На ма́лой вече́рни

Стихи́ры на 4, глас 1.

Подо́бен: Небе́сных чино́в:

Доброде́телию Боже́ственною, преблаже́нне Дими́трие,/ на Небе́сныя сла́вныя кру́ги возше́л еси́,/ не во мра́це заше́д неве́дения,/ но в благода́ти Боже́ственней яви́лся еси́,/ прие́мля неизрече́нная сия́ния.

Умо́м просвеще́нным,/ ду́шу твою́, о́тче, просвети́в, освяти́лся/ и от земны́х преста́вился еси́ в Христо́во Ца́рствие, Дими́трие преблаже́нне./ В по́стницех ты све́тел яви́лся еси́,/ пи́щи нестаре́емыя ны́не насыща́яся,/ Боже́ственною сла́вою облиста́ем.

Тро́ица Безнача́льная и Единосу́щная,/ яви́ тя Себе́ селе́ние, Богоно́се Дими́трие,/ и показа́ тя пресве́тла свети́льника./ От жите́йских мяте́жей уклони́лся еси́ се́рдцем/ и житие́ с Небе́сными приобре́л еси́.

Сла́ва, глас 3:

Преподо́бне о́тче Дими́трие,/ кре́пким поще́нием и жесто́ким воздержа́нием,/ по́том и труды́ стезю́ сию́ соверши́л еси́/ и, я́ко в сла́достех, почива́еши, ра́дуяся,/ Ева́нгельски же моли́твою и посто́м полки́ де́монския прогоня́еши./ Те́мже со А́нгелы водворя́ешися во Ца́рствии Небеснем/ и ны́не Христа́ Бо́га моли́/ о ве́рою хва́лящих всечестну́ю па́мять твою́.

И ны́не, Богоро́дичен.

На стихо́вне стихи́ры, глас 2.

Подо́бен: До́ме Евфра́фов:

Я́ко преходя́щую жизнь,/ я́же на земли́, презре́л еси́, блаже́нне,/ тем сподо́бился еси́/ улучи́ти жи́зни Божественныя/ и Того́ прия́л еси́ сия́ние, Богоно́се.

Стих: Честна́ пред Го́сподем/ смерть преподо́бных Его́.

Любве́ ра́ди Христо́вы,/ преподо́бне Дими́трие,/ пло́ти рачи́тельное умертви́л еси́ мудрова́ние/ и ду́шу, от страсте́й свобо́дну,/ Богови предста́вил еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Бо́дренными моли́твами/ и сле́зными исто́чники/ Це́ркви ве́рных/ обогати́л еси́,/ Богоблаже́нне.

Сла́ва, и ны́не, Богоро́дичен:

Вы́шнии Тя ли́цы,/ Богоро́дице Де́во,/ пою́т с ни́жними,/ сла́вяще непреста́нно/ Рождество́ Твое́ Пречестно́е.

Тропа́рь пи́сан на вели́цей вече́рни.

На вели́цей вече́рни

Блаже́н муж: на Го́споди, воззва́х:

поста́вим стихо́в 8 и пое́м стихи́ры, глас 2.

Подо́бен: Егда́ от Дре́ва:

Свети́ло вели́кое яви́ся нам днесь,/ мир весь просвеща́юще Богодарова́нными чудесы́, о́тче преподо́бне./ Я́коже исто́чник неисчерпа́емый показа́лся еси́,/ я́ко струи́ чуде́с то́чиши исцеле́ния/ ве́рою приходя́щим ти, блаже́нне,/ и припа́дающим ко гро́бу твоему́ свято́му:/ да́руеши же душа́м и телесе́м здра́вие неоску́дно,/ боля́щим вели́кое врачева́ние,/ чудотво́рче о́тче наш Дими́трие,/ и о нас ны́не моли́ся ко Спа́су Христу́,/ пра́зднующих ве́рою че́стную па́мять твою́.

Сла́вы и че́сти ны́нешния не восхоте́в,/ того́ ра́ди оста́вил еси́ твое́ оте́чество/ и, о Бо́зе вся́чески в ми́ре просла́вився, чудотво́рец яви́лся еси́./ Отту́ду бо отбежа́в, в пусты́ни при вода́х пре́был еси́,/ и па́ки посреди́ ми́ра пожи́л еси́,/ уедини́вся душею, блаженне, от мирски́х/ и Божиею благодатию оби́тель соста́вив,/ в нейже, потруди́вся, преста́вился еси́,/ идеже лежа́т честный мо́щи твоя́./ Бо́гу бо тя па́че прославляющу,/ ты же, исцеле́ния от Него́ прося́ приходя́щим ти с ве́рою, блаженне,/ и нас ны́не не забуди в моли́твах ко Христу́, Спаси́телю на́шему.

На земли́, я́ко А́нгел, по́жил еси́ в телеси́,/ души́ плоть повину́л еси́,/ поще́нием же и воздержа́нием мно́гим/ светлообра́зен всегда́ явля́яся,/ украси́ бо ся душе́ю, блаже́нне,/ Святе́й Тро́ице оби́тель тебе́ соде́лал еси́./ И дарова́ния чуде́с сподо́бися,/ больны́я и прокаже́нныя исцеля́я/ и стра́ждущим от духо́в нечи́стых проще́ние подава́я,/ и нас изба́ви от враг ви́димых и неви́димых всегда́,/ пра́зднующих святу́ю па́мять твою́.

И́ны стихи́ры, глас 8.

Подо́бен: О, пресла́внаго чудесе́:

Преподо́бне о́тче Дими́трие,/ ты Ева́нгельски Го́спода Бо́га возлюби́л еси́,/ Боже́ственное Его́ и́го/ на ра́мена своя́ взял еси́/ и Крест Госпо́день я́ко ле́гкое Его́ бре́мя поне́сл еси́,/ не возвраща́яся на сла́сти вре́менныя,/ и был еси́ упра́влен в Ца́рствие Бо́жие./ Те́мже и ны́не непреста́нно Христа́ моли́/ спасти́ся душа́м на́шим.

Преподо́бне о́тче Дими́трие,/ твоему́ Владыце Христу́ подража́тель был еси́,/ я́ко бо благода́ть Свята́го Ду́ха прия́л еси́,/ та́ко и подае́ши исцеле́ние неду́гующим,/ разсла́бленныя моли́твами твои́ми к Бо́гу/ сотворя́еши здра́вы./ И был еси́ мона́хом похвала́ и утвержде́ние/ и моле́бник ко Спа́су/ о всех, к тебе́ притека́ющих.

Преподо́бне о́тче Дими́трие,/ бу́дущия ра́ди жи́зни/ до́блественне моли́твою и посто́м Бо́гу угоди́л еси́/ и неви́димых враг шата́ния и ко́зни попра́л еси́,/ си́лою Креста́ Христо́ва укре́пился;/ те́мже и по сме́рти ны́не, ра́дуяся, живе́ши./ Сего́ ра́ди и мы днесь вопие́м ти, блаже́нне:/ мо́ли Христа́ Бо́га спасти́ся душа́м на́шим.

Сла́ва, глас 8:

Укра́шен доброде́тельми духо́вными,/ преподо́бне о́тче наш Дими́трие,/ просла́ви бо тя Госпо́дь Бог житие́м же и чудесы́,/ в преставле́нии же твое́м ду́ши ве́рных облагоухал еси́ и телеса́./ И ны́не, блаже́нне, и нас моли́твами твои́ми очи́сти от вся́ких грехопаде́ний,/ пра́зднующих святу́ю па́мять твою́/ и со стра́хом и любо́вию припа́дающих к твоему́ гро́бу чудотво́рному,/ о́браз подо́бия твоего́ любе́зно целу́юще./ Не преста́й моля́ся за твое́ ста́до Богозва́нное,/ я́ко да ми́лостивый Госпо́дь спасе́т ду́ши на́ша.

И ны́не, Богоро́дичен: Царь Небе́сный:

Вход. Проки́мен дне. Чте́ния 3.

Прему́дрости Соломо́ни чте́ние ( глава́ 3):

Пра́ведных ду́ши в руце́ Божией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всеплодие же́ртвенное, прия́т я./ И во вре́мя посеще́ния их возсияют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиеся на Него разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во и́збранных Его́.

Прему́дрости Соломо́ни чте́ние ( глава́ 4):

Пра́ведник, а́ще пости́гнет скончатися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть,/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Господеви душа́ его́,/ сего́ ра́ди потща́ся от среды́ лука́вствия./ Людие же ви́девше, и не разуме́вше,/ ни́же поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние ( гла́вы 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И, от каменоме́тныя я́рости испо́лнь, паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судий конце́в земли́./ Внуши́те, держа́щии мно́жества и гордя́щиися о наро́дех язы́к./ Я́ко дана́ есть от Го́спода держа́ва вам/ и си́ла от Вы́шняго.

На лити́и, стихи́ры, глас 1:

На Не́бо теку́щею, о́тче, стезе́ю ходи́ти изво́лил еси́,/ бу́дущия жи́зни жела́я,/ того́ ра́ди во вре́менней сей жи́зни, путь у́зкий ше́ствуя,/ простра́нная же сладостра́стия отрева́я,/ кра́йнее же житие́ воздержа́нием препроводи́л еси́,/ смиреному́дрием ни́жния сла́вы отбеже́,/ вы́шняго гра́да Иерусали́ма смотря́я/ сла́вы же и красоты́, и ве́чным благи́м насле́дник яви́лся еси́,/ и по́честь трудо́в твои́х от Христа́ прия́т./ Его́же, Дими́трие блаже́нне, моли́ о душа́х на́ших.

По́стником похвалу́, днесь Дими́трия почти́м,/ на земли́ бо я́ко А́нгела пожи́вшаго,/ ревни́теля же Илии́ Фесви́тянина,/ усугу́бившаго Елиссею благода́ть духо́вную./ Сей же своему́ ста́ду оста́ви сугу́бая благоуха́ния,/ Боже́ственных арома́т в преставле́нии свое́м испо́лни,/ и по сме́рти бо процвете́ чудесы́,/ я́ко дре́во Богосажде́нно при исхо́дищих вод,/ насыща́я днесь ве́рою творя́щих па́мять его́ пи́щею духо́вною/ и Спа́су Христу́ служа́щих преподо́бием и пра́вдою.

Ле́ствица Боже́ственная и честна́я, на высоту́ доброде́тели возводя́щая,/ всем яви́ся Богоприя́тное жити́е твое́./ Тезоимени́т быв Селу́нскому Дими́трию,/ в ми́лости же рачи́тель того́ милосе́рдию был еси́, преподо́бне:/ он у́бо свой град от пога́ных изба́ви,/ ты же, святе, иногда́ свой град от междоусо́бныя ра́ти сохрани́л еси́;/ он не́когда от плене́ния челове́ки износя́ на пра́здник свой,/ ты же, блаже́нне, всегда́ свобожда́я стра́ждущия от нечи́стых бесо́в,/ и́мя твое́ нарица́ющия то́кмо./ Те́мже и мы вопие́м ти:/ о́тче наш Дими́трие,/ со все́ми святы́ми моли́ о нас Еди́наго Человеколю́бца Христа́,/ спаса́ющаго ду́ши на́ша.

Сла́ва, глас 6:

Ра́дуйся и весели́ся, Русская всесвяще́нная Це́рковь Божия,/ со свяще́нными и с князи благочести́выми,/ и́ноки же и просты́я/ блаже́ннаго Дими́трия днесь па́мять почита́юще,/ духо́вне соше́дшеся, пра́зднуем/ и, честны́й гроб его́ обстоя́ще,/ любе́зно покланя́ющеся,/ мо́лимся, реку́ще:/ ра́дуйся, преподо́бне Дими́трие,/ свети́льниче пресве́тлый и врачу́ боля́щим,/ моли́твенниче ко Спа́су Христу́ Бо́гу на́шему/ о и́же ве́рою и любо́вию притека́ющих к тебе́/ спасти́ся душа́м на́шим.

И ны́не, Богоро́дичен: Творе́ц и Изба́витель:

На стихо́вне стихи́ры, глас 5.

Подо́бен: Ра́дуйся:

Ра́дуйся, свяще́нная главо́,/ преподо́бне о́тче наш Дими́трие,/ А́нгельским лико́м собесе́дниче в Вы́шних;/ на земли́ бо доброде́тельно по́жи́л еси́/ и яви́лся пречи́сто и нескве́рно зерца́ло,/ Ду́ха Свята́го заря́ми блиста́яся, пребога́те,/ и, озаря́ем, зрел еси́ бу́дущая./ Те́мже Христа́ Бо́га моли́/ пода́ти ду́шам на́шим ве́лию ми́лость.

Стих: Честна́ пред Го́сподем/ смерть преподо́бных Его́.

Ра́дуйся, свяще́нная главо́,/ по́стников непоколеби́мый сто́лпе/ и непобеди́мый побо́рниче,/ страсте́й посека́я коре́ния,/ бе́сов стремле́ния погуби́л еси́,/ кре́стным ору́жием вся козноде́йства отгоня́я,/ и по преставле́нии твое́м жив Святе́й Тро́ице предстои́ши,/ за ны моля́ся,/ дарова́ти душа́м на́шим ве́лию ми́лость.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, свяще́нная главо́,/ преблаже́нне Дими́трие,/ моли́твою враги́ устраша́я/ и неи́стовыя на святы́ню судо́м Божиим сме́рти предая́й,/ с ве́рою же приходя́щим стра́стныя неду́ги отгоня́я,/ и ко́рчащияся ру́це исправля́я,/ и бе́сы от челове́к прогоня́я,/ моли́твою же и свяще́нныя воды́ кропле́нием/ мно́гим исцеле́ния подая́./ Христу́ помоли́ся/ дарова́ти душа́м на́шим ве́лию ми́лость.

Сла́ва, глас 8:

Преподо́бне о́тче наш Дими́трие,/ твоя́ мо́щи честны́я оби́льно источа́ют всегда́ исцеле́ния/ ве́рою приходя́щим к твоему́ гро́бу,/ благоуха́ния всех исполня́я духо́внаго/ и тьму бесо́вскую дале́че отгоня́я,/ све́том благоче́стия ве́рных сердца́ озаря́я./ Те́мже мо́лим тя, раби́ твои́/ вся́каго наве́та вра́жия нас изба́вити,/ я́ко да ра́достною душе́ю свято́е твое́ успе́ние духо́вно пра́зднующе,/ прославля́ем Спа́са на́шего, тебе́ просла́вльшаго,/ Еди́наго во святы́х Свои́х Бо́га на́шего.

И ны́не, Богоро́дичен:

Влады́чице, приими́ моли́тву раб Твои́х/ и изба́ви нас/ от вся́кия ну́жды и печа́ли.

Тропа́рь, глас 1:

Свы́ше от Бо́га, преподо́бне, благода́ть прия́л еси́ духо́вную/ и от Него́ у́бо позна́лся еси́, блаже́нне,/ того́ ра́ди и ты ду́хом позна́л еси́ лу́чшая Его́, бу́дущаго ве́ка пребыва́ние,/ и по́стнически испыта́вся во свои́х оби́телех./ И ны́не, со А́нгелы ликовству́я,/ Спа́су всех за ны моли́ся, свя́те Дими́трие,/ да вси́ вопие́м:/ сла́ва Да́вшему ти кре́пость./ Сла́ва Венча́вшему тя./ Сла́ва Де́йствующему тобо́ю всем исцеле́ния.

Ин тропа́рь, глас 1:

Свы́ше от Бо́га преподо́бне, благода́ть прия́л еси́, Дими́трие пресла́вне,/ и Того́ си́лою укре́пля́ем,/ Ева́нгельски ходи́ти изво́лил еси́,/ отону́ду же и от Христа́ возме́здие трудово́м обре́те, всеблаже́нне,/ Его́же моли́/ спасти́ся душа́м на́шим.

Сла́ва, и ны́не,

Богоро́дичен: Гаврии́лу веща́вшу:

На у́трени

На Бог Госпо́дь: тропа́рь свято́му, два́жды.

Сла́ва, и ны́не, Богоро́дичен.

По 1-й стихоло́гии седа́лен, глас 3.

Подо́бен: Красоте́ де́вства:

Я́ко Безплотен, на земли́, о́тче, пожи́л еси́,/ превознося́щагося врага́ смири́л еси́,/ темже и ны́не с невеще́ственными во́инствы водворя́ешися, блаже́нне,/ и́же тамо, блаже́нства наслажда́яся,/ и нас помина́й, пра́зднующих па́мять твою́ днесь,/ да вси ра́достными гла́сы воспева́ем Спа́са на́шего Иису́са Христа́,/ благода́ть тебе́ дарова́вшаго исцеле́ний.

Сла́ва, и ны́не, Богоро́дичен:

Боже́ственная ски́ния была́ еси́ Слова,/ Еди́на Пречи́стая Ма́ти Де́во,/ чистото́ю А́нгелы превозше́дшая,/ па́че всех мене́ персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

По 2-й стихоло́гии седа́лен, глас 4.

Подо́бен: Яви́лся еси́ днесь:

Я́ко со́лнце, возсия́в,/ заря́ми блиста́еши всему́ ми́ру/ издале́ча чудесы́ твои́ми,/ чудотво́рче Дими́трие,/ светоно́сче блаже́нне, преподо́бным похвала́.

Сла́ва, и ны́не, Богоро́дичен:

В кров Твой, Пречи́стая Де́во, прибега́ющих,/ мольбу́ принеси́ о нас к Челове́колюбцу Бо́гу,/ спасти́ся рабо́м Твои́м.

По полиелеи седа́лен, глас 8.

Подо́бен: Прему́дрости:

Сладостра́стия нощь посто́м, о́тче, утоли́в,/ и Бо́гу ду́шу свою́ непоро́чну соблю́л еси́,/ и прие́м от Спа́са благода́ть Свята́го Ду́ха/ исцеля́ти стра́ждущих телесы́ и ду́ши ве́рных просвеща́ти./ Сего́ ра́ди благода́рственно вопие́м ти:/ Дими́трие, о́тче наш,/ моли́ Христа́ Бо́га/ согреше́ний проще́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Воплоще́ннаго Бо́га от Твоея́ утро́бы ро́ждши, Пречи́стая,/ мене́, растле́ннаго грехи́, от прило́г лука́ваго укрепи́, Ма́ти Божия,/ и се́рдце мое́ очи́сти, Богоблагодатная, ма́терними Тво́ими моли́твами,/ да и аз благода́рно зову́ Ти:/ моли́ Христа́ Бо́га, Сы́на Твоего́, Мари́е Богоро́дице,/ поми́ловати ста́до Твое́, е́же стяжа́ла еси́, Всенепоро́чная.

Степе́нна, 1-й антифо́н 4-го гла́са.

Проки́ мен: Честна́ пред Господем/ смерть преподо́бных Его́.

Стих: Что возда́м Господеви о всех,/ я́же воздаде́ ми?

Ева́нгелие от Матфе́я, зача́ло 43.

По 50-м псалме́ стихи́ра, глас 6:

Возлю́блен бысть Бо́гом от чре́ва ма́терня,/ я́коже други́й Се́ргий преподо́бный вели́кий,/ о́тче Дими́трие,/ и с ним благоду́шственно Спаси́телю Бо́гу угоди́л еси́,/ и Свята́го Ду́ха сосу́д яви́лся еси́ избра́нный,/ и́нокующим жезл кре́пости/ и всем тре́бующим чудотво́рный пода́тель,/ испроси́ нам от Христа́ Спа́са, чтущи́м тя,/ ве́лию ми́лость.

Кано́н Богоро́дице, глас 2: Нетре́ну, необычну:

со ирмосо́м на 6. И свята́го два кано́на, на 8.

Кано́н преподо́бнаго Дими́трия, глас 2.

Песнь 1

Ирмо́с: В о глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ препросла́вленный Госпо́дь сла́вно бо просла́вися.

Тебе́ твоего́ блаже́нне, уче́ния долг принося́ще,/ возда́ния простира́ем, вене́ц похвала́ми плету́ще;/ ты же ми́лостив яви́ся, пребога́те,/ твои́ми мольба́ми благода́ть нам пода́ждь духо́вную.

Всегуби́тельное стремле́ние страсте́й, о́тче, увяди́л еси́,/ слове́сным объят Богому́дрием,/ благопребы́тен бо был еси́ и благогла́сен,/ кро́ток же и смире́н,/ сло́вом прему́дрости, Дими́трие, и ра́зума венча́н.

Священноукраси́л еси́ себе́, о́тче, ра́зумом и де́тельным виде́нием благода́ти,/ Богоглаго́ливе Дими́трие, жела́я венца́ сла́вы Христо́вы,/ и тво́ю наде́жду изря́дно, преблаже́нне, не погреши́л еси́.

Целому́дрие удержа́л еси́ я́ве,/ кра́йнюю же кро́тость и высо́кое, Богоно́се, смире́ние,/ и́миже возвыша́ем,/ трудо́в твои́х де́йством и виде́нием, ра́дуяся, принесе́ся,/ вене́ц неувяда́емый прие́м.

Богоро́дичен: Тва́рей яви́лася еси́, Чи́стая, всех ви́димых и неви́димых превы́шши, Всенепоро́чная:/ Зижди́теля бо родила́ еси́,/ я́коже изво́ли воплоти́тися во утро́бе Твое́й./ Его́же со дерзнове́нием моли́ спасти́ пою́щия Тя.

Други́й кано́н преподо́бнаго, глас 8.

Песнь 1

Ирмо́с: Пои́м Господеви,/ прове́дшему лю́ди Своя́ сквозе́ Че́рмное мо́ре,/ я́ко Еди́н сла́вно просла́вися.

Даждь ми, Христе́, мой Спа́се, проще́ние мно́гих ми согреше́ний,/ я́ко да и мы почита́ем па́мять Твоего́ уго́дника, преподо́бнаго Дими́трия./ Его́же моли́твами, Бо́же, спаси́ нас.

Твои́ми моли́твами же и мольба́ми ми́лостиваго умоля́й Бо́га,/ преподо́бне о́тче наш Дими́трие,/ и грехо́вный мрак печа́ли нашея разори́,/ и благоду́шия утеше́ния нас духовнаго испо́лни.

От младе́нства ты, блаже́нне Дими́трие, позна́н бысть Бо́гом/ и, на Него́ наде́яся, наставля́ем на спаси́тельная Его́ повеле́ния./ Ему́же ны́не предстоя́ со дерзнове́нием, о нас помоли́ся.

Богоро́дичен: Еди́наго от Святы́я Тро́ицы Сло́ва и Сы́на родила́ еси́, Де́во Пречи́стая,/ Его́же с преподо́бными и пра́ведными моли́ о рабе́х Твои́х,/ ве́рою прося́щих грехо́в проще́ния.

Катава́сия: Отве́рзу уста́ моя́:

Песнь 3

Ирмо́с: Процвела́ есть пусты́ня, я́ко крин, Господи,/ язы́ческая неплодя́щая це́рковь/ прише́ствием Твои́м,/ в не́йже утверди́ся мое́ се́рдце.

Просия́л еси́ в житии́ твое́м, Богоно́се Дими́трие,/ я́коже всесве́тлое со́лнце в ми́ре,/ и просвети́ и́же к тебе́ ве́рою и любо́вию приходя́щия/ и пою́щия тя.

Просвеща́ются концы́ уче́нии твои́ми, преподо́бне,/ я́коже бо свети́льник просвети́л еси́, Богоно́се, Це́рковь Христо́ву,/ о Не́йже утверди́ся мое́ се́рдце.

Непорабоще́ну соблю́л еси́ ду́шу твою́ страстьми́/ и сластьми́ теле́сными, Богоно́се Дими́трие всече́стне,/ те́мже ны́не по достоя́нию восхваля́ем тя.

Богоро́дичен: Сказу́я иногда́ сокрове́нное та́инство, Отрокови́це, Тебе́ дре́вле Гаврии́л зовя́ше:/ ра́дуйся, Божия пала́то, в то́же всели́ся вся челове́ки обожи́, я́ко Милосе́рд.

Ин

Ирмо́с: Ты еси́ утвержде́ние притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Ты еси́, преподо́бне о́тче Дими́трие, послу́шатель Ева́нгельских слове́с,/ Самаго́ Го́спода рече́нию,/ вся любы́ ми́ра сего́ отве́рг и после́довал еси́ стопа́м Христо́вым;/ Ему́же с ли́ки А́нгел ны́не служа́,/ и о нас моли́ся, чту́щих тя.

В зако́нех по́стных поуча́яся, преподо́бный/ не осла́бися в нача́льных соверше́нных нача́лех, хотя́ угоди́ти своему́ Го́споду,/ Ему́же жела́тельне обещася усе́рдно да́же и до кончи́ны,/ до́ндеже сын Ца́рствия Его́ показа́ся.

Воздержа́нием кра́йним плоть твою́ умертви́л еси́, Дими́трие,/ сего́ ра́ди Ду́хом Боже́ственным окрили́вся,/ дости́гл еси́ священнонача́льных служи́телей,/ иде́же Небе́сных Бо́жиих слуг безпло́тных ра́дования.

Богоро́дичен: Благослове́нная, Всенепоро́чная Богоро́дице Де́во Мари́е, Сло́во Божие нам ро́ждшая,/ свобожда́ющаго Свои́х преподо́бных от тле́ннаго ми́ра,/ и́хже ра́ди нас спаса́ющаго.

Ин конда́к, глас 3:

Же́злом, свя́те Дими́трие, от Бо́га да́нным ти,/ лю́ди своя́ упасе́ на па́житех зако́на живоно́сна,/ зве́ря же неви́димаго шата́ние сокруши́ под но́зе тебе́ пою́щих,/ я́ко да в беда́х тя те́пла предста́теля и́мамы.

Седа́лен, глас 3.

Подо́бен: Красоте́ де́вства:

Исправле́ние жития́ твоего́ всем просвеща́ет стопы́, Дими́трие о́тче,/ вои́стинну ве́рою подо́бящим ти ся;/ те́мже, и́же любо́вию блажа́т тя всегда́,/ спаса́й моли́твами твои́ми от вся́кия тесноты́,/ Христа́ Преблага́го моля́,/ преподо́бне блаже́нне досточу́дне.

Сла́ва, и ны́не, Богоро́дичен:

Я́ко невозде́ланная, Де́во, Лоза́, красне́йший грозд прозябла́ еси́,/ источа́ющ нам вино́ спасе́ния,/ всех веселя́щее ду́ши же и телеса́./ Те́мже я́ко вину́ Тя до́брых блажа́ще при́сно,/ со А́нгелом вопие́м Ти:/ ра́дуйся, Благода́тная.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Ты, Дими́трие, и́нокующим бысть вене́ц,/ не ка́мением многоце́нным укра́шен, но доброде́телию обло́жен,/ яви́лся еси́, блаже́нне, Богорадова́нное вои́стинну украше́ние.

Боже́ственную, Богому́дре, поче́л еси́ прему́дрость:/ те́мже дарова́нии тя сия́ одари́,/ сла́ву ве́чную тебе́ хода́тайствовавши,/ о́тче Дими́трие всече́стне.

Све́тлостию нрав твои́х и о́бразы бла́гости,/ преподо́бне Дими́трие, подо́бне пожи́л еси́,/ те́мже присту́пен ты всем бысть,/ всеблаже́нне и пречу́дне.

Богоро́дичен: Умерщвле́ния плод нам Е́ва принесе́,/ Ты же, Жизнь ро́ждши Ипоста́сную,/ а́бие испра́вила еси́ род наш, Богоневе́сто Пречи́стая.

Ин

Ирмо́с: Услы́шах, Господи,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Боже́ство.

Рачи́тель сый ми́лостиваго Спаси́теля Христа́ твоего́,/ е́же ми́лостивно к Нему́ наказу́я не ктому́ согреша́ти,/ разсла́бленную жену́ исцели́л еси́, я́коже при купе́ли иногда́.

Яко́же дре́во воздержа́ния, при вода́х насажде́н был еси́, о́тче блаже́нне,/ и благора́слена лоза́ яви́лся еси́, износя́ благоче́стия гро́зды.

Не восхоте́ сла́вы се́я тле́нныя,/ па́че кня́зя вся́чески благочести́ваго,/ Царю́ Небе́сному хотя́ угоди́ти,/ от Него́же по́честь трудо́в свои́х прия́т нетле́нную.

Богоро́дичен: Бы́вшее под ле́том Сло́во,/ Возсия́вшаго от Отца́ безле́тно Богома́ти нам родила́ еси́,/ Его́же моли́ спасти́ пою́щия Тя.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Владыко, к Светонача́льнику, Отцу́ Твоему́,/ от но́щи неве́дения/ приведе́ние има́мы.

Стремле́ние страсте́й безстра́стием удержа́л еси́,/ Богоно́се Дими́трие,/ виде́нии и дея́нии просвети́л еси́, о́тче, душе́вное устрое́ние.

Умо́м чи́стым и писа́нии духо́вными бесе́довал еси́,/ Богоглаго́ливе Дими́трие,/ виде́ния и дея́ния собра́в бога́тство, о́тче преподо́бне.

Прему́дрости глубину́ испыта́в, Дими́трие,/ дости́гл еси́ обрести́, ели́ко благопотре́бно,/ и би́сер многоце́нный боле́зньми стяжа́л еси́, преблаже́нне, ра́зума.

Богоро́дичен: Се во чре́ве, Богоро́дице Пречиста́я, Христа́ Бо́га па́че сло́ва име́ла еси́,/ я́коже Иса́ия провозгласи́,/ и вы́ше естества́ Сего́, Богороди́тельнице, родила́ еси́.

Ин

Ирмо́с: У́тренююще, вопие́м Ти,/ Го́споди: спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

А́ще и земно́е оте́чество, блаже́нне Дими́трие, оста́вил еси́,/ вся́чески Богоимени́тну оби́тель совокупи́л еси́:/ те́мже пе́рвое оте́чество Небе́сное прия́т,/ со дерзнове́нием Христу́ за ны моли́ся.

Благоче́стия па́ки на стезю́, Дими́трие, наста́влен был еси́, о́тче,/ от Бо́га к неги́блемому наслажде́нию, посто́м и моли́твою в Вы́шняя приве́дься.

Зело́ ми́лостива и странноприи́мца показа́ тя Спас наш ми́рови, о́тче,/ врача́ боля́щим, Дими́трие,/ си́рым и убо́гим засту́пника любе́зна.

Богоро́дичен: Вои́стинну Тя, Ма́терь Божию, испове́дуем, и́стинную Богоро́дицу,/ Твои́м Рождество́м тле́ннаго осужде́ния изба́вльшиися,/ милосе́рдия ра́ди Человеколю́бца Бо́га к жи́зни нетле́нней по́звани бы́хом.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Вселе́нней свети́ло пресве́тлое, о́тче, яви́лся еси́, Дими́трие,/ слове́с све́тлостию просвеща́я/ ве́рою и любовию к тебе́ притека́ющия.

Блаже́нное житие́ проше́л еси́,/ назда́в у́бо чу́вства, вне был еси́ мирска́го мятежа́/ и Бо́гу прибли́жился еси́, Дими́трие.

Я́ко добр, я́ко красе́н вене́ц,/ и́мже ны́не венча́лся еси́, прему́дре Дими́трие,/ доброде́тельми венча́ем,/ и над страстьми́ ца́рствовал преизря́дне.

Богоро́дичен: Вы́ше естества́ родила́ еси́, Де́во, и ве́чнуеши Де́ва,/ я́вльши и́стиннаго Божества́ Сы́на и Бо́га Твоего́ о́бразы.

Ин

Ирмо́с: Ри́зу мне пода́ждь светлу,/ одея́йся све́том, я́ко ри́зою,/ Многоми́лостиве Христе́, Бо́же наш.

В души́ свое́й Боже́ственная бога́тства Ду́ха Свята́го собра́в,/ непорочну моли́тву и чистоту́ красноле́пну,/ бде́ние и воздержа́ние,/ сего́ ра́ди жили́ще Святе́й Тро́ице яви́ся.

Ри́зную ху́дость име́л еси́, пребога́те,/ в зиме́ же и ле́те не пременя́я, боле́зненно претерпе́л еси́ Бо́га ра́ди соверше́нно;/ те́мже Небе́снаго прия́тия насле́дник бы́ти сподо́бился еси́.

На земли́, я́ко А́нгел, Бо́гу послужи́л еси́ вся́чески,/ и ны́не у Него́ со Безпло́тными и с преподо́бными/ ра́достно лику́еши, преблаженне Дими́трие,/ благоуха́ния же чуде́с нам испусти́л еси́.

Богоро́дичен: Боже́ственное Сло́во в ложесна́х Твои́х прия́ла еси́, Богоро́дице Де́во Мари́е,/ и па́че естества́ родила́ еси́./ Его́же мо́ли от бед вся́ких нас изба́вити рабы́ Твоя́, пою́щия Тя.

Конда́к, глас 8.

Подо́бен: Взбра́нной:

От ю́ности, преподо́бне, крест твой взем, Христу́ после́довал еси́,/ в моли́твах и поще́ниих, во бде́ниих же и злострада́ниих плоть твою́ изнуря́я;/ те́мже и Всеви́дящее О́ко, твоя́ труды́ ви́дев,/ чудесы́ тя прославля́ет и всех зва́ти тебе́ науча́ет:/ ра́дуйся, преподо́бне о́тче Дими́трие, по́стников удобре́ние.

И́кос:

Боже́ственными доброде́тельми твои́ми себе́, му́дре, украси́л еси́,/ Спа́су Христу́ жили́ще со́делав, о́тче, му́жественне:/ я́коже зла́то, искуси́лся еси́ ве́рою к Бо́гу и, наде́ждею и любо́вию обе́ты полага́я,/ воздержа́нием пости́вся, я́ко безпло́тен,/ в целому́дрии и во смире́нии возне́слся еси́./ Те́мже и мы, моли́твами твои́ми просве́щшеся,/ преподо́бне Дими́трие, вопие́м ти:/ ра́дуйся, я́ко из млада́ Бо́гу послужи́л еси́;/ ра́дуйся, притека́ющим к тебе́ спасе́ния хода́таю;/ ра́дуйся, христоимени́тым лю́дем похвала́ и утвержде́ние;/ ра́дуйся, я́ко твои́ми моли́твами сопроти́внии побежда́ются;/ ра́дуйся, я́ко всем прося́щим дае́ши дар, от Господа дарова́нный ти, исцеле́ний;/ ра́дуйся, я́ко и чудесы́ тя Бог прославля́ет и всех зва́ти тебе́ науча́ет;/ ра́дуйся, преподо́бне о́тче Дими́трие, по́стников удобре́ние.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть;/ Христо́с же простре́ Богочести́вым отроко́м ро́су духо́вную,/ Сын благослове́н и препросла́влен.

Благоуха́ют, преподо́бне, твои́х уче́ний словеса́, благода́тию Ду́ха сия́юще,/ Божество́ бо Еди́но чтый в Тре́х Ли́цех, Сло́ва же воплоще́ние поя́,/ благоуха́еши нас, пребога́те.

Ума́ чистото́ю и по́мысла, Богоразу́мия све́тлостию житие́ преше́л еси́,/ чистото́ю же телесе́ и де́вства сия́нием/ изря́дно возложе́ние я́влься Всеви́дцу и Вседержи́телю.

Сло́во твое́, со́лию раство́рено, и житие́ твое́, благода́тию, преблаже́нне, сия́я, яви́ся, пречу́дне;/ те́мже в вы́шния оби́тели, ра́дуяся, всели́лся еси́,/ Христу́ со дерзнове́нием ны́не предстоя́.

Богоро́дичен: Управля́ющи, Пречи́стая, мое́ житие́, к Твоему́ всети́хому приста́нищу напра́ви,/ Бо́га ро́ждши, благи́х исто́чника,/ всем подаю́ща ве́рным нетле́ния благода́ти.

И́н

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, по́юще:/ о́тцев Бо́же, благослове́н еси́.

И́же иногда́ притека́ющих, преподо́бне Дими́трие, к твоему́ чудотво́рному гро́бу с ве́рою,/ ка́ющихся к Бо́гу грехо́в свои́х,/ мольба́ми твои́ми ско́рченых челове́к ру́це испра́вил еси́, блаже́нне.

И́же иногда́ злочести́ваго ра́тника Боже́ственною си́лою отри́нул еси́ от свята́го твоего́ гро́ба,/ и, не улучи́вш поми́лования, вско́ре обою́ животу́ лиши́ся таковы́й.

И́же иногда́ благоче́стно благогове́йнии лю́дие твои́ми, свя́те Дими́трие, моли́твами,/ иногда́ же кропле́нием святы́я воды́ свяще́нныя,/ разли́чная исцеле́ния прие́млют, припа́дающии к чудотво́рному твоему́ гро́бу.

Богоро́дичен: Изба́вихомся вси от страсте́й, и бед, и обстоя́ний, и неду́гов многообра́зных/ мольба́ми Твои́ми, Пречи́стая Богома́ти,/ Спа́су Христу́ зову́ще:/ оте́ц на́ших Бо́же, благослове́н еси́.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Вене́ц благоле́пен Христо́с Живода́вец на верх твой положи́, тезоимени́те Дими́трие,/ и́бо дея́ньми просия́л еси́ и виде́нии яви́лся еси́, зовы́й:/ благослови́те, вся дела́ Госпо́дня, Го́спода.

Все преше́д чу́вство, преблаже́нне,/ уму́ пе́рвому прибли́жился еси́/ души́ твоея́ чистото́ю, жития́ же све́тлостию,/ венцено́сче Дими́трие, зовы́й:/ благослови́те, вся дела́ Госпо́дня, Го́спода.

Жела́нием зе́льным, преблаже́нне,/ изсле́дил еси́ Богоно́снаго Се́ргия вели́каго житие́ Божественно́е,/ жи́зни све́тлостию поревнова́л еси́, прехва́льне,/ быв у́бо и собесе́дник сего́ изря́ден вои́стинну.

Богоро́дичен: Ум безстра́стен во утро́бе Твое́й соединя́ется челове́ческому уму́, Пречи́стая,/ пло́ти же дебельство́м под ле́том быв лет превы́шший./ Тем Тя, Богоро́дице, ве́рою и любо́вию сла́вим.

Ин

Ирмо́с: Царя́ Небеснаго,/ Его́же пою́т вои́ А́нгельстии,/ хвали́те и превозноси́те во вся ве́ки.

Столп одушевле́нный, о́тче Димитрие, и исто́чник неоску́дный вои́стинну,/ слепыя просвеща́я, разсла́бленныя укрепля́я и бе́сы прогоня́я/ не то́кмо у гро́ба, но и на ме́стех, иде́же и́мя твое́ нарица́ют с любо́вию.

Яко́же други́й Илия́, яви́вся,/ сугу́бу благода́ть нам дал еси́,/ твоя́ честны́я мо́щи, точи́ти исцеле́ния тре́бующим,/ явле́нием же твои́м и по сме́рти, преподо́бне о́тче Дими́трие,/ ины́х злых устраша́я и па́че ины́м исцеле́ния творя́ ве́рным.

Иногда́ проро́ческим да́ром от Бо́га, блаже́нне, почте́н был еси́,/ вся́чески же тре́бующим ми́лостив пока́зовался еси́/ и ны́не, о́тче Дими́трие, ми́лостивому Спа́су за ны моли́ся,/ воспева́ющия и превознося́щия Его́ во ве́ки.

Богоро́дичен: Ра́дуйся, престо́ле Госпо́день огнезра́чный,/ ра́дуйся, две́ре невеще́ственнаго блиста́ния./ Ра́дуйся, о́блаче, Со́лнце возсия́вший Пра́ведное – Христа́ Спа́са на́шего,/ Его́же превозно́сим во ве́ки.

Песнь 9

Ирмо́с: Безнача́льна Роди́теля Сын, Бог и Господь,/ вопло́щься от Де́вы, нам яви́ся/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Пречестны́й Дими́трие,/ ны́не чи́сто услажда́яся и пи́щу прие́мля па́че у́мныя,/ иде́же собо́ри святы́х о́крест Го́спода лику́ют, блаже́нне,/ и́же тя ны́не чту́щия, хода́тайствуя, к себе́ привлецы́.

Преше́л еси́, ра́дуяся, жела́нием в рай,/ к еди́ному вои́стинну блаже́нству, к пребо́льшей добро́те,/ и к жи́зни вои́стинну нестаре́ющейся, и Све́ту Невече́рнему,/ Богоно́сне о́тче Дими́трие.

Я́ко Со́лнце просия́л еси́ в мона́шеских собо́рех,/ от млады́х ногте́й освяще́н был еси́,/ я́коже зарю́, испуща́я доброде́тели твоего́ жития́,/ пресла́дкий Дими́трие, Богоно́се о́тче преподо́бне.

Богоро́дичен: Разуме́вше издале́ча прозорли́выма очи́ма, проро́цы/ Тя я́ве провозвести́ша, хотя́щую Ма́терь бы́ти Вседе́телю, Владыце всех,/ тем Тя, Всепе́тая, Богоро́дицу испове́дуем.

Ин

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Явле́нием Боже́ственным сия́еши, о́тче Дими́трие преподо́бне,/ я́коже обеща́лся еси́, блаже́нне,/ моли́твою град твой сохрани́л еси́ от хотя́щих воева́ти без вины́ лю́ди твоя́, святе.

От Бо́га показа́лся еси́ нам цели́тель, неду́гующим в паде́ниих,/ очи́стник же, блаже́нне, и прогони́тель лука́вым ду́хом,/ тем тя вси велича́ем.

А́ще и преста́вился еси́ от нас, о́тче Дими́трие,/ в хра́мех Боже́ственных Святе́й Тро́ице предстоя́,/ храм Ду́ху Свято́му был еси́:/ моли́ся за вся христианы, и́ноки же и простцы́, тебе́ велича́ющия.

Богоро́дичен: Вои́стинну, Богоро́дице, Тобо́ю спа́сшиися, испове́дуем Тя,/ Де́во Влады́чице,/ я́ко родила́ еси́ нам Бо́га Спаси́теля,/ Еди́наго от Тро́ицы Сы́на и Сло́ва, Кресто́м разо́ршаго смерть,/ Его́же о нас с преподо́бным Дими́трием моли́, Тебе́ велича́ющих.

Свети́лен.

Подо́бен: Жены́, услы́шите:

Мирска́го пристра́стия я́ко от скве́рны уклони́лся еси́,/ и а́лчбою плоть увяди́л еси́, о́тче,/ и Небе́сною сла́вою со А́нгелы обогати́лся еси́./ Те́мже непреста́нно моли́ о нас Христа́ Бо́га, преподо́бне Дими́трие.

Сла́ва, и ны́не, Богоро́дичен:

Тя предста́тельницу и́мамы вси гре́шнии,/ о Пресвята́я Де́во!/ Ты благопреме́нна сотвори́ Сына Твоего́ Ма́терними Твои́ми моли́твами.

На хвали́тех стихи́ры, на 4, глас 5.

Подо́бен: Преподо́бне о́тче:

Преподо́бне о́тче,/ ду́шу твою́ с те́лом очи́стив,/ и Свято́му Ду́ху прекра́сная оби́тель яви́ся,/ и сла́вна тя конце́м, преблаже́нне Дими́трие, соде́ла./ В чудесе́х же вели́каго свети́льника, просвети́вшаго су́щих во мра́це,/ я́ко наста́вника и́ноком, соше́дшеся, велему́дренно ублажи́м.

Яви́лся еси́, Богоблаже́нне,/ му́драя плени́ца, связу́я мно́гая враг ополче́ния,/ те́мже и венце́м увя́злся еси́ неувяда́ющим,/ весе́лие, и ра́дость и сла́ву ве́чную восприя́л еси́, Богому́дре Дими́трие./ Моли́ Христа́ Бо́га/ дарова́ти мир ми́рови и душа́м на́шим ве́лию ми́лость.

Преподо́бне о́тче,/ теле́сныя стра́сти зе́льным воздержа́нием/ и по́стническими моли́твами же и труды́,/ сле́зными пото́ки и поты́ у́глия сла́дости погаси́л еси́,/ и в чудесе́х сла́вна тя показа́ Госпо́дь русским лю́дем,/ Дими́трие блаже́нне,/ и украси́ тя вы́шними дарова́нии,/ Ему́же служи́ши с Небе́сными си́лами,/ Иису́су Человеколю́бцу и Спа́су душ на́ших.

Сла́ва, глас 6:

Прииди́те, празднолю́бцы/ и по́стник сосло́вие,/ ве́рою соше́дшеся,/ и́стиннаго по́стника днесь почита́юще:/ ра́дуйся, ше́ствовав по стопа́м Владыки Христа́ у́зкий путь и безстра́стно житие́,/ я́коже дре́вле Авраа́м пра́ведный,/ о́тче Дими́трие,/ страннолю́бие притяжа́в, пресели́лся еси́ от оте́чества твоего́/ до ме́ста, иде́же ны́не благоуха́ет исцеле́ния честно́е те́ло твое́ всем притека́ющим и вопию́щим:/ о всеблаже́нне и преподобне!/ По́стником похвало́ и собесе́дниче Безпло́тным,/ правове́рному во́инству на́шему на пога́ныя спосо́бниче/ и наста́вниче и́ноком,/ о нас моли́ся Христу́ Бо́гу спасти́ ду́ши на́ша.

И ны́не, Богоро́дичен.

Славосло́вие вели́кое и отпу́ст.

На литурги́и

Блаже́нны от кано́на 1-го песнь 3-я, и 2-го песнь 6-я.

Проки́мен, глас 7: Честна́ пред Господем/ смерть преподо́бных Его́.

Стих: Что возда́м Господеви о всех,/ я́же воздаде́ ми?

Апо́стол к Гала́том, зача́ло 213. Аллилу́ия: Блаже́н муж, боя́йся Господа,/ в за́поведех Его́ восхо́щет зело́.

Стих: Си́льно на земли́ бу́дет се́мя его́.

Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник:

На Го́споди, воззва́х: стихи́ры Окто́иха 3 и святаго 3, глас 1.

Подо́бен: Небе́сных чино́в:

Доброде́телей верх и ве́рных основа́ние,/ святи́телей сла́ва и му́чеников похвала́,/ вся призыва́ет светло́ ве́рныя в па́мять свою́ честну́ю/ воспе́ти сего́ я́ко победи́теля,/ на земли́ Бо́га просла́вльшаго.

Воста́в явле́нием соборонача́льника Христа́,/ собра́ние беззако́нных ви́дев, му́чениче,/ усе́рдно на суди́ще прише́л еси́, му́дре,/ сла́вы взем победи́тельная,/ ны́не на Небесе́х водворя́ешися, преосвяще́нне.

Кро́вными ка́плями твои́ми, му́чениче Вла́сие,/ оде́жда Це́ркви истка́ся красно́,/ благопома́зании пе́стрыми укра́шься,/ сугу́быми боле́зней обагре́ньми,/ е́юже одева́ется я́ко красото́ю неве́стною,/ воспева́ющи Жениха́ Христа́.

Сла́ва, глас 4:

Я́ко добр детонаста́вник и учи́тель благоче́стия,/ де́йственною си́лою Боже́ственных слове́с твои́х/ жены́ Боголюбе́зны приве́л еси́ к подвиго́м му́ченическим,/ не́мощь естества́ тем укрепля́я о Христе́,/ с ни́ми тече́ние страда́ний до́бре сконча́в,/ в черто́зе Небеснем све́тло ра́дуешися,/ сугу́бым венце́м Боже́ственныя сла́вы украша́яся/ и прося́ с ни́ми мир нам дарова́ти/ и ве́лию ми́лость.

И ны́не, Богоро́дичен или́ Крестобогоро́дичен:

Подо́бен: Я́ко до́бля:

Распина́ема Христа́ Человеколю́бца ви́дящи, Пречи́стая,/ и ре́бра ископава́ема копие́м,/ пла́чущи, вопияше:/ что сие́, Сы́не Мой?/ что Ти безблагода́тнии лю́дие возда́ша,/ за я́же сотвори́л еси́ до́брая им?/ и тщи́шися безча́дствовати Мя, вселюбе́знейший./ Удивля́юся, Благоутро́бне, Твоему́ во́льному распя́тию.

На стихо́вне Окто́иха. Сла́ва, глас 6:

Прозя́б в поще́нии Боже́ственных доброде́телей,/ тезоиме́нно, Вла́сие,/ процве́л еси́ Дави́дски,/ я́ко фи́никс, во дво́рех Госпо́дних/ и, я́ко кедр, умно́жился еси́ исправле́ньми,/ я́ко виногра́д же плодови́т, в дому́ Бо́жии,/ во вре́мя муче́ния уре́заем мук томле́ньми,/ от плода́ по́двиг твои́х источи́л еси́ нам вино́ разу́мное,/ от него́же пию́ще, весе́лия Боже́ственнаго сердца́ наполня́ем/ и, согла́сно соше́дшеся к честне́й па́мяти твоего́ сконча́ния,/ ублажа́юще, восхваля́ем тя,/ прося́ще прия́ти тобо́ю мир и ве́лию ми́лость.

И ны́не, Богоро́дичен или́ Крестобогоро́дичен:

Подо́бен: Тридне́вен:

Лю́ди беззако́ннейшия,/ без пра́вды пригвожда́ющия Тя на Дре́ве,/ Де́ва и Чи́стая Ма́ти Твоя́ зря́щи,/ я́коже Симео́н прорече́,/ утро́бою, Спа́се, уязвля́шеся.

Тропа́рь, глас 4:

И нра́вом прича́стник,/ и престо́лом наме́стник А́постолом быв,/ дея́ния обре́л еси́, Богодохнове́нне,/ в виде́ния восхо́д,/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Власие./ Моли́ Христа́ Бо́га/ спасти́ся душа́м на́шим.

Кано́н, глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Похвалу́ согла́сну днесь Христу́ прино́сим,/ сла́вную Вла́сия му́драго творя́ще па́мять,/ Моисе́йски, празднолю́бцы, пою́ще песнь Бо́гу на́шему,/ я́ко просла́вися.

До́льних презира́тель Вла́сий и Христо́в рачи́тель, я́ко святи́тель, и му́ченик, и па́стырь,/ е́же де́лом показа́ние,/ и, предло́ж Боже́ственную трапе́зу, на снеде́ние созыва́ет нас.

Житие́ доброде́тельми очи́стил еси́ и сосу́д яви́лся еси́, потре́бен/ Боже́ственнаго ми́ра на восприя́тие честна́го служе́ния, му́дре,/ оде́жду же кровьми́ муче́ния испестри́л еси́.

Богоро́дичен: Воста́ от о́тча паде́ния, Богороди́тельнице Чи́стая,/ и от кля́твы изба́вися я́ве прама́терния, Пресвята́я,/ Твои́м Рождество́м род весь челове́ческий.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Я́ко ве́дом Бо́гу, свяще́нствовати Христу́ пома́зался и научи́лся Ду́хом,/ сам ся кро́вию освяти́л еси́.

Уче́ньми вои́стинну сбытие́м му́дрых дел твои́х/ Це́ркви был еси́ му́ченик и учи́тель, Вла́сие.

О́браз благоче́стия Це́ркве Христо́вы был еси́,/ свяще́нную оде́жду твою́ кровьми́ уясни́л еси́ страда́ний твои́х.

Богоро́дичен: Ро́ждши на земли́ пребога́таго Бо́га, Чи́стая,/ челове́ческое паде́ние на Небеса́ возвела́ еси́.

Конда́к, глас 2.

Подо́бен: Вы́шних ища́:

Боже́ственное прозябе́ние, цвет неувяда́емый,/ лозы́ Христо́вы розго́ многострада́льная, Богоно́се Вла́сие,/ ве́рою чту́щия па́мять твою́ весе́лия твоего́ испо́лни,/ моля́ся непреста́нно о всех нас.

Седа́лен, глас 8.

Подо́бен: Прему́дрости:

Благоче́стия сый прозябение че́стно,/ нече́стия яви́лся еси́ потреби́тель, Вла́сие прехва́льне, си́лою духо́вною:/ на суди́щи бо и́дольскую лесть обличи́л еси́/ и благодерзнове́нно пе́ти Тро́ицу пропове́дал еси́;/ те́мже и беззако́нным преда́вся, страстоте́рпче, зве́ря умори́л еси́, злонача́льнаго зми́я./ Сего́ ра́ди вопие́м ти:/ моли́ Христа́ Бо́га, согреше́ний оставле́ние дарова́ти чту́щим лю́бовию святу́ю па́мять твою́.

Сла́ва, и ны́не, Богоро́дичен:

Со́лнца о́блаче разу́мнаго,/ Боже́ственнаго Света свети́льниче златокова́нный,/ нескве́рная, небла́зная, Всенепоро́чная Влады́чице,/ омраче́нную ду́шу мою́ ослепле́нием страсте́й безстра́стия заре́ю просвети́, молюся,/ и оскверне́ное ми се́рдце омы́й пото́ки умиле́ния, покая́ния же слеза́ми,/ и от тиме́ния мя очи́сти дел мои́х,/ да любо́вию зову́ Ти:/ Богоро́дице Присноде́во,/ моли́ Христа́ Бо́га прегреше́ний оставле́ние пода́ти ми,/ Тебе́ бо име́ю наде́жду, раб Твой.

Крестобогоро́дичен:

А́гнца, и Па́стыря, и Изба́вителя/ А́гница зря́щи на Кресте́,/ восклица́ше, пла́чущи, и, го́рько рыдающи, вопия́ше:/ мир у́бо ра́дуется, прие́мляй Тобо́ю избавле́ние,/ утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости./ Долготерпели́ве Го́споди,/ ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Утвержда́ем же́злом и́стинным,/ Моисе́йски низложи́л еси́ пре́лести зми́я, Вла́сие, уго́дниче Христо́в,/ обличи́в мучи́теля и наст́авль но́выя лю́ди.

Слове́сным тя и безслове́сным благоде́теля,/ е́же к Бо́гу присвое́ние показа́, блаже́нне, исправле́ний твои́х,/ те́мже у́бо прия́л еси́ исцеле́ний дарова́ния.

Во удо́ле, иде́же положи́ся боле́знь, су́щим о Христе́ твои́м овца́м пра́ведно,/ все, о́тче, удави́л еси́ сло́вом благода́ти беззако́ния те́рние.

Богоро́дичен: Я́ко рай, посреде́ Це́ркве насажде́н,/ яви́ся ро́ждши Дре́во Жи́зни, Препе́тая,/ от Него́же у́бо вкуси́вше, позна́хом Христа́ Бо́га на́шего.

Песнь 5

Ирмо́с: Ты, Го́споди, мой свет,/ в мир прише́л еси́,/ свет святы́й, обраща́яй из мра́чна неве́дения/ ве́рою воспева́ющия Тя.

На па́жити Боже́ственней просте́р преде́лы ста́да твоего́, святи́телю,/ Богому́дренно лесть отгна́л еси́ от всея́ земли́.

Уче́ньми, му́дре святи́телю, ста́до твое́ утверди́л еси́ в ве́ре,/ се бо и жены́ лесть попра́ша.

Любо́вию Христо́вою утвержда́емы, жены́ к подо́бию прихо́дят по́двиг твои́х, о́тче,/ закала́емы усе́рдно Христо́ви.

Богоро́дичен: Умертви́ся вои́стинну Рождество́м Твои́м, Влады́чице, наи́тие сме́ртное,/ све́том бо тьма разоря́ема ви́дится.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Красото́ю разли́чных ран теле́сных/ та́йныя оде́жды твое́я украси́л еси́ ле́поту/ и обою́ду, иера́рше, венча́лся еси́ благода́тию.

Ве́рою Христо́вою я́ко стеко́шася,/ жены́ стра́ждущия с тобо́ю, о́тче, усе́рдно умро́ша, Власие./ Любо́вию творя́щих па́мять твою́ сохрани́.

Ре́вностию Христо́вою разже́гшеся му́ченицы,/ ласка́тельныя ле́сти пре́лесть отве́ргше,/ му́кам томле́ния запали́ша кро́вию.

Богоро́дичен: Кре́пость моя́ вои́стинну Ты и пе́ние еси́, Богородительнице,/ на Тя бо наде́жду мою́ возложи́х/ и возвы́сих Тобо́ю на враги́ моя́ рог мой.

Конда́к, глас 8.

Подо́бен: Я́ко нача́тки:

Свяще́ния пома́занием и муче́ния кро́вию украси́лся еси́, сла́вне Вла́сие,/ и сия́еши всю́ду, в Вы́шних лику́я/ и нас назира́я, в храм твой прише́дшия/ и в не́м тебе́ непреста́нно зову́щия:/ всех нас соблюди́.

И́кос:

Со тща́нием, бра́тие, собери́теся и храм му́ченика дости́гните,/ я́ко да сего́ воспое́м днесь, я́ко да благода́тию его́ наслади́мся,/ ду́ши бо спаса́ет и телеса́ от страсте́й многоразли́чных,/ я́ко му́ченик, я́ко преподо́бен,/ я́ко ве́рен святи́тель и побо́рник,/ вопию́щим ему́ от души́ чи́сты:/ всех нас соблюди́.

Песнь 7

Ирмо́с: В пе́щи Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Давидски тебе́ взыва́ем, о о́тче Вла́сие, любо́вию: Го́споду яви́лся еси́ ты подо́бник, и стопы́ твоя́ не позна́шася,/ и́бо стези́ твоя́ о Го́споде яви́шася на во́дах.

Спасовою насла́ждшеся му́ченицы благода́тию,/ воистинну ра́дость вмени́сте напа́сти муче́ние:/ чу́до же, я́ко превы́ше челове́ка, крове́м, прело́жшимся во млеко́, ужа́сно.

Ма́терне у́бо к муче́нию дерзнове́ние зря́ще/ ве́рою Христо́вою де́ти и того́ благоле́пия наслажда́ющеся,/ ко Владыце, ра́дующеся, тща́хуся.

Богоро́дичен: Вы́шняго освяще́нное Боже́ственное селе́ние, ра́дуйся:/ Тобо́ю бо даде́ся ра́дость, Богоро́дице, вопию́щим:/ благослове́на Ты в жена́х еси́, Всенепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Ру́це распросте́р псало́мски пред Лице́м Божиим, о́тче,/ прине́сл еси́, священноде́йствуя, кро́вию твое́ю моли́твы твоя́ Христу́. Те́мже ча́шу, му́дре, спаси́тельную испи́в, вопия́л еси́:/ благослови́те, вся дела́ Госпо́дня, Го́спода.

Вдови́це ревну́юще благоче́стно, Боже́ственную па́мять твою́ соверша́ем ве́рно, Богора́дованне Вла́сие,/ и сам у́бо обеща́ние, е́же сотвори́л еси́ к ней,/ и с не́ю к нам дарова́нии благи́ми нам буди́ на по́мощь.

Богоро́дичен: Бяше естество́ челове́ческое, е́же пре́жде осужде́нное паде́нием преступле́ния,/ обре́те же, Богоро́дице, Рождество́м Твои́м благослове́ние вои́стинну/ и пое́т ра́достно:/ благослови́те, вся дела́ Госпо́дня, Го́спода.

Песнь 9

Ирмо́с: Ка́мень нерукосе́чный/ от несеко́мыя горы́ – Тебе́, Де́во,/ краеуго́льный отсече́ся –/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Я́коже в сла́дости ра́йстей/ и в ней Ца́рствие, Вла́сие, му́дре святи́телю, насле́дие уготовля́я,/ на заколе́ние поте́кл еси́, о Го́споде ра́дуяся.

Горды́ню посе́кл еси́ ты, блаже́нне, духо́вным мече́м/ вознося́щихся су́етно на ста́до твое́ безбо́жных,/ твои́ми кровьми́ украси́в благоче́стие.

Вла́сие, му́дре святи́телю, со стра́ждущими с тобо́ю жена́ми, вку́пе и с детьми́ Боже́ственными/ благослове́ньми хва́лящия тя венча́ти помоли́ся,/ я́ко от нача́ла тебе́ сло́во воспе́вших.

Богоро́дичен: В Рождестве́ Де́ва яви́лася еси́, я́ко пре́жде Рождества́, Богоро́дице,/ и по Рождестве́ та́кожде уста́вленныя зако́ны естества́ преше́дши, Влады́чице./ Темже Тя вси велича́ем.

Свети́лен:

Подо́бен: Не́бо звезда́ми:

Святи́тель и му́ченик, преподо́бен, незло́бив я́влься, Вла́сие,/ страсте́й Христо́вых ра́ны нося́,/ Да́вшаго ти благода́ть исцеля́ти вся неду́ги.

Богоро́дичен: Тя Дании́л преднапису́ет несеко́мую го́ру, из нея́же честны́й Ка́мень отсече́ся,/ истнева́я и́дольския хра́мы, Богороди́тельнице Мари́е.

Ве́чер стихосло́вим, Блаже́н муж: 1-й антифо́н.

На Го́споди, воззва́х: стихи́ры на 8, глас 8.

Подо́бен: О, пресла́внаго чудесе́:

Блаже́нне Богому́дре кня́же Все́володе,/ чи́стая твоя́ душа́,/ правосла́вною му́дростию сияющи,/ облиста́ доброде́телей све́тлостию/ и озаря́ет ве́рных исполне́ние,/ бесо́в тьму отгоня́ющи./ Те́мже я́ко прича́стника невече́рней благода́ти/ тя благоче́стно почита́ем, досточу́дне.

Име́я ду́шу ми́лостивну, и чист по́мысл,/ и се́рдце бодрели́во,/ ве́ру небла́знену и любо́вь нелицеме́рну,/ от земли́ преста́вился еси́ к Небе́сным,/ ли́ком пра́ведных причте́н./ Те́мже чтим тя свяще́нными пе́сньми/ и благоче́стно вси ублажа́ем,/ блаже́нне кня́же Все́володе.

Боже́ственными поуче́нии вжиля́ем,/ сла́сти страстны́я от души́ отгна́л еси́/ и Тро́ице селе́ние чи́сто был еси́./ Те́мже к Боже́ственному наслажде́нию отше́л еси́,/ Бо́гу, соблюда́ющу ны́не/ неруши́мо твое́ честно́е те́ло/ Боже́ственными судьба́ми,/ и́миже Сам весть прославля́яй тя/ я́ве, Все́володе.

И́ны стихи́ры, глас 4.

Подо́бен: Я́ко до́бля:

От благочести́ваго корене/ благове́рия ветвь прозябе́,/ по Боже́ственному Па́влу апо́столу:/ аще бо ко́рень свят, то и ве́тви, е́же рече./ Ты же, от ди́вия ма́слины уклони́вся,/ востекл еси́ на па́жить зако́на живоно́снаго,/ благоче́стием осия́ем,/ блаже́нне кня́же Гаврии́ле,/ Благода́телю всех Бо́гу благоугоди́л еси́.

Благочести́в и непоро́чен,/ правди́в же и и́стинен, по И́ову,/ поуча́яся в за́поведех Госпо́дних всегда́,/ и, я́ко дре́во, сажде́но при исхо́дищих воды́ живо́тны,/ Бо́гу плоды́ принося́ благоче́стия,/ возде́лая хра́мы святы́я мно́ги/ и напису́я руко́ю твое́ю, блаже́нне, живо́тная словеса́/ на утвержде́ние Це́рквам.

Благоче́стия столпа́ непоколеби́ма,/ доброде́телей украше́ние,/ благоутро́бия сокро́вище,/ ми́лости пучи́ну неисчерпа́ему,/ во́ина на неве́рныя непобеди́ма,/ Все́волода кро́ткаго почти́м,/ изгна́ние претерпе́вшаго/ и ве́нцем терпе́ния от Царя́ всех Бо́га/ ве́чно венча́на.

Сла́ва, глас 6:

Нача́льнику бла́говестил Божия Сло́ва/ и неизрече́нных тайн служи́телю,/ Небе́сному воево́де Вы́шних сил тезоимени́таго,/ благочести́ваго вели́каго страти́га Все́волода,/ соше́дшеся, празднолю́бцы, хвала́ми и пе́сньми духо́вными возвели́чим/ и согла́сно возопие́м ему́:/ о всеблаже́нне и Богому́дре кня́же Гаврии́ле!/ Я́ко име́я дерзнове́ние ко Пресвяте́й Тро́ице,/ моли́ побе́ду да́ти во́ем благочести́вым во бра́нех,/ и от супоста́т наше́ствия град свой Псков сохрани́ти,/ и спасти́ ду́ши на́ша.

И ны́не, Богоро́дичен: Кто Тебе́ не ублажи́т: Вход. Проки́мен дне.

И чте́ния 3, пи́саны сего́ ме́сяца во 12-й день (зри страни́цы 413 – 415)

На ли́тии стихи́ры, глас 1:

Наста́ ны́не всечестна́я па́мять вели́каго князя Все́волода,/ нарече́ннаго по осмодне́вному зако́ну Госпо́дню но́выя благода́ти Гаврии́ла,/ на́шего засту́пника и помо́щника в ско́рбех,/ и боля́щим врача́ предо́бра,/ и на бра́нех посо́бника непобори́ма./ Сего́ ра́ди прииди́те, вси концы́ земни́и,/ прииди́ же и ты, вели́кий Но́вграде,/ в тебе́ бо пожи́вый, сей блаже́нный святы́я це́ркви мно́ги созда́./ Его́же досто́йно да ублажи́м и све́тло па́мять его́ торжеству́им:/ мо́лится бо Го́сподеви спасти́ся душа́м на́шим.

Житие́ твое́ по Бозе пожи́в, блаже́нне кня́же Гаврии́ле,/ в моли́тве и посте́, по апо́столу,/ в за́поведех Госпо́дних пре́был еси́,/ вдови́цы и оби́димыя, заступа́я, ми́ловал еси́./ Те́мже моли́ся Спа́су всех за правосла́вныя лю́ди всерусския,/ е́же одоле́ти им инове́рныя язы́ки,/ и нам испроси́ от Го́спода ми́лость в день Су́дный.

Глас 2:

Я́коже услы́ша Боголюби́вый епи́скоп Нифонт преставле́ние твое́ че́стное,/ тогда́ и наро́ди вели́каго Нова́града/ восхоте́ша мо́щи твоя́ взя́ти к себе́./ По́сланнии же от свяще́нных дерзну́ша взя́ти тя, и не возмого́ша,/ и та́ко пре́был еси́, всеблаже́нне Гаврии́ле, неподви́жим с ме́ста своего́,/ и сугу́бо чудодействие показа́л еси́,/ я́коже дре́вле чу́дный Илия Елиссе́еви ми́лоть свою́, усугу́бити Ду́ха благода́ть./ Ты же но́готь от честны́я руки́ своея́/ по́дал еси́ Вели́кому Нову́граду на исцеле́ние и заступле́ние./ И ны́не, моли́ся, святе, за град и лю́ди твоя́,/ е́же изба́витися нам от язы́ческаго наше́ствия/ и спасти́ся душа́м на́шим.

Сла́ва, глас 4:

Прииди́те, сла́внаго гра́да Пско́ва наро́ди,/ ма́лии и вели́цыи,/ на́шего засту́пника, от Вышегра́да к нам прише́дшаго,/ вели́каго князя Все́волода хвала́ми и пе́сньми ублажи́м,/ ми́лостынею же, и посто́м, и все́ми до́брыми де́лы Бо́гу угоди́вша,/ и ду́шу свою́ Ему́ преда́вша,/ и град Псков моли́твою изба́вльша от язы́ческаго наше́ствия,/ нам же честны́я мо́щи своя́ оста́вльша в па́мять,/ точи́ти неоску́дно исцеле́ния приходя́щим к нему́ ве́рою./ Те́мже и мы, припа́дающе, мо́лимся:/ о всеблаже́нне кня́же Гаврии́ле!/ Моли́ся Святе́й Тро́ице о душа́х на́ших.

И ны́не, Богоро́дичен: Призри́ на моле́ния:

На стихо́вне стихи́ры, глас 4.

Подо́бен: Дал еси́ зна́мение:

Дал еси́, Царю́ царе́м,/ благочести́вому Твоему́ кня́зю Все́володу,/ Дави́дову кро́тость, Соломо́ню му́дрость,/ Иезеки́ево раче́ние,/ по Влади́мире ве́ре храни́теля,/ церква́м строи́теля всеизря́дна,/ Иису́се Всеси́льне и Спа́се душа́м на́шим.

Стих: Возвесели́тся пра́ведник о Го́споде/ и упова́ет на Него́.

Даде́ зна́мение уго́дником Свои́м Госпо́дь:/ Иисусу Нави́ну/ стояти со́лнечному тече́нию во вре́мя бра́ни./ Та́коже и блаже́нному кня́зю Гаврии́лу,/ егда́ приидо́ша от Нова́гра́да мо́щи его́ взя́ти,/ ра́ка же ста, я́ко дре́вле со́лнце,/ неподви́жима с ме́ста своего́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Дал еси́ зна́мение боя́щимся Тебе́, Го́споди:/ благочести́вому царю́ Константи́ну/ Крест Твой Честны́й победи́ти враги́./ Та́кожде и ны́не по́дал еси́/ от честны́я руки́ но́готь благочести́ваго кня́зя Гаврии́ла/ на утвержде́ние Нову́гра́ду/ и всем на исцеле́ние.

Сла́ва, глас 6:

Христолюби́вых люде́й всерусских ты ве́лий хода́тай/ и во бра́нех посо́бствуяй на иноязы́чныя/ Святе́й Тро́ице предстоя́ в дерзнове́нии мно́зе./ Те́мже и мы, я́ко жи́ву ти су́щу, глаго́лем:/ преблаже́нне кня́же Гаврии́ле,/ и ны́не моли́ся о стране́ на́шей,/ е́же изба́витися от нахожде́ния инове́рных язы́к,/ и всем христолюби́вым лю́дем от наве́т вра́жиих,/ и спасти́ся душа́м на́шим.

И ны́не, Богоро́дичен, в то́йже глас.

Тропа́рь, глас 4:

Из мла́да яви́лся еси́, Богому́дре кня́же Гаврии́ле,/ Боже́ственный сосу́д, избра́н Богови,/ благоче́стием воспита́н, ве́ру непоро́чну соблю́д/ и мно́ги святы́я це́ркви устро́ив,/ изгна́ние претерпе́л еси́ от свои́х,/ я́коже и целому́дрии прароди́тели твои́ от бра́та убие́ние./ С ни́миже предстоя́ Святе́й Тро́ице,/ моли́ся, стране́ на́шей сохране́нной бы́ти/ и всем нам спасти́ся.

Сла́ва, и ны́не, Богоро́дичен: Е́же от ве́ка утаеное:

НА У́ТРЕНИ

На Бог Госпо́дь: тропа́рь два́жды. Сла́ва, и ны́не, Богоро́дичен.

По 1-й стихоло́гии седа́лен, глас 1.

Подо́бен: Гроб Твой, Спа́се:

Благонаро́читую па́мять пра́зднуют вку́пе вся Це́ркви преставле́ния вели́каго князя Все́волода,/ уго́дника Христо́ва,/ и сего́ приле́жно моля́щи/ исцели́ти неду́ги и боле́зни на́ша/ и вся́ких искуше́ний изба́вити ве́рою восхваля́ющих его́.

Сла́ва, и ны́не, Богоро́дичен:

Чу́до чуде́с, Благода́тная, в Тебе́ зря́щи, тварь ра́дуется:/ зачала́ бо еси́ безсе́менно и родила́ еси́ неизрече́нно,/ Его́же чинонача́лия А́нгелов ви́дети не мо́гут./ Того́ моли́ о душа́х на́ших.

По 2-й стихоло́гии седа́лен, глас 5.

Подо́бен: Собезнача́льное:

Тве́рдаго адама́нта и столпа́, непоколеби́ма вра́жиими прило́ги,/ вели́каго кня́зя Все́волода пе́сньми почти́м,/ и́же в вели́цей сла́ве и во изоби́лии жив ле́та своя́, непоколеби́м пребы́сть,/ терпе́нием бо во изгна́нии за и́стину посрами́ врага́/ и ны́не мо́лит спасти́ся нам.

Сла́ва, и ны́не, Богоро́дичен:

Ужа́сно чу́до зача́тия, и несказа́нен о́браз Рождества́ в Тебе́ позна́ся, Присноде́во Чи́стая,/ ужаса́ет мой ум и удивля́ет помышле́ние:/ сла́ва Твоя́, Богоро́дице, во всех простре́ся ко спасе́нию душ на́ших.

По полиеле́и седа́лен, глас 8.

Подо́бен: О Тебе́ ра́дуется:

Благоче́стно на земли́ в зако́не Госпо́дни пожи́в,/ ве́ру непоро́чну соблю́л еси́ в се́рдцы твое́м,/ сконча́в до́брый по́двиг, плоды́ доброде́телей возрасти́в,/ пожа́л еси́ кла́сы рукоя́ти своея́/ и вене́ц сугу́б от Вседержи́теля руки́ прия́л еси́,/ блаже́нне кня́же Гаврии́ле,/ и Того́ сла́вы сподо́бился еси́./ Престо́лу предстоя́ Святы́я Тро́ицы,/ моли́ спасти́ град и лю́ди,/ чту́щия любо́вию святу́ю па́мять твою́.

Сла́ва, и ны́не, Богоро́дичен:

О Тебе́ ра́дуется, Благода́тная, вся́кая тварь,/ А́нгельский собо́р и челове́ческий род,/ освяще́нный хра́ме, и раю́ слове́сный,/ де́вственная похвало́, из Нея́же Бог воплоти́ся/ и Младе́нец бысть, пре́жде век Сый Бог наш,/ ложесна́ бо Твоя́ престо́л сотвори́/ и чре́во Твое́ простра́ннее Небе́с соде́ла./ О Тебе́ ра́дуется, Благода́тная, вся́кая тварь,/ сла́ва Тебе́.

Таже степе́нна, 1-й антифо́н, 4-го гла́са.

Про́кимен: Пра́ведник, я́ко фи́никс, процвете́т:

Стих: Насажде́ни в до́му Госпо́дни,/ во дворех Бо́га на́шего процвету́т.

Та́же: Вся́кое дыха́ние:

Ева́нгелие от Матфе́я, зача́ло 43,

По 50-м псалме́ стихи́ра, глас 6:

Днесь всечестна́я па́мять возсия́ вели́каго кня́зя Все́волода,/ ве́рных сердца́ уясни́ па́че со́лнца доброде́телей свои́х блиста́ньми/ и, я́ко луча́ светла́, мир озаря́я чудесы́ свои́ми./ Со́лнце бо Пра́ведное, Христо́с Бог наш,/ моли́твами его́ просвеща́ет ду́ши на́ша.

Кано́н Богоро́дице со ирмосо́м на 6: и свята́го на 8. Кано́н свята́го, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть,/ Препросла́вленный Госпо́дь, сла́вно бо просла́вися.

Высоко́ житие́ име́я и восхожде́нии Боже́ственными весь све́тел быв,/ просвеще́ние ми испроси́, восхваля́ющу честны́я твоя́ по́двиги,/ и́миже до́бре пожи́в, улучи́л еси́, Все́володе,/ и́хже наде́ялся еси́.

Мироуха́нная любя́ уче́ния,/ и во чте́нии Свяще́нных Писа́ний упражня́яся,/ сласте́й уклони́лся еси́, блаже́нне, смра́дных и безче́стных/ и облагово́нился еси́, Боже́ственными добро́тами украша́ем.

Дрема́ние о́чию от души́, блаже́нне, отгна́л еси́,/ бдя и Бо́гови приединева́яся всено́щными стоя́нии,/ непрекло́нен ну́ждами естества́,/ те́мже ко дню невече́рнему дости́гл еси́.

Богоро́ дичен: Я́ко черто́г одушевле́н Бо́жий и кади́льницу мы́сленнаго и светоно́снаго у́гля,/ Присноблагода́тную ублажа́ем Богоро́дицу, зову́ще:/ ра́дуйся, Хода́таице спаси́тельнаго воскресе́ния.

Другий кано́н святаго, глас 4. И а́ще во́лиши повели́теля уве́дети, в нача́лех тропаре́й кано́на сего́.

Песнь 1

Ирмо́с: Несть Тебе́ подо́бен препросла́вленный Го́споди:/ руко́ю бо кре́пкою изба́вил еси́ лю́ди,/ я́же стяжа́л еси́, Человеколю́бче.

Несмь подо́бен, ка́ко воспе́ти от ча́сти/ Небе́сному Воево́де тезоимени́таго вели́каго кня́зя Все́волода,/ возсия́вша в словя́нех насе́льшихся,/ иде́же первозва́нный во апо́столех жезл водрузи́.

В ле́та вели́каго кня́зя Влади́мира ца́рскою диади́мою от Монома́ха че́стно почте́н, возсия́в,/ пе́рвому же вели́кому Влади́миру подража́в,/ я́ко от ко́рене их честна́ ветвь изра́сл еси́.

Царя́ Небе́снаго, сла́вима в Тро́ице,/ из мла́да яви́лся еси́ сосу́д чист и непоро́чен./ Ему́же ны́не предстоя́ дерзнове́нно,/ о нас помоли́ся, блаже́нне кня́же Гаврии́ле.

Богоро́дичен: Чи́стую Тя и непоро́чную Арха́нгел Гаврии́л я́ко узре́,/ ра́дуйся, Тебе́, Влады́чице, све́тло возопи́, Неискусобра́чная,/ челове́ком спасе́ние, князе́м и царе́м похвала́ и честносло́вие.

Катава́сия: Отве́рзу уста́ моя́:

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Глаго́лом живото́чным внима́я, испи́л еси́ во́ду спасе́ния,/ возгнуша́вся го́рькаго греха́, и, поя́, глаго́лал еси́ Бо́гови, Все́володе:/ я́ко несть свя́та, па́че Тебе́, Го́споди.

Ми́лование стяжа́л еси́ христоподража́тельно,/ разда́л еси́ бога́тство тре́бующим,/ Небе́сное бога́тство, хода́тайствующее тебе́, е́же и получи́л еси́, поя́, Все́володе:/ я́ко несть свя́та, па́че Тебе́, Го́споди.

Присво́ився Зижди́телю любо́вию Боже́ственною, прия́т Небе́сное насле́дие/ и дре́ва живо́тнаго прича́стник был еси́,/ обще́нием обо́жаем, и поя́, сла́вне:/ я́ко несть свя́та, па́че Тебе́, Го́споди.

Богоро́дичен: Су́щи А́нгел честне́йши,/ Зижди́теля А́нгелов во утро́бе носи́ла еси́ и родила́ еси́ неизрече́нно,/ Ему́же вси пое́м:/ Ты еси́ Бог наш,/ несть свя́та, па́че Тебе́, Го́споди.

Ин

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́:/ несть бо свят, па́че Тебе́,/ Человеколю́бче.

Сла́внаго страстоте́рпца Гео́ргия храм и оби́тель прече́стну со блаже́нным Кириа́ком воздви́гл еси́,/ и в ней мно́жество и́нок о тебе́, Богому́дре, хва́лятся/ и мольбу́ Богови прино́сят.

Бори́са, целому́драго прароди́теля своего́, поревнова́в,/ зако́нное сочета́ние, я́коже вели́кий Моисе́й и Иса́йя име́ста, Боговиде́ния сподо́бистася,/ терпе́нием до конца́ блаже́нство и Бо́жие благослове́ние получи́ша.

Всея́ Руси́ вели́кая княги́ня Богому́драя О́льга ви́де трисо́лнечныя лучи́, сия́юща на усть Пле́сковы,/ назна́менуя град и храм Пресвяты́я Тро́ицы,/ в нем бо и ты, досточу́дне, чудеса́ соде́я,/ с не́юже о нас моли́ся.

Богоро́дичен: Сказу́я е́же дре́вле сокрове́нное та́инство, Отрокови́це,/ Тебе́ иногда́ Гаврии́л, взыва́я:/ ра́дуйся, Бо́жия пала́то,/ в ню́же всели́вся, вся челове́ки обожи́л есть, я́ко Милосе́рд.

Седа́лен глас 4:

Благоволи́в благи́ми дея́нии,/ искуси́лся еси́, я́ко зла́то в пе́щи, напа́стьми, Все́володе сла́вне./ Те́мже и по сме́рти источа́еши бога́тно чудеса́, я́ко во́ды,/ и неду́ги исцеля́еши, о нас при́сно моля́ся,/ я́ко да согреше́ний проще́ние прии́мем.

Ин седа́лен, глас 3.

Подо́бен: Красоте́:

Иму́щи Дух и́стинный, прему́дре,/ и́же в тебе́ пожи́л есть, сосу́д и жили́ще Пресвяте́й Тро́ице соде́ла,/ стро́ити и соблюда́ти церква́м благоле́пие и утвержде́ние./ Сего́ ра́ди и мы, соше́дшеся в па́мять твою́,/ Богому́дре кня́же Гаврии́ле, мо́лим тя:/ Христо́ви моли́ся дарова́ти нам ве́лию ми́лость.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную? что же возымену́ю Тя?/ недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щься,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Уче́ния оте́ческая храня́ невреди́мо,/ правосла́вно мудрова́ние ты от младе́нства име́л еси́,/ житие́ нескве́рно и ми́лостивен нрав,/ досточу́дне.

Ни молва́ мирска́я, ни вла́сти держа́ние,/ ни сла́ва тле́нная твое́ е́же к Бо́гу жела́ние уста́виша, Все́володе,/ но благоволи́л еси́ вои́стинну Боже́ственными дея́нии.

Возвыша́ем Боже́ственными поуче́нии всегда́,/ врага́ смири́л еси́/ и исцеле́ний де́йство прия́т, Все́володе,/ судо́м пра́ведным вся управля́ющаго.

Иска́пающи сла́дость ра́ка моще́й твои́х бога́тых исцеле́ний,/ стра́сти отгоня́ет, Все́володе, ве́рою чту́щих тя/ и попаляет бесо́в вся полки́.

Богоро́дичен: Всепетая, во́инствы Го́рними пева́емаго Бо́га породила́ еси́,/ Челове́ка вои́стинну бы́вша,/ Его́же о рабе́х Твои́х моля́щи не преста́й, Присноде́во.

Ин

Ирмо́с: Неизсле́дный Бо́жий сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

По благослове́нию архиере́я со отце́м свои́м, Богому́дре, подви́гшеся,/ мног труд показа́ша, вели́кий Но́вград многому́дренно соде́ласта/ на утвержде́ние ве́рою зову́щим:/ сла́ва си́ле Твое́й, Го́споди.

Епи́скопа вели́каго Новагра́да свяще́нием це́рковь многочу́дну вели́кому Иоа́нну Предте́чи/ в па́мять сы́ну твоему́, прему́дре Гаврии́ле, воздви́гл еси́,/ с ни́мже поя́:/ сла́ва си́ле Твое́й, Го́споди.

Генна́дия Патриа́рха Богосло́вию после́довал еси́, Богому́дре Гаврии́ле,/ Триипоста́снаго Существа́ в со́бствех, Отца́, и Сы́на, и Свята́го Ду́ха,/ во Еди́ном Божестве́ покланя́ема бы́ти, ве́ровав,/ Ему́же с ним поя́:/ сла́ва си́ле Твое́й, Го́споди.

Богоро́дичен: Всю Тя, Ду́хом Гаврии́л очиствова́нну, Всенепоро́чная, разуме́в,/ вопие́т Ти я́вственно:/ о ра́дуйся, кля́твы избавле́ние и пра́отцев воззва́ние!

Песнь 5

Ирмо́с: Просвеще́ние во тьме лежа́щих,/ спа́сение отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Заре́ю честно́ю Святы́я Тро́ицы просвеще́н,/ зако́ном же Сея́ огражде́н, нощь жития́ непреткнове́нно ты премину́л еси́,/ виде́нии Боже́ственными окриля́ем, блаже́нне,/ и в Боже́ственную жизнь всели́лся еси́.

Ны́не на тебе́ чу́до ве́лие зри́тся, и у́жаса испо́лнь:/ ка́ко по погребе́нии вои́стинну мно́го лет соблюде́ся неруши́мо, блаже́нне,/ твое́ те́ло, во гро́бе лежа́щее,/ судьба́ми, и́ми́же весть Сам, прославля́яй тя.

Бла́гоже твоему́, е́же к Бо́гу, дерзнове́нию,/ бла́гоже жела́нию, е́же в се́рдцы к Нему́ име́л еси́,/ бла́го пожи́в, Гаврии́ле,/ просия́л еси́ пресла́вно Боже́ственными светлостьми́/ и уясни́л еси́ ве́рных совокупле́ния.

Богоро́дичен: О нас из Тебе́ воплоще́ннаго, Де́во Ма́ти, всегда́ моли́,/ благоче́стно Тя блажа́щих,/ изба́витися бед, душетле́нных страсте́й, и печа́лей,/ и ве́чнующаго пла́мене муче́ния.

Ин

Ирмо́с: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы,/ и к све́ту у́мному вознося́й Моего́ Божества́.

Пско́ва гра́да и ла́дожане, избра́ннии людие, при́звани новогоро́дскими му́жи,/ умы́слившими на изгна́ние твое́, свя́те,/ сове́т их разверго́ша, возврати́ша тя, ра́достию мир подаю́ща.

Руко́ю твое́ю честно́ю написа́в, прему́дре Гаврии́ле,/ твоего́ строе́ния вели́каго Иоа́нна Крести́теля це́ркви,/ пребога́тое твоего́ пра́веднаго дая́ния законоположе́ние ве́чно,/ мир всем да́руя.

Многоразсу́дное вселе́нских учи́телей о Це́ркви Христо́ве разсмотри́в,/ и твои́х святоле́пных прароди́телей зако́нное завеща́ние,/ и уста́вы судо́м оте́ческим, преда́в Царю́ сла́вы, Богому́дре,/ архиере́ом непоколеби́мо соблюда́ти.

Богоро́дичен: Храм су́щи свяще́ния, Пренепоро́чная,/ веща́нием Гаврии́ла Арха́нгела, во святы́х почива́ющаго, родила́ еси́ Пресвята́го Бо́га,/ всех освяща́ющаго и лю́тых изыма́юща.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Точе́ния сла́дка иска́паху, блаже́нне, по́тове твой,/ и ра́дование, и исцеле́ний сия́ние в хвалу́ Христа́ Бо́га на́шего.

Во дво́рех Бо́жиих процве́л еси́ виногра́д многопло́ден прозя́бший,/ доброде́телей гро́здие, де́лателю душа́м оби́лие пода́в.

Ца́рства Бо́жия возжеле́л еси́ и, над страстъми́ ца́рствовав, Все́володе,/ по благоволе́нию лу́чшему ра́дость пра́ведных получи́л еси́.

Богоро́дичен: Избра́нна Бо́гу бы́вши, я́ко прекра́сна,/ село́ простра́нно Сему́, Де́во, была́ еси́,/ и черто́г, и све́щник, и трапе́за.

Ин

Ирмо́с: Возопи́ша с весе́лием пра́ведных ду́си:/ ны́не ми́ру заве́т но́вый завеща́ется,/ и кропле́нием да обновя́тся лю́дие/ Бо́жия Кро́ве.

Бу́яго наро́да де́рзость на Су́ждаль,/ не послу́шавша святи́теля богонаказа́тельных слове́с чужда́го достоя́ния не жела́ти,/ ты же, пра́ведниче, пра́вду возлюби́в,/ в мир сих преложи́л еси́.

Умо́м разсуди́тельным/ оби́дящия достоя́ние, прему́дрости Бо́жия Це́ркве, инове́рныя язы́ки победи́в,/ и во гра́де Ю́риеве прароди́теля твоего́/ ве́ру правосла́вную па́ки предложи́л еси́.

В челове́цех Боголюбе́зен, и ве́лий властоде́ржец,/ и це́ркве Пресвяты́я Тро́ицы строе́нию спосо́бник,/ и я́ко проуве́дев, в ней положи́тися,/ Е́йже предстоя́, сла́вне Гаврии́ле, о нас моли́ся.

Богоро́дичен: Глаго́лом Боже́ственным послушли́ва Гаврии́ловым была́ еси́,/ Безнача́льнаго Сло́ва пло́тию породила́ еси́,/ всех освяща́ющаго и лю́тых изыма́юща.

Конда́к, глас 8.

Подо́бен: Взбра́нной:

Многому́дренно пресели́вся во град Псков, блаже́нне кня́же Гаврии́ле,/ плод благи́й Бо́гови в жи́зни сей был еси́,/ присноцвету́щ доброде́тельми и, я́коже Дави́д, незло́бием./ Того́ ра́ди получи́л еси́ жизнь ве́чную на Небесе́х,/ всегда́ зря Святу́ю Тро́ицу./ Моли́ изба́витися нам от вся́ких бед, да зове́м ти:/ ра́дуйся, утвержде́ние гра́ду на́шему.

И́кос:

Всечестну́ю па́мять почти́м уго́дника Христо́ва, вели́каго кня́зя Все́волода,/ оте́ческою диади́мою от ю́ности укра́шена,/ хра́браго во́ина на супоста́ты и вла́стеля благоути́шна,/ и ра́достныя глаго́лы от се́рдца воззове́м к нему́, си́це вопию́ще:/ ра́дуйся, я́ко из млады́х ногте́й Бо́га возлюби́в;/ ра́дуйся, я́ко за́поведей Его́ нело́жный храни́тель;/ ра́дуйся, земли́ слове́нстей украше́ние;/ ра́дуйся, церко́вный строи́телю и обогати́телю неску́дный;/ ра́дуйся, церква́м украше́ние и и́стинный побо́рниче;/ ра́дуйся, нело́жный прави́телю о́тческих преда́ний;/ ра́дуйся, благоче́стия столп, непоколеби́м вра́жиими прило́ги;/ ра́дуйся, я́ко во вре́мя вели́каго гла́да преизоби́льный ни́щим и си́рым пита́телю;/ ра́дуйся, бе́дным утеше́ние и засту́пник;/ ра́дуйся и весели́ся, я́ко сугу́бу мзду Небе́сную сугу́ба ра́ди изгна́ния от Бо́га обре́л еси́;/ ра́дуйся, я́ко сподо́бился еси́ восприя́тия/ сугу́быя благода́ти вене́ц пресве́тел и исто́чник исцеле́ния;/ ра́дуйся, пресла́вный кня́же Гаврии́ле, князе́м Русским похвала́;/ ра́дуйся, утвержде́ние гра́ду на́шему.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть;/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Кре́постию вжили́вся Живода́вца, пло́ти удержа́л еси́ жела́ния, пребога́те,/ и ум впери́л еси́ к Небе́сным, поя́ в кре́пости:/ благослове́н Бог оте́ц на́ших.

Сам ся благоро́ден сотвори́л еси́,/ благоро́дны о́бразы стяжа́в ума́ це́лостию;/ поуче́нием же упражня́яся Богодухнове́нных Писа́ний,/ все твое́ жела́ние на Бо́га Всеви́дца, блаже́нне, возложи́л еси́.

Вы́шняго ца́рства, вы́шняго гра́да, Бо́жия ра́я,/ пра́ведных наслажде́ния, пи́щи нетле́нныя,/ бога́тства некра́домаго, Све́та Невече́рняго/ сподо́бился еси́, блаже́нне Все́володе.

Богоро́дичен: Его́же родила́ еси́, Влады́чице, при́сно моли́/ рабо́ты изба́вити мя страсте́й и осужде́ния,/ и одержа́щаго мя лю́таго отча́яния, и оскорбля́ющих мя удержа́ния,/ Чи́стая, Богора́дованная.

Ин

Ирмо́с: В нача́ле Безнача́льное Сло́во,/ со Отце́м и Ду́хом Сын Единоро́дный,/ благослове́н еси́ и превозноси́мый Бо́же оте́ц на́ших.

В ско́рбех па́ки пребыва́я, блаже́нне Гаврии́ле,/ от разсвире́пившихся муже́й, сове́тующих на тя на коне́чное изгна́ние,/ но в кре́пости души́ благода́рно поя́:/ благослове́н Бог оте́ц на́ших.

Песносло́вивша тя Богому́дренно по Христо́ве Це́ркви,/ Боже́ственная преда́ния и оте́ческий уста́в/ прие́м, вели́кий Но́вград содержи́т, поя́:/ благослове́н Бог оте́ц на́ших.

Гри́вну зла́ту о твое́й вы́и нося́/ и вене́ц терпе́ния от Вседержи́теля восприе́мля,/ вы́ну зря у́мныма очи́ма,/ Тро́ичным све́том, Гаврии́ле, просвеща́ем, в весе́лии поя́:/ благослове́н Бог оте́ц на́ших.

Богоро́дичен: Гаврии́л Архистрати́г по́слан бысть, ра́дость возвеща́ет Ти,/ Де́во Ма́ти Чи́стая,/ ея́же ра́ди печа́ль преста́, и кля́тва непло́ды бысть,/ благослове́ние же ве́рным князе́м процвете́ во ве́ки.

Песнь 8

Ирмо́с: В пещи́ о́трочестей прообрази́л еси́ иногда́ Твою́ Ма́терь, Го́споди,/ о́браз же Сия́ из огня́ изыма́ше, неопа́льно входя́щия,/ Ю́же пое́м, я́вльшуюся Тобо́ю конце́м днесь,/ и превозно́сим во вся ве́ки.

Огнь помышля́я стра́шный, пред престо́лом Христо́вым хотя́щь пали́ти,/ умиле́нием се́рдца теплы́ излива́еши ка́пли слез,/ погаша́я те́ми пещь страсте́й, Все́володе Богому́дре.

Все предложи́л еси́ к Бо́гу, му́дре, душе́вное о́ко/ и Тому́ прилепи́лся еси́, вопия́ псало́мски:/ Христе́ мой, ка́ла мя изба́ви смертоно́сных страсте́й во ве́ки.

Терпе́нием пожда́тель и се́рдцем смире́н, ты был еси́ ми́лостив тре́бующим,/ обы́чай принося́ благ, и о́бразы доброде́тельны, всече́стне,/ в ни́хже до́бре пожи́в, чуде́с то́чиши благода́ть.

Ра́зум име́я Боже́ствен, испо́лнитель Влады́чних яви́лся еси́ слове́с,/ десны́я любя́ стези́, ле́вых же я́ве уклоня́яся, я́ко благоу́мен и мудр:/ те́мже тя почита́ем, Богому́дре, во ве́ки.

Богоро́дичен: Ада́мов Соде́тель от крове́й Твои́х чи́стых зи́ждется и мле́ком пита́ется,/ пита́яй вся́ко дыха́ние, Де́во Богоро́дице,/ те́мже я́ко Бо́жию Тя сла́вим Ма́терь.

Ин

Ирмо́с: Вся дела́ Божия/ и вся тварь, благослови́те Го́спода,/ преподо́бнии и смире́ннии се́рдцем, по́йте Его́/ и превозноси́те во вся ве́ки.

Го́рняго Иерусали́ма жела́я насле́довати, зва́нием почита́ем благонаро́читых люде́й,/ от Вышегра́да прише́л еси́ во град Псков,/ с ни́ми поя́, блаже́нне, и превознося́ Го́спода во ве́ки.

Раче́ние незло́биво ко изгна́вшим тя, блаже́нне,/ я́коже Дави́д ко Авессало́му показа́л еси́,/ жела́я в Вы́шних кро́тких зе́млю насле́дити, ве́чнаго селе́ния, Богому́дре, во ве́ки.

Тобо́ю, Богоблаже́нне кня́же Гаврии́ле, град Псков вельми́ хва́лится:/ в не́м бо благоче́стно пожи́в, спасе́ние соде́лав,/ Тро́ицу чти́ти научи́л еси́ во Еди́ном Божестве́,/ и покланя́тися Той, и благосло́вити во ве́ки.

Богоро́дичен: Предвозвести́тель ве́чныя та́йны/ Арха́нгел Гаврии́л, – е́же ра́дуйся! – Тебе́, Богоро́дице, взыва́я,/ тезоимени́тый же сему́ от земны́х князь/ Твоего́ успе́ния хра́му с Богому́дрым Ни́фонтом основа́ние полага́ют,/ благосло́вяще Тя во ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щься от Де́вы, нам яви́ся/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Ви́дети жела́я сла́ву Бо́га на́шего,/ доброде́телей благообра́зием себе́ удобри́л еси́/ и, свещу́ нося́, вшел еси́ в све́тлый черто́г,/ со А́нгелы живы́й ясне́е наслажда́ешися Боговиде́ния.

Я́ко у́тро, я́ко со́лнце, возсия́ па́мять твоя́,/ су́щая во мра́це сердца́ просвеща́ющи:/ ты бо све́та и дне я́ко вои́стинну сын яви́лся еси́,/ Богому́дре Все́володе,/ сего́ ра́ди тя почита́ем.

Му́дростию укра́шен и ра́зумом просвеще́н,/ смире́нием се́рдца ле́потствуя, высото́ю жития́ сия́я,/ к мы́сленным преше́л еси́ дворо́м,/ иде́же нас помина́еши, почита́ющих тя, Все́володе.

День пра́зднественный и по́льзы хода́тайственный/ честны́й твой соверша́ем от земли́ преставле́ния:/ ты бо Госпо́ден уго́дник и Того́ за́поведей де́латель яви́лся еси́ непосты́ден,/ досточу́дне Все́володе.

Богоро́дичен: Све́та прия́телище утро́ба Твоя́ бысть, просве́щшаго мир, Богора́дованная./ Те́мже молю́ Тя, окая́нный:/ све́тлу зарю́ пода́ждь ми, Богоневе́сто, мольба́ми Все́волода Богому́драго.

Ин

Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Изра́илев,/ в ни́хже посети́ нас Восто́к с высоты́/ и напра́вил ны есть на путь ми́ра.

Пи́щи безсме́ртныя, Те́ла и Кро́ве Христо́вы, сподо́бился еси́ причасти́тися, Богому́дре,/ проще́ние и мир всем дав,/ ду́шу твою́ Небе́сному Царю́ и Влады́це пре́дал еси́./ Ему́же со все́ми святы́ми предстоя́, всеблаже́нне, о нас моли́ся.

Нова́града наро́ди ми́рная устро́ивше и ско́ро ше́дше в Пле́сков,/ восхоте́ша взя́ти мо́щи твоя́, свя́те, но не возмого́ша:/ сугу́бо чудоде́йствие показа́в, ста́ша неподви́жими,/ и по́дал еси́ им от честны́я руки́ своея́ но́готь/ на исцеле́ние и в па́мять ве́чную.

Ско́ро предва́рше свяще́нное ополче́ние,/ власти же, и наро́читии, и всяк во́зраст, в пресла́вную це́рковь Пресвяты́я Тро́ицы,/ и присту́пльше к чудотво́рней ра́це, вопие́м:/ о всеблаже́нне кня́же Гаврии́ле! Моли́ Царя́ Небе́снаго ве́рным лю́дем здра́вие пода́ти и во́ем побе́ду на враги́,/ гра́ду же и нам спасе́ние и исцеле́ние.

Богоро́дичен: Господонача́льный Царю́, со Отце́м седя́й и Серафи́мы пое́мый,/ призри́ на мольбу́ раб Твои́х:/ Пречи́стыя же Твоея Ма́тере и уго́дника Твоего́, кня́зя Гаврии́ла, моле́нием/ спаси́ град и лю́ди и умно́жи плоды́ земны́я,/ пода́ждь ве́рным здра́вие и на проти́вныя побе́ды/ и очи́сти грехи́ на́ша И́мене Твоего́ ра́ди.

Свети́лен.

Подо́бен: Ученико́м:

Боже́ственною благода́тию просвети́вся,/ и по сме́рти показа́л еси́ све́тлость жития́ твоего́:/ источа́еши ми́рови благода́ть, притека́ющим к ра́це моще́й твои́х, всеблаже́нне Гаврии́ле,/ и моли́ спасти́ся чту́щим тя.

Богоро́дичен:

В Тя всели́ся, Присноде́во Богоро́дице, я́ве Соде́тель и Госпо́дь всех/ и Еди́ну Трисия́нну зра́ку Божества́ покланя́тися/ благочести́выми кня́зи в Руси́ челове́ческий род научи́ и просвети́.

На хвали́тех стихи́ры, на 4, глас 1.

Подо́бен: Небе́сных чино́в:

Из мла́да изво́ли храни́ти Госпо́дни за́поведи,/ положи́л еси́ сокро́вище неистощи́мое/ во храм вели́каго Иоа́нна Крести́теля/ и тем избра́л еси́ бога́тство Небе́сное,/ со А́нгелы лику́еши в Небе́сных хра́мех./ С ни́миже моли́ся Христу́ Бо́гу, Гаврии́ле прему́дре,/ о творя́щих па́мять твою́.

Иову пра́ведному поревнова́в,/ во искуше́нии изгна́ния непоколеби́м пребы́л еси́, я́ко столп неподви́жим,/ церко́вное воспите́ние, благоче́стия побо́рник и утвержде́ние оте́ческим преда́нием./ С ни́миже моли́ся Го́сподеви спасти́ся нам.

Пожи́л еси́ во гра́де Пско́ве, Богому́дре кня́же Гаврии́ле,/ и ду́шу твою́ в не́м предочи́стив, я́ко зла́то в горни́ле,/ Влады́це Христу́ пре́дал еси́./ Те́ло же твое́ честно́е положи́ся во хра́ме сла́внаго страстоте́рпца Дими́трия,/ чудесем нача́ло показа́./ С ни́мже моли́, свя́те, сохрани́ти град твой непоколеби́м.

Во хра́ме Святы́я Тро́ицы,/ иде́же лежи́т ны́не чудотво́рное те́ло твое́,/ исцеле́ния подаю́тся всем челове́ком,/ ве́рою притека́ющим к Боже́ственней ра́це твое́й,/ всеблаже́нне кня́же Гаврии́ле./ Те́мже и мы мо́лим тя:/ моли́ спасти́ся душа́м на́шим.

Сла́ва, глас 8:

Ра́дуйся, Пско́ву похвало́;/ ра́дуйся, Це́ркви Бо́жии украше́ние;/ ра́дуйся, прави́телю ве́ры благоче́стия;/ ра́дуйся, си́рым прибе́жище;/ раду́йся, свети́льниче всесве́тлый;/ ра́дуйся, сла́во и засту́пниче гра́ду на́шему;/ ра́дуйся, Богому́дре кня́же Гаврии́ле;/ ра́дуйся, жи́телю рая́;/ ра́дуйся, ве́рным забра́ло;/ ра́дуйся, до́ме и жили́ще Всесвяты́я Тро́ицы;/ Ю́же моли́ о почита́ющих всечестну́ю па́мять твою́.

И ны́не: Влады́чице, приими́ моли́тву раб Твои́х:

Славосло́вие вели́кое. И отпу́ст.

На литурги́и

Блаже́нны, от пе́рваго кано́на песнь 3-я и втора́го 6-я.

Проки́мен, глас 7: Возвесели́тся пра́ведник о Го́споде/ и упова́ет на Него́.

Стих: Услы́ши, Бо́же, глас мой,/ внегда́ моли́ти ми ся к Тебе́.

Апо́стол ко Евре́ем, зача́ло 325. Аллилу́ия: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

Ева́нгелие от Луки́, зача́ло 67.

Прича́стен: В па́мять ве́чную бу́дет пра́ведник:

А́ще па́мять свята́го му́ченика Гео́ргия Софи́йскаго вне Вели́кия Четыредеся́тницы, на ма́лой вече́рни, хотя́й бде́ние сотвори́ти предстоя́тель, да пое́т стихи́ры свята́го священному́ченика Вла́сия.

На вели́цей вече́рни

Первыя кафи́смы пе́рвый антифо́н, Блаже́н муж:

На Го́споди, воззва́х: поста́вим стихо́в 8 и пое́м стихи́ры, глас 1.

Подо́бен: Небе́сных чино́в:

Небе́сных красо́т возжела́л еси́,/ и вре́менную сла́ву, я́ко тле́нну, вмени́л еси́,/ и я́ко безпло́тен до́блественно претерпе́л еси́/ многоко́зненныя му́ки агаря́н,/ блаже́нне мучениче Георгие,/ ны́не же от Христа́ венчаем/ моли́ спастися душа́м на́шим.

На ка́мени ве́ры мысль утверди́в ,/ устремле́нии безбо́жных агаря́н ника́коже поколеба́лся еси́,/ па́че же о́ных нахожде́ния безде́льна показа́л еси́,/ си́ле Христо́вей тя укрепля́ющей,/ Богому́дре му́чениче Гео́ргие,/ моли́ спасти́ся ду́шам на́шим.

В Небе́сных черто́зех лику́я/ и во сла́ве Христо́вей ны́не веселя́ся,/ не забу́ди сро́дных твои́х никогда́,/ но вся́ческих Царя́ о нас при́сно моли́,/ всехва́льне му́чениче Георгие,/ улучи́ти нам ве́чнующее блаже́нство/ и спасти́ся душа́м на́шим.

И́ны стихи́ры, глас 4.

Подо́бен: Я́ко до́бля:

Одоле́в сопротивобо́рца, страстоте́рпче Гео́ргие,/ я́ко во́ин непобеди́м/ ору́жием ве́ры мы́сленных враго́в тьму победи́л еси́/ и зако́нно по́двиг соверши́в,/ вене́ц от Бо́га прия́л еси́,/ егоже моли́ от тли и бед изба́витися/ ве́рою соверша́ющим всечестну́ю па́мять твою́.

В темни́це затворе́н, страстоте́рпче Гео́ргие,/ и Боже́ственным уче́нием укрепле́н,/ неве́рным ника́коже повину́лся еси́;/ темже иску́сом о́гненным ко Христу́ преше́л еси́, ра́дуяся,/ Его́же моли́ от тли и бед изба́витися/ ве́рою соверша́ющим всечестну́ю па́мять твою́.

Наше́ствие вражие, страстоте́рпче Гео́ргие,/ си́лою Христа́ разру́шил еси́,/ нечести́вых ве́рою посрами́л еси́,/ правосла́вных побе́дою обвесели́л еси́, я́же от Христа́ Бо́га на́шего,/ Его́же моли́ от тли и бед изба́витися/ ве́рою соверша́ющим всечестну́ю па́мять твою́.

Сла́ва, глас 6:

Страда́льческим му́жеством и благо́ю со́вестию/ благоче́стно вооружи́вся, непобеди́мый му́чениче Гео́ргие,/ Христо́ва веща́ния пред нечести́выми я́сно пропове́дал еси́./ Боже́ственною си́лою укрепля́ем,/ мучительское преще́ние не́мощно показа́л еси́./ Неради́в о огни́, вре́менно горя́щем,/ и Боже́ственным да́ром упова́ние возложи́в, не погреши́л еси́./ Ны́не же сподо́бився Небе́сных жили́щ водворе́ния и Влады́це всех предстоя́ния,/ моли́ изба́витися нам от вся́каго наве́та проти́внаго/ и в бу́дущей жи́зни десна́го стоя́ния сподо́битися.

И ны́не Богоро́дичен: Кто Тебе́ не ублажи́т:

Вход. Све́те ти́хий:

Проки́мен дне и чте́ния три му́ченическая (зри страни́цы 145 – 146).

На литии́ стихи́ры самогла́сны, глас 1:

Све́тлый му́ченик сла́вным страда́нием свои́м/ Го́рния си́лы возвесели́,/ нам же на земли́ пра́здник воздви́же своего́ преставле́ния,/ в не́мже по́двиги его́ прославля́юще,/ я́же за Христа́ да́же до сме́рти претерпе́,/ сице к нему́ возопии́м:/ моли́ о нас, святе Гео́ргие,/ получи́ти нам ра́йское вселе́ние и ве́лию ми́лость.

Глас 2:

Весели́ся о Го́споде, гра́де Софи́е!/ Радуйтеся, окре́стная вся,/ и похвала́ми воспо́йте новаго страда́льца Гео́ргия,/ в после́дния дни пострада́вшего/ и ра́вное дре́вним терпе́ние показа́вшаго./ Просла́вим у́бо Христа́, того́ укре́пльшаго,/ и побе́ду на сопроти́вныя дарова́вшаго,/ и венце́м све́тлым увенча́вшаго,/ и на земли́ моще́м его́ воню́ благоуха́ния дарова́вшаго,/ нам же того́ моли́твами подающаго ве́лию ми́лость.

Глас 3:

В по́двизе муче́ния себе́ до́бре уясни́л еси́,/ зна́меньми же Боже́ственными укрепи́вся, бесо́вскую си́лу разруши́л еси́./ Амираха́нския учи́тели посрами́л еси́,/ Сердики́йския лю́ди со окре́стными удиви́л еси́,/ А́нгельския же си́лы терпе́нием свои́м ужаси́л еси́,/ и му́ченический лик просла́вил еси́,/ с ни́ми же ны́не водворя́ешися,/ десни́цею Христо́вою венце́м нетле́ния увенча́вся,/ Его́же ра́ди любве́, блаже́нне, огню́ себе́ пре́дал еси́,/ моли́ся к Бо́гу о нас, великому́чениче Гео́ргие.

Глас 4:

До́блественным страда́нием удиви́л еси́ А́нгельская во́инства,/ зря́щая тя огня́ не боя́щася/ и в пла́мень Христа́ ра́ди тща́шася,/ я́коже трие́ отроцы в вавило́нскую пещь;/ с ни́миже ны́не водворя́яся, Гео́ргие,/ помина́й тя почита́ющих и покланя́ющихся ра́це моще́й твои́х.

Сла́ва, глас 5:

Стеце́мся лю́бовию, бра́тие,/ к настоя́щему торжеству́ сла́внаго му́ченика Гео́ргия./ Во́инства Небе́сная да веселя́тся/ и о́блацы сла́дость да кропя́т,/ я́коже в день честна́го его́ сожже́ния./ Земля́ да удиви́тся све́тлаго ю́ноши пресла́вным веща́нием:/ сокруша́йте биеньми и жжи́те плоть мою́ огне́м,/ но Христа́ моего́ не отве́ргуся аз во ве́ки:/ сла́дце па́че прие́млю му́ки,/ бо́льших благ духо́вных мя сподобляющия./ Кто не удиви́тся, кто не просла́вит/ и хвале́ния пе́сней не воспое́т ему́, глаго́ля:/ му́чениче Гео́ргие, моли́ Бо́га о нас,/ почита́ющих па́мять твою́ и ра́це моще́й твои́х покланя́ющихся,/ изба́витися нам вся́каго прило́га сопроти́внаго/ и спасти́ся душа́м на́шим.

И ны́не, Богоро́дичен: Храм и дверь еси́:

На стихо́вне стихи́ры, глас 6.

Подо́бен: Все отложше:

Весь от ю́ности возложи́вся Влады́це,/ Сего́ вожделе́л еси́ и вся́кия стра́сти неприча́стен пребы́в,/ и скверносло́вия, велере́чия же, и глумле́ния, и непреподо́бнаго хожде́ния/ му́ченик яви́лся еси́ всеизря́ден,/ прило́ги муче́ния непрекло́нен си́лою Поже́ршагося на Кресте́,/ Его́же приле́жно моли́ о душа́х на́ших.

Стих: Пра́ведник, я́ко фи́никс, процвете́т/ и я́ко кедр, и́же в Ливане, умно́жится.

Бие́нием сокруша́емо те́ло твое́,/ страстоте́рпче, Гео́ргие всеблаже́нне,/ ду́шу непрело́жну и ум некра́дом соблю́л еси́;/ в темни́це затворя́ем,/ в нейже и поуча́ем терпе́ти до́блественне,/ вся́кий вид мук наноси́мых поне́сл еси́/ за пострада́вшего на Кресте́ Спа́са на́шего,/ егоже приле́жно моли́ о душа́х на́ших.

Стих: Насаждени в до́му Госпо́дни,/ во дво́рех Бо́га на́шего процвету́т.

Весе́лие ве́чное и пречи́стую сла́дость/ страда́нию возме́здие восприя́л еси́,/ му́чениче сла́вне Гео́ргие;/ во́инства бесо́вская и ополче́ния нечести́вых/ терпе́нием твои́м я́ве посрами́л еси́,/ благочести́вых же лик возвесели́л еси́/ и дерзнове́ние тем Христа́ ра́ди вдохну́л еси́,/ Его́же приле́жно моли́ о душа́х на́ших.

Сла́ва, самогла́сен, глас то́йже:

Весели́ся, гра́де Бо́лгарский, прему́дрости тезоимени́тый,/ я́ко в тебе́ страда́нием возсия́/ добропобе́дный му́ченик, Гео́ргий прекра́сный,/ все́ бо кова́рство мучи́теля врага́ му́жески попра́в,/ венец побе́ды досто́йно прия́т/ и всем лю́дем пропове́да покланя́тися че́стне в Тро́ице Еди́ному Бо́гу,/ Ему́же со дерзнове́нием и мы вопие́м/ умири́ти мир и спасти́ ду́ши на́ша.

И ны́не,

Богоро́дичен: Творе́ц и Избави́тель мой:

И́ны стихи́ры на стихо́вне, глас 2.

Подо́бен: До́ме Евфра́фов:

Гряди́те правосла́вных собо́ры,/ днесь почти́м новаго страда́льца Гео́ргия,/ егоже Христо́с прослави, исповедавша Того́ пред мучи́тели.

Стих: Пра́ведник, я́ко фи́никс, процвете́т,/ я́ко кедр, и́же в Ливане, умно́жится.

Ку́ю ти похвалу́ и честь принесе́м, о Гео́ргие,/ и́же зде́шних сла́вы и честь, я́ко уме́ты, оплева́в, презре́л еси́,/ получи́л же еси́ безсме́ртную сла́ву от Христа́ с му́ченики и му́дрыми де́вами.

Стих: Насажде́ни в до́му Госпо́дни,/ во дво́рех Бо́га на́шего процвету́т.

У Христа́ предстои́ши ны́не со все́ми святы́ми,/ я́сно наслажда́яся Того́ све́тлости и красоты́ нетле́ния,/ помяни́, му́чениче, помина́ющих тя, Гео́ргие.

Сла́ва, глас 2:

Возсе́д, я́коже на колесни́цу о́гненную, свое́ю кро́вию/ и прите́кл еси́ нехода́тайственно, блаже́нне к Тро́ице,/ иде́же глас пра́зднующих и веселя́щихся, Гео́ргие.

И ны́не, Богоро́дичен:

При́зри с высоты́, о Пречи́стая Влады́чице, на смире́ние рабо́в Твои́х/ и виждь возвыше́ние го́рдых на ста́до правосла́вное./ Го́рдых смири́, смире́нныя же моли́твами Твои́ми возвы́си, Богоро́дице.

Тропа́рь, глас 4:

В терпе́нии многоиску́снем, блаже́нне му́чениче Гео́ргие,/ огнеиску́сную смерть претерпе́л еси́/ и по кончи́не твое́й вене́ц от Христа́ нетле́нный/ с му́ченическими ли́ки прия́л еси́./ И ны́не, на земли́ кро́тких досто́йно водворя́яся,/ Христа́ Бо́га о нас непреста́нно моли́,/ и́же ве́рою покланя́ющихся ра́це моще́й твои́х.

На у́трени

На Бог Госпо́дь: тропа́рь му́ченика два́жды и

Богоро́дичен: Е́же от ве́ка утае́нное:

По 1-м стихосло́вии седа́лен, глас 1,

Подо́бен: Ка́мени запеча́тану от иуде́й:

Блаже́нство земно́е возненави́дев, мучениче сла́вне Гео́ргие,/ Небе́снаго жития вожделе́л еси́,/ егоже ра́ди вяза́ния претерпе́л еси́ и огне́м сожже́ние и ну́ждную смерть./ Темже днесь святу́ю па́мять твою́ пра́зднующе, любо́вию вопием:/ сла́ва Да́вшему ти кре́пость,/ сла́ва Венча́вшему тя,/ сла́ва Дарова́вшему моще́м твои́м благоуха́ние и цельбы́ всем притека́ющим.

Сла́ва и ны́не, Богоро́дичен:

Ру́це Твои́ Боже́ственныя, Де́во Пречи́стая,/ и́миже Бо́га понесла́ еси́, из Тебе́ воплоще́ннаго бла́гости ра́ди,/ просте́рши Того́ умоли́/ изба́витися нам напа́стей, восхваля́ющим Тя и любо́вию вопию́щим:/ Сла́ва Все́льшемуся в Тя,/ сла́ва Проше́дшему из Тебе́,/ сла́ва Свободи́вшему нас рождество́м Твои́м.

По 2-м стихосло́вии седа́лен, глас 4.

Подо́бен: Удиви́ся Ио́сиф:

Удиви́шася, Гео́ргие, ли́цы А́нгельстии, зря́ще твое́ противле́ние, е́же к собо́рищу агаря́нскому:/ Ничто́же мя, – рек, – разлучити возмо́жет от любве Христа́ Спа́са моего́!/ Бе́си же устраши́шася, венцено́сца тя ю́ностна ви́дяще,/ И́же того́ тогда́ укрепи́вый све́тлым по́двигом,/ Христе́, просвети́ ду́ши на́ша.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря, и внима́ше мы́слию,/ и́же на руно́ дождь, в безсе́меннем зача́тии Твое́м, Богоро́дице,/ купину́ огне́м неопали́мую, жезл Ааро́нов прозя́бший;/ и свиде́тельствуя обру́чник Твой и храни́тель, свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.

По полиеле́и седа́лен, глас 8.

Подо́бен: Прему́дрость и Сло́во:

Болга́р благочести́вых прозябе́ние,/ оста́вль оте́чество Святы́м Ду́хом води́м,/ прише́л еси́ в Сердики́йский град,/ благоче́стием же и пра́вдою себе́ украша́я,/ но зави́ден быв от безбо́жных агаря́н,/ посрами́л еси́ тех на тя шата́ние словесы́ прему́дрыми./ Сего́ ра́ди огне́м скончал еси́ тече́ние, му́чениче Гео́ргие,/ моли́ Христа́ Бо́га согреше́ний оставле́ние дарова́ти/ чту́щим любовию честну́ю па́мять твою́.

Сла́ва, и ны́не, Богоро́дичен:

Егда́ прии́дет всех Влады́ка суди́ти вселе́нней всей,/ тогда́ овца́м мя сопричти́ десны́м осужде́ннаго/ и кроме́шния тьмы мя исхити́, молю́ся,/ да благода́рственно велича́ю бога́тство бла́гости Твоея, Богоро́дице Всенепоро́чная,/ и да вопию Ти, ра́дуяся:/ моли́ Христа́ Бо́га согреше́ний оставле́ние дарова́ти,/ Тя бо и́мам наде́жду раб Твой.

Таже степе́нна, 1-й антифо́н 4-го гла́са.

Про́кимен, глас 4: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Стих: Насажде́ни в до́му Госпо́дни,/ во дво́рех Бо́га на́шего процвету́т .

Вся́кое дыха́ние: Ева́нгелие от Матфе́я, зача́ло 36.

По 50-м псалме́ стихи́ра, глас 6:

Прииди́те, правосла́вных собо́ри,/ му́ченика Гео́ргия поревну́им дерзнове́нию:/ те́ло все да сдробле́но бу́дет,/ и́мамы Зда́теля, то́е светле́йше па́ки соста́вити могу́щаго,/ то́кмо зва́ния да не отпаде́м Христо́ва,/ не су́щей бо воде́ всу́е и́мя исто́чнику;/ име́ний и чад да лиши́мся,/ то́кмо Го́спода своего́ да не отсту́пим,/ я́коже сей непобеди́мый, не слу́хом, но де́лы за́поведь Христо́ву соверши́вый/ и би́сер многоце́нный получи́ти своего́ те́ла не пощаде́вый!/ Темже досто́йно жи́тельствуим/ и на скрижа́лех се́рдца потщи́мся му́жество того́ изобрази́ти,/ Христу́ со дерзнове́нием вопию́ще:/ Го́споди, моли́твами Твоего́ му́ченика/ Небе́сных благи́х сподо́би нас, я́ко Человеколю́бец.

Кано́н святаго му́ченика, егоже краегране́сие:

Свяще́нник плете́т тебе́ похвалу́, Гео́ргие. Глас 1.

Песнь 1

Ирмо́с: Твоя́ победи́тельная десни́ца/ Боголе́пно в кре́пости просла́вися,/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.

Сло́ве Бо́жий, во святы́х препросла́вленный,/ сло́во ми вдохни́ и ум просвети́/ воспе́ти по достоя́нию новаго му́ченика Гео́ргия/ и Тебе́, того́ укре́пльшаго.

Вем любо́вь твою́, му́чениче,/ и на тя наде́яся потща́хся принести́ тебе́ пе́ние;/ аще и не по достоя́нию скудоу́мия ра́ди, но от усе́рдия приими́,/ я́коже и Христо́с вдови́цы две ле́пте.

Ят быв от нечести́вых, муче́ния по́прище преплы́л еси́/ и Еде́ма Небе́снаго приста́нище достигл еси́,/ в немже ны́не водворя́яся, Влады́це всех моли́ся/ душ на́ших помраче́ние отъяти,/ я́ко да досто́йно па́мять твою́ воспое́м.

Богоро́дичен: Щедролюби́вый Бог Сло́во, сотвори́вый руко́ю Ада́ма/ и от ребра́ его́ Е́ву возсозда́вый,/ из Тебе́ воплоти́ся, Пречи́стая,/ на Кресте́ пригвозди́ся и в ре́бра прободе́ся,/ я́ко да тех поползнове́ние ми́лостивно испра́вит.

Песнь 3

Ирмо́с: Еди́не ве́дый челове́ческаго естества́ не́мощь/ и ми́лостивно в не вообра́жься,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя славы Твоея, Человеколю́бче.

Еще́ в ю́ности ста́рческий ра́зум стяжа́в, сла́вне Гео́ргие,/ и вся све́рстники своя́ превозше́д му́дростию, незло́бием же и смире́нием,/ от всех ве́рных ублажа́ешися.

Но́вое был еси́ Правосла́вия утвержде́ние, сла́вне Гео́ргие,/ сте́пень же благоче́стия и чистоты́ снабде́ние ве́рным лю́дем,/ его́же ра́ди пе́сньми тя восхваля́ем.

Ны́не стяжа́ тя я́ко ве́лие сокро́вище и Це́ркве благоле́пие Сердики́йский град, блаже́нне Гео́ргие,/ но и вселе́нная вся слы́шавши твоя́ боре́ния/ весели́тся и по́двигу твоему́ дивя́щися, ублажа́ет тя.

Богоро́дичен: Исцели́ся преслуша́ние Е́вы прама́тере послуша́нием Твои́м, Пречи́стая:/ глаго́лы бо Гаврии́ла послу́шавши, Ма́ти была́ еси́ Сы́на Божия,/ И́же то́я печа́ль Кресто́м в ра́дость преложи́.

Седа́лен, глас 3.

Подо́бен: Красоте́ де́вства:

Красна́ тя лице́м Творе́ц показа́/ и душе́вною добро́тою внутрь снабде́,/ враг же не терпя́ сих, хотя́ща тя прельсти́ти и в снедь себе́ сотвори́ти./ Но Созда́тель Благи́й неви́димо тя укрепи́ и льстеца́ тобо́ю посрами́./ Темже ны́не на Небесе́х лику́я, свя́те Гео́ргие,/ моли́ся Го́сподеви о прославля́ющих тя.

Сла́ва, и ны́не, Богоро́дичен, глас 3.

Подо́бен то́йже:

Недомы́сленно и непостижи́мо есть, Влады́чице Богора́дованная,/ соде́ланное о Тебе́ стра́шное Бо́жие та́инство,/ необыме́ннаго бо заче́нши родила́ еси́,/ пло́тию обложе́нна от Пречи́стых крове́й Твои́х;/ Его́же всегда́, Пречи́стая, с му́ченики моли́/ спасти́ся душа́м на́шим.

Песнь 4

Ирмо́с: Го́ру Тя благода́тию Бо́жиею приосене́нную/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

К бу́дущей сла́ве взира́я, страда́льче всече́стне,/ маловре́менную ни во чтоже вмени́л еси́;/ темже тя ничто́же возмо́же разлучи́ти от любве́ Христо́вы:/ ни темни́чная затворе́ния, ни судиина́ преще́ния, ни огня́ разгоре́ние,/ ниже́ па́ки тле́нныя сла́вы обеща́ние.

Претерпе́л еси́ му́ки до́блественно, любве́ Боже́ственныя испо́лнен сый,/ и Бо́гу себе́ от ю́ности возложи́в, умре́ти за Него́ не отве́рглся еси́,/ повеле́ния Того́ послу́шая и стопа́м спаси́тельным после́дуя.

Люде́й сро́дных оста́вив, в Сердики́йский град прише́л еси́;/ доброде́тель же в себе́ нося́, му́ченик Христо́в изря́ден показа́лся еси́:/ весть бо та честь даровати сугу́бую стяжа́вшим ю.

Богоро́дичен: Е́вы прама́тере кля́тву упраздни́ла еси́ Рождество́м Твои́м, Богоблагода́тная;/ ми́рови же благослове́ние процвела́ еси́, цветонося́щи Христа́;/ темже́, ра́дующеся, Тя, Богоро́дицу, испове́дуем.

Песнь 5

Ирмо́с: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.

Твои́ми до́блестьми попра́ся и в преиспо́дняя низложи́ся,/ и́же безме́рно дре́вле хваля́йся зе́млю и мо́ре погуби́ти;/ погуби́ его́ Христо́с Кресто́м Свои́м и побе́ду ве́рным дарова́.

Егда́ предумышля́хуся го́рдаго денни́цы служи́телие/ ле́стными словесы́ улови́ти до́бляго и к свое́й слу́жбе удобь привлещи́,/ тогда́ посрами́шася вселука́вии вку́пе с посла́вшим я.

Твою́ не стерпе́ укори́зну, млада́го ю́ноши, велича́вый бес и попра́ние,/ но пону́ди слуги́ своя́ к судии́ ити́, наде́яся стра́хом тебе́ одоле́ти:/ устраши́шася преиспо́днии, зря́ще тя ви́димых посра́мльшаго.

Богоро́дичен: Та́инство провозгласи́ша несказа́ннаго Твоего́ зача́тия,/ е́же из Тебе́ Бо́жия Сло́ва, Всепе́тая Ма́ти Де́во,/ весь лик проро́ческий, Бо́гом я́ве науче́нный:/ Ты бо вои́стину Безнача́льный Свет породи́ла еси́, Богоблагода́тная.

Песнь 6

Ирмо́с: Обы́де нас после́дняя бе́здна:/ несть избавля́яй./ Вмени́хомся я́ко о́вцы заколе́ния:/ спаси́ лю́ди Твоя́, Боже наш,/ Ты бо кре́пость немощству́ющих и исправле́ние.

Е́же на тя скрежета́ния зубо́в не у́боя́лся еси́, ниже́ устраши́лся еси́,/ став на суди́щи мучи́телей, я́ко а́гнец незло́бивый посреде́ волко́в./ Сего́ ра́ди тя ублажа́ем, помина́юще до́блесть твою́.

Блаже́нне Гео́ргие, разгара́шеся на тя я́ростию мучи́тель,/ зря тя непрекло́нна и повеле́ния его́ ни во что же вменя́юща,/ и желе́зы тя окова́в, в темни́цу вве́рже, устраши́ти тя хотя́,/ но яви́ся посра́млен.

Егда́ тя в темни́цу вверго́ша,/ бо́льшими к Бо́гу наде́ждами впери́лся еси́, блаже́нне,/ и наставля́ющаго тя к муче́нию послу́шав,/ словесы́ му́дрыми незатыка́емая уста́ го́рдых заткну́л еси́.

Богоро́дичен: Прише́д с Небесе́ Архистрати́г, Чи́стая,/ я́ве Тебе́ ра́дость благовести́ рек:/ из Тебе́ произы́дет Бог пло́тию, Де́во Пречи́стая,/ во спасе́ние ве́рою пою́щих Тя.

Конда́к, глас 2.

Подо́бен: Вы́шних ища́:

Вы́шния сла́вы жела́я, многострада́льне Гео́ргие,/ агаря́нскую пре́лесть поплева́в, попра́л еси́/ и побе́ды вене́ц прия́л еси́,/ А́нгелом ны́не свеселя́ся и му́чеником соводворя́яся,/ с ними́же Христу́ Бо́гу моли́ся непреста́нно о всех нас.

И́кос:

Со́лнце множа́е возсия́ моле́бное твое́ торжество́, блаже́нне Гео́ргие,/ ве́рныя лю́ди просвеща́я и бесо́в темнозра́чную си́лу отгоня́я./ Темже припа́даю и аз, окая́нный, к ра́це моще́й твои́х и молю́ся от боле́зненнаго се́рдца,/ да прииму́ печа́лем премене́ние и житию́ безмо́лвие,/ согреше́нием проще́ние и скве́рному уму́ моему́ исправле́ние,/ во е́же по достоя́нию пе́ти тя всегда́,/ я́ко су́ща ны́не на Небесе́х со А́нгелы и му́ченики,/ с ни́миже Христу́ Бо́гу моли́ся непреста́нно о всех нас.

Песнь 7

Ирмо́с: Су́щим в пе́щи отроко́м Твои́м, Спа́се,/ не прикосну́ся, ни́же стужи́ огнь;/ тогда́ трие́, я́ко еди́неми усты́ поя́ху/ и благословля́ху, глаго́люще:/ благослове́н Бог оте́ц на́ших.

От вся́ких бед и напа́стей лю́тых всегда́ ны изба́вляй, блаже́нне му́чениче Гео́ргие,/ Боже́ственную благода́ть нам подава́я,/ мольбу́ тебе́ принося́щим и Христу́ воспева́ющим:/ благослове́н Бог оте́ц на́ших.

Христа́ Бо́га су́щаго и́стинно возлюби́в,/ есте́ственныя пло́ти отве́рглся еси́ и на огнь му́жески дерзну́л еси́;/ вене́ц же побе́ды прие́м, воспева́еши при́сно:/ благослове́н Бог оте́ц на́ших.

Возноше́ния го́рдых пламень угаси́л еси́,/ пла́менем огня́ земна́го опаля́ем, всеблаже́нне,/ и све́том ра́зума благочести́вых просвети́л еси́;/ тем, веселя́щеся, укре́пльшему тя Христу́ воспева́ем:/ благослове́н Бог оте́ц на́ших.

Богоро́дичен: А́може Влады́ка, душе́, Горе́ взира́й,/ не к земли́ ни́чущи, я́ко безслове́сная:/ но воспряни́ от помраче́ния и уны́ния, вопию́щи:/ Го́споди, моли́твами Ро́ждшия Тя и му́ченика Твоего́ Гео́ргия сподо́би мя Ца́рствия Твоего́.

Песнь 8

Ирмо́с: В пе́щи о́троцы Изра́илеви,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Люде́й правосла́вных утвержде́ние, Церкве́й Божиих благоле́пие,/ прибега́ющих те́плое заступле́ние яви́лся еси́, всеблаже́нне Гео́ргие, воспева́ющих:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

У́мную мольбу́ приношу́ тебе́, Гео́ргие:/ от лю́тых мя бед изба́ви моли́твами твои́ми,/ и све́том Богоразу́мия просвети́, и к Боже́ственным стезя́м наста́ви, вопию́ща:/ благослови́те, вся дела́ Госпо́дня, Го́спода, по́йте и превозноси́те во вся ве́ки.

Град на горе́ и свет на све́щнице, сия́я, яви́лся еси́ вои́стину, му́чениче сла́вне,/ просвеща́я в нощи́ жития́ ходя́щих и на стезю́ спасе́ния наставля́я вопию́щих:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Богоро́дичен: Ели́цы в пучи́не греха́ вла́емся,/ к небу́рному приста́нищу притеце́м Бо́жия Ма́тере,/ я́же Боже́ственною си́лою Сы́на Своего́ всех ко спасе́нию наставля́ет, зову́щих:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Песнь 9

Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная./ И ны́не на нас напа́стей свирепе́ющую угаси́ти, мо́лимся, пещь,/ да Тя, Богоро́дице,/ непреста́нно велича́ем.

Окре́стнии вси Сердики́йскаго гра́да собира́ющеся,/ пе́сненными гла́сы благоле́пно свяще́нную твою́ па́мять прославля́ем:/ приими́ у́бо сия́, аще и не по достоя́нию,/ иму́ще бо тя хода́тая ко Спа́су Христу́, песнь сию́ тебе́ принести́ потща́хомся.

Рабо́в твои́х моле́ния к Бо́гу напра́ви, му́чениче,/ я́же от жела́ния всея души́ тебе́ принесо́хом,/ и твою́ па́мять почита́ющих пресве́тлую от бед и напа́стей избавля́й твои́ми к Бо́гу моли́твами.

Горе́ние о́гненное благоду́шно претерпе́л еси́ Христа́ ра́ди,/ егоже любо́вию огради́вся,/ в се́рдцы твое́м утвержде́ние кре́пкое прия́л еси́ и Ца́рствие получи́л еси́./ Темже не забыва́й нас, тя любо́вию почита́ющих,/ венцено́сче Богому́дре Гео́ргие.

И́же му́дростию Бо́жия Ду́ха ага́рян посрами́вый/ и терпе́нием о́гненныя сме́рти Христа просла́вивый – и о оте́чествии свое́м при́сно Бо́гу моля́щийся, Гео́ргий му́ченик пресла́вный,/ пе́сньми Боже́ственными от нас да воспое́тся досто́йно.

Богоро́дичен: Егоже Оте́ц пре́жде денни́цы роди́/ и из Тебе́ напосле́док за ны, неблагода́рныя, воплощься/ я́ко Младе́нца на руку́ носи́ла еси́, Де́во Богоро́дице,/ Того́ с му́ченики моли́, о и́же ве́рою восхваля́ющих Тя.

Свети́лен, глас 2.

Подо́бен: Со ученики́ взыщем:

Я́ко благово́нный цвет в удо́лиях/ и я́ко дре́во при исто́чницех вод,/ све́тло возсия́ доброде́тельми и страда́ньми му́ченик Гео́ргий./ Темже облагоуха́вшеся душею, све́тлым лицем к нему́ воззове́м:/ ра́дуйся, страда́льцев печа́ть и ве́рных заступле́ние.

Сла́ва, и ны́не, Богоро́дичен:

Тя Дании́л преднапису́ет го́ру несеко́мую,/ из нея́же пречестны́й ка́мень отсече́ся кроме́ рук челове́ческих/ и сокруши́ и́дольскую пре́лесть всю./ И приведо́шася вслед Тебе́ в воню́ ми́ра Твоего́ му́чеников ли́цы,/ с ними́же о нас молися, Пречи́стая Де́во, Ма́ти Мари́е.

На хвали́тех стихи́ры, глас 4.

Подо́бен: Свы́ше зва́нный:

Свы́ше зван быв Вы́шним про́мыслом,/ егда́ тя Боже́ственное жела́ние распали́,/ тогда́ вся в житии́ сем презре́л еси́/ и Бо́га соверши́ти повеле́ния потща́лся еси́,/ не боя́ся преще́ния мучи́телей,/ ни прельща́яся сла́достию маловре́менных,/ но жела́я непрехо́дных благ,/ я́же и ра́дуяся восприя́л еси́ в Ца́рствии Христа́ Бо́га на́шего,/ егоже моли́ спасти́ и просвети́ти ду́ши на́ша.

Свы́ше укрепля́ем си́лою Ду́ха,/ егда́ тя беззако́ннии в темни́цу вверго́ша,/ тогда́ ты показа́лся еси́, я́ко адама́нт тве́рдый,/ гото́в терпе́ти му́ки до́блественне и мудре Христа́ пропове́дати/ и я́ко раб ве́рный наде́жду На ны возложи́ти, ея́же не погреши́л еси́,/ но восприя́л еси́ с му́ченическими ли́ки водворе́ние/ и увенча́лся еси́ от Христа́ Бо́га на́шего,/ егоже моли́ спасти́ и просвети́ти ду́ши на́ша.

Вы́шняго промышле́нием на суди́ще приведо́ша тя нечести́вии,/ многострада́льне Гео́ргие,/ и льсти́вными словесы́ улови́ти тя хотя́ху,/ ты же па́че пре́лесть их посрами́л еси́/ и Христо́во Ева́нгелие я́сно пропове́дал еси́,/ но Той тя укрепи́/ и от огня́ те́ло твое́ неврежде́нно сохрани́,/ ду́шу же твою́ в Ца́рствии Небе́снем всели́,/ Его́же моли́ спасти́ и просвети́ти ду́ши на́ша.

Вы́шняго промышле́ние, я́ко зла́то во огни́,/ искуси́ терпе́ние души́ твоея,/ и утвержде́ние ве́ры я́же в Бо́га/ и любо́вь же Боже́ственную цари́цу доброде́телей/ искова́ во украше́ние изря́дное Небе́снаго Ца́рствия;/ те́ло же твое́ сожже́нию не предаде́,/ но, я́ко сокро́вище многоце́нное, соблюде́ от огня́ неопа́льно/ и я́ко исто́чник благода́тей притека́ющим Христа́ Бо́га на́шего,/ егоже моли́ спасти́ и просвети́ти ду́ши на́ша.

Сла́ва, глас 8:

Прииди́те, ве́рнии,/ стеце́мся вси к честне́й па́мяти пресла́внаго страда́льца Гео́ргия,/ в Сердики́йстем гра́де просия́вшаго./ Се бо предлежа́т нам всечестны́я его́ мо́щи,/ благово́ния лучи́ испуща́юща и ве́ру на́шу прославля́юща;/ дух же его́, в преми́рных селениих водворя́яся,/ восприе́млет наслажде́ния благи́х, я́же угото́ва Бог Того́ возлю́бльшим./ В весе́лии же предстоя́ Влады́чнему Престо́лу,/ мо́лится о и́же ве́рою и любо́вию чту́щих всечестну́ю па́мять его́.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от всякия ну́жды и печа́ли .

Славосло́вие вели́кое и отпу́ст.

На литурги́и

Блаже́нны от кано́на му́ченика пе́сни 3-я и 6-я.

Проки́мен, глас 7: Возвесели́тся пра́ведник о Госпо́де и упова́ет на Него́.

Стих: Услы́ши, Бо́же, глас мой, внегда́ молити ми ся к Тебе́.

Апо́стол к Тимофе́ю, зача́ло 292: Аллилу́ия , глас 4.

Стих: Святы́м, и́же суть на земли Его́, удиви́ Госпо́дь вся хоте́ния Своя́ в них.

Ева́нгелие от Иоа́нна, зача́ло 52.

Прича́стен: В па́мять ве́чную бу́дет пра́ведник: