На Вече́рни

Блаже́н муж: 1-й антифо́н. На Го́споди, воззва́х: стихи́ры, глас 1:

Днесь любо́вию пра́зднующе Богоро́дице,/ честно́му образу Ея́ поклони́мся/ и те́пле возопии́м:/ Ма́тернее дерзнове́ние к Сы́ну Твоему́ и Бо́гу, Де́во, иму́щи,/ испроси́ нам у Него́ проще́ние грехо́в,/ мир и ве́лию ми́лость.

Храм Божества́ су́щая,/ вмести́лище простра́нное благода́ти и милосе́рдия/ яви́лася еси́, Богоневе́сто./ Услы́ши у́бо ско́ро рабо́в Твои́х, Всеблага́я Скоропослу́шнице,/ и пода́ждь скорбя́щим утеше́ние,/ бе́дствующим от бед избавле́ние,/ боля́щим здра́вие/ и всем ве́рным ве́лию ми́лость.

При́зри с Небесе́, Богоро́дице,/ на предстоя́щия пред свято́ю ико́ною Твое́ю/ и Тебе́ с ве́рою призыва́ющия/ и благода́ть Твою́ ниспосли́ нам,/ да богоуго́дно по́прище жи́зни на́шея пре́йдем/ и да сподо́бимся Твои́м хода́тайством/ от Сы́на Твоего́ прия́ти ве́лию ми́лость.

И́ны стихи́ры, глас 4:

Весели́ся, Дохиа́рская оби́тель Арха́нгелов,/ ра́дуйтеся, су́щии во Афо́не и повсю́ду, ве́рнии:/ о́бщая бо всех Засту́пница/ восхоте́ бы́ти ско́рая моля́щихся Услы́шательница/ вели́кия ра́ди Своея́ ми́лости.

Прите́кше под кров крил Небе́сных во́инств Архистрати́гов,/ притеце́м и под кров Небесе́ и земли́ Влады́чицы,/ благоутро́бно бо прие́млет и скоро́ вне́млет проше́нием,/ я́ко Всеблага́я Скоропослу́шница,/ к о́бразу Ея́ со благогове́нием прибега́ющих/ вели́кия ра́ди Своея́ ми́лости.

Богоизбра́нная Де́во Всецари́це,/ и́ноков необори́мый покро́ве/ и всех христиа́н непосты́дное прибе́жище,/ храни́ жре́бий Твой,/ Русь и вся гра́ды,/ ве́си и оби́тели правосла́вныя/ невреди́мы от враг ви́димых и неви́димых,/ и всех нас заступи́/ и спаси́ вели́кия ра́ди Твоея́ ми́лости.

Сла́ва, и ны́не, глас 7:

Егда́ трапеза́рь Дохиа́рский Нил лиши́ся зре́ния/ за е́же не вня́ти гла́су Твоему́, Пречи́стая,/ и принесе́ Тебе́ покая́ние пред свято́ю ико́ною Твое́ю,/ благоволи́ла еси́ рещи́ ему́:/ о и́ноче, услы́шася моле́ние твое́ ко Мне,/ бу́ди проще́н и зряй, я́ко и пре́жде,/ возвести́ же и про́чим подвиза́ющимся отце́м и собра́тиям твои́м,/ я́ко Аз есмь Ма́терь Бо́га Сло́ва/ и свяще́нныя оби́тели Арха́нгелов по Бо́зе покро́в,/ и по́мощь, и держа́вное предста́тельство,/ промышля́ющая о ней, я́ко Взбра́нная Прави́тельница./ И впредь и́ноцы да прибега́ют ко Мне во вся́кой их ну́жде,/ и ско́ро и́мам слу́шати их/ и всех, со благогове́нием прибега́ющих ко Мне правосла́вных христиа́н,/ се бо Скоропослу́шница нарица́юся.

Вход. Проки́мен дне. И чте́ния.

Бытия́ чте́ние (глава́ 28):

Изы́де Иа́ков от студенца́ кля́твеннаго,/ и и́де в Харра́нь./ И обре́те ме́сто, и спа́ та́мо,/ за́йде бо со́лнце,/ и взя́т от ка́мения ме́ста того́, и положи́ возгла́вие себе́,/ и спа́ на ме́сте о́ном; и сон ви́де:/ и се ле́ствица утвержде́на на земли́,/ ея́же глава́ досяза́ше до небе́с,/ и А́нгели Бо́жии восхожда́ху и нисхожда́ху по ней./ Госпо́дь же утвержда́шеся на ней, и рече́:/ Аз Бог Авраа́мов отца́ твоего́,/ и Бог Исаа́ков, не бо́йся,/ земля́, иде́же ты спи́ши на ней,/ тебе́ дам ю́, и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки./ И возблагословя́тся о тебе́ вся коле́на земна́я, и о се́мени твое́м./ И се Аз с тобо́ю, сохраня́яй тя на вся́ком пути́, а́може аще по́йдеши./ И возвращу́ тя в зе́млю сию,/ яко не и́мам тебе́ оста́вити,/ до́ндеже сотвори́ти Ми вся, е́лика глаго́лах тебе́./ И воста́ Иа́ков от сна́ своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но до́м Бо́жий,/ и сия́ врата́ небе́сная.

Проро́чества Иезекии́лева чте́ние: (гла́вы 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего, и я́же спасе́ния ва́шего,/ и прииму́ вы, глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки, и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут, и не отве́рзутся,/ и никто́же про́йдет сквозе́ их:/ я́ко Госпо́дь Бог Изра́илев про́йдет и́ми и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет, и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ себе́ дом,/ и утверди́ столпо́в седмь./ Закла́ своя́ же́ртвенная, и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́, созыва́ющи с высо́ким пропове́данием на ча́шу, глаго́лющи:/ и́же е́сть безу́мен, да уклони́тся ко мне,/ и тре́бующим ума́ рече́:/ прииди́те, яди́те мой хлеб, и пи́йте вино́,/ е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ние бо нечести́вому – ра́ны ему́./ Не облича́й злых, да не возненави́дят тебе́:/ облича́й прему́дра, и возлю́бит тя./ Даждь прему́дрому вину́, и прему́дрший бу́дет:/ сказу́й пра́ведному, и приложи́т приима́ти./ Нача́ло прему́дрости – страх Госпо́день, и сове́т святы́х – ра́зум./ Разуме́ти бо зако́н – по́мысла есть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.

А́ще изво́лит настоя́тель пе́ти литию́, на о́ной стихи́ры:

Глас 1:

Собра́вшеся днесь, бра́тие, на моле́бное песнопе́ние/ пред о́бразом Богома́тере Скоропослу́шницы,/ ду́ховное торжество́ соста́вим/ и благода́ть незави́стную почерпе́м/ от неистощи́маго исто́чника дарова́ний./ Благая́ бо Ма́терь су́щи Всеблага́го Бо́га на́шего/ Богоподо́бными сия́ет чудесы́,/ стра́сти и боле́зни исцеля́ет,/ в мо́ри и на су́ши спаса́ет/ с ве́рою к Ней прибега́ющия.

Глас 2:

Я́же всем удо́бь послу́шная в ско́рби/ и в печа́ли ско́ро помога́ющая/ призыва́ющим Тя от души́ нело́жно,/ умилосе́рдитися потщи́ся, Влады́чице,/ и заступи́ рабы́ Твоя́,/ избавля́ющи нас от бед моли́твами Твои́ми.

Глас 3:

Богоизбра́нная Присноде́во,/ Боже́ственных даро́в сокро́вище,/ ми́ра Предста́тельнице,/ ско́рая моля́щихся Послу́шательнице,/ не лиши́ нас щедро́т Твои́х/ и проше́ния на́ша ускори́ испо́лнити/ во спасе́ние душ на́ших.

Сла́ва, и ны́не, глас 7:

Ми́лостива, Благопребы́тна и Скоропослу́шна нам, Госпоже́, яви́ся,/ призыва́ющим Боже́ственную Твою благода́ть/ во всех, случа́ющихся нам:/ всю бо наде́жду душ на́ших возложи́хом к Тебе́, Благосе́рдой,/ и во всех упова́ем на про́мысл Твой,/ Ты и бу́дущия нас сла́вы,/ и живота́ Боже́ственнаго сподо́би.

На стихо́вне стихи́ры, глас 5:

Прииди́те, ве́рнии,/ восхва́лим Присноде́ву Богоро́дицу,/ ра́дуйся,– глаго́люще,– киво́те пресвяты́й/ и всесве́тлая ски́ния Царя́ царе́й, Христа́, Бо́га на́шего;/ ра́дуйся, А́нгелов удивле́ние и сла́во;/ ра́дуйся, земноро́дных похвало́ и весе́лие,/ спаса́ющая в ми́ре ду́ши на́ша.

Стих: Помяну́ и́мя Твое́/ во вся́ком ро́де и ро́де.

Ра́дуйся, Благослове́нная в жена́х,/ прароди́тельския кля́твы разреше́ние/ и о всем ми́ре умилостивле́ние;/ ра́дуйся, христиа́н те́плое предста́тельство/ и услы́шательнице ско́рая моля́щихся к Тебе́ с ве́рою;/ ра́дуйся, покро́ве и спасе́ние душ на́ших.

Стих: Слы́ши, Дщи, и виждь,/ и приклони́ у́хо Твое́.

Ра́дуйся, Госпоже́ всеми́лостивая,/ живоно́сный исто́чниче,/ струи́ щедро́т точа́щий ве́рным;/ ра́дуйся, Афо́на тве́рдое огражде́ние,/ и́ноков наста́внице и промышле́ние;/ ра́дуйся, всех по́моще,/ ра́досте и спасе́ние душ на́ших.

