Стихи́ры, глас 8.

Подо́бен: Что вы нарече́м:

Что тя имену́ем, сла́вне?/ Святи́теля и́стинна и свяще́нна учи́теля,/ правосла́вных утвержде́ние и церко́вное о́ко,/ свети́ло, у́мный свет возблиста́вшаго,/ му́чеником сла́вна су́ща,/ и́стины побо́рника, вели́каго лжи оглаго́льника./ Моли́ спасти́ся душа́м на́шим.

Что тя нарече́м, святи́телю?/ Реку́, от мы́сленнаго Еде́ма исходя́щую,/ напая́ющую зе́млю ороше́нии духо́вными;/ ча́шу, Боже́ственныя во́ды по́лну су́щу,/ А́риевы единомы́сленники погружа́ющую;/ столп о́гнен, предводя́щий но́выя лю́ди Боже́ственною благода́тию./ Моли́ спасти́ся душа́м на́шим.

Что тя нареку́, Евсе́вие?/ Благоче́стия пода́теля и нече́стия губи́теля,/ страстоте́рпцев добро́ту и свяще́нников ра́дование;/ серп, пле́велы посека́ющий,/ пшени́цу Небе́сную собира́ющий;/ исто́чник чуде́с приснотеку́щий,/ неду́гов отъе́млющий зной./ Моли́ спасти́ся душа́м на́шим.

И́ны стихи́ры, Пресвяты́я Богоро́дицы, глас и подо́бен то́йже:

Стра́нно та́инство, Чи́стая,/ безсе́меннаго Твоего́ рождества́, Де́во, и ужа́сно,/ превосходя́ вели́чеством вся́ку мы́сль челове́чу:/ Его́же бо не терпя́т зре́ти многоочи́тии/ и чи́ни вси святы́х А́нгел трепе́щут,/ нам пло́тию родила́ еси́,/ не отсту́пльша же О́тча Существа́./ Сла́вим ро́ждшую Тя, Богоневе́сто.

Кому́ уподо́билася еси́, окая́нная,/ к покая́нию ника́коже возни́чущи, душе́,/ и огня́ не ужаса́ешися, злых жду́щаго?/ Воста́ни, и еди́ну к заступле́нию ско́рую призови́, и возопи́й:/ Де́во Ма́ти, моли́ Твоего́ Сы́на и Бо́га на́шего/ изба́вити мя сете́й льсти́ваго.

Всех заступле́ние, Влады́чице,/ пучи́ною обурева́емому мне тьмы́/ и лю́тых жития́ треволне́ньми погружа́ему ми при́сно/ ка́плю ми́лости Твоея́ низпосли́,/ и ру́ку по́мощи Твоея́ пода́ждь ми,/ и ча́сти сподо́би мя избра́нных и пра́ведных,/ я́ко бе́здну ро́ждшая, Человеколю́бца.

Сла́ва, и ны́не, глас и подо́бен то́йже:

О́гнь ро́ждши нестерпи́мый,/ попаля́ющ грехи́ и ороша́ющ ве́рныя,/ ве́щная безме́рных мои́х, Пренепоро́чная Чи́стая, согреше́ний/ попали́ моли́твами Твои́ми/ и росо́ю иста́явшую страстьми́ ду́шу мою́ прохлади́,/ я́ко да Твою́ велегла́сно ми́лость и си́лу велича́ю, раб Твой.

Крестобогоро́дичен. Подо́бен то́йже:

А́гница А́гнца я́ко ви́де, на дре́ве/ просте́рта во́лею Кре́стнем,/ вопия́ше ма́терски, боле́знующи с пла́чем:/ Сы́не Мой, что стра́нное сие́ виде́ние?/ Всем живо́т дая́й я́ко Госпо́дь,/ ка́ко умерщвля́ешися, Долготерпели́ве,/ земны́м пода́й воскресе́ние?/ Сла́влю Твое́ мно́гое, Бо́же Мой, снизхожде́ние.

Кано́н, его́же краегране́сие: Благоче́стия тезоимени́та честву́ю. Творе́ние Ио́сифово, глас 8.

Пе́снь 1

Ирмо́с: Посе́ченный несеко́маго пресече́,/ и ви́де со́лнце зе́млю, ю́же не ви́де,/ лю́таго врата́, вода́ потопи́,/ и непроходи́мое про́йде Изра́иль,/ пе́снь же воспева́шеся:/ Го́сподеви пои́м, сла́вно бо просла́вися.

Соверше́нным све́том осия́емь, и свяще́нным лико́м, блаже́нне, сочиня́емь,/ и му́ченическим благосла́вием украша́емь,/ ве́рою пра́зднующия твою́, Евсе́вие блаже́нне, па́мять сохраня́й,/ Христа́ ми́лостива творя́.

