На Го́споди, воззва́х: стихи́ры, глас 4.

Подо́бен: Я́ко до́бля:

Пяточи́сленное сочета́ние му́чеников воспои́м,/ му́драго Акинди́на, Пига́сия, Елпидифо́ра,/ Аффо́ния и Анемподи́ста,/ до́блия страда́льцы и те́плыя защи́тники,/ точа́щия невозбра́нную благода́ть/ и наде́жду незави́стну/ безбе́дно благочести́вым подаю́щия.

Ни глад, ниже́ беда́,/ ни жизнь, ниже́ смерть,/ ни коно́бов вре́ния, ни земны́я про́пасти,/ ниже́ звере́й уста́/ разлучи́ти возмого́ша от любве́ Христо́вы/ ва́ша терпеливому́дрыя до́блести,/ к Нему́ бо непреста́нно взира́юще/ и Того́ еди́наго жела́юще,/ вражду́ющия победи́сте.

Сла́дости насыща́ющеся, и све́та исполня́еми,/ и жизнь ве́чную насле́довавше,/ к вам прибега́ющия от бед изба́вите,/ и уз, и темни́цы/ на ме́сте озлобле́ния, Богому́дрии,/ к Бо́гу дерзнове́ние иму́ще/ и милосе́рдие явля́юще,/ я́ко и́стинно Христоподража́теле.

Сла́ва, глас 6:

Днесь пятоза́рный му́чеников лик,/ я́ко светоно́сных звезд схожде́ние/ ве́рныя просвеща́ющь,/ к та́инственному весе́лию призва́./ Днесь и́же разу́мнаго Со́лнца служи́телие/ и пе́рсских потреби́телие преда́ний,/ чу́вственное со́лнце че́ствовавшия/ и покланя́ющияся огню́,/ руково́дствоваша ко благоче́стию./ Поче́рпше же оби́льне страстоте́рпческую их ча́шу,/ и Христа́ ра́ди излия́вшимися кровьми́ венча́шася,/ нас призыва́юще,/ благоче́стия рачи́тели, прииди́те, глаго́люще,/ по́двиги на́шими учреди́теся/ и венцы́, и че́сти зри́те:/ претерпе́вый бо до конца́, той спасе́тся,/ Христо́с И́стина изрече́;/ да о́бщницы бу́дете венце́в на́ших/ и моли́твенники ны ко Го́споду и́мате.

И ны́не, Богоро́дичен или́ КрестоБогоро́дичен:

Подо́бен: Тридне́вен:

Лю́ди беззако́ннейшия,/ без пра́вды пригвожда́ющия Тя на Дре́ве,/ Де́ва и Чи́стая Ма́ти Твоя́, зря́щи,/ я́коже Симео́н прорече́,/ утро́бою, Спа́се, уязвля́шеся.

На стихо́вне Окто́иха и святы́х стихи́ра, глас 1.

Стих: Дивен Бог во святых Своих,/ Бог Изра́илев.

Лучи́ возсия́ша му́чеников пятоза́рныя,/ де́вам равночи́сленны,/ воображе́ния бо их зря́ще,/ озаря́емся, па́мятем их приобща́ющеся./ Тем моли́твами их, Христе́ Бо́же,/ безбе́дне спаса́й от враг ду́ши на́ша/ и мольба́ми их неоску́дну жизнь на́шу соблюди́,/ я́ко источа́еши ми́лости Твоя́ бога́тыя непреста́нно/ безпреткнове́нно Тя сла́вящим,/ упова́ние же иму́щим в Тя;/ моли́твами их да́руй душа́м на́шим ве́лию ми́лость.

Сла́ва, глас 2. Самогла́сен:

Прииди́те, возра́дуемся Го́споду/ в па́мяти днесь страстоте́рпцев, о празднолю́бцы!/ Прииди́те, восхва́лим их, та́йно похваля́юще:/ ра́дуйся, Акинди́не; ра́дуйся, Пига́сие;/ ра́дуйся, Анемподи́сте; ра́дуйся, Елпидифо́ре;/ ра́дуйся, Аффо́ние,/ и́же лесть и́дольскую в про́пасть погрузи́вше/ и Христа́ Го́спода посреде́ три́знища я́сно пропове́давше./ Тем, всеблаже́ннии и многострада́льнии,/ непреста́нно моли́теся о душа́х на́ших.

И ны́не Богоро́дичен или́ Крестобогоро́дичен.

Подо́бен: Егда́ от Дре́ва:

Дре́ву Кре́стному Тя, Иису́се, пригвожде́на/ зря́щи, Неискусобра́чная,/ пла́чущи, глаго́лаше:/ Ча́до сладча́йшее, почто́ остави́л еси́ Мене́, ро́ждшую Тя, еди́ну,/ Све́те Непристу́пный Пребезнача́льнаго Отца́?/ Потщи́ся и просла́вися,/ я́ко да сла́ву получа́т Боже́ственную/ Боже́ственныя стра́сти Твоя́ сла́вящии.

Тропа́рь, глас 2:

Страстоте́рпцы Госпо́дни,/ блаже́нна земля́, напи́вшаяся кровьми́ ва́шими,/ и свя́та селе́ния,/ прии́мшая телеса́ ва́ша:/ в три́знищи бо врага́ победи́сте/ и Христа́ со дерзнове́нием пропове́дасте:/ Того́ я́ко бла́га моли́те/ спасти́ся, мо́лимся, душа́м на́шим.

На У́трени

О́ба кано́на Окто́иха и святы́х на 4, его́же краегране́сие: Твои́х мольба́ми мя му́чеников мно́жества покрыва́й. Феофа́н. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Со́лнца иму́ще пра́вды незаходи́ма, Христа́, Бо́га на́шего,/ просвеща́юща вас, святи́и, невеще́ственным Све́том,/ о́блаки разори́те неве́дения моего́.

Безбе́дную, святи́и, безпрепо́нно источа́юще, благода́ть подава́ете приходя́щим ве́рою,/ вся́ку беду́, и вся́кое уны́ние,/ и бу́рю, и мяте́ж уставля́юще.

Кре́постию непобеди́мою препоя́савшеся, святи́и,/ плотски́я не́мощи не помы́слисте,/ но, безбоя́зненно мудрова́ние явля́юще,/ на огнь и муче́ние дерзну́сте.

Богоро́дичен: Ты еди́на, Богоневе́сто,/ в высоча́йших Седя́щаго на объя́тиих носи́ла еси́, плоть бы́вша;/ Ты бо яви́лася еси́ от всех век прия́телище досто́йное Вседержи́теля.

Песнь 3

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́,/ Человеколю́бче.

