На Го́споди, воззва́х: стихи́ры, глас 1.

Подо́бен: Небе́сных чино́в:

Со Безпло́тными совокупи́лся еси́,/ земли́ живы́й,/ и с ни́ми непреста́нно слу́жиши Тро́ице, о́тче Богоблаже́нне./ Те́мже при́сно, я́ко Небе́сный челове́к, живы́й в Вы́шних,/ тайнонауча́еши су́щия не земли́/ Боже́ственным та́йнам.

Христо́ва де́лания розга́ Богонасажде́нная,/ слове́сныя Боже́ственныя предлага́я гре́зны,/ яви́лся еси́, Богоблаже́нне,/ от них же честну́ю почерпа́ем сла́дость ве́рно/ и се́рдцем во вселе́нную поуче́ния твоя́ прино́сим.

Боже́ственным сия́нием озаря́емь,/ огне́м веще́ственным снеда́емо те́ло,/ к невеще́ственней преста́вился еси́, о́тче, зари́,/ и даждь разреше́ние моли́твами твои́ми,/ страсте́й мра́чную нощь просвеща́я,/ му́дре, душ на́ших.

Сла́ва, и ны́не, Богоро́дичен.

Подо́бен то́йже:

Прегреше́ний пучи́ною обурева́емь,/ к ти́хому приста́нищу прибе́г,/ Пречи́стей моли́тве Твое́й,/ Богороди́тельнице, взыва́ю Ти: спаси́ мя,/ кре́пкую Твою́ десни́цу просте́рши рабу́ Твоему́,/ Всенепоро́чная.

Крестобогоро́дичен.

Подо́бен то́йже:

Воздви́жена я́ко ви́де на Кресте́ А́гнца,/ Непоро́чная Де́ва, пла́чущи, вопия́ше:/ сла́дкое Мое́ Ча́до,/ что но́вое и пресла́вное виде́ние?/ Ка́ко содержа́й вся́ческая го́рстию,/ на Дре́ве пригвожда́ешися пло́тию?

Тропарь, глас 4:

И нра́вом прича́стник,/ и престо́лом наме́стник апо́столом быв,/ дея́ние обре́л еси́, Богодохнове́нне,/ в виде́ния восхо́д./ Сего́ ра́ди, сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Полика́рпе,/ моли́ Христа́ Бо́га,/ спасти́ся душа́м на́шим.

На у́трени

Кано́н, его́же краегране́сие: Боже́ственнаго Полика́рпа в пе́снех восхваля́ю. Феофа́ново. Глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Христо́вым светоли́тием сия́я и Того́ просвеще́нием, о́тче, наполня́емь,/ омраче́нную ду́шу мою́ озари́, Богому́дре, моли́твами твои́ми.

Просвеще́ние спаси́тельнаго проповеда́ния, чи́стое се́рдце твое́,/ я́коже зерца́ло нескве́рно, о́тче, облиста́в зари́, всем просия́.

Зако́на но́ваго столпописа́ние ты был еси́,/ напи́сано име́я, о́тче, не черни́лом, но Ду́хом Боже́ственным/ благода́ти Боже́ственное Ева́нгелие.

Богоро́дичен: Бо́га, из Тебе́ воплоще́нна, веду́ще,/ без хоте́ния плотска́го, су́ща пре́жде тва́ри и пре́жде всех век,/ вои́стинну Богоро́дицу, Тя испове́дуем.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвлей грех,/ и страх Твой всади́/ в сердца́ нас, пою́щих Тя.

Ма́слина, псало́мски рещи́, плодови́та был еси́, Полика́рпе Богоявле́ние,/ в дому́ Го́спода твоего́,/ весе́лие нося́ пропове́дания.

Напра́вил еси́ усе́рдно, Богоблаже́нне, ум твой повеле́нием Спа́совым,/ по досто́инству был еси́ Того́ Це́ркве па́стырь изря́ден.

Всеце́лую тебе́ сама́го Христу́ прине́сл еси́ я́ко жи́ву же́ртву муче́нием,/ со́вести свиде́тельством, предпострада́в, всеблаже́нне, по́стничеством.

Богоро́дичен: Умерщвле́ния на́шего персть от трясла́ еси́, ро́ждши и́стинно безсме́ртие,/ и оде́жды нам истка́ла еси́ нетле́ния, Де́во, Рождество́м Твои́м.

Седа́лен, глас 8.

Подо́бен: Прему́дрости:

Благода́тный грозд в души́ вои́стинну возде́лав, о́тче му́дре,/ я́ко вино́, источи́л еси́ ве́ры сло́во, веселя́щее всех ве́рных мы́сли,/ и чуде́с яви́лся еси́ непроходи́ма пучи́на;/ те́мже и му́чеников яви́лся еси́ удобре́ние, огне́м скончава́емь/ и све́та сподобля́емь присносу́щнаго, Полика́рпе./ Моли́ Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Помышле́ньми поползну́вся лука́выми, во глубину́ впадо́х грехо́вную/ и, стеня́, взыва́ю Ти от се́рдца, Пречи́стая:/ на мне удиви́ бога́тую ми́лость, и Твоего́ милосе́рдия неизме́рную пучи́ну,/ и щедро́т Твои́х неисче́тное бога́тство/ и даждь ми покая́ние и прегреше́ний проще́ние, да любо́вию взыва́ю Тебе́:/ моли́ Христа́ Бо́га прегреше́ний оставле́ние дарова́ти ми,/ Тя бо наде́жду име́ю, раб Твой.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир убо ра́дуется, прие́мляй Тобо́ю избавле́ние,/ утро́ба же Моя́ гори́т, зря́ши Твое́ распя́тие, е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй прегреше́ний оставление ве́рою пою́щим Боже́ственныя стра́сти Твоя́.

Песнь 4

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче.

Многопло́дный доброде́телей добропло́дный сад Вла́ды́це яви́лся еси́,/ о́тче Полика́рпе.

Всесожже́ние соверше́нно и чиста́ же́ртва прине́слся еси́ Спа́су всех,/ о́тче Полика́рпе.

Песносло́вим, сла́вне, души́ твоея́ кре́пкое терпе́ние/ и твои́х по́двиг до́блесть.

Богоро́дичен: Просвети́, Чи́стая, омраче́нную ду́шу мою́ све́том Твои́м,/ я́же Свет ро́ждшая Присносу́щный.

Песнь 5

Ирмо́с: Све́та Пода́телю и веко́в Творче, Го́споди,/ во све́те Твои́х повеле́ний наста́ви нас:/ра́зве бо Тебе́, ино́го бо́га не зна́ем.

Заре́ю духо́вною просвеща́емь, ум, преподо́бне, обра́зно огне́м опаля́емь,/ я́ве научи́лся еси́ огне́м, Богому́дре,/ твоего́ сконча́ния.

Струю́ прия́л еси́ жи́зни, я́ко от пото́ка пи́щи, прему́дре,/ ученико́м возлю́бленным науче́н быв,/ поче́ртпим прему́дрости бе́здну.

Бога́тство, и сла́ву све́тлу, и долготу́ жити́я, и жизнь нетле́нну/ и́стинная му́дрость – Христо́с тебе́ дарова́, о́тче,/ я́ко вельми́ Того́ возлю́бльшему.

Богоро́дичен: Ве́тхий де́ньми, я́коже на руно́ дождь, Пречи́стая,/ в Твое́ чре́во сни́де освяще́нное,/ и нов яви́ся Ада́м, Человеколю́бец.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Умертвився, Богоглаго́ливе, ми́ру всему́, Еди́ному же Христу́ живы́й пребыва́я,/ и к Нему́ преше́л еси́, жи́зненное нетле́ние прие́мля.

Благообра́зно хо́дя, блаже́нне,/ ча́до же све́та и ми́ра явля́яся,/ нощна́го пе́рвенца и бори́теля позна́л еси́, Маркио́на.

Науча́еми, о́тче, словесы́ твои́ми,/ всяку побежда́ем скве́рную е́ресь и лука́вая со́нмища,/ два вводя́щих нача́ла злочести́вых.

Богоро́дичен: Грех ми́ра взе́млющаго, Чи́стаго А́гнца заче́нши, Всенепоро́чная,/ согреше́ний проще́ние моли́ дарова́ти рабо́м Твои́м.

Конда́к, глас 1.

Подо́бен: Лик А́нгельский:

Плоды́ словесныя Го́сподеви принося́, Полика́рпе му́дре, доброде́телей же́ртвы,/ те́мже и от Бо́га досто́ин иерарх просла́вился еси́./ Сего́ ра́ди днесь, просве́щшеся твои́ми словесы́,/ воспева́ем твою́ достохва́льную па́мять, сла́вяще Го́спода.

Икос:

Му́дрости благосты́ню поче́рп,/ от то́я, о́тче, напо́лнил еси́ Богоразу́мия ста́до твое́/ и всесвята́го и неизрече́ннаго Божества́ Трисо́лнечное облиста́л еси́/ Отца́ нерожде́ние, Сы́на же рожде́ние и исхожде́ние Ду́ха,/ Еди́но Божество́, Еди́ну Сла́ву я́сно научи́л еси́/ и и́дольское безбо́жие из ко́рене посе́кл еси́,/ плоды́ же зре́лы–ду́ши ве́рующих – приводя́ к Ней, сла́вне,/ в Ню́же крести́хомся, в Ню́же и ве́руем, сла́вяще Го́спода.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посре́де же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших,

Тве́рдым по́мыслом горя́щий пламень премину́л еси́, славне,/ я́ко трие ́о́троцы пещь, огне́м невеще́ственным ороша́еми,/ посреди́ же огня́ взыва́я, неопали́м пребы́л еси́:/ благослове́н еси́, Бо́же оте́ц на́ших.

Блаже́н еси́, и добро́ тебе́ есть,/ ны́не все́льшемуся, иде́же пра́ведных селе́ния,/ иде́же му́ченик во́инства,/ иде́же му́дрых апо́столов ли́цы взыва́ют:/ благослове́н еси́, Бо́же оте́ц на́ших.

Неплодныя первее, многоплодны Христу́ ду́ши приве́л еси́,/ возделанием духо́вным уравнйв, и благокласно сим предлага́я се́мя,/ и наказуя поющия с тобо́ю:/ благословен еси́, Бо́же оте́ц на́ших.

Богоро́дичен: Ты еди́на Бо́гу, вся́ческая му́дре соде́лавшему,/ Ма́ти яви́лася еси́ Неискусобра́чная, Девома́ти Всечи́стая./ Те́мже благоче́стно Тебе́, Всенепоро́чная, взыва́юще, пое́м:/ благослове́на, Я́же Бо́га пло́тию ро́ждшая.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте дела́ я́ко Го́спода/и превозноси́те во вся ве́ки.

Священноде́йствовав, сла́вне, Христо́ву та́йную слу́жбу,/ слове́сное овча́ – себе́ приве́л еси́ Бо́гу, же́ртву прия́тну/ и благоуго́дну, всепло́дну, Полика́рпе треблаже́нне.

Юношское в седи́не и глу́боча́йшее му́жество показа́л еси́:/ кре́стною си́лою воздви́гл еси́ себе́ к Боже́ственным подвиго́м, Богому́дре,/ священному́чеников Христо́вых сла́ва, преподо́бие.

Утверждае́мь Кресто́м, и святи́тельскою красото́ю досто́йно облече́н, о́тче,/ в Це́рковь Бо́жию вшел еси́ твое́ю кро́вию Пастыренача́льнику Христу́ яви́тися.

За Христа́ закла́вся, я́коже знамени́т ове́н, священноявле́нне,/ подо́бник яви́лся еси́ страда́нием Его́,/ и сла́вы был еси́ соприча́стник, и Ца́рствия Его́ снасле́дник.

Богоро́дичен: Светови́ден столп о́гнен/ и облак све́тел, предводя́щ к Небе́сному насле́дию, Богороди́тельнице Чи́стая,/ бу́ди ми, Де́во Всенепоро́чная, в пусты́ни жития́ заблужденному.

Песнь 9

Ирмо́с: От Бо́га Бо́га Сло́ва,/ неизрече́нною му́дростию, прише́дшаго обнови́ти А́дама,/ я́дию в тле́ние па́дшаго лю́те,/ от святы́я Де́вы неизрече́нно воплоти́вшегося нас ра́ди,/ ве́рнии, единому́дренно пе́сньми велича́ем.

Светоно́сная твоя́, о́тче, возсия́вши па́мять,/ просвеща́ет ду́ши благоче́стно сию́ соверша́ющих, чу́дне,/ и прича́стники Боже́ственнаго светоявле́ния сия́ соверша́ет./ Юже досто́йно, Богому́дре, песньми ублажа́ем.

С Вы́шними ли́ки святы́х А́нгел престо́лу Влады́чнему предстоя́,/ Сего́ моли́ дости́гнути нам спаси́тельную стра́сть/ и Того́ воскресе́ние све́тло, доброде́телей многообра́зныя ви́ды соверша́ющия.

Венцено́сна тя, о́тче, и по́чести побе́ду прии́мша Боже́ственныя десни́цы,/ и по́двиги сконча́вша, и све́та исполня́ема,/ ве́рующе, Полика́рпе му́дре, моли́твенника Христу́ тя усе́рдно предлага́ем.

Богоро́дичен: Я́ко Богоро́дицу Тя, Де́во, и Ма́терь Сло́ва, и Хода́таицу су́щую нам/ присносу́щныя и Боже́ственныя жи́зни,/ я́ко Пра́вды Со́лнце возсия́вшую нам,/ ве́рнии, единому́дренно пе́сньми велича́ем.

Свети́лен.

Подо́бен: Посети́л ны:

Богосло́вному ученику́ учени́к быв, Полика́рпе,/ мног плод Го́споду ве́рных приве́л еси́,/ себе́ же самого́ всепло́дие прине́сл еси́ о твое́м ста́де/ и ны́не моли́ся за вся ны.

Богоро́дичен:

Щедро́ты Твоя́, Бо́же, на лю́ди и ста́до Твое́ низпосли́/ моли́твами Пречи́стыя Твое́й Ма́тере и всех святы́х Твои́х/ и нам всем да́руй вели́кую Твою́ ми́лость .