Аллилуия или тропарь.

На Го́споди, воззва́х: а́ще пост, пое́м стихи́ры Богоро́дицы 3, глас 2, подо́бен: Егда́ от Дре́ва:

 И святаго 3, глас и подобен тойже:

Егда́ неразу́мия лед/ всю обдержа́ше тварь наве́ты вра́жиими/ и служи́мо бя́ше и́дольское мно́жество,/ тогда́, сла́внии му́ченицы, усе́рдным се́рдцем/ и теплото́ю Боже́ственныя ве́ры сие́ уста́висте,/ любо́вию пролива́ющее кровь/ за излия́вшаго Свою́ кровь на Кресте́ я́ве.

Егда́ манове́нием Боже́ственным/ к вышеесте́ственным подвиго́м отлучи́стеся,/ телесе́ тле́ющаго отве́ргшеся,/ тогда́, си́лою укрепля́еми Всеси́льнаго,/ огня́ не ужасо́стеся, ни меча́ посека́ющаго./ Те́мже, Бо́гу вы́и прекло́ньше, блаже́ннии,/ кончи́ну с ра́достию прия́сте.

Пео́н, до́блий страда́лец,/ Валериа́н, и Харито́н, и Хари́та с ним,/ и Боже́ственный Иусти́н, Еве́лпист и Иера́кс сла́вный,/ оде́жду от крове́й Боже́ственных обагри́вший,/ и, оде́явшеся вку́пе,/ Влады́це всех на Небесе́х со А́нгелы,/ Царю́ Христу́, предстоя́т.

И́ны стихи́ры Богоро́дицы, глас и подо́бен то́йже:

Ра́дуйся, солнцезра́чная звездо́,/ ра́дуйся, вино́вная всех до́брых, Пренепоро́чная;/ ра́дуйся, вмести́вшая Бо́га Невмести́маго,/ я́же клас прозя́бшая безсме́ртия;/ ра́дуйся, Боже́ственное носи́ло и две́ре всесве́тлая./ Ра́дуйся, кля́твы убие́ние прароди́тельныя на́шея, Отрокови́це,/ благи́х Хода́таица су́щи.

Всех скорбя́щих Ра́досте,/ и оби́димых Предста́тельнице,/ и убо́гих Пита́тельнице,/ стра́нных же утеше́ние и же́зле слепы́,/ немощны́ посеще́ние,/ тружда́ющихся покро́ве и Засту́пнице/ и си́рых Помо́щнице,/ Ма́ти Бо́га Вы́шняго/ Ты еси́, Пречи́стая,/ потщи́ся, мо́лимся, спасти́ся рабо́м Твои́м.

Покро́в и заступле́ние нам, христиа́ном, Ты еси́/ и прибе́жище держа́вно,/ Ма́ти Бо́га Вы́шняго./ Но и ны́не, я́ко при́сно, бо́дренною Твое́ю моли́твою/ не преста́й моля́ спасти́ рабы́ Твоя от обстоя́ний всех,/ я́ко Тя с Бо́гом и́мамы/ заступле́ние, вси христиа́не, и прибе́жище.

Сла́ва, и ны́не, Богоро́дичен:

Ино́го держа́внаго прибе́жища,/ и кре́пости столпа́, и стены́необори́мыя/ вои́стинну не стяжа́хом,/ ра́зве Тебе́, Пречи́стая,/ к Тебе́прибега́ем и Тебе́вопие́м:/ Влады́чице, помози́, да не поги́бнем,/ покажи́ Твою́ благода́ть на ны, и кре́пости сла́ву,/ и милосе́рдия Твоего́ вели́чество.

Крестобогоро́дичен:

Дре́ву Кре́стному Тя, Иису́се,/ пригвожде́на зря́щи Неискусобра́чная,/ пла́чущи, глаго́лаше:/ Ча́до сла́дкое,/ почто́ оста́вил еси́ Мене́, ро́ждшую Тя, еди́ну,/ Све́те непристу́пный Пребезнача́льнаго Отца́?/ Потщи́ся и просла́вися,/ я́ко да сла́ву получа́т Боже́ственную/ и́же Боже́ственныя стра́сти Твоя́ сла́вящий.

На стихо́вне Окто́иха.

Тропа́рь, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Кано́н, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петский,/ я́ко просла́вися.

Му́ченическими укра́шени светлостьми́,/ чи́стому предстоите́, му́ченицы, Престо́лу Влады́ки всех,/ на́ших согреше́ний разреше́ние подаю́ще.

Благочести́вии и́стины побо́рницы,/ пред мучи́тельским суди́щем подви́гшеся единому́дренно,/ низложи́ша пре́лесть диа́волю си́лою духо́вною.

Ра́нами, и я́звами, и скорбьми́/ благозва́ннии искупи́ша великому́ченицы Христо́во Ца́рство,/ в не́мже венцено́сцы ны́не живу́т.

Богоро́дичен: Ущедря́я Твои́х рук созда́ние, в ми́лости бога́тый,/ во утро́бу всели́лся еси́ Неискусому́жныя Де́вы/ и Сию́ Предста́тельницу нам показа́л еси́.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Утвержде́ние Христа́ в се́рдцы твое́м нося́,/ му́жески сопроти́вился еси́, Иусти́не, истяза́ющему,/ беззако́нновати пребеззако́нно тебе́веля́щему.

Лик богосия́нен, во́инство богоизбра́нное святы́х му́ченик,/ святы́й собо́р собра́вся ны́не, победи́ враги́ безпло́тныя с те́лом.

Те́ло ра́нам веледу́шнии преда́вше, ра́довахуся,/ прозря́ще ве́чное наслажде́ние, и бу́дущую сла́ву, и све́тлость.

Богоро́дичен: Облаки души́ моея́ разори́,/ Со́лнца сла́вы ле́гкий о́блаче,/ и ум мой све́том наста́ви, почерне́нием зло́бы омраче́нный.

Седа́лен, глас 5.

Подо́бен: Собезнача́льное Сло́во:

Иусти́н и Харито́н, Пео́н, Еве́лпист,/ Хари́та, и Иера́кс, и Валериа́н, свети́льницы све́тлии,/ озаря́ющии концы́ земны́я луча́ми подвиго́в свои́х,/ велегла́сно да восхва́лятся ве́рою, Христу́ моля́щеся спасти́ся нам.

Сла́ва, и ны́не, Богоро́дичен:

Те́плая Предста́тельнице и непобеди́мая, упова́ние изве́стное и непосты́дное,/ стено́, и покро́ве, и приста́нище прибега́ющим к Тебе́, Присноде́во Чи́стая,/ Сы́на Твоего́ и Бо́га моли́ со А́нгелы/ умире́ние да́ти ми́рови, и спасе́ние, и ве́лию ми́лость.

Крестобогоро́дичен:

На Кресте́ зря́щи Тя, Христе́, Ма́ти Твоя́,/ во́лею посреде́ разбо́йнику ви́сяща,/ растерза́ющися утро́бою ма́терски, глаго́лаше:/ безгре́шный Сы́не, ка́ко непра́ведно на Кресте́, я́коже злоде́й, пригвожде́н еси́,/ челове́ческий род хотя́ оживи́ти, я́ко Благоутро́бен?

Песнь 4

Ирмо́с: Услые́шах, Го́споди,/ слух Твоего́смотре́ния/ и просла́вих Тя,/ Еди́не Человеколю́бче.

Иусти́на, и Харито́на, и Хари́ты,/ и Пео́на страда́нием А́нгельстии чи́нове удиви́шася.

Сокруша́ема телеса́ ра́нами/ Боже́ственное исхода́тайствоваша до́блим блаже́нство.

Я́коже мы́сленное у́глие, Боже́ственным огне́м попали́сте лесть/ и свети́ла ми́ра, му́ченицы, яви́стеся.

Еве́лписта, Иера́кса, непрекло́нных му́ченик му́жеству/ тьмы кня́зи убоя́шася.

Богоро́дичен: Я́же огнь Божества́ во утро́бе, Де́во, прие́мшая,/ огня́ мя изба́ви и му́ки.

Песнь 5

Ирмо́с: Све́та Пода́телю/ и веко́в Тво́рче, Го́спода/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Ду́ха Боже́ственнаго испо́лнився,/ лука́вствия лю́тыя ду́хи тече́нии крове́й твои́х, му́чениче Иусти́не,/ удави́л еси́, блаже́нне, пострада́в кре́пко.

Благода́ти тезоимени́тая, благода́ти Бо́жия испо́лнена бысть,/ и, же́нскую забы́вши я́ве не́мощь,/ пострада́ зако́нно, и сла́ву получи́.

Облагода́тив ду́шу испове́дании свяще́нными,/ притупи́л еси́ ве́тхаго врага́ зло́бу, Харито́не страда́льне,/ Боже́ственных страстоте́рпец честно́е удобре́ние.

Богоро́дичен: Я́же Спа́са Христа́, уподо́бльшася земны́м, ро́ждшая,/ премно́жеством бога́тства милосе́рдия,/ Того́, я́ко Бо́га, Чи́стая, моли́ спасти́ рабы́ Твоя́.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Иусти́на и Харито́на, Пео́на и Валериа́на,/ Хари́ты же, и Иера́кса, и Еве́лписта/ вси пресве́тлую па́мять просла́вим.

Безво́лненно муче́ния пучи́ну Боже́ственным правле́нием проидо́сте, му́ченицы,/ и ко приста́нищу благоути́шному Христо́ва Ца́рства доидо́сте.

Я́коже неле́стныя зве́зды, сия́юще Це́ркви честны́м утвержде́нием,/ вселе́нную всю светосия́нием страда́ния просвеща́ете.

Богоро́дичен: Безме́рнаго окамене́ния изба́ви мя,/ одержи́маго мно́гими согреше́нии, Богороди́тельнице Влады́чице,/ и гее́нскому огню́ подлежа́щаго.

Кондак, глас 2:

Прему́дростию Боже́ственных твои́х слове́с, Иусти́не,/ Це́рковь Бо́жия вся украси́вшися,/ жития́ твоего́ све́тлостию мир освеща́ет,/ излия́ния же ра́ди кро́ве вене́ц прие́м/ и со А́нгелы предстоя́ Христу́,/ моли́ непреста́нно о всех нас.

Песнь 7

Ирмо́с: Те́лу злато́му прему́дрыя де́ти не послужи́ша,/ и в пла́мень са́ми поидо́ша, и бо́ги их обруга́ша,/ среди́ пла́мене возопи́ша, и ороси́ я А́нгел:/ услы́шася уже́ уст ва́ших моли́тва.

Пре́лести глубину́ крове́й реко́ю изсуши́сте, то́ки чуде́с источи́сте,/ угаша́юще у́глие, му́ченицы, лю́тых страсте́й вопию́щим всегда́:/ благослове́н Бог оте́ц на́ших.

Божества́ огне́м любве́, му́дрии, вещь зло́бы доблему́дренно попали́сте/ и, я́ко огнесия́нни, возсия́вше, всех вопию́щих сердца́ благоче́стно просвети́сте:/ благослове́н Бог оте́ц на́ших.

Му́дростию Бо́жиею Иусти́н му́дрый укра́шен,/ е́ллинское обуи́ мудрова́ние благода́тию,/ уве́рив покланя́тися Тро́ице и правосла́вно зва́ти:/ благослове́н Бог оте́ц на́ших.

Богоро́дичен: Де́во Честна́я, Неискусобра́чная, Чи́стая, Благослове́нная,/ низпа́дающих исправле́ние, согреша́ющих проще́ние,/ спаси́ мя, блу́днаго, спаси́ Сы́ну Твоему́ зову́ща:/ благослове́н Бог оте́ц на́ших.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки.

Я́коже в пещи́ о́гненней, в му́ках терпели́вно искуси́вшеся, страстоте́рпцы Госпо́дни,/ па́че зла́та вои́стинну боже́ственно облиста́сте, вопию́ще:/ Христа́ превозно́сим во вся ве́ки.

Со Иусти́ном му́дрым да воспое́тся Хари́та, и Харито́н,/ и Пео́н, и Иера́кс вели́кий, с Валериа́ном,/ страда́нием лесть отгна́вшии и А́нгельским лико́м совоку́пльшиися.

К ве́чней жи́зни ведо́ми, му́дрии,/ доблему́дренно вы́и мечу́ единомы́слием души́ вси преклони́сте, му́ченицы,/ я́ко же́ртвы, Бо́гу приве́дшеся.

Богоро́дичен: Живота́ су́щи исто́чник, я́ко во́ду жи́зни поро́ждши,/ ду́шу мою́, иста́явшую грехо́вным пла́менем, Де́во Богоро́дице, напо́й,/ да Тя сла́влю во вся ве́ки.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Боже́ственною сия́юще сла́вою,/ сту́день пре́лести разруши́сте, до́блии страда́льцы,/ и о́бщницы бы́сте свяще́нных страсте́й плоть прии́мшаго нас ра́ди,/ с Ним ве́чно на Небесе́х ра́дуетеся.

Иусти́нове му́дрости, и Хари́ты му́жеству, и Харито́нове де́рзости вои́стинну,/ Пео́ны же и Иера́кса до́блим подвиго́м/ и Валериа́на к лю́тым мно́гому терпе́чнию и А́нгели чуди́шася.

Я́коже на колесни́цу Боже́ственную все́дше сла́вно,/ кро́вию ва́шею к Небеси́ ра́достно востеко́сте/ и руко́ю живоно́сною побе́дныя прия́сте, му́дрии, венцы́,/ непреста́нно о нас моля́щеся.

Богоро́дичен: Неискусому́жно Сло́во па́че сло́ва ро́ждшая,/ Де́во Неискусобра́чная, Чи́стая,/ напа́стей изми́ нас, и вся́ких бед, и вре́да душетле́нна, и страсте́й,/ и ве́чнующего пла́мене, и осужде́ния.

ВЕЧЕР

Блаже́н муж: 1-й антифо́н. На Го́споди, воззва́х: стихи́ры на 6, глас 4.

Подо́бен: Дал еси́ зна́мение:

Пе́рвее пости́вся,/ пло́ти взыгра́ния/ воздержа́нием умертви́л еси́,/ второ́е побе́ду взял еси́ на враги́/ и низложи́л еси́ их кова́рства твои́ми по́двиги,/ Диони́сие Богоблаже́нне./ Те́мже тя венча́ сугу́быми венцы́/ Иису́с Человеколюбе́ц/ и Спас душ на́ших.

Струя́ми слез твои́х/ се́мя Боже́ственное напои́л еси́,/ я́ко земля́ благоплодови́та, Богодухнове́нне,/ стори́цею воздая́,/ преподо́бия плод прозя́бл еси́ вои́стинну/ и в жи́тницы собра́л еси́ мы́сленный,/ си́лою духо́вною/ тебе́ претво́ршаго премене́нием лу́чшим,/ Диони́сие пресла́вне.

Ве́рою и любо́вию,/ о празднолю́бцы, соше́дшеся днесь,/ псалмы́ и пе́сньми восхва́лим/ Небе́снаго челове́ка, земна́го А́нгела./ К нему́же возопие́м:/ о всеблаже́нне преподо́бие,/ пусты́нный жи́телю,/ по́стников похвало́,/ о нас моли́ся ко Го́споду, о́тче Диони́сие,/ спасти́ся душа́м на́шим.

Слава, глас 8:

Преподо́бие и Богоблаже́нне о́тче Диони́сие/ вои́стинну сподо́бился еси́ Боже́ственный жи́зни,/ посто́м и бде́нием изнуря́я те́ло твое́,/ о́браз быв мона́хом:/ а́ще бо и теле́сный язы́к умолче́,/ но чудеса́ свиде́тельствуют,/ пусты́ня, пропове́дающи, хва́лится,/ име́ющи в себе́ неотъе́млемое сокро́вище;/ лю́дие бо, зря́ще честну́ю ра́ку моще́й твои́х и чудеса́ быва́емая,/ прославляю́т просла́вльшаго тя Го́спода./ Ему́же моли́ся непреста́нно/ дарова́ти во́инству на́шему на враги́ побе́ды/ и вселе́нней мир и ве́лию ми́лость.

И ны́не, Богоро́дичен: Царь Небе́сный: Аще 50-ца, И ны́не, пра́здника.

Вход. Проки́мен дне, чте́ния три.

