На Го́споди, воззва́х: стихи́ры, глас 8.

Подо́бен: О, пресла́внаго чудесе:

Cвет мона́шествующих, Висарио́не му́дре,/ ты доброде́тельными заря́ми/ и сия́нием благода́ти/ пусты́ни был еси́ я́ко свети́ло пресве́тло,/ страсте́й мглы и тьмы злолю́тых/ тя чту́щия те́пле избавля́яй/ и вся́кия ско́рби и напа́сти,/ ве́рно пою́щия/ твое́ Боже́ственное успе́ние.

Неизрече́нных по́двиг твои́х,/ ты Боже́ственною любо́вию,/ терпя́ стоя́ние посреде́ те́рния,/ показа́л еси́ страда́льцем ра́вно сопротивле́ние./ Го́рькаго мо́ря услажда́еши во́ды/ и ду́ши напоя́еши в жа́жди, прему́дре./ Прехо́диши вы́ше Ни́ловых быстри́н,/ творя́ немо́кренно, прехва́льне,/ на вода́х ше́ствие.

Тя, подо́бника Илии́ му́дрому/ вси ве́дуще я́ве, Висарио́не, восхваля́ем:/ ми́лостию Боже́ственною тебе́/ с Небесе́ одожди́л еси́ водны́я струи́,/ и дожде́вныя исто́чники, и ро́су Боже́ственную,/ твои́ми честны́ми моли́твами подае́ши уже́ свы́ше,/ о́тче преблаже́нне, всем ве́рным/ благода́ть же и си́лу/ и покро́в необори́м.

И́ны стихи́ры преподо́бнаго Иларио́на, глас 4.

Подо́бен: Дал еси́ зна́мение:

Житие́ нескве́рно,/ терпе́ние, и кро́тость,/ и любо́вь нелицеме́рну,/ воздержа́ние безме́рно,/ всено́щное стоя́ние,/ умиле́ние Боже́ственное,/ ве́ру и наде́жду и́стинну/ с ми́лованием, о́тче, стяжа́в,/ я́ко А́нгел, пожи́л еси́ на земли́ с те́лом,/ Иларио́не блаже́нне,/ моли́твенниче о душа́х на́ших.

Земны́й А́нгел/ и Небе́сный челове́к был еси́, преподо́бне,/ исто́чник умиле́ния,/ ми́лования струя́,/ пучи́на чуде́с,/ гре́шников испору́чник,/ ма́слина вои́стинну Бо́жия плодови́та,/ еле́ем трудо́в твои́х/ умаща́я ли́ца, Иларио́не чу́дне,/ ве́рно восхваля́ющих тя.

Ум твой, сия́я/ Боже́ственными разуме́нии,/ теле́сных превы́ше страсте́й был еси́,/ несме́шен до́льними,/ нося́ начерта́ния/ и изобража́я в себе́ Боже́ственную добро́ту,/ и познава́емь, весь светови́ден/ де́йством Ду́ха, Иларио́не, о́тче наш,/ мона́шествующих украше́ние.

Слава, и ны́не, пра́здника или́ Богоро́дичен:

Ра́дуйся, солнцезра́чная луче́,/ Со́лнца незаходи́маго престо́ле,/ Я́же Со́лнце возсия́вши недоуме́нное./ Ра́дуйся, у́ме, облиста́яй Боже́ственными сия́ньми,/ заре́ мо́лнийная, освети́вшая земли́ концы́,/ и́стинное зла́та блиста́ние,/ вседо́брая и Пренепоро́чная,/ Свет невече́рний ве́рным облиста́вши.

Крестобогоро́дичен:

Распина́ема Христа́ Человеколю́бца/ ви́дяши, Пречи́стая,/ и ре́бра ископава́ема копие́м,/ пла́чущи, вопия́ше:/ что сие́, Сы́не Мой?/ Что Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне, Твоему́ во́льному распя́тию.

Тропа́рь, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.

Кано́н свята́го Висарио́на. Творе́ние Ио́сифово, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Пое́т Бо́гу Це́рковь, лику́ющи в па́мяти твое́й днесь,/ Богодохнове́нне Висарио́не,/ и ве́рою сла́вит вели́кия, о́тче, по́двиги твоя́.

Раб Бо́гу я́влься, порабо́тил еси́ душе́вными си́лами стра́сти теле́сныя/ и свобо́дь вся́кия зло́бы яви́лся еси́, о́тче всечу́дне.

Украси́вся добро́тами по́двиг твои́х,/ сосу́д яви́лся еси́ благопотре́бен Боже́ственнаго Ду́ха,/ Того́ де́йствия вмеща́ющ, Висарио́не блаже́нне.

Богоро́дичен: Душ льстец мя привлече́ в поги́бельный ров,/ но мне простри́ держа́вную Твою́ ру́ку/ и ско́ро, Богоро́дице, к све́ту возведи́.

Ин кано́н преподо́бнаго Иларио́на, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Во свет невеще́ственный и разу́мный/ от тьмы су́щих веще́й востеки́й, Иларио́не преподо́бне,/ моли́твами твои́ми к Бо́гу мя просвети́.

От младе́нства ссав доброде́тель,/ воздержа́ния боле́зньми и по́ты по́стными в му́жа дости́гл еси́/ и в ме́ру духо́вную во́зраста Христо́ва.

Страсте́й пучи́ну преше́д и треволне́ния де́монов избе́г,/ во приста́нище устреми́лся еси́ немо́кренно безстра́стия, о́тче преподо́бне.

Богоро́дичен: Сло́во без ма́тере из Отца́,/ без отца́ Сего́ напосле́док богому́жно родила́ еси́,/ еди́на Богома́ти,/ я́ко превы́шши всея́ тва́ри.

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Возше́л еси́ на высоту безстра́стия, вшел еси́ во мрак Боговиде́ния,/ прия́л еси́ в се́рдцы твое́м Боже́ственный зако́н,/ и́мже укре́плься, свети́льник пресве́тел мона́шествующих, преподо́бне, был еси́.

Плодови́тая ма́слина, в дому́ Боже́ственнем я́ве насажде́н, яви́лся еси́, о́тче,/ еле́ем подвиго́в твои́х умасти́ на́ша ли́ца,/ восхваля́ющих твоя́, Висарио́не преподо́бне, чудеса́.

Нестяжа́тельно пожи́в, блаже́нне, житие́, пти́цам подо́бно, о́тче,/ кри́лы же облича́емь безстра́стия, Вы́шния дости́гл еси́ оби́тели, ра́дуяся,/ сего́ ра́ди ве́рою тя ублажа́ем.

Богоро́дичен: Ле́ностно живо́т мой изжи́в и страстьми́ се́рдце оскверни́в,/ приступа́ю к Тебе́, Влады́чице, умиле́нием души́/ и молю́ся уще́дрити и спасти́ мя, покая́ния о́бразы мя утве́рждши.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Попали́л еси́ у́глем воздержа́ния, преподо́бне, страсте́й те́рние/ и прохлажда́еши ве́рных мудрова́ния.

Стре́лы изощре́ны доброде́тели стяжа́в ду́хом,/ я́ко си́лен, уязви́л еси́ се́рдце лю́таго ратобо́рца.

Ору́жием воздержа́ния и моли́твою, я́ко броня́ми, преподо́бне, вооружи́вся,/ враго́в неви́димых победи́л еси́ полки́.

Богоро́дичен: Ми́лостиву бы́ти ми, Тя молю́,/ Твои́ми, Влады́чице, дерзнове́ньми, из Тебе́ ро́ждшемуся,/ в День Су́дный.

Конда́к Иларио́на, глас 2.

Подо́бен: Тве́рдыя:

Огра́ды живоно́сныя твоея́ па́жити, па́стырски невреди́мо ста́до соблю́л еси́/ и яви́лся еси́ высото́ю дел вели́к, но́вый Иларио́не,/ по благоче́стии мно́ги му́ки и ско́рби прие́мь:/ тем во всера́достный живо́т всели́лся Го́рняго Сио́на,/ моли́ за ны, преподо́бне.

Седа́лен Висарио́на, глас 1.

Подо́бен: Гроб Твой:

Воздержа́ния огне́м попали́в стра́сти,/ свеща́ светла́ безстра́стия яви́лся еси́,/ тьму душ на́ших отгоня́щи благода́тию./ Темже днесь светоно́сную твою́ па́мять пра́зднуем весе́лием се́рдца,/ Висарио́не, о́тче наш.

Сла́ва, Иларио́на, глас 4.

Подо́бен: Ско́ро предвари́:

Бо́гу освяти́л еси́ твою́ жизнь, всеблаже́нне,/ быв изря́ден священноде́йственник вои́стинну Христо́в, свяще́нниче./ Те́мже по мно́гих по́тех и боле́знех,/ ра́дуяся, в невеще́ственная преста́вился еси́ селе́ния./ И ны́не источа́еши нам струи́ исцеле́ний.

И ны́не, пра́здника или Богоро́дичен:

Де́во Всенепоро́чная, Я́же Пресу́щнаго Бо́га ро́ждшая,/ со Безпло́тными Того́ непреста́нно моли́/ оставле́ние прегреше́ний и исправле́ние жития́ да́ти нам пре́жде конца́,/ ве́рою и любо́вию пою́щим Тя по до́лгу, еди́на Всепе́тая.

Крестобогоро́дичен:

Де́во Пренепоро́чная, Ма́ти Христа́ Бо́га,/ ору́жие про́йде Твою́ пресвяту́ю ду́шу,/ егда́ распина́ема ви́дела еси́ во́лею Сы́на и Бо́га Твоего́./ Его́же, Благослове́нная, моля́щи не преста́й/ проще́ние прегреше́ний нам дарова́ти.

Песнь 4

Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.

Ка́пли исцеле́ний прия́л еси́ от пучи́ны благода́тей,/ отсю́ду преложи́л еси́ воду морску́ю моли́твою твое́ю, му́дре, на сла́дость,/ исцеля́я ученику́ твоему́ жа́жду, досточу́дне.

Ника́коже да́же до ста́рости оскуде́л еси́, в житии́, Богому́дре о́тче,/ в пусты́нях и гора́х заблужда́я хоте́нием, ища́й Бо́га,/ светлостьми́ па́че у́мных чуде́с тя просве́щша.

Был еси́ смире́н и охужде́н, возноси́мь безстра́стием./ Те́мже разрази́л еси́ возноше́ния де́монов,/ свети́льник мона́шествующих, о́тче, быв,/ благоче́стно ве́рою восхваля́ющих тя.

Богоро́дичен: Стра́сти души́ моея́ исцели́,/ возраста́ющия ми преокая́нно, по́мысл просвети́,/ дале́че отгоня́щи тьму, Чи́стая, де́монов, оскорбля́ющих мя/ и всегда́ се́ти де́лающих ми.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Насажде́н быв при вода́х воздержа́ния, о́тче блаже́нне,/ лоза́ яви́лся еси́ благора́слена,/ благоче́стия гро́здие предлага́ющая.

Весь Боже́ствен быв и духоно́сен,/ весь изше́л еси́ к Бо́гу, Иларио́не всеблаже́нне,/ те́мже со А́нгелы лику́еши при́сно.

На ка́мени ве́ры поста́вил еси́ стопы́ се́рдца твоего́/ и непоколеби́мь пре́был еси́,/ прило́г де́монских не ужаса́яся.

Богоро́дичен: Херуви́м превы́шшую Тя и Серафи́м пое́м, Пречи́стая:/ Его́же бо трепе́щут,/ носи́ла еси́ пло́тию Бо́га на́шего на руку́ Твое́ю.

Песнь 5

Ирмо́с: Просвеще́ние во тьме лежа́щих,/ спасе́ние отчая́нных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.

Просвеще́ние, все́льшееся, преблаже́нне, Уте́шителя внутрь души́ твоея́,/ веду́щую к Ца́рству показа́ стезю́,/ в не́йже ше́ствуя, де́монов ловле́ния и помраче́ния душе́внаго уклони́лся еси́.

Нов я́влься Иису́с, Богоно́се,/ со́лнца тече́ние уста́вил еси́ мольбо́ю светосия́нною,/ Боже́ственными словесы́ украша́емь, блаже́нне, и чуде́с заре́ю просвеща́емь,/ и Бо́жиими чудесы́ мно́гими удобря́емь.

В кни́зе живо́тней написа́лся еси́ досто́йно,/ напи́санная вся сконча́в в Боже́ственных кни́гах./ Те́мже вопию́ ти:/ рукописа́ние, о́тче, зол мои́х твои́ми расто́ргни ко Всеви́дцу Бо́гу мольба́ми.

Богоро́дичен: Стопа́м после́дуя, собо́р преподо́бных, из чре́ва Твоего́ Возсия́вшему/ неизрече́нным рождество́м, Де́во Ма́ти,/ с Небе́сными ли́ки сочта́ся,/ с ни́миже моли́ся и испроси́ нам очище́ние, чту́щим Тя.

Ин

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́ ино́го не ве́мы.

О́ко серде́чное неусы́пно в Боже́ственных за́поведех/ соблю́л еси́ незазо́рно, сла́вне.

На го́ру доброде́телей воздержа́нием, Богоно́се,/ де́тельно восте́кл еси́ к Боговиде́нию восхожде́ния.

Еле́й расточи́в ни́щим,/ от се́рдца, Иларио́не преподо́бне,/ бога́тство Небе́сное поче́рпл еси́.

Богоро́дичен: Сло́ва ковче́г Тя показа́, Богоро́дице, зако́на Госпо́дь,/ во́ньже несказа́нно всели́ся.

Песнь 6

Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гла́се хвале́ния/ и́стины же ду́хом пожру́ Тебе́.

Не оскуде́л еси́, мно́гим приближа́яся подвиго́м:/ ноще́й бо, преподо́бне, и дней четы́редесять пребы́л еси́ стоя́,/ непреклоне́н ну́ждными ну́ждами естества́.

Умертви́в твоя́ у́ды, я́же на земли́, чу́дне,/ живы́м де́йством исцеле́ния обогати́лся еси́ и живе́ши на Небесе́х,/ умерщвля́ющих всегда́ душ на́ших стра́сти исцеля́я.

Житие́ твое́, рыда́я, при́сно сконча́л еси́:/ жела́ние бо Боже́ственное тя, о́тче, внутрь распали́./ И ны́не на Небесе́х обре́л еси́ утеше́ние,/ с преподо́бными ли́ки совокупля́яся.

Богоро́дичен: Госпо́дь из Тебе́ пло́тию ражда́ется,/ всех Госпожу́ Тя тва́рей соде́лав,/ Его́же моли́, Чи́стая, облада́ющаго изба́вит врага́ ду́ши на́ша.

Ин

Ирмо́с: Очи́сти мя, Спа́се,/ мно́га бо беззако́ния моя́,/ низ глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Мы́сленнаго Голиа́фа, зло́бою вознося́щагося безору́жным твои́м сплете́нием,/ ве́рно пра́щею уби́л еси́/ и сего́, исто́рг победи́тельная ору́жия, я́ко вельми́ хва́лящася, посе́кл еси́.

Вели́кому в доброде́телех поревнова́л еси́ Иларио́ну/ и, сего́ духо́вно стопа́м возсле́дуя,/ воздержа́нием, преподо́бне, верхо́вен яви́лся еси́ и ста́ду воображе́ние.

По́ты в оздержа́тельными у́глие стрел врага́ погаси́л еси́ до конца́/ и, о́гнь ве́ры вжег,/ попали́л еси́ неве́рия ерети́ческая шата́ния.

Богоро́дичен: Зачала́ еси́ вои́стинну Бо́жия Сло́ва во утро́бе Твое́й/ и Сего́ па́че естества́, Всенепоро́чная, родила́ еси́./ Его́же моли́твами умоли́ о и́же вои́стинну Богоро́дицу воспева́ющих Тя.

Конда́к Висарио́на, глас 2.

Подо́бен: Тве́рдыя:

Вы́шних сил подража́в, преподо́бне,/ о́бразом птиц житие́ пожи́л еси́,/ вре́менная в забы́тии положи́в,/ непреста́нным жела́нием влеко́м к Небе́сным добро́там Христа́ Царя́,/ до́ндеже Того́ дости́гл еси́, Висарио́не,/ моли́ непреста́нно о всех нас.

Песнь 7

Ирмо́с: Те́лу злато́му прему́дрыя де́ти не послужи́ша,/ и в пла́мень са́ми поидо́ша,/ и бо́ги их обруга́ша,/ среди́ пла́мене возопи́ша, и ороси́ я А́нгел:/ услы́шася уже́ уст ва́ших моли́тва.

Обнови́в ду́шу воздержа́ния благочести́вым, о́тче, ра́лом,/ клас многопло́ден возде́лал еси́, в жи́тницах соблюда́емь Небе́сных,/ и пита́еши ве́рно воспева́ющия:/ благослове́н еси́, Го́споди, Бо́же оте́ц на́ших.

Све́ту сраствори́вся невеще́ственному, чист свет был еси́/ и быстрину́ речну́ю преше́л еси́, омочи́в ника́коже стопы́ твоя́:/ по стезя́м же пра́вым, Богому́дре Висарио́не, ходи́л еси́,/ греха́ му́тныя изсуши́в во́ды.

О, чу́до стра́шно!/ Ка́ко непива́емыя иногда́ во́ды пие́мы сотвори́л еси́ Боже́ственным назна́менанием/ и речну́ю быстрину́ преше́л еси́,/ тече́ние же удержа́л еси́ со́лнечное, Висарио́не Богому́дре,/ богозна́мении свяще́нными велича́емь.

Богоро́дичен: Му́дрость Бо́жия Ипоста́сная из Тебе́, Чи́стая, роди́ся,/ и злове́рныя мудрецы́ потреби́,/ и умудри́ мно́жество мона́шествующих и преподо́бных воспева́ти благода́тию:/ Благослове́нная, Я́же Бо́га пло́тию ро́ждшая.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отцев Бо́же, благослове́н еси́.

В зла́це Вы́шняго Ца́рства ста́до, о́тче, воспита́л еси́/ и, жезло́м уче́ний зве́ри отгна́в ерети́ческия, пел еси́:/ оте́ц на́ших Бо́же, благослове́н еси́.

Чуде́с зарю́ просте́р, разоря́еши неду́гующих мглу/ и здра́вия лучи́ подае́ши днесь и цельбы́ зову́щим:/ оте́ц на́ших Бо́же, благослове́н еси́.

В Вы́шнюю вшел еси́ бра́чную трапе́зу Царя́ Христа́,/ во оде́жду оде́ян, досто́йно зову́щему./ Тем и возле́гл еси́, вопия́:/ оте́ц на́ших Бо́же, благослове́н еси́.

Богоро́дичен: Па́че естества́ и сло́ва Влады́ку всех родила́ еси́/ и пита́еши от сосцу́ Твое́ю всем во бла́го вре́мя гото́вящаго трапе́зу./ Его́же приле́жно, Пречи́стая, о нас моли́.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки.

Свет тебе́ возсия́ я́ве, я́коже пра́веднику, и ра́дость, и весе́лие,/ я́ко пла́кавшу, о́тче, на земли́ приле́жно/ и стра́нну сея́ бы́вшу нестяжа́нием и вся́цем злострада́нием.

Весь отню́д сраствори́вся коне́чными жела́нии, преподо́бне о́тче,/ гра́ды же и пусты́ни во умиле́нии мно́зе прохожда́л еси́,/ до́ндеже митропо́лию дости́гл еси́ вы́шнюю, све́тло украша́емь.

У́тро возсия́л еси́ нам све́тлыми доброде́тели просвеще́нии,/ на́ша мы́сли просвеща́я при́сно./ Те́мже твою́ светоно́сную днесь, о́тче Висарио́не, соверша́ем па́мять.

Богоро́дичен: Но́ва родила́ еси́ Сы́на, Собезнача́льна, Чи́стая, Отцу́ Безнача́льному,/ и обнови́ла еси́ еди́на обетша́вшее на́ше естество́ лю́тыми преступле́нии,/ те́мже Тя согла́сно пое́м, Богоро́дице.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Сле́зными струя́ми страсте́й взыгра́ния и неуста́вныя по́мыслы потопи́л еси́/ и пучи́на был еси́ долготерпе́ния, преподо́бне, к тишине́ веды́й ти́хостней вопию́щия:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Я́коже терпели́ва адама́нта, воздержа́нию иму́ще твоя́ наказа́ния, Иларио́не преподо́бне,/ сердца́ утвержда́ем и страсте́й полки́ побежда́ем, язы́ком ве́рно вопию́ще:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Воздержа́нием, преподо́бне, пло́ти благостра́стие удержа́нием изнури́в, прему́дре,/ испо́лнил еси́ Ду́ха душе́вное де́йство/ и к безстра́стия стезя́м дости́гл еси́, зовы́й:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Богоро́дичен: Под кров, Влады́чице, святы́х крил Твои́х вси прибега́ем,/ озло́бленнии лю́тыми согреше́нии, и напа́стьми, и скорбьми́./ Тя бо Предста́тельницу иму́ще, вопие́м:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Кре́пости низложи́л еси́ льсти́ваго, кре́постию препоя́сан духо́вною,/ и яви́лся еси́ си́лен на стра́сти, преблаже́нне,/ сего́ ра́ди чуде́с благода́ти прие́м от Бо́га,/ ве́рным исцелева́еши неисце́льныя неду́ги.

Яви́ся твоя́ ве́лия сла́ва, я́же по Бо́зе, всей тва́ри,/ просвеща́я ве́рныя свяще́нными уподобле́нии непоро́чнаго твоего́ жития́, Богому́дре Висарио́не,/ вои́стинну мона́хов украше́ние и отце́в верхо́вниче.

Стеня́, пла́ча и се́туя, умиле́нием сле́зным кропя́ зе́млю при́сно,/ о́тче Богому́дре, соверша́л еси́,/ до́ндеже обре́л еси́ Боже́ственное утеше́ние,/ во гра́де Бо́жии со все́ми святы́ми, преподо́бне, всели́вся.

Процве́л еси́, о́тче, я́ко крин,/ доброде́тельными благово́нии на́ша облагово́нствуя ду́ши./ Те́мже сотворя́ем па́мять твою́,/ злосмра́дия согреше́ний про́сим изба́витися тебе́ ра́ди, Висарио́не,/ и вся́каго де́монскаго озлобле́ния.

Богоро́дичен: Умовре́дно согреша́я, неиспра́влен пребыва́ю, мно́гим нечу́вством объюро́дев./ Те́мже зову́ Ти, Влады́чице:/ в такове́й ну́жди су́ща посети́ мя ны́не/ и уврачу́й стра́сти смире́ннаго се́рдца моего́.

Ин

Ирмо́с: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ быст простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Исто́чника тя чуде́с я́ко вои́стинну Христо́с показа́, блаже́нне,/ боле́зненныя скве́рны очища́юща страсте́й и неду́гов боле́зни потопля́юща удо́бь./ Те́мже и реку́ тя душе́вных очище́ний нарица́ем вси, преблаже́нне.

Процве́т, я́ко фи́никс, духо́вно в дому́ Бо́жии, пресла́вне,/ плод прине́сл еси́ воздержа́ния, я́коже сла́дость,/ и́мже сердца́, прему́дре, наслади́л еси́ ста́да твоего́ слове́снаго./ Те́мже и венцы́ Небе́сныя сла́вы, о́тче, восприя́л еси́, приснопа́мятне.

Воздержа́ния показа́лся еси́, о́тче, пра́вило, и кро́тости яви́лся еси́ о́браз,/ и тих всем, Иларио́не, наста́вник,/ и мою́ мольба́ми ко Го́споду укроти́ бу́рю страсте́й/ и пода́ждь прося́щему глубо́кий мир,/ я́ко да досто́йно ублажа́ю тя.

Богоро́дичен: Тя ору́жие в беда́х и напа́стех, приста́нище и сте́ну в ско́рбех,/ и щит во бране́х и́мамы разу́мный,/ и вели́ко очисти́лище в лю́тых согреше́ниих и нахожде́ниих./ Тем Тя, Богоро́дицу, по до́лгу чтим/ и велича́ем Рождество́ Твое́.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: поста́вим стихо́в 8 и пое́м стихи́ры, глас 5.

Подо́бен: Ра́дуйся:

Ра́дуйся, свяще́нная главо́,/ о́тче Паи́сие Богому́дре,/ Бо́жия ра́зума и́стиною святи́мь/ плод благоуха́нен яви́лся еси́/ житие́м твои́м от ю́ности, преподо́бне:/ а́ще и челове́к естество́м был еси́,/ но а́нгельски на земли́ пожи́л еси́,/ страх Бо́жий возлюби́в/ и в за́поведех Его́ при́сно поуча́яся,/ тих же и уте́шителен словесы́ показа́вся,/ ми́лостив и кро́ток был еси́/ и ны́не ра́дости Го́спода твоего́ сподо́бился еси́,/ приле́жно моли́ся/ дарова́ти душа́м на́шим ве́лию ми́лость.

Ра́дуйся, преподо́бне о́тче Паи́сие,/ кра́снии твои́ но́зе/ до́блественне к ше́ствию напра́вил еси́,/ и пусты́ни дости́гл еси́,/ и храм во сла́ву Святы́я Богоро́дицы воздви́гл еси́,/ и мно́жество мона́хов собра́л еси́,/ и доброде́тельми ты́я просвети́л еси́,/ и всели́лся еси́, иде́же сия́ет Свет Невече́рний,/ иде́же предстоя́т А́нгелов чи́ни,/ с ни́ми же, преподо́бне,/ моли́ спасти́ся душа́м на́шим.

Ра́дуйся, преподо́бне Паи́сие,/ я́ко от Бо́жия А́нгела извеще́ние прия́л еси́,/ и́же мно́гим ко спасе́нию наста́вника тя нарече́./ Ты же, Богому́дре,/ сла́дкий глас от него́ слы́шав,/ на бо́льшее воздержа́ние подви́глся еси́/ и, до́бре тече́ние соверши́в,/ ко Христу́ восхожде́ния сподо́бился еси́./ Честны́я твоя́ мо́щи источа́ют исцеле́ния/ с ве́рою приходя́щим к тебе́, Паи́сие преподо́бне,/ моли́ Христа́ Бо́га/ дарова́ти нам ве́лию ми́лость.

Сла́ва, глас 8:

Кто изглаго́лет до́блести твоя́, Паи́сие преподо́бне?/ Ра́вно А́нгелом житие́ пожи́л еси́,/ воздержа́нием ум просвети́в,/ сле́зными тече́нии ду́шу очи́стил еси́,/ тем и ны́не укра́шен, предстои́ши со А́нгелы, ра́дуяся,/ и сугу́бым венце́м украси́лся еси́./ Приле́жно моли́ся, блаже́нне,/ прося́ ми́ра ми́рови/ и земли́ Ру́сстей утвержде́ния./ Мы же, собра́нная твоя́ ча́да,/ к честно́му гро́бу припа́дающе, с любо́вию, Паи́сие, вопие́м:/ сохрани́ ста́до твое́ моли́твами твои́ми.

И ны́не, Богоро́дичен.

Вход. Проки́мен дне и чте́ния 3 преподо́бническая ( зри 1 июня ).

На лити́и стихи́ры, глас 5:

Преподо́бне о́тче,/ от ю́ности име́я смиренному́дрие,/ кро́ток душе́ю и се́рдцем был еси́,/ возжеле́в отлучи́тися мирски́х наслажде́ний,/ теле́сныя стра́сти укроти́л еси́ поще́нием/ и к безстра́стия высоте́, о́тче, возше́л еси́,/ и, светода́тельными заря́ми просвеща́емь,/ источа́еши исцеле́ния и отгоня́еши ду́хи лука́выя/ от притека́ющих к тебе́ с ве́рою,/ тем па́мять твою́ почита́ем, досточу́дне.

Преподо́бне о́тче,/ в пусты́ни жи́тельствуя,/ Еди́ному Бо́гу себе́ возложи́л еси́:/ те́сным путе́м ше́ствовав,/ воздержа́нием плоть умертви́л еси́,/ ду́шу же безстра́стием украси́в,/ по́стником похвала́ был еси́, Паи́сие,/ неви́димаго врага́ победи́л еси́/ и был еси́ чи́сто прия́телище Боже́ственнаго Ду́ха./ Те́мже вопие́м ти:/ мир ми́рови испроси́/ и душа́м на́шим ве́лию ми́лость.

Преподо́бне о́тче,/ Боже́ственнаго Ду́ха благода́тию/ собра́л еси́ лик мона́шествующих,/ во́инствующих Христу́,/ с ни́ми же до́бре подвиза́вся,/ тече́ние соверши́л еси́ твои́х подвиго́в:/ неукло́нно к Небеси́ приводя́щею стезе́ю ше́ствовал еси́,/ и ны́не со А́нгелы лику́еши,/ предстоя́ Престо́лу Всецаря́./ Моли́ся, блаже́нне, о ста́де твое́м,/ е́же му́дре собра́л еси́,/ да сохране́но бу́дет твои́ми моли́твами.

Сла́ва, глас 6:

Прииди́те, празднолю́бцы,/ усе́рдно вси стеце́мся,/ ве́рно торжеству́ем честну́ю па́мять преди́внаго отца́,/ пе́сньми воспева́юще всечестное и равноа́нгельное житие́ его́:/ по святе́м бо его́ преставле́нии/ честны́я мо́щи подаю́т исцеле́ния тре́бующим./ К нему́ же возопии́м:/ ра́дуйся, преподо́бне Паи́сие,/ свети́льниче многосве́тлый,/ мона́шествующих спасе́ния хода́тай./ Я́ко име́я дерзнове́ние ко Христу́ Бо́гу,/ не преста́й моля́ся о чту́щих па́мять твою́.

И ны́не, Богоро́дичен:

Творе́ц и Изба́витель мой, Пречи́стая,/ Христо́с Госпо́дь,/ из Твои́х ложе́сн проше́д,/ в мя оболки́йся,/ пе́рвыя кля́твы Ада́ма свободи́:/ те́мже Ти, Всечи́стая,/ я́ко Бо́жии Ма́тери же и Де́ве,/ вои́стинну вопие́м немо́лчно:/ ра́дуйся, а́нгельски, ра́дуйся, Влады́чице,/ предста́тельство и покро́ве, и спа́сение душ на́ших.

На стихо́вне стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ Я́ко звезда́ от за́пада,/ Паи́сие, провозсия́л еси́/ и был еси́ пра́вило доброде́телей,/ мона́хов утвержде́ние, по́стников удобре́ние./ Те́мже, соше́дшеся в па́мять твою́,/ Христа́ возвели́чим,/ прославля́ющаго Своя́ уго́дники.

Стих: Честна́ пред Го́сподем/ смерть преподо́бных Его́.

О, пресла́внаго чудесе́!/ В после́дняя времена́,/ я́ко заря́, облиста́л еси́, Паи́сие,/ мона́х и́стинен был еси́,/ любве́ яви́лся еси́ испо́лнен/ и, я́ко А́нгел, на земли́ пожи́л еси́,/ подража́я Боже́ственным соверше́нством,/ тем па́мять твою́ почита́ем, досточу́дне.

Стих: Блаже́н муж, боя́йся Го́спода,/ в за́поведех Его́ восхо́щет зело́.

О, пресла́внаго чудесе́!/ Паи́сий ди́вный, креста́ си́лою вооружи́вся,/ я́ко кре́пкий во́ин,/ победи́ неви́димых враго́в ополче́ния/ и со А́нгелы ны́не водворя́ется./ Те́мже в па́мять его возопии́м:/ того́ моли́твами, Христе́ Бо́же,/ спаси́ ду́ши на́ша, я́ко Милосе́рд.

Сла́ва, глас 8:

Мона́хов мно́жества,/ наста́вника тя почита́ем, о́тче наш Паи́сие,/ твое́ю бо стезе́ю вои́стинну пра́во ходи́ти позна́хом:/ блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́ми же моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

Тропа́рь, глас 8:

Христо́вы ра́ди любве́ оте́чество и род оста́вил еси́,/ и, а́нгельскому житию́ поревнова́в,/ в пусты́ню всели́лся еси́,/ в не́йже многотру́дное житие́ яви́л еси́/ и чуде́с дарова́ния от Бо́га прия́л еси́,/ Паи́сие преподо́бне,/ моли́ Христа́ Бо́га спасти́ся душа́м на́шим.

Ин тропа́рь, глас то́йже:

Христо́вы ра́ди любве́ оте́чество и род оста́вил еси́/ и, а́нгельскому житию́ поревнова́в,/ духо́вному отцу́ твоему́ преподо́бному Мака́рию, подража́тель быв,/ гра́да У́глеча дости́гл еси́,/ и близ того́ при вода́х в пусты́ню, А́нгелом пока́занную, всели́лся еси́,/ и оби́тель прекра́сну Ма́тери Бо́жией воздви́гл еси́,/ и мно́жество мона́хов собра́л еси́,/ и́мже и наста́вник ко спасе́нию быв,/ и чуде́с дарова́ния от Бо́га прия́л еси́,/ Паи́сие преподо́бне,/ моли́ Христа́ Бо́га спасти́ся душа́м на́шим.

Ин тропа́рь, глас то́йже:

Слез твои́х тече́ньми пусты́ни безпло́дное возде́лал еси́/ и, иже из глубины́ воздыха́ньми, во сто трудо́в уплодоноси́л еси́,/ и был еси́ свети́льник вселе́нней, сия́я чудесы́, Паи́сие, о́тче наш,/ моли́ Христа́ Бо́га/ спасти́ся душа́м на́шим.

И ны́не, Богоро́дичен.

НА У́ТРЕНИ

На Бог Госпо́дь: тропа́рь, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 8:

Заре́ю Боже́ственнаго сия́ния просвети́вся,/ оста́вил еси́ ми́ра кра́сная вся/ и восприя́л еси́ со Безпло́тными житие́ духо́вное,/ Боже́ственными благода́тьми обогати́вся,/ отону́дуже исцеле́ний дар восприя́л еси́, тем вопие́м ти:/ моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Святе́йшую святы́х всех сил, честне́йшую всея́ тва́ри,/ Ма́терь Де́ву Отрокови́цу восхва́лим, ве́рнии:/ ра́дуйся, Я́же А́нгелов Творца́ во утро́бе носи́вши;/ ра́дуйся, па́дающих воздви́жение, Бо́га Сло́ва вопло́щши./ Ра́дуйся, Неве́сто Неневе́стная.

По 2-м стихосло́вии седа́лен, глас 2:

Стра́стныя тьмы отбе́г,/ безстра́стия путе́м ше́ствовал еси́,/ и к Све́ту Невече́рнему восте́кл еси́,/ от Него́же озари́вся, нетле́ния дар насле́довал еси́,/ моли́ непреста́нно о всех нас.

Сла́ва, и ны́не, Богоро́дичен:

Души́ моея́ ле́ность лю́тую и се́рдца моего́ пренеможе́ние,/ Ма́ти Бо́жия, ви́девши, исцели́ моли́твами Твои́ми/ и спасе́нных ча́сти сподо́би,/ избавля́ющи мя тьмы и муче́ния,/ я́ко Еди́на еси́ упова́ние мое́ и утеше́ние.

По полиеле́и седа́лен, глас 6:

Воздержа́нием мно́гим мудрова́ния пло́ти умертви́л еси́,/ ду́шу укра́сив оде́ждею безстра́стия,/ сле́зныя ка́пли с непреста́нною моли́твою совокупи́л еси́,/ преше́д умо́м ко И́стинному Рачи́телю,/ испроси́ нам ве́лию ми́лость.

Сла́ва, и ны́не, Богоро́дичен:

От се́рдца стена́ние и от утро́бы Ти приноша́ю,/ Твоего́, Пренепоро́чная, прося́ заступле́ния,/ поми́луй всестра́стную мою́ ду́шу,/ умилосе́рди многоми́лостиваго Бо́га/ изба́вити мя Суда́ и е́зера о́гненнаго, Еди́на Благослове́нная.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х:/ де́монския погуби́л еси́ полки́/ и а́нгельския дости́гл еси́ чи́ны,/ и́хже житию́ без поро́ка поревнова́л еси́,/ дерзнове́ние име́я ко Христу́ Бо́гу,/ мир испроси́ душа́м на́шим.

Кано́н Богоро́дицы на 6: Мно́гими содержи́мь напа́стьми:  и свята́го кано́н, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Наста́ви мя, Го́споди Бо́же,/ да восхвалю́ ра́достно уго́дника Твоего́ преподо́бнаго Паи́сия, сла́вя честно́е его́ торжество́.

Му́жески подвиза́вся и зарю́ духо́вную восприи́м,/ восше́л еси́ к высоте́ Небе́сней, преподо́бне,/ и ны́не со А́нгелы прославля́ешися.

Ору́жием Креста́ огражда́емь, преподо́бне,/ всю си́лу сопроти́внаго погуби́л еси́/ и до конца́ безве́стну сотвори́л еси́.

Богоро́дичен: Пресу́щное Сло́во плоть прии́м от честны́х крове́й Твои́х,/ всех нас от истле́ния изба́ви, Чи́стая,/ сего́ ра́ди Тя при́сно сла́вим.

Други́й кано́н свято́му, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Отве́рзи ми, Христе́, устне́ мои́,/ честны́я по́двиги уго́дника Твоего́ преподо́бнаго Паи́сия воспе́ти,/ да мо́литвами свои́ми о́блак разжене́т неве́дения моего́.

Блаже́нно житие́ на земли́ пожи́л еси́, преподо́бне,/ и Небе́снаго наслажде́ния дости́гл еси́, и ны́не со А́нгелы лику́еши.

Па́мять твоя́, Паи́сие преподо́бне, я́ко пресве́тлое со́лнце, возсия́,/ те́мже испроси́ нам от Бо́га благода́ть, и ми́лость,/ и согреше́ний избавле́ние.

Богоро́дичен: Благослове́н Плод, Пречи́стая, чре́ва Твоего́,/ И́мже, земни́и вси, кля́твы изба́вихомся, Благослове́нная, Всечи́стая,/ родила́ бо еси́ Спа́са душ на́ших.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Молча́нием язы́к обузда́л еси́/ и немяте́жным житие́м во пло́ти а́нгельски, о́тче, пожи́л еси́.

Вои́стинну благоче́стныя жи́зни сподо́бился еси́, преподо́бне,/ чистото́ю и поще́нием сию́ обре́т,/ и ны́не со Безпло́тными вопие́ши:/ несть свят, па́че Тебе́, Го́споди.

Трисия́нным све́том све́тло озари́лся еси́,/ и благода́ть Ду́ха Свята́го всели́ся в тя, преподо́бне,/ возлю́бльши чи́стую твою́ ду́шу./ Те́мже непреста́нно вопие́ши:/ несть свят, па́че Тебе́, Го́споди.

Богоро́дичен: Разуме́ти рождества́ Твоего́, Чи́стая,/ неизглаго́ланную глубину́ недоуме́ет ум челове́ч:/ Бог бо, всели́вся за милосе́рдие во утро́бе Твое́й,/ всего́ мя обнови́.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Кре́пкою Твое́ю моли́твою, о́тче,/ возше́л еси́ к преми́рному наслажде́нию/ и от честны́я ра́ки чуде́с сия́ния испуща́еши, Паи́сие.

Во святе́й па́мяти твое́й днесь соше́дшеся,/ воспева́ем твоя́ по́двиги, и боле́зни,/ и исправле́ния, о́тче Паи́сие.

Чу́дно житие́ твое́ яви́ся, преподо́бне:/ благода́тию Боже́ственнаго Ду́ха обложе́н,/ блаже́нную кончи́ну прия́л еси́, о́тче, ра́дуяся.

Богоро́дичен: От ложе́сн Твои́х, Пречи́стая,/ Пра́вды Со́лнце возсия́ и мир просвети́,/ Его́же Боже́ственными заря́ми и мене́ просвети́.

Ин конда́к, глас 8:

Укра́шен доброде́тельми, преподо́бне Паи́сие Богодухнове́нне,/ Це́ркве Христо́вы красота́ был еси́,/ по́двиги бо и́ноческими украси́ ю, блаже́нне./ Те́мже мо́лим тя:/ моли́ся ко Го́споду свободи́ти нас от вся́кия бра́ни бори́теля, вопию́щих ти:/ ра́дуйся, о́тче преблаже́нне.

Седа́лен, глас 4:

Мраз нощны́й претерпе́л еси́,/ и тяготу́ ва́ра дневна́го поне́сл еси́,/ и сих ра́ди ве́чное наслажде́ние и пи́щу присноживу́щую восприя́л еси́,/ Христо́в уго́дниче, блаже́нне Паи́сие, моли́ спасти́ся душа́м на́шим.

Ин седа́лен, глас 8:

Защи́титель сый Боже́ственных повеле́ний Влады́ки, сла́вне,/ чи́стым житие́м твои́м показа́лся еси́ ца́рское свяще́ние,/ ка́плями по́тов твои́х пре́лести лю́тое у́тлие погаси́л еси́/ и, в ти́хое приста́нище дости́г, зри́ши, блаже́нне, Его́же возжеле́л еси́./ Те́мже вопие́м ти:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и Еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии,/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Песнь 4

Ирмо́с: Христо́с моя си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Безме́рное смире́ние восприи́м,/ своя́ мы́сли зри́тельно очи́стил еси́,/ и ны́не в ра́йских селе́ниих, водворя́яся, вопие́ши:/ сла́ва си́ле Твое́й, Го́споди!

Сле́зными то́ки, преподо́бне, зе́млю се́рдца своего́ напои́л еси́,/ предстоя́ в моли́твах непоколеби́мь и Творцу́ всех взыва́я:/ сла́ва си́ле Твое́й, Го́споди!

Не забу́ди ста́до твое́, преподо́бне, е́же му́дре собра́л еси́/ и в жи́зни упа́сл еси́ благоче́стно./ Потщи́ся, о́тче наш Паи́сие, привлещи́ е во огра́ду Небе́сную.

Богоро́дичен: Чистоты́ селе́ние, жили́ще Влады́ки/ и проро́ков всех сбытие́, Богора́дованная,/ пою́щия Тя уще́дри.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

В простоте́ души́, я́ко А́нгел, пожи́в, блаже́нне,/ страсте́й разгна́л еси́ душетле́нную пре́лесть Боже́ственною благода́тию.

Че́стен сосу́д яви́лся еси́ Боже́ственнаго Ду́ха,/ нося́ в се́рдце твое́м, блаже́нне, Боже́ственныя арома́ты,/ услажда́я сердца́ ве́рно па́мять твою́ почита́ющих.

Пресве́тлым венце́м обложе́н,/ предстои́ши Престо́лу всех Царя́,/ моли́ся, преблаже́нне, о ве́рою пра́зднующих святу́ю па́мять твою́.

Богоро́дичен: Зако́ны в Тебе́ испраздни́шася естества́,/ па́че естества́ бо Сло́во родила́ еси́,/ те́мже Тя ве́рою молю́:/ па́че естества́ челове́ча, Всенепоро́чная,/ мно́го согреши́вша и Бо́га удали́вшася,/ обра́щшася спаси́ мя моли́твами Твои́ми.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Бо́дренными твои́ми бде́нии, блаже́нне,/ и ча́стыми воздыха́нии благода́ть Ду́ха возрасте́ в тебе́, преподо́бне о́тче,/ и сла́вна тя, Паи́сие, показа́.

Влады́чне смире́ние восприи́м, во́ду почерпа́л еси́/ и на ра́му свое́ю носи́ти изво́лил еси́,/ тем и трудополо́жна во всем себе́ показа́л еси́.

Преблаже́нне и Богоприя́тне о́тче наш Паи́сие,/ непреста́нно ста́до твое́ вопие́т ти:/ моли́твами твои́ми к Бо́гу, спаси́ нас, мо́лимся.

Богоро́дичен: По рождестве́ стра́шнем пребыла́ еси́ Де́вою, я́коже пре́жде:/ Бог бо бе рожде́йся, устроя́я вся во́лею,/ Безневе́стная Мари́е, Богоблагода́тная.

Ин

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́ ино́го не ве́мы.

Егда́ благода́тию Ду́ха смире́нную стяжа́л еси́ му́дрость,/ ражда́ющему смерть врагу́ глубоку́ я́зву нане́сл еси́/ и высокоу́мный того́ нрав до конца́ низложи́л еси́.

Возше́д ко оби́телем ве́чным,/ ли́ку преподо́бных причта́лся еси́, Паи́сие,/ с ни́миже нас помина́й, на земли́ тебе́ помина́ющих.

Да ублажи́тся досто́йно Паи́сий, поще́нием бо, и моли́твами, и слеза́ми Бо́гови соедини́ся/ и вся просвеща́ет дух духо́вною благода́тию.

Богоро́дичен: Ма́ти Де́во Отрокови́це,/ Я́же Необыменнаго Бо́га пло́тию ро́ждшая,/ А́нгелов сла́ва и де́монов я́зва, Богоневе́сто,/ мое́ се́рдце, у язви́вшееся грехо́м, цельбы́ Боже́ственныя сподо́би.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

По́двигом страда́ний твои́х, преблаже́нне,/ клас Боже́ственный доброде́телей возрасти́л еси́,/ от него́ же пита́еши благоче́стно восхваля́ющих тя,/ Паи́сие преподо́бне о́тче наш.

Кня́же проше́ние, о́тче, со тща́нием исполня́я,/ храм Богома́тере воздви́гл еси́,/ в не́мже пра́здничною ра́достию мона́хов мно́жества веселя́тся,/ па́мять твою́ прославля́юще.

Ка́плями по́тов твои́х, преподо́бне,/ враго́в ополче́ния попра́л еси́/ и дости́гл еси́ А́нгельския невеще́ственныя ли́ки.

Богоро́дичен: Всеблага́я Цари́це,/ Я́же Преблага́го ро́ждши,/ озло́бленное страстьми́ мое́ се́рдце очи́сти,/ да ве́рно любо́вию велича́ю Тя.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

На земли́ до́бре пожи́л еси́, преподо́бне,/ и святы́х све́тлости зре́ти и ве́чнаго блаже́нства наслажда́тися сподо́бился еси́.

Честна́ смерть яви́ся блаже́ннаго Паи́сия пред Тобо́ю, Бо́же вся́ческих,/ его́же врачевство́ безме́здно яви́л еси́ па́мять того́ почита́ющим.

Ду́ха благода́ть прия́л еси́, о́тче,/ неду́ги от челове́к прогоня́ти и вред де́монский истребля́ти,/ вели́кий уго́дник показа́вся Христа́ Бо́га на́шего.

Богоро́дичен: На́йде на Тя Вседе́тельный Дух, Всенепоро́чная,/ и Сло́во Бо́жие в Тя всели́ся/ и плоть бысть несказа́нно, пребы́в неизме́нен.

Конда́к, глас 2:

Чистото́ю душе́вною боже́ственно вооружи́вся/ и непреста́нныя моли́твы, я́ко копие́, имы́й,/ кре́пко ссекл еси́ бесо́вское ополче́ние,/ Паи́сие, о́тче наш,/ моли́ непреста́нно о всех нас.

И́кос:

Всеси́льное Ду́ха Свята́го де́йство бога́тно в тя всели́ся:/ Бо́жиим манове́нием иды́й к горе́,/ иде́же хоте́л еси́ оби́тель воздви́гнути,/ я́коже Небе́сный рай, благово́нными насажде́н цветы́,/ сию́ обре́т, всели́лся еси́,/ и храм Богома́тере чу́дне воздви́же,/ и мона́хов мно́жество собра́л еси́,/ и сих, доброде́тельными твои́ми дея́нии све́тло блиста́ющих, в воздержа́нии му́дростию соде́лал еси́./ И ны́не в па́мять твою́ соше́дшеся, вопие́м ти:/ моли́ о нас, Паи́сие преподо́бне, о́тче наш.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Боже о́тец на́ших.

Пучи́ною слез твои́х, пребога́те,/ злонача́льнаго зми́я потопи́л еси́,/ и я́ко победоно́сец изря́ден к Небе́сным возне́слся еси́, и непреста́нно вопие́ши:/ благослове́н еси́, Бо́же оте́ц на́ших.

Житие́ незло́биво имел еси́, непоро́чно,/ укра́шено по́ты страда́ния, прехва́льне,/ и Боже́ственнаго светоли́тия испо́лнь, взыва́л еси́:/ благослове́н еси́, Бо́же оте́ц на́ших.

Хва́лится, преподо́бне, град твой,/ я́ко венце́м ца́рским обложи́ся, име́я мо́щи твоя́ в себе́,/ я́ко до́браго граждани́на от Бо́га прия́л есть.

Богоро́дичен: Пресвята́я Де́во,/ Я́же Препе́таго Бо́га ро́ждшая,/ пою́щия Тя прича́стники покажи́ Све́та/ и изба́ви гее́нны, и огня́, и вся́каго вре́да вра́жия моли́твами Твои́ми.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цветнице, лику́юще, поя́ху:/ благослове́н еси́, Бо́же оте́ц на́ших.

К Све́ту Незаходи́мому возше́д, я́ко со́лнце, просвеща́еши вселе́нную,/ све́та бо дела́ соверши́л еси́, Паи́сие преподо́бне,/ и ны́не вопие́ши:/ оте́ц на́ших Бо́же, благослове́н еси́.

Плотска́я движе́ния, преподо́бне, воздержа́нием умертви́л еси́/ и доброде́телей просвеще́нием просия́л еси́, вопия́ Христу́:/ оте́ц на́ших Бо́же, благослове́н еси́.

Чу́дно житие́ твое́, преподо́бне, яви́ся:/ благода́тию Боже́ственнаго Ду́ха обложе́н,/ блаже́нную кончи́ну прия́л еси́, о Христе́ ра́дуяся,/ к Нему́же и взыва́л еси́:/ оте́ц на́ших Бо́же, благослове́н еси́.

Богоро́дичен: Ны́не вся испо́лнившася све́та Боже́ственнаго Тобо́ю, Пречи́стая,/ Ты бо Дверь яви́лася еси́,/ е́юже ми́ру Бог прии́де, просвеща́я ве́рою зову́щия:/ оте́ц на́ших Бо́же, благослове́н еси́.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Мудрова́ние плотско́е умертви́л еси́,/ че́сти и име́ния презре́л еси́,/ от земли́ к Небе́сным тща́ся и всех пе́ти науча́я:/ Го́спода по́йте и превозноси́те Его́ во вся ве́ки.

Се́рдца своего́ бразды́, о́тче Паи́сие, му́дре возде́лал еси́/ и сле́зными тече́нии сия́ напои́л еси́,/ благоуха́нно ми́ро прине́сл еси́ Христо́ви, Ему́же вопия́л еси́:/ Го́спода по́йте и превозноси́те Его́ во вся ве́ки.

Христо́ви принося́, блаже́нне, поще́ние, и сле́зы, и непоро́чну моли́тву,/ ри́зную же ле́поту и мя́гкия оде́жды власяны́ми ру́бы премени́л еси́,/ сим показуя́ глубоча́йшее смире́ние.

Богоро́дичен: Изба́вльшеся пе́рвыя кля́твы рождество́м Твои́м,/ Всеблаже́нная Отрокови́це Богора́дованная,/ Гаврии́лов Ти глас возсыла́ем:/ ра́дуйся, Вино́вная всех спасе́нию.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Боже́ственными добро́тами наслажда́яся,/ чуде́с сия́нии вся просвеща́еши/ и де́монскую тьму разоря́еши Бо́жиею благода́тию, поя́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Блиста́яся благода́тию Боже́ственнаго Ду́ха, преподо́бне Паи́сие,/ честно́е пра́зднующим твое́ успе́ние,/ святы́ми твои́ми моли́твами испроси́ грехо́в отпуще́ние, пою́щим:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Заря́ми, му́дре, по́двиг твои́х, я́ко со́лнце, возсия́л еси́,/ врачева́ния источа́еши и вся́ку боле́знь облегча́еши Христу́ вопию́щим:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Богоро́дичен: Я́ко разбо́йник, взыва́ю Ти:/ помяни́ мя, Человеколю́бче./ Пла́чу, я́ко блудни́ца, и вопию́:/ согреши́х, я́ко дре́вле блу́дный,/ ка́ющася приими́ мя, отча́яннаго, Богоро́дицы ра́ди, да усе́рдно вопию́:/ о́троцы, благослови́те, свяще́нницы, воспо́йте,/ лю́дие, превозноси́те Христа́ во ве́ки.

Песнь 9

Ирмо́с: Бо́га челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Ви́дети сла́ву Вседержи́теля жела́я,/ обнови́л еси́ души́ кре́пость/ и сла́вою обогати́лся еси́ Небе́сною.

Че́стно украси́вся благода́тию, о́тче преподо́бне Паи́сие,/ проси́ оте́честву на́шему во бране́х кре́пость и благоде́нствие,/ я́ко да непреста́нно тя велича́ем.

Чи́ни а́нгельстии тебе́ срето́ша,/ и пра́ведных собо́ри возвесели́шася,/ и от Вседе́тельныя десни́цы Влады́чни венча́лся еси́,/ те́мже тя досто́йно велича́ем.

Богоро́дичен: Све́том мя Твои́м, Благослове́нная в жена́х, просвети́, молю́ся,/ и огня́ ве́чнаго мя изба́ви,/ я́ко да сла́влю Тя,/ я́ко да по до́лгу воспою́ вели́чия Твоя́.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.

Ра́ка, иде́же лежи́т честно́е те́ло твое́,/ исто́чник содева́ет чуде́с,/ к нейже притека́юще, от вся́кия скве́рны и страсте́й избавля́емся.

Огне́м Бо́жия стра́ха ду́шу распали́л еси́/ и к Сия́нию невече́рнему восте́кл еси́./ И ны́не, блаже́нне, Трисо́лнечным Светом озаря́емь,/ моли́ся о спасе́нии душ на́ших.

Мирски́я сла́дости возненави́дев,/ му́жеским нра́вом к подвиго́м устреми́лся еси́/ и преподо́бным красота́ ле́потна был еси́,/ тем па́мять твою́ почита́ем, досточу́дне.

Богоро́дичен: Низложи́ вознесе́нныя и победи́ полки́ иноплеме́нных,/ Де́во Чи́стая, хотя́щия бра́нем,/ и Твоя́ рабы́ невре́дны от них сохрани́, Отрокови́це.

Свети́лен:

Многосве́тлый свети́льник, пусты́нное воспита́ние,/ чистоты́ сокро́вище, А́нгелом собесе́дниче,/ дом Ду́ха Пресвята́го, Паи́сие преподо́бне,/ непреста́нно моли́ся о ве́рою почита́ющих пречестну́ю па́мять твою́.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и но́сиши на святы́х Твои́х объя́тиих Боже́ственное Сло́во,/ Его́же пе́сньми досто́йно сла́вим.

На хвали́тех стихи́ры, глас 4.

Подо́бен: Я́ко до́бля:

От ю́ности прилепи́вся Влады́це всех,/ Сего́ возжеле́л еси́,/ кре́пко к подвиго́м му́жески устреми́лся еси́/ и обогати́лся еси́ Боже́ственною благода́тию,/ во е́же твори́ти ти исцеле́ния/ и чудоде́йствовати пресла́вная,/ и восше́ствие к Небеси́ обре́л еси́./ Те́мже, со А́нгелы лику́я,/ непреста́нно моли́ся о ста́де твое́м, Богоблаже́нне.

Со́лнца светле́йши/ свяще́нная па́мять твоя́ провозсия́,/ всеблаже́нне Паи́сие,/ пресве́тлыми светлостьми́ озаря́ющи вся,/ по́двиги твоя́ почита́ющия./ Не преста́й моля́ся, блаже́нне,/ Просла́вльшему святу́ю па́мять твою́/ и чуде́с сокро́вище тя су́щим в ми́ре/ Дарова́вшему, преподо́бне.

Мирски́я красоты́, блаже́нне,/ ра́дуяся, избе́гл еси́,/ предпоче́л же еси́ те́сный, и боле́зненный путь,/ и зело́ же́стокий/ и в слеза́х препроводи́л еси́ все житие́ твое́, преподо́бне./ Те́мже утеше́ния Боже́ственнаго и непреста́ннаго весе́лия/ ны́не наслажда́ешися, Паи́сие.

Сла́ва, глас 6:

Преподо́бне о́тче,/ измла́да в доброде́тели приле́жно подвиза́вся,/ сосу́д был еси́ Свята́го Ду́ха,/ тем и чуде́с дарова́ния прии́м,/ челове́ки научи́л еси́ презира́ти маловре́менная./ Ны́не же неизрече́нным све́том све́тло сия́я,/ просвети́ на́ша помышле́ния,/ о́тче преподо́бне Паи́сие.

И ны́не, Богоро́дичен.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную:

Моли́тва, ю́же творя́ше бра́тия Покро́вския оби́тели

О, преподо́бне отче наш Паи́сие! Не забу́ди у́бо нас, чад свои́х, Бо́гом дарова́нную ти па́ству, ю́же ты сам собра́л еси́. Без твоея́ бо по́мощи ничто́же мо́жем бла́го сотвори́ти, но, в дому́ пребыва́юще Пречи́стыя Богоро́дицы, во огра́де твое́й, наде́емся Бо́гу угоди́ти. О́тче святы́й, соблюди́ нас твои́ми моли́твами и заступи нас от находя́щих зол, да, твои́ми моли́твами соблюда́еми, Ца́рствия Небе́сного сподо́бимся о Христе́ Иису́се, Го́споде на́шем. Ему́же сла́ва со Отце́м и Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.

(Службу зри 29 января)

Тропа́рь, глас 4:

Святи́телю Це́ркви Великопе́рмстей,/ и́стинный храни́телю апо́стольских преда́ний,/ сто́лпе непоколеби́мый Правосла́вия,/ благоче́стия учи́телю,/ Ио́но святи́телю блаже́нне,/ Влады́ку всех моли́/ мир па́стве твое́й/ и всей Ру́сстей земли́ дарова́ти/ и всем нам спасти́ся.

Тропа́рь, глас 4:

А́нгельскому житию́ поревнова́в, блаже́нне Ио́но,/ оста́вил еси́ о́течество твое́, вели́кий Но́вград,/ и, прише́д в преде́лы Олоне́цкия/ и в пусты́ню всели́вся,/ в труде́х, моли́твах и слеза́х подвиза́лся еси́,/ и, я́ко му́дрый купе́ц, Ца́рствие Небе́сное насле́довал еси́./ Те́мже любо́вию вопие́м ти:/ моли́ Христа́ Бо́га,/ да спасе́т ду́ши на́ша.

Конда́к, глас 2:

Христо́вым стопа́м после́дователь быв, блаже́нне Ио́но,/ ра́дуяся, всели́лся еси́ в пусты́ню,/ Вы́шняго Про́мыслом наставля́емь,/ и, не убоя́вся вра́жиих прираже́ний,/ я́коже столп непоколеби́м,/ уготова́л еси́ себе́ в жили́ще Ду́ху Пресвято́му,/ мы же, па́мять твою́ соверша́юще, вопие́м ра́достно:/ ра́дуйся, я́ко озаря́еши нас чудесы́ твои́ми;/ ра́дуйся, я́ко оста́вил еси́ вре́менная ра́ди бу́дущих благ./ Ра́дуйся, я́ко возставля́еши лени́вых ко спасе́нию./ Моли́ у́бо Христа́ Бо́га, о́тче преподо́бне,/ да спасе́т ду́ши на́ша в День Су́дный.