Сла́достне жела́нием Христо́вым разжига́емь от ю́ности,/ пло́ть покори́л еси́, преблаже́нне, души́ свяще́нными си́лами/ и, сосу́д свяще́н показа́вся,/ лю́ди в преподо́бии, преподо́бне, упа́сл еси́, пома́зався ми́ром благода́ти.

Тя пастыренача́льника Дух Святы́й предлага́ет,/ ерети́чествующих мглу словесы́ светоно́сными твои́ми разоря́юща, му́дре,/ и я́ве показу́юща стезю́ пра́вую в ню преподо́бно входя́щим,/ вели́кий Евсе́вие, свети́ло серде́ц на́ших.

Богоро́дичен: Благослове́нная, Бо́га ро́ждшая,/ благословя́щия Тя ны́не, Пречи́стая, благослови́,/ к благи́м вхо́дом руководи́, и испо́лни Боже́ственных благ, и пе́ти укрепи́:/ Го́сподеви пое́м, сла́вно бо просла́вися.

Пе́снь 3

Ирмо́с: Страх Твой, Го́споди,/ всади́ в се́рдца раб Твои́х/ и бу́ди нам утвержде́ние,/ Тя во и́стине призыва́ющим.

Был еси́ кро́ток и незло́бив, смиренному́др же и тих/ и любве́ Боже́ственныя испо́лнен,/ му́ченическими при кончи́не украси́лся еси́ венцы́.

Оде́ждами, и́же от кро́ве, Евсе́вие свяще́нне, сия́я,/ во свята́я восте́кл еси́,/ све́тло святы́х сла́вою венча́емь.

Облича́я А́риевы единомы́сленники,/ гоне́ния, блаже́нне, подъя́л еси́ и ну́ждную сме́рть,/ те́мже безсме́ртныя сла́вы сподо́бился еси́.

Богоро́дичен: Во́лею О́тчею Сло́во родила́ еси́, наи́тием Боже́ственнаго Ду́ха,/ Пресвята́я Де́во Ма́ти, архиере́ев сла́во,/ те́мже Тя пое́м.

Седа́лен, глас 4.

Подо́бен: Ско́ро предвари́:

Уясни́в житие́ твое́ доброде́телей красота́ми,/ па́стырь наре́клся еси́, святи́тель че́стен, преблаже́нне Евсе́вие,/ кро́вию же муче́ния себе́ украси́в,/ горе́ к Невеще́ственным преста́вился еси́ лико́м./ С ни́миже о нас Христа́, о́тче, моли́ поми́ловати ду́ши на́ша.

Сла́ва, и ны́не, Богоро́дичен:

Чи́стая, Всенепоро́чная Неискусому́жная,/ Я́же еди́на Безле́тнаго Сы́на и Сло́ва Бо́жия в ле́то ро́ждши,/ Сего́ со святы́ми и честны́ми патриа́рхи, и му́ченики, и проро́ки, и преподо́бными моли́/ дарова́ти нам очище́ние и ве́лию ми́лость.

Крестобогоро́дичен:

На Кресте́ Тя возвы́шена я́ко узре́ Пречи́стая Ма́ти Твоя́, Сло́ве Бо́жий,/ ма́терски рыда́ющи, веща́ше:/ что но́вое и стра́нное сие́ чу́до, Сы́не Мой?/ Ка́ко, Жи́знь всех, вкуша́еши сме́рти,/ оживи́ти ме́ртвыя хотя́, я́ко Милосе́рд?

Пе́снь 4

Ирмо́с: Из го́ры приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяще си́лу Твою́.

Уста́вил еси́, му́дре, пре́лести гное́ние со́лию твои́х изря́дных уче́ний/ и неду́гующия е́ресию злове́рия, блаже́нне, исцели́л еси́, Евсе́вие.

Напра́вив лю́ди к приста́нищу спасе́ния,/ А́риево погрузи́л еси́ неве́рие кро́вным наводне́нием,/ па́стырю и му́чениче, святи́телей удобре́ние.

Звезда́ све́тла возсия́л еси́ в ми́ре,/ сия́нием свяще́нным озаря́я мы́сли, преблаже́нне, правосла́вных,/ те́мже тя ве́рно ублажа́ем.

Богоро́дичен: Усты́, Чи́стая, и язы́ком, и се́рдцем/ испове́даю Тя, Зижди́теля Ма́терь, и молю́ Тя:/ озари́ ду́шу мою́, омраче́нную согреше́ньми.

Пе́снь 5

Ирмо́с: От но́щи неве́дения,/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.

Уче́нии твои́ми, блаже́нне, правосла́вных утвержда́я мудрова́ние,/ за благоче́стие заточе́ние претерпе́л еси́.

Правосла́вия столпа́, и исцеле́ний исто́чника тя ве́мы, прему́дре святи́телю,/ и Це́ркве утвержде́ние.

