На Го́споди, воззва́х: стихи́ры пра́здника, 3 и свята́го, 3. Стихи́ры пра́здника, глас 1.

Подо́бен: Небе́сных чино́в:

Творе́ц вся́ческих и Изба́витель наш/ Ма́терию Де́вою в це́рковь прино́сится,/ те́мже ста́рец, Сего́ прие́м,/ с ра́достию взыва́ше:/ ны́не отпуща́еши раба́ Твоего́, Бла́же, с ми́ром,/ я́коже изво́лил еси́.

Симео́н, на ру́ки от Де́вы прие́м/ пре́жде всех век рожде́ннаго/ Спа́са ви́дех, вопия́ше:/ просвеще́ние Твоея́ сла́вы конце́м;/ ны́не отпуща́еши раба́ Твоего́, Бла́же, с ми́ром,/ я́ко ви́дех Тя днесь.

Напосле́док веко́в рожде́на на спасе́ние челове́ков,/ Симео́н, понесы́й на рука́х Спа́са,/ ра́дуяся, вопия́ше:/ ви́дех Свет язы́ков и сла́ву Изра́иля,/ ны́не отпуща́еши, я́коже рекл еси́, я́ко Бог,/ от су́щих зде веле́нием Твои́м.

Ины стихи́ры свята́го, глас 4.

Подо́бен: Дал еси́ зна́мение:

Пра́веден и соверше́н/ и по всему́ сла́вен сый, Богодохнове́нне,/ Бо́га Еди́наго соверше́нна,/ во е́же оправда́ти мир прише́дшаго,/ подъя́л еси́ рука́ми воплоще́нна,/ и отреши́тися телесе́, вопия́ Ему́:/ ны́не отпуща́еши раба́ Твоего́/ с ми́ром, Человеколю́бче,/ я́ко ви́дех Тя днесь.

Ю́ношствуя ду́хом,/ престаре́в же те́лом, Симео́не,/ обеща́ние прия́л еси́ не ви́дети сме́рти,/ до́ндеже уви́диши Младе́нца ю́на,/ пре́жде век Су́щаго Творца́ и Бо́га вся́ческих,/ пло́тию обнища́вша,/ ви́дев же, взыгра́л еси́/ и пло́ти разреше́ние проси́л еси́,/ к Боже́ственным селе́нием преше́д, ра́дуяся.

А́нна Богодохнове́нная/ и Симео́н пребога́тый,/ проро́чествием сия́ющий,/ в зако́не же непоро́чни я́вльшиися,/ зако́на Да́теля,/ Младе́нца, я́вльшася по нам ви́девше,/ Тому́ ны́не поклони́шася./ Тех па́мять днесь ра́достно пра́зднуим,/ по до́лгу сла́вяще Иису́са Человеколю́бца.

Сла́ва и ны́не, глас 5.

Ге́рманово: Ве́тхий де́ньми, младе́нствовав пло́тию,/ Ма́терию Де́вою в це́рковь прино́сится,/ Своего́ зако́на исполня́я обеща́ние,/ Его́же Симео́н прии́м, глаго́лаше:/ ны́не отпуща́еши с ми́ром,/ по глаго́лу Твоему́, раба́ Твоего́,/ ви́деша бо о́чи мои́ спасе́ние Твое́, Святы́й.

На стихо́вне стихи́ры, глас 1.

Подо́бен: Небе́сных чино́в:

Богоявле́ния неизрече́ннаго/ ны́не пра́зднуем спаси́тельную благода́ть:/ от Де́вы бо Отрокови́цы непрело́жно младе́нствовав, Христо́с Бог/ в це́рковь Бо́гу и Отцу́/ Ма́терию ны́не прино́сится,/ Его́же прие́м, Симео́н рука́ми объя́т.

Стих: Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром.

Во проро́цех ви́ден был еси́, я́коже мо́щно бя́ше, Иису́се,/ Тебе́ ви́дети дре́вле,/ но ны́не, Бо́жий Сло́ве,/ пло́тию всему́ ми́ру яви́лся еси́ во́лею от Де́вы Мари́и, Христе́,/ Твое́ спасе́ние всем су́щим от Ада́ма яви́л еси́,/ я́ко Человеколю́бец.

Стих:Свет во открове́ние язы́ков/ и сла́ву люде́й Твои́х Изра́иля.

На Сина́йстей горе́ зако́н учини́вый дре́вле,/ ны́не в Сио́не гра́де исполня́я зако́нная,/ рука́ми Богоро́дицы/ Младе́нец, Христе́, со всесожже́нии/ на рука́х Симео́на/ во храм внести́ся восхоте́л еси́ пло́тию.

Сла́ва, и ны́не, глас 1:

Иоа́нна мона́ха: Днесь дре́вле Моисе́ю в Сина́и зако́н пода́вый/ зако́нным повину́ется веле́нием,/ нас ра́ди, я́ко Милосе́рд, по нам быв./ Ны́не Чи́стый Бог я́ко Отроча́ Свя́то,/ ложесна́ разве́рз чи́стыя,/ Себе́ Самому́ я́ко Бог прино́сится,/ зако́нныя кля́твы свобожда́я/ и просвеща́я ду́ши на́ша.

Тропа́рь пра́здника, глас 1:

Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды, Христо́с, Бог наш,/ просвеща́яй су́щия во тьме./ Весели́ся и ты, ста́рче пра́ведный,/ прие́мый во объя́тия Свободи́теля́ душ на́ших,/ да́рующаго нам воскресе́ние.

На у́трени

На Бог Госпо́дь: тропа́рь, три́жды.

По 1-й стихоло́гии седа́лен, глас 1.

Подо́бен: Ка́мени запеча́тану:

В це́рковь прине́слся еси́, Жизнь вся́ческих,/ мене́ ра́ди младе́нствовав,/ под зако́ном был еси́,/ дре́вле начерта́в на скрижа́лех зако́н на горе́ Сина́йстей,/ да вся измени́ши от зако́нный дре́вния рабо́ты./ Сла́ва Благоутро́бию Твоему́, Спа́се,/ сла́ва Ца́рствию Твоему́,/ сла́ва смотре́нию Твоему́,/ Еди́не Человеколю́бче.

Сла́ва, и ны́не, то́йже.

По 2-й стихоло́гии седа́лен, глас 5.

Подо́бен: Собезнача́льное Сло́во:

Во храм прине́слся еси́, обы́чная исполня́я,/ Творе́ц, и Влады́ка, и зако́на Да́тель, Спа́се,/ и на рука́х Симео́на благоволе́нием Твои́м носи́тися пло́тию,/ И́же всем стра́шный и всю тварь содержа́й,/ восхоте́л еси́, Еди́не Ще́дре,/ свет Твой всем откры́ти нам.

Сла́ва, и ны́не, то́йже.

Канон праздника со ирмосом на 6 (зри страницы 30–35) и ин канон святаго на 6, егоже краегранесие: Приими пение, Симеоне Богоприимче. Ио́сиф. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

В пра́ведных селе́ниих ра́достно водворя́яся Пра́веднаго Го́спода,/ Симео́не пра́ведный,/ и́же Боже́ственное твое́ соверша́ющия преставле́ние/ оправда́ти моли́, преблаже́нне.

В зако́не быв священноде́тель, свяще́ннейше,/ Его́же зако́н пропове́да, Младе́нца ви́дел еси́/ и естества́ зако́ном, Богоприи́мче, у́мер,/ к безсме́ртней, ра́дуяся, преше́л еси́ жи́зни.

Рука́ми держа́щаго вселе́нныя концы́,/ Деви́ческими носи́ма рука́ми, ви́дел еси́/ и, честны́ми твои́ми прие́м объя́тии,/ Моисе́я вы́шший яви́лся еси́, пребога́те.

Богоро́дичен: По́лный истощава́ется, Преве́чный начина́ется,/ Сло́во одебелева́ет, Соде́тель зи́ждется,/ Невмести́мый вмеща́ется, во чре́ве Твое́м воплоща́емь,/ Богоблагода́тная.

Ин. Песнь 3

Ирмо́с: Я́ко непло́ды, роди́ от язы́к Це́рковь,/ и мно́гое в ча́дех изнемо́же со́нмище,/ чу́дному Бо́гу на́шему возопии́м:/ Свят еси́, Го́споди.

Возвы́сився дея́ньми свяще́нными, Богоглаго́ливе,/ я́ко светови́ден столп высо́к, Всесвято́му Ду́ху был еси́, утвержда́яся я́ве,/ те́мже восхваля́ем тя.

Зако́ну Го́спода, разве́рзшаго ложесна́ Деви́ча,/ и Младе́нца, плотоно́сна, Симео́не, бы́вша, ви́дел еси́,/ да́рующаго всем избавле́ние.

Рука́ми челове́ка созда́вый, вопло́щься,/ рука́ми твои́ми держи́м есть, освяща́я тя я́ве,/ и к жи́зни бу́дущей проси́вшася, блаже́нне, отпуща́ет тя.

Богоро́дичен: Мы́сленную Тя клещу́, угль нося́щу Боже́ственный,/ от Твои́х крове́й воплоще́нна па́че ума́ Симео́н я́ко ви́де, Всенепоро́чная,/ ра́дуяся, ублажа́ше.

Конда́к свята́го Симео́на, глас 4.

Подо́бен: Яви́лся еси́ днесь:

Ста́рец днесь отреши́тися от юз моля́шеся/ сего́ жития́ тле́ннаго,/ Христа́ восприя́т на ру́ки,/ Зижди́теля и Го́спода.

Седа́лен, глас 3.

Подо́бен: Красоте́:

От Де́вы Тя воплоще́нна, Христе́, ра́дуяся, подъя́т свяще́нный Симео́н, –/ны́не отпущаеши, – вопия́, – раба́ Твоего́, Влады́ко./ А́нна же непоро́чная, проро́чица и сла́вная,/ ны́не испове́дание и пе́ние прино́сит Тебе́./ Мы же, Жизнода́вче, вопие́м Ти:/ сла́ва та́ко благоволи́вшему.

Сла́ва, и ны́не, то́йже.

Ин. Песнь 4

Ирмо́с: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Престаре́лся еси́ в ста́рости,/ ве́рою же обнови́лся еси́,/ но́ва Младе́нца хотя́ ви́дети, Симео́не, всесоверше́ннаго,/ обновля́юща мир обетша́вший прило́гом ве́тхаго борца́.

Ублажи́м согла́сно Симео́на блаже́ннаго,/ я́ко сподо́бльшася ви́дети Бо́га Блаже́ннаго, в плоть обо́лкшася,/ я́ко да сотвори́т блаже́нны, окая́нны пре́жде бы́вшия.

Законода́вца Тя вем и зако́нных естества́ вопло́щшагося кроме́,/ зако́н же нов вве́дшаго, Симео́н взыва́ше,/ Еди́не Го́споди, ны́не отпусти́ мя к жи́зни нетле́нней.

Богоро́дичен: И́же руко́ю вся нося́й, на рука́х носи́мый Присноде́вы,/ Сию́ Херуви́м соде́ла и Серафи́м вы́шшу, я́ко роди́тельницу,/ Ю́же воспои́м и благоче́стно ублажи́м.

Ин. Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Ума́ чистото́ю Бо́гу Вседержи́телю, я́ко А́нгел послужи́в, блаже́нне,/ кро́вными же́ртвами очи́стил еси́ дре́вле лю́ди Изра́илевы,/ кровь спаси́тельную предзна́менав я́сно.

Самого́ себе́ сотвори́л еси́ храм Бо́гу всесвя́т/ де́лы Боже́ственными, Богоглаго́ливе./ Те́мже я́ко Младе́нца во святем хра́ме ви́дел еси́ Бо́га с пло́тию,/ тя преставля́юща к Боже́ственным селе́нием.

Воспои́м днесь, духо́вно лику́юще, вси/ Симео́на Богоприи́мца и с ним А́нну целому́друю,/ проро́ки су́ща Бо́жия/ и Сего́ ви́девшия, нас ра́ди младе́нствовавшаго.

Богоро́дичен: Не опали́в ложе́сн Твои́х естество́м Неизме́нный,/ Еди́на Херуви́м святе́йши,/ Челове́к яви́ся, из Тебе́ ражда́емь,/ и отринове́нныя тле́нием вся совокупи́, Богома́ти, Рождество́м Твои́м.

Ин. Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя,/ Иису́се, Царю́ сил.

Возопи́л еси́, внегда́ ви́дел еси́ Го́спода, Симео́не,/ я́ко обеща́лся еси́: ны́не раба́ Твоего́, Спа́се, отпусти́,/ во а́де су́щим всем Твое́ Боже́ственное возвеща́юща воплоще́ние.

Украси́лся еси́ и Моисе́я светле́йший был еси́,/ на ру́ки добро́тою Кра́снаго прии́м, Симео́не ста́рче,/ нас ра́ди по нам Младе́нца бы́вша.

Вод тя испо́лнена Боже́ственных су́ща/ и во а́дова до́льная ме́ста сше́дша,/ ви́девше та́мо су́щии у́зницы, Симео́не,/ Боже́ственный росы́ испо́лнишася.

Богоро́дичен: Улови́ти мя всегда́ и́щет вселука́вый,/ но того́ мя се́тей исхи́ти, Влады́чице,/ и Боже́ственным кро́вом крил Твои́х це́ла соблюди́.

Конда́к и и́кос пра́здника.

Ин. Песнь 7

Ирмо́с: Не послужи́ша тва́ри Богому́дрии,/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Зако́нно Го́споду Вседержи́телю ты послужи́л еси́,/ пра́веден я́ко и́стинно и в зако́не непоро́чен, блаже́нне, быв,/ те́мже пое́ши: препе́тый отце́в Госпо́дь и Бог, благослове́н еси́.

Ра́дость скорбя́щих прии́де,/ избавле́ние Изра́илю вои́стинну яви́ся, я́ко Младе́нец в хра́ме свое́м,/ отпусти́ мя к жи́зни бу́дущей, Симео́н вопия́ше, ра́дуяся.

За милосе́рдие щедро́т Твои́х/ претружде́на мя зако́на пи́сменем,/ сля́чена мя ста́ростию отпусти́, Спа́се, раба́ Твоего́,/ я́ко ви́дех Тя, Симео́н взыва́ше,/ на земли́ нося́ща плоть.

Богоро́дичен: Не истощи́в по́лный пречи́стых недр ро́ждшаго Отца́,/ в Твои́х не́дрех, Чи́стая, я́ко Младе́нец седи́т,/ угото́вая, и́мже восхоте́ уподо́битися, Пречи́стая,/ свяще́нное я́ве седа́лище

Ин. Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.

Овдове́вший мир Боже́ственный сла́вы прише́дшаго невестоукраси́ти Пребоже́ственнаго,/ вдова́ су́ши, А́нна всехва́льная,/ и проро́чества благода́тию облиста́емая, просла́ви Его́/ и бу́дущее всем предстоя́щим показа́ше Боже́ственное избавле́ние.

Зако́нныя же́ртвы приноси́л еси́/ А́гнца за милосе́рдие несказа́нное, кровь спаси́тельную провозвеща́я издале́ча,/ блаже́нне свяще́нниче,/ Его́же воплоще́нна прие́м, Симео́не,/ просла́вился еси́ па́че Моисе́я и всех проро́ков.

Ви́дев Жела́емаго, разреше́ние прия́л еси́ теле́сное, Богодохнове́нне/ и, я́коже зре́лая пшени́ца, преше́л еси́ ко отце́м, сла́вне,/ воспита́н в ста́рости до́брей./ Те́мже твою́ всепра́зднетвенную па́мять ра́достию душе́вною соверша́ем.

Богоро́дичен: Я́ко крин, я́ко благово́нен ши́пок, я́ко Боже́ственное обоня́ние,/ обре́т Тя Сло́во Пребоже́ственное, Пречи́стая Богоневе́сто,/ и в Твою́ утро́бу всели́ся,/ благоуха́я на́ше естество́, злосмра́дия испо́льшееся, е́же от греха́,/ Мари́е Богоро́дице.

Ин. Песнь 9

Ирмо́с: Е́ва у́бо неду́гом преслуша́ния кля́тву всели́ла есть;/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси велича́ем.

Че́стны ру́це твои́, вои́стинну прикосну́вшияся, Богоприи́мче,/ Боже́ственным удесе́м, прикаса́ющагося гора́м, я́коже пое́т Дави́д, и дымя́тся:/ блаже́н вои́стинну ты был еси́./ Те́мже досто́йно восхваля́ем тя.

Ра́ка твоя́ источа́ет ве́рным исцеле́ния,/ па́мять же блаже́нная, сия́ющи па́че со́лнца,/ и всех ду́ши просвеща́ющи, и мра́ка мы́сленнаго исхища́ющи,/ священнотаи́нниче всече́стне.

Просвеща́ют сия́нием мы́сленным, я́ко со́лнце и луна́ подсо́лнечную,/ А́нна целому́дренная и проро́чица,/ ста́рец же Симео́н сла́вный./ И́хже ра́ди нас, Человеколю́бче Го́споди, грехо́вныя тьмы изба́ви.

Богоро́дичен: Я́вльшуюся Тя, Ма́терь Бо́жию, я́ко ви́дев, Богоро́дице, ста́рец рече́, я́коже проро́к:/ се Твой Сын, на воста́ние и паде́ние мно́гих лежи́т, Влады́чице,/ и в зна́мение неудобосказу́емое.

Свети́лен.

Подо́бен: Жены́, услы́шите:

Непреме́нне по Ипоста́си в Тебе́, Богороди́тельнице,/ пло́тию соедини́ся безсе́менно/ и младе́нствова Сло́во, Его́же на рука́х нося́щи, Херуви́мски, я́ко престо́л,/ ны́не Бо́гу Отцу́ принесла́ еси́,/ и Симео́н ста́рец, ра́дуяся, прия́т Того́.

Сла́ва, и ны́не, пра́здника.

На стихо́вне стихи́ры, глас 6.

Подо́бен: Тридне́вен:

Восприими́, рече́, Симео́не, Зижди́теля вся́ческих рука́ми:/ о ста́рче, подыми́ Христа́,/ Его́же Де́ва Отрокови́ца роди́ без се́мене/ на ра́дость ро́ду на́шему.

Стих: Ны́не отпуща́еши раба́ Твоего́, Влады́ко,/ по глаго́лу Твоему́, с ми́ром.

Зако́ну Творца́ и Бо́га,/ Его́же трепе́щут А́нгельская мно́жества,/ соше́дшеся, воспои́м, лю́дие, Еди́наго Благоде́теля и зако́ну Законода́теля/ во спасе́ние душ на́ших.

Стих: Свет во открове́ние язы́ков/ и сла́ву люде́й Твои́х Изра́иля.

Ны́не отпуща́еши, Влады́ко, раба́ Твоего́,/ я́коже рекл еси́, с ми́ром,/ я́ко ви́дех Тя, Христе́, Све́та Первове́чнаго,/ соу́з мя плотски́х,/ во открове́ние язы́ков и Изра́илю.

Сла́ва, и ны́не, глас 2:

Свяще́ннаго Свяще́нная Де́ва принесе́ во святи́лище святи́телю,/ просте́р же ру́це, Симео́н прия́т Сего́, ра́дуяся,/ и возопи́: ны́не отпуща́еши раба́ Твоего́, Влады́ко,/ по глаго́лу Твоему́, с ми́ром, Го́споди.

На литурги́и

Блаженны от канона праздника песнь 1-я, и святаго песнь 6-я. Прокимен, праздника, и святаго, глас 7: Возвесели́тся пра́ведник о Го́споде и упова́ет на Него́. Стих: Услы́ши, Бо́же, глас мой,/ внегда́ моли́ти ми ся к Тебе́.Апостол к Евреем, зачало 321 от полу́. Аллилуйя, глас 6: Свет возсия́ пра́веднику,/ и пра́вым се́рдцем весе́лие.Евангелие от Луки, зачало 8. Причастен праздника и святаго: В па́мять ве́чную:

На ма́лой вече́рни

Стихи́ры свята́го Симео́на на 4, глас 4 с Го́споди, воззва́х на вели́цей вече́рни (зри страни́цы 48–49).

Сла́ва свята́го, глас 6:

Проро́че и пропове́дателю Христо́в,/ престо́ла вели́чествия никогда́же отлуча́ешися/ и кому́ждо немощно́му всегда́ предстои́ши, в Вы́шних служа́,/ вселе́нную исполня́еши, всю́ду прославля́емый,/ испроси́ просвеще́ние душа́м на́шим.

И ны́не, пра́здника, глас 4: Днесь свяще́нная Ма́ти:(зри страни́цу 22).

На стиховне 2 стихиры праздника, глас 7 (зри страницу 28). Таже свята́го 2 стихиры.

Стих: Свет во открове́ние язы́ков/ и сла́ву люде́й Твои́х Изра́иля.

Единоро́днаго Сы́на, Собезнача́льна Отцу́,/ разве́рзша ложесна безсе́менно Ма́тере,/ повину́ющися зако́на повеле́нием,/ Богоро́дице Мари́я напосле́док из Нея́ вопло́щшагося/ и с челове́ки пожи́вшаго приноша́ет Бо́гови всех Первосвяти́теля,/ исполня́ющаго зако́н дре́вняго Законода́вца,/ Его́же прие́м Симео́н на ру́ку свое́ю,/ пропове́даше лю́дем:/ Бог есть Сей, Отцу́ Собезнача́лен,/ Изба́витель душа́м на́шим.

Сла́ва, глас 1:

Се Симео́н вопии́те:/ пререка́емое зна́мение Сей бу́дет:/ Бог Сый и Отроча́./ Сему́, ве́рнии, возопие́м:/ благослови́те, вся дела́ Госпо́дня, Го́спода.

И ны́не, пра́здника, глас 4: Зако́н, и́же в Писа́нии, исполня́я:(зри страни́цу 35).

Тропарь святаго. Слава и ныне, праздника (зри страни́цу 58).

На вели́цей вече́рни

Блажен муж:1-й антифон. На Господи, воззвах стихиры праздника 3 (зри страницу 23) и праведнаго Симеона 5 (зри страни́цы 48–49).

Сла́ва свята́го, глас 6:

Возсия́ день ра́достный/ па́мяти Богови́дца и Богоприи́мца Симео́на:/ сей бо Престо́лу вели́чествия моле́бне днесь предстои́т,/ Его́же в жи́зни на руку́ понесе́,/ о Нем же проро́чески веща́:/ се, – рече́, – лежи́т Сей на па́дение и на воста́ние мно́гим во Изра́или./ И к Ро́ждшей Того́ возгласи́:/ и Тебе́, Пречи́стая, Само́й се́рдце про́йдет ору́жие./ Его́же, ве́рнии, свято́е торжество́ и ле́тную па́мять почита́юще усе́рдно,/ к нему́ воззове́м:/ о Богому́дре и Богоно́сче,/ Ева́нгельских та́йн благове́стником свиде́тельствованный пра́ведниче/ и Ду́ха Свята́го испо́лненный, Симео́не,/ не преста́й моля́ за ны, Его́же я́ко Младе́нца/ на руку́ свое́ю поне́сл еси́,/ да изба́вит ны в день Су́дный шу́ияго сто́яния,/ и свободит ве́чнаго муче́ния,/ и спасе́т ду́ши на́ша,/ я́ко Милосе́рд и Человеколю́бец.

И ны́не, пра́здника, глас 6: Да отве́рзется дверь Небе́сная днесь:(зри страницу 24).

Вход. Проки́мен дне и чте́ния 3, преподобническая (зри страницы 339–340).

На литии стихи́ры пра́здника (зри страни́цы 26–27).

Сла́ва, свята́го, глас 4:

И́же Боговиде́нием осия́ем досто́йно,/ и проро́ческим пропове́данием,/ и благода́тию почте́н быв, Богодухнове́нне Симео́не,/ и Боже́ственнаго сподо́блен быв блаже́нства,/ е́же к Преблаго́му ны́не дерзнове́ние и ми́лость стяжа́в,/ моли́ся непреста́нно о и́же ве́рою тя хва́лящих и чту́щих,/ я́ко бла́га веща́теля, че́стна и Богопости́жна,/ от бед изба́вити и спасти́ ду́ши на́ша.

И ны́не, пра́здника глас 5: Ве́тхий де́ньми, младе́нствовав пло́тию:(зри страницу 28).

На стихо́вне стихи́ры свята́го, глас 2.

Подо́бен: Егда́ от Дре́ва:

Обре́те духо́вная заря́ твоего́ ума́, проро́че Симео́не,/ чистоту́ сия́ющу:/ я́коже зерца́ло, явственно ми́р озари́л еси́ Богоразу́мия сия́нием,/ блиста́я и провозвеща́я Гряду́щаго,/ И́же пода́ет благода́ть все́м челове́ком/ моли́твами твои́ми, пречу́дне.

Стих: Ты еси́ иере́й во век/ по чи́ну Мелхиседе́кову.

Уста́ быв Бо́жия,/ нече́стия де́латели я́ве обличи́л еси́,/ судо́м неизбе́жным те́х осуди́в, Симео́не ди́вне,/ пра́вды уче́нию после́дуя и Боже́ственным судьба́м./ Те́мже прему́дрым ти́ глаго́лом ви́дяще возведе́ние, блаже́нне,/ пе́сньми досто́йно восхваля́ем тя.

Стих: Моисе́й и Ааро́н во иере́ех Его́/ и Самуи́л в призыва́ющих И́мя Его́.

Престо́лу Влады́чню предстоя́/ и неизрече́нныя сла́вы насыща́емь,/ добро́ты же зря́ преми́рныя/ и све́та исполня́емь,/ проро́че Симео́не Богогла́се,/ вся, чту́щия тя́, ве́рою помина́й,/ си́м душе́вное спасе́ние/ и разреше́ние согреше́нием всем прося́, Богопости́жне.

Сла́ва, свята́го, глас 1:

Се Симео́н вопияше:/ пререка́емое зна́мение Сей бу́дет,/ Бог Сы́й и Отроча́./ Сему́, ве́рнии, возопии́м:/ благослови́те, вся дела́ Госпо́дня, Го́спода.

И ны́не, пра́здника, глас 8: И́же на Херуви́мех носи́мый:(зри страни́цы 28–29).

Тропа́рь Симео́ну, глас 4:

Симео́н ста́рец дне́сь весели́тся,/ восприя́т на руку́ свою́ Младе́нца Преве́чнаго Бо́га,/ от уз пло́ти разреши́тися прося́/ и вопия́:/ ви́деста о́чи мои́/ спасе́ние Твое́ ми́рови.

Тропа́рь пра́здника, глас 1: Ра́дуйся, Благода́тная Богоро́дице Де́во: (зри страницу 23).

На благослове́нии хле́бов: чте́ние свято́му от слов пра́зднику.

На у́трени

На Бог Госпо́дь: тропа́рь пра́здника два́жды. Сла́ва, Симео́на, и ны́не, пра́здника.

По 1-м стихосло́вии седа́лен свята́го, глас 5.

Подо́бен: Собезнача́льное Сло́во:

Не сме́сен начерта́нием до́льним, сла́вне,/ ты́, ум стяжа́в, Боже́ственнаго Ду́ха чи́стее, Симео́не Богоприи́мче, был еси́,/ сия́ния Его́ прие́мля све́тло и все́м облиста́я./ Те́мже мо́лим тя́:/ о ми́ре всего́ ми́ра помоли́ся.

Сла́ва, и ны́не, пра́здника, глас 1: Лик Ангельский да удиви́тся чудеси́: (зри страни́цу 29).

По 2-м стихосло́вии седа́лен свята́го, глас 4.

Подо́бен: Вознесы́йся:

На Боже́ственней стра́жи стал еси́, блаже́нне,/ и разуме́л еси́ Бо́жие прия́тие проро́ческими очи́ма, Богодохнове́нне./ Те́мже и возопи́л еси́, Симео́не Богоприи́мче, со стра́хом:/ Го́споди, услы́шах сла́вное восприя́тие Твое́/ и воспева́ю Тя, в пло́ть бре́нную от Де́вы во́лею обле́кшася.

Сла́ва, и ны́не, пра́здника, глас 1: В це́рковь принеслся еси́, Жизнь вся́ческих: (зри страницу 50).

Велича́ние:

Велича́ем тя́,/ святы́й пра́ведный Симео́не Богоприи́мче,/ и чти́м святу́ю па́мять твою́,/ ты́ бо мо́лиши о нас/ Христа́, Бо́га на́шего.

По полиеле́и седа́лен Симео́ну, глас 5:

Очи́стив от скве́рны ум, прему́дре,/ зерца́ло Боже́ственное соде́лался еси́/ и ны́не к восприя́тию Сы́на Бо́жия, ра́дуяся, прише́л еси́, проро́че Симео́не.

Сла́ва, и ны́не, пра́здника глас 5: Во храм прине́слся еси́, обы́чная исполня́я: (зри страницу 50).

Та́же степе́нна, 1-й антифо́н 4-го гла́са.

Проки́мен: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой,/ внегда́ моли́ти ми ся к Тебе́. Вся́кое дыха́ние: Ева́нгелие от Луки, зача́ло 8.

По 50-м псалме́ стихи́ра самогла́сна, славник Го́споди, воззва́х: глас 6: Проро́че и пропове́дателю Христо́в:(зри страни́цу 56).

Кано́н пра́здника со ирмо́сом на 6 (зри страницы 30–35) и свята́го Симео́на на 6 (зри страницы 50–55). По 3-й пе́сни конда́к и и́кос пра́здника (зри страницы 32–33), седа́лен свята́го (зри страницу 31), Сла́ва, и ны́не, то́йже.

По 6-й пе́сни конда́к и и́кос свята́го.

Конда́к Симео́ну глас 4.

Подо́бен: Яви́лся еси́ днесь:

Ста́рец днесь отреши́тися от юз моля́щеся/ сего́ жития́ тле́ннаго,/ Христа́ восприя́т на ру́ки, Зижди́теля и Го́спода.

И́кос:

Госпо́дня свиде́тельства прие́м, Симео́не Богоприи́мче,/ па́че всех челове́к вы́сши был еси́;/ те́мже похвалы́ принести́ тебе́ ужасо́хся,/ но, любо́вию пону́дився, песнь нача́ти дерзну́х,/ те́мже не отри́ни, помо́щник нам бу́ди, прехва́льне,/ да возмогу́ пе́ти че́стны ру́це твои́,/ вои́стину прикосну́вшиися Богоприя́тне Боже́ственному Младенцу,/ и́бо се Христа́ восприя́л еси́ на руку́, Зижди́теля и Го́спода.

На 9-й пе́сни припе́вы, вся́кий припе́в по еди́ножды (зри страни́цы 33–34).

Свети́лен свята́го:

На земли́ равноа́нгельно житие́ име́л еси́,/ вои́стину престаре́вся те́лом,/ и ны́не на Небесе́х со А́нгельскими ли́ки всели́лся еси́ близ Све́та Трисия́ннаго./ Его́же насыща́яся, Симео́не Богоприи́мче,/ назира́й нас, пою́щих тя.

Сла́ва, и ны́не, пра́здника: Ду́хом во святи́лищи предста́в, ста́рец:(зри страницу 35). На хвали́тех стихи́ры пра́здника 3, глас 4 (зри страницу 35) и пра́веднаго Симео́на 3 стихи́ры с Го́споди, воззва́х: глас 4 (зри страницы 48–49).

Сла́ва, свята́го, глас 4:

О Го́споде ра́дуяся и Бозе, Спа́се свое́м,/ Богоглаго́ливе и сла́вне проро́че,/ и та́мо су́щаго сия́ния зарю́ прие́м,/ и Све́том Боже́ственным мы́сленно просвеща́емь,/ и́же па́мять твою́ всепра́зднственную ве́рою творя́щия/ напа́стей и бед твои́ми моли́твами изба́ви.

И ны́не пра́здника, глас 6: На рука́х ста́рческих во дне́шний день: (зри страницу 35).

Славосло́вие вели́кое

На литурги́и: Уста́в (зри страницу 56)

Тропа́рь, глас 8:

Восприе́мши ду́ши челове́ческия/ и утоли́вши злый сове́т,/ сокруши́, Богома́ти Влады́чице,/ и разгони́ тьму прегреше́ний,/ и нас наста́ви на путь смире́ния,/ я́ко да и мы бу́дем во све́те дел ходи́ти,/ и Твоея́ ико́ны явле́нию торжествова́ти,/ и на по́мощь Твою́ упова́ти,/ и уми́льным гла́сом зва́ти, Влады́чице, из глубины́:/ помози, Еди́на Благослове́нная.

Кано́н, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя чудеса́.

Припе́в осо́бый: Пресвята́я Госпоже Богоро́дице, услыши моли́тву раб Свои́х, моля́щихся Тебе́.

Го́споди Бо́же мой,/ да́руй ми язы́к и отве́рзи мне устне́/ к похвале́нию Ма́ти Твоея́,/ и Ея о́бразу песнь прине́сти кра́сную, си́це вопию́ще:/ умягчи́ злых сердца́, Влады́чице.

Спасе́ние мое́ и прибе́жище еси́, Влады́чице,/ покро́в дарова́ла еси́ Свое́ю честно́ю ико́ною,/ ей же предстоя́т вси лю́дие, прося́ще по́мощи,/ и Тебе́ вопие́м:/ умягчи́ злых челове́к сердца́, Влады́чице. Мари́е, Пречи́стая Де́во Богоро́дице,/ посли́ ми благода́ть воспе́ти Тя/ и Твое́й ико́не честне́й поклоня́тися, вопию́ще:/ умягчи́ злых сердца́, Владычице.

Сла́ва:

Клеветы́ и наве́ты упраздни́ и от вся́кия зло́бы спаси́,/ бу́ди, Влады́чице, заступле́ние,/ Свое́ю чу́дною ико́ною соблюди́ вопию́щих:/ умягчи́ злых сердца́, Влады́чице.

И ны́не:

Тя Бог показа́ нам Засту́пницу/ и в ско́рбех Помо́щницу/ и дарова́ нам Твою́ честну́ю ико́ну/ на прославле́ние всем и на исцеле́ние вопию́щим:/ умягчи́ злых сердца́, Влады́чице, сыно́в.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия духо́вно утверди́,/ в Боже́ственней Твое́й сла́ве/ венце́в сла́вы сподо́би.

Ра́дуйся, непосты́дная Храни́тельнице;/ ра́дуйся, Богоро́дице, и́же и мы ра́дуемся о Твое́й чу́дней ико́не, кра́сящеся, вопие́м:/ ра́дуйся, умягче́ние злых серде́ц, Богоро́дице.

Вои́стинну честна́я ико́на дарова́ся христоимени́тым лю́дем на прогна́ние духов нечи́стых/ и на здра́вие всем, тре́бующим по́мощи от не́я, вопию́щим:/ ра́дуйся, умягче́ние злых сердец, Богоро́дице.

Сла́ва:

О́блак светоза́рный показа́ся Твоя́ честна́я ико́на,/ па́че со́лнца сия́юща и всем лучу́ простира́юща,/ от боле́зней и скорбе́й избавля́юща и злых отрева́юща,/ те́мже вси зове́м ей:/ ра́дуйся, умягче́ние злых серде́ц, Влады́чице.

И ны́не:

Я́ко да Твои́ми моли́твами избавля́емся,/ Богоро́дице Де́во, спаси́,/ славосло́вим Предста́тельницу, и Твое́й честне́й ико́не покланя́емся,/ и мо́лим Тя по Бо́зе, я́ко Ма́терь Бо́жию:/ вопию́щих умягчи́ злых сердца́, Богоро́дице.

Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,/ я́ко неруши́мей стене́ и предста́тельству.

Тропа́рь, глас 2:

Моле́ние те́плое и стена́ необори́мая,/ ми́лости исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́/ и от бед изба́ви нас,/ Еди́на вско́ре предста́тельствующая.

Песнь 4

Ирмо́с: Неизсле́дный Бо́жий сове́т,/ е́же от Де́вы воплоще́ния/ Тебе́, Вы́шняго,/ проро́к Аввакум усмотря́я, зовя́ше:/ сла́ва си́ле Твое́й, Го́споди,

Непосты́дную предста́тельницу нам дарова́, ико́ну Ма́тери Своея́,/ и́же Ея́ зря́ще, весели́мся и уми́льно зове́м:/ помози́, Влады́чице, всем, и от всех злых спаси́,/ и Ца́рствию Небе́сному сподо́би.

Тобо́ю вси спаса́емся и от нахожде́ний диа́вольских свобожда́емся./ Тя Бог показа́ нам Засту́пницу/ и Твою́ честну́ю ико́ну нам дарова́,/ Ей же вопие́м:/ Влады́чице, помози́, и от всех злых челове́к спаси́, и Ца́рствию сподо́би.

Сла́ва:

Не умолчи́м, Влады́чице, чудеса́ Твоя́,/ я́ко Свое́ю честно́ю ико́ною всех спаса́еши/ и стра́ждущих от без избавля́еши,/ неду́жным цельбы́ подае́ши,/ и нас от всех злых спаси́/ и Ца́рствию Небе́сному сподо́би.

И ны́не:

Пе́ние от недосто́йных раб приими́, Ма́ти Христа́ Бо́га,/ и не отри́ни мене́ от Своего́ Пречи́стаго Лица́,/ но спаси́ от злых всех/ и Ца́рствию Небе́сному сподо́би.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая.

Удивля́юся умо́м, ужаса́юся душе́ю и весь трепе́щу,/ но наде́юся на ми́лость благоутро́бия Твоего́, Чи́стая,/ и вопию́ от се́рдца: я́ко Бо́га ро́ждшая еси́,/ Того́ моли́ от злых спасти́ ду́шу мою́.

Прииди́те, вси ве́рнии, воспое́м Пречи́стую Де́ву Мари́ю/ и честно́му Ея́ о́бразу поклони́мся, вопию́ще от се́рдца:/ ра́дуйся, Гаврии́лово благове́щение;/ ра́дуйся, Царя́ Христа́ восприе́мши, и на руку́ Свое́ю держа́, я́ко со́лнце./ Того́ моли́, Чи́стая, от злых спасти́ ду́шу мою́.

Сла́ва:

Ублажи́м Ма́терь Бо́жию Боже́ственными пе́сньми,/ иде́же сла́вится Пречестно́е и́мя, ту бесо́вская кре́пость разруша́ется,/ не мо́гут терпе́ти си́лы Ея́, отбега́ют./ Мы же о Ней весели́мся и вопие́м Ей:/ моли́ Сы́на Своего́ от злых ду́шу мою́ изба́вити.

И ны́не:

К Преблагослове́нней Де́ве Богоро́дице, лю́дие вси, припаде́м и моли́тву принесе́м,/ да умо́лит Сы́на Своего́, Христа́ Бо́га на́шего,/ от злых спасти́ся всем.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Не́я ро́ждшагося Бо́га сла́вим.

Боже́ственный Твоея́ ико́ны свято́е явле́ние,/ я́ко со́лнце, возсия́ в сердца́х,/ луча́ всечестна́я просвеща́ет све́том Свои́м всех, вопию́щих Ей:/ ра́дуйся, Блага́я на́ша Предста́тельнице и ско́рая Помо́щнице,/ славосло́вящих Тя, Пречи́стая, поми́луй всех.

Правове́рно чту́щих Тя, Цари́цу всех Бо́га,/ и Твое́й чу́дней ико́не святе́й любе́зно покланя́емся, вопию́ще:/ о Бо́жия Ма́ти,/ спаси́ от клеветы́ злых челове́к,/ и изба́ви мя славосло́вящаго Тя, и поми́луй.

Сла́ва:

Боже́ственней Твое́й ико́не покланя́емся, Богоро́дице Де́во,/ прося́ще от Тебе́ вели́кия ми́лости,/ да́руй рабо́м Свои́м, Еди́на Чи́стая,/ от вся́кия зло́бы изба́ви/ и славосло́вящих Тя, Пречи́стую, поми́луй.

И ны́не:

О Ма́ти Го́спода, моего́ Творца́,/ Ты родила́ еси́ всех Царя́ Христа́,/ Того́ моли́, Чи́стая и Преблаже́нная,/ изба́вити ду́ши на́ша,/ славосло́вящих Тя, Пречи́стую, поми́луй.

Конда́к, глас 6:

Око се́рдца моего́ смуща́ют,/ и злый сове́т разоря́ет мя,/ сих сокруши́, Де́во Чи́стая,/ и не пре́зри мое́ воздыха́ние,/ и супоста́ты на нас умягчи́, Преблагослове́нная Влады́чице.

И́кос:

Ра́дуйся, Престо́ле огнеобра́зный Бо́жий;/ раду́йся, Отрокови́це, седа́лище Ца́рское,/ ло́же преиспе́щренное по́сланное, златопорфи́рный черто́же,/ ри́за цветолу́чная, украше́нный о́бразе,/ молниено́сное ору́жие, светильниче многосветлый,/ ра́дуйся, Богоро́дице, двенадесятосте́нный гра́де и дверь златокова́нная;/ ра́дуйся, пала́то светообра́зная, позлаще́нная трапе́зо, Богоукраше́нная сень;/ ра́дуйся, Голуби́це Чи́стая;/ ра́дуйся, я́ко от злых челове́к спаса́еши, Преблагослове́нная Влады́чице.

Песнь 7

Ирмо́с: Не послужи́ша тва́ри Богомудрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Не и́мамы ины́я Засту́пницы, то́кмо Тебе́, Всенепоро́чная,/ да Тя вси я́ко Предста́тельницу воспева́ем, и уми́льно аз зову́:/ Чи́стая, от всех злых спаси́ мя.

На моле́ние мое́ умилосе́рдися,/ и ра́дость вме́сто печа́ли дару́й, Влады́чице,/ и от клеветы́ злых изба́ви мя, да вопию́ Ти:/ от всех злых спаси́ мя.

Сла́ва:

Пречи́стыя и воспе́тыя Богома́тере ико́ны/ принесе́м песнь, похвала́ми вопием:/ моли́ся, Чи́стая, к ро́ждшемуся из Тебе́ Сы́ну и Бо́гу,/ от всех злых спасти́ мя.

И ны́не:

Богозра́чная на земли́ па́че всех родо́в яви́ся, Чи́стая Богоотрокови́це,/ спаси́ всех, чту́щих день пра́зднества Твоего́, Богоро́дице Де́во,/ от всех злых спаси́ мя.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Отрокови́це Предо́брая, яви́ся луносия́тельная, Чи́стая,/ утро́ба Твоя́ породи́ Изба́вителя,/ Его́же моли́ сохрани́тися нам от прило́га диа́вольскаго,/ Тя бо чту́щим, Засту́пницу,/ и Твое́й ико́не кла́няемся, вопию́ще со слеза́ми:/ Де́во Богоро́дице,/ чту́щих Тя, Многопе́тую,/ во ве́ки сохрани́.

Взира́ю на Боже́ственный о́браз Твой,/ и чту Влады́чню Бо́жию Ма́терь,/ и взира́ю на подо́бие Пречи́стаго Ея́ лица́ зрак,/ покланя́юся и вопию́:/ Де́во Богоро́дице,/ чту́щих Тя, Многопе́тую, во ве́ки сохрани́.

Сла́ва:

Палато Сло́ва, одушевле́нная Це́рковь,/ Пре́столе огнеобра́зный, ра́ю слове́сный,/ мы́сленный виногра́д, грезн нося́ще, Христа́, на руку́, Чи́стая,/ приклони́ у́хо Твое́ и услы́ши моли́тву раба́ Твоего́, Де́во Богоро́дице:/ чту́щих Тя, Многопе́тую, во ве́ки сохрани́.

И ны́не:

Тебе́ от се́рдца возложи́х песнь,/ спаси́, Де́во Чи́стая, и моли́ся о ми́ре,/ ве́си, я́ко на тя упова́ние с Бо́гом возлага́ем и вопие́м:/ Де́во Богоро́дице, чту́щих Тя, Всепе́тую, во ве́ки сохрани́.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжествуе́т же Безпло́тных умо́в естество́,/ почита́ющее свяще́нное торжество́ Богоматере,/ и да вопиет:/ ра́дуйся, Всеблаженная Богоро́дице,/ Чи́стая Присноде́во.

Всяк во́зраст к похвале́нию да подви́жится Де́вы Богоро́дицы/ и честно́му Ея о́бразу всяк да покло́нится,/ мы же, ве́рнии, воспое́м и́стинную Де́ву, Ма́терь Христо́ву, си́це реку́ще:/ о Де́во Богоро́дице,/ сокруши́ стре́лы вра́жия и умягчи́ злых сердца́,/ Тя бо вси по до́лгу велича́ем.

Вознеси́, Богороди́тельнице, рог благове́рных люде́й на́ших/ и пода́ждь на враги́ по́мощь,/ иноплеме́нных шата́ния низложи́,/ Богороди́тельнице Пречи́стая,/ невоеваны вся гра́ды сохрани́ и соблюди́/ и вся стра́ны христиа́нския сохрани́,/ в них же и́мя Твое́ велича́ется и ве́рою от всех сла́вится,/ да Тя вси, Ма́терь Бо́жию, по до́лгу велича́ем.

Восхва́лит Тя Не́бо и земля́, вся оте́чествия язы́к,/ и вси рука́ми да воспле́щут Ма́тери Госпо́дни/ и о́бразу Ея, А́нгелом гове́йному, да покло́нятся, с на́ми вопию́ще:/ сла́ва мно́жеству щедро́т Твои́х, Еди́на Человеколюби́вая,/ Тя вси по до́лгу велича́ем.

Сла́ва:

Па́дшим воста́ние и уныва́ющим ра́дование,/ заблу́ждшим Наста́вница, боля́щим посеще́ние и исцеле́ние,/ гре́шным спасе́ние, во бра́нех побе́да/ и всем христиа́ном нело́жная Храни́тельница/ и умягче́ние злых серде́ц, Де́во Богоро́дице,/ те́мже Тя вси по до́лгу велича́ем.

И ны́не:

Приими́ песнь исхо́дную, Ма́ти Жива́го Бо́га,/ и спаси́ всех, ве́рно покланя́ющихся свя́тому Твоему́ о́бразу и чудотво́рней ико́не/ и вопию́щих Тебе́, Богороди́тельнице:/ моли́ся, Пречи́стая, Сы́ну Своему́,/ поми́ловатися нам от всех злых.

слу́жба, ея́же краегранеси́е:

Христу́, Све́ту и И́стине, послужи́в, Япо́нию просвети́в, яви́лся ра́вен апо́столом, Нико́лае.

На вели́цей вече́рни

На Го́споди, воззва́х: стихи́ры на 8, глас 4:

Христо́ва святи́теля,/ апо́столов подража́теля,/ Ева́нгелия пропове́дника сло́вом и житие́м,/ архиере́я чу́днаго, Никола́я, велича́ем ны́не с весе́лием духо́вным,/ той бо мо́лится о па́стве свое́й и о всей Це́ркви.

Русския земли́ порожде́ние,/ Япо́нския страны́ просвети́тель ди́вный,/ Святы́я Це́ркве сын благода́тный,/ Христа́ Спа́са служи́тель и́стинный,/ Никола́й, равноапо́стольный святи́тель,/ ны́не предстои́т Живонача́льней Тро́ице,/ моля́ся о спасе́нии ми́ра.

Испове́дниче любве́ Христо́вы/ и пропове́дниче Воплоще́ннаго Бо́га Сло́ва,/ Спаси́теля челове́ческаго ро́да,/ Нико́лае, апо́столов соприча́стниче,/ ю́ность твою́ освяти́л еси́/ луча́ми Со́лнца пра́вды, Христа́ Го́спода,/ моли́ся ны́не о всех лю́дех.

Све́том Христо́вым незаходя́щим озаря́емый,/ устреми́лся еси́, Нико́лае, апо́столом ра́вный,/ к земли́ восходя́щаго со́лнца,/ во е́же просвети́ти Ева́нгелием сердца́ челове́ческия/ и согре́ти я любо́вию Боже́ственною,/ моли́ся о лю́дех па́ствы твоея́.

Сла́ва, глас то́йже:

Тро́ицу Единосу́щную пропове́дал еси́,/ Я́же есть Любо́вь соверше́нная,/ и пребыва́л еси́, я́коже глаго́лет/ возлю́бленный учени́к воплоще́ннаго Сло́ва,/ в Бо́зе и в любви́ Небе́сней к лю́дем япо́нским,/ о них же моли́ся, свя́те Нико́лае.

И ны́не, догма́тик, глас 4: И́же Тебе́ ра́ди:

На литии́: глас 1:

Уте́шитель Боже́ственный,/ Дух Святы́й и И́стинный,/ просвети́ твое́ се́рдце и ра́зум/ послужи́ти лю́дем, Христа́ неве́дущим,/ и прише́л еси́ во страну́ Япо́нскую,/ возвеща́я и́стиною дел и слов твои́х/ Спа́са ми́ра воплоще́ннаго,/ Ему́ же моли́ся, Нико́лае равноапо́стольне,/ спасти́ся всем нам.

Свети́ся и ра́дуйся, Япо́нская страно́,/ святи́теля и апо́стола иму́щи Никола́я,/ предстоя́щаго Престо́лу Небе́снаго Отца́/ и моля́щагося о тебе́ и о лю́дех твои́х,/ е́же Ева́нгелие восприя́ти им в се́рдце и ра́зум/ и жи́ти со Христо́м во ве́ки.

Сла́ва, глас то́йже:

Восприя́л еси́ Христа́ в твое́ се́рдце,/ апо́столом ра́вный, Нико́лае святи́телю,/ и любо́вь Боже́ственная/ излия́ся изоби́льно от уст твои́х,/ возвеща́л бо еси́ Преве́чную Прему́дрость, Сы́на Бо́жия,/ И́же хо́щет всем челове́ком спасти́ся.

И ны́не, глас то́йже:

Единоро́днаго Сы́на Отца́ Безнача́льнаго/ родила́ еси́, егда́ прии́де исполне́ние време́н,/ Пренепоро́чная Ма́ти Бо́жия, Де́во Мари́е,/ Спаси́теля челове́ков, Просвети́теля ми́ра,/ Его́же и пропове́да Никола́й святи́тель, апо́столом подо́бяся,/ лю́дем страны́ Япо́нския.

Стихи́ры на стихо́вне, глас 2:

Тако́в подоба́ет архиере́й,/ апо́столом ра́вный ре́вностию,/ преподо́бным соприча́стник чистото́ю жития́,/ ду́шу за па́ству положи́ти гото́вый да́же до кро́ве,/ яко́в же был еси́, Нико́лае,/ святи́телю и Бо́жий служи́телю.

Устреми́лся еси́ ко Христу́, Со́лнцу И́стины,/ равноапо́стольне Нико́лае,/ сего́ ра́ди восприя́л еси́/ а́нгельское житие́ преподо́бных/ и жре́бий служе́ния апо́стольскаго во стране́ Япо́нстей,/ иде́же насади́л еси́ Це́рковь Бо́жию, я́ко прекра́сный сад,/ и был еси́ ве́рен па́стве твое́й да́же до сме́рти,/ я́ко жени́х неве́сте прекра́сней,/ и восприя́л еси́ вене́ц жи́зни ве́чныя,/ по сло́ву святи́теля,/ да́вшаго в десни́цу твою́ жезл архиере́йства.

И нра́вом и престо́лом апо́столом соприча́стник был еси́,/ святи́телю Нико́лае,/ на высоте́ святи́тельства поста́вленный,/ сия́я све́том Христо́вым лю́дем страны́ Япо́нския,/ их же утвержда́л еси́ ве́рою ева́нгельскою,/ о них же моли́ся ко Го́споду.

Испове́дал еси́ Го́спода твоего́ пред челове́ки,/ и Той испове́да тя пред Отце́м Небе́сным,/ Нико́лае, апо́столом ра́вный,/ житие́м бо и сло́вом уст твои́х/ пропове́дал еси́ жизнь ве́чную/ и приобща́л еси́ к Це́ркви Бо́га Жива́го лю́ди япо́нския,/ и был еси́ ми́ру свети́льник.

Сла́ва, глас то́йже:

Сын Возлю́бленный Единоро́дный,/ Преве́чнаго Отца́ О́браз Ипоста́си,/ прише́дый спасти́ род челове́ческий,/ призва́ тя, Нико́лае, святи́телю,/ послужи́ти Ему́ благове́стием Ева́нгелия,/ повеле́ бо ученико́м Свои́м научи́ти вся язы́ки,/ ты же, утвержде́нный благода́тию Ду́ха Свята́го,/ учи́л еси́ и крести́л еси́ лю́ди япо́нския,/ насажда́я на земли́ Бо́жие Ца́рствие.

И ны́не, Богоро́дичен.

Тропа́рь, глас 4:

Апо́столов единонра́вне и сопресто́льне,/ служи́телю Христо́в ве́рный и Богому́дрый,/ цевни́це избра́нная Боже́ственнаго Ду́ха,/ сосу́де преизлива́ющийся любве́ Христо́вы,/ Япо́нския земли́ просвети́телю,/ святы́й Нико́лае, иера́рше равноапо́стольне,/ моли́ся Живонача́льней Тро́ице/ о всем твое́м ста́де/ и о всем ми́ре.

На у́трени

По 1-м стихосло́вии седа́лен, глас 3:

И́стину Бо́жия вочелове́чения/ и спасе́ния ве́чнаго во Христе́ Иису́се/ пропове́дал еси́ лю́дем япо́нским, Нико́лае равноапо́стольне,/ и созида́л еси́ в сердца́х челове́ческих Бо́жию любо́вь и пра́вду.

Сла́ва, глас то́йже:

Несозда́нная Тро́ице, Боже́ственная Еди́нице в Трие́х Ипоста́сех,/ к жи́зни Боже́ственней в любви́ и ми́ре/ зове́ши Твое́ созда́ние Богогла́сным язы́ком служи́телей Святы́я Це́ркве,/ в ней же возси́я Нико́лай, благове́стник Япо́нский,/ того́ моли́твы приими́ о па́стве его́ и о всех нас.

И ны́не, глас то́йже:

Е́вы прама́тере разреши́ла еси́ кля́твы соу́з, Пресвята́я Де́во Влады́чице,/ рожде́нием Бо́га во пло́ти,/ и ны́не Сын Твой, Пречи́стая,/ спаса́ет вся лю́ди, лю́бящия Тя/ и под Твой покро́в прибега́ющия,/ Ему́ же о нас моли́ся с Николаем равноапосто́льным,/ Япо́нии просвети́телем.

По 2-м стихосло́вии седа́лен, глас 5:

Преобрази́л еси́ в себе́ ве́тхаго челове́ка,/ благода́тию Ду́ха Свята́го побежда́я грехо́вныя стра́сти,/ изволе́нием бо благи́м восхоте́л еси́ сотвори́ти во́лю Вы́шняго Бо́га,/ просвети́л еси́ све́том невече́рним и себе́ и мно́гия лю́ди.

Сла́ва, глас то́йже:

Отца́ Небе́снаго всех челове́ков во́лю исполня́я о спасе́нии ве́чнем,/ упра́вил еси́ путь твой в зе́млю Япо́нскую,/ возвести́ти воплоще́ние Спа́са ми́ра, Сы́на Бо́жия,/ и мно́гия лю́ди просвети́л еси́ Того́ благода́тию,/ моли́ся о них, Нико́лае, апо́столом подо́бниче.

И ны́не, глас то́йже:

Сы́ну Твоему́, Богоро́дице, моли́ся, со святи́телем Япо́нским Никола́ем,/ дарова́ти лю́дем благода́тную си́лу,/ и озаре́ние све́том Небе́сным Того́ неве́дущим,/ да спасе́ние ве́чное восприи́мут.

Седа́лен по полиеле́и, глас 6:

Лю́дие страны́ Япо́нския ны́не духо́вно торжеству́ют,/ с ни́ми же и вси христолю́бцы спра́зднуют, Го́споду пою́ще и глаго́люще:/ сла́ва Тебе́, Спаси́телю ми́ра,/ я́ко дарова́л еси́ нам Никола́я святи́теля,/ апо́стола житие́м, благове́стника Ева́нгелия,/ ны́не Тебе́ моля́щагося о нас.

По 50-м псалме́ стихи́ра, глас 6:

Устреми́лся еси́, Нико́лае святи́телю,/ от земли́ к Небе́сным/ и пожи́л еси́ не себе́ ра́ди, но Спа́су твоему́,/ повеле́вшему положи́ти ду́шу за дру́ги своя́,/ и в Япо́нии возвести́л еси́ Ева́нгелие спасе́ния,/ и приве́л еси́ ко Христу́ лю́ди мно́гия,/ ви́дяшия в тебе́ о́браз Христо́в.

Кано́н, глас 4

Песнь 1

Ирмо́с: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Житие́м а́нгельскаго, нра́вом апо́стольскаго/ челове́ка Бо́жия,/ свети́льника, горя́щаго све́том Христо́вым,/ Русския земли́ порожде́ние,/ Отца́ Небе́снаго сы́на возлю́бленнаго уве́де тя, Нико́лае святи́телю, страна́ Япо́нская.

И сло́вом и де́лом научи́л еси́ япо́нския лю́ди/ сла́вити вели́чия Бо́га твоего́, милосе́рдие и любо́вь людем явля́ющаго,/ и сотвори́л еси́ на земли́ пред Ним вся́ку пра́вду,/ сего́ ра́ди успе́ние твое́ со святы́ми/ и предстои́ши Животворя́щей Тро́ице, Нико́лае равноапо́стольне.

Весь существо́м твои́м был еси́ ра́вен апо́столом,/ в се́рдце твое́м стяжа́л еси́ Свята́го Ду́ха Бо́жия,/ сего́ ра́ди источи́л еси́ сло́во жи́зни ве́чныя,/ в житии́ твое́м явля́я в себе́ о́браз ве́ры и пра́вды и кро́тости,/ испроси́ и нам сию́ благода́ть,/ Нико́лае, апо́столом ра́вне.

Богоро́дичен: Яви́лася еси́, Пречи́стая, служи́тельница спасе́ния вечнаго,/ сочета́ла бо еси́ вочелове́чением естеству́ земноро́дных Сы́на Бо́жия,/ Еди́наго Хода́тая Бо́га и челове́ков, Христа́ Иису́са,/ сего́ ра́ди вся́кое дыха́ние хва́лит Тя,/ Тобо́ю бо Творе́ц и Влады́ка Небе́сный на зе́млю прии́де.

Песнь 3

Ирмо́с: Утвержде́ние ве́рных и похвало́,/ и нетле́ния Исто́чниче,/ и благи́х Прошениода́вче, Христе́,/ в любви́ Твое́й утверди́ мя.

Па́ствы Бо́жия храни́тель,/ япо́нских христиа́н учи́тель,/ апо́стольских нра́вов ревни́тель был еси́, Нико́лае святи́телю,/ с дерзнове́нием Влады́чнему́ Престо́лу предстоя́ во све́те невече́рнем,/ моли́ся о всем ми́ре.

О́браз плодоно́снаго дре́ва явля́еши нам, Нико́лае равноапо́стольне,/ укорени́лся бо еси́ в Ева́нгелии Ца́рствия Бо́жия,/ возраста́л еси́ в благоче́стии и дости́гл еси́ соверше́нства,/ плоды́ же моли́тв и трудо́в твои́х/ явля́ет страна́ Япо́нская в сыне́х и дще́рех Це́ркве Христо́вы.

Ни во что же вмени́л еси́ ю́ность во́зраста твоего́ и стремле́ния ея́, свяще́нне Нико́лае,/ егда́ пла́мень Боже́ственный разжже́ твою́ ду́шу,/ жела́ние се́рдца твоего́ исполня́я и приобща́яся апо́стольскому по́двигу,/ Ева́нгелие ве́чное благовеству́я в Япо́нии.

Богоро́дичен: И Де́ва, и Непоро́чная Ма́ти Спаси́теля ми́ра,/ Твою́ пода́ждь по́мощь рабо́м Твои́м,/ изба́ви моли́твами от бед и вся́каго греха́ Твоя́ лю́ди/ во е́же причаща́тися благода́ти Небе́сней в земно́м житии́/ и ви́дети сла́ву Небе́сную в жи́зни ве́чней.

Седа́лен, глас 7:

Ю́ность твою́ Христу́ дал еси́/ и освяти́л еси́ всего́ себе́, апо́столом ра́вный, Нико́лае сла́вне,/ све́том Бо́жиим сия́я, был еси́ свети́льник, на высоте́ поста́вленный,/ указу́ющий путь ве́чныя жи́зни,/ к ней же чрез пучи́ну жите́йскаго мо́ря/ мно́гия сыны́ и дще́ри твоя́ приве́л еси́ в стране́ Япо́нстей.

И ны́не, глас то́йже:

Покро́ве христиа́ном и Блага́я Помо́щнице на земли́,/ Засту́пнице ми́ра, Богоро́дице Мари́е,/ утверди́ моли́твами Твои́ми Це́рковь Сы́на Твоего́ в стране́ Япо́нстей и во все́м ми́ре/ и спаси́ лю́ди Твоя́ от вся́каго зла.

Песнь 4

Ирмо́с: Приклони́л еси́, Христе́, снизхожде́нием Твои́м/ Небеса́ в ра́зуме/ и яви́лся еси́ воплоще́н на земли́./ Тем вси вопие́м:/ си́ле Твое́й сла́ва, Человеколю́бче.

Роди́лся еси́ к жи́зни а́нгельстей/ и отве́ргл еси́ мир и вся я́же в не́м зла́я,/ восхоте́в сла́вити то́чию Бо́га, мона́х изря́дный был еси́/ и, свяще́нством укра́шен, я́ко апо́стол, пожи́л еси́ в стране́ Япо́нстей/ и приве́л еси́ ко Христу́ лю́ди мно́ги.

О́браз вои́стину Христо́в был еси́, Нико́лае, святи́телю и апо́столе,/ зе́млю хла́дну возде́лал еси́ ра́лом любве́ Ева́нгельский,/ в моли́тве и труде́х пребыва́я, се́ял еси́ се́мя спаси́тельнаго благове́стия/ и пожа́л еси́ жа́тву во сто крат./ Ны́не Це́рковь Япо́нская, тобо́ю насажде́нная, све́тло красу́ется.

Свет Восто́ка свы́ше прине́сл еси́ восто́ку да́льнему в Япо́нстей стране́, Нико́лае равноапо́стольне,/ и возже́гл еси́ свет сей в сердца́х япо́нских люде́й/ и согре́л еси́ их любо́вию Христо́вою,/ сам быв, я́ко огнь, пред Бо́гом горя́щий,/ моли́ся о ча́дех твои́х,/ моли́ся мир и любо́вь утверди́ти в ми́ре.

Богоро́дичен: Влады́чице Ма́ти Бо́жия,/ неразлу́чна еси́ от Сы́на Твоего́,/ Ему́ же предстои́ши в сла́ве Небе́сней и земноро́дных не оставля́еши,/ моли́твам их вне́млеши и моля́щихся Тебе́ посеща́еши,/ ве́даеши бо челове́ческия ско́рби серде́чныя.

Песнь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Еле́ем любве́ испо́лнил еси́ сосу́д твоего́ се́рдца, апо́столом ра́вный Нико́лае,/ егда́ избра́л еси́ многотру́дное жи́тельство в стране́ Япо́нстей/ дале́че от сро́дник, дале́че от друго́в твои́х, дале́че от земли́ твоея,/ насажда́я Це́рковь Христо́ву, Бо́гом утвержда́емый.

Труд и боле́знь возложи́л еси́ на себе́,/ Бо́гом зва́нный, Нико́лае святи́телю,/ и ско́рби мно́гия претерпе́л еси́/ и всего́ себе́ пре́дал еси́ по́двигу апо́стольскому/ и сотвори́л еси́ себе́ же́ртву жи́ву твоему́ Го́споду,/ Его́же сло́во благовести́л еси́ лю́дем япо́нским.

Иерусали́ма Небе́снаго взыску́я,/ отше́л еси́ от преде́л оте́ц твои́х и от земли́ твоея́, Авраа́му подо́бяся,/ и обре́л еси́ обетова́ния зе́млю,/ иде́же не поко́й и весе́лие,/ но ско́рби мно́ги прия́л еси́, ра́дуяся,/ я́ко ни́ва церко́вная произраща́ет Бо́гу но́выя лю́ди.

Богоро́дичен: Вселе́нная храни́тся Твои́м заступле́нием,/ Богоро́дице Мари́е, Пречи́стая Ма́ти Де́во,/ любве́ Бо́жия изря́дное вмести́лище,/ избра́нная от всех родо́в,/ во е́же послужи́ти спасе́нию ми́ра,/ вся язы́цы Твои́м благосе́рдием посеща́еши/ и мо́лишися дарова́ти спасе́ние всем живу́щим на земли́.

Песнь 6

Ирмо́с: Ве́чер, и у́тро, и полу́дне/ хва́лим Тя, Го́споди Бо́же наш,/ услы́ши глас наш.

Я́сно пропове́дал еси́ Триеди́наго Бо́га,/ любо́вь Свою́ излива́юща на все созда́нное,/ наипа́че же челове́ка,/ его́же приобщи́ Боже́ственней жи́зни вочелове́чение Единоро́днаго Сы́на Бо́жия,/ Ему́же после́дующе, восприе́млем возрожде́ние водо́ю и Ду́хом,/ е́же Це́рковь твори́т во И́мя Отца́ и Сы́на и Всеблага́го Уте́шителя.

Весе́лия се́рдце твое́ исполня́шеся,/ прие́мля мно́гия труды́ и ско́рби,/ ве́дал бо еси́,/ я́ко всяк, после́дуяй Христу́ Спа́су, прие́млет крест и по Нем и́дет./ Животворя́щий Крест си́лою мно́гою утверди́ тя,/ сло́вом и житие́м возвеща́юща всем,/ я́ко мо́жем вся во укрепля́ющем нас Иису́се.

И́стинный па́стырь, свети́льник в ми́ре,/ свет во тьме пребыва́ющим,/ путево́ждь не иму́щим духо́внаго зре́ния был еси́, Нико́лае,/ да спасе́ши лю́ди, Бо́гом тебе́ вруче́нныя,/ всем вся был еси́,/ сего́ ра́ди и ра́вен апо́столом нарече́н еси́ в Це́ркви Христо́ве/ и причте́н еси́ предсто́ящим Боже́ственному Престо́лу А́гнца,/ закла́ннаго за весь мир.

Богоро́дичен: Лицу́ Твоему́ бога́тии лю́дстии предстоя́т и мо́лятся, Влады́чице,/ и сла́вят Тя и Сы́на Твоего́,/ Его́же родила́ еси́ ра́ди спасе́ния ми́ра и избавле́ния от ско́рби,/ быва́ющия в лю́дех ра́ди грех их,/ подае́ши всем прибега́ющим к Тебе́ ра́дость на земли́ и ра́дость ве́чную,/ Ты бо еси́ Ра́дость всех ра́достей.

Конда́к, глас 4:

Стра́нника и прише́льца прия́т тя страна́ Япо́нская,/ равноапо́стольне святи́телю Нико́лае,/ в ней же испе́рва позна́л еси́ себе́ я́ко чужда́го,/ оба́че теплоту́ и свет Христо́в источа́я,/ прелага́л еси́ враги́ твоя́ в сы́ны духо́вныя,/ и́мже раздая́ благода́ть Бо́жию, созида́л еси́ Це́рковь Христо́ву,/ о ней же ны́не моли́ся,/ и тебе́ бо сы́нове ея и дще́ри взыва́ют:/ ра́дуйся, па́стырю до́брый наш.

И́кос:

Яви́лся еси́, равноапо́стольне святи́телю Нико́лае, в стране́ Япо́нстей,/ нося́ в себе́ о́браз вои́стину Христо́в,/ любо́вию побежда́я сопроти́вныя,/ низлага́я и́дольскую пре́лесть,/ утвержда́я и созида́я Бо́жию Це́рковь,/ порожда́я водо́ю и Ду́хом сыны́ и дще́ри Ца́рствия Бо́жия./ Ны́не ча́да твоя́, о них же мо́лишися,/ сохраня́юще ве́ру Христо́ву, к тебе́ взыва́ют: ра́дуйся, па́стырю до́брый наш.

Песнь 7

Ирмо́с: В пе́щи о́троки неопа́льны соблю́дшаго/ и огнь угаси́вшаго воспое́м, глаго́люще:/ благослове́н еси́, Бо́же оте́ц на́ших.

Ра́дость се́рдцу твоему́ бысть, равноапо́стольне святи́телю Нико́лае,/ егда́ рожда́л еси́ Бо́гу в купе́ли Креще́ния лю́ди но́выя/ и егда́ сы́нове противле́ния от зло́бы к любве́,/ от тьмы ко све́ту,/ от неве́рия к ве́ре прехожда́ху/ и быва́ху но́вы апо́столы пре́жде гони́телие.

Апо́стольски любо́вь твою́ яви́л еси́,/ егда́ врага́, я́ко дру́га, прия́л еси́, Савабе, хоте́вша тя умертви́ти,/ и плени́л еси́ его́ и́стиною в послуша́ние Христо́во/ и нарекл еси́ того́ Па́вла,/ и сотвори́л еси́ его́ христиани́на и свяще́нника Бо́га Вы́шняго,/ и́же благове́стник Ева́нгелия пребы́сть до сме́рти.

Ви́дети лю́ди япо́нския, Христу́ приведе́ны, пла́менне жела́л еси́,/ ра́вный апо́столом Нико́лае,/ сего́ ра́ди ле́та мно́га пребы́л еси́ та́мо,/ науча́яся му́дрости страны́ тоя́,/ и Боже́ственныя глаго́лы преложи́л еси́ в разуме́ние ча́дом твои́м на язы́к их,/ ны́не, предстоя́ Престо́лу Влады́чню, о них моли́ся.

Богоро́дичен: Естества́ уста́вы побежда́ются в Тебе́, Ма́ти Де́во,/ и́бо рожде́ние Твое́ от непло́дных роди́телей пресла́вно есть,/ и Сло́во плоть бысть в чре́ве Твое́м,/ и по сме́рти Твое́й гроб и умерщвле́ние не удержа́ста Тя,/ но Сын Твой пресели́ Тя в пренебе́сная,/ иде́же мо́лишися Ему́ с равноапо́стольным Никола́ем о вселе́нней.

Песнь 8

Ирмо́с: Избави́телю всех, Всеси́льне,/ посреде́ пла́мене благочествова́вшия,/ снизше́д ороси́л еси́/ и научи́л еси́ пети́;/ вся дела́ благослови́те, по́йте Го́спода.

Никола́е святи́телю, апо́столе и праведниче,/ был еси́ ве́рен да́же до сме́рти Христу́ Спа́су,/ призва́вшему тя в вертогра́д Свой,/ подвиза́лся еси́ Его́ ра́ди,/ да сочета́вши ве́тви дивия с Лозо́ю Боже́ственною,/ ны́не, видяще те плодонося́щий,/ велича́ем и благослови́м Его́ во ве́ки.

Апо́стола вои́стину по́двигом,/ А́нгела житие́м,/ нра́вом отца́ чадолюби́ва,/ такова́ ве́даша тя лю́дие япо́нстии,/ и́хже возлюби́л еси́ па́че, не́жели самаго́ себе́,/ и тех ра́ди ле́та мно́га отда́л еси́ благове́стию в них Ева́нгелия/ и возде́лал еси́ сердца́ их, я́ко ни́ву плодоно́сну,/ ны́не в ра́дости ве́чней о них непреста́нно моли́ся.

Па́влу верхо́вному, наро́дов учи́телю,/ подража́л еси́, Нико́лае Богоно́сне,/ себе́ отве́ргся, всем вся был еси́,/ презира́я вся бе́ды и напа́сти,/ учи́л еси́ лю́ди япо́нския зако́ну Христо́вы любве́/ сло́вом и де́лом твои́м,/ Спа́су всех помоли́ся,/ да утверди́т виногра́д, в не́мже труди́лся еси́.

Богоро́дичен: Отрокови́це Богоневе́сто Мари́е,/ родила́ еси́ Иису́са Спа́са,/ обнови́вшаго мир и всего́ обветша́вшаго челове́ка,/ Свои́м воплоще́нием взя́вшаго Себе́ естество́ на́ше,/ Кро́вию безгре́шною омы́вшаго грехи́ на́ши/ и Воскресе́нием вхо́ды ве́чныя жи́зни отве́рзшаго нам.

Песнь 9

Ирмо́с: Сокрове́нное Бо́жие неизрече́нное/ в Тебе́ соверша́ется я́вственно та́инство,/ Де́во Пречи́стая,/ и́бо Бог из Тебе́ воплоти́ся за милосе́рдие./ Те́мже Тя я́ко Богоро́дицу велича́ем.

Собо́ру святы́х соприча́стник,/ подви́жник благоче́стия и ве́ры,/ возвести́тель глаго́лов ве́чныя и́стины,/ пропове́дник спасе́ния ты, свя́те Нико́лае,/ предстои́ши на Небесе́х в жи́зни безсме́ртней твоему́ Спа́су,/ Его́же пропове́дал еси́ лю́дем япо́нским.

Тро́ица Свята́я избра́ тя я́ко сосу́д живоно́сный,/ питие́ жи́зни ве́чныя нося́щий/ всем жа́ждущим пра́вды Бо́жия,/ и напои́л еси́ сы́ны и дще́ри твоя́ и́стинным Богове́дением,/ и напра́вил еси́ стопы́ их путе́м спаси́тельным/ и крести́л еси́ их во И́мя Отца́ и Сы́на и Свята́го Ду́ха.

Оте́ц и учи́тель,/ моли́твенник и наста́вник лю́дем па́ствы твоея́ был еси́, свя́те Нико́лае,/ равноапо́стольне первосвяти́телю Це́ркве Япо́нския,/ сего́ ра́ди сердца́ мно́гих привле́кл еси́ ко Христу́/ и улови́л еси́ их мре́жею любве́ Его́,/ моли́ся о всех, да бу́дут всегда́ с Ним во ве́ки.

Богоро́дичен: Ли́ствием смоко́вным препоя́сана бысть иногда́ Е́ва ра́ди грехопаде́ния,/ Ты же, ря́сны златы́ми оде́яна и преукра́шена Боже́ственными благоле́потами/ ра́ди послуша́ния во́ле Небе́снаго Отца́,/ прама́терь кля́твы и сме́рти изба́вила еси́/ и родила́ еси́ Жизнода́вца ро́ду челове́ческому.

Свети́лен, глас 4:

Осия́ свет Небе́сный тя, челове́ка земна́го,/ и просвети́ся се́рдце твое́,/ и все житие́ Христо́м утверди́ся,/ да после́дуеши Ему́ неукло́нно путе́м спаси́тельным не то́кмо сам,/ но приведе́ши к Нему́ и лю́ди мно́ги.

Сла́ва:

Мо́лимся Тебе́, Небе́сный О́тче,/ про́сим Тя, Сы́не Безнача́льне,/ взыва́ем к Тебе́, Ду́ше Пресвяты́й,/ озари́ нас све́том и́стины и любо́вию Твое́ю,/ я́коже Никола́я, Япо́нскаго апо́стола,/ да вку́пе с ним предста́нем во Ца́рствии ве́чнем.

И ны́не:

Наде́ждо не иму́щих наде́жды,/ Прибе́жище всех су́щих в жите́йстей бу́ри,/ Ма́ти Госпо́дня Непоро́чная,/ услы́ши всех прибега́ющих к Тебе́/ и по́мощи у тебе́ прося́щих,/ не има́мы бо ины́я наде́жды, ра́зве Тебе́,/ не и́мамы ины́я по́мощи.

На хвали́тех стихи́ры, глас 4:

Инноке́нтия иера́рха,/ благове́стника лю́дем сиби́рским и Аме́рики,/ сре́тил еси́, свя́те Нико́лае,/ и от лампа́ды се́рдца его́ прия́л еси́ еле́й апо́стольства,/ той бо укрепи́ в тебе́ ре́вность Бо́жию,/ во е́же пребы́ти в Япо́нии се́ятелем да́же до сме́рти на ни́ве Христо́ве/ лю́дем, Того́ не ве́дущим.

Кладе́зь Бо́жия му́дрости был еси́,/ Нико́лае, апо́столом ра́вне,/ обогати́л еси́ себе́ в Япо́нии позна́нием но́вым/ и приобщи́л еси́ тем лю́ди страны́ тоя́ Христу́ Го́споду,/ наставля́я их, запреща́я и умоля́я/ после́довати Спа́су ми́ра,/ и сконча́л еси́ многотру́дное житие́ твое́,/ возде́лав да́же до сме́рти бразду́ твою́ ра́лом духо́вным/ и се́я се́мя Ева́нгельское.

О́браз Бо́жий соверше́нный яви́л еси́ в себе́,/ Нико́лае святи́телю,/ егда́ возжеле́л еси́/ отъити́ на страну́ дале́че, в преде́лы япо́нския,/ во́лю Небе́снаго Отца́ исполня́я,/ я́ко дре́вле проро́к в се́рдцы твое́м воззва́л еси́:/ Го́споди, се аз, посли́ мене́ к лю́дем, Тебе́ не ве́дущим,/ да послужу́ спасе́нию ве́чному их.

Лампа́ду и́стиннаго Богове́дения/ возже́гл еси́ в стране́ Япо́нстей,/ лю́дие бо ея́ иска́ша прему́дрости и ра́зума и и́стины,/ возсия́вшаго ми́ру Све́та ра́зума,/ И́же просвеща́ет вся́каго челове́ка/ и отверза́ет вхо́ды в жизнь ве́чную.

Архиере́ю, проше́дшему Небеса́, Иису́су,/ предста́л еси́, апо́столом ра́вный, Нико́лае свя́те,/ прине́сл еси́ Ему́ твою́ любо́вь и ве́ру, глаго́ля:/ е́же до́лжен бех, Го́споди, сотвори́ти, соде́ях,/ я́ко служи́тель Твой./ И услы́шал еси́ Того́ сладча́йший глас:/ вни́ди с весе́лием в ра́дость Мою́,/ и прия́л еси́ вене́ц нетле́нныя сла́вы.

Сла́ва, глас то́йже:

Еле́й лампа́ды жития́ твоего́ угаса́ше,/ оба́че весе́лия души́ испо́лнен был еси́,/ я́ко пре́йде нощь идолослуже́ния,/ и возсия́ Христо́с, Со́лнце Пра́вды,/ во стране́ восходя́щаго со́лнца,/ лю́ди бо но́вы приве́л еси́ к Триеди́ному Бо́гу,/ и хра́мы святы́я созда́л еси́,/ обре́л еси́ жизнь ве́чную,/ утверди́ моли́твами твои́ми Япо́нскую Це́рковь.

И ны́не, глас 8:

Влады́чице, приими моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое.

На литурги́и

Блаже́нны от кано́на пе́сни 3-я и 6-я. Проки́мен: Во всю зе́млю изы́де веща́ние их/ и в концы́ вселе́нныя глаго́лы их. Стих: Небеса́ пове́дают сла́ву Бо́жию, творе́ние же ру́ку Его́ возвеща́ет твердь. Апо́стол ко Евре́ем, зача́ло 335. Ева́нгелие от Матфе́я, зача́ло 11. Прича́стен: Во всю зе́млю изы́де веща́ние их и в концы́ вселе́нныя глаго́лы их.

На ма́лой вече́рне.

Да пое́тся после́дование святы́х Симео́на Богоприи́мца и А́нны проро́чицы

На вели́цей вече́рне

На Го́споди, воззва́х: ста́вим стихо́в 8 и пое́м стихи́ры, повторя́юще первыя, пре́жде пра́здника (зри страницу 48).

Стихи́ры святи́теля, глас 2.

Подо́бен: Ки́ими похва́льными венцы́:

Како тя воспе́ти возмо́жем,/ святи́телю Нико́лае равноапо́стольне?/ Дерзну́л бо еси́ ро́дину оста́вити благочести́вую,/ роди́телей, дом и бли́жних,/ и я́коже апо́столи Христо́вы иногда́ отыдти в зе́млю неве́домую и далеча́йшую,/ идеже тя гне́вом и зло́бою срето́ша/ и уби́ти тя хотя́ху/ за не́нависть ко Христу́ и к про́поведи твое́й./ Но посла́вый Христо́с тя соблюде́,/ И́же име́яй ве́лию ми́лость.

Ка́ко воспе́ти тя возмо́жем,/ святи́телю Нико́лае равноапо́стольне?/ Кири́лла бо и Мефо́дия Слове́нских быв учени́к поздне́йший,/ проше́л еси́ путь их те́сный и приско́рбный,/ преложи́в трудо́м вели́ким вся кни́ги благоче́стия правосла́внаго/ и дав япо́нцам сокро́вище безце́нное,/ я́ко да просвеща́ются ве́дением,/ да мо́лятся Бо́гу свои́м си их язы́ком и да процвета́ет среди́ них Це́рковь Христа́ Бо́га на́шего,/ И́же име́яй ве́лию ми́лость.

Ка́ко воспе́ти тя возмо́жем,/ святи́телю Нико́лае равноапо́стольне?/ Увенча бо тя Госпо́дь венцы́ преподо́бия и архиере́йства и апо́стольства:/ отре́кся бо ми́ра,/ всего́ себе́ преда́л еси́ Бо́гу во служе́ние;/ священноде́йствуя же благодаре́ния же́ртву та́йную/ в пи́щу Небе́сную твои́х чад,/ пропове́дал еси́ сло́во Христо́во,/ доводя́ е до разделе́ния чле́нов же и мозго́в слу́шающих;/ со апо́столы же ны́не водворя́яся,/ мо́лишися о нас Христу́,/ И́же име́яй ве́лию ми́лость.

Сла́ва, святи́теля, глас 8:

Восто́к свы́ше Сый,/ Го́споди Иису́се Христе́ Бо́же наш,/ озари́ Све́том Твои́м невече́рним всю страну́ восходя́щаго со́лнца/ и проле́й на всех вразуми́тельную благода́ть Твою́,/ я́ко да умили́вшеся наро́ды вси/ вни́дут во двор о́вчий Це́ркве Правосла́вныя,/ и принесу́т Тебе́ гобзова́ние плодо́в благочести́вых,/ и тем возме́здят труды́ тя́жкия равноапо́стола земли своея,/ святи́теля Никола́я./ Того́ моли́твами спаси́ души всех почита́ющих честну́ю па́мять его́.

И ны́не, пра́здника, глас 6:

Да отве́рзется дверь Небе́сная днесь:/ Безнача́льное бо Сло́во О́тчее,/ нача́ло приим под ле́ты,/ не отсту́пль Своего́ Божества́,/ от Де́вы я́ко Младе́нец четыредесятодне́вен/ Ма́терию во́льне прино́сится в це́рковь зако́нную!/ И Сего́ на руки прие́млет ста́рец,/ отпусти́ зовы́й раба́, Влады́ко,/ и́бо о́чи мои́ ви́деста спасе́ние Твое́!/ Прише́дый в мир спасти́ род челове́чь,/ Го́споди, сла́ва Тебе́.

Вход. Све́те ти́хий. Проки́мен дне и чте́ния святи́тельская (зри страницы 413–415).

На ли́тии стихи́ры пра́здника, я́коже и на стихо́вне, глас 7 (зри страницу 28).

Сла́ва, святи́теля, глас 8:

Святи́телю Нико́лае,/ пожи́в и потруди́вся неуста́нно вся дни живота́ твоего́/ в Япо́нии язы́честей му́дростию и пра́вдою,/ преложи́л еси́ зло́бу люде́й стропти́вых в кро́тость и любле́ние./ Те́мже егда́ сконча́л еси́ по́двиг твой приснопа́мятный/ и преше́л еси́ отсю́ду в ве́чная жили́ща,/ вси воспла́кашася твоего́ лише́ния/ и припа́дают даже до ны́не ко гро́бу твоему/ прося́ще по́мощи моли́тв твои́х,/ и́же до́бре соблю́дшаго заве́т апо́стольский/ и приобре́тшаго я́ко епи́скоп Це́ркве свиде́тельство вне́шних, не то́кмо свои́х./ Не преста́й у́бо назира́я ста́до твое́,/ во е́же креще́нным ча́дам твои́м преспева́ти благоче́стием,/ некреще́нным же умили́тися когда́/ и вни́ти в ло́но Це́ркве Правосла́вныя/ и всем спасти́ся с любо́вию пра́зднующим святу́ю па́мять твою́.

И ны́не, пра́здника, глас то́йже: И́же на Херуви́мех носи́мый: (зри страни́цу 28).

Тропа́рь святи́теля, глас 4:

Я́ко апо́столом соприча́стника в труде́х и возме́здиих/ Це́рковь тя с любо́вию почита́ет,/ святи́телю о́тче Нико́лае равноапо́стольне./ Положи́в бо мно́гими по́двиги нача́ло Правосла́вия в Япо́нии язы́честей,/ умно́жил еси́ в ней ча́да спасе́ния,/ и по кончи́не прия́т тя Бог во оби́тели апо́стол Свои́х по достоя́нию./ Сего́ ра́ди мо́лим тя/ моли́ся Го́сподеви пребы́ти и в пре́дняя де́лу твоему́ незы́блему на ве́ки,/ и ввести́ся в ло́но Це́ркве Правосла́вныя всем поги́бнути иму́щим,/ умири́тися ми́рови/ и спасти́ся душа́м на́шим.

Сла́ва, и ны́не, пра́здника, глас 1:

Ра́дуйся, Благода́тная Богоро́дице Де́во,/ из Тебе́ бо возсия́ Со́лнце Пра́вды, Христо́с Бог наш,/ просвеща́яй су́щия во тьме!/ Весели́ся и ты, ста́рче пра́ведный,/ прие́мый во объя́тия Свободи́теля душ на́ших,/ да́рующаго нам воскресе́ние.

На у́трени.

На Бог Госпо́дь:тропа́рь пра́здника два́жды. Сла́ва, святи́теля, и ны́не, пра́здника.

По 1-ом стихосло́вии седа́лен, глас 8.

Подо́бен: Повеле́нное та́йно:

Повеле́ние свы́ше прие́м в хра́ме Бо́жий,/ е́же идти́ на апо́стольство в Япо́нию,/ и крест и́ноческий и благода́ть свяще́нства,/ во всеору́жии сем оста́вил еси́ ро́дину и отше́л еси́ в да́льнюю зе́млю язы́ческую./ Но по́мощию благода́ти потруди́вся усе́рдно,/ пожа́л еси́ плоды́ ра́дости/ – многия ду́ши спаса́ющихся.

Сла́ва, и ны́не, седа́лен пра́здника, глас 1:

Лик а́нгельский да удиви́тся чудеси́,/ земни́и же гла́сы возопием пе́ние,/ зря́ще неизрече́нное Божие снизхожде́ние,/ егоже бо трепе́щут Небе́сныя си́лы,/ ны́не ста́рче объе́млют руце, Еди́наго Человеколю́бца.

По 2-ом стихосло́вии седа́лен, глас 4.

Подо́бен: Вознесы́йся на Крест:

Вознесе́н быв Бо́гом в сан апо́стола,/ восприя́л еси́ заве́т Христо́в в глубину́ души́,/ и а́гня посреди́ волко́в, ника́коже устраши́ся,/ но креща́я люде́й, и устроя́я це́ркви, и воздвиза́я хра́мы,/ испо́лнил еси́ за́поведь Боголе́пно,/ те́мже и соблюде́ся тебе́ вене́ц пра́вды нетле́нный.

Сла́ва, и ны́не, пра́здника, глас 1.

Подо́бен: Лик а́нгельский:

Сый со Отцем на Престо́ле святем,/ прише́д на зе́млю от Де́вы роди́ся,/ Младе́нец бысть ле́ты Сый неопи́сан,/ егоже прие́м Симео́н на руки, ра́дуяся глаго́лаше:/ ны́не отпуща́еши, Щедре, возвесели́в раба́ Твоего́.

По полиеле́и седа́лен, глас 8.

Подо́бен: Прему́дрость:

Прему́дрость Боже́ственную всоса́в умо́м и се́рдцем в до́ме, хра́ме и учи́лищах Русских,/ был еси́ исто́чник воды́, теку́щия в живо́т ве́чный,/ и идеже аще был еси́, вся напои́л еси́ жи́зни ду́ха окре́ст себе́:/ ты обрати́ япо́нцев в Правосла́вие, нача́в от перваго,/ ты положи́ основа́ние Це́ркве в Япо́нии,/ ты воспева́ем быва́еши днесь по достоя́нию./ Моли́ Христа́ Бо́га преумно́жити де́ло твое́/ и согреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, пра́здника, глас 4.

Подо́бен: Удиви́ся Ио́сиф:

Младе́нствуеши ме́не ра́ди, Ве́тхий де́ньми./ Чище́нием приобща́ешися, чисте́йший Бо́же,/ да плоть уве́риши мне ю́же от Де́вы./ И сим Симео́н поуча́яся,/ позна́ Тя Бо́га я́вльшагося пло́тию,/ и я́ко жизнь лобза́ше и ра́дуяся ста́рчески взыва́ше:/ отпусти́ ме́не, Тебе́ бо ви́дех, Живота́ вся́ческих.

Таже степе́нна, 1-й антифо́н, глас 4:

От ю́ности моея: Проки́мен, глас 4: Уста́ моя́ возглаго́лют прему́дрость и поуче́ние се́рдца моего́ ра́зум. Стих: Услы́шите сия́, вси язы́цы,/ внуши́те, вси, живу́щии по вселе́нней. Вся́кое дыха́ние:Ева́нгелие от Иоа́нна, зача́ло 35.

По 50-м псалме́ стихи́ра самогла́сна, глас 6:

Излия́ся благода́ть во устна́х твои́х,/ святи́телю о́тче Нико́лае,/ е́же пропове́дати Христа́ япо́нцам сло́вом и писа́нием./ И был еси́ па́стырь вернаго ста́да,/ с нимже ку́пно не боя́лся еси́ ма́лости своея,/ па́че же ра́довался еси́ благода́тным нача́лом,/ и кре́пкою наде́ждою возраста́ния,/ и благоволе́нием Отца́ Небе́снаго, да́рующаго Ца́рство./ Того́ моли́твами, Христе́ Бо́же,/ пода́ждь мир и благоче́стие ми́рови,/ и душа́м на́шим ве́лию и бога́тую ми́лость.

Кано́н пра́здника пре́жде (зри страницу 30).

Кано́н святи́теля, его́же краегране́сие: Японие, спаса́йся Правосла́вием.Парфений, глас 1.

Песнь 1

Ирмо́с: Го́рькия рабо́ты изба́влься Изра́иль,/ непроходи́мое про́йде я́ко су́шу./ Врага́ зря потопля́ема,/ песнь я́ко благоде́телю пое́т Бо́гу, чудоде́ющему мы́шцею высо́кою,/ я́ко просла́вися.

Я́коже Моисе́й не убоя́лся еси́ фараони́тских страхова́ний,/ но му́жественно про́йде провести́ род япо́нский чрез мо́ре Креще́ния/ в обетова́нную зе́млю Правосла́вия, Го́сподеви поя́:/ сла́вно бо просла́вися.

Покрыва́ша тя о́блак Бо́жия благода́ти во дни напа́стей,/ в нощи́ же твоея от люде́й оста́вленности свет Боже́ственный тя осиява́ше,/ в тве́рдом терпе́нии Го́сподеви пою́ща:/ сла́вно бо просла́вися.

О́ный Моисе́й даде́ наро́ду своему́ зако́н Сина́йский,/ сей же япо́нскому наро́ду даде́ весь зако́н правосла́внаго благоче́стия,/ я́ко да поуча́ются и возраста́ют, Го́сподеви пою́ще:/ сла́вно бо просла́вися.

Богоро́дичен: Неискусобра́чная Ма́ти,/ не преста́й помога́ющи моли́твами Твоего́ равноапо́стола Никола́я,/ процвета́ти Правосла́вию в Япо́нии,/ умы́тися всему́ наро́ду ба́нею пакибытия́/ и спасти́ся всем пою́щим Го́сподеви:/ сла́вно бо просла́вися.

Песнь 3

Ирмо́с: Пре́жде век от Отца́ рожде́нному нетле́нно Сы́ну/ и в после́дняя от Де́вы/ воплоще́нному безсе́менно,/ Христу́ Бо́гу возопии́м:/ вознесы́й рог наш,/ свят еси́, Го́споди.

И́зо уст твои́х не изы́де велере́чие, смире́н сый,/ но, утверди́в в Го́споде се́рдце твое́,/ вели́кая соверши́л еси́, в терпе́нии взыва́я:/ свят еси́, Го́споди.

Ели́ко противля́хуся сло́ву твоему́ неве́рнии,/ толи́ко па́че утвержда́л еси́ в Го́споде дух твой,/ и не убоя́вся, и вспять не возврати́вся,/ спасл еси́ спасе́ния и́щущих, взыва́я:/ свят еси́, Го́споди.

Свя́тость Божию пропове́дуя и сам ю стяжава́я,/ умили́л еси́ наконе́ц коравосерде́чных/ и мно́жество их приве́л еси́ ко Го́споду, взыва́ющих:/ свят еси́, Го́споди.

Богоро́дичен: Преблагослове́нна еси́, Богоро́дице Де́во,/ Твои́м бо Рождество́м спаса́ются челове́цы вси от пре́лести лука́ваго, взыва́юще:/ свят еси́, Го́споди.

Конда́к пра́здника, глас 1:

Утро́бу Деви́чу освяти́вый Рождество́м Твои́м/ и ру́це Симео́не благослови́вый,/ я́коже подоба́ше, предвари́в,/ и ны́не спасл еси́ нас, Христе́ Бо́же./ Но умири́ во бра́нех жи́тельство,/ Еди́не Человеколю́бче.

И́кос:

К Богоро́дице притеце́м, хотя́щия Сы́на Ея ви́дети, к Симео́ну носи́ма,/ егоже с Небесе́ Безпло́тнии ви́дяще, дивля́хуся глаго́люще:/ чу́дная зрим ны́не и пресла́вная,/ непостижи́мая, несказа́нная./ И́же бо Ада́ма созда́вый но́сится я́ко Младе́нец,/ невмести́мый вмеща́ется на рука́х ста́рчих,/ И́же в не́дрех неопи́санных Сый Отца́ Своего́,/ во́лею опису́ется пло́тию, а не Божество́м,/ Еди́н Человеколю́бец.

Седа́лен святи́теля, глас 8.

Подо́бен: Прему́дрость:

Прему́дростию Боже́ственною просвети́в твою́ душу,/ был еси́ свети́льник на све́щнице всем светяй/ в Япо́нии язы́чеством затме́нной./ И возсия́ денни́ца в сердца́х мно́гих,/ и Со́лнце Пра́вды Христо́с облиста́,/ я́ко да ви́дят Его́ неви́девшии и уве́руют и спасу́тся./ Моли у́бо Христа́ Бо́га о ста́де твое́м/ и прегреше́ний оставле́ние дарова́ти честву́ющим с ве́рою па́мять твою́.

Сла́ва, и ны́не, пра́здника, глас 4.

Подо́бен: Удиви́ся Ио́сиф:

На горе́ Сина́йстей дре́вле ви́де Моисе́й за́дняя Бо́жия,/ и то́нкий Боже́ственный глас сподо́бися во мраце же и ви́хре слы́шати./ Ны́не Симео́н воплоще́ннаго Бо́га непрело́жне нас ра́ди на руки прия́т,/ и ра́достно тща́шеся идти от су́щих зде к животу́ ве́чному,/ те́мже вопия́ше:/ ны́не отпуща́еши раба́ Твоего́, Влады́ко.

Песнь 4

Ирмо́с: Жезл из ко́рене Иессе́ова/ и цвет от него́, Христе́,/ от Де́вы прозя́бл еси́/ из горы́, хва́льный приосене́нныя ча́щи./ Прише́л еси́ вопло́щся/ от Неискусому́жныя, невеще́ственный и Бо́же,/ сла́ва си́ле Твое́й, Го́споди.

Аще и пе́рвее от сама́го себе́ не возжела́л еси́,/ но в хра́ме Бо́жий услы́шав глас Го́спода твоего́, я́ко зове́т тя,/ возде́в руце твои́,/ Той тя препоя́са и поведе́ в да́льнюю страну́ на по́двиг.

Се́де на тя Госпо́дь, я́коже на коня́ кре́пкаго,/ впусти́ тя в Япо́нию и спасе́ние ей бысть ежде́ние Его́,/ Той бо сотвори́ де́ло Свое́ тобо́ю,/ я́коже Богодохнове́нным послу́шником.

Аз – рече́т Япо́ния иногда́ – радуюся и веселю́ся о Го́споде/ я́ко спасе́ние соде́лася мои́х чад досе́ле/и в пре́дняя апо́стольскими труды́ святи́теля Никола́я.

Богоро́дичен: Изми́ нас вла́сти те́мнаго мироде́ржца, Ма́ти Бо́жия,/ просвети́ ны моли́твами Твои́ми в ра́зум благоче́стия/ и спаси́ ны в десны́х стоя́нием Сы́на Твоего́ в день Суда́.

Песнь 5

Ирмо́с: Бог сын ми́ра, Оте́ц щедро́т,/ великаго сове́та Твоего́ А́нгела,/ мир подаваю́ща, посла́л еси́ нам./ Тем, Богоразу́мия к све́ту наста́вльшеся,/ от но́щи у́тренююще,/ славосло́вим Тя, Человеколю́бче.

Свет повеле́ний Бо́жиих возсия́ на земли япо́нстей твои́ми апо́стольскими труды́/ и пра́вде Христо́вой научи́шася та́мо живу́щии́,/ и доброде́тель сотвори́ша по зако́ну/ и И́мя Божие просла́виша.

Я́ко помяну́л еси́ Го́спода в ско́рбех твои́х,/ того́ ра́ди услы́ша тя и помо́же ти/ да преумно́жиши по́двиги твоя́ и кни́ги и чад духо́вных мно́жество.

Преста́ нече́стие среди́ избра́нный па́ствы твоея,/ и апо́стольское вдохнове́ние косну́ся сердец их,/ егда́ бо диа́кон возглаша́ше моли́твы,/ весь умиле́н пад на коле́на моля́шеся в рыда́ниях пред Бо́гом,/ и с ним вся Це́рковь.

Богоро́дичен: Рука́ми носи́вшая Емману́ила, Богоро́дице Чи́стая,/ умоли́ Его́ посла́ти по́мощь Свою́ всемогу́щую ве́рным Свои́м,/ я́ко да с на́ми Бо́га иму́ще,/ поживе́м в благоче́стии и вся́кой че́стности.

Песнь 6

Ирмо́с: Из утро́бы Ио́ну младе́нца изблева́ морски́й зверь,/ я́кова прият./ В Де́ву же все́льшееся Сло́во/ и плоть прие́мшее про́йде, сохра́ншее нетле́нну,/ егоже бо не пострада́ истле́ния,/ Ро́ждшую сохрани́ неврежде́нну.

А́нгел храни́тель тя руковожда́ше на пути́ твое́м терни́стом./ Те́мже кро́тостию Христа́ твоего́ и му́дростию Ду́ха/ враги́ приобре́л еси́ в дру́ги твоя́.

Воева́ше людие друг на дру́га/ – па́ства твоя́ проти́ву ро́дины твоея,/ но Князь ми́ра тя умудри́ держа́тися ме́ры разу́мныя,/ я́коже похвали́ша тя о́бе.

Осла́бы не дава́л еси́ твоему́ те́лу, ни твоему́ ду́ху,/ претружда́я их до конца́,/ до́ндеже де́ло соверши́л еси́ ди́вное,/ я́коже никтоже ин пре́жде тебе́.

Богоро́дичен: Сла́ву Твою́ на земли и на Небеси́, Ма́ти Бо́жия,/ не затми́т змий вели́кий, ни ору́дия его́,/ Ты бо Бо́га родила́ еси́/ и от Него́ благода́ть прия́ла еси́ наступа́ти на всю си́лу вра́жию,/ и вся мо́жеши, ели́ка хощеши.

Конда́к святи́теля, глас 2.

Подо́бен: Тве́рдыя и Боговеща́нныя:

Тве́рдаго и Боговеща́ннаго пропове́дателя Ева́нгелия Твоего́, Го́споди,/ возме́здил еси́ Боголе́пно,/ труды́ бо его́ и боле́зни прия́л еси́ па́че всех жертв зако́нных и всесожже́ний./ Того́ моли́твами соблюди́ нас от неприя́зни.

И́кос:

Не да́де Дави́дски сна очесе́м свои́м,/ ни ве́ждома своима дрема́ния,/ до́ндеже преложи́ япо́нцем все сло́во Твое́, Го́споди,/ Ве́тхаго и Новаго Заве́та,/ и все Твое́ служе́ние, и все Богосло́вие в ме́ру дово́льную/ равноапо́стол Твой, святи́тель Никола́й./ И се ны́не благодаря́ще труды́ его́ неуста́нныя/ Япо́нская Це́рковь Правосла́вная процвета́ет в благоче́стии и мно́жится исполне́нием./ Того́ моли́твами у́бо соблюди́ нас от неприя́зни.

Песнь 7

Ирмо́с: О́троцы благоче́стию совоспита́ни,/ злочести́ваго веле́ния небре́гше,/ о́гненнаго прещения не убоя́шася,/ но, посреде́ пла́мене стоя́ще, поя́ху:/ отцев Бо́же, благословен еси́.

Любо́вию к Бо́гу и людем разжиза́ем,/ не убоя́лся еси́ огня́ зло́бы и не́нависти люде́й стропти́вых,/ но Бо́гом укрепля́ем ше́ствовал еси́ путь твой терни́стый, взыва́я:/ отцев Бо́же, благослове́н еси́.

А́бие по прише́ствии твое́м нача́т язы́к япо́нский изуча́ти,/ я́ко да не иноязы́чник наро́ду бу́деши,/ и дар Пятидеся́тницы апо́стольския получи́в,/ скоро преуспе́л еси́, взыва́я:/ отцев Бо́же, благослове́н еси́.

Всю́ду быва́я и се́мя се́ятеля верга́я,/ Госпо́дню попече́нию с ве́рою предава́л еси́,/ те́мже и преумно́жишася ни́ва трудо́в твои́х плодоноше́нием/ и вку́пе с мно́жеством па́ствы твоея взыва́л еси́:/ отцев Бо́же, благослове́н еси́.

Богоро́дичен: Има́мы Тя предста́тельство непосты́дное к Сы́ну Твоему́ и Бо́гу на́шему, Ма́ти Де́во,/ Имже враго́в сломля́ются мечи́,/ прегреше́ний проще́ние прие́млем и жизнь ве́чную насле́дствуем.

Песнь 8

Ирмо́с: Чу́да преесте́ственнаго/ показа́ о́браз огнеро́сная пещь дре́вле:/ огнь бо не опали́ ю́ныя де́ти,/ Христо́во явля́я безсе́менное от Де́вы Боже́ственное рождество́./ Тем, воспева́юще, воспои́м:/ да благослови́т тварь вся Го́спода/ и превозно́сит во вся ве́ки.

Еди́н противу ты́сящи,/ изше́л еси́ не ору́жием, но кро́тостию и любо́вию, благода́тию же Христа́,/ и победи́л еси́ враги́, и вве́л еси́ избра́нныя в Це́рковь Божию, всех поуча́я:/ да благослови́т тварь вся Го́спода и превозно́сит во вся ве́ки.

Му́дрый зижди́тель быв,/ на тве́рдом камени ве́ры созда́л еси́ Це́рковь Япо́нскую,/ ино́го бо основа́ния никто́же мо́жет положи́ти па́че поло́женнаго Христо́м./ Те́мже на ве́ки утвержде́на тобо́ю воспева́ет:/ да благослови́т тварь вся Го́спода и превозно́сит во вся ве́ки.

Путь вся́кия пло́ти наста́ день и тебе́ проидти́,/ и благослови́в люде́й твои́х, и приобщи́вся Христо́вых Та́ин,/ коне́ц земнаго труда́ прия́л еси́, всех рыда́ти по тебе́ оста́вив,/ и по сме́рти их наставля́я:/ да благослови́т тварь вся Го́спода и превозно́сит во вся ве́ки.

Аще и умерл еси́,/ но жив в Го́споде пребыва́еши чудотворя́ ко гробу твоему́ притекаю́щим и и́мя твое́ призыва́ющим,/ и по всей Япо́нии прино́сиши сла́ву Христо́ву неслы́шным гла́сом вопия́:/ да благослови́т тварь вся Го́спода и превозно́сит во вся ве́ки.

Богоро́дичен: Раба́ Бо́жия смире́нная Цари́ца Небе́сная бысть/ и всех покрыва́ет всемогу́щим предста́тельством Свои́м,/ и всем помога́ет в напа́стех су́щим,/ и всем покрыва́ет согреше́ния ма́тернею любо́вию,/ и всем хода́тайствует спасти́ся.

Песнь 9

Ирмо́с: Неизглаго́ланное Де́вы та́инство:/ Не́бо возсия, и Престо́л Херуви́мский,/ и светоно́сный черто́г показа́ся/ Христа́ Бо́га Вседержи́теля,/ Сию́ благоче́стно я́ко Богоро́дицу велича́ем.

Фимиа́м прино́сим тебе́ пред гро́бом твои́м честны́м,/ я́ко да с кади́лом вку́пе и моли́твы твоя́ возно́сятся вы́ну ко Го́споду/ о преспе́янии вся́ческом па́ствы твоея и вели́кия Япо́нии.

Еди́наго Бо́га пропове́дав вся дни живота́ твоего́,/ Той тя и просла́ви по́двигом апо́стольским и да́ром прозорли́вства/ и жи́знию свято́ю и ве́чным воздая́нием.

На сме́ртном одре́ тела многотру́днаго/ вся Япо́ния тя почте́ вку́пе с царе́м свои́м,/ и да́же до ны́не почита́ет святу́ю па́мять твою́/ и про́сит благода́тныя по́мощи при гро́бе твое́м.

Иису́са И́мя пресла́дкое всегда́ во усте́х и се́рдце име́в при жи́зни,/ Той тебе́ посо́бствова в де́ле и по́двизе,/ и Той тя упоко́и в ве́чных селе́ниих по преставле́нии.

Богоро́дичен: И ны́не, и при́сно, и во ве́ки веко́в сла́ва Твоя́, Богома́ти,/ в ро́ды родо́в челове́ческих, на земли и на Небеси́,/ благодея́ния ра́ди спасе́ния спаса́емых.

Свети́лен, глас 3.

Подо́бен: Ду́хом во святи́лищи:

Ду́ха манове́нием поше́л еси́ в Япо́нию/ и пропове́дав Ева́нгелие злочести́вым,/ приобре́л еси́ Христу́ мно́жества./ Те́мже с любо́вию пра́зднуют па́мять твою́/ и призыва́ют тя я́ко предста́теля своего́ пред Го́сподем.

Сла́ва, и ны́не, пра́здника.

Самоподо́бен:

Ду́хом во святи́лищи предста́в ста́рец,/ на ру́ки восприя́т зако́на Влады́ку, вопия́:/ ны́не соу́з мя плотски́х разреши́,/ я́коже рекл еси́ с ми́ром,/ ви́дех бо очи́ма открове́ние язы́ков и Изра́илю спасе́ние.

На хвали́тех стихи́ры пре́жде пра́здника (зри страницу 55).

Стихи́ры святи́теля, глас 8.

Подо́бен: О, пресла́внаго чудесе́:

О, пресла́внаго чудесе́,/ от камений япо́нскаго идолослуже́ния/ воздвиза́ет Никола́й святи́тель ча́да Авраа́му,/ и Креще́нием святы́м обновля́ет,/ и Це́ркви Правосла́вней приобрета́ет!/ О каковы́й столп Правосла́вия Япо́нии дарова́ся,/ егоже моли́твами, Христе́, спаси́ ду́ши на́ша,/ я́ко еди́н благ и Человеколю́бец.

О, пресла́внаго чудесе́,/ Пятидеся́тницы дар получи́в Никола́й святи́тель,/ не утоми́ся, ниже́ преста до конца́ дней свои́х/ прелага́ти все кни́ги благоче́стия на язы́к япо́нский!/ О каковы́й столп Правосла́вия Япо́нии дарова́ся,/ его́же моли́твами, Христе́, спаси́ ду́ши на́ша,/ я́ко еди́н благ и Человеколю́бец.

О, пресла́внаго чудесе́,/ пра́ведник, аще пости́гнет сконча́тися – в поко́и бу́дет,/ но живы́м сиро́тствующим скорбь и рыда́ние!/ Никола́ю святи́телю преста́вльшуся,/ вся Япо́ния ско́рбию поскорбе́ о лише́нии./ О каковы́й столп Правосла́вия Япо́нии дарова́ся,/ егоже моли́твами, Христе́, спаси́ души на́ша,/ я́ко еди́н благ и Человеколю́бец.

Сла́ва, святи́теля, глас 8:

Дом Воо́зов бога́тый/ кормля́ще нищету́ Ру́фину,/ и Византи́я благочести́вая откорми́ Правосла́вием язы́чествовавшую Болга́рию./ Ны́не же Русь Правосла́вная,/ гобзу́ющи зело́ благоче́стием,/ посла в Япо́нию, ниществу́ющую ду́хом язы́чества,/ единаго то́кмо апо́стола своего́ Никола́я,/ и́же ди́вная сотвори́ поспешеству́ющей ему́ благода́ти:/ пропове́да бо япо́нцам Христа́, крести́ спаса́ющихся,/ положи́ основа́ние кре́пкое Це́ркве, и бысть им во отца́,/ и ти́и примкну́ша к нему́ я́коже де́ти./ И се Це́рковь Япо́нская процвета́ет ны́не и в пре́дняя!/ Того́ моли́твами Христе́ Бо́же, благослови́ ю благослове́нием благостынным,/ я́ко да пребу́дет преспева́ющи во век века.

И ны́не, пра́здника, глас 6:

На рука́х ста́рческих в дне́шний день,/ я́ко на колесни́це херуви́мстей,/ восклони́тися благоволи́вый, Христе́ Бо́же,/ и нас пою́щих Тя страсте́й мучи́тельства призыва́емый изба́ви и спаси́,/ я́ко Человеколю́бец.

Славосло́вие вели́кое и отпу́ст. И быва́ет пома́зание бра́тии еле́ем от лампа́ды святи́теля.

На литурги́и

Блаже́нны от кано́на пра́здника песнь 3-я и святи́теля песнь 6-я. Проки́мен, глас 1-й: Уста́ моя́ возглаго́лют прему́дрость и поуче́ние се́рдца мое́го ра́зум. Стих: Услы́шите сия́, вси язы́цы,/ внуши́те, вси, живущии по вселе́нней. Апо́стол ко Евре́ем, зача́ло 318. Аллилу́ия, глас 2. Уста́ пра́веднаго поуча́тся прему́дрости и язы́к его́ возглаго́лет суд. Ева́нгелие от Иоа́нна, зача́ло 36. Прича́стен: В па́мять ве́чную бу́дет пра́ведник:

Аще ли настоятель восхощет праздновати и день рождения святителя Николая (1-е августа), да поет службу его си́це:

Службы святых 7-ми Маккавеев – на малой вечерни или повечерии. На вели́цей же вечерни, на Господи, воззвах: – 3 стихиры Честнаго Креста и 3 святителя. Слава, святителя, Восток свыше: И ныне, Креста, Егоже древле: На литии поет юже хощет славу святителя. На стиховне же да поет стихиры на Го́споди, воззва́х: и́ли на Всякое дыхание: со стихи сими: Священницы Твои́ облеку́тся в пра́вду и преподо́бнии Твои́ возра́дуются; Моисе́й и Ааро́н воиере́ех Его́ и Самуи́л в призыва́ющих и́мя Его́. Слава, святителя, Святи́телю Никола́е: И ныне, Креста Честнаго: Глас пророка: На благословении хлебов тропарь святителя дважды и Креста́ единожды.

На утрени, на Бог Господь: тропарь Креста дважды. Слава, святителя. И ныне паки Креста. На седальнах первый седален святителя: Повеление свыше прием:

Сла́ва, и ны́не, Богоро́дичен:

Повеле́нное та́йно прие́м в ра́зуме,/ в кро́ве Ио́сифове тща́нием предста Безпло́тный глаго́ля Неиекусобра́чней:/ Приклони́вый схожде́нием небеса́ вмеща́ется неизме́нно весь в Тя,/ егоже и ви́дя в ложесна́х Твои́х, прие́мша ра́бий зрак, ужасаюся зва́ти Тебе́:/ ра́дуйся, Неве́сто Неневе́стная.

Вторый седа́лен святи́теля: Вознесе́н быв:

Сла́ва, и ны́не:

Вознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же./ Возвесе́ли си́лою Твое́ю правосла́вных христи́ан,/ побе́ды дая им на супоста́ты,/ пособи́я иму́щим Твое́ ору́жие, ми́ра/ непобеди́мую побе́ду.

Тре́тий седа́лен святи́теля:

Прему́дрость Боже́ственную:

Сла́ва, и ны́не, Богоро́дичен:

Прему́дрость и Сло́во во чре́ве Твое́м заче́нши нево́льно, Ма́ти Божия,/ ми́ру родила еси́ мир содержа́щаго,/ и во объя́тиях име́ла еси́ вся содержа́щаго, Пищеда́теля всех и Творца́ тва́ри./ Те́мже молю Тя, Всесвята́я Де́во,/ и ве́рою сла́влю Тя изба́витися мне прегреше́ний,/ и в день Суда́, егда́ предстати и́мам пред лице́м Созда́теля моего́, Влады́чице Де́во Чи́стая,/ Твою́ по́мощь тогда́ пода́ждь ми,/ вся бо мо́жеши ели́ка хо́щеши, Всепе́тая.

И про́чая, я́коже подоба́ет по уста́ву, ста́вя кано́н Креста́ вме́сто кано́на Сре́тения. Свети́лен святи́теля, Сла́ва, и ны́не, Креста́. На Вся́кое дыха́ние: стихи́ры три Честнаго Креста́ и 3 святи́теля. Сла́ва, святи́теля: Дом Воо́зов: И ны́не, Честнаго Креста́: Пособивый, Го́споди:

На ма́лой вече́рни

На Го́споди, воззва́х: стихи́ры, глас 1:

Подо́бен: Небе́сных чино́в:

Це́рковь днесь торжеству́ет та́инственно/ в сла́вной па́мяти твое́й, благове́рный кня́же Рома́не,/ и земноро́дных собо́ри пе́сненно ликовству́ют,/ от земли́ к Небеси́ преселе́ние твое́ сла́вяще,/ уго́дниче Бо́жий,/ моли́твенниче о душа́х на́ших.

Неукло́нно, пра́ведне,/ путь жи́зненный ше́ствовал еси́ преподо́бием и пра́вдою,/ жела́я спаса́емых ча́сти получи́ти/ и е́же со А́нгелы пребыва́ния/ и безсме́ртнаго блаже́нства.

Сни́дитеся, о празднолю́бцы,/ днесь в па́мять благове́рнаго кня́зя Рома́на,/ и сию́ вси пе́сненно торжеству́йте:/ той, бо благоче́стия бе подража́тель/ и гра́да У́глеча удобре́ние.

Сла́ва, глас 6. Самогласен:

Ми́ра сего́ княже́ние,/ я́ко не су́щее и привре́менное, бы́ти помышля́я,/ век же о́ный непреходя́щий/ и присносу́щный проразумева́я,/ вся́кий доброде́телей вид испра́вил еси́/ и к Бо́гу ве́ру несумне́нну име́л еси́,/ к поддержа́вным же твои́м ми́лование и любо́вь стяжа́л еси́,/ к ни́щим подая́ние показу́я нелицеме́рное,/ и сих ра́ди доброде́тельных исправле́ний/ в лице́ угождших Ему́ вчини́ тя Христо́с Бог наш,/ име́яй ве́лию ми́лость.

И ны́не, пра́здника.

А́ще ли когда́ пое́ши возсле́дование благове́рнаго кня́зя Рома́на, кро́ме попра́зднства, И ны́не: Богоро́дице, Ты еси́ лоза́ и́стинная:

На стихо́вне стихи́ры, глас 2.

Подо́бен: До́ме Евфра́фов:

Дом и жили́ще Свята́го Ду́ха/ себе́ соде́лал еси́, Рома́не,/ пра́востию ве́ры и благи́ми твои́ми де́лы.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Я́коже друго́му Авраа́му,/ ми́ра сего́ бога́тство не сотвори́ тебе́ препя́тия, о́тче/ к пресла́вному Небоше́ственному пути́.

Стих: Честна́ пред Го́сподем/ смерть преподо́бных Его́.

На земли́ княже́ние име́л еси́,/ бде́нными же моли́твами/ Небе́сное Ца́рствие получи́л еси́,/ в не́мже ны́не живе́ши,/ помина́й нас, ве́рно чту́щих тя.

Сла́ва, глас и подо́бен то́йже:

Те́лом твои́м, свя́те, град Углеч освяти́л еси́,/ душе́ю же твое́ю свяще́нною/ чту́щих па́мять твою́ свы́ше озаря́еши.

И ны́не, глас то́йже:

Свеще́ неугаси́мая,/ Свет Невече́рний в рождестве́ Твое́м поне́сшая,/ просвети́, Влады́чице, сердца́ любо́вию пою́щих Тя.

Тропа́рь пи́сан на вели́цей вече́рни

Сла́ва, и ны́не, пра́здника.

Аще ли вне попра́зднства, Сла́ва, и ны́не, Богоро́дичен: Еже́ от ве́ка утае́нное:

На вели́цей вече́рни

На Го́споди, воззва́х: стихи́ры пра́здника и свята́го, глас 4.

Подо́бен: Зва́нный свы́ше:

Всяк град и страна́, гра́ду У́глечу сра́дуйтеся/ и псало́мски восплещи́те рука́ми вку́пе,/ духо́вное торжество́ пра́зднующе днесь/ благове́рнаго кня́зя Рома́на,/ благоче́стия столпа́ и нече́стия обузда́теля./ В его́же па́мять соше́дшеся,/ любе́зно воззове́м к нему́:/ моли́, свя́те, Его́же возлюби́л еси́, Христа́ Бо́га на́шего/ спасти́ и просвети́ти ду́ши на́ша.

Светообра́зна и Боголюбе́зна,/ ра́достна же и свя́та,/ сла́вная твоя́ па́мять наста́ днесь,/ лучи́ испуща́ет нетле́ния/ и разгоня́ет мглу бед и искуше́ний/ от и́же ве́рою взыва́ющих:/ моли́, свя́те Рома́не, Христа́ Бо́га на́шего/ спасти́ и просвети́ти ду́ши на́ша.

И́же на земли́ А́нгела и на Небесе́х челове́ка Бо́жия,/ празднолю́бцем благо́е украше́ние,/ Рома́на прему́драго пе́сненно вси восхва́лим,/ та́ко бо обы́че пра́веднича па́мять быва́ти,/ е́же с похвало́ю и пра́зднственною по́честию,/ и обы́чно зва́ти к нему́:/ моли́ Христа́ Бо́га на́шего/ спасти́ и просвети́ти ду́ши на́ша.

И́ны стихи́ры, глас то́йже.

Подо́бен: Я́ко до́бля:

Пра́веден и непоро́чен,/ благ и и́стинен,/ отгреба́яся от вся́кия злы́я ве́щи,/ свя́те Рома́не, ты был еси́,/ и таково́е на земли́ твое́ житие́ Небе́снаго граждани́на соде́ла тя/ и изба́вителя от тли и бед/ ве́рою творя́щим всечестну́ю па́мять твою́.

Звезду́ незаходи́мую,/ Русскаго свети́льника,/ и́же пре́жде во благоче́стии кня́зем просия́вшим единоревни́теля,/ А́нгелом совсе́льника/ и преподо́бным сожи́теля,/ свя́те Рома́не, восхваля́ем тя,/ и свято́е твое́ успе́ние пра́зднуем, глаго́люще:/ моли́ изба́вити от тли и бед/ ве́рою творя́щих всечестну́ю па́мять твою́.

Да воспое́тся пе́сненно/ и похвала́ми от земноро́дных да почти́тся/ благове́рный князь Рома́н Богому́дрый./ Днесь в па́мять его́ собра́вшеся, празднолю́бных сосло́вия,/ ра́достно ю торжеству́ем пе́сненными хвала́ми/ и друг ко дру́гу любо́вию.

Сла́ва, глас 6.

Самогла́сен:

Прииди́те, лю́дие,/ треблаже́нному кня́зю Ро́ману пе́сненное принесе́м почита́ние,/ днесь в па́мять его́ соше́дшеся,/ похва́льными пе́сньми воспои́м, глаго́люще:/ ра́дуйся, Русский свети́льниче пресве́тлый,/ ра́дуйся, ве́рою прося́щим пода́телю Боже́ственныя благода́ти,/ ра́дуйся, путеше́ствующим безбе́дный пу́тниче/ и и́же в мо́ри жития́ сего́ вла́ющимся необурева́емое приста́нище,/ о всеблаже́нне Рома́не,/ моли́ся вы́ну ко ца́рствующему все́ми, Христу́ Бо́гу на́шему/ сохрани́ти спасти́ ны от вся́каго прило́га проти́внаго,/ ве́рныя лю́ди Его́,/ сла́вную па́мять твою́ торжеству́ющая любо́вию.

И ны́не, пра́здника.

Аще ли кро́ме пра́здника пое́ши, И ны́не, Богоро́дичен: Кто Тебе́ не ублажи́т:

Вход. Чте́ния 3 преподо́бническая: (зри страницы 339–340).

На литии стихи́ры пра́здника и свята́го, самогла́сен, глас 1:

Ели́цы лю́бящий духо́вная,/ прииди́те, ны́не ликовствова́ние соста́вите,/ и ели́цы грехми́ обремене́ннии, облегче́ние приими́те./ Ели́цы же преутружде́ннии разли́чными неду́ги,/ гото́вое исцеле́ние име́йте,/ вся́кая бо проше́ния, от душе́вных сокро́вищ ве́рою произноси́ма,/ дарова́нием обо́гаща́ются,/ моли́твами благове́рнаго кня́зя Ро́мана,/ его́же ны́не па́мять ве́рно пра́зднуем.

Глас 2:

Кто дово́лен воспе́ти твоя́ до́блести,/ свя́те Рома́не,/ е́же проше́л еси́, на высоте́ княже́ния седя́/ Богоспаса́емаго гра́да У́глеча?/ На сие́ бо тя избра́ Бог,/ я́ко вся прови́дяй,/ да пока́жеши лю́дем о́браз де́телей твои́х/ и просла́виши град твой святы́м житие́м твои́м,/ наипа́че же по сме́рти чудесы́ твои́ми,/ но и ны́не не забыва́й град твой, о́тче,/ и лю́ди, живу́щия в нем,/ я́же к Бо́гу в моли́твах твои́х.

Глас 6:

Блаже́ни роди́телие,/ роди́вший тя, Рома́не,/ блаже́но и ме́сто, воспита́вшее тя,/ блаже́н и преблаже́н град,/ в не́мже ты Богоуго́дне пожи́л еси́/ и в не́мже по успе́нии твое́м честны́м твои́м положи́лся еси́ те́лом./ Но мо́лим тя, свя́те Ро́мане,/ мы, лю́дие твои́:/ не преста́й о нас мольбы́ приноси́ти ко Го́споду,/ е́же изба́витися от бед душа́м на́шим.

Сла́ва, глас 5:

Ра́дуйся и весели́ся о Го́споде,/ Богоспаса́емый гра́де У́глече,/ красу́йся и лику́й, Бо́жия це́рковь,/ име́я в себе́ гроб пречу́днаго отца́ на́шего,/ благочести́ваго кня́зя Рома́на./ Весели́теся о па́мяти его́,/ Богоизбра́ннии Рустии христолюби́вии наро́ди,/ и, соше́дшеся, пе́ньми и пе́сньми взыва́юще, глаго́лем:/ ра́дуйся, уго́дниче Госпо́день и засту́пниче наш те́плый;/ ра́дуйся, в ско́рбех неисце́льных су́щим врачу́ благоиску́снейший;/ ра́дуйся, печа́льми подавля́емым Боже́ственная ра́досте./ И ны́не, венцено́сче преблаже́нне Рома́не,/ не преста́й моли́ти о нас ко Го́споду,/ почита́ющих свято́е твое́ успе́ние,/ и спаси́ град твой от вся́каго зла/ я́же к Бо́гу твои́ми моли́твами.

И ны́не, пра́здника.

А́ще ли кро́ме пра́здника, пое́ши:

И ны́не, Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый и сте́ну необори́мую,/ тве́рдую Предста́тельницу/ и прибе́жище душ на́ших.

На стихо́вне пра́здника, а́ще внутрь попра́зднства, пое́ши, а́ще ли ни, то на стихо́вне стихи́ры, глас 4.

Подо́бен: Дал еси́ зна́мение:

Дал еси́ утвержде́ние гра́ду Твоему́, Го́споди,/ мо́щи Твоего́ раба́, чудотво́рца Рома́на,/ и́хже ра́ди спаса́еши его́ от вра́жиих наве́тов,/ тем безчи́сленное Твое́ милосе́рдие сла́вим,/ Иису́се, Всеси́льне, Спа́се душ на́ших.

Стих: Честна́ пред Го́сподем/ смерть преподо́бных Его́.

Дал еси́ хвале́ние Це́ркви Твое́й, Го́споди,/ мо́щи Твоего́ уго́дника, благове́рнаго кня́зя Рома́на,/ его́же моле́нием сохрани́ ю неодоле́ему а́довыми враты́,/ да Тя вси мы велича́ем,/ Иису́се Человеколю́бче, Спа́се душ на́ших.

Стих: В па́мять ве́чную буде́т пра́ведник/ от слу́ха зла не убои́тся.

Дал еси́ весе́лие лю́дем Твои́м, Го́споди,/ па́мять чу́днаго Рома́на,/ к нему́же ве́рою притека́ющий свобожда́ются от неду́гов неисце́льных,/ душе́вных же и теле́сных,/ Тем Твое́ человеколю́бие сла́вим,/ Иису́се Многоблагоутро́бне, наде́ждо душ на́ших.

Сла́ва, глас 4:

Кто дово́лен воспе́ти твое́ житие́,/ свя́те Ро́мане?/ Челове́к бо на земли́ естество́м быв,/ па́че челове́ка доброде́тели испра́вил еси́:/ извне́ вещми́ бога́т,/ но внутрь нищ ду́хом показа́лся еси́,/ вне́шнее бога́тство до́бре расточи́в на созида́ние домо́в Бо́жиих/ и в ми́лование ни́щих./ Тем, я́ко му́дрый заимода́вец, за о́ная вре́менная и преходя́щая/ ны́не восприе́млеши нетле́нная и присносу́щная блага́я,/ я́же угото́ва Бог лю́бящим Его́./ И́хже и нам получи́ти моли́,/ пе́сненно торжеству́ющим в сла́вней и всечестне́й твое́й па́мяти.

И ны́не, пра́здника.

Аще ли кро́ме пра́здника, И ны́не, Богоро́дичен.

Тропа́рь, глас 4:

От младе́нства яви́лся еси́,/ правове́рный кня́же Рома́не,/ и́збран от Бо́га/ благоче́стия столп необори́м,/ ве́ру непоро́чну соблю́л еси́,/ моли́твами и ми́лостынею и посто́м Бо́гу угоди́л еси́;/ те́мже и по сме́рти яви́ся све́тлость жития́ твоего́,/ исцеля́еши бо неду́ги немощству́ющих,/ ве́рою притека́ющих ко свято́му твоему́ гро́бу./ Сего́ ра́ди вопие́м ти:/ ра́дуйся, уго́дниче Бо́жий Рома́не,/ гра́да У́глеча похвало́ и утвержде́ние.

На у́трени

По 1-м стихосло́вии седа́лен, глас 1.

Подо́бен: Гроб Твой, Спа́се:

Изря́днаго воево́ду и правове́рнаго кня́зя,/ У́глечскаго свети́льника, Рома́на приснопа́мятнаго вси восхва́лим,/ да моли́твами его́ в ми́ре житие́ препрово́дим/ и полу́чим прегреше́ний оставле́ние,/ ве́рно творя́щии святую́ па́мять его́.

Сла́ва, и ны́не, пра́здника.

А́ще ли кро́ме пра́здника, И ны́не, Богоро́дичен, глас 1:

Всех Творца́, и Бо́га, и Соде́теля,/ Всенепоро́чная Чи́стая, Ду́хом Боже́ственным в ложесна́х заче́нши, без истле́ния родила́ еси́./ Его́же сла́вяще, Тя воспева́ем, Де́во,/ я́ко пала́ту Царя́ всех и ми́ру заступле́ние.

По 2-м стихосло́вии седа́лен, глас 8:

Подо́бен: Повеле́нное:

Я́ко звезда́ многосве́тлая,/ светоно́сною па́мятию твое́ю днесь во страна́х Русских возсия́л еси́,/ благове́рный кня́же Рома́не,/ озаря́еши е́ю смы́слы ве́рных/ и отгоня́еши нощь уны́ния,/ дае́ши исцеле́ния ве́рно чту́щим жизнь твою́ сла́вную/ и любоче́стно торжеству́ющим всепра́зднственную па́мять твою́.

