На Го́споди, воззва́х: стихи́ры, глас 4.

Подо́бен: Я́ко до́бля в му́ченицех:

Богособра́нное ополче́ние, свяще́нное во́инство,/ собра́ние Боже́ственное, наро́д святы́й,/ полк му́чеников Богодохнове́нный,/ кра́сное сгромажде́ние, нерасте́рзное споборе́ние,/ и́стинно яви́стеся, достосла́внии,/ и Вы́шния митропо́лии досто́йно жи́теле./ Сего́ ра́ди до́лжно ублажа́етеся.

С Ника́ндром Иси́хия, Афана́сия, Ма́манта,/ Боже́ственнаго Вара́хия, и Каллини́ка,/ и Феоге́на, и Ни́кона,/ Ло́нгина и Фео́дора,/ Уалле́рия купно и Ксанфи́я,/ Феоду́ла, и Каллима́ха, и Евге́ния,/ вси соше́дшеся,/ с Боже́ственным Феодо́хом и Острихи́я почтим.

До́бляго Ие́рона, сла́внаго Епифа́ния,/ Максимиа́на ку́пно и Дуки́тия,/ Клавдиа́на, и Фео́фила,/ и Боже́ственнаго Гига́нтия,/ и Дорофе́я ве́рно, и Феодо́та воспои́м,/ и Кастри́хия, и Аники́ту ку́пно, и Фемели́я,/ Евтихи́я же согла́сно,/ Истины свиде́тели.

И́ны стихи́ры преподо́бнаго, глас 6.

Подо́бен: Все отло́жше:

Все отложи́в страсте́й безслове́сие/ и плоть ду́ху покори́в,/ был еси́ доброде́тели пра́вило,/ мона́шествующих утвержде́ние,/ по́стников о́браз, преподо́бных удобре́ние./ И ны́не неизрече́нную добро́ту зри́ши Творца́ твоего́,/ пита́яся при́сно добро́тами, су́щими на Небесе́х ду́хом./ Тем, соше́дшеся, в пе́снех пе́нии сла́дкими/ твою́ честну́ю и всепра́зднственную па́мять пра́зднуем.

Все́ оттря́сл еси́ ве́щи тяжкобре́менное/ и многомяте́жное пло́ти волне́ние,/ укроти́в, му́дре, дыха́ния,/ пребы́л еси́, страстьми́ непрекло́нен,/ я́ко столп, укрепля́емь/ духо́вными броня́ми, умо́м до́блественным./ И ны́не Боже́ственнаго получи́ вои́стинну виде́ния и све́тлости,/ и к Нему́же жела́л еси́, преста́вился,/ наслажда́яся Его́ неконе́чныя све́тлости, положе́нием обожа́емь.

Илии́ подо́бяся и Иоа́нну свети́льнику,/ Свет возлюби́в,/ молча́ти в гора́х и в пусты́нях сухи́х,/ восхожде́нию всегда́ поуча́яся Боже́ственному/ и преспева́я доброде́телей путе́м./ Те́мже пости́гл еси́ жела́ние кра́йнее, прему́дре,/ и, ра́дуяся, предстои́ши трисия́нному Тро́ицы Све́ту,/ от Него́же нехода́тайственне Боже́ственную прие́мля зарю́,/ со дерзнове́нием моли́ся о душа́х на́ших.

Сла́ва, глас 5:

Преподо́бне о́тче,/ не дал еси́ сна твои́м очесе́м,/ ниже́ ве́ждам твои́м дрема́ния,/ до́ндеже ду́шу и те́ло от страсте́й свободи́л еси́/ и тебе́ сама́го угото́вал еси́ Ду́ха жили́ще./ Прише́д бо, Христо́с со Отце́м/ оби́тель в тебе́ сотвори́,/ и, Единосу́щныя Тро́ицы уго́дник быв,/ великопропове́дниче Ла́заре, о́тче наш,/ моли́ся о душа́х на́ших.

И ны́не, Богоро́дичен или́ Кре́стобогородичен.

Подо́бен: Ра́дуйся:

А́гнца Своего́ А́гница иногда́ зря́щи,/ к заколе́нию тща́щася,/ усе́рдно после́доваше,/ сия́ вопию́щи Ему́:/ ка́мо и́деши, Ча́до Мое́ сладча́йшее, Христе́?/ чесо́ ра́ди ско́рое тече́ние сие́, Долготерпели́ве, тече́ши неле́ностью?/ Иису́се Возжеле́ннейший безгре́шне,/ Многоми́лостиве Го́споди,/ даждь Ми сло́во, Рабе́ Твое́й./ Сы́не Мой Вселюбе́знейший,/ не пре́зри, Ще́дре, молча́, Тя стра́нно ро́ждшую,/ Бо́же Всеще́дре, да́руяй ми́ру ве́лию ми́лость.

На стихо́вне Окто́иха.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду трудо́в твои́х,/ де́монов разруши́л еси́ полки́,/ А́нгелов чи́ны пости́гл еси́,/ и́хже житию́ непоро́чно поревнова́л еси́./ Дерзнове́ние име́я ко Хри́сту Бо́гу,/ мир испроси́ душа́м на́шим.

И ны́не, Богоро́дичен или́ Кре́стобогородичен.

Подо́бен: Тридне́вен:

Лю́ди беззако́ннейшия,/ без пра́вды пригвожда́ющия Тя на Дре́ве,/ Де́ва и Чи́стая Ма́ти Твоя́, зря́щи,/ я́коже Симео́н прорече́,/ утро́бою, Спа́се, уязвля́шеся.

Тропа́рь, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Сла́ва, преподо́бнаго, глас 8:

Бде́нными моли́твами,/ тече́ньми сле́зными столп омочи́л еси́,/ и из глубины́ воздыха́ньми/ во сто трудо́в уплодоноси́л еси́,/ и был еси́ па́стырь, всем подая́ проще́ние,/ преподо́бне о́тче наш Ла́заре:/ моли́ся Христу́ Бо́гу/ спасти́ся душа́м на́шим.

На У́трени

Кано́н Окто́иха еди́н и святы́х два. Кано́н му́чеников, его́же краегране́сие: Му́дрым похвалу́ сию́ му́чеником приношу́. Глас 8.

Песнь 1

Ирмо́с:Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Совоку́пльшеся Боже́ственным Небе́сным си́лам,/ всем проси́ти очище́ния,/ светоно́сную ва́шу па́мять похваля́ющим, добропобе́днии му́ченицы.

Путь муче́ния све́тло ше́ствовати жела́юще,/ претерпе́сте кре́пко все треволне́ние муче́ния,/ укрепля́еми Ду́хом Святы́м.

Свети́льницы яви́стеся на земли́,/ многобо́жия разруша́юще тьму, Боже́ственнии страстоте́рпцы,/ сего́ ра́ди невече́рний Свет прие́млете.

Богоро́дичен: Ма́нием вся содева́яй,/ из Тебе́ па́че сло́ва воплоща́ется, Ма́ти Чи́стая,/ страстоте́рпцы венча́вый, побе́дно врага́ попра́вшия.

Ин кано́н преподо́бнаго, его́же краегране́сие: Мольбу́ пою́ второ́е тебе́, треблаже́нне. Глас 2.

Песнь 1

Ирмо́с:Гряди́те, лю́дие,/ пои́м песнь Христу́Бо́гу,/ разде́льшему мо́ре и наставльшему лю́ди,/ я́же изведе́ из рабо́ты еги́петския,/ я́ко просла́вися.

Гряди́те, ве́рнии, Ду́хом Боже́ственным веселя́щеся ве́рно,/ восхва́лим Боже́ственнаго Ла́заря, к нему вопию́ще:/ блаже́нне, твои́ми моли́твами бед изба́ви ны.

К твоему́ па́ки оте́честву приити́ тя Бог сотвори́ и не хотя́ща:/ тем приходя́ща мя при́сно к страсте́м спаси́ моли́твами твои́ми.

Светоза́рная Богода́нная любо́вь, в тебе́ возсия́вши бога́тно,/ свою́ ду́шу за бли́жняго тя усе́рдно, Богоно́се, положи́ти сотвори́.

Богоро́дичен: Спаси́ ны, Богороди́тельнице Всенепоро́чная, вся́каго гне́ва и скорбе́й,/ покланя́ющияся Твоему́ свято́му о́бразу/ и ве́рою Богоро́дицу испове́дающия Тя.

Песнь 3

Ирмо́с:Небе́снаго кру́га верхотво́рче Го́споди/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ еди́не Человеколю́бче.

Свяще́нными повеле́нии твои́ми свяще́нныя му́ченики, сла́вне Ие́роне,/ к Боже́ственному страда́нию ты наста́вил еси́,/ и неради́ти о му́ках пресла́вно сотвори́л еси́, Богоблаже́нне.

Сокруша́еми дре́вием, страсть честну́ю, святи́и, преблага́го Влады́ки изобрази́ли есте́,/ сокруши́сте па́губныя лестцы́ тьмы благода́тию Вседержи́теля.

На Го́спода всех, Богови́днии му́ченицы, возло́жше упова́ние,/ отню́д неподви́жими бы́сте стоя́ния бо́льшаго,/ но зако́нно Боже́ственное тече́ние соверши́сте нра́ва пра́востию.

Богоро́дичен: Многоимени́тая Отрокови́це, ра́дуйся, Чи́стая Влады́чице,/ Я́же неопи́санное Сло́во поро́ждши опи́санно пло́тию,/ Его́же лик му́ченический, Бо́га испове́дая, стра́ждет крепча́йше.

Ин

Ирмо́с:Утверди́ нас в Тебе́, Го́споди,/ Дре́вом умерщве́й грех,/ и страх Твой всади́/ в сердца́ нас, пою́щих Тя.

Кре́постию Боже́ственною, му́дре, укрепля́емь,/ изба́вился еси́ звере́й свире́пых./ Тем моли́ся Христу́ от звере́й мы́сленных изба́вити пою́щия тя.

Укрепля́емь Христо́вою си́лою, преподо́бне,/ жа́жду, и тя́жесть пусты́нную, и ску́дость поне́сл еси́ до́блественно/ наде́ждею неизрече́нныя сла́дости.

Избе́гл еси́ вражде́бных напа́стей, всеблаже́нне, Ага́риных вну́ков,/ Боже́ственною благода́тию покрыва́емь и мно́гим на по́льзу спаса́емь.

Богоро́дичен: Влады́ку вся́ческих, Чи́стая, родила́ еси́, Де́во, па́че сло́ва неизрече́нно,/ Его́же моли́, Всепе́тая, пою́щия Тя влады́чествия измени́ти страсте́й.

Конда́к преподо́бнаго, глас 4.

Подо́бен: Яви́лся еси́:

Я́ко свети́льника превели́каго/ Це́рковь Христо́ва сла́вит тя с весе́лием псало́мски./ Те́мже не преста́й моля́ся Христу́/ да́ти всем прегреше́ний проще́ние.

Седа́лен, глас 4.

Подо́бен: Удиви́ся:

Му́жества кре́пкое показа́вше, му́дрии,/ притупи́сте враго́в всезло́бныя козни, на суди́щи пропове́давше Христа́./ Тем глава́ми усе́чени и Боже́ственною десни́цею венча́стеся,/ и́же к трем десяти́цам три блаже́ннии, Мелити́ны же жи́тели,/ нас, ве́рою вы чту́щия, помяни́те, честни́и му́ченицы.

Сла́ва, преподо́бнаго, глас 3.

Подо́бен: Боже́ственныя ве́ры:

Боже́ственный ум твое́ се́рдце имы́й, преподо́бне,/ земна́я измени́ Боже́ственными и стоя́щими и сликовству́еши А́нгелом,/ Све́та невеще́ственнаго наслажда́яся, непреста́нно веселя́ся./ Тем, преподо́бне Христа́ Бо́га моли́ дарова́ти нам ве́лию ми́лость.

И ны́не, Богоро́дичен:

Боже́ственная ски́ния была́ еси́ Сло́ва, еди́на Пречи́стая, Ма́ти Де́во,/ чистото́ю А́нгелы превозше́дшая,/ па́че всех мене́ персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

Крестобогоро́дичен:

Нескве́рная А́гница Сло́ва, нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно, рыда́ющи, вопия́ше:/ увы́ Мне, Ча́до Мое́,/ ка́ко стра́ждеши во́лею, хотя́ изба́вити от страсте́й безче́стия челове́ка?

Песнь 4

Ирмо́с:Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Заря́ми Боже́ственных по́двиг, всебога́тии, вселе́нныя вся концы́ просвеща́ете пресла́вно/ и неви́димых враго́в тьму отго́ните./ Тем благочестному́дренно ва́ше соверша́ем светоно́сное и Боже́ственное торжество́.

Равному́дрии вси, по́двиг соверши́вше, и по́чести ра́вно сподо́бистеся,/ да́вше кро́ви своя́ за Пострада́вшаго и Боже́ственную Кровь Источи́вшаго на Дре́ве во́лею за на́ше спасе́ние./ Сего́ ра́ди вы ублажа́ем.

Ны́не мудрыя восхва́лим му́ченики,/ Феоге́на и Ма́манта, Ие́рона, Клавдиа́на, Ни́кона ку́пно и Ника́ндра,/ Ло́нгина, и Иси́хия, и Вара́хия, Каллини́ка вели́каго/ и Ксанфи́я Боже́ственнаго, Фео́фила и Уалле́рия.

Всеу́мно к подвиго́м устреми́вшеся, соде́йствующу вся, достосла́внии,/ Боже́ственную благода́ть Изба́вителя обрето́сте/ и вся доблему́дренно претерпе́сте муче́ния, благода́рственно Христу́ пою́ще:/ си́ле Твое́й сла́ва, Челове́колюбче.

Богоро́дичен: Зако́на се́ни и проро́ческая гада́ния/ Тя Ма́терь провозвести́ша дре́вле бы́вшу Изба́вителя./ И́мже ны́не соверше́ние мы, зря́ще, Всенепоро́чная, согла́сно Тя пое́м,/ страстоте́рпцев сла́во и му́ченик святы́х держа́ва.

Ин

Ирмо́с:Пою́ Тя,/ слу́хом бо, Го́споди, услы́шах и ужасо́хся,/ до мене́ бо и́деши, мене́ ища́ заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.

Я́ко всех вре́менных, преподо́бне, пристра́стия же и любве́ отбежа́в,/ всю к Бо́гу твою́ наде́жду стяжа́в всегда́./ И е́же стяжа́л еси́, ни́щих ру́ки прия́ша.

Де́монское злоде́йство, преподо́бне, отрази́в,/ прираже́нии звери́ными некоснове́н от сего́ отню́д пребы́л еси́, блаже́нне,/ Боже́ственною благода́тию покрыва́емь/ тя при́сно во всех Заступа́ющаго.

Разсла́бити твою́ кре́пость, преподо́бне, вселука́вый тща́шеся,/ е́же к Бо́гу зря твою́ любо́вь и благодаре́ние;/ тем на тя псы пусти́, но во тщету́ его́ ухищре́ние обличи́ся.

Богоро́дичен: Пою́ Тя, Богоро́дице Влады́чице, и вопию́ Ти:/ Твое́ю моли́твою освяти́, соблюда́ющи,/ и наста́ви ко спасе́нию мно́гими грехи́ па́дающаго/ и прило́ги де́монскими коле́блема.

Песнь 5

Ирмо́с:Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго;/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Му́дрых страстоте́рпец, Максимиа́на и Боже́ственнаго Евге́ния с Фео́дором, Дуки́тия чту́ще,/ Каллима́ха, ку́пно Феоду́ла и Дорофе́я похва́лим,/ му́жески по́двиг соверши́вшия.

До́блии ору́жницы, во́лею умерщвля́еми и сокруша́еми,/ безсме́ртие ве́чно насле́доваша и в ра́йстей лику́ют ны́не широте́,/ блаже́нныя наде́жды прии́мше.

Дрема́ние небреже́ния отрази́вше всехва́льнии,/ во вре́мя подвиг ку́пно бо́дростию Боже́ственною потеко́сте тече́ние Боже́ственныя ве́ры муче́ния/ и к приста́нищу Небе́сному ны́не приидо́сте.

Богоро́дичен: Свя́зана плени́цами мя прегреше́ний, всепе́тая Влады́чице,/ у́зы а́довы разреши́вшая Боже́ственыым Твои́м Рождество́м,/ разреши́, молю́ся Тебе́, и пути́, вводя́щия к жи́зни, ступа́ти поспеши́.

Ин

Ирмо́с:Све́та Пода́телю и веко́в Тво́рче,Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го Бо́га не зна́ем.

Души́ твоея́ тве́рдое и ра́зума Богостоя́нное, преподо́бне,/ лука́вый, низложи́ти наде́явся, во пса себе́ преложи́в,/ та́ко прии́де искуси́ти тя.

В ску́дости мно́зей недоуме́ния враг быв, отступи́,/ ничто́же отню́д стужи́вша тя, блаже́нне, зря,/ па́че же благода́рственно ску́дость нося́ща.

Жезл си́лы, я́коже ору́жие, крест, преподо́бне, в рука́х всегда́ нося́,/ все вра́жие ко́зней де́йство, я́ко прах, истни́л еси́.

Богоро́дичен: Отча́явшихся Наде́жда и Предста́тельнице ве́рных, спаси́ мя, Ма́ти Бо́жия,/ от вся́каго наси́лия враго́в неви́димых и ви́димых, Всепе́тая.

Песнь 6

Ирмо́с:Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́.

В пе́снех страда́льца Феодо́та, Иларио́на, Гига́нтия му́драго,/ и Афана́сия, и Боже́ственнаго Евти́хия со Епифа́нием по до́лгу ублажи́м.

Да ублажа́тся ве́рно Ие́рон и Диодо́т,/ Кастри́кий му́дрый и Боже́ственный Остри́хий,/ вели́кий Феме́лий со Амони́том, Христовы до́блии му́ченицы.

Крове́й ваших тече́нием/ фарао́на неви́димаго потопи́вше со всем во́инством, добропобе́днии му́ченицы,/ Небеса́ постиго́сте и перворожде́нных Це́рковь украси́сте.

Богоро́дичен: Ору́жия вра́жия, Богороди́тельнице, оскуде́ша,/ отне́леже копие́м прободе́ся Христо́с, Его́же родила́ еси́,/ Кро́вию и водо́ю обетша́вшия челове́ки назида́я.

Ин

Ирмо́с:Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гла́се хвале́ния/ и́стины же ду́хом пожру́ Тебе́.

Храм Бо́гу твое́ се́рдце хотя́ яви́ти, преподо́бне,/ Це́ркви обхожда́л еси́ святы́х,/ от ни́хже прия́л еси́ благода́ть оби́льно Свята́го Ду́ха/ мно́гим челове́ком на утвержде́ние.

Твое́ оте́чество, я́ко бога́тство, тя, Богому́дре, многоце́нное, па́ки прия́т Боже́етвенным судо́м./ Тем стра́нна мя оте́чества Еде́мскаго, преподо́бне,/ су́ща насле́дника сему́ соде́лай.

Це́рковь тя Мари́ны де́вы му́ченицы пе́рво прият все́льника,/ в не́йже, я́ко незаходи́ма, возсия́л еси́,/ звезда́, озаря́я, преподо́бне, во тьме неве́дения спя́щия.

Богоро́дичен: Умоли́ Сы́на Твоего́ и Го́спода, Де́во, о рабе́х Твои́х,/ ве́рою честно́му о́бразу зра́ка Твоего́, Всенепоро́чная, покланя́ющихся при́сно,/ и́бо мо́жеши.

Конда́к, глас 8.

Подо́бен: Я́ко нача́тки:

Лик му́ченический я́сен, полк светоно́сен,/ соше́д к нам разу́мно,/ Це́рковь днесь просвети́л есть чу́дными заря́ми./ Те́мже, пра́зднующе честну́ю па́мять их,/ про́сим от Тебе́, Спа́се наш:/ тех моли́твами от бед изба́ви нас,/ да пое́м Ти: аллилу́ия.

Песнь 7

Ирмо́с:От Иуде́и доше́дше, о́троцы/ в Вавило́не иногда́/ ве́рою Трои́ческою пла́мень пе́щный попра́ша, пою́ще:/ отце́в Бо́же, благослове́н еси́.

Честну́ю твою́ ру́ку за и́стину, Ие́роне сла́вне, отссчену зря,/ благода́рственныя пе́сни Всеви́дцу поя́, взыва́л еси́:/ оте́ц на́ших Бо́же, благослове́н еси́.

Высо́ким смы́слом прообра́зие сострада́льцем был еси́, сла́вне Ие́роне,/ и с ни́ми вы́шняго Ца́рствия жре́бий прия́л еси́, поя́:/ оте́ц на́ших Бо́же, благослове́н еси́.

Во́ини до́блии Царя́ я́вльшеся ве́чнующаго,/ му́жества ва́шего мече́м полки́ лестца́ погуби́ли есте́, пою́ще:/ оте́ц на́ших Бо́же, благослове́н еси́.

Богоро́дичен: Врача́ поро́ждши, Де́во, се́рдца моего́ стра́сти уврачи́, Чи́стая,/ и ве́чнующаго мя муче́ния изба́ви, в пе́снех зову́ща:/ оте́ц на́ших Бо́же, благослове́н еси́.

Ин

Ирмо́с:Вети́и яви́шася о́троцы любому́дрейшии дре́вле,/ от Богоприя́тныя бо души́, Богосло́вяще устна́ми, поя́ху:/ пребоже́ственный отце́в и наш Бо́же, благослове́н еси́.

Трапе́зу оби́льну угото́ва, испо́лнену благи́х доброде́телей ти Боже́ственных,/ и́миже вся пита́я, и пе́ти науча́ше:/ оте́ц на́ших Бо́же, благослове́н еси́.

Глаго́лом уче́ний твои́х прему́дрых после́дующе, лю́дие,/ маловре́менных всех любо́вь вои́стинну усе́рдно отложи́вше,/ и жи́тельство с то́бою я́ко бла́го, всеблаже́нне, произво́лиша .

О́браз стяжа́в жития́ ты Симео́на ди́внаго,/ я́ко ка́мень адама́нт, на столпе́ без покро́ва стоя́л еси́, зовы́й, веселя́ся:/ пребоже́ственный отце́в и наш Бо́же, благослове́н еси́.

Богоро́дичен: Спаси́ мя от се́тей вра́жиих хода́тайством Твои́м, Чи́стая,/ и любви́ коне́чней блага́го Сы́на Твоего́ привяжи́,/ удаля́ема всегда́ от Него́ сластьми́ безме́стными.

Песнь 8

Ирмо́с:Победи́тели мучи́теля и пла́мене благода́тию Твое́ю бы́вше,/ за́поведем Твои́м зело́ прилежа́ще, о́троцы вопия́ху:/ благослови́те вся дела́ Госпо́дня Го́спода.

Умертви́вшеся ми́ру, жизнь бу́дущую насле́дуете/ и исцеле́ний благода́ть источа́ете пою́щим:/ благослови́те вся дела́ Го́спода и превозноси́те Его́ во ве́ки.

Све́тлии свети́льницы страда́ний сия́ньми я́вльшеся,/ облиста́ете мир, страстоно́сцы му́ченицы, вопию́ще:/ благослови́те вся дела́ Го́спода и превозноси́те Его́ во ве́ки.

В темни́цу вве́ржени, Боже́ственныя вои́стинну храни́телие и́стины,/ и воло́выми жи́лами пло́ти неми́лостивно, блаже́ннии, ураня́еми,/ ника́коже пра́ваго пути́ соврати́стеся./ Тем побе́дныя прия́сте венцы́.

Словесы́ святы́ми, ве́рою просвеща́еми,/ Бо́га – Отца́ и Сы́на и Свята́го Ду́ха – Тро́ицу Неразде́льную испове́дуем,/ Еди́но Ца́рство, Еди́но Госпо́дство и Еди́ну Власть во вся ве́ки.

Богоро́дичен: Я́ко святе́йши А́нгел, Чи́стая,/ прия́ла еси́ во святы́х почива́ющаго Бо́га всех:/ сего́ ра́ди вси, ве́рнии, пое́м Тя и славосло́вим во вся ве́ки.

Ин

Ирмо́с:В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте дела́ я́ко Го́спода/ и превозноси́те во вся ве́ки.

Навы́к неле́стно от пре́жде тебе́ пости́вшихся отце́в, о́тче, по́двиги и боре́ния,/ и потща́лся еси́ не яви́тися вторы́й,/ и я́ко не то́кмо яви́ся, но уже́ и превзы́де.

Испо́лнил еси́ моли́тву, е́юже моля́ся Бо́гу дре́вле, треблаже́нне,/ Твой хлеб всем предлага́ю, глаго́ля:/ и Тебе́ Твоя́ от Твои́х прино́сим, Го́споди сла́вы, во вся ве́ки.

И сло́вом, о́тче, и де́лом ты, направля́я су́щия с тобо́ю к Боже́ственней стези́,/ сам мно́жае па́че сих к сей направля́емь, и́мже чудеса́ соверши́л еси́:/ Бог бо моли́твами твои́ми гумно́ умно́жи.

Богоро́дичен: Да ра́дуется не́бо, да весели́тся и земля́ с челове́ки,/ Де́ва бо Мари́я Тво́рца всех неизрече́нно роди́, Ему́же пои́м:/ Тя превозно́сим, Христе́, во ве́ки.

Песнь 9

Ирмо́с:Ужасе́ся о сем не́бо,/и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Возмо́гл еси́, си́лою Боже́ственною укрепля́емь, Ие́роне пречу́дне,/ многоко́зненнаго побори́ти ума́ кре́постию,/ и приве́л еси́ Христу́ страстоте́рпцев собо́р твои́ми поуче́ньми,/ с ни́миже ве́рою тя при́сно ублажа́ем.

Яви́стеся во́инство честно́е, во Христе́ собра́но, великоимени́тии,/ и проти́вистеся ко власте́м мироде́ржца и, победи́вше их ору́жием Боже́ственныя ве́ры,/ венцы́ взя́сте от руки́ живонача́льныя, веселя́щеся.

Взыгра́й, о Мелити́не, приве́д многочи́сленный собо́р Вседержи́телю честны́х му́чеников,/ и́хже митропо́лия Вы́шняя и́мать, свяще́нно тече́ние соверши́вших,/ и со все́ми ве́рно сих гра́ды ублажа́й всегда́.

Со́лнце незаходи́мое, Христе́,/ моли́твами сла́вных му́чеников Твои́х,/ соверша́ющия их светоно́сное и Боже́ственное страда́ние, све́тлыми заря́ми просвети́, и освяти́,/ и та́мо о́бщники Ца́рствия я́ко Бог сподо́би.

Богоро́дичен: Трепе́щу Твоего́, еди́не Ца́рю, Суда́ бу́дущаго и устраша́юся,/ да не ка́ко в страсть и муче́ние вве́ргуся./ Но очи́сти мя от вся́кия скве́рны грехо́вныя/ моли́твами Пречи́стыя Твоея́ Ма́тере, я́ко Человеколю́бец.

Ин

Ирмо́с:От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Ле́ностию, увы́ мне, житие́ соверши́х все и бою́ся Суда́ стра́шнаго!/ Но, о Человеколю́бче Го́споди!/ моле́нием Ла́заря сле́зныя ми посли́ струи́,/ да те́ми омы́ю скве́рну прегреше́ний мои́х.

Ти́ху име́я ду́шу, кро́ток же зрак, вле́поту име́л еси́, о́тче,/ и уве́тлив ко всем весь явля́яся,/ струя́ми же твои́х глаго́л напая́я ду́ши, му́дре./ Ю́же тишину́ и нам Христа́ умоли́ пода́ти.

Я́вственнейшу всем доброде́тель твою́ Боже́ственную подо́бно яви́ти хотя́ Бог,/ горе́ приступи́ти тя, преподо́бне, соде́я к жесто́кой,/ от нея́же па́че, о́тче, лучи́ удо́бь испуща́я жития́,/ озари́л еси́ вселе́нную.

Богоро́дичен: Ми́лостива тогда́ яви́ мне Судию́, Сы́на Твоего́, Его́же родила́ еси́ без се́мене,/ во вре́мя, егда́ ся́дет, я́коже пи́шется, на Престо́ле святе́м, суди́ти, Отрокови́це, вся земны́я,/ о и́хже в житии́ безме́стных соде́яша.

Свети́лен.

Подо́бен: Жены́, услы́шите:

Ору́жием честна́го Твоего́ Креста́ защити́вшеся, страстоте́рпцы Твои́, Сло́ве,/ проти́вныя си́лы кре́пко победи́ша и мучи́теля посрами́ша,/ по Тебе́ пострада́ша и Тебе́, Христе́ мой, всех Царю́, сца́рствуют ку́пно.

И преподо́бнаго.

Подо́бен: Не́бо звезда́ми:

Богоно́сца вси и Влады́чня подража́теля восхва́лим пе́сньми, Ла́заря приснопа́мятнаго,/ демонское свире́пство разори́вшаго Боже́ственною си́лою.

Богоро́дичен: Тя Дании́л прописа́ несеко́мую го́ру,/ от нея́же честны́й Ка́мень отсече́ся,/ сокруша́я и́дольския хра́мы, Богороди́тельнице Мари́е.

На Литурги́и

Проки́мен, глас 7: Честна́ пред Го́сподем смерть преподо́бных Его́. Стих: Что возда́м Го́сподеви: Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Стих: Си́льно на земли́ бу́дет се́мя его́. Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник:

На Го́споди, воззва́х: стихи́ры, глас 1.

Подо́бен: Прехва́льнии му́ченицы:

А́вкта и Таврио́на, Христо́ву му́ченику,/ дне́сь све́тло па́мять сотворя́ем,/ Боже́ственною бо ре́вностию разжже́на,/ огнь пре́лестный попали́ла еста́,/ и тьму́ неве́жествия прогна́ста,/ и попра́ла еста́ мучи́теля шата́ние,/ и побе́дный вене́ц прия́ста.

Ра́нами стру́жема, му́драя, и ка́мением побива́ема,/ и в о́гнь вмета́ема и в во́ду ку́пана,/ повеле́нием нечести́ваго, сла́вная, дае́ма и мече́м усека́ема,/ не отверго́стася Иису́са Преблага́го,/ ни истука́ном отню́д не пожро́ста.

Терпи́ше суровство́ отца́,/ ти́ понужда́юща, Фессалоники́е прехва́льная,/ Бо́га отврещи́ся, па́ки и Влады́ки,/ естества́ бо уста́ва окая́нный ви́дяше,/ бия́ ти и обраня́я тя́,/ Отца́ Небе́снаго взыска́ющи ду́шу чистото́ю.

Тропа́рь, глас 4.

Подо́бен: Ско́ро предвари́:

Таврио́н сла́вный и Авкт ди́вный,/ о́гневи проти́вистася и всем и́нем ка́знем,/ моли́твами возмога́юща;/ та у́бо моле́нием сердца́ похваля́юще,/ ве́рою пресвяту́ю и честну́ю па́мять е́ю соверши́м,/ ду́шам просвеще́ние почерпа́юща.

Кано́н, глас 8.

Песнь 1

Ирмо́с: Пе́снь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ пе́снь побе́дную пою́ще/ и вопию́ще:/ пои́м Тебе́ Еди́ному, Влады́це.

Ве́рою страда́ния ва́ю сла́вное чту́щая, вели́кая му́ченика,/ помоли́тася спасти́ся от бе́д и скорбе́й,/ иму́ща дерзнове́ние ко всех Бо́гу и Влады́це.

Звезда́, ве́рным све́том тварь озаря́юща, му́ченика яви́стася/ и тьму пре́лестную прогони́ста благода́тию./ Тем светоно́сную ва́шу па́мять ве́рою твори́м.

Зако́ну нечести́вых безсту́дно предло́жену,/ чести́ безду́шны истука́ны, му́ченика, ника́коже попеко́стася,/ иму́ща ве́ру необори́му к Еди́ному Бо́гу и Влады́це.

Ста пред су́дищем му́жески Таврио́н многостра́стный, Авкт сла́вный,/ верста́ светоно́сная, Тро́ицу пропове́дающи,/ и многобо́жную глубо́кую отогна́ тьму.

Богоро́дичен: Высоту́ та́йны стра́шныя и глубину́ непостижи́му/ кто возмо́жет, Де́во, сказа́ти?/ Бо́га бо родила́ еси́, Челове́ка бы́вша/ па́че всея́ вины́ и сло́ва.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й, / жела́ний кра́ю, ве́рных утвержде́ние,/ Еди́не Человеколю́бче.

На еди́наго ро́дом злочести́ваго, свята́я, всю я́рость пра́во вверго́ста,/ истощи́вша ва́ю телеса́ Бо́жиим посо́бием,/ того́ суровство́ победи́ста.

Просвети́вшася ран до́бротворя́щими я́звами/ и укра́шшася мук приложе́нии,/ па́че облиста́сте, я́ко светоза́рней звезде́,/ страстоте́рпца му́ченика светоза́рная.

Пребыва́ющи ви́дя и Христо́во И́мя призыва́юща,/ льстец ра́нами ссече́,/ Боже́ственными противле́нии и терпе́нием мук того́ победи́ла есть, Богоблаже́нная.

Богоро́дичен: К Тебе́ прибега́ем вы́ну, Деви́це, мно́жеством всегда́ обступа́еми,/ уще́дри и спаси́ мя,/ ро́ждши Спа́са всего́ ми́ра и Го́спода, Еди́на Препе́тая.

Седа́лен, глас 4, то́йже что и тропа́рь ( зри день сей вы́ше )

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Сокруша́ема телесе́ ра́нами и боле́зньми не поми́ловаста,/ Боже́ственным ране́нием раждиза́ема Бо́га и Зижди́теля, до́бляя.

Себе́ Сотво́ршему нетле́нну и нескве́рненну/ привела́ еси́ житие́м соверше́нным, Фессалоники́е доброду́шная.

Име́ния обнажи́ся и роди́телю себе́ удалила́ еси́,/ Го́сподеви же восле́дова,/ Того́ ра́ди стра́ждущи терпе́нью.

Богоро́дичен: Одержи́ма мя бу́рею грехо́в и погиба́юща, Богоро́дице,/ мя напра́ви к приста́нищу ти́ху умиле́ния.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма́, окая́ннаго,/ но обрати́ мя и к све́ту за́поведей Твои́х/ пу́ти моя́ напра́ви, молю́ся.

Безду́шным же́ртву, душе́вная су́ще Госпо́дня заколе́ния, страда́льцы,/ ника́коже не принесо́сте ра́зумом тве́рдым./ Тем, вся́ку боле́знь ран претерпе́вша,/ на неболе́зненную кончи́ну преидо́ста.

Неукроще́нный ра́зум осужда́ющаго гне́ва испо́лнися/ и каме́нием побива́ти святы́я го́рце повелева́ше,/ но тех, я́ко дете́й оте́ц чадолюби́в, спаса́ет Спас,/ Его́же ра́ди страда́ти изво́лиша.

Подо́бницы, первострада́льца, Авкт с Таврио́ном, му́ченика яви́стася,/ мно́жеством бо каме́ния неща́дно, я́ко он, каме́нием побива́ема,–/ Христа́ – ка́мене неразседо́маго, до сме́рти ника́коже отверго́стася, сла́вная.

Богоро́дичен: Грехо́вная тя́жкая всегда́ ношу́ бремена́, Пречи́стая,/ и вопию́ Ти:/ сих хода́тайством Боже́ственным обложи́/ и и́го ми носи́ти ле́гкое безпа́костно сподо́би, Еди́на Непоро́чная.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Растяже́ну тя роди́тель, де́во, бия́ше,/ ви́дя уневе́щену Зижди́телеви и Спа́су всех,/ чрез естество́м зло́бою естества́ уста́вы бо попира́ют,/ и честну́ тя сотворя́ет му́ченицу.

Кре́постию ти вся́ческая Творя́щаго, честна́я Фессалоники́е, укре́пльшшся,/ не́мощь же́нску Сло́во ю́ношески и му́жески отложи́,/ и пострада́ терпе́ньно, и обоже́ния Боже́ственнаго получи́.

Не повину́вшеся беззако́нному веле́нию,/ вве́ржени бы́сте в во́ду ку́пно,/ руко́ю же вся Направля́ющаго непотопле́ни, му́ченицы, яви́стася/ и приведо́стася к ти́хому приста́нищу спасе́нному, ра́дующеся.

Богоро́дичен: Кра́сен, я́ко из черто́га, из чре́ва Твоего́ Же́них про́йде, Сло́во,/ Деви́ческое украси́в естество́,/ Бо́жиим ра́зумом просвети́ и разори́ безле́потное зло́бие, Де́во Богоневе́стная.

Песнь 7

Ирмо́с: От Иуде́и до́шедше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Неи́стовный гони́тель в пыла́ющий пла́мень вас вве́ргл есть,/ не поже́ршем и́долом, ни прекло́ньшем коле́ну,/ но до́бро уста́вно зову́щем:/ оте́ц на́ших Бо́же, благослове́н еси́.

Несумне́нным се́рдцем в огнь вле́зше, преблаже́ннии,/ я́коже пре́жде ю́ноша, не опали́стася ника́коже,/ но спасе́ни бы́сте, пою́ще:/ оте́ц на́ших Бо́же, благослове́н еси́.

Стремле́нием нанесе́ных с Небе́сными вод пла́мень у́бо потуше́,/ мно́жество же беззако́нных напра́сно сокруши́ся,/ святи́и же поя́ху:/ оте́ц на́ших Бо́же, благослове́н еси́.

Богоро́дичен: Ду́шу мою́ уязве́ну неприя́зненнаго греха́ стре́лами исцели́,/ ум мой, преступле́нием зле омраче́нный, просвети́, Влады́чице,/ Светода́вца Христа́ ро́ждши, Богома́ти.

Песнь 8

Ирмо́с: Седмери́цею пещь/ халде́йский мучи́тель / Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Па́че живота́ вре́меннаго та́мо су́щии возлюби́вше,/ мно́гообра́зными ра́нами преидо́сте сквозе́ огнь же и во́ду,/ уте́ху обре́тше, я́ко Небе́сное вои́стину Ца́рство,/ в не́мже пое́те:/ де́ти, благослови́те, свяще́ннии, воспо́йте,/ лю́дие, превозноси́те во вся ве́ки.

Глаго́л мучи́телев безбо́жных я́ве обличи́ла еста́,/ и́стинное испове́дание, свята́я, до́бре соблюла́ еста́,/ и к Бо́гу приидо́ста ны́не Подви́жнику,/ мече́м усека́ема, и любо́вию воспева́ета:/ де́ти, благослови́те, свяще́ннии, воспо́йте,/ лю́дие, превозноси́те во вся ве́ки.

Я́коже пау́чныя ни́ти,/ вра́жия вседе́йства, му́ченика до́бляя, Богомо́щно раздра́ста/ младе́нец стреля́ния, я́же от них мня́ща,/ тем и́стинна победоно́сца я́вльшася, вопие́та благода́рно:/ де́ти, благослови́те, свяще́ннии, воспо́йте,/ лю́дие, превозноси́те во вся ве́ки.

Богоро́дичен: Умерщвле́на страстьми́ и мно́гими злы́ми, Чи́стая,/ ду́шу мою́ оживи́, Живо́т ро́ждшия,/ смерть разру́шши все́ю кре́постию и сме́ртию/ и даждь пе́ти ми благода́рственным се́рдцем:/ де́ти, благослови́те, свяще́ннии, воспо́йте,/ лю́дие, превозноси́те во вся ве́ки.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Возмо́гша телесы́ тле́нными безпло́тнаго врага́,/ непобеди́ми и ве́лии му́ченицы, победи́ти, подвиза́вшася,/ и ны́не нетле́нный живо́т насле́доваша,/ Авкт сла́вный и Таврио́н с ним прехва́льный.

Я́ко цве́тца, посреде́ пла́мене, прехва́льная, неувядо́ма, яви́стася,/ благоуха́вша Богоразу́мием вся концы́,/ и злый смрад вра́жий си́лою прогна́ста,/ и светле́йша яви́стася зла́та Бо́жиею благода́тию.

Телеса́ челове́ческая пресла́вный Амфипо́лий сокры́в ва́ю, прехва́льная,/ я́ко Боже́ственное бога́тство,/ сия́ обогати́вши исцеле́ние всем оби́ло источа́юще благода́тию/ и отмыва́юще теле́сныя и душе́вныя недуги.

Я́ко со́лнце светоза́рно,/ всепра́здная па́мять ва́ю возсия́, вели́кая му́ченика,/ всю тварь озаря́юща,/ в ню́же мо́лимся, ва́ю Боже́ственными утеше́нии вся просвеща́ета,/ ва́ю ра́достно бла́жащая.

Богоро́дичен: Просвети́, две́рь Све́та, ду́шу мою́,/ ю́же враг помрачи́ па́дании и жите́йскими все́ми смуще́нии,/ и тьмы изба́ви без све́та огня́ и муче́ния,/ да просла́влю Тя, Богоро́дице, ве́рным удобре́ние.

Сия́ слу́жба пое́тся и ме́сяца а́вгуста в 22-й день на всечестно́е пренесе́ние многоцеле́бных моще́й его́.

Ве́чер

Блаже́н муж: 1-й антифо́н. На Го́споди, воззва́х: стихи́ры, глас 8.

Подо́бен: О пресла́внаго чудесе́:

О́тче преподо́бне Кири́лле,/ впери́в свой ум к Бо́гу ве́рою,/ мирска́го смуще́ния возгнуша́ся неуста́внаго,/ и крест свой взем, Всеви́дцу после́довал еси́,/ те́ло непокори́вое по́двиги воздержа́ния по́мыслу порабо́тив,/ си́лою Боже́ственнаго Ду́ха.

О́тче Богому́дре Кири́лле,/ ты от утро́бы ма́терни Христо́ви прибли́жився/ и всем смы́слом Тому́ прилежа́,/ и от свои́х по́двиг Бо́гу Вседержи́телю/ плоды́ досто́йныя принося́, преподо́бне,/ доброде́тельными венцы́ украша́емь,/ те́мже благи́х наслажде́ние обре́те и восприя́т досточу́дне.

Преподо́бне о́тче, прему́дре Кири́лле,/ боля́щим ты яви́лся еси́ исцеле́ние,/ и хромы́м хожде́ние ми́лостивно сотворя́еши,/ и всем притека́ющим с ве́рою к цельбоно́сному гро́бу твоему́,/ прося́щим по́мощи и заступле́ния,/ ты же моли́твами твои́ми исцеле́ние неду́гующим неоску́дно подава́еши.

И́ны стихи́ры, глас 2.

Подо́бен: Егда́ от Дре́ва:

Егда́ уязви́ся Боже́ственным жела́нием,/ тогда́ вся я́же в ми́ре кра́сная ни во что же вмени́в,/ восле́д Спаси́теля изы́де,/ бога́тство мимотеку́щее презре́ до́блественне,/ сла́ву же и могу́тство я́ко ничто́же оплева́,/ моли́, мо́лим тя,/ спасти́ и просвети́ти ду́ши на́ша.

Егда́ ты прия́л еси́ мона́шество,/ тогда́ своея́ во́ли, Кири́лле преподо́бне, до конца́ оша́яся,/ настоя́щему повину́яся неразсу́дне,/ и всем покаря́яся и рабо́тая,/ доса́ды и безче́стия прие́мля, ра́дуяся,/ те́мже и Госпо́дь зря твое́, о́тче, предложе́ние благо́е,/ прославля́ет тя.

Егда́ обе́ты мона́шества Го́сподеви воздаде́,/ тогда́ у́мное о́ко бо́дро зре́ти поста́вил еси́,/ мы́сленныя враги́ слеза́ми потопля́я/ и непоро́чно ходи́ти в пути́ за́поведей Госпо́дних ду́шу наставля́я,/ Кири́лле преподо́бне, дерзнове́ние име́я к Бо́гу,/ моли́, мо́лим тя,/ спасти́ и просвети́ти ду́ши на́ша.

Сла́ва, глас 1:

Днесь пресве́тлое нам наста́ торжество́/ честны́х и многоцеле́бных твои́х моще́й обре́тение,/ преподо́бне о́тче наш Кири́лле,/ и́хже, соше́дшеся, досто́йно почти́м,/ во псалме́х и пе́ниих и пе́снях духо́вных взыва́юще./ О празднолю́бцы! притеце́м к чу́дней ико́не преподо́бнаго отца́/ и любе́зно сию́ обстоя́ще, ра́достно лобыза́юще, си́це рцем:/ ра́дуйся, сокро́вище неистощи́мое,/ ра́дуйся, исто́чниче приснотеку́щий,/ ра́дуйся, вселюбе́зный о́тче цельбоно́сный,/ ра́дуйся, многотру́дныя пло́ти показа́,/ ра́дуйся, и́же мно́го в по́двизех восприе́мля,/ ра́дуйся, вене́ц вене́чника нося́ще,/ ра́дуйся, источа́я сладкоуха́нная нам свяще́нная благово́ния./ Но, о чудотвори́вый о́тче!/ целу́юще тя прии́мем благода́ть/ и благода́теля Бо́га прославля́ем,/ прославля́ющаго Своего́ уго́дника бога́тыми дарова́нии/ и вопию́ще Ему́:/ о всех благи́й, Го́споди, сла́ва Тебе́.

И ны́не, Богоро́дичен: Всеми́рную сла́ву:

Вход, проки́мен дне. И чте́ния три преподо́бническая ( зри Мине́ю ноября́ 6-й день )

На литии́ стихи́ры, глас 1, самогла́сны:

Преподо́бне о́тче Кири́лле,/ соше́дшеся любо́вию в сла́вное обре́тение многоцеле́бных моще́й твои́х,/ све́тло торжеству́юще, Дави́дски глаго́лем:/ блаже́н муж, боя́йся Го́спода,/ непоро́чно бо в путе́х Госпо́дних ходи́л еси́,/ те́мже с преподо́бными водворя́яся,/ с ни́миже моли́ся Го́сподеви,/ поми́ловатися душа́м на́шим.

Све́тлая твоя́ па́мять обре́тения твоего́,/ преподо́бне о́тче Кири́лле,/ сердца́ просвеща́ет нам,/ зря́ще бо честну́ю твою́ ико́ну,/ врачевство́ страсте́м неудо́бь цели́мым,/ прославля́ем прославля́ющаго тя Го́спода/ и труды́ твоя́ и по́двиги венча́вша благода́тию,/ усе́рдно и мы по́двигом и трудо́м/ е́мшеся твоею стезе́ю ходи́ти ко Христу́ Бо́гу,/ Его́же моли́ спасти́ и просвети́ти ду́ши на́ша.

Глас 2:

Предстоя́ще гро́бу знаменоно́сному/ преподо́бнаго отца́ на́шего Кири́лла, о празднолю́бцы!/ возопие́м похва́льными гла́сы, глаго́люще:/ ка́ко тя ублажи́м, Кири́лле,/ на земли́ пожи́вша па́че челове́ка/ и в Вы́шних бла́жимаго со все́ми уго́ждшими Го́сподеви,/ с ни́ми же предстоя́ во Све́те Боже́ственнем,/ моли́, мо́лим тя,/ изба́витися нам от собла́зн льсти́ваго/ и спасти́ся душа́м на́шим.

По успе́нии твое́м, блаже́нне Кири́лле,/ учи́тельница нам быва́ет твоя́ ра́ка,/ при́сно бо излива́ющимися чудесы́ вопие́т,/ возводя́ нас к трудо́м и по́двигом, глаго́ля:/ возлюби́те Го́спода, да обря́щете благода́ть ве́чную/ и ничто́же па́че Его́ почти́те,/ да егда́ прии́дет/ и обря́щете поко́й со избра́нными Его́,/ его́же да и мы улучи́м твои́ми моли́твами.

Глас 4:

Дне́сь соше́дшеся, бра́тие,/ духо́вне почти́м преподо́бнаго отца́ на́шего Кири́лла,/ и́же посто́м те́ло свое́ изнури́вша,/ воздержа́нием стра́сти охуди́вша/ и бде́нием ум очисти́вша,/ моли́твами же ду́шу просвети́вша,/ нището́ю бога́тство восприи́мша благода́ти/ и послуша́нием Бо́га благопослу́шна стяжа́вша,/ чистото́ю жили́ще Пресвята́го Ду́ха бы́вша,/ Его́же ра́ди враго́в шата́ния Христо́с низложи́в,/ да́рует нам ми́р и ве́лию ми́лость.

Сла́ва, глас 8:

Мона́хов мно́жества/ наста́вника тя почита́ем, о́тче наш Кири́лле,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, и преподо́бных соприча́стниче, и пра́ведных./ С ни́ми же моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

На стихо́вне стихи́ры, глас 8.

Подо́бен: О пресла́внаго чудесе́:

Прииди́те и приими́те, бра́тие,/ лию́щияся благода́ти от гро́ба преподо́бнаго отца́ Кири́лла,/ той бо подвиза́ся без ле́ности во вре́менней жи́зни/ и я́ко безпло́тен во пло́ти поживе́/ те́мже прия́т дар от Христа́ Бо́га/ и нам про́сит очище́ния и ве́лия ми́лости.

Стих: Честна́ пред Го́сподем/ сме́рть преподо́бных Его́.

Предстоя́ще ти, о́тче наш Кири́лле/ прие́млем оби́льно благода́ти:/ всяк бо, приходя́й с ве́рою, не посрами́тся,/ и прие́млет, и́хже тре́бует,/ прославля́ющу тя Го́споду/ я́ко благоуго́дна раба́ бы́вша своему́ Влады́це,/ и Того́ за́поведи сохра́нша,/ те́мже тя чтим и ублажа́ем.

Стих: Блаже́н муж, боя́йся Го́спода,/ в запо́ведех Его́ восхо́щет зело́.

Исто́чник приснотеку́щий врачевства́ безме́зднаго,/ гроб знаменоно́снаго отца́ Кири́лла/ и всяк хотя́й прие́млет/ подава́ет бо приходя́щим с ве́рою/ от вели́кия благода́ти от си́лы живоно́снаго мертвеца́/ его́же моли́твами, Иису́се Царю́,/ спаси́ ду́ши на́ша я́ко еди́н Милосе́рд.

Сла́ва, глас 4:

Возвесели́ся явленно, честна́я Христо́ва Це́рковь,/ и торжеству́й све́тло,/ возсия́ бо днесь пресве́тлая и всепра́зднственная па́мять/ обре́тения честны́х моще́й преподо́бнаго и Богоно́снаго отца́ Кири́лла,/ крася́щися его́ многотру́дными по́двиги, я́ко многоце́нною оде́ждею/ и вопие́т, хва́лящися, глаго́лющи:/ сицево́е мое́ рожде́ние, его́же Ева́нгелием породи́х,/ воспита́х же стра́хом Госпо́дним/ и ны́не в преподо́бных живе́т./ Прииди́те, по́стническое сосло́вие и пра́ведных ликостоя́ние,/ и сра́дуйтеся со мно́ю,/ име́ю бо в себе́ неистощи́мое сокро́вище,/ пречестна́го и всебога́таго преподо́бнаго отца́ Кири́лла,/ облагоуха́юще ве́рных и веселя́ще душе́вная чу́вства и теле́сная,/ и исцеле́ния подаю́ща, и прося́ща от Бо́га ве́лия ми́лости,/ я́ко да ми́лостив бу́дет нам в де́нь Су́дный.

И ны́не, Богоро́дичен: При́зри на моле́ния:

Тропа́рь, глас 8:

Я́ко свети́льник яви́лся еси́ всесве́тел/ во ото́це Нова́ е́зера на Кра́сном о́строве,/ преподо́бне о́тче Кири́лле,/ ты бо кре́ст Христо́в на ра́мо взем,/ усе́рдно Тому́ после́довал еси́,/ чистото́ю Бо́гови прибли́жився,/ от Него́же и си́лами чуде́с обогати́ся,/ тем и мы любе́зно прибега́ем к ра́це честны́х моще́й твои́х, уми́льно глаго́лем:/ о преподо́бне о́тче Кири́лле!/ моли́ Христа́ Бо́га спасти́ся душа́м на́шим.

На У́трени

На Бог Госпо́дь: тропа́рь свята́го два́жды, сла́ва и ны́не, Богоро́дичен.

По 1-й кафи́зме седа́лен, глас 1:

Житие́ на земли́ благоче́стно сконча́в,/ чи́сто селе́ние Свято́му Ду́ху яви́ся,/ просвеща́еши и́же ве́рою приходя́щих к честны́м моще́м твои́м, блаже́нне./ Те́мже моли́ Влады́ку Христа́ Бога просвети́ти ду́ши на́ша,/ пра́зднующим всечестну́ю па́мять твою́, Богому́дре Кири́лле.

Сла́ва, и ны́не, Богоро́дичен:

Купину́, ю́же Моисе́й неопа́льну ви́де,/ го́ру Бо́жию, све́тлый о́блак, сень нескве́рную,/ Богоприя́тную трапе́зу, пала́ту Высо́каго Царя́,/ всесве́тлую и непроходи́мую дверь, Де́во, пое́м Тя.

По 2-й кафи́зме седа́лен, глас 5:

По́стника Госпо́дня пе́сньми почти́м,/ я́ко умертви́ша вся прило́ги страсте́й/ воздержа́нием тве́рдым и кре́пким терпе́нием вои́стинну/ и посра́мльша сопроти́внаго всю горды́ню,/ и согла́сно возопие́м ему́:/ преподо́бне о́тче Кири́лле, моли́ся Го́сподеви поми́ловатися душа́м на́шим.

Сла́ва, и ны́не, Богоро́дичен:

Стра́шно чу́до зача́тия и несказа́нен о́браз рождества́/ в Тебе́ позна́ся, Чи́стая Присноде́во,/ ужаса́ет ми ум и удивля́ет помышле́ния./ Сла́ва Твоя́, Богоро́дице, всем простре́ся на спасе́ние душа́м на́шим.

По полиеле́и седа́лен, глас 8:

Егда́, блаже́нне, к Боже́ственному жела́нию ум свой впери́в,/ тогда́ оста́вив вся до́лу влеку́щая мудрова́ния,/ и в пусты́ню всели́вся в Кра́сный о́стров,/ иде́же процве́л еси́, я́ко кедр, доброде́тельми прекра́сными,/ страсте́й искорени́в те́рние, и в нем насади́в плоды́ трудо́в свои́х./ Те́мже и пожа́в рукоя́ти – неотъе́млемо бога́тство на Небеси́,/ о́тче, преподо́бне Кири́лле, моли́ Христа́ Бо́га согреше́нием оставле́ние пода́ти,/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Вопло́тшееся Сло́во от утро́бы Твоея́ ро́ждши, Пречи́стая,/ мене́ же растле́ннаго грехми́ от прило́г, укрепи́, Ма́ти Бо́жия,/ и се́рдце мое́ очи́сти, Богоблагода́тная, Ма́терними Свои́ми моли́твами,/ да и аз благода́рно взыва́ю Ти:/ Мари́е Богоро́дице, моли́ Сы́на Своего́, Христа́ Бо́га на́шего,/ поми́ловати ста́до Свое́, е́же стяжа́, Всенепоро́чная.

Степе́нна 1-й антифо́н, 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Преподо́бне о́тче Кири́лле,/ слух свой приле́жно Ева́нгелию простре́,/ услы́шал еси́ Боже́ственный глас,/ зову́щ в Небе́сное Ца́рство,/ и до́бре после́дова, ми́ра кра́сная, я́ко уме́ты вмени́в,/ еди́ныя добро́ты жела́я – Христа́./ Его́же моли́ приле́жно/ ми́ру посла́ти смире́ние, и це́рквам единомы́слие,/ и стране́ на́шей на враги́ побе́ду и одоле́ние,/ и душа́м на́шим ве́лию ми́лость.

Кано́н, глас 2.

Песнь 1

Ирмо́с: Гряди́те, лю́дие, пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Просвеще́нием Трисо́лнечного Божества́ озари́вся, прему́дре,/ свети́ло яви́ся, осиява́я всю́ду./ Тем и нас, те́мностию страсте́й омраче́нных,/ просвеще́нием благода́ти озари́ти помоли́ся/ и су́щаго получи́ти спасе́ния.

Све́том Боже́ственным и благода́тию просвеща́емь, Кири́лле преблаже́нне,/ ве́рно светоно́сную твою́ па́мять торжеству́ющих просвети́,/ и от тьмы грехо́вныя моли́твами твои́ми, преподо́бне, изба́ви.

Ду́ху Свято́му храм, прему́дре, бысть,/ и к нему́ все духо́вное жела́ние обрати́в,/ и сего́ ра́ди кро́тких зе́млю насле́дова,/ душе́вную на́шу страстну́ю бу́рю, преподо́бне, укроти́,/ да в тишине́ Боже́стненной бы́вше, песносло́вим твоя́ по́двиги.

Богоро́дичен: Лю́тыми страсте́й наве́ты обурева́емь есмь, Отрокови́це,/ и прило́ги грехо́вными погружа́емь,/ к Твоему́ еди́ному ти́хому и невла́емому приста́нищу любо́вию прибега́ю, Всепе́тая,/ уще́дривши, спаси́ мя, Присноде́во.

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Высото́ю смире́ния украша́емь, Кири́лле преподо́бне,/ и все у́бо жела́ние ко Влады́це своему́ простира́я,/ я́ростная движе́ния на враги́ вооружа́я,/ со изря́дными де́лы свои́ми посто́м и моли́твами.

Пло́ти своея́ двиза́ние, кре́пким поще́нием, преподо́бне, умертви́в,/ оби́телище был еси́ Влады́чне,/ Его́же моли́ изба́витися скорбе́й, и мучи́тельства страсте́й,/ с ве́рою притека́ющим к ра́це моще́й твои́х, преподо́бне.

Име́я споспешеству́ющих душе́вную си́лу,/ исцеле́ния безчи́слеиная источа́ют мо́щи твоя́, преподо́бне Кири́лле:/ отгоня́ют от челове́к боле́зни теле́сныя,/ и душе́вныя стра́сти уврачева́ют по́двиги твои́ми, всече́стне.

Богоро́дичен: Тружда́ет мя бу́ря грехо́вная, и возмуще́ние безме́рных помышле́ний,/ умилосе́рдися, Всенепоро́чная,/ и ру́ку ми по́мощи я́ко Ми́лостива простри́,/ я́ко да, спа́сся, велича́ю Тя.

Седа́лен, глас 4:

Жите́йское мо́ре воздержа́нием без труда́ преплы́в,/ ко приста́нищу мы́сленному безстра́стия, ра́дуяся, дости́гл еси́,/ преподо́бне о́тче Кири́лле, Богому́дре и преблаже́нне,/ моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Стена́ непобеди́мая нам христиа́ном еси́, Богоро́дице Де́во,/ к Тебе́ бо прибега́ющии неврежде́ни пребыва́ем,/ и па́ки согреша́юще, и́мам Тя Моли́твенницу./ Тем, благодаря́ще, вопие́м Ти:/ ра́дуйся, Благода́тная, Госпо́дь с Тобо́ю.

Песнь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́и́, Го́споди.

Умо́м и душе́ю предочи́стився, преподо́бне,/ и пре́лесть душепа́губную всеконе́чно от себе́ отве́рже,/ и чу́вства своя́ к нему́тней тишине́ упра́вив,/ во о́стров Кра́сный, прему́дре, всели́лся еси́, воспева́я:/ сла́ва си́ле Твое́й, Го́споди.

Зако́ны Но́выми и Ве́тхим Заве́том, ра́зума святы́х муже́й поуча́яся, Кири́лле преподо́бне,/ вся́кия доброде́тели о́браз навы́к, прему́дрой пчеле́ подо́бяся,/ прия́телище изря́дное Ду́ху Свято́му был еси́, прему́дре, воспева́я:/ сла́ва си́ле Твое́й, Го́споди.

Вся́ческим светя́ся чудоде́йствы, преподо́бне,/ и Боже́ственною озаря́емь благода́тию,/ всем позна́ся сокро́вище исцеле́ний неистощи́мое,/ страсте́й отгоня́я омраче́ние и вра́жия низлага́я ополче́ния:/ сла́ва си́ле Твое́й, Го́споди.

Богоро́дичен: Из утро́бы Твоея́, Чи́стая Отрокови́це, возсия́в, Боже́ственное Со́лнце/ и́же во тьме́ многобо́жия просвети́ и в се́ни сме́ртней су́щия, Влады́чице, осия́й./ Ему́же, воспева́юще, зове́м:/ сла́ва си́ле Твое́й, Го́споди.

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Те́снаго предпоче́т, не́жели простра́ннаго, пути́, преподо́бне,/ и, ра́дуяся, во о́строве Кра́снем, вся́чески утесня́емь, претерпе́,/ Боже́ственными поуче́нии ду́шу свою́ очища́я,/ и добро́ту Бо́жию неизглаго́ланную зря, всеблаже́нне.

Незло́бив, и кро́ток, и ми́лостив был еси́, преподо́бне,/ вся зло́бы и стре́лы вра́жия до конца́ погу́бль./ Благода́ть и ми́лость от Бо́га свы́ше прии́м,/ ми́лостивно нам поспеша́й, любо́вию святу́ю па́мять твою́ почита́ющим.

Я́ко вели́кое со́лнце, вели́чие по́двиг твои́х возсия́ нам, Кири́лле преподо́бне,/ вся просвеща́я све́том Богоразу́мия,/ тем мо́лим тя просвети́ти на́ши ра́зумы, о́тче преблаже́нне.

Богоро́дичен: Мно́зи бо́рющеся со мно́ю свы́ше, в боле́зни исчезе́ живо́т мой,/ понро́х в про́пасти безчи́сленных мои́х согреше́ний,/ спаси́ мя, Влады́чице, и возведи́ я́ко Ми́лостива, Всенепоро́чная:/ Тебе́ бо и́мам еди́ну Предста́тельницу непобеди́му, раб Твой.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Ева́нгельски, преподо́бне, Христа́ возлюби́в, и пли́щев⁸⁷ отврати́ся,/ непроходи́мыя же пусты́ни проходя́ и на Кра́сный о́стров прише́д,/ еди́ному Владыце своему́ прилепи́ся,/ от Него́же и трудо́м воздая́ния прие́м,/ животу́ ве́чному я́ве причасти́ и за пою́щия тя моли́ся.

Богому́дрыми по́мыслы преудобри́вся, преподо́бне,/ и вся я́же на земли́ льстя́щая, я́ко уме́ты, вмени́в,/ тем и ны́не в нестаре́ющемся блаже́нстве,/ во све́те с ли́ки Безпло́тных сил о Бо́зе при́сно сликовству́еши, преблаже́нне.

Стра́нна и пресла́вна о Бо́зе содева́я чудеса́, преподо́бне,/ всем, и́же зле стра́ждущим, призыва́нием ско́ро предваря́еши, от бед избавля́я,/ и нас, бе́дствующих лю́те и напа́стьми одержи́мых,/ ми́лостивно предста́в, спаса́еши, преблаже́нне.

Богоро́дичен: Грехо́в тя́жким бре́менем обложе́н есмь, Пречи́стая, и вопию́ Ти:/ хода́тайством Твои́м Боже́ственным сие́ облегчи́,/ Ты бо еси́ Предста́тельница гре́шным, Пресла́вная,/ Изба́вителя и Спа́са ро́ждши земны́м.

Конда́к, глас 2:

Христо́в яре́м на ра́мо взем,/ усе́рдно Тому́ после́дова,/ чистото́ю Бо́гови прибли́жився,/ о́тче преподо́бне Кири́лле,/ мо́лим тя, посеща́й ми́лостивно чад свои́х,/ и моли́ непреста́нно о всех нас.

И́кос:

Кто дово́лен изрещи́ твои́х чудодея́ний, преподо́бне о́тче Кири́лле,/ мы у́бо от непостиза́ющаго ума́ на́шего, недосто́йнии, ма́лое сие́ пе́ние прино́сим,/ ра́достию и Боже́ственною любо́вию почита́юще/ всехва́льное и всечестно́е обре́тение многоцеле́бных моще́й твои́х, глаго́люще:/ ра́дуйся, я́ко исполня́емь Христо́вы красоты́,/ пресве́тла от Него́ и преизоби́льна восприе́мля ве́чнующая воздая́ния,/ те́лом у́бо тя Кра́сный о́стров прия́т, ду́хом же само́ Не́бо,/ по́чести трудо́м свои́м, прехва́льне, восприи́м от Христа́ всех Царя́ и Бо́га,/ тем мо́лим тя,/ посеща́й ми́лостивно ста́до свое́, е́же собра́л еси́, прему́дре,/ и моли́ непреста́нно о всех нас.

Песнь 7

Ирмо́с: Образу злато́му, на по́ле Деи́ре служи́му,/ три́е Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

В моли́твах бо́дренное, и в поще́ниих кре́пкое, и во искуше́ниих терпе́ние неосла́бное,/ ума́ чистото́ю, преподо́бне, показа́,/ земли́ бо и земны́х досто́йно отступи́л,/ Небе́сное обре́л еси́ наслажде́ние, воспева́я:/ благослове́н Бог оте́ц на́ших.

Плод духо́вный и же́ртву непоро́чную,/ житие́ свое́, преподо́бне, Владыце прине́с,/ в воздержа́нии бо вся́цем пожи́в,/ от Него́же и по́чести трудо́м я́ко подвигополо́жник восприи́м,/ де́йствуеши пресла́вная чудеса́, воспева́я:/ благослове́н Бог оте́ц на́ших.

Страстьми́ коле́блющихся и бу́рею грехо́вною, преподо́бне, погружа́емых,/ я́ко равномо́щно к Бо́гу дерзнове́ние име́я,/ руково́дствуй всегда́, прему́дре,/ и сохраня́й почита́ющих тя благоче́стно, я́ко да воспева́ем:/ благослове́н Бог оте́ц на́ших.

Богоро́дичен: Изба́ви нас от напа́стей, и скорбе́й, и печа́лей разли́чных,/ иноплеме́нных наше́ствия, и междоусо́бныя бра́ни, Влады́чице Всепе́тая,/ я́ко да сла́вим Тя и Сы́ну Твоему́ взыва́ем:/ благослове́н Бог оте́ц на́ших.

Песнь 8

Ирмо́с: Пещь иногда́ о́гненная в Вавило́не де́йства разделя́ше/ Бо́жиим веле́нием, халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

В пребыва́лища присноживу́щая всели́лся еси́, преподо́бне,/ нетле́нных благ наслажда́яся и Трисо́лнечныя све́тлости исполня́яся,/ нас, призыва́ющих тя, те́плым твои́м предста́тельством от всех лю́тых спаса́й, пою́щия:/ благослови́те, вся дела́ Госпо́дня, Го́спода.

Нам, и́же любо́вию почита́ющим тя,/ и честно́е твое́ соверша́ющим торжество́, Христо́в уго́дниче Кири́лле,/ пода́ти моли́ согреше́нием оставле́ние и Боже́ственнаго Све́та осия́ние, пою́щим:/ благослови́те, вся дела́ Госпо́дня, Го́спода.

Тро́ичен: О Пребезнача́льное Естество́ и Триипоста́сное Еди́нство –/ О́тче, и Сы́не, и Ду́ше Святы́й –/ приими́ о нас моле́бника, преподо́бнаго Твоего́ уго́дника Кири́лла,/ и пода́ждь прегреше́ний оставле́ние, и житию́ исправле́ние, и злых отчужде́ние,/ и сподо́би ны в ми́ре воспева́ти Твою́ держа́ву:/ благослови́те, вся дела́ Госпо́дня, Го́спода.

Богоро́дичен: Я́ко еди́на ро́ждши безсе́менным рождество́м Христа́ Бо́га, Ма́ти Безневе́стная Чи́стая,/ Сего́ ми́лостива сотвори́, Влады́чице,/ спаси́ рабы́ Твоя́ от наси́лия и мучи́тельства вра́жия,/ вопию́щих Христо́ви, Сы́ну Твоему́:/ благослови́те, вся дела́ Госпо́дня, Господа.

Песнь 9

Ирмо́с: Безначи́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Выспрь к Бо́гу име́яй мысль, Кири́лле преподо́бне,/ земна́я оста́вль и Небе́сная восприя́т:/ Бо́гу и Спа́су тя вельми́ просла́вльшу,/ трудо́в ра́ди твои́х и воздержа́ния неосла́бнаго,/ сего́ ра́ди почита́ем тя, преблаже́нне.

И́хже благ, преподо́бне, получи́в Небе́сныя сла́вы,/ е́йже от Бо́га сподо́бися и Ему́же всегда́ предстоя́,/ моли́ся и нам неотлу́чным бы́ти, мо́лим тя,/ ра́достию и Боже́ственною любо́вию почита́ющим по́двиги твоя́, всече́стне.

О блаже́нне и Богому́дре, преподо́бне о́тче Кири́лле!/ мир ми́рови от Бо́га низпосли́/ и испроси́ це́рквам соедине́ние, и стране́ на враги́ победи́тельная,/ и всем скорбя́щим предста́тельство и спасе́ние, преблаже́нне.

Богоро́дичен: Пощади́ мя, Христе́ Спа́се, пощади́,/ моли́твами Ро́ждшия Тя и всех святы́х Твои́х,/ егда́ ся́деши суди́ти дело́м мои́м,/ беззако́ния и грехи́ моя́ пре́зри я́ко Безгре́шен,/ мир же пода́ждь, и спасе́ние воспева́ющим Тя,/ Ми́лостивый Бо́же и Человеколю́бче.

Свети́лен:

Мирска́го пристра́стия я́ко от скве́рны уклони́вся,/ и алчбо́ю плоть умертви́л еси́, блаже́нне,/ Небе́сною сла́вою со А́нгелы обогати́вся,/ те́мже непреста́нно о нас моли́ Христа́ Бо́га, преподо́бне Кири́лле.

Сла́ва, и ны́не, Богоро́дичен:

Держа́вным Свои́м покро́вом, Чи́стая,/ нас, рабо́в Свои́х, от наве́т вра́жиих сохраня́й всегда́ невре́дны,/ Тя бо еди́ну стяжа́хом прибе́жище в ско́рбех и печа́лех.

На хвали́тех стихи́ры на 4, глас 8.

Подо́бен: О пресла́внаго чудесе́:

Име́яй Боже́ственную благода́ть учи́теля,/ целому́дрием тя наставля́ющу к жела́нию Боже́ственному,/ отню́дуже мирска́го мяте́жа отре́кся,/ к ра́зуму и́стинному возведе́ся,/ боле́зненными труды́ себе́ удруча́я,/ повину́я лу́чшему го́ршее, Кири́лле преподо́бне,/ моли́ спасти́ся нам.

Преподо́бне о́тче Кири́лле,/ любве́ ра́ди Христо́вы, вся я́же на земли́ преоби́дел еси́,/ и в пусты́ню всели́вся,/ плотски́я по́хоти мудрова́ние умертви́л еси́,/ по́стническими труды́ свое́ житие́ уясни́л еси́,/ тем и Христо́с да́ром чуде́с обогати́ тя,/ помина́й нас, чту́щих па́мять твою́, досточу́дне.

Доброде́тели удержа́ти потща́ся,/ и́миже Бо́гови присво́итися разумева́я, Кири́лле преподо́бне,/ к Нему́же и востече́,/ Его́же и светоли́тие прие́мля,/ хода́тайствуй о нас, ми́рно житие́ преити́,/ спаса́ющимся от собла́зн льсти́ваго,/ и святы́х ра́дости о́бщником бы́ти твои́ми моли́твами.

Приноси́те ве́ру вси, хотя́щии исцеле́ния,/ прие́млите незави́стно,/ почерпни́те вино́, ду́ши веселя́щее,/ всем бо окри́н благода́ти предстои́т,/ ника́коже сомня́ся,/ испо́лнь бо честна́я ча́ша преблаже́ннаго отца́ на́шего Кири́лла,/ и излива́ет приходя́щим с ве́рою/ душа́м и телесе́м здра́вие.

Сла́ва, глас 6:

Преподо́бне о́тче Кири́лле,/ во всю зе́млю изы́де веща́ние исправле́ний твои́х,/ тем и на Небесе́х обре́л еси́ мзду трудо́в твои́х,/ де́монския погуби́л еси́ полки́,/ и А́нгельския дости́гл еси́ чи́ны,/ и́хже житию́ без поро́ка поревнова́л еси́,/ дерзнове́ние име́яй ко Христу́ Бо́гу,/ мир испроси́ душа́м на́шим.

И ны́не, Богоро́дичен: Богоро́дице, Ты еси́ лоза́: