Слу́жбу зри 13 октября́ или́ ину́ю ни́же

Тропа́рь, глас 1:

От святы́я ико́ны Твоея,/ о Влады́чице Богородице,/ исцеле́ния и цельбы́ подаю́тся оби́льно,/ с ве́рою и любо́вию приходя́щим к ней./ Та́ко и мою́ не́мощь посети́/ и ду́шу мою́ поми́луй, Блага́я,/ и те́ло исцели́ благода́тию Твое́ю, Пречи́стая.

Конда́к, глас 8:

Аще и в мо́ре вве́ржена бысть свята́я ико́на Твоя́, Богоро́дице,/ от вдови́цы, не могу́щия спасти́ сию́ от враго́в,/ но яви́лася есть Храни́тельница Афо́на/ и Вратарница оби́тели И́верския, враги́ устраша́ющая/ и в Правосла́вней Русстей стране́/ чту́щия Тя от всех бед и напа́стей избавля́ющая.

И́кос:

Встолпе́ о́гненне я́вльшуюся Богома́тере ико́ну ви́девше,/ возопи́ша по́стников и́верских ли́цы:/ о Влады́ко, сподо́би нас прия́ти ико́ну Ма́тере Твое́я во утеше́ние стра́нствия на́шего;/ ты же, Гаврии́ле, дерза́й и вни́ди в мо́ре,/ и приими́ во объя́тия твоя́ сокро́вище, нам явля́емое,/ да бу́дет нам страж неусы́пный, покро́в же, и ра́дость всем христиа́ном,/ и храни́тельница, от бед и напа́стей избавля́ющая.

Пра́зднственная Тоя́ прише́ствию сверша́ют Све́тлыя Неде́ли во вто́рник непреме́нно, в он же день чуде́сно по мо́рю Пресвяты́я о́браз прии́де. А́ще и индиктио́ны прехо́дят, но а́бие суди́лося всего́ собра́ния вели́каго Афо́на мона́шествующих, во е́же не премину́ти дне све́тлаго, в он же блиста́ет Свет торжества́, или́ всего́ ми́ра наполне́ния све́тлости, и обо́е ве́село торжеству́ющи, Пренепоро́чныя Влады́чицы о́бразу похва́льная пе́ти начина́ющи, ра́достно воспое́м.

Ико́на Пречистыя от Нике́и огнено́сна прише́дши понт, во Афо́не обита́ет.

На вели́цей вече́рни

На Го́споди, воззва́х: стихи́ры, глас 1.

Подо́бен: Небе́сных чино́в:

От восто́ка возсия́вши, я́ко со́лнце,/ огнено́сная со сла́вою Афо́нстей Горе́ ико́на Бо́жия Ма́тере./ О чудесе́ стра́шнаго, – возопи́ша мона́шествующии, –/ ка́ко в мо́ре яви́ся столп о́гненный,/ я́ко ви́де иногда́ Изра́иль.

Я́коже Моисе́ю в Сина́и/ купина́ яви́ся иногда́,/ огне́м у́бо опаля́ема и невреди́ма пребы́вше,/ си́це Всенепоро́чныя Богороди́тельницы свяще́нный о́браз огне́м одева́ется,/ но неопали́м пребыва́ет,/ зареви́дно освяща́ет зря́щих ве́рно.

Гряди́те весе́лыми нога́ми, по́стников ли́цы,/ почерпи́те благода́ть неоскудную/ от ико́ны огне́м блиста́ющия Богома́тери,/ кре́пость и стена́ оби́телем на́шим пресла́вно дарова́ся,/ ве́лиим гла́сом возопи́йте ко всем:/ прииди́те у́бо, земноро́днии,/ по о́бразу Бо́жию бы́вши,/ изображе́ние Пречи́стыя пе́сньми почти́м.

Сла́ва, глас 8:

Прииди́те, лю́дие,/ зрим светоно́сную зарю́,/ и чудотво́рному и всечестно́му Бо́жия Матере поклони́мся о́бразу,/ его́же даро́ва мона́шествующим во оби́тели И́верстей/ и всем во Афо́не по́стником стра́жа неусы́пна и необори́ма тем, от мо́ря восходя́щи/ обита́ние на врате́х изво́ли Себе́/ и чрез преподо́бнаго благода́ть возвеща́ет,/ я́ко Го́ру избра́ в насле́дие Себе́/ и хо́щет обита́ющих в ней благоче́стно спаса́ти тве́рдо,/ ю́же ра́достно прие́млюще/ Неискусобра́чную и Присноблаже́нную велича́ем.

И ны́не, Богоро́дичен, глас 3: Ка́ко не диви́мся:

Вход. Проки́мен. И пареми́и (зри страни́цы 176–178).

На ли́тии стихи́ры самогла́сны, глас 2:

Днесь свяще́нныя ико́ны прише́ствие/ щедрота́ми я́вльшеся нам,/ ра́достно пра́зднующи, Богома́тери вопие́м,/ я́коже иногда́ се́ю по́лчище ва́рваров всегуби́тельству предала́ еси́,/ та́ко и ны́не, всех Цари́це,/ на безбо́жных ага́рянов побе́ду нам дару́й/ на утвержде́ние ве́рных и све́тлое ра́дование.

Се, а́ки труба́ велегла́сная вопиет,/ Афо́н на весе́лое торжество́ созыва́ет, христолюби́вых людей,/ прииди́те, зри́те чу́до пресла́вное,/ с на́ми Ро́ждшую Сло́во Бо́жие возвели́чите,/ ка́ко посети́ прише́ствием Свои́м достоя́ние Свое́/ и не оста́ви до конца́ ве́рных Свои́х/ и всех устраши́ враго́в христиа́нского ро́да,/ Ю́же досто́йно, я́ко За́ступницу на́шу, воспои́м, ку́пно глаго́люще:/ ра́дуйся, Де́во, упова́ние христиа́ном.

Сла́ва, и ны́не, глас 1:

Благода́ть пречи́стыя ико́ны восприе́млюще, бра́тие,/ досто́йно воспле́щим рука́ми/ и возвели́чим ра́достными похвала́ми дарова́вшую,/ и храни́теля неусы́пна поста́вльшую нам/ в сей же Горе́ стра́жа тверда́ и правосла́вным вели́кое заступле́ние,/ тем, че́стно ра́дующеся, Богоро́дице вопие́м:/ христиа́нский рог вознеси́/ и стра́шную враго́м покажи́ побе́ду, я́ко Всеси́льная.

На стихо́вне, глас 2.

Подо́бен: До́ме Евфра́фов:

Собра́ние отцев, прииди́те,/ пешемореходя́щую ико́ну Де́вы прии́мем,/ Боже́ственно благода́тию прише́дшую,/ враго́в устраша́ющую/ и ве́рных увеселя́ющую.

Стих: Воскре́сни, Го́споди, в поко́й Твой/ Ты и киво́т святы́ни Твое́й.

Сни́демся ве́рно/ в ра́дости души́ и весе́лии се́рдца,/ зде бо Де́ва милостию посеща́ет нас/и в зало́г благода́ти/ ико́ну Свою́ стра́жа дару́ет нам.

Стих: Клятся Госпо́дь Дави́ду и́стиною/ и не отве́ржется ея́.

Зри́те со стра́хом и удиви́теся:/ се Де́ва Бо́га ро́ждшая/ свяще́нному ста́рцу повелева́ет, глаго́ля:/ вни́ди, Гаврии́ле, на во́ды му́жественно/ и приими́ ико́ну Мою́, Афо́ну прише́дшую.

Сла́ва, и ны́не, глас 5:

Прииди́те, вси мона́си и мирсти́и,/ Еди́ну Пречи́стую и Нескве́рную просла́вим,/ днесь бо ра́ди свяще́нныя ико́ны,/ в мори́ путие́ ея́ и стези́ ея́ в вода́х мно́гих,/ и следы́ в чудеси́ несказа́нныя,/ ка́ко бо от Нике́и в столпе́ о́гненном понт морски́й ко Афону прехо́дит,/ и дар прише́ствием Свои́м ве́рным подае́т,/ мы же, просвеще́ннии луча́ми благода́тей,/ единогла́сно Хода́таицу спасе́ния на́шего ублажа́ем.

Тропа́рь, глас 1:

Де́рзость ненави́дящих о́браз Госпо́день/ и держа́ва нечести́вых безбо́жно в Нике́ю прии́де,/ и по́сланнии безчелове́чно вдови́цу,/ благоче́стно чту́щую ико́ну Богома́тери, истязу́ют,/ но та́я но́щию с сы́ном ико́ну в мо́ре пусти́, вопию́щи:/ сла́ва Тебе́, Чи́стая,/ я́ко непроходи́мое мо́ре плещи́ своя́ подаде́,/ сла́ва правоше́ствию Твоему́, Еди́на Нетле́нная.

На у́трени

По 1-м стихосло́вии седа́лен, глас 1.

Подо́бен: Гроб Твой, Спа́се:

Веселя́тся све́тло Афо́на па́ствы,/ пе́сней мно́жество соплета́ют, любо́вию Непоро́чную почита́юще,/ вели́чеством благода́ти крася́щеся,/ ю́же прия́ша прише́ствием ико́ны Всенепоро́чныя Отрокови́цы,/ златови́дными заря́ми благоче́стно пою́щих озаря́ющия.

По 2-м стихосло́вии седа́лен, глас 3.

Подо́бен: Красоте́ де́вства:

Чу́до пресла́вное зри́тся днесь,/ ка́ко в вода́х огнено́сная Богоотрокови́цы ико́на показу́ется,/ и зна́мения ́лучи́ испущает, и пребыва́ние по́стников чу́дом спаса́ет,/ сего́ ра́ди благода́рственно вопием:/ ра́дуйся, Благода́тная.

По полиеле́и седа́лен, глас 5.

Подо́бен: Собезнача́льное Сло́во:

Во сне яви́ся, Всеблаже́нная,/ и преподо́бному возвеща́ет Гаврии́лу:/ иди́ ра́но, – глаго́лет, – и сни́ди со тща́нием,/ ку́пно с ли́ком мона́шествующих, ко бре́гу приближися,/ сме́ло пойди́ по волна́м и приими́ ико́ну Мою́.

Проки́мен и Ева́нгелие Богоро́дицы.

Стихи́ра по 50-м псалме́, глас 6. Самогласна:

Егда́ явле́ние пречи́стаго Твоего́ о́браза приспе,/ тогда́ Афо́нстии отцы́ столп о́гненный на мори́ зряще,/ стра́хом содержи́ми, недоумева́ху,/ Гаврии́л же, я́ко вторы́й Пе́тр, по мо́рю ходя́,/ со слеза́ми вопия́ше Тебе́:/ о Пресвята́я!/ Прииди́ и сохрани́ достоя́ние Твое́ от враго́в ненаве́тно.

Кано́н умили́тельный ко Пресвяте́й Влады́чице на́шей Богоро́дице. Творе́ние мона́ха Гера́сима. Глас 8.

Песнь 1

Ирмо́с: К олесницегонителя фарао́ня погрузи́,/ чудотворя́й иногда́/ Моисе́йский жезл, крестообра́зно порази́в,/ и раздели́в мо́ре,/ Изра́иля же, беглеца́, пешеходца спа́се,/ песнь Бо́гови воспевающа.

От скве́рных у́стен хвале́ние приими, Всенепоро́чная,/ я́коже пре́жде Сын Твой, Бог же мой и Госпо́дь/ прия́т две ле́пте вдови́цы/ и разреше́ние прегреше́ний мои́х пода́ждь,/ я́ко да по до́лгу почита́ю Тя.

А́нгельское пе́ние подобаше Ти, Ма́тери Бо́жией,/ Творца́ бо сих родила́ еси́ стра́шно и па́че смы́сла,/ но приими́ всех, Цари́це, и от нас ма́лое приноше́ние,/ че́стную Твою́ ико́ну почита́ющих.

Благотвори́ти рабо́м Твои́м произволи́вши, Влады́чице,/ проти́вныя по́лчища враго́в си́лою Сы́на Твоего́ и Твое́ю, Всемогу́щая,/ отгна́вши от па́ствы Твое́й,/ храм созда́ти к защище́нию на врате́х благоволи́ла еси́, Богоневе́сто.

Изыде от нечести́ваго царя́ повеле́ние/ не покланя́тися первообра́зно Сы́на Твоего́, Де́во, Бо́жественному изображе́нию,/ и Твоему́, Богома́ти, и святы́х всех,/ и возмути́ ве́рных собра́ние,/ но Ты же вско́ре разори́ла еси́.

Песнь 3

Ирмо́с: Утвержде́й в нача́ле Небеса́ ра́зумом,/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Едине Человеколю́бче.

Иконобо́рцев нечести́вых стремле́ние услы́шавши, че́стная и Боголюбе́зная вдови́ца,/ ужа́сными рука́ми ико́ну Твою́ нося́щи, Всечестна́я,/ на во́лны морски́я слезоточа́щи пусти́.

Скры́вшиеся у́бо су́дьбами Сы́на Твоего́ до́лгое вре́мя во глуби́нах морски́х,/ но ма́нием Бо́жественным в па́ству Твою́ изыде.

Чу́до тре́петное и сла́вное ви́дяху в мори́,/ обита́ющии в Афо́нстей Горе́,/ и́бо после́дова све́тлость благода́ти Твое́й/ и услади́ сия́нием ико́ны всех, прославля́ющих Тя.

Ра́дующеся, наде́яхуся, Чи́стая,/ мно́жества мона́шествующих о держа́ние ико́ны Твое́й получити,/ но Ты держа́вною Твое́ю руко́ю/ обители Твое́й подала́ еси́ я́ко хранили́ще некра́домо.

Седа́лен, глас 4:

Весе́лое днесь Засту́пницы на́шея торжество́,/ да взыгра́ется тварь, да ликовству́ют челове́честии собо́ри,/ созыва́ет нас Свята́я Богоро́дица видети огнено́сную ико́ну Свою́/ и луча́ми ми́лости ве́рных просвеща́ющую./ Тем, ра́дующеся, вопи́ем:/ спаси́, Госпоже́, от гла́да, огня́, меча́ и всех бед почита́ющих явле́ние Твое́ ве́рно.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог,/ Ты мое́ ра́дование,/ не оста́вль не́дра Отча,/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Наше́ствия нечести́вых отгоня́ющи от па́ствы Твое́я,/ Вра́тница бы́ти изво́лила еси́, Всеблага́я,/ но сохрани́ сию́ и пребыва́ти во ве́ки благоволи́/ пою́щую честно́е изображе́ние светоно́сныя иконы Твоея́, Влады́чице.

Виждь, Чи́стая, и́ноков собо́ры па́ствы Твоея,/ окружа́ющих ико́ну Твою́ благохва́льную,/ разреше́ние грехо́в прося́щих и жития́ исправле́ние,/ и Боже́ственныя сла́вы прича́стниками быти, Всенепоро́чная.

Все́ю душе́ю и мы́сли пра́востию в па́стве Твое́й вси слику́юще,/ псалмы́ и пе́сньми духо́вными, и пе́нием Боже́ственным ико́ну Твою́ почита́ют,/ проще́ние прося́ще и душ спасе́ние,/ Ты же сие́ пода́ждь, Влады́чице Богоневе́сто.

Храм Твой просвеща́ется, Влады́чице, све́том Твои́м,/ и украша́ется Боже́ственными пе́сньми,/ я́ко обогати́ся ве́лиим сокро́вищем, ико́ною Твое́ю пречи́стою,/ Боже́ственная же Твоя́ огра́да си́лою благода́ти Твое́й Не́бо слове́сное показу́ется.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Да посрамя́тся ли́ца нечести́вых/ и заградя́тся уста́ отрица́ющих и умаля́ющих све́тлую и Бо́жественную ико́ну Твою́, Влады́чице,/ и во огнь негаси́мый и тьму ве́чную да послю́тся му́читися.

Храм Твой, Де́во, я́ко рай други́й показа́ся ны́не,/ дре́во жи́зни име́я – ико́ну красоты́ Твое́я,/ ю́же усе́рдно вси со благогове́нием и любо́вию целу́юще, Отрокови́це, спаса́емся.

Ре́ку Тя сла́дкую и пото́к насыще́ния,/ ма́нну Небе́сную, ме́д от ка́мени,/ изоби́лие и благода́ть приснотеку́щую стяжавше, Отрокови́це,/ во оби́тели обита́ющии благода́рно пою́т рождество́ Твое́.

Ди́вно превознесе́ся вели́чие ико́ны Твое́й, Богоро́дице Де́во,/ всю́ду бо лучи́ испуща́ет и просвеща́ет усе́рдно пою́щих/ неизрече́нное рождество́ Твое́, Влады́чице.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молюся:/ к Тебе́ бо возопи́х, и услы́ши мя,/ Бо́же спасе́ния моего́.

При́зри благосе́рдно на па́ству Твою́, Пречи́стая,/ и вся́кий наве́т и вред при́сно востающи́ на ню осуети́,/ и сохрани́ невреди́му.

Покро́в и храни́лище ико́на Твоя́ бысть, Вла́дычице,/ е́юже от враго́в мы́сленных избавля́ются, прибега́ющи,/ и́ноков совокупле́ния и ве́рных собо́ры,/ душе́ю и се́рдцем славосло́вят Тя, Богома́ти.

Призыва́ние и́мени Твоего́ вои́стинну ду́шам есть очисти́лище/ и скве́рных мы́слей истребле́ние,/ и отгна́ние лука́вых ду́хов, Богоро́дице Присноде́во.

Пое́м вси благогове́йно ико́ну Твою́ пречи́стую, в храм Твой входя́щи,/ в Боже́ственное весе́лие,/ и ду́шам исцеле́ние почерпа́ем, Богоневе́сто.

Конда́к, глас 4.

Подо́бен: Яви́лся еси́ днесь вселе́нней:

Совозсия днесь Све́ту Воскресе́ния свет чи́стыя ико́ны Твоея́,/ обо́я ве́село торжеству́юще вопием:/ сохрани́ раб Твои́х благода́тию, Влады́чице.

И́кос:

Древле изра́ильтеский люд столпо́м огня́ путенаста́вивый/ и че́рмну́ю во́лну сему́ подсла́вы в зна́мение свобо́ды от рабо́ты мучи́тельския,/ Той и ны́не ико́ну Своея́ Ма́тере огнеобра́зну показу́ет,/ во изве́ство безме́рныя бла́гости/ и Храни́тельницу, мо́ре пешеходя́щую, Святоиме́нной Горе́ подае́т;/ тем по до́лгу благода́ть почита́юще, вопием:/ сохрани́ раб Твои́х благода́тию, Вла́дычице.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди отроцы в пе́щи ра́дованною ного́ю,/ я́ко во цве́тнице лику́юще, поя́ху:/ благослове́н еси́, Бо́же оте́ц на́ших.

О па́стве Твое́й Предста́тельница буди́, Чи́стая Де́во,/ и дре́вния ми́лости Твоя́ покажи́ на рабе́х Твои́х, Бо́га ро́ждшая,/ правосла́вно Сы́ну Твоему́ зову́щих:/ благослове́н Бог оте́ц на́ших.

Позна́ша, Влады́чице, ро́ди ага́рянстии си́лу Твою́,/ находя́щи су́етно на любе́зную па́ству Твою́,/ и падо́ша безче́стною сме́ртию пра́ведно, Чи́стая Богоблаже́нная.

Блаже́н, Влады́чице, Боже́ственный храм Твоея́ све́тлости,/ стяжа́в внутрь, я́ко ве́лие сокро́вище,/ подо́бия Твоего́ Боже́ственное изображе́ние,/ его́же ны́не целу́юще, славосло́вим Христа́, Тя просла́вльшаго.

Испо́лнися, Пречи́стая, уст Твои́х Боже́ственное прорече́ние,/ блажа́т Тя А́нгелов и челове́ков мно́жества и пою́т согла́сно Рождество́ Твое́:/ благослове́н Бог оте́ц на́ших.

Песнь 8

Ирмо́с: Седмери́цею пещь/ халде́йский мучитель,/ Богочести́вым неистовно разжже,/ си́лою же лу́чшею, спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Ю́же возлюби́ла еси́ Богосо́бранную па́ству Твою́/ и пребыва́ти вы́ну в той благоволи́,/ укроща́ющи безбо́жных ага́рянов во́лны,/ ми́рную жизнь подаю́щи ве́рою вопию́щим:/ благослови́те, свяще́нницы, по́йте, лю́дие, Благода́тную во вся ве́ки.

Стра́нна чудеса́ Твоя́ и пресла́вна, Влады́чице,/ мо́ре, земля́ и не́бо послу́шает Ти,/ но соблюди́ пла́вающих ми́рнаго мо́ря пучи́ны,/ спасаеши бо преходя́щих от всех бед и возво́диши к высоте́ Небе́сней пою́щих:/ лю́дие, превозноси́те Бо́жию Ма́терь.

Кто изрещи́ возмо́жет чуде́с Твои́х бе́здну/ и вели́чия всечестны́я ико́ны Твоея́,/ от нея́же излива́ется свяще́нной оби́тели Твое́й и всем приходя́щим всех благ незави́ство,/ ихже причаща́ющеся, благоче́стно воспева́ют Благода́тную во вся ве́ки.

Ра́дующеся пое́т Тебе́, Богоро́дице Всепе́тая,/ благочести́вая и блаже́нная па́ства Твоя́,/ Бо́жественную благода́ть прие́млюще, Де́во, от Тебе́/ и Ца́рствия Сы́на Твоего́ прича́стниками про́сит Тобо́ю, вопию́щии:/ ра́дуйся, Благода́тная, во вся ве́ки.

Песнь 9

Ирмо́с: Ужасе́ся о се́м Не́бо,/ и земли́ удиви́шася концы́,/ я́ко Бог явися челове́ком пло́тски,/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Ужасо́шася А́нгелов во́инство и челове́ков ро́ди, Всенепоро́чная,/ стра́шнаго и па́че ума́ рождества́ Твоего́,/ ка́ко и Де́ва пребыла́ еси́, и Ма́ти Бо́жия бы́ти сподо́билася еси́,/ сего́ ра́ди по до́лгу пое́м, благослови́м и покланя́емся ико́не Твое́й.

Огражде́ние и стена́ духо́вная,/ столп ве́лий и утвержде́ние оби́тели Твое́й и всем ве́рным дарова́лася еси́ от Бо́га,/ и́хже и сохрани́ неврежде́нных Боже́ственное изображе́ние ико́ны Твоея велича́ющих.

Осуети́, Де́во, нечести́вых сове́ты и беззако́нная ухищре́ния,/ ча́сто находя́щия на ста́до Твое́/ и прожени́ сих дале́че со студо́м/ и коне́чному разоре́нию преда́ждь,/ да позна́ют си́лу и власть Твою́, Богоневе́сто.

При́зри, Де́во, ны́не на нас от высоты́ сла́вы Твоея́, Влады́чице,/ благогове́йно ико́ну Твою́ почита́ющих/ и проше́ния на́ша испо́лни Бо́жественных даро́в,/ и прегреше́ний дару́й оставле́ние.

Ексапостиларий.

Подо́бен: В Ду́се Свяще́нном:

В мо́ре вшед немо́кренно, восприя ико́ну Твою́, Всенепоро́чная, Гаврии́л свяще́нный/ зовы́й, ужаса́яся, почита́ет:/ О Всечестна́я, ве́лия Твоя́ чу́деса и благода́ть неисчерпа́емая,/ ю́же освяща́вши всю́ду воспева́ющих любовию.

На хвали́тех стихи́ры, глас 8.

Подо́бен: О, пресла́внаго чудесе́:

О, несказа́нныя бла́гости!/ Ико́ны заря́ све́тится,/ сия́ет чудеса́ми и просвеща́ет благода́тию приходя́щих ве́рно,/ расточа́ющая же ополче́ния враго́в/ и пучи́ною ку́пно погружа́ющая, ю́же приемлюще,/ Чи́стую Богоотрокови́цу достодолжно песньми почита́ем и ублажа́ем.

О, Твоего́ о нас, Влады́чице, промышле́ния!/ чу́дную бо Твою́ ико́ну посыла́вши днесь/ и стра́жа неусы́пна пода́вши благода́тию,/ Наде́ждо и Покро́ве прибега́ющих ве́рно/ и утеше́ние стра́нствию на́шему,/ тем позна́вше честны́я Твоя́ чудеса́,/ песньми Тя почита́ем и ублажа́ем.

О, пресла́внаго чудесе!/ Ка́ко огнено́сная ико́на пря́мо на волна́х морски́х, я́ко на колесни́це, прехо́дит,/ полносве́тлыми луча́ми благода́ти просвеща́ет ве́рных умы́,/ ея́же торжество́ пе́сньми почита́юще,/ ра́достно сла́ву возсыла́ем, Благоде́тельнице.

Сла́ва, и ны́не, глас 8:

Восприя́т свяще́нную ико́ну свяще́нный Гавриил,/ я́коже Всенепоро́чная повеле,/ чу́до чудесе́ после́дова,/ путеше́ствова бо немо́кренно во́ду,/ огнено́сную во́льно прия́т ико́ну,/ сие́ лик воста́ви и торжество́ совокупи́,/ тем и мы, удивля́ющеся, вопие́м Первовино́вному:/ сла́ва Тебе́, сотво́ршему ди́вная, еди́ному Царю́ и Бо́гу,/ Богоро́дицы ра́ди сохрани́ страну́ на́шу и побе́ды на враги́ дару́й, я́ко Всеси́лен.

Славосло́вие вели́кое и отпу́ст.

На литурги́и слу́жба Богоро́дичная.

А́ще хо́щет настоя́тель, соверша́ем бде́ние.

На ма́лой вече́рни

Стихи́ры пое́м на 4, глас 8.

Подо́бен: О, пресла́внаго чудесе́:

Блаже́нне святи́телю Алекси́е,/ ты, Сло́ва глас восприе́м,/ о теле́сных небре́гл еси́,/ уго́дия и сво́йства оста́вив жития́/ и мысле́нное преше́д мо́ре,/ и благоче́стия уче́нием,/ и греме́нии преми́рными/ Христу́ послужи́л еси́,/ Богоблаженне.

О чудотво́рче, Алекси́е премудре,/ ты мона́шеским житие́м Бо́гу угоди́л еси́;/ тя бо Бог пре́жде избра́ от ю́ности, о́тче,/ па́стыря овца́м слове́сным и учи́теля вели́ка,/ ты свяще́нником наказа́тель яви́лся еси́/ и всей стране́ Русстей звезда́ пресве́тлая,/ осиява́ющи чудесы́ всех, ве́рою припа́дающих к раце моще́й твои́х./ Те́мже мо́лимся:/ проси́ ста́ду твоему́ грехо́в оставле́ния, о́тче Богоблаже́нне.

Преподо́бне о́тче, святи́телю Алекси́е,/ ты со́нным явле́нием разсла́бленнаго здра́ва сотвори́л еси́,/ ру́це и нозе укрепи́в,/ оби́дящему глаго́ля:/ аще вско́ре не отда́си сокро́вища и́скренняго,/ не и́маши со одра́ воста́ти./ Он же вско́ре, с покая́нием и со слеза́ми/ к честне́й твое́й ра́це прише́д, исцеле́ние получи́,/ о́тче Богоблаженне.

Сла́ва, глас то́йже, самогла́сен:

Прииди́те, Русстии собо́ри,/ в честну́ю па́мять чудотво́рца Алекси́я/ во храм Боже́ственный, в не́мже лежи́т честна́я его́ ра́ка,/ я́же и́мать в себе́ исцеле́ний благода́ть, честно́е те́ло его́./ К немуже возопийм:/ вели́кий святи́телю, Алекси́е чудотво́рче,/ ты похвала́ земли́ Русстей,/ ты и защище́ние,/ ты сокро́вище неиждива́емое дарова́ний духо́вных/ и исто́чник исцеле́ний неисчерпа́емый./ Тем, воспева́юще, глаго́лем:/ ра́дуйся, сто́лпе и утвержде́ние Це́ркве./ Ра́дуйся, с первосвяти́тели предстоя́й престо́лу Христо́ву./ Ра́дуйся, свети́льниче всесве́тлый, ве́рныя осиява́яй чудесы́./ Но у́бо, честны́й наш святи́телю,/ моли́ся Христу́ Бо́гу всех/ спасти́ся душа́м на́шим.

И ны́не, Богоро́дичен.

На стихо́вне стихи́ры, глас 2.

Подо́бен: До́ме Евфра́фов:

Святи́телю Богоно́се,/ ты яви́лся еси́/ от млады́х ногте́й/ сосу́д освяще́н, Алекси́е,/ и жили́ще Пресвята́го Ду́ха.

Стих: Свяще́нницы Твои облеку́тся в пра́вду,/ и преподо́бнии Твои́ возра́дуются.

Святи́телей похвало́,/ свяще́нников сла́во,/ мона́шествующих пра́вило,/ блаже́нне Алекси́е,/ раду́йся, Це́ркве утвержде́ние.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Услы́ши моле́ние твои́х чад,/ о́тче святи́телю Алекси́е,/ и сле́з не пре́зри,/ и серде́чная проше́ния/ подава́й лю́бящим тя.

Сла́ва, и ны́не, Богоро́дичен:

Обра́дованная, ра́дуйся,/ я́же ра́дость ми́ру ро́ждшая,/ Христа́ Жизнода́вца,/ и прама́тернюю, Де́во,/ печа́ль отъе́мшая.

Тропа́рь пи́сан на вели́цей вече́рни

На вели́цей вече́рни:

Блаже́н муж: 1-й антифо́н. На Го́споди, воззва́х: стихи́ры на 8. Глас 5.

Подо́бен: Ра́дуйся:

Ра́дуйся, пречестны́й архиере́ю вели́кий, Алекси́е преблаженне,/ церко́вный краси́телю, святи́телей че́стное удобре́ние,/ наро́ду правосла́вному моли́твою помога́я,/ земли́ Русския вели́кое утвержде́ние,/ честны́й учи́телю наш,/ безпо́мощным по́моще,/ печа́льным утеше́ние ра́достное,/ моле́бниче те́плый всем скорбя́щим,/ тьму неразу́мия отгоня́я,/ и ко Христу́ во приста́нища ти́хая притекл еси́,/ в лице́ безплотных предстоя́,/ и кра́сныя добро́ты Владычни наслажда́ешися,/ и сердца́ благочести́вых на пе́ние воздви́гл еси́./ Христу́ помоли́ся/ дарова́ти душа́м на́шим мир и вели́ю ми́лость.

Ра́дуйся, свети́ло всея́ Русския митрополии:/ ты бо доброде́телию све́тло процве́л еси́,/ я́ко ма́слина плодови́та в до́му Бо́жии,/ и, разли́чныя плоды́ износя́,/ бога́тно раздава́еши ста́ду твоему́ слове́сному/ и на па́житех духо́вных ту́чами твои́х моли́тв напоя́еши,/ исцеле́ния незави́стно источа́еши/ ве́рою притека́ющим к раце моще́й твои́х, святи́телю Алекси́е./ Свещу́ све́тлу себе́ угото́вал еси́,/ и во оби́телех Небе́сных всели́вся,/ и трудо́в твои́х воздая́ния венцы́ прия́л еси́,/ не дал бо еси́ сна очи́ма твои́ма и ве́ждома дрема́ния,/ до́ндеже сном о́бщим усну́л еси́./ Преподо́бне святи́телю, Христу́ помоли́ся/ дарова́ти ду́шам на́шим мир и вели́ю ми́лость.

Ра́дуйся и весели́ся, Алекси́е пресвяще́нный,/ благода́тный пропове́дниче, тве́рдый у́ме,/ виногра́да живо́тнаго святопрозя́бший грозд, вино́ иска́пающий,/ ве́рных сердца́ веселя́щее уче́нии медото́чными,/ святопома́занная главо́,/ честны́й наш учи́телю,/ прииди́, посети́ нас, озло́бленных грехо́вными страстьми́,/ пога́ных де́рзость низложи́, проти́вных прожени́,/ усо́бныя бра́ни укроти́/ и боле́зни, и неду́ги вся́кия облегчи́,/ Христу́ моля́ся/ дарова́ти ду́шам на́шим мир и вели́ю ми́лость.

Ра́дуйся, пресла́вный гра́де Москва́,/ красу́йся и весели́ся,/ сицева́го име́я благода́ти исто́чника неисчерпа́емаго,/ преблаже́ннаго и чудоноси́ваго Алекси́я,/ святи́теля вели́каго,/ и́же му́дростию Свята́го Ду́ха укра́шшася/ и от ю́ности доброде́тельнаго ра́ди его́ жития́/ сосу́д Свято́му Ду́ху быв поще́нии и моли́твами;/ свяще́нства ма́стию пома́зася,/ исцеле́ния дар прие́мша от всех Царя́ Христа́ Бо́га,/ и по святе́м его́ преставле́нии о́трока, е́ле жи́ва су́ща,/ мате́рию принесе́на к честне́й его́ раце, здра́ва сотвори́./ И до ны́не источа́ет исцеле́ние неоскудно с ве́рою приходя́щим,/ и Христу́ мо́лится/ даровати ду́шам на́шим мир и вели́ю ми́лость.

И́ны стихи́ры, глас 2.

Подо́бен: Ки́ими похва́льными:

Ки́ими пе́сненными добро́тами воспое́м святи́теля,/ Христо́ва уста́ ти́хая/ и Ева́нгелия Его́ пропове́дника све́тла,/ церко́внаго храни́теля и засту́пника земли́Русстей,/ ве́рному во́инству на́шему побо́рника,/ Его́же моли́твами шата́ния враго́в Христо́с низложи́,/ име́яй ве́лию ми́лость.

Ки́ими бодре́нными устна́ми похва́лим святи́теля,/ Христо́вы Це́ркве краси́теля,/ Петру́ верхо́вному ревни́теля и Па́влу насле́дника,/ нра́вы подо́бящася Крести́телю,/ Петра́ чудотво́рца Русскаго сопресто́льника/ и лучи́ чуде́с испуща́юща оби́льно,/ исцеле́ния подава́юща незави́стно всем, приходя́щим с ве́рою/ и па́мять его́ светло́ пра́зднующим,/ вели́каго засту́пника земли́ Русстей и учи́теля,/ Алекси́я, ди́внаго чудотво́рца,/ и правосла́вным людем на́шим те́плаго посо́бника./ Его́же ра́ди враги́ Христо́с низложи́,/ име́яй ве́лию ми́лость.

Ки́ими укра́шенными глаго́лы воспое́м святи́теля,/ ди́внаго в чудесе́х Алекси́я,/ безпло́тным сожи́теля, освяще́ннаго от пеле́н,/ столпа́ Це́ркве неподви́жима,/ весе́лие земли́ Русстей,/ пра́вды пра́вило, оби́димым засту́пника,/ не́мощным врача́ безме́здна./ Его́же ра́ди дарова́ Христо́с Церква́м соедине́ние,/ име́яй ве́лию ми́лость.

Сла́ва, глас 6:

Святи́телей удобре́ние и отце́в красоту́,/ исто́чника чуде́с,/ земли́ Русстей засту́пника вели́ка,/ соше́дшеся, о празднолю́бцы, пе́сненными похвала́ми воспое́м, глаго́люще:/ ра́дуйся, Алекси́е,/ тве́рдый у́ме, благода́тию и́стинною окропле́н./ Отню́дуже и прия́телище быв Пресвята́го Ду́ха,/ чуде́с дар восприя́л еси́./ И ны́не, с первосвяти́тели предстоя́ престо́лу Христо́ву,/ моли́ся о рабе́х твои́х.

И ны́не, Богоро́дичен: Кто Тебе́ не ублажи́т:

Та́же вход. Проки́мен дне. Чте́ния три.

При́тчей чте́ние (гла́вы 10, 3 и 8):

Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те прему́дрость, и сме́ртен, и́же уведе ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все́ же честно́е недосто́йно ея есть./ Долгота́ бо дней и ле́та живота́ в десни́це ея,/ в шу́ице же ея бога́тство и сла́ва./ От уст ея́ исхо́дит пра́вда, зако́н же и ми́лость на язы́це но́сит./ Послу́шайте у́бо ме́не, о ча́да, честна́я бо ре́ку,/ и блаже́н челове́к, и́же пути́ моя́ сохрани́т:/ исхо́ди бо мои́, исхо́ди живота́, и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смы́сл аз призва́х./ Мой сове́т и утвержде́ние, мой ра́зум, моя́ же кре́пость./ Аз ме́не лю́бящия люблю́, и́щущии же мене́ обрящут благода́ть./ Разуме́йте у́бо, незло́бивии, кова́рство, ненака́заннии же, прилага́йте сердца́./ Послу́шайте мене́ и па́ки, честна́я бо ре́ку,/ и отве́рзу от усте́н пра́вая, я́ко и́стине поу́чится горта́нь мой,/ ме́рзки же предо́ мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (гла́вы 10 и 11):

Уста́ пра́веднаго ка́плют прему́дрость, язы́к же непра́веднаго поги́бнет./ Устне́ муже́й пра́ведных ка́плют благода́ти, уста́ же нечести́вых развраща́ются./ Ме́рила льсти́вая – ме́рзость пред Го́сподем, вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их, и поползнове́ние отрица́ющихся упасе́т их./ Не по́льзуют име́ния в день я́рости, пра́вда же изба́вит от сме́рти./ Умер пра́ведный, оста́ви раска́яние, нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́, в нече́стие же па́дает непра́вда./ Пра́вда муже́й пра́вых изба́вит их, безсо́ветием же пленя́ются беззако́ннии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет, вме́сто же его́ предае́тся нечести́вый./ Во усте́х нечести́вых сеть гра́жданом, чу́вство же пра́ведных благопоспе́шное./ Во благи́х пра́ведных испра́вится град, и в поги́бели нечести́вых ра́дование./ Во благослове́нии пра́вых возвы́сится град, усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется,/ седи́на же есть му́дрость челове́ком, и во́зраст ста́рости – житие́ нескверно́е./ Благоуго́ден Бо́гови быв, возлю́блен бысть и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая и паре́ние по́хоти пременя́ет ум незлобив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́ди же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во и́збранных Его́.

На лити́и стихи́ра хра́ма, и свята́го, самогла́сны. Глас 8:

Преподо́бне о́тче, святи́телю Алекси́е,/ а́ще ка́я страна́ или́ кий град молчи́т,/ но вси, и́же тобо́ю просвеще́ннии,/ чуде́с твои́х мно́жество слы́шаще и ви́дяще,/ и мы с ни́ми похва́льными пе́сньми вопие́м и глаго́лем:/ благода́тию Пресвята́го Ду́ха Христо́вым апо́столом подо́бник был еси́/ и вселе́нную всю просвеща́вши,/ те́мже и до царя́ доидо́ша словеса́ чуде́с твои́х, я́ко луча́,/ и да́льным я́ко близ сия́юща./ И нас от бед и находя́щих лют свободи́ твои́ми моли́твами.

Кто дово́лен есть до́блестей твои́х исчести́, преподо́бне о́тче, труды́?/ Кто бо, слы́ша безме́рное твое́ смире́ние, и терпе́ние, и чадолю́бие, не удиви́тся?/ Ка́ко у́бо не усумне́вся ни ма́ло,/ егда́ слы́ша проше́ние царя́ беззако́нна:/ да ми по́слеши, – рече́, – о́наго, больны́м здра́вие подава́ющаго,/ и слепы́м прозре́ние, и хромы́м тече́ние, и бесово́м прогони́теля;/ да ми сего́ по́слеши, да умо́лит своего́ Бо́га и исцели́т мою́ цари́цу,/ отжене́т бе́са и о́чи просвети́т./ О́ле проше́ния, превосходя́ща челове́ческия ра́зумы!/ О, ди́вство, бра́тие!/ кто не удиви́тся,/ или́ кто не похва́лит кре́пкаго сего́ хра́бреника?/ Не то́кмо бо не усумне́ся, но и, су́щих с ним подкрепля́я, глаго́лаше:/ пожди́те, не скорби́те, но упова́ние возложи́те на Бо́га/ и на Пречи́стую Его́ Ма́терь/ и у́зрите сла́ву Бо́жию.

Блага́го Учи́теля Христа́ благи́й учени́к,/ святи́телю Христо́в Алекси́е,/ до́брому Па́стырю Христу́ поревнова́л еси́,/ ду́шу твою́ полага́я за о́вцы,/ и царе́во свере́пство, я́ко льво́во зия́ние, во о́вчую кро́тость премени́л еси́,/ и цари́цу исцели́л еси́,/ и ста́ду твоему́ скорбь на ра́дость преложи́л еси́,/ и Це́ркви мир устро́ил еси́,/ вели́каго же князя возвесели́л еси́./ Тем мо́лимся тебе́:/ моли́ о нас Человеколю́бца Влады́ку Христа́,/ да спасе́т ду́ши на́ша.

Сла́ва, глас 6:

Егда́ прише́л еси́ от царя́,/ мир церко́вный, о́тче, нося́,/ тогда́ святи́телие и церко́внии собо́ри, и народи́/ ра́достно срета́ху тя,/ свободи́теля благода́рно нарица́ху,/ о́вии же, я́ко победи́телю да́ры нося́ще,/ ра́достию покланя́хуся./ Князь же вели́кий Дими́трий со слеза́ми вопия́ше ти:/ О вла́дыко!/ что ти возда́мы проти́ву труду́ твоему́,/ и́мже нам мир дарова́л еси́?/ Но у́бо, святи́телю Алекси́е,/ моли́ся приле́жно Христу́ Бо́гу на́шему,/ я́ко спасти́ся гра́ду твоему́ невоева́ну.

И ны́не, Богоро́дичен:

По́слан бысть с Небесе́ Гаврии́л Арха́нгел/ благовести́ти Де́ве зача́тие/ и, прише́д в Назаре́т, помышля́ше в себе́, чудеси́ удивля́яся:/ о, ка́ко в Вы́шних Непостижи́м Сый от Де́вы ражда́ется?/ име́яй престо́л Не́бо и подно́жие зе́млю во утро́бу вмеща́ется Деви́чу?/ На Него́же шестокрила́тии и многоочи́тии зрети не мо́гут,/ сло́вом еди́нем от Се́я воплоти́тися благоизво́ли./ Бо́жие есть Сло́во настоя́щее,/ что у́бо стою́ и не глаго́лю Де́ве:/ ра́дуйся, Благода́тная, Госпо́дь с Тобо́ю;/ ра́дуйся, Чи́стая Де́во;/ ра́дуйся, Невесто Неневестная;/ ра́дуйся, Ма́ти Живота́,/ благослове́н Плод чре́ва Твоего́.

На стихо́вне стихи́ры, глас 2.

Подо́бен: До́ме Евфра́фов:

Дом Свята́го Ду́ха/ и вселе́ние благода́ти/ Алекси́й явйся:/ и ны́не, в па́мять его́ соше́дшеся,/ того́ воспое́м.

Стих: Восхва́лятся преподо́бнии во сла́ве/ и возра́дуются на ло́жах свои́х.

Ты еси́ святи́телем похвала́,/ свяще́нником удобре́ние,/ мона́хом пра́вило,/ и мы ти вопие́м, святи́телю Алекси́е:/ ра́дуйся, Це́ркве утвержде́ние.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Приими́ ны́не пе́ние/ чад твои́х, о́тче,/ ве́рою пра́зднующих,/ и лю́бящим тя подава́й/ я́же на по́льзу проше́ния.

Сла́ва, глас 6. Самогла́сен:

Благи́й ра́бе,/ ве́рный де́лателю виногра́да Христо́ва,/ ты и тяготу́ дневну́ю поне́сл еси́,/ ты и да́нный ти тала́нт возрасти́л еси́/ и по тебе́ прише́дшим не зави́дел еси́./ Те́мже врата́ Небе́сная отверзо́шася тебе́:/ вни́ди в ра́дость Го́спода твоего́/ и моли́ о нас, свя́те Алекси́е.

И ны́не: Творе́ц и Изба́витель:

На благослове́нии хлебов тропа́рь свята́го два́жды и Богоро́дице Де́во: еди́ножды.

Тропа́рь, глас 8:

Я́ко апо́столом сопресто́льна,/ и врача́ предо́бра, и служи́теля благоприя́тна,/ к раце твое́й честне́й притека́юще, святи́телю Алекси́е, Богому́дре чудотво́рче,/ соше́дшеся, любо́вию в па́мять твою́ светло́ пра́зднуем,/ в пе́снех и пе́ниих ра́дующеся и Христа́ сла́вяще,/ такову́ю благода́ть тебе́ дарова́вшаго исцеле́ний/ и гра́ду твоему́ вели́кое утвержде́ние.

Ин тропа́рь, глас 4:

Апо́стольских до́гмат опа́сна храни́теля,/ Це́ркве Русския па́стыря и учи́теля,/ преблаже́ннаго Алекси́я святи́теля па́мять пра́зднующе,/ славосло́вим Христа́ Бо́га на́шего пе́сньми достодо́лжными,/ дарова́вшаго нам уго́дника Своего́,/ я́ко оби́льный исто́чник, точа́щ врачева́ния,/ гра́ду же Москве́ похвалу́ и утвержде́ние.

Ин тропа́рь, глас 8:

Я́ко светоно́сная возсия́ днесь па́мять твоя́, сла́вне,/ ве́рных озаря́ющи ду́ши и телеса́,/ и исцеле́ния струи́ Богоприя́тными ти моли́твами источа́еши,/ о́тче святи́телю Алекси́е,/ Те́мже тя мо́лим, я́ко архиере́ом сопресто́льна и чудоде́йственника изря́дна,/ и́же Христо́ву Престо́лу предстоя́й,/ о нас не оскудева́й моля́ся спасти́ся душа́м на́шим.

Сла́ва, и ны́не, Богоро́дичен.

На у́трени

На Бог Госпо́дь: тропа́рь свята́го, два́жды.

Сла́ва, и ны́не, Богоро́дичен.

По 1-й стихоло́гии седа́лен, глас 8:

На́ста светоно́сный день: чудотво́рца, архиепи́скопа Алекси́я па́мять,/ прииди́те, соше́дшеся, пра́зднуем светло́ и соста́вим ли́ки,/ похвала́ми почти́м его́ и рцем ему́:/ ра́дуйся, честны́й свети́льниче Русския земли́,/ источа́еши бо чудеса́, и излива́еши исцеле́ния,/ и мо́лишися о душа́х на́ших.

Сла́ва, и ны́не, Богоро́дичен:

Да Твой па́ки сози́ждеши о́браз, истле́вший страстьми́, Спа́се,/ Небе́сных утаився суще́ств, воплоти́лся еси́ от Де́вы,/ Е́йже согла́сно возопи́ем:/ ра́дуйся, Благода́тная, Госпо́дь с Тобо́ю.

По 2-й стихоло́гии седа́лен, глас 4:

Прииди́те, торжеству́ем светло́, пра́зднующии па́мять иера́рха, Алекси́я чудотво́рца,/ преста́вися бо от земли́ к невеще́ственным, оби́телем,/ иде́же зрит добро́ту неизрече́нную,/ А́нгельским во́инством собесе́дник я́влься./ Те́мже со апо́столы и му́ченики лику́я, о́тче наш, Алекси́е преподо́бне,/ приле́жно моли́ся Влады́це Христу́ о чту́щих ве́рою па́мять твою́.

Сла́ва, и ны́не, Богоро́дичен:

Стена́ необори́мая нам христиа́ном еси́, Богоро́дице Де́во:/ к Тебе́ бо прибега́юще, невреди́ми пребыва́ем/ и, па́ки согреша́юще, и́мамы Тя мо́литвенницу./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

По полиеле́и седа́лен, глас 8.

Подо́бен: Прему́дрости:

Пропове́дует, о́тче, твоя́ чудеса́ ны́не Русская митропо́лия/ и вся оте́чествия и страны́ чудоде́йствия,/ и́миже вся от боле́зней ско́рбных избавля́вши,/ Богоблаже́нне Алекси́е,/ пита́телю вдов и сиро́т оте́ц,/ помо́щник су́щим в ско́рби всеизря́ден,/ пла́чущим утеше́ние, па́стырь и наста́вник всем заблужда́ющим,/ Алекси́е преподо́бне./ И нас твои́ми моли́твами от бед изба́ви/ и моли́ся Христу́ Бо́гу,/ да грехо́в оставле́ние пода́ст ве́рою и любо́вию чту́щим святу́ю па́мять твою́.

Сла́ва, и ны́не, Богоро́дичен:

Ра́дуйся, А́нгелом ра́дость ми́ра прие́мшая;/ ра́дуйся, ро́ждшая Творца́ Твоего́ и Го́спода;/ ра́дуйся, сподо́бльшаяся бы́ти Ма́ти Бо́жия.

Та́же степе́нна, 1-й антифо́н 4-го гла́са. Про́кимен, глас то́йже: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Вся́кое дыха́ние: Ева́нгелие от Иоа́нна, зача́ло 36. Та́же псало́м 50.

По 50-м псалме́ стихи́ра, глас 6:

Неиздае́ма есть благода́ть святи́теля Алекси́я,/ ю́же прия́т от всех Христа́ Бо́га,/ тем и честныя́ его́ мо́щи Бо́жиею си́лою вы́ну содевают чудеса́/ и всех, ве́рою призыва́ющих и́мя его́, от неисцельных неду́г изменя́ют./ Его́же моли́твами, Го́споди,/ христолюби́вым людем посо́бствуй на враги́/ и належа́щих скорбе́й душе́вных и теле́сных свободи́,/ я́ко Человеколю́бец.

Кано́н Богоро́дицы, со ирмосо́м на 6, и свята́го на 8. Глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спа́се,/песнь Бо́гови воспева́юща.

Колесни́цею благода́ти Твое́й, Го́споди, возвы́си на́ша по́мыслы от до́льних на Го́рняя/ и сподо́би восхвали́ти уго́дника Твоего́, святи́теля Алекси́я,/ песнь Тебе́, Бо́гу, воспева́юща.

Колесни́цею хода́тайств твои́х/ ум наш, отягче́нный жите́йскими печа́льми, возвы́си от земны́х к Небе́сным/ и наста́ви восхвали́ти тя досто́йно, о́тче Алекси́е,/ песнь побе́дную Бо́гу воспева́юща.

Колесни́цу го́рдости ми́ра сего́ превозше́л еси́ смире́нием,/ и, взем крест твой, после́довал еси́ Христу́ добро́тами,/ и, во приста́нище го́рняго селе́ния дости́г,/ песнь Бо́гу побе́дную воспева́еши.

Колесни́цею доброде́телей, я́ко Илия́ о́гненною, возше́л еси́ на Не́бо,/ отону́дуже моли́ Бо́га низпосла́ти я́ко ми́лоть благода́ть Ду́ха,/ уча́щую ны песнь побе́дную Бо́гу воспева́ти.

Богоро́дичен: Колесни́ца огнеобра́зная, носи́вшая Бо́га Сло́ва,/ во чре́ве Твое́м воплоще́ннаго,/ моли́ Его́ приле́жно спасти́ся рабо́м Твои́м,/ к Тебе́ притека́ющим и побе́дную песнь Бо́гу воспева́ющим.

Ин кано́н. Творе́ние иеромона́ха Епифа́ния Славини́цкаго, Феоло́га, жи́вша во оби́тели его́. Глас 4.

Песнь 1

Ирмо́с: П ои́м, лю́дие, ди́вно чудоде́йствовавшему/ в Чермне́м мо́ри Христу́ Бо́гу,/ я́ко дре́вле Изра́иля всевооруже́на/ стопа́ми пешеше́ствовати непрохо́дную сотвори́/ и зло́бы делода́теля фарао́на во глубине́ потопи́.

Богосия́тельными Триипоста́снаго Све́та зарями Богови́дно озаре́нный,/ златоза́рный свети́льниче церко́вный, Богому́дре Алекси́е, мо́лим тя:/ светоно́сными твои́х моли́тв луча́ми в достоле́пую твою́ похвалу́/ просвети́ ум тя хва́лящих.

Христоподража́тельный а́нгеле земны́й,/ Богомы́сленный Небе́сным А́нгелом собесе́дниче,/ Боговенча́нный а́дских а́нгел победи́телю,/ удосто́ивыйся зрети вели́каго сове́та А́нгела, Бо́га воплоще́нна,/ треблаже́нне Алекси́е, мо́лим тя:/ твои́ми Боговнуша́емыми мольба́ми изба́ви ны от душевре́дных прилог а́дских.

Горьково́дною душетле́нных прегреше́ний буре́ю потопля́еми,/ к тебе́, я́ко досточу́дну вла́ющагося мо́ря утиши́телю, прибега́юще, вопием:/ свя́те Алекси́е, твои́ми Богоуго́дными моли́твами утиши́ волну́ющееся страсте́й на́ших мо́ре.

Богоро́дичен: Светоно́сный облаче, одожди́вый нам дождь Небе́сный, воплоще́нное Сло́во Божие,/ Богороди́тельнице Де́во, небото́чною Твоего́ благоутро́бия водо́ю/ погаси́ огнепа́льный вредоно́сных страсте́й на́ших пламень.

Песнь 3

Ирмо́с: Небе́снаго кру́га Верхотво́рче Го́споди,/ и Це́ркве Зижди́телю,/ Ты ме́не утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Небе́снаго кру́га и всея́ тва́ри Госпо́дь,/ предве́дый тя, о́тче Алекси́е, бу́дуща па́стыря добра́,/ вве́ри тебе́ па́ству слове́сную, я́ко Еди́н Человеколю́бец.

Небе́снаго кру́га возлюби́в Творца́,/ посто́м облегче́н, страсте́й мо́ре преше́л еси́ и, на безстра́стия верх доброде́тельми возше́д,/ Бо́га узре́л еси́, Еди́наго Человеколю́бца.

Небе́снаго кру́га на высоту́ возше́д Богоразу́мием,/ уви́дел еси́ у́мно та́мо неизрече́нная/ и прия́л еси́ дар чудотворе́ния от Бо́га Человеколю́бца.

Богоро́дичен: Небе́снаго кру́га Верхотво́рца, хотя́ща роди́тися из Тебе́, Пречи́стая, возвести́ Тебе́ Гаврии́л:/ ра́дуйся, Де́во, Госпо́дь с Тобо́ю, Еди́н Человеколю́бец.

Ин

Ирмо́с: Да не хва́лится мудр хваля́йся,/ но о се́м е́же разумева́ти,/ я́ко несть свят, я́ко Бог наш,/ вознося́й рог наш,/ дая́й кре́пость царе́м на́шим.

Тя, Богому́дра ко́рмчия,/ Небе́сным сло́ва Бо́жияго корми́лом Богохрани́мый кора́бль Русския Це́ркве/ к благоти́шному ве́чныя жи́зни при́станищу пра́ве корми́льствовавша, блажа́ще, мо́лим:/ всече́стне Алекси́е,/ к благове́дрой покая́ния тиши́не корми́льствуй ду́ши на́ша.

Душеспаси́тельну всемо́щнаго мо́ря Творца́ за́поведь благопоспе́шно сохра́ньша/ и бу́рная вла́ющагося мо́ря треволне́ния моли́твою́ утиши́вша,/ твои́м чудодействи́тельным предста́тельством утиши́ волну́ющуюся скорбе́й на́ших бу́рю.

Златото́чная реко́ Бо́жия, Небе́сными Ева́нгельскаго уче́ния вода́ми/ Богосажде́нный Це́ркве Русския рай наводни́вшая оби́льно,/ досточу́дне Алекси́е,/ небото́чною духо́вный ра́дости струе́ю напая́й скорбя́щия ду́ши на́ша.

Богоро́дичен: В Богозда́нном Богосло́вяще Це́ркве апо́стольския Не́бе,/ к Тебе́, светоно́сному незаходи́маго Со́лнца Не́бу, прибега́ем, вопию́ще:/ Всепе́тая Де́во, Твое́ю Небе́сною по́мощию помози́ нам,/ Тя блажа́щим, в Небе́сная всели́тися жили́ща.

Седа́лен, глас 4:

Благово́нною сло́ва Бо́жияго па́житию/ слове́сную па́ству Христо́ву Богоуго́дно воспита́нную,/ па́стырским Богодухо́вным исправле́ния жезло́м/ на пра́вую спасе́ния стезю́ путево́дствив я́ко до́брый па́стырь,/ удосто́ился еси́ нетле́нну ве́чныя жи́зни мзду восприя́ти/ в Го́рнем Сио́не от Пастыренача́льника Христа́ Бо́га./ Его́же моли́, досточу́дне Алекси́е,/ нам, твои́м о́вцам слове́сным, сохрани́тися от неви́димых волко́в хи́щных.

Сла́ва, глас 8:

Подо́бен: Прему́дрости:

Ду́хом Боже́ственным пома́зася верх твой свяще́нный, архиере́е Алекси́е,/ и сни́де на тя бла́годать бога́тно,/ и пребы́сть, я́ко ми́ро, на главе́ сходя́щее на браду́, браду́ Аа́роню,/ и сходя́щая, я́ко роса́ аермо́нская,/ и ороша́ющая ка́плями благодея́ний твои́х притека́ющия к ра́це моще́й твои́х/ и зову́щия тебе́ усе́рдно:/ о́тче преподо́бне, моли́ Христа́ Бо́га/ грехо́в оставле́ние дарова́ти/ чту́щим досто́йно святу́ю па́мять твою́.

И ны́не, Богоро́дичен:

Повеле́нное та́йно прие́м в ра́зуме,/ в кро́ве Ио́сифове тща́нием предста́ безпло́тный,/ глаго́ля Неискусобра́чней:/ приклони́вый схожде́нием Небе́са вмеща́ется неизме́нно весь в Тя,/ Его́же и ви́дя в ложесна́х Твои́х, прие́мша ра́бий зрак,/ ужаса́юся звати Тебе́:/ ра́дуйся, Неве́сто Неневе́стная.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́влъ не́дра О́тча/ и на́шу нищету́ посети́в./ Тем с проро́ком Авва́кумом зову́ Ти:/ си́ле Твое́й сла́ва, Человеколю́бче.

Ты моя́ кре́пость, Го́споди, Ты моя́ и си́ла, – вопия́, о́тче Алекси́е, прия́л еси́ дар/ теле́сныя неду́ги цели́ти и лука́выя ду́хи отгоня́ти от зову́щих Христу́:/ си́ле Твое́й сла́ва, Человеколю́бче.

Ты еси́ свети́ло Русския земли́ и гра́ду Москве́ стена́ неруши́ма,/ на враги́ же победи́тель,/ и христоимени́тым людем во бранех посо́бник,/ зову́щим Христу́/ си́ле Твое́й сла́ва, Человеколю́бче.

Ты Богосло́вил еси́ Едини́цу несозда́нную,/ в Трие́х Лицех су́щую, неслива́ему же и неразде́льну,/ воумля́я па́ству твою́, о́тче Алекси́е, непреста́нно зва́ти:/ си́ле Твое́й сла́ва, Человеколю́бче.

Богоро́дичен: Ты моя́ кре́пость еси́ вои́стинну и спасе́ние, Богоро́дице,/ и на Тя наде́жду мою́ возложи́х,/ спаси́ мя, Де́во Чи́стая, и укрепи́ ро́ждшемуся из Тебе́ звати:/ си́ле Твое́й сла́ва, Человеколю́бче.

Ин

Ирмо́с: Гла́сом благоглаго́ливым предразуме́в, Авваку́м/ зря́ще Сло́ва воплоще́ние и взыва́ше я́ве:/ слух услы́шах Бо́жия сове́та,/ Бог бо непрело́жно Челове́ком возбесе́дует,/ из горы́ гряды́й Де́вственнаго чре́ва/ и мир избавля́я/ началоро́дныя кля́твы.

Богосоде́янною смиренному́драго исправле́ния мре́жею/ неисче́тное рыб слове́сных мно́жество Богопоспе́шно уловле́й,/ Богому́дрый ло́вче, досточу́дный Алекси́е,/ Богокова́нною предста́тельства твоего́ у́дицею извлецы́ ны из глу́бокия зол мно́гих пучи́ны.

Небе́сным сло́ва Бо́жия врачевство́м/ душетле́нныя уврачевствова́вый людски́х грехопаде́ний язи́/ и Богоустро́енным кро́ткаго наказа́ния пла́стырем умовре́дныя исцели́вый ра́ны,/ безме́здный цели́телю, досточу́дный Алекси́е, мо́лим тя,/ исцели́ душевре́дныя грехо́в на́ших стру́пы.

Благоплодови́тое Богонасажде́ннаго са́да дре́во,/ благово́нныя прозя́бшее достохва́льных исправле́ний плоды́/ и плодоно́сныя просте́ршее к Не́бу Боговнуши́мых моле́ний ве́тви,/ всечу́дне Алекси́е, мо́лим тя:/ Богора́сленным твоего́ покрова ли́ствием/ осени́ ны от вредоно́снаго лю́тых бед же́га.

Богоро́дичен: К Тебе́, златоза́рная Све́та Неве́черняго заре́, Богороди́тельнице Де́во, прибега́ем, вопию́ще:/ светоза́рным Твоего́ защище́ния сия́нием разреши́ темнозра́чен о́блак печа́лей на́ших.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Вску́ю проти́внии ополча́ются на ны, иму́щия тя кре́пка побо́рника?/ Ты, о́тче Алекси́е, де́рзость их низложи́ и во́инство на́ше моли́твою твое́ю стра́шно им покажи́.

Вску́ю уныва́ем, согнета́емии мно́жеством печа́лей,/ иму́ще ско́рбных уте́шителя – святи́теля Алекси́я,/ избавля́юща ны от бед и скорбе́й на́ших/ и от враг ви́димых же и неви́димых?

Вску́ю, о́тче Алекси́е, теле́сныя не́мощи нахо́дят на ны, и беды́ окружа́ют ны,/ врача́ тя иму́щия в боле́знех и уте́шителя в ско́рбех?/ изми́ у́бо ны от сих моли́твами твои́ми.

Богоро́дичен: Вску́ю обурева́ют мя во́лны страсте́й,/ ко́рмчия Христа́ ро́ждшая, Де́во Всенепоро́чная?/ Ты Его́ моли́ сих исхи́тити мя/ и к стези́ за́поведей Его́ пути́ моя́ упра́вити, молю́ся.

Ин

Ирмо́с: Нощебори́мых страсте́й тиме́нием/ к Тебе́ у́тренюю, Еди́ному Благоутро́бному,/ души́ моея́ мглу просвети́ и у́зы пресеки́ долго́в мои́х,/ я́ко да Твои́м Соприсносу́щным Ду́хом просвеща́емь,/ пра́вды путь нетле́нный обря́щу повеле́ний Твои́х.

Слове́сную па́ству Христо́ву благово́нным Ева́нгельскаго уче́ния зла́ком Богоуго́дно воспита́вый/ и на пра́вый Христоподража́тельнаго жития́ путь Боголе́пно наставле́й, па́стырю до́брый,/ всеблаже́нне Алекси́е, мо́лим тя:/ твои́ми моли́твами наста́ви ны на пра́вую за́поведей Божиих стезю́.

Богозда́нный Ду́ха Свята́го сосу́де, чи́стым любве́ Бо́жия зла́том Боголе́пно позлаще́нный,/ Богому́дре о́тче Алекси́е,/ раждеже́нным сло́ва Божия сребро́м ча́да твоя́ обогаще́й оби́льно, мо́лим тя:/ твои́ми моли́твами пода́ждь нам Небе́сное Бо́жия благода́ти бога́тство.

Богонача́льному преми́рных умо́в ли́ку сообще́нный/ и Богосия́тельными Триипоста́снаго Све́та заря́ми Богови́дно озаре́нный,/ у́ме Богому́дрый, священнонача́льниче Алекси́е,/ Небе́сною Богооткрове́нныя ти му́дрости луче́ю просвеща́й свы́ше мра́чныя умы́ на́ша.

Богоро́дичен: Богора́сленный грозд, воплоще́нное Сло́во Бо́жие прозя́бшая,/ Богосажде́нная лозо́, Всенепоро́чная Де́во, мо́лим Тя:/ благово́нным Бо́жия благода́ти вино́м напая́й жа́ждущия ду́ши на́ша.

Песнь 6

Ирмо́с: Очи́сти мя, Спа́се,/ мно́га бо беззако́ния моя́/ и из глубины́ зол возведи́, молю́ся ,/ к Тебе́ бо возопи́х, и услы́ши мя,/ Бо́же спасе́ния моего́.

Очи́сти ны, Спа́се, от мно́гих грехо́в на́ших/ и боле́зни отжени́ моли́твами святи́теля Твоего́ Алекси́я,/ и мир Церква́м Твои́м подаждь и соедине́ние.

Очи́сти сердца́ на́ша и мы́сли хода́тайствы твои́ми, о́тче,/ и, прии́м от нас приноси́мыя тебе́ моли́твы,/ испроси́ у Христа́ обрести́ нам велию ми́лость.

Очи́стив се́рдце твое́, о́тче Алекси́е,/ и трость языка́ твоего́ изостри́в Ду́хом,/ написа́л еси́ в сердца́х ве́рных сло́во Богоразу́мия уче́ньми твои́ми.

Богоро́дичен: Очище́нну Тя Ду́хом, Всенепоро́чная, Арха́нгел Гаврии́л позна́в,/ зовяще Тебе́:/ ра́дуйся, Де́во Мариṙе, па́дших воззва́ние и кля́твы разреше́ние.

Ин

Ирмо́с: Из чре́ва а́дова во́пля моего́ услы́шал еси́ глас мой/ и возве́л еси́ от тли бу́ри прегреше́ний,/ обдержи́т бо, Спа́се,/ и погружа́ти искуша́ет, Бла́же:/ но я́коже пре́жде Ио́ну возве́л еси́ от тли́,/ и ме́не, молю́ся, Го́споди,/ предвари́в, спаси́.

Златоза́рная Русская звездо́,/ светоно́сными равноапо́стольских исправле́ний заря́ми/ Богозда́нное Це́ркве Бо́жия Не́бо озари́вшая светло́/ и темномра́чну ва́рварских наве́тов мглу разре́шшая Богопоспе́шно,/ всеблаже́нне Алекси́е,/ разреши́ те́мен напа́стей вра́жиих о́блак.

В Боголе́пную Невеще́ственнаго Бо́га сла́ву/ веще́ственныя хра́мы Бо́жия Боготща́тельно созда́вый,/ мы́сленный хра́ме Бо́жий, Богоносе Алекси́е, мо́лим тя,/ Богоуго́дными твои́ми мольба́ми Богоприе́мный храм Бо́жий сози́жди сердца́ на́ша.

Пагуборо́дное го́рдаго киче́ния те́рние исто́ргнувый/ и доброра́сленныя смиреному́драго Богомы́слия ле́торасли Богопоспе́шно возрасти́вый,/ благоплодови́тый Небе́снаго сада́ ко́реню, всечу́дне Алекси́е,/ насади́ в сердца́х на́ших Богорасти́тельный Богоуго́днаго смире́ния ко́рень.

Богоро́дичен: Всемо́щнаго морски́х треволне́ний утиши́теля,/ воплоще́нное Сло́во Бо́жие ро́ждшая,/ Богоро́дице Де́во,/ Небе́сною Твоего́ засту́пничества тишино́ю/ многобу́рную утиши́ скорбе́й на́ших молву́.

Конда́к, глас 8.

Подо́бен: Взбра́нной:

Боже́ственнаго и пречестна́го святи́теля Христо́ва,/ но́ваго чудотво́рца Алекси́я,/ ве́рно вси пою́ще, лю́дие, любо́вию да ублажи́м, я́ко па́стыря вели́каго,/ служи́теля же и учи́теля прему́дра земли́ Русстей./ Днесь, в па́мять его́ прите́кше,/ ра́достно возопие́м песнь Богоно́сному:/ я́ко име́я дерзнове́ние к Бо́гу,/ многообра́зных нас изба́ви обстоя́ний, да зове́м ти:/ ра́дуйся, утвержде́ние гра́ду на́шему.

И́кос:

Ди́внаго и пречестна́го чудотво́рца ви́дяще чудеса́,/ исцеле́ния подава́юща всем, от души́ с ве́рою притека́ющим,/ и Христо́вы лю́ди неви́димо посеща́юща,/ и зе́млю Русскую просвеща́юща,/ ра́достно от души́ вси, вку́пе соше́дшеся к раце моще́й его́,/ слышаще же и ви́дяще чуде́с мно́жество и исто́чник исцеле́ний неисчерпа́емь,/ чи́стыми сердцы́ и просвеще́нными ра́зумы, я́ко благоуха́нно кади́ло,/ плоды́ доброде́тельны от души́ принося́ще/ и ра́дующеся, воззове́м ему́, глаго́люще:/ ра́дуйся, о́тче, честны́й наш учи́телю,/ я́ко прия́л еси́ трудо́в твои́х воздая́ние/ и в Вы́шних водворя́ешися, о нас моля́ Человеколю́бца Бо́га./ Чуде́с дар прия́л еси́,/ земли́ Русстей оте́ц и учи́тель,/ и святи́телем изря́дная похвала́,/ и во́инству на́шему во бране́х посо́бник кре́пок./ Ра́дуйся, святи́телю Алекси́е, гра́ду на́шему утвержде́ние.

Песнь 7

Ирмо́с: От Иуде́и доше́дше, о́троцы/ в Вавило́не иногда́,/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

От Иуде́и отроко́м поревнова́в, огнепа́льныя стра́сти угаси́л еси́,/ Христу́ при́сно поя́, блаже́нне Алекси́е:/ отце́в Бо́же, благослове́н еси́.

От Иуде́и о́троки подража́л еси́,/ живу́щею бо в тебе́ Ду́ха благода́тию просве́щъся,/ воспе́л еси́ Христу́:/ отцев Бо́же, благослове́н еси́.

От Иуде́и о́троком ревну́ем,/ ви́дяще мо́щи твоя́ чудоточа́щия, любо́вию распаля́еми, Христу́ зове́м:/ отцев Бо́же, благослове́н еси́.

Богоро́дичен: От Иуде́и о́троцы Твое́ прообразиша Рождество́, Де́во Всечи́стая,/ огнь бо в пещи́ не опали́ их, пою́щих:/ отце́в Бо́же, благослове́н еси́.

Ин

Ирмо́с: Тя живопису́ющий ассири́йский пла́мень/ ю́ноши три спа́се, Го́споди,/ я́коже и Де́ву не опали́ Отрокови́цу,/ в Боже́ственном Рождестве́ Твое́м Боже́ственная искра́:/ препе́тый отцев Бо́же, благослове́н еси́.

Тя, я́ко от Небе́снаго врача́ дар исцеле́ния ту́не прие́мша,/ та́ко вредоно́сныя к тебе́ прибега́ющих язи́ ту́не исцелйвша,/ усе́рдно мо́лим, врачу́ безмездный, архиере́е Алекси́е:/ Небе́сною твои́х мольб цельбо́ю исцели́ лю́тыя неду́ги душ и теле́с на́ших.

Боготка́нная правосла́внаго благоче́стия ри́зо,/ многоце́нными превели́ких доброде́телей би́серми Боголе́пно удобре́ная,/ всехвальне Алекси́е, моли́ све́том одеяющася Бо́га/ в све́тлую ве́чныя жи́зни рйзу одеятися ду́шам на́шим.

Трудолюбный Богосажденнаго са́да де́лателю,/ благово́нную досточу́дных исправле́ний ка́ссию насади́вши/ и Богора́сленную постническаго воздержа́ния сми́рну в Боголюбйвом сердцы твое́м вкорени́вый,/ святе Алекси́е,/ Неботочную защищения твоего́ стакту изл́й на лю́бящая тя сердца́ на́ша.

Богоро́дичен: От Богосиятельнаго Пра́вды Со́лнца/ Богооткровенно па́че умо́в преми́рных озаря́ема,/ светоза́рная луно,/ Всенепорочная Дево,/ светоно́сною Твоея благода́ти лучею мра́чная просвети́ сердца́ на́ша.

Песнь 8

Ирмо́с: Царя́ Небе́снаго,/ Его́же пою́т вои А́нгельстии,/ хвали́те и превозноси́те во вся ве́ки.

Царя́ Небе́снаго хвали́ти учи́л еси́ па́ству твою́, зовы́й:/ по́йте и превозноси́те Христа́ во ве́ки.

Царя́ Небе́снаго умоли́ о нас, ча́дех твои́х,/ ра́достно пою́щих и превознося́щих Его́ во ве́ки.

Царю́ Небе́сному предстоя́, па́ству твою́ назира́й,/ пою́щую и превознося́щую Христа́ во ве́ки.

Богоро́дичен: Царя́ Небеснаго родила́ еси́, Дево,/ Его́же Ангели пою́т и превозно́сят во вся ве́ки.

Ин

Ирмо́с: Находя́щия в пла́мени/ беззако́ннаго мучи́теля веле́нием о́троки подража́юще,/ немо́лчными устна́ми/ в Вы́шних похва́льно возопии́м:/ Бла́же, преесте́ственно Сый Пресвяты́й,/ пою́щия Тя/ Све́том у́мным Твои́м озари́.

Небе́сною Богоприя́тныя моли́твы цельбо́ю/ телесну́ю ва́рварския цари́цы слепоту́ преесте́ственно исцели́вый,/ Богому́дрый, душе́вных и теле́сных неду́г цели́телю,/ всеблаже́нне Алекси́е, мо́лим тя:/ душе́вную исцели́ слепоту́ вредоно́сных прегреше́ний на́ших.

Церко́вная красото́,/ преосвяще́нная главо́,/ непоколе́бленный благоче́стия столпе́,/ Богозда́нный ве́ры степе́ню,/ неисчерпа́емая Боже́ственных чуде́с пучи́но, всече́стне Алекси́е,/ златото́чными твои́х мо́льб вода́ми вредоно́сен погаси́ огнь печа́лей на́ших.

Пагу́боносное грехопаде́ний ство́лие Боже́ственным любве́ Бо́жия огне́м Богоуго́дно соже́г/ и Богозда́нным ве́ры степе́нем/ к невеще́ственну огню́ преесте́ственну,/ в Живонача́льной Тро́ице Бо́гу, приступи́в благогове́йно, преподо́бне о́тче Алекси́е,/ от гее́нскаго огня́ изба́ви ду́ши чад твои́х, тя блажа́щих.

Богоро́дичен: Присносу́щную Жизнь,/ воплоще́нное Сло́во Божие па́че сло́ва челове́ча и́стинно ро́ждшая,/ Всепе́тая Богоро́дице Де́во, мо́лим Тя:/ изба́ви ны, рабы́ Твоя́, от ве́чныя сме́рти.

Песнь 9

Ирмо́с: Вои́стиину Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Вои́стинну свет ми́ру яви́лся еси́, светя́щ добро́детельми,/ и па́стырь изря́ден твоего́ ста́да был еси́,/ Христа́ велича́юща.

Вои́стинну ве́мы тя, о́тче, чудотво́рца вели́ка,/ точа́ща мно́га чудеса́ ве́рно к тебе́ приходя́щим/ и Христа́ велича́ющим.

Вои́стинну светло́ па́мять пра́зднуют святи́теля Алекси́я/ архиере́и, и свяще́нницы, мона́си и вси лю́дие,/ Христа́ Бо́га велича́юще.

Богоро́дичен: Вои́стинну Ты еси́ христиа́ном спасе́ние:/ Христа́ бо родила́ еси́, спаса́ющаго ны,/ Де́ву Чи́сту Тя велича́ющия.

Ин

Ирмо́с: В Тебе́, Богоро́дице, на́ше умале́ние преста́,/ неви́димое бо Сло́во/ во утро́бе Твое́й прие́мшая,/ сугу́ба Того́ родила́ еси́,/ Бо́га вку́пе и Челове́ка,/ на Него́же Херуви́ми воззре́ти не дерза́ют./ Те́мже Тя велича́ем, Пречи́стая.

Благови́дною архиере́йских исправле́ний красото́ю/ Богопоста́вленный престо́л твой Боголе́пно украси́вый, первопресто́льный иера́рше, всече́стне Алекси́е,/ моли́ седя́щаго на преми́рных престо́лех Бо́га/ удосто́итися нам, тя блажа́щим, в Ца́рствии Небе́сном предста́ти Бо́жию престо́лу.

К чудотво́рным твои́м моще́м притека́юще усе́рдно,/ мо́лим тя, чудото́чный исто́чниче, досточу́дне Алекси́е:/ Богото́чною Боже́ственных чуде́с твои́х струе́ю/ угаси́ раждеже́ное бед и печа́лей на́ших горни́ло.

С ца́рствуемым ми́ром правосла́вныя лю́ди на́ша от вся́ких бед защити́/ Богозда́нный правосла́вия щи́те/ и Це́ркви Ру́сския первопресто́льный иера́рше, всеблаже́нне Алекси́е,/ в Боголе́пое церкве́й Божиих благострое́ние даждь свы́ше Небе́сную по́мощь.

Богоро́дичен: Богови́дцем Моисе́ем ви́денная в Сина́и купино́ неопа́льная,/ огнь Боже́ственный, воплоще́нное Сло́во Бо́жие ро́ждшая, Всесвята́я Де́во,/ Небе́сным любве́ Бо́жия огне́м разжзи́ оледе́вшая сердца́ на́ша.

Свети́лен:

Благода́ть Свята́го Ду́ха, все́льшаяся в тя, святи́теля́ тя пока́за,/ Христо́с же ти вручи́ па́ству Свою́ па́ствити на па́житех духо́вных,/ Его́же ра́ди потща́лся еси́ наставля́ти лю́ди,/ и ны́не на Небесе́х, ра́дуяся, живе́ши.

Сла́ва, и ны́не, Богоро́дичен:

По Бо́зе упова́ние иму́ще на Тя, Пречи́стая Богоро́дице,/ мо́лим Ти ся,/ ко и́же из Тебе́ Ро́ждшемуся мольба́ми/ невреди́мы нас до конца́ сохрани́.

На хвали́тех стихи́ры на 4, глас 8.

Подо́бен: Что вы нарече́м:

Что тя нарече́м, святи́телю Алекси́е?/ Звезду́, озаря́ющу поднебе́сная,/ ми́ра красова́ние всечестно́е,/ сего́ луча́ми озаря́юща веле́нии благове́рия/ и е́реси тьму отгоня́юща./ Моли́, преподо́бне,/ от тли и бед изба́витися/ ве́рою творя́щим па́мять твою́.

Что тя нарече́м, преподо́бне святи́телю Алекси́е?/ Ре́ку, излива́ющу исцеле́ния незави́стно/ всем, ве́рою приходя́щим,/ исто́чник, источа́ющ уче́ний медото́чных,/ во вся концы́ простира́ют/ и ве́рныя просвеща́ющ./ Моли́ся, преподо́бне,/ спасти́ся душа́м на́шим.

Что тя ны́не нарече́м,/ святи́телю Алекси́е,/ преди́вный чудотворче?/ врача́ разу́мна и безме́здна,/ исцелева́юща вся́ку язю́ душе́вную и теле́сную,/ Безпло́тным равноче́стна./ Моли́ся, преподо́бне,/ спасти́ся душа́м на́шим.

Сла́ва, глас 6:

Челове́че Бо́жий и ве́рный ра́бе, слуго́ Госпо́день,/ му́жу жела́ний, сосу́де избра́нный,/ сто́лпе и утвержде́ние Це́ркве,/ Ца́рствия насле́дниче,/ не премолчи́, вопия́ за ны ко Го́споду.

И ны́не, Богоро́дице, Ты еси́ лоза́:

Славосло́вие вели́кое и отпу́ст.

На литурги́и

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Апо́стол ко Евре́ем, зача́ло 335. Аллилу́ия: Воззва́ша пра́веднии: Стих: Мно́ги ско́рби пра́ведным: Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

На Го́споди, воззва́х: стихи́ры Окто́иха 3: и Меле́тия 3, глас 4.

Подо́бен: Я́ко до́бля:

Пло́ти по Ипоста́си соедини́вшася Безпло́тнаго/ и Отцу́ Собезнача́льнаго Сло́ва, всему́дре,/ кроме́ преложе́ния и слия́ния му́дре научи́л еси́;/ де́йствующа же сугу́бо обои́ми естествы́,/ из ни́хже слежи́т и в ни́хже зри́тся,/ Еди́н Сый неразде́лен существо́м,/ в се́м и о́ном разумева́емый.

Поучи́вся, блаже́нне, святи́телю Меле́тие, в зако́не Госпо́дни,/ я́коже писа́ся, дре́во яви́лся еси́, на вода́х поще́ния стоя́щее/ и плоды́ доброде́телей предлага́ющее благода́тию/ просвети́вшаго святу́ю ду́шу твою́/ и вся́ческих прия́тельну соде́лавша духо́вных осия́ний.

Украси́шася, всему́дре, писа́тельне лани́ты твоя́,/ я́ко го́рлицы, лю́бящия воздержа́ние и пи́щу оплева́ющия,/ жела́нием, Меле́тие, пи́щи разу́мныя,/ ю́же тебе́ Христо́с да́рует, прие́м мно́гия твоя́ труды́/ и ре́вность разжже́нную, ю́же име́л еси́,/ предбе́дствуя ве́ры ра́ди.

Сла́ва, и ны́не, Богоро́дичен:

Я́ко моли́тву неусыпа́ющу/ и мольбу́ пребы́вающу иму́щи, Пречи́стая, ко Го́споду,/ напа́сти успи́, во́лны укроти́ окая́нныя моея́ души́/ и в ско́рби су́щей се́рдце мое́ уте́ши,/ Отрокови́це, молю́ Тя,/ и облагодати́ ум мой,/ я́ко да досто́йно Тя просла́влю.

Крестобогоро́дичен, глас и подо́бен тойже:

А́гнца и Па́стыря Тя на Дре́ве я́ко ви́де,/ Агница рождшая рыда́ше и ма́терски Тебе́ веща́ше:/ Сы́не возжеле́нне, ка́ко на Дре́ве Кре́стнем пове́шен еси́, Долготерпели́ве?/ ка́ко ру́це и но́зи Твои́, Сло́ве, пригвозди́шася от беззако́нных,/ и кро́вь Твою́ излия́л еси́, Владыко?

Тропа́рь, глас 4:

Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́,/ я́же веще́й и́стина,/ сего́ ра́ди стяжа́л есй смире́нием высо́кая,/ нището́ю бога́тая./ О́тче Меле́тие,/ моли́ Христа́ Бо́га/ спасти́ся ду́шам на́шим.

Кано́н, его́же краегране́сие: Твоя́ похвалы́ изъявля́ю, всеблаже́нне.

Глас 8.

Песнь 1

Ирмо́с: Колесницегони́теля фарао́ня погрузи́,/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же, беглеца́, пешехо́дца спа́се,/ песнь Бо́гови воспева́юща.

Светода́вцу предстоя́ весь све́тел,/ све́том ра́зума омраче́нное о́ко души́ моея просвети́/ и мглу отжени́ страсте́й твои́ми моли́твами,/ я́ко святи́тель бо, преподо́бне, имаши дерзнове́ние, Меле́тие.

В не́дрех Отца́ седяй,/ Соприсносу́щное и Соесте́ственное Сло́во ро́ждшему,/ пропове́дника Своего́ Божества́ поставля́ет еди́н, я́ко апо́столом единонра́вна тя ны́не,/ о Богоявле́нее Меле́тие.

Боже́ственным просвети́вся сия́нием,/ от Безнача́льнаго Отца́ единоро́дна Сло́ва, несозда́нна, ве́чна, Богосло́вил еси́, преподо́бне,/ А́риевы же побо́рники единомы́сленныя разгна́л еси́,/ Бо́жественным всеору́жием огражда́емь.

Богоро́дичен: Воплоще́ннаго, Пресвята́я, родила́ еси́, пре́жде безпло́тнаго, Богонача́льнаго Сло́ва:/ Еди́на бо от ве́ка луча́ми чистоты́,/ де́вства же добро́тою/ и всенепоро́чными дарова́нии была́ еси́ досто́йна, Всенепоро́чная.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на во́дах основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Тверде́йшу ду́шу адама́нта имеяй,/ гнило́е ересе́й мне́ние ты, уче́ньми благоче́стия просве́щься, всеблаже́нне, оплева́л еси́./ Те́мже, вернии, тя вси пе́сньми, Богому́дре, почита́ем.

Уподо́бився доброде́тельми Христо́вым апо́столом,/ онех власть и престо́л насле́довал еси́ я́вственно, Меле́тие всесла́вне,/ правосла́вия столп и благоче́стия побо́рниче быв.

Всыновле́н Бо́гу,/ и́же от Бо́га Бо́га Сло́ва не низвел еси́ в тварь безу́мно,/ но просла́вил еси́, Отцу́ Собезнача́льна и Сопресто́льна,/ Соде́теля и Зижди́теля всех веко́в, Богоприя́тне.

Богоро́дичен: В Твою́ святу́ю Бог утро́бу всели́вся,/ воплотися, я́коже весть, Богома́ти,/ и спасе́ нас живоно́сными Свои́ми страстьми́,/ Те́мже Тя спасе́ния дверь, Де́во, зна́ем.

Седа́лен, глас 8.

Подо́бен: Прему́дрости:

Поучи́вся день же и нощь в зако́не Госпо́дни, о́тче му́дре,/ я́ко дре́во плодови́то, на во́дах духо́вных насажде́но, яви́лся ерй;/ Те́мже, свяще́нствовав Бо́гу непоро́чно,/ А́риева хуле́ния и Саве́ллиева злосла́внаго нра́ва я́ве возгнуша́вся,/ правосла́вною мы́слию, святи́телю Меле́тие,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Пло́тским неду́гом многови́дным и душе́вным страсте́м многообра́зным/ исцеле́ние обре́т Тобо́ю, Пренепоро́чная,/ печа́лем же разреше́ние, бе́дам и ско́рбем премене́ние гото́во и ско́ро избавле́ние,/ ве́рою несомне́нною и те́плым се́рдцем испове́даю Твоя́ ми́лости, Влады́чице,/ сы́ном же челове́ческим мно́гая Твоя́ чудеса́;/ и молю́ся, кро́вом крил Твои́х при́сно соблюсти́ и сохрани́ти мя всегда́.

Крестобогоро́дичен:

А́гнца, и Па́стыря, и Изба́вителя/ А́гница зря́щи на Кресте́, восклица́ше, пла́чущи/ и, го́рько рыда́ющи, вопия́ше:/ мир у́бо ра́дуется, прие́мляй Тобо́ю избавле́ние,/ утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неизчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оставлъ не́дра О́тча/ и на́шу нищету́ посети́в./ Тем с проро́ком Авва́кумом зову́ Ти:/ си́ле Твое́й сла́ва, Человеколю́бче.

Я́вственно, священнотаи́нниче, преизя́ществовав, Петра́ престо́л насле́довал еси́ верхо́внаго,/ от Христа́ рукоположе́ннаго,/ его́же и нра́ву поревнова́в,/ Сы́на Бо́га жива́го Спа́са просла́вил еси́,/ уче́нием О́наго после́дуя.

Всеразли́чными укра́шен дарова́ньми, единонача́лия пропове́дник был еси́,/ во Отце́ и Единоро́днем Сло́ве познава́емаго и Боже́ственнем Дусе, всему́дре,/ Едини́цу у́бо существо́м, в Тре́х Ли́цех су́шу,/ научи́л еси́, преподо́бне.

Воспита́вся добро́тами, Богоуче́нне, и заре́ю то́я вообража́емь,/ и просвети́вся Боже́ственными блиста́ньми по прича́стию,/ це́ркви свет вторы́й был еси́, Богоявле́нне,/ просвеще́ние благоче́стия явля́я ве́рою притека́ющим.

Богоро́дичен: Да о́браз, погребе́нный страстьми́, взы́щеши бога́тством бла́гости,/ в Деви́ческую всели́лся еси́ утро́бу/ и из нея́же Ты, Прему́дрость Бо́жия, храм созда́л еси́,/ и́мже пожи́л еси́ с челове́ки, Ще́дре,/ и спасл еси́ ми́ра концы́.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чу́ждая тьма, окая́ннаго?/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Жиру́юще безме́стно вся́кой е́реси, злоде́монстей,/ превше́л еси́, о́тче, благоро́дием души́,/ и све́тлостию, и всесвяты́м нра́вом, и тве́рдым благоче́стием,/ Богоявле́нне преблаже́нне Меле́тие.

Вся́ким усе́рдием А́риевы единому́дренники отвраща́я,/ Правосла́вною ве́рою, Богоно́се, держа́ву утверди́л еси́/ в Тро́ице Еди́наго Бо́га нам пропове́дуя,/ всеблаже́нне о́тче Меле́тие.

Пребоже́ственныя Тро́ицы таи́нник был еси́ всеи́стиннейший,/ Отцу́ Сло́во Единосу́щно честву́я и сопресто́льно/ и Боже́ственный Дух, единоесте́ствен Отцу́ и Сло́ву,/ всечестны́й о́тче Меле́тие.

Богоро́дичен: Во́инства вы́шних, Всечи́стая, сил Тя ублажа́ют,/ ро́дове же вси челове́честии досто́йно сла́вят,/ Тебе́ бо ра́ди еди́ныя, су́щии на земли́, с Небе́сными совоку́пльшеся,/ пою́т, Де́во Рождество́ Твое́.

Песнь 6

Ирмо́с: Очи́сти мя, Спа́се,/ мно́га бо беззако́ния моя́/ и из глубины́ зол возведи́, молю́ся:/ к Тебе́ бо возопи́х, и услыши мя,/ Бо́же спасе́ния моего́.

Изсуши́л еси́ пото́ки, Богому́дре, ерети́ческия,/ отверзл же еси́ исто́чники догма́тов пра́вости,/ непобеди́м побо́рник Правосла́вия быв, Богоблаже́нне.

Изсуши́в му́тный А́риев ток и безбо́жный,/ напои́л еси́ бога́тно благода́тными вода́ми ве́рных собо́ры/ и церко́вное благоле́пие украси́л еси́.

Живы́й подо́бно Боже́ственными начина́ньми,/ был еси́ пресве́тел, о́тче, де́латель,/ неукло́нно забра́ло благоче́стия и па́стырей наста́вник.

Богоро́дичен: Просвеща́ют ду́ши правосла́вно пою́щих Тя рече́ния проро́ческая,/ Твое́ провозвеща́юще пречи́стое зача́тие/ и е́же вы́ше Сло́ва, Богоневе́сто, Твое́ Рождество́.

Конда́к, глас 6:

Духо́внаго твоего́ дерзнове́ния у́боявся,/ отсту́пник бе́гает Македо́нии,/ моли́твенное же служе́ние соверша́юще, твои́ раби́,/ любо́вию притека́ем,/ А́нгелом собесе́дниче, Меле́тие,/ о́гненный мечу́ Христа́ Бо́га на́шего,/ вся безбо́жныя закала́яй:/ воспева́ем тя, свети́льника, просвети́вшаго вся.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пе́щи ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Святы́й тя собо́р первостоя́теля имя́ше, Богоприя́тне,/ его́же Святы́й Дух от коне́ц во еди́но собра́,/ песносло́вящия Того́ Божество́:/ благослове́н еси́, Бо́же оте́ц на́ших.

Равноче́стно получи́л еси́ председа́тельство апо́столов Христо́вых,/ и Боже́ственное сих уче́ние насле́довал еси́ и, житию́ подо́бяся, пел еси́:/ благослове́н еси́, Бо́же оте́ц на́ших.

Ум име́я остре́йш, к Боговиде́нию просте́рт,/ ерети́чествующих тупозре́нию поруга́лся еси́,/ благочести́выя же уча́, взыва́л еси́:/ благослове́н еси́, Бо́же оте́ц на́ших.

Богоро́дичен: Я́ко зерца́ло чи́сто, Твое́я чистоты́ блиста́ющося благода́тию,/ Светороди́тельница, Де́во, и Богоро́дица Всечи́стая была́ еси́./ Те́мже согла́сно Рождеству́ Твоему́ пое́м:/ благослове́н еси́, Бо́же оте́ц на́ших.

Песнь 8

Ирмо́с: Седмери́цею пещь/ халде́йский мучи́тель,/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Пресве́тло научи́л еси́ Еди́но чти́ти Божество́, е́же во Отце́, и Сы́не, и Дусе,/ и си́лу безме́рну, и ца́рство еди́но я́ве/ сво́йством, кре́пко соблюда́емым ко́ейждо Ипоста́си./ Ему́же и поя́, вопия́л еси́: лю́дие, превозноси́те во вся ве́ки.

Святы́ни храм, святи́телю, быв,/ вся освяща́еши, твое́ и́мя нарица́ти тща́щияся,/ и о́браз, о́тче, твой, любовию я́же к тебе́ напису́ющия, блаже́нне, и ве́рою пою́щия:/ благослови́те, вся дела́ Госпо́дня, Го́спода,/ по́йте и превозноси́те Его́ во ве́ки.

Тайнонаставле́ньми изря́днейшее твое́ ста́до просвети́л еси́,/ ны́не же перворо́дных Це́рковь возрасти́л еси́,/ приложе́ние быв от ве́ка просия́вшим святи́тельскими и та́йными слу́жбами./ С ни́миже вопие́ши непреста́нно:/ свяще́ннии, по́йте, лю́дие, превозноси́те Го́спода во ве́ки.

Богоро́дичен: Науча́еми, Всечи́стая, е́же на Тебе́ та́инством/ и бы́вшее Тобо́ю пожина́юще душа́м избавле́ние и спасе́ние,/ зове́м со Арха́нгелом Гаврии́лом Тебе́:/ ра́дуйся, – вопию́ще, – Богоро́дице, – и ве́рно песнопо́юще Тя,/ и превознося́ще, Чи́стая, во ве́ки.

Песнь 9

Ирмо́с: Ужасе́ся о се́м Не́бо,/ и земли́ удиви́шася концы́,/ я́ко Бог яви́ся челове́ком пло́тски и чре́во Твое́ быстъ простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Невеще́ственно невеще́ственному предстоя́,/ Его́же, и Зижди́теля всех и Го́спода, и О́тчее Сло́во, и Му́дрость,/ су́щественне и соесте́ственне су́ща, ты Богосло́вил еси́ све́тло,/ моля́, не преста́й спасти́/ и́же ве́рою тя, Богоглаго́ливе, хва́лящия.

Труды́ потя́щася духо́вными/ и усе́рдно еще́ борю́щася за него́ с духобо́рцы,/ тя зря Благи́й и Святы́й Дух, венча́в/ я́ко победи́теля, прия́т досто́йно,/ и с Вы́шними, всеблаже́нне, ликостоя́нии счисли́ тя.

По́двиги соверши́в благочести́вы,/ и тече́ние сконча́в добре́йшее,/ и пра́вей ве́ре научи́в всеблагоче́стно,/ пра́ведный вене́ц от всех Соде́теля прия́л еси́, Богоглаго́ливе,/ собо́ра учи́телей песнь от пе́сней предпосыла́я.

Богоро́дичен: Удо́бно, Богоро́дице, преити́ жития́ пода́ждь ми бу́рю,/ напа́стей настоя́ния и страсте́й, я́ко блага́ укротя́щи/ и наставля́ющи к доброде́тели, и стези́ пра́вости,/ да я́ко Благоде́тельницу непреста́нно велича́ю Тя.

На ма́лой вече́рни

На Го́споди, воззва́х: стихи́ры на 4, глас 8:

Прииди́те, ве́рнии,/ святи́теля на́шего пе́сньми почти́м,/ сей бо благоче́стия и́стинный ревни́тель бысть,/ ста́ду же своему́ па́стырь всеусе́рднейший,/ ему́же со умиле́нием припа́дающе вопием:/ Меле́тие всеблаже́нне,/ услы́ши мольбы́ люде́й твои́х, на тя упова́ющих.

Прииди́те, ча́да церко́вная,/ днесь бо подоба́ет песнь принести́ Влады́це,/ прия́л бо Всеще́дрый, его́ же возлюби́/ и со все́ми святы́ми к вели́чию сла́вы Свое́й приобщи́,/ его́ же ублажа́юще, возопии́м:/ святи́телю ми́лостивый, предстоя́ Святе́й Тро́ице,/ моли́ся во е́же спасти́ся нам.

Тро́ическое поклоне́ние принесе́м Влады́це и, припа́дающе, возопии́м:/ моли́твами святи́теля на́шего Меле́тия,/ Тебе́ ве́рно послужи́вшаго,/ изле́й на нас, люде́й Свои́х, мир и ве́лию ми́лость.

Сла́ва, глас то́йже:

Богому́дре о́тче наш Меле́тие,/ розго́ добропло́дная от Лозы́ Верхо́вныя Христа́ – Бо́га на́шего,/ блаже́н еси́ я́ко пра́вды добро́ту до конца́ возлюби́л/ и сего́ ра́ди си́рым и скорбя́щим, аки самому́ Го́споду, послужи́л,/ вся притека́ющия к тебе́ вся́чески удовли́л./ Тем же буди́ и нам, к тебе́ припа́дающим,/ тра́пеза благода́тно ве́рных насыща́ющая и ко Христу́ приобща́ющая.

И ны́не, Богоро́дичен, глас то́йже:

Небе́сную дверь и всех святы́х Святе́йшую/ похва́льными гла́сы священноле́пно воспое́м,/ из Тебе́ бо, Ма́ти Живота́ и Влады́чице,/ Боже́ственному А́гнцу плоть истка́ся,/ Же́ртва искупле́ния всему́ ми́ру бывше,/ от Не́я бо земноро́днии жизнь вкуси́хом и истле́ния свободи́хомся,/ кля́твы Ада́мовы изба́влени бы́хом./ Ему́же, первозда́нную добро́ту нам па́ки дарова́вшему, покланя́емся/ и Тебе́, Ма́терь Искупи́теля на́шего, сла́вяще, велича́ем.

На стихо́вне стихи́ры, глас 2.

