НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 4.

Подо́бен: Дал еси́ зна́мение:

Прииди́те ны́не, празднолю́бцы,/ мона́шествующих сосло́вие,/ прииди́те, пе́сньми воспои́м,/ и́миже нас Арха́нгел научи́ пе́ти Чи́стей Де́ве,/ прииди́те, совоспои́м те́пле Тоя́ Боже́ственная великодея́ния/ и любо́вию ублажи́м вои́стинну Присноблаже́нную/ во хра́ме Тоя́ дне́сь Прота́тстем веселя́щеся.

Пе́снь, ю́же Арха́нгел Гаврии́л/ я́ко преднача́тие к пе́сни Космы́ воспе́,/ пле́щуще, Богому́дрии,/ дне́сь благогла́сне воспои́м,/ любо́вию и благогове́нием вку́пе/ Тоя́ вели́кое сие́ чу́до,/ е́же дне́сь он соверши́ в ке́ллии пе́ния,/ мона́ха бо послу́шника пе́сни стра́нней научи́.

Ны́не Тя блажи́м, Присноблаже́нная Влады́чице,/ и ве́рно покланя́емся Твое́й ико́не всечестне́й,/ Храни́тельнице Го́ры,/ пред Не́юже о́бразом стра́нным Гаврии́л/ с Небесе́ внеза́пу предста́ и воспе́,/ е́же досто́йно е́сть пе́ти и блажи́ти/ Тя, Ма́терь Созда́теля.

Сла́ва, и ны́не, глас 1:

Возвесели́теся дне́сь,/ мно́жество пустынножи́телей и общежи́телей Святы́я Го́ры,/ и взыгра́йте, веселя́щеся,/ благода́рственная Де́ве припева́юще./ Се бо промышле́нием Свои́м чрез А́нгелово прише́ствие/ а́нгельскую пе́снь нам востайново́дствова./ Досто́йно е́сть я́ко вои́стинну блажи́ти и чти́ти Ю,/ я́ко Ма́терь су́щую Творца́ всех,/ Христа́ Бо́га на́шего,/ вы́сшую Херуви́м и Серафи́м святе́йшую без сравне́ния су́щую/ и спаса́ющую от бед ду́ши на́ша.

На стихо́вне стихи́ры, глас 2.

Подо́бен: До́ме Евфра́фов:

Досто́йно вои́стинну е́сть,/ Богоро́дице,/ при́сно Тя блажи́ти,/ Бо́га Ма́терь,/ спаса́ющую чту́щих Тя.

Стих: Помяну́ и́мя Твое́/ во вся́ком ро́де и ро́де.

Ико́на всесла́вная/ Ма́тере Бо́га Сло́ва,/ Покрови́тельнице Прота́та,/ покрыва́й нас,/ сохраня́ющи от вся́ких скорбе́й.

Стих: Лицу́ Твоему́ помо́лятся/ бога́тии лю́дстии.

Арха́нгел Гаврии́л,/ с Небесе́ прише́д,/ пред честно́ю ико́ною/ пе́снь а́нгельскую,/ Чи́стая, Тебе́ воспе́.

Сла́ва, и ны́не, глас и Подо́бен то́йже:

Упова́ние христиа́н,/ Пресвята́я Де́во,/ благода́тию Твоея́ ико́ны/ от вся́каго вре́да/ Твоя́ рабы́ соблюда́й.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: О, ди́вное чу́до:

О, ди́вное чу́до!/ Бог, И́же из Тебе́ воплоти́выйся,/ благоволи́ пе́сни Твое́й ны́не, Чи́стая, преднача́тися./ Сего́ ра́ди Гаврии́ла ко и́ноку/ в подо́бием о́бразе посла́/ пе́сни Твое́й научи́ти,/ и́же пре́жде вопия́ше Тебе́:/ Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.

О, Твои́х чуде́с, Чи́стая!/ Вы́шняго Ма́ти показа́лася еси́, Влады́чице./ И ны́не с Небесе́ промышле́нием Твои́м/ по́слан бы́сть стра́нным о́бразом/ пе́сни Твое́й научи́ти, Всенепоро́чная, Арха́нгел Гаврии́л, соверше́ннейше,/ и́же пре́жде вопия́ше Тебе́:/ Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.

Твое́ сла́вим промышле́ние, Богома́ти Де́во,/ нас бо научи́ла еси́ преднача́тию ди́вному/ я́ко вои́стинну пе́сни Твое́й/ Боже́ственнаго ны́не Гаврии́ла/ прише́ствием стра́нным, Всенепоро́чная./ Припа́дающе у́бо ве́рно,/ Тебе́ взыва́ем, с ним вопию́ще:/ Благода́тная, ра́дуйся, с Тобо́ю Госпо́дь,/ подая́й ми́рови Тобо́ю ве́лию ми́лость.

О, ди́вное чу́до!/ Гаврии́л светоза́рный/ во о́бразе и́ночестем яви́ся и́ноку,/ в ке́ллии оста́вшуся,/ восприи́м чу́дно Твое́й пе́сни преднача́тие, Всенепоро́чная./ Начерта́ же а́бие на дщи́це ка́менней руко́ю пое́мая,/ неви́дим же пото́м быв,/ во удивле́ние приведе́ мона́шествующаго,/ е́же сла́вити Тя, Всепе́тая!

Сла́ва, и ны́не, глас 4:

Подоба́ше Горе́ сей Афо́нстей,/ Тебе́ Предста́тельницу иму́щей, Богома́ти,/ е́же сию́ пе́снь Твою́, Де́во Всепе́тая,/ Арха́нгелу пе́рвейше в ней воспе́ти/ и отсю́ду в концы́ вселе́нныя протещи́,/ к составле́нию пе́сней Богома́терних./ Те́мже вопие́м Ти:/ Богоро́дице пресла́вная!/ Твоего́ Сы́на моли́,/ во е́же спасти́ся душа́м на́шим.

Вход. Проки́мен дне. И чте́ния три Богоро́дицы.

Бытия́ чте́ние (глава́ 28):

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо./ За́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном./ И сон ви́де,/ и се ле́ствица утвержде́на на земли́, ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней, тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю,/ сохраня́яй тя на вся́ком пути́, а́може а́ще по́йдеши,/ и возвращу́ тя в зе́млю сию́,/ я́ко не и́мам тебе́ оста́вит,/ до́ндеже сотвори́ти ми вся, ели́ка глаго́лах тебе́./ И воста́ Иа́ков от сна своего́, и рече́:/ я́ко е́сть Госпо́дь на ме́сте сем,/ аз же не ве́дех./ И убоя́ся, и рече́:/ я́ко стра́шно ме́сто сие́,/ не́сть сие́, но дом Бо́жий,/ и сия́ врата́ Небе́сная.

Проро́чества Иезеки́илева чте́ние (главы́ 43 и 44):

Та́ко глаго́лет Госпо́дь:/ бу́дет от дне осма́го, и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, – глаго́лет Адонаи́ Госпо́дь./ И обрати́ мя на пу́ть врат святы́х вне́шних,/ зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми,/ и бу́дут затворе́на./ Я́ко игу́мен ся́дет в них сне́сти хлеб,/ по пути́ ела́мских врат вни́дет/ и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му,/ и ви́дех:/ и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ Себе́ дом/ и утверди́ столпо́в се́дмь./ Закла́ своя́ же́ртвенная, и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́,/ созыва́ющи с высо́ким пропове́данием на ча́шу, глаго́лющи:/ и́же е́сть безу́мен, да уклони́тся ко мне./ И тре́бующим ума́ рече́:/ Прииди́те, яди́те мой хлеб/ и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́й же нечести́ваго, опоро́чит себе́,/ обличе́ние бо нечести́вому, ра́ны ему́./ Не облича́й злых, да не возненави́дят тебе́;/ облича́й прему́дра, и возлю́бит тя./ Да́ждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум./ Разуме́ти бо зако́н по́мысла е́сть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ры, глас 1:

Де́вственное торжество́ дне́сь, бра́тие!/ Да игра́ет Афо́н,/ да ликовству́ет Це́рковь!/ Созва́ бо нас Свята́я Богоро́дица/ на ле́тний пра́здник стра́нных пе́сней Ея́,/ Гаврии́лу Арха́нгелу нас научи́вшу/ страннообра́зне Боже́ственныя пе́сни Ея́ преднача́тию./ Та́ко бо, я́влься и́ноку в подо́бием о́бразе,/ Богоро́дицу возвели́чи,/ я́ко Су́щаго на Херуви́мех с те́лом носи́вшую./ Тоя́ моли́твами, Христе́ Бо́же, спаси́ ду́ши на́ша.

Глас 2: Я́же Небе́с Вы́сшая су́щи,/ и Херуви́м Сла́внейшая,/ и всея́ тва́ри Честне́йша,/ Я́же премно́гия ра́ди чистоты́/ Присносу́щнаго Естества́ прия́телище бы́вши,/ во оби́тели Ея́ дне́сь от А́нгела велича́ется пе́сньми,/ и тем исполня́ются вся́ческая ра́дости,/ и нам да́руется ве́лия ми́лость.

Всенепоро́чная Неве́ста и Ма́ти благоволе́ния О́тча,/ Бо́гом предопределе́нная Тому́ в жили́ще,/ дне́сь стра́нную слу́ху пе́снь/ чрез Арха́нгела нам предае́т,/ Ю́же Безпло́тныя си́лы непреста́нно сла́вят,/ и мы ублажа́ем, я́ко Богоро́дицу,/ вои́стинну Присноблаже́нную и Всенепоро́чную/ и Ма́терь Бо́га на́шего.

Сла́ва, и ны́не, глас 5:

Воспо́йте, лю́дие,/ Ма́тери Бо́га на́шего, воспо́йте./ Дне́сь бо Арха́нгел пе́снь но́вую Пренепоро́чныя Де́вы/ мона́ху уедине́нному воспе́,/ Ю́же и чти́ти непреста́нно до́лжны есмы́ вси,/ Засту́пницу на́шу су́щую.

На стихо́вне стихи́ры, глас 1.

Подо́бен: Небе́сных чино́в:

Небе́сных чино́в преднача́льника,/ Тебе́ Гаврии́ла Боже́ственнаго/ Бог пре́жде, Де́во, посла́,/ принести́, Отрокови́це, Твоего́ неизрече́ннаго зача́тия благове́стие,/ ны́не же пе́сни Твое́й научи́ти преднача́тию.

Стих: Помяну́ и́мя Твое́/ во вся́ком ро́де и ро́де.

Кто досто́йно, Де́во, пове́сть стра́нное сие́ чу́до,/ бы́вшее во сла́ву Твою́, Отрокови́це?/ И́бо преднача́вший пе́снь Твою́/ чу́дными похвала́ми Тебе́,/ яви́ся во о́бразе и́нока ны́не А́нгел,/ та́ко пе́ти глаго́ля всем.

Стих: Лицу́ Твоему́ помо́лятся/ бога́тии лю́дстии.

Тя блажи́ти, Де́во, е́сть досто́йно,/ я́ко вои́стинну Боже́ственный Гаврии́л воспе́,/ Чи́стую Богоро́дицу, Блаже́нную и Пренепоро́чную,/ вои́стинну Ма́терь су́щую Тя Бо́жию,/ Ю́же в пе́снех велича́ем.

Сла́ва, и ны́не, глас 4:

Пе́снь, ея́же не веде́,/ услы́ша ны́не мона́шествующий,/ сказа́ бо ему́ Арха́нгел/ пе́сни Твоея́, Де́во, преднача́тие./ Те́мже удивля́яся, мона́х/ прося́ще сему́ преда́тися и в пи́сьмени./ Сего́ ра́ди на дщи́це ка́менней руко́ю начерта́в/ и пото́м неви́дим быв,/ в ра́дости воспева́ти Тя при́сно Богоро́дицу устро́и.

Тропа́рь, глас 4:

Отце́в все Афо́нское мно́жество,/ собери́теся, ве́рно пра́зднующе,/ дне́сь ра́дующеся и све́тло восклица́юще вси в весе́лии,/ Бо́жия бо Ма́ти ны́не от А́нгела пресла́вно воспева́ется./ Те́мже, я́ко Богоро́дицу, при́сно Сию́ сла́вим.

Ин Тропа́рь, глас то́йже:

Притеце́м, ве́рнии, со дерзнове́нием/ к ми́лующей Цари́це Богоро́дице/ и уми́льно воззове́м к Ней:/ низпосли́ на ны ми́лости Твоя́ бога́тыя:/ Це́рковь на́шу сохрани́,/ лю́ди во благоде́нствии соблюди́,/ зе́млю на́шу изба́ви от вся́каго обстоя́ния,/ мир да́руй ми́рови/ и спасе́ние душа́м на́шим.

НА У́ТРЕНИ

По 1-м стихосло́вии седа́лен, глас 1.

Подо́бен: Гроб Твой, Спа́се:

Все мно́жество отце́в Афо́нских собра́ся ны́не све́тло воспе́ти Твое́, Отрокови́це, сла́вное торжество́./ Дне́сь бо нача́льник А́нгелов/ преднача́тие пе́сни Твоея́ пресла́вно нам возвести́.

По 2-м стихосло́вии седа́лен, глас 4.

Подо́бен: Удиви́ся Ио́сиф:

Гаврии́л с Небесе́ пре́жде по́слан бы́сть Тебе́, Чи́стая,/ благовести́ти Твое́ безсе́менное зача́тие стра́шное./ Той и ны́не во о́бразе мона́шествующаго яви́ся я́ве/ научи́ти пе́сни Твое́й, и сию́ чу́дно начерта́./ Сего́ ра́ди вси с пусты́нниками и общежи́телями Афо́на вопие́м:/ ра́дуйся, Ю́же воспева́ют чи́ни А́нгельстии.

Велича́ние:

Досто́йно е́сть/ велича́ти Тя,/ Богоро́дице,/ Честне́йшую Херуви́м/ и Сла́внейшую/ без сравне́ния Серафи́м.

По полиеле́и седа́лен, глас 3.

Подо́бен: Красоте́ де́вства:

Афо́на ны́не все мно́жество весели́тся, пра́зднуя све́тлое торжество́,/ Богоро́дицу вои́стинну уве́дев Тя блажи́ти,/ Присноблаже́нную и Чи́стую, Всенепоро́чную и нескве́рную,/ Ма́терь Бо́га на́шего су́щую./ Те́мже с Гаврии́лом Тебе́ зове́м:/ ра́дуйся, Благода́тная.

Сла́ва, и ны́не, глас и подо́бен то́йже:

Красоту́ де́вства Твоего́ и пресве́тлую чистоту́ Твою́/ Гаврии́л показа́в нам, возопи́ ны́не, поя́ Тебе́ пе́сни Твоея́ преднача́тие ди́вное, всеизря́дное,/ и сие́ начерта́ на дщи́це ка́менней чу́дно, а́бие неви́дим бы́сть./ Те́мже Тя почита́ем.

