На Ма́лой Вече́рни

Стихи́ры на 4, глас 1.

Подо́бен: Небе́сных чино́в:

Крести́теля подража́л еси́ тезоиме́ннаго до́бре воздержа́нием, о́тче,/ и Илию́ вели́каго посто́м и чистото́ю:/ ре́вностию уя́звлен обои́х, Златоу́сте,/ на ца́рское вели́чество сме́льствуеши,/ я́ко па́стырь Це́ркве Христо́вы.

Боже́ственным вдохнове́нием Сло́ва/ проте́к, по пи́санному, всю зе́млю,/ веща́ние догма́тов твои́х, о́тче, просвети́ мир:/ отве́рзл еси́ нам покая́ния вход,/ ни́щих попече́нием возобража́я Христо́во Ева́нгелие.

Чи́стый души́ твоея́ и нескве́рный свет/ со́лнечныя лучи́ осиява́ет ми́ру догма́тов благоче́стия,/ о́тче му́дре Иоа́нне Златоу́сте,/ и мглу отго́нит,/ и просвеща́ет вселе́нную ко благоче́стию.

Сла́ва, глас 4:

Был еси́, Златоу́сте, Богодохнове́нный орга́н,/ чрез его́же нам Дух Святы́й провозгласи́:/ благознамени́тым бо гла́сом/ протече́ концы́ веща́ние уче́ний твои́х,/ и, подража́тель быв апо́столов, преподо́бне,/ лик пости́же о́ный, его́же вожделе́л еси́./ Моли́ся Го́споду, всеблаже́нне,/ умири́ти мир и спасти́ ду́ши на́ша.

И ны́не, Богоро́дичен:

Изба́ви ны от нужд на́ших, Ма́ти Христа́ Бо́га,/ ро́ждшая всех Творца́,/ да вси зове́м Ти:/ ра́дуйся, еди́на предста́тельство душ на́ших.

На стихо́вне стихи́ры, глас 2.

Подо́бен: До́ме Евфра́фов:

Труба́ златови́дная,/ све́тло вопию́щи Бо́жия вели́чия,/ показа́лся еси́, Иоа́нне, ми́ра в конце́х.

Стих: Уста́ моя́ возглаго́лют прему́дрость,/ и поуче́ние се́рдца моего́ ра́зум.

Зако́н, я́коже Моисе́й, прия́л еси́ от Го́спода, Златоу́сте,/ мир умудря́я и просвеща́я/ Боже́ственными твои́ми уче́нии.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Пропове́дник я́ко и́стинно Боже́ственнаго ца́рствия/ был еси́, Златосло́ве, вопия́:/ пока́йтеся, погружа́я отча́яние.

Сла́ва, глас и подо́бен то́йже:

Тро́ицы Честны́я во единонача́лие научи́л еси́ ве́ровати,/ Отца́, Сло́ва, Ду́ха,/ Златоу́сте, о́тче наш.

И ны́не, Богоро́дичен:

Де́во, из Тебе́ ро́ждшагося Бо́га Сло́ва/ моли́, Богоро́дице, с Златосло́вным Иоа́нном,/ е́же спасти́ ду́ши на́ша.

Та́же, Ны́не отпуща́еши: Трисвято́е. По О́тче наш: тропа́рь, глас 8: Уст твои́х: ( зри день сей ни́же ). Сла́ва, и ны́не, Богоро́дичен: И́же нас ра́ди:

На Вели́цей Вече́рни

Стихологису́ем Блаже́н муж: 1-й антифо́н.

На Го́споди, воззва́х: стихи́ры на 8, глас 4.

Подо́бен: Я́ко до́бля:

Златокова́нную трубу́, Богодохнове́нный орга́н,/ догма́тов пучи́ну неисчерпа́емую,/ Це́ркве утвержде́ние,/ ум Небе́сный, прему́дрости глубину́,/ ча́шу всезлату́ю,/ излива́ющую ре́ки уче́ний медото́чных и напая́ющую тварь,/ пе́сненно воспои́м.

Звезду́ незаходи́мую,/ заря́ми просвеща́ющую уче́ний всю подсо́лнечную,/ покая́ния пропове́дника,/ гу́бу всезлату́ю,/ мокроту́ лю́тую неве́дения взе́млющую/ и ороша́ющую иста́явшая сердца́ грехми́,/ Иоа́нна досто́йно Златослове́снаго почти́м.

Земны́й А́нгел и Небе́сный челове́к,/ ла́стовица благоглаго́ливая и многогла́сная,/ доброде́телей сокро́вище,/ ка́мень неразсе́дный, ве́рных воображе́ние,/ му́чеником подо́бен,/ равностоя́тель святы́х А́нгел,/ апо́столов единонра́вен,/ в пе́снех да возвели́чится Златоу́ст.

Глас 2:

До́м духо́вный одея́нии, я́ко ка́мении, согражде́н/ и ми́р покрыва́яй,/ прему́дрый Златоу́ст.

До́м духо́вен благода́ти все́й/ сло́ва прему́дрости яви́ся, вну́трь имы́й,/ Златоу́сте блаже́нне.

Глас 5:

До́м свяще́нных доброде́телей свяще́нный/ себе́ соверши́л еси́,/ в тебе́ бо жили́ще,/ я́ко во святе́м хра́ме и честне́йшем, о́тче,/ положи́, прему́дро окорми́в,/ и чу́вства теле́сная,/ я́ко в неокра́доме сокро́вищи,/ соблю́л еси́ помышле́ния страстны́х смуще́ний,/ отню́дуже Богови́днейши, преблаже́нне, быв,/ Це́ркви предста́тельством укра́шен,/ Христа́ моли́,/ подаю́щаго ми́рови ве́лию ми́лость.

Сла́ва, глас 6:

Преподо́бне, треблаже́нне, святе́йший о́тче,/ па́стырю до́брый и началопа́стыря Христа́ учениче́,/ положи́вый ду́шу за о́вцы:/ сам и ны́не, всеблагохва́льне Иоа́нне Златоу́сте,/ проси́ моли́твами твои́ми/ дарова́ти нам ве́лию ми́лость.

И ны́не, Богоро́дичен: Кто Тебе́ не ублажи́т:

Вход, проки́мен дне́ и чте́ния.

При́тчей чте́ние (главы́ 10, 3, 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́:/ и блаже́н челове́к, и́же пути́ мои́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим./ Я́ко аз, прему́дрость, устро́их сове́т,/ и ра́зум, и смы́сл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь моя́,/ ме́рзски же пре́до мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (гла́вы 10, 6, 8, 9):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды объи́мет./ Свет пра́ведным всегда́,/ и от Го́спода обря́щут благода́ть и сла́ву,/ язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго:/ постига́ет бо жела́ющия ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности мое́я./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница бо есть Бо́жия хи́трости/ и обрета́тельница дел Его́./ Труды́ ея́ суть доброде́тели:/ целому́дрию же и ра́зуму та учи́т,/ пра́вде и му́жеству,/ и́хже потре́бнее ничто́же есть в житии́ челове́ком./ А́ще же и многоиску́сства жела́ет кто,/ весть дре́вняя и бы́ти хотя́щая разсмо́трит:/ свесть изви́тия слове́с и разреше́ния гада́ний,/ зна́мения, и чудеса́ проразуме́ет,/ и сбытия́ време́н и лет,/ и всем сове́тник есть благ./ Я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся Сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тва́рьми/ и да управля́ет мир в преподо́бии и пра́вде,/ даждь ми Твои́х Престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да, су́щи со мно́ю, научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

Прему́дрости Соломо́новы чте́ние (гла́вы 4, 6, 7, 2):

Похваля́ему пра́веднику возвеселя́тся лю́дие:/ безсме́ртие бо есть па́мять его́,/ я́ко от Го́спода познава́ется и от челове́ков,/ и уго́дна Го́споду душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете,/ Нача́ло бо ея́ – любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости Наста́вник есть,/ и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость:/ есть бо в ней Дух Разу́мен и Свят,/ и сия́ние Све́та Присносу́щнаго,/ и о́браз бла́гости Бо́жия;/ та́я дру́ги Бо́жия и проро́ки устроя́ет./ Благоле́пнейши же есть со́лнца/ и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та́я, угожда́ющия ей, от боле́зни изба́ви/ и наста́ви на стези́ пра́выя./ Даде́ им ра́зум име́ти свят,/ и сохрани́ от ловя́щих,/ и по́двиг кре́пок подаде́ им./ Да разуме́ют вси,/ я́ко си́льнейши всего́ есть благоче́стие./ И никогда́же премо́жет зло́ба му́дрости,/ ниже́ пре́йдет, злы́я облича́ющи, суд./ Реко́ша же в себе́, помы́сливше непра́ведно:/ наси́льствуем пра́веднаго/ и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго,/ я́ко неуго́ден нам есть:/ и проти́вится дело́м на́шим,/ и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́ний на́ших,/ и тя́жек нам есть, и ви́димь:/ я́ко неподо́бно ины́м житие́ его́,/ и измене́ны стези́ его́./ В поруга́ние вмени́хомся ему́:/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо,/ а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́,/ и иску́сим беззло́бство его́:/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася:/ ослепи́ бо я зло́ба их./ И не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти власть,/ и спаса́яй во вре́мя ско́рби,/ и избавля́яй от вся́каго зла́./ Щедр и ми́лостив,/ и дая́й преподо́бным Свои́м благода́ть,/ и Свое́ю мы́шцею го́рдым противля́яйся.

На литии́ стихи́ра хра́ма и свята́го самогла́сны, глас 1. Анато́лиево:

Свети́льниче Иоа́нне, уста́ златосия́нная,/ удобре́ние Богоде́янных доброде́телей,/ обита́лище писа́ний тайнонача́льных:/ ты пречи́стое, Всесвята́го Ду́ха нетле́нное сокро́вище был еси́,/ отню́дуже возвесели́л еси́ всю Це́рковь/ спаси́тельным твои́м сло́вом су́щим,/ дерзнове́ние у́бо обре́т к Бо́гу,/ в наслажде́нии Го́рняго насле́дия/ моли́ся о нас, о́тче святе́йший.

Излия́ся благода́ть во устна́х твои́х,/ преподо́бне о́тче Иоа́нне Златоу́сте,/ сего́ ра́ди пома́за тя Бог архиере́я лю́дем Свои́м,/ па́ствити па́ству Его́ в преподо́бии и пра́вде./ Те́мже, препоя́сан ору́жием Си́льнаго,/ пресе́кл еси́ языковре́дия ересе́й,/ и ны́не не преста́й моля́ся/ умири́ти мир и спасти́ ду́ши на́ша.

Глас 2. Студи́тово:

Тя, вели́каго архиере́я и па́стыря,/ незло́бива и преподо́бна,/ покая́ния пропове́дника,/ златослове́сная уста́ благода́ти,/ восхваля́юще любо́вию, мо́лимся:/ препода́ждь нам моли́твы твоя́, о́тче,/ во спасе́ние душ на́ших.

Гео́ргия Никомиди́йскаго:

Златы́ми словесы́ твои́ми,/ Це́рковь, я́ко у́тварию злато́ю, украси́вшися,/ Иоа́нне Златоу́сте,/ неве́стнически ра́дующися, вопие́т тебе́:/ насы́тихся от твои́х златото́чных вод,/ украси́вшися златотка́нными и медозлаты́ми питии́;/ от дея́ния бо в виде́ние возвожду́ся/ кро́тких ра́ди твои́х поуче́ний/ и со Христо́м, у́мным Женихо́м, соединя́юся, ца́рствующи с Ним./ Тем и мы, совоку́пльшеся в па́мять твою́, зове́м:/ не преста́й моля́ся за ны ко Го́споду,/ е́же спасти́ ду́ши на́ша.

Прия́л еси́, иера́рше, Го́рнейшую филосо́фию/ и вне ми́ра был еси́,/ живя́ вы́шше ви́димых,/ и зерца́ло нескве́рное Бо́жие Боже́ственно показа́лся еси́,/ и сый, при́сно соедине́н Све́том,/ свет приима́л еси́,/ и ясне́йший блаже́нный получи́л еси́ коне́ц./ Моли́ся, Златоу́сте, о душа́х на́ших.

Глас 4:

Глаго́лы златоза́рнейшими/ зе́млю я́ве напои́л еси́,/ златоточи́ву име́я ду́шу же и те́ло, всеблаже́нне,/ вся позлати́в словесы́ твои́ми,/ златоде́лателю догма́тов твои́х,/ и, кни́ги написа́в златопи́санныя,/ возлете́л еси́ на Небеса́./ Тем вопие́м ти:/ златоточи́ве и Златоу́сте,/ Христа́ Бо́га моли́ спасти́ ду́ши на́ша.

Сла́ва, глас то́йже.

Ге́рманово:

Подоба́ше Ца́рствующему градо́в/ Иоа́нна име́ти архиере́я,/ я́коже не́кую у́тварь ца́рскую/ и златокова́нную трубу́,/ вся оглаша́ющу концы́ спаси́тельными догма́ты/ и вся совоздви́жущую к ре́вности пе́ний Боголе́пных./ К нему́же возопии́м:/ златосло́ве и Златоу́сте,/ Христа́ Бо́га моли́ спасти́ ду́ши на́ша.

И ны́не, Богоро́дичен:

Тя сте́ну стяжа́хом, Богоро́дице Пречи́стая,/ и благоути́шное приста́нище, и утвержде́ние,/ те́мже мо́лим, и́же в житии́ обурева́емии,/ упра́ви и спаси́ ны.

На стихо́вне стихи́ры, глас 5.

Подо́бен: Ра́дуйся:

Ра́дуйся, златоза́рный и кра́сный/ Це́ркве Богодохнове́нный орга́не;/ язы́че, человеколю́бно покая́ния/ нам разли́чныя о́бразы подпису́ющий;/ у́ме златозра́чный;/ ла́стовице златоу́стая;/ голуби́це же, псало́мски междора́миями златосия́ющая/ доброде́телей на зла́це;/ струя́ златови́днейшая,/ пролива́ющая во́ды;/ уста́ Боже́ственная/ и Боже́ственнаго человеколю́бия поручи́тельная,/ Христа́ моли́ низпосла́ти душа́м на́шим ве́лию ми́лость.

Стих: Уста́ моя́ возглаго́лют прему́дрость,/ и поуче́ние се́рдца моего́ ра́зум.

Ра́дуйся, сиро́т оте́ц,/ оби́димых бы́страя по́мощь,/ убо́гим подая́ние, а́лчущим пи́ща,/ греша́щих исправле́ние,/ душ благоуго́днейший врачу́ и честне́йший,/ Богосло́вия высо́кое изве́ство,/ сказа́ние писа́ний духо́вных,/ зако́н де́йственнейший,/ пра́вило пра́вейшее,/ виде́ния и дея́ния прему́дросте кра́йнейшая,/ Христа́ низпосла́ти душа́м на́шим моли́ ве́лию ми́лость.

Стих: Уста́ пра́веднаго поуча́тся прему́дрости,/ и язы́к его́ возглаго́лет суд.

Ра́дуйся, Це́рковь вопие́т ти,/ жениху́ своему́, о Златоу́сте!/ Просия́вый во всем ми́ре па́че луч со́лнечных/ доброде́тельми и словесы́ би́серными,/ па́че му́дрых прему́дрейший/ и ри́торов превысоча́йший,/ и́стинных догма́т побо́рниче,/ лжи обличи́телю, покая́ния учи́телю./ Ра́дуйся, тиша́йшая зна́ния пучи́но,/ и́же, по Па́влу вели́кому, уста́ и ум насле́довав Христо́в./ Его́же моли́ душа́м на́шим да́ти ве́лию ми́лость.

Сла́ва, глас 6:

Труба́ златогла́сная показа́лся еси́,/ златоглаго́ливе Златоу́сте,/ златоде́йствуя сердца́ ве́рных/ златотру́дными твои́ми уче́нии,/ проро́чески бо изы́де веща́ние исправле́ний твои́х, преподо́бне о́тче,/ и ми́ра всего́ концы́ просвети́л еси́.

И ны́не: Творе́ц и Изба́витель мой:

На благослове́нии хле́бов тропа́рь свята́го два́жды и Богоро́дице Де́во, ра́дуйся: еди́ножды.

Тропарь святителя, глас 8:

Уст твои́х, я́коже све́тлость огня́ возсия́вши, благода́ть/ вселе́нную просвети́:/ не сребролю́бия ми́рови сокро́вища сниска́,/ высоту́ нам смиренному́дрия показа́,/ но, твои́ми словесы́ наказу́я, о́тче Иоа́нне Златоу́сте,/ моли́ Сло́ва Христа́ Бо́га спасти́ся душа́м на́шим.

А иде́же всено́щное бде́ние не быва́ет, по тропаре́: сла́ва, и ны́не, Богоро́дичен и отпу́ст.

На У́трени

На Бог Госпо́дь: тропа́рь два́жды. Сла́ва, и ны́не, Богоро́дичен воскре́сный.

По 1-ом стихосло́вии седа́лен, глас 1.

Подо́бен: Лик Ангельский:

Златообра́зная звезда́, земны́м возсия́л еси́, Златоу́сте, све́тло,/ Иоа́нне всеблаже́нне,/ просвеща́я концы́ заря́ми слове́с твои́х./ Тем днесь всесвяту́ю твою́ па́мять пра́зднующе,/ грехо́в всех про́сим оставле́ния.

Сла́ва, и ны́не, Богоро́дичен:

Безневе́стная Чи́стая Богоро́дице Де́во,/ еди́на ве́рных Предста́тельнице и Покро́ве,/ бед и скорбе́й и лю́тых обстоя́ний вся изба́ви/ на Тя упова́ние, Отрокови́це, иму́щия/ и ду́ши на́ша спаси́ Боже́ственными моли́твами Твои́ми.

По 2-ом стихосло́вии седа́лен, глас 5.

Подо́бен: Собезнача́льное Сло́во:

Цветника́ слове́с Богодохнове́нных писа́ний,/ наставля́ющаго нас к покая́нию,/ мно́гая искуше́ния претерпе́вша,/ Златоу́стаго, ве́рнии, я́ко научи́вшеся от него́, почти́м по до́лгу:/ мо́лится бо Го́споду спасти́ся душа́м на́шим.

Сла́ва, и ны́не, Богоро́дичен:

Ужа́сно чу́до зача́тия/ и несказа́нен о́браз рождества́ в Тебе́ позна́ся, Присноде́во Чи́стая,/ ужаса́ет мой ум и удивля́ет помышле́ние,/ сла́ва Твоя́, Богоро́дице, всем простре́ся ко спасе́нию душ на́ших.

По полиеле́и седа́лен, глас 8.

Подо́бен: Прему́дрости:

Сокро́вище яви́лся еси́ духо́вное Боже́ственными твои́ми словесы́,/ я́ко вои́стинну ми́ра, Златоу́сте, просия́в конце́м,/ бога́тство спаси́тельное всем по́дал еси́,/ наставля́я, блаже́нне, лю́ди к покая́нию./ Тем и тече́ние соверши́в жития́,/ Престо́лу предстои́ши Вы́шняго, приснопа́мятне Иоа́нне Златоу́сте,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Небе́сную дверь и киво́т,/ пресвяту́ю го́ру, све́тлый о́блак воспои́м,/ неопали́мую купину́, слове́сный рай,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́ра и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му Рождеству́ Твоему́.

Степе́нна, 1-й антифо́н 4-го гла́са. Проки́мен, глас 4: Уста́ моя возглаго́лют прему́дрость, и поуче́ние се́рдца моего́ ра́зум. Стих: Услы́шите сия́, вси язы́цы: Вся́кое дыха́ние: Ева́нгелие от Иоа́нна, зача́ло 35, от полу́.

По 50-м псалме́ стихи́ра самогла́сна, глас 6:

Излия́ся благода́ть во устна́х твои́х, преподо́бне о́тче,/ и был еси́ па́стырь Христо́вы Це́ркве,/ уча́ слове́сныя о́вцы/ ве́ровати в Тро́ицу Единосу́щную/ во еди́ном Божестве́.

Кано́н Пресвяты́я Богоро́дицы со ирмосо́м на 6. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла́ избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Мно́гими содержи́мь напа́стьми,/ к Тебе́ прибега́ю, спасе́ния иски́й:/ о Ма́ти Сло́ва и Де́во!/ от тя́жких и лю́тых мя спаси́.

Страсте́й мя смущаю́т прило́зи/ мно́гаго уны́ния испо́лнити мою ду́шу:/ умири́, Отрокови́це, тишино́ю Сы́на и Бо́га Твоего́, Всенепоро́чная.

Спа́са ро́ждшую, Тя и Бо́га молю́, Де́во, изба́витися ми лю́тых:/ к Тебе́ бо ны́не прибега́я,/ простира́ю и ду́шу, и помышле́ние.

Неду́гующа те́лом и душе́ю,/ посеще́ния Боже́ственнаго и промышле́ния от Тебе́ сподо́би,/ еди́на Богома́ти, я́ко блага́я, Блага́го же Роди́тельнице.

Кано́н свята́го на 8, его́же краегране́сие: Ду́ха пою́ тя, злато́е усто́. Феофа́ново. Глас 8.

Песнь 1.

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бо́гови воспева́юща.

Покая́ния быв тепле́йший пропове́дник, Златоу́сте,/ пока́ятися мне, о́тче, Бо́гу моли́ся от всего́ се́рдца моего́/ и дре́вних прегреше́ний исцели́ти я́звы/ твои́м страда́тельством¹³⁴ умоли́.

Всю зарю́ Свята́го Ду́ха, о́тче, прии́м,/ всесве́тел яви́лся еси́ столп, предводи́телен Це́ркве, преподо́бне,/ све́тел же о́блак, всеблаже́нне,/ осеня́ющ правосла́вных собо́ры.

От Христа́ рукоположе́н учи́тель,/ Боже́ственная уче́ния златови́дным язы́ком,/ мы́слию же Богому́дрою бога́тно ты источи́л еси́:/ Бо́жия бо река́, вод испо́лнен Ду́ха,/ яви́лся еси́, Богоявле́нне Златоу́сте.

Богоро́дичен: Преукра́шена разли́чием благода́ти, Богора́дованная,/ О́тчее Сло́во, плоть бы́вшее за благоутро́бие мно́гое па́че ума́ и словесе́,/ Благослове́нная, родила́ еси́,/ пребы́вши Де́ва нескве́рная.

Катава́сия: Отве́рзу уста́ моя́:

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Предста́тельство и покро́в жи́зни моей полага́ю Тя, Богороди́тельнице Де́во,/ Ты мя окорми́ ко приста́нищу Твоему́,/ благи́х вино́вна, ве́рных утвержде́ние, еди́на Всепе́тая.

Молю́, Де́во, душе́вное смуще́ние и печа́ли моей бу́рю разори́ти:/ Ты бо, Богоневе́стная, нача́льника тишины́, Христа́, родила́ еси́,/ еди́на Пречи́стая.

Благоде́теля ро́ждши до́брых вино́внаго,/ благодея́ния бога́тство всем источи́:/ вся бо мо́жеши, я́ко си́льнаго в кре́пости Христа́ ро́ждши, Богоблаже́нная.

Лю́тыми неду́ги и боле́зненными страстьми́ истяза́ему,/ Де́во, Ты ми помози́:/ исцеле́ний бо неоску́дное Тя зна́ю сокро́вище,/ Пренепоро́чная, неиждива́емое.

Ин

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче.

Умо́м Ты Христо́вым обога́щся,/ твои́м чи́стым житие́м/ челове́ком спасе́ния был еси́ споспе́шник и повествова́тель, де́йствитель, Златоу́сте,/ учи́тельства точа́ спаси́тельная, Богодохнове́нне.

От невеще́ственных сокро́вищ Ду́ха ты обогати́вся,/ от исто́чников спасе́ния поче́рпл еси́ приснотеку́щий исто́чник уче́ний/ и напои́л еси́ все́ Це́ркве, преподо́бне о́тче, лице́.

Олядене́вшия душе́вныя, Златоу́сте, ни́вы,/ прему́дрым земледе́ланием слове́с изчи́стил еси́, му́дре,/ и плодоно́сны показа́л еси́,/ Небе́сными ту́чами сия́ напая́я, Богоприя́тне.

Богоро́дичен: Поро́ка в Тебе́ и скве́рны несть отню́д, Де́во,/ оби́тель же па́че яви́лася еси́ Небе́сных бла́гостей,/ в Тебе́ бо всели́ся доброде́телей вся святы́ня, Всенепоро́чная.

Седа́лен, глас 8.

Подо́бен: Прему́дрости:

Неизрече́нныя му́дрости Богови́дно поче́рпл еси́ бога́тство ра́зума,/ всем сокро́виществовал еси́ Правосла́вия во́ды,/ ве́рных у́бо сердца́ Боже́ственне веселя́щия,/ неве́рных же мне́ния досто́йно погружа́ющия:/ тем отобою́ду благоче́стия по́тами показа́лся еси́ непобе́дный Тро́ицы побо́рник, Иоа́нне Златоу́сте./ Моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

Сла́ва, подо́бен то́йже:

Су́щую свы́ше му́дрость позна́в/ и благода́ть слове́с от Бо́га всем просия́л еси́, я́ко зла́то в горни́ле,/ и Святу́ю Тро́ицу, Еди́ницу, пропове́дал еси́,/ сребролю́бную лесть устрели́в словесы́ твои́ми./ Те́мже и ре́вностию цари́цу обличи́в,/ А́риево посрами́л еси́ иноплеме́нное киче́ние, Иоа́нне Златоу́сте,/ моли́ Христа́ Бо́га грехо́в оставле́ние дарова́ти/ пра́зднующим любо́вию святу́ю па́мять твою́.

И ны́не, Богоро́дичен:

Пла́мень гее́нский и сгоре́ние,/ плач, и́же в нем и рыда́ние,/ зело́ окая́ннейшее разлуче́ние и горча́йшее, святы́х насле́дия/ и собра́ния ра́достнаго, помышля́ющи, содрогни́ся, душе́ моя́, и возстени́ ,/ и писа́ния тми́нных долго́в твои́х истреби́ти потщи́ся умиле́ния слеза́ми,/ Споспе́шницу непосты́дную иму́щи, Чи́стую Богома́терь:/ Тоя́ бо ра́ди прегреше́ний дае́тся оставле́ние/ Сию́ Богоро́дицу правосла́вно сла́вящим.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Страсте́й мои́х смуще́ние,/ Ко́рмчию ро́ждшая Го́спода,/ и бу́рю утиши́ мои́х прегреше́ний, Богоневе́стная.

Милосе́рдия Твоего́ бе́здну призыва́ющу пода́ждь ми,/ и́же Благосе́рдаго ро́ждшая и Спа́са всех пою́щих Тя.

Наслажда́ющеся, Пречи́стая, Твои́х дарова́ний,/ благода́рственное воспева́ем пе́ние,/ ве́дуще Тя, Богома́терь.

На одре́ боле́зни моея́ и не́мощи низлежа́щу ми,/ я́ко благолюби́ва, помози́, Богоро́дице,/ еди́на Присноде́во.

Наде́жду, и утвержде́ние,/ и спасе́ния сте́ну недви́жиму иму́ще Тя, Всепе́тая,/ неудо́бства вся́каго избавля́емся.

Ин

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Ина́го нам апо́столов единонра́внаго,/ и́же промышле́нием всех промышля́я,/ я́ко Благ, даде́ Христо́с тя, Небе́снаго тайново́дства пропове́дника/ и Боже́ственнаго сказа́теля та́ин Го́рних,/ Иоа́нне всеблаже́нне, Златоу́сте.

Златоза́рнаго и златослове́снаго, почти́м Златоу́стаго Иоа́нна,/ вся позлати́вшаго златови́дными сия́нии уче́ния/ и мир язы́ком просвети́вша,/ зла́та светле́йшим и све́та полне́йшим,/ источа́ющим благода́ть Боже́ственную.

Весь был еси́ Бо́жие жили́ще,/ весь яви́лся еси́ орга́н Ду́ха,/ возглаша́ющ вся́кия доброде́тели Богодохнове́нную песнь,/ и спасе́ния вину́, и добро́ту явля́я Небе́снаго Ца́рствия,/ Иоа́нне всеблаже́нне Златоу́сте.

Ты Бо́жие благоутро́бие пропове́дал еси́,/ покая́ния о́бразы излага́я,/ и злых отбежа́ния изя́щнейше поуча́я,/ преблаже́нне и всесоверше́ннейше,/ и о де́лех изря́дных поуче́ния источа́я,/ всече́стне о́тче Златоу́сте.

Богоро́дичен: По Бо́зе предста́тельницу Тя стяжа́хом,/ Ты бо Бо́жия Ма́ти была́ еси́ Творца́ и Соде́теля,/ и наш зрак прие́мшаго, Всенепоро́чная,/ и сей спа́сшаго от тли и сме́рти/ и сла́вою Боже́ственною просла́вившаго.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою,/ Твой мир пода́ждь нам;/ Человеколю́бче.

Испо́лни, Чи́стая, весе́лия се́рдце мое,/ Твою́ нетле́нную даю́щи ра́дость,/ весе́лия ро́ждшая Вино́внаго.

Изба́ви нас от бед, Богоро́дице Чи́стая,/ ве́чное ро́ждши избавле́ние/ и мир, всяк ум преиму́щий.

Разреши́ мглу́ прегреше́ний мои́х, Богоневе́сто,/ просвеще́нием Твоея́ све́тлости,/ Свет ро́ждшая Боже́ственный и Преве́чный.

Исцели́, Чи́стая, души́ моей неможе́ние,/ посеще́ния Твоего́ сподо́бльшая,/ и здра́вие моли́твами Твои́ми пода́ждь ми́.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма́, окая́ннаго;/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Церко́внаго свети́льника вси тя ве́мы светови́днейшаго/ и душа́м спаси́тельнаго,/ восхища́ющаго сии́ из горта́ни смертоно́сныя/ и к жи́зни путеводя́ща ве́чней,/ о́тче приснопева́емый.

Разруша́еши ополче́ния ерети́чествующих, треблаже́нне,/ огради́вся благоче́стия ору́жии и му́жеством души́, свяще́ннейше,/ собира́еши же, ра́дуяся пресве́тло,/ правосла́вных ли́ки сою́зом Ду́ха.

Испо́лнены, я́коже фиа́лы, Боже́ственных арома́т лани́ты твои́/ и вселе́нную у́мными благово́нии весели́т/ мирова́рным тайново́дством разуме́ний/ и добро́тою слове́с твои́х, всему́дре.

Богоро́дичен: Я́ко Бо́га заче́нши, Соде́теля же, и Зижди́теля, и Го́спода,/ ро́ди Тя вси челове́честии, Чи́стая, ублажа́ют,/ и Безтеле́сных разу́мная чинонача́лия/ я́ко Ма́терь Бо́жию Тя сла́вят.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Сме́рти и тли я́ко спасл есть, Са́м Ся изда́в сме́рти,/ тле́нием и сме́ртию мое́ естество́ я́то бы́вшее,/ Де́во, моли́ Го́спода и Сы́на Твоего́/ враго́в злоде́йствия мя изба́вити.

Предста́тельницу Тя живота́ вем, и храни́тельницу тве́рду, Де́во,/ и напа́стей реша́щу молвы́, и нало́ги бесо́в отгоня́ющу,/ и молю́ся всегда́ от тли страсте́й мои́х изба́вити мя.

Я́ко сте́ну, прибе́жища стяжа́хом, и душ всесоверше́нное спасе́ние,/ и простра́нство в ско́рбех, Отрокови́це,/ и просвеще́нием Твои́м при́сно ра́дуемся, о Влады́чице,/ и ны́не нас от страсте́й и бед спаси́.

На одре́ ны́не немощству́яй лежу́, и несть исцеле́ния пло́ти мое́й./ Но Бо́га, и Спа́са ми́ру, и Изба́вителя неду́гов ро́ждшая,/ Тебе́ молю́ся, Благо́й, от тли неду́г возста́ви мя.

Ин

Ирмо́с: Очи́сти мя Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́.

Му́дростию духо́вною мир весь обогати́л еси́,/ словесе́ раздава́тель быв бога́тый:/ бога́та бо свы́ше, иера́рше,/ благода́ть излия́ся твои́м устна́м.

Во всю, я́ко мо́лния, зе́млю изы́де веща́ние твое́,/ и си́ла же твои́х глаго́л, Златоу́сте,/ я́ко труба́ велегла́сная, вселе́нныя вся огласи́ концы́.

Свы́ше во истка́нную ри́зу оде́явся, всеблаже́нне, доброде́телей/ и слове́с красото́ю обложи́вся,/ и́стины яви́лся еси́ сла́вное утвержде́ние.

Богоро́дичен: Вседержи́тельною си́лою нося́й вся́ческая,/ в немощну́ю плоть из Тебе́ оде́явся, Де́во Пренепоро́чная,/ на благодея́ние челове́ков Человеколю́бец.

Конда́к, глас 6.

Подо́бен: Е́же о нас испо́лнив:

От Небе́с прия́л еси́ Боже́ственную благода́ть/ и твои́ми устна́ми вся учи́ши/ покланя́тися в Тро́ице еди́ному Бо́гу,/ Иоа́нне Златоу́сте, всеблаже́нне преподо́бне,/ досто́йно хва́лим тя:/ еси́ бо наста́вник, я́ко Боже́ственная явля́я.

И́кос:

Всех Творцу́ преклоня́ю коле́на,/ преве́чному Сло́ву ру́ки простира́ю,/ сло́ва ища́ дарова́ние, да воспою́ преподо́бнаго, его́же Сам возвели́чи,/ глаго́лет бо проро́ком Живы́й во ве́ки:/ просла́влю ве́рою сла́вящия Мя./ И́же у́бо в дре́вних Самуи́ла возвы́сивый, просла́ви ны́не иера́рха:/ тала́нт бо, ему́же вве́рися, до́бре ку́пльствовав, Царю́ принесе́,/ тем и превозвы́шши его Пресу́щественный./ Сего́ благода́ти прошу́ недосто́йный аз сло́во прия́ти ми,/ да возмогу́ благоче́стно воспе́ти того́:/ конце́й бо той есть наста́вник, я́ко Боже́ственная явля́я.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

На́ше спасе́ние, я́коже восхоте́л еси́, Спа́се, устро́ити,/ во утро́бу Де́вы всели́лся еси́,/ Ю́же ми́ру Предста́тельницу показа́л еси́:/ оте́ц на́ших Бо́же, благослове́н еси́.

Воли́теля ми́лости, Его́же родила́ еси́, Ма́ти Чи́стая,/ умоли́ изба́витися от прегреше́ний и душе́вных скверн ве́рою зову́щим:/ оте́ц на́ших Бо́же, благослове́н еси́.

Сокро́вище спасе́ния, и исто́чник нетле́ния Тя, Ро́ждшую,/ и столп утвержде́ния, и дверь покая́ния зову́щим показа́л еси́:/ оте́ц на́ших Бо́же, благослове́н еси́.

Теле́сныя сла́бости и душе́вныя неду́ги, Богороди́тельнице,/ любо́вию приступа́ющих к кро́ву Твоему́,/ Де́во, исцели́ти сподо́би,/ Спа́са Христа́ нам ро́ждшая.

Ин

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Бла́гости бе́здну и благоутро́бия навы́к Бо́жия,/ пору́чник яви́лся еси́ спасе́ния ка́ющимся те́пле/ и вседу́шно Го́споду зову́щим:/ благослове́н Бог оте́ц на́ших.

Управля́еши, Златоу́сте, уче́нии твои́ми вся́кую мысль,/ и душе́вныя врачу́еши не́мощи, я́ко сострада́тельнейший,/ и благотеку́щим спое́ши, весели́ся:/ благослове́н Бог оте́ц на́ших.

Возвы́сился еси́, быв избра́н,/ преподо́бен, незло́бив, свяще́нник Высоча́йшаго,/ пра́вдою оде́ян све́тло и весе́лием, зовы́й, всебога́те:/ благослове́н Бог оте́ц на́ших.

Богоро́дичен: Зачала́ еси́, Пречи́стая, Су́щаго над все́ми Бо́га и Го́спода,/ благоволи́вшаго спасти́ челове́ческий род от тле́ния и сме́рти./ Его́же, досто́йно пою́ще, зове́м:/ благослове́н Бог оте́ц на́ших.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

По́мощи и́же от Тебе́ тре́бующия не пре́зри, Де́во,/ пою́щия и превознося́щия Тя во ве́ки.

Неможе́ние души́ моея́ исцеля́еши и теле́сныя боле́зни, Де́во,/ да Тя просла́влю, Чи́стая, во ве́ки.

Исцеле́ний бога́тство излива́еши ве́рно пою́щим Тя, Де́во,/ и превознося́щим неизрече́нное Твое́ Рождество́.

Напа́стей Ты прило́ги отгоня́еши/ и страсте́й нахо́ды, Де́во./ Те́мже Тя пое́м во вся ве́ки.

Ин

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

И́же разу́мно словесе́м твои́м бесе́дующе, Златоу́сте,/ Богосло́вия честно́му учи́мся,/ и всепло́дствуем благи́х поле́зное,/ и злобы отбега́ем вре́да:/ о́бщий бо строи́тель спасе́ния был еси́, вопия́:/ превозноси́те Христа́ во ве́ки.

За ны моли́ Влады́ку, Златоу́сте,/ сострада́тельнейшее дерзнове́ние име́я/ и ми́лостивною и человеколю́бною твое́ю, о́тче, любо́вию:/ тя бо ко Спа́су предлага́ем, ве́рнии, хода́тая же, и предста́теля,/ и тепле́йша моли́твенника, Богому́дре иера́рше, всеблаже́нне Иоа́нне.

Ю́ношское противле́ние, и непрекло́нное мудрова́ние,/ и ца́рствующих непра́вду обличи́л еси́,/ те́пле предста́тельствуя оби́димыя, преподо́бне;/ и сиро́т, и вдо́в, и ни́щих оте́ц был еси́ любо́вным предложе́нием,/ превозноси́те, вопия́, Христа́ во ве́ки.

Богоро́дичен: Теле́сными образова́нии, и разли́чными гада́нии,/ и символи́ческими, и знамена́тельными предъявле́ньми,/ Твое́ провозвести́ша Богоглаго́ливии рождество́,/ преесте́ственное и чу́дное, Де́во;/ тем Тя, веселя́щеся, благоче́стно воспева́ем,/ Христа́ превознося́ще во вся ве́ки.

Песнь 9

Ирмо́с: Вои́стинну Бого́родицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

То́ка слез мои́х не отврати́ся,/ я́же от вся́каго лица́ вся́ку сле́зу отъе́мшаго,/ Де́во, Христа́ ро́ждшая.

Ра́дости мое́ се́рдце испо́лни, Де́во,/ я́же ра́дости прие́мшая исполне́ние,/ грехо́вную печа́ль потребля́ющи.

Све́та твоего́ заря́ми просвети́, Де́во,/ мрак неве́дения отгоня́щи/ благове́рно Богоро́дицу Тя испове́дающих.

На ме́сте озлобле́ния не́мощи смири́вшагося, Де́во, исцели́,/ из нездра́вия во здра́вие претворя́ющи.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннеийшее Небе́с:/ тем Тя, Богоро́дицу,/ А́нгелов и челове́к чинонача́лия велича́ют.

И́стинно наслажда́яся, о́тче, жи́зни,/ о не́йже подвиза́лся еси́, ели́ко мо́щно,/ на земли́ житие́м преизя́ществовав А́нгельским/ и Христо́в стяжа́в язы́к и уста́ ти́хая:/ спасти́ся, Богоглаго́ливе, моли́ тя ве́рою изя́щне блажа́щим.

Словеса́ твоя́, треблаже́нне, словеса́ жи́зни,/ жизнь хода́тайствующая неконе́чную:/ тя бо исто́чника теку́ща показа́ Христо́с/ и реку́, пролива́ющу Боже́ственных пото́ки уче́ний,/ сла́дости и́стинно пото́к, оставле́ния же струю́/ и покая́ния све́тла пропове́дника.

Хода́тай яви́лся еси́, священнонача́льниче, Бо́га и челове́ков пресве́тлый,/ ты бо свети́льник яви́лся еси́ благоче́стия Богосве́тлый/ и Боже́ственнаго зна́ния и ми́лостыни наказа́тель:/ тем тя, златосло́ве, серде́чною любо́вию ны́не досто́йно велича́ем.

Богоро́дичен: Чи́стая препросла́вленная Ма́ти Бо́жия,/ пою́щия Тя любо́вию спаса́й,/ искуше́ний молву́ разреша́ющи ми́лостивно./ Я́ко бо Бо́га ро́ждши,/ вся, ели́ко хо́щеши, соверша́еши,/ успева́еши невозбра́нно и мо́жеши, Де́во./ Тем Тя вси велича́ем.

Свети́лен.

Подо́бен: Ду́хом во святи́лищи:

Златоза́рными словесы́ твои́ми Христо́ва Це́рковь светле́ется я́сно,/ о Златоу́сте о́тче!/ Ду́ши же веселя́тся ве́рных, почита́ющия всесвяту́ю твою́ па́мять,/ ты бо всем показа́лся еси́ покая́ния наста́вник и вождь спасе́ния.

Сла́ва, ины́й.

Подо́бен: Жены́, услы́шите:

Великогла́снейшаго покая́ния пропове́дника,/ сокро́вище убо́гих,/ уста́ Це́ркве злата́я и благоглаго́ливая, писа́ний явле́ние,/ Иоа́нна всему́драго да восхва́лим вси,/ я́ко от того́ утверди́вшеся.

И ны́не, Богоро́дичен:

Де́во Всенепоро́чная,/ Госпоже́ моя́ и Влады́чице,/ Твоего́ Сы́на умоли́ с сла́вным Златоу́стом/ напа́стей изба́витися вся́ческих пою́щим Тя/ и ве́чных получи́ти благ, Всесвята́я:/ мо́жеши бо, ели́ка хо́щеши.

На хвали́тех стихи́ры на 4, глас 4.

Подо́бен: Дал еси́ зна́мение:

Сосу́д честне́йший Боже́ственнаго Ду́ха был еси́/ и па́стырь свяще́ннейший,/ А́нгел на земли́, столп церко́вный и догма́тов степе́нь,/ гре́шных пору́чник, ка́ющихся Боже́ственное утеше́ние,/ ни́щих же промы́сленник и сиро́т утеше́ние,/ Иоа́нне Златоу́сте,/ моли́твенниче о душа́х на́ших.

Со́лнце многосве́тлое,/ вселе́нную словесы́ твои́ми озаря́я,/ был еси́ звезда́ светле́йшая,/ свеща́ светя́щия зари́,/ и́же в мо́ри ми́ра всегда́ обурева́емыя/ привлача́я ко приста́нищу тиша́йшему/ спасе́ния благода́тию, златосло́ве Златоу́сте,/ моли́твенниче о душа́х на́ших.

А́нгел земны́й и Небе́сный челове́к,/ слави́й добропе́снивый,/ река́, исполня́ема слове́сных вод,/ о́блак ту́чи разу́мныя,/ всем нам бога́тно ка́плющий,/ спасе́ния учи́тель и покая́ния споспе́шник,/ Иоа́нне Златоу́сте, вои́стинну был еси́.

Непра́ведно от па́ствы твоея́ изгна́н, о́тче преподо́бне,/ приобщи́лся еси́ скорбе́м и го́рьким заточе́нием,/ в ни́хже удосто́ился еси́ блаже́нныя кончи́ны,/ а́ки до́блественный страда́лец,/ победи́в многоко́зненнаго,/ и побе́ды диади́мою тя Христо́с венча́,/ Иоа́нне Златоу́сте,/ моли́твенниче о душа́х на́ших.

Сла́ва, глас 8. Анато́лиево:

Златы́ми словесы́ и Боговеща́нными уче́нии/ украси́в Бо́жию Це́рковь,/ бога́тство духо́вное сокро́вищствовал еси́ в ней,/ твоя́ Богопре́данная словеса́./ Тем вене́ц из нетле́нных цвето́в спле́тши пе́сньми,/ свяще́нней твое́й прино́сит па́мяти,/ всезлаты́й душе́ю с язы́ком, Иоа́нне Богому́дре,/ но, я́ко име́я дерзнове́ние, преподо́бне,/ моли́ся о душа́х на́ших.

И ны́не:

Влады́чице, приими́ моли́тву раб Твои́х,/ и изба́ви нас/ от вся́кия ну́жды и печа́ли.

Славосло́вие вели́кое. И отпу́ст.

На Литурги́и

Блаже́нны от кано́на, песнь 3-я и 6-я. Проки́мен, глас 1: Уста́ мои́ возглаго́лют прему́дрость, и поуче́ние се́рдца моего́ ра́зум. Стих: Услы́шите сии́, вси язы́цы, внуши́те вси живу́щии по вселе́нней. Апо́стол ко Евре́ем, зача́ло 318. Аллилуи́я, глас 2: Уста́ пра́веднаго поуча́тся прему́дрости: Ева́нгелие от Иоа́нна, зача́ло 36. Прича́стен: В па́мять ве́чную бу́дет пра́ведник: На трапе́зе быва́ет бра́тии вели́кое утеше́ние.