Утверди́вшеся Христо́вою си́лою, всеизя́щнейшии, по́мыслом кре́пким,/ сквозе́ огнь же и во́ду, стра́ждуще, преидо́сте к Небе́сным.

Нерасте́рзною бу́дущих наде́ждею ствержда́еми,/ настоя́щих боле́зней му́жественнейшим смы́слом, всесла́внии му́ченицы, небрего́сте.

Равному́дрствующе трем ю́ношам, всехва́льнии,/ безу́мия пе́рсскаго огнь угаша́юще, яви́стеся,/ росо́ю Ду́ха окропля́еми.

Богоро́дичен: Тя, Предста́тельницу изве́стну, Богома́ти, стяжа́вшии,/ наде́жды на Тя возлага́юще, спаса́емся/ и, к Тебе́ прибега́юще, сохраня́емся.

Седа́лен, глас 8.

Подо́бен: Прему́дрости:

Безбе́дно тече́ние благочести́вное, в по́двизе стра́ждуще,/ благосла́внии наде́ждею проидо́ша, венцы́ укрепля́еми;/ сопроти́вныя бо до конца́ погуби́вше,/ безпрепо́нно побе́ду свою́ соверши́ша,/ тем и оби́льно прося́щим ве́рою источа́ют всегда́ мно́жество исцеле́ний./ И́мже согла́сно возопии́м:/ моли́те Христа́ Бо́га грехо́в оставле́ние дарова́ти честву́ющим любо́вию святу́ю па́мять ва́шу.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́/ и я́ко Младе́нца дои́ши Зижди́теля и Го́спода./ Тем А́нгельский и челове́ческий род/ досто́йно сла́вим пресвято́е Рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му Рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница, зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мляй Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди,/ ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя Стра́сти Твоя́.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ нетле́нною дла́нию и спасе́ зову́щия:/ сла́ва, Христе́, си́ле Твое́й.

Просвеща́еми добро́тою изя́щнейшаго страда́ния,/ све́тлии свети́льницы, му́ченицы Христо́вы яви́стеся,/ светле́йшими луча́ми озаряя́юще зову́щия:/ сла́ва, Христе́, си́ле Твое́й.

Очище́ние кровь му́чеников бысть,/ и благово́ннейшее и́стинно приноше́ние Бо́гу безпрепо́нно даю́щи,/ и безбе́дный источа́ющи всем исто́чник врачева́ния.

Разли́чных напа́стей и бед нахожде́ние/ ва́шими моли́твами, су́щими ко Христу́, отрази́сте/ соверша́ющих усе́рдно всесвяще́нную и всепра́зднственную па́мять ва́шу, досточу́днии.

Испрове́ргше пре́лести и́дольское безбо́жие,/ Бо́га всех животворя́щее де́йство де́лы явля́юще, зва́сте, преблаже́ннии:/ сла́ва, Христе́, си́ле Твое́й.

Богоро́дичен: Крепча́йшее Тя ору́жие на враги́ предлага́ем,/ ско́рби вся́кия и лю́тых обстоя́ний отрева́ем вред/ и во́змущений ерети́ческих, Ма́ти Бо́жия, избега́ем.

Песнь 5

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче.

Тя сама́го, Аффо́ние, приве́л еси́ Христу́,/ кре́пце мучи́тельскую, сла́вне, обличи́в зло́бу безбо́жную,/ и к све́ту прите́кл еси́ ве́ры, веселя́ся.

Подо́бяся, Аффо́ние, стра́сти Христо́ве,/ Того́ ра́ди твоя́ глава́ отсече́ся изя́щне:/ к неизме́нному бо весе́лию потща́лся еси́ и безсме́ртному поко́ищу.

На недви́жимей наде́жди утверди́вся,/ и кра́сная, я́же на земли́, оплева́в, всему́дре Елпидифо́ре,/ неукло́нно бо ты прете́кл еси́ по́прище страда́ния.

Богоро́дичен: Возсия́в из Тебе́, Со́лнце мы́сленное/ све́тлыя лучи́ Своего́ Божества́ всем простре́, Богоро́дице Влады́чице:/ тем вси Тя сла́вим.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти, от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Теку́щих тле́нная презре́вше,/ нетле́нная сподо́бистеся зре́ти./ Искуше́ний у́бо изба́вите и бед/ ве́рою вас призыва́ющия, всехва́льнии.

Тро́ицу Безнача́льную, пресла́внии му́ченицы,/ лю́то свя́занныя и в темни́цах неосла́бно держи́мыя разреши́ти,/ ва́шими мольба́ми умилосе́рдите.

За Тя себе́ преда́вше на смерть,/ безсме́ртие, Спа́се мой, до́блии получи́ша,/ и спаси́телие су́щих в бу́ри и напа́стех и скорбе́х бы́ша.

Богоро́дичен: Расто́ргни мо́их прегреше́ний, Отрокови́це, рукописа́ние,/ и содержа́щия мя печа́ли и страсте́й разреше́ние да́рующи,/ и соблюда́ющи вы́ну неврежде́нна, Влады́чице.

Конда́к, глас 2.

Подо́бен: Тве́рдыя:

Благочести́выя и Богоно́сныя му́ченики,/ я́ко на земли́ оста́вльшия вся,/ прия́л еси́ в наслажде́ние благи́х Твои́х и упокое́ние,/ Акинди́на, Пига́сия, Анемподи́ста,/ с ни́миже Аффо́ния и Елпидифо́ра же,/ Еди́не сый Преблаги́й.

И́кос:

Отве́рзи ми уста́, Христе́ мой,/ воспе́ти и похвали́ти че́стно по́двиги страстоте́рпец Твои́х, Го́споди:/ сии́ бо, вся оста́вльше и возлюби́вше Тебе́, Созда́теля всех,/ су́щая на земли́ вся я́ко тле́нная вмени́ша./ И та́мо честны́й о́браз живоно́снаго Твоего́ Креста́ сотвори́вше,/ усе́рдно предста́ша Царю́, я́ко ору́жницы,/ му́ченицы до́блии, вопию́ще Ти:/ Еди́не сый Преблаги́й.

Песнь 7

Ирмо́с: Спасы́й во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше:/ препе́тый Го́споди,/ Бо́же оте́ц на́ших, благослове́н еси́.

Я́ко изба́вил еси́ из пла́мене три благочести́выя о́троки,/ си́це и ны́не страда́льцы в пещи́ о́гненней сохрани́л еси́,/ вопию́щия Ти Богому́дренно:/ оте́ц на́ших Бо́же, благослове́н еси́.

Дае́ши оби́льныя дары́ и чудодея́ние источа́еши страстоте́рпцы Твои́ми, Христе́,/ содева́я и соде́йствуя я́ко Милосе́рд и явля́я пою́щим Тя:/ оте́ц на́ших Бо́же, благослове́н еси́.

Мно́жество му́ченик, нело́жно со́браннии ве́рою, приведо́стеся Христу́,/ пресла́вных чуде́с явле́ние де́йствующе и пою́ще:/ оте́ц на́ших Бо́же, благослове́н еси́.

Богоро́дичен: Изба́вленнии Тобо́ю пра́дедния кля́твы/ и к присносу́щней пи́щи преше́дше,/ ра́дуйся, зове́м Тебе́, Препросла́вленная Влады́чице,/ Я́же Бо́га нам воплоще́ннаго ро́ждшая.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.

Благочести́вейшее му́чеников торжество́ ра́достно прии́де,/ мир озаря́ющее, вся возвесели́,/ и све́тло украша́ющее ве́рою пою́щия:/ Го́спода воспева́йте дела и превозноси́те Его́ во вся ве́ки.

На зве́ри, и ро́вы, и му́ки лю́тыя дерзну́сте, преизя́щнии,/ иму́ще Помо́щника непобеди́ма, сла́вы Го́спода,/ Ему́же ны́не зове́м:/ Го́спода воспева́йте дела и превозноси́те Его́ во ве́ки.

Вас, до́блия страда́льцы, Акинди́на, Пига́сия, и Анемподи́ста,/ па́ки же Аффо́ния и приснопа́мятнаго Елпидифо́ра, иму́ще сте́ну кре́пкую,/ Го́спода пое́м и превозноси́м во ве́ки.

Венце́м побе́ды украси́вшеся и добро́ты диади́мою светя́щеся,/ зарю́ невече́рнюю коне́чно, блаже́ннии, на Небесе́х прия́ли есте́, му́ченицы, зову́ще:/ Го́спода по́йте дела и превозноси́те Его́ во ве́ки.

Богоро́дичен: Усты́ и ра́зумом Богоро́дицу му́дрствующе,/ песносло́вим Тя, Пренепоро́чная:/ породила́ бо еси́, Пречи́стая,/ пло́тию обложе́наго Творца́, и Бо́га, и Царя́ Христа́./ Тем Тя, Де́во, пое́м и превозноси́м во ве́ки.

Песнь 9

Ирмо́с: Е́ва у́бо неду́гом преслуша́ния/ кля́тву всели́ла есть,/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.

Труды́ ва́ша на земли́ Небе́сное весе́лие прия́ше,/ иде́же му́чеников ли́цы, и Боже́ственных во́инства,/ и все перворо́дных сра́дуется торжество́, всеблаже́ннии.

От уз лю́тых, всеблаже́ннии, и бед изба́вите вся,/ ве́рою свято́е торжество́ ва́ше пра́зднующия,/ мир же, и тишину́ прося́ще, и спасе́ние, блаже́ннии.

Бога́тым озаря́еми све́том и благода́тию, страстоте́рпцы, сия́юще,/ согреше́ний разреше́ние и печа́лей ку́пно с ва́ми подви́гшимися/ да́ти к вам прибега́ющим Благоде́теля умоли́те.

Богоро́дичен: Е́ва у́бо дре́ва жи́зненнаго изгна́ся, возбрани́вшися причаще́ния,/ Ты же, Де́во Богоро́дице, Жизнь преве́чную родила́ еси́,/ ми́ру живоно́сное де́йство да́рующи ве́рою.

Свети́лен.

Подо́бен: Жены́, услы́шите:

Акинди́на, и Пига́сия, и Елпидифо́ра венча́ем/ со Аффо́нием пе́сньми, ку́пно и Анемподи́ста,/ и́бо пе́рсскую лесть обличи́вше суему́дренную/ и бие́ния и ра́ны за Христа́ претерпе́вше,/ неизрече́нныя сла́вы получи́ша.

Богоро́дичен: Ра́дуйся, Бо́жия пала́то; ра́дуйся, горо́ осеня́ема;/ ра́дуйся, купино́ неопали́мая;/ ра́дуйся, престо́ле сла́вы;/ ра́дуйся, Боже́ственная трапе́зо;/ ра́дуйся, ру́чко всезлата́я;/ ра́дуйся, све́щниче огнезра́чный;/ ра́дуйся, ле́гкий о́блаче, Де́во Ма́ти Мари́е.

На стихо́вне Окто́иха и святы́х стихи́ра,

глас 2:

Стих: Мно́ги ско́рби пра́ведным,/ и от всех их изба́вит я Госпо́дь.

Кро́вными то́ки те́ло обагри́в,/ безбе́дне проше́л еси́ путь муче́ния, страстоте́рпче Акинди́не,/ тем и кре́постию Боже́ственною препоя́сався,/ вра́жия изсе́кл еси́ козноде́йства./ Христа́ Бо́га моли́ о нас/ спасти́ся душа́м на́шим.

Сла́ва, глас 4:

Пятоза́рная страда́лец свеща́,/ я́ко в дубра́ве древ секи́рою,/ Дави́дски изсече́ лесть вра́жию,/ испове́давше Христа́ пред цари́,/ непреста́нно мо́лят о душа́х на́ших.

И ны́не,

Богоро́дичен или́ Крестобогоро́дичен.

Подо́бен: Я́ко до́бля:

На Кресте́ Тя я́ко узре́ пригвожде́на, Го́споди,/ А́гница и Ма́ти Твоя́ дивля́шеся:/ и что виде́ние сие́, взыва́ше, Сы́не вожделе́ннейше?/ Сия́ Ти неве́рный собо́р воздаде́ пребеззако́нный,/ и́же мно́гих Твои́х чуде́с наслади́выйся,/ но сла́ва неизглаго́ланному соше́ствию Твоему́, Влады́ко.

На Литурги́и

Проки́мен, глас 4: Святы́м, и́же суть на земли́ Его́: Стих: Предзре́х Го́спода пре́до мно́ю вы́ну: Апо́стол ко Ефесе́ем, зача́ло 233. Аллилу́ия, глас 4: Воззва́ша пра́веднии: Стих: Мно́ги ско́рби пра́ведным: Ева́нгелие от Матфе́я, зача́ло 36. Прича́стен: Ра́дуйтеся, пра́веднии:

На Вели́цей Вече́рни

На Го́споди, воззва́х:

Стихи́ры на 8, глас 1:

Приди́те ны́не, ве́рнии,/ в пе́нии и пе́снех духо́вных воспои́м,/ благодаря́ще Ма́терь Бо́жию,/ ди́внаго ра́ди прославле́ния Ея ико́ны Шу́йския,/ в не́й бо от лет дре́вних/ нам Всеми́лостивая исто́чник чуде́с преизоби́лен/ во здра́вие теле́с и спасе́ние душ на́ших.

С чи́нми свяще́нными днесь,/ вси ро́ди ве́рных, духо́вно да взыгра́ем,/ всечестно́е соверша́юще пра́зднество Богома́тере/ и прославля́юще да́ры благода́тныя,/ я́же моли́твами Влады́чицы/ бога́тно подае́т рабо́м Свои́м,/ с ве́рою к ли́ку Ея́ прибега́ющим,/ рожде́йся от Нея́ Человеколю́бец Христо́с/ и Спас душ на́ших.

Глас 2:

Ка́ко Тя, от Сама́го святы́х Святе́йшаго просла́вленную,/ воспои́м, Богоро́дице, недосто́йнии и мно́гим грехо́м пови́ннии,/ несть бо красна́ песнь во усте́х гре́шничих,/ но мы, любо́вию и усе́рдием побежда́еми,/ припа́дающе, вопие́м Ти:/ Сама́ испроси́ нам у Сы́на Твоего́ и Бо́га на́шего/ ро́су благода́ти во омы́тие беззако́ний на́ших,/ да очище́нными душа́ми и устна́ми/ блажи́м Тя, Всепе́тая.

Ма́ти су́щи Бо́жия,/ Ма́ти еси́ и милосе́рдия, Небе́сная Цари́це,/ предстоя́щи бо одесну́ю Царя́ Сла́вы,/ всегда́ пред Ним за род христиа́нский предста́тельствуеши/ и ве́рным рабо́м Тво́им да́ры ми́лости источа́еши./ Се бо и гра́ду Шу́е/ дре́вле избавле́ние от смертоно́сныя я́звы дарова́ла еси́/ новопи́санною ико́ною Твое́ю,/ по внесе́нии во храм ди́вным све́том просия́вшею,/ и тем сотвори́ла еси́ нача́ток зна́мением и чудесе́м от ней,/ и́же мы ны́не воспомина́юще, приле́жно мо́лимся Ти:/ проба́ви нам пре́жния Твоя́ ми́лости,/ да во благодаре́нии серде́ц при́сно сла́вим и блажи́м Тя, Всепе́тая.

Сла́ва и ны́не, Богоро́дичен, глас 6: Кто Тебе́ не ублажи́т: Вход, проки́мен дне и чте́ния три ( зри Мине́ю ноября́ 9 день )

На литии́ стихи́ры, глас 6:

Небе́сный Царю́, Христе́ Богомладе́нче,/ на начерта́нии свята́го о́браза Пречи́стыя Твоея́ Ма́тере/ зрим Тя, в десни́це пред ли́ком Свои́м сви́ток кни́жный держа́ща,/ в не́мже заключе́ны су́дьбы челове́чества./ Вои́стину Ты еси́ суде́б его́ Влады́ка и Реши́тель./ Те́мже и мы тре́петом объе́млемся,/ да не ка́ко по грехо́м, во оте́чествии на́шем умно́жившимся,/ впи́шутся о нем во сви́ток сей словеса́ о́ныя:/ оты́мется от вас Ца́рствие Бо́жие/ и да́стся язы́ку, твори́щему плоды́ его́./ Оба́че на долготерпе́ние Твое́ упова́юще,/ смире́нно мо́лимся Тебе́:/ изба́ви ны от належа́щаго и пра́веднаго Своего́ преще́ния и поми́луй ны,/ на́шего вся́чески ожидая́ покая́ния и обраще́ния,/ и страну́ на́шу благода́тию Твое́ю сохрани́,/ предста́тельством Ро́ждшия Тя,/ име́яй ве́лию и бога́тую ми́лость.

Небе́сная Цари́це Богоро́дице,/ на святе́м Твое́м о́бразе,/ ему́же ны́не пра́зднуем благоче́стно,/ зрим Тя десни́цею Свое́ю стопу́ шу́юю у Христа́ Богомладе́нца придержа́щу,/ главу́ же Свою́ к Нему́ моле́бно прикло́ншу/ и сим а́ки бы за град Шу́ю предста́тельствующу./ Те́мже во умиле́нии серде́ц взыва́ем Ти:/ поддержи́ руко́ю Своего́ милосе́рдия град Шу́ю,/ ико́ну Твою́ благогове́йне чту́щий,/ и моли́ Сы́на Твоего́ и Бо́га на́шего,/ да спасе́т живу́щия в нем и во о́бласти его ве́рныя лю́ди,/ име́яй ве́лию и бога́тую ми́лость.

Сла́ва и ны́не, глас то́йже:

Тебе́ вси ро́ди челове́честии/ хва́льныя да́ры приносят, Влады́чице,/ и мо́лятся я́ко Цари́це и Ма́тери Бо́жии,/ проро́цы Тя пропове́даша,/ леви́ти благослови́ша,/ апо́столи и му́ченицы испове́даша,/ архиере́и пропове́дают,/ мона́си и прости́и благогове́ют,/ бога́тии и убо́зии, сироты и вдо́вы,/ и всяк во́зраст, и вся́ко преспея́ние,/ ста́рческое и младе́нческое,/ под кров Твой держа́вный с ве́рою прибега́ем:/ покры́й и соблюди́, Госпоже́, моли́твами Твои́ми/ и спаси́ от бед ду́ши на́ша.

На стихо́вне стихи́ры, глас 8:

Испо́лнила еси́ благода́ти, Госпоже́ Де́во Богоро́дице,/ ико́ну Твою́ нача́льную,/ святы́м Луко́ю Евангели́стом первопи́санную./ Отто́ле же благи́м обы́чаем Свои́м/ не престае́ши и ины́я изображе́ния пречи́стаго ли́ка Твоего́,/ людьми́ Богоуго́дными пи́санныя,/ тоя́жде приобща́ти си́лы благода́тныя,/ в чудесе́х и зна́мениих от них явля́ющи ю́,/ я́коже и во гра́де Шу́е иногда́/ напи́санную Боголюби́вым рабо́м Бо́жиим Гера́симом,/ вели́кий о́браз мона́шеский на кончи́не свое́й восприя́вшим,/ честну́ю ико́ну Твою́ соде́лала еси чудотво́рну,/ за е́же Тя благодаря́ще/ и пра́зднество той ны́не соверша́юще,/ сла́вим неизрече́нное Твое́ к нам милосе́рдие.

Стих: Помяну́ и́мя Твое́/ во вся́ком ро́де и ро́де.

И́мя Твое́ я́ко ро́ждшия Спа́са ми́ру, о Влады́чице,/ благода́рне во вся́ком ро́де и ро́де ве́рных помина́ется и сла́вится:/ сия́ же свяще́нная и сла́вная, Де́во, па́мять Твоя́/ в нас непрестаю́щими Твои́ми благодея́ньми утвержда́ется,/ источа́еши бо ты́я неоску́дно всем,/ с ве́рою и любо́вию к Тебе́ притека́ющим,/ милосе́рдия су́щи исто́чник, живы́й и незави́стный,/ Еди́на Благослове́нная.

Стих: Лицу́ Твоему́/ помо́лятся бога́тии лю́дстии.

Лицу́ Твоему́, Влады́чице,/ его́же изображе́нию благоче́стно покланя́емся,/ мо́лятся лю́дие, стяжа́вшии бога́тство Твоея́ бла́гости,/ и упова́ют кре́пко,/ я́ко мно́го мо́жет моле́ние Ма́тернее ко благосе́рдию Влады́ки/ и я́ко никто́же от них оты́дет от ли́ка Твоего́ тощ и неуслы́шан,/ но прии́мет ми́лость и благода́ть обря́щет/ во благовре́менную по́мощь.

Сла́ва, и ны́не,

глас то́йже:

Ра́дуйся, вселе́нныя похвало́,/ ра́дуйся, хра́ме Госпо́день,/ ра́дуйся, горо́ приосене́нная,/ ра́дуйся, всех прибе́жище,/ ра́дуйся, све́щниче златы́й,/ ра́дуйся, сла́во правосла́вных честна́я,/ ра́дуйся, Мари́е, Ма́ти Христа́ Бо́га,/ ра́дуйся, ра́ю, раду́йся, Боже́ственная трапе́зо,/ ра́дуйся, се́не, ра́дуйся, ру́чко всезлата́я,/ ра́дуйся, всех упова́ние.

На благослове́нии хле́бов

Тропа́рь, глас 4:

Я́ко многоце́нное сокро́вище прия́т град Шу́я/ чуде́сно напи́санную ико́ну Твою́,/ Пресвята́я Влады́чице, Де́во Богоро́дице,/ во исцеле́ние лю́тыя я́звы и во утеше́ние правосла́вных Тобо́ю дарова́нную,/ от нея́же исто́чники благода́тныя и до ны́не оби́льно изливаются./ Проба́ви, Пречи́стая, и на бу́дущее вре́мя ми́лости Твоя́ ве́дущим Тя,/ храни́ град Твой и всю Ру́сскую зе́млю/ и спаса́й люде́й, к Тебе́ с ве́рою и любо́вию притека́ющих.

Ин тропа́рь, глас 4:

Всеблага́я и преми́лостивая Засту́пнице ро́да христиа́нскаго,/ Пречи́стая Де́во Богоро́дице,/ припа́дающе пред святы́м и чудотво́рным Твои́м о́бразом,/ и́мже от лю́таго смертоно́сия град Шу́ю дре́вле изба́вила еси́,/ уми́льно взыва́ем Ти:/ не преста́й под кро́вом Своея́ бла́гости/ сохраня́ти от бед и обсто́яний град Твой/ и вся гра́ды и ве́си страны́ нашея/ и моли́ти Сы́на Твое́го, Христа́ Бо́га на́шего,/ да спасе́т ду́ши на́ша.

На У́трени

По 1-й кафи́зме седа́лен, глас 3:

Лю́дие благочести́вии,/ правове́рнии собо́ри христоимени́тии,/ приступи́те ве́рно вси,/ Боже́ственному припа́дающе Бо́жия Ма́тере о́бразу,/ и́мже исцеле́ние боля́щим ра́достно подава́ет,/ уязвля́ет же злосла́вныя, я́ко стрела́ из лу́ка,/ нас всех веселя́щи светови́дно/ и благода́тию озаря́ющи моли́твами Свои́ми.

Сла́ва, и ны́не, глас то́йже:

Ты еси́ на́ша кре́пость и утвержде́ние, Влады́чице,/ и от враго́в ви́димых и неви́димых заступле́ние,/ и су́щим в беда́х прибе́жище:/ Тя бо, Ма́терь Бо́жию, стяжа́вше Всеми́лостивую,/ от вся́ких напа́стей избавля́емся,/ к пречестне́й ико́не Твое́й с ве́рою притека́ющии.

По 2-й кафи́зме седа́лен, глас 4:

Да ликовству́ет све́тло ве́рных все мно́жество,/ да рыда́ет же де́монское во́инство,/ ви́дяще многоиме́нно сия́ющия пра́здники Бо́жия Ма́тере,/ ю́же ублажа́ем я́ко Богома́терь Боже́ственными пе́сньми,/ иде́же бо Богоприя́тно сла́вится Преблагослове́нная Богоро́дица Влады́чица,/ неприя́зни паде́ние, христиа́н же кре́пкое утвержде́ние.

Сла́ва, и ны́не, глас то́йже:

Ты в напа́стех и ско́рбех ми́лостивно защища́еши, Влады́чице,/ я́же к заступле́нию Твоему́ усе́рдно прибега́ют,/ ны́не у́бо, егда́ мно́зи ско́рби и напа́сти, обыше́дше, обыдо́ша нас/ и житие́ на́ше отяготи́ша,/ приклони́ся к моле́нию рабо́в Твои́х/ и пода́ждь нам от облежа́щих зол избавле́ние,/ мир и благоде́нствие хода́тайствы Твои́ми.

По полиеле́и седа́лен, глас 1:

Правове́рно чту́щия Тя/ и ико́не Твое́й святе́й покланя́ющияся,/ о Бо́жия Ма́ти, спаси́/ и не даждь в расхище́ние сопоста́том,/ ниже́ на́йдут на ны вся зла́я,/ я́же грехи́ на́ша угото́ваша нам,/ и беззако́ния на́ша превзыду́т главы́ на́ша:/ но да Твоя́ Ма́терняя к Бо́гу преодоле́ет за ны благоприя́тная моли́тва.

Сла́ва, и ны́не, глас то́йже:

Пречестна́я Твоя́ ико́на, Богоро́дице Де́во,/ врачевство́ всего́ ми́ра духо́вное,/ к не́йже прибега́ем и лобыза́ем ю́,/ исцеле́ний благода́ть почерпа́юще от нея́,/ и неду́гов теле́сных и душе́вных страсте́й Твои́ми моли́твами свобожда́емся.

Та́же степе́нна, 1-й антифо́н 4-го гла́са. Проки́мен: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь,/ и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

Не вве́ри мя челове́ческому предста́тельству,/ Пресвята́я Влады́чице,/ но приими́ моле́ние раба́ Твоего́,/ скорбь бо обдержи́т мя,/ терпе́ти не могу́ де́монскаго стреля́ния,/ покро́ва не и́мам, ниже́ где прибе́гну окая́нный,/ всегда́ побежда́емь,/ и утеше́ния не и́мам, ра́зве Тебе́, Влады́чице ми́ра,/ упова́ние и предста́тельство ве́рных,/ не пре́зри моле́ние мое́, поле́зно сотвори́.

Кано́на два Одиги́трии Пресвяты́я Богоро́дицы, глас 4, со ирмосы́ на 6 ( зри Мине́ю ию́ля 28 день ). Ин кано́н пра́здника, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Отве́рзти ми недоуме́нный ум и язы́к/ на похвалу́ пречи́стаго Твоего́ и́мене не возбрани́,/ грех ра́ди мои́х, Всеблага́я Де́во,/ но и, Ма́ти, си́лу, ели́ко есть произволе́ние, даждь,/ да воспою́, ра́дуяся, Твоя́ чудеса́.

Отве́рзла еси́ дре́вле от о́браза Твоего́ честна́го/ и́ноку Шу́йския оби́тели Святы́я Трои́цы Ни́кону осле́пшия о́чи,/ и той, исцеле́н, оты́де в монасты́рь свой, ра́дуяся,/ сла́вити та́мо и воспева́ти Твоя́ чудеса́.

Отверзе́ния осле́пшим очесе́м свои́м проси́вшая у тебе́, Богома́ти,/ жена́ не́кая, и́менем Ма́рфа,/ а́бие на моли́тве пред ико́ною Твое́ю нача́ ви́дети я́сно/ и, исцеле́на, оты́де в дом свой,/ ра́дуяся и прославля́я Твоя́ чудеса́.

Отве́рзи нам душе́вныя о́чи, Богоро́дице и Ма́ти Све́та,/ слепото́ю грехо́вною неду́гующим,/ и во све́те повеле́ний Госпо́дних ходи́ти напра́ви нас,/ да, ра́дующеся, воспева́ем Твоя́ к нам ми́лости и чудеса́.

Песнь 3

Ирмо́с: Твоя́ песносло́вцы, Богоро́дице,/живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Твоя́ песносло́вцы, Богоро́дице,/ се́рдцем и усты́ вознося́щия Ти глас хвалы́ и благодаре́ния,/ содева́еши всех, и́же от Тебе́ исцеле́ний и вся́кия благода́ти сподобля́ются,/ и́хже не лише́ны бы́ти и прича́стия Ца́рства Сла́вы сподо́би.

Твои́х песносло́вцев а́бие услы́ша гла́сы, Влады́чице,/ и́нок Юрьевецкия оби́тели Боголе́п,/ егдя́ на слу́жбе Бо́жией моля́шеся пред ико́ною Твое́ю о исцеле́нии от глухоты́,/ и отве́рзла еси́ слух его́./ Тогда́ нача́т и́нок ра́достно припева́ти им:/ лик себе́ совоку́пльшия духо́вно утверди́,/ в Боже́ственней Твое́й сла́ве венце́в сла́вы сподо́би.

Твоя́ певцы́, Богоро́дице,/ показа́шася иногда́ архиепи́скоп Су́ждальский Стефа́н с про́чим духо́вным собо́ром,/ егда́ по пришествии свое́м во град Шу́ю/ на свиде́тельствование чуде́с от Твоея́ ико́ны/ моле́бная пред не́ю воспе́ша:/ ты́я песносло́вцы Твоя́ и и́стину чуде́с тех дозна́вшия блаже́нства ве́чнаго сподо́би.

Твоя́ песносло́вцы, Богоро́дице,/ вознося́щия Ти гла́сы моле́ния и благохвале́ния,/ и с ни́ми вся ве́рныя/ от грехо́вных паде́ний огради́, в доброде́тели утверди́/ и Небе́сныя сла́вы улучи́ти сподо́би.

Конда́к, глас 3:

Ма́ти Бо́жия Пресвята́я,/ стено́ христиа́ном, гра́да на́шего Шу́и покро́в и заступле́ние!/ Моли́твы раб Твои́х, ко ико́не Твое́й припа́дающих, приими́,/ во испове́дании Правосла́вныя ве́ры укрепи́,/ от вся́кия напа́сти и беды́ изба́ви,/ ско́рби земны́я, на ра́дость преложи́/ и Сы́на Твоего́ моли́ гра́ду и лю́дем Твои́м в ми́ре спасти́ся.

Седа́лен, глас 2:

Моле́ние те́плое и стена́ необори́мая,/ ми́лости исто́чниче, ми́рови прибе́жище,/ приле́жно вопие́м Ти:/ Богоро́дице Влады́чице, предвари́ и от бед изба́ви нас,/ Еди́на вско́ре предста́тельствующая.

Сла́ва, и ны́не, то́йже.

Песнь 4

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ нетле́нною дла́нию и спасе́ зову́щия:/ сла́ва, Христе́, си́ле Твое́й.

Седя́й в сла́ве на Престо́ле Божества́,/ соше́д на зе́млю на́шего ра́ди спасе́ния/ и из Тебе́ проше́д, су́щую Тя Богоро́дицу вы́сшую всех тва́рей показа́,/ те́мже в благогове́нии тре́петнем зове́м Ему́:/ сла́ва, Христе́, си́ле Твое́й.

Седя́й в сла́ве на Престо́ле Божества́,/ благоволи́, вочелове́чився, седе́ти я́ко Младе́нец на руку́ Твое́ю, о Богома́ти,/ сим показу́я, я́ко Ты еси́ и ближа́йшее пред Ним предста́тельство о всех,/ ве́рно чту́щих Тя, Ему́ же зову́щих:/ сла́ва, Христе́, си́ле Твое́й.

Седя́й во объя́тиях Твои́х Младе́нец Иису́с Пребоже́ственный/ нетле́нною дла́нию де́ржит пред Собо́ю сви́ток дел челове́ческих,/ я́коже ви́дим на пречу́дней ико́не Твое́й, Влады́чице:/ из него́ же да бу́дут, мо́лимся, изъя́ты хода́тайством Твои́м грехи́ все́х,/ Сы́ну Твоему́ зову́щих:/ сла́ва, Христе́, си́ле Твое́й.

Седя́щему на Престо́ле Божества́ Царю́ Сла́вы/ предстои́ши одесну́ю, Цари́це Небе́сная,/ помози́ нам подража́ти Тебе́,/ да сподо́бимся ча́сти блаже́нства Твоего́ и воскли́кнем:/ сла́ва, Христе́, си́ле Твое́й.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й,/ Ты́ бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ все́м воспева́ющим Тя/ мир подава́ющая.

Ужасо́шася вся́ческая о Боже́ственней сла́ве Твое́й,/ в чудотво́рных ико́нех Твои́х явля́емей:/ Ты бо, Премилосе́рдая, да́ры целе́бныя и зна́мения подае́ши/во времена́ благопотре́бна притека́ющим Ти с ве́рою,/ всем воспева́ющим Тя мир подава́ющая.

Ужасо́шася гра́да Шу́и жи́телие нашедшей на ня́ смертоно́сней я́зи ве́лией,/ но Ты, Всеми́лостивая, прикло́ншися на моле́ние их,/ дарова́ла еси́ им от нея́ ско́рое избавле́ние новопи́санною ико́ною Твое́ю/ и успокое́ние сердца́м их низпосла́ла еси́,/ все́м воспева́ющим Тя мир подава́ющая.

Ужасо́шася свиде́телие чуде́с от Твоего́ пречу́днаго о́браза/ приводи́мым к нему́ бе́сным, сотряса́емым и лома́емым си́лою де́монскою,/ посе́мже и ра́довахуся, воо́чию ви́девше ты́я а́бие исцеле́ны Тобо́ю,/ и ку́пно с ни́ми моли́твы благодаре́ния приноша́ху Тебе́, Влады́чице,/ всем воспева́ющим Тя ми́р подава́ющая.

Ужаса́юся опа́сно наве́та диа́воля,/ но, припа́дая к чудотво́рному о́бразу Твоему́,/ упова́ю Тобо́ю вра́жия прельще́ния изба́витися и умире́ния улучи́ти,/ е́же и потщи́ся дарова́ти ми, Госпоже́ Богоро́дице,/ всем воспева́ющим Тя мир подава́ющая.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

Боже́ственное Твое́ истоща́ние, Иису́се,/ о́бразно живопису́ется нам на ико́нех Пречи́стыя Твоея́ Ма́тере,/ иде́же зрим Тя, на руку́ Ея́ держи́ма я́ко Младе́нца:/ те́мже Тебе́, от Нея́ ро́ждшагося Бо́га, сла́вим.

Боже́ственное и всечестно́е торжество́/ чудотво́рныя ра́ди ико́ны Твоея́, Богоро́дице,/ егда́ святи́тель Стефа́н соверша́ше,/ тогда́ сие́ ознамено́вано бысть исцеле́нием от слепоты́ жены́ не́кия Ва́ссы,/ два́десять лет очи́ма не ви́девшия./ О такове́м чудеси́ Твое́м ра́дующеся,/ от Тебе́ ро́ждшагося Бо́га сла́вим.

Боже́ственное сие́ и всечестно́е соверша́юще пра́зднество/ прославле́ния Твоея́, Богома́ти, ико́ны,/ па́мять твори́м всех чуде́с, я́же Тобо́ю от нея́ соде́яшася,/ о ни́хже Тя благода́ряще,/ от Тебе́ ро́ждшагося Бо́га сла́вим.

Боже́ственное сие́ и всечестно́е соверша́юще пра́зднество,/ от тя́жких и лю́тых изба́ви ны,/ ми́ра сподо́би, да ти́хое и безмо́лвное житие́ поживе́м,/ вся́ бо мо́жеши, Ма́ти Бо́жия су́щи,/ Юже велича́юще, от Тебе́ ро́ждшагося Бо́га сла́вим.

Конда́к, глас 6:

Предста́тельство христиа́н непосты́дное,/ хода́тайство ко Творцу́ непрело́жное,/ не пре́зри гре́шных моле́ний гла́сы,/ но предвари́ я́ко Блага́я/ на по́мощь нас, ве́рно зову́щих Ти́,/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.

И́кос:

Простри́ дла́ни Твоя́,/ и́миже всех Влады́ку я́ко Младе́нца прия́ла еси́ за мно́жество бла́гости:/ не оста́ви нас, всегда́ наде́ющихся на Тя́, бо́дренною Твое́ю моли́твою,/ и неисче́тным состра́данием уще́дри нас,/ и пода́ждь душа́м на́шим милосе́рдие Твое́, во ве́ки источа́ющи:/ Тебе́ бо и́мамы, гре́шнии, Засту́пницу от находя́щих на ны́ бе́д и зо́л,/ но, я́ко иму́щи милосе́рдия щедро́ты,/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя́.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго, / но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Не послужи́ти бого́м ины́м, ра́зве Тебе́,/ ниже́ покланя́тися вся́кому подо́бию их,/ законоположи́л еси́ дре́вле Изра́илю, Го́споди:/ се́ и мы́ Тебе́ Еди́ному слу́жим и Тебе́ Еди́ному пое́м:/ препе́тый отце́в Госпо́дь и Бог, благослове́н еси́.

Не послужи́ти тва́ри па́че Созда́вшаго запове́давый Госпо́дь/ повеле́ оба́че на киво́те заве́та два́ Херуви́ма извая́нна сотвори́ти,/ да покланя́ющеся им, Самому́ Ему́ сы́нове Изра́илевы покланя́ются;/ мы́ же Тебе́, Богоро́дице,/ я́ко одушевле́нному Бо́жию Киво́ту, от Херуви́м осеня́ему, покланя́ющеся,/ Творцу́ и Влады́це всех пое́м:/ препе́тый отце́в Госпо́дь и Бог, благослове́н еси́.

Не послужи́ша тва́ри о́троцы евре́йстии па́че Созда́вшаго;/ не иска́ша и лю́дие Шу́йския по́мощи челове́ческия па́че Бо́жия,/ егда́ на́йде на них смертоно́сие,/ тогда́ а́бие к Бо́гу со слеза́ми покая́ния обрати́шася/ и, избавле́ние получи́вше, воспе́ша:/ препе́тый отце́в Госпо́дь и Бог, благослове́н еси́.

Не послу́жити, па́че же противустоя́ти уче́нием и обы́чаем ве́ка сего́/ помози́ нам, Богоро́дице, да не в коне́ц поги́бнем,/ и сохрани́ в нас ве́ру отце́в на́ших, да всегда́ Творцу́ вопие́м:/ препе́тый отце́в Госпо́дь и Бог, благослове́н еси́.

Песнь 8

Ирмо́с: Отроки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю́ воздвиза́ет пе́ти Тебе́:/ Го́спода по́йте дела́/и превозноси́те Его́ во вся́ ве́ки.

О́трока Иа́кова, лю́те бесну́ема,/ приведе́ннаго ко ико́не Твое́й, Богородице,/ от де́монскаго мучи́тельства изба́вила еси́ я́ве,/ я́коже всем, ви́девшим сие́, диви́тися зело́;/ изба́ви у́бо и нас наве́тов и искуше́ний бесо́вских,/ да в ми́ре душе́внем при́сно пое́м, изба́вленнии:/ Го́спода по́йте дела́ и превозноси́те во вся́ ве́ки.

Отрока друга́го, Иоа́нна и́менем,/ и́же, разболе́вся зле́, хотя́ше умре́ти,/ Ты, Преми́лостивая, молитв ра́ди и ве́ры роди́телей его́ ско́ро от боле́зни исцели́ла еси́,/ те́мже мо́лим Тя:/ и на́с от вся́ких неду́гов уврачу́й, да благода́рне зове́м:/ Го́спода по́йте дела́ и превозноси́те Его́ во вся́ ве́ки.

Отроки иногда́ и ученики́ духо́внаго вертогра́да уче́ний мы бы́вше,/ моли́хомся пред о́бразом Твои́м, Богоотрокови́це,/ те́х ра́ди о́трочих моли́тв на́ших не оста́ви нас покро́вом Свои́м/ и во вре́мя ста́рости и по кончи́не живота́ на́шего,/ да со о́троки евре́йскими и все́ми святы́ми зове́м:/ Го́спода по́йте дела́ и превозноси́те Его́ во вся́ ве́ки.

Отроки благочести́выя в пещи́ Рождество́ Богоро́дичо спасло́ есть:/ да спасе́т Оно́ и на́ши о́троки и де́ти,/ в пе́щи су́щия собла́знов неве́рия и развраще́ния,/ мы́ же во упова́нии на сию́ к ни́м и на́м Бо́жию ми́лость вопие́м:/ Го́спода по́йте де́ла и превозноси́те Его́ во вся́ ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная/ Богородице, Чистая Приснодево.

Всяк род ве́рных благогове́йне чтит свяще́ннаго ли́ка Твоего́ многоиме́нная изображе́ния,/ наипа́че зна́меньми Твоея́ благода́ти и ми́лости просия́вшия,/ от ни́хже и в пре́дняя Твои́х благодея́ний и да́ров не лише́ну бы́ти упова́я, вопие́т:/ ра́дуйся, Всеблаже́нная Богоро́дице, Чи́стая Присноде́во.

Всяк, слы́шай по́весть о изве́ствованных во гра́де Шу́е веще́х,/ я́коже преда́ше нам я́же испе́рва самови́дцы,/ ка́ко в не́м во дни́ дре́вния заступле́нием Богома́тере/ от новопи́санныя ико́ны Ея́ всегуби́тельство сме́ртное преста́,/ и мно́гая ина́я чудеса́ соде́яшася,/ игра́нием ду́ха исполня́ется и вопие́т:/ ра́дуйся, Всеблаже́нная Богоро́дице, Чи́стая Присноде́во.

Вся́ких даро́в благода́ти исто́чник яви́ла еси́, Влады́чице,/ не то́чию самую ико́ну Твою́ Шу́йскую,/ но и не́кия из спи́сков ея́ свяще́нных:/ се́ бо и в селе́нии Па́влове, е́же во о́бласти Нова́гра́да Низо́вския земли́,/ и во Яросла́вле гра́де, и во ины́х месте́х/ подоби́я тоя́ ико́ны ми́лостию Твое́ю чудоде́йственны показа́шася,/ те́мже и живу́щии та́мо ве́рнии благода́рне Тебе́ вопию́т:/ ра́дуйся, Всеблаже́нная Богоро́дице, Чи́стая Присноде́во.

Вся́кия ны́не мяту́щия страну́ нашу церко́вныя собла́зны и разделе́ния/ утоли́, Влады́чице, моли́твами Твои́ми,/ отсту́пльшия же от Православныя Це́ркве па́стыри и мирски́я лю́ди на путь и́стины обрати́,/ да вси́ еди́но пребыва́юще, согла́сно Го́спода сла́вим и Тебе́ вопие́м:/ ра́дуйся, Всеблаже́нная Богоро́дице, Чи́стая Присноде́во.

Свети́лен:

Сла́дость Ангелов, скорбя́щих ра́досте,/ христиа́н предста́тельнице, Де́во, Ма́ти Госпо́дня,/ заступи́вши ны, спаси́ от ве́чнаго муче́ния.

На хвали́тех стихи́ры на 4, глас 3:

Неисчерпа́емую чуде́с пучи́ну ве́мы Тя, Богоро́дице Де́во,/ я́ко па́че ума́ и сло́ва ро́ждши Христа́, Спа́са на́шего,/ от Него́ чудоде́йственныя благода́ти превы́сший дар восприя́ла еси́:/ Тобо́ю бо слепи́и прозира́ют,/ хроми́и хо́дят, прокаже́ннии очища́ются,/ глуси́и слы́шат, неми́и глаго́лют,/ от бесо́в томи́мии свобожда́ются,/ от неду́гов вся́ких и боле́зней стра́ждущии исцелева́ются,/ и ме́ртвии востаю́т./ Те́мже Тя ны́не и при́сно в пе́снех велича́ем,/ а́ще и недосто́йнии раби́ Твои́, Благослове́нная.

Пра́зднественным зво́ном доброшу́мным,/ град Шу́ю ны́не оглаша́ющим,/ внима́им ра́достно, бра́тие,/ себе́ оба́че назида́юще,/ да са́ми не я́ко медь звеня́щи или́ кимва́ли звяца́юще/ бу́дем в прославле́нии Пречи́стыя Ма́тере Бо́га на́шего/ еди́неми гла́сы благохва́льными, а́ще и от серде́ц возноси́мыми,/ но де́лы благи́ми наипа́че да ублажа́ем Ю,/ подража́юще Ея́ милосе́рдию/ и си́м вои́стину благоуго́дное Ей сотворя́юще.

Соста́вити пра́здник ра́достен/ в честь пречу́дныя ико́ны Твоея́, о Влады́чице, нам ны́не дарова́вшая,/ не лиши́ нас всемо́щнаго пред Сы́ном Твои́м предста́тельства,/ да бу́дем о́бщницы и ли́ка пра́зднующих с Тобо́ю/ в торжестве́ ве́чнем избра́нных Его́.

Сла́ва, и ны́не, глас 8:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

На Литурги́и

Блаже́нны от кано́на Одиги́трии песнь 3-я и от втора́го кано́на пра́здника песнь 6-я и про́чая слу́жбы Пресвяты́я Богоро́дицы.