На Го́споди, воззва́х: стихи́ры, глас 8.

Подо́бен: О, пресла́внаго чудесе́:

О́тче Богому́дре Ону́фрие,/ мирски́я себе́ отлучи́в молвы́,/ к преми́рному возше́л еси́ соверше́нию,/ того́ вожделе́в благи́х исто́чника,/ та́мо и́стинную любо́вь дости́гл еси́,/ ея́же сия́нии, блаже́нне, освеща́емь,/ грехо́внаго мра́ка/ моли́твами твои́ми нас исхи́ти.

О́тче Богому́дре Ону́фрие,/ мраз нощны́й и дневны́й вар/ наде́ждею, преподо́бне,/ бу́дущих претерпе́л еси́,/ на земли́ твоя́ у́ды умертви́в,/ Небе́сную жи́знь получи́л еси́:/ вну́трь вшел еси́ черто́га, свя́те, ра́достно,/ добро́ту безме́рную/ зре́ти Зижди́теля твоего́.

О́тче Богому́дре Ону́фрие,/ я́ко сокро́вище, тя обре́т,/ в пусты́ни кры́ющася, сла́вный Пафну́тий/ и су́щим в ми́ре сказа́ я́сно/ твои́х подвиго́в исправле́ния,/ ве́рныя богатя́ повестьми́/ богоуго́днаго твоего́ жития́, прехва́льне,/ его́же и нас покажи́/ моли́твами твои́ми подража́тели, сла́вне.

О́тче Богому́дре Ону́фрие,/ в пусты́ни мя ны́не страсте́й водворя́ющася,/ на пу́ть пра́вый доброде́телей руково́дствуя мя,/ к покая́ния стезе́, моли́твами твои́ми/ наста́ви ко исполне́нию Боже́ственных хоте́ний,/ к неистощи́мому благи́х восприя́тию,/ я́ко твою́, ра́дуяся,/ соверша́ю па́мять, всехва́льне.

И́ны стихи́ры преподо́бнаго Петра́, глас и Подо́бен то́йже:

Петру́ Боже́ственному тезоимени́та,/ после́дующа вои́стинну/ и ре́вности ве́ры благоче́стно тя, преподо́бне,/ приобщи́вшася позна́хом:/ благи́й бо зако́н возлюби́л еси́,/ и о́наго Боже́ственная повеле́ния,/ о́тче, вожделе́л еси́,/ и ду́шу удобри́л еси́ доброде́тельми./ Те́мже тя почита́ем и ублажа́ем.

Преподо́бне о́тче всебога́те,/ терпе́ние и́стинно, и любо́вь нелицеме́рну,/ и наде́жду неукло́нну,/ соверше́нное смире́ние/ во умиле́нии души́ стяжа́в,/ Боже́ственнаго Ду́ха храм был еси́,/ Его́же сия́ние чи́сто восприе́м,/ земны́м свет ви́ден был еси́ вторы́й/ жития́ чистото́ю.

Преподо́бне о́тче Богодухнове́нне,/ ле́та мно́га на земли́/ неявле́нием кры́емь,/ позна́н был еси́ Ду́хом/ во зна́мениих и чудесе́х/ благово́нием ми́ра,/ и́бо источи́л еси́ живу́щую све́тлость и святы́ню/ и Боже́ственнаго Ду́ха вои́стинну благода́ть/ лю́бящим тя показу́я.

Сла́ва, глас 6:

Преподо́бнии отцы́,/ во всю зе́млю изы́де веща́ние исправле́ний ва́ших,/ те́мже на Небесе́х обрето́сте мзду трудо́в ва́ших,/ де́монския полки́ погуби́сте/ и А́нгельския достиго́сте чи́ны,/ и́хже житию́ непоро́чно поревнова́сте./ Дерзнове́ние иму́ще ко Го́споду,/ мир испроси́те душа́м на́шим.

И ны́не, пра́здника, или́ Богоро́дичен.

А́ще не пра́зднуеши, Крестобогоро́дичен.

Подо́бен: Тридне́вен:

Со́лнце омрачи́ся,/ на Кресте́ Тя пригвожде́на, Светода́вче, зря́щи,/ и земля́ стра́хом колеба́шеся,/ лю́дие же иуде́йстии ника́коже уще́дриша, беззако́ннии.

На стихо́вне Окто́иха.

А́ще пра́зднуеши, на стихо́вне стихи́ры святы́х, глас 4.

Подо́бен: Дал еси́ зна́мение:

Блаже́нства е́же вы́ше ума́ жела́я,/ вмени́л еси́, Боже́ственне,/ сла́дкую пи́щу –воздержа́ние,/ нищету́ же – бога́тство,/ нестяжа́ние – многоиме́ние и́стинное/ и смире́ние – в благосла́вие,/ те́мже и жела́ния е́же в ра́зуме получи́л еси́,/ в ски́ниях водворя́яся святы́х, Ону́фрие.

Стих: Честна́ пред Го́сподем/ сме́рть преподо́бных Его́.

Тече́ние по́стничества невозвра́тне соверши́л еси́/ и ве́ру соблю́л еси́,/ отту́ду же и вене́ц прия́л еси́, о́тче, пра́вды,/ его́же тебе́ угото́ва Христо́с,/ И́же по достоя́нию подая́ возме́здия/ и по́чести да́руя и воздая́ния в труде́х,/ Его́же и нас ны́не изба́вити от бед моли́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Вся́кое сладостра́стие укроща́яй,/ те́ла отре́клся еси́, Богому́дре,/ огорча́яй чу́вство воздержа́ния труды́/ и жесто́кими пребыва́нии,/ терпе́нием же искуше́ний/ и стоя́нием кре́пким во обстоя́ниих,/ в ни́хже ме́сто безконе́чное прия́л еси́ наслажде́ние,/ и сла́дость несконча́емую,/ и ра́дость неизглаго́ланную.

Сла́ва, глас 6:

Е́же по о́бразу соблю́дше невре́дно,/ ум влады́ку на стра́сти губи́тельныя по́стнически утве́рждше,/ ко е́же по подо́бию, я́коже мо́щно, приидо́сте:/ му́жески бо естество́ пону́дивше,/ потща́вшеся ху́ждшее покори́ти лу́чшему/ и пло́ть порабо́тити ду́ху./ Те́мже мона́шествующих показа́стеся верх,/ гра́ждане пусты́ннии,/ благотеку́щих обучи́тели,/ пра́вило доброде́телей изве́стное,/ и ны́не на Небесе́х зерца́лом разре́шшимся/ чи́сте зри́те Святу́ю Тро́ицу,/ моля́щеся вку́пе о и́же ве́рою и любо́вию чту́щих вас.

И ны́не, пра́здника или́ Богоро́дичен.

А́ще не пра́зднуеши, Крестобогоро́дичен.

Подо́бен: Тридне́вен:

Зачатие Твое́ безсе́менное/ и рождество́ неизрече́нное помышля́ющи,/ удивля́юся зело́:/ ка́ко си́це, я́коже злоде́й,/ благоволи́л еси́ умре́ти, Сы́не? –/ Пречи́стая, пла́чущи, взыва́ше.

Тропа́рь, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас/ но моли́твами их/ в ми́ре упра́ви живо́т наш.

Тропа́рь преподо́бнаго Ону́фрия, глас 1:

Жела́нием духо́вным пусты́ни дости́гл еси́,/ Богому́дре Ону́фрие,/ и, я́ко безпло́тен, в ней многоле́тне подвиза́лся еси́ трудолю́бие,/ соревну́я проро́ком Илии́ и Крести́телю,/ и, от руку́ а́нгельску Та́ин Боже́ственных наслади́вся,/ ны́не во све́те Святы́я Тро́ицы ку́пно с ни́ми весели́шися,/ моли́ спасти́ся нам,/ твою́ па́мять почита́ющим.

Тропа́рь преподо́бнаго Петра́, глас 4:

Мир оста́вил еси́, Пе́тре, Го́спода ра́ди своего́/ и крест восприи́м на ра́мо свое́,/ на го́ру дости́гл еси́ Афо́нскую,/ я́коже дре́вле фесви́тянин Илия́./ И в ней пребы́в поще́нием, и моли́твами, и бде́нием,/ Бо́га ми́лостива творя́,/ и Пречи́стую Богоро́дицу Моле́бницу предлага́я,/ сего́ ра́ди вопие́м ти:/ моли́ Христа́ Бо́га, да спасе́т ду́ши на́ша.

Кано́н Окто́иха еди́н, а́ще не пра́зднуеши, и святы́х два, на 8.

Кано́н Ону́фрия, глас 4.

Пе́снь 1

Ирмо́с: Колесни́цы фарао́новы/ и си́лу его́ вве́рже в мо́ре Кре́пкий во бране́х;/ воспое́м пе́снь но́вую, я́ко просла́вися.

Зари́ трисве́тлыя осия́емь све́том,/ мра́ка мя исхи́ти смертоно́снаго согреше́ний/ твои́ми, о́тче, моли́твами, Ону́фрие,/ я́ко да пою́ па́мять твою́.

Ми́ра отве́ргся, прилепи́лся еси́ Христу́,/ пло́ть покори́л еси́ по́мыслу/ и прия́телище яви́лся еси́ Свята́го Ду́ха, о́тче Богому́дре Ону́фрие.

Столпо́м Боже́ственнаго све́та наставля́емь, Еги́пет оста́вил еси́ стра́стный,/ и к высоте́ дости́гл еси́ безстра́стия,/ и Бо́гу бесе́довал еси́.

Богоро́дичен: Родила́ еси́ пре́жде Тебе́ ро́ждшагося из Отца́,/ пребыла́ же еси́ нетле́нна, и по рождестве́ Де́ва:/ те́мже Богоро́дицу Тя и́стинную испове́дуем, Препе́тая.

Ин кано́н преподо́бнаго Петра́. Творе́ние Ио́сифово, глас 2.

Пе́снь 1

Ирмо́с: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петский,/ я́ко просла́вися.

Друга́го тя нам Петра́ предлага́ет Це́рковь дне́сь,/ просвеща́юща, а на́ша мы́сли па́мятию твое́ю Боже́ственною, о́тче пребога́те.

Ка́ла страсте́й очи́щ о́чи у́мныя, преподо́бне,/ я́сно ви́дел еси́ безме́рную добро́ту Христа́ Царя́, тя просла́вльшаго.

Просия́в тебе́, Трисо́лнечнаго Божества́, преблаже́нне, невече́рний свет/ соде́ла тя чи́сто прия́телище Боже́ственных дарова́ний, о́тче Богому́дре.

Богоро́дичен: И́же нас ра́ди из Тебе́, Де́во, в челове́ка премно́гою бла́гостию обо́лкся,/ преподо́бных собо́ры Того́ возлю́бльших препросла́влен е́сть.

Пе́снь 3

Ирмо́с: Утвержда́яй гром и созида́яй дух,/ утверди́ мене́, Го́споди, да Тя пою́ и́стинно/ и творю́ во́лю Твою́:/ я́ко не́сть свят, я́ко Ты, Бо́же наш.

А́нгельскому после́дуя зре́нию, пусты́ню дости́гл еси́/ и, воздержа́нием плотски́я сла́сти увяди́в,/ а́нгельски пожи́л еси́ в той, блаже́нне.

Насажде́но дре́во при исхо́дищих яви́вся воздержа́ния вод,/ во бла́го, о́тче, вре́мя благопло́дие доброде́телей/ я́ко вои́стинну по́дал еси́, Ону́фрие, дея́нием.

Всесве́тлая звезда́ вселе́нней от пусты́ни возсия́в,/ уясни́л еси́ ве́рных собо́ры заря́ми по́двигов благочести́вых,/ о́тче наш Ону́фрие преподо́бне.

Богоро́дичен: Пра́отец разори́ла еси́ печа́ль,/ ра́дость нам ро́ждши, Жизнода́вца и Изба́вителя, Пресвята́я Богоро́дице,/ Его́же приле́жно моли́ спасти́ ста́до Твое́.

Ин

Ирмо́с: Утверди́ нас в Тебе́, Го́споди,/ Дре́вом умерщвле́н грех,/ и страх Твои́ всади́/ в сердца́ нас, пою́щих Тя.

Умертви́в я́же на земли́ у́ды, преподо́бне,/ поуче́нии оживи́л еси́ ду́шу Боже́ственными/ и получи́л еси́ ве́чную жи́знь и све́тлость.

Совокупи́лся еси́, я́ко до́бре пожи́в, с Вы́шними, преблаже́нне, ликостоя́нии,/ в безмо́лвии пребыва́я и на добро́ту Боже́ственную взира́я.

В гора́х я́ве скрыва́емь, челове́к совокупле́ния удали́лся еси́/ и ум ве́сь впери́л еси́ к Небе́сней добро́те, веселя́ся.

Богоро́дичен: Пала́ту красну́ неизрече́ннаго бога́тства, Де́во, зна́юще,/ по до́лгу Тя сла́вим,/ спа́сшиися Рождество́м Твои́м, Всенепоро́чная.

Конда́к преподо́бнаго Петра́, глас 2.

Подо́бен: Вы́шних ища́:

Удали́в себе́ челове́ческаго сожи́тельства,/ в пеще́рах ка́менных и разсе́линах пожи́л еси́,/ жела́нием Боже́ственным и любо́вию, Пе́тре, Го́спода твоего́,/ от Него́же вене́ц прия́л еси́./ Моли́ непреста́нно спасти́ся нам.

И́кос:

Мирски́х молв избе́г и бу́ри жите́йския,/ я́ко бе́гательны и уко́рны,/ непроходи́мая места́ дости́гл еси́/ и осо́бь, я́коже пти́ца, еди́н ле́та мно́га пожи́л еси́,/ в пеще́рах и про́пастех, и разсе́линах кры́яся,/ ко Го́споду взира́я и Того́ исполня́я повеле́ния;/ от Него́же прие́мь благода́ть, преподо́бне,/ я́ко со́лнце, о́тче, возсия́л еси́,/ моля́ непреста́нно о всех нас.

Седа́лен свята́го Ону́фрия, глас 4.

Подо́бен: Ско́ро предвари́:

Удали́лся еси́, преподо́бне, и в пусты́нях я́ве водвори́лся еси́,/ Го́спода, изба́вльшаго тя от лют, при́сно ожида́я./ Те́мже, благоугоди́в Влады́це, всеблаже́нне,/ прия́л еси́ нестаре́ющееся Небе́сное Ца́рство,/ в не́мже ны́не водворя́яся, помина́й чту́щия тя.

Слава, преподо́бнаго Петра, глас 1.

Подо́бен: Гроб Твой, Спа́се:

Погре́бл еси́ страсте́й всевоста́ние умерщвле́нием пло́ти, свяще́нный о́тче,/ и жизнь безконе́чную по сме́рти прия́л еси́./ Те́мже днесь Христо́ва Це́рковь пра́зднует твою́ досточу́дную па́мять,/ преподо́бных украше́ние.

И ны́не, пра́здника или́Богоро́дичен:

Наста́ви нас на путь покая́ния,/ укло́ншияся при́сно к безпу́тием зол и Преблага́го прогне́вавшия Го́спода,/ Неискусобра́чная благослове́нная Мари́е,/ прибе́жище отчая́нных челове́ков, Бо́жие жили́ще.