Законоположе́нии Боже́ственными беззако́ннующия утвержда́я, Евсе́вие,/ от руки́ беззако́ннующих непра́ведну претерпе́л еси́ сме́рть.

Богоро́дичен: Све́тел све́щник, Богороди́тельнице,/ Боже́ственную свещу́ нося́щи, позна́лася еси́,/ вся озаря́ющую концы́.

Пе́снь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Пропове́дал еси́ Единосу́щное Сло́во и Собезнача́льнаго Отцу́ Сы́на,/ ме́рзкаго А́риева неи́стовства потреби́л еси́ су́етное мудрова́ние, Евсе́вие,/ благочести́вых неразсе́дное и тве́рдое огражде́ние.

Кропле́нием честны́х твои́х крове́й порфи́ру себе́ обагри́л еси́ ца́рску/ и вмести́лся еси́, о́тче, с весе́лием в Боже́ственное Ца́рствие,/ предстоя́ти Царю́ веко́в, всеблаже́нне Евсе́вие.

Я́ко ши́пок, я́ко благово́нен крин, я́ко рай Бо́жий, показа́лся еси́,/ посреде́ жи́зни име́я дре́во, Самоде́теля всех и Го́спода, Евсе́вие./ Ны́не нас благово́ния исполня́еши Боже́ственнаго Ду́ха.

Богоро́дичен: Разуме́вше Богоглаго́ливии проро́цы та́инства Твоего́ безме́рную глубину́,/ сие́ я́ве провозвести́ша, Отрокови́це, гада́ньми и Боже́ственными прорече́нии:/ Сло́во бо О́тчее па́че сло́ва, Чи́стая, воплоти́ла еси́.

Конда́к, глас 4.

Подо́бен: Яви́лся еси́ дне́сь:

Благоче́стно во святи́тельстве пожи́в/ и муче́ния пу́ть проше́д,/ и́дольския угаси́л еси́ же́ртвы, святи́телю Евсе́вие,/ но я́ко име́яй дерзнове́ние ко Христу́ Бо́гу,/ моли́ спасти́ся душа́м на́шим.

Пе́снь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.

Пе́сньми упражня́яся, святи́телю, и мольба́ми, успи́л еси́ стра́сти/ и нам, ве́рным, бодр яви́лся еси́ храни́тель,/ благоче́стно пою́щим тя и творя́щим твою́ па́мять.

Му́ченик я́влься и святи́тель, Небе́сная боже́ственне насле́довал еси́/ и престо́лу предстои́ши Зижди́теля, вопия́:/ благослове́н еси́, Го́споди Бо́же, во ве́ки.

У́тро возсия́л еси́, пропове́дая возсия́вшаго от Отца́ пре́жде денни́цы, Иису́са Христа́,/ свети́льниче церко́вный, святи́телей украше́ние, страда́льцев удобре́ние.

Богоро́дичен: Зако́ны естества́, Де́во, рождество́м Твои́м обновля́еши пресла́вно/ и истле́вшия ны злым преступле́нием очища́еши./ Те́мже Тя по до́лгу восхваля́ем.

Пе́снь 8

Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху;/ благослови́те, дела́ Госпо́дня, Го́спода.

Со святи́тели и му́ченики моли́,/ я́ко святи́тель и му́ченик, священнопропове́дниче Евсе́вие, Спа́са всех/ обрести́ нам ми́лость.

Благи́м нра́вом пожи́в,/ слове́сною па́лицею свяще́нное твое́ ста́до упа́сл еси́/ и ерети́ческия зве́ри, всеблаже́нне, отгна́л еси́.

Отягче́нныя пия́нством пре́лести, ерети́чествующия всу́е ты облича́я, Евсе́вие,/ от тех убие́н был еси́, страда́в тве́рдо.

Богоро́дичен: Я́ко вы́шши небе́сных высо́т,/ вы́шнее пролила́ еси́ Сло́во,/ от земли́ возне́сшее па́дшее существо́ челове́ческое, Всепе́тая.

Пе́снь 9

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Ви́дети сподо́бился еси́, о́тче, да́льняя,/ свяще́нней твое́й души́ наде́емая,/ и к невече́рнему сия́нию, ра́дуяся, всели́лся еси́.

Красе́н яви́лся еси́ богоглаго́ланием, и благи́ми дея́нии, Евсе́вие,/ и всечестны́ми страда́ний, блаже́нне, светлостьми́.

Соста́вим лик ра́достен, свяще́ннаго восхваля́юще Евсе́вия,/ благоче́стия добро́тою укра́шена.

Ра́ка твоя́ дае́т благода́ть исцеле́ний,/ свята́я же па́мять твоя́, Евсе́вие, просвеща́ет мир,/ я́ко вели́кое со́лнце.

Богоро́дичен: Благолюби́вая Де́во, озло́бленную грехми́ ду́шу мою́ ублажи́,/ Я́же Преблага́го Бо́га пло́тию ро́ждшая.