Сла́ва, и ны́не, глас 8:

О, мно́гих Тво́их чуде́с, Богоблагода́тная,/ соде́ланных о́бразом Твои́м, Скоропослу́шнице!/ Всяк бо, прите́кший к Тебе́ с ве́рою,/ не оты́де от ли́ка Твоего́ тощ и не услы́шан:/ слепи́и у святы́я Твоея́ ико́ны прозре́ша,/ хроми́и, разсла́блении и глуси́и исцели́шася,/ безча́дия, пле́на, пру́жия,/ треволне́ния морска́го и ины́х бед и неду́гов/ изба́вила еси́ призыва́ющих Тя,/ Ма́терь Всеще́драго Бо́га на́шего,/ подаю́щаго нам Тобо́ю ве́лию ми́лость.

Тропа́рь, глас 4:

К Богоро́дице притеце́м, су́щии в беда́х,/ и святе́й ико́не Ея́ ны́не припаде́м,/ с ве́рою зову́ще из глубины́ души́:/ ско́ро на́ше услы́ши моле́ние, Де́во,/ я́ко Скоропослу́шница наре́кшаяся./ Тебе́ бо раби́ Твои́ в ну́ждах/ гото́вую Помо́щницу и́мамы.

На У́трени

По 1-й кафи́зме седа́лен, глас 2:

Вчера́ воспе́ Свята́я Це́рковь собо́р Небе́сных Сил,/ благи́х покрови́телей на́ших;/ днесь пое́м песнь Тебе́, Всепе́той Богоро́дице, ми́ра держа́вному покро́ву,/ и прославля́ем ра́достно бла́гость Твою́./ Со Безпло́тными у́бо моли́ся во е́же спасти́ся нам.

Сла́ва, и ны́не, то́йже.

По 2-й кафи́зме седа́лен, глас 3:

Я́ко многосве́тлая луна́,/ показа́ся в честне́й оби́тели Арха́нгелов свята́я ико́на Твоя́, Де́во Скоропослу́шнице:/ свети́ши бо благода́тию чуде́с в нощи́ бед су́щим/ и ско́рую по́мощь подае́ши во спасе́ние душ на́ших.

Сла́ва, и ны́не, то́йже.

На полиеле́и велича́ние:

Велича́ем Тя,/ Пресвята́я Де́во,/ и чти́м о́браз Твой святы́й,/ и́мже то́чиши исцеле́ния/ всем, с ве́рою притека́ющим.

Псалом избра́нный: Помяни́, Го́споди, Дави́да:

По полиеле́и седа́лен, глас 8:

Благогове́йно обстоя́ще честны́й о́браз Ма́тере Све́та,/ моли́твы Ей я́ко Всеблаго́й Скоропослу́шнице усе́рдно принесе́м./ Сию́ бо Не́бо одушевле́нное человеколю́бием Госпо́дь соде́ла,/ излива́я То́ю, я́ко дождь, да́ры Своя́ во спасе́ние душ на́ших.

Сла́ва, и ны́не, то́йже.

По 50-м псалме́ стихи́ра, глас 7:

Проше́ния исполни́ рабо́в Твои́х,/ Тебе́, Пресвята́я Де́во, с ве́рою призыва́ющих./ От вся́кия ско́рби, неду́гов и озлобле́ния всех нас свободи́,/ да благода́рственно воспева́ем Тя,/ ско́рую моля́щихся Услы́шательницу,/ подаю́щую ве́рным ве́лию ми́лость.

Кано́на два. Кано́н пе́рвый, творе́ние преподо́бнаго Никоди́ма Святого́рца. Глас 8.

Песнь 1

Ирмо́с:Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Чуде́с Твои́х Боже́ственных мно́жество благохвали́ти предпринима́я,/ Тя молю́, Де́во, от се́рдца, Скоропослу́шнице,/ благода́ть пода́ждь ми.

Кто не изуми́тся Твоего́ о́браза чудесе́м, Де́во?/ От него́ бо служи́телю трапе́зы возгласи́ла еси́ три́жды,/ Скоропослу́шница наре́кшися.

Ка́ко чудодея́ние Твое́ изрещи́ возмогу́, Отрокови́це?/ Ты бо пре́жде непоко́рнаго и́нока безо́чна соде́лала еси́/ и па́ки сего́ устро́ила еси́ ви́дяща.

Ра́дуйся, свяще́нная оби́тель Дохиа́рская:/ ты бо и́маши всех Госпожу́ Предста́тельницу и покро́в,/ я́коже Сама́ Она́ я́сно возвести́.

Други́й кано́н, глас 4.

Песнь 1

Ирмо́с:Отве́рзу уста́ моя́:

Ма́ти Присносу́щнаго Све́та и о́тчия Прему́дрости,/ умудри́ неразу́мие мое́/ и просвети́ мя на пе́ние и моли́тву пред свято́ю ико́ною Твое́ю, Скоропослу́шнице.

Обре́тши сокро́вище ра́дуются,/ те́мже и мы, иму́ще Тя, Всецари́це,/ милосе́рдия сокро́вище Небе́сное и неиждива́емое,/ воспева́ем, ра́дующеся, Твоя́ чудеса́.

Лицу́ Твоему́, – предрече́ Дави́д, – помо́лятся бога́тии лю́дстии;/ исполня́ющуся сему́, вку́пе с бога́тыми и мы, доброде́тельми убо́зии,/ мо́лимся Тебе́, Де́во, пред ли́ком Твои́м.

Я́коже о́чи раб в руку́ госпо́дий свои́х,/ та́ко о́чи на́ши устремле́ни суть к Тебе́/ и к о́бразу Твоему́, Всеблага́я Влады́чице,/ до́ндеже уще́дриши рабы́ Твоя́.

Катава́сия:Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Песнь 3

Ирмо́с:Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Безча́дных благоча́дных Ты, Ма́рие, показа́ла еси́/ и непло́дных жен соде́лала еси́, Скоропослу́шнице, веселя́щихся о ча́дех./ Кто у́бо не изуми́тся, Де́во, вели́чию Твоему́?

Булга́рия пропове́дует Твоего́ о́браза чудеса́, о Скоропослу́шнице,/ восто́к же и за́пад./ Исто́чник бо соде́лалася еси́,/ точа́щий благода́ти всем призыва́ющим и́мя Твое́.

Ра́ка боле́знь от руки́ исчеза́ет честны́я жены́, Де́во, посеще́нием Твои́м,/ те́мже стра́ждущая, от неду́га свободи́вшися,/ ра́дующися, пропове́да благода́рственная.

Чу́дно украси́ся ико́на Твоя́, Скоропослу́шнице,/ и па́че луче́й со́лнечных освеща́ет всех благода́тию Твое́ю, Пречи́стая./ Кто у́бо не восхва́лит Тя, на Небеси́ и на земли́ сла́вимую!

Ин. Песнь 3

Ирмо́с:Твоя́ песносло́вцы:

Воззри́ Твои́ми очесы́, Мари́е,/ и виждь благоутро́бно пред ико́ною Твое́ю предстоя́щих и Тя с ве́рою призыва́ющих,/ и услы́ши сих, Скоропослу́шнице.

Кре́пость да́руй нам, Чи́стая, да твори́м во́лю Сы́на Твоего́ со стра́хом и любо́вию,/ укрепля́еши бо рабы́ Твоя́ я́ко Ма́терь Всеси́льнаго Бо́га на́шего.

Страстьми́ бори́мии и неви́димыми се́ятелями зол,/ при́сно нужда́емся в Твое́й, Влады́чице, необори́мой по́мощи,/ ея́же не лиши́ нас, Богоблагода́тная.

Спаси́тельный щит пода́ждь нам, Госпоже́,/ Твое́ держа́вное заступле́ние,/ и́мже началозло́бнаго побежда́юще кова́рства,/ венце́в сла́вы сподо́бимся.

Катава́сия: Твоя́ песносло́вцы, Богоро́дице,/ живы́й и незави́стный Исто́чниче,/лик себе́ совоку́пльшия, духо́вно утверди́,/ в Боже́ственнеи́ Твое́и́ сла́ве/ венце́в сла́вы сподо́би.

По 3-й песни седа́лен:

Влады́чицу Тя ми́ра ве́мы, Мари́е Всепе́тая,/ я́ко родила́ еси́ нам всех Творца́, Спаси́теля ми́ра,/ И́же и просла́ви Тебе́, Пречи́стую Ма́терь Свою́,/ подая́ Тобо́ю благода́ть и ми́лость чту́щим Тя/ и моля́щимся Тебе́, Богоро́дице.

Сла́ва, и ны́не, то́йже.

Песнь 4

Ирмо́с:Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Во всех конце́х чудотво́рный Твой о́браз просла́вися,/ и ны́не вси уста́ми Скоропослу́шницу произно́сят.

И во сне, Всецари́це, и я́ве, Скоропослу́шнице, явля́яся,/ чудеса́ соверша́еши в ми́ре пресла́вная.

Кто Твое́, Де́во, и́мя в нужде́ вся́кой призыва́ше,/ и ско́ро того́ не услы́шала еси́, я́ко Скоропослу́шница су́щая?

Блаже́нна еси́ Дохиа́рская оби́тель сла́вная,/ ико́ною бо обогати́лася еси́ Скоропослу́шницы всечестно́ю.

Ин. Песнь 4

Ирмо́с:Седя́й в сла́ве:

Припа́дая ко святе́й ико́не Твое́й, Де́во,/ вопию́ Ти от се́рдца сокруше́нна:/ не попусти́ ми поги́бнути, Всеми́лостивая Госпоже́,/ житие́ мое́ во гресе́х ижди́вшему.

Грехолюби́в сый, удали́хся, Влады́чице, Сы́на Твоего́,/ и лише́н есмь дерзнове́ния к Нему́./ Те́мже к покая́нию мя напра́вив,/ сподо́би получи́ти, е́же погуби́х.

Богоизбра́нная Отрокови́це, в руне́ ороше́нном предви́денная,/ окропи́ росо́ю благода́ти изсо́хшую зе́млю се́рдца моего́/ и благопло́дну соде́лай ду́шу мою́.

Ра́дуйся, Богоневе́сто, доброде́тельми, я́ко ря́сны златы́ми, преукра́шенная;/ ра́дуйся, сосу́де ми́ра, и́мже врачу́ются зову́щии:/ сла́ва, Христе́, си́ле Твое́й.

Катава́сия: Седя́й в сла́ве на Престо́леБожества́/ во о́блаце ле́гце,/ прии́де Иису́с Пребоже́ственный/ нетле́нною дла́нию и спасе́ зову́щия:/ сла́ва, Христе́, си́ле Твое́й.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой ми́р пода́ждь нам, Человеколю́бче.

Ка́ко на Твой пречи́стый о́браз/ аз, недосто́йный, воззрю́, Скоропослу́шнице,/ нечи́стыми очесы́ мои́ми!

Мо́ре и земля́, Всецари́це,/ Твоея́ ико́ны чудеса́ пропове́дуют:/ Твои́х бо благода́тей сия́ обоя́ наслади́шася.

Та́тя явля́еши, пе́нязи похи́тивша бли́жняго, Матероде́во,/ и возвраща́еши пра́ведно сия́ иму́щему.

Что воздади́м Тебе́, Всеблага́я, за благода́ть мно́гую,/ ю́же яви́ла еси́ нам,/ дарова́в ико́ну Твою́, бога́тство свяще́нное.

Ин. Песнь 5

Ирмо́с:Ужасо́шася вся́ческая:

Несть, Всеми́лостивая Госпоже́, такова́го,/ и́же бы лиши́ся щедро́т Твои́х, прибе́г с ве́рою к Твоему́ благоутро́бию./ Те́мже приле́жно мо́лим Тя:/ сподо́би и нас гре́шных ми́лости Твоея́.

Умилостивле́ние о всем ми́ре су́щая,/ умоли́, Де́во, Сы́на Твоего́, всех Судию́,/ да не помяне́т грехо́в на́ших,/ и да изба́вимся Тобо́ю вся́каго преще́ния Его́,/ находя́щаго на лю́ди согреши́вшия.

Примири́теля вся́ческих ро́ждшая,/ всемо́щным предста́тельством Твои́м, Влады́чице, умиротвори́ нас к Нему́,/ к бли́жним и к себе́ сами́м, я́ко воспева́ющим Тя мир подава́ющая.

Катава́сия:Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Песнь 6

Ирмо́с:Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ исполни́ся/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Яко любвеоби́льная Ма́терь я́вльшися, призыва́ла еси́ о́трока к Себе́,/ до́ндеже изба́вила еси́ от руки́ разбо́йников, Матероде́во./ Но да обрете́м Тя и мы, Ма́терь любвеоби́льную!

Не и́мамы раби́ Твои́ ино́го, ра́зве Тебе́, предста́тельства и покро́ва./ Те́мже, Чи́стая, от се́рдца вопие́м:/ вся́кия беды́ свободи́ ста́до Твое́/ и ве́рных, к Тебе́ прибега́ющих.

Я́коже спасла́ еси́ от морски́я бу́ри призва́вших Боже́ственное и́мя Твое́,/ та́ко и нас от чу́вственнаго круше́ния и мы́сленнаго, Де́во, спаси́/ и в ти́хия приста́нища спасе́ния упра́ви.

Мир Тя прибе́жище стяжа́ и спасе́ние;/ тем, Чи́стая, к честне́й Твое́й ико́не отвсю́ду притека́ют лю́дие,/ и вси ско́ро их слу́шающуто обрета́ют Тя.

Ин. Песнь 6

Ирмо́с:Боже́ственное сие́ и всечестно́е:

Ты – рабо́в Твои́х утеше́ние, Всеблаже́нная,/ Ты – свет, удобре́ние и наде́жда спасе́ния;/ Ты у́бо промышле́нием Твои́м вся́кия ну́жды и ско́рби изба́ви нас.

Ве́дущи не́мощи на́ша, Богороди́тельнице,/ восполня́й духо́вную и веще́ственную ску́дость на́шу,/ да подаю́щаго нам Тобо́ю вся блага́я Бо́га сла́вим.

Не оста́ви нас, Всеще́драя, внегда́ оскудева́ти кре́пости на́шей,/ не отступи́ от упова́ющих на Тя во исхо́де/ и по исхо́де яви́ нам бла́гости Твоея́ си́лу.

Преблагослове́нная Мари́е, кни́га Бо́жия запечатле́нная,/ в кни́зе живота́ ве́чнаго написа́тися нам сподо́би,/ да от Тебе́ ро́ждшагося Бо́га сла́вим.

Катава́сия: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим:/ от Нея́ ро́ждшагося Бо́га сла́вим.

Конда́к, глас 8:

В мо́ри жите́йстем обурева́емии,/ треволне́нию подпа́даем страсте́й и искуше́ний./ Пода́ждь у́бо нам, Госпоже́, ру́ку по́мощи, я́коже Петро́ви Сын Твой,/ и ускори́ от бед изба́вити ны, да зове́м Ти:/ ра́дуйся, Всеблага́я Скоропослу́шнице.

И́кос:

Иде́же осени́т благода́ть Твоя́, Влады́чице,/ та́мо неду́жнии здра́ви быва́ют, бе́дствующии во благополу́чие прихо́дят,/ и всяк скорбя́щий ра́дости исполня́ется./ Те́мже благода́тию Твое́ю осени́ и нас, сицева́я ра́достная Тебе́ глаго́лющих:/ ра́дуйся, Богоблагода́тная, Непристу́пнаго Божества́ селе́ние;/ ра́дуйся, свята́я трапе́зо, хле́бом жи́зни нас снабдева́ющая;/ ра́дуйся, ми́ро многоце́нное, облагоуха́ющее ве́рных;/ ра́дуйся, ма́слино, еле́ем милосе́рдия нас умаща́ющая;/ ра́дуйся, неистощи́мое сокро́вище даро́в;/ ра́дуйся, приснотеку́щий исто́чниче чуде́с;/ ра́дуйся, оби́димых заступле́ние;/ ра́дуйся, обурева́емых благоути́шное приста́нище;/ ра́дуйся, глухи́х слы́шание и све́те слепы́х;/ ра́дуйся, разсла́бленных укрепле́ние;/ ра́дуйся, свобожде́ние плене́нных;/ ра́дуйся, ми́ра всего́ упова́ние;/ ра́дуйся, Всеблага́я Скоропослу́шнице.

Песнь 7

Ирмо́с:От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Слепы́м дарова́ла еси́ де́йствие очесе́м, Де́во, е́же ви́дети,/ но и на́ша зе́ницы души́ и телесе́ просвети́,/ да пое́м при́сно вели́чия Твоя́.

Глухи́м слы́шание дарова́ла еси́, Мари́е Скоропослу́шнице,/ но и нас всех отве́рзи ушеса́ души́ и телесе́,/ я́ко да пое́м при́сно вели́чия Твоя́.

Я́коже дре́вле от пруго́в изба́вила еси́ прибе́гших к Тебе́, Пречи́стая,/ та́ко и нас от сих и вся́каго вре́да изба́ви,/ да пое́м при́сно вели́чия Твоя́.

Я́ко испра́вила еси́ пре́жде разсла́бленнаго,/ та́ко и нас, по обою́ разсла́бленных, те́плым Твои́м предста́тельством испра́ви,/ да пое́м при́сно вели́чия Твоя́.

Ин. Песнь 7

Ирмо́с:Не послужи́ша тва́ри Богому́дрии:

Наста́внице ко спасе́нию рабо́в Твои́х,/ души́ трича́стное, Госпоже́, испра́ви,/ да благода́ти безстра́стия сподо́бльшеся, пое́м:/ препе́тый отце́в Го́сподь и Бог, благослове́н еси́.

Жела́тельную си́лу души́ к Боже́ственному раче́нию напра́ви,/ да то́ю Бо́га всеце́ло возлю́бим/ и к Нему́ при́сно стреми́мся,/ я́ко всеблаже́нному жела́ний кра́ю.

Я́ростную си́лу души́/ помози́ нам, Де́во, обраща́ти на неви́димыя враги́ спасе́ния на́шего/ и спаси́тельныя любве́ испо́лни сердца́ на́ша к бли́жним и к Бо́гу.

Слове́сное души́ к Богоуго́дному созерца́нию воскрыли́, Влады́чице,/ богопроти́вных помышле́ний избавля́ющи,/ и всех нас благо́е мы́слити, глаго́лати и твори́ти укрепи́.

Катава́сия:Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Песнь 8

Ирмо́с:Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

От вся́ких боле́зней, Скоропослу́шнице, нас изба́ви,/ я́коже от сих мно́гих изба́вила еси́.

Ико́на Твоя́, Де́во, показа́ся исто́чник чуде́с,/ от него́же жа́ждущии снабдева́ются изоби́льно.