Подо́бен: До́ме Евфра́фов:

О́тче, всеблаже́нне Меле́тие,/ ты бо, ревну́я о Го́споде, ста́до Христо́во ве́рно возлюби́л еси́,/ не я́ко нае́мник, но я́ко па́стырь до́брый, Спа́су твоему́ подража́л еси́,/ кро́тость и смиренному́дрие стяжа́л еси́,/ тем же и дарова́ся тебе́ вене́ц неувяда́емый жи́зни Еде́мския.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Чи́стыя моли́твы златокова́нная тру́бо, Богому́дре о́тче Меле́тие,/ воструби́ за ны ко Го́споду/ и умоли́ Вседержи́теля не помяну́ти непра́вд и беззако́ний на́ших,/ но я́ко Всеще́дру дарова́ти ми́ру от зол избавле́ние/ и спасе́ние душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

О́тче, всеблаже́нне Меле́тие,/ апо́стольских уче́ний ве́рный подража́телю/ и Ева́нгельския и́стины всеусе́рднейший глаша́таю,/ ты бо моли́твою и ми́лованием Христу́ Бо́гу угоди́л еси́/ и Це́ркви Небе́сныя дости́гл еси́,/ не преста́й у́бо моля́ся о благостоя́нии земны́я/ и о лю́бящих благоле́пие ея́.

Сла́ва, глас 2:

Всеблаже́нне святи́телю Меле́тие,/ Це́ркви Христо́вы служи́телю преди́вный/ и ста́да твоего́ храни́телю неусы́пный,/ моли́ Го́спода Сла́вы на ка́мене ве́ры всем нам утверди́тися,/ во е́же твори́ти во́лю Его́ сладкопе́сненно,/ тебе́ в ве́ре подража́юще.

И ны́не, Богоро́дичен, глас то́йже:

Влады́чице Блага́я,/ святи́и Твои́ ру́це к Сы́ну Твоему́ воздежи́,/ душелюби́вому Соде́телю, уще́дрити рабы́ Твоя́.

Тропа́рь, глас 4: зри на вели́цей вече́рни.

На вели́цей вече́рни

Блаже́н муж: 1-й антифо́н. На Го́споди, воззва́х: стихи́ры свята́го на 6, глас 4.

Подо́бен: Зва́нный свы́ше:

Уго́днику Божию и па́стырю Це́ркви Христо́вой Меле́тию достохва́льному/ прииди́те вси вене́ц сладкопе́вца в похвалу́ принесе́м;/ ра́дуйся, отце́в и подви́жников Це́ркви Правосла́вной подража́телю;/ ра́дуйся, Та́ин Бо́жиих ве́рный строи́телю;/ ра́дуйся, вдов и сиро́т неуста́нный попечи́телю./ Моли́ Христа́ Бо́га/ дарова́ти Це́ркви Святе́й единомы́слие, мир и ве́лию ми́лость.

Гроб и истле́ние упраздни́вшему,/ жизнь и воскресе́ние ми́ру дарова́вшему,/ Христу́ Жизнода́вцу прите́кл еси́,/ избра́нниче Бо́жий Меле́тие,/ от ю́ности вся су́етная ми́ра сего́ нивочто́же вмени́в/ и равноа́нгельское житие́ возлюби́в,/ па́стырем ста́да слове́снаго бы́ти сподо́бился еси́,/ Пастыренача́льнику труды́ твои́ми ве́рно послу́жив./ Его́же моли́, Богому́дре,/ дарова́ти Оте́честву на́шему и всей вселе́нней мир и ве́лию ми́лость.

О, преди́вне святи́телю Меле́тие,/ ты бо вся́кое злоче́стие му́дре посрами́л еси́,/ па́ству же свою́ от па́губных раско́лов и треволне́ний му́жественно огради́л еси́,/ си́це и нас от ко́зней и сете́й вра́жиих огради́,/ и непосты́дны Пра́ведному Судии́ приведи́./ Его́же моли́, всеблаже́нне,/ дарова́ти душа́м на́шим мир и ве́лию ми́лость.

Сла́ва, глас 6:

Днесь ра́дости испо́лнишася вся́ческая,/ днесь па́жить Ха́рьковская Богому́дрому па́стырю прино́сит похвалы́:/ ра́дуйся, нужда́вшихся косне́нием не утомля́вый/ и о по́мощи умоля́вших лица́ твоего́ не отвраща́вый;/ ра́дуйся, ди́вный кла́дезю благоче́стия и чистоты́;/ ра́дуйся, сосу́де, преиспо́лненный целому́дренной добро́ты,/ е́юже и на́ша сердца́ испо́лни,/ ми́лостивый па́стырю наш, Меле́тие.

И ны́не, догма́тик, глас 6: Кто Тебе́ не ублажи́т:

Вход. Проки́мен дне, и чте́ния три святи́тельская (зри страни́цы 413–415)

На литии́ стихи́ры свята́го, глас 5:

Избра́нниче Бо́жий и па́стырю ди́вный,/ пять ты́сящ пятию́ хле́бы Насы́тившему тепле́ подража́л еси́,/ о лю́дех милосе́рдствуя,/ хлеб неиму́щим в до́ме твое́м преизоби́льно подава́л еси́,/ моли́твы своя́, доброде́тельми украша́юще,/ бога́тство некра́домо у А́гнца, Взе́мшаго грехи́ ми́ра, обре́л еси́./ Моли́, иера́рше ми́лостивый Меле́тие,/ прича́стники Того́ бра́чныя ве́чери сотвори́тися тебе́ ве́рно моля́щимся.

Сла́ва, глас 6:

Ди́вен в по́двизех твои́х яви́лся еси́,/ чистото́ю душе́вною, я́ко багряни́цею, оде́ялся еси́,/ душе́вныя по́мыслы сла́достию ве́ры к Бо́гу утвержда́я,/ кро́тостию и пра́вдою в до́ме Бо́га на́шего процве́л еси́,/ моли́твою пла́мени о́гненнаго,/ А́нгельское дерзнове́ние пред Бо́гом стяжа́л еси́./ Моли́ Христа Бо́га спасти́ся ста́ду твоему́,/ Меле́тие, земли́ на́шея похвало́ и упова́ние.

И ны́не, Богоро́дичен, глас то́йже:

Ублажи́м, ве́рнии, го́рних сил Честне́йшую,/ Еди́ну Невмести́маго Вмести́вшую,/ Бо́га челове́ком пло́тию Рождшую – Пречи́стую Де́ву Богоро́дицу,/ Ю́же во́инства Небе́сная, я́ко Ма́терь Го́спода Своего́, непреста́нно велича́ют,/ челове́цы же, наде́жду непосты́дную иму́ще, уми́льно взыва́ют:/ ра́дуйся, Ро́ждшая Спа́са душ на́ших.

На стихо́вне стихи́ры, глас 2.

Подо́бен: До́ме Евфра́фов:

Бога́тства некра́домаго му́драго стяжа́теля,/ прииди́те христолю́бцы целому́дренно обогати́мся, я́коже и сей:/ боля́щия и в ско́рбех су́щия посети́м,/ а́лчущия и жа́ждущия пра́вды бра́тскою трапе́зою соуте́шим,/ я́же есть человеколю́бия торжество́,/ в не́м бо Сам Влады́ка Сла́вы добротолю́бие се́рдца на́шего вся́чески благослови́т,/ егда́ Богому́драго Меле́тия добро́ты порфи́рою обогати́мся братолю́бне.

Стих: Восхва́лятся преподо́бнии во сла́ве,/ и возра́дуются на ло́жах свои́х.

От пло́ти и кро́ви челове́ческия роди́лся еси́, всеблаже́нне,/ и сия́ целому́дрием души́ твоея́ покори́л еси́,/ Богоуго́дное житие́ добре́ стяжа́л еси́, о́тче наш./ Де́ланием духо́вным, бде́нием всено́щным и и́ноческим воздержа́нием/ тве́рд ум Христу́ Бо́гу соблю́л еси́/ и доброде́тельми твои́ми, аки би́серми, укра́сился еси́./ Те́мже тя вси чтим и ублажа́ем, я́ко при́снаго о нас моли́твенника.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Житие́ твое́ пала́та кра́сная яви́ся, преподо́бне о́тче наш Меле́тие,/ в ней бо доброде́тель твоя́, я́ко мука́ и еле́й вдови́цы Саре́пты Сидо́нския не ума́лися,/ но я́ко алава́стр ми́ра благово́ннаго, благода́ти Бо́жией испо́лнися./ Сего́ ра́ди всем вся был еси́,/ вдов и сиро́т трапе́за неоскудева́емая,/ в ско́рбех и напа́стех су́щих – отра́да непрестае́мая./ Сицевы́я благода́ти не лиши́ и нас, тебе́ моля́щихся,/ во е́же дарова́тися нам ве́лией ми́лости.

Сла́ва, глас 6:

И́же вся ве́дый, я́ко Бог,/ Той тя предуве́де и предъизбра́,/ и я́ко свети́льника неме́ркнущия ве́ры тебе́ нам дарова́,/ Ты же, я́ко Илия́ сла́вный, ста́до твое́ от лжепроро́ков сохрани́л еси́,/ и сим вене́ц неувяда́емый стяжа́л еси́, всеблаже́нне,/ его́ же и нам сподо́битися моли́ Христа́ Бо́га,/ предста́телю наш те́плый, Меле́тие.

И ны́не, Богоро́дичен, глас то́йже:

Еди́ну Тя, ве́рнии, упова́ние непосты́дно има́мы, Влады́чице,/ Твои́ми моли́твами изба́ви нас от вся́ких враг, ви́димых и неви́димых,/ в беда́х и напа́стех буди́ нам избавле́ние непреодоле́нное,/ пред Бо́гом же предста́тельство Ма́терней любви́ преиспо́лненное./ Ты бо Рождество́м Твои́м мир спа́сшая,/ род челове́ческий с Бо́гом примири́ла еси́,/ вои́стину во успе́нии Твое́м нас не оставля́ющая.

На благослове́нии хлебов.

Тропа́рь свята́го два́жды, глас 4:

Ми́ра сего́ вре́менная, я́ко преходя́щая уразуме́л еси́,/ от ю́ности по́стническое и мно́готру́дное житие́ возлюби́л еси́, всеблаже́нне,/ иера́рхов сла́во и преподо́бных похвало́,/ Предве́чнаго Сло́ва усе́рдный благове́стниче,/ си́рых и неиму́щих кро́ве и прибе́жище./ Тем же в моли́твах пребыва́я, Христу́ у́треневати прилежа́л еси́/ и, Сего́ взыску́я, вене́ц неувяда́емый со все́ми свя́тыми стяжа́л еси́,/ о́тче наш, святи́телю Меле́тие,/ моли́ Христа́ Бо́га спасти́ся душа́м на́шим.

Богоро́дице Де́во, ра́дуйся: еди́ножды.

На у́трени

На Бог Госпо́дь: тропа́рь святаго два́жды. Сла́ва, и ны́не, Богоро́дичен, глас 4: Е́же от века:

По 1-м стихосло́вии, седа́лен, глас 5:

Ра́дуйтеся, лю́дие, и просла́вите Бо́га на́шего, ди́вно во святы́х Свои́х почива́ющаго,/ Его́же непреста́нно славосло́вят вся Небе́сная во́инства,/ Сей бо, я́ко Оте́ц щедро́т, воздви́же нам па́стыря верна́ и хода́тая пред Ним непосты́дна,/ в не́м бо благоволе́ние Бо́жие позна́хом.

Сла́ва, и ны́не, Богоро́дичен:

Всесвята́я Де́во, поми́луй нас, прибега́ющих с ве́рою к Тебе́, Благода́тней,/ и прося́щих те́плаго Твоего́ заступле́ния,/ мо́жеши бо всех спасти́, я́ко Блага́я су́щи Ма́ти Бо́га Вы́шняго,/ моли́твы Своя́ всемо́щныя при́сно вознося́щая, Благода́тная Мари́е.

По 2-м стихосло́вии седа́лен, глас 4:

Я́ко жезл Ааро́нов, в Це́ркви Христо́вой ди́вно процве́л еси́/ и красото́ю доброде́тели обле́клся еси́, благоче́стне Меле́тие,/ не пре́зри у́бо и нас, к тебе́ прибега́ющих,/ пред Бо́гом предста́тельства твоего́ и́щущих,/ моли́ Его́ во е́же спасти́ся нам.

Сла́ва, и ны́не, Богоро́дичен, глас 8:

Те́плая Предста́тельнице и непобеди́мая За́ступнице,/ упова́ние христиа́н непосты́дное, стено́ и покро́ве, и приста́нище, прибега́ющих к Тебе́,/ земны́х и Небе́сных Влады́чице,/ Сы́на Твоего́ и Бо́га на́шего моли́/ умире́ние да́ти ми́рови, и спасе́ние, и ве́лию ми́лость.

Велича́ние:

Велича́ем тя,/ святи́телю о́тче Меле́тие,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

По полиелеи, седа́лен, глас 8: Прииди́те, ча́да церко́вная: (зри на ма́лой вече́рни, на Г о́споди, воззва́х: страни́ца 442)

Сла́ва, и ны́не, Богоро́дичен: Небе́сную дверь: (зри там же, страни́ца 443).

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми. Ева́нгелие от Иоа́нна, зача́ло 35, от полу́. По 50-м псалме́ стихи́ра, глас 4: Ди́вен в по́двизех твои́х яви́лся еси́: (зри Сла́ва на литии́, страни́ца 445)

Кано́н Богоро́дицы на 6 и святи́теля на 6.

Кано́н святи́теля, глас 7.

Песнь 1

Ирмо́с: Сокруши́вшему бра́ни мы́шцею Свое́ю,/и вса́дники триста́ты погрузи́вшему,/ пои́м Ему́, я́ко Изба́вителю на́шему Бо́гу,/ я́ко просла́вися.

Из утро́бы ма́терния Бо́гом и́збран был еси́, святи́телю Меле́тие, пасти́ о́вцы Его́ слове́сныя,/ ихже, я́ко насле́дие Божие добре́ соблю́л еси́/ и Ца́рствию Небе́сному сочета́лся еси́, Богому́дре.

Тро́ическое поклоне́ние Еди́ному Бо́гу, в Трие́х Ипоста́сех пева́емому, от ю́ности твоея́ уразуме́л еси́,/ Го́рняго Иерусали́ма иска́л еси́,/ иде́же и дарова́ся ти вене́ц жи́зни, по́двига твоего́ украше́ние неувяда́емое.

К Нему́же те́пле прилепи́лся еси́, Богоблаже́нне,/ Ему́же день и нощь по́двигом благоразу́мным труди́лся еси́,/ Его́же возлюби́ душа́ твоя́,/ не преста́й и ны́не умоля́ти спасти́ся воспева́ющим тя.

Богоро́дичен: Ле́ствица, ю́же Иа́ков ви́де,/ гора́ приосене́нная, всесве́тлый облак Боже́ственнаго све́та,/ дверь, еюже Бог еди́н про́йде, –/ Ты еси́ Благослове́нная в же́нах, Пренепоро́чная.

Песнь 3

Ирмо́с: В нача́ле Небеса́ Всеси́льным Сло́вом Твои́м утвержде́й, Го́споди Спа́се,/ и Вседе́тельным и Бо́жиим Ду́хом всю си́лу их,/на недви́жимем мя ка́мени/ испове́дания Твоего́ утверди́.

Ю́ности твоея́ де́вственную добро́ту скоропреходя́щей суете́ в же́ртву не повергл еси́,/ но я́коже Исаа́к, же́ртву живу́ю Бо́гу себе́ приве́л еси́,/ Его́же моли́, святи́телю о́тче Меле́тие,/ в же́ртву поро́чную не пожре́тися к тебе́ прибега́ющим.

Многотру́ден и многоско́рбен путь и́ноческаго по́двига/ в бде́нии, посте́ и моли́твах со слеза́ми неленостно прейти́ потща́лся еси́, о́тче Богому́дре,/ та́ко бо ху́ждшее покори́в лу́чшему и плоть поработи́в ду́ху,/ Богомы́слие стяжа́л еси́.

Егда́ испи́л еси́ от исто́чника Богосло́вия во́ду жи́ву,/ просвеща́ющую ра́зум и́стиною Боже́ственною,/ тогда́ я́ко лоза́ многопло́дная, вино́м премудрости сердца́ ю́ных чад твои́х укрепи́л еси́.

Богоро́дичен: Лю́тыми грехми́ окруже́нии и напа́стей беда́ми потопля́еми/ и, под Боже́ственный покро́в Твой прибега́ем,/ Ма́ти Христа́ Бо́га, моли́ся, во е́же спасти́ся рабо́м Твои́м, Всепетая.

Седа́лен, глас 3:

Еле́й ве́ры непоро́чной и житие́ нескве́рное Бо́гу ве́рно стяжа́л еси́, святи́телю Меле́тие,/ имже но́вая свеща́ на све́щнице Це́ркви Христо́вой возжже́ся,/ всех ве́рных на путь спасе́ния наставля́юще,/ во е́же чи́стым се́рдцем творити во́лю Бо́жию,/ усе́рдием души́ ко Христу́ пламене́юще.

Сла́ва, и ны́не, Богоро́дичен, глас то́йже:

Ты кре́пость на́ша,/ Ты похвала́ и ра́дование, и храни́тельница нам еси́,/ и заступле́ние, и прибе́жище, и предста́тельница непобеди́мая,/ Пресвята́я Богоро́дице Де́во,/ Те́мже спаси́ рабы́ Твоя́.

Песнь 4

Ирмо́с: Покры́ла есть Небеса́, Христе́ Бо́же,/ смотре́нием Твои́м,/ доброде́тель неизрече́нныя му́дрости Твоея́, Человеколю́бче.

Излия́ся благода́ть Божия на тя, и Ду́ха прему́дрости испо́лни тя,/ сего́ ра́ди пото́ки ересе́й ученьми твои́ми изсуши́л еси́,/ ду́ши же ве́рных струя́ми Ева́нгельской и́стины напои́л еси́,/ е́юже утоли́ жа́жду душ на́ших, Богому́дре.

Ю́ности пла́мень ве́ры и во́зраста житие́ непоро́чное Бо́гу чи́сте прине́сл еси́,/ дыха́нием моли́твы благода́тной пред Ним о лю́дех хода́тайствуя./ Та́ко и ны́не от бед изба́вится нам Го́спода умоли́, я́ко оте́ц лю́бящий ны.

Заре́ю доброде́телей просия́л еси́/ и ско́рый помо́щник в ско́рбех и боле́знех су́щим показа́лся еси́, многоми́лостиве./ Буди́ же всем призы́вающим тя изба́витель кре́пкий и покрови́тель неотсту́пный, святи́телю Меле́тие.

Богоро́дичен: А́нгельстии язы́цы досто́йно Твоя́ хвалы́ воспе́ти не мо́гут, Чи́стая:/ мы же ны́не ра́бски взе́мшеся, ра́дование Гаврии́лово прино́сим Ти:/ ра́дуйся, Ма́ти Бо́га на́шего.

Песнь 5

Ирмо́с: Нощь не све́тла неве́рным, Христе́,/ ве́рным же просвеще́ние в сла́дости слове́с Твоих:/ сего́ ра́ди к Тебе́ у́тренюю,/ и воспева́ю Твое́ Божество́.

Приста́нищу небу́рному и благооти́шному приведи́ нас, о́тче Богому́дре, прегреше́ньми обурева́емых,/ да пла́мене бу́дущаго, му́ки нестерпи́мыя и гне́ва Божия изба́вимся,/ на тя упова́ние возложи́вше.

Моли́тву те́плую, я́ко ми́ро благоуха́нное принеси́ за ны ко Го́споду, святи́телю Меле́тие,/ не има́мы бо покая́ния, ни жития́ непоро́чнаго, ниже́ моли́твы чи́стыя,/ сего́ ра́ди помози́ нам.

Святи́телю Христо́в Меле́тие, искорени́ зло́бу и по́хоть вре́дную серде́ц на́ших,/ да тля грехо́вная не растли́т и не помрачи́т ду́ши на́ша,/ на тя с ве́рою упова́ющих.

Богоро́дичен: Тебе́, Де́во, еди́ну вси ве́рнии стяжа́хом Засту́пницу тве́рду,/ Ты бо Бо́га родила́ еси́,/ сего́ ра́ди хвала́ми, Чи́стая, Тя ублажа́ем, ро́ди земни́и, по глаго́лу Твоему́.

Песнь 6

Ирмо́с: Во глубину́ грехо́вную впа́дся, Бла́же,/ я́ко Ио́на от кита́ вопию́ Ти:/ возведи́ от тли живо́т мой,/ и спаси́ мя, Человеколю́бче.

Воздохни́ и припади́ за ны ко Го́споду/ и уми́лостиви Его́, святи́телю Меле́тие,/ пре́жде да́же не предста́ти нам Судии́ Нелицеприя́тному,/ возда́ти коему́ждо по де́лом его́ досто́йная гряду́щему.

Услы́ши глас стена́ния на́шего и вопль пла́ча на́шего, о́тче наш Меле́тие,/ я́ко изсохо́ша во гресе́х сердца́ на́ша./ Росо́ю сле́зныя моли́твы твоея ускори́ погаси́ти пла́мень грехо́в на́ших,/ во ад влеку́щих ду́ши на́ша.

Хромы́я возста́вив и прокаже́нныя очи́стив,/ блудни́цы поми́ловав и разбо́йника благоразу́мнаго во еди́ном часе́ ра́еви сподо́бивый Человеколюбец Госпо́дь,/ Его́ же умоли́, Боговозлю́бленне, всепроща́ющей любо́вию просвети́ти убо́гия ду́ши на́ша и спасти́ нас.

Богоро́дичен: Ада́м преступи́ у́бо за́поведь еди́ну Сы́на Твоего́, Де́во, и во изгна́ние впаде́:/ ка́ко же рыда́ем прегреше́ний на́ших бе́здну,/во мно́гия бе́ды впа́дшии.

Конда́к, глас 4:

Ревну́я, поревнова́л еси́ к Бо́гу, Его́же возлюби́л еси́/ и Его́же всем се́рдцем возжела́л еси́, о́тче наш Меле́тие,/ и Его́же ра́ди к и́ноческому по́двигу поте́кл еси́/ и закла́тися Христу́ Бо́гу сама́го себе́ приве́л еси́,/ я́ко па́стырь до́брый вруче́нное тебе́ ста́до ове́ц Христо́вых му́дре упа́сл еси́./ Моли́ о нас Христа́ Бо́га, святи́телю достохва́льне.

И́кос:

И́же в доброде́телех па́стырь Це́ркви Христо́вой преди́вный/ и, я́ко оте́ц чадолюби́вый, а́лчущим и жа́ждущим пра́вды сосу́д неистощи́мый,/ пред Бо́гом предста́телю наш ве́рный, в похвалу́ тебе́ зове́м:/ ра́дуйся, иера́рше Христо́в, Боже́ственныя благода́ти досто́йный носи́телю;/ ра́дуйся, за́поведей Божиих – глаго́лов жи́зни ве́чной – усе́рднейший исполни́телю;/ ра́дуйся, сокро́вище несокрове́нное, бога́тство твое́ неиму́щим добре́ расточи́вый;/ ра́дуйся, в труде́х, посте́ и бде́нии ве́рно Бо́гу послужи́вый./ Моли́ о нас Христа́ Бо́га, святи́телю достохва́льне.

Песнь 7

Ирмо́с: В пещь о́гненную вве́ржени преподо́бнии о́троцы,/ огнь в росу́ преложи́ша,/ воспева́нием сице вопию́ще:/ благослове́н еси́, Го́споди Бо́же оте́ц на́ших.

Моли́твы твоя́ источи́ за ны ко Го́споду, о́тче преблаже́ннейший,/ и скве́рну сту́дных дел на́ших омы́й, во е́же чи́стым се́рдцем взыва́ти нам:/ благослове́н Госпо́дь, Бог оте́ц на́ших.

О́гнь моли́твы непоро́чный проле́й за всех нас к Бо́гу, святи́телю Меле́тие,/ да не пожре́т нас зло́ба грехо́вная,/ оба́че научи́ нас ве́рно взыва́ти:/ благослове́н Госпо́дь, Бог оте́ц на́ших.

Возше́л еси́ на высоту́ доброде́тели, па́стырю наш Меле́тие,/ е́юже, я́ко еле́ем благода́тным, горе́ние серде́ц на́ших воспламени́/ и мрак грехо́вный от душ на́ших отжени́, во е́же звати нам чи́сте:/ благослове́н Госпо́дь, Бог оте́ц на́ших.

Богоро́дичен: Свята́я Богоро́дице, Пресвята́го Ро́ждшая пло́тию,/ уподо́битися восхоте́вшаго челове́ком,/ Небе́снаго Ца́рствия всех нас яви́ прича́стники моли́твами Твои́ми.

Песнь 8

Ирмо́с: Стра́шнаго Херуви́мом,/ и чу́днаго Серафи́мом, и ми́ру Творца́,/ свяще́нницы, и раби́, и ду́си пра́ведных,/ по́йте, благослови́те и превозноси́те Его́ во ве́ки.

Ка́ко у́бо воспое́м вели́чие трудо́в твои́х,/ аще не подража́ем смире́нию и терпе́нию твоему́, преподо́бне о́тче Меле́тие,/ и́мже вся́ка зло́ба упраздни́ся и Це́рковь Христо́ва украси́ся:/ благословя́ще и превознося́ще Го́спода во ве́ки.

Ума́ красото́ю ди́вно увенча́ Тя Госпо́дь, па́стырю наш Меле́тие,/ во е́же быти нам: в ве́ре утвержде́ние, в ле́ности же посрамле́ние, в служе́нии бли́жним поспеше́ние,/ благословя́ще и превознося́ще Бо́га во ве́ки.

Го́рняго Сио́на жи́тель показа́лся еси́, святи́телю Меле́тие,/ сего́ ра́ди со все́ми святы́ми мо́лиши Го́спода мир нам и ве́лию ми́лость дарова́ти,/ благословя́щим и превознося́щим Го́спода во ве́ки.

Богоро́дичен: Я́ко Ма́терь Све́та,/ трапе́зу Хле́ба Жи́зненнаго и руно́ ороше́нное, и сла́дость ра́йскую почита́ем Тя, Чи́стая Де́во Ма́ти.

Песнь 9

Ирмо́с: Па́че естества́ Ма́терь/ и по естеству́ Де́ву,/ Еди́ну в жена́х Благослове́нную,/ пе́сньми, ве́рнии, Богоро́дицу велича́ем.

Богопозна́нием утверди́л еси́ себе́ и слове́сное ста́до твое́, Богому́дре,/ сего́ ра́ди о́вцы па́жити твоея́, со умиле́нием вопиют тебе́:/ настави нас Бо́гу служи́ти усе́рдно.

Над мно́гими тя поста́ви Госпо́дь,/ о мале бо был еси́ ве́рен Ему́ от ю́ности твоея, святи́телю Ме́летие,/ дерзнове́ние к Нему́ име́я, моли́, да сотвори́т нас насле́дники Ца́рствия Своего́.

Престо́лу Ще́драго Бо́га предстоя́ще,/ не преста́й моли́тися, святи́телю Меле́тие,/ Це́рковь и страну́ на́шу огражда́ти ми́ром во вся ве́ки.

Богоро́дичен: От Тебе́, Де́во Пречи́стая, воплоти́вшагося моли́ о спасе́нии на́шем,/ Емуже предстои́ши всегда́, я́ко Ма́терь Сы́ну.

Свети́лен, глас 8.

Подо́бен: О, пресла́внаго чудесе́:

Свет стезя́м твои́м вои́стину зако́н Бо́га на́шего бысть, святи́телю Меле́тие,/ Его́же благода́ти струя́ми напое́н был еси́/ и нам Боже́ственный Свет испроси́,/ во е́же пра́во ходити пути́ Господни.

Сла́ва, и ны́не, Богоро́дичен, глас то́йже:

Де́вство некра́домо, Де́во, сохра́нше,/ Ма́терь яви́лася еси́ Сы́на Бо́жия вои́стинну,/ Отца́ благоволе́нием и Ду́ха Свята́го наше́ствием.

На хвали́тех стихи́ры на 6, глас 6:

И́збра́нному ста́да Христо́ва па́стырю преди́вну/ прииди́те вси, свети́льников ве́ры носи́телие,/ сиро́т пита́телю и вдов уте́шителю песнь принесе́м,/ сей бо ны́не усе́рдно за ны мо́лится ко Го́споду:/ Владыко! Вдови́цам предста́ни, си́рых защити́, плене́нныя изба́ви,/ неду́гующия исцели́ и вся лю́ди Твоя́ помяни́,/ всем подая́ я́же ко спасе́нию проше́ния, Го́споди Бо́же наш!

Мона́хом наста́вника и па́стырем красоту́/ и су́щим в ско́рбех и печа́лех неистощи́мую добро́ту/ в псалме́х, и пе́ниих, и пе́снех духо́вных досто́йно восхва́лим святи́теля Меле́тия,/ его́же в дни плене́ния гра́да Ха́рькова ве́рнии с ли́ком Засту́пницы Усе́рдной узре́ша,/ ско́рое избавле́ние от иноплеме́нников предре́кша./ Сим благоволе́ние Бо́жие к нам уразуме́ша,/ святи́телево предста́тельство благодари́в просла́виша,/ я́ко стра́жа гра́да на́шего в беда́х неотсту́пна.

А́нгела Це́ркви нашея,/ храни́теля неусы́пна и столпа́ непоколеби́ма,/ благоче́стия побо́рника и нече́стия искорени́теля,/ дея́нием и зре́нием ди́вно просия́вшаго/ и све́том ве́ры тварь просвети́вшего,/ прииди́те песнопе́ний цвета́ми увенча́ем святи́теля ми́лостиваго,/ христиа́нский кончи́ны и до́браго отве́та на Страшне́й Суди́щи Христо́ве нам умоля́ющаго,/ предста́теля за ны ко Го́споду Меле́тия преди́вна.

Ду́ха Всесвята́го жили́ще яви́лся еси́,/ Боголюби́ве о́тче наш Меле́тие,/ от ю́ности бо твоея́ возжела́л еси́ лу́чшее житие́,/ пло́ти тленныя вся́кое сладостра́стие умертви́в,/ ду́шу твою́ оживотвори́л еси́,/ и сию́ Боже́ственный орга́н Ду́ха Свята́го показа́в,/ Христу́ Бо́гу моли́ся непови́нным бы́ти нам,/ Пречи́стаго Те́ла и Честны́я Кро́ви Его́ недосто́йне причаща́ющимся.

Сла́ва, глас 6:

Же́ртву чи́стую и Богоприя́тную за лю́ди Бо́гу приноси́л еси́/ и, я́ко жезл Ааро́нов, житие́м непоро́чным ди́вно процве́л еси́,/ уго́дниче Бо́жий Меле́тие,/ избра́вшему тя всех Творцу́ и Бо́гу ны́не предстоя́,/ о ми́ре ми́ра и о соблюде́нии стада́ твоего́ от всех зол хода́тайствуеши приле́жно./ Мы же предста́тельством твои́м спаса́еми,/ Тро́ице Единосу́щней и Неразде́льней ве́рно вопие́м:/ Свят, Свят, Свят еси́, Го́споди Бо́же наш,/ поми́луй ны И́мени ра́ди свята́го Твоего́.

И ны́не, Богоро́дичен, глас то́йже:

Ра́дуйся, Це́ркве Святы́я красото́;/ ра́дуйся, Прему́дрости Бо́жией неизмери́мая глубино́,/ проро́ческаго сбытия́ надеждо непосты́дная,/ апо́стольския про́поведи тверды́ня непоколеби́мая./ Ра́дуйся, святе́йших Го́рних во́инств непостижи́мое ра́дование,/ святы́х Собо́ра и земноро́дных мно́жества непререка́емое упова́ние;/ ра́дуйся, Ма́ти А́гнца Бо́жия,/ сме́рти жа́ло попра́вшаго и су́щим во гробе́х живо́т дарова́вшаго./ Его́же моли́, Богоро́дице, в кни́зе живо́тней рабо́м Твои́м написа́тися,/ еси́ бо Ма́терь Све́та и ми́ра Вла́дычица.

Славосло́вие вели́кое.

На литурги́и

Блаже́нны от кано́на свята́го, пе́сни 3-я и 6-я. Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́ вси язы́цы,/ внуши́те вси живу́щии по вселенней. Апо́стол ко Евре́ем, зачало 335. Аллилу́ия, глас 4: Воззва́ша праве́днии,/ и Госпо́дь услыша их. Стих: Многи ско́рби пра́ведным,/ и от всех их изба́вит я Госпо́дь. Ева́нгелие от Лу́ки, зача́ло 24. Прича́стен: В па́мять ве́чную бу́дет пра́ведник: