием Божией благода́ти высо́к быва́еши,/ источа́еши бо на земли́ ми́ро исцеле́ния,/ обогаща́я ве́рою приходя́щия,/ но, я́ко Престо́лу предстоя́ Христа́ Бо́га,/ от Него́же, о́тче, обожа́ем,/ ве́рою твою́ па́мять творя́щим Боже́ственную/ от искуше́ний многообра́зных моли́ изба́витися/ и спасти́ся душа́м на́шим.
Разше́дшеся по земли́ я́ко исполни́телие Ева́нгелия,/ оте́чество и род оста́висте,/ оба́че, и по сме́рти живу́ще,/ люде́й свои́х вся́чески не оста́висте,/ Божиим бо манове́нием от чужестра́нствия во своя́ приидо́сте./ Те́мже и Це́рковь Божия ве́село мо́щи ва́ша прия́т,/ и, си́ми украси́вшися, ра́дуется,/ мы́сленно же испове́дается, глаго́лющи:/ просвети́ся доброта́ моя́, па́че вся́кия лепоты́:/ вели́чит сла́ва моя́ Го́спода,/ возда́вшаго ми дво́ицу святу́ю, сы́на со о́тцем неве́стовожды́,/ и утвержде́ние ве́ры, прия́тие досто́инств мои́х./ Се бо архиере́ов вели́кий верх,/ Са́вва прехва́льный, и Симео́н ди́вный и многопе́тый/ ше́ствие ду́хом на Небеса́ сотво́рше,/ в не́дрех мои́х теле́сно па́ки водвори́шася,/ прииди́те, праздниколю́бцы,/ кое́гождо сих вку́пе похва́лим:/ о́ваго у́бо, я́ко ца́рство оста́вивша,/ в пусты́ни пости́вшася, смире́нием вознесе́нна, и ми́ро источа́юща./ О́ваго же пусты́нное воспита́ние, я́ко му́ченика поще́нием,/ и я́ко апо́столов пропове́дание,/ обо́их изя́щне труди́вшихся,/ и во всех Христу́ уго́ждших./ К Нему́же, я́ко иму́ще дерзнове́ние,/ мо́лятся спасти́ся душа́м на́шим.
Сла́ва, глас 5:
Востру́бим трубо́ю пе́сней,/ всех к похвале́нию досто́йному, Богоно́сных оте́ц, ны́не созыва́юще./ Ца́рие и князи да дивя́тся,/ и́же всех Царя́ и́скренним рабо́м,/ и́же кня́зя тьмы смире́нием низложи́ша./ Па́стырие и учи́телие, преподо́бнии же и по́стницы/ вси соше́дшеся восхва́лим:/ отца́ у́бо, я́ко пе́рваго ве́ры наста́вника,/ реку́ ми́лостыни, ско́рбных утеше́ние,/ и всех боля́щих ми́лование./ Сы́на же, я́ко моли́твами Богода́нна,/ и млеко́м поще́ния воспита́нна,/ изря́дна па́стыря же и учи́теля:/ о́ба наста́вника люде́й свои́х,/ и те́пла к Бо́гу моли́твами предста́теля,/ и́хже похваля́юще, си́це рцем:/ О, отцы́ и па́стыри до́брии,/ Симео́не преподо́бне и Са́вво свяще́нне:/ Тро́ице ны́не я́ко предстои́те/ моли́те спасти́ся ду́шам на́шим.
И ны́не, Богоро́дичен. Ге́рмана Патриа́рха:
Востру́бим трубо́ю пе́сней,/ прекло́ншися бо свыше Всецари́ца Ма́ти Де́ва/ благослове́ньми венчава́ет воспева́ющий Ю./ Цари́ и кня́зи да стеку́тся/ и Цари́це да воспле́щут в пе́снех,/ Царя́ ро́ждщую,/ сме́ртию одержи́мыя пе́рвее,/ разреши́ти человеколю́бно благоизво́лившаго./ Па́стырие и учи́телие до́браго Па́стыря,/ Пречи́стую Ма́терь, соше́дшеся, да восхва́лим:/ Све́щник златоза́рный, светоно́сный о́блак,/ Небе́с простра́ннейшу, одушевле́нный же киво́т,/ огнезра́чный Влады́чен Престо́л,/ манноприе́мную злату́ю ста́мну,/ заключе́нную Сло́ва дверь,/ всех христиа́н прибе́жище,/ пе́сньми Богоглаго́ливыми похваля́юще, си́це рцем:/ пала́то Сло́ва,/ сподо́би смире́нных нас Небе́снаго Ца́рствия,/ ничто́же бо не возмо́жно хода́тайству Твоему́.
На стихо́вне стихи́ры, глас 1.
Подо́бен: Небе́сных чино́в:
Небе́сных красо́т сия́нием,/ разу́мно, о́тче, просвеща́емь,/ вся, я́же на земли́ кра́сная, оста́вив,/ и за вся Христа́ стяжа́в:/ тем све́тлую твою́ па́мять пе́сньми сла́вим,/ и твой гроб святы́й ве́рою облобыза́им,/ моля́щеся моли́твами твои́ми ко Го́споду,/ получи́ти живота́ ве́чнаго све́тлости.
Стих:Блаже́н муж, боя́йся Го́спода,/ в за́поведех Его́ восхо́щет зело́.
Прише́ствием святы́х моще́й твои́х/ оте́чество твое́ обогати́ся,/ и све́тлая це́рковь твоя́ сих прие́мши,/ и миропода́тельны их иму́щи кра́сится,/ и вся ве́рныя созыва́ет,/ светоно́сную и святу́ю па́мять твою́ пра́здновати,/ та́йно к ним глаго́лющи:/ струи́ исцеле́ния, ми́ро почерпи́те;/ ве́ру, я́ко ве́рно даю́ще приходя́щим, празднолю́бцы, приими́те.
Стих:Честна́ пред Го́сподем/ смерть преподо́бных Его́.
Проро́ческая словеса́ соверша́емая ви́дяще, глаго́лем:/ пра́ведницы во ве́ки живу́т,/ от Тебе́, Христе́, воздая́нием,/ се бо оте́ц с сы́ном/ и по сме́рти па́че живота́ хвали́ми./ Ов у́бо ми́ро источа́я яви́ся,/ ов же цел и неразруши́м благоуха́ет,/ о́ба отгоня́ща ду́хи лука́вствия,/ от Тебе́ прославля́ема свы́ше:/ о́ба чудесы́ удивля́ема си́лою Твое́ю.
Сла́ва, глас 3:
Благоче́стия и́стинныя пропове́дники/ и Це́ркве пресве́тлыя зве́зды,/ Симео́на пе́рваго ве́ры побо́рника,/ Са́вву же и́стиннаго учи́теля и служи́теля Ева́нгелия,/ и сказа́теля Христо́вых свяще́нных та́ин,/ обои́х пе́сньми похва́льными почти́м./ Си́и бо па́че со́лнца просия́ша в ве́рней тве́рди,/ я́ко луча́ми, уче́нием,/ в но́щи неве́дения су́щих возведо́ша./ Си́и пле́велы злоче́стия истерза́вше,/ благоче́стием лю́ди своя́ возрасти́ша/ и бога́тую правове́рием ни́ву возде́лаша./ Си́и и́стиннаго виногра́да Христо́ва грозд зрел,/ и́стинную ве́ру, на сте́блиях чад свои́х но́сят:/ его́же ве́рнии яду́ще,/ с весе́лием стеце́мся к ним, моля́щеся:/ Симео́не Богоно́се, Са́вво священне,/ Се́рбская похвало́ и удобре́ние,/ па́стырие и учи́телие,/ пе́рваго Па́стыря и Учи́теля, Христа́, моли́те,/ душа́м на́шим пода́ти ве́лию ми́лость.
И ны́не, Богоро́дичен:
Без се́мене от Боже́ственнаго Ду́ха,/ во́лею же О́тчею, зача́ла еси́ Сы́на Бо́жия:/ от Отца́ без ма́тере пре́жде век су́ща,/ нас же ра́ди, из Тебе́ без Отца́ бы́вша,/ пло́тию родила́ еси́,/ и Младе́нца млеко́м пита́ла еси́:/ те́мже не преста́й моли́ти изба́вится от бед душа́м на́шим.
Тропа́рь, глас 3:
Боже́ственною благода́тию просвети́вся,/ и по сме́рти показу́еши све́тлость жития́ твоего́,/ источа́еши бо ми́ро благоуха́ния/ притека́ющим к раце моще́й твои́х,/ и лю́ди твоя́ наста́вил еси́ к све́ту Богоразу́мия,/ Симео́не о́тче наш,/ Христа́ Бо́га моли́/ дарова́ти нам ве́лию ми́лость.
На у́трени
На Бог Госпо́дь: тропа́рь святаго, Сла́ва, и ны́не, Богоро́дичен.
По 1-й кафи́зме седа́лен, глас 8.
Подо́бен: Прему́дрости и сло́во:
Ми́лостива Бо́га, ми́лостию себе́, о́тче, устро́ити хотя́,/ ми́лостив стяжа́л еси́ ра́зум/ и ми́лостивно ни́щия уще́дрил еси́./ Несто́ящим бога́тством смы́сленно, во ве́ки недви́жимое искупи́л еси́,/ е́же ны́не восприе́мля, ра́дуешися./ Симео́не Богоно́се и всеблаже́нне,/ моли́ Христа́ Бо́га, прегреше́ний проще́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко Де́ву и Еди́ну в же́нах, Тя безсе́менно ро́ждшую Бо́га пло́тию,/ вси ублажи́м ро́ди челове́честии,/ Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем А́нгельский и челове́ческий род досто́йно сла́вим всесвято́е рождество́ Твое́/ и согла́сно вопие́м Ти:/ моли́ Христа́ Бо́га, прегреше́ний оставле́ние дарова́ти,/ покланя́ющимся ве́рою Пресвято́му Рождеству́ Твоему́.
По 2-й кафи́зме седа́лен, глас 1.
Подо́бен: Гроб Твой, Спа́се:
У́тро благоле́пно возсия́в лю́дем твои́м,/ тьму глубо́кую е́реси отгна́в, о́тче,/ и ду́ши их просвети́л еси́ ве́рою./ Те́мже це́рковь твоя́ светоза́рная, мо́щи твоя́ иму́щи,/ пое́т днесь светоно́сную твою́ па́мять, Симео́не, Христа́ велича́ющи.
Сла́ва, и ны́не, Богоро́дичен:
Наста́ви ны на путь покая́ния,/ уклоня́ющияся при́сно к безпу́тием зол,/ и Преблага́го прогне́вающия Го́спода,/ Неискусобра́чная Благослове́нная Мари́е,/ прибе́жище отча́янных челове́ков, Божие пребыва́ние.
По полиеле́и седа́лен, глас 8.
Подо́бен: Прему́дрость и сло́во:
Миродержа́ния и мирски́х красо́т я́ко со́ния льстя́щая оста́вив,/ и во Афо́нстей пусты́ни с сы́ном всели́вся,/ иде́же слове́сное ста́до Го́сподеви собра́вше,/ и́мже и всесве́лии свети́льницы яви́стеся, смире́нием проходя́ще./ Те́мже, любо́вию восхваля́юще, велича́ем исхо́дную всесвяту́ю ва́шу па́мять,/ моля́щеся Богоно́снии отцы́, Са́вво и Симео́не, Христу́ Бо́гу,/ па́ству ва́шу в ми́ре и сою́зе любве́ сохрани́ти.
Сла́ва, и ны́не, Богоро́дичен:
От Тро́ицы Еди́наго преесте́ственно заче́нши Де́во,/ и чу́дно Сего́ породи́ла еси́ па́че сло́ва и мы́сли,/ и о́бщно Боже́ственнаго естества́ устро́ила еси́ челове́ческое естество́, дре́вле изгна́нное./ Те́мже соше́дшеся, Рождество́м Твои́м вси спа́сшиися, Всенепоро́чная,/ Твои́м словесе́м после́дующе до́лжно Тя ублажа́ем,/ моля́ще Христа́ Бо́га прегреше́ний оставле́ние дарова́ти,/ ве́рою Тя сла́вящим, Ма́терь Его́.
Таже степе́нна, 1-й антифо́н 4-го гла́са. Про́кимен, глас 4: Честна́ пред Го́сподем смерть преподо́бных Его́.Стих: Что возда́м Го́сподеви о всех, я́же воздаде́ ми. Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6, самогла́сна:
Возсия́ днесь пресла́вно/ всесве́тлая твоя́, Симео́не, па́мять/ созыва́ющий нас, празднолю́бцев,/ к похвале́нию во сла́ве Христа́ Бо́га на́шего:/ и́же приры́щуще к ра́це моще́й твои́х,/ мироисцеле́ния да́ры прие́млем,/ но я́ко име́я дерзнове́ние,/ мир испроси́ ду́шам на́шим.
Кано́н Пресвятыя Богоро́дицы со ирмо́сом на 6, глас 8: Во́ду проше́д я́ко су́шу: И святаго два кано́на на 8. Кано́н святаго, глас 4.
Песнь 1
Ирмо́с:Ли́цы изра́ильтестии/ невла́жными стопа́ми/ понт чермны́й и вла́жную глубину́ прогна́вше,/ вса́дники триста́ты враги́ ви́дяще в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися.
Фесви́тянина ре́вностию сту́дныя е́реси потреби́л еси́,/ с ними́же ко Христу́ моли́твами твои́ми сту́дныя моя́ по́мыслы потреби́ти моли́ся./ Я́ко да возмогу́ дерзнове́нно похвали́ти тя, Симео́не Богоно́се присноблаже́нне.
Егда́ сия́нием Пресвяты́я Тро́ицы, преподо́бне о́тче, озари́вся,/ е́реси мрак оста́вив,/ лю́ди твоя́ возве́л еси́ от тьмы неве́дения во све́те Богоразу́мия,/ Симео́не Богоно́се и присноблаже́нне.
О Бозе ве́рою возмога́я, ерети́ческое шата́ние низложи́л еси́,/ и рог ве́рных Це́ркве возне́сл еси́,/ Христа́ Отцу́ Сы́на Единосу́щна, и Ду́ху равноче́стна,/ Тро́ицу Нераздели́мую во еди́ном Божестве́ лю́ди твоя́ чести́ научи́л еси́.
Богоро́дичен:Доброто́ю благода́ти преукраше́нная, Богора́дованная,/ О́тчее Сло́во пло́тию я́вльше́еся, за благосе́рдие неизрече́нное,/ па́че ума́ и сло́ва, Благослове́нная, родила́ еси́:/ пребы́вши Де́вою по рождестве́, Нескве́рная.
Ин кано́н святаго о мироизлитии, глас 8.
Песнь 1
Ирмо́с: Посе́ченый несеко́маго пресече́/ и ви́де со́лнце зе́млю, ю́же не ви́де,/ лю́таго врага́ вода́ потопи́/ и непроходи́мое про́йде Изра́иль./ Песнь же воспева́шеся:/ Го́сподеви пои́м, сла́вно бо просла́вися.
Сло́во ра́зума пода́ждь ми, Безнача́льне Сло́ве,/ и́маши бо бога́тство милосе́рдия безчи́сленных Твои́х су́деб,/ да и аз душе́внаго мра́ка избе́гнув,/ скве́рну же ума́ очи́стив, досто́йно воспою́ Твоего́ уго́дника.
Богосве́тла тя свети́льника позна́хом,/ све́том Богоразу́мия лю́ди твоя́, Симео́не о́тче, озари́вша/ и тьму е́реси отгна́вша пе́рвее,/ ны́не же ми́ром моще́й твои́х вся облагоуха́еши./ Тем светоно́сную твою́ па́мять пра́зднуем.
Исправле́нием ве́ры, о́тче, просия́в,/ ре́ку ми́лостыни из се́рдца твоего́ ни́щим источи́л еси́,/ отню́дуже ми́ра исто́чники излива́еши:/ и́хже струи́ веселя́т град Бо́жий, твою́ це́рковь:/ в не́йже твою́ па́мять пра́зднуем.
Ра́ка моще́й твои́х, Симео́не, кла́дезь яви́ся исцеле́ния,/ источа́ющи ми́ро благоуха́ния,/ и́мже се́рдце мое́ омы́й, молю́ся ти, благоуха́ние показу́я Христу́,/ и ум мой обвесели́ твою́ светоно́сную па́мять воспева́ти.
Я́ко два свети́ла ве́рою лю́ди своя́ просвети́сте,/ чуде́сными блиста́ньми, сло́ва пропове́данием мрак е́реси от них отгна́вше,/ и ны́не пога́н нахо́да и вся́кия ско́рби моли́твами ва́шими, Са́вво и Симео́не, сих изба́вите.
Богоро́дичен:Це́рковь пресве́тлую Божию ве́дый Тя,/ всех тва́рей вои́стинну вы́шшую, Симео́н, Твой уго́дник, Богома́ти,/ све́тлу на земли́ це́рковь во Твою́ сла́ву воздви́же, Чи́стая,/ в не́йже чи́стыми гла́сы блажа́щия Тя спаса́й.
Катава́сия по уста́ву.
Песнь 3
Ирмо́с:Не му́дростию, и си́лою, и бога́тством хва́лимся,/ но Тобо́ю, О́тчею Ипостасною му́дростию, Христе́,/ несть бо свят па́че Тебе́, Человеколю́бче.
О благоче́стии зави́дим,/ бра́тнею не́навистью в темни́це затворя́ешися,/ и́деже о́бразом му́ченика Гео́ргия А́нгел, о́тче, явля́ется ти,/ тя́жкия око́вы от Тебе́ растерза́я,/ и от смертоно́сныя я́мы, Симео́не, изведе́ тя.
Суему́дренный пла́ча досто́ин, о твое́й любви́ негоду́я,/ Ка́ин нра́вом, па́ки уби́ти тя покуси́ся,/ мно́жество иноплеме́нных на тя совокупи́в./ Их же, о Го́споде возмога́я,/ копие́ обраща́я, Симео́не, низложи́л еси́.
И́же на тя се́ти угото́вав,/ в них подо́бно увяза́ет,/ Бо́гу месть свою́ на нем отда́вшу;/ и я́коже древле мо́рем фарао́на,/ и сего́ ре́чными вода́ми потопи́,/ тебе́, о́тче, прославля́я досто́йно, я́ко на него́ упова́вша.
Богоро́дичен:Еди́на Ты поро́ка не прича́стна/ и скве́рны не иму́щи, Де́во Чи́стая,/ поко́ище же па́че яви́лася еси́ Небе́сных благ,/ в Тя бо всели́ся Христо́с, доброде́тели вся святы́ня Пренепоро́чная./ Его́же моли́ поро́ка нас изба́вити моли́твами Твои́ми.
Ин
Ирмо́с:Утвержде́н в нача́ле Небеса́ ра́зумом/ и зе́млю на во́дах основа́вый/ на каа́мени мя, Христе́, за́поведей Твои́х утверди́/ я́ко несть свят па́че Тебе́, Еди́не Человеколю́бче.
Блаже́н муж Дави́дом пе́рвее нарече́ся и на́ми ны́не похваля́ем,/ сове́та нечести́вых Симео́н неприе́м/ и пути́ беззако́нных уклони́вся,/ зако́ну же Госпо́дню поуча́яся,/ дре́во плодови́то насади́вся. Ду́ха благода́тию напая́емь.
Плоды́ доброде́телей, благоуха́ния Де́лателю Христу́ приноша́я, яви́лся еси́,/ от Него́же бла́годать прие́м, ми́ро ны́не источа́еши,/ просвети́вшися же па́мять твоя́, во ве́ки просла́вися,/ Симео́не Богоно́се, похвало́ лю́дем твои́м.
Псало́мски я́ко фи́никс ве́рою, Симео́не, во Христе́ процве́л еси́,/ и я́ко кедр благоче́стием ча́да твоя́ умно́жил еси́,/ и ми́ром моще́й твои́х умаща́я,/ твою́ па́мять любо́вию пою́щих.
Всех кра́сных ми́ра чу́вствия преше́д смы́слом, о́тче, Богому́дрым,/ к вы́шней жи́зни умо́м преложи́вся,/ иде́же ны́не со А́нгелы весели́шися/ и ми́ра твоего́ исто́чники лю́ди твоя́ ра́достно напая́еши.
Све́ту вели́кому предстоя́ще и отону́дными заря́ми осия́еми,/ и пребога́тыми ле́потами сия́юще,/ ду́ши раб свои́х, Симео́не и Са́вво, просвети́те,/ е́же воспе́ти светоно́сную ва́шу па́мять досто́йно.
Богоро́дичен:Дои́ши млеко́м всех, Де́во, Пита́теля,/ рожде́ннаго без тли из пречи́стаго Твоего́ те́ла,/ и держи́ши на руку́ вся Содержа́щаго,/ и сокруше́нных тле́ю па́ки назида́юща:/ и нас в ве́ре не подви́жимых назда́ти, моли́ся.
Седа́лен, глас 8.
Подо́бен: Прему́дрости:
Другий Авраа́м нра́вом и де́лы яви́лся еси́,/ ми́лостию и ве́рою украша́лся,/ оте́чества и ро́да изше́л еси́ Бо́га послуша́нием,/ и в стра́нах чужды́х уго́дно Тому́ пожи́л еси́./ Тем и Авраа́мле прича́стие тебе́ дарова́ся,/ иде́же ны́не восприе́мля, ра́дуешися,/ и ра́ка моще́й твои́х источа́ет ми́ро исцеле́ния,/ твоя́ сыны́ веселя́щи, пою́щия тя:/ Симео́не о́тче Богоно́се,/ моли́ Христа́ Бо́га прегреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Егда́ прии́дет суди́ти всю зе́млю всех Влады́ка и Творе́ц,/ о́вцам мя сопричти́ десны́м осужде́ннаго,/ и кроме́шния тьмы и вся́каго муче́ния Твоего́ непотре́бнаго раба́ исхити́, молю́ся,/ да благода́рно велича́ю бога́тство Твое́я бла́гости, Богоро́дице Всенепоро́чная,/ и вопию́ Ти, ра́дуяся:/ моли́ся Христу́ Бо́гу прегреше́ний оставле́ние да́ти мне,/ Тебе́ бо и́мам наде́жду раб Твой.
Песнь 4
Ирмо́с:Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы,/ Ты́ бо еси́, Человеколю́бче,/ кре́пость моя́ и хвале́ние.
Неразде́льным Све́том Божества́ Трисве́тлыя Тро́ицы, Симео́не, лю́ди твоя́ осия́нием просвети́л еси́./ Еюже, о́тче, возмога́я, во́лки-еретики́ отгна́л еси́, вопия́:/ сла́ва си́ле Твое́й, Го́споди.
Еди́нством ве́ры и наде́жды,/ и любве сою́зом ду́шу твою́, преподо́бне, име́я утвержде́нну,/ ми́лостив и прав се́рдцем яви́лся еси́:/ и сего́ ра́ди я́ко пра́веднику свет и́стины возсия тебе́/ и того́ супру́гу весе́лие.
Добро́ты вожделе́в недомы́слимыя,/ я́же в житии добре́ устро́ив,/ све́рстники же и ча́да о́ставив,/ бога́тство и ца́рство, о́тче, преоби́дев,/ крестоно́сно пусты́ню насле́довал еси́,/ и с сы́ном упраздни́вся, вопия́:/ сла́ва си́ле Твое́й, Го́споди.
Богоро́дичен:Оживи́ мя Еди́на Засту́пнице ве́рных,/ Ты бо Ма́ти Бо́га была́ еси́, Творца́ же и Соде́теля,/ прие́мша наш о́браз, Пренепоро́чная,/ и спа́сшаго от тли и сме́рти, и сла́вою Божиею просла́вльша.
Ин
Ирмо́с:Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Авраа́ма странноприя́тием подо́бяся,/ И́ова ми́лостивное нищелю́бие подража́я,/ о́ко слепы́м, и нога́ хромы́м, оте́ц си́рым, и всем ми́лование яви́лся еси́,/ и па́че сих изя́щнейшая взыска́л еси́.
Ю́ношеское соверше́ние возлюби́в,/ бога́тство твое́ ни́щим разда́л еси́,/ и ца́рство оста́вив, Христу́ после́довал еси́./ Те́мже на Небесе́х сокро́вище тебе́ дарова́л есть,/ отону́дуже бога́тство, ми́ро, Симео́не, источа́еши.
От благоутро́бнаго твоего́ се́рдца,/ бога́тою руко́ю, е́же к ни́щим,/ ми́ро ны́не истека́ет,/ лю́ди твоя́ умаща́я, преподо́бне, твоя́ доброде́тели похваля́ющия:/ возме́здна бо быша тебе́, о́тче, пе́рвым втора́я.
Я́ко ра́йский крин, ве́рою процве́л еси́,/ и я́ко ма́слина, ми́лость источа́я яви́лся еси́,/ и я́ко ши́пок та́йный, процве́л еси́ поще́нием:/ сего́ ра́ди благово́ния и честна́го ми́ра це́рковь твою́ исполня́я, благоуха́еши лю́ди твоя́.
Тле́емыя сла́вы красоту́ возненави́девше,/ ми́ра и миродержа́ния мы́слию Богому́дрою избежа́вше,/ и в пусты́ни поще́нием просве́щшеся Симео́не и Са́вво,/ па́мять ва́шу пою́щих моли́твами ва́шими озари́те.
Богоро́дичен:По́мощь имени́ту обре́тше Тя, Богоро́дице, Са́вва и Симео́н, Твои́ уго́дницы,/ е́ресей хра́мы разо́рше и Це́ркви в сла́ву всех Бо́га Сы́на Твоего́ воздвиго́ша/ в них, Чи́стая Влады́чице, Засту́пницу христиа́н Тебе́ пою́щих спаса́й.
Песнь 5
Ирмо́с:Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы/ и к све́ту у́мному вознося́й Моего́ Божества́.
Сла́вен в житии́ земна́го ца́рствия, бога́тством и сла́вою яви́лся еси́/ и сие́ по́стническим измени́в,/ Христа́ Царя́, на земли́ вопло́щшагося нищете́, о́тче, уподо́бился еси́,/ тем мно́гими тя дара́ми обогати́л есть.
Теку́щими нестоя́тельными стоя́щая и ве́чнующая/ и вре́менными тле́нными Небе́сная измени́в,/ иде́же со А́нгелы лику́я ра́дуешися,/ о нас, и́же твою́ па́мять, Симео́не, соверша́ющих моли́ся.
О до́брыя ку́пли твое́я и прему́драго премене́ния!/ погиба́ющим бога́тством ве́чное искупи́л еси́/ и ни́жнее вла́стию вы́шнее Ца́рство измени́в/ в не́мже ны́не, о́тче, веселя́ся,/ ко Христу́ о нас моли́ся.
Богоро́дичен:И́стинную Тя Богоро́дицу све́мы, Пречи́стая Влады́чице,/ и из Тебе́ ро́ждшагося Бо́га Сло́ва ве́дуще,/ во двою́ существу́ пропове́дуема и во́ли самовла́стно познава́ему, Христа́ Бо́га,/ Ма́терь Богоневе́стная.
Ин
Ирмо́с:Вску́ю мя отри́нул еси́/ от лица́ Твоего́, Све́те Незаходи́мьй/ и покры́ла мя есть чужда́я тьма окая́ннаго/ но обрати́ мя и к све́ту за́поведей Твои́х/ пути́ моя́ напра́ви молю́ся.
Упраздни́теся и разуме́йте, Дави́дом услы́шав, я́ко Аз есмь Бог, Бо́га глаго́люща,/ ца́рство мяте́жное, Симео́не, оста́вив/ в пусты́ни поще́нием упраздни́лся еси́,/ я́ко подо́бне разуме́ти Бо́га и от Него́ разуме́тися.
Свети́льника мы́сленно пресве́тла лю́дие твои́ получи́вше тя весели́мся,/ Боже́ственною бо ве́рою тобо́ю просвеща́еми/ и ми́ром святы́х твои́х моще́й, Симео́не, облагоуха́еми/ обога́щшеся ра́дуемся.
Услышахом твоя́ ди́вная пе́рвее сла́вы ца́рствия преоби́дение,/ ны́не же пресла́вная ви́дим чудеса́ стенапи́санное бо твоего́ о́браза подо́бие,/ от суха́го ва́ра моще́м подо́бно ми́ро источа́ет.
Таково́ю сла́вою просла́ви тя,/ таковы́ми чудесы́ удиви́ тя,/ таковыя по́чести дарова́ тебе́ на земли́,/ И́же бога́тыя дары́ дае́т, Христо́с, лю́бящим Его́/ в Небе́сных, о́тче, и́хже о́ко не ви́де, кто дово́лен изглаго́лати.
К животу́ нестарею́щемуся и ра́дости нетле́нней/ к весе́лию вои́стинну па́че ума́, Симео́не и Са́вва, преста́вистеся/ де́тельным бо любому́дрием веще́ственных отбе́гше, невеще́ственная получи́сте.
Богоро́дичен:Стра́нное Твое́ зача́тие, Отрокови́це,/ стра́нное и стра́шно, е́же па́че ума́, Чи́стая, Твое́ рождество́,/ устра́ншееся дре́вле от Бо́га челове́ческое существо́/ Тому́ собира́ющи, Вла́дычице,/ и добро́ту пе́рвую назида́ющи.
Песнь 6
Ирмо́с:Бу́ря мя мно́гих согреше́ний мои́х потопля́ет/ и изнемога́ет дух мой,/ но Ты, Го́споди,/ я́ко Ми́лостив, сшед,/ возведи́ живо́т мой.
Нау́чен вы́шнею, Симео́не, прему́дростию,/ и ни́жняя презре́в я́ко несу́щая,/ в пусты́ни поще́нием всели́лся еси́,/ Бо́гу же при́сно испове́даяся и к Нему́, о́тче, любо́вию прилепля́яся,/ ра́достно пожи́л еси́.
Иску́сен в житии́ земно́му во́инству,/ на супоста́ты побе́ды мно́гия поста́вив,/ и во и́ночестве смире́нием и моли́твами бе́сов полки́ мы́сленно победи́л еси́, Симео́не о́тче,/ во обо́их хва́лим.
Па́че умныя сла́вы ра́йские добро́ты наслажде́ния/ и све́та разу́мнаго су́щия ра́дости наде́ждею, о́тче, увеселя́ем,/ в пусты́ни усе́рдно с сы́ном пожи́л еси́./ Тем у Христа́ во ве́ки с ним, Симео́не, ра́дуешися.
Богоро́дичен:Онас моли́ Сы́на Твоего́, Го́спода же и Бо́га, Чи́стая Влады́чице,/ вседержи́тельною си́лою вся нося́щаго,/ и в не́мощное пло́ти из Тебе́ обле́кшася,/ Де́во Всенепоро́чная, на благодея́ние челове́ков Человеколю́бец.
Ин
Ирмо́с:Моли́тву пролию́ ко Го́споду/ и Тому́ возвещу́ печа́ли моя́,/ я́ко зол ду́ша моя́ испо́лнися/ и живо́т мой а́ду прибли́жися,/ и молю́ся, я́ко Ио́на,/ от тли, Бо́же, возведи́ мя.
От мно́гих служи́мь, послужи́ти изво́лил еси́,/ от пребога́та убо́г хотя́ быти вои́стинну, о́тче,/ до́брою изме́ною измени́вся, псало́мски подо́бно ре́щи:/ сия́ изме́на десни́цы Вы́шняго.
Храм себе́ Бо́гу сотвори́в,/ це́рковь Того́ Матере с сы́ном в Горе́ святе́й воздви́гл еси́,/ ю́же и облагоуха́л еси́ ми́ром свята́го твоего́ те́ла./ Я́же ны́не благоле́пием, сы́ны твои́ми украша́ема, гроб твой обновля́ет,/ па́мять твою́ пра́зднующих.
Делы доброде́телей живонача́льное де́йство от Живонача́льныя Тро́ицы прие́м,/ ме́ртвость гро́ба, забве́ния хода́тая, я́ко животоча́щ ны́не явля́еши:/ не потаи́ бо твои́х исправле́ний, Симео́не, струя́ми ми́ра твоего́.
Благода́ть вседе́тельная Ду́ха пе́рвее селе́ние в тебе́ обре́тши,/ ны́не ра́ку моще́й твои́х осеня́ющи, ми́ра издаю́щую кла́дязь, сию́ содела́;/ от него́же благода́ть, блажа́ще тя, почерпа́ем, Симео́не преподо́бне, и и́ноков украше́ние.
Непрекло́ннии столпи́ Це́ркве Христо́вы, Симео́не и Са́вво яви́стеся:/ вы бо я́ко персть, е́реси попра́вше,/ лю́ди своя́ возвы́систе к ве́ре благоче́стия./ Тем А́нгелом согра́ждане бы́сте, воспева́юще с ни́ми:/ Свят, Свят, Свят Оте́ц и Сын, и Дух Святы́й.
Богоро́дичен:И́же манове́нием вся содержа́й и ца́рствуяй ве́ки все́ми Христо́с Бог,/ из Тебе́, Богома́ти, воплоти́ся, безстра́стен Сый Бо́жество́м,/ ме́не ра́ди Кресту́ сочта́ся,/ Его́же стра́сти жела́юще Твои́ уго́дницы,/ ца́рство земно́е оста́вльше, по́стнически Тому́ сраспя́шася.
Конда́к, глас 6.
Подо́бен: Е́же о нас испо́лнив:
А́нгельское возлюби́в на земли́ житие́,/ миродержа́ние и мир оста́вив,/ поще́нием Христу́, Симео́не, после́довал еси́,/ к Нему́же лю́бящих тя апо́стольски наста́вил еси́, вопия́:/ возлюби́те Бо́га, я́коже Он возлюби́ нас.
И́кос:
И́же до распя́тия и сме́рти нас ра́ди Смири́вшагося,/ крест, поще́нием смири́вся, о́тче, поне́сл еси́,/ и тем, хваля́щагося престо́л свой утверди́ти на о́блацех,/ я́коже на го́рдаго до́блественне подви́гся, низложи́л еси́./ Тем ве́льми тя просла́ви Христо́с, Вели́кий Дарода́тель:/ Ему́же ны́не предстоя́, помина́й, я́ко отечестволю́бец,/ и от нападе́ния проти́вных ста́до твое́ соблюда́й неразсыпа́емо/ и, умаща́я ми́ром, твоя́ лю́ди знамена́й,/ губи́теля душ бежа́ти от них творя́й, Симео́не, моли́твами твои́ми,/ апо́стольски же наставля́я и вопия́ лю́бящим тя:/ возлюби́те Бо́га, я́коже Он возлюби́ нас.
Песнь 7
Ирмо́с: Спасы́й во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.
Ю́ношески в ста́рости те́сный путь ше́ствовати изво́лив,/ к простра́нству ра́я и дре́ва живо́тнаго дости́гл еси́,/ иде́же ны́не наслажда́ем ра́дуешися,/ и нам сих дости́гнути ко Христу́, Симео́не, моли́ся.
Ты на земли́ ни́щим Бо́га, о́тче, взаимова́в,/ И́же тебе́ в Небе́сных преподо́бных и пра́ведных прича́стие дарова́,/ я́ко ревни́телю их на земли́ бы́вшу,/ А́нгелом равноче́стна тя устро́и.
Его́же за́поведи соблюда́я, Христа́, любо́вию просвеща́ем,/ све́тлая ми́ра оста́вив, молвы́ же пусты́нею жите́йския избежа́в,/ и о Го́споде, о́тче, поуча́яся,/ преми́рную тишину́ получи́л еси́.
Богоро́дичен:О вы́ше ума́ Твои́х похва́л, Пречиста́я Де́во!/ Я́ко Бо́га заче́нши, Соде́теля же Творца́ и Го́спода:/ те́мже ро́ди вси челове́честии и Безпло́тных умо́в чинонача́лия Тя блажа́т,/ и мы вси я́ко Ма́терь Бо́жию непреста́нно Тя сла́вим.
Ин
Ирмо́с:Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице лику́юще, поя́ху:/ благослове́н еси́, Бо́же оте́ц на́ших.
Разумева́я на ни́ща и убо́га,/ благ муж ми́луяй и дая яви́лся еси́,/ и бла́гости Бо́жия сподо́бився, благи́х зе́млю насле́довал еси́:/ отону́дуже и нас ны́не, Симео́не, весели́ши,/ облагоуха́я струя́ми ми́ра твоего́.
Вседу́шно Христа́ возлюби́в и Того́ за́поведи соблюда́я,/ я́ко реко́ю, благоутро́бием изсо́хших нището́ю бога́тно напои́л еси́./ Тем твою́ па́мять возвели́чил есть/ и ра́ку моще́й твои́х ми́ром, о́тче, обогати́л есть.
В пе́щи пла́менем росу́ источи́вый,/ и из суха́го же́зла цвет израсти́вый,/ ди́вен в де́лех Свои́х Госпо́дь:/ и твоего́ о́браза стенопи́санное подо́бие,/ из суха́го ва́ра, Симео́не, миропрозяба́ющее яви́л есть.
Безме́рным твои́м смире́нием,/ безме́рно хвало́ю вы́сящагося на земли́ го́рдаго смири́л еси́./ Ны́не щито́м моли́тв твои́х от ко́зней его́ лю́ди твоя́, Симео́не, защища́й,/ ма́стию ми́ра твоего́ знамену́я пою́щия:/ благослове́н Бог оте́ц на́ших.
Све́тло отцы́ пе́рвее ва́ше житие́/ светле́йше же ны́не па́мять и честне́йши:/ сокро́вище бо бла́гости и дом ми́лости яви́стеся,/ и пе́рвыя бла́гости существа́ сподо́бистеся, Симео́не и Са́вво,/ и́стинно ублажа́еми и досто́йно хвали́ми.
Богоро́дичен:О́гненными блиста́нии просвети́ омраче́нное мое́ се́рдце, ро́ждшая на земли́ Восто́ка мы́сленнаго Со́лнце,/ И́мже просвети́вшеся Твои́ служи́тели, Са́вва и Симео́н Богома́ти,/ лю́ди своя́ на за́паде озари́ша и научи́ша пе́ти:/ благослове́н Бог оте́ц на́ших.
Песнь 8
Ирмо́с:Изба́вителю всех, Всеси́льне,/ посреде́ пла́мене благоче́ствовавшия,/ снизше́д ороси́л еси́/ и научи́л еси́ пе́ти:/ вся дела́ благослови́те, по́йте, Го́спода.
Чу́вственных добро́т я́ко со́ния избежа́в,/ и мы́сленных получи́ти вожделе́в,/ в Го́ру святу́ю вшел еси́, Симео́не,/ сы́на наста́вника по́двигом духо́вным име́я,/ жела́емых непогреши́л еси́.
Еди́наго жела́я к жи́зни веду́щаго пути́,/ ми́ра кра́сных мимоте́кл еси́./ Тем преми́рное насле́дие стяжа́л еси́,/ отону́дуже просвети́л еси́ ду́ши пою́щих тя,/ просвеще́ния неизрече́ннаго, Симео́не, сподобля́емь.
Со́лнце на зе́мли доброде́телию сы́на твоего́ обре́т,/ того́ словесы́, о́тче, просвеща́емь,/ звезда́ светле́йшая яви́лся еси́. С ним же предстоя́ Христу́ Бо́гу,/ о нас, хва́лящих ва́шу па́мять, отцы́, моли́теся.
Богоро́дичен:И́же Отцу́ Единоро́днаго/ и от небытия́ О́тчим сове́том вся́ческая соста́вившего,/ Сло́ва Бо́жия Безнача́льна Боголе́пно родила́ еси́,/ пло́тию бы́вшаго нас ра́ди Челове́ка./ Сего́ ра́ди Тя, Богороди́тельницу, правосла́вно му́дрствуем.
Ин
Ирмо́с:Седмери́цею пещь/ халде́йский мучи́тель,/ Богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Я́ко у́тро, я́ко со́лнце па́мять твоя́ возсия́,/ просвеща́ющи сердца́ ве́рных,/ ты бо све́та и дне яви́лся еси́ насле́дник,/ иде́же, о́тче, водворя́яся ны́не,/ помина́й твою́ па́мять блажа́щих, и пою́щих:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.
Село́ мы́сленное, ду́шу твою́, к ни́щим ми́лостию посе́яв,/ угобзи́вшияся ти плоды́ живо́тныя в ве́чных жи́тницах собра́л еси́,/ и от оби́лия Небе́снаго твоего́ бога́тства,/ ми́ром на земли́ благово́нным сыны́ твоя́ украша́еши.
Прекра́сный душе́ю твой, о́тче Са́вво, любе́зный,/ друга́го тя патриа́рха, я́ко пе́рваго Ио́сиф, но́ваго нам Изра́иля прино́сит,/ не от Еги́пта рабо́ты, но от святы́я горы́:/ и в земли́ люде́й твои́х утвержде́ние мироточи́ва положи́л есть.
Це́рковь твоя́ вели́кая, Боже́ственный я́ко рай ви́дится,/ ра́ку моще́й твои́х, о́тче, иму́щи,/ цве́ты разли́чныя многообра́зныя твое́я доброде́тели чудесно прозяба́ющи,/ и твою́ па́мять, Симео́не, чту́щия облагоуха́ет пою́щи:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Чужестра́ннии гро́би по́стническими ва́шими телесы́ освяти́шася,/ земля́ ва́ша благослови́ся прише́ствием моще́й ва́ших,/ це́ркви же ва́ша украша́ются, миропода́тельны и благоуха́нны сих иму́ща:/ я́же от Бога ми́ром спаса́йте.
Богоро́дичен:Свята́я, две́ри отве́рзи ми, Чи́стая Богоро́дице,/ су́щим во тьме свет неопи́санный,/ опи́саннаго пло́тию Христа́, пра́вды Со́лнце, облиста́вши./ Его́же луча́ми Са́вва и Симео́н озари́вшеся,/ страну́ люде́й свои́х ве́рою Тому́ присво́иша.
Песнь 9
Ирмо́с:Е́ва у́бо неду́гом преслуша́ния/ кля́тву всели́ла есть,/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.
Мног в ми́лости и во бла́гости обре́тся,/ мно́гих вы́ше ума́ благ насле́дник яви́лся еси́,/ я́ко сын оте́ческих сокро́вищ./ О, великода́рныя ру́ки!/ О, дарова́ния превосходя́щаго Христа́, просла́вльшаго тя, о́тче Симео́не.
Еди́наго от Тро́ицы роди́вшагося, це́рковь све́тлу воздви́гл еси́,/ иде́же твоя́ мироточи́вая мо́щи цельбу́ ве́рою приходя́щим подава́ют./ В не́йже лю́дие твои́ па́мять твою́, о́тче, ублажа́юще,/ Христа́ велича́ем.
Отягче́ннии прегреше́ньми, и страстьми́ преклоне́ннии,/ к тебе́, о́тче, прибега́ем,/ обо́их разреше́ние и́щуще,/ но я́ко избра́нник Влады́ки Христа́,/ твои́ми моли́твами воздви́гни нас от душетле́нных страсте́й.
Ны́не свята́я твоя́ па́мять, соверша́ющих ю освяща́ет,/ свя́то бо, о́тче, пожи́л еси́ житие́,/ и све́тлости святы́х улучи́ти сподо́бился еси́./ Сподо́би и нас улучи́ти часть достоя́ний твои́х,/ не понося́ вели́честву проше́ния.
Богоро́дичен:Еди́наго от Тро́ицы, Еди́на Ма́ти бы́вши,/ со дерзнове́нием Сы́ну Твоему́ моли́ся,/ спасти́ от наси́лия мучи́тельска, плене́ния же и рабо́ты рабы́ Твоя́:/ ти́хость же и спасе́ние пода́ти Тя велича́ющим.
Ин
Ирмо́с:Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дице,/ А́нгелов и челове́к чинонача́лия велича́ют.
Прише́ствием пе́рвее моще́й твои́х/ оте́чество твое́ ра́дости испо́лнися,/ предста́теля тя к Бо́гу стяжа́вше;/ и па́мять твою́ ны́не торжеству́юще, весели́мся,/ обогаща́емы ма́стию ми́ра твоего́.
Я́ко столпа́ высока́ и крепка́,/ я́ко бла́га побо́рника и отечестволю́бца,/ христоимени́тии лю́дие твои́ и́муще тя, проти́вных, о́тче, воста́ния,/ и вся́кия зло́бы ко Христу́ моли́твами твои́ми, Симео́не, избавля́емся.
Моще́й ва́ших прия́тием це́ркви ва́ша на земли́ обога́щшеся,/ и ду́хом на Небесех пе́рвенец Церковь просвеща́ете./ В не́йже со апо́столы, я́ко учи́тели,/ и со преподо́бными, я́ко спо́стницы,/ о нас, Симео́не и Са́вво, моли́теся.
Престо́лу вели́кому предстоя́ще, призира́йте на лю́ди своя́:/ и прие́мше на́ше моле́ние, мир от Христа́ испроси́те земли́ на́шей/ и во благове́рии нас утверди́те.
Преподо́бнии и преблаже́ннии,/ Богому́дрии и Богоно́снии,/ равноапо́столы и чудотво́рцы,/ па́стыри же и учи́тели,/ многохвали́мии же и многоимени́тии отцы́, Симео́не и Са́вво, досточу́днии,/ от нас песнь сию́ прие́мше, спаса́йте рабы́ своя́.
Богоро́дичен:Пла́мене о́гненнаго мя свободи́,/ я́же па́че ума́ Огнь ро́ждши Непостоя́нный,/ прише́дшаго огнь ра́зума на зе́млю воврещи́./ Имже Твои́ уго́дницы разже́гшеся, Богома́ти,/ любо́вию Тому́ после́доваша.
Свети́лен.
Подо́бен: Ду́хом во святи́лищи:
От Боже́ственныя благода́ти, о́тче, просвеща́емь,/ мра́ком е́реси одержи́мыя просвети́л еси́ лю́ди твоя́:/ и жития́ све́тлости отврещи́ся собо́ю научи́л еси́./ Тем тя любо́вию чтим, Симео́не му́дре, мона́хов похвало́.
Сла́ва, ин свети́лен:
Я́ко два свети́ла мы́сленныя тве́рди,/ страну́ люде́й свои́х ве́рою просвеща́ете./ Те́мже па́мять ва́шу че́стно соверша́юще,/ сла́вим просла́вльшую вас, Пресвяту́ю Тро́ицу./ Симео́не и Са́вво, дво́ице свята́я.
И ны́не, Богоро́дичен:
И́же Твой, Всенепоро́чная Богоро́дице, о́браз не целу́ет, во огнь вмеща́ется гее́нский,/ я́коже безу́мный А́рий./ Мы же, Пречи́стая, любо́вию лобыза́ем, Засту́пнице ми́ра,/ ве́рою Тя сла́вяще.
На хвали́тех стихи́ры на 4, глас 2.
Подо́бен: Егда́ от Дре́ва:
Егда́ на земли́ зако́нно пожи́л еси́,/ сокро́вище доброде́телей обре́теся:/ дом отве́рст вся́кому любо́вию име́я,/ си́рых оте́ц и ни́щих засту́пник яви́лся еси́,/ ми́лости же непресекая́й исто́чник,/ ми́лости ра́ди я́вльшагося на земли́,/ Христа́, Сло́ва Божия, за́поведи соблюда́я./ Тем и во Ца́рствии Его́ ны́не прии́млен,/ Симео́не о́тче ра́дуешися.
Егда́ промышле́нием Вы́шняго тебе́ жре́бий подаде́ся/ пе́рвому побо́рнику церкве́й во оте́чествии твое́м быти,/ подви́жно е́реси отгна́л еси́,/ и вседу́шно це́ркви Бо́гу воздви́гл еси́,/ Правосла́вия же ве́рою лю́ди твоя́ утверди́л еси́./ Тем святу́ю твою́ па́мять почита́юще,/ моли́твами твои́ми ко Христу́, Симео́не, мо́лимся:/ в День Су́дный изба́витися нам муче́ния.
Егда́ ко Христу́ любо́вию уязви́вся,/ Ца́рствия красоты́ оста́вил еси́,/ и, ра́дуяся, Тому́ после́довав,/ усе́рдно пусты́ню пости́гл еси́,/ и в ней Богоуго́дно пожи́л еси́./ И ны́не духо́вное во плоти́ де́йство,/ ме́ртв во гро́бе, я́ко жив показу́еши,/ ми́ро источа́я,/ лю́ди твоя́ освяща́еши,/ Симео́не, оте́честву твоему́ удобре́ние.
Я́ко звезда́ у́тро возвеща́ющая,/ сия́еши лю́дем твои́м, преподо́бне,/ пе́рвее возвести́в им Мы́сленно́е У́тро, Христа́ Бо́га,/ и ве́рою к Нему́ па́че со́лнца просвети́в,/ ны́не же покрыва́еши от озлобле́ния враг,/ и от бу́ри вся́кия и беды́, о́тче, изима́еши./ Тем твою́ па́мять соверша́юще, Христа́ Спа́са восхваля́ем,/ тебе́ просла́вльшаго, Симео́не.
Сла́ва, глас 8:
С похвало́ю све́тло па́мять твоя́, преподо́бне, сотворя́ется,/ и ра́дости наполня́ет твоя́ до́блести похваля́ющих./ Ты бо Дави́дски Бо́гу,/ держа́вен земли́ зело́ умо́м взя́вся,/ ца́рство оста́вив, Христу́ после́довал еси́,/ и в го́ру святу́ю прише́д,/ иде́же по́стнически с сы́ном подвиза́вся,/ о́чи душе́вныя просвети́л еси́,/ и свет, Симео́не, быв,/ к сия́нию незаходи́мому премину́л еси́./ С ни́мже ны́не Христу́ предстоя́ще,/ моли́твами ва́шими к Нему́ помина́йте,/ ста́до ва́ше сохрани́ти от волко́в гу́бящих е.
И ны́не, Богоро́дичен:
Влады́чице, приими́ моли́твы раб Твои́х,/ и изба́ви нас/ от вся́кия ну́жды и печа́ли.
Таже, славосло́вие вели́кое: и дае́тся еле́й братии от канди́ла свята́го, пою́ще вку́пе стихи́ры глас 4, самогла́сны:
Прииди́те, праздниколю́бцы,/ прии́дем и мы, бра́тие,/ и́бо пресве́тлая па́мять отца́ на́шего возсия́./ Прииди́те любе́зно сию́ соверша́юще рцем:/ ра́дуйся, све́тлая похвало́ ве́ры и ересе́й низложи́телю,/ ра́дуйся, Це́ркве украше́ние,/ ра́дуйся, Ду́ха Святаго оби́телище;/ ра́дуйся, мироточи́ве Симео́не о́тче Богоно́се;/ всех Царя́ Христа́ Бо́га на́шего моли́/ изба́вити нас от собла́зн лука́ваго/ и спасти́ ду́ши на́ша.
Стих:Честна́ пред Го́сподем/ смерть преподо́бных Его́.
Пред Го́сподем смерть ва́ша, преподо́бнии, честна́ вои́стинну яви́ся:/ я́коже бо Безпло́тнии во пло́ти теле́сней,/ враги́ неви́димыя, подви́гшеся, победи́ли есте́,/ ро́ды у́бо благочести́вых воспева́ют вас,/ изря́днее же честна́я стада́ и́ноков,/ я́же Боголе́пно в церква́х Боже́ственных собра́ли есте́,/ в них же похваля́юще ва́шу па́мять, Симео́не и Са́вво,/ ва́шими моли́твами вся́кия напа́сти соблюсти́ся нам,/ ко Христу́ моли́теся,/ иму́щему ве́лию ми́лость.
Сла́ва, глас 6:
Прииди́те, правосла́вных собо́ри,/ во всече́стном хра́ме Богоно́сных оте́ц,/ псало́мски согла́сную песнь сих Просла́вльшему воспои́м;/ ди́вен еси́, Бо́же, во святы́х Твои́х, глаго́люще:/ и кое́муждо сих вкупе́ возопии́м:/ ра́дуйся, зе́мный А́нгеле, Небе́сный челове́че, Симео́не преподо́бне;/ ра́дуйся, равноапо́столов учи́телю, Са́вво всесвяще́нне;/ ра́дуйся, предста́телю и похвало́ христоимени́тых люде́й свои́х./ И ны́не у Христа́ предстоя́ще,/ приле́жно к Нему́, отцы́, моли́теся,/ от вся́ких бед нас изба́вити/ и спасти́ ду́ши на́ша.
И ны́не, Богоро́дичен:
Преложе́ние скорбя́щих,/ премене́ние боля́щих еси́, Богоро́дице Всепе́тая,/ спаси́ град и лю́ди,/ боримых умире́ние,/ обурева́емых тишина́,/ еди́на Предста́тельница ве́рных.
На литурги́и
Блаже́нны: от кано́на песнь 3-я, глас 4-й и песнь 6-я, глас 8. Проки́мен, глас 7: Честна́ пред Го́сподем смерть преподо́бных Его́.Стих: Что возда́м Госпо́деви о всех, я́же воздаде́ ми? Апо́стол ко Гала́том, зача́ло 213. Аллилу́ия, глас 2. Блаже́н муж, боя́йся Го́спода: Ева́нгелие от Ма́рка, зача́ло 37. Причастен: В па́мять ве́чную бу́дет пра́ведник:
