На Го́споди, воззва́х: стихи́ры, глас 8.

Подо́бен: Что вас нарече́м:

Что́ тя имену́ем, Богодохнове́нне?/ главу́ ли правосла́вныя Це́ркве Христо́вы/ о́ко ли благоче́стия,/ зре́ти явле́нно се́рдцем ра́зум духо́вный,/ всем источа́ющий конце́м сло́во жи́зни,/ Богоначерта́нный сви́ток ве́ры пра́выя?/ Моли́ спасти́ся ду́шам на́шим.

Что тя ны́не пронареку́, чу́дне?/ пропове́дника ли и́стины и основа́ние тве́рдо?/ старе́йшину верхо́внаго собо́ра честна́го,/ пра́вило уче́ний изве́стно/ и ме́рило иму́ще исправле́ние,/ Несто́риево разделе́ние и Евти́хиево слия́ние отсека́юща/ Богоплете́нными явле́ньми.

Что тя ны́не нареку́, ди́вне?/ нача́льника ли и царя́ теле́сных страсте́й,/ душе́вное влады́чество направля́юща светло́?/ Боже́ственнаго ми́лования сосу́д,/ любве соверше́нныя жили́ще?/ человеколюбе́зна согреша́ющим, обраще́ния ожида́юща?/ Моли́ спасти́ся ду́шам на́шим.

Сла́ва, и ны́не, Богоро́дичен.

Подо́бен то́йже:

Кому́ уподо́билася еси́, окая́нная душе́,/ к пока́янию ника́коже возни́чущи/ и огня́ не ужаса́ющися, злых ожида́ющаго?/ Воста́ни, и еди́ну к заступле́нию ско́рую призови́, и возопи́й:/ Де́во Ма́ти,/ моли́ Твоего́ Сы́на и Бо́га на́шего/ изба́вити мя от се́ти льсти́ваго.

Крестобогоро́дичен.

Подо́бен то́йже:

А́гница А́гнца я́ко ви́де,/ на Дре́ве просте́рта во́лею Крестнем,/ вопия́ше ма́терски и боле́знующи с пла́чем:/ Сы́не Мой, что стра́нное сие́ виде́ние?/ всем живо́т даяй я́ко Госпо́дь,/ ка́ко умерщвля́ешиея, Долготерпели́ве,/ земны́м подая́ воскресе́ние?/ Сла́влю Твое́ мно́гое, Бо́же мой, снизхожде́ние.

Тропа́рь, глас 8:

Правосла́вия наста́вниче,/ благоче́стия учи́телю и чистоты́,/ вселе́нныя свети́льниче, архиере́ев Богодухнове́нное удобре́ние,/ Льве прему́дре,/ уче́ньми твои́ми вся просвети́л еси́, цевни́це духо́вная./ Моли́ Христа́ Бо́га спасти́ся ду́шам на́шим.

Кано́н, его́же краегране́сие: Всему́дрому Льву пе́сни плету́. Творе́ние Феофа́ново. Глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Че́рмное мо́ре,/ я́ко Еди́н сла́вно просла́вися.

Свяще́нства пома́занием, всеблаже́нне, удобре́н,/ укра́сил еси́ сие́ доброде́тельными ви́ды, пребога́те.

Я́коже зрел грозд, о́тче, изгне́л еси́ рйзум,/ весе́лия крати́р, треблаже́нне, прему́дрости твое́й всем предложи́л еси́.

Петра́ верхо́внаго престо́ла насле́дник был еси́,/ того́ име́я нрав и ре́вность, Богому́дре, ве́ры.

Богоро́дичен: Зако́на преступле́нием осуждена́ первозда́ннаго,/ Спа́са ро́ждши, Богома́ти Чи́стая, свободи́ла еси́.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты ме́не утверди́ в любви́ Твое́й,/ жела́нии кра́ю, ве́рных утвержде́ние,/ Еди́не Человеколю́бче.

Столп правосла́вия Христо́вы Це́ркве, всему́дре Льве, усе́рдно нося́, возста́вил еси́,/ его́же держа́нии, еретико́в безбо́жныя разруша́ет полки́ и собо́рища.

Небе́сныя и Боже́ственныя насы́тився благода́ти,/ церко́вныя до́гматы, о́тче, предложи́л еси́,/ со все́ми бо́рбствуя ерети́ческими языкобо́лии,/ благоче́стия побо́рниче, Льве пребога́те.

Све́том пресветле́йшим озари́вся, преподо́бие,/ неизглаго́ланнаго и Боже́ственнаго вочелове́чения,/ Сло́во уясни́л еси́,/ сугу́бо, рек, существо́ и сугу́бо де́йство вопло́щшагося Бо́га.

Богоро́дичен: Украси́лася еси́, я́ко неве́ста, де́вственными добро́тами,/ обра́дованная Де́во Ма́ти Неневе́стная,/ вся́кия бо тва́ри Ты превознесла́ся еси́ мно́жае,/ я́ко всех вино́вное Сло́во ро́ждшая.

Седа́лен, глас 3.

Подо́бен: Боже́ственныя ве́ры:

Уста́вил еси́ дерзнове́ния,/ де́лы уве́рил еси́ правосла́вия,/ я́ко упова́, я́ко лев, пра́ведный;/ и́стины пропове́даеши уче́ния/ и облича́вши преле́сти сокрове́ния,/ о́тче преподо́бие, Христа́ Бо́га моли́/ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственнаго естества́ не отлу́чься,/ плоть быв во чре́ве Твое́м,/ но Бог вочелове́чься и пребы́сть,/ и́же по Рождестве́ Ма́терь Тя Де́ву,/ я́ко пре́жде Рождества́, сохрани́в Всенепоро́чну, Е́дин Госпо́дь,/ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница,/ Сло́ва нетле́нная Де́ва Ма́ти,/ на Кресте́ зря́щи пове́шена, из Ней без боле́зни прозя́бшаго,/ ма́терски подо́бно, рыда́ющи, вопия́ше:/ увы́ Мне, Ча́до Мое́,/ ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Из горы́ приосене́нныя, Сло́ве, проро́к,/ Еди́ный Богоро́дицы,/ хотя́ща воплоти́тися Богови́дно усмотри́/ и со стра́хом славосло́вяше си́лу Твою́.

Лев ты я́ко и́стинно, преблаже́нне, яви́лся еси́,/ смуща́ющия ли́сы отгоня́, ца́рским ры́канием ужа́сая нечести́вых умышле́ния.

Скрыл еси́ приложе́нием твои́х до́гматов богоме́рзких е́ресей следы́,/ сокрове́нную и́стину взыска́в, священнотаи́нниче всече́стне.

У́тро от за́пада возсия́л еси́, треблаже́нне,/ сви́ток благочести́вых до́гматов,/ я́ко лучи́, Це́ркве, Богому́дре, испуща́я и озаря́я ду́ши на́ша.

Богоро́дичен: Умертви́ стремле́ния, Де́во, страсте́й мои́х,/ уста́ви, Блага́я, молву́ прегреше́ний,/ грехо́вную бу́рю Твое́ю тишино́ю, Богороди́тельнице, потребляющи.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чу́ждая тьма, окая́ннаго?/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Сугу́бому де́йству пропове́дник был еси́ Спа́са Христа́:/ де́йствовати бо, рекл еси́, в ко́емждо естестве́, я́коже имя́ше,/ со обои́м слежа́щим обще́нием, святи́телю Богому́дре блаже́нне.

Равномо́щно су́що Ро́ждшему Сло́во позна́л еси́,/ я́коже плоть Сего́ бы́вша, треблаже́нне, уве́рил еси́,/ прили́чно, рекл еси́, пло́тская сво́йства де́яти,/ несли́тно непревра́тно обо́я.

Богоро́дичен: Е́же пре́жде всех век, Еди́ному ве́домо Бо́гу та́инство/ челове́ка бы́ти вся́ческих Влады́ку и Го́спода и с пло́тию смеси́тися кро́ме преложе́ния, из Тебе́, Де́во, яви́ся, прехожде́ние прие́м.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Петра́ честна́го прее́мник, и сего́ нача́льством обогати́вся,/ и теплу́ стяжа́в ре́вность, Богодви́жимый сви́ток написа́л еси́,/ ерети́ческое веле́ние отмета́я смуще́нное, растворе́ние несме́сно соединя́я.

Сы́на Еди́наго, Христа́ и Го́спода, пре́жде век от Отца́ рождена́,/ и нас ра́ди от Де́вы ро́ждшагося, и я́вльшася нам Единосу́щна, пропове́дал еси́ преесте́ственно,/ служи́телю неизглаго́ланных, Богоприя́тне.

Богоро́дичен: Тя, Всечи́стая, спасе́ния Хода́таицу, ве́рнии, испове́дающе, вопие́м:/ ра́дуйся, Чи́стая,/ ра́дуйся, Неве́сто Де́во,/ ра́дуйся, горб Божия присе́нная,/ ми́ру бо Ты ра́дость присносу́щыую источи́ла еси́.

Конда́к, глас 3.

Подо́бен: Де́ва днесь:

На престо́ле, сла́вне, свяще́нства сед/ и львов уста́ слове́сных загради́в,/ до́гматы Богодухнове́нными Честны́я Тро́ицы озари́л еси́ свет Богоразу́мия твоему́ ста́ду./ Сего́ ра́ди просла́вился еси́/ я́ко Боже́ственный таи́нник Бо́жия бла́годати.

И́кос:

Отца́, и Сы́на, и Ду́ха Свята́го/ Трисо́лнечный Свет,/ Трисвяту́ю Си́лу,/ Божество́ Еди́но и Еди́но Существо́,/ Сию́ пропове́дав, уста́ льсти́вая до конца́ загради́л еси́ ерети́чествующих,/ Льве Богому́дре./ Те́мже Чи́стую Богороди́тельницу я́ко Богоро́дицу испове́дав,/ Несто́риево безу́мие и буесло́вие низложи́л еси́,/ сего́ ра́ди позна́лся еси́ в ми́ре и в Ри́ме/ я́ко Боже́ственный таи́нник Бо́жия благода́ти.

Песнь 7

Ирмо́с: О́троцы евре́йстии в пе́щи/ попра́ша пла́мень дерзнове́нно/ и на росу́ огнь преложи́ша, вопию́ще:/ благослове́н еси́, Го́споди Бо́же, во ве́ки.

Сна не дал еси́ ве́ждома,/ дóндеже из ко́рене исто́ргл еси́ лесть Евти́ха обезу́мившагося, зовы́й:/ благослове́н еси́, Го́споди Бо́же, во ве́ки.

Еди́ну Ипоста́сь во двою́ существу́, Христа́ испове́дав,/ де́йствующа сугу́бо и хотя́ща, ны́не пое́ши:/ благослове́н еси́, Го́споди Бо́же, во ве́ки.

Богоро́дичен: Ны́не к Тебе́ прибега́ю, Богома́ти,/ прегреше́ний плени́цами стя́гнут, за милосе́рдие ми́лости изба́ви мя, вопию́ща:/ благослове́н, Пречи́стая, Плод Твоего́ чре́ва.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасены́, сия́ ви́дев,/ Творцу́ и Избави́телю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Всесве́тел, я́ко со́лнце, от за́пада возсия́л еси́, чу́до, Богоглаго́ливе, я́ве пресла́вно,/ смеше́ние и слия́ние Евти́хиево изсуши́в я́ве и Несто́риево разделе́ние пресека́я,/ уча́ Еди́наго чествова́ти Христа́ во двою́ существу́/ неразде́льно, непревра́тно, неслия́нно.

От Бо́га дви́жим, благоче́стия уче́ния,/ я́ко на Богочерта́нных скрижа́лех вообрази́л еси́,/ я́коже Моисе́й вторы́й, яви́вся Боже́ственным лю́дем/ и собо́ру че́стных учи́телей, зовы́й:/ о́троцы, бла́гослови́те, свяще́нницы, воспо́йте,/ лю́дие, превозноси́те во вся ве́ки.

Воплоще́ннаго, преподо́бне, пре́жде безпло́тнаго, позна́л еси́,/ Сло́ва О́тча Единоро́днаго и Собезнача́льнаго, в ле́то безле́тнаго,/ опи́сана у́бо пло́тию, я́ко Творца́ же описа́ния не веду́ща, учи́ши, взыва́я:/ свяще́ннии, воспо́йте, лю́дие, и превозноси́те Его́ во ве́ки.

Богоро́дичен: Обложе́нием телесе́ обложи́ся, Пречи́стая, от Твои́х крове́й,/ свети́л добро́тами, со́лнцем и луно́ю не́бо просвети́вый Бог,/ одушевле́нное Тя друго́е Не́бо показа́в,/ Его́же о́троцы благословя́т, свяще́нницы воспева́ют,/ лю́дие превозно́сят во вся ве́ки.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Сия́еши ны́не, таи́нниче Христо́в, благоле́пия ве́нцем укра́шен/ и, я́ко ве́рен святи́тель, пра́вдою вои́стинну оде́ялся еси́/ и, в рай сла́дости лику́я, чу́дне,/ о па́стве твое́й Влады́ку приле́жно умоли́.

Иде́же ны́не патриа́рхов председа́ния же, и престо́ли, и чини́,/ Льве всеблаже́нне, ты досто́йно, о́тче, всели́лся еси́,/ я́ко патриа́рх и́стинен, и 4 ве́рою и благода́тию осияемъ./ Те́мже вси тя при́сно блажи́м.

От бу́ри жите́йския отступи́в, ко Христу́ прише́л еси́,/ Льве всеизря́днейше,/ на ме́сте зла́чнем почива́я,/ иде́же пото́к сла́дости, и Свет Невече́рний,/ и несказа́нное весе́лие, и ра́дость пребыва́ющая.

Богоро́дичен: Зре́лу пожина́ю жизнь, невреди́му дре́вом ра́зума:/ Ты бо, Всенепоро́чная, жи́зни дре́во – Христа́ процвела́ еси́,/ вхо́ды жи́зни всем сказа́вши./ Тем Тя, Всечи́стая, Богоро́дицу, ве́рнии, велича́ем.

Свети́лен.

Подо́бен: Не́бо звезда́ми:

Святи́телей сла́ва и ве́рных защи́тник,/ ты яви́лся еси́, Богому́дре о́тче, и столп доброде́телей./ Те́мже помина́й всегда́ воспева́ющия тя любо́вию.

Богоро́дичен: Тя Предста́тельницу вси иму́ще гре́шнии, о Пресвята́я Де́во!/ Ты благопремени́тельна нам сотвори́ Сы́на Твоего́/ Ма́терними Твои́ми моли́твами.

На ма́лой вече́рни

На Го́споди, воззва́х: стихи́ры, глас 1:

Подо́бен: Прехва́льнии му́ченицы:

Сия́, преподо́бие о́тче Космо,/ я́же Бо́жественный апо́стол Па́вел/ до тре́тияго Небе́се восхище́нный ви́дев написа́,/ о́ко не ви́де, и у́хо не слы́ша,/ и на се́рдце челове́ку плотяну не взыдо́ша,/ я́же угото́ва Бог лю́бящим Его́,/ слы́шав, кре́пко во уме́ себе́ прия́л еси́/ и, тая́ при́сно по́мня, мона́шествовати возлюби́л еси́,/ в неже усе́рдно облеки́йся,/ непреста́нно Триипоста́сному Божеству́ Херуви́мскую песнь, ра́дуяся, воспева́л еси́:/ аллилу́йя, аллилу́йя, аллилу́йя, сла́ва Тебе́, Бо́же.

Моя́ благода́рственный хвалы́, –/ блаже́нне, вы́ну вопия́л еси́, –/ Влады́ко Го́споди Вседержи́телю, приими́:/ Ты бо еси́ мой и всея тва́ри Созда́тель,/ и́бо и аз пречи́стою Твое́ю руко́ю сотворе́ние/ и о́браз и подо́бие Твое́я Боже́ственныя сла́вы ношу́,/ но сне́дию дре́ва су́етно прельсти́вся,/ пра́ведно ра́йския доброты́ изпадо́х,/ и во удоль сию́ плаче́вную вселе́н бых,/ от нея́же к Тебе́, Избави́телю мой, возве́д мя,/ в Небе́сных селе́ниях серафи́мски пе́ти учини́:/ аллилу́йя, аллилу́йя, аллилу́йя, сла́ва Тебе́, Бо́же.

Но́выя Небе́сныя пресве́тлыя оби́тели/ восприя́ша тя но́ваго граждани́на,/ в ни́хже, ра́дуяся, со А́нгелы, живе́ши,/ со апо́столы, и проро́ки, и святи́тели лику́я,/ и му́ченики и преподо́бными светло́ торжеству́я,/ с весе́лием Присносу́щней Тро́ице предстои́ши;/ Ю́же усе́рдно моли́, приле́жно мо́лим тя, о́тче!/ низпосла́ти Церква́м пра́восла́вное соедине́ние/ и преми́рное спасе́ние, Богосло́вие пою́ще Ей:/ Свят, Свят, Свят еси́, Бо́же.

Сла́ва, глас 3:

Пе́сни Богогла́сныя прино́сим Тебе́, Христе́ – Сло́ве Безнача́льнаго Ума́,/ и Сы́не Единоро́дный и Соприсносу́щный Преве́чнаго Отца́,/ я́ко та́ко благоволи́л еси́ за ны смири́тися,/ зрак раба́ восприя́л еси́, Бо́же, от Пречи́стыя и Присноде́вы Мари́и,/ и от Ду́ха Свята́го воплоще́н,/ Крест, и смерть, и погребе́ние пло́тию за грехи́ на́ша претерпе́л еси́,/ и воскре́сл еси́ сла́вно я́ко Бог,/ челове́ка возводя́ в перворо́дное блаже́нство,/ его́же огнепа́льно жела́я твой рачи́тель,/ наш до́брый па́стырь и прему́дрый учи́тель,/ священне́йший оте́ц, общежи́тельный нача́льник преподо́бный Косма,/ усе́рдно во след Тебе́ – Жениха́ Небе́снаго потече́,/ ве́рою, любо́вию и наде́ждою,/ бде́нием же, ку́пно и посто́м и моли́твами,/ и́миже, я́ко Небопа́рнейший оре́л,/ А́нгельское на земли́ житие́ соверши́в,/ в Небе́сный Сио́н возлете́/и в Го́рнем Иерусали́ме водвори́ся,/ пресла́вно же наслажда́лся Боже́ственныя Твое́я сла́вы,/ его́же моли́твами мо́лим Тя, Иису́се, Царю́,/ умири́ мир и Правосла́вие утверди́,/ и Небе́снаго Твоего́ Ца́рствия сподо́би нас.

И ны́не, Богоро́дичен, глас то́йже:

Преве́лие чу́до – Де́ва ро́ждшая/ и рожде́нное Бог пре́жде век./ О, та́инства стра́шнаго!/ Е́же мы́слимое неизрече́нно пребыва́ет/ и зри́мое не пое́млется,/ блаже́нна Ты еси́, Пречи́стая Отрокови́це./ Ада́ма земна́го Дщи/ и Бо́га Вы́шняго я́вльшаяся Ма́ти,/ Того́ моли́ спасти́ся ду́шам на́шим.

На стихо́вне стихи́ры, глас 2.

Подо́бен: До́ме .Евфра́фов:

Приими́ пе́ние чад твои́х,/ Космо, преподо́бие о́тче наш,/ и пода́ждь нам кре́пость и си́лу/ на неви́димыя и ви́димыя враги́ на́ша,/ моле́бными твои́ми ко Христу́ хода́тайствы.

Стих: Честна́ пред Господем/ смерть преподо́бных Его́.

О́тче преди́вный и Богоблаже́нный Космо́,/ ты на земли́ Ангельски пожи́л еси́,/ и на Небесе́х, я́ко челове́к Бо́жий, водвори́лся еси́./ Помяни́ и нас, соверша́ющих па́мять твою́,/ и усе́рдно пою́щих тя, целе́бниче.

Стих: Блаже́н муж, бояйся Го́спода,/ в за́поведех Его́ восхо́щет зело́.

Космо́, свяще́нный о́тче наш,/ моли́ Христа́ Бо́га о всех нас,/ притека́ющих с ве́рою к ра́не честне́й чудотво́рных и целе́бных моще́й твои́х,/ и усе́рдно пою́щих тя,/ и прося́щих исцеле́ния и спасе́ния душе́внаго и теле́снаго.

Сла́ва, глас 5:

Преблаже́нный рабе́ Бо́жий/ и ве́рный слуго́ Госпо́день,/ при́сный и любе́зный ты показа́лся еси́,/ А́нгел земны́й и челове́к Небе́сный,/ ты, да́нныя тебе́ от Го́спода тала́нты усе́рдно де́лая,/ духо́вною ре́вностию многобога́тно расплоди́л еси́,/ и красноцвету́щия доброде́телей плоды́ возрасти́л еси́,/ и ве́село, засия́, в ра́дость Влады́ки своего́ вшел еси́,/ преподо́бием и пра́вдою со́лнцео́бразно сия́я,/ сла́вою непристу́пнаго Божества́ Его́ озаря́ем,/ и вене́ц от десни́цы Вы́шняго восприя́л еси́,/ Его́же непреста́нно со все́ми святы́ми моли́,/ правосла́вному во́инству победи́тельная на ва́рвары дарова́ти/ и всех христиа́н в ми́ре и тишине́ и благоде́нствии утверди́ти/ и спасти́ ду́ши на́ша по вели́цей Его́ ми́лости.

И ны́не, глас то́йже:

Я́же о Тебе́ проро́чествия испо́лнишася, Де́во Чи́стая,/ ов у́бо от проро́к дверь Тя прорече́ на восто́к зря́щую,/ ю́же никто́же про́йде,/ то́чию Зижди́тель Твой и всего́ ми́ра;/ ов купину́ огне́м жегому,/ я́ко в Тебе́ оби́та огнь Божества́, и не опали́ма пребы́сть;/ ин го́ру святу́ю,/ от нея́же ка́мень краеуго́льный кро́ме руки́ челове́ческия отсечеся,/ и порази́ о́браз мы́сленнаго Навуходоно́сора:/ вои́стинну ве́лие и пресла́вное, е́же в Тебе́ та́инство есть, Богома́ти,/ те́мже Тя сла́вим,/ Тобо́ю бо бысть спасе́ние ду́шам на́шим.

На вели́цей вече́рни

На Го́споди, воззва́х: стихи́ры, глас 1.

Подо́бен: Прехва́льнии му́ченицы:

О́тче Космо́ пречудный,/ твоя́ прекра́сная память свяще́нных собра́ние весели́т,/ добре́ твое́ житие́ и чуде́с благода́ть,/ и́же ве́рных совокупле́ния облистава́ет дарова́ний све́тлостьми:/ Христу́ моли́ся дарова́ти ду́шам на́шим/ мир и ве́лию ми́лость.

О́тче Космо́ пречу́дный,/ вре́менных презря́ и до́льних, Богому́дре,/ высо́кая пребыва́ющая возлюби́л еси́,/ сме́ртное попече́ние в се́рдце стяжа́л еси́,/ Христу́ моли́ся дарова́ти ду́шам на́шим/ мир и ве́лию ми́лость.

О́тче Космо́ преми́рный,/ до́брыми доблестьми́ возше́д на колесни́цу доброде́телей,/ к Бо́гу восте́кл еси́,/ побе́дныя по́чести прие́мляй,/ я́ко ми́лоть нам те́ло твое́, положе́нно во гро́бе, о́тче,/ оста́вил еси́ источа́ти исцеле́ния,/ Христу́ моли́ся дарова́ти ду́шам на́шим/ мир и ве́лию ми́лость.

Сла́ва, глас 6:

Днесь созыва́ет нас преподо́бнаго всеми́рное торжество́:/ прииди́те у́бо, празднолю́бцы,/ светло́ пра́зднуем па́мять его́, глаго́люще:/ ра́дуйся, свети́льниче всесве́тлый;/ возводя́ ко Христу́ и́нок мно́жества;/ ра́дуйся, по́стником похвале́ и удобрение;/ ра́дуйся, преимени́тому гра́ду Влади́миру и всем ве́рным/ благоути́шное приста́нище и очище́ние боля́щим во гресе́х;/ ра́дуйся, Небе́сных чино́в сия́ния ви́дети сподо́бивыйся,/ с ни́ми же ны́не ра́дуешися, во сла́ве предстоя́ Христу́ Бо́гу,/ Его́же моли́ по́стников удобре́ние,/ Космо́ о́тче всеми́рный,/ изба́вити нас ви́димых и неви́димых враг/ и спасти́ ду́ши на́ша.

И ны́не, Богоро́дичен: Кто Тебе́ не ублажи́т: Вход. Проки́мен дне. И чте́ния три преподо́бническая.

На литии́ стихи́ры, глас 5:

Преподо́бие о́тче Космо́,/ не дал еси́ сна твои́ма очи́ма,/ ни ве́ждома дрема́ния,/ до́ндеже ду́шу и те́ло от страсте́й свободи́л еси́,/ и жили́ще Бо́гу соде́лал еси́,/ прише́д бо Христо́с со Отце́м, оби́тель в тебе́ сотвори́,/ отню́дуже благода́ть прие́м, преподо́бие Космо́,/ моли́ Единосу́щную Тро́ицу о ду́шах на́ших.

Глас 6:

И́же на земли́ А́нгела,/ и на Небеси́ челове́ка Божия,/ ми́ру благо́е украше́ние,/ пи́щу благи́м и доброде́тельных рачи́теля,/ по́стников похвалу́,/ Ко́ему почтим:/ насажде́н бо в до́му Бо́жий,/ и процве́те пра́ведно,/ и я́ко кедр в пусты́не,/ умно́жил еси́ ста́до Христо́во слове́сных ове́ц/ во преподо́бии и пра́вде.

Глас 8:

Преподо́бие о́тче Космо,/ ты мирско́е попече́ние и пристра́стие/ от ю́ности возненави́дел еси́/ и от Небе́снаго тя осия́ния/ глас свы́ше услы́шати сподо́бился еси́,/ вку́пе же и явле́ния от высоты́ чуде́сныя ико́ны,/ сла́внаго Успе́ния Пречи́стыя Богоро́дицы,/ ю́же тогда́ я́ко многоце́нный тебе́ от Бо́га дар,/ умиле́нным ду́хом и радостотво́рным пла́чем на руце, о́тче, прии́м,/ усе́рдно после́довал еси́ Зва́вшему тя с Небесе́/ и внеза́пу Бо́жиим манове́нием обре́лся еси́ на ме́сте в Бели́цей Ла́вре Пече́рской,/ иде́же мона́шествовати восприи́м,/ па́ки по мно́зех труде́х и преспе́яниих/ чу́дною Бо́жиею си́лою на о́ное же ме́сто/ от Ки́ева восхище́н и предпоста́влен быв,/ оби́тель созда́л еси́,/ бде́нием же, и посто́м, и моли́твами,/ я́ко не́коею ле́ствицею, на Не́бо возше́л еси́,/ и тамо с ли́ки преподо́бных/ предстои́ши у Престо́ла всех Царя́ Христа́ Бо́га,/ те́мже мо́лим тя,/ моли́ся Христу́ Бо́гу на́шему,/ умири́ти мир и спасти́ ду́ши на́ша.

Глас 5:

Преподо́бие о́тче,/ ты возше́д на высоту́ добро́детели,/ я́ко крин Дави́дский, в удо́лиих процве́л еси́,/ и я́ко кедр в Ливане собра́л еси́ ча́да своя́,/ и я́ко го́рлица пусты́ню возлюби́л еси́,/ и мирско́е пристра́стие от себе́ отве́ргл еси́,/ и многоце́ннаго би́сера Христа́ приобре́л,/ и Ца́рство Небе́сное дости́гл еси́,/ и тамо с ли́ки преподо́бных/ предсто́я Христу́ Бо́гу ра́дуешися:/ тем мо́лим тя, преподо́бие,/ моли́ся о ча́дех твои́х Христу́ Бо́гу на́шему,/ и ми́рови по́дати мир,/ и изба́вите нас ве́чнаго муче́ния в день Су́дный.

Глас 8:

Преподо́бие о́тче,/ ты возшел еси́, я́ко некоею высоковосходною лествицею, на Не́бо,/ и тамо с ли́ки преподо́бных сочета́вся/ предстои́ши Христу всех Царю́ Бо́гу на́шему,/ и от Него́ прии́м дар чуде́с де́йство,/ исцеля́ти неду́жныя и прогоня́ти ду́хи лука́вый,/ и́бо и ду́ши приходя́щих с ве́рою к раце моще́й твои́х,/ исцеле́ния прие́млют;/ помоли́ся, преподо́бие,/ изба́витися нам находя́щих зол, и бед, и скорбе́й,/ и ве́чных муче́ний в день Су́дный.

Сла́ва, глас то́йже:

Преподо́бие о́тче Космо́,/ ми́ра красоты́ и пи́щи вре́менный отню́д возненави́дев,/ мона́шеское житие́ па́че возлюби́л еси́,/ А́нгелом собесе́дник бы́ти сподо́бився,/ и свети́льник многосве́тлый Русския земли́,/ чудесы́, я́коже второ́е со́лнце, сия́я;/ но всех нас помина́й, соверша́ющих святу́ю па́мять твою́,/ мы бо ча́да твоя́,/ и о́вцы слове́сных твои́х уче́ний,/ и тя на по́мощь призыва́ем,/ прося́ще тобо́ю прия́ти мир и ве́лию ми́лость.

И ны́не, Богоро́дичен: Безневестная Де́во:

На стихо́вне стихи́ры, глас 4.

Подо́бен: Дал еси́ знамение:

Житие́ твое́ нескве́рно, блаже́нне,/ терпе́ние и кро́тость, и любо́вь нелицеме́рну,/ воздержа́ние безме́рно, стоя́ние всено́щное,/ умиле́ние Бо́жественно,/ ве́ру, наде́жду и ми́лование, о́тче, стяжа́в,/ я́ко А́нгел пожи́л еси́ с пло́тию на земли́, Космо́ преподо́бие,/ моли́твенниче о ду́шах на́ших.

Стих: Честна́ пред Го́сподем/ смерть преподо́бных Его́.

Земны́й А́нгел и Небе́сный челове́к был еси́, преподо́бие,/ исто́чник умиле́ния, ми́лования струя́,/ пучи́на чуде́с, гре́шником спору́чник,/ масли́на вои́стинну Бо́жия плодови́та,/ трудо́в твои́х утиши́ ли́ца, Космо́ в се́чу дне,/ ве́рно восхваля́ющих тя.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ум твой просвеща́ем Боже́ственными ра́зумы,/ теле́сных страсте́й превы́ше бысть непреме́шен,/ земны́х нося́ начерта́ния,/ изобража́я в себе́ Боже́ственную доброту́/ и познава́ем весь Богови́ден де́йством Свята́го Ду́ха,/ Космо́ о́тче наш,/ и́ноков украше́ние.

Сла́ва, глас 6:

Преподо́бие о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́т мзду дел твои́х,/ бесо́вския погуби́л еси́ по́лчища,/ и Ангельския дости́гл еси́ чи́ны,/ и́хже житию́ без поро́ка поревнова́л еси́,/ дерзнове́ние име́я ко Христу́ Бо́гу/ мир испроси́ ду́шам на́шим.

И ны́не, Богоро́дичен: Творе́ц и Изба́витель:

Тропа́рь, глас 4:

Го́рняго жела́я преми́рнаго жития́,/ до́льняя возненави́дел еси́,/ и, взем крест свой, после́довал еси́ Христу́,/ и в пусты́ню всели́лся еси́, досточу́дне,/ в ней подвиза́ся в пе́ниих, в бде́ниих и поще́ниих./ Те́мже в тя всели́ся Пресвяты́й Дух,/ но я́ко име́я дерзнове́ние ко Христу́ Бо́гу,/ испроси́ людем правосла́вным здра́вие и спасе́ние/ и не забу́ди посеща́я чад свои́х,/ соверша́ющих свяще́нную па́мять твою́,/ Космо́, преподо́бие о́тче наш.

Сла́ва, и ны́не, Богоро́дичен.

На у́трени

По 1-м стихосло́вии седа́лен, глас 1.

Подо́бен: Гроб Твой:

Я́ко со́лнце све́тлое, возсия́вши, о́тче, па́мять твоя́,/ ве́рных сердца́ просвеща́ет, страсте́й тьму отгоня́ющи;/ ве́ру же и чистоту́ творя́щая,/ покры́й и сохрани́ от искуше́ний жите́йских нас, о́тче Космо́ блаже́нный.

Сла́ва, и ны́не, Богоро́дичен:

Безневе́стная Чи́стая Богоро́дице Де́во,/ Еди́на ве́рным Предста́тельнице и покро́ве,/ бед, и скорбе́й, и лю́тых обстоя́ний изба́ви,/ и́же на Тя наде́жду, Отрокови́це, иму́щих,/ и ду́ши на́ша спаси́ Боже́ственными Твои́ми моли́твами.

По 2-м стихосло́вии седа́лен, глас 3.

Подо́бен: Красоте́ де́вства:

Ко Го́споду име́я о́чи серде́чныя,/ вся, и́же на земли́, оста́вил еси́,/ и мно́гими труды́ твои́ми свое́ житие́ изъясни́в,/ и па́че вся́кия доброты́ оби́тель показа́ся,/ во псалме́х и пе́снех Го́сподеви пою́ще,/ моли́ спасти́ся ду́шам на́шим.

Сла́ва, и ны́не, Богоро́дичен:

Небе́сная веселя́хуся и земна́я с тре́петом у́жасахуся,/ егда́ пречи́стый глас на́йде на Тя, Богоро́дице,/ еди́но бо торжество́ обо́йм возсия́,/ егда́ Безпло́тный ра́дость Тебе́ принесе́./ Те́мже со А́нгелом Тебе́ вопием:/ ра́дуйся, Обра́дованная.

По полиеле́и седа́лен, глас 4:

Возсия́ па́мять твоя́, я́ко со́лнце блиста́ющи заря́ми,/ ми́ру твои́ми чудесы́, преподо́бие Космо́,/ светоно́сче блаже́нне, по́стником похвало́/ и гра́ду Влади́миру вели́кое заступле́ние.

Сла́ва, и ньше, Богоро́дичен:

Под кров Твой, Пречи́стая Де́во, прибега́ющих/ мольбу́ принеси́ о нас Человеколю́бцу Христу́ Бо́гу,/ спасти́ся рабо́м Твои́м.

Степе́нна, 1-й антифо́н 4-го гла́са. Проки́мен: Честна́ пред Го́сподем: Стих: Что возда́м: Ева́нгелие от Матфе́я, зачало 43.

По 50-м псалме́ стихи́ра, глас 6:

Ева́нгельски Бо́га возлюби́л еси́,/ к Нему́ добро́детельми прибли́жися,/ Го́рних жела́я,/ до́ндеже, блаже́нне, в безконе́чней жи́зни/ Боже́ственным раче́нием всели́лся еси́:/ но моли́ся, преподо́бие о́тче Космо́, Христу́ Бо́гу,/ по́дати побе́ды на враги́ стране́ на́шей/ и изба́вит вся́каго обстоя́ния/ и́же ве́рою соверша́ющих прече́стную и святу́ю па́мять твою́.

Кано́н Богоро́дице со ирмосо́м на 6 и преподо́бному Косме́, творе́ние смире́ннаго Григория, емуже краегране́сие сице: От недосто́инства моего́ приноша́ю ти моле́бныя пе́сни, блаже́нне. Глас 8.

Песнь 1

Ирмо́с: Пои́м Бо́гу/ от го́рький рабо́ты фарао́новы изба́вльшему Изра́иля,/ и о́гненным столпо́м и све́тлым о́блаком наста́вльшему,/ я́ко просла́вися.

Я́ко безпло́тен, блаже́нне, на земли́ пожи́в,/ и ны́не на Небеси́ с ли́ки преподо́бных счетава́яся,/ с ни́ми же ра́дуяся, помина́й нас, чту́щих тя ве́рно.

Сою́зом грехо́вным помраче́нное се́рдце мое́, просвети́, блаже́нне Космо́,/ те́плыми твои́ми ко Влады́це моли́твами.

Умо́м очи́щенным Богови поработи́лся еси́, блаже́нне,/ целому́дрием теле́сным и чистото́ю ду́шу твою́ просвети́л еси́.

Богоро́дичен: Прему́дрость и Сло́во О́тчее несказа́нно ро́ждшая,/ души́ мое́й лю́тую исцели́ я́зву и серде́чную укроти́ боле́знь.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Ду́хом разжже́н быв, о́тче,/ труды́ подъя́л еси́, я́ко безпло́тен,/ возвы́сився смире́нием, верхи́ бесо́вския смири́л еси́, всече́стне,/ сла́ва и́ноком и утвержде́ние.

По у́зкому пути́ ходи́л еси́ Боже́ственными восхожде́нии,/ простра́ннаго же пути́ от ю́ности удаля́яся/ и неви́димаго, о́тче, зми́я смири́л еси́, смире́нием огра́ждьшся.

Моле́бный глас мой услы́ша, о́тче преблаже́нный,/ и не забу́ди раба́ твоего́,/ воспева́ющаго честны́я твоя́ по́двиги.

Богоро́дичен: Уста́ви неуста́вное помышле́ние, Чи́стая Ма́ти Божия,/ Сы́ну Своему́ моля́щися,/ и напра́ви смуще́нная движе́ния се́рдца моего́.

Се дален, глас 8:

Ра́зума тве́рдостию украша́яся, преподо́бие,/ плотски́я тя́гости отве́рг, зми́еву горды́ню попра́л еси́/ и оби́телище и́збранно был еси́ Пресвято́му Ду́ху,/ неукло́нным ра́зумом поработи́лся еси́ Христу́ Бо́гу, всеблаже́нне Космо́,/ Того́ моли́ грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и Еди́ну в же́нах Тя без семе́не ро́ждшую Бо́га пло́тию,/ вси ублажа́ем ро́ди челове́честии,/ Огнь бо всели́ся в Тя Божества́,/ и я́ко Младе́нца дои́ши Зижди́теля и Го́спода./ Тем А́нгельский и челове́ческий род,/ досто́йно сла́вим пресвято́е рождество́ Твое́ и согла́сно вопие́м Ти:/ моли́ Христа́ Бо́га, согреше́ний оставле́ние дарова́ти/ покланя́ющимся ве́рою пресвято́му Рождеству́ Твоему́.

Песнь 4

Ирмо́с: Всел еси́ на ко́ни, апо́столы Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бысть ежде́ние Твое́,/ ве́рно пою́щим;/ сла́ва си́ле Твое́й, Го́споди.

Всел еси́ на коня́,/ в путе́х пра́вых неукло́нно ше́ствовал еси́,/ дости́гл еси́, блаже́нне, широты́ ра́йския/ и по́стническим ли́ком счета́лся еси́.

В пусты́ню Боже́ственным манове́нием представля́ем, преподо́бие,/ жела́нием всели́лся еси́ и в ней подвиза́лся еси́ кре́пкими по́двиги и поще́нием,/ мона́шествующим показа́лся еси́ верх и основа́ние/ и научи́ вопи́ти:/ сла́ва си́ле Твое́й, Го́споди.

Храм Го́сподеви Боголе́пен воздви́гл еси́,/ и Того́ Рождшей именова́л еси́, по о́бразу я́вльшемуся тебе́ свы́ше:/ в не́мже и сла́вятся при́сно честны́я твоя́ по́двиги, Космо́ всеблаже́нне.

Богоро́дичен: Ра́дуйся, Влады́чице Де́во,/ церква́м еси́ красото́, правосла́вным похвале́ и державо;/ непреста́нно моли́ся, Богоро́дице, Сы́ну Твоему́,/ сохрани́ти Це́рковь Святу́ю и лю́ди правосла́вный от вся́каго обстоя́ния.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою,/ Твой мир подаждь нам,/ Человеколю́бче.

Просвеща́ем ум твой Боже́ственными ра́зумы,/ теле́сных страсте́й превы́ше быв непреме́шен,/ земны́м нося́ начерта́ние, блаже́нне.

О́тче треблаже́нный, не забу́ди посеща́я чад свои́х,/ соверша́ющих че́стную па́мять твою́,/ я́ко да моли́твами твои́ми избу́дем от вся́кия ну́жды.

Нощь грехо́вная покры́ла мя есть, о́тче,/ но озари́ мя покая́нием, преподо́бие,/ я́ко да омыю скве́рну от окая́нныя моея души́.

Богоро́дичен: Всесве́тлым укра́шена све́том, Богора́дованная Ма́ти,/ Ты бо породи́ честне́йши всех Христа́ Бо́га на́шего,/ Его́же моли́, да изба́вит ны от вся́ких напа́стей.

Песнь 6

Ирмо́с: Ри́зу мне пода́ждь светлу,/ одея́ися Све́том, я́ко ри́зою,/ Многоми́лостиве, Христе́ Бо́же наш.

Масли́на вои́стинну Божия плодови́та, ты был еси́, преподо́бие;/ еле́ем трудо́в твои́х утиши́ ли́ца, Космо́ всечу́дный,/ ве́рно хваля́щих тя.

Земный А́нгел и Небе́сный челове́к был еси́, преподо́бие,/ исто́чник умиле́ния, ми́лования струя́ и пучи́на чудесем.

Сле́зными пото́ки и по́стными поты́/ углия сла́дости погаси́л еси́, преподо́бие,/ и в чудесе́х, славна́ тя показа́ Госпо́дь, Космо́ блаже́нне,/ и украси́ тя Вы́шними дарова́нии.

Богоро́дичен: Прокля́тся смерть Тобо́ю/ и а́дово жа́ло притупи́ся, Ма́ти Чи́стая,/ Ты бо Безсмертна́го Влады́ку Христа́ пло́тию родила́ еси́.

Конда́к, глас 8.

Подо́бен: Взбра́нной:

Душе́вныя стра́сти из ко́рене исторга́я,/ в пусты́ню всели́лся еси́, преподо́бие,/ и неболе́зненную жизнь в боле́знех восприя́л еси́,/ боле́зней же лю́тым уставля́еши озлобле́ния прося́щим у тебе́ с ве́рою./ Те́мже разреши́ боле́зни на́ша душе́вныя и теле́сныя, да зове́м ти:/ ра́дуйся, Космо́ Богому́дре.

И́кос:

Покая́ния две́ри отве́рзи ми, всеблаже́нне,/ да омы́то скве́рну от окая́нныя моея души́/ и те́ла моего́ вся чу́вства очи́сти,/ да любо́вию зову́ ти благода́рственная:/ ра́дуйся, по́стником удобре́ние и и́же сам собо́ю о́браз показа́вый;/ ра́дуйся, исто́чниче пресла́дкий, и́же напоя́я ве́рных се́рдца уче́нии;/ ра́дуйся, и́же нощь на́шего неразу́мия отгоня́ющи смиренному́дрым уче́нием;/ раду́йся, слове́с твои́х благода́ть теплота́ бысть мно́гим Боже́ственному восхожде́нию;/ ра́дуйся, прелюби́мая весна́, израща́ющая всем Боже́ственную любо́вь;/ ра́дуйся, прекра́сный кри́не, и́же любо́вным взо́ром всех ко Христу́ влеки́й;/ ра́дуйся, измени́вый вре́менная, ве́чными;/ ра́дуйся, е́же возже́ле, то и соверши́;/ ра́дуйся, ве́рным по Бозе изве́стная наде́жда;/ ра́дуйся, се́рдца моего́ ко Го́споду пригвожде́ние моли́твою́ день и нощь;/ ра́дуйся, кра́сное доброде́тели храни́лище;/ раду́йся, пастыренача́льниче слове́сных ове́ц;/ раду́йся, гра́ду Влади́миру похвале́,/ всем притека́ющим покро́в и заступле́ние;/ ра́дуйся, Космо́ Богому́дре.

Песнь 7

Ирмо́с: А́нгелом о́троки из огня́ спа́сый/ и гремя́щую пещь преложи́вый на росу́,/ благословен еси́, Бо́же оте́ц на́ших.

А́нгельским житием, блаженне, пожи́л еси́,/ труды́ плодо́в свои́х умно́жил еси́,/ и процве́л еси́ Дави́ де́ки, я́коже фи́нике, воспева́я:/ благослове́н еси́, Го́споди, Бо́же оте́ц на́ших.

Восхваля́ем тя, о́тче Космо́, блаже́нный,/ ты же моли́ в па́мяти твое́й Христа́ Бо́га,/ лука́вства сатанина́ изба́вити нас, воспева́ющих,/ благослове́н еси́, Го́споди, Бо́же оте́ц на́ших.

Безпу́тием заблужде́ннаго/ и зимо́ю грехо́вною олядене́вшаго мя согре́й, Космо́ преподо́бие,/ и научи́ вопи́ти:/ благослове́н еси́, Го́споди, Бо́же оте́ц на́ших.

Богоро́дичен: Прия́ла еси́ вои́стинну Бо́жественное Сло́во во чре́во Твое́,/ и Сего́ па́че естества́, Пречи́стая, родила́ еси́./ Его́же моли́ изба́вити от бед рабы́ Твоя́, вопию́щия:/ благослове́н еси́, Бо́же оте́ц на́ших.

Песнь 8

Ирмо́с: От Отца́ пре́жде век Рожде́ннаго/ и от Ма́тере в после́дняя воплоще́ннаго,/ свяще́ннины, благослови́те,/ лю́дие, превозноси́те во вся ве́ки.

И́нок и́стинен был еси́, простра́ннаго пути́ удаля́лся,/ широты́ ра́йския дости́гл еси́/ и та́мо дре́ву живо́тному причаща́ешися, ра́дуяся, во ве́ки.

Дом душе́вный доброде́телей был еси́,/ и пра́вости пра́вило, Космо́ пречу́дный, испра́вил еси́/ и ны́не бу́дущих благ дре́ву живо́тному причаща́ешися, ра́дуяся, во ве́ки.

Ли́ком преподо́бных сочета́лся еси́,/ и по́стническим житие́м укра́сился еси́, Космо́ преподо́бие,/ ны́не ра́я пи́щи дре́ву живо́тному причаща́ешися, ра́дуяся во ве́ки.

Богоро́дичен: Под ле́том бы́вши,/ И́же от Отца́ безле́тно возсия́вшаго, Богома́ти, нам родила́ еси́,/ Его́же мо́ли спасти́ пою́щия Тя во ве́ки.

Песнь 9

Ирмо́с: Чи́стую сла́вно почти́м, лю́дие, Богоро́дицу,/ Огнь Божества́ прии́мшую во чре́ве неопа́льно,/ пе́сньми велича́ем.

Чи́стое и кра́сное храни́лище доброде́телей был еси́, Космо́ блаже́нный:/ сего́ ра́ди я́ко молитвенни́ка тепла́ о нас ко Го́споду при́сно предлага́ем/ и непреста́нно тя ублажа́ем.

От се́рдца боле́знь, от очию сле́зы,/ от души́ покая́ние, приими́, преподо́бие!/ и ко Го́споду тепле́ принеси́,/ я́ко да непреста́нно тя ублажа́ем.

Всече́стне Космо́!/ Сохрани́ певцы́ твоя́ неви́димо, о́тче,/ си́лою моли́тв твои́х ко Влады́це,/ я́ко да непреста́нно тя велича́ем.

Богоро́дичен: А́нгели и Арха́нгели, проро́цы и апо́столи/ и весь лик преподо́бных; с преблаже́нным Космо́ю ко Христу́ приле́жно с Пречи́стою Его́ Мате́рию за весь мир моли́теся,/ я́ко да непреста́нно вас восхваля́ем.

Свети́лен:

Просла́ви тя Госпо́дь в чудесе́х, всеблаже́нный Космо́,/ и преста́вил тя есть от тли на безсме́ртие, Своего́ уго́дника,/ сего́ ра́ди па́мять твою́ ве́рно восхваля́ем.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ и́же от Тро́ицы Еди́наго родила́ еси́, Богоро́дице,/ и но́сиши на Боже́ственную Твое́ю ру́ку Пребога́тое Сло́во,/ Его́же пе́сньми немо́лчно велича́ем.

На хвали́тех стихи́ры, глас 5:

Богому́дре о́тче, всеблаже́нный Космо́,/ по́стником ты был еси́ похвало́,/ ми́ра красоты́ отню́дь возненави́дев,/ от ю́ности Бо́га возлюби́л еси́,/ и те́сный путь ше́ствовал еси́ и́ноческаго жити́я,/ пресве́тлый свети́льниче,/ и всем ве́рным те́плый засту́пниче,/ моли́ся ко Го́споду да спасе́т ду́ши на́ша.

Богому́дре о́тче,/ ду́шу твою́ с те́лом от страсте́й очи́стив,/ Свято́му Ду́ху прекра́сная оби́тель яви́лся еси́,/ То́йже славна́ тя пока́за ко́нцем, преблаже́нне Космо́,/ соде́ла в чудесе́х вели́ка свети́льника,/ просвеща́ющаго во мра́це су́щия,/ темже я́ко наста́вника тя и́ноком и всем ве́рным,/ соше́дшеся, велему́дренно ублажа́ем.

Глас 6:

Любо́вию Христо́вою, Богому́дре, просвеща́ем,/ душетле́нныя стра́сти победи́в, всеблаже́нный Космо́,/ в до́брых по́двизех усе́рдствуя,/ подвиза́лся еси́ кре́пко на неви́димаго врага́/ и того́ ко́зней, блаже́нне, избеже́,/ в преми́рная селе́ния дости́гл еси́,/ и тамо с ли́ки преподо́бных водворя́лся,/ с ни́ми же я́ко име́я дерзнове́ние ко Христу́,/ мир испроси́ ду́шам на́шим.

Глас 2:

Прииди́те, мона́хов мно́жества,/ в па́мять отца́ на́шего собери́теся,/ обстоя́ще любе́зно че́стную его́ и многоце́нную ра́ку,/ ра́достно лик соста́вим днесь,/ и моле́бно возопие́м ему́:/ преподо́бие о́тче наш Космо́,/ предстоя́ Христу́ Бо́гу на́шему/ и Пречи́стей Его́ Ма́тери,/ моли́ся о со́бранном твое́м ста́де,/ изба́вится нам от всех наве́тов вра́жиих,/ и умири́тися ми́ру, и спасти́ся ду́шам на́шим.

Сла́ва, глас 8:

Днесь благове́рнии Христорусстии народи́,/ благочести́вии правосла́внии Влади́мирстии соб́ри,/ усе́рдно в дом Спаси́теля на́шего Бо́га прииди́те,/ умили́тельно предста́телю на́шему возопи́те:/ о пресве́тлый ми́ра свети́льниче/ и те́плый Христа́ Бо́га моле́бниче,/ Космо́ о́тче наш свяще́нный,/ благода́ти Ду́ха Свята́го испо́лненный,/ предстоя́й Престо́лу Царя́ Небе́снаго/ и я́сно зря сла́ву Божества́ Его́,/ призри́ на смире́нныя рабы́ твоя́,/ усе́рдно днесь моля́щия тя,/ к тебе́ бо ру́це простира́ем/ и тебе́ на по́мощь призыва́ем,/ к чудотво́рным твои́м моще́м припада́юще/ и сня́тый твой о́браз любе́зно целу́юще,/ оте́ческому твоему́ милосе́рдию покланя́емся,/ и ра́достными се́рдцы приле́жно ти мо́лимся,/ моли́, преблаже́нне, Животворя́щую Тро́ицу/ и Влады́чицу на́шу Пречи́стую Богоро́дицу/ уще́дрити и спасти́ ве́рно Тя воспева́ющих/ и па́мять твою́, свя́те, светло́ соверша́ющих,/ да и мы, тобо́ю изба́вльшеся а́дских муче́ний,/ сподо́бимся у Го́спода во ве́ки Небе́сных селе́ний.

И ны́не, Богоро́дичен: Влады́чице, приими́:

По сем славосло́вие вели́кое, час пе́рвый и отпу́ст.

На литурги́и

Служба преподо́бническая.