Поги́бшаго Ты явля́еши, Госпоже́,/ и подае́ши ра́дость обре́тшим./ Коль мно́гая есть о́браза Твоего́ благода́ть!

Повеле́нию Твоему́, Влады́чице, повиную́тся вся стихи́и,/ от ни́хже вре́да да избавля́еши Тя призыва́ющих.

Ин. Песнь 8

Ирмо́с:О́троки благочести́выя:

Па́жить плодоно́сну обрета́ет ста́до под Твои́м, Богома́ти, управле́нием,/ и душетле́ннии во́лцы не мо́щны расхи́тити слове́сных ове́ц,/ храни́мых благода́тию Сы́на Твоего́ и Бо́га.

Блаже́н челове́к, ему́же есть заступле́ние его́ от Тебе́, Богоневе́сто,/ при́сно бо полага́ет таковы́й восхожде́ния в се́рдце свое́м,/ до́ндеже у́зрит себе́ спасе́нна и воспое́т:/ Го́спода по́йте дела́ и превозноси́те Его́ во вся ве́ки.

Седмисве́щный свети́льниче, седмию́ дара́ми Ду́ха светя́щий,/ сподо́би и нам украси́тися духо́вными плода́ми,/ да, уще́дреннии чрез Тебе́ Бо́гом, пое́м:/ Го́спода по́йте дела́ и превозноси́те Его́ во вся ве́ки.

Горо́ Бо́жия, в Не́йже благоволи́ жи́ти Бог,/ моли́ся к Нему́ о нас,/ да по́мощию Его́ благо́е творя́ще,/ сподо́бимся узре́ти преми́рныя го́ры и та́мо пе́ти:/ Го́спода по́йте дела́ и превозноси́те Его́ во вся ве́ки.

Катава́сия:О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́и́ствуемое,/ вселе́ннуювсю воздвиза́ет пе́ти Тебе́:/ Го́спода по́йте дела́/ и превозноси́те Его́ во вся ве́ки.

Песнь 9

Ирмо́с:Вои́стинну Богоро́дицу Тя испове́дуем,/спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Собери́теся усе́рдно в оби́тель Боже́ственную Арха́нгелов, боля́щии:/ Врач бо в ней пребыва́ет безме́здный.

Свяще́нная ико́на Твоя́ друга́я показа́ся Силоа́мская купе́ль, Де́во,/ очища́ющая и целя́щая боле́зни души́ и телесе́.

Воспламеня́ет мя раче́ние зре́ти Твоего́ о́браза благода́тную ле́поту,/ и насыще́ния не и́мам велича́ти Тя!

Да уви́жду Тя, Всеблага́я Скоропослу́шнице, во вре́мя сме́рти утеша́ющую мя/ и зра́ки де́монов отгоня́ющую!

Ин. Песнь 9

Ирмо́с:Всяк земноро́дный:

Помяни́, Госпоже́, рабы́ Твоя́, любо́вию сла́вящия Тя,/ услы́ши моля́щихся к Тебе́/ и моли́твами Твои́ми благоуве́тлива нам соде́лай Сы́на Твоего́ и Бо́га/ зде и на Стра́шном Суде́ Его́,/ Всеблаже́нная Богоро́дице, Чи́стая Присноде́во.

Ра́досте А́нгелов и челове́ков, свобо́дны нас печа́лей жите́йских сотвори́/ и хода́тайством Твои́м не конча́емых мук изба́ви,/ да вре́менных и ве́чных бед Тобо́ю избы́вше, вопие́м:/ ра́дуйся, Всеблаже́нная Богоро́дице, Чи́стая Присноде́во.

Ви́димо пред о́бразом Твои́м предстоя́ще,/ неви́димо же к Тебе́, одесну́ю Сы́на Твоего́ стоя́щей,/ ум возводя́ще, мо́лим Ти ся приле́жно:/ сподо́битися нам ра́йскаго блаже́нства умоли́,/ Всеблаже́нная Богоро́дице, Чи́стая Присноде́во.

Блага́го Царя́ Блага́я Ма́ти,/ осени́ ны необори́мым покро́вом Твои́м,/ Всеблаже́нная Богоро́дице, Чи́стая Присноде́во.

Катавасия: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная/ Богоро́дице, Чи́стая Присноде́во.

Свети́лен:

Зря́щии Тя ны́не на ико́не с Предве́чным Младе́нцем,/ про́сим Тебе́, Богоневе́сто:/ не лиши́ нас и в бу́дущем ве́це всеблаже́ннаго лицезре́ния Твоего́/ и воплоти́вшагося от Тебе́ Сы́на Бо́жия,/ да со благоугоди́вшими Ему́ И́мя Его́ и Твое́ велича́ем.

На хвали́тех стихи́ры, глас 5:

Ди́вна дела́ Твои́, Го́споди!/ Пресвяту́ю Ма́терь Твою́ дарова́л еси́/ безпомо́щным ско́рую Помо́щницу,/ си́льную Защи́тницу беззащи́тным/ и предста́тельство те́плое безотве́тным:/ предстоя́ бо Тебе́, всех Влады́це,/ мо́лится при́сно о всех нас.

Ко́е досто́йное благодаре́ние/ принесе́м Ти, Богоизбра́нная Присноде́во?/ За мно́жество даро́в Твоего́ милосе́рдия,/ явля́емаго с ве́рою к Тебе́ прибега́ющим,/ неду́ги бо душ и теле́с врачу́еши/ и избавля́еши от бед,/ моля́щися Бо́гу при́сно о всех нас.

Держа́вная Влады́чице ми́ра,/ назира́ющая су́щих в Горе́ Твое́й и повсю́ду ве́рных/ я́ко Взбра́нная Прави́тельница,/ не преста́й благоутро́бно промышля́ти о рабе́х Твои́х/ и вся блага́я нам ниспосыла́ти,/ вре́менная же и ве́чная,/ и моли́ся Бо́гу при́сно о всех нас.

Сла́ва, и ны́не, глас 3:

Све́тел преше́дший пра́здник,/ озаре́нный сла́вою Архистрати́гов,/ ра́достен дне́шний, свети́ся благода́тию А́нгелом гове́йнаго о́браза Богома́тере/ и на рука́х Ея́ держи́маго Вседержи́теля./ Я́коже бо Он рече́ нам:/ проси́те, и да́стся вам,–/ тако и Всеблага́я Ма́терь Его́/ повеле́ прибега́ти к Ней во вся́кой ну́жде/ и обеща́ ско́ро слу́шати/ со благогове́нием моля́щихся пред свято́ю Ея́ ико́ною,/ ю́же и просла́ви чудесы́ мно́гими,/ подаю́щи ве́рным ве́лию ми́лость.

Славосло́вие вели́кое и отпу́ст.

На Литурги́и

Блаже́нны пе́рваго кано́на, песнь 3-я, и втора́го, песнь 6-я. Проки́мен, Апо́стол, Ева́нгелие и прича́стен Богоро́дицы.

На Го́споди, воззва́х: стихи́ры му́чеников, глас 8.

Подо́бен: О, пресла́внаго чудесе́:

Му́чениче страда́льче, блаже́нне Ониси́форе,/ Христа́ Бо́га испове́дал еси́,/ стражда́ крепча́йше беззако́ннующих пред суди́щем,/ ра́ны язв претерпе́в/ и пожже́ния всего́ телесе́./ Те́мже венча́лся еси́ побе́ды венце́м/ живонача́льнейшею руко́ю, всехва́льне.

Му́чениче страда́льче Порфи́рие,/ крове́й обагре́ньми себе́ пома́зал еси́ порфи́ру,/ благода́тию и си́лою Ду́ха,/ в ню́же оде́явся,/ яви́лся еси́ светле́йший,/ сца́рствуя ца́рствующему еди́ному Бо́гу на́шему во ве́ки, сла́вне./ Его́же приле́жно всегда́ моли́/ е́же спасти́ся всем нам.

Му́ченицы достосла́внии,/ за всех Жизнь свяще́нно умерщвля́еми,/ на сковраде́, ра́дующеся, разжже́нней простро́стеся/ и, привя́зани, ко́ньми влачи́ми,/ блаже́нный коне́ц прия́сте./ Тем прославля́етеся и ублажа́етеся,/ о нас всегда́ моля́щеся, присноблаже́ннии.

И́ны стихи́ры преподо́бныя, глас 4.

Подо́бен: Я́ко до́бля:

Пло́ти игра́ния/ по́стными по́двиги души́ любоче́стне покори́ла еси́,/ и Христу́ после́довала еси́,/ и посреде́ по́стников всели́лася еси́ всегове́йно, о Матро́но,/ угаша́ющи распале́ния сластна́я Боже́ственными ту́чами слез/ и зе́льнейшее жела́ние к Зижди́телю возжига́ющи.

Свяще́нное жили́ще/ во мно́гих по́льзу Бо́гу воздви́гла еси́,/ бы́вши храм Ду́ха, всему́драя, чистото́ю душе́вною,/ и путево́дствила еси́ ду́ши к поле́зным подвиго́м по́стным,/ и привела́ еси́ сия́, я́коже ве́но, спасе́ны, о Матро́но, Влады́це./ С ни́миже ве́рою тя почита́ем.

Отрокови́цы возлюби́ша Неве́стника и Го́спода,/ уче́нию твоему́ покаря́ющияся/ и плотску́ю презре́вше сла́бость в ду́се,/ усе́рдием стра́сти благоче́стно удержа́ша/ и введо́шася с тобо́ю, о Матро́но,/ в черто́г Небе́сный и Боже́ственный,/ всегда́ веселя́щеся.

Сла́ва и ны́не, Богоро́дичен.

Подо́бен то́йже.

Я́же Бо́га невмести́маго во чре́ве Твое́м вмести́вшая,/ человеколю́бно Челове́ка бы́вша,/ и на́ше смеше́ние из Тебе́ прии́мша,/ и обожи́вша я́в ./ Не пре́зри мене́, Всечи́стая, ны́не скорбя́ща,/ но уще́дри ско́ро/ и разли́чныя вражды́ же и вре́да лука́ваго свободи́.

Крестобогоро́дичен:

Подо́бен то́йже.

На Кресте́ Тя яко узре́ пригвожде́на, Го́споди,/ А́гница и Ма́ти Твоя́ дивля́шеся:/ и что виде́ние сие́, взыва́ше, Сы́не вожделе́ннейше?/ сия́ Ти неве́рный собо́р воздаде́, пребеззако́нный,/ и́же мно́гих Твои́х чуде́с наслади́выйся,/ но сла́ва неизглаго́ланному соше́ствию Твоему́, Влады́ко.

Тропа́рь му́чеников, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Сла́ва, преподо́бныя, глас 8.

Подо́бен: Прему́дрости:

Мужескому́дрено утаи́вшися вра́жиих лука́вых путе́й, Матро́но,/ к жи́зни вои́стину ше́ствовавши несумне́нною во́лею/ и неукло́нное тече́ние Богому́дро сконча́вши,/ от Христа́ прия́ла еси́ благода́ть духо́вную,/ тем и во́ду цельба́м источа́еши/ любо́вию притека́ющим в па́мять твою́ сла́вную,/ мни́хом похвала́,/ моли́ Христа́ Бо́га спасти́ся душа́м на́шим.

И ны́не, Богоро́дичен или́ Крестобогоро́дичен.

Восле́дование пое́тся на повече́рии. Кано́н, глас 6.

Песнь 1

Ирмо́с:Я́ко по су́ху, пешеше́ствовав, Изра́иль,/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь/ пои́м, вопия́ше.

Я́ко чу́дна твоя́ жизнь и житие́,/ А́нгелом каса́ющися невеще́ственным но́вым и необы́чным нра́вом,/ тесното́ю па́че естества́, Феокти́сто, жи́тельства твоего́.

От младе́нства мирску́ю пи́щу отню́д возненави́дела еси́ и плотску́ю сласть,/ пост возлюби́вши,/ и́мже обузда́ла еси́ стремле́ния вся теле́сная.

Благу́ю зе́млю души́ твоея́ во мла́дости незло́бия обре́те Се́ятель благи́х/ и вложи́ се́мя жизни,/ собра́ плод стори́чествующий.

Богоро́дичен: Тя, Пречи́стую Отрокови́цу и ве́рным кре́пкое Заступле́ние,/ Феокти́ста, от души́ изде́тска возлюби́вши,/ всем доброде́телем па́че естества́ прия́телище бысть.

Песнь 3

Ирмо́с:Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Не утаи́ся лука́ваго, Богоуго́дне живу́щи,/ сего́ ра́ди содева́ет на плещи́ твои́ зла́я/ и мно́жество Ара́влян наво́дит Ле́зве, оте́честву́ твоему́.

Плене́ну тя враги́ пра́ведных враг преда́ти тщи́тся,/ но близ Изба́витель,/ И́же а́бие от ме́рзких исхи́тив, чи́сту Себе́ соблюде́.

В Па́ре о́строве, враго́в избе́гши руки́,/ изво́лила еси́ мона́шествовати, я́ко пти́ца, в нем,/ и в та́мо су́щем хра́ме Присноде́вы Богома́тере/ я́ко служе́бница пребыва́ющи всегда́.

Богоро́дичен: Всю наде́жду на Тя Феокти́ста возложи́вши, Ма́ти Де́во Отрокови́це,/ и Тя, покро́в, и пи́щу, и питие́,/ и кре́пкое заступле́ние, в лю́тых стяжа́.

Песнь 4

Ирмо́с:Христо́с моя́ си́ла,/ Бог и Госпо́дь,/ честна́я Це́рковь/ Боголе́пно пое́т, взыва́ющи/ от смы́сла чи́ста, о Го́споде пра́зднующи.

Тай отше́дши во вну́тренняя и веще́ственная о́строва,/ ви́димых враго́в избе́гла еси́,/ неви́димых же зе́льна приложи́ся тебе́ рать.

Кто возмо́жет твоя́, преподо́бная, отню́д изрещи́ по́двиги,/ я́же име́ла еси́, к нача́льником тьмы стра́ждущи?/ и́хже и стре́лы пла́менны, и словеса́ неудобопости́жна.

О, и́же храня́щия тя Боже́ственныя благода́ти!/ Ка́ко и еди́на, и млада́, разу́мных ефио́плян ополче́ние/ в же́нстем естестве́ победи́вши, посрами́ла еси́.

Богоро́дичен: Соверше́нным ра́зумом в ю́ности телесе́, Феокти́ста, пожи́вши,/ к Твое́й Ма́тери, Бо́же, утверди́ все упова́ние свое́/ и приспе́ в ста́рость до́брую.

Песнь 5

Ирмо́с:Бо́жиим све́том Твои́м, Бла́же,/у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Ум возвы́сивши к Бо́гу,/ вся прешла́ еси́ жела́емая паде́ний и ну́жная телесе́./ Тем ни глад тя, ни жа́жда, сла́вная,/ ни мраз, ни нагота́, ни зной победи́.

Стра́нное твое́ житие́ враг ви́дя, яря́ся за́вистию,/ смуща́я тя и искуша́я ко́зньми вся́кими,/ но не возмо́же запя́ти, непоро́чная, стопы́ твоя́.

Стре́лы младе́нец лука́ваго вся́ко приложе́ний вмени́вши,/ невозвра́тно соверши́ла еси́ но́вое поще́ния твоего́ обхожде́ние/ и посрами́ла еси́ сего́ тще́е шата́ние.

Богоро́дичен: Я́ко блаже́нная в жена́х, Тя, преблаже́нная Богоро́дице,/ разу́мное заступле́ние себе́ положи́,/ о Тебе́ сотво́рши си́лу, оскорбля́ющия же изничто́жи.

Песнь 6

Ирмо́с:Жите́йское мо́ре,/ воздвиза́емое зря/ напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Уста́вы есте́ственныя превзы́де, кроме́ потре́бных жи́вши./ Тем я́ко прикаса́ющися, во пло́ти безвеще́ственна пребыва́ше,/ и́мже хотя́ше су́щих неви́димых.

Проуве́дела еси́ Ду́хом Святы́м твою́ кончи́ну прибли́жившуся./ Тем и ви́дена была́ еси́ ловце́м, Бо́гу благоволи́вшу,/ я́ко да не утаи́тся твое́ житие́ страннообра́зное.

Я́ко ви́де тя, преподо́бная, в це́ркви лове́ц,/ зрак зе́млен иму́щу, кроме́ пло́ти и кро́ве,/ уди́влься, мечта́ние зре́ти мня́ше,/ в толи́ко иста́явшу, о, чудесе́!

Богоро́дичен: Пречи́стая Влады́чице,/ не отри́ни мене́, лю́тыя нечистоты́ по́лна су́ща,/ но ми́лостива бу́ди мне и уве́тлива,/ приими́ принося́щаго Твоея́ Феокти́сты в моли́твы моле́ние.

Седа́лен, глас 1.

Подо́бен: Гроб Твой, Спа́се:

Измла́да Бо́гу, Феокти́сто, вдана́ бы́вши,/ я́ко зда́ние благо́е и созда́вшему подо́бно,/ усе́рдно и́го Его́ благо́е от ю́ности взе́мши,/ не вкуси́ла еси́ мяте́жа жите́йскаго, храня́щи вся чу́вства./ Тем, я́ко безпло́тна, стра́нно на земли́ жи́тельствоваше.

Сла́ва и ны́не, Богоро́дичен:

Безневе́стная Чи́стая Богоро́дице Де́во,/ еди́на ве́рных Предста́тельнице и Покро́ве,/ бед, и скорбе́й, и лю́тых обстоя́ний вся изба́ви/ на Тя наде́жду, Отрокови́це, иму́щия/ и ду́ши на́ша спаси́ Боже́ственными моли́твами Твои́ми.

Или́ Крестобогоро́дичен:

Нескве́рная А́гница,/ А́гнца и Па́стыря пове́шена на Дре́ве ме́ртва зря́щи,/ пла́чущи, веща́ше, ма́терски восклица́ющи:/ ка́ко претерплю́ Твое́, е́же па́че сло́ва, Сы́не Мой, сни́тие/ и во́льныя стра́сти, Бо́же Преблаги́й?

Песнь 7

Ирмо́с:Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Ско́ро разреши́ла еси́ устраши́вшемуся виде́ния твоего́ боя́знь,/ объяви́вши приклю́чшаяся тебе́ по Боже́ственному Про́мыслу, чи́стая,/ о ни́хже и пред ним дала́ еси́ сла́ву Бо́гу благода́рственно.

3а ше́сть лет и три́десять пости́вшися,/ спаси́тельнаго Те́ла и Кро́ве причасти́тися не иму́щи,/ про́сиши приклю́чшемуся ти/ от него́ Часть еди́ну благогове́йно принести́ к тебе́.

Прии́де, нося́ Жела́емое, и вложи́ всегове́йно в ру́ку твою́,/ е́же и прие́мши, и, веселя́щися, глаго́лала еси́ к Бо́гу:/ ны́не отпуща́еши мя Твою́, Влады́ко, рабу́ ми́лостивно по глаго́лу Твоему́.

Богоро́дичен: Благоуго́дно Тебе́ пожи́вшую, Всепе́тая, прия́ла еси́ служе́бницу Твою́/ и сподо́била еси́ неизрече́нных Боже́ственных благ;/ тоя́ моли́твами и нас прича́стники сотвори́, Чи́стая, нетле́нныя пищи.

Песнь 8

Ирмо́с:Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Стра́шных Та́ин причасти́вшися ве́рно,/ я́коже жела́ла еси́, ма́ти преподо́бная,/ оста́вила еси́ персть у́бо пе́рсти,/ честны́й же дух твой А́нгели че́стно принесо́ша Го́споду.

Приступи́в к тебе́ и па́ки лове́ц ве́рный,/ благослове́ния я́ко получи́ти от Тебе́ шед,/ обре́те ме́ртву лежа́щу тя зако́ном есте́ственным и дивля́шеся,/ что подо́бно ему́ соде́яти.

Помышле́нием я́ко мня́ше, и́же не навы́к до́браго,/ Богоуго́дно взем твою́ де́рзостно ру́ку честну́ю,/ обеща́ся прия́ти на честь святы́я твоея́ па́мяти, блаже́нная,/ и жития́ соблюде́ние име́ти.

Богоро́дичен: Доброде́тели святы́х почита́ю, Влады́чице,/ доброде́тели же де́лания отню́д не стяжа́х,/ но, я́ко ми́лостива, уще́дри моя́ чу́вствия/ и изба́ви мя всезло́бнаго обы́чая.

Песнь 9

Ирмо́с:Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти:/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем.

Ру́ку укра́дену взе́мшаго/ с корабле́м, и бре́менем, и плову́щими удержа́ла еси́/ пребыва́ти во о́строве Па́ре, до́ндеже уразуме́в, он,/ нося́ сию́, положи́ с мольбо́ю к про́чему честно́му твоему́ телеси́.

Отпуще́ннии и удержа́ннии, су́щия в тебе́ си́лы во иску́се бы́вши,/ ку́пно вси притеко́ша к моще́м твои́м/ до́бре поклони́тися и объя́ти, ничто́же обрето́ша:/ неви́дима бо бы́вше о́бразом, и́мже весть Бог.

Вели́ких боле́зней измене́ние бо́льшим от Христа́, преподо́бная, прие́мши/ и иму́щи дерзнове́ние вели́ко моли́тися Ему́,/ помяни́ почита́ющия Боже́ственную па́мять твою́/ и испроси́ нам грехо́в очище́ние и жития́ исправле́ние.

Богоро́дичен: Вся хотя́ спасти́, Госпо́дь,/ Тя Себе́ Ма́терь избра́в, положи́ ве́рным вину́ вся́каго бла́га./ Сего́ беззако́нием огорчи́вши,/ Тобо́ю упова́ем обрести́ ми́лость, Ми́лостивая Влады́чице.

Стихи́ры, глас 1.

Подо́бен: Небе́сных чино́в:

Ве́чных жела́ющи получи́ти благ,/ тле́ющих все сладостра́стие,/ зло́е мне́ла еси́ ку́плю/ и пи́щу страсте́й разжже́ние./ Тем изде́тска ли́ку мона́шествующих сочета́лася еси́, чи́стая.

Нечи́стых духо́в не неве́дящи ко́зней всех,/ проти́вилася еси́ до́блественно,/ из ко́рене истерза́ющи стра́стная возраще́ния,/ и младе́нцы зло́бы держа́щи Дави́дски,/ и разбива́ющи к ка́мени Христу́.

Ма́нием Бо́жиим избе́гши ра́тных рук,/ водвори́лася еси́ в пусты́ни, Христа́ и́щущи,/ претекла́ еси́ разу́мно мирско́е страсте́й мо́ре жития́/ и в приста́нищи вы́шняго оти́шия./ Его́же возжеле́ла еси́, Христа́ зри́ши.

Сла́ва, и ны́не, Богоро́дичен:

Ра́дуйся, ту́чная горо́;/ радуйся, седа́лище Бо́жие;/ ра́дуйся, Боже́ственная держа́во;/ ра́дуйся, неопали́мая купино́;/ ра́дуйся, Богоро́дице;/ ра́дуйся, черто́же;/ ра́дуйся, ле́ствице Небе́сная;/ ра́дуйся, хра́ме; ра́дуйся, ру́чко;/ ра́дуйся, ски́ние;/ ра́дуйся, не престаю́щая ми́ру ра́дость.

Крестобогоро́дичен:

Воздви́жена я́ко ви́де на Кресте́ А́гнца/ Непоро́чная Де́ва, пла́чущи, вопия́ше:/ сла́дкое Мое́ Ча́до,/ что но́вое и пресла́вное виде́ние?/ Ка́ко содержа́й вся́ческая го́рстию/ на Дре́ве пригвожда́ешися пло́тию?

На У́трени

Кано́н Окто́иха еди́н и святы́х два. Кано́н му́чеников, его́же краегране́сие: Но́сиши по́льзу твои́м похва́льником, блаже́нне. Ио́сиф. Глас 4.

Песнь 1

Ирмо́с:Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Нося́щи ве́рою благохва́лящим по́льзу Боже́ственную,/ честна́я наста́ па́мять твоя́,/ в не́йже тя мо́лим, блаже́нне:/ всех нас помяни́.

Име́я дерзнове́ния испо́лнено твое́ до́блественное помышле́ние,/ безслове́снаго повеле́ния небре́гл еси́, Богодухнове́нне,/ и, ра́дуяся, блаже́нне, страда́л еси́.

Си́лою возмога́емь Небе́сною, Ониси́форе,/ к лю́тым устреми́лся еси́ му́кам/ и всю победи́л еси́ кре́пость ра́тующаго.

Богоро́дичен: Уста́вила еси́ сме́рти мучи́тельство,/ безсмертную Жизнь, Созда́теля, ро́ждши, Христа́, Изба́вителя на́шего,/ Де́во Неискусобра́чная.

Ин кано́н преподо́бныя, его́же краегране́сие: Матро́ны подо́бно пою́ сла́ву. Ио́сиф. Глас 8.

Песнь 1

Ирмо́с:Пои́м Го́сподеви, вси лю́дие,/ в мо́ре Чермне́м фарао́на погрузи́вшему,/ побе́дную песнь пою́ще, я́ко просла́вися.

С чи́ны Небе́сными всегда́ су́щи/ и прича́стием Боже́ственным обожа́ема,/ чту́щия тя спаса́й моли́твами твои́ми.

Вся, Боже́ственным жела́нием распала́емая,/ разжже́ния сласте́й душетле́нных воздержа́ния ту́чами угаси́ла еси́.

Че́стен Влады́ки сосу́д яви́лася еси́,/ очи́стивши се́рдце, Матро́но, страсте́й плотски́х поще́нием.

Богоро́дичен: Обра́дованная,/ из Тебе́ роди́тися Благоволи́вшаго па́че естества́ моли́/ умири́ти и спасти́ вся́ческая.

Песнь 3

Ирмо́с:Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Ра́вно Отцу́ и Ду́ху, Сло́во на три́знищи испове́дающе, му́ченицы,/ треволне́ния мук му́жески отрази́ша.

Поста́вив тве́рдо но́ги твоя́, му́чениче, на ка́мени испове́дания и ве́ры,/ ве́тры, Ониси́форе, ран не поколеба́лся еси́.

Всем умо́м, блаже́нне му́чениче, изступи́в ко Христу́ жела́емому,/ не чу́вствовал еси́ и́же от ран боле́зней, всеблаже́нне.

Богородичен: При́зри, Пречи́стая, спасти́ мя,/ и́бо Боже́ственным ма́нием все стро́ящаго воплоти́ла еси́ Бо́га Сло́ва/ па́че сло́ва и помышле́ния.

Ин

Ирмо́с:Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т тя дух мой.

Жезло́м Боже́ственныя ве́ры страсте́й пресе́кла еси́ мо́ре,/ Боже́ственне душа́м предпутетворя́щи пра́вое прехожде́ние.

Яви́лася еси́ удобре́ние еди́нствующих я́ве, всечестная́,/ и мона́хов житие́ стяжа́вши чи́стое и непоро́чное.

Ме́ртвости совлекла́ся еси́ тлетво́рных страсте́й, сла́вная,/ и врага́ житие́м благоче́стным обнажи́ла еси́.

Богоро́дичен: Соедини́ся во утро́бе Твое́й Созда́тель пло́ти, Пречи́стая,/ пребы́в е́же бе,/ я́ко да е́же бла́го бы́ти челове́ком да́рует.

Конда́к преподо́бныя, глас 2.

Подо́бен: Бла́гость прии́мше:

За любо́вь Госпо́дню, преподо́бная Матро́но,/ поко́я жела́ние возненави́дела еси́,/ поще́нием дух твой просвети́вши,/ но твои́ми моли́твами и проти́вных шата́ния разори́,/ кре́пко бо зве́ри победи́ла еси́.

И́кос:

Струю́ мне сло́ва даждь, Бо́же мой,/ и исто́чник благочи́ния сотвори́ мой ум,/ и благослови́ язы́к мой, да воспою́ Твою́ а́гницу,/ ю́же венча́л еси́ Ты бла́гостию Твое́ю./ А́ще бо Сам не да́си мне сло́во досто́йное,/ ка́ко принесу́ дар ни́щий бога́тней в словесе́х и дея́ниих?/ Тем пода́ждь мне си́лу испове́дати ея́ натрижне́ния,/ кре́пко бо зве́ри победи́ла есть.

Седа́лен му́чеников, глас 1.

Подо́бен: Гроб Твой, Спа́се:

Огне́м Боже́ственнаго распала́еми жела́ния,/ огня́ чу́вственнаго прикоснове́нием отню́д не опали́стеся, блаже́ннии,/ пре́лесть же пожго́сте/ и, влеко́ми неми́лостивно, страстоте́рпцы,/ приснопа́мятный прия́сте коне́ц и сла́ву получи́сте.

Сла́ва преподо́бныя, глас 8.

Подо́бен: Повеле́нное:

Предъизбра́нная от Бо́га ма́ти,/ к приста́нищу жи́зни наставля́ема,/ без волне́ния жития́ бу́рю претекла́ еси́,/ со А́нгелы песносло́вящи Изба́вителя/ и моля́щися непреста́нно о нас,/ я́ко да благода́ть и ми́лость Христо́с да́рует нам,/ сохраня́ющи па́ству, ю́же боле́знию соста́вила еси́.

И ны́не, Богоро́дичен:

Непреме́ннаго Бо́га поро́ждшая,/ пременя́емое при́сно се́рдце мое́ грехо́м и ле́ностию, прило́гми льсти́ваго,/ утверди́, Блага́я, моли́твами ма́терними Твои́ми,/ я́ко да и аз благода́рно сла́влю Тя, Богороди́тельнице Мари́е,/ поми́луй ста́до Твое́, е́же стяжа́ла еси́, Всенепоро́чная.

Крестобогоро́дичен:

Сы́на Твоего́ и Бо́га Кресто́м, Де́во, сохраня́еми при́сно,/ де́монския прило́ги и ко́зни побежда́ем,/ су́щую Богоро́дицу, Тя и́стинно воспева́юще,/ и любо́вию вси ро́ди блажи́м, Пречи́стая, я́коже прорекла́ еси́./ Те́мже согреше́ний на́ших оставле́ние моли́твами Твои́ми да́руй.

Песнь 4

Ирмо́с:Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Облиста́ющее светозаре́ние боле́зней твои́х, Ониси́форе му́чениче,/ привлече́ любо́вию, блаже́нне, спострада́ти тебе́ блаже́ннаго Порфи́рия.

Возложи́вше на сковраду́ разжже́нную,/ протяза́ют мучи́тели ку́пно Христо́вы во́ины,/ ра́дующияся и горя́щия ду́хом.

Заколе́ние я́ко соверше́нно, страстоте́рпцы,/ и чи́стыя же́ртвы Влады́це всех, ра́дующеся, приведо́стеся,/ тем блажи́ми есте́.

Разу́мно тя, возложе́ннаго Влады́це,/ льсти́выя бесе́ды прельсти́ти отню́д не возмого́ша, Порфи́рие Богому́дре,/ всему́дре и всебога́те.

Богоро́дичен: Воплоща́ема родила́ еси́ Бо́га Сло́ва,/ уподо́битися, Отрокови́це, за милосе́рдие ми́лости всем благоволи́вша,/ Всенепоро́чная Влады́чице.

Ин

Ирмо́с:Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Ка́плями слез твои́х напои́вши се́рдце твое́,/ и возде́лала еси́ доброде́телей стори́чествующий, о Матро́но, клас/ Боже́ственною благода́тию.

Ко Христу́ возве́ргши помышле́ния степе́ни,/ пребы́сть напа́стьми непревра́тна лука́вых де́монов, достосла́вная.

До́блественною му́дростию сопру́га оста́вивши и жития́ мяте́ж,/ и́го Христо́во возлюби́ла еси́/ и Того́ в след после́довала еси́.

Богоро́дичен: Не оста́вив небе́сных, Пречи́стая, Бог/ истощава́ется во утро́бе Твое́й и ме́рится Безме́рный,/ безме́рная ми́ра разреши́в прегреше́ния.

Песнь 5

Ирмо́с:Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Столпи́ Христо́вы Це́ркве непоколеби́мии/ колеба́ньми мук непревра́тни кре́постию ду́ха яви́стеся.

Куми́ры бого́в скве́рных истни́сте/ и яви́стеся благоче́стия и му́жества о́бразы, честни́и великому́ченицы.

Во́инством и́стинным от Бо́га препоя́састеся,/ привре́менное могу́тство оста́вивше ве́рою,/ ра́дующеся, пострада́сте.

Богоро́дичен: Всели́ся в Тя, вмести́вся, Невме́стный/ и показа́ Тя, Небе́с ши́ршую, Де́во:/ тем Тя ублажа́ем.

Ин

Ирмо́с:У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе, ино́го не ве́мы.

Оде́явшися во о́браз святы́й, о Матро́но!/ Врага́ злотво́рнаго в студ оде́яла еси́.

Теку́щими измени́ла еси́ бу́дущая/ и сопру́жником Жениха́ безсме́ртнаго,/ Невестоводи́теля душ на́ших.

Всено́щную принося́щи хвалу́ Влады́це, Матро́но,/ успи́ла еси́ сла́сти теле́сныя.

Богоро́дичен: Ме́ртвых и живы́х Влады́ку родила́ еси́,/ стра́сти, Всенепоро́чная, се́рдца моего́ умертви́.

Песнь 6

Ирмо́с:Приидо́х во глубины́ морски́я,/ и потопи́ла мя е́сть бу́ря мно́гих грехо́в,/ но я́ко Бог из глубины́ возведи́ живо́т мой,/ Многоми́лостиве.

Боле́зни ран претерпе́л еси́, Ониси́форе му́чениче,/ тече́ние соверши́в свиде́тельства и победи́тель быв,/ прия́л еси́ по́чести небе́сныя.

Друг дру́гу содержа́щеся,/ ве́рою привяза́еми ку́пно и влеко́ми,/ разреше́ние телесе́, я́ко кре́пцыи страда́льцы, прия́сте,/ Го́споду совокупля́еми.

К ко́нем привя́зани и ну́ждно влеко́ми/ нра́вом судя́щаго люте́йшим, благосла́внии му́ченицы Госпо́дни,/ Боже́ственнаго конца́ сподо́бистеся.

Богоро́дичен: Зако́нов кроме́ есте́ственных, Де́во, Законода́вца ражда́еши,/ обновля́ющаго сокруше́ное естество́ на́ше,/ Его́же моли́ спасти́ мя, грехи́ сокруше́наго.

Ин

Ирмо́с:Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на,/ от тли́, Бо́же, возведи́ мя.

Я́ко пти́ца добропе́снива, в лу́зе по́стничества сла́дко возглаша́ющи,/ я́ко у́мныя привлекла́ еси вра́бии свяще́ннейших жен собор,/ мреж вра́жиих избе́гши, Матро́но, ду́хом.

Плоть у́бо любому́дрием держа́щи и обуздова́ющи стра́сти, преподо́бная,/ души́ же красне́йшую добро́ту све́тло Христу́ благоукраша́ющи,/ красна́ же и благоле́пна, Матро́но, ду́хом позна́лася еси́.

А́нгельское жи́тельство на земли́ возлюби́ла еси́,/ пою́щи непреста́нно нас ра́ди от Святы́я Де́вы за мно́жество бла́гости Воплоти́вшася/ и естество́ же́нское на врага́ лука́ваго Укрепи́вша.

Богоро́дичен: Порабо́тися грехо́м естество́ челове́ческое,/ но сие́ изба́вила еси́, Богоро́дице, лука́выя рабо́ты,/ вся́ческих Влады́ку ро́ждши, показа́вшаго нам жи́зии вхо́ды, Всенепоро́чная.

Конда́к, глас 2.

Подо́бен: Вы́шних ища́:

Му́ченик дво́ица, пострада́вше кре́пко,/ вра́жию горды́ню на зе́млю низложи́сте,/ озари́вшеся благода́тию несозда́нныя Тро́ицы,/ сла́внии Ониси́форе и Порфи́рие,/ моли́теся непреста́нно о всех нас.

И́кос:

Возмого́ша, Боже́ственною кре́постию утве́рждшеся, Христо́вы во́ини/ низложи́ти вра́жия сове́ты и ухищре́ния,/ к свире́пым ко́нем ку́пно привя́зани/ и стра́ждуще зако́нно,/ нам про́сят от Бога долго́в проще́ния,/ и разреше́ния гряду́щих искуше́ний,/ и лю́тых избавле́ния./ Тем ты́я хва́лим при́сно,/ я́ко при́сныя к Богу уго́дники,/ моля́щияся непреста́нно о всех нас.

Песнь 7

Ирмо́с:Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Благоро́днейшия твоея́ души́ благоро́дныя твоя́ нра́вы явля́я,/ испове́дал еси́ пред мучи́тели, Ониси́форе му́чениче, Бо́га воплоще́нна.

Ве́чную Боже́ственную свобо́ду любя́,/ твоему́ Вла́дыце, я́ко благопослушли́в раб, спострада́л еси́/ и с Ним лику́еши, Порфи́рие всеблаже́нне.

Боже́ственными кровьми́ ва́шими/ разжже́нный пла́мень безбо́жия угаси́вше, вопие́те, всехва́льнии:/ оте́ц на́ших Бо́же, благослове́н еси́.

Да блаже́нныя и безсме́ртныя сла́вы сподо́битеся,/ блаже́нную пострада́сте смерть,/ Богосве́тлыя зве́зды мы́сленнаго Со́лнца.

Богоро́дичен: Воплоще́нно Сло́во от Твои́х крове́й ражда́еши,/ земны́я обожи́ти благоволи́вшаго, Де́во, воспева́ющия:/ оте́ц на́ших Бо́же, благослове́н еси́.

Ин

Ирмо́с:О́троцы евре́и́стии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.

Я́ко го́рлица красне́йша, соблюла́ еси́ Бо́гу целому́дрия благоча́дие,/ страсте́й непло́дством, блаже́нная,/ я́ко и́стинно обогати́вши тобо́ю спаса́емыя.

Мир, честна́я, и я́же в ми́ре оста́вивши в Бо́жией наде́жди,/ преми́рное ны́не насле́довала еси́ насле́дие,/ еди́нствующих су́щая и́стинно, Матро́но, красота́.

Богоро́дичен: Разреша́я Е́вину кля́тву, в Пренепоро́чную всели́ся Деви́цу,/ благослове́ния исто́чник источа́я вопию́щим:/ благослове́н, Пречи́стая, Плод Твоего́ чре́ва.

Песнь 8

Ирмо́с:На Кресте́ пло́тию пригвожде́ннаго/ и показа́вшаго нам ору́жие во спасе́ние,/ о́троцы, превозноси́те Христа́, Бо́га на́шего, во ве́ки.

Удеса́ терза́нием преда́вше,/ растерза́сте врага́ несмы́сленное се́рдце,/ пребы́вше непоколе́блени умо́м, великоимени́тии венцено́сцы.

Кровьми́ ва́шими огнь угасе́ неве́дения, страда́льцы,/ ве́рных же напои́сте всех и сердца́, и ду́ши возраще́нием Богозна́ния.

Во́лны лю́тых муче́ний окормле́нием Христо́вым преидо́сте/ и к приста́нищу Боже́ственнаго Ца́рствия Небе́снаго приста́сте в нетле́ние.

У́глие, огне́м Паракли́та распаля́еми, я́ве, му́ченицы, я́вльшеся,/ пожго́ша лесть вра́жию и просвети́ша вселе́нную.

Богоро́дичен: Цвет избра́нный во удо́лиих, Отрокови́це, жития́ обре́т,/ возжеле́ Твоея́ добро́ты Сло́во Бо́жие/ и, воплоти́вся, облагово́нстви вселе́нную.

Ин

Ирмо́с:Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те вся дела́ Госпо́дня Го́спода.

Благоче́стия нра́вы ду́шу украси́вши, Матро́но,/ Ду́хом Боже́ственным Бо́гу привела́ еси́, чи́стая, лик дев, пою́щий:/ благослови́те вся дела́ Го́спода и превозноси́те Его́ во ве́ки.

Твои́х по́тов ту́чи Боже́ственною благода́тию/ страсте́й ту́чи, Матро́но, му́тныя изсуша́ют,/ сердца́ же ве́рно приходя́щих всегда́ напая́ют./ Тем тя почита́ем во вся ве́ки.

Тебе́ саму́ю ору́жии ве́ры вооружи́вши воздержа́ния,/ не уязви́лася еси́ стрело́ю сла́сти, пребыва́ющи посреде́ муже́й./ И дре́вле Е́ву уязви́вшаго уязви́ла еси́ копие́м целому́дрия, Матро́но блаже́нная.

Богоро́дичен: Се Де́ва, я́ко глаго́лет Ду́хом Иса́ия,/ име́ во чре́ве Изба́вльшаго ны от а́дова чре́ва, благоче́стно вопию́щия:/ благослови́те вся дела́ Го́спода и превозноси́те Его́ во ве́ки.

Песнь 9

Ирмо́с:Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.

Возмого́ша, си́лою Христо́вою вжиля́еми,/ безпло́тныя с те́лом побори́ти, до́блии адама́нти, столпи́ ве́ры,/ и ны́не на Небесе́х весели́тся от ве́ка с пострада́вшими.

Я́ко колесни́ца Словесе́ свяще́нная бы́вше,/ к безслове́сным привя́зани бы́сте, Боже́ственнии му́ченицы,/ и к приста́нищу Небе́сному достиго́сте, ра́дующеся, и побе́ды по́чести прия́сте./ Тем досто́йно блажи́ми есте́.

Телеса́ ва́ша Пангеа́нов сла́вный ны́не и́мать град, му́ченицы Боже́ственнии,/ обога́щся засту́пники ва́ми и врачи́, цели́щими теле́с и душ неду́ги/ приходи́щих ве́рою всегда́.

Боже́ственная дво́ица и светоза́рная,/ Порфи́рие, страстоте́рпче присносла́вный, и Ониси́форе доблему́дрый,/ Тро́ице Пресвяте́й моли́теся мир и лю́тых избавле́ние пода́ти душа́м на́шим.

Богоро́дичен: Оде́явся во всего́ мя во́лею, Влады́ка/ от Твои́х происхо́дит, Всенепоро́чная, Боже́ственных чресл, я́ко жени́х,/ и млеко́м пита́ется, И́же всю тварь пита́яй ма́нием, Благослове́нная Присноде́во.

Ин

Ирмо́с:Устраши́ся всяк слух/ неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти,/ от Деви́ческаго чре́ва быв челове́к/ Те́мже Пречи́стую Богоро́дицу, ве́рнии, велича́ем.

Я́ко Боже́ственная ты голуби́ца,/ доброде́телей позлаще́нными кри́лы, Матро́но сла́вная,/ выспрь возлете́ла еси́/ и ны́не воспочива́еши, иде́же преподо́бных ли́цы, и пра́ведных чи́ни,/ и ве́чное весе́лие, и ра́дость неизглаго́ланная.

Лю́бящи от Жены́ за утро́бы щедро́т Возсия́вшаго, незаходи́маго Со́лнца,/ разжже́нную и неудо́бь прохо́дную удо́бно про́йде, чи́стая, стезю́ по́стную,/ де́моны попаля́ющи и стра́сти плотски́я изсуша́ющи.

Боже́ственная па́мять твоя́ нам светле́йши со́лнца возсия́,/ просвеща́ющи на́ша сердца́ и помышле́ния,/ в ню́же помина́й нас, ве́рою творя́щих ю, Матро́но сла́вная,/ дерзнове́ние к Бо́гу и́стинно иму́щи.

Богоро́дичен: Нося́щи, Отрокови́це, рука́ми вся́ческая ма́нием Нося́щаго,/ руки́ мя изба́ви чужда́го хода́тайством Твои́м,/ и све́том Твои́м мое́ помышле́ние просвети́,/ и отчужди́ страсте́й, неосла́бно борю́щих мя.

Свети́лен.

Подо́бен: Жены́, услы́шите:

Му́ченики почти́м, страда́нии возсия́вших/ и озари́вших мир му́ченическими светлостьми́,/ Ониси́фора сла́внаго и с ним Порфи́рия,/ и́бо си́и мо́лятся о нас,/ любо́вию соверша́ющих па́мять их.

Сла́ва, преподо́бныя:

Посреде́ муже́й всели́лася еси́, Матро́но, присносла́вная,/ прие́мши о́браз, о, стра́нно чу́до! преподо́бная,/ ка́ко утаи́лася еси́ мучи́теля, тве́рдо при́сно огорча́ющася,/ поще́нием, и моли́твами, и бде́нии непреста́нными сего́ главу́ сокруши́ла еси́.

И ны́не, Богоро́дичен:

Ра́дуйся, Бо́жия пала́то;/ ра́дуйся, горо́ осене́нная;/ ра́дуйся, неопали́мая купино́;/ ра́дуйся, престо́ле сла́вы;/ ра́дуйся, Боже́ственная трапе́зо;/ ра́дуйся, ста́мно всезлата́я;/ ра́дуйся, све́щниче всесве́тлый;/ ра́дуйся, ле́гкий о́блаче, Девома́ти Мари́е.

На хвали́тех стихи́ры преподо́бныя Матро́ны, глас 2.

Подо́бен: Егда́ от Дре́ва:

Прииди́те, бра́тия,/ при́точно из духоно́снаго исто́чника вкуси́м,/ се бо поставля́ет нам Матро́на я́ве,/ с высо́ким пропове́данием зову́щи, вопие́т./ Возра́дуимся и возвесели́мся све́тло сию́ согла́сно сла́вяще,/ честна́ смерть вои́стину благоуго́ждшим Ти, Человеколю́бче.

Егда́ Безпло́тных ти ли́цы зря́ху,/ свы́ше преподо́бныя му́жествующе,/ устраша́хуся и кова́рствию твоему́ непрело́жному,/ и подвиго́м дивля́хуся,/ и житию́ стра́нному,/ кро́тости и безмо́лвию./ Тем та́йно ти вопия́ху:/ гряди́, неве́сто, и вни́ди,/ иде́же ра́дость Жениха́ Христа́.

Сла́ва, глас и подо́бен то́йже:

Егда́ Жени́х твой Христо́с/ венчава́ше тя венце́м нетле́нным,/ главу́ твою́ честну́ю,/ ра́довахуся чи́ни Ангельстии, проро́к соста́в,/ преподо́бных мно́жество, младе́нцы веселя́хуся./ Еди́н диа́вол пла́кашеся:/ ны́не низве́ржен ви́жуся,/ жене́ побежда́ющи си́лы моя́.

Тропа́рь, глас 4

Подо́бен: Ско́ро предвари́:

Преподо́бнически пожи́в, я́ко му́дрый иера́рх,/ просла́вил еси́ Го́спода/ доброде́тельным житие́м, Некта́рие преподо́бне./ Те́мже, Уте́шителя просла́влен си́лою,/ Боже́ственными мощми́ твои́ми,/ де́моны отго́ниши и боля́щия исцеля́еши,/ ве́рою приходя́щия ти.