Степе́нна 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 2. Самогла́сна:

Благовести́ Гаврии́л Благода́тней пре́жде:/ Ра́дуйся, Неневе́стная Отрокови́це и Неискусобра́чная!/ Ны́не же, я́влься в стра́ннем о́бразе мона́шествующему,/ пе́снь воспе́ но́вую./ Тогда́ благовести́в сказа́ Тебе́, Чи́стая,/ ны́не воспе́ Тя чу́дно,/ я́ко Пренепоро́чную и ро́ждшую, Де́во, Го́спода.

Кано́н Богома́тери, глас 4.

Пе́снь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Афо́н, и́же нарече́ся Свята́я Гора́, Всенепоро́чная, Чи́стая, я́коже прорекла́ еси́,/ ны́не све́тло пра́зднует Тебе́,/ Святе́й вои́стинну Горе́ су́щей,/ и Боже́ственное соверша́ет дне́сь Тебе́ торжество́.

Боже́ственным при́сно Гаврии́л та́йнам Твои́м изря́дным/ слу́жит чу́дно, о Всенепоро́чная,/ те́мже и ны́не, Де́во, Твоея́ пе́сни, ра́дуяся, пое́т преднача́тие.

Не престае́ши, Всенепоро́чная, соверша́ти при́сно рабо́м Твои́м/ пресла́вная чудеса́, Ма́ти Чи́стая,/ и во вся времена́ излива́ти благодея́ния, Пресвята́я,/ я́ко Благоде́тельница на́ша.

Ка́ко изреку́ велича́йшее, соверше́нное тобо́ю, Арха́нгеле,/ близ скита́ Каре́йскаго чу́до,/ егда́ научи́л ны еси́ твои́м явле́нием пе́сни досто́йней Богома́тере?

Пе́снь 3

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Приспе́ вре́мя собра́тися всем отце́м в хра́ме Прота́тстем,/ всено́щную соверши́ти хвалу́,/ тогда́ Боже́ственную пе́снь Твою́, Чи́стая, воспева́ет Арха́нгел.

Прии́де со ины́ми и ста́рец о́наго послу́шника и́нока,/ и сему́ еди́ному оста́вшуся Гаврии́л Арха́нгел яви́ся в подо́бием о́бразе,/ предначина́я пе́снь Твою́.

Приложе́ние творя́ше к пе́сни Твое́й, я́ко преднача́тие, Чи́стая,/ тоя́, ю́же пре́жде воспе́ Косма́, Боже́ственный Твой служи́тель, глаго́ля,/ я́ко та́ко обы́чай е́сть им начина́ти пе́снь Твою́.

О, чуде́с Твои́х стра́шных, Арха́нгеле Боже́ственный Гаврии́ле!/ Ка́ко во и́ночестем о́бразе пе́снь воспе́л еси́ Богома́тери дне́сь/ и, я́ко подоба́ше, возвели́чил еси́?

Ин конда́к, глас 8:

Арха́нгельский глас вопие́м Ти, Всецари́це:/ досто́йно е́сть, я́ко вои́стинну,/ блажи́ти Тя, Богоро́дицу,/ Присноблаже́нную и Пренепоро́чную/ и Ма́терь Бо́га на́шего.

Седа́лен, глас 4.

Подо́бен: Удиви́ся Ио́сиф:

Удиви́ся и́нок А́нгела пе́сни,/ стра́нно пою́щаго ту́ю пред Твое́ю пе́снию, о Чи́стая,/ я́вльшуся сему́ во о́бразе подо́бнем,/ а поне́же и́нок написа́тися жела́ше о́ней,/ на дщи́це ка́менней руко́ю чу́дно начерта́, и неви́дим бы́сть./ Отто́ле пропове́дася всем пе́снь сия́,/ е́же Богоро́дицу Тя сла́вити, Всенепоро́чная.

Пе́снь 4

Ирмо́с: Неизсле́дный Бо́жий сове́т,/ еже́ от Де́вы воплоще́ния/ Тебе́, Вы́шняго, проро́к Авваку́м усмотря́я, зовя́ше:/ сла́ва си́ле Твое́й, Го́споди.

Досто́йно, предначина́ше, я́ко вои́стинну е́сть блажи́ти Тя, Пречи́стая,/ Богоро́дицу, Присноблаже́нную и вои́стинну Пренепоро́чную/ и Бо́га Ма́терь Всенескве́рную.

Предначина́тельную сию́ пе́снь Боже́ственному Гаврии́лу стра́нно пою́щу,/ удивля́шеся слу́шаяй и́нок,/ а поне́же вопроша́ше, та́ко пе́ти, рече́, обыко́хом  .

Глаго́лати и ему́ та́ко повелева́ше Гаврии́л сие́ преднача́тие,/ та́же пе́ти пе́снь Космы́ Боже́ственную/ и всех научи́ти сему́, Боже́ственный рече́ Арха́нгел.

Зане́же проси́ и́нок, Гаврии́ле Боже́ственне, написа́ти пе́снь, ю́же услы́ша,/ ты начерта́л еси́ а́бие на дске ка́менней, Арха́нгеле./ Сла́ва неизрече́нней си́ле твое́й.

Пе́снь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Ужасе́ся челове́к ди́вным чудесе́м, егда́ чу́до узре́,/ я́ко дска ка́менная начерта́ся и внеза́пу собесе́дующий ему́ неви́дим бы́сть,/ Гаврии́л, сла́вный и честны́й Архистрати́г.

Ста́рец, егда́ во у́трие в ке́ллию свою́ возврати́ся/ и егда́ стра́нная сия́ услы́ша,/ дску же ка́менну узре́, руко́ю начерта́нну,/ взем же а́бие с ученико́м сию́,/ принесо́ша Го́ры нача́льствующим.

Зна́емы и всем изве́стны бы́ша сия́ чудеса́, Дево́,/ поне́же дску ка́менную а́бие в ца́рствующий град/ торже́ственно отсла́ша Горы́ нача́льствующии,/ во е́же сла́вити Тя всем.

Стеко́шася вси во убо́гое обита́лище,/ в не́мже стра́нное чу́до соде́яся, и Твое́й ико́не,/ пред не́юже воспе́та бы́сть пе́снь. Всечи́стая,/ благогове́йне покланя́ющеся, единогла́сно уста́виша в Прота́те той храни́тися.

Пе́снь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

С неизрече́нною вси стеко́шася ра́достию и весе́лием,/ е́же взя́ти честну́ю ико́ну Твою́,/ иере́и, и мона́шествующий, и все Го́ры мно́жество, Пречи́стая.

Боже́ственную Твою́ ико́ну сию́/ со вся́ким благогове́нием держа́ще отцы́ вси,/ пле́щуще, с пе́сньми и пе́ньми внесо́ша в Боже́ственный храм Твой, Пречи́стая.

Де́во! Стоя́ние всено́щное соверши́ша,/ любо́вию Тебе́ чту́ще и Арха́нгела,/ пе́снь Твою́ возвести́вша,/ и ны́не мы та́кожде вас вку́пе почита́ем.

Отцы́ Боже́ственнии, с пе́сньми, по тайноде́йствии,/ взе́мше Боже́ственную Твою́ ико́ну,/ вну́трь хра́ма, в невходи́мая, со мно́гим благогове́нием по́ставиша.

Конда́к, глас 4.

Подо́бен: Яви́лся еси́ дне́сь:

Пра́зднует дне́сь ве́сь Афо́н,/ я́ко пе́снь прия́т от А́нгела чу́дно/ Тебе́, Чи́стей Богома́тери,/ Ю́же вся тва́рь чтит, сла́вящи.

И́кос:

Ны́не да весели́тся мно́жество отце́в Афо́на:/ се бо Де́ве пре́жния пе́сни,/ ю́же чу́дно воспе́ Ей Косма́, Боже́ственный песнопе́вец,/ Гаврии́л ны́не пое́т преднача́тие,/ и́же: Досто́йно е́сть я́ко вои́стинну, – глаго́лаше и́ноку, – блажи́ти Тя, Богоро́дицу,/ Присноблаже́нную и Пренепоро́чную и Ма́терь Бо́га на́шего;/ сему́ повелева́ше, да та́ко вси предначина́ют Твою́ пе́снь./ И, сию́ начерта́в руко́ю на дске ка́менней, внеза́пу бы́сть неви́дим./ И́нок же, дивя́ся, воспе́вше, я́коже научи́ся, чи́стую Богома́терь,/ Ю́же вся тва́рь чтит, сла́вящи.

Пе́снь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Преизря́дную че́сть воздая́ху вси отцы́,/ и пре́жнии и ны́нешнии, сей ико́не Твое́й Боже́ственней, Пренепоро́чная, пра́веднейше:/ че́сти бо премно́гия удосто́ися пресла́вно.

Ве́лия благода́ти удосто́ися Боже́ственная ико́на Твоя́, Пренепоро́чная,/ я́сно бо пред не́ю Твоея́ пе́сни преднача́тие/ пе́рвее возгласи́ся благоволе́нием Твои́м./ Те́мже по до́лгу ны́не сей с любо́вию покланя́емся.

Не боготвори́м ико́ну Твою́, Пречи́стая, на ны клеве́щут,/ но относи́тельне чтим, Пренепоро́чная,/ сию́, ра́дующеся, лобыза́ем че́ствовательно, раби́ Твои́,/ ны́не же и во ве́ки.

С Тобо́ю, Пресвята́я, не престае́м чти́ти и сла́внаго Гаврии́ла,/ нас ны́не пе́сни Твое́й научи́вшаго,/ и́же и пре́жде, Тебе́ возглаша́я, взыва́ше:/ ра́дуйся, Благода́тная.

Пе́снь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть:/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Отроко́м благочести́вым подража́юще, Богоро́дице,/ о чудесе́х Твои́х, я́же твори́т Госпо́дь во сла́ву Твою́, Пречи́стая, воспева́юще, пое́м:/ Го́спода по́йте, дела́, и превозноси́те во вся ве́ки.

Вои́стинну благослове́н, и́же сподо́бися услы́шати/ Боже́ственныя хвалы́ Твоя́ от А́нгела, Пресвята́я Де́во Пренепоро́чная,/ я́коже Сын Твой благоволи́, и́мже всех научи́ пе́ти Тя досто́йно/ и превозноси́ти Тя во вся ве́ки.

«Пе́ние» – по достоя́нию уста́вися именова́ти ме́сто о́но,/ иде́же соверши́ся сие́ чу́до,/ я́коже нарица́ние удержа́ся до нас и навсегда́, на па́мять, Пречи́стая, чудесе́,/ я́ко да воспева́ем Тя и превозно́сим во вся ве́ки.

«Досто́йно е́сть» – да́же до ны́не нарица́ется я́сно и ке́ллия та,/ в не́йже и Боже́ственная Твоя́ ико́на, пред не́юже пе́рвее воспе́то бы́сть/ пе́сни Твоея́, Де́во Чи́стая, преднача́тие,/ я́ко да пою́т Тя вси досто́йно и превозно́сят Тя во вся ве́ки.

Пе́снь 9

Ирмо́с: Всяк земноро́дный/ да взыгра́ется, ду́хом просвеща́ем,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Вси раби́ Твои́, стека́емся во храм Твой Боже́ственный/ и пра́зднуем, све́тло соверша́юще ны́не торжество́,/ в ле́тную дне́сь па́мять чудесе́ Твоея́ пе́сни восполне́ния,/ Богоро́дице, Чи́стая Присноде́во.

Досто́йно е́сть, – не престае́м, ра́дующеся, глаго́лати, –/ блажи́ти Тя, Присноблаже́нную же я́ко вои́стинну/ и Пренепоро́чную и Ма́терь Бо́га на́шего, –/ от А́нгела сим ны́не научи́вшеся, Богоро́дице, Чи́стая Присноде́во!

Вку́пе сла́внаго и Боже́ственнаго Арха́нгела Гаврии́ла дне́сь, ра́дующеся, прославля́ем,/ благода́рственная пе́ния прино́сите,/ ди́вным чу́дом всех научи́вшаго Боже́ственней пе́сни Чи́стыя Богома́тере,/ ра́дуйся, таи́нниче неизрече́нных, взыва́юще.

Ра́дуйся, храм Прота́та пресла́вный, хваля́щийся сокро́вищем/ всечестны́я, Боже́ственныя и благода́ть точа́щия ико́ны еди́ныя Богома́тере и Предста́тельницы Афо́на:/ Гора́ бо сия́ избра́нный жре́бий Ея́ соде́лася.

Свети́лен.

Подо́бен: Жены́, услы́шите:

Собери́теся, взыгра́йте, све́тло торжеству́йте,/ Гаврии́л бо Боже́ственный мона́шествующему ны́не предста́ в и́ночестем о́бразе,/ пе́снь Богома́терню пе́рвый провеща́в в Горе́ Афо́нстей,/ стяжа́вшей Ю Предста́тельницу.

На хвали́тех стихи́ры, глас 1.

Подо́бен: Небе́сных чино́в:

С Небе́сных круго́в соше́д, Гаврии́л/ стра́нным о́бразом яви́ся и́ноку послу́шнику,/ Твою́ пе́снь, о Де́во, необы́чную/ ему́ поя́ ны́не, Арха́нгел,/ предначина́я е́ю ту,/ ю́же не́когда Косма́ Тебе́ воспе́.

Гаврии́л Де́ве пре́жде/ благовести́в с Небесе́ прине́с,/ возопи́: ра́дуйся!/ Ны́не же стра́нную пе́снь Ея́/ чу́дно Горе́ Святе́й возвести́, припева́я,/ е́же блажи́ти я́ко вои́стинну/ досто́йно е́сть Всечи́стую.

Любо́вию Боже́ственней ико́не Твое́й/ покланя́емся, Чи́стая,/ пред не́юже воспе́ся пе́рвее/ преднача́тие пе́сни Твоея́ от А́нгела./ Те́мже ве́рно сию́ ны́не лобыза́ем/ и вку́пе Гаврии́лу Боже́ственному све́тло пра́зднуем,/ я́ко вино́вному.

Сла́ва, и ны́не, глас 6:

Кто возглаго́лет си́лы Твоя́, Чи́стая,/ или́ кто изочте́т чуде́с Твои́х мно́жества?/ Мно́го и па́че естества́ де́йствуеши Твоя́ чудеса́./ О, вели́чий, я́же и ны́не соде́лала еси́!/ Твоея́ бо пе́сни преднача́тие/ чрез А́нгела, Всечи́стая, нам предала́ еси́, Де́во,/ и стра́нно на дщи́це ка́менней сему́ написа́тися/ Ты благоволи́ла еси́ промышле́нием Твои́м,/ е́же в пе́снех велича́ти Тя, Пренепоро́чная.

НА ЛИТУРГИ́И СЛУ́ЖБА БОГОРО́ДИЦЫ

НА ВЕЧЕ́РНИ

Пое́м Блаже́н муж: 1-й антифо́н. На Го́споди, воззва́х: стихи́ры на 8, глас 4.

Подо́бен: Я́ко до́бля:

Мре́жею слове́с твои́х,/ Богоглаго́ливе апо́столе,/ из глубины́ возве́л еси́ су́етства/ и лю́таго безбо́жия/ мирски́я концы́/ и приве́л еси́ Христу́ Бо́гу ве́рою,/ такову́ю тебе́ благода́ть пода́вшему,/ я́ко Боже́ственну ученику́ и тайноглаго́льнику,/ Варфоломе́е апо́столе.

Со́лнце сла́вы, тя Иису́с, Бог наш,/ я́ко лучу́, пресла́вне, посла́/ в мирска́я исполне́ния,/ кре́пко отгоня́щую безбо́жия мглу/ и просвеща́ющую всех,/ во тьме́ неве́дения седя́щих,/ и́хже насле́дники соде́ла Све́та,/ Варфоломе́е Богому́дре.

Повину́яся манове́нием,/ Его́же манове́нию вся́ческая повину́ются,/ Сему́ же подо́бяся,/ я́ко пра́вды Учи́телю,/ ча́шу сме́рти стра́сти ра́ди кре́стныя,/ ра́дуяся, испи́л еси́/ и предстои́ши жела́ний кра́йнему,/ А́нгелом и апо́столом сликовству́я,/ Варфоломе́е сла́вне.

Стихи́ры, глас 1.

Подо́бен: Прехва́льнии му́ченицы:

Варфоломе́е всече́стне,/ Христа́ благовеству́я,/ вселе́нную проте́кл еси́, я́коже со́лнце,/ потребля́я всю заря́ми ве́ры многобо́жия тьму́,/ и ны́не моли́ся дарова́ти душа́м на́шим/ мир и ве́лию ми́лость.

Варфоломе́е сла́вне,/ све́тел показа́ся орга́н,/ де́йством Ду́ха бряца́я,/ я́ко уче́нием Боже́ственным/ скоропи́сца тро́сть и честна́го писца́ быв./ Ему́же предстоя́, написа́тися пою́щим тя/ в кни́зе живо́тней помоли́ся.

Варфоломе́е му́дре,/ пи́щный пото́к устреми́ся,/ ка́плями Боже́ственныя благода́ти/ напая́я ве́сь оляде́вший ра́зум/ и мно́жае пре́жде мгло́ю одержи́мую мы́сль./ И ны́не моли́ся предста́ти ми до конца́/ плодоно́сну Спа́сови, прему́дре.

И́ны стихи́ры апо́стола Варна́вы, глас 4.

Подо́бен: Дал еси́ зна́мение:

Прия́л еси́, апо́столе,/ на де́моны непобеди́мую вла́сть и си́лу,/ о и́мени Христо́ве,/ нача́ла тьмы́ отгоня́ти,/ проше́л еси́ зе́млю,/ просвеща́я, я́коже со́лнце,/ и, в Рим сла́вный прише́д,/ пе́рвее, сла́вне, Христо́во пропове́дал еси́/ спаси́тельное прише́ствие.

Пе́рвей бла́гости/ и есте́ственному и пребоже́ственному/ житию́ подо́бяся,/ муж был еси́ благ,/ Варна́во, по существу́/ и утеше́ния сын подо́бием имену́емь,/ нра́вов твои́х бла́гостию/ и ума́ чистото́ю/ Христо́в показа́лся еси́ учени́к и́скренний.

Орга́н, до́бре соста́влен/ де́ланием духо́вным, Варна́во, был еси́,/ язы́ком зва́нию ты вве́рился еси́,/ к позна́нию Христо́ву наставля́я/ словесы́ и дея́нии,/ и вся просвети́л еси́/ испове́дати и́стинное/ Иису́сово Божество́,/ Спа́са душ на́ших.

Сла́ва, глас 6. Византи́ево:

Варна́во прехва́льне,/ блиста́ющий сосу́де Свята́го Ду́ха,/ я́ко сын утеше́ния,/ и́же пре́жде Па́вла,/ седми́десятим ученико́м быв верх/ и с Па́влом па́ки пропове́дав Ева́нгелие конце́м./ Те́мже и благода́ти сло́во де́лы испо́лнив,/ себе́ прине́сл еси́ всепло́дие чи́сто/ Учи́телю твоему́ Христу́./ Моли́ всегда́, апо́столе сла́вне,/ в ми́ре спасти́ся душа́м на́шим, мо́лимся.

И ны́не, пра́здника или́ Богоро́дичен: Кто Тебе́ не ублажи́т:

Вход. Проки́мен дне. И чте́ния:

Собо́рнаго Посла́ния Петро́ва чте́ние (глава́ 1):

Бра́тие,/ благослове́н Бог и Оте́ц Го́спода на́шего Иису́са Христа́,/ И́же по мно́зей Свое́й ми́лости порожде́й нас во упова́ние жи́во/ воскресе́нием Иису́с Христо́вым от ме́ртвых,/ в насле́дие нетле́нно, и нескве́рно, и неувяда́емо,/ соблюде́но на Небесе́х вас ра́ди,/ и́же си́лою Бо́жиею соблюде́ни ве́рою во спасе́ние,/ гото́вое яви́тися во вре́мя после́днее./ О не́мже ра́дуйтеся, ма́ло ны́не, а́ще ле́по е́сть,/ приско́рбни бы́вше в разли́чных напа́стех,/ да искуше́ние ва́шея ве́ры многочестне́йше зла́та ги́бнуща,/ огне́м же искуше́на, обря́щется в похвалу́ и че́сть и сла́ву,/ во открове́нии Иису́с Христо́ве,/ Его́же не ви́девше, лю́бите,/ и на Него́же ны́не не зря́ще, ве́рующе же,/ ра́дуетеся ра́достию неизглаго́ланною и просла́вленною,/ прие́млюще кончи́ну ве́ре ва́шей, спасе́ние душа́м.

Собо́рнаго Посла́ния Петро́ва чте́ние (глава́ 1):

Возлю́бленнии,/ препоя́савше чре́сла помышле́ния ва́шего,/ трезвя́щеся соверше́нне, упова́йте на приноси́мую вам благода́ть открове́нием Иису́с Христо́вым./ Я́ко ча́да послуша́ния, не преобразу́ющеся пе́рвыми неве́дения ва́шего похоте́нии,/ но по зва́вшему вы Свято́му, и са́ми свя́ти во всем житии́ бу́дите./ Зане́ пи́сано е́сть:/ свя́ти бу́дите, я́ко Аз Свят е́смь./ И а́ще Отца́ называ́ете, нелицеме́рно судя́ща кому́ждо по де́лу,/ со стра́хом жития́ ва́шего вре́мя жи́тельствуйте,/ ве́дяще, я́ко не нетле́нным сребро́м или́ зла́том/ изба́вистеся от су́етнаго ва́шего жития́, отцы́ пре́даннаго,/ но честно́ю кро́вию, я́ко А́гнца непоро́чна/ и Пречи́ста, Христа́.

Собо́рнаго Посла́ния Петро́ва чте́ние (глава́ 2):

Возлю́бленнии,/ молю́, я́ко прише́льцы и стра́нники,/ огреба́тися от плотски́х похоте́й, я́же вою́ют на ду́шу,/ житие́ ва́ше иму́ще добро́ во язы́цех,/ да о не́мже клеве́щут вас, а́ки злоде́ев,/ от до́брых дел ви́девше, просла́вят Бо́га в де́нь просвеще́ния./ Повини́теся у́бо вся́кому челове́чу созда́нию, Го́спода ра́ди:/ а́ще царю́, я́ко преоблада́ющую а́ще ли же князе́м, я́ко от Него́ по́сланным,/ во отмще́ние у́бо злоде́ем, в похвалу́ же благотво́рцем./ Я́ко та́ко е́сть во́ля Бо́жия,/ благотворя́щим обуздова́ти безу́мных челове́к неве́жество,/ я́ко свобо́дни, а не я́ко прикрове́ние иму́ще зло́бы свобо́ду, но я́ко раби́ Бо́жии./ Всех почита́йте,/ бра́тство возлюби́те,/ Бо́га бо́йтеся, царя́ чти́те./ Раби́, повину́йтеся во вся́ком стра́се влады́кам,/ не то́кмо благи́м и кро́тким, но и стропти́вым./ Се бо е́сть уго́дно пред Бо́гом,/ а́ще со́вести ра́ди Бо́жия терпи́т кто ско́рби, стражда́ без пра́вды./ Ка́я бо похвала́, а́ще согреша́юще, му́чими, терпите́?/ Но, а́ще добро́ творя́ще и стра́ждуще, терпите́,/ сие́ уго́дно пред Бо́гом./ На сие́ бо и зва́ни бы́сте,/ зане́ и Христо́с пострада́ по нас,/ нам оста́вль о́браз, да после́дуем стопа́м Его́./ И́же греха́ не сотвори́, ни обре́теся ле́сть во усте́х Его́./ И́же укоря́емь, проти́ву не укоря́ше,/ стражда́, не преща́ше,/ предая́ше же судя́щему пра́ведно./ И́же грехи́ на́ша Сам вознесе́ на те́ле Свое́м на дре́во,/ да, от грех избы́вше, пра́вдою поживе́м.

На стихо́вне стихи́ры пра́здника. А́ще ли пост, стихи́ры апо́стола, глас 1.

Подо́бен: Всехва́льнии му́ченицы:

Во всю зе́млю изы́де/ ва́ше спаси́тельное веща́ние,/ Богови́дцы апо́столи,/ и просвети́ ду́ши заблу́ждшия,/ и Христу́ приведе́ челове́ки,/ просвеще́нныя благода́тию./ Те́мже моли́те/ дарова́ти душа́м на́шим/ мир и ве́лию ми́лость.

Стих: Во всю зе́млю изы́де веща́ние их/ и в концы́ вселе́нныя глаго́лы их.

Свети́льницы пресве́тлии Христо́вы,/ сосу́ди чисте́йший,/ зарю́ Ду́ха, прему́дрии, ве́рою вмести́вшии,/ церко́внии столпи́,/ Небеса́ пресла́вная,/ Бо́жию сла́ву возвеща́ющая,/ Того́ моли́те/ дарова́ти душа́м на́шим/ мир и ве́лию ми́лость.

Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет тве́рдь.

Язы́ки приведо́сте/ Христу́ Бо́гу, блаже́ннии,/ изба́вленныя кро́вию/ на земли́ роди́тися благоволи́вшаго/ и Крест и сме́рть/ во́лею претерпе́вшаго, сла́внии,/ Его́же ны́не моли́те/ дарова́ти душа́м на́шим/ мир и ве́лию ми́лость.

Сла́ва, глас 8:

Апо́столе Спа́сов, Варна́во прехва́льне,/ прия́телище ве́ры, сы́не утеше́ния,/ тишино́ обурева́емых,/ непреста́нно в па́мяти твое́й дерзнове́ние име́я,/ моли́ в ми́ре сохрани́тися душа́м на́шим.

И ны́не, пра́здника или́ Богоро́дичен: Безневе́стная Де́во:

Тропа́рь, глас 3:

Апо́столи святи́и,/ моли́те Ми́лостиваго Бо́га,/ да прегреше́ний оставле́ние/ пода́ст душа́м на́шим.

Ин Тропа́рь, глас то́йже:

Язы́к огнедохнове́н в си́ле Ду́ха прие́мше,/ во пло́ти прише́дшее Сло́во пропове́дасте всю́ду,/ Его́же ра́ди ов во главу́ усе́чен,/ ов же ка́мением побие́н,/ и есте́ апо́стольскому ли́ку украше́ние,/ Варфоломе́е и Варна́во,/ те́мже па́мять ва́шу почита́ем и про́сим:/ моли́те Христа́ Бо́га пода́ти нам грехо́в оставле́ние.

НА У́ТРЕНИ

На Бог Госпо́дь: тропа́рь апо́столов, два́жды. Сла́ва, и ны́не: Тя, хода́тайствовавшую:

По 1-й кафизме седа́лен, глас 1.

Подо́бен: Гроб Твой:

Лик духо́вный апо́стольский ми́ру посла́ся та́йно от Бо́га Вы́шняго,/ и нево́лею стра́ждущим вра́чеве яви́шася,/ Триипоста́снаго еди́нственне призыва́юще,/ Боже́ственное воплоще́ние Емману́ила Го́спода му́дре написа́ша.

Сла́ва, и ны́не, Богоро́дичен:

Купину́ ю́же Моисе́й неопали́му ви́де, го́ру Бо́жию, святы́й о́блак,/ се́нь нескве́рную, Богоприя́тную трапе́зу, пала́ту высо́каго Царя́,/ всесве́тлую и непроходи́мую две́рь, Де́во, пое́м Тя.

По 2-й кафизме седа́лен, глас 4.

Подо́бен: Яви́лся еси́ дне́сь:

Светолу́чными сия́нии, я́ко зве́зды, земны́я концы́ просвеща́ете,/ Богоуче́нии свята́го пропове́дания,/ Небе́снии таи́нницы Госпо́дни апо́столи.

Сла́ва, и ны́не, Богоро́дичен:

Те́плое заступле́ние су́щим в ну́ждах, на́шу по́мощь и к Бо́гу премене́ние,/ Ея́же ра́ди тли изба́вихомся,/ Богоро́дицу, ве́рнии, ублажа́ем.

По полиеле́и седа́лен, глас 8.

Подо́бен: Прему́дрости:

Мре́жею сло́ва возве́д из глубины́ неразу́мия,/ боголе́пно язы́ки приве́л еси́ ве́рою/ и, я́ко исто́чник сый вод духо́вных,/ вселе́нную всю напои́л еси́ благода́тию./ Те́мже и спа́сшиися тобо́ю, Богогла́се,/ я́ко дру́га тя бли́жняго Христо́ва ублажа́ем, Варфоломе́е, вопию́ще ти:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен.

Степе́нна, пе́рвый антифо́н 4-го гла́са. Проки́мен, глас 4: Во всю зе́млю изы́де веща́ние их: Стих: Небеса́ пове́дают сла́ву Бо́жию: Вся́кое дыха́ние: Ева́нгелие от Иоа́нна, зача́ло 67.

По 50-м псалме́ стихи́ра, глас 1:

Во всю зе́млю изы́де ва́ше спаси́тельное веща́ние,/ Богови́дцы апо́столи,/ и просвети́ ду́ши заблу́ждшия,/ и Христу́ приведе́ челове́ки, просвеще́нныя благода́тию./ Те́мже моли́те дарова́ти душа́м на́шим/ мир и ве́лию ми́лость.

Кано́н Богоро́дицы со ирмосо́м на 6 и апо́столов два кано́на на 8. Кано́н свята́го апо́стола Варфоломе́я, глас 2.

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть,/ препросла́вленный Госпо́дь сла́вно бо просла́вися.

Прове́дец всех и Бог, ума́ твоего́ богови́дно зря, избра́/ и тя сочета́ ли́ку апо́стольску, Варфоломе́е всехва́льне,/ благода́тию просвети́в се́рдце твое́.

Доброде́телей на высоту́ возше́д,/ язы́ком огнедохнове́нным огневи́дно разделе́нием обогати́лся еси́,/ я́ко Христо́в апо́стол, прише́ствием Уте́шителя, пребога́те,/ нече́стия хвра́стие пояда́я, и неразу́мия.

Богоно́сен у́гль вои́стинну, Боже́ственнаго Ду́ха заре́ю разжже́н, показа́лся еси́,/ пре́лести се́но попаля́я, Варфоломе́е прехва́льне,/ и просвеща́я ве́рою се́рдца пою́щих тя.

Богоро́дичен: Чи́стая, рцы, ка́ко дои́ши?/ Ка́ко же Ма́ти была́ еси́, де́вственными печа́тьми сия́ющи?/ Не пыта́й бе́здны, неприча́стна естество́м, испыта́яй еди́н всех Бог и Госпо́дь,/ Его́же и пло́тию роди́х.

Ин кано́н свята́го Варна́вы, глас и ирмо́с то́йже.

Я́ко муж сый благ и утеше́ния сын я́влься,/ души́ моея́ озлобле́ние и греха́ душегу́бную печа́ль отжени́,/ я́ко да, весе́лия испо́лнен быв, воспою́ тя.

Одержи́м, блаже́нне, чи́стым сия́нием,/ прозя́бшаго от коле́на Иу́дова, пребога́те, Христа́ Всецаря́,/ от леви́тска сро́дства прише́дша свяще́нна,/ зако́на же преложе́ние пропове́дал еси́.

Све́тлая твоя́, прему́дре, жи́знь, пе́рвыя бла́гости/ и есте́ственнаго существа́ показа́ бо́га тя втора́го,/ е́же отту́ду ублажа́ема благода́тьми, сла́вне Варна́во,/ порожде́ние Боже́ственнаго утеше́ния.

Богоро́дичен: Отрокови́ц Боже́ственный лик боже́ственно в жена́х Тя до́брую воспева́ет, Богоро́дице Влады́чице,/ добро́тами укра́шену Божества́:/ добротвори́тельное бо Сло́во па́че сло́ва родила́ еси́.

Катава́сия по уста́ву.

Пе́снь 3

Ирмо́с: Процвела́ е́сть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием, Твои́м,/ в не́йже утверди́ся мое́ се́рдце.

Я́ко до́ждь небе́сный,/ изсо́хшую, прему́дре, вселе́нную всю тьмо́ю безбо́жия/ напои́л еси́, Богови́дче досточу́дне.

Исто́чник изы́де спаси́тельнаго пи́ва, Варфоломе́е всече́стне,/ и многосугу́б плод прине́сл еси́ язы́ком спасе́ния, досточу́дне.

Со́лию благода́ти и́дольское уста́вил еси́ гное́ние, всему́дре,/ сла́дким сло́вом ве́ры сердца́ услажда́я чту́щих тя.

Богоро́дичен: Еди́ну Де́ву Тя и Ма́терь чтим,/ я́ко спасе́ния Хода́таицу бы́вшую нам, Непоро́чная,/ и мир избавля́ющую моли́твами Твои́ми.

Ин, ирмо́с то́йже

О́блак во́льный, нам до́ждь нося́щий от исто́чника благода́ти,/ ви́ден был еси́, Варна́во сла́вне,/ и пи́щный пото́к напая́ющий.

Разли́чными одарова́на сия́нии/ ви́дящи Всеси́льнаго Ду́ха вла́сть,/ та́йнам Христо́вым служи́теля, отлучи́ тя, прехва́льне.

Просвеща́еми благода́тию Креста́ Твоего́, Влады́ко, благосла́внии апо́столи/ тебе́ язы́ки ве́рою приведо́ша,/ Варна́ва и Па́вел Богому́дрии.

Богоро́дичен: Яви́лася еси́ чистото́ю, я́ко крин, Влады́чице,/ посреде́ те́рния возсия́вши заря́ми де́вства Твоего́,/ Богоро́дице Всечи́стая.

Конда́к, глас 3.

Подо́бен: Де́ва дне́сь:

Госпо́день был еси́ всеи́стинный служи́тель,/ апо́столов же яви́лся еси́ седми́десятих пе́рвый,/ озари́л еси́ и с Па́влом про́поведь твою́,/ всем возвеща́яй Христа́ Спа́са,/ сего́ ра́ди песнопе́нии Боже́ственную па́мять твою́, Варна́во, соверша́ем.

И́кос:

Сын Бо́жий, соприсносу́щный Ду́ху, благоволе́нием на земли́ пло́ть прие́мь, я́ко Челове́к,/ и стра́стию честно́ю безстра́стие дав, тя полага́ет, блаже́нне, апо́стола/ и вити́я ве́ры, му́дра в сло́ве и досточу́дна, пропове́дника че́стна,/ язы́ков учи́теля, Варна́во блаже́нне, и Тро́ицы и́стинна покло́нника./ Те́мже возсия́ ве́рным честна́я денни́ца све́тлая,/ озаря́ющая твоя́ Боже́ственная па́мять, ю́же досто́йно соверша́ем.

Седа́лен, глас 8.

Подо́бен: Прему́дрости:

Мре́жею сло́ва возве́д из глубины́ неразу́мия,/ боголе́пно язы́ки приве́л еси́ ве́рою/ и, я́ко исто́чник сый вод духо́вных,/ вселе́нную всю напои́л еси́ благода́тию./ Те́мже и спа́сшиися тобо́ю, Богогла́се,/ я́ко дру́га тя бли́жняго Христо́ва ублажа́ем, Варфоломе́е, вопию́ще ти:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, Варна́вы, глас и подо́бен то́йже:

Слове́сен показа́лся еси́,/ я́ко Небе́сную пове́дуя сла́ву Бо́жию чуде́с све́тлостию и си́лы луча́ми,/ неразу́мия но́щь отгоня́ благода́тию, богоразу́мия же лучи́ облиста́я конце́м./ Те́мже светоно́сную и святу́ю твою́ па́мять сла́вим дне́сь, ве́рнии, и вопие́м ти:/ Варна́во всехва́льне, моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

И ны́не, пра́здника или́ Богоро́дичен:

Я́ко Всенепоро́чная Неве́ста Творцу́, я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище и бесо́м игра́лище в ра́зуме бы́вша,/ потщи́ся от тех злоде́йства мя изба́вите/ и све́тлое жили́ще доброде́телей соверши́, Светоно́сная Нетле́нная,/ отжени́ о́блак страсте́й и Вы́шняго прича́стия сподо́би/ и Све́та невече́рняго моли́твами Твои́ми.

Пе́снь 4

Ирмо́с: Прише́л еси́ от Де́вы, не хода́тай, ни А́нгел, но Сам, Го́споди, вопло́щся,/ и спасл еси́ всего́ мя, челове́ка,/ Тем зову́ Ти:/ сла́ва си́ле Твое́й, Го́споди.

Упраздни́л еси́, кресто́м Госпо́дним огражда́емь,/ де́монское свере́пство, Варфоломе́е преизря́дне,/ сих душегуби́тельную пре́лесть отгна́л еси́ пропове́данием.

Свет ми́ра, сла́вы Боже́ственныя сия́ние/ Христо́с тя показа́, Варфоломе́е Богоприя́тне:/ всю бо просвети́л еси́ Богоразу́мием тва́рь, всеблаже́нне.

Возмути́л еси́ язы́ческая мо́ря, апо́столе,/ я́ко ко́нь преизря́ден, колесни́ца Сло́ва быв,/ ве́рою же погаси́л еси́ го́рькаго безбо́жия концы́.

Богоро́дичен: Исцеля́я Е́вино ве́тхое преступле́ние,/ в Тя, непоро́чную, Пречи́стая, всели́ся,/ всего́ мя челове́ка обнови́ па́дшаго Пребоже́ственный.

Ин, ирмо́с то́йже

После́дуя повеле́нием Влады́ки, апо́столе Варна́во прехва́льне,/ ни́щим разда́л еси́ все твое́ име́ние,/ и Христо́в пропове́дник быв велегла́сен.

Дости́гл еси́ доброде́телей све́тлость коне́чную/ и, Па́вла обре́т, Богогла́снаго апо́стола,/ с ни́мже всем возвести́л еси́ та́инства глубину́ неизрече́нную.

Я́ко со́лнце, претека́я ми́ра концы́, Варна́во всече́стне,/ зарелу́чными сия́нии, Па́влу после́дуя,/ просвеща́вши сло́вом благода́ти.

Соприча́стник страсте́й Спа́са быв, Варна́во прехва́льне,/ в Небе́сных се́лех с Ним прославля́ешися,/ па́че ума́ весе́лия насыща́яся.

Богоро́дичен: Е́вы прама́тере кля́тва упраздни́ся Тобо́ю, Всенепоро́чная:/ воплоще́ннаго бо Сло́ва родила́ еси́ Присносу́щнаго,/ благослове́ньми мир венча́вшаго.

Пе́снь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику Отцу́ Твоему́/ от но́щи неве́дения/ приведе́ние и́мамы.

Несозда́нну Све́ту, нас ра́ди в зда́ниих я́вльшемуся Христу́,/ перводе́льно бесе́довал еси́, к Нему́ прише́д, апо́столе,/ и Боже́ственными заря́ми от Него́ просвеща́емь.

Я́ко роса́ Бо́жия, челове́ком исцеле́ние подаю́щи,/ в ми́ре был еси́, о Варфоломе́е преблаже́нне,/ и зе́млю нече́стия проро́чески опрове́ргл еси́.

К пе́рвому Све́ту присту́пль, был еси́ свет вторы́й:/ е́же отту́ду сия́нии и светоли́тии озаря́емь,/ я́ко самови́дец Сло́ва, Варфоломе́е всему́дре.

Богоро́дичен: Глаго́лы Твоя́ по́мняще, Тя ны́не блажи́м:/ Тобо́ю бо, Непоро́чная, блаже́нство обрето́хом/ и жи́знию честно́ю и́стинною обогати́хомся.

Ин, ирмо́с то́йже

Зако́на се́нь преше́д и благода́тию сия́я,/ язы́ком исполне́ние благовеству́я,/ просвети́л еси́, Богому́дрый Варна́во, Христо́вым пропове́данием.

Кре́постию держа́вною Свята́го Ду́ха, апо́столе, я́ве обложе́н,/ лука́вствия ду́хи низложи́в,/ от тех злоде́йства мир изба́вил еси́.

Вопию́щаго глас в пусты́х язы́цех был еси́, му́дре,/ Боже́ственнаго воплоще́ния непостижи́мое та́инство возвеща́я всем,/ Варна́во пребога́те.

Богоро́дичен: Се во утро́бе, Богоро́дице Пречи́стая,/ Христа́ Бо́га па́че сло́ва име́ла еси́, я́коже Иса́ия предрече́,/ вы́ше естества́ же Сего́, Богороди́тельнице, родила́ еси́.

Пе́снь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Чуде́с благода́ть прие́м/ и исцеле́ний обога́щся де́телию, Варфоломе́е всему́дре,/ язы́к ста́да улови́л еси́.

О́гненный твой язы́к, пресла́вне,/ вся́ку пре́лесть, я́ко се́но, попали́,/ ве́рных же просвети́ сердца́ Боже́ственным пропове́данием.

Исто́чника прему́дрости учи́теля име́я, пресла́вне, Сло́ва Безнача́льнаго,/ мирску́ю обуи́л еси́, Богопропове́дниче, му́дрость благода́тию.

Богоро́дичен: Па́че естества́, Де́во, родила́ еси́ и ве́чнуеши Де́вою,/ явля́ющи и́стиннаго Божества́, Сы́на и Бо́га Твоего́, о́бразы.

Ин, ирмо́с то́йже

Возсия́в ми́ру, Христе́ Бо́же,/ Пра́вды Со́лнце, Влады́ко,/ я́коже лучи́ сия́ющия, Варна́ву и Па́вла возблиста́л еси́.

Кореносе́чна секи́ра был еси́,/ олядене́вшую пре́лесть секу́щи па́че сло́ва чудесы́,/ Богоглаго́ливе Варна́во чу́дне.

Законополо́жник показа́лся еси́ благода́ти,/ я́ко ве́тхаго заве́та о́бразы ко и́стинному явле́нию прелага́я, Варна́во Богоприя́тне.

Богоро́дичен: Небеса́ Простры́й во́лею/ не́бо земно́е друго́е показа́ Тя, Богома́ти Пречи́стая,/ и, из Тебе́ возсия́в, яви́ся.

Конда́к, глас 4.

Подо́бен: Яви́лся еси́:

Яви́лся еси́ вели́кое со́лнце вселе́нней/ уче́ний сия́ньми и чуде́с стра́шных, световодя́ почита́ющия тя,/ Варфоломе́е, Госпо́день апо́столе.

И́кос:

Я́ко не́бо, сла́ву Бо́жию веща́я, ви́ден был еси́ Ду́хом Святы́м, апо́столе Богови́дче,/ и, я́ко со́лнце све́тло, яви́лся еси́ ми́ру,/ преле́стное помраче́ние разгоня́я Боже́ственною благода́тию./ Тем молю́ ти ся и мил ся де́ю:/ Боже́ственными твои́ми луча́ми души́ моея́ ослепле́ние, всебога́те, просвети́ зе́ницы/ и сло́во тя пе́ти да́ждь во отверзе́ние усто́м мои́м в твое́й дне́сь па́мяти,/ в то́же всяк ве́рный, веселя́ся, хва́лит тя,/ Варфоломе́е, Госпо́день апо́столе.

Пе́снь 7

Ирмо́с: Богопроти́вное веле́ние/ беззако́ннующаго мучи́теля высо́к пла́мень вознесло́ е́сть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Вели́кое та́инство, Варфоломе́е, Боже́ственнаго воплоще́ния ми́ру яви́л еси́,/ е́же всем невмести́мое и непостижи́мое,/ еди́нем же вмести́мо ве́рным, несказа́емо и ве́руемо.

Я́ко ка́мень, пресвяты́й Варфоломе́е, чи́сте валя́яся,/ пре́лести утвержде́ние кре́пко опрове́ргл еси́,/ Це́ркви же необори́мое основа́ние я́влься,/ сохраня́еши сию́ непоколеби́му.

Боже́ственное подо́бие, Варфоломе́е, доброде́телей ша́ром  , преблаже́нне, написа́л еси́,/ отсю́ду апо́стол Боже́ствен быв,/ всем пропове́дал еси́ Христо́во прише́ствие многопе́тое.

Богоро́дичен: Грозд созре́вший, Его́же невозде́ланно, Чи́стая, возрасти́ла еси́,/ на Дре́ве я́ко узре́вши пове́шена, вопия́ла еси́:/ Ча́до сла́дкое, мсто  иска́пи, и́мже страсте́й пия́нство оты́мется.

Ин, ирмо́с то́йже

Свя́то Свята́го, во святы́х почива́ющаго, Варна́во, пропове́дал еси́ Сы́на,/ собезнача́льна Отцу́ и сопресто́льна,/ Челове́ка бы́ша, нам спасе́ние содева́юща.

Лучи́, блиста́ющия Боже́ственное сия́ние,/ Варна́ва всечестны́й и Па́вел Богоприя́тный, я́ко свет, исхо́дят,/ просвеща́ющия сло́вом благода́ти язы́к всенасле́дие, христопропове́дницы.

Ра́дуется дне́сь воспита́вый тя, Варна́во, цвету́щаго/ сло́во благода́тное, Христо́ви тя прозя́бши, Богоблаже́нне./ Его́же измени́в, ны́нешняго плене́ния изба́ви моли́твами твои́ми.

Богоро́дичен: Направля́ющи, Всечи́стая, мою́ жи́знь,/ ко Твоему́ благоути́шному приста́нищу наста́ви,/ Бо́га ро́ждшая, благи́х исто́чника,/ всем подаю́ща ве́рным незави́стную бла́гость.

Пе́снь 8

Ирмо́с: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Ве́лие и ма́ло, мно́го же и ума́лено, Спа́сово Ева́нгелие прему́дро научи́л еси́./ Ве́лия и пресла́вная сложе́нными глаго́лы всем назна́менал еси́,/ Варфоломе́е Богому́дре.

Я́коже река́, от Сио́на исходя́, церко́вный со́нмы напоя́еши, пребога́те,/ и пото́к Боже́ственныя пи́щи испусти́л еси́ явле́ннейше, зовы́й:/ благослови́те, вся дела́ Госпо́дня, Го́спода.

Боже́ственных даро́в я́ве светле́йшими и вели́кими/ я́ко апо́стол боже́ственне украси́лся еси́./ Превосхо́дит сан благосла́вия всего́, блаже́нне,/ су́щее во челове́цех зри́мое благода́тию.

Богоро́дичен: Ум безстра́стен в ложесна́х Твои́х едини́тся челове́чу уму́, Всечи́стая,/ пло́ти же дебельство́м подле́тен быв, веко́в превы́шший./ Тем Тя, Богоро́дице, ве́рою и любо́вию сла́вим.

Ин, ирмо́с то́йже

Мо́ре язы́ческое возмути́ти Твоя́ ко́ни, я́ко Благоде́тель,/ наве́л еси́ – Варна́ву сла́внаго и Па́вла чу́днаго,/ пре́лесть многобо́жную уче́ньми, Живода́вче, благоче́стия отгоня́щия.

Положи́, я́ко Бог, Уте́шителю Ду́ше вседе́тельный, в Це́ркви Твое́й свети́ла сия́ющая,/ Твою́ си́лу пропове́дающая, Сы́ну же и Роди́телю зову́щая:/ благослови́те, вся дела́ Госпо́дня, Го́спода.

Облиста́л еси́ све́тло, я́ко со́лнце, в ми́ре,/ мы́сленному бесе́довав я́ве Со́лнцу, Богоприя́тне:/ разже́гся бо сия́нием, свет вторы́й был еси́,/ всем явля́я та́инства си́лу.

Зе́млю всю уче́ньми просвети́в,/ е́же па́че ума́ блаже́нство досто́йно улучи́л еси́,/ в Небе́сных се́лех, Варна́во всече́стне, вене́ц благоле́пия от Влады́ки прие́м.

Богоро́дичен: Да кля́тву пе́рвую погуби́ши и сме́рти осужде́ние дре́вния прама́тере,/ от Де́вы Богома́тере Сло́во Бо́жие роди́ся,/ всем дарова́ безсме́ртие неги́блющее.

Пе́снь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем всепе́тую Богоро́дицу велича́ем.

Сло́ва быв самови́дец и служи́тель, учени́к же и пропове́дник богови́ден,/ иде́же ны́не е́сть Сло́во, ты жи́ти вои́стинну сподо́бился еси́,/ я́коже Сам обеща́ нело́жно Преблаги́й.

Я́ко ны́не предстоя́ престо́лу Влады́ки твоего́/ и отону́дными заря́ми осия́емь, о Варфоломе́е Богому́дре,/ певцы́ твоя́ назира́я, страсте́й избавля́еши и разли́чных обстоя́ний.

Сын ве́ры ра́ди сподо́блься бы́ти Бо́гу,/ оте́ческих насле́дник сокро́вищ был еси́./ О, великода́рныя дла́ни!/ О, дарова́ния, ны́не превосходя́щаго, Христа́, просла́вльшаго тя,/ Богови́дче всеблаже́нне!

Богоро́дичен: Разуме́вше издале́ча прозорли́выма очи́ма, проро́цы/ Тя вси провозгласи́ша, хотя́щую Ма́терь бы́ти Вседе́теля и всех Влады́ки./ Тем Тя, Всепе́тую Богоро́дицу, возвеща́ем.

Ин, ирмо́с то́йже

Свет бы́вше доброде́телию, апо́столи, и Све́ту вели́кому ны́не предстоя́ще,/ ми́ру мир пода́ти и на́шу спасти́ Це́рковь, ю́же соста́висте,/ Влады́ку умоли́те.

Вети́йскую лю́тость прему́дрости твоея́ пла́менем, Богоявле́ние Варна́во, я́ве погаси́л еси́,/ сия́ний Боже́ственных, я́ко исто́чник, вну́трь име́я./ Те́мже всесвяще́нный пра́здник твой почита́ем.

Ве́рою па́мять твою́ соверша́юще ны́не, апо́столе,/ моли́твенника ко Влады́це тя предлага́ем, разреше́ния прося́ще согреше́ний/ твои́м прия́ти хода́тайством, Варна́во всече́стне, Богопропове́дниче свяще́нне.

Богоро́дичен: Я́ко у́тро обре́теся у́треннее,/ в жите́йстей но́щи де́вства заря́ми сия́ющи,/ восто́к Со́лнца разу́мнаго пра́вды нам я́вльши, Богома́ти Всечи́стая.

Свети́лен.

Подо́бен: Посети́л ны:

Апо́столы Христо́вы прииди́те, лю́дие, воспои́м,/ Боже́ственнаго Варфоломе́я и Варна́ву му́драго, пропове́дники ве́ры,/ я́ко моля́щияся Христу́ о душа́х на́ших.

Сла́ва, и ны́не, пра́здника или́ Богоро́дичен:

Чи́стая Влады́чице Свята́я и еди́на Муженеиску́сная, спасе́ние и упова́ние Ты,/ моли́ из Тебе́ рожде́ннаго Изба́вителя на́шего/ спасти́ мир от ле́сти, бед и скорбе́й.

На хвали́тех стихи́ры на 4, глас 4.

Подо́бен: Я́ко до́бля:

Пра́вды тя Со́лнце,/ Иису́с, Бог наш,/ во вся мирска́я исполне́ния,/ я́коже многосве́тлую лучу́,/ Богому́дре апо́столе, положи́л е́сть,/ зло́бы мглу отгоня́ща/ и просвеща́юща омраче́нная се́рдца неразу́мием/ и страсте́й обдержа́нием,/ Варфоломе́е пребога́те.

Чи́стое прия́телище/ Тро́ицы был еси́,/ доброде́телей светлостьми́ облиста́емь/ и в се́рдцы прие́мь, Варна́во,/ от Нея́ сия́ние,/ и просвеще́ние, со́лнца светле́йшее,/ в конце́х све́тло препосыла́я/ и просвеща́я во тьме́ седя́щия неразу́мия,/ Богоприя́тне.

Я́коже о́блацы, блаже́ннии,/ во вся концы́ до́ждь иска́паете Небе́сный/ и ду́ши ве́рных напоя́ете/ Боже́ственною благода́тию,/ потопи́вше лю́таго безбо́жия пле́велы/ и соверши́вше ду́ши плодоно́сны челове́ческия,/ сего́ ра́ди во хвале́нии вас почита́ем,/ Госпо́дни апо́столи.

Сла́ва, глас 5. Византи́ево:

Прему́дрость Бо́жия,/ соприсносу́щное Сло́во О́тчее,/ я́коже во Ева́нгелиих предрече́:/ вы есте́ изоби́льныя ло́зы, прехва́льнии апо́столи,/ и́же грозд зре́лый и красе́н во ве́твиях ва́ших нося́ще,/ Его́же, ве́рнии, яду́ще, услажда́ем вкус к весе́лию./ Варфоломе́е Богоприя́тне/ и Варна́во, сы́не утеше́ния,/ приле́жно моли́теся о душа́х на́ших.

И ны́не, пра́здника или́ Богоро́дичен: Блажи́м Тя, Богоро́дице Де́во:

Славосло́вие вели́кое и отпу́ст.

НА ЛИТУРГИ́И

Блаже́нны от кано́на Варфоломе́я, пе́снь 3-я на 4. И Варна́вы, пе́снь 6-я на 4. Проки́мен, глас 8: Во всю зе́млю изы́де веща́ние их: Стих: Небеса́ пове́дают сла́ву Бо́жию: Апо́стол Дея́ний, зача́ло 28. Аллилу́ия, глас 1: Испове́дят Небеса́ чудеса́ Твоя́, Го́споди. Ева́нгелие от Луки́, зача́ло 51. Прича́стен: Во всю зе́млю изы́де веща́ние их:

А́ще изво́лит настоя́тель, твори́м па́мять преподо́бнаго, пренесе́ния его́ моще́й, в пе́рвый пято́к Петро́ва поста́.

НА ВЕЧЕ́РНИ

Стихи́ры преподо́бному Ефре́му, поста́вим стихо́в 6, глас 8.

Подо́бен: Что вы нарече́м:

Что тя нарече́м, преподо́бне?/ Я́ко светоно́сное со́лнце,/ во свое́й оби́тели, Ефре́ме, яви́ся,/ град Торже́к просвеща́я многочуде́сными заря́ми,/ неоску́дный исто́чник исцеле́ний источа́я/ от нетле́нных и всечестны́х моще́й твои́х/ ве́рою приходя́щим и со стра́хом предстоя́щим,/ мы же любе́зно припа́даем ти и мо́лим:/ о́тче преподо́бне Ефре́ме,/ моли́ спасти́ся душа́м на́шим.

Что тя воспое́м, преподо́бне?/ Се бо на́ше зва́ние прии́де ра́достию и весе́лием,/ я́ко да наслади́мся ны́нешняго торжества́,/ Ру́сския земли́ сы́нове, бога́тии и убо́зии,/ ста́рцы со ю́нотами, му́жи и жены́ со младе́нцы,/ на честну́ю твою́ па́мять ра́достно приходя́ще,/ ты бо, преподо́бне Ефре́ме,/ я́ко река́ живо́тных вод,/ жа́ждущия напая́еши чуде́сными дарми́,/ исцеле́ние подае́ши ве́рою притека́ющим./ Мо́лим тя, Ефре́ме,/ моли́ спасти́ся душа́м на́шим.

Что тя ны́не провозгласи́м, преподо́бне Ефре́ме?/ Чуде́с бо бе́здну источа́еши/ и просвеща́еши оби́тель свою́,/ град Торже́к вельми́ тобо́ю хва́лится,/ име́я мо́щи твоя́ в себе́,/ я́ко исто́чник неистека́емый,/ пода́еши тре́бующим здра́вие,/ с ве́рою приходя́щим к моще́м твои́м./ Мо́лим тя, преподо́бне Ефре́ме,/ моли́ спасти́ся душа́м на́шим.

И́ны стихи́ры, глас 4, самогла́сны:

Чуде́сными заря́ми просвеща́еши,/ преподо́бне Ефре́ме, оби́тель свою́,/ озаря́я светолу́чным сия́нием и́нок мно́жество собра́вшихся,/ и освеща́еши от цельбоно́снаго гро́ба своего́/ возжиза́нием свещи́ Боже́ственнаго огня́ А́нгелом/ вся, с ве́рою приходя́щия к ра́це твое́й,/ облобыза́ющия любе́зно о́браза твоего́ подо́бие,/ ты бо подае́ши бога́тное дарова́ние,/ боле́знем исцеле́ние, преподо́бне Ефре́ме,/ проще́ние и очище́ние грехо́м на́шим,/ име́я и ве́лию и бога́тую ми́лость.

Честна́я и всепра́зднственная дне́сь па́мять твоя́/ возсия́, я́ко второ́е со́лнце,/ всех празднолю́бных собо́ри просвеща́ющи,/ ду́шу и те́ло веселя́щи,/ те́мже, прииди́те, празднолю́бцы,/ Боже́ственней и светоно́сней наста́вши па́мяти,/ почти́м преподо́бнаго Ефре́ма похвала́ми и пе́сньми:/ се бо прии́де Ру́сския земли́ удобре́ние,/ и гра́ду Торжку́ похвала́, и оби́тели сей утвержде́ние,/ вселе́нную созыва́юще к честне́й боготво́рней ра́це,/ со стра́хом и любо́вию ей предстоя́ще, любе́зно облобыза́юще,/ мо́лимся на враги́ одоле́ние дарова́ти, и ми́ру смире́ние,/ и душа́м на́шим ве́лию ми́лость.

Честны́я твоя́ мо́щи нетле́нныя,/ нам я́ко честна́я дарова́ния обрето́шася,/ от мно́гих лет сокрове́нныя,/ чуде́с зарю́ испуща́юще, преподо́бне Ефре́ме,/ исто́чник духо́вных исцеле́ний и спасе́ние ве́рным./ Чудотво́рныя мо́щи воспое́м, ве́рнии,/ чту́щий па́мять преподо́бнаго, велегла́сно вопию́ще:/ Ты прояви́л еси́, Влады́ко Христе́,/ сицева́го свети́льника христоимени́тым лю́дем/ и Ца́рствия сподо́би их Небе́снаго/ моли́твами Твоего́ преподо́бнаго отца́ Ефре́ма.

Сла́ва, глас то́йже, Самогла́сен:

Чудесы́ удивля́еми,/ достоле́пно ра́достно от души́ вопие́м:/ Богоблаже́нне, преподо́бне о́тче наш Ефре́ме,/ воспева́юще пра́зднственнаго дне све́тлое торжество́,/ па́мять твою́ ве́рою почита́ем,/ я́ко светоза́рную лучу́, возсия́вшу свы́ше/ яви́лся бо еси́, я́ко многосве́тлый свети́льник,/ возжига́нием свещи́ своея́/ цельбоно́снаго гро́ба своего́,/ ея́же сия́нием це́рковь свою́ просвети́л еси́/ и град Торже́к озари́л еси́ светолу́чным сия́нием,/ и́нок мно́жество удиви́л еси́./ Чуде́сными дея́ньми удивля́еми, Богому́дре,/ ра́достно от души́ вопие́м со мно́жеством наро́да:/ Богоблаже́нне, моли́ Христа́ Бо́га/ уще́дрити мир и спасти́ ду́ши на́ша.

И ны́не, Богоро́дичен.

Вход. Проки́мен дне и чте́ния 3, преподо́бническая (зри 1 июня)

На стихо́вне стихи́ры, глас 1:

Боже́ственным све́том озаря́емь, преподо́бне Ефре́ме,/ дом Ду́ха Свята́го был еси́,/ и благода́тель яви́ся, преподо́бне,/ ты бо гра́ду Торжку́ утвержде́ние,/ и оби́тели своея́ похвала́, и и́ноком наста́вник./ Те́мже в па́мять твою́ мы ны́не соше́дшеся, тя воспое́м:/ ра́дуйся, це́ркви сей утвержде́ние.

Стих: Честна́ пред Го́сподем/ сме́рть преподо́бных Его́.

Я́ко чи́сто очище́нно зла́то/ в нескве́рнем чи́сте сосу́де,/ та́коже и цельбоно́сный гроб твой держи́т/ честно́е бога́тство – многочуде́сное твое́ те́ло./ Те́мже, обогаща́я чудесы́/ притека́ющих ве́рно к моще́м твои́м,/ блаже́нне Ефре́ме, разу́мнаго све́та заре́,/ церко́вное свети́ло,/ и́ноческому житию́ и́стовое пра́вило,/ нам же засту́пник Бо́жиею благода́тию,/ Христу́ моли́ся дарова́ти душа́м на́шим/ мир и ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Честны́я твоя́ мо́щи, преподо́бне Ефре́ме,/ реку́ излива́юще исцеле́ний/ от честны́я ра́ки твоея́ незави́стно/ всем, ве́рою приходя́щим,/ благоуха́ние чуде́с испуща́ют/ и неду́жным подаю́т здра́вие Христо́вою благода́тию,/ те́мже Христу́ моли́ся, преподо́бне Ефре́ме,/ дарова́ти душа́м на́шим/ мир и ве́лию ми́лость.

Сла́ва, глас 6. Самогла́сен:

Боже́ственная и честна́я возсия́вши па́мять твоя́,/ преподо́бне Ефре́ме,/ ру́сстим страна́м показа́ся, я́ко златоза́рная,/ твоя́ бо мо́щи блеща́хуся па́че со́лнца и целе́бни./ Ты бо благода́ти от Бо́га сподо́бися, блаже́нне,/ и по сме́рти чудесы́ удивля́еши,/ мы же вопие́м,/ прииди́те, празднолю́бцы, и́нок мно́жества,/ дне́сь хва́ляще, си́це рцем:/ ра́дуйся, гра́ду Торжку́ похвало́/ и оби́тели своея́ удобре́ние;/ ра́дуйся, и́ноком наста́вниче/ и всем ве́рным благоути́шное приста́нище,/ ра́дуйся, вдови́цам пита́телю и сирота́м прибе́жище./ Те́мже, пречестну́ю твою́ ра́ку обстоя́ще,/ любе́зно облобыза́ем, преподо́бне Ефре́ме,/ и Боже́ственнаго человеколю́бия про́сим получи́ти/ к Бо́гу твои́ми моли́твами,/ и ми́ру смире́ние дарова́ти/ и душа́м мир и ве́лию ми́лость.

И ны́не, Богоро́дичен.

Тропа́рь, глас 1:

Боже́ственною свы́ше благода́тию просвети́вся, Богому́дре,/ и по сме́рти яви́ тя све́тлость жития́ твоего́,/ те́мже источа́еши ми́рови благоуха́ние,/ и́же с ве́рою притека́ющим к ра́це моще́й твои́х, Ефре́ме преподо́бне./ Тем вопие́м ти:/ сла́ва Да́вшему ти чудесе́м благода́ть,/ сла́ва Просла́вльшему тя в чудесе́х,/ сла́ва Де́йствующему тобо́ю всем исцеле́ния.

НА У́ТРЕНИ

На Бог Госпо́дь: Тропа́рь свята́го, два́жды. Сла́ва, и ны́не, Богоро́дичен, по гла́су.

По 1-м стихосло́вии седа́лен, глас 6:

Ду́хом предстоя́ще в честне́м хра́ме,/ мо́лишися со святы́ми страстоте́рпцы Спа́су и Пречи́стей/ за притека́ющих к тебе́ с ве́рою./ Ра́дуйся, гра́де Торже́к, прие́мше такова́го свети́льника,/ весели́ся, честна́я оби́тель,/ просвети́ся бо в тебе́ свеча́ многосве́тлая у цельбоно́снаго гро́ба./ Лику́йте, вси ро́ди земни́и, припа́дающе к моще́м преподо́бнаго Ефре́ма./ Ны́не, предстоя́ Христу́, преподо́бне Ефре́ме,/ помина́й ны с ли́ки апо́стол и святи́телей,/ моли́твами твои́ми сохрани́ нас от вся́каго озлобле́ния,/ я́ко да в ми́ре соверша́ем па́мять твою́.

Сла́ва, и ны́не, Богоро́дичен:

Воззри́ на ны, Всепе́тая,/ возсия́й просвеще́ние в сердца́ омраче́нная/ и озари́ ста́до Свое́, Пресвята́я,/ мо́жеши бо, ели́ко хо́щеши, я́ко Ма́ти су́щи Зижди́теля Своего́,/ и вопие́ши к лю́бящим Тя:/ Аз е́смь с ва́ми, и никто́же на вы.

По 2-м стихосло́вии седа́лен, глас 4:

Дне́сь свята́я па́мять возсия́ нам,/ солнцеобра́зно луча́ми сия́ющи и пото́ки целе́бныя неоску́дно точа́щи,/ воню́ благоуха́ющи,/ собра́вшеся, цве́ты добропе́сненными увязе́м преподо́бнаго Ефре́ма и хвала́ми почти́м:/ ра́дуйся, благоуха́нный цве́те ра́ки твоея́,/ ра́дуйся, просвеще́ние гра́ду на́шему,/ ра́дуйся, наде́ждо всем, хва́лящим тя, преподо́бне Ефре́ме,/ моли́ся о душа́х на́ших.

Сла́ва, и ны́не, Богоро́дичен:

Пречи́стеи ру́це Свои́ просте́рши,/ покры́й наде́ющихся на Тя, Сы́ну Твоему́ зову́щи:/ всем пода́й же ми́лости Твоя́, Христе́.

По полиеле́и седа́лен, глас 5:

Всечестна́я и светоно́сная твоя́ па́мять, преподо́бне Ефре́ме,/ ра́дости всех испо́лни и весе́лия духо́внаго,/ те́мже, соше́дшеся, и́нок мно́жество и христоимени́тии лю́дие,/ любо́вию восхваля́юще, блажи́м Боже́ственная дея́ния твоя́,/ я́ко бо крин во удо́лии, процве́л еси́ и благоуха́еши душ на́ших чу́вствия,/ преподо́бне Ефре́ме, моли́ Христа́ Бо́га/ пода́ти нам мир и ве́лию ми́лость.

Сла́ва, и ны́не, Богоро́дичен:

Наста́ви ны на пу́ть покая́ния,/ уклоня́ющияся при́сно к злым безпу́тием и Преблага́го прогне́вающия Го́спода,/ Неискусобра́чная, Благослове́нная Мари́е,/ прибе́жище отча́янных челове́ков, Бо́жие обита́лище.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Боже́ственная благода́ть/ осеня́ет ра́ку моще́й твои́х, преподо́бне Ефре́ме,/ те́мже и воня́ ми́ра чуде́с твои́х облагоуха́ет притека́ющих,/ неду́гом исцеле́ние почерпа́ем у цельбоно́снаго твоего́ гро́ба/ и не и́мамы в забве́ние приложи́ти твои́х чуде́с мно́жество, преподо́бне,/ а́ще бо и язы́к мой теле́сный умолчи́т,/ но чудеса́ твоя́ свиде́тельствуют, преподо́бне блаже́нне,/ честна́я же сия́ оби́тель пропове́дует нам и хва́лится тобо́ю,/ са́ми бо, зря́ще честну́ю ра́ку моще́й твои́х и чудеса́ быва́ема,/ прославля́ем тя, о́тче преподо́бне,/ Христа́ Бо́га моли́ о душа́х на́ших.

Кано́н Богоро́дицы на 6, глас 8: Во́ду проше́д: и преподо́бному два кано́на на 8. Кано́н преподо́бнаго, его́же краегране́сие сицево́: Ефре́ма похвали́ти ра́зума, Бо́же мой, да́руй ми. Глас 6.

Пе́снь 1

Ирмо́с: Помо́щник и Покрови́тель/ бы́сть мне во спасе́ние,/ Сей мой Бог,/ и просла́влю Его́,/ Бог отца́ моего́,/ и вознесу́ Его́,/ сла́вно бо просла́вися.

Бо́же, Спа́се мой,/ отве́рзи ми устне́ и язы́к мой уясни́,/ я́ко да воспою́ па́мять преподо́бнаго Твоего́,/ его́же на земли́ удиви́л еси́ славосло́вити Тя,/ сла́вно бо просла́вися.

Па́мять твоя́, преподо́бне, пребыва́ет в род и род,/ сию́ почита́юще и Боже́ственныя твоея́ сла́вы насыща́ющеся,/ досто́йно Бо́жия дарова́ния, де́тели, тебе́ воздае́м,/ Го́сподеви пою́ще, сла́вно бо просла́вися.

К Боже́ственней ра́це твое́й, веселя́щеся, приближа́емся/ и хва́лим Боже́ственный твой зрак, и́же в Вы́шних поко́ищех пребыва́ет,/ Го́сподеви пою́ще, сла́вно бо просла́вися.

Богоро́дичен: Окова́нных Свободи́теля, Богоро́дице,/ и те́мных Просвети́теля чре́во Твое́ пресвято́е вмести́,/ Его́же рождество́м и́дольския льсти́ свобо́ждшеся,/ и и́стинную Тя навыко́хом воспева́ти Бо́жию Ма́терь.

Други́й кано́н преподо́бному. Глас 4.

Пе́снь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Боже́ственными светлостьми́ озаря́емь, преподо́бне,/ о́блак разжени́ помышле́ния моего́,/ я́ко да узрю́ честна́го о́браза твоего́ подо́бие,/ и припа́даю к честне́й твое́й ра́це,/ и воспою́ мно́жество чуде́с твои́х,/ о Христе́ приле́жно пою́ще, преподо́бне.

Светоявле́ния духо́внаго испо́лнися храм от честны́я твоея́ ра́ки благоуха́ния,/ ты бо яви́ся мно́гим свети́ло, издале́ча сия́я и слове́сныя зари́ нам облиста́я,/ е́же зре́ти нам твою́ честну́ю ра́ку/ и Боже́ственнаго светоли́тия твоего́, уго́дниче Ефре́ме,/ да тя вси воспое́м.

С гове́нием притеце́м к светоно́сней и светоза́рней ра́це твое́й, преподо́бне,/ то́чит бо исцеле́ния ве́рою воспева́ющим.

Богоро́дичен: Па́че ума́ родила́ еси́, о Де́во,/ и по рождестве́ яви́ся де́вствующи,/ тем немо́лчными гла́сы – ра́дуйся – Тебе́, Влады́чице, ве́рою несумне́нною вопие́м, Чи́стая.

Пе́снь 3

Ирмо́с: Утверди́, Го́споди,/ на ка́мени за́поведей Твои́х/ подви́гшееся се́рдце мое́,/ я́ко Еди́н Свят еси́ и Госпо́дь.

Па́мять твоя́ пребыва́ет в век ве́ка, свя́те,/ кре́пость се́рдца твоего́, в род и род,/ ти уподобля́ющеся и Боже́ственныя твоея́ сла́вы насыща́ющеся,/ досто́йно тя воспева́ем.

Вод от исто́чника ева́нгельскаго пив досто́йно,/ от чре́ва ны́не ре́ки чуде́с источа́еши/ и напая́еши ве́рою притека́ющия ти.

Кре́пкую с высоты́ по́мощь и просвеще́ние посли́ ра́зума,/ я́ко ра́вно тя А́нгелом похва́лим, преподо́бне Ефре́ме,/ ты бо исто́чник чудесе́м бы́сть.

Богоро́дичен: Свет Боже́ственный из чре́ва Твоего́ возсия́, ве́рныя благоуха́я,/ Сего́ благово́ния получи́вше,/ омраче́ния свободи́хомся Тобо́ю, Богоро́дице Пречи́стая.

Ин

Ирмо́с: Твоя́ песносло́вцы, Богоро́дице,/ Живы́й и Незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Просвеще́ние де́тели твоея́ Боже́ственныя, каса́яся земны́х,/ к па́мяти возво́дит жела́ние,/ приводя́ от тли в жи́знь неконе́чную.

Благоуго́дно пожи́в, пусты́ню, я́ко град, сотвори́л еси́,/ богоподо́бный душеполе́зный исто́чник исцеле́ния пролива́я/ ве́рою покланя́ющимся ра́це моще́й твои́х.

Исцеле́ний ре́ки источа́еши мно́гими чудесы́,/ страсте́й тле́нных очища́еши,/ ра́дующеся, ве́рою похваля́ем твоя́ мо́щи, преподо́бне.

Богоро́дичен: Прему́дрость и Сло́во О́тчее Ро́ждшая несказа́нно,/ души́ моея́ лю́тую я́зву исцели́/ и се́рдца боле́знь утоли́.

Седа́лен, глас 4.

Подо́бен: Вознесы́йся:

Приспе́ пра́здник све́тлаго твоего́ торжества́, блаже́нне Ефре́ме,/ просвеща́я всех, пра́зднующих па́мять твою́, све́тло./ Блиста́нием Боже́ственнаго све́та, преподо́бне о́тче, при́сно озаря́емь,/ ве́сь светови́ден был еси́,/ мно́гими укра́шен от Бо́га дарова́ньми,/ во оби́тели дости́гл еси́ Небе́сныя,/ в ни́хже мо́лишися о и́же ве́рою пою́щих тя/ и Христа́ непреста́нно сла́вящих.

Сла́ва, и ны́не, Богоро́дичен:

И́же на Престо́ле херуви́мстем седя́й, в не́дрех О́тчих водворя́емь,/ я́ко на престо́ле святе́м Свое́м, седи́т, Влады́чице, в не́дрех Твои́х./ Бог бо вои́стинну воцари́ся над все́ми язы́ки,/ и разу́мно пое́м Ему́,/ Его́же моли́ спасти́ся рабо́м Твои́м.

Пе́снь 4

Ирмо́с: Услы́ша проро́к прише́ствие Твое́, Го́споди, и убоя́ся,/ я́ко хо́щеши от Де́вы роди́тися/ и челове́ком яви́тися, и глаго́лаше:/ услы́шах слух Твой и убоя́хся;/ сла́ва си́ле Твое́й, Го́споди.

Чудеса́, и́хже Влады́кою сподо́блен бы́сть, преподо́бне, зря́ще,/ приходя́щии к ра́це твое́й, духо́вный сла́дости насыща́емся,/ предста́теля тя иму́ще ко Влады́це,/ и свобо́ду прича́стия Боже́ственнаго улучи́ти мо́лимся, пою́ще:/ си́ле Твое́й сла́ва, Человеколю́бче.

Восприи́м житие́, и́же на Небесе́х пребыва́ние,/ со А́нгелы лику́еши,/ я́ко, оста́вив зе́млю и оте́чество свое́,/ пресели́лся еси́ та́мо су́щему пребыва́нию.

Облиста́л еси́, я́ко невече́рнее со́лнце,/ град Торже́к просвеща́я, преподо́бне Ефре́ме,/ тьмы́ изба́ви страсте́й, и́же на нас наве́туемых,/ возста́ви от враг непреткнове́нным бы́ти,/ тем пое́м твою́ святу́ю па́мять.

Богоро́дичен: Чре́во деви́ческое но́сит Своего́ Созда́теля,/ еде́мская две́рь отверза́ется,/ а́бие ве́рных со́нми дерзнове́нно вхо́дят,/ и́стинную Богоро́дицу ве́рно восхваля́ют, Рожде́нному от Нея́ зову́ще:/ си́ле Твое́й сла́ва, Человеколю́бче.

Ин

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Све́том благода́ти озаря́емь, преподо́бне,/ ве́рою па́мять твою́ торжеству́ющих просвети́/ и тьмы́ грехо́вныя изба́ви, те́мже пое́м:/ сла́ва си́ле Твое́й, Го́споди.

Ра́ка твоя́, преподо́бне, пу́ть зело́ жела́емых благ показа́ся,/ от мног бо лет забве́нию тя преложе́на, не извеща́еми о твое́м преставле́нии,/ те́мже тя, блаже́нне, и́же обрето́хом честны́й твой пра́здник,/ от мно́гих чуде́с прославля́ем, пою́ще:/ сла́ва си́ле Твое́й, Го́споди.

Коле́блеми страстьми́ разли́чными,/ ве́рою к тебе́ притека́ем, преподо́бне Ефре́ме, к ра́це моще́й твои́х,/ святы́ми твои́ми хода́тайствы вся ны́не посети́, моли́ся Го́сподеви.

Богоро́дичен: Тя, очище́ние всем земны́м, ве́рою моля́щим,/ припа́дая, Благослове́нная, молю́:/ моли́твами Твои́ми Судию́ и Сы́на Твоего́ сотвори́ ми́лостива,/ я́ко да по до́лгу Тя сла́влю.

Пе́снь 5

Ирмо́с: Мир мног лю́бящим Тя, Христе́,/ и но́щь просвеще́ния в пи́щи слове́с Твои́х,/ сего́ ра́ди, от но́щи у́тренююще,/ про́сим ми́лости от Тебе́, Человеколю́бче.

Пра́зднующим све́тло честну́ю па́мять твою́, преподо́бне Ефре́ме,/ и чту́щим честны́я мо́щи твоя́,/ мир испроси́, усо́бныя же ра́ти укроти́, мо́лимтися, преподо́бне,/ боле́зни на́ша уврачу́й моли́твами твои́ми.

Мо́лниями чуде́с твои́х, преподо́бне всебога́те Ефре́ме,/ це́рковь твою́ озари́, град Торже́к и лю́ди бо в нем осия́й,/ пра́зднующия любо́вию па́мять твою́.

Преблаже́нне преподо́бне Ефре́ме, моли́ся приле́жно,/ отгна́ти от оби́тели сей належа́щую ско́рбь на́шу и премину́ти,/ и грехо́м проще́ние испроси́, и язы́ческое преще́ние и о́блак разгна́ти,/ да тя, преподо́бне, велича́ем.

Богоро́дичен: Пра́дедняя кля́тва разреши́ся/ и прама́терняя боле́знь исцели́ся, Пречи́стая, чре́ва Твоего́ рождество́м,/ без се́мене бо заче́нши Сло́во, родила́ еси́,/ Ему́же приле́жно моли́ся спасти́ся нам.

Ин

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Бо́жиим хране́нием блюдо́мо/ во святе́м сем хра́ме всечестно́е те́ло твое́, преподо́бне Ефре́ме,/ мно́гими ле́ты яви́ся невреди́мо,/ ве́рных се́рдца веселя́ще.

Гроб честна́го твоего́ телесе́ просвеща́ет ве́рою приходя́щих к ра́це твое́й,/ и подае́т душа́м благослове́ние,/ и телесе́м исцеле́ние, оби́льно излива́я, то́чит,/ и вся́кия стра́сти тьму́ отгоня́ет.

Христа́ да похва́лим, вси ве́рнии,/ такова́ преподо́бнаго да́вшаго,/ пречестно́е удобре́ние, и гра́ду на́шему и оби́тели сей просвеще́ние,/ и сла́вной Це́ркви украше́ние.

Богоро́дичен: О Ма́ти Бо́жия, души́ моея́ зло́бу исцели́,/ ро́ждшая Преблага́го Сло́ва,/ сего́ ра́ди вся во́инства Небе́сная ублажа́ют Тя.

Пе́снь 6

Ирмо́с: Возопи́х всем се́рдцем мои́м/ к Ще́дрому Бо́гу,/ и услы́ша мя/ от а́да преиспо́дняго,/ и возведе́/ от тли живо́т мой.

Честна́я твоя́ ра́ка, преподо́бне,/ возжже́нием свещи́ в Торже́к собира́ющихся просвеща́ет:/ гряди́те, вои́стинну просвеща́емся, ве́рнии.

Гра́ду наше́ствие тече́т,/ провосхища́я прири́нувших на честну́ю твою́ па́мять, преподо́бне,/ по гла́су Ева́нгелия, я́коже рече́ Госпо́дь:/ прииди́те ко Мне, вси тружда́ющиися и обремене́ннии,/ я́ко кро́ток е́смь и смире́н се́рдцем,/ и обря́щете поко́й душа́м ва́шим.

Я́коже неистекомый исто́чник, источа́еши исцеле́ний ре́ки от честны́я своея́ ра́ки,/ подае́ши врачева́ние страсте́м неисце́льным,/ слепы́м дае́ши свет, и глухи́м слы́шание,/ и хромы́м хожде́ние, разсла́бленным здра́вие/ и всем благода́ть излива́еши, я́ко ми́ро на главе́, сходя́щее на браду́ Ааро́ню,/ ра́дости же свещу́ возжига́я у цельбоно́снаго гро́ба своего́, о́тче Ефре́ме.

Богоро́дичен: Искони́ проро́чествия о Тебе́ прореко́шася,/ ны́не же на Тебе́ испо́лнися, Пречи́стая:/ ов бо Тя руно́ пронарече́, на него́ сни́де Сло́во Бо́жие,/ ны́не же Ты Де́вою род́и Го́спода.

Ин

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Богоразу́мием све́тло пра́зднуют твою́ святу́ю па́мять,/ име́юще ве́ру к тебе́ в души́ свое́й,/ и у́мно крася́т мо́щи твоя́ стека́ющияся к их похвале́нию/ празднолю́бцы и свяще́ннейший учи́тели.

Тобо́ю освяти́л е́сть Госпо́дь град Торже́к и оби́тель твою́ просвети́л./ От цельбоно́снаго гро́ба твоего́, венцено́сче преподо́бне Ефре́ме,/ сте́кшеся в па́мять твою́, исцеле́ние прие́млем твои́ми моли́твами.

Лику́ют чи́нове а́нгельстии на Небесе́х,/ и, ве́рных со́нмища, на земли́ па́мять твою́ почита́ем, преподо́бне Ефре́ме,/ любо́вию припа́дающе к моще́м твои́м,/ и про́сим отпуще́ние грехо́м и неду́жным исцеле́ние.

Богоро́дичен: Глаго́лы, Отрокови́це Всенепоро́чная, Боже́ственнаго Гаврии́ла я́ко услы́ша,/ зачала́ еси́ в безсе́меннем чре́ве Твое́м/ и па́че сло́ва Бо́га породила́ еси́.

Конда́к, глас 8.

Подо́бен: Взбра́нной:

Светоза́рную лучу́ похва́лим, преподо́бне,/ твою́ честну́ю ра́ку,/ многосве́тлою свеще́ю просвеща́ет бо Госпо́дь це́рковь твою́ от цельбоно́снаго гро́ба твоего́/ и озаря́ет омраче́нная на́ша се́рдца./ Я́коже со́лнце незаходи́мое, о́тче,/ подо́бие о́браза твоего́ возсия́ нам,/ и град Торже́к тобо́ю благода́ть прие́млет,/ обогаща́ющу ти всех нас добро́тою чуде́с,/ соде́янием благода́ти пою́щих ти: аллилу́ия.

И́кос:

Пе́сньми похва́лим преподо́бнаго Ефре́ма,/ и с благоче́стием притеце́м к ра́це моще́й его́,/ и почерпа́ем дарова́ния я́ко от исто́чника исцеле́ния,/ и ра́достию возвесели́мся, усе́рдно обстоя́ще,/ светоно́сными пе́сньми просла́вим, глаго́люще:/ ра́дуйся, я́ко, Бо́гом наставля́емь, в сие́ ме́сто дости́гл еси́;/ ра́дуйся, я́ко пречестны́й храм страстоте́рпцем воздви́гл еси́,/ в не́мже тобо́ю Бог прославля́ется;/ ра́дуйся, я́ко оби́тель свою́ просвеща́еши чудесы́ свои́ми и учени́к мно́жества собра́л еси́;/ ра́дуйся, и́ноком смире́нию высото́;/ ра́дуйся, свети́льниче многосве́тлый;/ ра́дуйся, гра́ду Торжку́ утвержде́ние и оби́тели сей похвало́;/ ра́дуйся, облиста́в на гора́х, я́ко со́лнце;/ ра́дуйся, гра́ды и се́ла просвеща́я чудесы́;/ ра́дуйся, страны́ озаря́я добро́тами;/ ра́дуйся, гра́ду на́шему тве́рдое основа́ние;/ ра́дуйся, стране́ на́шей побе́дный ве́нче;/ ра́дуйся, свети́ло пресве́тлое, о́тче преподо́бне Ефре́ме.

Пе́снь 7

Ирмо́с: Неизрече́нное чу́до:/ в пещи́ Изба́вивый преподо́бныя о́троки из пла́мене/ во Гро́бе мертв, бездыха́нен полага́ется/ во спасе́ние нас, пою́щих:/ Изба́вителю Бо́же,/ благослове́н еси́.

Благода́тию Бо́жиею нетле́нны сохранены́ бы́ша честны́я мо́щи твоя́, преподо́бне Ефре́ме,/ разли́чная исцеле́ния источа́ют ве́рою чту́щим па́мять твою́./ Те́мже вопие́м, ве́рнии:/ благослове́н Бог оте́ц на́ших.

Призыва́ющих и́мя твое́ во вся́ком ме́сте, преподо́бне,/ изба́ви от вся́каго зла и лю́тых нахожде́ний,/ да не одоле́ет нас сме́рть лю́тая, вопию́щих:/ благослове́н Бог оте́ц на́ших.

Манове́нием Боже́ственным исцеле́ния подаю́т разли́чная мо́щи твоя́, преподо́бне,/ соде́йствует бо Дух Святы́й косте́м твои́м,/ исцеля́я во стра́се Бо́жий пою́щих:/ благослове́н Бог оте́ц на́ших.

Богоро́дичен: Две́рь Тя затворе́нную нарече́ проро́к, Чи́стая,/ е́юже никто́же про́йде, то́кмо Бог Еди́н,/ отверза́ющий еде́мския вхо́ды ве́рно сла́вящим Тя.

Ин

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Пресла́вными указа́нии, всебога́те, чуде́с/ всех ду́ши, притека́ющих к твоему́ цельбоно́сному гро́бу, ты просвеща́еши,/ благода́тию Вседержи́телевою просвети́ ве́рных се́рдца,/ почита́ющих святу́ю па́мять твою́, вопию́щих:/ благослове́н Бог оте́ц на́ших.

Цельбы́ источа́ет пресла́вно ра́ка твоя́, о́тче Ефре́ме,/ прири́щущим  боле́зни уставля́ющи,/ е́йже покланя́ющеся, пое́м житие́ твое́ и Боже́ственныя по́двиги,/ Ефре́ме блаже́нне, свети́льниче и́ночествующим.

Изба́ви нас, преподо́бне, твои́ми моли́твами/ всех собла́зн змии́ных сете́й,/ исцели́ на́ша лю́тыя неду́ги/ ко Влады́це мольба́ми твои́ми.

Богоро́дичен: Ми́лостиваго ро́ждши Го́спода, еди́на Богоблагода́тная,/ десни́цею Его́, Чи́стая, поми́ловати мя моли́ся,/ и́же всегда́ лю́те совраща́ема жите́йскими печа́льми.

Пе́снь 8

Ирмо́с: За зако́ны оте́ческия/ блаже́ннии в Вавило́не ю́ноши предбе́дствующе,/ царю́ющаго оплева́ша повеле́ние безу́мное/ и, совоку́плени, и́мже не свари́шася огне́м,/ Держа́вствующему досто́йную воспева́ху пе́снь:/ Го́спода по́йте, дела́,/ и превозноси́те во вся ве́ки.

Све́том Боже́ственным и благоуха́нием цвету́щи,/ свяще́нная па́мять твоя́, преподо́бне Ефре́ме,/ просвеща́ет ве́рных, созыва́ющи вопи́ти:/ Го́спода по́йте, дела́, и превозноси́те Его́ во ве́ки.

Жела́емыя сы́тости Боже́ственная твоя́ ча́да напо́лнишася, прося́ще,/ благоукраше́нною твое́ю па́мятию прохлажда́еми,/ и, веселя́щеся, ве́рно пою́т пресла́вную па́мять твою́, преподо́бне, взыва́юще:/ Го́спода воспева́йте, дела́, и превозноси́те Его́ во ве́ки.

Весе́лие приснотеку́щее твоя́ ра́ка то́чит, о́тче Ефре́ме сла́вне,/ приходя́щих очища́ет скве́рны плотски́я, вку́пе и душе́вныя,/ благода́тию всех Царя́ и Бо́га на́шего, пою́щих:/ Го́спода воспева́йте, дела́, и превозноси́те Его́ во ве́ки.

Богоро́дичен: Неоску́дныя пото́ки милосе́рдия источа́ющи/ призыва́ющим Тя, Влады́чице, и пе́сньми хва́лящим Тя, Пречи́стая,/ не оста́ви моля́щихся, Ца́рствию Сы́на Твоего́ сподо́би пою́щих:/ Го́спода воспева́йте, дела́, и превозноси́те Его́ во ве́ки.

Ин

Ирмо́с: О́троки благочести́выя в пещи́/ Рождество́ Богоро́дичо спасло́ е́сть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Тя град Торже́к име́я сокро́вище многоце́нное,/ ра́дуется, я́ко ма́ти о ча́дех,/ ви́дя непрепла́ваемую пучи́ну твои́х чуде́с,/ всяк бо, всеобра́зным обдержи́м неду́гом, к твоему́ гро́бу прири́ща,/ ско́рое здра́вие прие́млет/ и Бо́га сла́вит, тебе́ просла́вльшаго.

То́чиши, я́ко исто́чник, чудеса́ исцеле́ний, преподо́бне, приходя́щим к моще́м твои́м,/ Бо́гу бо, о́тче, угоди́л еси́,/ и́же у́бо в Того́ ве́ровавшим от чре́ва та́йныя ре́ки то́чиши Бо́жиею благода́тию, пою́щим:/ Го́спода по́йте и превозноси́те Его́ во ве́ки.

Ра́ка, иде́же лежи́т честно́е те́ло твое́, преподо́бне о́тче Ефре́ме,/ я́ко светоза́рная звезда́, в це́ркви возсия́/ и просвеща́ет ве́рою приходя́щия на честну́ю твою́ па́мять и с тобо́ю пою́щия:/ благослови́те, вся дела́ Госпо́дня, Го́спода.

Богоро́дичен: Вод мя испо́лни Боже́ственных, Я́же Исто́чник поро́ждшая,/ изба́ви мя зно́я грехо́внаго и к животу́ наста́ви,/ две́ре Боже́ственнаго Све́та, пою́ща:/ Го́спода по́йте и превозноси́те Его́ во ве́ки.

Пе́снь 9

Ирмо́с: Стра́нствия Влады́чня/ и Безсме́ртныя Трапе́зы/ на Го́рнем ме́сте высо́кими умы́,/ ве́рнии, прииди́те, наслади́мся,/ возше́дша Сло́ва,/ от Сло́ва научи́вшеся, Его́же велича́ем.

Све́тлое торжество́, се па́мять свяще́нна,/ се благода́ть соше́дшимся ве́рно, оби́льно целова́ние точа́щим,/ присту́пим, ве́рнии, источа́ет бо нам всечестна́я ра́ка блаже́ннаго Ефре́ма/ просвеще́ние приснотеку́щее безсме́ртия.

Вои́стинну ты, преподо́бне, богоизбра́н на прославле́ние святы́м страстоте́рпцем,/ це́рковь бо воздви́гл еси́ Бори́са и Гле́ба,/ в не́йже ты, блаже́нне, непреста́нно Бо́га сла́виши/ и по успе́нии свое́м чуде́с све́тлостию просвеща́еши у ра́ки моще́й твои́х.

Чудеса́ твори́ши мно́зи вои́стинну, преподо́бне, от цельбоно́снаго гро́ба твоего́/ и исцеле́ния безчи́сленная незави́стно подава́еши/ с те́плою ве́рою притека́ющим к честне́й ра́це твое́й,/ Ефре́ме преблаже́нне, соблюди́ град Торже́к и святу́ю оби́тель сию́.

Богоро́дичен: Дре́вним преступле́нием введе́ в па́губу пра́баба естества́ земна́го,/ рождества́ Твоего́ прижи́тием, Пречи́стая, па́ки Бо́гу примири́хомся,/ Его́же сла́вяще, Тебе́, Де́во, велича́ем.

Ин

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

От горя́щаго се́рдца жела́нием к тебе́, преподо́бне Ефре́ме, пе́снь ти принесо́х,/ ты же ми твою́ да́руй благода́ть, все исполня́я моего́ се́рдца жела́ние:/ от вся́каго неду́га изба́ви и искуше́ния/ и на Суде́ бу́дущем вселе́ние на еди́ном ме́сте и па́жить да́руй,/ чудесе́м исто́чниче, моли́твами твои́ми.

Ве́рою к тебе́ притека́ющим на честну́ю твою́ па́мять, преподо́бне Ефре́ме,/ ты обрета́ешися и́стинный те́плый засту́пник,/ всю зло́бу разреша́я и проше́ния исполня́я,/ Бог бо прославля́ет тя, блаже́нне, я́ко при́снаго Своего́ раба́,/ челове́ки же страсте́й и озлобле́ния, Ефре́ме, спаса́еши.

Вся се́рдца моего́ скрижа́ли распросте́р/ и вся написа́х мно́гия твоя́ благода́ти чуде́с де́йства,/ и́же бо не бе на мне досто́йна, ничто́же не име́х принести́ тебе́,/ ты бо, преподо́бне, подае́ши ми незави́стную благода́ть/ похвали́ти тебе́, преблаже́нне Богому́дре,/ сопле́тшу ми словеса́ похва́льная со усе́рдием,/ грехо́м разреше́ние прося́щу получи́ти.

Богоро́дичен: Свет, И́же от Све́та, возсия́ от чре́ва Твоего́, Ма́ти Присноде́во,/ и пре́лести тьму́ отгна́, и земны́я концы́ вся просвети́./ Те́мже ве́рою – ра́дуйся – зове́м Ти, Богоро́дице,/ преподо́бным похвало́.

Свети́лен:

Весели́теся, вси земни́и ро́ди, ра́дуйся, гра́де Торже́к,/ лику́йте, и́нок мно́жества, прииди́те, празднолю́бцы,/ я́ко да наслади́мся ны́нешняго торжества́,/ пе́сньми и хвала́ми почти́м ди́внаго и сла́внаго в чудесе́х преподо́бнаго Ефре́ма/ и любо́вно соверши́м па́мять его́, прося́ще:/ блаже́нне, помяни́ нас, хва́лящих твою́ па́мять.

Сла́ва, и ны́не, Богоро́дичен:

Ра́дуйся, ве́рным похвало́;/ ра́дуйся, преподо́бным утвержде́ние./ Ра́дуйся, пра́ведным сла́во;/ ра́дуйся, све́те су́щим во тьме́./ Ра́дуйся, хра́ме пресвяты́й;/ ра́дуйся, Бо́жий раю́./ Ра́дуйся, кля́твы разреше́ние, Благослове́нная Мари́е.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́вное чу́до:/ исто́чник чудодея́ний от гро́ба возсия́, –/ святы́я мо́щи твоя́, преподо́бне Ефре́ме./ Ра́дуйся, гра́де Торже́к,/ и весели́ся, честна́я оби́тель сия́,/ име́я в себе́ сокро́вище дарова́ний духо́вных,/ исто́чник исцеле́ний, спасе́ние ве́рным,/ чудотво́рныя мо́щи твоя́, преподо́бне./ О, прему́дрых суде́б Твои́х, Христе́,/ И́же такову́ю благода́ть дарова́вый Своему́ уго́днику,/ его́же моли́твами поми́луй нас.

Благода́ть Ду́ха Боже́ственнаго/ де́йствуется к моще́м твои́м ве́рою приходя́щим,/ тем благоуха́нное ми́ро чуде́с испуща́еши/ и разли́чным неду́гом исцеле́ние подава́еши:/ немы́м – глаго́лание, слепы́м – зре́ние,/ глухи́м – слы́шание./ Те́мже мы воспое́м, ве́рнии,/ прося́ще у Христа́ и глаго́люще:/ Го́споди, моли́твами преподо́бнаго Ефре́ма поми́луй нас.

Возсия́ дне́сь пресве́тлая па́мять твоя́,/ преподо́бне Ефре́ме,/ вои́стинну к похвале́нию./ Те́мже прииди́те, празднолю́бцы,/ я́ко да наслади́мся ны́нешняго торжества́./ Ду́ха Боже́ственнаго благода́тию со́брани,/ благоче́стию подража́тели,/ о Христе́ веселя́щеся,/ дне́сь восхва́лим преподо́бнаго Ефре́ма,/ церко́внаго свети́льника,/ за град Торже́к моле́бника/ и оби́тели сей утвержде́ние,/ хвала́ми и пе́сньми почти́м,/ мо́лим ти ся, блаже́нне,/ покры́й нас ми́лостию свое́ю,/ христолюби́вому во́инству побе́ды дая́/ и на враги́ одоле́ние/ и ве́рным лю́дем грехо́м оставле́ние,/ всем, притека́ющим к моще́м твои́м,/ за ны, свя́те, моли́ся.

Я́ко звезда́ пресве́тла,/ всем ве́рным возсия́ честна́я ра́ка твоя́,/ преподо́бне Ефре́ме,/ в не́йже чудотво́рныя и многоцеле́бныя твоя́ мо́щи/ предложи́ нам, я́ко сне́дь сла́дку и всестро́йну,/ во исцеле́ние неду́жным и скорбя́щим во утеше́ние,/ прибе́жище тружда́ющимся,/ духово́м злым отгна́ние./ Прииди́те, вси ру́сстии наро́ди,/ к честны́м моще́м его́,/ и, разли́чная дарова́ния прие́млюще,/ того́ просла́вим и мо́лимся, вопию́ще:/ того́ моли́твами, Христе́ Бо́же, поми́луй нас.

Сла́ва, глас 6:

Неразуме́ющим, преподо́бне Ефре́ме,/ проразуми́ся благода́тию от Бо́га,/ не подоба́ше бо твои́х, блаже́нне, доброде́телей забве́нию преда́ти,/ а́ще бо и язы́к наш теле́сне умолчи́т,/ но чудоде́йствием Госпо́дь тя прославля́ет/ и вои́стинну исцеле́ния от твои́х моще́й прие́млют с ве́рою приходя́щии,/ и я́ко светоно́сна свети́льника, Влады́ка тя всем нам показу́ет./ Те́мже ра́дуйся и весели́ся, гра́де Торже́к,/ процве́тше в себе́ но́ваго свети́льника,/ я́коже со́лнце, страну́ на́шу просвеща́ющаго,/ красу́йся и лику́й, Це́рковь Бо́жия,/ и ра́дуйтеся, и́нок мно́жества,/ взыгра́йте, празднолю́бных собо́ри,/ пра́зднующе духо́вно пречестну́ю па́мять преблаже́ннаго Ефре́ма/ и прося́ще у Христа́ Бо́га его́ моли́твами/ поми́ловатися душа́м на́шим.

И ны́не, Богоро́дичен, глас 6:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.

Славосло́вие вели́кое и отпу́ст.

НА ЛИТУРГИ́И СЛУ́ЖБА ПРЕПОДО́БНИЧЕСКАЯ

Тропа́рь, глас 1:

Жела́нием духо́вным распали́вся/ и мяте́жи мирски́я отри́нув,/ к Бо́гу любо́вию приле́жно присовокупи́ся./ И Того́ вседу́шне взыску́я,/ во вну́треннюю пусты́ню отше́л еси́,/ при вода́х всели́ся,/ иде́же во слеза́х и труде́х пребыва́я многоле́тное вре́мя,/ в терпе́ниих мно́зех житие́ а́нгельское проходи́л еси́/ в наставле́нии Боже́ственнаго ра́зума/ и мно́жество мона́хов собра́л еси́, му́дре,/ и́хже, посеща́я не оста́ви,/ Варна́во преподо́бне, о́тче наш,/ Пресвяте́й Тро́ице моля́ся,/ от зол вся́ческих изба́вити и спасти́ ду́ши на́ша.

Конда́к, глас 8:

От ю́ности, преподо́бне, пло́ть твою́ в посте́х и моли́твах истончи́л еси́/ и, крест твой взем, усе́рдно после́довал еси́ Христу́,/ те́мже и к Вы́шним тече́ние ра́достно соверши́л еси́,/ иде́же со все́ми святы́ми предстои́ши./ И ны́не ста́до твое́ посеща́й, помина́я чту́щих всесвяту́ю па́мять твою́,/ да вси благода́рственно вопие́м ти:/ ра́дуйся, Богому́дре Варна́во, наста́вниче пусты́нный.

Моли́тва

О всеблаже́нне о́тче преподо́бне Варна́во, те́плый засту́пниче и помо́щниче с ве́рою призыва́ющим тя! Изба́ви нас моли́твами твои́ми ко Го́споду от вся́каго обстоя́ния бесо́вскаго. Изми́ нас, окая́нных рабо́в твои́х, о чудотво́рче Варна́во, от уст па́губнаго зми́я, зия́ющаго пожре́ти нас и свести́ во ад живы́х. Прости́ нас, о́тче, ели́ко согреши́хом ти, исто́ргни нас от греха́ и вся́кия напа́сти, приходя́щия грехо́в ра́ди на́ших. Пода́ждь душа́м на́шим утеше́ние, всади́ в се́рдца на́ша страх суда́ Бо́жия, изба́ви нас от враго́в на́ших ви́димых и неви́димых, тебе́ бо и́мамы те́пла моли́твенника и засту́пника, е́же в беда́х су́щия и в грехи́ впа́дшия. Ты бо яви́ся столп благоче́стия, воздержа́ния пра́вило, смиренному́дрия о́браз, целому́дрия наста́вник, убо́гим и сирота́м засту́пник и храни́тель прибега́ющим к тебе́. Кто у́бо по досто́инству мо́жет похвали́ти равноа́нгельное твое́ житие́ и кто мо́жет исчести́ твои́х трудо́в по́двиги и сле́зы ко Го́споду? Вои́стинну я́ко со́лнца светле́йши возсия́ твоя́ исправле́ния, ревни́тель бо бы́сть всем святы́м, преподо́бных и пра́ведных учи́тель духо́вный и всем, призыва́ющим тя, моли́твенник ко Пресвяте́й Тро́ице. Ты, я́ко ми́ра оста́вил еси́ и я́же в ми́ре, и нас приведи́ ко Го́споду моли́твами твои́ми, о́тче честне́йший, да и мы сподо́бимся ве́чных благи́х, и́хже наслажда́ешися: Небе́сныя сла́вы, жела́емаго Иису́са Христа́ и сладча́йшаго Влады́ки и Го́спода всех. Ему́же подоба́ет вся́кая сла́ва, че́сть и поклоне́ние, со Безнача́льным Его́ Отце́м и Пресвяты́м и Благи́м и Животворя́щим Его́ Ду́хом, ны́не, и при́сно, и во ве́ки веко́в. Ами́нь.