Прему́дрости Соломо́новы чте́ние (главы 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щий мно́жества/ и гордя́щийся о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И, вма́ле нака́зами бы́вше, вели́кими благоде́тельствовали бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющийся Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется,/ седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 5.

Подо́бен: Преподо́бне о́тче:

Преподо́бне о́тче Диони́сие Богому́дре,/ те́плый к Бо́гу предста́телю,/ доброде́тели сокро́вище, равностоя́телю святы́х А́нгел,/ зерца́ло нескве́рное Бо́жие боже́ственно показа́ся,/ А́нгелы удиви́л еси́,/ бе́сы посрами́л еси́ доброде́тельми твои́ми,/ си́лою Боже́ственнаго Ду́ха своему́ Влады́це подо́бяся:/ Он вшел есть на Крест, рукописа́ние всех растерза́,/ ты же, взем на ра́мо крест свой, в пусты́ню всели́ся,/ стра́сти умертви́л еси́ и ду́шу очи́стил еси́,/ на высоту́ взы́де доброде́тельми,/ единокро́вниче преподо́бным,/ во све́те невече́рнем живы́й,/ егоже луча́ми Боже́ственными просвеща́емь,/ и наслажда́яся Того́ виде́ньми,/ и пита́лся Того́ добро́тами,/ сия́я Того́ чудесы́,/ бысть свети́льник вселе́нней,/ уясни́л еси́ сла́ву Христо́ву./ Того́ моли́, Тому́ помоли́ся, преподо́бне,/ дарова́ти Це́рквам единомышле́ние,/ мир и ве́лию ми́лость.

Преподо́бне о́тче Диони́сие Богому́дре,/ дом Пресвята́го Ду́ха соде́яся/ и свяще́н сосу́д от ма́терних пеле́н показа́ся, о́тче наш,/ нося́ на ра́му свое́ю крест Госпо́день,/ в пусты́нях и гора́х ты живя́,/ яви́ся любве́ ра́ди Христо́вы,/ Ему́же и порабо́тися,/ Его́же и жела́ше, а́бие узре́л еси́./ Те́мже и венце́м увязе́ся неувяда́емым,/ и весе́лие и ра́дость восприя́т и сла́ву ве́чную,/ и украси́ тя Небе́сными дарми́ Христо́с,/ в чудесе́х сла́вна ру́сским страна́м, о́тче Диони́сие, показа́:/ цели́ти неду́ги и ду́хи прогони́ти,/ источа́я неду́жным исцеле́ний струи́./ Те́мже мо́лимся:/ моли́ся Христо́ви, помина́й ста́до, е́же собра́, му́дре,/ и не забу́ди, я́коже обеща́ся посеща́ти чад свои́х./ Мы бо, ча́да твоя́ и о́вцы слове́сных твои́х уче́ний,/ тя на по́мощь призыва́ем,/ прося́ще тобо́ю прия́ти грехо́в оставле́ние./ Того́ моли́, Тому́ помоли́ся, преподо́бне,/ дарова́ти мир ми́рови/ и душа́м на́шим ве́лию ми́лость.

Преподо́бне о́тче Диони́сие Богому́дре,/ кто испове́сть труды́ твоя́ и боле́зни?/ Или́ кий язы́к изрече́т жесто́кое твое́ житие́,/ бде́ние же и сухояде́ние, и е́же на земли лега́ние,/ и моли́твы непреста́нныя и чистоту́ душе́вную и теле́сную./ Устна́ма и умо́м соверше́нное безмо́лвие стяжа́л еси́,/ ху́дость ри́зную, па́мять сме́ртную име́л еси́,/ того́ ра́ди па́мять твоя́ во ве́ки пребыва́ет,/ преподо́бне Диони́сие, уго́дниче Христо́в, блаже́нне./ А́ще бо преста́вися от нас, па́стырю до́брый,/ но не отступа́еши от нас ду́хом,/ всех нас помина́й, соверша́ющих па́мять твою́ свяще́нную,/ приле́жно пою́ще, мо́лим тя:/ моли́ся, преподо́бне, побе́ды дарова́ти на враги́ наро́ду на́шему,/ и Це́рквам благоле́пие, и ми́ру смире́ние,/ и душа́м на́шим ве́лию ми́лость.

Глас 4: Блаже́н вои́стинну был еси́, о́тче Диони́сие,/ плач ра́достен стяжа́л еси́, преподо́бне,/ и́мже Ца́рство Небе́сное насле́довал еси́/ и ве́чную жизнь и насле́дие ве́чное, преблаже́нне, восприя́л еси́,/ в се́лех Небе́сных веселя́ся,/ всю́ду зари́ испуща́я чуде́с твои́х, вся просвети́л еси́,/ позна́лся еси́, благода́тию сия́я,/ не подоба́ше бо твое́й доброде́тели в пусты́нях забы́тися и покры́тися,/ те́мже Христо́с светоно́сна тя свети́льника всем показа́.

По́стник благоче́стия на Небе́сную стезю́, Диони́сие,/ наста́вил еси́, о́тче,/ и к насле́дию неги́блющему Вы́шних веды́й,/ Боже́ственными свои́ми уче́нии умудря́я, о́тче,/ наказу́я ученики́ своя́,/ те́мже житие́ твое́, преблаже́нне, А́нгелом ра́вно/ и жизнь твоя́, Богому́дре, пресве́тла,/ душа́ же светови́дна и благоче́стна ве́ра твоя́./ Сего́ ра́ди Христо́с дарова́ тя врача́ боля́щим зело́ ми́лостивна/ и пита́теля а́лчущим пресла́вна,/ наказа́теля несмы́сленным, целому́дреника неразуме́ющим,/ си́рым и ни́щим засту́пника.

Слава, глас 6:

Сказа́ Христо́с тебе́,/ е́же к Нему́ многорачи́тельное преставле́ние,/ преста́влься, дости́гл еси́ он, Вы́шний град,/ и ве́чныя оби́тели дои́де,/ и насле́дие Небе́сное от свои́х боле́зней обре́те./ И ны́не Влады́це предстоя́,/ помина́й ве́рою творя́щих па́мять твою́ светоно́сную и всеосвяще́нную,/ тя, восхваля́юще, досто́йно ублажа́ем.

И ны́не, Богоро́дичен. На стихо́вне стихи́ры, глас 2.

Подо́бен: До́ме Евфра́фов:

Яви́вся/ от ма́терних пеле́н,/ Богоно́се преподо́бне Диони́сие,/ сосу́д, о́тче, был еси́/ и дом Пресвята́го Ду́ха.

Стих: Честна́ пред Го́сподем/ смерть преподо́бных Его́.

Нося́ на ра́му твое́ю Госпо́день Крест,/ Диони́сие, о́тче преподо́бне,/ бесо́вское мечта́ние/ до конца́ потреби́л еси́/ и ве́рным исцеле́ние дарова́л еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Пре́лесть лука́вых бесо́в/ обличи́л еси́ кре́стною си́лою,/ бо́дренными моли́твами и сле́зными исто́чники,/ Це́ркви ве́рных обогати́л еси́,/ Богоблаже́нне Диони́сие.

Сла́ва, глас 6:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию, я́ко мо́щно, возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху./ Те́мже мона́шествующих яви́лся еси́ верх,/ жи́тель пусты́нный,/ благотеку́щих обучи́тель,/ пра́вило доброде́тели изве́стнейшее./ И ны́не на Небесе́х зерца́лом разре́шшимся,/ о́тче наш Диони́сие,/ чи́сте зри́ши Святу́ю Тро́ицу,/ моля́ся несре́дственне/ о и́же ве́рою и любо́вию чту́щих тя.

И ныне: Богоро́дице, Ты еси́ лоза́: А́ще Пятдеся́тница: И ны́не, пра́здника.

Тропа́рь, глас 1:

Боже́ственною любо́вию от ю́ности распала́емь,/ Диони́сие преподо́бне,/ вся, я́же в ми́ре кра́сная, возненави́дев,/ Христа́ еди́наго возлюби́л еси́/ и Сего́ ра́ди во вну́треннюю пусты́ню всели́лся еси́,/ со зверьми́ живы́й, весь Христо́ви./ Отону́дуже и Всеви́дящее О́ко, твоя́ труды́ ви́дев,/ да́ром чуде́с и по преставле́нии обогати́л тя есть./ Те́мже вопие́м ти:/ моли́ непреста́нно о всех нас,/ честну́ю па́мять твою́ при́сно/ в пе́снех почита́ющих.

Сла́ва, и ны́не, Богоро́дичен: Гаврии́лу веща́вшу Тебе́:

НА У́ТРЕНИ

По 1-й стихоло́гии седа́лен, глас 3.

Подо́бен: Красоте́:

Сою́зом любве́ привяза́вся Христу́, земна́я же и мимотеку́щая возненави́дев,/ пусты́нное озлобле́ние усе́рдно подъя́л еси́,/ бесо́вская же ополче́ния и их многоко́зненную си́лу до конца́ посрами́л еси́,/ и Подвигополо́жник Христо́с дарова́нием чуде́с обогати́ тя./ Те́мже тя почита́ем, Диони́сие Богому́дре.

Сла́ва, и ны́не, Богоро́дичен:

Я́ко невозде́ланная, Де́во, лоза́, красне́йший Грозд прозябла́ еси́,/ источа́ющ нам вино́ спасе́ния, всех веселя́щее ду́ши же и телеса́./ Те́мже, я́ко вину́ Тя до́брых блажа́ще при́сно, со А́нгелы вопие́м Ти:/ ра́дуйся, Благода́тная.

По 2-й стихоло́гии седа́лен, глас 1.

Подо́бен: Лик А́нгельский:

Житие́ благоче́стно на земли́ стяжа́в, прия́телище чи́сто Ду́ху ты яви́лся еси́,/ просвеща́я ве́рою к тебе́ притека́ющия, блаже́нне./ Те́мже моли́ твоего́ Влады́ку просвети́ти ду́ши нас, воспева́ющих тя,/ Диони́сие, преподо́бне о́тче наш.

Сла́ва, и ны́не, Богоро́дичен:

Всех Творца́, и Бо́га, и Соде́теля, Всенепоро́чная Чи́стая,/ Ду́хом Боже́ственным в ложесна́х заче́нши,/ без истле́ния родила́ еси́./ Его́же сла́вяще, Тя воспева́ем, Де́во,/ я́ко пала́ту Царя́ всех и ми́ру заступле́ние.

По полиеле́и седа́лен, глас 8.

Подо́бен: Прему́дрости:

Окормля́емь си́лою вседе́тельною и ве́трилом кре́стным обложе́н,/ легко́ преплы́л еси́ жития́ мо́ре/ и к Боже́ственным вои́стинну приста́нищем дости́гл еси́,/ доброде́телей ку́плю мно́гу стяжа́в, ю́же всех Влады́це прине́сл еси́,/ и́же, благи́й ра́бе, слы́шал еси́./ Неду́гующих исцели́л еси́, ско́рчившихся ру́це испра́вил еси́,/ слепы́я просвеща́я, немы́м повеле́л еси́ вопи́ти./ Диони́сие преподо́бне, моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́мь безчи́сленных согреше́ний мои́х,/ я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ воплоще́нному без се́мене/ моли́ся приле́жно о всех рабе́х Твои́х,/ непреста́нно моля́щих Ти ся, Богоро́дице Пречи́стая,/ моля́щи Его́ при́сно согреше́ний оставле́ние дарова́ти/ воспева́ющим досто́йно сла́ву Твою́.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43. Псало́м 50-й.

Стихи́ра, глас 2:

Ра́дуйся, преподо́бне о́тче Диони́сие всече́стне,/ и́же зако́н Госпо́день до́бре извы́кл еси́/ и ве́ру соблю́л еси́ невреди́му,/ хода́тай яви́вся о ста́де твое́м Христу́ Бо́гу./ Того́ моли́ умири́ти мир/ и спасти́ ду́ши на́ша.

Кано́н Богоро́дицы на 6 и свята́го на 8, глас 8.

Песнь 1

Ирмо́с: Колесницегоние́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.

Озаре́нием Свята́го Ду́ха озари́ благоче́стно любо́вию пе́сньми восхваля́ющих тя,/ по́стников похвало́, мона́шествующих сла́во, пусты́ни украси́телю,/ благоче́стия учи́телю, Диони́сие.

От ю́ности жела́ние к Бо́гу возложи́в,/ и к Не́му, ра́дуяся, возше́л еси́, име́я все твое́ помышле́ние,/ взыгра́ние пло́ти и страсте́й нахожде́ние воздержа́нием умертви́л еси́,/ Диони́сие прехва́льне.

Попра́в зми́я, того́ се́ти легко́ прелете́л еси́,/ кри́лы благоче́стия впери́вся, о́тче:/ живо́т бо, ра́дуяся, объя́л еси́ от са́да кре́стнаго, блаже́нне Диони́сие.

Богоро́дичен: Уста́ви неуста́вное помышле́ние смуще́ния,/ Пречи́стая Де́во, Ма́ти Бо́жия,/ к Сы́ну Твоему́ направля́ющи движе́ния.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Во све́те невеще́ственне и мы́сленне,/ от печа́лей веще́ственных восте́к к Небе́сным невеще́ственным чино́м,/ преподо́бне, моли́твами твои́ми нас просвети́.

Воздержа́ния сла́дость иска́пав, отри́нул еси́ го́ресть страсте́й,/ те́мже па́че ме́да и со́та наслади́л еси́, о́тче, чу́вствия на́ша.

Возше́д на высоту́ доброде́телей, до́лу влеку́щия оплева́л еси́ сла́сти,/ сла́дость показа́вся спасе́ния, о́тче преподо́бне,/ ста́ду твоему́ проси́ грехо́в оставле́ния.

Богоро́дичен: Прему́дрость и Сло́во О́тчее несказа́нно родила́ еси́,/ души́ моея́ лю́тую исцели́ я́зву и серде́чную боле́знь утоли́.

Ин и́кос:

Прииди́́те, и́ночествующих мно́жество,/ ве́рою соше́дшеся днесь,/ я́ко и́стиннаго по́стника почита́ем Диони́сия,/ и честну́ю его́ и многоцеле́бную ра́ку обстоя́ще,/ любе́зно облобыза́ем, глаго́люще:/ о всеблаже́нне Диони́сие,/ преподо́бным сожи́телю и по́стником похвало́,/ в наро́читем пра́зднице преподо́бнаго па́мяти духо́вне весели́мся,/ Ева́нгельских исто́чник струя́ми напои́вшеся, ра́дующеся, реку́ще:/ ра́дуйся, Диони́сие, преподо́бне и всеблаже́нне,/ Небе́сный челове́че и земны́й А́нгеле/ и Ду́ха Пресвята́го обита́лище./ Ра́дуйся, я́ко мно́гих к спасе́нному пути́ наставля́ющий;/ ра́дуйся, оте́честву на́шему похвало́ и утвержде́ние./ Ра́дуйся, де́лателю вои́стинну разу́мный;/ ра́дуйся, преподо́бне, а́лчущим пита́телю и оби́димым посо́бниче./ Ра́дуйся, печа́льным утеше́ние и вдови́цам засту́пниче, Диони́сие преблаже́нне,/ хромы́х хожде́ние и кре́пость,/ мно́гим неду́гом цели́телю;/ ра́дуйся, скорбя́щим сла́дкое похвале́ние,/ вождю́ слепы́м и све́тлость/ и пла́вающим наста́вниче те́плый./ Ра́дуйся, чи́сте, Чисте́йшему Све́ту совокупи́ся;/ ра́дуйся, я́ко Тро́ице предстои́ши со А́нгелы./ Мо́лим тя: непреста́нно о нас моли́ся,/ дарова́ти душа́м на́шим ве́лию ми́лость.

Седа́лен, глас 8:

Красоты́ мирски́я от млады́х ногте́й, преподо́бне, возненави́дев,/ еди́наго Христа́ от се́рдца возлюби́л еси́ и, Тому́ все́ю душе́ю прилепи́вся,/ я́ко безпло́тен, на земли́ пожи́л еси́ с пло́тию,/ сла́ву же мимотеку́щую и бога́тство нивочто́же вмени́в,/ Небе́сное бога́тство восприя́л еси́ и сла́ву ве́чную./ Те́мже и ублажа́ем свято́е твое́ успе́ние/ и, в нем торжеству́юще, вопие́м ти:/ Богоблаже́нне о́тче наш Диони́сие,/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Песнь 4

Ирмо́с: Ты моя кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра Отча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколюбче.

Душе́вное очища́я чу́вство и разширя́я Боже́ственными виде́нии,/ Боже́ственных дарова́ний сподо́бился еси́, Богоблаже́нне,/ к ра́це моще́й Твои́х притека́ющим, Диони́сие преподо́бне, подае́ши ско́рое исцеле́ние.

Зако́ном Бо́жиим повину́яся, преподо́бне,/ к смотре́нию безпло́тных и мы́сленных твое́ худо́жество упра́вил еси́,/ преходя́ вы́ну от сла́вы в сла́ву, от си́лы, о́тче, в си́лу.

Богоуго́дно пожи́в,/ пусты́ни, я́ко гра́ды, сотвори́л еси́ потре́бны и душеполе́зны,/ исто́чник исцеле́ний пролива́я ве́рою покланя́ющимся ра́це моще́й твои́х.

Богоро́дичен: Новора́сленный безсме́ртия рай и красе́н вои́стинну показа́лася еси́, Де́во:/ дре́во бо жи́зни в Тебе́ насади́ся богонача́льно,/ е́же, во чре́ве Твое́м нося́щи, родила́ еси́,/ всем иска́пающее спасе́ния наде́жду, ве́рно, Богоро́дице, испове́дающим Тя.

Песнь 5

Ирмо́с: Вскуе́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́мя и  к све́ту за́поведей Твои́х/ пути́ моя́ напра́ви, молю́ся.

Угаси́в пла́мень страсте́й росо́ю подвиго́в твои́х,/ о́тче блаже́нне Диони́сие,/ бога́тно вжегл еси́ огне́м любве́ ве́ры воздержа́ния свети́льник,/ просвеще́ние безстра́стия, и сын дне яви́лся еси́.

Ве́ры грозд Боже́ственным де́ланием, о́тче, воспита́л еси́,/ и, в точи́лех поста́вив, изгне́л еси́ боле́зньми поще́ния,/ и ча́шу напо́лнил еси́ духо́вную воздержа́ния,/ весели́ши сердца́ ста́да твоего́.

До́блественне претерпе́в бие́ния неви́димых враго́в,/ показа́лся еси́ столп непоколеби́мь,/ утвержда́я ста́до твое́ па́лицею Боже́ственною, словесы́ медото́чными,/ блаже́нне Диони́сие преподо́бне.

Богоро́дичен: Еди́на ро́ждши де́вою, едина муженеиску́сная яви́лася еси́, Всенепоро́чная,/ во утро́бе Сло́во О́тчее прие́мши Безнача́льное,/ млеко́м дои́ши, Чи́стая, чу́до стра́шно!/ Де́вствуеши и зако́ны обновля́вши естества́.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ низ глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Исцеле́ний ре́ки источа́еши, стра́сти земноро́дных боже́ственно очища́еши,/ ра́дующеся ве́рою,/ восхваля́ем твоя́ по́двиги, чу́дне.

Зако́нно от всех Соде́теля десни́цею венча́лся еси́, преподо́бне Диони́сие,/ Небе́сный граждани́не, А́нгелом равностоя́телю.

Нетле́ннаго и Боже́ственнаго пребыва́ния и непости́жных наслажда́яся ны́не благи́х,/ А́нгелом собеседниче, Диони́сие Богому́дре, восхваля́ющие тя спаса́й.

Богоро́дичен: Бо́га ро́ждши, вся́кия тва́ри, Влады́чице,/ я́ко вои́стинну еди́на, Богоро́дице, превы́шши яви́лася еси́.

Кондак, глас 8:

Все твое́ у́мное жела́ние к Бо́гу впери́в,/ Тому́ невозвра́тно от души́ после́довал еси́, в пусты́ню всели́вся,/ и, та́мо а́нгельски пожи́в, мно́гим путь был еси́ ко спасе́нию;/ сего́ ра́ди и Христо́с тебе́ просла́ви и да́ром чуде́с обогати́./ Те́мже вси вопие́м ти:/ ра́дуйся, Диони́сие преподо́бне, пусты́нный жи́телю.

Икос:

Храм Бо́гу я́ко вои́стинну себе́ соде́лав, о́тче,/ и Вы́шняго Иерусали́ма яви́вся граждани́н,/ Боже́ственными доброде́тельми твои́ми безпло́тных че́сти сподо́бился еси́./ Те́мже и мы зря́ще чудеса́, похвале́нию досто́йная,/ я́же удивля́ют нас и науча́ют тебе́ зва́ти такова́я:/ ра́дуйся, благочести́ваго отца́ о́трасль и ма́тере благогове́йный ветвь./ Ра́дуйся, целому́дрия сто́лпе,/ и́мже бесо́вская шата́ния искорени́шася./ Ра́дуйся, свети́льниче многосве́тлый./ Ра́дуйся, я́ко увяди́л еси́ плотска́я мудрова́ния./ Ра́дуйся, пусты́ни до́брое прозябе́ние./ Ра́дуйся, пра́ведных Боже́ственное наслажде́ние./ Ра́дуйся, я́ко презре́л еси́ теку́щая и тле́нная./ Ра́дуйся, я́ко на Небесе́х со А́нгелы живе́ши./ Ра́дуйся, я́ко мона́шествующих изве́стное пра́вило./ Ра́дуйся, леня́щихся к Бо́гу дерзнове́ние./ Ра́дуйся, исто́чниче чуде́с богото́чный./ Ра́дуйся, честны́й Ду́ха сосу́де, наста́вниче на́шего спасе́ния./ Ра́дуйся, Диони́сие преподо́бне, пусты́нный жи́телю.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Вре́менная отложи́в, ве́чными украси́лся еси́,/ со А́нгелы лику́еши, я́ко а́нгельское пожи́в житие́, с ни́миже пое́ши:/ благослове́н Бог оте́ц на́ших.

Непреста́нно мо́лим, Диони́сие Богому́дре,/ о ста́де твое́м приле́жно моли́ся,/ тебе́ на моли́тву призыва́ющих, и плоды́ принося́щих, и любо́вию пою́щих:/ благослове́н Бог оте́ц на́ших.

В зла́це Вы́шняго Ца́рствия ста́до твое́, о́тче, воспита́л еси́/ и жезло́м уче́ний упа́сл еси́ ве́рно пою́щия:/ благослове́н Бог оте́ц на́ших.

Богоро́дичен: Изба́ви нас, Христе́, от страсте́й, и бед, и обстоя́ний, и неду́гов многообра́зных/ моли́твами Пречи́стыя Твоея́ Ма́тере и преподо́бнаго Диони́сия, взыва́ющих:/ благослове́н Бог оте́ц на́ших.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Столп тя одушевле́н я́ко вои́стинну и о́браз воздержа́ния, о́тче, стяжа́вшее,/ вси твою́, Диони́сие, па́мять почита́ем.

Собо́р ра́дуется мона́шеский, и лику́ет преподо́бных сонм,/ с ни́миже пра́ведных вене́ц досто́йно восприя́л еси́.

Укра́шен доброде́тельми, в неве́стнице неизре́ченныя сла́вы возле́гл еси́,/ песнь воспева́я Христу́ во ве́ки вся.

Богоро́дичен: Поглоще́на боле́зньми и па́дша возста́ви, Богома́ти,/ я́ко да Тя сла́влю во вся ве́ки.

Песнь 9

Ирмо́с: Чи́стую сла́вно почти́м,/ лю́дие, Богоро́дицу,/ Огнь Божества́ прии́мшую во чре́ве неопа́льно,/ пе́сньми велича́ем.

Неду́гующих в паде́нии врач от Бо́га показа́лся еси́, и очи́стник, блаже́нне,/ и прогони́тель лука́вых духо́в, Богоно́се Диони́сие,/ тем тя вси велича́ем.

Яко тле́нно жили́ще, зе́млю оста́вив, о́тче, всели́лся еси́в зе́млю кро́тких/ и с ни́ми ра́дуешися, Боже́ственнаго наслажда́яся, о́тче, сия́ния.

Неукло́нен к ве́ре преде́л/ и образ воздержа́ния иму́ще по́двиги твоя́к Зижди́телю вои́стинну,/ пе́сньми тя велича́ем.

Богоро́дичен: В Тя всели́вся, Всенепоро́чная,/ пе́рвее родонача́льныя злообра́зно запе́ншаго/ человекоуби́йцу низложи́ Роди́выйся и всех нас спасе́.

Светилен:

Пристра́стия мирска́го, я́ко от скве́рны, уклони́лся еси́,/ разу́мнаго Со́лнца светоза́рная луча́ возсия́,/ свети́льник многосве́тлый, пусты́нное воспита́ние и чистоты́ оби́телище,/ Христо́вы добро́ты я́сно зря,/ Его́же сия́нием ум твой озари́л еси́/ и сла́вою обогати́лся еси́ Небе́сною, Диони́сие сла́вне./ Мо́лим тя, в ми́ре сохране́ным бы́ти па́мять твою́ почита́ющим.

Сла́ва, и ны́не, Богоро́дичен:

Я́ко иму́щи милосе́рдие и ми́лость ве́лию,/ при́зри, Препе́тая Богоро́дице Де́во, на мое́ смире́ние,/ и страсте́й молву́, и собла́зн жития́ разори́, Отрокови́це,/ и огня́ гее́нскаго изба́ви мя моли́твами Твои́ми.

На хвали́тех стихи́ры на 4, глас 2.

Подо́бен: Егда́ от Дре́ва:

Диони́сие, мона́хов удобре́ние,/ прозябе́ние кра́сное пусты́ни,/ преподо́бных похвало́,/ ве́рных утвержде́ние,/ любо́вию творя́щих твою́ всечестну́ю па́мять/ и к ра́це моще́й твои́х приступа́ющих,/ изба́ви обстоя́ния вся́каго/ и о́гненнаго осужде́ния.

Тро́ице храм сам себе́ соде́лал еси́,/ о́тче Богоблаже́нне,/ в пусты́ни непрохо́дныя заше́д,/ я́ко Моисе́й, в Сина́йскую го́ру всели́лся еси́,/ иде́же прии́м Боже́ственный зако́н,/ мона́хов мно́жество вои́стинну/ научи́л еси́ изря́дному житию́,/ и ны́не прикаса́ющимся к ра́це моще́й твои́х/ подае́ши всем исцеле́ние.

Име́я дерзнове́ние ко Христу́ Бо́гу,/ моли́ся о ста́де твое́м, преподо́бне,/ сохрани́тися от искуше́ний вра́жиих и язы́ческих нахожде́ний,/ огня́ и меча́, и вся́каго прило́га,/ и наве́та лука́ваго:/ тебе́ бо град и покро́в иму́ще,/ на тя наде́жду с Бо́гом стяжа́хом, блаже́нне.

Сла́ва, глас 8. Самогла́сен:

На Не́бо теку́щую возше́д колесни́цу, чу́дне,/ доброде́телей дости́гл еси́ кра́йнее/ жития́ воздержа́нием,/ из пусты́ни смотря́я Вы́шняго Иерусали́ма красоты́/ и боле́зненных подвиго́в досто́йно по́чести восприи́м,/ с Небе́сными ра́дуешися чинонача́лии, преблаже́нне,/ ве́чных благ насле́дник яви́лся еси́,/ Небе́снаго Ца́рствия жи́тель быв./ Моли́ся, Богоно́се Диони́сие, Спа́су всех/ умири́ти мир и спасти́ ду́ши на́ша.

И ны́не: Влады́чице, приими́ моли́твы:

А ́ ще ли Пятдеся́тница: И ны́не, пра́здника. Славосло́вие вели́кое и отпу́ст.

НА ЛИТУРГИИ

Блаже́нны, от кано́на, пе́сни 3-я и 6-я. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

ВЕЧЕР

На Го́споди, воззва́х: стихи́ры, глас 4.

Подо́бен: Я́ко до́бля:

Духо́вныя благода́ти дарова́ние изоби́льно/ прие́мь свы́ше, Ага́пите преподо́бне,/ а́ки ре́чными струя́ми, всех напая́еши/ и моли́твами твои́ми подае́ши исцеле́ние/ всем, с ве́рою к тебе́ притека́ющим./ Сего́ ра́ди и мы, дерзнове́ние прие́мше,/ кла́няемся ра́це моще́й твои́х и про́сим,/ да пода́си душа́м и телесе́м на́шим исцеле́ние.

Стра́сти безслове́сныя ума́ чистото́ю/ и непреста́нными в моли́твах стоя́нии/ покори́в ду́ху, всеблаже́нне,/ прия́л еси́ благода́ть исцеле́ния/ и подае́ши неоску́дно всем,/ прося́щим от Тебе́ по́мощи./ Те́мже и мы, твое́ почита́юще успе́ние,/ мо́лимтися приле́жно:/ я́ко врач безме́здный/ пода́ждь душа́м и телесе́м на́шим исцеле́ние.

Ра́ка моще́й твои́х, о́тче преподо́бне Ага́пите,/ светоза́рное не́бо явля́ется,/ показу́я чудеса́, я́ко лучено́сныя зве́зды,/ и подае́т благода́тное исцеле́ние/ с наде́ждою к ней притека́ющим./ Сего́ ра́ди и мы, упова́ние иму́ще,/ мо́лимтися приле́жно/ дарова́ти душа́м и телесе́м на́шим в страсте́х поможе́ние.

Слава, глас 2:

Благода́ть исцеле́ния свы́ше прие́мый,/ живы́й еще́ в маловре́менной сей жи́зни,/ преблаже́нне Ага́пите,/ подава́л еси́ всем прося́щим исцеле́ние незави́стно./ Ны́не бо́льшия благода́ти сподо́бивыйся,/ предстоя́ Вы́шняго Престо́лу,/ низпосли́ от твои́х дарова́ний нам,/ покланя́ющимся многочуде́сным твои́м моще́м/ и па́мять твою́ хвала́ми почита́ющим,/ я́ко да прии́мем неду́гом на́шим исцеле́ние/ твои́ми, о́тче, к Бо́гу моли́твами.

И ны́не, Богоро́дичен или́Крестобогоро́дичен.

На стихо́вне в Окто́ихе. Сла́ва, глас 3:

От духо́вных дарова́ний струи́ исцеле́ний изводя́, сла́вне,/ мно́гими страстьми́ содержи́мым,/ твоего́ тре́бующим заступле́ния,/ пода́ждь ско́рую по́мощь свы́ше,/ струя́ми чуде́с твои́х прохлажда́я/ и прогоня́я от лука́ваго наноси́мыя боле́зни,/ я́ко да, почерпа́юще исцеле́ния вси ту́не,/ сла́вим Отца́ Небе́снаго,/ и велича́ем Безле́тнаго Сы́на Его́/ с Присносу́щным Ду́хом Его́,/ и тя, о́тче Ага́пите, вси ублажа́ем.

И ны́не, Богоро́дичен или Крестобогоро́дичен.

Тропа́рь, глас 5:

Богоно́снаго Анто́ния ревну́я смиренному́дрию,/ а́ки не́киим врачевство́м зе́лием сне́дным/ исцеля́л еси́ боля́щия, преподо́бне Ага́пите,/ тем и врача́ неве́рна уве́рив,/ наста́вил еси́ на путь спасе́ния./ Уврачу́й и на́ша боле́зни/ и моли́ся Го́сподеви о воспева́ющих тя.

Кано́н преподо́бному, глас 6.

Песнь 1

Ирмо́с: Яко по су́ху; пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

Я́ко нема́го дре́вле прикоснове́нием устро́ил еси́ пра́во глаго́лати,/ си́це и мне, Христе́, мой язы́к разреши́, ум отве́рзи,/ да принесу́ в па́мять уго́дника Твоего́ хвале́ние,/ любо́вию поя́.

Не могу́ воспе́ти я́сно благода́ти твоея́, преподо́бне,/ а́ще не ты моли́твами твои́ми пода́си мне по́мощь,/ да просла́влю Влады́ку, да́вшаго тебе́ благода́ть исцеле́ний,/ во хвале́нии поя́.

По предуве́дению воззва́н был еси́, свя́те, вслед Влады́ки своего́ ше́ствовати/ и, Тому́ после́дуя, вся кра́сная ми́ра оста́вль,/ любо́вию прише́л еси́ к вели́кому Анто́нию/ и с ним пожи́л еси́, непреста́нное хвале́ние Бо́гу поя́.

Земно́му А́нгелу и Небе́сному челове́ку после́дуя,/ и сам а́нгельское житие́ стяжа́л еси́, о́тче преподо́бне./ Тем твоя́ исправле́ния почита́ем и прославля́ем всех Влады́ку,/ о тебе́ песнь Ему́ пою́ще.

Богоро́дичен: От земны́х и Небе́сных сил сла́вимая, Присноде́во,/ в дне́шний день хвале́ние Тебе́ дерза́ющих приноси́ти,/ от всех прило́гов сохраня́й, да вы́ну Тя воспое́м, Обра́дованная.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Во мно́гих ле́тех мно́жайшия проше́л еси́ труды́, Ага́пите,/ подвиза́яся во бде́нии и поще́нии,/ до́ндеже единонра́вен показа́лся еси́ наста́внику своему́/ и от него́ утверди́лся еси́ на ка́мени тве́рдаго жития́.

Ничто́же и́но, то́кмо нищету́ име́я,/ обнища́вшему нас ра́ди Христу́ после́довал еси́, о́тче,/ и, Того́ за́поведи храня́,/ служи́л еси́ больны́м, посеща́я, и упокоева́я,/ и здра́вие тем моли́твою свое́ю подава́я.

С преподо́бным жи́тельствуя, стяжа́л еси́ преподо́бство, достохва́льне Ага́пите,/ и исцеле́ния даро́в сподо́бился еси́,/ яко моли́твою и зе́лием сне́дным здра́вие подава́л еси́ боля́щим,/ те́мже и врач наре́клся еси́ безме́здный.

Просла́вил еси́ Бо́га во удесе́х твои́х, преподо́бне,/ те́мже и Бог тя просла́ви благода́тию исцеле́ния,/ и́мже и на́ша неду́ги уврачу́й душе́вныя и теле́сныя,/ да утверди́мся на ка́мени испове́дания Бо́жия.

Богоро́дичен: Израсти́вшая живо́тное дре́во,/ Того́ плодо́м нас, умерщвле́нных греха́ми, оживи́/ и да́руй нам, Ма́ти Чи́стая, кре́пкое бла́гости Твоея́ испове́дание.

Седа́лен, глас 4:

Я́ко ту́не прие́мый от Бо́га дар исцеле́ния,/ стра́ждущим исцеле́ние ту́не подае́ши, с ве́рою к тебе́ притека́ющим./ Те́мже и мы, кла́няющеся ра́це моще́й твои́х, о́тче преподо́бне,/ про́сим прия́ти от Тебе́ неду́гом на́шим исцеле́ние.

Сла́ва, и ны́не, Богоро́дичен:

К Твоему́ благоутро́бию в ско́рбех притека́юще, мо́лимся, Всенепоро́чная:/ пода́ждь преподо́бнаго Твоего́ ра́ди нам,/ неду́ги одержи́мым, ско́рое исцеле́ние.

Песнь 4

Ирмо́с: Христо́с моя си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Бу́ия ми́ра сего́ Христо́с избра́,/ да прему́дрыя посрами́т,/ е́же и на тебе́ сбы́стся, о́тче всеблаже́нне:/ благода́тию бо, а не хи́тростию прему́драго посрами́л еси́ врача́./ Тем тя сла́вим, о Го́споде пра́зднующе.

Прельсти́ся, и́же пе́рвее больны́х прельща́ше, извеща́я им день и час сме́рти,/ ему́же ты поно́сив, преподо́бне,/ боля́щаго исцели́л еси́ моли́твою и зе́лием сне́дным, рек:/ даждь сла́ву Бо́гу, иму́щему ключ живота́ и сме́рти.

За́висти стрело́ю злочести́вый армени́н уя́звен, поноша́ше ти, свя́те,/ и, посла́в на смерть осужде́ннаго,/ повеле́ пред тобо́ю умертви́ти бы́лием смертоно́сным./ Но ты сего́ моли́твою и зе́лием исцели́в,/ посрами́л еси́ еретика́, хотя́щего тя посрами́ти.

Претыка́ющемуся да́нная ти благода́ть бысть паде́ние, преблаже́нне,/ наипа́че бо на тя вооружи́вся, злочести́вый армени́н/ наусти́ да́ти тебе́ отра́ву,/ но ты, и сме́ртно испи́в, невреди́мь был еси́,/ яко Бо́жия благода́ть сохрани́ тя к бо́льшему чудоде́йствию.

Богоро́дичен: Ра́дуйся, сосу́де, носи́вший ми́ро, исцели́вшее род челове́ческий,/ я́дом мя грехо́вным умерщвле́нна оживи́,/ да про́чее вре́мя цел поживу́, Тя, Де́во, восхваля́я.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

От Бо́га благода́ть исцеле́ния прие́мь, исцели́л еси́ кня́зя,/ и́же а́ще и врачу́ем бе от армени́на, но не получа́ше отра́ды,/ твоего́ же зе́лия вкуси́в, от неду́га изба́вися.

Зри́те, и́ночествующии,/ и доброде́тельному терпе́нию Богоно́снаго отца́ почуди́теся,/ ка́ко со отрече́нием ми́ра во́ли своея́ отрече́ся/ и не изы́де никогда́же вне врат монасты́рских,/ е́же ви́дяще, сему́ поревну́йте.

Еди́ну любо́вь ко всем име́я, а не на лице́ зря,/ а́ще князь, а́ще прост к тебе́ прихожда́ше, преподо́бне,/ всем приходя́щим подава́л еси́ исцеле́ние ту́не,/ еди́наго ища́ возме́здия от Бо́га.

Прие́мь князь тобо́ю исцеле́ние, всеблаже́нне,/ уразуме́, яко и́стинен раб Бо́жий еси́,/ и ви́дети тя жела́ше, те́мже прии́де к тебе́ с дары́./ Ты же, Еди́наго име́я Бо́га,/ ничто́же от тех даро́в восхоте́л еси́ прия́ти.

Богоро́дичен: Хва́лим Тя, Пречи́стая Де́во,/ я́ко отверза́еши нам две́ри ми́лости Твоея́/ и подае́ши всем незави́стный исто́чник исцеле́ния,/ от я́да грехо́внаго избавля́ющий.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Вся тле́нная ми́ра сего́ оста́вив,/ принесе́нное зла́то изве́ргл еси́, блаже́нне, пред враты ке́ллии своея́,/ изверга́я вку́пе любоиме́ннаго врага́/ и стира́я душегу́бную того́ главу́.

Еди́н би́сер стяжа́в многоце́нный – Иису́са,/ вся во уме́ты вмени́л еси́, свя́те,/ и тем купи́л еси́ себе́ селе́ние в Небе́сных,/ е́же и мы получи́ти мо́лимся твои́ми, о́тче, моли́твами.

Мно́гими ле́ты постя́ся, изнемо́гл еси́ те́лом, преподо́бне,/ но ду́хом пребы́л еси́ кре́пок, а́ки столп,/ вся наноси́мая терпя́ и благодаря́ Бо́га, к Нему́ взыва́л еси́:/ возведи́ от тли живо́т мой, Многоми́лостиве.

Те́лом боле́знуя,/ ду́хом бра́лся еси́ с злочести́вым армени́ном,/ и́же по трие́х днех смерть тебе́ провозвеща́ше,/ сего́ ты, блаже́нне, одоле́л еси́,/ по трие́х ме́сяцех отше́ствие свое́ к Бо́гу возвеща́я.

Богоро́дичен: К Твоему́ приста́нищу прибега́ем, Богоневе́стная Де́во,/ носи́ми жите́йских страсте́й волна́ми,/ я́же Ты укроти́, да воспое́м Тебе́:/ ра́дуйся, приста́нище жите́йских пла́ваний.

Кондак, глас 6:

Врач сый изря́ден, чу́дне,/ явля́я несумне́нную твою́ ве́ру,/ облича́я же армени́ново неве́рие/ и приводя́ его́ к благоче́стию,/ себе́, близ сме́рти бы́вшу,/ испроси́л еси́ от Бо́га продолже́ние живота́/ и, сим чу́дом того уве́рив,/ приве́л еси́ Христо́ви,/ Ему́же в весе́лии предстоя́,/ моли́ся о нас, преподо́бне.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Дарова́ние имы́й свы́ше неду́ги исцеля́ти, преподо́бне,/ боля́ща мя небреже́нием благи́х дея́ний уврачу́й,/ я́коже иногда́ принесе́ннаго в неду́зе уврачева́л еси́,/ моли́твою пода́в тому́ здра́вие и воспе́в:/ благослове́н Бог оте́ц на́ших.

Чудоде́йствуя святы́ми, тва́ри Созда́тель/ внеза́пу поста́ви тя здра́ва пред злочести́вым,/ и́же ви́дев, удиви́ся ско́рому твоему́от боле́зни в здра́вие премене́нию./ Му́чима мя я́звами сту́дных дел,/ во измене́ние исправле́ния приведи́твои́м, о́тче, свы́ше посеще́нием, да пою́:/ благослове́н Бог оте́ц на́ших.

Боле́знь твоя́ и зе́лие сне́дно/ прину́ди испове́сти врача́ свое́ злоче́стие,/ его́же укори́л еси́, я́ко дерзну́ осяза́ти святу́ю твою́ ру́ку;/ се дерза́ю и а́з к тебе́, о́тче, приступи́ти, но молю́тя:/ не отри́ни мя в ну́ждах мои́х, да пою́:/ благослове́н Бог оте́ц на́ших.

Трудо́в свои́х собра́в плоды́ с весе́лием, а́ки добр земледе́лец,/ блаже́нною кончи́ною отше́л еси́ к Го́рним прия́ти от Христа́ Бо́га дая́ние/ и прия́л еси́ от Него́ неконча́емую ра́дость, многочу́дне Ага́пите.

Богоро́дичен: Во Твое́ чре́во, Пренепоро́чная Де́во, все́льшееся Сло́во/ род челове́ческий в Небе́сных дво́рех всели́./ Умоли́ Того́ от тле́ния мя сея́ жи́зни пресели́ти,/ иде́же пото́ком сла́дости пита́ются святи́и.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Врач был еси́, о́тче преди́вен,/ теле́сныя боле́зни врачу́я, в жи́зни сей живы́й те́лом,/ по кончи́не же твое́й душе́вное врачевство́ подава́я,/ я́коже сие́ на армени́не яви́л еси́,/ души́ того́ дав цельбу́ и ко благоче́стию наказа́ние.

Ви́дев тя, свя́те, армени́н в виде́нии чу́дном,/ испове́да я́сно, я́ко свят еси́ и преподо́бен,/ и в ве́ру из неве́рия прело́жся,/ бысть и́нок твои́м направле́нием,/ его́же и нас не лиши́, пою́щих Го́спода во ве́ки.

Мно́гое имы́й дарова́ние,/ чудоде́йствовал еси́, исцеля́я боля́щих,/ ны́не же, сподо́бивыйся бо́льших дарова́ний, приложи́ пла́стырь на ра́ны души́ моея́,/ да, получи́в осла́бу, превозношу́ Го́спода во ве́ки.

Из пламенови́днаго све́та святы́м струи́ благода́ти подаяй, Христе́ Бо́же,/ паля́щия мя стра́сти угаси́ щедро́т Твои́х росо́ю, разгоня́я тьму страсте́й./ Се бо преподо́бный мо́лит с на́ми Тебе́, Го́спода,/ превозноси́маго от всех во ве́ки.

Богоро́дичен: Просвети́вшая мир пречи́стым рождество́м Твои́м,/ мрак злодея́ния моего́ разжени́,/ излива́я мне на благотворе́ние щедро́т Твои́х бога́тую ми́лость,/ да превозношу́ Тя, Ма́терь Бо́жию, во ве́ки.

Песнь 9

Ирмо́с: Бога/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажаем.

Богодарова́ннаго целе́бника лю́дие иму́ще,/ никто́же да гряде́т к су́етным враче́м,/ и́же име́ние и здра́вие врежда́ют,/ но тре́буяй с ве́рою да гряде́т к ра́це Богоно́снаго отца́/ и ту́не прии́мет исцеле́ние.

Мы́сленныя ура́ниша ны разбо́йницы ны́не,/ неисце́льныя у́бо иму́ще я́звы,/ несумне́нно к многочуде́сней припа́даем ра́це твое́й, преподо́бне, и про́сим:/ пода́ждь цельбу́ тре́бующим,/ да вси тя хва́лим и велича́ем.

В Го́рняя душе́ю возше́д, во всесветя́щияся черто́ги,/ оста́вил еси́, преблаже́нне, ра́ку моще́й свои́х в пеще́ре;/ и́мже покланя́ющеся, про́сим:/ пода́ждь неду́гом на́шим исцеле́ние,/ да тя пе́сньми велича́ем.

По́мощи от Тебе́ в не́мощех прося́щих не пре́зри,/ но посеще́нием твои́м даждь душе́вное вку́пе и теле́сное исцеле́ние, преблаже́нне Ага́пите,/ я́ко сый врач преизя́щный, да вы́ну тя велича́ем.

Богоро́дичен: По́мощи от Тебе́ тре́бующих не пре́зри, Де́во,/ но подава́й с ве́рою к Тебе́ притека́ющим:/ Ты бо еси́ исто́чник цельба́м неоску́ден,/ да Тя с Небе́сными си́лами при́сно велича́ем.

Светилен:

Тле́нная ми́ра оста́вив/ и нетле́нная сподо́бився прия́ти,/ потща́лся еси́ ху́ждшая на лу́чшая премени́ти,/ обнища́в любоиме́нием стра́стным,/ но обогати́вся дарова́нием исцеле́ний, и нам сия́ пода́й,/ днесь па́мять твою́ почита́ющим, всеблаже́нне Ага́пите.

Сла́ва, и ны́не, Богоро́дичен:

Спа́сшиися Тобо́ю, Чи́стую Тя Ма́терь испове́дуем:/ родила́ бо еси́ Того́, Иже Кресто́м разруши́ смерть,/ и, возше́д на высоту́, вся привлече́ к Себе́,/ и нам дарова́ ве́лию ми́лость.

На хвали́тех стихи́ры, глас 4.

Подо́бен: Дал еси́ зна́мение:

Стра́стная пло́ти взыгра́ния увяди́в по́стническими труды́/ и возше́д на высоту́ доброде́телей,/ светле́е со́лнца показа́лся еси́,/ благода́тию исцеле́ний сия́я/ и просвеща́я тех луча́ми к тебе́ приходя́щих./ Те́мже тя мо́лим, преподо́бне,/ любо́вию па́мять твою́ почита́ющим,/ пода́ждь неду́гом исцеле́ние.

От Еди́наго Человеколю́бца свы́ше прие́мь бога́тое дарова́ние,/ раздава́л еси́ то тре́бующим неоску́дно,/ подая́ тем исцеле́ние,/ но и ны́не к ра́це моще́й твои́х припа́дающим/ низпосли́ цельбу́ в неду́зех,/ я́ко и́стинный врач, преблаже́нне,/ и моли́твенник о душа́х на́ших.

Ве́рою и любо́вию совоку́пльшеся, лю́дие,/ в па́мяти достоблаже́ннаго отца́,/ пе́сненными гла́сы восхва́лим,/ да исцеле́ния в не́мощех на́ших от него́ сподо́бимся:/ и́мать бо ско́рое преклоне́ние/ и подае́т исцеле́ние, я́ко врач безме́здный/ и ско́рый в ско́рбех помо́щник.

Слава, глас 2:

Безконе́чная Твоя́, Христе́ Царю́, благода́ть/ и дарова́ние ве́лие,/ е́же дарова́л еси́ преподо́бному Твоему́:/ не то́кмо бо живы́й те́лом исцеля́ше неду́ги,/ но и по сме́рти Боже́ственною си́лою Твое́ю/ ра́ка моще́й его́ нетле́нных/ подае́т с ве́рою приходя́щим исцеле́ние./ Тем мо́лимтися, Благи́й Влады́ко,/ свята́го Твоего́ приводя́ще во умилостивле́ние/ по мно́зей Твое́й бла́гости,/ душе́вных и теле́сных нас неду́гов свободи́/ и спаси́ ду́ши на́ша, я́ко Человеколю́бец.

И ныне, Богоро́дичен.