Крестобогоро́дичен:

Зря́щи Тя, Христе́, Всенепоро́чная Ма́ти ме́ртва, на Кресте просте́рта, вопия́ше:/ Сы́не Мой, собезнача́льне Отцу́ и Ду́ху,/ что неизрече́нное Твое́ сие́ смотре́ние,/ и́мже спасл еси́ пречи́стых рук Твои́х, Ще́дре, созда́ние.

Песнь 4

Ирмос: Услы́шах, Бо́же, слух Твой и убоя́хся,/ разуме́х дела́ Твоя́ и ужасо́хся, Го́споди,/ я́ко Твоего́ хвале́ния испо́лнь земля́.

Совле́к тле́нную греха́ ри́зу, о́тче,/ пра́вды, Ону́фрие, во оде́жду обле́клся еси́/ и внутрь черто́га всели́лся еси́.

Моли́твами непреста́нными свет Боже́ственнаго ра́зума/ собра́л еси́ в се́рдцы твое́м, о́тче наш,/ неразу́мия же отбе́гл еси́ мра́чныя ле́сти, Ону́фрие.

Те́сный ше́ствовав путь и приско́рбный на земли́, Богому́дре,/ к широ́кому дости́гл еси́/ и ра́дости испо́лнен Небе́сных наслажде́ний, преподо́бне.

Богоро́дичен: Спасе́ние Тя на вся́ко вре́мя и ме́сто призыва́ю:/ не пре́зри Мене́, Всенепоро́чная,/ Я́же Бо́га ро́ждшая, Изба́вителя вку́пе и Спа́са моего́.

Ин

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

В гора́х и пеще́рах, му́дре, быва́я,/ Боже́ственное восхожде́ние в се́рдцы поло́ж,/ вся изсуши́л еси́ страсте́й то́ки Боже́ственною благода́тию.

Стреля́ния де́монов, и стрел, и ловле́ния до конца́ отбе́гл еси́,/ щито́м ве́ры, преподо́бне, покрыва́емь.

Пове́ржена при но́гу твое́ю льсти́ваго зми́я/ и смех ви́дяще, су́рово свире́пеющагося, Пе́тре всесла́вне,/ вели́чие Го́сподеви возсыла́ем.

Богоро́дичен: Госпо́дь, из Тебе́ роди́вся, Госпоже́ Всенепоро́чная,/ облада́юща врага́ ми́ром изба́ви вся,/ преподо́бныя же, я́ко возлю́бльшия Сего́, возвели́чи.

Пе́снь 5

Ирмо́с: Возсия́й ми, Го́споди, Свет повеле́ний Твои́х,/ я́ко к Тебе́ дух мой у́тренюет и пое́т Тя:/ Ты бо, еси́ Бог наш,/ и к Тебе́ прибега́ю, Царю́ ми́ра.

А́нгелом единожи́теля Пафну́тий обре́т в пусты́ни тя,/ вели́каго равноа́нгельнаго свети́льника,/ благоче́стно жития́ твоего́ всем яви́ исправле́ния, му́дре.

Возсия́ тебе́ Госпо́дь, Его́же от души́ вожделе́л еси́,/ безстра́стия Свет невече́рний, Ону́фрие,/ и мир в по́вестех непоро́чнаго жития́ твоего́ ве́сь просвети́л еси́, му́дре.

Я́ко благопропове́дуя, Ону́фрие блаже́нне, е́же прилепля́тися Бо́гу на́шему,/ на Того́ упова́ние от души́ возложи́л еси́/ и Того́ хвалу́ име́л еси́ во усте́х при́сно.

Богоро́дичен: Возсия́й ми, Влады́чице, зарю́ ми́лости Твоея́,/ во тьме́ прегреше́ний мои́х су́щу, Де́во,/ и к све́ту наста́ви покая́ния, молю́ся, и спасе́ния жи́зни.

Ин

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ина́го бо́га не зна́ем.

На го́ры честны́х за́поведей восте́к,/ я́коже Моисе́й, преподо́бне, ви́дел еси́ Бо́га я́ве,/ я́коже вмеща́л еси́,/ и, все́ми просве́щся душе́вными чу́вствы, вельми́ просла́вился еси́.

Манове́нии Боже́ственными при́сно удобря́емь, му́дре,/ пребы́л еси́ стра́сти вся́кия неприча́стен, Пе́тре,/ и безстра́стием, я́ко оде́ждею, обле́клся еси́, преподо́бне.

Ле́ты мно́гими сокрыва́емо те́ло твое́ в просвеще́ние на́ше яви́ся,/ источа́я ре́ки нам исцеле́ний и ми́ро благода́ти.

Богоро́дичен: Свяще́нными гла́сы Тя, добро́ту Иа́ковлю, пое́м,/ пло́тски ро́ждшую ми́рови Свет, И́же от Све́та,/ просвеща́ющ преподо́бных собо́р.

Пе́снь 6

Ирмо́с: Бу́ря мя помышле́ний пости́гши,/ во глубину́ низвлачи́т мя безме́рных грехо́в,/ но Ты, Упра́вителю Благи́й,/ предвари́в, упра́ви,/ я́ко проро́ка, и спаси́ мя.

Мра́зом померза́емей пло́ти твое́й,/ теплото́ю Ду́ха гре́яшеся твой дух;/ зно́ем же опаля́емь, му́дре,/ роса́ прохлажда́ше Небе́сная тя благода́тию.

Ходя́щу ти в пусты́ни, от Бо́га предвожда́лся еси́, сла́вне, светозаре́нием,/ та́мо хотя́щаго све́та приити́ тя ны́не пропису́я/ и сла́ву, при́сно пребыва́ющую.

В верте́пе роди́выйся и на руку́ ста́рца я́ко Младе́нец прияти́ сподо́блься,/ младе́нствующа де́лы благи́ми, ста́рца в верте́пе тя учиня́ет к лу́чшим.

Богоро́дичен: Бе́здну ми́лости ро́ждшая,/ страсте́й мои́х бе́здну пучи́ною щедро́т Твои́х пото́пльши,/ ту́чу от души́ пода́ждь ми слез, Богороди́тельнице Всенепоро́чная.

Ин

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Утве́рждься кре́постию Ду́ха,/ всю вра́жию кре́пость смири́л еси́/ и, победи́тель быв, ко Христу́ венцено́сец восте́кл еси́.

Стопа́м после́дуя был еси́, преподо́бне, Петру́ верхо́вному, ка́меню ве́ры,/ его́же и зва́ние име́л еси́/ и ве́рою бога́тно обогати́лся еси́.

По́двигом Боже́ственным подвиза́лся еси́, о́тче,/ и веру подо́бно соблю́л еси́,/ про́чее тебе́ предлежи́т до́браго де́лания вене́ц.

Богоро́дичен: Во утро́бу Твою́ всели́ся, и все челове́ческое существо́ обожи́,/ и преподо́бных, Чи́стая, мно́жество свяще́нно привлече́.

Конда́к, глас 3.

Подо́бен: Де́ва днесь:

Сия́нием Ду́ха Пресвята́го,/ Богому́дре, просве́щся,/ оста́вил еси́ я́же в житии́ молвы́,/ пусты́ню же дости́гл есй, преподо́бне о́тче,/ возвесели́л еси́ и́же над все́ми Бо́га и Зижди́теля,/ сего́ ра́ди прославля́ет тя Христо́с, блаже́нне,/ вели́кий Дарода́тель.  

И́кос:

Кто изрече́т твоя́ по́двиги, всеблаже́нне?/ Или́ кто от земноро́дных досто́йно похва́лит твое́ житие́, Ону́фрие о́тче?/ Я́коже безпло́тен, пожи́л еси́, бы́лии пита́емь,/ пи́щу же име́л еси́ Христа́ Бо́га,/ на Него́же твою́ наде́жду положи́л еси́,/ наг ходя́ в пусты́нях, сту́день и мраз, я́ко безпло́тен, терпя́./ Сего́ ра́ди Той тя свети́льника показа́, блаже́нне, вели́кий Дарода́тель.

Песнь 7

Ирмо́с: Глагола́вый на горе́ с Моисе́ом/ и о́браз де́вства явле́й в купине́,/ благослове́н еси́, Бо́же оте́ц на́ших.

На горе́ Илию́ препита́вый вра́ном,/ Той тебе́ А́нгелом пи́щу посыла́ет,/ тя велича́я, преподо́бне, Того́ возвели́чившаго.

Я́коже фи́никс, при исхо́дищих прозя́б водны́х воздержа́ния,/ пи́щу име́л еси́ фи́ники,/ пита́вся пи́щею боле́зней твои́х.

Виде́нии разширя́яся, о́тче,/ боле́зньми пита́лся еси́ воздержа́ния/ и ны́не получи́л еси́ Го́рнее благопита́ние, Ону́фрие.

Богоро́дичен: И́же во чре́во Де́вы всели́выйся и сие́ небе́с ши́рши показа́вый,/ благослове́н еси́, Го́споди, Бо́же оте́ц на́ших.

Ин

Ирмо́с: Те́лу злато́му прему́дрыя де́ти не послужи́ша,/ и в пла́мень са́ми поидо́ша,/ и бо́ги их обруга́ша,/ среди́ пла́мене возопи́ша, и ороси́ я А́нгел:/ услы́шася уже́ уст ва́ших моли́тва.

Тве́рдым по́мыслом на ра́мо крест взем, распе́ншемуся после́довал еси́,/ я́ко мона́х освяще́н, опаля́я, я́ко хвра́стие, стра́сти/ и вопия́, преблаже́нне:/ благослове́н еси́, Го́споди, Бо́же оте́ц на́ших.

Тя, ле́ты мно́гими сокрове́на, я́ко сокро́вище,/ явля́ет та́йно Боже́ственное Сло́во, Пе́тре преподо́бне, в явле́нно снабде́ние/ всем, вта́йне стяжа́вшим грехо́вныя скве́рны,/ явле́нна тя моли́твенника, ка́ющимся я́сно.

Благово́нно Христу́ обе́том доброде́телей яви́ся кажде́ние,/ ми́ро излива́емо благово́нно от честны́х моще́й твои́х/ всем зря́щим во удивле́ние излива́я:/ с пло́тию бо а́нгельское житие́ пожи́л еси́.

Богоро́дичен: Красну́ обре́т и добру́ в жена́х Тя, Пресвята́я,/ прекра́сное Сло́во всели́ся в пресвято́е чре́во Твое́,/ вся ли́ки преподо́бных осве́щ, зову́щия:/ благослове́н еси́, Го́споди, Бо́же оте́ц на́ших.

Пе́снь 8

Ирмо́с: Земля́ и вся, я́же на ней,/ мо́ре и вси исто́чницы,/ небеса́ небе́с, свет и тьма́, мраз и зной,/ сы́нове челове́честии,/ свяще́нницы, благослови́те Го́спода/ и превозноси́те Его́ во ве́ки.

Зе́млю до́льную премину́в, Небе́сную стяжа́л еси́ жи́знь,/ и Безпло́тных лико́м счи́слился еси́, нося́ пло́ть, Ону́фрие блаже́нне,/ и зе́млю кро́тких насле́довал еси́, ю́же тебе́ подаде́ Христо́с во ве́ки.

Сле́зныя ка́пли гаси́ло стяжа́л еси́ вои́стинну стра́стным разгоре́нием/ и любо́вию огня́ Боже́ственнаго росе́ совокупи́лся еси́ безстра́стия,/ Христу́ Бо́гу на́шему,/ те́мже тя чтим, Ону́фрие Богому́дре.

А́нгельскому житию́ поревнова́вша непреста́нными моли́твами,/ руко́ю А́нгела Свои́м та́йнам прича́стника, о́тче, Христо́с тя показа́,/ Вели́каго Сове́та вои́стинну А́нгел, Его́же превозно́сим во ве́ки.

Богоро́дичен: Земле́ свята́я, из Нея́же Христо́с прозябе́, клас жи́зни,/ и иста́явшее гла́дом назда́ челове́ческое естество́ дре́вния зло́бы, Богома́ти Всенепоро́чная,/ те́мже Тя пое́м во ве́ки.

Ин

Ирмо́с: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки.

Блаже́нства Боже́ственнаго сподо́бился еси́ вои́стинну, Пе́тре Богому́дре, во́лею обнища́в/ и всегда́, му́дре, пла́кав, и, кро́ток быв,/ насле́дил еси́ зе́млю кро́тких.

Бодр име́я по́мысл, успи́л еси́ страсте́й воста́ния/ и, усну́в, сон до́лжный ны́не пра́ведным, всем, пребога́те, неусыпа́ющ яви́лся еси́,/ тя чту́щим моли́твенник.

Зимо́ю и ва́ром, му́дре, победи́в зи́му де́монскую,/ духо́вною теплото́ю потребля́еши я́ве/ и стра́сти умерщвля́еши теле́сныя, безстра́стия облиста́я сия́нием.

В горе́ Афо́нстей всели́лся еси́,/ я́коже на Карми́льстей иногда́, Пе́тре Богому́дре, Фесви́тянин Илия́,/ в безмо́лвии Бо́га усе́рдно ища́й, досточу́дне,/ и Сего́ зре́ния, я́ко преподо́бен, сподо́бился еси́.

Богоро́дичен: Уны́л име́я по́мысл и ду́шу, сластьми́ отягче́ну,/ к Тебе́ прибега́я, Богороди́тельнице Чи́стая, вопию́ Ти:/ воздви́гни и спаси́ мя, отча́яннаго и осужде́ннаго.

Пе́снь 9

Ирмо́с: Я́ко сотвори́ Мне вели́чие Си́льный,/ и свя́то и́мя Его́,/ и ми́лость Его́ в род и род боя́щимся Его́.

Взира́нии непреста́нными, я́же к Бо́гу, о́тче Богому́дре, обожа́емь,/ прича́стием Его́ был еси́ бог/ и, со А́нгелы служа́, Сего́ сла́виши при́сно.

Умертви́в пло́ть, победи́л еси́ врага́,/ преста́вился еси́ к невече́рней зари́,/ Небе́сных благ ты насле́дник быв, о́тче Ону́фрие.

Любо́вию творя́щих святы́й твой пра́здник/ от вся́каго треволне́ния страсте́й мольба́ми твои́ми избавля́й при́сно,/ я́ко дерзнове́ние обре́т у Спа́са, Ону́фрие.

Богоро́дичен: Наде́жду Тя и сте́ну стяжа́вше, Пречи́стая,/ упова́ем улучи́ти блага́я моли́твами Твои́ми, Чи́стая,/ я́же обеща́ Христо́с, воплоти́выйся из Тебе́ нас ра́ди.

Ин

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Кре́постию и держа́вою Христо́с Бог тя препоя́сав,/ укрепи́ победи́ти хи́трости де́монския, пребога́те,/ я́ко возлю́бльша Сего́ от всего́ се́рдца и души́./ Сего́ ра́ди тя ве́рою ублажа́ем и любо́вию.

Яви́лся еси́ в до́му Госпо́дни, я́ко ма́слина, Богому́дре,/ еле́ем по́тов твои́х на́ша умаща́я ли́ца,/ творя́щих твой сей сла́вный и Боже́ственный пра́здник,/ мона́хов украше́ние, преподо́бных верхо́вник.

Твое́ пресла́вное, источи́вшее, всесла́вный Пе́тре, те́ло/ благово́нно и красно́ ми́ро, ве́рныя благово́ния испо́лни,/ благово́ние бо Бо́гу и жив, и по кончи́не я́ве показа́лся еси́./ Те́мже тя досто́йно ублажа́ем.

Освяще́нный Го́споду Бо́гу на́шему сосу́де,/ му́чеником, и апо́столом, и А́нгелом собесе́дниче,/ о всех моли́, ве́рою тя чту́щих на земли́,/ да обря́щем вси согреше́ний оставле́ние.

Богоро́дичен: Пощади́ мя, Го́споди, пощади́, егда́ хо́щеши ми суди́ти,/ и не осуди́ мене́ во о́гнь, ниже́ я́ростию обличи́ши мене́,/ мо́лит Тя Де́ва, Тебе́ ро́ждшая, Христе́,/ и а́нгельстии собо́ри, и преподо́бных совокупле́ния.

Свети́лен.

Подо́бен: Жены́, услы́шите:

А́нгельстии удиви́шася чи́ни твои́м по́двигом,/ я́же в пусты́ни твори́л еси́, Ону́фрие Богоно́се:/ три бо к шести́десятим ле́та, о́тче, пости́лся еси́./ И ны́не, всеблаже́нне преподо́бне, со Христо́м ца́рствуеши в непроходи́мыя ве́ки.

Сла́ва, свята́го Петра́, Подо́бен то́йже:

Петру́ тезоимени́таго верхо́вному вси по́стников похвалу́/ и преподо́бных сла́ву, столпа́ Небе́снаго, цве́та афо́нскаго/ велегла́сно пе́сньми почти́м по до́лгу,/ я́ко моли́твенника нам всем.

Богоро́дичен:

Богоро́дицу Тя вои́стинну испове́дуем, Влады́чице, Тебе́ ра́ди спа́сшиися,/ и́бо Бо́га неизрече́нно родила́ еси́, разру́шшаго Кресто́м сме́рть/ и к Себе́ привле́кша преподо́бных собо́ры,/ с ни́миже Тя восхваля́ем, Де́во.

На хвали́тех стихи́ры, глас 8:

На Не́бо теку́щую всед колесни́цу, чу́дне, доброде́телей/ дости́гл еси́ краегра́дия по́стничеством,/ из пусты́ни смотря́я Вы́шняго Иерусали́ма преми́рная,/ и я́же от трудо́в и по́двигов досто́йныя по́чести восприе́м,/ с Небе́сными ра́дуешися чинонача́лии, преблаже́нне,/ ве́чных благ насле́дник и Ца́рствия жи́тель быв,/ но моли́ся, Богоно́сне Ону́фрие, Спа́су всех,/ умири́ти мир и спасти́ ду́ши на́ша.

По́двига неле́ностно тве́рдостию, блаже́нне, защити́вся/ и благода́тию духо́вною вооружи́вся,/ Амали́ка победи́л еси́,/ вся́кия еги́петския тьмы́ ополче́ние, и, по́мысл очи́стив,/ и́же на высоту́, блазни́теля обличи́л еси́,/ победоно́сец яви́лся еси́ на ду́хи, преблаже́нне,/ и снасле́дник Христо́в яви́ся,/ Безпло́тных подража́тель быв,/ но моли́ся, Богоно́сне Ону́фрие, Спа́су всех/ умири́ти мир и спасти́ ду́ши на́ша.

Вре́менных предзря́, до́льных взыску́я, Богому́дре,/ высо́кая и пребыва́ющая возлюби́л еси́ Боже́ственным раче́нием,/ крест бо свой поне́сл еси́ на ра́ме ева́нгельски/ и Бо́га возлюби́л еси́,/ поще́нием му́жески победи́в бесо́вския полки́,/ с Небе́сными весели́шися ли́ки, я́коже непобеди́м/ и пречи́стый храм, жела́я безконе́чныя жи́зни сподо́битися, был еси́,/ но моли́ся, Богоно́сне Ону́фрие, Спа́су всех,/ умири́ти мир и спасти́ ду́ши на́ша.

Взыска́л еси́, Богоно́сне, ви́дети Госпо́дню красоту́/ и еди́н Тому́ Еди́ному бесе́довати вожделе́л еси́,/ те́мже мир оста́вил еси́,/ бе́гая и пребыва́я в пусты́нях и гора́х,/ и, в Христа́ обле́кся, небре́гл еси́ о ри́зе,/ нетле́ния ри́зу себе́ самому́ соде́ловая,/ с не́юже же возше́л еси́ в Небе́сный черто́г,/ ве́чно ра́дуяся, Ону́фрие преподо́бне.

Сла́ва, глас 6:

Дне́сь вели́кий свети́льник,/ основа́ние пусты́нных, верх преподо́бных,/ пра́вило и́ночествующих,/ А́нгел земны́й и Небе́сный челове́к,/ вели́кий Ону́фрий от земны́х к Небе́сным пресла́вно прехо́дит,/ а́нгельскими чи́нми дориноси́м./ Те́мже и мы, соше́дшеся в па́мять его́,/ псалмы́ и пе́сньми духо́вными Христа́ воспева́ем,/ И́же та́ко того́ по досто́инству просла́вльшаго,/ и мо́лимся: того́ моли́твами да спасе́т ду́ши на́ша,/ я́ко Человеколю́бец.

И ны́не, Богоро́дичен:

Преложе́ние скорбя́щих,/ премене́ние боля́щих еси́, Богоро́дице Всепе́тая,/ спаси́ оби́тель и лю́ди,/ бори́мых умире́ние,/ обурева́емых тишина́,/ еди́на Предста́тельница ве́рных.

А́ще не пра́зднуеши, на стихо́вне Окто́иха.

Сла́ва, глас 8:

Мона́хов мно́жества,/ наста́вники вас почита́ем, отцы́ всечестни́и,/ и́миже мы вои́стинну стезю́ пра́вую ше́ствовати позна́хом./ Блаже́нни есте́ Христу́ рабо́тавшии/ и вра́жию низложи́вшии си́лу,/ Госпо́дни уго́дницы,/ А́нгелом святы́м соприча́стницы,/ с ни́миже моли́теся Го́сподеви/ поми́ловатися душа́м на́шим.

Крестобогоро́дичен.

Подо́бен: О, пресла́внаго чудесе́:

Ю́ница нескве́рная,/ Юнца́ ви́дящи, на Дре́ве/ пригвожда́ема во́лею,/ рыда́ющи жа́лостне,/ увы́ Мне, – вопия́ше, –/ Люби́мейшее Ча́до!/ Что Ти сонм воздаде́ безблагода́тный евре́йский,/ хотя́ Мя обезча́дствовати/ от Тебе́, Вселюбе́зне?

НА ЛИТУРГИ́И

Блаже́нны, от кано́на Петра́, пе́снь 3-я, и Ону́фрия, пе́снь 6-я. Проки́мен, глас 7: Честна́ пред Го́сподем/ сме́рть преподо́бных Его́. Стих: Что возда́м Го́сподеви: Апостол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Стих: Си́льно на земли́ бу́дет: Ева́нгелие от Матфе́я, зача́ло 43. Прича́стен: Ра́дуйтеся, пра́веднии, о Го́споде:

Моли́тва

О преизя́щный и превели́кий пустынножи́телю, преподо́бне о́тче Ону́фрие! Похваля́ю твоя́ неизрече́нная чудотворе́ния и житие́ пресве́тлое, е́же еси́ препроводи́л от ю́ности твоея́ да́же и до ста́рости: никто́же бо изчести́ возмо́жет терпе́ний и по́двигов твои́х, прече́стне. Удиви́ся преподо́бный Пафну́тий твоему́ жесто́кому, е́же в пусты́ни, житию́, вку́пе же и зело́ возра́довася, обре́т тя еди́наго толи́ких по́двигов и соверше́нства су́ща о́браз. Сего́ ра́ди и по́длинно испыта́ о труде́х твои́х святы́х и о е́же коли́ко име́л еси́ вре́меннаго жития́. Те́мже и написа́, я́ко шестьдеся́т лет и три в трудолю́бии пребыва́я, в наготе́ претерпева́я мраз и зной, в глубо́цей пусты́ни со зверьми́ и пти́цы обита́я, моли́твы непреста́нно творя́, пожи́л еси́. Сего́ ра́ди ны́не ра́дость тебе́ приношу́ от недосто́йных усте́н мои́х, преподо́бне о́тче, преподо́бному Пафну́тию ра́досте вели́кая: сподо́бися бо при кончи́не со львы́ послужи́ти тебе́, погребсти́ те́ло твое́ и с тобо́ю на Небеси́ жи́ти, Илии́ Фесви́тянину ревни́телю, Иоа́нну Крести́телю насле́дниче, дру́же Христо́в и снасле́дниче и́стинный, Еги́пту у́мная красото́, фиве́ом вели́кое свети́ло, Ливи́и кра́сная добро́то, фи́никсе краснопроцвета́ющий, орле́ высокопа́рный, лета́ющий в поднебе́сная, на Небесе́х гражда́нство обреты́й, иде́же и водвори́ся у Престо́ла Влады́ки сла́вы, с два́десять четы́рьми ста́рцы жили́ще обреты́й, с ни́ми же и пребыва́еши. И ны́не молю́ тя, пречу́дный граждани́не Небе́сный, святы́х лико́в А́нгельских совсе́льниче: услы́ши мя, гре́шнаго и недосто́йнаго раба́ твоего́, в час сей и приими́ сие́ ма́лое моле́ние мое́, вели́кий засту́пниче, ско́рый помо́щниче притека́ющим к тебе́ усе́рдно; загла́ди рукописа́ние дел мои́х скве́рных и нечи́стых, я́же держа́т де́монския полки́, покры́й мя твои́м заступле́нием, причти́ мя ко угото́ванному ме́сту моли́твами твои́ми и сподо́би мя Вы́шняго Иерусали́ма, и́бо по Преблагослове́нней Влады́чице на́шей Богоро́дице и Присноде́ве Мари́и тебе́ между́ тепле́йшими помо́щниками и засту́пниками мои́ми почита́ю. Присеща́еши бо и дае́ши ру́ку по́мощи припа́дающим к тебе́ в хра́ме твое́м повсю́ду. Те́мже и аз, недосто́йный, ны́не тебе́ молю́ся и призыва́ю: умоли́ Ми́лостиваго Бо́га, да отпу́стит ми вся прегреше́ния моя́ во́льная и нево́льная, сотворе́нная вся зла́я дела́ моя́ и да изба́вит мя твои́м предста́тельством от ве́чных мук, научи́т мя твори́ти до́брая дела́, наста́вит мя на пу́ть ко спасе́нию и́стинному и сподо́бит мя ку́пно ра́дости ве́чныя наслади́тися со все́ми святы́ми ны́не, и при́сно, и во ве́ки веко́в. Ами́нь.

А́ще бу́дет па́мять преподо́бныя А́нны Ка́шинския в попра́зднство Святы́я Пятдеся́тницы или́ в Неде́лю всех святы́х, ищи́ уста́в ея́ слу́жбы в хра́мовых глава́х.

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 1.

Подо́бен: О, ди́вное чу́до:

О блаже́нная ма́ти,/ вели́кая княги́не иноки́не А́нно!/ От блага́го ко́рене произрасла́ еси́, преподо́бная,/ а́ки красноцвету́щая ве́твь/ и та́ко сама́ от ю́ности твоея́/ сосу́д избра́нный Бо́гу яви́лася еси́/ до́брыми твои́ми дея́нии,/ посто́м и моли́твою, воздержа́нием и ми́лостынею,/ чистото́ю душе́вною и теле́сною,/ любо́вию и смиренному́дрием./ Тем и Христо́с всели́ся в тя, преподо́бная,/ Ему́же ны́не моли́ся/ дарова́ти нам мир и ве́лию ми́лость.

О блаже́нная ма́ти,/ вели́кая княги́не иноки́не А́нно!/ Ты от млады́х ногте́й твои́х/ страх Бо́жий име́ла еси́ в се́рдце твое́м,/ духо́вныя о́чи твои́ к Го́рнему Иерусали́му устремля́ющи/ и помышля́ющи всегда́ о бу́дущих,/ я́же и получи́ла еси́, преподо́бная./ Те́мже ны́не моли́ся/ дарова́ти нам мир и ве́лию ми́лость.

О чу́дная ма́ти,/ вели́кая княги́не иноки́не А́нно!/ Чи́стая душа́ твоя́,/ я́ко зерца́ло, очище́но доброде́тельми твои́ми мно́гими, явля́ется,/ отобража́ющее всем душе́вное спасе́ние/ и ко Творцу́ на́шему и Бо́гу присвое́ние./ Ны́не у́бо моли́ся/ дарова́ти душа́м на́шим мир и ве́лию ми́лость.

Сла́ва, глас 5:

Возсия́вшей весне́, прииди́те, лю́дие, возвесели́мся,/ се бо приближа́ется ле́то Госпо́дне благоприя́тное,/ принося́щее плоды́ мно́гия:/ почти́м па́мять преподо́бныя ма́тере,/ вели́кия княги́ни и́нокини А́нны,/ и восприи́мем по́льзу душе́вную,/ я́ко та́я угоди́ Христу́ Бо́гу мно́гими свои́ми труды́ и по́двиги/ и показа́ нам пу́ть ко спасе́нию,/ и ны́не мо́лит Христа́ Бо́га/ дарова́ти нам мир и ве́лию ми́лость.

И ны́не, Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и прибе́жище душ на́ших.

На стихо́вне стихи́ры, глас 2.

Подо́бен: До́ме Евфра́фов:

Дом и жили́ще/ Пресвято́му Ду́ху/ была́ еси́, блаже́нная ма́ти А́нно,/ тем и Христо́с в тебе́ живя́ше/ и ум твой и ду́шу просвеща́ше.

Стих: Честна́ пред Го́сподем/ сме́рть преподо́бных Его́.

Дом и пода́тельница ни́щим/ и всем неиму́щим/ яви́лася еси́, достохва́льная,/ тем и приобрела́ еси́/ бога́тство неистощи́мое на Небесе́х.

Стих: Что возда́м Го́сподеви о всех,/ я́же воздаде́ ми?

Дом доброде́телей/ измла́да нача́ла еси́ бы́ти,/ преподо́бная ма́ти А́нно,/ тем и получи́ла еси́ Ца́рство Небе́сное/ и жи́знь векове́чную.

Сла́ва, и ны́не, глас то́йже:

Ра́дуйся, Ма́ти Госпо́дня,/ ра́дость от А́нгела прие́мшая,/ и ми́ру пода́вшая,/ и печа́ль Е́вину до́бре утоли́вшая.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 5.

Подо́бен: Ра́дуйся:

Ра́дуйся, преподо́бная ма́ти,/ вели́кая княги́не иноки́не А́нно,/ благоволи́ бо Бог освяти́ти тя от ю́ности твоея́/ Боже́ственным Свои́м светосия́нием,/ и обогати́ти тя Свое́ю благода́тию,/ и просвети́ти твои́ о́чи серде́чныя,/ во е́же зре́ти к бу́дущему пребыва́нию./ Того́ ра́ди, я́ко ца́рским путе́м,/ ше́ствовала еси́, блаже́нная,/ Христу́ Бо́гу угожда́ющи,/ Ему́же ны́не моли́ся/ дарова́ти нам мир и ве́лию ми́лость.

Ра́дуйся, блаже́нная ма́ти,/ я́ко, подо́бящися А́нне целому́дренней,/ де́нь и но́щь моли́лася еси́ Го́сподеви,/ пребыла́ же еси́ в посте́ и смире́нии, вы́ну твою́ ду́шу снабдева́ющи,/ те́мже угоди́ла еси́ Небе́сному Царю́ и Влады́це всех,/ Ему́же ны́не моли́ся/ дарова́ти нам мир и ве́лию ми́лость.

Ра́дуйся, ни́щим пита́тельнице неоску́дная,/ си́рым и вдови́цам кре́пкая помо́щнице,/ всем же скорбя́щим утеше́ние;/ ми́лостиву ду́шу твою́ иму́щи,/ с любо́вию и ти́хостию ми́лостыню подава́ла еси́,/ наде́ющися сугу́бу ми́лость себе́ прия́ти в бу́дущем ве́це,/ по рече́нному от Христа́ Бо́га на́шего,/ я́ко ми́лостивии ми́лостив и суд прии́мут./ Те́мже угоди́ла еси́, преподо́бная,/ Творцу́ твоему́ и Го́споду/ и прия́ла еси́ от Него́ Ца́рство Небе́сное и вене́ц нетле́нный,/ Того́ моли́ спасти́ся душа́м на́шим.

Ра́дуйся, достохва́льная ма́ти,/ вели́кая княги́не иноки́не А́нно,/ я́ко за мно́гия твоя́ доброде́тели/ сподо́билася еси́ прия́ти от Бо́га дар чудотворе́ний:/ мно́ги бо боля́щия разли́чными неду́ги исцеля́еши,/ и, я́ко не́киим драги́м бога́тством, обогаща́еши,/ и всех чудесы́ твои́ми удивля́еши./ Тем тя ны́не мо́лим:/ моли́ Христа́ Бо́га/ дарова́ти душа́м на́шим мир и ве́лию ми́лость.

Ра́дуйся, чи́стая се́рдцем ма́ти,/ я́ко тезоимени́та бы́вши А́нне целому́дренней,/ вы́ну гото́вилася еси́ к ве́чному спасе́нию,/ по Госпо́дню изволе́нию,/ к Нему́ же и отшла́ еси́/ в ве́чный поко́й и весе́лие/ и пребыва́еши в неизрече́нных све́тлостех,/ со все́ми святы́ми, Бо́гу угоди́вшими,/ ра́дующися и веселя́щися,/ наслажда́ющися Боже́ственнаго светосия́ния./ Моли́ у́бо Христа́ Бо́га/ дарова́ти нам мир и ве́лию ми́лость.

Сла́ва, глас 8:

Прииди́те, вси ве́рнии русстии наро́ди,/ почти́м, и похва́лим, и согла́сно воспои́м/ русскую на́шу похвалу́,/ я́ко пресве́тлую звезду́,/ осиява́ющую град свой Ка́шин чудесы́ свои́ми,/ ни́щим пита́тельницу,/ си́рым и вдова́м засту́пницу,/ скорбя́щим уте́шительницу,/ сию́ блаже́нную в жена́х, преподо́бную ма́терь княги́ню А́нну:/ сия́ бо пре́йде ко Христу́ Бо́гу в ве́чныя оби́тели/ и ны́не пребыва́ет в Го́рних селе́ниих,/ с чи́нми А́нгельскими ра́дующися и веселя́щися./ Тем возопии́м к ней, зову́ще:/ ра́дуйся, русская похвало́,/ всем жена́м кра́сное удобре́ние,/ гра́ду Ка́шину просвеще́ние;/ прие́мши от Христа́ Бо́га Ца́рство Небе́сное и вене́ц нетле́нный,/ Того́ моли́ спасти́ся душа́м на́шим.

И ны́не, Богоро́дичен: Ца́рь Небе́сный:

Вход. Проки́мен дне, и чте́ния 3 преподо́бническая (зри 1 июня)

На лити́и стихи́ра хра́ма и преподо́бней стихи́ры, глас 2.

Подо́бен: Ки́ими похва́льными венцы́:

Ки́ими похва́льными пе́сньми/ ублажи́м преподо́бную чудотво́рицу,/ вели́кую княги́ню иноки́ню А́нну,/ ве́рным лю́дем засту́пницу те́плую?/ Ве́рою и любо́вию возопии́м ей, глаго́люще:/ ра́дуйся, земли́ на́шей кра́сное утвержде́ние,/ всему́ же христоимени́тому жи́тельству удивле́ние,/ тя бо венце́м нетле́ния венча́ет Христо́с Бог наш,/ име́яй ве́лию и бога́тую ми́лость.

Ки́ими похва́льными пе́сньми/ возвели́чим преподо́бную ма́терь,/ вели́кую княги́ню А́нну,/ те́плую моли́твенницу и хода́таицу/ ко Влады́це Христу́ и Бо́гу на́шему?/ Во умиле́нии серде́ц на́ших ей помо́лимся:/ моли́ стране́ на́шей побе́ду на враги́ дарова́ти,/ прося́щи нам ми́ра и ве́лия ми́лости.

Ки́ими пе́сненными добро́тами/ восхва́лим преподо́бную ма́терь А́нну?/ Я́ко бо звезда́, осиява́ет зе́млю Русскую/ и град свой Ка́шин свои́м к Бо́гу предстоя́нием,/ Того́ моля́щи за лю́ди правосла́вныя,/ во е́же спасти́ся всем,/ па́мять ея́ ве́рою и любо́вию почита́ющим.

Сла́ва, глас 5:

Стецы́теся, вси правове́рнии лю́дие,/ соше́дшеся, соста́вим пра́зднество,/ в прославле́ние вели́кия княги́ни и́нокини А́нны/ и возопии́м ей, глаго́люще:/ ра́дуйся, я́ко А́нгелы и челове́ки удиви́ла еси́, блаже́нная,/ чи́стым твои́м и непоро́чным житие́м/ и прешла́ еси́ ко Христу́ в ве́чный поко́й и небу́рное приста́нище;/ дне́сь лю́дие ра́дуются и веселя́тся/ о обре́тении честны́х моще́й твои́х,/ я́же подаю́т исцеле́ние приходя́щим к ним с ве́рою,/ ты же, пребыва́ющи у Христа́ Бо́га во Ца́рствии Небе́снем,/ моли́ спасти́ся душа́м на́шим.

И ны́не, Богоро́дичен:

Храм и две́рь еси́, пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме́ спя́щим яви́ся,/ Со́лнце Сый Пра́вды,/ просвети́ти хотя́, я́же созда́ по о́бразу Своему́ руко́ю Свое́ю./ Те́мже, Всепе́тая, я́ко ма́терне дерзнове́ние к Нему́ стяжа́вшая,/ непреста́нно моли́ спасти́ся душа́м на́шим.

На стихо́вне стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́,/ я́ко в немощне́м естестве́ ве́лия кре́пость яви́ся,/ и бесо́вская пре́лесть победи́ся,/ и вся ко́зни лука́ваго разруши́шася,/ и наве́ты упраздни́шася./ О, блаже́нная в жена́х,/ преподо́бная вели́кая княги́не иноки́не А́нно,/ моли́ о нас Человеколю́бца, Христа́ Бо́га на́шего.

Стих: Честна́ пред Го́сподем/ сме́рть преподо́бных Его́.

О, вели́ких Боже́ственных дарова́ний,/ на тебе́, ма́ти преподо́бная,/ вели́кая княги́не А́нно, бы́вших:/ я́ко от млады́х ногте́й твои́х/ всели́ся в тя Христо́с Бог наш,/ тем мно́гия доброде́тели сотвори́ла еси́/ и житие́м твои́м всех удиви́ла еси́./ Моли́ у́бо спасти́ся душа́м на́шим.

Стих: Что возда́м Го́сподеви о всех,/ я́же воздаде́ ми?

О, досточу́дная ма́ти А́нно,/ похвала́ еси́ гра́ду Ка́шину,/ всем же иноки́ням кра́сное удобре́ние:/ я́ко бо добропло́дная лоза́,/ посреде́ их процвела́ еси́ до́брыми твои́ми де́лы/ и прешла́ еси́ к Ве́чному селе́нию./ Моли́ у́бо о нас Христа́ Бо́га/ спасти́ся душа́м на́шим.

Сла́ва, глас 6:

Прииди́те, вси и́ноцы и иноки́ни,/ мирсти́и же му́жие и жены́ благочести́выя,/ бога́тии и убо́зии, хотя́щии спасти́ся:/ поревну́им блаже́нней и преподо́бней ма́тери,/ вели́цей княги́не А́нне,/ я́же посто́м, и бде́нием, и зе́льным воздержа́нием/ те́ло свое́ до конца́ изнури́,/ и, я́ко ве́лия свети́льница, возсия́ до́брыми свои́ми де́лы,/ и, прише́дши ко Христу́ в ве́чныя селе́ния,/ ны́не пребыва́ет в невече́рнем Све́те со А́нгельскими чи́нми,/ ра́дующися и веселя́щися,/ и мо́лит о всех лю́дех,/ во е́же спасти́ся душа́м на́шим.

И ны́не, Богоро́дичен: Творе́ц и Изба́витель мой:

Тропа́рь, глас 3:

Дне́сь восхваля́ем тя, преподо́бная ма́ти,/ вели́кая княги́не иноки́не А́нно:/ я́ко бо лоза́ плодови́та посреде́ те́рния,/ процвела́ еси́ во гра́де Ка́шине твои́ми доброде́тельми,/ всех удиви́ла еси́ чу́дным твои́м житие́м,/ те́мже Христу́ Бо́гу угоди́ла еси́,/ и ны́не, ра́дующися и веселя́щися,/ пребыва́еши с ли́ки преподо́бных жен,/ наслажда́ющися ра́йския красоты́ и весе́лия./ Мо́лим у́бо тя:/ моли́ о нас Человеколю́бца, Христа́ Бо́га на́шего,/ дарова́ти нам мир и ве́лию ми́лость.

Ин тропа́рь, глас 4:

Просвети́вшися Боже́ственною благода́тию, преподо́бная,/ и пра́востию у́мною ду́шу твою́ привяза́вши в любо́вь Христо́ву,/ тле́нныя, и кра́сныя, и вре́менный нивочто́же вмени́ла еси́./ Кре́стным зна́мением на мы́сленныя враги́ му́жески вооружи́вшися,/ по́стническими по́двиги, посто́м и моли́твами/ у́глие страсте́й угаси́ла еси́, достосла́вная А́нно,/ и по сме́рти источа́еши благода́ть притека́ющим к моще́м твои́м./ И ны́не, в Небе́снем черто́зе с му́дрыми де́вами предстоя́щи Христу́,/ моли́ о нас, почита́ющих святу́ю па́мять твою́.

НА У́ТРЕНИ

По 1-м стихосло́вии седа́лен, глас 1:

Дне́сь призыва́ет нас обре́тение честны́х моще́й твои́х, преподо́бная ма́ти А́нно,/ све́тло пра́здновати па́мять твою́,/ дне́сь вси лю́дие веселя́тся, прии́мше тя засту́пницу пред Го́сподем./ Ты же, о блаже́нная, моли́ся о нас,/ ве́рою и любо́вию тя почита́ющих.

Сла́ва, и ны́не, Богоро́дичен:

Свет, от Све́та происходя́й, во Твою́ Деви́чу утро́бу вни́де/ и пло́тию обложи́ся недомы́сленно и несказа́нно,/ рождество́м же Его́ вся тва́рь обнови́ся и и́дольская ле́сть разори́ся./ Тем мо́лим Тя, Пречи́стая:/ моли́, да спасе́т ду́ши на́ша.

По 2-м стихосло́вии седа́лен, глас 4.

Подо́бен: Ско́ро предвари́:

Преблаги́й Бог, прему́дростию Свое́ю вся соде́ловаяй и прославля́яй святы́я Своя́,/ просла́ви тя, преподо́бная ма́ти, на земли́ и на Небеси́;/ иму́щи у́бо к Нему́ дерзнове́ние ве́лие,/ моли́ за вся лю́ди, в правосла́вии живу́щия,/ я́ко да пода́ст им ми́лость Свою́ в Де́нь Су́дный.

Сла́ва, и ны́не, Богоро́дичен:

От всех родо́в предъизбра́нная и от всех проро́ков пронарече́нная,/ от всех же челове́к препросла́вленная и от А́нгел удивля́емая,/ Ма́ти Бо́га Вы́шняго,/ удиви́ на нас, недосто́йных рабе́х Твои́х, ми́лость Твою́/ и моли́ за ны Сы́на Твоего́ и Бо́га на́шего,/ я́ко да пода́ст нам ми́лость Свою́ в Де́нь Су́дный.

Велича́ние:

Ублажа́ем тя,/ преподо́бная ма́ти, вели́кая княги́не А́нно,/ и чтим святу́ю па́мять твою́,/ наста́внице и́нокиням/ и собесе́днице А́нгелом.

Псало́м избра́нный: Терпя́, потерпе́х Го́спода:

По полиеле́и седа́лен, глас 8.

Подо́бен: Прему́дрости:

От ю́ности твоея́ предъизбра́ тя. Госпо́дь в селе́ния Своя́, преподо́бная ма́ти А́нно,/ и от Вседержи́тельныя десни́цы Его́ положи́ся вене́ц нетле́нен на главе́ твое́й,/ и, озаре́на бы́вши от Него́ Боже́ственным светосия́нием,/ ны́не мо́лишися за град твой, за всю же зе́млю Русскую и за вся христиа́ны правосла́вныя́,/ святу́ю па́мять твою́ ве́рно почита́ющия и Христу́ воспева́ющия:/ сла́ва Тебе́, Го́споди, творя́щему ди́вная Твоя́ чудеса́.

Сла́ва, и ны́не, Богоро́дичен:

Со́лнце разу́мное возсия́ от пречи́стыя Твоея́ утро́бы,/ от Него́ же вся тва́рь ви́димая и неви́димая просвети́ся и те́рние грехо́вное искорени́ся,/ тем и мы, убо́зии и недосто́йнии раби́ Твои́, мо́лим Тя:/ да просвети́т Сын Твой мрак душ на́ших,/ да избу́дем ти́ны грехо́вныя/ и да обря́щем ми́лость в Де́нь стра́шнаго испыта́ния/ Твои́ми ма́терними к Нему́ моли́твами.

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 104.

По 50-м псалме́ стихи́ра, глас 6:

Тя хода́таицу и моли́твенницу благоприя́тну и́мамы к Бо́гу,/ преподо́бная ма́ти, вели́кая княги́не А́нно,/ ты бо мо́лиши за вся правосла́вныя лю́ди,/ я́ко да изба́вимся от бед, и скорбе́й,/ и от вся́каго наве́та вра́жия./ Тем прославля́ем твою́ святу́ю и честну́ю па́мять,/ и восхваля́ем тя, блаже́нную в жена́х, зову́ще:/ не преста́й моля́щися о душа́х на́ших.

Кано́н Пресвяте́й Богоро́дице со ирмосо́м на 6 и преподо́бней кано́н на 8, глас 3.

Пе́снь 1

Ирмо́с: Во́ды дре́вле ма́нием Боже́ственным/ во еди́но со́нмище совокупи́вый,/ и раздели́вый мо́ре изра́ильтеским лю́дем,/ Сей Бог наш препросла́влен е́сть,/ Тому́ Еди́ному пои́м, я́ко просла́вися.

Да́ждь ми, Го́споди, разуме́ние,/ да досто́йно воспою́ и просла́влю благоуго́ждшую Ти преподо́бную ма́терь,/ пре́жде бы́вшую вели́кую княги́ню А́нну,/ и возопию́ Тебе́, Христу́ моему́, я́ко препросла́влен еси́.

О тебе́, блаже́нная ма́ти А́нно,/ хощу́ ны́не язы́к подви́гнути и сло́во простре́ти:/ споспе́шествуй ми, недосто́йному, моли́твами твои́ми,/ да досто́йно восхвалю́ тя и воспою́ Го́сподеви моему́, я́ко просла́вися.

Со млады́х ногте́й твои́х страх Бо́жий име́ла еси́ в се́рдце твое́м, блаже́нная,/ его́же до конца́ содержа́ла еси́, укрепля́ема Боже́ственною благода́тию,/ тем и ду́шу твою́ спасла́ еси́, вы́ну пою́щи Христу́, я́ко просла́вися.

Богоро́дичен: Тобо́ю, Пречи́стая Влады́чице, от всех родо́в предъизбра́нная Де́во,/ ве́сь мир обнови́ся,/ и ве́сь род челове́ческий от ле́сти диа́вольския свободи́ся,/ и вопие́т ко Христу́, я́ко просла́вися.

Пе́снь 3

Ирмо́с: Непло́дная душе́ и безча́дная,/ стяжи́ плод благосла́вный,/ веселя́щися, возопи́й/ утверди́хся Тобо́ю, Бо́же,/ не́сть свят, не́сть пра́веден,/ па́че Тебе́, Го́споди.

О́ко душе́вное чи́сто и здра́во име́ла еси́ от ю́ности твое́й, блаже́нная,/ и́мже всегда́ зре́ла еси́ к Го́рнему селе́нию, его́же и дости́гла еси́,/ и ны́не Христу́ воспева́еши:/ не́сть свят и не́сть пра́веден, па́че Тебе́, Го́споди.

Из благочести́ваго ко́рене произрасла́ еси́, блаже́нная,/ и, во вся дни жития́ твоего́ с супру́гом твои́м чи́сто и непоро́чно пребыва́ющи,/ вопия́ла еси́ ко Христу́:/ не́сть свят и не́сть пра́веден, па́че Тебе́, Го́споди.

Ничто́же пред Бо́гом вя́щше е́сть добро́ты душе́вныя./ Ты же, преподо́бная ма́ти, соблюла́ еси́ ю непреткнове́нно, вопию́щи ко Христу́:/ не́сть свят и не́сть пра́веден, па́че Тебе́, Го́споди.

Богоро́дичен: Отрокови́це Чи́стая, Ма́ти Го́спода на́шего,/ помози́ ми, недосто́йному рабу́ Твоему́,/ воспе́ти уго́дницу Сы́на Твоего́ и Бо́га моего́,/ преподо́бную ма́терь А́нну, и рещи́ ко Христу́:/ не́сть свят и не́сть пра́веден, па́че Тебе́, Го́споди.

Ин конда́к, глас 8:

Скоропослу́шную помо́щницу, вси, су́щии в беда́х,/ благоче́стно воспое́м, А́нну святу́ю,/ дне́сь любо́вию соше́дшеся во обре́тение честны́х моще́й ея́./ Воспое́м пе́снь Еди́ному в Тро́ице Бо́гу, ра́дующеся,/ сподо́бльшему нас ви́дети пречи́стое сокро́вище честны́х моще́й ея́:/ от мног бо лет сокрове́ны бы́ша,/ напосле́док же нам явле́ны/ и источа́ют мно́га и разли́чна исцеле́ния./ Я́ко да моли́твами ея́ к Бо́гу/ от вся́ких находя́щих зол изба́вимся,/ ра́достною душе́ю и весе́лием се́рдца благода́рная воспое́м, глаго́люще:/ ра́дуйся, утвержде́ние гра́ду на́шему.

Седа́лен, глас 3:

Воспита́на была́ еси́, блаже́нная, от ро́ждших тя в за́поведех Госпо́дних,/ я́ко лоза́ в красноцвету́щих виногра́дех,/ тем тя ублажа́ем и святу́ю па́мять твою́ ве́рно почита́ем./ Моли́ Христа́ Бо́га, да спасе́т ду́ши на́ша.

Сла́ва, и ны́не, Богоро́дичен:

Све́та Преве́чнаго, от Отца́ пре́жде век рожде́нное Сло́во Бо́жие,/ родила́ еси́ нам, Пресвята́я Влады́чице, Христа́ Бо́га на́шего,/ И́мже вселе́нная от тли сме́ртныя свободи́ся,/ тем Тя непреста́нно с Ним пое́м и велича́ем.

Пе́снь 4

Ирмо́с: Покры́ла е́сть Небеса́ доброде́тель Твоя́, Христе́,/ из Киво́та бо проше́д святы́ни, Твоея́ Нетле́нныя Ма́тере,/ в хра́ме сла́вы Твоея́ яви́лся еси́,/ я́ко Младе́нец руконоси́м,/ и испо́лнишася вся Твоего́ хвале́ния.

Преукра́шена была́ еси́, преподо́бная ма́ти, доброде́тельми твои́ми,/ я́ко цве́ты благоуха́нными и я́ко ка́мением драгоце́нным./ Тем и угоди́ла еси́ Нетле́нному Царю́ и Влады́це всех,/ Ему́же и воспе́ла еси́:/ Го́споди, испо́лнишася вся Твоего́ хвале́ния.

О, тве́рдое основа́ние ве́ры, о, любы́ к Бо́гу кре́пкая!/ В же́нстем бо естестве́ му́жески победи́ла еси́ неви́димаго врага́ супоста́та/ и та́ко угоди́ла еси́ Христу́, вопию́щи:/ Го́споди, испо́лнишася вся Твоего́ хвале́ния.

Христо́в храм была́ еси́, преподо́бная ма́ти,/ твое́ю чистото́ю и целому́дрием и про́чими доброде́тельми,/ те́мже вмести́ла еси́ в себе́ Свята́го Ду́ха,/ к Нему́же и возопи́ла еси́:/ Го́споди, испо́лнишася вся Твоего́ хвале́ния.

Богоро́дичен: Вои́стинну всех тва́рей вы́шши яви́лася еси́, Влады́чице,/ и кто дово́лен по достоя́нию изрещи́ вели́чие Твое́?/ Простра́ннее бо небе́с яви́ся чре́во Твое́, в не́мже носи́ла еси́ все́ми Невмести́маго Бо́га,/ к Нему́же и мы вопие́м:/ Го́споди, испо́лнишася вся Твоего́ хвале́ния.

Пе́снь 5

Ирмо́с: Я́ко ви́де Иса́ия обра́зно/ на Престо́ле превознесе́на Бо́га,/ от А́нгел Сла́вы дориноси́ма,/ о, окая́нный, – вопия́ше, – аз!/ прови́дех бо воплоща́ема Бо́га, Све́та Невече́рня/ и ми́ром влады́чествующа.

А́ще и во благоде́нствии пребыва́ла еси́, блаже́нная ма́ти,/ и вся́ко изоби́лие близ себе́ име́ла еси́,/ ника́коже вдала́ся еси́ на поко́й и весе́лие пи́щное,/ но, зе́льным трудо́м и воздержа́нием те́ло твое́ удруча́ющи,/ воспева́ла еси́ Жениха́ твоего́, Христа́,/ Све́та Невече́рня и ми́ром влады́чествующа.

Любо́вию Христо́вою уязви́вшися, блаже́нная ма́ти,/ вели́кая княги́не иноки́не А́нно,/ я́ко добропло́дная лоза́ в виногра́де, процвела́ еси́ во гра́де Ка́шине благи́ми твои́ми дея́нии/ и победи́ла еси́ бесо́вския полки́, воспева́ющи Христа́,/ Све́та Невече́рня и ми́ром влады́чествующа.

И́стинным све́том Христо́вым осия́на была́ еси́, ма́ти свята́я,/ вели́кая княги́не иноки́не А́нно,/ насыща́ющися ве́лия благода́ти и воспева́ющи Его́,/ Све́та Невече́рня и ми́ром влады́чествующа.

Богоро́дичен: Ты у́бо, Чи́стая Ма́ти Госпо́дня,/ чистото́ю и де́вством всех превзошла́ еси́,/ те́мже избра́на была́ еси́ в Бо́жие вмести́лище и родила́ еси́ нам Христа́ Бо́га на́шего,/ Све́та Невече́рня и ми́ром влады́чествующа.

Пе́снь 6

Ирмо́с: Бе́здна после́дняя грехо́в обы́де мя,/ и исчеза́ет дух мой;/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́.

Из благочести́ваго ко́рене произрасла́ еси́,/ преподо́бная ма́ти, вели́кая княги́не иноки́не А́нно,/ благоче́стием же и ве́рою, а́ки цвет, процвела́ еси́ во твое́м оте́честве, во гра́де Ка́шине,/ и прешла́ еси́ к Го́рнему жи́тельству, вопию́щи ко Христу́:/ я́ко Петра́, мя, Упра́вителю, спаси́.

Вои́стинну досто́йна еси́ похвалы́ ве́лия,/ преподо́бная ма́ти, вели́кая княги́не А́нно,/ я́ко в же́нстем естестве́ му́жескую кре́пость име́ла еси́,/ и победи́ла еси́ супоста́та диа́вола, и воспева́ла еси́ ко Влады́це Христу́:/ яко Петра́, мя, Упра́вителю, спаси́.

Ей, вои́стинну све́тел и тверд ум имела еси́, преподо́бная,/ вся бо кра́сная ми́ра сего́, я́ко уме́ты, вмени́ла еси́, блаже́нная,/ и ничто́же возмо́же поколеба́ти непоро́чную твою́ ду́шу,/ внегда́ воспева́ти ти Христу́:/ я́ко Петра́, мя, Упра́вителю, спаси́.

Богородичен: Ле́стным у́бо змии́ным преступле́нием низпадо́хом,/ но с Сы́ном Твои́м, Иису́сом Христо́м, Бо́гом на́шим,/ совоста́хом, Ма́ти Госпо́дня,/ Его́же родила́ еси́ нам, Свет, и Живо́т, и Воскресе́ние.

Кондак, глас 4.

Подо́бен: Возне́слся еси́:

Я́ко пресве́тлая звезда́,/ яви́лася еси́ в Русстей земли́, во гра́де Ка́шине,/ преподо́бная ма́ти А́нно,/ во всех благочести́вых и ве́рных жена́х,/ а́ки крин, процвела́ еси́ чи́стым и непоро́чным твои́м житие́м,/ во иноки́нях же соверше́нными твои́ми труды́ и по́двиги,/ и возшла́ еси́ к Вы́шнему гра́ду, ра́дующися и веселя́щися,/ я́ко до́бре соверши́вши твое́ тече́ние,/ и ны́не честны́я твоя́ мо́щи,/ а́ки би́серие драго́е, яви́шася,/ на исцеле́ние всем, приходя́щим с ве́рою./ Тем и вопие́м ти:/ ра́дуйся, всекра́сная душе́ю,/ и моли́ Христа́ Бо́га/ о спасе́нии душ на́ших.

И́кос:

Прииди́те, вси благове́рнии лю́дие,/ воспои́м и просла́вим преподо́бную вели́кую княги́ню иноки́ню А́нну и та́ко к ней возопии́м:/ ра́дуйся, ма́ти свята́я, великоимени́тая княги́не иноки́не А́нно,/ я́ко от ю́ности твоея́ возлюби́ла еси́ Христа́/ и по за́поведем Его́ ше́ствовала еси́;/ ра́дуйся, я́ко зе́льным твои́м воздержа́нием те́ло твое́ удручи́ла еси́./ Ра́дуйся, я́ко сподо́билася еси́ от Бо́га да́ра чудотворе́ний;/ ра́дуйся, яко озари́ Бог се́рдце твое́,/ во е́же восхоте́ти облещи́ся во и́ноческое одея́ние и после́довати Христу́./ Ра́дуйся, ни́щим пита́тельнице и си́рым засту́пнице;/ ра́дуйся, всем русским жена́м похвало́ и утвержде́ние./ Ра́дуйся, всей Руси тве́рдое удобре́ние;/ ра́дуйся, я́ко вме́сто земна́го ца́рства Небе́сное обрела́ еси́./ Ра́дуйся, я́ко по сме́рти твое́й те́ло твое́ в не́дрех земли́ не подве́ржеся тле́нию;/ ра́дуйся, я́ко предстои́ши с ли́ки святы́х и преподо́бных жен Невече́рнему Све́ту/ и мо́лишися о спасе́нии душ на́ших.

Пе́снь 7

Ирмо́с: Я́коже дре́вле/ благочести́выя три о́троки ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,/ Бо́же оте́ц на́ших.

И́стинно ве́лие чу́до яви́ся во гра́де Ка́шине,/ я́ко честны́я твоя́ мо́щи мно́га ле́та земле́ю покрове́ны бы́ша,/ ны́не же Бо́жиею благода́тию яви́шася верху́ земли́/ на исцеле́ние всем, приходя́щим с ве́рою и вопию́щим:/ благослове́н Бог оте́ц на́ших.

Ка́ко возмо́жем не диви́тися тебе́, блаже́нная ма́ти?/ Пребыла́ бо еси́, а́ки свеща́ светя́щи,/ посреде́ русских жен чу́дным твои́м житие́м, вы́ну воспева́ющи:/ благослове́н Бог оте́ц на́ших.

Утвержде́на была́ еси́, ма́ти преподо́бная,/ а́ки адама́нт кре́пкий, доброде́тельми твои́ми/ и, я́ко неве́ста, укра́шена была́ еси́ мони́сты златы́ми –/ де́лы твои́ми благи́ми, воспева́ющи Христу́:/ благослове́н еси́, Го́споди Бо́же оте́ц на́ших.

Богоро́дичен: Ю́ницу Тя нескве́рную, Де́ву и Богоро́дицу,/ издале́ча проро́цы имены́ разли́чными нареко́ша:/ ин бо Тя го́ру мы́сленну нарече́,/ други́й же – Роди́тельницу Бо́жию,/ ов же – руно́, ов же – свяще́нную две́рь./ Те́мже и мы вси досто́йно Тя пое́м и славосло́вим во ве́ки.

Пе́снь 8

Ирмо́с: Служи́ти Живо́му Бо́гу/ в Вавило́не о́троцы претерпе́вше,/ о мусики́йских орга́нех неради́ша/ и, посреде́ пла́мене стоя́ще, боголе́пную пе́снь воспева́ху, глаго́люще:/ благослови́те, вся дела́ Госпо́дня, Го́спода.

Ка́ко изглаго́лю вели́чие Бо́жие/ на тебе́, преподо́бная ма́ти А́нно, я́вльшееся?/ Я́ко по толи́цех ле́тех обрето́шася мо́щи твоя́ нетле́нны,/ на удивле́ние всем челове́ком, пою́щим:/ благослови́те, вся дела́ Госпо́дня, Го́спода.

Ничто́же е́сть дража́йше пред Бо́гом доброде́тельныя души́,/ ея́же ве́сь мир недосто́ин./ Те́мже и ты, преподо́бная ма́ти А́нно,/ па́че всего́ прилежа́ла еси́ о сицеве́й безсме́ртней ве́щи, пою́щи:/ благослови́те, вся дела́ Госпо́дня, Го́спода.

Я́ко свещу́ све́тлу, угото́вала еси́ кро́ткую ду́шу твою́, преподо́бная ма́ти А́нно,/ те́мже по сме́рти твое́й мно́га исцеле́ния неду́жным излия́шася от честны́х моще́й твои́х./ Сего́ ра́ди мы вопие́м:/ благослови́те, вся дела́ Госпо́дня, Го́спода.

Богоро́дичен: Го́спода моего́ и Бо́га Ро́ждшая, Ма́ти Безневе́стная,/ дерзнове́ние иму́щи к Нему́, заступи́ и сохрани́ мя Твои́м хода́тайством, я́ко да воспою́:/ благослови́те, вся дела́ Госпо́дня, Го́спода.

Пе́снь 9

Ирмо́с: Сла́дкою Пречи́стаго Твоего́ рождества́/ стрело́ю уя́звлени, Чи́стая,/ Твое́й достожела́нней добро́те дивя́щеся,/ пе́сньми а́нгельскими досто́йно Тя я́ко Ма́терь Бо́жию велича́ем.

И́миже ве́сть судьба́ми прославля́ет Госпо́дь святы́я Своя́,/ и́хже имена́ напи́сана су́ть на Небеси́ в кни́гах живо́тных,/ То́йже и тя просла́ви Свои́м милосе́рдием, преподо́бная ма́ти А́нно./ Тем тя пое́м и велича́ем.

Ны́не с ли́ки А́нгельскими на Небесе́х предстои́ши Влады́це всех, преподо́бная ма́ти А́нно,/ моля́щи о гра́де твое́м и о чту́щих ве́рою святу́ю па́мять твою́,/ неду́гующим же подаю́щи исцеле́ние от честны́х моще́й твои́х./ Тем тя пое́м и велича́ем.

Ю́на еще́ во́зрастом бы́вши, преподо́бная ма́ти А́нно,/ те́сным и приско́рбным путе́м ше́ствовала еси́,/ вся́кия сла́дости, я́ко го́рести, отвраща́ющися,/ ны́не же дости́гла еси́ неизрече́нныя ра́дости./ Тем тя пое́м и велича́ем.

Богоро́дичен: Ааро́нов жезл прозябе́й, Влады́чице, пре́жде непло́ден быв,/ по́слежде цвет и плод испусти́;/ та́кожде и Ты, Пресвята́я Де́во, безму́жно родила́ еси́ Христа́ Бо́га на́шего./ Тем Тя пое́м и велича́ем.

Свети́лен:

Стра́хом Бо́жиим огражде́на была́ еси́, преподо́бная,/ и, ника́коже убоя́вшися де́монских сил,/ отшла́ еси́ ко Трисия́нному Вели́кому Све́ту/ и ны́не пребыва́еши в неизрече́нней све́тлости со все́ми святы́ми./ Тем тя мо́лим:/ моли́ся о нас, творя́щих святу́ю па́мять твою́.

Сла́ва, и ны́не, Богоро́дичен:

Све́та Преве́чнаго родила́ еси́ нам, Христа́ Бо́га на́шего, Пречи́стая Де́во,/ изба́вльшаго ве́сь мир от ле́сти диа́вола./ Те́мже мо́лим Тя:/ не преста́й моля́щи, да пода́ст нам ми́лость Свою́ в Де́нь Су́дный.

На хвали́тех стихи́ры, глас 4.

Подо́бен: Что Тя нарече́м:

Что тя нарече́м, преподо́бная ма́ти А́нно?/ Я́ко бо звезда́, осиява́еши/ оте́чество твое́, град Ка́шин,/ многочи́сленными чудесы́ твои́ми,/ подаю́щи исцеле́ние приходя́щим с ве́рою/ к честны́м моще́м твои́м./ Моли́ у́бо спасти́ся душа́м на́шим.

Что тя возъимену́ем, блаже́нная ма́ти А́нно?/ Луну́ ли све́тлую,/ светя́щую во всей земли́ Русстей?/ или́ звезду́ разу́мную,/ зря́щую ко у́мному Со́лнцу,/ наслажда́ющуся Боже́ственнаго светосия́ния/ и моля́щуся за ве́сь христиа́нский род,/ да не превозмо́гут супоста́ты,/ но да бу́дут побежде́ни стра́хом Бо́жиим./ Моли́ у́бо спасти́ся душа́м на́шим.

Прииди́те, вси рустии наро́ди,/ почти́м и похва́лим преподо́бную ма́терь,/ вели́кую княги́ню иноки́ню А́нну,/ па́че зла́та чистоту́ возлюби́вшую,/ и па́че сапфи́ра ду́шу свою́ просвети́вшую/ до́брыми свои́ми дея́нии,/ и ны́не предстоя́щую Царю́ Небе́сному со А́нгельскими ли́ки,/ и моля́щую спасти́ся душа́м на́шим.

Сла́ва, глас 8:

Кто не подиви́тся, кто не похва́лит и не воспое́т ве́рно/ сию́ блаже́нную преподо́бную ма́терь А́нну?/ Я́ко по святе́м ея́ преставле́нии/ бы́ша си́лою Бо́жиею мно́га чудеса́ от честны́х моще́й ея́,/ я́же подаю́т исцеле́ния приходя́щим к ним с ве́рою./ Сего́ ра́ди возопии́м к ней, си́це зову́ще:/ ра́дуйся, преподо́бная ма́ти иноки́не А́нно,/ вели́каго да́ра от Христа́ сподо́бившаяся/ и ны́не пребыва́ющая во Ца́рствии Небе́снем с ли́ки преподо́бных,/ моли́ спасти́ся душа́м на́шим.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Апо́стол к Гала́том, зача́ло 208. Ева́нгелие от Матфе́я, зача́ло 104. Прича́стен: В па́мять ве́чную:

Моли́тва

О преподо́бная и преблаже́нная ма́ти А́нно! Смире́нно припа́дающе к честны́м моще́м твои́м, мо́лимся со слеза́ми приле́жно: не забу́ди убо́гих твои́х до конца́, но помина́й нас всегда́ во святы́х твои́х и благоприя́тных моли́твах к Бо́гу. О преблаже́нная вели́кая княги́не А́нно! Не забу́ди присеща́ти чад твои́х, а́ще бо те́лом и преста́вилася еси́ от нас, но и по сме́рти жива́ пребыва́еши и не отступа́еши от нас ду́хом, сохраня́ющи нас от стрел вра́жиих, вся́кия пре́лести бесо́вския и ко́зней диа́вольских. Моли́твеннице на́ша усе́рдная! Не преста́й моля́щися за ны ко Христу́, Бо́гу на́шему, а́ще бо моще́й твои́х ра́ка пред очи́ма на́шима вы́ну ви́дима е́сть, но свята́я душа́ твоя́, со А́нгельскими во́инствы у Престо́ла Вседержи́теля предстоя́щи, досто́йно весели́тся. К тебе́ у́бо припа́даем, тебе́ мо́лимся, тебе́ ми́ли ся де́ем: моли́ся, преблаже́нная А́нно, Всеми́лостивому Бо́гу на́шему о спасе́нии душ на́ших, е́же испроси́ти нам вре́мя на покая́ние и невозбра́нно прейти́ от земли́ на Не́бо, мыта́рств го́рьких и ве́чныя му́ки изба́витися и Небе́сному Ца́рствию насле́дником бы́ти со все́ми преподо́бными, от ве́ка угоди́вшими Го́споду на́шему Иису́су Христу́, Ему́же сла́ва, со Безнача́льным Его́ Отце́м, и с Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Небе́сных чино́в:

Небе́сных ра́дований прича́стника,/ во сла́ве святы́х Боже́ственною сла́вою озаря́емаго,/ всесве́тлаго свети́льника на́шего,/ Богому́драго Арсе́ния,/ на земли́ доброде́тельми просия́вшаго,/ наста́ дне́сь све́тлое торжество́.

Ра́дуйтеся, лю́дие, и весели́теся,/ не я́ко весна́ прии́де,/ земноро́дных ве́лия ра́дость,/ но я́ко де́нь прибли́жися,/ в о́ньже пе́сненными хвала́ми, я́ко цве́ты,/ венча́ется святы́й Арсе́ний,/ путево́ждь спасе́ния на́шего.

Сра́дуйтеся нам, Афо́нская Горо́ и вели́кий Новгра́де,/ в светоно́сный де́нь па́мяти свята́го Арсе́ния,/ и́же в вас доброде́тельными дея́ньми,/ я́ко фи́никс, процвете́/ и, я́ко кедр в Лива́не, умно́жися.

Страстьми́ борю́щих де́монов/ моли́твою и посто́м побежда́я/ и Боже́ственным жела́нием согрева́я се́рдце,/ храм че́стен Ду́ху Свято́му/ бы́ти сподо́бился еси́,/ Богоно́се Арсе́ние, о́тче наш.

Сла́ва, глас 5:

Я́ко жа́ждущий еле́нь на исто́чники водны́я,/ ты, ко Го́споду горя́й ду́хом,/ те́сным путе́м по́стничества/ неукло́нно текл еси́, преподо́бне,/ от Него́же и во́ду живоно́сну прии́м,/ к ве́чней жи́зни пресели́лся еси́,/ иде́же ны́не Богозре́нием насыща́яся,/ помина́й нас, любо́вию пра́зднующих/ всечестну́ю па́мять твою́.

И ны́не, Богоро́дичен, глас то́йже:

Я́коже де́нь со́лнечными луча́ми па́че просвеща́ется,/ си́це дне́шнее торжество́ ико́на Твоя́, Влады́чице,/ чуде́с сия́нием светоза́рнейшим твори́т/ и всех нас ра́дости исполня́ет,/ а́нгельски вопию́щих Ти:/ ра́дуйся, Благода́тная,/ Бо́га пло́тию ро́ждшая ко спасе́нию душ на́ших.

На стихо́вне стихи́ры, глас 2.

Подо́бен: До́ме Евфра́фов:

Дом душе́вный омы́л еси́,/ блаже́нне Арсе́ние, о́тче наш,/ струя́ми слез твои́х,/ и возсия́л тебе́/ свет Христо́в.

Стих: Честна́ пред Го́сподем/ сме́рть преподо́бных Его́.

Се́мя Боже́ственное/ обре́т тя, Арсе́ние,/ зе́млю бла́гу,/ страсте́й те́рнием не подави́ся,/ но возрасти́ доброде́телей плод стори́чный.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ничто́же земно́е/ возмо́же тя, свя́те Арсе́ние,/ от любве́ Бо́жия разлучи́ти,/ е́юже, я́ко свети́льник горя́й и светя́й,/ при́сно был еси́.

Сла́ва, глас 4:

Труды́ и по́двиги твоя́/ му́жеству тезоимени́та  я́ве показа́ша тя,/ преподо́бне о́тче наш,/ и́миже отце́в Святы́я Го́ры удиви́л еси́,/ благослове́ния и даро́в от них сподо́бился еси́,/ и ны́не на Небесе́х мзду трудо́в твои́х восприи́м,/ Христу́ Бо́гу не преста́й моли́тися,/ е́же спасти́ и просвети́ти ду́ши на́ша.

И ны́не, Богоро́дичен, глас то́йже:

Исто́чник Тя исцеле́ний всем ве́рным/ пропове́дуют чудеса́ святы́я ико́ны Твоея́, Влады́чице,/ ю́же святы́й Арсе́ний,/ я́ко многоце́нен дар,/ трудолю́бием приобре́т, всем нам дарова́;/ тем, благода́рным се́рдцем и усты́ пою́ще,/ уми́льно Тебе́ вопие́м:/ ра́дуйся, благи́х Вино́вная,/ ра́дуйся, Стено́ неруши́мая,/ Прибе́жище и Спасе́ние душ на́ших.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 8.

Подо́бен: О, пресла́внаго чудесе́:

Благове́стия Христо́ва Боже́ственный глас:/ не лю́бите ми́ра, –/ от ми́ра воззва́ тя в ю́ности,/ и был еси́ рачи́тель по́стнических по́двигов,/ Боже́ственныя любве́ пра́вило,/ трудолю́бия зерца́ло,/ свети́льник благода́тный,/ горя́й ду́хом ко Го́споду/ и светя́й доброде́тельми и чудесы́,/ Его́же ны́не, всехва́льне Арсе́ние,/ моли́ о душа́х на́ших.

Обновля́тися острово́м,/ рекл Госпо́дь проро́ком Иса́ием,/ и се тобо́ю испо́лнися, свя́те Арсе́ние:/ необита́емый о́стров бы́сть твое́ю оби́телию,/ иде́же, я́ко на ме́сте зла́чне и воде́ поко́йне,/ Боже́ственными глаго́лы ча́да мно́га воспита́в,/ ко Христу́ приве́л еси́;/ сего́ ра́ди ны́не духо́вно пра́зднующе,/ тя в пе́снех ублажа́ем.

Го́рняго мудрова́ния испо́лнен сый,/ к горе́ Афо́нстей ты ше́ствуеши,/ Богому́дре Арсе́ние,/ иде́же луча́ми доброде́телей,/ я́ко Богоза́рное свети́ло, возсия́л еси́/ и, чуде́с сокро́вище – о́браз Богоблагода́тныя в дар прии́м,/ страну́ сию́ озари́л еси́;/ тем, све́тло дне́сь пра́зднующе,/ воспева́ем ди́вныя по́двиги твоя́.

Я́ко избра́нный Бо́жий,/ Бо́га доброде́тельми прославля́л еси́,/ не иски́й сла́вы от челове́к,/ и Бог просла́ви тя в чудесе́х,/ Арсе́ние досточу́дне:/ ты бо, я́влься на мо́ри,/ живота́ отча́янных ры́барей спасл еси́;/ ты слепцу́ прозре́ния вино́вен был еси́;/ при гро́бе твое́м неду́жный здрав бы́сть, –/ ди́вна вся дела́ твоя́!/ Ди́вен Бог во святы́х Свои́х!

Сла́ва, глас 6:

Я́ко А́нгел, был еси́ на земли́,/ всеблаже́нне о́тче наш Арсе́ние,/ невеще́ственно имы́й житие́,/ порабо́тив пло́ть ду́ху:/ я́ко Херуви́м, храня́й дре́во жи́зни, Христа́, вну́трь себе́/ и не дая́ вхо́да скве́рну или́ нечи́сту по́мыслу в рай мы́сленный,/ я́ко Серафи́м, горя́й вы́ну ко Христу́ любве́ пла́менем;/ и ны́не на Небесе́х со Безпло́тными ли́ки/ Триипоста́сному Божеству́ славосло́вие принося́,/ помина́й нас, чту́щих всечестну́ю па́мять твою́.

И ны́не, Богоро́дичен: Кто Тебе́ не ублажи́т:

Вход. Проки́мен дне и чте́ния 3 преподо́бническая (зри 1 июня)

На лити́и стихи́ры, глас 3:

Да ра́дуется дне́сь ве́рных мно́жество,/ пою́ще во псалме́х и пе́снех всехва́льнаго Арсе́ния,/ и́же красото́ю доброде́телей,/ я́ко крин в пусты́ни, процвете́,/ и бы́сть, я́коже плодови́та ма́слина,/ в до́му Бо́жия Ма́тере,/ и ди́вно просла́вися на земли́,/ и к Небеси́, я́ко оре́л, возлете́,/ иде́же Христу́ Бо́гу/ при́сно мо́лится о душа́х на́ших.

Е́же Бо́гу подо́бное/ и, ели́ко мо́щно, сообра́зное,/ души́ благоле́пие возжела́л еси́ взыска́ти,/ посто́м, бде́нием и труда́ми,/ смире́нием же, моли́твою и слеза́ми/ у́зы страсте́й растерза́в,/ Ду́ху Свято́му усво́ился еси́,/ И́мже дух твой обнови́ся и дарова́ний сподо́бися./ Его́же моли́, преподо́бне о́тче наш,/ от и́га страсте́й изба́вити нас/ и спасти́ ду́ши на́ша.

В труде́ и по́двизе,/ во бде́ниих мно́жицею,/ во а́лчбе и жа́жде/ и в пу́тных ше́ствиих  во Афо́нскую Го́ру/ ты му́жествен яви́лся еси́, Богоно́се о́тче наш,/ я́ко и ста́рость не разсла́би тя в по́двизех твои́х,/ но апо́стольски взыва́л еси́:/ я́ко не изнемога́ю,/ но умерщвля́ю те́ло мое́ и порабоща́ю ду́ху,/ да не ка́ко ине́х уча́ сло́вом,/ сам неключи́м де́лы явлю́ся.

Сла́ва, глас 6:

Егда́ в Небе́сныя оби́тели позна́л еси́, Арсе́ние,/ исхо́д твой от земли́,/ тогда́, я́ко оте́ц чадолюби́вый,/ благослове́ние дая́ ча́дом свои́м,/ запове́дал еси́ им благоугожда́ти Го́сподеви/ Правосла́вием и до́брыми де́лы:/ ве́ра бо без дел ме́ртва е́сть./ Тем и о нас, гре́шных,/ Христа́ Бо́га моли́, преподо́бне,/ е́же благоче́стно житие́ сконча́ти нам/ и с тобо́ю всели́тися, иде́же Свет Невече́рний.

И ны́не, Богоро́дичен: Богоро́дице, Ты еси́ лоза́ и́стинная:

На стихо́вне стихи́ры, глас 5.

Подо́бен: Ра́дуйся, Живоно́сный Кресте́:

Ра́дуйся, мона́хов све́тлая добро́то,/ ра́дуйся, Арсе́ние о́тче наш!/ Ра́дуйся, я́ко трудо́в твои́х/ и по́стнических по́двигов прия́л еси́ возме́здие:/ све́тлая селе́ния ра́йская,/ зре́ние сла́вы Божества́ Трисо́лнечнаго,/ со А́нгелы ликостоя́ние,/ с преподо́бными торжество́ преми́рное,/ неизрече́нную ра́дость с пра́ведными,/ сла́ву присносу́щную со все́ми святы́ми./ Те́мже Человеколю́бца Бо́га моли́, преподо́бне,/ е́же и нам, гре́шным, сподо́битися Небе́снаго Ца́рствия.

Стих: Честна́ пред Го́сподем/ сме́рть преподо́бных Его́.

Ра́дуйся, Арсе́ние, Небе́сный граждани́не,/ совсе́льниче А́нгелов;/ ра́дуйся, всесве́тлый свети́льниче,/ сия́нием чуде́с всех озаря́ющий:/ ты по вода́м пла́вающим по́мощь,/ от потопле́ния спасе́ние,/ явле́нием твои́м слепцу́ прозре́ние дарова́ся./ Ра́дуйся, врачу́ безме́здный прося́щим тя ве́рою./ Ра́дуйся, де́монов прогони́телю,/ страхова́ния тех до конца́ разруши́вый./ О, преподо́бне о́тче наш!/ Не преста́й моли́ти Христа́ Бо́га/ е́же от бед и зол изба́вити нас,/ умири́ти мир и спасти́ ду́ши на́ша.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, Арсе́ние,/ благи́й и ве́рный ра́бе Христо́в/ и Богому́дрый наста́вниче спасе́ния на́шего:/ ты, о́браз и пра́вило жития́ спаси́тельнаго/ преднаписа́в нам собо́ю,/ всех нас от сна ле́ности возбужда́еши/ на по́двиг доброде́телей;/ ты у́тро мы́сленное,/ трудолю́бием озари́вшее собо́ры и́ноков./ Вели́кий Но́вград тобо́ю сла́вится,/ и вся страна́ сия́ красу́ется,/ мы же, се́рдцем и усты́ пою́ще,/ тебе́ умиле́нно про́сим/ моли́ти вы́ну Спа́са Христа́ о спасе́нии душ на́ших.

Сла́ва, глас 8:

Мона́хов ликостоя́ние/ и все ве́рных мно́жество,/ песносло́вяще, ублажа́ем тя, Арсе́ние о́тче наш!/ Блаже́н еси́ вои́стинну,/ я́ко прило́г уны́ния в духо́вных по́двизех не разсла́би тя,/ но, трезви́мый ум в моли́тве непреста́нней,/ ве́сь Христу́ усво́ился еси́/ и, я́ко благи́й и ве́рный раб,/ вни́ти сподо́бился еси́ в ра́дость Го́спода своего́,/ Его́же моли́ о душа́х на́ших.

И ны́не, Богоро́дичен: Безневе́стная Де́во:

На благослове́нии хле́бов тропа́рь преподо́бнаго, два́жды, и Богоро́дице Де́во: еди́ножды.

Тропа́рь преподо́бнаго, глас 1:

Боже́ственною любо́вию возгоре́вся,/ мирска́я пристра́стия от души́ отве́ргше,/ те́сным путе́м по́стничества во след Христа́/ невозвра́тным умо́м ше́ствовал еси́, Арсе́ние всеблаже́нне,/ от Него́же и мзду трудо́в твои́х на Небесе́х восприи́м,/ помина́й нас, чту́щих святу́ю па́мять твою́ и вопию́щих:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Ин Тропа́рь, глас 4:

Ду́хом Бо́жиим наставля́емый,/ возлюби́л еси́ безмо́лвие,/ в не́мже ева́нгельски подвиза́ющуся,/ пречу́дный Афо́нский дар –/ Богома́тере ико́на, дарова́ся ти, всеблаже́нне,/ и, о́браз доброде́телей быв ста́ду твоему́,/ Арсе́ние о́тче наш,/ к Го́рнему торжеству́ возше́л еси́,/ иде́же со А́нгелы ликовству́я,/ моли́ Христа́ Бо́га/ спасти́ся душа́м на́шим.

НА У́ТРЕНИ

На Бог Госпо́дь: Тропа́рь преподо́бнаго, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4:

Я́коже звезду́ пресве́тлую, Соде́тель ми́ра дарова́ тя нам, Арсе́ние блаже́нне!/ В нощи́ бо жития́ сего́, грехи́ мно́гими омраче́ни су́ще,/ доброде́тели твоя́ пою́ще, просвеща́емся/ и чуде́с све́тлостию озаря́емся,/ сла́ву и благодаре́ние прино́сим просла́вльшему тя Христу́ Бо́гу, Спа́су душ на́ших.

Сла́ва, и ны́не, Богоро́дичен, глас то́йже:

Приими́, Влады́чице, моли́твы на́ша и принеси́ я к Сы́ну Твоему́ и Бо́гу на́шему,/ я́ко да изба́вит ны, гре́шныя, от де́рзости лука́вых де́монов,/ страстьми́ на́шими нас при́сно ра́тующих,/ и да огради́т ми́ром ду́ши на́ша.

По 2-м стихосло́вии седа́лен, глас 8:

Ду́хом горя́й ко Го́споду,/ вся кра́сная и сла́дкая ми́ра сего́ вмени́л еси́, Арсе́ние, за уме́ты,/ да Его́ еди́наго приобря́щеши,/ и ни ско́рбь, ни теснота́ жития́ по́стническаго возмого́ша тя любве́ Его́ разлучи́ти./ Его́же моли́, преподо́бне, от пристра́стий мирски́х се́рдца на́ша очи́стити,/ в любви́ Свое́й утверди́ти/ и спасти́ ду́ши на́ша.

Сла́ва, и ны́не, Богоро́дичен, глас то́йже:

Купина́, дре́вле огне́м горя́щая, не сгара́ше,/ проявля́ющи Богоневе́стныя Де́вы рождества́ та́инство,/ Я́же, О́гнь Божества́ во чре́ве прии́мши, неопа́льна пребы́сть,/ Сию́, ве́рнии, я́ко Ма́терь Бо́жию, благоче́стно велича́ем.

По полиеле́и седа́лен, глас 1:

Иде́же сла́дкая вода́ во исто́чницех, та́мо вси жа́ждущии стека́ются;/ но се па́мять свята́го Арсе́ния и благода́тный о́браз Бо́жия Ма́тере/ я́ко исто́чницы от Бо́га нам дарова́шася,/ к ни́мже, ве́рнии, прииди́те,/ во е́же благи́х дарова́ний сподо́битися.

Сла́ва, и ны́не, Богоро́дичен, глас то́йже:

Свеще́ та́инственная, Влады́чице Богоро́дице,/ от Святы́я Твоея́ ико́ны благода́тным све́том возсия́й на ны, гре́шныя рабы́ Твоя́,/ от мра́ка страсте́й изба́ви и безстра́стия красоту́ пода́ждь душа́м на́шим.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Светоно́сная па́мять твоя́,/ преподо́бне о́тче наш Арсе́ние,/ я́ко труба́ велегла́сная,/ от всех стран торжества́ рачи́телей созыва́ет/ и глас орга́нов у́мных дви́жет ко хвале́нию Соде́теля,/ И́же показа́ тя свят орга́н Свята́го Ду́ха/ и я́ко неистощи́мое благ сокро́вище/ дарова́ нам ра́ку твою́./ Тем све́тло дне́сь пра́зднующе,/ дарова́ний духо́вных исполня́емся/ и, веселя́щеся, тя в пе́снех ублажа́ем.

Кано́н преподо́бнаго Арсе́ния, глас 8.

Пе́снь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Соде́телю А́нгелов и све́та Пода́телю, Иису́се, Бо́же мой,/ ум и се́рдце мое́ просвети́,/ да земна́го А́нгела – свята́го Арсе́ния воспою́,/ ра́дуяся сла́ве Твое́й.

Я́коже крин се́льный, красе́н был еси́, Арсе́ние, в ю́ности доброде́тельми/ и я́ко избра́нный Бо́жий, полн сый любве́ и благода́ти,/ удали́лся еси́ от ми́ра.

Простра́ннаго пути́ бе́гая,/ пу́ть те́снаго жития́, по́двиги и труды́ по́стническия возлюби́л еси́, Богому́дре,/ и́миже вни́ти сподо́бился еси́ в ве́чный поко́й.

Богоро́дичен: Хва́лим, благослови́м, пое́м и велича́ем Тя, Богоро́дице,/ я́ко рождество́м Твои́м от пре́лести мир изба́влен бы́сть/ и подаде́ся отпуще́ние грехо́в и спасе́ние душа́м на́шим.

Пе́снь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя, дух мой.

Я́же на Горе́ оби́тель бы́сть тебе́, Арсе́ние,/ я́ко ле́ствица, на го́ру доброде́телей возводя́щая/ и Го́рняго ра́зума и мудрова́ния хода́тайственна.

Кро́ткому и смире́нному се́рдцем Го́споду Иису́су подража́я,/ смире́н мудрова́нием, кро́ток и послушли́в ты был еси́,/ от Него́же и благода́ть тебе́, Арсе́ние, дарова́ся.

Я́коже Гедео́н иноплеме́нники,/ ты па́губныя стра́сти воздержа́нием победи́л еси́, досточу́дне,/ и ничто́же у́спе враг диа́вол, при́сно о́ными ра́тующий.

Богоро́дичен: Оскверне́но се́рдце и устне́ име́я,/ припа́даю, и лобыза́ю, Пречи́стая, о́браз Твой святы́й,/ и со слеза́ми молю́ Тя, Влады́чице:/ росо́ю благода́ти и ду́шу и те́ло мое́ очи́сти.

Седа́лен, глас 5:

Ма́нием Боже́ственным, а́ще и нехотя́щаго,/ внеза́пу бу́ря ве́треная к сему́ о́строву на ладии́ обрати́ тя, свя́те Арсе́ние,/ иде́же всели́вся, духо́в нечи́стых страхова́ния потреби́л еси́ и оби́тель созда́л еси́,/ в не́йже, я́ко ма́слина, плодови́т был еси́ доброде́тельми и душепита́тельными словесы́./ И ны́не во оби́телех Небе́сных Христа́ Бо́га моли́/ от грехопаде́ний изба́вити ны и спасти́ ду́ши на́ша.

Сла́ва, и ны́не, Богоро́дичен, глас то́йже:

Благоутро́бия исто́чниче, Ма́ти Госпо́дня,/ не пре́зри ны, во глубину́ грехо́вную впа́дшия,/ но моли́ Сы́на Твоего́ и Бо́га на́шего,/ е́же не погуби́ти нас со беззако́ньми на́шими,/ но поми́ловати и спасти́ ду́ши на́ша.

Пе́снь 4

Ирмо́с: Услы́шах, Го́споди, слух Твой и убоя́хся,/ разуме́х неизрече́нное Твое́ смотре́ние/ и просла́вих, Сло́ве, снизхожде́ние Твое́.

А́ще и соверше́н был еси́ в дея́нии и виде́нии,/ но сокро́вище духо́вных даро́в умно́жити жела́я,/ я́ко рачи́тельный купе́ц, поше́л еси́, Арсе́ние, от се́вера на восто́к.

Го́рняго Сио́на иски́й,/ я́ко жа́ждущий еле́нь на исто́чники водны́я,/ во Афо́нскую Го́ру ты ше́ствуеши, Богому́дре,/ и нас научи́, мо́лим тя, Го́рняя му́дрствовати, а не земна́я.

Во Афо́нстей Горе́, я́ко богоза́рный свети́льник,/ возсия́л еси́, Арсе́ние, доброде́тельми:/ по́двизи бо и труды́ твоя́ светови́дна и сла́вна тя сотвори́ша.

Богоро́дичен: Не оста́ви погружа́тися лю́тыми скорбьми́ ду́шу мою́, о Ра́досте,/ Ра́дость роди́вшая, Богоневе́сто!/ Но те́мныя скорбе́й о́блаки от се́рдца отжени́/ и да́руй ми свет и весе́лие.

Пе́снь 5

Ирмо́с: Просвети́ нас повеле́нии Твои́ми, Го́споди;/ и мы́шцею Твое́ю высо́кою/ Твой мир пода́ждь нам,/ Человеколю́бче.

Богоизбра́нному сосу́ду – Па́влу, труда́ми, Арсе́ние, ревну́я,/ сам был еси́, я́ко сосу́д злат, че́стен, богоизбра́н,/ Небе́сным ми́ром испо́лнен,/ благоуха́яй при́сно до́брыми де́лы и словесы́.

Свя́та и пра́ведна,/ духо́вных плодо́в испо́лнена и Небе́сным сокро́вищем ода́рствована,/ необита́емому о́строву дарова́ тя Бог, Арсе́ние,/ на прославле́ние И́мене Своего́ свята́го.

Е́же при исхо́де от Го́ры Святы́я проро́чески рече́ а́вва Иоа́нн,/ сие́ тобо́ю, о́тче, испо́лнися:/ оби́тель бо во стране́ се́верней устро́ил еси́/ и храм ди́вен в че́сть Хра́му одушевле́нному.

Богоро́дичен: Взира́юще на святу́ю ико́ну Твою́, Влады́чице,/ зрим вели́чие и сла́ву Твою́ и благоче́стно сла́вим Тя,/ я́ко покро́в, заступле́ние и спасе́ние душ на́ших.

Пе́снь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Проро́ческий глас во уме́ имы́й:/ се, что добро́ или́ что красно́, но е́же жи́ти бра́тии вку́пе, –/ купножи́тие, еди́но се́рдце и ду́шу иму́щее,/ во оби́тели твое́й уста́вил еси́, му́дре,/ в назида́ние и спасе́ние душ на́ших.

Я́ко избра́нный Бо́жий, святы́й и возлю́бленный,/ возлю́блен был еси́, Арсе́ние, святы́м Евфи́мием,/ Богому́дрым па́стырем вели́каго Нова́града,/ и́же, во оби́тели твое́й быв,/ просла́ви Бо́га, святы́я Своя́ прославля́ющаго.

О́браз доброде́телей был еси́ ста́ду твоему́,/ Богопросвеще́нный наста́вниче наш Арсе́ние,/ от вся́кия злы́я ве́щи удале́н:/ я́ко да изба́вишися от собла́зна, преткнове́ния и козноде́йства вра́жия.

Богоро́дичен: Хра́ме одушевле́нный, Богоро́дице Де́во,/ предста́тельством Твои́м мене́, жили́ще бесо́в и страсте́й,/ претвори́ во храм Ду́ху Пресвято́му,/ да воспою́, ра́дуяся, Твое́ Ма́тернее благоутро́бие.

Конда́к, глас 8:

Трисия́тельнаго Божества́ сия́нием просвети́в се́рдце твое́, преподо́бне,/ светови́ден ве́сь яви́лся еси́ доброде́тельми,/ я́ко и Го́ру Афо́нскую свет трудолю́бия твоего́ озари́,/ иде́же святу́ю ико́ну Со́лнца и́стиннаго,/ Христа́, и Его́ Пречи́стыя Ма́тере в дар прии́м,/ на о́стров Нева́ е́зера прише́д,/ оби́тель устро́ил еси́, всеблаже́нне./ Тем, ве́рою и любо́вию к тебе́ притека́юще, ра́достно вопие́м:/ ра́дуйся, пресве́тлый свети́льниче, Арсе́ние, о́тче наш.

И́кос:

Ка́ко тя восхвали́ти, недоуме́ю?/ Ты сам безпло́дный ум мой, преподо́бне о́тче, сотвори́ благопло́ден/ и научи́ язы́к до́бре глаго́лати твоя́ по́двиги и труды́,/ и́миже восто́к и се́вер, я́ко луча́ми све́тлыми, озари́л еси́./ Сего́ ра́ди ны́не ве́сь собо́р празднолю́бцев хва́лит тя, вопия́:/ ра́дуйся, блага́го ко́рене Богоизбра́нное прозябе́ние;/ ра́дуйся, плодови́тая ма́слино вели́каго Нова́града./ Ра́дуйся, зерца́ло в ю́ности благонра́вия;/ ра́дуйся, Христо́ва и́га рачи́телю всеизря́дный./ Ра́дуйся, светоза́рное и́ноков удобре́ние;/ ра́дуйся, Го́ры Афо́нския посети́телю трудолю́бный./ Ра́дуйся, чуде́с сокро́вищем, о́бразом Богома́тере, одарова́нный;/ ра́дуйся, в чудесе́х от Бо́га просла́вленный пресла́вно./ Ра́дуйся, страхова́ний де́монских потреби́телю;/ ра́дуйся, обурева́емых на мо́ри спаси́тельное окормле́ние./ Ра́дуйся, боля́щих безме́здное врачева́ние;/ ра́дуйся, притека́ющих к тебе́ исто́чник исцеле́ний./ Ра́дуйся, Коне́вское пресве́тлое свети́ло, Арсе́ние, о́тче наш.

Пе́снь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Мы́сленному куми́ру – греху́, води́мь сый Ду́хом Святы́м,/ ты, о́тче, не послужи́л еси́,/ и от огня́ страсте́й невреди́ма тя сохрани́ Вседе́тель, пою́ща:/ отце́в Бо́же, благослове́н еси́.

Не име́ша во труде́х поко́я ру́це твои́, Арсе́ние,/ ни ум в тре́звенней моли́тве,/ ниже́ о́чи твои́ воздрема́ша когда́ от бде́ния,/ ни коле́на твоя́ изнемого́ста от поста́,/ я́ко Бо́га помо́щника себе́ име́л еси́, поя́ Ему́:/ отце́в Бо́же, благослове́н еси́.

Оби́тель твоя́, Арсе́ние, от ску́дости и гла́да изба́вися,/ возвра́щшуся ти второ́е от Афо́нския Го́ры./ И ны́не, Даю́щаго пи́щу а́лчущим моли́,/ хлеб насу́щный дарова́ти пою́щим:/ отце́в Бо́же, благослове́н еси́.

Богоро́дичен: Врачу́ душ и теле́с, Христе́ Бо́же,/ моли́твами Тебе́ рожде́ния не́мощи на́ша уврачу́й,/ просвети́ и укрепи́ ны в за́поведех Твои́х, пою́щия:/ отце́в Бо́же, благослове́н еси́.

Пе́снь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Царя́ сла́вы Христа́, не иска́в сла́вы челове́ческия,/ на Небесе́х зре́ти лице́м к лицу́ сподо́бился еси́, Арсе́ние, во вся ве́ки.

Царя́ ца́рствующих Бо́га в Небе́снем Ца́рствии не преста́й моли́ти, Арсе́ние,/ на супоста́ты побе́ду и одоле́ние дарова́ти.

Царя́ Небе́снаго моли́, преподо́бне,/ дарова́ти мир Це́ркви, оби́лие благ земны́х,/ отпуще́ние грехо́в и спасе́ние душа́м на́шим.

Богоро́дичен: Царю́ Небе́сных сил, Иису́се Всеси́льне,/ моли́твами Ма́тере Твоея́ Пречи́стыя/ от обдержа́щих мя страсте́й изба́ви, я́ко Благоутро́бен.

Пе́снь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными, ли́ки Тя велича́юще.

Я́ко избра́нный во́ин Христо́в,/ благоче́стно по́двиги соверша́я и те́снаго пути́ тече́ние скончава́я,/ упова́нием ты ра́довался еси́, Арсе́ние,/ о воздая́нии на Небесе́х.

Я́ко благи́й вои́стинну,/ от блага́го сокро́вища се́рдца своего́ словеса́ бла́га при исхо́де изне́сл еси́, Богому́дре,/ наказу́я ученики́ своя́ е́же благоугожда́ти Го́сподеви/ благоче́стием и доброде́телей де́ланием.

О, Боже́ственнаго раче́ния!/ я́ко в час исхо́да от земли́ святы́й Арсе́ний быва́ет прича́стник Боже́ственных Тайн Христо́вых/ и а́бие дух свой в ру́це Его́, ра́дуяся, предае́т.

Богоро́дичен: От святы́я ико́ны Твоея́, Влады́чице,/ благода́тию озаря́еми, ра́достно вопие́м Ти:/ ра́дуйся, исто́чниче во́ды живо́тныя,/ ра́дуйся, земноро́дных ра́досте, прибе́жище и спасе́ние душ на́ших.

Свети́лен:

Я́коже зве́зды многосве́тлыя,/ доброде́тели твоя́, свети́льниче наш Арсе́ние,/ помышле́ния на́ша дне́сь озаря́ют и се́рдца ра́дости исполня́ют,/ я́же воспева́юще, тя при́сно ублажа́ем.

Сла́ва, и ны́не, Богоро́дичен:

Всесве́тлая заре́ у́мнаго Со́лнца,/ возсия́й ми свет ра́зума,/ е́же пе́ти и сла́вити Твое́, Влады́чице, Ма́тернее о нас смотре́ние.

На хвали́тех стихи́ры на 4, глас 4.

Подо́бен: Дал еси́ зна́мение:

Дал еси́ во о́браз нам/ благоугожда́ти Тебе́, Го́споди,/ свята́го Арсе́ния,/ и́же крест свой взем,/ Тебе́ усе́рдно после́дова/ и, пло́ть распя́в со страстьми́ и похотьми́,/ у́мре ми́ру и греху́,/ да Тебе́ еди́ному живе́т,/ Иису́се Всеси́льне, Спа́се душ на́ших.

Мирски́х обурева́ний,/ и ду́хом зло́бы воздвиза́емых страсте́й,/ и пото́па грехо́внаго,/ в корабли́ жития́ мона́шескаго/ ве́трилами Ду́ха Свята́го носи́мый,/ изба́вился еси́, Арсе́ние,/ и в ти́хое приста́нище ве́чныя жи́зни/ упра́ви тя Вседе́тель,/ Иису́с Человеколю́бец, Спас душ на́ших.

Щито́м ве́ры огражде́н/ и си́лою Креста́ вооруже́н,/ избра́нный во́ин Твой, Го́споди,/ му́жеству соиме́нный святы́й Арсе́ний,/ всю си́лу вра́жию низложи́,/ страхова́ния и мечты́ лука́ваго потреби́,/ име́я Помо́щницу Тебе́ Ро́ждшую,/ Иису́се Человеколю́бче,/ Покрови́телю и Спа́се душ на́ших.

Я́ко живоно́сный исто́чник/ бы́сть ра́ка твоя́, Арсе́ние,/ исцеле́ний струи́ при́сно точа́щая/ всем, с ве́рою притека́ющим,/ со слеза́ми моля́щимся/ и боголе́пно сла́вящим тя,/ просла́вльшаго Иису́са Человеколю́бца,/ Врача́ душ и теле́с на́ших.

Сла́ва, глас 6:

В ра́йская селе́ния возше́л еси́ от нас,/ всеблаже́нне о́тче наш Арсе́ние,/ и о́ком бре́нным зре́ти тя не мо́жем,/ ве́рою же созерца́ем,/ я́ко с ли́ки всех святы́х/ сла́дким зре́нием Боже́ственныя сла́вы насыща́ешися/ и в Трие́х Ли́цех сла́вимому Бо́гу/ при́сно мо́лишися о душа́х на́ших.

И ны́не, Богоро́дичен, глас то́йже:

О́браз Твой, Влады́чице,/ све́тлыми чуде́с луча́ми ве́рныя озаря́ет/ и светоно́сный де́нь сей ра́достным твори́т,/ на́нь же мы взира́юще,/ благода́рно Тебе́ вопие́м:/ ра́дуйся, Де́во Ма́ти Госпо́дня;/ ра́дуйся, стено́ неруши́мая;/ ра́дуйся, ве́рным блага́я Помо́щнице;/ ра́дуйся, Боже́ственный покро́ве,/ заступле́ние и спасе́ние душ на́ших.

Славосло́вие вели́кое и отпу́ст.

НА ЛИТУРГИ́И

Блаже́нны, от кано́на пе́сни 3-я и 6-я. Проки́мен, глас 7: Честна́ пред Госпо́дем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Луки́, зача́ло 24. Прича́стен: В па́мять ве́чную:

Моли́тва

О всеблаже́нне и Богоно́се Арсе́ние, о́тче наш! Сый во сла́ве Небе́снаго Царя́ Христа́ Бо́га, предстоя́ Престо́лу Его́ со все́ми Его́ святы́ми, не пре́зри нас, до́лу су́щих, гре́шных и недосто́йных, со слеза́ми тебе́ моля́щихся, но приими́ серде́чное стена́ние и бре́нных усте́н моле́ние сие́ на́ше. Тебе́ бо вси мо́лимся, о преподо́бне о́тче, и тебе́ умиле́нно про́сим: бу́ди о нас хода́тай и моли́твенник тепле́йший ко Всеблаго́му Бо́гу Моли́ бла́гость Его́, е́же спасти́ нас от прегреше́ний на́ших, и́миже ве́сть судьба́ми. Моли́ся щедро́там Его́, е́же подава́ти ще́дро всему́ ми́ру потре́бная. Моли́ся Даю́щему всем мир низпосла́ти мир це́рквам, собира́я расточе́нныя воеди́но, сохрани́ти зе́млю Ру́сскую в ми́ре и тишине́, и всем ве́рным в до́ме, и на пути́, и на мо́ри, и повсю́ду дни бла́ги и безмяте́жны дарова́ти; благослови́ти труды́ отце́в и бра́тии на́ших и прости́ти всех согреше́ния во́льная и нево́льная, я́ко да сподо́бимся и мы, гре́шнии, вку́пе с тобо́ю сла́вити Отца́ и Сы́на и Свята́го Ду́ха в безконе́чныя ве́ки. Ами́нь.

(Слу́жбу зри 3 июля)

Тропа́рь, глас 8:

И́же Христа́ ра́ди, во́лею оста́вив свое́ оте́чество – град Во́логду/ и вся кра́сная ми́ра сего́ возненави́дев,/ жела́нием духо́вным всели́лся еси́ во град Росто́в/ и, я́ко в пусты́ни скита́яся в нем,/ гла́дом, и жа́ждею и безме́рною тягото́ю пло́ть свою́ изнуря́я,/ и рабо́тая Го́сподеви де́нь и но́щь,/ в посте́ и моли́тве пребыва́я в притво́ре церко́внем,/ власы́ же главы́ своея́ пе́плом и смоло́ю удруча́я,/ и, ревну́я Васи́лию блаже́нному,/ прише́л еси́ в ца́рствующий град Москву́/ и в целому́дрии и терпе́нии тече́ние до́бре сконча́в,/ пресели́лся еси́ к ве́чным оби́телем,/ чуде́с лучи́ испуща́я,/ преблаже́нне Иоа́нне, о́тче наш,/ моли́ Христа́ Бо́га спасти́ся душа́м на́шим.

Конда́к, глас то́йже:

И́же Христа́ ра́ди наложи́вый на себя́ му́дростию юро́дство,/ о́бразом бу́йства зрим от челове́к,/ у́мныма же крыло́ма горе́ возлета́я,/ все те́ло свое́ вери́гами обяза́я,/ я́ко зла́то многоце́нное, соблюде́ся в наро́де,/ очи́стив ум от страсте́й,/ весе́лием духо́вным преше́л еси́ мо́ре мяте́жнаго сего́ жития́,/ обре́те све́тлость жи́зни ве́чныя,/ мо́лим тя, блаже́нне Иоа́нне,/ моли́ся приле́жно Христу́ Бо́гу на́шему/ сохрани́тися нам от вся́каго наве́та/ и злых обстоя́ний ви́димых и неви́димых враг, да зове́м ти:/ ра́дуйся, многострада́льне, я́ко да моли́твами твои́ми направля́еми,/ предстоя́ при́сно с на́ми,/ в Тро́ице сла́вимому Бо́гу пое́м Ему́: аллилу́ия.

Тропа́рь, глас 8:

Правосла́вия наста́вницы,/ благоче́стия и чистоты́ учи́телие,/ Це́ркви Во́логодстей Богодарова́нное украше́ние,/ преподо́бнии отцы́ на́ши Ону́фрие и Авксе́нтие,/ моли́те ми́лостиваго Бо́га,/ да ва́шим предста́тельством пода́ст благода́ть и мир стране́ на́шей/ и душа́м на́шим спасе́ние.

Слу́жбу зри 5 июня