Сла́ва, и ны́не, пра́здника.

А́ще ли кро́ме пра́здника, И ны́не, Богоро́дичен, глас 8:

Я́же непреме́ннаго Бо́га поро́ждшая,/ пременя́емое при́сно се́рдце мое́ грехо́м и ле́ностию, прило́гми льсти́ваго/ утверди́, Блага́я, моли́твами ма́терними Твои́ми,/ я́ко да и аз благода́рно сла́влю Тя, Богороди́тельнице Мари́е,/ поми́луй ста́до Твое́, е́же стяжа́ла еси́, Всенепоро́чная.

По полиеле́и велича́ние: Ублажа́ем тя,/ благоверный кня́же Рома́не,/ и чтим святу́ю па́мять твою́,/ ты бо мо́лиши о нас/ Христа́ Бо́га на́шего.

Псало́м избра́нный: Блаже́н муж, боя́йся Го́спода:

Посе́м седа́лен, глас 8.

Подо́бен: Прему́дрости Сло́во:

Со́лнце Пра́вды, Христо́с, дарова́ тя лучу́ гра́ду Своему́ У́глечу,/ благове́рный кня́же Рома́не,/ в не́мже ты святоле́пно пожи́л еси́ в преподо́бии и пра́вде,/ от него́же и в Небе́сныя оби́тели душе́ю твое́ю отше́л еси́,/ и со все́ми святы́ми в весе́лии предстои́ши Пресвяте́й Тро́ице,/ и со дерзнове́нием мо́лишися Ей/ согреше́ний оставле́ние дарова́ти и жития́ исправле́ние/ ве́рою творя́щим всечестну́ю па́мять твою́.

Сла́ва, и ны́не, пра́здника.

По полиеле́и Богоро́дичен, глас 8:

О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме и раю́ слове́сный,/ де́вственная похвало́,/ из Нея́же Бог воплоти́ся и Младе́нец бысть, пре́жде век Сый Бог наш./ Ложесна́ бо Твоя́ престо́л сотвори́/ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь, сла́ва Тебе́.

Та́же степе́нна 1-й антифо́н 4-го гла́са.

Проки́мен, глас 4: Честна́ пред Господем/ смерть преподо́бных Его́.Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Егда́ приспе́ вре́мя е́же к Бо́гу твоего́ отше́ствия,/ тогда́ мно́жество наро́да стеко́шася:/ вси у́бо слез испо́лнени бя́ху,/ ви́дяще своего́ прави́теля/ и благоче́стия люби́теля невозвра́тно отходя́ща от них./ Пла́каху вдо́вы, смотря́юще своего́ засту́пника и возбра́нника оби́дящим их во гро́бе ме́ртва/ и бездыха́нна лежа́ща./ Рыда́ху сиро́ты,/ зря́ще своего́ пита́теля ничто́же к ним веща́юща,/ но усну́вша сном ве́чнаго упокое́ния/ и в землена́я не́дра полага́ема./ И та́ко се́тованно тогда́ они́ те́ло твое́ погребо́ша./ Мы же ны́не, свя́те Рома́не, лю́дие твои́,/ чудесы́ твои́ми удивля́еми,/ ра́достно пра́зднуем всесла́вную па́мять твою́.

Аще внутрь попра́зднства, пое́ши кано́н пра́здника со ирмосо́м на 6. А́ще ли вне: кано́н Богоро́дицы со ирмосо́м подо́бне и свята́го два кано́на на 8. Кано́н свята́го Рома́на, его́же краегране́сие по а́збуке. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

А́гнче Бо́жий и Сло́ве,/ даждь ми сло́во ра́зума и косноязы́чная моя́ уста́ де́йством Свята́го Ду́ха благослове́сия испо́лни,/ да в ра́дости принесу́ пе́ние Твоему́ уго́днику, преблаже́нному Рома́ну,/ и воспою́, ра́дуяся, того́ чудеса́.

Благода́ть испроси́ ми у Христа́, благове́рный кня́же Рома́не,/ в предначина́нии ма́лаго моего́ и недосто́йнаго, к тебе́ приноси́маго моле́ния,/ и просвеще́ние омраче́нному се́рдцу моему́ низпосли́,/ да, ра́дуяся, воспою́ твоя́ чудеса́.

Всех Влады́ки и Бо́га повеле́ния все́ю душе́ю исполня́я,/ ми́лостив, незло́бив и кро́ток на земли́ пожи́л еси́/ и ны́не в земли́ кро́тких живе́ши,/ моля́ся о чту́щих тя и ра́достно сла́вящих твоя́ чудеса́.

Богоро́дичен: Глаго́лы уст пророковеща́тельных коне́ц прия́ша,/ недоразумева́емым и непостижи́мым, на Тебе́ соде́янным стра́шным та́инством, Де́во Влады́чице,/ Его́же бо они́ я́ко Бо́га на зе́млю сни́ти прореко́ша,/ Того́ Ты я́ко Сы́на на пречи́стую Твое́ю руку́ ма́терски понесла́ еси́.

Ин кано́н, его́же краегране́сие: Приноше́ние недосто́йна мона́ха Ге́рмана, глас 8.

Песнь 1

Ирмо́с: Мо́ре огусти́л еси́,/ погрузи́вый со ору́жием го́рдаго фарао́на,/ и лю́ди спасл еси́ немо́кренно, Го́споди,/ и ввел еси́ я в го́ру святы́ни, вопию́щия:/ пои́м Тебе́, Бо́гу на́шему, песнь побе́дную, я́ко просла́вися.

Иису́су: Преклони́ся недоуме́нию моему́, Христе́ мой,/ преклони́вый снизхожде́нием Твои́м Небеса́,/ возвы́си к похвале́нию ум мой, Высокоца́рствуяй Небесы́,/ даждь ми приноше́ния сло́во, О́тчее Единоро́дное Сло́во,/ да возмогу́ воспе́ти па́мять Твоего́ уго́дника,/ его́же Ты Сам, Влады́ко, сла́вна чудесы́ всей Руси́ показа́л еси́/ и и́мже град Твой У́глеч просла́вил еси́.

Раба́ бы́вша мя греха́ моли́твами твои́ми свобо́дна покажи́/ и души́ моея́ сляче́ние испра́ви,/ исцели́вый иногда́ сляче́нныя прикоснове́нием честны́я твоея́ ра́ки,/ благове́рный кня́же Рома́не.

И́же от Бо́га чудесы́ пресла́вно удивля́емь,/ и власть от Него́ на ду́хи нечи́стыя прия́л еси́/ от челове́к ты́я отгони́ти,/ от и́же ве́рою тя на по́мощь призыва́ющих.

Тро́ичен: Неразде́льное Существо́м, несли́тное Ли́цы, вси ве́рнии, славосло́вити потщи́мся/ Пренача́льное Боже́ственное Естество́,/ в трие́х Ипоста́сех разумева́емое/ и во Еди́ном Божестве́ покланя́емое.

Богоро́дичен: Ору́жие пламеннообра́зное, храня́щее пре́жде врата́ Еде́мская,/ не возбраня́ет ны́не вхо́да,/ воплоти́выйся бо из Тебе́, я́ко Челове́к,/ И́же естество́м непристу́пный Бог па́ки дре́внее дае́т мне вхожде́ние.

Катава́сия пое́тся, я́коже уста́в изъявля́ет.

Песнь 3

Ирмо́с: Твоя́ песносло́вцы, Богоро́дице,/ Живый и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве,/ венце́в сла́вы сподо́би.

Ди́вно на земли́ житие́ твое́ и сла́вна па́мять твоя́,/ чудесы́ же твои́ми, благове́рный кня́же Рома́не, удивля́еми есмы́, лю́дие твои́,/ пе́сненное благодаре́ние тебе́ приноша́ем.

Ева́нгельский глас я́ко услы́шав,/ обеща́ющий ми́лостивым на земли́ ми́лость Небе́сную получи́ти,/ и сего́ ра́ди ми́лостив ты, кня́же Рома́не, был еси́,/ за ню́же ны́не восприе́млеши безконе́чное возме́здие.

Живо́т нетле́нный и блаже́нство, не иму́щее конца́,/ на Небесе́х ны́не живе́ши по достоя́нию твоего́ благоче́стия и Богоуго́дных де́телей,/ я́же на земли́ соверши́л еси́.

Богоро́дичен: Змий иногда́ излия́ яд свой во Еде́ме во ушеса́ прама́тери на́шей Е́ве/ е́же сравни́тися Бо́гу яде́нием запове́даннаго бра́шна./ Сему́ же злу сове́ту она́ повину́вшися,/ с родонача́льником изве́ржена Еде́ма бысть/ и рожде́нным от них смерть исхода́тайствова./ Тобо́ю же, Чи́стая Де́во,/ па́ки восприе́млем пе́рвое блаже́нство.

Ин

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бие.

Ше́ствие нога́м изменя́шеся и рука́м осяза́ние,/ животу́ же своему́ ожида́ше сме́ртию поглоще́ну бы́ти/ предстоя́щая иногда́ жена́ у гро́ба твоего́, свя́те,/ но еще́ в наде́жди ду́ха ве́рою возопи́ к тебе́:/ свя́те Рома́не,/ разреши́ мя от ю́зы сея́!/ и а́бие соверше́нное исцеле́ние получи́.

Еле́нь, ловцы́ утружде́нный, на исто́чники водны́я жела́ет;/ утружде́на же бе иногда́ жена́ сляче́нием/ к мы́сленному исто́чнику, ко гро́бу твоему́, кня́же Рома́не, с ве́рою прихо́дит,/ ты же, о́тче, сея́ неду́г здра́вием премени́л еси́.

Тро́ичен: Неразде́льная Тро́ице,/ Еди́нице Триипоста́сная,/ Пренача́льное Боже́ственное Естество́,/ О́тче, и Сы́не, и Ду́ше Святы́й,/ пою́щия Тя сохрани́ от вся́ких бед и искуше́ний.

Богоро́дичен: Иа́ков ле́ствицу Тя предви́де, Пречи́стая Де́во,/ по не́йже Вы́шний Бог сни́де на зе́млю,/ да обожи́т земноро́дныя и совокупи́т их с невеще́ственными Чи́ны/ и сотвори́т ны примире́ны к пре́жде денни́цы Ро́ждшему Его́.

Седа́лен, глас 8:

Исто́чника чуде́с и ве́рных исцеле́ния,/ гра́да У́глеча сла́ву и живу́щим в нем ра́дость,/ во благове́рных князе́х кня́зя Рома́на пречу́днаго пе́сненно вси́ восхва́лим./ Пло́тию бо той а́ще и мертв есть,/ но душе́ю живе́т во ве́ки/ и избавля́ет от неду́г разли́чных прири́чущих к нему́/ и мо́лит Христа́ Бо́га прегреше́ний оставле́ние дарова́ти/ че́ствующим любо́вию святу́ю па́мять его́.

Сла́ва, и ны́не, пра́здника.

А́ще ли вне пра́здника, пое́ши: Сла́ва, и ны́не, Богоро́дичен:

Небе́сную дверь и киво́т,/ пресвяту́ю го́ру, све́тлый облак воспои́м,/ неопали́мую купину́, слове́сный рай,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́ру и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му Рождеству́ Твоему́.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Зна́меньми и чудесы́ просла́ви тя Бог, благове́рный кня́же Рома́не:/ вси, и́же с ве́рою приходя́щии́ к моще́м твои́м,/ исцеле́ния да́ры оби́льно прие́млют/ и ко Просла́вльшему тя взыва́ют:/ сла́ва си́ле Твое́й, Го́споди.

И́же пре́жде тебе́ бы́вшим/ и Богоуго́дно житие́ препрово́ждшим благове́рным князе́м, свя́те Рома́не, поревнова́л еси́,/ с ни́миже ны́не на Небесе́х ра́достно зове́ши:/ сла́ва си́ле Твое́й, Го́споди.

Иа́ковлю ле́ствицу разуме́в, благове́рный кня́же Рома́не,/ явля́емую от земли́ к Небесе́м,/ се́я восхожде́ние стяжа́л еси́ благоче́стием и чи́стым твои́м взыва́нием:/ сла́ва си́ле Твое́й, Го́споди.

Богоро́дичен: Кова́рством и ловле́нии льсти́ваго умертви́хся, Влады́чице Всенепоро́чная,/ оживи́ мя, я́же Живо́т ро́ждшая Боже́ственный и Ипоста́сный,/ да к Тебе́ ве́рою воззову́:/ сла́ва де́вству Твоему́, Ма́ти Безневе́стная.

Ин

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́те:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.

Еди́наго Бо́га па́че всех на земли́ возлюби́л еси́, свя́те Рома́не,/ те́мже и сам от Него́ возлю́блен еси́/ и дар чудотворе́ния по сме́рти твое́й прия́л еси́:/ разсла́бленным да́руеши встягне́ние/ и о́чию лиша́емыя благода́тию Ду́ха Свята́го вооча́еши.

Не исхо́дит тощь, с ве́рою и́же притека́яй к те́бе, кня́же Рома́не,/ ниже́ возвраща́ется посра́млен от любве́ душе́вныя моле́ния принося́й к тебе́,/ но вско́ре прие́млет дарова́ние поле́знаго себе́ проше́ния.

Тро́ичен: Единоче́стный и Трисо́лнечный Све́те,/ Безнача́льное Божество́ и конца́ не иму́щее Ца́рство,/ Бо́же бо́гове, Го́споди,/ пра́во Тебе́ испове́дающия лю́ди Твоя́ и несумне́нно в Тя ве́рующия/ о́гненнаго осужде́ния и про́чих муче́ний изба́ви.

Богоро́дичен: Де́ва во ине́х жена́х доне́леже не роди́,/ по рождестве́ же не де́ва, но уже́ ктому жена́./ Ты же, Пречи́стая Богоро́дице,/ пре́жде рождества́ Де́ва и в рождестве́ Де́ва,/ и па́ки по рождестве́ Де́ву же яви́ Тя воплоти́выйся из Тебе́ Бог.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Люде́й твои́х, пою́щих тя, блаже́нне Рома́не,/ свы́ше ми́лостию твое́ю озари́/ и испроси́ у Бо́га всех/ ве́рным на сопроти́вныя дарова́ти побе́ду,/ на́ше же приими́, требога́те кня́же,/ а́ще и ма́лое сие́, приноси́мое к тебе́ моле́ние.

Многочуде́сне и пресла́вне благове́рный кня́же Рома́не,/ ве́мы, я́ко превосхо́дят твоя́ бы́вшая на земли́ исправле́ния/ ны́нешняго к тебе́ приноси́маго от нас песноплете́ния,/ но па́ки сие́ ве́мы, я́ко не слове́с изви́тия зри́ши ты,/ но ве́ры предложе́ние.

Ны́не пра́зднующия лю́ди святу́ю па́мять твою́, о благочести́ве Рома́не,/ и святу́ю твою́ и чудото́чную обстоя́щия ико́ну ра́дости и весе́лия испо́лни/ и све́том за́поведей Бо́жиих озари́ душе́вная на́ша омраче́ния.

Богоро́дичен: Окая́нную ду́шу мою́, волну́ющуюся в мо́ри жите́йских попече́ний,/ пре́жде да́же не погря́знути ей с корабле́м те́ла моего́ ко дну поги́бели отча́янием,/ Ма́ти Бо́жия, простри́ ми ру́ку по́мощи/ и окорми́ живо́т мой во благооти́шное приста́нище,/ Боже́ственную во́лю Сы́на Твоего́ и Бо́га всех.

Ин

Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны;/ Го́споди, ра́зве Тебе́, ино́го не ве́мы,/ И́мя Твое́ имену́ем.

Обстои́му ви́дя свяще́нную ра́ку твою́ на́ми, ве́рными ча́ды твои́ми,/ и от Тебе́ по́мощи прося́щих,/ свя́те Рома́не, умоли́ Бо́га всех,/ е́же изба́витися нам напа́стей, и иноплеме́нных плене́ния, и вся́ких бед,/ и́ми́же казни́ми от Не́го быва́ем за грехи́ на́ша.

Серде́чное о́ко непомраче́но на земли́, свя́те Рома́не, име́л еси́ сла́вою ми́ра сего́/ и сего́ ра́ди прозри́л еси́ день Госпо́день вели́кий и стра́шный,/ в о́ньже суди́и не по сла́ве суди́ми бу́дут,/ ниже́ суди́мии по оглаго́ланию облича́емы.

Тро́ичен: Тро́ице Свята́я,/ Вседержа́вный Бо́же,/ в Вы́шних трегу́бо песносло́вимый от Безтеле́сных и у́мных слуг Твои́х,/ приими́ песнь и от бре́нных и веще́ственных на́ших усте́н,/ ве́рою и со стра́хом приноси́мую держа́ве Твое́й.

Богоро́дичен: Обветша́вшия ны преступле́нием,/ дале́че от Бо́га отгна́нныя и в смерть попо́лзшияся,/ па́ки возвраща́ет к Себе́ воплоти́выйся из Тебе́ Пребоже́ственный Бог,/ тем вину́ спасе́ния на́шего ве́мы/ и славосло́вим Тя, Пречи́стая Де́во.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Прехва́льному и ди́вному Русскому свети́льнику,/ и́же от Христа́ дар чудотворе́ния прие́мшему, благове́рному кня́зю Рома́ну/ пе́сненныя принесе́м глаго́лы,/ я́ко иму́щему дерзнове́ние ко Святе́й Тро́ице,/ Ю́же и мо́лит от бед спасти́ся нам.

Рома́не кня́же,/ а́ще и в после́дняя ле́та на земли́ пожи́л еси́,/ но пре́жде тебе́ бы́вших благове́рных князе́й че́сти от Христа́ ра́вны сподо́бился еси́,/ е́же Сам Он предрече́, я́ко бу́дут и после́днии пе́рвии.

Све́тлостию дел твои́х просия́л еси́, преподо́бне,/ а́ще гроб и хода́тай забве́ния,/ но и той ника́коже мо́жет скры́ти зарю́ чуде́с твои́х./ Та́ко просла́ви тя Бог, я́ко вои́стинну просла́вил еси́ Его́.

Богоро́дичен: Та́йно Свяще́нная Писа́ния предзнаменова́ша Тя, Пречи́стая:/ Иа́ков ле́ствицу пронарече́,/ Моисе́й купино́ю Тя предви́де,/ Дании́л же го́ру Тебе́ пронаписа́./ Мы же с Гаврии́лом Тебе́ взыва́ем:/ ра́дуйся, Благода́тная, Госпо́дь с Тобо́ю.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

И́же гла́дом ума́ та́ющии,/ я́коже дре́вле Иа́ков со свои́ми ча́ды вре́менною пи́щею,/ слы́шавше и мы изоби́лие вся́каго благодея́ния,/ потщи́мся ити́ ко гро́бу чудотво́рца Рома́на, та́йно вопию́щу:/ и́же в вас безу́мен, да уклони́тся ко мне,/ и ду́ши своя́, я́ко вре́тища, ве́рою разве́рзше,/ напо́лнимся Ду́ха благода́ти.

Не в го́рький и многотру́дный Еги́пет сего́ ра́ди бла́га ити́ нам,/ удуже они́ дре́вле в зе́млю чужду́ идя́ху,/ но ко любе́зней Ма́тери на́шей, Це́ркви,/ ве́село созыва́ющей ча́да своя́ и глаго́лющей:/ прииди́те, яди́те хлеб безсме́ртия/ и пи́йте вино́ безконе́чныя ра́дости,/ и безу́мен той, и́же а́ще кто изы́дет отту́ду а́лчен.

Тро́ичен: А́ще и недосто́йны есмы́, Тро́ице Пребоже́ственная,/ но оба́че приими́ от нас пе́ние, ве́рно зову́щих Ти:/ Свят еси́, О́тче Безнача́льный,/ Свят еси́, Сы́не, Собезнача́льный Отцу́ и Ду́ху,/ Свят еси́, и Ду́ше Святы́й, Равноче́стне Отцу́ и Сопресто́льне Сы́ну,/ Тро́ице, Еди́ный Бо́же, спаси́ ны, гре́шныя рабы́ Твоя́.

Богоро́дичен: Моли́, Пречи́стая Де́во, о нас, непотре́бных рабе́х Твои́х, всех Влады́ку и Го́спода,/ Его́же иногда́, я́ко Сы́на Твоего́, во святы́х Твои́х объя́тиих понесла́ еси́,/ е́же изба́витися душа́м на́шим от вся́каго преще́ния/ и получи́ти ми́лость в час страшнаго испыта́ния.

Конда́к, глас 8:

Я́ко многосве́тлая звезда́,/ всепра́зднственная па́мять твоя́ возсия́ днесь, благове́рный кня́же Рома́не,/ созыва́ющи к похвале́нию лю́ди твоя́,/ пе́сньми славосло́вити честно́е житие́ твое́/ и ве́рно торжествова́ти свято́е твое́ успе́ние,/ в не́мже моли́ся, свя́те, ко Христу́ Бо́гу на́шему,/ е́же изба́витися нам от всех наве́тов вра́жиих,/ да вси зове́м ти:/ ра́дуйся, Рома́не пребога́те, но́вый Русский чудотво́рче.

И́кос:

Сон ле́ности души́ моея́ хода́тайствует му́ку,/ и сласте́й мои́х разжже́ние вжига́ет ми ве́чный пла́мень,/ нощь же уны́ния моего́ уготовля́ет ми тьму, не иму́щую конца́./ Но я́ко скоропослу́шный моли́твенниче ко Христу́ Бо́гу, свя́те Рома́не,/ и вся́каго бла́га незави́стный да́телю,/ сих вино́вных поги́бели бед изба́ви мя/ и научи́ мя воспе́ти святу́ю па́мять твою́,/ я́же свы́ше собира́ет мно́жество А́нгел и до́лу созыва́ет к похвале́нию челове́ки,/ да с ни́ми и аз возглаго́лю, зовы́й тебе́ сицева́я:/ ра́дуйся, на похвалу́ от Бо́га оте́честву твоему́ да́нный;/ ра́дуйся, от младе́нства в сосу́д Ду́ха Свята́го произбра́нный;/ ра́дуйся, са́де при вода́х Ева́нгельских насажде́нный;/ ра́дуйся, Христо́вых повеле́ний после́дователю всеусе́рдный;/ ра́дуйся, апо́стольских преда́ний и́стинный храни́телю;/ ра́дуйся, святы́х жития́м до́брый ревни́телю;/ ра́дуйся, от Бо́га в кня́зя гра́ду У́глечу да́нный;/ ра́дуйся, от Него́ вся́кими благи́ми де́лы одаро́ванный;/ ра́дуйся, я́ко и по преставле́нии чудесы́ град твой назира́еши;/ ра́дуйся, я́ко от неду́гов с ве́рою приходя́щих к тебе́ избавля́вши;/ ра́дуйся, гра́ду на́шему У́глечу хвало́;/ ра́дуйся, от враго́в ему́ необори́мое забра́ло;/ ра́дуйся, Рома́не о́тче, но́вый Русский чудотво́рче.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Ути́ши многомяте́жную душ на́ших бу́рю, благове́рный кня́же Рома́не,/ и разжени́ нощь уны́ния от мы́слей на́ших,/ даждь просвеще́ние душа́м рабо́в твои́х,/ хва́лящих свято́е успе́ние твое́.

У́глеча похвало́ ты еси́, святе Рома́не:/ моли́ся о не́м ко Христу́ Бо́гу,/ сохрани́ти и спасти́ его́ от сыно́в ага́рянских,/ скреже́щут бо они́ на ны, я́ко зве́рие, зубы́ свои́ми,/ но сокруши́ че́люсти их.

Фарисе́ево отве́ржим от себе́ тщесла́вное зия́ние/ и мытаре́ву научи́мся се́рдца сокруше́нию,/ и, та́ко предочи́стивше ду́ши, со стра́хом воззове́м к Зижди́телю:/ О́тче Небе́сный,/ оста́ви нам до́лги на́ша/ моли́тв ра́ди уго́дника Твоего́, Рома́на приснопа́мятнаго.

Богоро́дичен: Херуви́мов честне́йшая и Серафи́мов превы́шшая,/ Предста́тельнице скорбя́щих, Де́во Пречи́стая,/ Всенепоро́чная Неве́сто Творца́ и Ма́ти благоволе́ния О́тча,/ простри́, Влады́чице, к Нему́ пречи́стыя Твои́ дла́ни/ и умоли́ Его́, Всенепоро́чная, я́ко Бо́га всех,/ е́же получи́ти нам ми́лость в день стра́шнаго прише́ствия Его́.

Ин

Ирмо́с: Халде́йская пещь, огне́м распала́емая,/ ороша́шеся Ду́хом, Бо́жиим предстоя́нием,/ о́троцы поя́ху:/ благослове́н еси́, Бо́же оте́ц на́ших.

Обыдо́ша, я́ко пче́лы сот, страсте́й прило́ги смире́нную мою́ ду́шу,/ и душетле́нными сластьми́, я́ко о́стны, отвсю́ду бодо́м есмь,/ но я́же к Бо́гу моли́твами твои́ми, свя́те Рома́не,/ от сих зол изба́ви мя,/ да, ра́дуяся, воспою́ ко Просла́вльшему тя:/ благослове́н еси́, Бо́же оте́ц на́ших.

Не смерть, но сон непщу́ем бы́ти есте́ственных твои́х соу́з разреше́ние./ А́ще бо и измени́лся еси́ те́лом,/ но душе́ю живе́ши во ве́ки/ и избавля́еши от лю́тых ко Христу́ взыва́ющих:/ благослове́н еси́, Бо́же оте́ц на́ших.

Тро́ичен: А́нгелы немо́лчно в Вы́шних песносло́вимый Бо́же, Триипоста́сне Вседе́телю,/ приими́ пе́ние и от нас, недосто́йных рабо́в Твои́х, ве́рно Тебе́ пою́щих:/ благослове́н еси́, Бо́же оте́ц на́ших.

Богоро́дичен: Херуви́мский престо́л показа́лася еси́, Де́во Пречи́стая,/ во объя́тиих Твои́х носи́ла еси́ Невмести́маго все́ми и Неудобозри́маго А́нгельскима очи́ма,/ Того́, Чи́стая, я́ко Сы́на Твоего́ и Бо́га на́шего, моли́ спасти́ пою́щих Тя.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.

От вся́ких прило́г сопроти́внаго сохрани́ лю́ди твоя́ Богоуго́дны, кня́же Рома́не,/ и изба́ви град твой, свя́те,/ и всяк град и страну́ от всех наве́т вра́жиих,/ в ни́хже пою́т от зол тобо́ю изба́вленнии:/ Го́спода по́йте вся дела́ и превозноси́те Его́ во ве́ки.

Царю́ ца́рствующих и Бо́гу вся́ческих ны́не, кня́же Рома́не, в весе́лии предстои́ши/ и я́же отону́дными све́тлостьми Триипоста́снаго Божества́ озаря́ешися;/ моли́ся и о нас, достоблаже́нне и приснопе́тый Богоуго́дниче,/ е́же получи́ти нам селе́ния, иде́же в весе́лии воспева́ют:/ Го́спода по́йте дела́ и превозноси́те Его́ во ве́ки.

Чесо́ ра́ди приско́рбна еси́, душе́ моя́,/ и вску́ю смуща́еши мя?/ Упова́й на Бо́га и притецы́ к благове́рному кня́зю Рома́ну,/ да благода́ть полу́чиши и ско́рбных смуще́ний соверше́нное избавле́ние.

Богоро́дичен: Ши́ршая Небе́с и простра́ннейшая земли́ утро́ба Твоя́ бысть, Де́во Влады́чице./ О́ле чудесе́!/ И́же Невмести́мый все́ми вме́щся во чре́ве Твое́м и произы́де, я́ко Плотоно́сец,/ к Не́муже вся́ческая, я́же на Небеси́ и я́же на земли́, взыва́ют:/ Го́спода по́йте дела́ и превозноси́те Его́ во ве́ки.

Ин

Ирмо́с: А́нгели и Небеса́,/ на Престо́ле сла́вы Седя́щаго/ и я́ко Бо́га непреста́нно Сла́вимаго/ благослови́те, по́йте/и превозноси́те Его́ во ве́ки.

А́нгелы Небе́с свы́ше собира́ет свята́я па́мять твоя́/ и на земли́ челове́ком чудеса́ твоя́ повелева́ет любоче́ствовати, чудотво́рче Рома́не,/ и пе́сньми хвали́ти сла́вное успе́ние твое́.

Град твой, свя́те Рома́не, соблюди́ от вся́ких зол/ и лю́ди, живу́щия в не́м, враго́м стра́шны и нерабо́тны яви́,/ ору́жие же, изощре́нная на ны, вонзи́ в сердца́ враго́в,/ да тя, кня́же, похваля́ем, защи́тника на́шего.

Тро́ичен: Еди́ный Бо́же, в Тро́ице Ипоста́сей пева́емый,/ возьми́ бре́мя от Мене́ неудобоноси́мое прегреше́ний/ и, я́ко Благоутро́бен, поми́луй пою́щия Тя/ и превознося́щая во вся ве́ки.

Богоро́дичен: Роди́выйся из Тебе́ Бог Безле́тный/ благоволе́нием Отца́ Безнача́льнаго и соде́йствием Свята́го Ду́ха/ дарова́ Тя ми́ру избавле́ние/ и спасе́ние пою́щим честно́е Богорожде́ние Твое́/ и превознося́щим во вся ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Щито́м моли́тв твои́х, кня́же присносла́вне Рома́не,/ отжени́ летя́щия на ны стре́лы вра́жия,/ и сохрани́, свя́те, невреди́м град,/ в не́мже похвала́ми пое́тся честна́я па́мять твоя́ и ве́рно сла́вится.

Ю́же получи́л еси́ на Небесе́х ны́не сла́ву благочести́вым на земли́ житие́м твои́м,/ тоя́ и нам получи́ти моли́ вся Могу́щаго/ и испроси́ у Бо́га та́яжде нам зре́ти блага́я,/ и́хже ны́не ты смотря́еши.

О присноблаже́нне, венцеувязе́нная главо́, пребога́те кня́же Рома́не,/ приими́ ма́лое сие́ от непотре́бных мои́х усте́н приноше́ние,/ и прие́м е, осени́ ны светоно́сною твое́ю благода́тию,/ и испроси́ у Бо́га всех нам ми́рное и Богоуго́дное житие́/ и спасе́ние, песнопою́щим тя.

Богоро́дичен: Я́ко прекра́сну пала́ту от всех земны́х родо́в произбра́ Бог пречи́стую Твою́ утро́бу, Чи́стая,/ и, соше́д с Небесе́, всели́ся в Ню, и исцели́ телотле́нный неду́га вред,/ препода́нный зми́ем во Еде́ме прама́тери Е́ве со Ада́мом и рожде́нным от них.

Ин

Ирмо́с: Чу́жде ма́терем де́вство,/ и стра́нно де́вам деторожде́ние:/ на Тебе́, Богоро́дице, обоя́ устро́ишася./ Тем Тя, вся племена́ земна́я,/ непреста́нно велича́ем.

Многожела́нно лю́бящий Небе́сную сла́ву,/ прииди́те, взыгра́им, веселя́щеся,/ и во хвале́нии просла́вим чу́днаго в сове́тех и стра́шнаго в де́лех Го́спода,/ венча́юща по́честьми уго́дников Свои́х.

А́ще и непотре́бна мене́ раба́ и в небре́жении ижди́вша жизнь мою́,/ дерзну́вша принести́ к тебе́ но́вое сие́ моле́ние,/ не возгнуша́йся, рабе́ Жива́го Бо́га,/ от предложе́ния бо души́ принесо́х тебе́ сие́,/ е́же и прии́м, пребога́те Рома́не, пою́щих тя свы́ше назира́й.

Тро́ичен: Не рожде́нна, но Безнача́льнаго Отца,/ рожде́нна же от Него́ Собезнача́льна Сы́на/ и исходя́ща Свята́го Ду́ха,/ Трисия́тельное Ипоста́сьми, сра́сленное же Божество́м влады́чество,/ вся племена́ земна́я, велича́ем.

Богоро́дичен: А́ще и недосто́йне принесо́х Ти таково́е мои́х слове́с изви́тие, Ма́тери Ада́мова Соде́теля,/ но приими́ сие́ с любо́вию, Пречи́стая,/ и принеси́ о мне моле́ние ко всецарю́ющему Сы́ну Твоему́ и Бо́гу,/ да обря́щу от Него́ ми́лость в день стра́шнаго слововоздая́ния.

Свети́лен.

Подо́бен: Жены́, услы́шите:

Сла́вно торжеству́ет град У́глеч в благонаро́читый день твоея́ па́мяти, благове́рный кня́же Рома́не,/ и све́тло красу́ется це́рковь, в не́йже лежи́т честна́я ра́ка твоя́,/ ве́дущи во све́те лица́ Бо́жия сла́вы предстоя́ща тя,/ Ему́же предстоя́, и нас помина́й.

Сла́ва, и ны́не, пра́здника и́ли сей:

А́нгелов удивле́ние, апо́столов сла́во,/ похвало́ му́чеников, утро́бо пречи́стая, Бо́га ро́ждшая,/ кади́льнице чисте́йшая невеще́ственнаго у́гля,/ честно́е селе́ние Божества́,/ в Ню́же О́тчим благоволе́нием Сын всели́ся,/ и Дух Святы́й Богоро́дицу Тя соде́ла.

На хвали́тех стихи́ры, глас 1.

Подо́бен: Небе́сных чино́в:

Благоче́стия сия́теля,/ пресве́тлаго свети́льника,/ гра́ду У́глечу председа́тельствовавшаго Рома́на,/ све́тлаго сла́вою,/ торжеству́ем ра́достно па́мять и ве́рно пра́зднуем.

Светосия́нная чуде́с звезда́,/ река́ исцеле́ний незави́стная,/ граждани́не ра́йских селе́ний,/ У́глеча князь Рома́н Богому́дрый/ пе́ти повелева́ет ве́рою свое́ю к Бо́гу преше́ствия день всечестны́й.

Небе́сных чино́в ра́дование/ и на земли́ челове́ком спасе́ние/ сла́вная твоя́ есть па́мять, преподо́бне,/ помина́й нас, ве́рно торжеству́ющих,/ и моли́ всех Го́спода, во е́же спасти́ся нам.

Сла́ва, глас 8:

Наста́ день ра́достен,/ и пра́здник хода́тайствен спасе́ния./ Днесь похваля́ем пра́ведника,/ и веселя́тся лю́дие в честне́й его́ па́мяти:/ днесь и́же ше́ствовавый стезе́ю присноживо́тия/ и дости́гни по ней гражда́нства Небе́снаго/ призыва́ет почита́ющих его́ к себе́ в честне́м торжестве́ свое́м;/ днесь и́же му́жественно в доброде́телех подвиза́выйся/ и и́стинно во́инствовавый Христо́ви/ поуча́ет и нас, да благи́ми дея́ньми потщи́мся досто́йни бы́ти с ним соводворе́ния./ Те́мже, я́ко соверше́нна челове́ка Божия,/ па́мяти святы́я дости́гше днесь, ве́рнии,/ честну́ю его́ ико́ну лобза́ем стра́хом и ра́достию и глаго́лем:/ о преподо́бне о́тче наш, благове́рный кня́же Рома́не!/ воздежи́ в моле́ние святы́я твоя́ ру́це ко Пресвяте́й Тро́ице,/ да пода́ст благочести́вым на враги́ побе́ду и одоле́ние,/ и христоимени́тым лю́дем от злых свобожде́ние,/ и спасе́ние душа́м на́шим.

И ны́не, пра́здника или́ сей Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие, и про́чее, и о́тпуст.

На литурги́и

Слу́жба преподо́бным о́бща.

На вели́цей вече́рни

На Го́споди, воззва́х: поста́вим стихо́в 8 и пое́м стихи́ры, глас 6.

Подо́бен: Все упова́ние:

Днесь стра́шному и неизрече́нному Христо́ву прише́ствию/ ты, благове́рный кня́же Рома́не,/ всегда́ в животе́ свое́м гото́в был еси́/ чистото́ю, и любо́вию, и многотру́дным терпе́нием,/ и преста́вися с ми́ром к ве́чным оби́телем,/ и предстои́ши пред Бо́гом во ве́ки со А́нгелы/ и святы́ми, Бо́гу угоди́вшими,/ Его́же со дерзнове́нием моли́ о душа́х на́ших.

Был еси́ на земли́ доброто́ю и чистото́ю, я́ко свет,/ а по сме́рти яви́л еси́ нам мощи твоя́/ и излия́л еси́ на нас свои́ми чудесы́ мно́гое милосе́рдие./ Тобо́ю, благове́рный кня́же Рома́не,/ прокаже́нныя очища́ются,/ неду́ги отгоня́ются/ и от разли́чных боле́зней исцеля́юще,/ помоли́ся Христу́ Бо́гу о чтущих святу́ю па́мять твою́.

Кто не почуди́тся или кто не похва́лит,/ слы́шав вели́кую сла́ву по всех стра́нах пресла́вную,/ Бо́гом спаса́емаго гра́да У́глеча,/ велича́ющася и вы́сящася па́че ине́х гра́дов,/ име́я в себе́ бога́тство неоскуде́емо,/ сокро́вище неги́блемо,/ но́ваго чудотво́рца, благочести́ваго кня́зя Рома́на?/ К нему́ же моля́щеся и ве́рно вопие́м:/ Христо́ви моли́ся/ спасти́ и просвети́ти ду́ши на́ша.

И́ны стихи́ры, глас то́йже

Подо́бен: Тридневен:

Прииди́те, христоно́снии лю́дие,/ ви́дим чу́до, вся́каго ра́зума превосходя́щее,/ и, благоче́стно вопию́ще,/ благове́рнаго кня́зя Рома́на восхва́лим,/ и честно́му его́ о́бразу покланя́ющеся,/ и моля́ще спасти́ и просвети́ти ду́ши на́ша.

Я́ко со́лнце незаходи́мое на земли́ луча́ распросте́р,/ и озари́л есть ве́рных сердца́,/ соверша́ющих ве́рно па́мять твою́,/ всеблаже́нне кня́же Рома́не,/ моли́ся Христу́ Бо́гу спасти́ся душа́м на́шим.

Благода́ть твоя́, благове́рный кня́же Рома́не,/ всем ве́рным исцеле́ние душа́м же и телесе́м да́рует,/ тем же тя мо́лим/ в ми́ре соблюсти́ все Правосла́вие,/ да вси тебе́ я́ко и́стиннаго засту́пника и моли́твенника к Бо́гу и́мамы,/ прося́ще тобо́ю прия́ти ми́ра и ве́лию ми́лость.

Сла́ва, глас 6:

Хотя́ Госпо́дь наш, Иису́с Христо́с,/ милосе́рдие Свое́ неизрече́нное показа́ти всем челове́ком,/ благове́рный кня́же Рома́не,/ гра́ду У́глечу дал тя, такова́ кня́зя,/ свя́та и ди́вна де́лы благи́ми в животе́ свое́м,/ а по сме́рти твое́й дал нам неизрече́нную ра́дость/ обрести́ мо́щи твоя́,/ и от Тебе́ прие́млют всегда́ боля́щии здра́вие,/ печа́льнии утеше́ние и бе́днии заступле́ние,/ гла́днии насыще́ние и наги́и одея́ние,/ гре́шнии спасе́ние,/ моли́ся Христу́ Бо́гу о ду́шах на́ших.

И ны́не, Богоро́дичен.

Та́же вход.

Проки́мен дне.

Чте́ния 3 святи́тельская (зри страни́цы 413–415).

На литии́ стихи́ры, глас 5:

Посрами́л еси́ диа́вола,/ благове́рный кня́же Рома́не,/ Богоуго́дным свои́м житие́м/ и бога́тство Небе́снаго Ца́рствия в животе́ свое́м,/ неприкоснове́нно напо́лнив, соблю́л еси́,/ ны́не моли́ся Христу́ Бо́гу на́шему/ о спасе́нии душ на́ших.

О вселюдстии наро́ди,/ возопие́м любо́вию:/ благове́рный кня́же Рома́не,/ непреста́нно воздви́гни ру́це к Бо́гу/ и моли́ся за правосла́вный наро́д и за вся русстии лю́ди,/ изба́вити град наш и вся стра́ны ру́сстии/ от гла́да и пото́па,/ и от наше́ствия иноплеме́нных,/ и от междоусо́бныя бра́ни/ и дарова́ти правосла́вным христиа́нам на враги́ побе́ду и одоле́ние,/ и Це́рквам соедине́ние ми́рно устро́й,/ и моли́ся о душа́х на́ших.

Благочести́вый кня́же Рома́не,/ яви́ся гра́ду своему́ У́глечу/ засту́пник кре́пок и столп непревра́тен,/ благоче́стия степе́нь непоколеби́мый,/ и лю́дем правосла́вным на враги́ посо́бник,/ и всем гра́дом ру́сским забра́ло неруши́мо./ Се у́бо, ди́вный наш врач и спаси́тель,/ Небе́снаго врачевства́ лечбы́ предлага́ет/ де́йствием Свята́го Ду́ха,/ Его́же прие́млет весь род и во́зраст,/ но моли́ся Христу́ Бо́гу на́шему/ о чту́щих святу́ю па́мять твою́.

Сла́ва, глас 8:

Прииди́те, вси людсти́и собо́ри христиа́нстии,/ притецем к многочуде́сному, благове́рному кня́зю Рома́ну,/ У́глечскому чудотво́рцу,/ зря от него́ всегда́ мно́гим боля́щим ско́рое исцеле́ние,/ печа́льным, и бе́дным, и си́рым заступле́ние и утеше́ние,/ благове́рный кня́же Рома́не,/ моли́ Христа́ Бо́га о ду́шах на́ших.

И ны́не, Богоро́дичен.

На стихо́вне стихи́ры, глас 1.

Подо́бен: Небе́сных чино́в:

Я́ко вели́кое со́лнце, яви́ся вселе́нней,/ блаже́нне кня́же Рома́не,/ чудесы́ просвеща́еши весь мир,/ вси у́бо, сше́дшеся, Христа́ воспои́м,/ спаса́ющаго нас от бед моли́твами твои́ми.

Стих: Честна́ пред Го́сподем/ смерть преподо́бных Его́.

Све́том сия́еши Боже́ственный благода́ти,/ пресве́тлый твой пра́здник и ра́достен всем,/ его́ же, ра́дующеся,/ и́скренно вси восхва́лим.

Стих: Что возда́м Го́сподеви о всех,/ я́же воздаде́ ми?

Прииди́те, у́глечестии наро́ди,/ вели́цы и ма́ли,/ восхва́лим, и́же в вас, и́же пре́же кня́жившаго,/ те́плаго предста́теля, но́ваго чудотво́рца,/ блаже́ннаго кня́зя Рома́на.

Сла́ва, глас 1:

Ра́дуйся и весели́ся о Го́споде, гра́де У́глеч,/ и све́тло торжеству́й и лику́й, Це́рковь Христо́ва,/ в не́йже пра́зднуется всечестна́я па́мять/ пресла́внаго но́ваго чудотво́рца,/ благочести́ваго кня́зя Рома́на,/ чудеса́ бо точа́ще всем, приходя́щим с ве́рою,/ прииди́те, ве́рнии, теци́те, собра́вшеся/ и лику́юще, ра́дуйтеся и весели́теся, си́це глаго́лите:/ ра́дуйся, пресла́вный но́вый чудотво́рче,/ блаже́нне кня́же Рома́не,/ гра́ду на́шему утвержде́ние и нам, ве́рным, спасе́ние,/ и ны́не, в па́мяти свое́й, испроси́ у Христа́/ дарова́ти душа́м на́шим мир и ве́лию ми́лость.

И ны́не, Богоро́дичен.

Тропа́рь, глас 4:

Измла́да яви́лся еси́, Богому́дре,/ кня́же Рома́не всеблаже́нне,/ Боже́ственный сосу́д избра́н Бо́гови,/ и ны́не то́чиши нам мно́гая исцеле́ния,/ и вся неду́ги потопля́еши,/ и спаси́ град свой У́глеч,/ и всех ве́рных сохраня́й от неви́димых и ви́димых враг,/ ве́рою, мо́лим, блаже́нне кня́же Рома́не,/ моли́ Христа́ Бо́га спасти́ся душа́м на́шим.

Ин тропа́рь, глас то́йже.

Яви́ся, я́ко звезда́ пресве́тлая,/ благове́рный кня́же Рома́не,/ в Бо́гом пору́ченном ти гра́де У́глече,/ в животе́ свое́м просвети́вся/ воздержа́нием и всено́щным стоя́нием,/ посто́м, и моли́твою, и слеза́ми,/ моляся ко Всеми́лостивому Спа́су за град свой/ и за вся страны́ Ру́сския земли́,/ и по преставле́нии твое́м источа́еши исцеле́ния неоску́дно/ приходя́щим с ве́рою,/ тем же вопие́м ти:/ моли́ Христа́ Бо́га/ спасти́ся душа́м на́шим.

На у́трени

По 1-м стихосло́вии седа́лен, глас 4:

Дости́гл еси́ Христа́ Бо́га на́шего, благове́рный кня́же Рома́не,/ в житии сем су́етном у́зким, и приско́рбным, и тру́дным путе́м ше́ствовав,/ стяжал еси́ Небе́сное Ца́рство во о́ном и в неизрече́нном, в безконе́чном ве́це,/ но моли́ся Христу́ Богу́ о душа́х на́ших.

Сла́ва, и ны́не, Богоро́дичен:

Стена́ непобеди́мая нам, христиа́ном, еси́, Богоро́дице Де́во,/ к Тебе́ бо прибега́юще, невреди́ми пребывающе/ и па́ки согреша́юще, и́мамы Тя моли́твенницу,/ тем, благодаря́ще, вопие́м Ти:/ ра́дуйся, Обра́дованная, Госпо́дь с Тобо́ю.

По 2-м стихосло́вии седа́лен, глас 5:

Уже́ при двере́х день Стра́шный и Суд Госпо́день гро́зный,/ помози́ нам, благове́рный кня́же Рома́не,/ наста́ви нас на путь пра́вый/ и не лиши́ нас на Стра́шном Суде́ десна́го стоя́ния,/ моли́ся о душа́х на́ших.

Сла́ва, и ны́не, Богоро́дичен:

И́же от Де́вы возсия́вый всему́ ми́ру, Христе́ Бо́же,/ и сыны́ Све́ту Тоя́ ради показа́вый, поми́луй нас.

По Многоми́лостиве седа́лен, глас 8:

Духо́вно торжеству́ем в па́мять вели́каго и чу́днаго, благове́рнаго кня́зя Рома́на,/ А́нгели на Небесе́х ра́достно лику́ют,/ но моли́ся Христу́ Бо́гу на́шему о душа́х на́ших.

Сла́ва, и ны́не, Богоро́дичен:

О Тебе́ ра́дуется, Обра́дованная, вся тварь,/ Арха́нгельский собо́р и челове́ческий род,/ Освяще́нная Це́рковь,/ Раю́ слове́сный,/ Де́вственная похвало́,/ из Нея́же Бог воплоти́ся и Младе́нец бысть,/ пре́жде век Сый Бог наш,/ ложесна́ бо Твоя́ Престо́л сотвори́/ и Твое́ же чре́во простра́ннее Небе́с соде́ла, Деви́це,/ о Тебе́ ра́дуется, Обра́дованная, вся́кая тварь,/ сла́ва Тебе́.

Таже степе́нна, глас 4, 1-й антифо́н. Проки́мен: Честна́ пред Господем: Стих: Что возда́м Го́сподеви: Вся́кое дыха́ние: Стих: Хвали́те Бо́га во святы́х: Ева́нгелие от Матфе́я, зача́ло 11.

По 50-м псалме́ стихи́ра, глас 6:

Прииди́те, вси лю́дие,/ хвалу́ принесе́м блаже́нному кня́зю Рома́ну,/ вопию́ще си́це:/ ра́дуйся, благоче́стия и́стиннаго пропове́дниче/ и Це́ркве Христо́ве пресве́тлая звездо́;/ ра́дуйся, пресве́тлый сто́лпе,/ просвеща́я и нас чуде́с светлостьми́;/ ра́дуйся, гра́ду У́глечу све́тлый свети́льниче;/ ра́дуйся, ро́сный о́блаче, пла́мень погаша́ющи страсте́м/ и ороша́ющи ве́рных мы́сли,/ благочести́вый кня́же Рома́не,/ моли́твенниче о душа́х на́ших.

Кано́н Богоро́дицы со ирмосо́м на 6 и свято́му два кано́на на 8.

Кано́н свято́му, глас 6

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

И́же ско́ро всем послу́шный,/ благове́рный кня́же Рома́не,/ призыва́ющим свято́е и́мя твое́/ в беда́х, и в ско́рбех, и в боле́знех разли́чных,/ и всем прося́щим подае́ши ско́рое здра́вие и ра́достное утеше́ние,/ ве́рныя лю́ди ми́лостивно посеща́й.

Взы́де, я́ко светолу́чное со́лнце на высоту́ Небе́сную и осия́юще вселе́нную,/ та́ко и ты, благове́рный кня́же Рома́не,/ Бо́гом пору́ченный ти град У́глеч/ освяти́ и просла́ви весь град,/ и вся лю́ди, живу́щая в нем,/ и вся стра́ны Ру́сския земли́ свои́ми чудесы́.

Ви́димых и неви́димых враг/ и от них вся́каго наведе́ния вра́жия изба́ви нас,/ мо́лимся тебе́, благове́рный кня́же Рома́не,/ от нестерпи́мых бед нас свободи́.

Богоро́дичен: О, Всеми́лостивая Госпоже́ Богоро́дице,/ к Ро́ждшемуся из Тебе́ о нас моли́,/ ско́рби на́ша на ра́дость претвори́.

Ин кано́н, глас 1.

Ирмо́с: Твоя́ победи́тельная десни́ца,/ Боголе́пно в кре́пости просла́вися,/ та бо, Безсме́ртне,/я́ко всемогу́щая проти́вная сотре́,/ изра́ильтянам путь глубины́ новосоде́лавшая.

Благочести́ваго и венчено́снаго кня́зя Рома́на/ по достоя́нию похва́лим,/ чуде́с пода́теля оби́льна,/ спаса́ющаго ду́ши на́ша молитвами своими.

Престо́лу у́бо предстоя́ благода́ти/ и со все́ми А́нгелы ра́дуяся,/ днесь ми́рови исцеле́ния раздае́т бога́тство,/ тем же согла́сно зове́м ему́:/ спаси́ нас моли́твами свои́ми, блаже́нне.

Пе́сньми и пе́ньми восхва́лим блаже́ннаго кня́зя Рома́на/ и, честну́ю его́ и благода́тную па́мять пра́зднующе,/ си́це возопие́м:/ ра́дуйся, гра́ду своему́ У́глечу многосве́тлый свети́льниче и тве́рдый засту́пниче.

Богоро́дичен: Ума́ моего́, Всенепоро́чная, омраче́ние/ све́том Свои́м отжени́ и тьмы изба́ви мя ве́чнующия,/ я́ко да пою́ вели́чия Твоя́.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Благове́рный кня́же Рома́не,/ вси лю́дие пра́зднуют и мно́жество и́ночествующих по́стник покланя́ются тебе́,/ ви́девше от Бо́га да́нныя тебе́ пресла́вныя чудеса́/ ко всем, прося́щим у тебе́ ми́лости.

Мо́лим тя, благове́рный кня́же Рома́не, и взыва́ем ти:/ покая́нию у́прави нас/ и не лиши́ нас душеспасе́ннаго исполне́ния.

Благове́рный кня́же Рома́не,/ убо́гия рабы́ твоя́, во глубине́ грехо́вней пони́кшая, воздви́гни,/ и на стезю́ покая́ния наста́ви нас, и плоды́ израсти.

Богоро́дичен: Кто не сла́вит или кто велегласно не пое́т Тебе́,/ Благове́рная Госпоже́, Пречиста́я Богоро́дица, Ма́ти Бо́жия,/ мо́лим Тя, Милосе́рдая,/ откры́й нам душеспасе́ннаго исполне́ния.

Ин

Ирмос: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нный сла́вы Твоея, Человеколю́бче,

Свети́льник Све́та яви́ся благочести́вый князь Рома́н,/ неду́г и глубо́кую тьму разреша́ющ всегда́,/ и заре́ю све́тлою чуде́с озаря́ет прему́дрый.

Днесь весе́лием ра́дуется Христо́ва Це́рковь,/ в па́мять присноблаже́ннаго кня́зя Рома́на,/ и ве́рою взыва́ющи:/ Ты ми, Христе́, держа́ва и утвержде́ние.

Яко честны́й би́сер, благода́ть твоя́, блаже́нне Рома́не, всем незри́мо низхо́дит/ и разли́чная исцеле́ния неоску́дно подава́ющи.

Богоро́дичен: А́нгел святи́и чи́нове и во́инства Небе́сных Сил/ Твоего́ Сы́на ужаса́ются,/ мо́лим Тя, Милосе́рдая,/ в стра́шный и гро́зный день прише́ствия Его́/ помози́ нам, Влады́чице.

Кондак, глас 8:

Сконча́в до́брый по́двиг,/ и ве́ру соблюде́ в се́рдцы свое́м,/ и вене́ц нетле́нный от Бо́га прия́л еси́,/ блаже́нный кня́же Рома́не,/ и сла́ве Его́ сподо́бился еси́,/ и Престо́лу предста́л еси́ Спа́сову./ Моли́ся Господеви спасти́ град У́глеч и вся гра́ды/ от наше́ствия иноплеме́нных, и междоусо́бныя бра́ни, и пога́ных,/ и твое́ честно́е преставле́ние почита́ющим/ грехо́в оставле́ние дарова́ти/ чту́щим любо́вию святу́ю па́мять твою́.

Икос:

Всечестну́ю и Боже́ственную память чтим/ вели́каго кня́зя Рома́на, уго́дника Христо́ва,/ иже ца́рским венце́м от ю́ности укра́шен/ и пребога́тым да́ром, и ми́лостынею,/ ве́лия власть бысть своему́ Оте́честву, и всей земли́ украше́ние,/ и заступление гра́ду на́шему,/ и от наше́ствия иноплеме́нных изба́вил еси́,/ от злых бед и скорбе́й моли́твою свое́ю./ И си́це рцем:/ ра́дуйся, ни́щим корми́телю;/ ра́дуйся, вдови́цам и сирота́м засту́пниче;/ ра́дуйся, бе́дным утеше́ние;/ ра́дуйся, град свой изба́вивый от враг и моли́твою победи́вый их./ И ныне неви́димо молишися Христу́ Бо́гу, я́ко да зове́м ти:/ ра́дуйся, гра́ду на́шему У́глечу похвало́/ и Оте́честву своему́ славо и утвержде́ние.

Седа́лен, глас 8:

Ско́рый в беда́х уте́шитель и в боле́знех исцели́тель,/ во гра́дех и во страна́х/ вся лю́ди неисче́тною ми́лостию покрови́тель,/ благове́рный кня́же Рома́не,/ моли́ся Христу́ Бо́гу о чту́щих святу́ю па́мять твою́.

Сла́ва, и, ны́не, Богоро́дичен:

Ра́дуйся, Я́же от А́нгела ми́ру ра́дость прие́мши;/ ра́дуйся, Ро́ждшая Творца́ тва́ри;/ ра́дуйся, сподо́бльшаяся бы́ти Ма́ти Христа́ Бо́га.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ Боголе́пно пое́т, взыва́ющи,/ от смы́сла чи́ста о Го́споде пра́зднующи.

Укроти́, благове́рный кня́же Рома́не, злотво́рных челове́к,/ из рук их исхити́/ гони́мых и расхища́емых неми́лостивно.

Смири́ враго́м вознесе́нную вы́ю велере́чующих сове́т,/ злонра́вных сердца́, поуча́ющих на нас по вся дни,/ на тя несть их упова́ния,/ но упова́ют на свой язы́к велеречи́в, язы́к челове́ч,/ ты, благове́рный кня́же Рома́не,/ от таковы́х злотво́рных бед изба́ви.

Вооружи́ся на нас лука́вно враг мечта́нием злым,/ я́коже мече́м погуби́ти хотя́,/ но милосе́рдый кня́же Рома́не,/ защити́ от тех злых и ми́рны их сотвори́.

Богоро́дичен: Кто изочте́т си́лы Твоя́, Чи́стая,/ но пощади́ нас, вы́ими из глубины́ грехо́вныя/ и наста́ви на благо́е покая́ние безвозвра́тно.

Ин

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Заре́ю Трисо́лнечныя благода́ти сия́ет/ све́тлый твой пра́здник, блаже́нне кня́же Рома́не,/ стра́стнаго омраче́ния бесо́вскаго избавля́я/ творя́щих ве́рою па́мять твою́.

Простре́ ум ко Еди́ному Влады́це, блаже́нне,/ и вене́ц нетле́ния от Него́ прии́м,/ сия́ющи све́тлыми све́тлостии и бога́тными дарова́нии,/ иде́же перворо́дных жили́ща.

Источи́л еси́ ре́ки чуде́с, благове́рный кня́же Рома́не,/ ве́рным напоя́юще сердца́,/ и му́тныя во́ды неве́рия изсуши́л еси́.

Богоро́дичен: Влады́чице ми́ру, Богоро́дице, помози нам,/ прелука́вый враг поглота́ет нас зе́льне лю́тыми воспомина́нии и помышле́нии,/ и́же от Бо́га нас разлуча́ют,/ не оста́ви у́бо нас, ниже́ пре́зри нас.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Ускори́, благове́рный кня́же Рома́не,/ отъя́ти от зла неми́лостивых челове́к,/ пленя́ющих и расхища́ющих безве́стно,/ и печа́ль на́шу ра́дованьми раствори́.

Покажи́ ско́рое заступле́ние, благове́рный кня́же Рома́не,/ прося́щим у тебе́ ми́лости,/ я́ко да у́зрят по нас врази́ сопроти́в их борю́щую твою́ си́лу, постыдя́тся.

Благове́рный кня́же Рома́не,/ буди́ нам стена́ тве́рдая,/ бу́ди нам защи́тниче непреста́нный,/ бу́ди нам я́ко оте́ц чадолюби́в,/ бу́ди нам прибе́жище и утвержде́ние.

Богоро́дичен: Богоро́дица, Блага́я Помо́щница,/ из Тебе́ бо нам возсия́ Свет преди́вный,/ тем же Тя, Цари́цу и Влады́чицу всех,/ Ма́терь Зижди́теля тварем, пропове́дуем.

Ин

Ирмо́с: Твой мир даждь нам,/ Сы́не Бо́жий,/ ино́го бо, ра́зве Тебе́, бога не зна́ем,/ И́мя Твое́ имену́ем,/ я́ко Бог живы́х и ме́ртвых еси́.

Яви́ся, я́ко звезда́ све́тлая, непреле́стная, блаже́нне кня́же Рома́не,/ лю́дем благочести́вым побо́рник,/ пле́нным свободи́тель и ни́щим защи́титель, боля́щим врач/ и гра́ду на́шему и всей земли́ Ру́сской утвержде́ние.

Я́ко вели́кое бога́тство щедро́т, блаже́нный кня́же Рома́не,/ явися гра́ду У́глечу безчи́сленное проли́тие ми́лости твоея́,/ ты бо прося́щим ве́рою су́щая цельбы́ подаеши/ и тех просвеща́еши свои́м милосе́рдием, блаже́нне.

Пресве́тлый свети́льник, сия́я во все́м ми́ре, блаже́нный князь Рома́н,/ и во мра́це стра́стне озаря́я всех нас,/ и в Ру́сстей земли́ чудотво́рец яви́ся пресла́вен,/ прося́щим подава́я цельбу́, блаже́нне,/ я́ко да и мы благода́ть исцеле́нием обрета́ем.

Богоро́дичен: Светообра́зна и Христо́в храм, Отрокови́це,/ моли́твами Свои́ми Отцу́ и Сы́ну и Свято́му Ду́ху/ и нас хра́мы сотвори́,/ преподо́бныя содева́юще, Пречи́стая.

Песнь 6

Ирмо́с: Жите́йское мо́ре,/ воздвиза́емое зря/ напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Во́тчину свою́, град У́глеч, и страны́ Ру́сския земли́/ благомилосе́рдо пощади́ и ми́лостивно утверди́,/ мир и любо́вь, и здра́вие, и оби́лие во все́м во всех до́мех сотвори́/ и всегда ра́достно нас посеща́й.

Еди́н аз, гре́шный, и ны́не в ле́ности предлежу́,/ и ум мой во грехи́ глубо́кия впад,/ но ты, благове́рный кня́же Рома́не,/ наста́ви мя на стезю́ пра́вую/ и не оста́ви мя, погиба́ющаго.

Процве́л еси́, я́ко цвет ра́йский, посреди́ Ру́сския земли́,/ уго́дниче Бо́жий, благове́рный кня́же Рома́не,/ жив к Бо́гу свои́ми труды́, посто́м, и моли́твами,/ и нищелю́бием, и нощны́м стоя́нием,/ а по сме́рти боля́щим разли́чными неду́ги,/ печа́льным и бе́дным заступле́ние,/ здра́вие и ра́дость всем подае́ши безпреста́нно.

Богоро́дичен: На Небеси́ Арха́нгели и А́нгели,/ Херуви́ми и Серафи́ми сла́вят,/ а на земли́ вси лю́дие раболе́пно покланя́ются Рождеству́ Твоему́,/ мо́лим Тя: спаси́ ду́ши на́ша.

Ин

Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния./ Спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

От пречестна́го ко́рене израсте́ ветвь пресла́вная,/ благочести́вый кня́же Рома́не,/ благоче́стно на земли́ пожи́в,/ и прия́телище чи́сто Ду́ху Свято́му был еси́,/ просвеща́я вопию́щих ны́не па́мять твою́.

Сохрани́ град свой У́глеч и вся страны Ру́сския земли́,/ благочести́вый кня́же Рома́не,/ от безбо́жных инове́рных нахо́да и от усо́бныя ра́ти,/ всякаго стра́ха и му́ки изба́ви.

Сирота́м и вдови́цам засту́пник,/ и в бе́дах необори́мый помо́щник,/ и всем притека́ющим к тебе́ приста́нище,/ небу́рное и неле́стное оти́шие су́щим во гресе́х.

Богоро́дичен: Вели́чия Тебе́, Чи́стая, сотвори́ Госпо́дь наш,/Его́ же моли́ при́сно возвели́чити и в нас бога́тую Его́ ми́лость,/ Пренепоро́чная Влады́чице.

Конда́к, глас 8:

Красоту́ ми́ра сего́, княже́ние и сла́ву/ я́ко вре́менно помышля́я,/ и сего́ ра́ди благоче́стно в ми́ре пожи́л еси́,/ блаже́нне кня́же Рома́не,/ ми́лостынею и моли́твами Бо́гу угоди́в,/ и по преставле́нии свое́м чуде́с дар прии́м от Христа́ Бо́га,/ и свети́льник яви́ся пресве́тлый,/ просвеща́я свои́ми чудесы́, приходя́щим к тебе́ с ве́рою здра́вие подаеши и от бед избавля́еши./ Тем же Христо́ва Це́рковь пе́сньми сла́вит тя,/ благочести́вый кня́же Рома́не,/ гра́ду своему́ У́глечу вели́кий побо́рниче.

И́кос:

Го́споди, отве́рзи ми устне́ и язык мой,/ умили́ се́рдце мое́ и напо́лни ду́ха смиренному́дрия,/ да возглаго́лю и воспою́ Твоего́ уго́дника,/ но́ваго чудотво́рца, благове́рнаго кня́зя Рома́на:/ ра́дуйся, благочести́ваго ко́рене пречестна́я о́трасль;/ ра́дуйся, ма́тере благогове́йны ветвь прекра́сна и пресла́вна;/ ра́дуйся, честны́й сосу́де Свято́му Ду́ху;/ ра́дуйся, я́ко на Небеси́ со А́нгелы живе́ши;/ ра́дуйся, целому́дрия сто́лпе, и́мже бесо́вская шата́ния искорени́шася;/ ра́дуйся, свети́льниче многосве́тлый, чуде́с сия́ния вселе́нную просвеща́еши;/ ра́дуйся, пра́ведным Боже́ственное наслажде́ние;/ ра́дуйся, гре́шным спасе́ние и леня́щимся к Бо́гу дерзнове́ние;/ ра́дуйся, град свой У́глеч и живу́щая в не́м лю́ди спасл еси́ от бед и злых скорбе́й;/ ра́дуйся, крестоно́сным лю́дем похвало́ и утвержде́ние;/ ра́дуйся, земли Ру́сской засту́пниче и забра́ло неруши́мое;/ ра́дуйся, гра́ду на́шему У́глечу вели́кий побо́рниче.

Песнь 7

Ирмо́с: Росодательну у́бо пещь/ содела А́нгел/ преподо́бным о́троком,/ халде́и же опаля́ющее/ веле́ние Божие мучи́теля увеща вопи́ти:/ бла́гословен еси́, Бо́же оте́ц на́ших.

Мо́лим тя, благове́рный кня́же Рома́не,/ виждь на́шу нестерпи́мую печа́ль, и боле́зни,/ и ско́рби, и стра́сти,/ но умилосе́рдися, от всех бед свободи́;/ благослове́н Бог оте́ц на́ших.

Показася гра́ду Углечу, я́ко свети́ло негаси́мое,/ благове́рный кня́же Рома́не,/ доброде́тельми свои́ми просвети́л еси́ всех нас/ и, трудолю́бным житие́м на земли́ пожи́в,/ сего́ ра́ди всели́ся во оби́тель Небе́снаго Ца́рствия;/ благослове́н Бог оте́ц на́ших.

Ра́дуйся, благове́рный кня́же Рома́не,/ просвети́вше свои́ми чудесы во́тчину свою́, град Углеч,/ и страны́ Русския земли́;/ ра́дуйся, победи́вше диавола,/ и посрами́вше житие́ ны́нешняго су́етнаго све́та,/ и обре́тше неизрече́нную благода́ть от Бо́га/ в безконечном во о́ном ве́це со А́нгелы и святы́ми;/ благослове́н Бог оте́ц на́ших.

Богоро́дичен: Надеждо всем, Госпоже́ Богоро́дице,/ разгони́, Влады́чице, враги́ души́ мое́й/ и напра́ви на стезю́ пра́ву,/ пощади́, Помо́щнице и Надеждо христиа́нская;/ благослове́н Бог оте́ц на́ших.

Ин

Ирмо́с: Тебе́, у́мную, Богоро́дице, пещь,/разсмотряем, ве́рнии,/ я́коже бо о́троки спа́се три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Во всех стра́нах про́йде веща́ние,/ я́ко гра́ду Углечу яви́ся чудотво́рец пресла́вен,/ дару́ющий мно́жество исцеле́ний всем, приходя́щим к нему́ и ве́рою пою́щим его́;/ отце́м Бог благослове́н еси́.

Чудесы́ у́бо свои́ми, я́ко цвет, процве́л еси́, блаже́нне,/ исцеле́ния подае́ши притека́ющим к тебе́,/ Богому́дре и досточу́дне кня́же Рома́не,/ отце́м Бог благослове́н еси́.

Се ны́не стеко́шася от всех гра́дов и стран ве́рующие людие,/ ра́дующеся вку́пе, хвалу́ возда́ти тебе́, Богоблаже́нне Рома́не;/ отце́м Бог бла́гословен еси́.

Богоро́дичен: Тебе́, Всесвята́я и Чи́стая Госпоже́ Богоро́дице,/ раб и Твой, всегда́, во дни и в но́щи, мо́лимся сокруше́нною мы́слию,/ прося́ще избавле́ния по́дати согреше́нием Твои́ми моли́твами;/ отце́м Бог благослове́н еси́.

Песнь 8

Ирмо́с: Из пла́мене преподо́бным росу́ источи́л еси́/ и пра́веднаго же́ртву водо́ю попали́л еси́:/вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Ра́достный нам вели́кий и све́тлый пра́здничный день возсия́/ в Богоспаса́емом гра́де У́глече,/ в день пра́здника основа́ния хра́ма во и́мя Преобра́жения Го́спода на́шего Иису́са Христа́/ и обрете́ние твои́м многочуде́сным моще́м,/ Его́ же превозно́сим, Го́спода, во ве́ки.

День Госпо́день всегда́ пред очи́ма зря/ и всегда́ во уме́ свое́м держа́,/ кто в ны́нешнем житии́ не у́зрит сме́рти,/ и Богоуго́дно и смиренному́дренно пожи́в,/ и с ми́ром к Бо́гу отъи́де,/ Его́ же превозно́сим, Го́спода, во ве́ки.

В день восше́ствия твоего́ на Небеса́ ко Го́споду Бо́гу,/ благове́рный Рома́не,/ Арха́нгели, А́нгели, Херуви́ми и Серафи́ми,/ и вся святы́я, от ве́ка Бо́гу угоди́вшия,/ неизрече́нною ра́достию тебе́ срето́ша,/ а мы, гре́шнии, про́сим у тебе́ ми́лости:/ изба́ви нас от всех скорбе́й и не лиши́ нас душеспасе́ннаго исполне́ния.

Богоро́дичен: О, Влады́чице,/ непремо́лчно Тебе, Ма́терь Бо́жию, пою́т велегла́сно Арха́нгели и А́нгели,/ и вси́ ро́ди человечести́и покланя́ются,/ и дай, Де́во, избыти Тобо́ю тле́нное существо́,/ ра́дуйся, Обра́дованная, Госпо́дь с Тобо́ю,/ Его́ же превозно́сим, Го́спода, во ве́ки.

Ин

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие;/ и превозноси́те во вся ве́ки.

Струя́ происхо́дит от благода́ти твое́й,/ блаже́нне кня́же Рома́не, исцеле́ний вся́ких,/ и омыва́ет скве́рны страсте́й, и гное́ния лю́тых очища́ет,/ всех ве́рных напоя́ет сердца́ любо́вию чту́щих тя, пресла́вне,/ Го́спода по́йте и превозноси́те Его́ во ве́ки.

Хвала́ми досто́йными воспе́ти пресла́внаго чудотво́рца/ ум и смысл дару́й ми, Христе́ Бо́же,/ я́ко да пою́, ра́дуяся, па́мять его́,/ Го́спода по́йте и превозноси́те Его́ во ве́ки.

Днесь спасе́ния пра́здник весе́лию на́ста,/ стецемся, вернии, очи́стивше вку́пе ду́ши и телеса́,/ се бо нас призыва́ет князь Рома́н Боже́ственный,/ Го́спода по́йте и превозноси́те Его́ во ве́ки.

Богоро́дичен: Уврачу́й, Пречи́стая, стра́сти се́рдца моего́,/ рождшая всех Царя́,/ и пра́ведный че́сти яви́ мя, прича́стника,/ Богоро́дице Де́во, Христа́, Сы́на Своего́ умоли́вше,/ Го́спода воспевайте дела́ и превозноси́те Его́ во ве́ки.

Песнь 9

Ирмо́с: Бо́га/ челове́ком невозмо́жно ви́дети,/на Него́же не сме́ют чини́ А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́1и/ Тя ублажа́ем.

Сохрани́ от бед, благове́рный кня́же Рома́не,/ принося́щих ти сию́ ма́лую мольбу́,/ и от пото́па страсте́й,/ и всякаго наве́та, и злотво́рных челове́к избави.

Просвети́лся еси́, благове́рный кня́же Рома́не,/ я́ко со́лнце, свои́ми чудесы,/ дающе всем исцеление,/ благи́м и гре́шным, невозвра́тно.

Дерзнух многогре́шный аз и недосто́йный/ се написа́ние проглаголати тебе́,/ благове́рный кня́же Рома́не,/ приими́ с ми́лостию и покры́й мя/ неистощи́мыми свои́ми щедро́ты.

Богоро́дичен: Безнача́льнаго Роди́теля Собезнача́льну Сы́ну Ма́ти,/ Всекрасная И́збранная Пречи́стая Отрокови́це Мари́е,/ пою́щих Тя возвесели́,/ и ма́лое сие́ моле́ние Сы́ну Своему́ и Бо́гу на́шему проповеждь,/ и от вся́ких бед свободи́,/ и не лиши́ ме́не зре́ния Сы́на Своего́ и Бо́га на́шего,/ на стра́шном Суде́ ста́ти на десно́й стране́,/ и не отвержи ме́не от Престо́ла Бо́жия.

Ин

Ирмо́с: О́браз чистаго рождества́ Твоего́,/ огнепали́мая купина́ пока́за неопальная,/ и ны́не на нас напа́стей свирепе́ющую угаси́ти, мо́лимся, пещь,/да Тя, Богоро́дице,/непреста́нно велича́ем.

Яви́ся вели́к щит и вели́ка кре́пость земли́ Русстей,/ блаже́нный князь Рома́н,/ людем православным похваление во всех языцех,/ ны́не мо́лим ти ся сохрани́ти страну́ Ру́сскую от ва́рварскаго нахожде́ния,/ и от плене́ния иноплеме́нных,/ и от междоусобныя бра́ни, и от всякаго зла.

Кра́сен душею и те́лом и, благоче́стием сия́я,/ славне кня́же Рома́не,/ Боже́ственна испо́лни ра́зума и прему́дрости,/ орга́н Свята́го Ду́ха был еси́ по сме́рти/ и безсмертней жи́зни и нескончаемому блаже́нству прише́л еси́, радуяся.

Углечестии народи́, прииди́те,/ собери́теся вси в це́рковь святу́ю,/ ко многоцелебному и пресла́вному но́вому чудотво́рцу,/ благове́рному князю Рома́ну,/ со слеза́ми велегла́сно воззови́те:/ о угодниче Бо́жий, блаженне кня́же Рома́не,/ изба́ви град и лю́ди своя́,/ не дай же достоя́ния твоего́ ро́ду измаильтеску/ и междоусобныя бра́ни, и от всякаго зла сохрани́,/ да должно́ воспое́м милость твою́, святый.

Богоро́дичен: Неизрече́нно та́инство,/ Ты бо Престо́л Херуви́мский и Светоно́сный Черто́г показася Вседержи́теля Бо́га,/ и возопием к Ней уми́льным гла́сом:/ о, Пресвята́я Госпоже́ Богородице,/ от вся́ких бед и скорбе́й нас сохрани́/ и вечныя избави му́ки,/ Ю́же благочестно, я́ко Богоро́дицу, велича́ем.

Свети́лен:

Всели́ся в сердцы твое́м, благове́рный Рома́не, ко́рень благ/ и расплоди́ в тебе́ неоскудныя к Бо́гу многоподви́жныя труды́/ и добро́ту ко всем челове́ком,/ моли́ся о ду́шах на́ших.

Ин свети́лен:

Ра́дуйся, Бо́гом и́збранный, благочести́вый кня́же Рома́не,/ людем правосла́вным похвала́ и во́ином соблюде́ние,/ и ва́рваром побеждение, и в бе́дах необори́мый помо́щник,/ и гра́ду Углечу утвержде́ние.

Богоро́дичен:

Просла́вим Ма́терь Бо́га на́шего,/ пре́жде рождества́ пребы́сть Де́ва, Ма́ти Сы́на Божия,/ и по рождестве́ Де́ва яви́ся,/ ра́дуйся, Обра́дованная, Госпо́дь с Тобо́ю.

На хвали́тех, стихи́ры самогла́сны, глас 6:

Кре́пко во уме́ свое́м держа́ ты, благове́рный кня́же Рома́не,/ Божие сло́во во Ева́нгелии:/ кто хощет вели́к быти, да бу́дет всем слуга́./ И по сему́ словеси́ ты житие́ свое́ соверши́л еси́/ при животе́ свое́м неукло́нно к Бо́гу,/ труды́ и добродетель ко всем челове́ком име́л еси́,/ сего́ ра́ди по сме́рти во Ца́рствии Небеснем со А́нгелы ли́куеши,/ моли́ся Христу́ Бо́гу о ду́шах на́ших.

Ра́дуйся, благове́рный кня́же Рома́не,/ я́ко со́лнце, сияеши свои́ми чудесы во всей Руси́и,/ ра́дуйся, я́ко цвет прекра́сный, процве́л еси́/ во гра́де Углече свои́ми щедро́ты,/ моли́ся Христу́ Бо́гу о ду́шах на́ших.

Бога́тство неизрече́нное обре́л еси́, гра́де Углеч,/ воистинну еси́ бога́т,/ таковый свети́льник в тебе́ возси́я,/ благове́рный князь Рома́н,/ засту́пник тве́рдый яви́ся гра́ду своему́,/ моли́ся Христу́ Бо́гу/ о чтущих святу́ю па́мять твою́.

Избра́л еси́ бога́тство Небе́сное,/ изво́лил храни́ти Госпо́дни за́поведи,/ оста́вил еси́ земна́я Христа́ ра́ди/ и на Небеси́ со А́нгелы ликуеши,/ всеблаженне кня́же Рома́не,/ моли́ся Христу́ Бо́гу/ о творя́щих святу́ю па́мять твою́,

Сла́ва, глас 8:

Прииди́те, людие,/ покло́нимся и припаде́м ко свято́му благове́рному князю Рома́ну,/ той нас свободи́т от рук неве́рных язы́к и злотво́рных челове́к,/ и из рук ненави́стных моли́твами его́ свободи́мся.

И ны́не, Богоро́дичен по гла́су.

Славосло́вие вели́кое. И отпу́ст.

На литурги́и

Блаже́нны от обою́ кано́нов, пе́сни 3-я и 6-я. Проки́мен: Честна́ пред Го́сподем: Апо́стол к Кори́нфяном, зача́ло 151. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник: