На Го́споди, воззва́х: стихи́ры проро́ка, глас 1.

Подо́бен: Всехва́льнии му́ченицы:

Прия́телище Ду́ха све́тлое, Авди́е, быв,/ и от Него́ просвеща́емь Богови́днейше,/ проро́чествия о́бразом, и бу́дущих прозна́нием,/ и зна́нием и́стины обогати́лся еси́./ И ны́не моли́ся дарова́ти душа́м на́шим/ мир и ве́лию ми́лость.

И́миже вообража́ется Бог,/ пе́рвыми, сво́йствы и су́щественными указа́нии,/ сих, сла́внии и честни́и проро́цы,/ причаще́нием и благода́тию,/ второ́е, по да́ру причаща́ются,/ просвеща́ющу Го́споду уго́дники Своя́ Свое́ю све́тлостию.

Незаходи́маго исполняе́мь све́та,/ и сла́ву ви́дя па́че у́ма и смы́сла,/ и предстоя́ Влады́це всех, я́ко проро́к сла́вный/ и Боже́ственный Боговеща́тель быв./ То́го мо́ли дарова́ти душа́м на́шим/ мир и ве́лию ми́лость.

И́ны стихи́ры свята́го Варлаа́ма, глас 4.

Подо́бен: Я́ко до́бля:

Столпа́ тверде́йший, и ме́ди крепча́йший,/ и желе́за был еси́ мощне́йший:/ отступа́ет бо жго́мо/ и а́бие разруша́емо сих ко́еждо огне́м,/ того́ ну́ждею побежда́емо./ Твоя́ же непрекло́нна десни́ца просте́рта/ у́глием жгу́щим/ пресла́вно преодоле́, всему́дре.

Свяще́нник я́коже быв, и Бо́гу предстоя́,/ и к Тому́, блаже́нне, приходи́,/ не чужде́ю кро́вию, свое́ю же наипа́че,/ и руко́ю му́ченическою благово́ния кади́ло прине́сл еси́,/ не де́монским пре́лестем, Христу́ же Спа́су,/ и Влады́це, и при́сно Ца́рствующему.

Свяще́нника принося́ща и а́гнца приноси́маго,/ того́жде обою́ду ти, всехва́льне, ра́достно имену́ем,/ я́ко су́ща обое́ тебе́ сама́го Бо́гу я́ко всенепоро́чное заколе́ние/ всесоже́г о́гненным муче́нием./ Его́же моли́ спасти́ чту́щия при́сно/ всесла́вную па́мять твою́.

Сла́ва, и ны́не, Богоро́дичен:

Ту́чами Ду́ха Пресвята́го,/ Пречи́стая, мою́ мысль ороси́,/ Я́же ка́плю ро́ждшая, Христа́, неизче́тно,/ безме́рная беззако́ния челове́ков щедро́тами измы́вшую;/ изсуши́ исто́чник страсте́й мои́х/ и пото́ка ми сподо́би сла́дости жи́зни/ при́сно моли́твами Твои́ми.

Крестобогоро́дичен:

А́гнца и Па́стыря, Ти на Дре́ве я́ко ви́де,/ А́гница ро́ждшая рыда́ше/ и ма́терски Тебе́ веща́ше:/ Сы́не возжеле́нне,/ ка́ко на Дре́ве Кре́стнем пове́шен еси́, Долготерпели́ве?/ ка́ко ру́це и но́зе Твои́, Сло́ве, пригвозди́шася от беззако́нных,/ и Кровь Твою́ излия́л еси́, Влады́ко?

Тропа́рь проро́ка Авди́я, глас 2:

Проро́ка Твоего́ Авди́я па́мять, Го́споди, пра́зднующе,/ тем Тя мо́лим,/ спаси́ ду́ши на́ша.

Тропа́рь му́ченика, глас 4:

Му́ченик Тво́й, Го́споди, Варлаа́м/ во страда́нии свое́м ве́нец прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

На У́трени

Кано́н Окто́иха еди́н и святы́х два. Кано́н проро́ка, его́же краегране́сие: Прозорли́ваго Авди́я пою́ сла́ву. Феофа́ново. Глас 5.

Песнь 1

Ирмо́с:Спаси́телю Бо́гу,/ в мо́ри лю́ди немо́крыми нога́ми наста́вльшему/ и фарао́на со всево́инством пото́пльшему,/ Тому́ еди́ному пои́м, я́ко просла́вися.

Спаси́телю Бо́гу, проро́чески предстоя́ ны́не,/ со дерзнове́нием моля́ся/ свеща́тельными луча́ми просвеща́ти,/ ве́рою, Богодохнове́нне, тя блажа́щия.

Иже́ вся я́ве прозна́тельно зряй,/ твоего́ се́рдца нему́тное, и чи́стое, и светоза́рное, блаже́нне, ви́дя,/ проро́ка Богоприя́тна тя поставля́ет.

Виде́ния ви́дев и́стинно, от Бо́га те́бе изъявля́емая,/ пропове́дал еси́ злоче́стие бра́тий, и па́губу лю́тую,/ и тех пра́ведное, блаже́нне, искорене́ние.

Богоро́дичен: Спа́сшиися Твои́м, Богороди́тельнице Чи́стая, безсе́менным Рождество́м,/ мо́лим Тя:/ мирски́я напа́сти изба́ви ны,/ согла́сно зову́щия песнь побе́дную.

Ин кано́н му́ченика, его́же краегране́сие: Терпели́выя твоя́, Варлаа́ме, пою́ боле́зни. Феофа́ново. Глас 4.

Песнь 1

Ирмо́с:Воспо́ю Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы иси́лу.

Твоего́ страда́ния светлостьми́ озаря́емь,/ нас, ве́рою чту́щих па́мять твою́,/ соблюди́, Варлаа́ме, моли́твами твои́ми.

Огнь угаси́вый нече́стия/ Богоче́стия изве́стно огне́м Богодохнове́нным,/ да почти́тся песнопе́ньми Варлаа́м чу́дный.

О благоче́стии подвиза́вся, венчено́сче Варлаа́ме,/ венце́м сла́вы ны́не досто́йно почествова́лся еси́/ десни́цею Вседержи́телевою.

Кре́пость тебе́ дарова́ Влады́ка на разли́чныя ра́ны, всеблаже́нне му́чениче,/ сего́ ра́ди победи́л еси́ безбо́жных свире́пство.

Богоро́дичен: Ле́ствица яви́лася еси́ Небе́сная,/ е́юже сни́де к нам Сло́во, Де́во,/ ю́же дре́вле прови́де Иа́ков, пра́отец Твой.

Песнь 3

Ирмо́с:Си́лою Кре́ста Твоего́, Христе́,/ утверди́ мое́ помышле́ние/ во е́же пе́ти и сла́вити/ спаси́тельное Твое́ Вознесе́ние.

Вод та́инственных река́,/ из пучи́ны происходя́ даро́в Ду́ха,/ Боговеща́телю, был еси́.

Хоте́нием и Про́мыслом Бо́жиим/ провозвеща́ти бу́дущая предложи́лся еси́, достосла́вне.

Просвеща́емь Боже́ственным све́том и Небе́сным,/ провозвести́л еси́ бу́дущее язы́ком спасе́ние, всеблаже́нне.

Богоро́дичен: Всели́ся Сло́во в Тя, Де́во Ма́ти,/ спаса́ет же, Богоро́дицу, му́дрствующия Тя/ хода́тайством Твои́м, Всенепорочная.

Ин

Ирмо́с:Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Весь пло́тский сою́з/ и сочета́ние твои́х удо́в разреша́шеся,/ но кре́пость соблюде́ся твоея́ души́ нерасте́рзана.

Стремле́ние благомо́щно претерпе́л еси́,/ стру́жущих твоя́ ре́бра, всеблаже́нне,/ терпе́ние ю́ношеское кре́пко показа́в.

Кто твое́ кре́пкое и си́льное/ и по́мысла неужа́сное мудрова́ние/ похвала́ми похва́лит по досто́инству, всеблаже́нне?

Богоро́дичен: Уста́вися тля сме́рти во Ипоста́сной пло́тию Жи́зни, Пречи́стая,/ челове́ком я́вльшейся из чре́ва Твоего́, Богоневе́стная.

Седа́лен проро́ка, глас 1.

Подо́бен: Гроб Твой, Спа́се:

Вели́кий Авди́й, Боже́ственными сия́нии ум светови́дный стяжа́в,/ сказу́ет бу́дущая, Ду́хом Святы́м веща́я./ Сего́ днесь благочестивому́дренно чту́ще,/ соверша́ем свяще́нную его́ па́мять, сердца́ просвеща́ющую.

Сла́ва, му́ченика, глас 4.

Подо́бен: Вознесы́йся:

Пла́мень нече́стия угаси́в/ и росо́ю Богозна́ния вжег ве́рных сердца́,/ ны́не да почти́тся ве́рно Варлаа́м сла́вный пе́сньми Боже́ственными./ Сей бо посрами́ и́дольскую лесть/ и, побе́дный вене́ц взем,/ всем про́сит грехо́в оставле́ния.

И ны́не, Богоро́дичен:

И́же на Престо́ле Херуви́мстем седя́й,/ и в не́дрех О́тчих пребыва́яй,/ я́ко на престо́ле святе́м седи́т Свое́м, Влады́чице, в не́дрех Твои́х:/ вопло́щся бо, Бог вои́стинну воцари́ся над все́ми язы́ки,/ и разу́мно ны́не пои́м Ему́./ Его́же умоли́ спасти́ся рабо́м Твои́м.

Крестобогоро́дичен:

Из Безнача́льнаго Отца́ рожде́ннаго,/ напосле́док Тя пло́тию ро́ждшая,/ на Кресте́ ви́сяща зря́щи, Христе́,/ увы́ Мне́, любе́знейший Иисусе́, вопия́ше:/ ка́ко, сла́вимый я́ко Бог от А́нгел,/ от беззако́нных ны́не челове́к, Сы́не, хотя́ распина́ешися?/ Пою́ Тя, Долготерпели́ве.

Песнь 4

Ирмо́с:Услы́шах слух си́лы Креста́,/ я́ко рай отве́рзеся им,/ и возопи́х:/ сла́ва си́ле Твое́й, Го́споди.

Проро́чества благода́ть, от страсте́й я́ко предъочи́стив твою́ ду́шу,/ Ду́хом Святы́м прие́мь, возопи́л еси́:/ сла́ва си́ле Твое́й, Го́споди.

Проро́к Авди́й, заре́ю светода́тельныя мо́лнии озаря́емь,/ просвети́ нас зва́ти Тебе́:/ сла́ва си́ле Твое́й, Го́споди.

Невестокраси́тель яви́лся еси́, всеблаже́нне, церко́вный,/ от Сио́на пропове́дав Спа́са изы́ти, Ему́же зове́м:/ сла́ва си́ле Твое́й, Го́споди.

Богоро́дичен: Собезнача́льное и соприсносу́щное Сло́во Отчее родила́ еси́, Чи́стая,/ Боголе́пно, Ему́же зове́м:/ сла́ва си́ле Твое́й, Го́споди.

Ин

Ирмо́с:Твоего́ на земли́ явле́ния, Христе́ Бо́же,/ пропове́дая проро́к прише́ствие,/ с весе́лием вопия́ше:/ сла́ва си́ле Твое́й, Го́споди.

Вити́йское буесло́вие отри́нув,/ уче́ние же апо́стольское прие́м и́стинное, сла́вне,/ свиде́тель и́стинный был еси́.

О Христе́ да́же до сме́рти, терпеливоду́шне,/ огню́ и му́кам проти́вился еси́, велегла́сно поя́:/ сла́ва си́ле Твое́й, Го́споди.

Си́льнейшим преусе́рдием, всеблаже́нне, обдержи́мь,/ пре́лесть попра́л еси́ Богому́дренно, пой:/ сла́ва си́ле Твое́й, Го́споди.

Богоро́дичен: Вопло́щся от Де́вы,/ Безпло́тный на зе́млю к челове́ком прии́де./ Те́мже ве́рою зове́м:/ сла́ва си́ле Твое́й, Го́споди.

Песнь 5

Ирмо́с:У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве бо Тебе́, ино́го незна́ем.

У́треневав ко Го́споду,/ прия́л еси́ с Небесе́ дар Ду́ха Пресвята́го, всехва́льне.

Спомо́щника, житие́ Боже́ственное стяжа́в,/ ви́дети сподо́бился еси́,/ неви́димо разумева́емаго.

Возсия́ тебе́ свет, всеблаже́нне, я́ко проро́ку,/ и того́ супру́жница тебе́ весе́лие дарова́ся.

Богоро́дичен: Хоте́нием вся́ческая, Пречи́стая, сотвори́вый,/ из Тебе́ созда́ся е́же по нам Пребоже́ственный.

Ин

Ирмо́с:Возсия́вый свет,/ и просвети́вый у́тро,/ и показа́вый день,/ сла́ва Тебе́, сла́ва Тебе́,/ Иису́се, Сы́не Бо́жий.

Показа́вый нам Свои́х Страсте́й свиде́теля, вопию́ща:/ сла́ва Тебе́, сла́ва Тебе́, Иису́се, Сы́не Бо́жий.

Терпе́нию твоему́ мно́гому/ мзда и побе́ды вене́ц исплете́ся,/ сла́ва Тебе́, сла́ва Тебе́, зову́щу,/ Иису́се, Сы́не Бо́жий.

Стре́лы глаго́л твои́х в сердца́ вра́жия вонзи́л еси́, зовы́й:/ сла́ва Тебе́, сла́ва Тебе́, Иису́се, Сы́не Бо́жий.

Богоро́дичен: Святу́ю го́ру, Чи́стая,/ и я́ко ски́нию Высоча́йшаго му́дрствующе Тя, Де́во,/ сла́ва Тебе́, зове́м, Богоро́дице, на́ше упова́ние.

Песнь 6

Ирмо́с:Обы́де мя бе́здна,/ гроб мне кит бысть,/ аз же возопи́х Тебе́, Человеколю́бцу,/ и спасе́ мя десни́ца Твоя́, Го́споди.

Си́лою Ду́ха Боже́ственнаго зрел еси́, проро́че, бу́дущая,/ о́бразы прие́мля Боже́ственных явле́ний,/ я́ко в зерца́ле, души́ све́тлостию.

Умоли́ Го́спода, проро́че всеблаже́нне, моли́твами твои́ми/ ве́рою соверша́ющим па́мять твою́/ прося́ прегреше́ний дарова́ти проще́ние.

Уми́лостивися рабо́м Твои́м/ и сим прегреше́ний проще́ние пода́ждь, Человеколю́бче,/ име́яй моля́щаго Тя Твоего́ проро́ка,/ ми́ру Тебе́ провозвести́вшаго.

Богоро́дичен: Вся́ческая нося́й сло́вом, Боже́ственною си́лою,/ объя́тии Твои́ми но́сится, Неискусобра́чная,/ Его́же ны́не моли́ спасти́ся душа́м на́шим.

Ин

Ирмо́с:Возопи́, прообразу́я погребе́ниетридне́вное,/ проро́к Ио́на в ки́те, моля́ся:/ от тли изба́ви мя, Иису́се, Царю́ сил.

Да бию́тся десни́цею разжже́ною ли́ца де́монская,/ сердца́ же ве́рных да взыгра́ются/ и Безпло́тных ли́цы све́тло да веселя́тся.

Украша́ются до́брых твои́х по́двиг побе́ды и одоле́ния,/ и страда́льческая зря́щих натрижне́ния,/ перворожде́нных избра́нное и светоно́сное торжество́.

Воста́ните, до́брии ны́не живопи́сцы,/ му́ченика о́браз ва́шими благохи́тростьми украси́те,/ подвигополо́жника я́вственно в нем начерта́юще.

Богоро́дичен: Весели́тся о Тебе́, Богома́ти Всепе́тая, прама́ти,/ дре́вния кля́твы Рождество́м Твои́м изба́вльшися/ и сме́ртнаго го́рькаго осужде́ния.

Конда́к му́ченика, глас 4.

Подо́бен: Яви́лся еси́:

Яви́лся еси́, преудивле́н кре́постию всесожже́ния,/ лива́н благово́нен, себе́ прине́сл еси́ же́ртву Христу́,/ и, вене́ц по́чести прии́м, Варлаа́ме,/ при́сно моли́ за ны, страда́льче.

Песнь 7

Ирмо́с:В пещи́ о́гненней песносло́вцы спасы́й о́троки,/ благослове́н Бог оте́ц на́ших.

Преесте́ственна и́стинно проро́к Твои́х сла́ва,/ благослове́нный Бо́же оте́ц на́ших.

С Бо́гом обита́ти сподо́бився, воспева́еши:/ благослове́н Бог оте́ц на́ших.

Во проро́цех Твои́х Боже́ственную благода́ть Твою́ явля́еши,/ благослове́нный Бо́же оте́ц на́ших.

Богоро́дичен: Изба́вленнии Твои́м Рождество́м, Пречи́стая Де́во, песнопое́м:/ благослове́н Бог оте́ц на́ших

Ин

Ирмо́с:Оте́ц на́ших Бо́же, не посрами́ нас, но да́руй нам со дерзнове́нием вопи́ти Тебе́:/ благослове́н еси́, Бо́же оте́ц на́ших.

С му́ченическими ли́ки, я́ко непобеди́м му́ченик,/ сподо́бился еси́ Христу́ велегла́сно зва́ти:/ благослове́н Бог оте́ц на́ших.

Со свеща́ми све́тлыми в Боже́ственный черто́г вшел еси́,/ Христу́, великому́чениче, зовя́:/ благослове́н Бог оте́ц на́ших.

Крепча́йшу огня́ десни́цу стяжа́в,/ предста́тель десны́й твоему́ Влады́це, зове́ши:/ благослове́н Бог оте́ц на́ших.

Богоро́дичен: Изба́вленнии Твои́м Пречи́стым Рождество́м,/ пое́м Тя, ве́рнии, непреста́нно зову́ще:/ благослове́н, Пречи́стая, Плод чре́ва Твоего́.

Песнь 8

Ирмо́с:Из Отца́ пре́жде век рожде́ннаго Сы́на и Бо́га/ и в после́дняя ле́та воплоще́ннаго от Де́вы Ма́тере,/ свяще́нницы, по́йте,/ лю́дие, превозноси́те во вся ве́ки.

От Бо́га просве́щшеся,/ проро́цы провозвеща́ют бу́дущих зна́ние,/ Богому́дренно взыва́юще:/ свяще́нницы, по́йте,/ лю́дие, превозноси́те во вся ве́ки.

Я́коже заря́ в пучи́не,/ во тьме су́щия просвети́л еси́, Боже́ственными луча́ми, Боговеща́телю,/ озаря́ем, зовы́й:/ свяще́нницы, по́йте,/ лю́дие, превозноси́те во вся ве́ки.

Богоро́дичен: По Боже́ственному существу́ Отцу́ Твоему́ Единосу́щне/ и нам единоесте́ствен яви́лся еси́,/ воплоти́вся от неискусому́жныя Ма́тере./ Те́мже Тя пое́м, Христе́,/ и благослови́м во вся ве́ки.

Ин

Ирмо́с:Вся дела́ Бо́жия и вся тварь, благослови́те Го́спода,/ преподо́бнии и смире́ннии се́рдцем, по́йте Его́/ и превозноси́те во вся ве́ки.

Все низложи́л еси́ вра́жие всеору́жие, Варлаа́ме достосла́вне,/ попали́л еси́ и́дольскую лесть, зовы́й:/ Тя превозно́сим, Христе́, во ве́ки.

Укра́шен благоле́пно,/ Христу́ предста́л еси́, страда́льче приснопа́мятне,/ кро́вию му́ченическою очервле́ну нося́ багряни́цу/ и Влады́ку поя́ во ве́ки.

Благоче́стия огне́м разжже́н,/ я́ко те́рние, попали́л еси́ вся де́монская мечта́ния, зовы́й:/ Тя превозно́сим, Христе́, во ве́ки.

Богоро́дичен: Благословя́щии Тя ве́рно от Го́спода благословля́ются, Всенепоро́чная:/ ражда́еши бо благословя́щаго тварь Влады́ку,/ Его́же превозно́сим, Чи́стая, во вся ве́ки.

Песнь 9

Ирмо́с:Тя, па́че ума́ и словесе́ Ма́терь Бо́жию,/ в ле́то Безле́тнаго неизрече́нно ро́ждшую,/ ве́рнии, единому́дренно велича́ем.

Сло́вом Боже́ственным и дея́нием украша́емь/ впери́вся Ду́хом, проро́че чу́дный,/ бу́дущая зре́ти сподо́бился еси́.

Иде́же проро́честии ли́цы вселя́емь и святы́х све́тлости,/ моли́ Го́спода спасти́ ве́рою благохва́лящия тя, сла́вне.

Весь Бо́гу те́пле прилежа́,/ чи́сто бесе́довал еси́ Боже́ственными явле́нии,/ и́хже и ны́не наслажда́ешися, всеблаже́нне.

Богоро́дичен: Тя, Све́та свети́льник, пое́м, Чи́стая,/ Тя, и скрижа́ль благода́ти,/ Сло́во воплоще́нное прие́мшу, ве́дяще, велича́ем.

Ин

Ирмо́с:Ка́мень нерукосе́чныи́/ от несеко́мыя горы́, Тебе́, Де́во,/ краеуго́льныи́ отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Зако́н похвале́ний побежда́ется подвиго́в твои́х вели́чеством,/ еди́н Влады́ка Христо́с тя сла́вити весть Божественною све́тлостию:/ Его́же приле́жно моли́ о ве́рою воспева́ющих тя.

Всего́ тебе́ сама́го Го́споду же́ртву жи́ву прине́с,/ весь Того́ Ца́рствия сонасле́дник яви́лся еси́ и прича́стник/ и с Ним, ра́дуяся, ны́не ца́рствуеши, приснопа́мятне.

За Твою́, Спа́се, любо́вь кро́вию да́же и до сме́рти,/ мечу́, и огню́, и му́кам Боже́ственный му́ченик противоополчи́вся,/ е́же у тебе́, Человеколю́бче, безсме́ртие прие́м,/ наслажда́ется.

Богоро́дичен: Тя, Засту́пницу Ми́ра и Богома́терь Де́ву,/ все́я жи́зни моея́ предста́тельницу и спасе́ние, ра́дуяся, предлага́ю:/ Ты бо, Бо́га ро́ждшая,/ спаса́ти мо́жеши пою́щия Тя.

Свети́лен.

Подо́бен: Ученико́м зря́щим:

Авди́е проро́че,/ лику́й и весели́ся,/ твои́х глаго́л зря сбытие́./ Те́мже, Тро́ице предстоя́,/ соверша́ющия светоно́сную твою́ па́мять помяни́ и тебе́ чту́щия, всеблаже́нне.

Богоро́дичен: Из пречи́стых чресл Твои́х проше́дшаго Бо́га Сло́ва неизрече́нно,/ Де́во Ма́ти, ви́дящи распина́ема, взыва́ла еси́:/ сла́ва неизрече́нному Твое́му строе́нию, Спа́се Мой,/ и́мже мир Твой спаса́еши.

Ве́чер

На Го́споди, воззва́х: стихи́ры на 6, глас 6.

Подо́бен: Все отло́жше:

От ко́рене ца́рска прекра́сна ветвь израсте́,/ благоуха́нный крин,/ блаже́нный царь Иоаса́ф,/ и́же наказа́нием духо́внаго наста́вника/ возжеле́ ви́дети безце́нный би́сер,/ позна́ в Тро́ице сла́вимаго Бо́га/ и Того́ за́поведей де́латель изря́ден показа́ся;/ и ны́не, в Вы́шних ликовству́я,/ мо́лится о душа́х на́ших.

Просвеще́нный душе́ю, Варлаа́м/ царю́ Иоаса́фу глаго́лаше:/ позна́л еси́ Бо́га Творца́ всех,/ Той да просвети́т твоя́ о́чи серде́чныя/ и даст ти дух му́дрости и ра́зума,/ да уве́дати и́маши,/ что есть наде́жда зва́ния Его́,/ я́ко напосле́док и роди́телю твоему́ ко спасе́нию наста́вник бу́деши./ Аз же не и́мам оста́ти зде,/ но отхожду́ в путь мой,/ Бо́га наста́вника име́я,/ возводя́щаго мя ко спасе́нию.

Услы́шав до́блественный царь Иоаса́ф о разлуче́нии словеса́,/ распали́вся душе́ю,/ лице́ свое́ слеза́ми облива́я, глаго́лаше:/ ты, учи́телю духо́вный,/ всех благи́х мои́х хода́таю,/ па́ки ли оста́вити мя в ми́ре сем хо́щеши?/ Кто ми соверши́т твой чин учи́тельства?/ Кто ми бу́дет наста́вник ко спасе́нию?/ Ты мене́ к Бо́гу приве́л еси́/ и в чину́ сыно́вне наста́вника наста́вил еси́,/ и тобо́ю наде́юся/ от Христа́ прия́ти ве́лию ми́лость.

Сла́ва, глас 6:

Зарда́ну изве́стно уве́девшу/ ко о́троку учи́телево прилежа́ние/ и ко Христу́ обраще́ние,/ мно́ги ско́рби испо́лнися душа́ его́,/ зе́льную боле́знь себе́ притвори́;/ ни сим возмо́же утаи́тися,/ подро́бну царю́ вся испове́дая,/ и́мя Варлаа́мово нари́чет:/ той, рече́, прельсти́ сы́на твоего́./ Царь же, я́ко лев, от я́рости возреве́,/ вма́ле сме́рти не вкуси́,/ Иоаса́фу же безпреста́ни моля́щуся,/ призыва́я Спа́са душ на́ших.

И ны́не, Богоро́дичен: Кто Тебе́ не ублажи́т:

Вход. Проки́мен дне. Чте́ния 3, преподо́бническая (зри Мине́ю ноября́ 23-й день).

На стихо́вне стихи́ры, глас 8.

Подо́бен: О, пресла́внаго чудесе́!

Царю́ Авени́ру к сы́ну глаго́лющу:/ возлю́бленное мое́ ча́до,/ честь бого́в на́ших оста́вил еси́,/ чужде́му же Бо́гу служи́ти изво́лил еси́./ Вску́ю, ча́до мое́, та́ко сотвори́л еси́?/ аз, любо́вию воспитава́я тя,/ наде́яхся прее́мника бы́ти ца́рствия моего́,/ ты же, ча́до мое́, та́ко сотвори́л еси́,/ Галилея́нину после́довав.

Стих: Восхва́лятся преподо́бнии во сла́ве/ и возра́дуются на ло́жах свои́х.

Аз отверго́хся де́монския тьмы,/ и к све́ту притеко́х Богоразу́мия,/ и́дольскую пре́лесть оста́вив,/ и ко и́стине прибли́жихся,/ и Христу́ рабо́тати изво́лих:/ Той бо на́ше осужде́ние дре́внее разруши́,/ и естество́ на́ше на Небеса́ вознесе́,/ и Ца́рство Небе́сное обеща́ всем/ лю́бящим Его́ вои́стинну.

Стих: Мно́ги ско́рби пра́ведным,/ и от всех их изба́вит я Госпо́дь.

Царю́ я́ростию и преще́нием/ свята́го о́трока устраши́ти хотя́щу, прирече́:/ мно́гим му́кам преда́м тебе́,/ и зло́ю сме́ртию уморю́ тя,/ и ктому́ сы́на тебе́ не нареку́,/ но я́ко врага́ и отсту́пника;/ и та́ко прети́в, со гне́вом отъи́де./ Иоаса́ф же, в пала́ту вшед, безпреста́ни Бо́гу моля́шеся.

Сла́ва, глас 8. Самогла́сен:

В моли́тве свое́й Иоаса́ф царь глаго́лаше:/ Го́споди Бо́же мой,/ сла́дкая наде́ждо, нело́жное обеща́ние,/ тве́рдое прибе́жище на Тя наде́ющимся,/ укрепи́ мя во Твое́м благо́м испове́дании/ до коне́чнаго ми бы́ти издыха́ния:/ воспали́ся бо душа́ моя́ вели́кою к Тебе́ любо́вию./ Те́мже даждь ми во всей мое́й жи́зни/ за и́мя Твое́ и за Твое́ испове́дание вся страда́ти/ и всего́ мене́ Тебе́ пожре́ти:/ я́ко еди́н еси́ Побо́рник непобеди́мый/ и Бог ми́лостивый.

И ны́н е, Богоро́дичен: Безневе́стная Де́во:

Тропа́рь, глас 1:

От духо́внаго наста́вника научи́вся,/ царю́ Иоаса́фе, Бо́га позна́ти,/ Креще́нием же просвети́вся,/ лю́ди к ве́ре обрати́л еси́,/ и отцу́ твоему́ от купе́ли прие́мник быв,/ ца́рство оста́вив, пусты́ню дости́гл еси́/ и в ней трудолю́бне подвиза́лся еси́./ Моли́ Христа́ Бо́га со учи́телем твои́м Варлаа́мом/ спасти́ся душа́м на́шим

Сла́ва, и ны́не, Богоро́дичен воскре́сен.

На У́трени

По 1-м стихосло́вии седа́лен, глас 8.

Подо́бен: Прему́дрости:

Царь Авени́р, прие́м сове́т от Арахи́я, дру́га своего́,/ нача́т Иоаса́фа ласка́тельными и ти́хими словесы́,/ объима́я его и целу́я, прельща́ти, глаго́ля:/ о ча́до мое́ вожделе́нное!/ Почестви́ отца́ твоего́ седи́ны/ и, моея́ послу́шав мольбы́, принеси́ же́ртву бого́м:/ та́ко бо о́нех ми́лость получи́ши, и долготу́ дний,/ и сла́ву вся́кую, и ца́рство безвре́дно,/ и вся́ческих благ прича́стие от них прии́меши.

Сла́ва, глас 8.

Подо́бен: Прему́дрости:

Страстны́й мрак очи́стив/ и Христо́ва повеле́ния я́ко вои́стину свет прии́м,/ в посте́ просия́л еси́/ и, умертви́в те́ло, ду́хом о́жил еси́,/ вра́жия се́ти попра́в, блаже́нне,/ тем и Вы́шних Безпло́тных слуг соприча́стник бысть Ду́ха благода́тию,/ Иоаса́фе о́тче наш, моли́ Христа́ Бо́га/ согреше́нием оставле́ние дарова́ти/ пра́зднующим любо́вию святу́ю па́мять твою́.

И ны́не, Богоро́дичен:

Пречи́стая Де́во, Ма́ти Бо́жия,/ души́ моея́ стра́сти лю́тыя исцели́, молю́ся,/ и проще́ние да́руй мои́х прегреше́ний,/ я́же безу́мне соде́ях, ду́шу и те́ло оскверни́в, окая́нный./ Увы́ мне, что сотворю́ в час он,/ внегда́ А́нгели ду́шу мою́ разлуча́т от страстна́го моего́ телесе́?/ Тогда́ Помо́щница мне бу́ди и Предста́тельница тепле́йшая:/ Тебе́ бо и́мам наде́жду, раб Твой.

По 2-м стихосло́вии седа́лен, глас 5.

Подо́бен: Собезнача́льное Сло́во:

Иоаса́ф ко отцу́ глаго́лаше:/ несть пра́ведно отца́ своего́ седи́ны чествова́ти,/ и́стиннаго же Бо́га безче́ствовати,/ ниже́ досто́йно, оста́вя Творца́ всей тва́ри,/ и́долом же́ртвы приноси́ти,/ но подоба́ет и́стиннаго Бо́га чествова́ти/ и Тому́ еди́ному же́ртву приноси́ти.

Сла́ва, и ны́не, Богоро́дичен:

Себе́ пре́жде Суда́ ны́не пла́чу,/ помышля́я моя́ дела́ лука́вая и лю́тая,/ и прегреше́ний глубину́, одержа́щую мя от ю́ности и подавля́ющу ум;/ но Твои́м, Чи́стая, предста́тельством оставле́ние ми пода́ждь/ и спасе́ние улучи́ти сподо́би.

По Хвали́те И́мя Госпо́дне:

Припе́в: Ублажа́ем тя,/ преподо́бне о́тче Иоаса́фе,/ и чтим боле́зни и труды́ твоя́,/ и́миже труди́лся еси́/ во испове́дании Христо́ве.

Псало́м избра́нный: Блаже́н муж, боя́йся Го́спода:

По полиеле́и седа́лен, глас 3:

Не престая́ше у́бо Авени́р о прельще́нии сы́на своего́ промышля́ти,/ собра́в вити́и на состяза́ние, рече́ им:/ а́ще ве́ру на́шу утвердите́,/ Христиа́нскую же ве́ру низложите́, просла́витеся;/ а́ще же победите́ся, то умертвите́ся./ Подо́бне рече́ и Иоаса́ф к Нахо́ру, нарица́ющуся Варлаа́му:/ а́ще ле́стныя вити́и победи́ши, просла́вишися;/ а́ще же побежде́н бу́деши, се́рдце и язы́к твой рука́ми изъе́м,/ псом в снедь с про́чими у́ды преда́м сия́./ Да, тя ви́дяще, устраша́тся вси/ не прельща́ти сыно́в царе́вых.

Сла́ва, и ны́не, Богоро́дичен:

Те́плая Засту́пнице, наде́жда тве́рдая,/ стено́, и покро́ве, и приста́нище прибега́ющих к Тебе́,/ Присноде́во Чи́стая, необурева́емое,/ Сы́на Твоего́ и Бо́га моли́/ мир пода́ти ми́ру, и спасе́ние,/ и ве́лию и бога́тую ми́лость.

Та́же степе́нна, 1-й антифо́н 4-го гла́са.

Проки́мен, глас 4: Пра́ведник, я́ко фи́никс, процвете́т/ и, я́ко кедр, и́же в Лива́не, умно́жится. Стих: Насажде́ни в дому́ Госпо́дни,/ во дво́рех до́му Бо́га на́шего процвету́т. Вся́кое дыха́ние: Стих: Хвали́те Бо́га во святы́х Его́: Ева́нгелие от Матфе́я, зача́ло 11.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х:/ тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́;/ дерзнове́ние име́я ко Христу́ Бо́гу,/ мир испроси́ душа́м на́шим.

Кано́н Богородице, со ирмосо́м на 6, и Иоаса́фу на 8, глас 8. Царю́ Иоаса́фу пе́ние моле́бное приношу́.

Песнь 1

Ирмо́с:Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре,/ пои́м Ему́/ я́ко Изба́вителю на́шему Бо́гу, я́ко просла́вися.

Царе́вы глаго́лы слы́шав, Нахо́р зело́ вострепета́:/ вме́сто бо развраще́ния изрече́ благослове́ние,/ облича́я иуде́и и е́ллины,/ пропове́дая же на земли́ Христо́во прише́ствие,/ я́ко просла́вися.

Рече́ния Нахо́р о зако́не изложи́,/ вити́и же и жерцы́ посрами́шася/ и я́ко безгла́сни обрето́шася,/ царю́ же Иоаса́фу душе́ю веселя́щуся и сла́вящу Бо́га Небе́снаго,/ я́ко просла́вися.

Иоаса́ф царь к Нахо́ру рече́:/ благода́ть ти испове́дую,/ я́ко по и́стине побо́рник был еси́,/ и а́ще Христа́ возлю́биши, жизнь насле́диши:/ обраща́ющимся бо к Нему́ отверза́ет врата́ Небе́сная.

Богоро́дичен: А́ще и недосто́йне принесо́х ти таково́е слове́с изви́тие,/ Богому́дрый царю́ Иоаса́фе,/ приими́ сия́ с любо́вию и принеси́ к Богома́тери моле́ние за мя,/ да ми́лость обря́щу в день Стра́шнаго испыта́ния.

Катава́сия:Отве́рзу уста́ моя́:

Песнь 3

Ирмо́с:Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,/ возвесели́хся о спасе́нии Твое́м.

Словесы́ любе́зными царь Нахо́ра наказа́в,/ он же с пла́чем и ра́достию пусты́ню дости́же,/ на ве́ру обрати́ся и Креще́нием просвети́ся,/ и, вме́сто волка́, овча́ Христо́во обре́теся.

Фе́вда к царю́ Авени́ру глаго́лаше:/ не убо́йся, царю́, Галиле́йских мудре́ц:/ си́и бо ско́ро испаду́т, не и́мут пред лице́м мои́м ста́ти,/ ни слове́с проти́вных глаго́лати.

Предста́виша отрокови́цы укра́шены царе́ву сы́ну на послуже́ние,/ да прельстя́т пра́веднаго о́трока;/ о́н же, а́ще и разжже́ние в се́рдце плотско́е прии́м,/ моли́твою же и поще́нием от се́ти о́ныя изба́влен бысть.

Богоро́дичен: Напа́стьми мно́гими одержи́мь,/ из глубины́ се́рдца вопию́ Ти:/ Влады́чице, изба́ви мя, непотре́бнаго раба́ Твоего́, лю́тых обстоя́ний/ и тишину́ пода́ждь се́рдцу моему́.

Седа́лен, глас 3:

Чи́стая и непоро́чная душа́ Боже́ственнаго о́трока/ ополче́ния вра́жия не устраши́ся,/ на по́двиг му́жески укрепля́яся, свы́ше избавле́ния прося́,/ да не оскверни́т оде́жды, ю́же от свята́го Креще́ния прия́т,/ да полу́чит красоту́ и сла́ву Христо́ву.

Сла́ва, и ны́не, Богоро́дичен:

Ки́йждо иде́же спаса́ется, та́мо пра́ведно и притека́ет;/ и ко́е ино́е таково́е прибе́жище,/ я́ко Ты, Богоро́дице, покрыва́ющее ду́ши на́ша?

Песнь 4

Ирмо́с:Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог./ Сла́ва си́ле Твое́й, сла́ва снизхожде́нию Твоему́.

Егда́ посто́м и моли́твою те́ло свое́ удручи́,/ зрит во сне па́жить прекра́сну/ и гра́да красоту́ недомы́сленну,/ во еди́ном у́гле жела́ет пребыва́ния, и глас слы́шит:/ подвиза́ющимся сия́ угото́вашася.

Мину́в места́ о́на све́тлая,/ зрит ме́сто, тьмы испо́лнено,/ и пещь, стра́шным пла́менем шумя́щую, и гла́су глася́щу:/ сие́ муче́ние гре́шником, де́лы скве́рными себе́ оскверни́вшим.

Лежа́ на одре́, убуди́вся от виде́ния,/ сле́зы, а́ки ре́ки, испуща́ше,/ и весь стра́хом объя́т быв и в себе́ разсужда́я:/ ка́ко све́тло пра́ведным воздая́ние и гре́шным стра́шно муче́ние?/ и вопия́ Христу́: сла́ва си́ле Твое́й, Го́споди.

Богоро́дичен: Бо́га на руку́ носи́вши, вся́ческая руко́ю Содержа́щаго,/ о Де́во Всеблагослове́нная!/ Того́, Де́ва, роди́вши, и по рождестве́ па́ки Де́ва пребыла́ еси́.

Песнь 5

Ирмо́с:Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́, ино́го не ве́мы,/ и́мя Твое имену́ем.

Не здра́вствует твой сын, пове́даше царю́;/ он же ско́ро притече́ и уми́льно вопроша́ше:/ что ти бысть, сы́не мой люби́мый, уте́хо ста́рости моея́?/ что та́ко лежи́ши на одре́ твое́м, ни ма́ло к кому́ бесе́дуя?

Препя́л еси́ сеть нога́м мои́м:/ вма́ле всели́лася бы во ад душа́ моя́,/ а́ще не Госпо́дь помо́гл бы ми/ и показа́ мне путь ко спасе́нию,/ и ктому́ не возмо́гл бы еси́ мене́ ви́дети жи́ва/ и сы́на себе́ именова́ти.

Рыда́ние и печа́ль с го́рьким пла́чем сплета́ше царь,/ неутоли́м мяте́ж име́яше, рече́ в себе́:/ ча́до, не то́кмо бого́в отступле́ния,/ но и живота́ твоего́ отрица́ешися.

Богоро́дичен: Неизглаго́ланно заче́нши Бо́га,/ и па́че естества́ родила́ еси́:/ Сего́ моли́, Всенепоро́чная, растле́вша безме́стными дея́нии,/ поми́ловати мя за неизрече́нную ми́лость.

Песнь 6

Ирмо́с:Я́ко во́ды морски́я, Человеколю́бче,/ волна́ми жите́йскими обурева́юся./ Те́мже, я́ко Ио́на, та́ко вопию́ Ти:/ возведи́ от тли живо́т мои́, Благоутро́бне Го́споди.

Шу́яго стоя́ния изба́витися/ и десна́го стоя́ния сподо́битися жела́ти/ Иоаса́фу, та́ко и́стинствующу, и ничто́же чествова́ти па́че Христо́вы любве́:/ се бо и́стинная сла́дость, и весе́лие, и ве́чное пребыва́ние.

У́бо Фе́вда глаго́лаше:/ почто́ бого́в отступи́л еси́/ и отца́ царя́ прогне́вал еси́?/ Сего́ ра́ди от всех люде́й возненави́ден еси́./ Не бо́зи ли отца́ твоего́, моли́твы послу́шавше, тебе́ ему́ дарова́ша?

Возопи́ царь Иоаса́ф:/ о, заблужде́ния глубино́, Вавило́нское се́мя,/ столпотворе́ния вну́че, окая́нне чароде́ивый ста́рче!/ Почто́ укаря́еши спаси́тельную про́поведь Христо́ва прише́ствия,/ Его́же сла́вы Не́бо и вся земля́ испо́лнишася?

Богоро́дичен: Помози́, Влады́чице,/ и услы́ши глаго́л мой, Всенепоро́чная,/ его́же из глубины́ души́ приношу́ Ти,/ и разреше́ние долго́в пода́ждь ми.

Конда́к, глас 8:

Ве́дый твое́ из младе́нства благо́е изволе́ние, Иоаса́фе, еди́н сердцеве́дец Бог,/ и от ца́рствия земна́го в мона́шеское пребыва́ние приведы́й тя,/ вели́кому Варлаа́му после́довати сподо́би./ С ни́мже и ны́не го́рний Иерусали́м всесве́тлый оте́чество име́я,/ жела́емыя добро́ты красно́ наслажда́яся Святы́я Тро́ицы,/ мо́лим тя, ца́рская красото́,/ помина́й нас, ве́рою чту́щия тя.

И́кос:

Други́й, о́тче, яви́лся еси́ врач и предста́тель,/ неду́гом одержи́мых ско́рбию, Иоаса́фе чу́дне,/ исцеля́я вся ве́рныя, притека́ющия под Боже́ственный покро́в твой./ Тем и от нас слы́шиши:/ ра́дуйся, отца́ блага́го ко́реню,/ ра́дуйся, ма́тере благи́я ветвь,/ ра́дуйся, и́же тех любо́вь отри́нувый,/ ра́дуйся, и́же еди́наго Бо́га прие́мый,/ ра́дуйся, я́ко оста́вил еси́ на земли́ во́инство,/ ра́дуйся, я́ко низложи́л еси́ ва́рварскую горды́ню,/ ра́дуйся, стена́ и храни́тель ве́рных бы́вый,/ ра́дуйся, ору́жие и столп ми́ру я́влься,/ ра́дуйся, огне́м поже́г язы́чества,/ ра́дуйся, свети́льниче, сия́я чудесы́,/ ра́дуйся, наги́м мно́жицею покро́в,/ ра́дуйся, плене́нных изба́вителю,/ помина́й нас, ве́рою чту́щия тя.

Песнь 7

Ирмо́с:Халде́йская пещь, огне́м распала́емая,/ ороша́шеся Ду́хом,/ Бо́жиим предстоя́нием, о́троцы поя́ху:/ благослове́н еси́, Бо́же оте́ц на́ших.

Сла́ву же, и ца́рство, и о́бласть всю на́двое разде́льшему,/ о́ву себе́ оста́вль,/ о́ву же вруча́ет сы́ну, царя́ его́ поста́вив;/ кня́зи же мно́ги и страти́ги преда́в,/ любе́зно же и че́стно отпусти́ его́ на страну́ свою́.

Не про́сто к ца́рству идя́ше,/ но честны́й крест пред ним ноша́ху;/ вшед же во град,/ на всех столпе́х о́браз креста́ водружа́ше и ка́пища разоря́ше,/ прекра́сну це́рковь Влады́ки Христа́ воздви́же/ и всем собра́тися к ней повелева́ше;/ сам же приле́жно моля́шеся.

Христу́ ве́ровати вся подру́чныя уча́ше,/ изгна́нныя же отце́м епи́скопы, иере́и и мона́хи ра́достно срета́ше,/ и свои́ми рука́ми но́ги их омыва́ше,/ и вся́ко промышле́ние о них творя́ше; и усе́рдно взыва́ше:/ препросла́вленный Бо́же, благослове́н еси́.

Богоро́дичен: Дре́вле у́бо Иа́ков Тя преднаписа́;/ Иса́ия же, у́глем Ду́ха очи́щся,/ Бо́га Емману́ила от утро́бы Твоея́ роди́тися прозна́менова./ К Нему́же велегла́сно вопия́ше:/ оте́ц на́ших Бо́же, благослове́н еси́.

Песнь 8

Ирмо́с:Покрыва́яй вода́ми превы́спренняяСвоя́,/ полага́яй мо́рю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,/ я́ко Соде́телю всех во ве́ки.

У́бо Иоаса́фов дом растя́ше,/ Авени́ров же умаля́шеся,/ а́бие царь писа́нием сы́на призыва́ет,/ он же ско́ро прише́д, на ве́ру отца́ обрати́,/ и от купе́ли сему́ прие́мник быв, и возопи́ ра́достно:/ сла́влю Тя, Христе́, во ве́ки вся.

Бысть чу́до преди́вно:/ сын роди́телю своему́ отец яви́ся./ Окре́стныя страны́ просвеща́хуся, це́ркви созида́хуся,/ епи́скопи и иере́и же́ртву Бо́гу приноша́ху, песнь воспева́юще/ и сла́вяще Христа́ во ве́ки вся.

Госпо́днею благода́тию дарь Авени́р веселя́шеся,/ всю ца́рскую власть сы́ну предаде́,/ сам же в молча́нии пребыва́ше:/ в толи́ку глубину́ смире́ния вложи́ себе́,/ я́ко и дре́вних превзы́ти благове́рием,/ и сла́вяше Христа́ во ве́ки вся.

Богоро́дичен: Ины́я по́мощи не и́мамы, ра́зве Тебе́, Влады́чице:/ Ты кре́пость и утвержде́ние,/ Ты похвала́, и ра́дование, и храни́тельница ми́ра;/ к Тебе́ прибега́юще, спаса́емся вси.

Песнь 9

Ирмо́с:Тя, Неискусобра́чную Ма́терь Бо́гаВы́шняго,/ Тя, па́че ума́ ро́ждшую сло́вом вои́стинну Бо́га,/ вы́шшую Пречи́стых сил,/ немо́лчными славословле́нии велича́ем.

Мину́вшим днем не́киим по Креще́нии/ царь Авени́р а́бие в неду́г теле́сный впаде́,/ и егда́ нача́т приближа́тися коне́ц жития́ его́,/ в до́брем испове́дании, с те́плыми слеза́ми ду́шу свою́ предаде́.

Ра́достными слеза́ми сын почита́ше отца́,/ не украси́ его ца́рскими оде́ждами,/ но просты́м одея́нием те́ло его покры́;/ над гро́бом став, ру́це возде́в, Бо́гу благодаре́ние возсыла́ше,/ в покая́нии того́ прии́мшу.

К лю́дем глаго́лаше, седя́ на престо́ле ца́рстем:/ отец мой, царь Авени́р, у́мре, я́ко еди́н от ни́щих,/ ничто́же ему́ после́дова, ни бога́тство, ни ца́рская сла́ва;/ вы же избери́те себе́, его́же хо́щете,/ да ца́рствует над ва́ми.

Богоро́дичен: Ле́ствица Иа́ковля, Е́юже дре́вле А́нгелы ви́де сходя́ща;/ гора́ приосене́нная, от Нея́же ка́мень без рук отсече́ся;/ и дверь Небе́сная, Е́юже Госпо́дь еди́н про́йде./ Еди́на в жена́х Ты еси́, Пречи́стая.

Свети́лен:

Ца́рство оста́вив, к пусты́ни устреми́ся/ и в хра́мине убо́гаго обита́,/ ца́рскую оде́жду совле́к, убо́гому даде́,/ коне́чную ми́лостыню показа́в, Христу́ после́дова.

Богоро́дичен: В це́рковь Твою́ прибега́юще, вопие́м Ти, Пречи́стая:/ пода́ждь нам по́мощь и лю́тых избавле́ние,/ да при́сно велича́ем Рождество́ Твое́.

На хвали́тех стихи́ры на 4, глас 6.

Подо́бен: Все отло́жше:

пи́саны на вече́рни (зри день сей вы́ше) Сла́ва, глас 6:

Преподо́бнии отцы́,/ во всю зе́млю изы́де веща́ние исправле́ний ва́ших:/ тем на Небесе́х обрето́сте мзду трудо́в свои́х,/ де́монския погуби́ли есте́ полки́/ и А́нгельския дости́гли есте́ чи́ны,/ и́хже житию́ непоро́чно поревнова́ли есте́./ Дерзнове́ние иму́ще ко Христу́ Бо́гу,/ мир испроси́те душа́м на́шим.

И ны́не: Богоро́дице, Ты еси́ лоза́ и́стинная:

Славосло́вие вели́кое. И отпу́ст.

На Литурги́и

Блаже́нны, пе́сни 3-я и 6-я. Проки́мен, глас 7:Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой,/ внегда́ моли́тимися к Тебе́. Апо́стол к Колосса́ем, зача́ло 250. Аллилу́ия, глас 5: Воззва́ша пра́веднии,/ и Госпо́дь услы́ша их. Стих: Мно́ги ско́рби пра́ведным,/ и от всех их изба́вит я Госпо́дь. Ева́нгелие от Матфе́я, зача́ло 55, от полу́. Прича́стен: В па́мять ве́чную:

На Го́споди, воззва́х: стихи́ры, глас 4.

Подо́бен: Я́ко добля:

Пусты́ни до́брое воспита́ние/ и Небе́снаго Иерусали́ма граждани́на,/ преподо́бным украше́ние,/ преблаже́ннаго Варлаа́ма пе́сньми, лю́дие, почти́м/ со Иоаса́фом достохва́льным,/ я́ко де́лателей прему́дрых/ в Тро́ице сла́вимаго Бо́га,/ Е́муже и ны́не предстоя́т,/ с Вы́шними си́лами лику́юще,/ и мо́лятся о душа́х на́ших.

От присноживо́тнаго исто́чника напое́нный,/ уче́ний медото́чных Варлаа́ма преподо́бнаго,/ непло́дное дре́во израсти́ ветв многопло́дный,/ Иоаса́фа, ца́рское украше́ние/ и отце́м пусты́нным сла́ву,/ и́хже ли́ком сопричте́нны,/ ны́не водворя́ющеся в Небе́сных оби́телех,/ я́ко пе́рвии жи́телие,/ моли́теся Го́сподеви/ о любо́вию па́мять ва́шу пе́сньми ублажа́ющих.

Я́ко прему́дрый лове́ц/ и сладкоглаго́ливый ри́тор,/ мре́жею Богодухнове́нных ти слове́с,/ Варлаа́ме сла́вный,/ улови́ ца́рскую о́трасль,/ в пусты́ни неви́дения рожде́нную,/ и прине́сл еси́ в дар/ ко от Небе́с Соше́дшему взыска́ти поги́бшее/ и спасти́ естество́ челове́ческое.

Сла́ва, глас 6:

Иноку́ющих мно́жества,/ прииди́те, хвале́ние принесе́м/ досто́йным хвалы́ преподо́бным отце́м,/ Варлаа́му со Иоаса́фом,/ он бо тле́нных ми́ра оста́вль,/ а сей ца́рство презре́в,/ и те́сным путе́м, крест на ра́мена взе́мше, после́доваста,/ с Ни́мже ны́не ца́рствующе в Небе́сных дво́рех,/ моли́тася о чту́щих любо́вию святу́ю па́мять ва́шу.

И ны́не, Богоро́дичен по гла́су.

На стихо́вне стихи́ры, глас 2.

Подо́бен: Егда́ от Дре́ва:

Духо́вную мре́жу распросте́р,/ от вы́шния прему́дрости научи́вся,/ преблаже́нне Варлаа́ме,/ улови́л еси́ кра́сную лови́тву – Иоаса́фа сла́внаго,/ и того́ прине́с ко Влады́це своему́,/ я́ко непоро́чную же́ртву и всесожже́ние Богоприя́тно.

Стих: Восхва́лятся преподо́бнии во сла́ве/ и возра́дуются на ло́жах свои́х.

Би́сер многоце́нный обре́т,/ преподо́бне Варлаа́ме,/ в пусты́ни живы́й с Бо́гом,/ и того́ не сокры́в, я́ко лени́вый раб,/ но, а́ки до́брый купе́ц, шед, прода́в,/ досто́йный ца́рскаго венца́,/ до́брому то́ржнику, Иоаса́фу преблаже́нному.

Стих: Честна́ пред Го́сподем/ смерть преподо́бных Его́.

От до́браго дража́йшую маргари́ту стяжа́в,/ преподо́бне Иоаса́фе,/ ца́рство и вся пре́лести ми́ра, а́ки уме́ты, вмени́л еси́,/ пусты́ни дости́гл, еди́н Еди́ному Бо́гу после́дуя,/ духо́внаго своего́ отца́ обре́т,/ и, от него́ укра́сився по́стническими труды́,/ вшел еси́ в Небе́сный черто́г,/ отню́ду же и нас не забу́дита,/ преблаже́ннии отцы́,/ па́мять ва́шу пе́сньми ублажа́ющих.

Сла́ва, глас 4:

От ко́рене терно́внаго/ благоуха́нный крин израсте́,/ блаже́нный царю́ Иоаса́фе,/ от пото́ка бо напое́н уче́ний преподо́бнаго Варлаа́ма,/ и те́мже, омы́в серде́чныя о́чи,/ узре́ све́тло Творца́ своего́,/ в Тро́ице сла́вимаго Бо́га,/ Ему́же ны́не в Вы́шних с учи́телем предстоя́ще,/ моли́те спасти́ся душа́м на́шим.

И ны́не, Богоро́дичен.

Тропа́рь преподо́бному Варлаа́му, глас 8:

Слез твои́х исто́чники пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоно́сил еси́,/ и был еси́ свети́льник вселе́нныя, сия́я чудесы́, Варлаа́ме о́тче наш,/ моли́ Христа́ Бо́га спасти́ся душа́м на́шим.

Сла́ва, Тропа́рь преподо́бному Иоаса́фу, царю́ Инди́йскому, глас 4:

Из чре́ва ма́терня/ прекра́сное вселе́ние бысть Свята́го Ду́ха,/ пресла́вне Иоаса́фе,/ и от блаже́ннаго Варлаа́ма безце́нный би́сер, Христа́,/ в се́рдце свое́м прия́л еси́,/ и Боже́ственным Креще́нием И́ндию просвети́л еси́,/ оте́ческое же нече́стие испра́вль,/ приведе́ его́ от тьмы ко све́ту Богоразу́мия/ и, оста́вив тле́нное на земли́ ца́рство,/ пусты́ню дости́г и своего́ учи́теля,/ те́мже на Небесе́х от Живонача́льныя Тро́ицы/ венце́м ца́рским венча́ся,/ моли́ о нас, чту́щих честну́ю твою па́мять.

И ны́не, Богоро́дичен.

На У́трени

По 1-м стихосло́вии седа́лен, глас 1.

Подо́бен: Лик А́нгельский:

Зако́ну благоче́стия и и́стины су́щи служи́тель,/ уче́нию Ева́нгельскому ревни́тель изя́щный,/ ему́же Богосло́вными словесы́ преподо́бнаго Варлаа́ма научи́вся, царе́вичу Иоаса́фе,/ вся е́ллинская служе́ния и честь и́дольскую попра́л еси́/ и Еди́наго Бо́га в Тро́ице чести́ пред все́ми я́ко созда́нию Созда́теля/ пропове́дал еси́, преблаже́нне.

Сла́ва, и ны́не, Богоро́дичен: Гаврии́лу, веща́вшу Тебе́:

По 2-м стихосло́вии седа́лен, глас 5.

Подо́бен: Собезнача́льное:

Я́ко многоце́нное сокро́вище и дража́йшую маргари́ту,/ открове́нием преблаже́ннаго Варлаа́ма обре́т, царе́вичу Иоаса́фе,/ Присносу́щное Сло́во Отцу́ и Ду́хови,/ ду́хи лука́вствия и лесть и́дольскую оплева́л еси́,/ ме́рзость творя́ служе́нием тва́ри тварь боготвори́ти,/ тем я́ко испове́дник ве́ры от Бо́га венча́лся еси́, преподо́бне,/ Ему́же предстоя́, со дерзнове́нием моли́ся о чту́щих любо́вию па́мять твою́.

Сла́ва, и ны́не, Богоро́дичен:

Собезнача́льное Сло́во Отцу́ и Ду́хови,/ от Де́вы ро́ждшееся на спасе́ние на́ше,/ воспои́м, ве́рнии, и поклони́мся,/ я́ко благоволи́ пло́тию взы́ти на Крест,/ и смерть претерпе́ти,/ и воскреси́ти уме́ршия/ сла́вным воскресе́нием Свои́м.

По полиеле́и седа́лен, глас 4.

Подо́бен: Ско́ро предвари́:

Я́ко прие́м, о́тче Варлаа́ме, Небе́сное Сло́ва се́мя,/ добропло́дну зе́млю душе́ при́тчею гада́ний возде́лав, преблаже́ннаго Иоаса́фа,/ все́яв му́дре, и израсти́ клас Богови́дения,/ и прине́с во всепло́дие Влады́це своему́,/ тем я́ко бла́га де́лателя Це́рковь почита́ет па́мять твою́, свя́те,/ хвалу́ даю́щи Творцу́ всех и Бо́гу.

Сла́ва, и ны́не, Богоро́дичен:

Мно́гими обстоя́ньми и напа́стьми лю́тых, Де́во, окружа́еми, и ко отча́янию при́сно впа́дающе,/ еди́ну Тя спасе́ние, и наде́жду, и сте́ну и́мамы, Богоро́дице,/ и Тебе́ по до́лгу ве́рою и ны́не мо́лим:/ спаси́ рабы́ Твоя́.

Кано́н преподо́бным, глас 8.

Песнь 1

Ирмо́с:Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре,/ пои́м Ему́ я́ко Изба́вителю на́шему Бо́гу, я́ко просла́вися.

Сокруше́нна ми се́рдца в хвале́нии па́мяти ва́шей, преподо́бнии отцы́,/ в сокруше́нии припа́дающия прие́мля, Бог да не уничижи́т,/ помоли́ся, о́тче Варлаа́ме со Иоаса́фом,/ е́же ми воспе́ти Изба́вителю, я́ко просла́вися.

Вы́шняго про́мысл, е́же всем хотя́й спасти́ся,/ посла́ тя от пусты́ни, преподо́бне Варлаа́ме, взыска́ти Иоаса́фа,/ в неве́дении Богови́дения су́ща,/ и показа́ти многоце́нный би́сер – Христа́,/ со́лнца светле́е блища́щийся,/ отъе́млющаго неве́рующим зра́ки.

До́браго купца́ уподо́бивыйся нра́ву, о́тче Варлаа́ме,/ сам пе́рвие прода́л еси́ вся своя́ отверже́нием ми́ра/ и купи́л еси́ село́ до́брое – Сенахери́мскую пусты́ню,/ иде́же обре́т сокро́вище, искупи́ тем, а́ки долг, ду́шу преблаже́ннаго Иоаса́фа.

Богоро́дичен: До́брую Тя Еди́ну обре́т в жена́х и нескве́рную голуби́цу,/ одесну́ю Себе́ ста́ти повеле́ Сын Твой и Бог,/ скве́рну душ на́ших очи́сти и шу́яго стоя́ния свободи́,/ рожда́я к десно́й ча́сти всех Призыва́ющаго, Мари́е Де́во.

Песнь 3

Ирмо́с:Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разши́ришася на враги́ моя́ уста́ моя́,/ возвесели́хся о спасе́нии Твое́м.

Ничто́же па́че любве́ предпочита́я, Варлаа́ме свя́те,/ е́же за ду́шу дру́га ду́шу свою́ положи́ти,/ упова́нием впери́ся, утверди́ся па́лицею ве́ры,/ изведе́ честно́е от недосто́йнаго/ и возвесели́ся о спасе́нии твое́м, Иоаса́фе.

О, блаже́нныя твоея́ любве́, преблаже́нне Варлаа́ме!/ О, вы́шния и Богода́нныя ти прему́дрости!/ Вверг бо еси́, а́ки у́дицу, сло́во/ в многому́тное идолобе́сия мо́ре/ и ят, а́ки ры́бу, Иоаса́фа,/ о его́же взыска́нии возвесели́ся.

Стра́нным о́бразом Бы́вшаго за ны стра́нна/ покры́лся еси́, преблаже́нне Варлаа́ме,/ и прии́де показа́ти и́стину по предуви́дению иму́щему я́тися пра́вды, Иоаса́фу преблаже́нному.

Богоро́дичен: Стра́нный о́браз прижи́тия Твоего́ ви́дяще,/ к Тебе́, Безму́жная Ма́ти, ра́бски припа́даем и мо́лимся:/ стра́нных нас на путь спасе́ния наста́ви,/ я́ко еди́на Наста́вница хотя́щим спасти́ся.

Седа́лен, глас 5:

Отце́м сла́ву и пусты́ни воспита́ние,/ преподо́бнаго Варлаа́ма пе́сньми пе́ти не земноро́дных подо́бне, но А́нгельским лико́м сво́йственно,/ я́ко земна́го А́нгела и Небе́снаго граждани́на,/ при́сно моля́щегося о душа́х на́ших.

Сла́ва, и ны́не, Богоро́дичен:

Херуви́мов Честне́йшей и Серафи́мов Превы́шщей/ не земноро́дных уст песнь приноси́ти,/ но А́нгельскому ли́ку то сво́йственно,/ оба́че дерза́ем, кни́жнии, пе́ти и хвали́ти Тя, Пречи́стая,/ я́ко Неусы́пную Моли́твенницу о душа́х на́ших.

Песнь 4

Ирмо́с:Проро́к Авваку́м у́мныма очи́ма/ прови́де, Го́споди, прише́ствие Твое́,/ те́ми вопия́ше:/ от ю́га прии́дет Бог./ Сла́ва си́ле Твое́й,/ сла́ва снизхожде́нию Твоему́.

Усмотри́тельным Свои́м о́ком ве́дый Вы́шний коего́ждо пре́жде бытия́ его́/ призыва́ет и наставля́ет к Себе́,/ я́коже и тебе́, царе́вичу Иоаса́фе, блаже́нным Варлаа́мом,/ да возда́си сла́ву Призыва́ющему во спасе́ние, и́мже весть смотре́нием.

Ви́дев, преблаже́нне Иоаса́фе, а́ще и стрего́м,/ немощно́е челове́ческое естество́,/ и, разуме́в кра́ткую жизнь, се́рдцем уязви́ся, лу́чшия взыска́ти жела́я,/ те́мже и жела́емое ти извести́ся разу́мне преподо́бным Варлаа́мом.

Егда́ со́лнце пра́вды облиста́ тя, царе́вичу Иоаса́фе,/ уче́ньми преподо́бнаго Варлаа́ма,/ тогда́ идолопокло́нницы, а́ки зве́рие в ло́жах свои́х, неве́дением успо́ша/ и не разуме́ша та́йны, отверза́ющия ти врата́ Го́рняго Иерусали́ма.

Богоро́дичен: Со́лнцу предте́кшая денни́це, Богоневе́стная Де́во,/ сы́на дне́ви покажи́ ми и на путь покая́ния наста́ви,/ я́ко да тем улучу́ вход к ра́йскому селе́нию.

Песнь 5

Ирмо́с:Го́споди, Бо́же наш,/ мир даждь нам,/ Го́споди, Бо́же наш,/ стяжи́ ны,/ Го́споди, ра́зве Тебе́, ино́го не ве́мы,/ и́мя Твое́ имену́ем.

Во при́тчах отве́рзл еси́ уста́ своя́, Варлаа́ме,/ сия́ показу́я гада́ний о́бразы,/ и научи́ ти, Иоаса́фе, Ева́нгельскому после́довати тече́нию,/ пе́рвие отро́ждшися водо́ю и Ду́хом.

Ба́нею Креще́ния обно́влься, пречу́дне Иоаса́фе,/ ве́тхаго совле́кся челове́ка и в но́ваго обле́кся,/ я́коже наста́ви тя духо́вный твой оте́ц, Варлаа́м преподо́бный.

Бу́ря идолобе́сия воста́ на тя, преподо́бне Иоаса́фе,/ но не поколеба́ твоего́ ве́ры хра́му,/ осно́ван бо бе на краеуго́льном ка́мени – Христе́/ и утвержде́н до́бре, я́коже устро́и Варлаа́м прему́дрыми уче́ньми.

Богоро́дичен: Бу́ря жите́йских страсте́й воста́ на ми отча́яния,/ и проти́вен ветр от до́браго тече́ния ми воспяща́ет,/ ускори́, Чи́стая, и путь мой от паде́ния к до́брому приста́нищу устро́й,/ Ты бо еси́ приста́нище жите́йских пла́ваний.

Песнь 6

Ирмо́с:Я́ко во́ды морски́я, Человеколю́бче,/ волна́ми жите́йскими обурева́юся,/ те́мже, я́ко Ио́на,/ та́ко вопию́ Ти:/ возведи́ от тли живо́т мой, Благоутро́бне Го́споди.

Я́ко во́ды морски́я, во́лны искуше́ния воста́ша на тя, преподо́бне Иоаса́фе,/ но, а́ки крыло́ма, посто́м и моли́твою прелете́в на ти́хое приста́нище/ направле́нием до́браго учи́теля твоего́ Варлаа́ма.

Кре́пка любы́ твои́, а́ки сме́рть, царю́ Иоаса́фе, к Бо́гу бя́ше,/ то́ю бо умори́л еси́ все Фе́вдино волхвова́ние,/ па́че же сама́го кня́зя тьмы́, хотя́щаго, твое́й чистоте́ одоле́в, от Бо́га отврати́ти.

Ди́вен позо́р и взыска́ние мудрецо́в о ве́ре,/ но, егда́ Дух Святы́й возде́йствова,/ вся е́ллинская шата́ния ослабе́ша,/ проти́ву твоему́, царе́вичу Иоаса́фе, Боже́ственному раче́нию не возмого́ша ста́ти/ и отца́ твоего́ Варлаа́ма моли́твам.

Богоро́дичен: Ди́вен позо́р А́нгелом и челове́ком, Пречи́стая,/ я́ко без му́жа ражда́еши и де́вством запечатле́нна Ма́ти познава́ешися,/ Бог бо из Тебе́ роди́ся, побежда́яй естества́ чин.

Конда́к, глас 8:

Ве́дый твое́ от младе́нства благо́е изволе́ние, Иоаса́фе,/ еди́н сердцеве́дец Бог,/ и́бо от ца́рствия земна́го во и́ноческое пребыва́ние приведы́й тя,/ и вели́кому Варлаа́му восле́довати сподо́би тя,/ и со А́нгелы с ним в Неизрече́нном Све́те водворя́ся;/ с ни́мже Святе́й Тро́ице предстоя́,/ мо́лим тя, ца́рское красото́,/ помина́й нас, ве́рою пра́зднующих па́мять твою́.

Песнь 7

Ирмо́с:О́троцы евре́йския в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

В се́ти свое́й увязе́ гре́шник,/ псало́мник предви́де сие́,/ запина́яй бо прему́дрым,/ в кова́рстве устро́и, е́же бы ста́ти проти́ву ве́ры твоея́, царе́вичу Иоаса́фе,/ сей той вторы́й Варлаа́м яви́ся, благослови́ и восхвали́ премене́нием о́браза,/ я́коже сам той Варлаа́м Нахо́р бя́ше.

Ка́мень мы́сленный был еси́, о́тче Варлаа́ме,/ источи́вший струю́ сла́дких уче́ний,/ и́хже испи́в, Иоаса́ф ди́вный, го́ресть ми́ра презре́в, и возопи́:/ благословен Бог оте́ц на́ших.

Ца́рствия Христо́ва жела́я насле́дник бы́ти, Иоаса́фе прему́дре,/ ца́рство земно́е оста́ви и взыска́ти и́де Варлаа́ма,/ измени́в ме́ньше на бо́льшее и ху́ждшее покори́ лу́чшему, поя́:/ благослове́н Бог оте́ц на́ших.

Богоро́дичен: Царя́ Небе́снаго Черто́г све́тел и Пала́та кра́сна су́щи,/ я́ко Многомо́щная не забу́ди лю́де́й Твои́х,/ но приклони́ у́хо Твое́ на мольбу́/ и введи́ в черто́г Небе́сный ве́рно испове́дающих Тя, Ма́терь Бо́га оте́ц на́ших.

Песнь 8

Ирмо́с:Покрыва́яй вода́ми превы́спренняяСвоя́,/ полага́яй мо́рю преде́л песо́к и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь/ я́ко Соде́телю всех во ве́ки.

Покры́в себе́ во́льною нището́ю Христа́ ра́ди,/ нас ра́ди обнища́вшаго стопа́м после́дуя, царе́вичу Иоаса́фе,/ в пусты́ню всели́ся, а́ки пти́ца, избе́гшая се́тей ми́ра страсте́й,/ влеко́м любо́вию к Бо́гу и отцу́ своему́ Варлаа́му,/ с ни́мже ны́не Тро́ицу сла́вите во ве́ки.

Любо́вь твоя́, преблаже́нне Иоаса́фе, и жела́ние бысть, а́ки желе́зо,/ влеку́щееся, а́ки магни́том, Богому́дрым Варлаа́мом,/ его́же обре́т в пусты́ни,/ ра́достным се́рдцем возда́сте хвалу́ во ве́ки.

Во двои́х ли́цах бысть еди́но се́рдце в вас, преподо́бнии отцы́,/ еди́ным жела́нием, еди́ным раче́нием воскрыли́вшеся, на Богови́дение востеко́сте/ и, де́монов победи́вше полки́, со А́нгелы сла́вите Го́спода во ве́ки.

Богоро́дичен: Во двои́х во́лех и хоте́ниих,/ в еди́ном же соста́ве вопло́щся из Тебе́, Безму́жняя Ма́ти,/ просла́ви Тя в ро́дех родо́в/ и научи́ хвала́ми пе́ти во вся ве́ки.

Песнь 9

Ирмо́с:Проявле́нное на горе́ законополо́жнику во огни́ и купине́/ Рождество́ Присноде́вы,/ в на́ше, ве́рных, спасе́ние/ пе́сньми немо́лчными велича́ем.

Ле́ствицу доброде́телей утверди́вше, блаже́ннии отцы́,/ взыдо́сте на Го́рняя и всели́стеся в пресве́тлая места́ прекра́снаго Иерусали́ма,/ моли́тася и нам с ва́ми бы́ти, я́ко па́мять ва́шу велича́ем.

По мно́гих труде́х и боле́знех прише́л еси́, о́тче Варлаа́ме,/ в поко́йная и безболе́зненная места́, во град нерукотворе́нный,/ и по себе́ не оста́вил еси́ духо́внаго ти сы́на Иоаса́фа,/ но ско́ро умоли́ всели́тися ему́ с то́бою/ и наслади́тися, е́же угото́ва Бог лю́бящим Его́.

Я́ко единоу́мне в жи́зни сей пожи́сте,/ та́ко в бу́дущем ве́це неразлу́чно вселе́ние и́мате в оби́телях Небе́сных,/ иде́же и нам всели́тися моли́те, преподо́бне Варлаа́ме с Иоаса́фом,/ се бо па́мять ва́шу пе́сньми велича́ем.

Богоро́дичен: Жизнь присносу́щную ро́ждшая, Безневе́стная Де́во,/ жизнь вре́менную даждь нам до́бре премину́ти и доспе́ти ве́чныя жи́зни,/ раболе́пне Тя пе́сньми велича́ющим.

Свети́лен:

Ца́рскую диади́му и ски́петр держа́вы,/ све́тлыя черто́ги и златотка́нную порфи́ру оста́вль, царе́вичу Иоаса́фе,/ и измени́в та на убо́гую иноку́ющих оде́жду ску́дную,/ пусты́ню, а́ки простра́нныя черто́ги, возлюби́в за любо́вь возлюби́вшаго тя Христа́,/ Ему́же предстои́ши с Варлаа́мом достохва́льным,/ моли́те о всех чту́щих па́мять ва́шу.

Богоро́дичен:

Ца́рская порфи́ро и у́мная багряни́це, в ню́же Царь Сла́вы одея́ся,/ оде́жды све́тлыя нас не иму́щих/ покры́й ри́зою бла́гости Твоея́, Пречи́стая Де́во, и введи́ в черто́г,/ Ты бо еси́ Сама́ све́тлая пала́та и черто́г нескве́рный.

На хвали́тех стихи́ры на 4, глас 4.

Подо́бен: Я́ко до́бля:

Во мно́жестве трудо́в ва́ю, преподо́бнии отцы́,/ Небе́сная упокое́ния стяжа́сте,/ с весе́лием на ло́жа́х свои́х восхваля́етеся,/ я́ко А́нгелом согра́ждане су́ще/ и Престо́лу Бо́жию предстоя́ще,/ на земли́ па́мять ва́шу соверша́ющим/ моли́тася страсте́й и грехо́в оставле́ние улучи́ти,/ я́ко моли́твенницы о душа́х на́ших.

Доброде́телем вели́кое приста́нище/ и пусты́ни украше́ние/ доброгла́сно нарица́ем тя, преблаже́нне Варлаа́ме/ со Иоаса́фом достохва́льным,/ вы бо бы́ста о́браз целому́дрию и моли́тве,/ сокро́вище некрадо́мо,/ и чудесе́м мно́гим де́лателие,/ и моли́твенника преизя́щна/ о при́сно хва́лящих па́мять ва́шу, отцы́ Богому́дрии.

Гроб и пусты́ня непрохо́дная/ сопря́та вас, отцы́ Богоно́снии,/ но Бог яви́ ца́рству Инди́йскому,/ ему́же держа́вствуяй, благоспе́шно про́йде, ища́,/ и, обре́т, отве́рзе земле́нна не́дра,/ ви́де мо́щи тле́нию неприча́стны и благоуха́ния испо́лнены,/ я́же, я́ко многоце́нное сокро́вище, ра́достию прене́с/ в по́мощь и заступле́ние держа́ве свое́й.

Сла́ва, глас 6:

Свети́льника слове́с Богодухнове́нных/ и при́точника преизя́щна, Варлаа́ма преблаже́ннаго,/ пе́сньми, лю́дие, почти́м,/ той бо отве́рзе в при́тчах уста́ своя́ медото́чная/ и провеща́ гада́ния, а́ки гусль сладча́йшая,/ приклони́ ушеса́ во слы́шание Иоаса́фа, царя́ достохва́льнаго,/ и, обвесели́в скорбьми́ одержи́ма о Бо́зе неве́дения,/ в Не́мже изве́стно обре́т Богови́денный свет,/ просвети́ся, ве́ровав в Тро́ице сла́вимому Бо́гу,/ от Него́ прия́т Ца́рство Небе́сное,/ иде́же моли́тася, о Богоно́снии отцы́,/ да обря́щемся с Ва́ми,/ любо́вию чту́щии святу́ю па́мять ва́шу.

И ны́не, Богоро́дичен.

На Литурги́и слу́жба преподо́бническая.

По заприча́стном стихе́ – стихи́ра, глас 2, песнь царе́вича Иоаса́фа,

коли́ шел в пусты́ню к Варлаа́му.

Подо́бен: Егда́ от Дре́ва:

Приими́ мя, пусты́не,/ я́ко ма́ти ча́до свое́,/ в ти́хое и безмо́лвное не́дро свое́,/ отбе́гшаго от лука́выя блудни́цы ми́ра сего́./ О прекра́сная пусты́не,/ возлюби́х бо тя па́че ца́рских черто́г/ и позлаще́нных пала́т./ Не брани́, пусты́не,/ страши́лищи свои́ми,/ ве́твие твое́ зеле́ное,/ дви́жащеся от возду́ха ма́лых ветро́в,/ и по́йду в лу́зе/ по кра́сному твоему́ виногра́ду,/ и бу́ду, я́ко ди́вий зве́рь,/ еди́н, скита́яся и бе́гая/ челове́к и многомяте́жныя сея́ жи́зни,/ седя́, пла́ча и рыда́я/ в глубо́ком и ди́ком не́дре твое́м./ О, Христе́, всех Царю́,/ не лиши́ мене́ Небе́снаго Ца́рствия Твоего́!

Зри:А́ще пое́м преподо́бным Варлаа́му и Иоаса́фу бде́ние, соединя́ем о́бе слу́жбы си́це: На Го́споди, воззва́х: стихи́ры на 8 из обе́их служб. На литии́ – стихи́ры стихо́вныя ино́й слу́жбы. Сла́ва, стихи́ра по заприча́стном стихе́ ино́й слу́жбы. На стихо́вне – стихи́ры стихо́вныя пе́рвой слу́жбы. Тропа́рь пе́рвой слу́жбы глаго́лем на вече́рни и у́трени, а тропари́ ино́й слу́жбы глаго́лем, пременя́юще на сла́ву. Седа́льны ино́й слу́жбы глаго́лем на сла́ву. Кано́ны святы́м обе́их служб на 8. По 3-й песни конда́к ино́й слу́жбы и седа́льны обе́их служб. По 6-й пе́сни конда́к и и́кос пе́рвой слу́жбы. Свети́лен ино́й слу́жбы глаго́лем на сла́ву. На хвали́тех – стихи́ры хвали́тныя ино́й слу́жбы.

На Литурги́и: зри уста́в пе́рвой слу́жбы . По заприча́стном стихе́ стихи́ра ино́й слу́жбы, глас 2: Приими́ мя, пусты́не:

На Ма́лой Вече́рни

На Го́споди, воззва́х: стихи́ры, глас 5:

Преподо́бне о́тче Варлаа́ме,/ ты, и́го Христо́во на ра́мо взем,/ до́блественне нападе́ние вра́жие поне́сл еси́/ и, невозвра́тно те́сный путь проше́д,/ по́чести зва́ния вы́шняго дости́гл еси́,/ но, о преблаже́нне, и́ночествующих похвало́,/ Христа́ непреста́нно моли́/ дарова́ти душа́м на́шим ве́лию ми́лость.

О́тче Богому́дре Варлаа́ме,/ ты из мла́да Христа́ возлюби́в/ и Боже́ственными заря́ми Пресвята́го Ду́ха се́рдце твое́ просвети́в,/ светови́ден вои́стинну был еси́,/ те́мже ко хра́му твоему́ притека́ющих/ проше́ния к по́льзе спасе́ния испо́лни/ и моли́ Христа́ Бо́га/ дарова́ти нам ве́лию ми́лость.

О́тче Варлаа́ме,/ ты, крест свой на ра́мо восприе́м/ и кра́сное ше́ствие Христа́ Царя́ твоего́ любе́зно прете́к,/ во святе́м гра́де Небе́снем Живу́щему предста́л еси́,/ отню́дуже, призира́я ны́не на чту́щих по́двиги твоя́, свя́те,/ моли́ Христа́ Бо́га/ е́же напра́вити и на́ша стопы́ на путь ми́ра.

Сла́ва, глас 8:

Мно́гим воздержа́нием, преподо́бне, житие́ твое́ украси́в,/ путь показа́л еси́, веду́щий в жизнь доброде́телей притяжа́нием,/ ми́ра отве́ргся и вся, я́же в ми́ре кра́сная, презре́в,/ жесто́ким житие́м плоть свою́ изнуря́я,/ го́рдаго зми́я смире́нием попра́л еси́,/ те́мже, на Небеси́ водворя́яся,/ моли́ спасти́ся душа́м на́шим.

И ны́не, Богоро́дичен.

На стихо́вне стихи́ры, глас 2:

Подо́бен: До́ме Евфра́фов:

Жизнь преходя́щую, я́же на земли́,/ презре́л еси́, блаже́нне,/ я́ко да улучи́ши жизнь безконе́чную.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Любве́ ра́ди Христо́вы,/ преподо́бне Варлаа́ме,/ пло́ти рачи́тельное умертви́л еси́ мудрова́ние.

Стих: Честна́ пред Го́сподем/ смерть преподо́бных Его́.

Бо́дренными твои́ми моли́твами/ помози́ в напа́стех/ пою́щим любе́зно па́мять твою́, Богоблаже́нне.

Сла́ва, глас 2:

В пеще́ру вшед, преподо́бне,/ отту́ду доброде́телей ра́ди к Небе́сному гра́ду преше́л еси́/ и дости́гл еси́ поко́я пра́ведных и святы́х ра́дования,/ те́мже с ни́ми приле́жно моли́ся о всех,/ ве́рою па́мять твою́ почита́ющих,/ изба́витися вся́каго сопроти́внаго обстоя́ния, Варлаа́ме Богому́дре.

И ны́не, Богоро́дичен.

Тропа́рь, глас 1: Ми́ра кра́сная:

(зри́ на вели́цей вече́рни, день сей ни́же)

На Вели́цей Вече́рни

Блаже́н муж: 1-й антифо́н.

На Го́споди, воззва́х: стихи́ры, глас 4.

Подо́бен: Зва́нный свы́ше:

Исто́чник приснокипя́щий слове́с медото́чных,/ исходя́щий от уст вели́каго отца́,/ ви́дя, блаже́нне Варлаа́ме,/ я́ко еле́нь, на истека́ющия струи́ воды́ живы́я,/ несы́тною любо́вию возжажда́вся, приходи́л еси́./ Отню́дуже, напои́в ду́шу свою́ умиле́ния,/ вся кра́сная ми́ра сего́ презре́л еси́/ и от слове́с Сло́ву после́довал еси́./ Ему́же ны́не с весе́лием предстоя́,/ моли́ спасти́ и просвети́ти ду́ши на́ша.

Егда́ вели́кая свети́ла,/ кры́ющаяся под спу́дом святы́я пеще́ры,/ мы́сленными очи́ма усмотре́л еси́, преподо́бне,/ тогда́, све́том доброде́телей в ю́ности озари́в се́рдце/ и Боже́ственным огне́м к сопребыва́нию их распали́вся,/ дом, роди́тели и дру́ги оста́вил еси́/ и был еси́ и́ночествующим соприча́стник./ Ны́не же, светоно́сным лико́м на Небеси́ причте́н су́щи,/ луча́ми благода́ти земны́х нас просвети́/ и пода́ждь дарова́ния, моля́щи Христа́/ спасти́ и просвети́ти ду́ши на́ша.

Егда́ Боже́ственное раче́ние благ гряду́щих/ и присносия́ющую сла́ву в Черто́зе Небе́сном/ оте́ц достоблаже́нный тебе́ показа́,/ а́бие земна́я блага́я, а́ки уме́ты, вмени́л еси́:/ бога́тство, сла́ву и вели́чество ро́да своего́,/ кра́сныя черто́ги и обруче́нную ти неве́сту презре́в,/ еди́наго Христа́ возлюби́л еси́,/ и, Того́ нищете́ подо́бяся,/ те́сный в по́двизех и труде́х путь проше́л еси́,/ и по кончи́не жела́емая насле́довал еси́,/ и́хже ны́не наслажда́яся,/ моли́ Влады́ку умири́ти мир/ и спасти́ ду́ши на́ша.

Сла́ва, глас 8:

На земли́ живы́й в теле́сном соста́ве,/ житию́ Безпло́тных поревнова́л еси́,/ преподо́бне о́тче Варлаа́ме,/ сла́вы твоея́ отверже́нием челове́ки удиви́л еси́,/ нището́ю и воздержа́нием бе́сы посрами́л еси́,/ чисто́тою А́нгелы возвесели́л еси́/ и вели́кими твои́ми по́двиги и́ночествующим о́браз был еси́./ Те́мже по достоя́нию ублажа́ем тя,/ удобре́ннаго от Вы́шняго Влады́ки,/ Его́же при́сно моли́, блаже́нне,/ мир Це́ркви Правосла́вной дарова́ти/ и душа́м на́шим ве́лию ми́лость.

И ны́не, Богоро́дичен: Царь Небе́сный

Вход, проки́мен дне и чте́ния три преподо́бническая (зри Мине́ю ноября́ 23-й день)

На литии́ стихи́ры, глас 1:

Днесь ра́достно ликовству́ет пеще́ра свята́я,/ име́ющи святы́я мо́щи твоя́, блаже́нне Варлаа́ме,/ подава́ют бо здра́вие с ве́рою притека́ющим к честне́й твое́й ра́це./ Отню́дуже и мы, просве́щшеся, глаго́лем:/ сподо́би нас даро́в твои́х, блаже́нне,/ и ста́до твое́ сохраня́й моли́твами твои́ми,/ спасе́ние подава́я душа́м на́шим.

Преподо́бне о́тче Варлаа́ме,/ ты, из мла́да возлюби́в добро́ту Влады́ки Христа́/ и к Нему́ жела́ние невозвра́тно име́яй,/ оте́чество и род оста́вил еси́,/ бога́тство и сла́ву возненави́дел еси́/ и, Тому́ Еди́ному после́довав,/ равноа́нгельно в пеще́ре пожи́л еси́,/ тем, ны́не на Небесе́х со А́нгелы Ему́ предстоя́,/ со дерзнове́нием моли́ся о душа́х на́ших.

Глас 4:

Вседержи́тельною десни́цею укрепля́емь,/ преподо́бне о́тче наш Варлаа́ме,/ воздержа́ние в пи́щи стяжа́л еси́,/ непреста́нною же моли́твою и нощны́м стоя́нием/ Анто́нию блаже́нному соприча́стник бы́ти сподо́бився,/ сле́зными пото́ки вся бесо́вская ополче́ния потопи́л еси́./ Те́мже и Христо́с, Его́же вожделе́л еси́/ и Его́же ра́ди тяготу́ дневну́ю поне́сл еси́,/ дарова́нием чуде́с тя просла́ви,/ Его́же моли́ спасти́ся душа́м на́шим.

Глас 3:

Прииди́те, вси и́ночествующих собо́ри,/ псалмы́ и пе́сньми честно́е преподо́бнаго торжество́/ днесь благоче́стно восхва́лим,/ и́же а́ще и последи́ возсия́,/ но дре́вних оте́ц че́сти сподо́бися/ и мо́лится Христо́ви спасти́ся душа́м на́шим.

Честно́е прия́телище Ду́ха Пресвята́го/ был еси́, Варлаа́ме преподо́бне:/ Безпло́тным бо во пло́ти подо́бяся,/ житию́ тех подража́л еси́,/ сего́ ра́ди от вседержи́тельныя венча́лся еси́ десни́цы,/ а́ще же и преста́вился еси́ от земли́,/ но Бо́гови жив предстои́ши со святы́ми/ и мо́лишися о душа́х на́ших.

Сла́ва, глас 8:

Красоты́ ми́ра сего́ от мла́да, преподо́бне, возненави́дев,/ Красне́йшаго па́че сыно́в челове́ческих от се́рдца возлюби́л еси́/ и, Тому́ все́ю душе́ю прилепи́вся,/ я́ко безпло́тен на земли́,/ в ме́ртвенном и тле́нном те́ле живы́й,/ нетле́ния по́честь улучи́л еси́,/ и ны́не, чи́сте зря Святу́ю Тро́ицу,/ приле́жно помоли́ся, преподо́бне,/ умири́ти мир и спасти́ ду́ши на́ша.

И ны́не, Богоро́дичен: Безневе́стная Де́во:

На стихо́внах стихи́ры, глас 8:

Подо́бен: Что́ вас нарече́м, святи́и:

Что тя имену́ем, преподо́бые?/ А́нгела ли, во пло́ти су́ща?/ я́ко А́нгельски на земли́ пожи́л еси́;/ свети́льника ли преподо́бным?/ я́ко тех по́двигом удиви́л еси́,/ бе́сы посрами́л еси́,/ покори́в ду́ху теле́сныя стра́сти./ И ны́не, Христу́ предстоя́,/ моли́ спасти́ и просвети́ти ду́ши на́ша.

Стих: Честна́ пред Го́сподем/ смерть преподо́бных Его́.

Что тя провеща́ем, сла́вне?/ столпа́ ли одушевле́нна?/ я́ко непоколеби́мь искуше́нии пребы́в еси́;/ реку́ ли воды́ живо́тныя,/ струи́ духо́вныя благода́ти излива́ющую?/ наста́вника и́ноком изя́щна,/ и безпло́тным единонра́вна,/ и те́плаго моли́твенника о душа́х на́ших.

Стих: Пра́ведник, я́ко фи́никс, процвете́т,/ и, я́ко кедр, и́же в Лива́не, умно́жится.

Что́ тя нарече́м, свя́те?/ ненака́занным наказа́теля и врача́ в боле́знех су́щим и́стинна,/ благоуха́нное пеще́ры прозябе́ние,/ и́ноком утвержде́ние,/ исто́чника чуде́с приснотеку́щаго/ и подви́жника до́бляго,/ ско́раго предста́теля всем,/ с ве́рою к тебе́ приходя́щим.

Сла́ва, глас 6:

Преподо́бне о́тче,/ ты, от ю́ности Бо́га возлюби́в,/ ничто́же па́че Того́ предпоче́л еси́,/ ми́ра и жития́ сего́ молвы́ избе́г,/ в безмо́лвное приста́нище святы́я пеще́ры доспе́л еси́/ и, в ню, я́ко в прекра́сный черто́г, всели́вся,/ ду́шу свою́ Еди́ному Влады́це уневе́стил еси́,/ предъочи́стив ю посто́м и моли́твами;/ те́мже был еси́ кра́сная пала́та Святы́я Тро́ицы,/ Е́йже ны́не с весе́лием предстоя́,/ помяни́ чту́щих всечестну́ю па́мять твою́.

И ны́не, Богоро́дичен: Богоро́дице, Ты еси́ лоза́ и́стинная:

Тропа́рь, глас 1:

Ми́ра кра́сная и сла́ву его́ оста́вль,/ прите́кл еси́ в пеще́ру,/ иде́же от си́лы преуспева́я в си́лу,/ был еси́ вождь Христо́ва ста́да, всесла́вне Варлаа́ме,/ е́же я́ко упа́с до́бре, упаси́ и нас, мо́лим тя,/ сохраня́я от всех зол, да тя ублажа́ем. Сла́ва, и ны́не. Богоро́дичен по гла́су.

На У́трени

По 1-м стихосло́вии, седа́лен, глас 5.

Подо́бен: Собезнача́льное:

Прииди́те, и́ночествующих Русстии собо́ри,/ и ви́девше в святе́м его́ сла́ву Бо́жию, к похвале́нию отве́рзите устне́,/ благословя́ще Творца́ своего́ Влады́ку,/ прославля́ющагося в святы́х Свои́х,/ и псало́мски воспо́йте, глаго́люще:/ нам зело́ че́стны дру́зи Твои́, Христе́ Бо́же,/ зело́ бо утверди́шася влады́чествия их о Тебе́,/ Спа́се и Изба́вителе душ на́ших.

Сла́ва, и ны́не, Богоро́дичен:

Утверди́ся пе́ти се́рдце мое́, Всенепоро́чная Де́во,/ Пречи́стое Рождество́ Твое́,/ и́мже изба́вила еси́ нас прароди́тельныя кля́твы и вознесла́ еси́ па́дшее челове́ческое естество́ к высоте́,/ те́мже Тя по до́лгу пое́м и велича́ем.

По 2-м стихосло́вии, седа́лен, глас 1.

Подо́бен: Лик А́нгельский:

Духо́вныя криле́ ве́дения и дея́ния/ от слове́с вели́каго отца́ прия́л еси́, Богому́дре Варлаа́ме,/ и, си́ми возводя́ ум свой к высоте́,/ избе́гл еси́, я́ко пти́ца от се́ти, ловя́щих,/ и кра́йняго, иде́же пра́ведных водворя́ются ли́цы, блаже́нства дости́гл еси́./ Сла́ва Да́вшему ти на сие́ и́стое жела́ние,/ сла́ва Да́вшему ти на стра́сти побе́ду,/ сла́ва Приве́дшему тя в ве́чное селе́ние.

Сла́ва, и ны́не, Богоро́дичен:

Прие́мшая от Ду́ха Свя́та во чре́во, Де́во Чи́стая,/ и ро́ждшая пре́жде век от Отца́ рожде́нное Сло́во,/ безслове́сным нас дея́нии уподо́бльшихся/ к ра́зуму приведи́ и даждь житию́ исправле́ние,/ я́ко да при́сно Тя велича́ем.

По полиеле́и, седа́лен, глас 8.

Подо́бен: Прему́дрости возле́г:

Сия́нии Боже́ственных слове́с заре́ю просвети́вся,/ в мра́це жития́ сего́ су́щее оста́вил еси́/ и, ко Све́ту мы́сленному прите́к,/ восприя́л еси́ во пло́ти со Безпло́тными житие́ невеще́ственно;/ отню́дуже, Ду́ха благода́тию предочи́стився,/ был еси́ и́ночествующим наста́вник, Богому́дре Варлаа́ме,/ сего́ ра́ди хвала́ми вопие́м ти:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

В кал грехолю́бия впадо́х, и несть ми воста́ния наде́жды,/ лю́те погружа́юся отча́янием,/ но я́ко ро́ждшая спасе́ния наде́жду, на мя, раба́ Твоего́, при́зри/ и изба́ви от губя́щаго мя греха́, и страсте́й душетле́нных,/ и всегда́шняго озлобле́ния льсти́ваго врага́,/ Богоро́дице Неискусобра́чная, моли́ Христа́ Бо́га грехо́в оставле́ние дарова́ти ми,/ Тя бо име́ю наде́жду, раб Тво́й.

Степе́нна, 1-й антифо́н, 4-го гла́са. Проки́мен, глас 4: Ди́вен Бог во святы́х Свои́х,/ Бог Изра́илев. Стих: В це́рквах благослови́те Бо́га,/ Го́спода от исто́чник Изра́илевых. Ева́нгелие от Матфе́я, зача́ло 43.

Стихи́ра по 50-м псалме́, глас 6:

Сла́ву преподо́бных и украше́ние,/ вы́шняго Сио́на граждани́на,/ земна́го а́нгела и Небе́снаго челове́ка,/ по́стников споспе́шника и де́вствующих похвале́ние,/ и́ноков вожди́ и удобре́ние,/ прииди́те, празднолю́бных собо́ри,/ в дне́шний день с на́ми воспое́м,/ похва́льныя венцы́ любо́вию спле́тше,/ духо́вный лик у честна́го гро́ба Богоно́снаго отца́ на́шего соста́вим/ и принесе́м досто́йныя пе́сни, псало́мски пою́ще:/ честна́ смерть твоя́ пред Го́сподем, преблаже́нне Варлаа́ме,/ ты бо, ду́хом а́ще и отше́л еси́ ко Влады́це,/ но те́лом вы́ну пребыва́еши с на́ми,/ и покланя́ющихся моще́м твои́м даро́в духо́вных исполня́еши,/ и ны́не, у́бо я́ко мно́го дерзнове́ние стяжа́вый ко Го́споду,/ моли́ся о пою́щих честно́е твое́ успе́ние,/ дарова́ти нам единомы́слие/ и всему́ ми́ру утвержде́ние.

Кано́н преподо́бному, глас 1.

Песнь 1

Ирмо́с:Го́рькия рабо́ты изба́влься, Изра́иль/ непроходи́мое про́йде, я́ко су́шу,/ врага́ зря потопля́ема,/ песнь я́ко благоде́телю пое́т Бо́гу, чудоде́ющему мы́шцею высо́кою,/ я́ко просла́вися.

Лю́тою рабо́тою печа́лей ми́ра сего́/ мно́гих, блаже́нне, ви́дя плене́нных, размы́слил еси́,/ я́ко несть от той избавля́яй, ра́зве а́ще кто Изба́вителя Христа́ стопа́м после́дует,/ те́мже О́ному неле́ностен был еси́ ревни́тель./ Бо́дрою у́бо твое́ю моли́твою, о́тче,/ и мене́, уны́лаго, к похвале́нию твои́х по́двигов до́бре подви́гни,/ да ско́ро воспою́ песнь Бо́гу, я́ко просла́вися.

Напое́н быв слове́с медото́чных от вели́каго отца́,/ не возжела́л еси́ про́чее зре́ти вспять,/ но, за́дняя забы́в, на пре́дняя, а́ки перна́т, устреми́лся еси́,/ еди́но мы́сля, е́же взыска́ти всем се́рдцем Бо́га/ и вы́ну пе́ти Ему́ песнь, я́ко просла́вися.

От бесе́ды преподо́бнаго Анто́ния те́плою к Бо́гу любо́вию,/ а́ки пла́менем, се́рдцу твоему́ распали́вшуся, блаже́нне,/ ра́достен, а́ки не́кое обре́т сокро́вище,/ в дом свой возврати́лся еси́,/ предложе́ние же во́ли твоея́ при ногу́ достоблаже́ннаго отца́ оста́вил еси́,/ пото́м к нему́ па́ки прите́к,/ вы́ну воспева́л еси́ Бо́гу, я́ко просла́вися.

Вели́каго Анто́ния бесе́де Богодухнове́нней внима́я,/ запина́ющия миролю́бия се́ти расто́ргл еси́/ и, прите́к к нему́, был еси́ уче́ния того́ при́сный слы́шатель,/ поя́ ку́пно с ним Бо́гу, я́ко просла́вися.

Богоро́дичен: Стужа́ющия ми вы́ну напа́сти и прило́ги вра́жия/ разжени́ предста́тельством Твои́м, Чи́стая Де́во,/ и не посрами́ мене́ от ча́яния ми́лости Твоея́:/ еди́на бо еси́ с Сы́ном Твои́м наде́жда ненаде́ждным.

Песнь 3

Ирмо́с:Ка́мень, его́же небрего́ша зи́ждущии,/ сей бысть во главу́ у́гла./ Той есть Ка́мень, на не́мже утверди́ Це́рковь Христо́с,/ ю́же от язы́к искупи́.

Ка́мень небрего́мый, Христе́, Ты был еси́ во главу́ у́гла,/ и на Тебе́ преподо́бный Тво́й, хотя́ дом душе́вный созда́ти,/ предразсуди́ смире́ния, нищеты́ и про́чиих доброде́телей сте́ны положи́ти,/ те́мже, прише́д к вели́кому отцу́, моли́ его́, глаголя́:/ на ка́мени за́поведей Госпо́дних утверди́ мя, преподо́бне.

В сла́ве и бога́тстве со мно́гими о́троки прише́д к пеще́ре святе́й,/ пове́ргл еси́ под но́зе ста́рцу вся кра́сныя у́твари и себе́ сама́го,/ вку́пе низлага́я и лука́ваго горды́ню.

Разуме́в, свя́те, я́ко сокро́вище у́мное сокрове́нно есть в пеще́ре святе́й,/ все принесе́нное тобо́ю бога́тство и себе́ сама́го прода́л еси́ Анто́нию/ и, я́ко доброразу́мный купе́ц, купи́л еси́ село́ то,/ на не́мже обогати́лся еси́ сим,/ и́мже тя и по сме́рти прославля́ем.

Ве́ка сего́ бога́тство, сла́ву и суету́ вся́ку,/ се́ни скоропреходя́щей подо́бна бы́ти, проразсуди́л еси́, преподо́бне./ Те́мже, вся в уме́ты вменя́я, да Христа́ Еди́наго приобря́щеши,/ возлюби́л еси́ ше́ствовати к Нему́ и́ночествующих стезе́ю.

Богоро́дичен: Путь живота́ моего́, беззако́нными страстьми́ олядене́вший,/ десни́цею, Чи́стая, е́юже Де́лателя Вы́шняго носи́ла еси́, отреби́ и очи́сти,/ да и во мне стезя́ доброде́телей яви́тся,/ и дух прав обнови́тся во утро́бе мое́й.

Седа́лен, глас 8:

Твое́ жела́ние неотло́жно вели́кий во отце́х ви́дев,/ возложи́ на тя шлем спасе́ния,/ обле́к тя в броня́ пра́вды,/ причте́ к и́ноческому полку́,/ ты же – вои́н, в Ца́рство Небе́сное учине́н,/ до́бре подвиза́лся еси́ на ви́димыя и неви́димыя враги́,/ и́мже одоле́в, прия́л еси́ вене́ц Небе́сныя по́чести,/ ю́же улучи́ти моли́, преподо́бне Варлаа́ме, и нам,/ чту́щим любо́вию святу́ю па́мять твою́.

Сла́ва, и ны́не, Богоро́дичен:

На борю́щияся со мно́ю враги́ даждь по́мощь свы́ше, Богоневе́стная Де́во,/ и научи́ мя, я́ко ве́дущая их хи́тростныя ко́зни, сия́ одолева́ти:/ никто́же бо их победи́т, а́ще не Ты пособи́ши/ изря́днее чту́щим любо́вию Пренепоро́чное Рождество́ Твое́.

Песнь 4

Ирмо́с:Слы́ша дре́вле Авваку́м, Христе́, чу́дный Тво́й слух/ и стра́хом взыва́ше:/ от ю́га Бог прии́дет/ и Святы́й от горы́ приосене́нныя ча́щи/ спасти́ пома́занныя;/ сла́ва си́ле Твое́й, Го́споди.

Слы́шавше три во́инствующии супоста́ты,/ я́ко обнажи́шася любве́ твоея́, егда́ обле́клся еси́ в ри́зу спасе́ния,/ возскорбе́ша на тя и, яря́щася, воздвиго́ша на тя отца́ твоего́,/ ты же положи́л еси́ се́рдце твое́ в си́ле Госпо́дни.

Притече́ на ста́до свято́е неразу́мный оте́ц со мно́гими о́троки к пеще́ре/ и, разгна́в всех, извлече́ тебе́, тепле́йшею любо́вию к Бо́гу привя́заннаго,/ на Него́же наде́яся, взы́ва́л еси́:/ сла́ва си́ле Твое́й, Го́споди.

Извле́к тя, блаже́нне, вон оте́ц твой,/ совлече́ святу́ю ма́нтию и вве́рже в дебрь,/ та́кожде и шлем спасе́ния, и́же бе на главе́ твое́й, снем, заве́рже,/ та́же облече́ во оде́жду све́тлу и многоце́нну./ Ты же, вся сия́ презре́в,/ А́нгельскому житию́ неукло́нно поревнова́л еси́, взывая́ и вопия́:/ сла́ва си́ле Твое́й, Го́споди.

Ну́ждею оде́ян в пресве́тлую оде́жду, попра́л еси́ ту в кал,/ вку́пе с не́ю попира́я го́рдаго врага́,/ льстя́щаго разли́чными су́етствы приближа́ющихся пе́ти:/ сла́ва си́ле Твое́й, Го́споди.

Богоро́дичен: Студо́м беззако́ний лю́тых покрове́нна мя совлецы́, Богоро́дице,/ и оскверне́нную ри́зу мою́,/ подаю́щи ми покая́ние и умиле́ние,/ благода́тию Твое́ю чи́сту сотвори́,/ да благода́рно предста́ну Ти, зовы́й:/ ра́дуйся, оде́ждо наги́х дерзнове́ния, Влады́чице.

Песнь 5

Ирмо́с:Свет Твой незаходи́мый возсия́й, Христе́, в сердца́х ве́рно пою́щих Тя,/ мир подава́яй нам па́че ума́;/ тем, от но́щи неве́дения/ ко дню све́том Твои́м теку́ще,/ славосло́вим Тя, Человеколю́бче.

Ну́ждею ведо́му ти в дом в све́тлых ри́зах, блаже́нне,/ свет Бо́жий незаходи́мый облиста́ се́рдце твое́,/ тем не воззре́л еси́ на свет ле́стный,/ но, Бо́га Еди́наго предзря́ одесну́ю себе́,/ Того́ славосло́вил еси́ я́ко Человеколю́бца.

Послу́шав Влады́ку, на безсме́ртный обе́д зову́щаго, преподо́бне,/ оте́ческия трапе́зы не вкуси́л еси́,/ но, очи́ма до́лу зря, ум возводи́л еси́ к высоте́,/ размышля́я трапе́зу Небе́снаго Царя́/ и блаже́нство сего́, и́же снесть обе́д в Ца́рствии Небе́сном.

Кра́сную пала́ту творя́ в се́рдце свое́м Пресвято́му Ду́ху,/ не сел еси́ на сла́вном ме́сте в пала́те твое́й, но в угле́ еди́ном,/ изволя́я те́сное житию́ ме́сто избра́ти к славосло́вию Го́спода Человеколю́бца.

Не уклони́л еси́ се́рдца в словеса́ лука́вая обру́чницы твоея́,/ ни возше́л еси́ на ло́же ея́, внима́я рече́нным:/ во сла́ве преподо́бнии возра́дуются на ло́жах свои́х,/ и́хже ны́не еси́ прича́стник и насле́дник.

Богоро́дичен: На ло́жи злых лежа́ща мя воздви́гни, Богоро́дице,/ и Твои́м руководи́тельством напра́ви живо́т мой,/ е́же бы про́чее вре́мя покая́нием проводи́ти и славосло́вити Тя,/ Благоутро́бнаго Христа́ Бо́га на́шего Ма́терь.

Песнь 6

Ирмо́с:Весь от страсте́й безме́рных содержу́ся/ и ки́том зол снизпадо́х,/ но возведи́ из истле́ния мя, Бо́же,/ я́коже пре́жде Ио́ну,/ и ве́рою безстра́стие ми да́руй,/ я́ко да во гла́се хвале́ния и спасе́ния/ ду́хом пожру́ Ти.

Весь напа́стными искуше́нии окружа́емь,/ к Человеколю́бцу взыва́л еси́, преподо́бне, е́же изба́вити тя от се́ти ловя́щих,/ и пребы́л еси́ три дни а́лчен,/ моли́твою то́кмо ду́шу пита́я и глаго́ля с проро́ком:/ от тли сея́ возведи́ мя, Бо́же,/ и аз про́чая ле́та и́стинным ду́хом поживу́ Тебе́.

О тебе́, блаже́нне, в толи́ком искуше́нии су́щу,/ моли́тва бе приле́жна от святы́х, су́щих в пеще́ре,/ воззва́ша бо пра́веднии, и Госпо́дь услы́ша их/ и тя изба́ви от печа́ли, преклони́в се́рдце отца́ твоего́ на ми́лость,/ и́же сожале́ о терпе́нии твое́м/ и, любе́зно тя целова́в, отпусти́ с ми́ром в святу́ю пеще́ру.

Глас плаче́вен тогда́ слы́шашеся в дому́ отца́ твоего́:/ роди́тели пла́кахуся по тебе́, люби́мом сы́не,/ жена́ лю́те рыда́ше тебе́, обру́чника своего́,/ раби и рабы́ни стеня́ху с во́плем по господи́не,/ и провожда́ху тя вси́ со слеза́ми;/ ты же, ра́достен изше́д, а́ки от Еги́пта во обетова́нную зе́млю, свя́те,/ благодаре́ние прине́сл еси́ Бо́гу,/ я́ко изба́ви тя от лю́таго мироде́ржца.

Сла́ва Тебе́, Бо́гу Еди́ному, во Тро́ице Святе́й сла́вимому,/ я́ко спасл еси́ раба́ Твоего́ от треплете́ннаго супоста́та,/ от его́же спаси́ и нас моли́твами Твоего́ уго́дника,/ почита́ющих его́ па́мять.

Богоро́дичен: Спаси́, Влады́чице, страстьми́ погруже́нных и простри́ ру́ку отча́янным,/ я́ко да, спа́сшеся Тобо́ю,/ и́стинным ду́хом хвале́ние принесе́м Тебе́ с Единоро́дным Твои́м Сы́ном и Бо́гом.

Конда́к, глас 2:

Оте́ческаго преще́ния не устраши́лся еси́,/ ласка́ниям того́ не повину́лся еси́,/ ниже́ ле́стию низложи́лся еси́ же́нскою, всече́стне Варлаа́ме,/ но непобеди́мь от тех пребы́л еси́,/ наде́яся на Го́спода своего́, Ему́же моли́ся о душа́х на́ших.

И́кос:

Самоизво́льное твое́ ви́дя страда́ние,/ кто не удиви́тся, преблаже́нне Варлаа́ме?/ Обличи́л бо еси́ де́монския ко́зни/ и, по́хотным страсте́м до́блественно сопротивоста́в,/ коль мно́го от напа́сти пострада́л еси́,/ да чи́сту ду́шу твою́ предста́виши Бо́гови,/ Ему́же и о нас моли́ся приле́жно, свя́те,/ да изба́вимся от я́рости плотски́х и неви́димых враго́в/ поспешеству́ющими твои́ми к Бо́гу моли́твами о душа́х на́ших.

Песнь 7

Ирмо́с:Проидо́ша, я́ко черто́г, пе́щный пла́мень нестерпи́мый/ я́же за благоче́стие иногда́ о́троцы святи́и, показа́вшеся я́ве,/ и, согла́сно воспева́юще, песнь поя́ху:/ отце́в Бо́же, благослове́н еси́.

Проше́л еси́, преподо́бне, искуше́ния пла́мень/ и, не опали́м пребы́в от него́,/ врага́ па́че опали́л еси́, неви́димо борю́щагося с тобо́ю,/ на́ньже посо́бствоваху тебе́ наста́вника твоего́ моли́твы,/ той бо непреста́нно зва́ше:/ отце́в Бо́же, благослове́н еси́.

Почуди́ся Анто́ний терпеливоду́шию твоему́,/ я́ко с лю́тым велиа́ром боря́ся,/ не устраши́лся еси́ многоплете́нных его́ ко́зней,/ и́миже а́ще и запи́т был еси́,/ но терпе́нием и смире́нием победи́л еси́/ и о́троческую воспе́л еси́ песнь:/ отце́в Бо́же, благослове́н еси́.

Возвра́щшуся тебе́ с побе́дою ко отце́м в пеще́ру,/ ра́дости вси испо́лнишася, я́ко ви́деша тя, венцено́сца,/ возра́довася же и ста́рец твой, прие́мый тя здра́ва,/ те́мже и воспе́ша:/ отце́в Бо́же, благослове́н еси́.

Ви́дев Анто́ний, я́ко на ко́рени уче́ний его́ доброде́тельми возра́сл еси́,/ а́ки доброцвету́щее дре́во, преподо́бне,/ и ле́торасль ю́ности твоея́ ста́рческия благода́ти принесе́ плоды́, чуди́ся/ и благода́рственне взыва́ше:/ отце́в Бо́же, благослове́н еси́.

Богоро́дичен: Гнию́щее греха́ми дре́во живота́ моего́/ окропи́ от благода́ти Твоея́ росо́ю, Де́во Чи́стая,/ я́ко да поне́ ма́лыя возрасту́т ве́тви/ и принесу́ Ти красе́н, безсме́ртен смире́ния и моли́твы плод, зовы́й:/ ра́дуйся, плода́ безсме́ртнаго стяжа́ние.

Песнь 8

Ирмо́с:Чу́да преесте́ственнаго/ показа́ о́браз огнеро́сная пещь дре́вле,/ огнь бо не опали́ ю́ныя де́ти,/ Христо́во явля́я безсе́менное от Де́вы Боже́ственное Рождество́./ Тем, воспева́юще, воспои́м:/ да благослови́т тварь вся Го́спода и превозно́сит во вся ве́ки.

Чу́до! я́ко дарова́ние еще́ в ю́ности твое́й нача́ де́йствовати,/ е́же ви́дев, Анто́ний вождя́ тя в себе́ ме́сто поста́вил бра́тии,/ и был еси́ добр па́стырь отце́м,/ пою́щим и превознося́щим Го́спода во ве́ки.

Прие́м нача́ло правле́ния,/ прия́л еси́ вновь нача́ло и житию́ твоему́, свя́те,/ и́бо приложи́л еси́ труды́ ко трудо́м и по́двиги во бде́нии сугу́бо,/ я́ко всем име́ти тя во о́браз, хотя́щим пе́ти Го́спода во ве́ки.

Добр наста́вник и оте́ц был еси́, блаже́нне:/ я́коже бо сам никогда́же не измени́л еси́ пра́вила твоего́,/ та́ко и бра́тию нака́зовал и моли́л еси́/ име́ти тща́ние о спасе́нии и прилежа́ти о души́, ве́щи безсме́ртней,/ а́ще хо́щут со А́нгелы превозноси́ти Го́спода во ве́ки.

Мы́сленнаго ища́ Иерусали́ма,/ стра́нствовал еси́ к чу́вственному,/ вся́кия труды́ в пути́ Христа́ ра́ди сла́дце терпя́;/ Его́же жизнопода́тельный Гроб любе́зно целова́в,/ возврати́лся еси́, пою́щи Го́спода во ве́ки.

Богоро́дичен: Всепе́тая Ма́ти, Небе́сных чино́в Госпоже́,/ Небеси́ и земли́ Цари́це,/ от земны́х мя отврати́ и даждь го́рняя иска́ти,/ сподо́би же в Го́рнем Иерусали́ме Тебе́ пе́ти и превозноси́ти Го́спода во ве́ки.

Песнь 9

Ирмо́с:Неизглаго́ланное Де́вы та́инство:/ Не́бо бо Сия́, и престо́л Херуви́мский,/ и светоно́сный черто́г показа́ся Христа́ Бо́га Вседержи́теля./ Сию́ благоче́стно я́ко Богоро́дицу велича́ем.

Неизглаго́ланныя ра́дости наслажда́ешися, о́тче, ны́не:/ со А́нгельскими бо чи́ны предстои́ши Невече́рнему Све́ту/ и нас в све́те за́поведей Госпо́дних ходи́ти упра́ви моли́твами твои́ми.

От жи́зни сея́ к ве́чному животу́ пресели́лся еси́, преподо́бне,/ и прия́л еси́ упокое́ния ме́сто./ Жизнь у́бо на́шу, обурева́ему наведе́нии сопроти́вных, невре́дну сохрани́/ и ра́йскаго селе́ния даждь доспе́ти твои́м направле́нием.

Возвраща́яся от Константи́на гра́да,/ отше́л еси́ душе́ю во всесветя́щийся град Царя́ Небе́снаго,/ мо́щи же своя́ оста́вил в монастыре́ Святы́я Горы́,/ я́же запове́дал еси́ пренести́ в пеще́ру, иде́же ны́не лежа́т нетле́нны,/ точа́щия исто́чник чуде́с приснотеку́щий.

Прославля́яйся во святы́х Свои́х, Еди́ный Бо́же,/ просла́ви всех ве́рных, покланя́ющихся Твое́й великоле́пней сла́ве:/ се бо приво́дим Тебе́ в моли́тву уго́дника Твоего́,/ его́же ра́ди спаси́ всех нас.

Богоро́дичен: Славосло́вим Тя, Де́во, немо́лчными усты́ и ублажа́ем по до́лгу:/ Ты бо Еди́на Блаже́нная в жена́х еси́,/ ро́ждши О́тчее Единоро́дное Сло́во,/ с Ни́мже Тя ку́пно, ве́рнии, велича́ем.

Свети́лен:

Сла́дким любве́ Христо́вы жела́нием уязви́в ду́шу твою́, преподо́бне,/ и тоя́ вы́ну насыща́тися хотя́щи,/ ми́ра тле́ннаго с похотьми́ отре́клся еси́,/ дом и роди́тели оста́вил еси́,/ о обру́чнице твое́й небре́гл еси́;/ сего́ ра́ди стори́цею прия́л еси́ и живо́т ве́чный насле́дуеши,/ его́же и мы да не лиши́мся,/ даждь по́мощь твои́ми моли́твами.

Сла́ва, и ны́не, Богоро́дичен:

Кра́сная пала́то, Мари́е Богоневе́сто,/ Ея́же красоты́ жела́я Вы́шний,/ де́йством Всесвята́го Ду́ха всели́ся во всеосвяще́нное чре́во/ и плоть прия́т нас ра́ди:/ ду́шу мою́ сотвори́ пала́ту на вселе́ние Небе́сному Царю́,/ да при́сно велича́ю Тя, непотре́бный раб Тво́й.

На хвали́тех стихи́ры, глас 4.

Подо́бен: Дал еси зна́мение:

Житие́ нескве́рно,/ терпе́ние, кро́тость и любо́вь к Бо́гу нелицеме́рну,/ воздержа́ние вели́ко, умиле́ние Боже́ственное, о́тче, стяжа́в,/ я́ко а́нгел пожи́л еси́ во пло́ти, Варлаа́ме блаже́нне,/ моли́твенниче о душа́х на́ших.

Добро́ту души́ своея́/ дом Ду́ху Свято́му предуготовля́я,/ красоту́ ми́ра сего́ презре́л еси́,/ на ка́мени же за́поведей Госпо́дних незы́блемо основа́ние положи́в,/ высото́ю смире́ния соверши́л еси́/ и был еси́ селе́ние Тро́ицы Пресвяты́я,/ Ю́же о нас моли́,/ душа́м на́шим да́ти добро́ту/ и бы́ти прия́тием духо́вныя благода́ти.

Мы́сленное дре́во жития́ твоего́/ отверже́нием ми́ра израсти́в,/ прине́сл еси́ плоды́ доброде́телей Бо́гу, о́тче блаже́ннейший,/ от Него́же прие́м трудо́в возме́здие,/ наслажда́ешися ны́не дре́ва жи́зни в раи́,/ его́же сла́дости и нам сподо́битися/ моли́ Иису́са Человеколю́бца и Спа́са душ на́ших.

Сла́ва, глас 8:

И́ноков наста́вник, вели́кий во отце́х,/ ви́дя твою́ к Бо́гу, о́тче, теплоту́,/ мно́гими доброде́тельми испра́вленну,/ вручи́ тебе́ Богосо́бранное ста́до,/ е́же на па́житех наказа́ния твоего́ до́бре упа́с,/ приве́л еси́ це́ло к па́стырей Нача́льнику – Христу́ Бо́гу,/ Его́же ны́не умоли́/ разу́мное ста́до свое́ соблюсти́ в ми́ре/ и сохрани́ти от волко́в, гу́бящих е.

И ны́не, Богоро́дичен:

Влады́чице, приими́ мольбы́ раб Твои́х/ и изба́ви нас/ от вся́кия ну́жды и печа́ли.

Славосло́вие вели́кое и отпу́ст.

На Литурги́и слу́жба преподо́бническая.

На Вели́цей Вече́рни

На Го́споди, воззва́х: стихи́ры глас 4.

Подо́бен: Дал еси́ зна́мение:

Духо́вным жела́нием распали́вся,/ преподобному́чениче Адриа́не,/ и вся, я́же в ми́ре, возненави́дев,/ Христа́ Еди́наго возлюби́л еси́./ Того́ ра́ди оте́чество свое́ оста́вил еси́/ и по́йде по пути́ спасе́нному,/ его́же возжеле́в,/ обре́л еси́ до́браго наста́вника себе́,/ и́ноческому житию́ окорми́теля.

Житие́ твое́ благо́е прови́дя,/ наста́вник твой, преподобному́чениче Адриа́не,/ устроя́ет тя в чину́ свяще́нном,/ во е́же служи́ти Бо́гу и́стиною/ в преподо́бии и пра́вде со вся́ким усе́рдием,/ я́ко Го́сподеви уго́дно, та́ко и сотвори́.

Го́споду хотя́щу просла́вити Своего́ уго́дника,/ преподобному́ченика Адриа́на,/ явле́нием А́нгеловым е́же извести́ его́ от оби́тели тоя́/ и пресели́ти на ме́сто ти́хо и безмо́лвно,/ и по нем после́дуя преподо́бный до пусты́ни,/ иде́же всели́тися показу́ще ему́ руко́ю,/ и а́бие неви́дим бысть.

Сла́ва, глас 6:

Прииди́те, бра́тия, пусты́нная ча́да,/ дади́м сла́ву и вели́чие Христу́ Бо́гу на́шему,/ днесь бо прояви́ нам уго́дника Своего́/ преди́вными чудесы́, преподобному́ченика Адриа́на,/ и́же мно́га ле́та сокрове́ны бы́ша мо́щи его́,/ ны́не же па́ки прино́сятся ко оби́тели свое́й,/ иде́же показа́ мно́гия труды́ и по́ты,/ Адриа́не преподо́бне,/ моли́ спасти́ся душа́м на́шим.

И ны́не, Богоро́дичен: Кто Тебе́ не ублажи́т:

Проки́мен дне. Чте́ния 3 преподо́бническая (зри Мине́ю ноября́ 23-й день)

На литии́ стихи́ры, глас 2:

Преподо́бне о́тче Адриа́не,/ житие́ свое́ доброде́тельми просвети́л еси́,/ страсте́м бо ко́рение погуби́л еси́,/ и яви́ся сосу́д Свято́му Ду́ху,/ и отто́ле обогати́ся безстра́стием,/ поя́ в се́рдцы свое́м Го́сподеви всегда́.

Преподо́бне о́тче Адриа́не,/ от всего́ усе́рдия своего́ изво́ли/ Ева́нгельски после́довати Христу́,/ та́ко бо помина́я псало́мская уче́ния –/ се удали́хся, бе́гая, и водвори́хся в пусты́ни,/ ча́ях от Бо́га спасе́ния.

Го́споду хотя́щу просла́вити Свою́ Ма́терь,/ Пречи́стую Богоро́дицу,/ живу́щии бо о́крест тоя́ пусты́ни лю́дие/ слы́шавше на де́бри звон по мно́ги дни, иде́же собра́ся оби́тель во и́мя Пресвяты́я Богоро́дицы/ моли́твами преподо́бнаго Адриа́на.

Сла́ва, глас то́йже:

Оста́вив мир, преподо́бне,/ и вся, я́же в нем, возненави́дев,/ Христа́ Еди́наго возлюби́л еси́/ и, по Нем после́дуя, невозвра́тным по́мыслом,/ в пусты́ню всели́вся, я́ко во огра́ду Небе́сную,/ поя́ Го́сподеви со ученики́ свои́ми/ и Того́ Ро́ждшую призыва́я на по́мощь, Пречи́стую Богоро́дицу,/ поми́ловати лю́ди, и́же в ве́ре Христо́вой живу́щия,/ моля́щеся о душа́х на́ших.

И ны́не, Богоро́дичен: О, чудесе́ но́ваго:

На стихо́вне стихи́ры, глас 4.

Подо́бен: Да́л еси́ зна́мение:

Пусты́нное озлобле́ние претерпева́я, блаже́нне,/ вся́ко сладостра́стие отри́нул еси́/ и к по́двигу и́ноческому устреми́ся,/ я́ко же дре́внии отцы́, шел еси́ в пусты́ню,/ в Го́рнее селе́ние, и А́нгельское ликова́ние,/ и святы́х водворе́ние.

Стих: Честна́ пред Го́сподем смерть/ преподо́бных Его́.

Весели́ся, пусты́не непло́дная,/ возопи́ с весе́лием,/ се бо в тебе́ преподобному́ченик яви́ся,/ отъя́т от Тебе́ вся́ку непра́вду и дре́внюю зло́бу,/ ему́же уби́йственных ру́це вене́ц испле́тше/ у́жем терпе́ния и ну́ждным умерщвле́нием.

Стих: Блаже́н му́ж, боя́йся Го́спода,/ в за́поведех Его́ восхо́щет зело́.

Весели́ся, це́рковь Бо́жия Ма́тере/ со и́ноки, и просты́ми, и со все́ми окре́стными пусты́нями,/ се бо дре́вний яви́ся трудополо́жник/ Твоему́, Влады́чице, до́му,/ многострада́льный преподобному́ченик Адриа́н,/ и́же бо к тебе́ гряде́т со свои́ми мощми́,/ их же от мног лет не ви́деша.

Сла́ва, глас 8:

Весели́ся, пусты́не, прозя́бшая такова́го граждани́на,/ я́ко во блаже́нных блаже́ннаго,/ Всесвята́го Ду́ха испо́лнена,/ возлюби́ бо пусты́нное пребыва́ние/ и вся́ку доброде́тель испра́ви,/ того́ и мы хода́тая приводя́ще, мо́лимся:/ умоли́ Христа́ спасти́ся душа́м на́шим.

И ны́не: Безневе́стная Де́во:

Тропа́рь, глас 4:

Христо́ву му́ченику тезоимени́т был еси́, преподо́бне,/ мно́ги труды́ подъя́л еси́ терпе́нием свои́м,/ и убие́ние от окре́стных и ну́ждную смерть претерпе́л еси́,/ и ны́не, о преподобному́чениче о́тче Адриа́не,/ моли́ душе́вныя и теле́сныя на́ша стра́сти уврачева́ти,/ и́же ве́рою и любо́вию обре́тение честны́х моще́й твои́х почита́ющих/ и всечестну́ю па́мять твою́ пра́зднующих.

Сла́ва и ны́не:

Е́же от ве́ка утае́нное,/ и А́нгелом несведо́мое та́инство,/ Тобо́ю, Богоро́дице, су́щим на земли́ яви́ся Бог,/ в несли́тном соедине́нии воплоща́емь,/ и Крест во́лею нас ра́ди восприи́м,/ и́мже воскреси́в первозда́ннаго,/ спасе́ от сме́рти ду́ши на́ша.

На У́трени

По 1-й кафи́зме седа́лен, глас 4.

Подо́бен: Яви́лся еси́:

Светоли́тием сия́я, я́ко заря́,/ просия́л еси́ в пусты́нях чудесы́ свои́ми, Адриа́не,/ с ве́рою приходя́щим к тебе́.

Сла́ва и ны́не, Богоро́дичен:

В кров Твой, Пречи́стая Де́во, прибега́ющих,/ мольбу́ приими́ от нас,/ непреста́нно моля́щися о нас Человеколю́бцу Бо́гу.

По 2-й кафи́зме седа́лен, глас 4.

Подо́бен: Ско́ро предвари́:

Явле́нию А́нгелову после́довал еси́, преподо́бне Адриа́не,/ претерпе́л еси́ пусты́нное озлобле́ние/ и разбо́йниче стремле́ние, на тя бесо́вскими прило́гами воздви́женное, му́жески прия́л еси́./ Те́мже твою́ па́мять при́сно пе́сньми почита́ем.

Сла́ва и ны́не, Богоро́дичен:

В Твой, Влады́чице, покро́в прибега́ю аз, смире́нный,/ и молю́ Тя, и мил ся де́ю,/ поми́луй мя, Чи́стая, я́ко превзыдо́ша главу́ мою́ грехи́ моя́,/ и бою́ся, Влады́чице, муче́ния, и трепе́щу./ Моли́тву сотвори́, Чи́стая, к Сы́ну Своему́ от сих изба́вити мя.

По полиеле́и седа́лен, глас 8:

Смире́нием Влады́це Христу́ после́дуя,/ воздержа́нием житие́ украси́в/ и от сего́ плоды́ терпе́ния показа́л еси́,/ муче́нием венца́ досто́йно сподо́бився, преподо́бне Адриа́не,/ моли́ Христа́ Бо́га согреше́нием оставле́ние дарова́ти/ чту́щим любо́вию святу́ю па́мять твою́.

Сла́ва и ны́не, Богоро́дичен:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище су́щи Уте́шителя, Всепе́тая,/ беззако́ний мя су́ща скве́рно жили́ще и бесо́м игра́лище в разуме бы́вша,/ потщи́ся сих злоде́йствия мя изба́вити,/ све́тло жилище доброде́телем соде́лавше,/ Светода́тельная и Нетле́нная,/ разжени́ о́блак страсте́й и Вы́шняго прича́стия сподо́би/ и Све́та Невече́рняго моли́твами Твои́ми.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех/ я́же воздаде́ ми. Вся́кое дыха́ние да хва́лит Го́спода. Ева́нгелие от Ма́рка, зача́ло 37.

По 50-м псалме́ стихи́ра, глас 6:

Го́ры у́бо, и хо́лми,/ и вся окре́стныя дубра́вы,/ прииди́те, возра́дуемся в ны́нешнее торжество́,/ днесь созыва́ет нас на весе́лие преподобному́ченик Адриа́н,/ и́же с побе́дою гряде́т,/ возвраща́ет своя́ мо́щи на пе́рвоо́бразное свое́ ме́сто,/ в дом Бо́жия Ма́тере,/ иде́же Влады́чица изво́лила ему́ бы́ти/ и показа́ ме́сто хле́бом и ры́бою пред о́бразом Свои́м.

Кано́н, глас 3.

Пе́ние моле́бно сло́жено по а́збуце, соверше́но же и́менем списа́вшаго.

Песнь 1

Ирмо́с:Су́шу глубороди́тельную зе́млю/ со́лнце наше́ствова иногда́:/ я́ко стена́ бо, огусте́ обаполы́ вода́/ лю́дем пешемореходя́щим/ и Богоуго́дно пою́щим:/ пои́м Го́сподеви, сла́вно бо просла́вися.

А́гнец непоро́чный, Бо́жий Сло́ве,/ отве́рзи ми устне́ недосто́йнии,/ да поне́ возмогу́ воспе́ти преподобному́ченика Адриа́на, Твоего́ страда́льца.

Был еси́, преподо́бне, пусты́ни Во́тхинския пе́рвый жи́тель, сла́вне,/ и Небе́снаго Ца́рствия насле́дник яви́ся страда́нием свои́м,/ и Христу́ предста́в, ра́дуяся, поя́:/ сла́вно бо просла́вися.

Всего́ себе́ возложи́в, преподо́бне, Бо́гови,/ и жили́ще яви́ся Пресвято́му Ду́ху и А́нгелом еди́нокро́вниче,/ помина́й ве́рою чту́щих тя, поя́ Бо́гови:/ сла́вно бо просла́вися.

Богоро́дичен: Го́спода Роди́тельнице, Влады́чице Мари́е,/ моли́, Его́же родила́ еси́, Бо́га и Царя́ на́шего,/ да ми́лостив бу́дет нам в День Су́дный.

Песнь 3

Ирмо́с:Непло́дная душе́ и бесча́дная,/ стяжи́ плод благосла́вныи́,/ веселя́щися, возопи́й:/ утверди́хся Тобо́ю, Бо́же,/ несть свят, несть пра́веден,/ па́че Тебе́, Го́споди.

Де́латель быв, блаже́нне, за́поведем Госпо́дним, непреста́нно в них поуча́яся,/ сего́ ра́ди вни́де в Небе́сная селе́ния муче́нием свои́м и вопия́, ра́дуяся:/ несть свят и несть пра́веден, па́че Тебе́, Го́споди.

Егда́ воззави́де тебе́ прелука́вый,/ тогда́ наво́дит на тя лука́вых челове́к разбо́йническим наше́ствием,/ ты же, преподо́бне, не устраши́вся убие́ния от них, Христу́ вопия́:/ несть свят и несть пра́веден, па́че Тебе́, Го́споди.

Житие́м доброде́тельным Бо́гови угоди́л еси́/ и лука́вых челове́к посрами́л еси́,/ и́же не хотя́ху тя ви́дети на сем ме́сте со ученики́ твои́ми,/ ты же Христу́ взыва́л еси́:/ несть свят и несть пра́веден, па́че Тебе́, Го́споди.

Богоро́дичен: Зачала́ еси́ о́тчее Сло́во Ипоста́сное,/ Его́же мо́ли, Богоро́дице,/ изба́вити от бед рабы́ Твоя́, вои́стинну Тя призыва́ющих.

Седа́лен, глас 3.

Подо́бен: Красоте́ де́вства:

Бога́тство тле́нно и сла́ву мимотеку́щую оста́вив,/ пусты́нное же пребыва́ние па́че возлюби́л еси́,/ те́мже ублажа́ем честно́е страда́ние твое́ и, торжеству́юще, вси вопие́м ти:/ помяни́ нас ко Го́споду, преподо́бне Адриа́не, о́тче наш.

Сла́ва и ны́не, Богоро́дичен:

Я́ко неде́ланен, Де́во, виногра́д,/ прекра́сный Грозд прозябла́ еси́,/ источа́ющий нам вино́ спасе́нное, всех веселя́щее ду́ши и телеса́./ Те́мже, я́ко вино́вну Тя по до́лгу ублажа́юще,/ при́сно со А́нгелом вопие́м:/ ра́дуйся, Обра́дованная, Госпо́дь с Тобо́ю.

Песнь 4

Ирмо́с:Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на сме́рть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди.

За ко́е де́ло возста́ли есте́ на мя, о отцы́ и бра́тие,–/ преподо́бному моля́щуся уби́йцам и глаго́лющу:/ ма́ло осла́бите ми, да помолю́ся, уже́ бо све́та сего́ не и́мам ви́дети,–/ со слеза́ми Христу́ взыва́я:/ сла́ва си́ле Твое́й, Го́споди.

Иногда́ преподо́бнии отцы́ в Сина́и и Раи́фе избие́ни бы́ша от неве́рных,/ сии́ же, ве́рнии, зле́е неве́рных яви́шася,/ преподо́бнаго со ученики́ сме́рти преда́ша и ме́сто его́ опустоши́ша./ Пра́веднии же и по сме́рти непреста́нно Христу́ взыва́ют:/ сла́ва си́ле Твое́й, Го́споди.

Исполня́я за́поведи Боже́ственныя, е́же злу не проти́витися,/ и ты, преподо́бне, за убива́ющих тя моля́ше:/ Го́споди, не поста́ви им греха́ сего́! –/ и ве́рно взыва́ше:/ сла́ва си́ле Твое́й, Го́споди.

Богоро́дичен: Кади́льнице всезлата́я, Мари́е Всенепоро́чная,/ Христа́ моли́, Его́же родила́ еси́,/ изба́витися нам от бед и огня́ ве́чнующаго.

Песнь 5

Ирмо́с:К Тебе́ у́тренюю, всех Творцу́,/ преиму́щему всяк ум ми́рови,/ зане́ свет – повеле́ния Твоя́,/ в ни́хже наста́ви мя.

Лу́ки злых сокруши́л еси́ терпе́нием свои́м/ и брань их смире́нием до конца́ разори́л еси́, преподо́бне,/ и вене́ц нетле́ния стяжа́л еси́.

Моли́твами и моле́нием взы́де на Небе́сная/ и, с ли́ки преподо́бных оте́ц пребыва́я, весели́шися,/ помина́й, преподо́бне, нас,/ честны́х твои́х моще́й обре́тение све́тло торжеству́ющих.

Нечести́вии лю́дие вску́ю шата́шася на свята́го,/ подоба́ше бо пра́веднаго дарми́ почти́ти,/ я́ко Госпо́дня пропове́дника и учи́теля их.

Богоро́дичен: Упова́ние и наде́жда на́ша Ты еси́, Пречи́стая,/ спаси́ правосла́вныя лю́ди,/ Тебе́ моля́щияся и и́мя Твое́ призыва́ющия.

Песнь 6

Ирмо́с:Бе́здна после́дняя грехо́в обы́де мя,/ и исчеза́ет дух мои́;/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́.

При́зван быв, преподо́бне, Боже́ственною благода́тию,/ во е́же в пусты́ни послужи́ти Ма́тери Его́/ и и́ноческое жити́е лю́дем показа́ти./ Ты же, я́ко па́стырь и́стинен,/ за ста́до свое́ и за мно́гих хотя́щих спасти́ся ду́шу свою́ положи́л еси́.

Разу́мне поуча́л еси́ ча́да своя́, преподо́бне,/ ча́сто наказу́я духо́вными словесы́,/ да пребу́дут, тве́рдо соблюда́юще и́ноческое обеща́ние.

Свяще́нством, па́че же и старе́йшинством,/ от святи́теля че́стно почте́н был еси́, преподо́бне,/ приле́жно моле́ние за ста́до свое́ приноша́й и за лю́ди,/ и́хже Кро́вию Свое́ю стяжа́л Христо́с Бог,/ да обря́щут ми́лость в Де́нь Су́дный.

Богоро́дичен: Ты еси́, Пречи́стая Богоро́дице, прибе́жище на́ше и утвержде́ние,/ моли́ Сы́на Своего́ и Бо́га на́шего/ пода́ти на́м спасе́ние и грехо́в оставле́ние.

Конда́к, глас 4:

Христа́ ра́ди до́блественне претерпе́л еси́/ и вене́ц нетле́ния от Него́ восприя́л еси́ страда́ния своего́,/ приходя́щим же с ве́рою к тебе́ подае́ши цельбы́,/ о преподобному́чениче Адриа́не, приснопа́мятне,/ моли́твенниче о душа́х на́ших.

И́кос:

Не уныва́й, предо́брая пусты́не, и́ноческое селе́ние, честны́м воздыха́нием,/ преста́ни от многоле́тныя печа́ли,/ се бо Госпо́дь моле́нием Ма́тере Своея́/ услы́ша воздыха́ние твое́ и па́ки да́рует тебе́ пе́рваго отца́,/ честны́я его́ мо́щи на исцеле́ние боля́щим./ Приими́ у́бо ты́я с ра́достию и весе́лием,/ поклони́ся им и рцы любе́зно:/ о преподобному́чениче Адриа́не приснопа́мятне,/ моли́ся Христу́ Бо́гу спасти́ся душа́м на́шим.

Песнь 7

Ирмо́с: Три́е о́троцы в пещи́, Тро́ицупрообрази́вше,/ преще́ние о́гненное попра́ша/ и, пою́ще, вопия́ху:/ благослове́н еси́, Бо́же оте́ц на́ших.

Веселя́тся пусты́ннии и́ноцы, воспева́юще обре́тение моще́й твои́х, Адриа́не преподо́бне,/ и мы, ча́да твоя́, уми́льно вопие́м:/ испроси́ нам оставле́ние согреше́нием и благи́х наслажде́ние.

Фарао́на мы́сленнаго кро́вию свое́ю потопи́л еси́, блаже́нне,/ от Христа́ дерзнове́ние прии́м,/ е́же цели́ти челове́ка, неду́ги разли́чными одержи́ма,/ и ве́лие ра́дование всему́ ми́ру сотвори́л еси́, поя́:/ оте́ц на́ших Бо́же, благослове́н еси́.

Христе́, Царю́ Безнача́льне,/ приими́ моле́ние раб Свои́х, прося́щих у тебе́ вели́кия ми́лости Твоея́,/ прости́ на́ша согреше́ния, во́льная и нево́льная, моли́твами отца́ на́шего Адриа́на,/ да вси в ра́дости душе́вней возопии́м:/ оте́ц на́ших Бо́же, благослове́н еси́.

Богоро́дичен: Утро́бы Твоя́ про́йде У́мное, Богоро́дице, Со́лнце, Сего́ моли́ я́ко Сы́на Своего́ и Го́спода/ пода́ти на́м разреше́ние от скорбе́й и боле́знем облегче́ние,/ да ра́достною душе́ю вопие́м Христу́ Бо́гу:/ оте́ц на́ших Бо́же, благослове́н еси́.

Песнь 8

Ирмо́с:Веще́ственнаго огня́ пла́мень/ невеще́ственным увяди́ша Богозри́мии о́троцы и поя́ху:/ благослови́те, вся дела́ Госпо́дня, Го́спода.

Правосла́вным христиа́ном испроси́, Адриа́не преподо́бне,/ мир, здра́вие, и спасе́ние, и на враги́ одоле́ние,/ да в ра́дости душе́вней возопии́м:/ благослови́те, вся дела́ Госпо́дня, Го́спода.

Чу́вственныя враги́ победи́в и от них муче́ния венце́м увязе́ся,/ по достоя́нию вси тя ублажа́ем я́ко му́ченика и пра́ведника, Адриа́не преподо́бне,/ не преста́й о нас моля́щи Христу́ Бо́гу, Ему́же возопии́м:/ благослови́те, вся дела́ Госпо́дня, Го́спода.

Шум бысть от чу́вственных враго́в,/ и́же внеза́пу приидо́ша на оби́тель свята́го и возложи́ша на тя, преподо́бне, злы́я ра́ны ноже́м,/ изощре́нием и о́гненным подпале́нием, коне́чно же ну́ждно и безчелове́чно сме́рти преда́ша,/ ты же, до́блий страда́лец, вся претерпе́в бу́дущия ра́ди жи́зни, поя́:/ благослови́те, вся дела́ Госпо́дня, Го́спода.

Богоро́дичен: Ще́драго и Челове́колюби́ваго Бо́га роди́ти, Богоро́дице, сподо́билася еси́,/ Сего́ моли́, Неискусобра́чная Отрокови́це,/ низпосла́ти нам, ве́рным, ве́лию ми́лость.

Песнь 9

Ирмо́с:В зако́не се́ни и Писа́ний/ о́браз ви́дим, ве́рнии:/ всяк му́жеский пол, ложесна́ разверза́я,/ свят Бо́гу./ Тем Пе́рворожде́нное Сло́во,/ Отца́ Безнача́льна/ Сы́на, первородя́щася Ма́терию неискусому́жно,/ велича́ем.

Анто́ния, пустынножи́теля, житию́ поревнова́л еси́, преподо́бне,/ того́ ра́ди продли́в Бог душе́вное твое́ усе́рдие,/ е́же к Нему́ стяжа́л еси́,/ прославля́ет тя, вели́кий Дарода́тель.

И́ноческая ти́хая и безмо́лвная пусты́ня,/ от мно́гих лет в пла́че и се́товании бы́вша,/ ны́не у́бо ра́достию весели́тся,/ поне́же первоо́бразная красота́ ея́ па́ки возврати́ся.

Та́ко рыда́ете и пла́чете, пусты́нная ча́да,/ сиро́тства и лише́ния отца́ своего́,/ сей бо с побе́дою гряде́т, вра́жию главу́ сокруши́в до конца́,/ нося́ на главе́ кре́стное зна́мение – Христо́во одоле́ние.

Богоро́дичен: Не дря́хлуй , Ио́сифе, зря Мене́, Де́ву, непра́здну су́щу,/ у́зриши бо Ражда́емаго от Мене́/ и ра́достию я́ко Бо́гу поклони́шися Ему́ со все́ми.

Свети́лен:

Ди́вно чу́до несказа́нно!/ яви́ся Тебе́ А́нгел, имену́я себе́ и́ноком безсту́жем,/ и́же и указа́ тебе́ ме́сто пусты́нное,/ Бо́гу та́ко изво́лившу.

Сла́ва и ны́не, Богоро́дичен:

Тя пе́сньми ублажа́ем, Де́во,/ Бо́га бо родила́ еси́ и на руку́ но́сиши,/ Того́ моли́ о душа́х на́ших.

Стихи́ры на 4, глас 2.

Подо́бен: Егда́ от Дре́ва:

Егда́ манове́нием Боже́ственным/ мирски́я красоты́, ра́дуяся, о́тче, отше́л еси́,/ тогда́ предпоче́л еси́ яре́м Христо́в,/ Ева́нгельски ходи́ти во след Го́спода,/ те́сный и зело́ приско́рбный путь ше́ствовати,/ претерпе́л еси́ пусты́нное озлобле́ние,/ помина́я бу́дущее ра́дование, Адриа́не преподо́бне.

Егда́ всели́ся в пусты́ню, преподо́бне, со ученико́м свои́м,/ тогда́ помышля́я вну́треннима очи́ма,/ иде́же Го́сподеви возсыла́ти непреста́нное славосло́вие,/ и, я́ко му́дрый прави́тель,/ вся Боголе́пно устроя́я е́же к по́двигу духо́вному,/ сим возводя́ на высоту́ разуме́ния.

Егда́ беззако́ннии лю́дие ви́девше тя, преподо́бне,/ Бо́гу помога́ющи ти на духо́вное пребыва́ние,/ тогда́ вооружа́ются на тя,/ и прихо́дят со ору́жием и дреко́льми,/ и, я́ко во́лцы, обыдо́ша ста́до твое́/ и разли́чныя ра́ны на и́ноков возложи́ша,/ и́ных ору́дием умертви́ша, и церко́вную ле́поту отья́ша,/ и до конца́ все разори́ша./ Сия́ ви́дев, преподо́бный со слеза́ми вопия́ше:/ сла́ва Бо́гу, венча́вшему нас кро́вным проли́тием!

Сла́ва, глас 8:

Сле́зное рыда́ние и серде́чное воздыха́ние/ ко враго́м свои́м предлага́я, преподо́бне, уми́льно глаго́лаше:/ о отцы́ и бра́тие,/ за ко́е де́ло хо́щете ми уби́ти?/ аз бо приидо́х к вам повеле́нием Бо́жиим на спасе́ние ва́ше,/ ны́не же мене́ сме́рти предае́те./ О отцы́ и бра́тие,/ молю́ся вам, припа́дая,/ ели́ко ма́ло умилосе́рдитеся,/ отпусти́те в пре́жнее селе́ние,/ иде́же и́ноческое мое́ обеща́ние,/ и та́мо иду́ и вселю́ся со отцы́ и бра́тиями мои́ми,/ да в ра́дости почие́м Го́спода своего́,/ Бо́же наш, сла́ва Тебе́!

И ны́не, Богоро́дичен:

Влады́чице, приими́ моли́тву раб Твои́х/ и изба́ви нас/ от вся́кия ну́жды и печа́ли.

На Литурги́и слу́жба преподо́бническая.

Моли́тва свято́му преподобному́ченику Адриа́ну Пошехо́нскому

О вели́кий чудотво́рче, святы́й и преподобному́чениче, многострада́льне игу́мене Адриа́не! услы́ши мя, гре́шнаго раба́ своего́, и и́же к те́бе моего́ моле́ния, я́ко име́я дерзнове́ние ко Святе́й Тро́ице, помяни́ мя, да отпу́стятся грехи́ моя́, и Небе́снаго Ца́рствия сподо́би мя, преподобному́чениче, твои́ми моли́твами.

Тропа́рь, глас 4:

Ду́ха Свята́го благода́ть стяжа́в,/ богому́дре святи́телю Филаре́те,/ и́стину и пра́вду ра́зумом просвеще́нным/ лю́дем пропове́дал еси́,/ мир и ми́лость се́рдцем умиле́нным/ стра́ждущим яви́л еси́,/ я́ко учи́тель ве́ры и страж неусы́пный/ па́ству русскую жезло́м пра́вости сохрани́л еси́./ Сего́ ра́ди, ко Христу́ Бо́гу дерзнове́ние име́я,/ моли́ дарова́ти Це́ркви утвержде́ние// и душа́м на́шим спасе́ние.

Конда́к, глас 2:

Я́ко и́стинный подража́тель преподо́бнаго Се́ргия,/ доброде́тель измла́да возлюби́л еси́,/ богоблаже́нне Филаре́те./ я́ко па́стырь пра́ведный и испове́дник непоро́чный,/ по святе́м преставле́нии/ от безбо́жных поруга́ние и поноше́ния прия́л еси́,/ Бог же зна́меньми и чудесы́ тя просла́ви// и засту́пника Це́ркве на́шея яви́.

Моли́тва

О пресла́вне и богому́дре святи́телю Христо́в Филаре́те, Русския Це́ркве свети́льниче, земли́ на́шея похвало́ и гра́ду Москве́ украше́ние! Ты житие́м и служе́нием твои́м трие́м вселе́нским святи́телем был еси́ подо́бник: Вели́кому Васи́лию – я́ко бытие́ су́щих изъясни́л еси́, Це́ркве Бо́жия и та́ин Христо́вых строи́тель до́брый яви́лся еси́, и́ноческих уста́вов быв ре́вностный исполни́тель и покрови́тель; Богосло́ву Григо́рию – я́ко, небота́инственных созерца́ний о Святе́й Тро́ице и о Бо́зе Сло́ве сподо́бивыйся, сих иску́сный провозве́стник яви́лся еси́; Златоу́стому Иоа́нну – я́ко неуста́нный пропове́дник и учи́тель покая́ния наро́да Бо́жия был еси́. И ны́не, вку́пе с ни́ми предстоя́ во сла́ве Престо́лу Бо́жию и хода́тайствуя о нас, моли́: Це́ркви Русстей на ка́мени испове́дания правосла́вныя ве́ры утвержде́нней бы́ти, стране́ на́шей мир и едине́ние дарова́ти, па́стырем сло́во Боже́ственныя И́стины пра́во пра́вити, град Москву́ и па́ству твою́ от вся́ких напа́стей сохрани́ти. Святу́ю оби́тель, иде́же почива́ют честны́я мо́щи твоя́, по заве́том преподо́бнаго Се́ргия, я́ко учени́к его́ при́сный, до́бре упра́ви; и́ноки в по́двизех укрепи́; наста́вники умудри́; зва́нныя к па́стырскому де́ланию, уча́щияся ве́ре и благоче́стию в вертогра́де твое́м духо́внем, соде́лай избра́нны и досто́йны служе́ния сего́. При́зри с Небесе́, святи́телю, на ны, ча́да твоя́, и да́руй те́плым твои́м хода́тайством ко Го́споду в за́поведех Его́ нам преспева́ти, ве́ру тве́рду, любо́вь нелицеме́рну и благоче́стие до после́дняго часа́ сме́ртнаго сохрани́ти, да непосты́дно предста́нем Спаси́телю на́шему Го́споду Иису́су Христу́, Ему́же со Отце́м и Святы́м Ду́хом подоба́ет сла́ва, честь и поклоне́ние, ны́не и при́сно, и во ве́ки веко́в. Ами́нь.