НА ВЕЧЕ́РНИ:

На Го́споди, воззва́х: стихи́ры, глас 1.

Подо́бен: Небе́сных чино́в:

Боже́ственнаго супру́га/ страда́ния и труды́, совоку́пльшеся ве́рою,/ к подо́бней ре́вности впери́м ра́зумы,/ Христа́ приле́жно моля́ще и глаго́люще:/ И́же святы́х прославле́й, я́ко Благ,/ и нас утверди́ стра́хом Твои́м.

Я́ко тезоимени́тна зва́ния/ прие́мше, му́дрии,/ и Боже́ственная дея́ния испра́вльше,/ вельми́ подо́бно, страстоте́рпцы,/ в стезя́х пра́вых Бо́гу рабо́таете/ и муче́ния ча́шу вои́стинну испи́сте спаси́тельную.

Безбо́жие я́коже и́но пресе́кше мо́ре,/ в зе́млю безстра́стия,/ в Небе́сное Ца́рство внидо́сте досто́йно,/ иде́же пи́щи пото́к истека́ет/ и Свет непрело́жный, му́ченицы Христо́вы,/ сия́ет присносу́щный.

Сла́ва, и ны́не, Богоро́дичен:

Всегуби́тельных страсте́й мои́х/ огнепа́льная стремле́ния/ ороше́нием Боже́ственнаго во́льнаго дождя́ Твоего́/ погаси́, Де́во:/ да и аз, я́ко о́троцы,/ Бо́гу, су́щему от Тебе́, благодарю́,/ сла́вя и благословя́ бла́гость Твою́, Влады́чице.

Крестобогоро́дичен:

Воздви́жена я́ко ви́де на Кресте́ А́гнца,/ Непоро́чная Де́ва, пла́чущи, вопия́ше:/ сла́дкое Мое́ Ча́до,/ что но́вое и пресла́вное виде́ние?/ Ка́ко содержа́й вся́ческая го́рстию,/ на Дре́ве пригвожда́ешися пло́тию?

Кано́н, его́же краегране́сие: Твои́х воспева́ю му́ченик, Христе́, красоту́. Ио́сиф. Глас 4.

Пе́снь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зными Моисе́овыма рука́ма/ Амали́кову си́лу в пусты́ни победи́л е́сть.

Боже́ственным муче́ния венце́м увя́зшеся,/ просвеще́ни добро́тою мы́сленною,/ Влады́це предстоите́, о нас моля́щеся, прекра́снии великому́ченицы.

Красно́ к Бо́гу творя́ще, му́дрии, присвое́ние,/ безле́потныя зло́бы себе́ благоче́стно удали́сте/ и с ли́ки, ра́дующеся, страстоте́рпец причто́стеся.

Вод Животворя́щаго Ду́ха су́ще испо́лнена,/ неразу́мия дре́вле зно́ем та́ющия напои́сте благодея́нием, святи́и,/ Боже́ственным повину́ющеся веле́нием.

Богоро́дичен: Спа́са и Вседе́теля Го́спода во чре́ве носи́ла еси́,/ Его́же Агафопо́д вку́пе со сла́вным Феоду́лом пропове́да, су́ща Бо́га и Челове́ка,/ Де́во Ма́ти Всенепоро́чная.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Глаго́лы твои́х плени́ц, препе́нся,/ враг паде́ и я́вственно обличи́ся,/ му́чениче страстоте́рпче Феоду́ле.

Любо́вию су́щею к Бо́гу укрепи́в ду́шу,/ показа́л еси́ всю вра́жию си́лу, му́чениче Агафопо́де, некре́пку.

Исцеле́ния ве́рным от приснотеку́щих пото́ков точа́ще,/ исто́чник страсте́й, сла́внии,/ Боже́ственною си́лою изсуша́ете.

Богоро́дичен: Избавля́ющаго челове́ки от плене́ния вра́жия, Чи́стая,/ Изба́вителя родила́ еси́,/ пло́тию на́шею обложе́на.

Седа́лен, глас 8.

Подо́бен: Прему́дрости:

Бра́тия по благода́ти Ду́ха,/ единонра́внии ве́рою благочести́вою,/ су́ще святи́и, вои́стинну великоимени́тии,/ в моли́твах и поще́ниих житие́ проходя́ще,/ лю́ди привлеко́сте к Боже́ственному позна́нию./ Те́мже, до́блии во́ини, пре́лесть му́жески пленя́ете/ и, зако́нно пострада́вше, венцы́ получи́сте./ Моли́те Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять ва́шу.

Сла́ва, и ны́не, Богоро́дичен:

Прему́дрость и Сло́во в Твое́м чре́ве заче́нши неопа́льно, Ма́ти Бо́жия,/ ми́рови родила́ еси́ мир Содержа́щаго/ и во объя́тиих понесла́ еси́ вся Нося́щаго,/ Пита́теля всех и Творца́ тва́ри./ Те́мже молю́ Тя, Всесвята́я Де́во, и ве́рно сла́влю Тя/ изба́витися мне от прегреше́ний,/ и в Де́нь Суда́, егда́ предста́ти и́мам пред лице́м Созда́теля моего́,/ Влады́чице Де́во Чи́стая, Твою́ по́мощь тогда́ пода́ждь ми:/ вся бо мо́жеши, ели́ка хо́щеши, Всепе́тая.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мляй Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Пе́снь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Я́ко свети́льницы возсия́вше пресве́тлии муче́ния светлостьми́,/ вселе́нныя исполне́ние просвеща́ют сла́внии му́ченицы,/ пре́лести омрача́юще зломы́слие.

Блаже́нную супру́гу, благоу́мную и прии́мшую вене́ц муче́ния,/ А́нгели почуди́шася, и челове́цы похвали́ша терпе́ния до́блесть.

Ра́дуяся, Феоду́л вопия́ше:/ в пу́ть теку́, Го́споди, Твои́х свиде́тельств/ и наслажда́юся бога́тно Твоего́ сия́ния,/ ку́пно с тве́рдым Агафопо́дом.

Богоро́дичен: Вити́йствующе воплоще́ние Влады́ки, из Твоея́ возсия́вша утро́бы, Богоро́дице,/ му́ченицы сла́внии спаси́тельное испи́ша пи́во муче́ния, ра́дующеся.

Пе́снь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Но́ги твоя́ я́ве на правоте́ поста́вил еси́, прехва́льне Агафопо́де, честна́го муче́ния,/ враги́ препина́ющия.

Во́ду жи́зни, страстоно́сцы, теку́щую в се́рдцы стяжа́вше,/ сла́вный коне́ц водо́ю прия́сте.

Тече́ние и́дольскаго преще́ния изсуши́сте,/ вве́ржени, страда́льцы, во глубину́ морску́ю/ и во́лею умерщвле́ни.

Богоро́дичен: Ма́ти Бо́жия, души́ мое́й озлобле́ния уврачи́,/ ро́ждшая Всеблага́го Сло́ва, вся ублажа́ющаго.

Пе́снь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Вод живото́чных су́ще испо́лнени,/ достохва́льную кончи́ну потопле́нием вод прия́сте,/ зло́бы в них предста́теля потопи́вше.

Благода́тию и си́лою Бо́жиею соблюда́еми,/ не преврати́стеся пожре́ти ме́рзким куми́ром,/ но же́ртву Влады́це себе́ чи́сту принесо́сте.

Ору́жия вра́жия в вас изнемого́ша,/ изощре́ныя бо стре́лы ва́шего му́жества/ вонзо́сте, страда́льцы, в се́рдце его́ до́блественно.

Богоро́дичен: Исцели́ души́ моея́ стра́сти, Всенепоро́чная,/ безстра́стия ро́ждши Исто́чник,/ и уста́ви томи́тельство непреста́нно смуща́ющих, Чи́стая, се́рдце мое́.

Пе́снь 7

Ирмо́с: В пещи́ Авраа́мстии о́троцы перси́дстем,/ любо́вию благоче́стия па́че,/ не́жели пла́менем, опаля́еми, взыва́ху,:/ благослове́н еси́ в хра́ме сла́вы Твоея́, Го́споди.

Ра́зумом Боже́ственным в леви́тскую оде́жду оде́ялся еси́,/ сию́ муче́ния све́тлостию свяще́нно светле́йшу соде́лав,/ и ны́не предстои́ши, Агафопо́де, Сло́ву ра́дуяся.

Первому́ченика слу́жбою украша́емь,/ Сло́ву пожре́нному, блаже́нне, служи́ти, Агафопо́де, сподо́бился еси́,/ благослове́н еси́,– вопия́,– в хра́ме сла́вы Твоея́, Го́споди.

Единоу́мием еди́но мы́сляще, досточу́днии,/ еди́н сме́рти иску́с за Христа́ претерпе́сте, зову́ще:/ благослове́н еси́ в хра́ме сла́вы Твоея́, Го́споди.

Богоро́дичен: Преукра́шену доброде́телей, Чи́стая, све́тлостию,/ Сло́во, доброде́телию покры́вый Небеса́, обре́т Тя,/ всели́ся в Тя, Пренепоро́чная, и челове́ческое естество́ онебеси́.

Пе́снь 8

Ирмо́с: Ру́це распросте́р, Дании́л/ льво́в зия́ния в ро́ве затче́,/ о́гненную же си́лу угаси́ша, доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Словесы́ твои́ми ле́сть помрача́я, му́дре Феоду́ле,/ му́дростию благода́тною озаря́емь, просия́л еси́,/ пред судя́щем благоче́стие возглаша́я и злочести́вых загражда́я уста́, зовы́й:/ благослови́те, вся дела́ Госпо́дня, Го́спода.

Скры́ти морска́я глубина́ ва́ша телеса́ ника́коже возмо́же, святи́и,/ на су́шу бо сия́ издае́т Боже́ственным манове́нием неистле́нна,/ источа́юща нам ди́вная чудеса́, вопию́щим:/ вся дела́ благослови́те Госпо́дня Го́спода.

Ве́сь порабо́тився тебе́ ра́ди в ра́бии о́бразе я́вльшемуся, сла́вне,/ и по сме́рти промышле́ние сирота́м явля́ешися творя́ и вдова́м,/ Влады́чнее законоположе́ние исполня́я, я́ко благоразу́мен раб Госпо́день,/ преблаже́нне Феоду́ле.

Пелены́ ва́ша, и ра́ны, и боре́ния Фессалоники́я чтит,/ того́ бо воспита́ние яви́стеся,/ и в том блаже́нную кончи́ну, я́ко страда́льцы, вои́стинну прия́сте,/ и Це́рковь перворо́дных че́стно ны́не уясня́ете.

Богоро́дичен: Не премени́в естества́, Христо́с/ из Тебе́ во всего́ челове́ка облече́ся, Богора́дованная Влады́чице,/ Его́же стра́сть Феоду́л и Агафоно́д кре́пце изобрази́вше, вопию́т:/ вся дела́, благослови́те Госпо́дня Го́спода.

Пе́снь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Се ны́не что добро́,– вопия́ху,– или́ что красно́, страстоте́рпцы,/ но е́же жи́ти во гра́де Жива́го Бо́га,/ соблю́дше благоче́стия соу́з, да́же до сме́рти нереши́м?

Я́ко свиде́тельства тече́ние сконча́вше, страда́льцы,/ ликостоя́ние Вы́шних чино́в вас восприя́т,/ неувяда́ющими, сла́внии, венча́еми венцы́.

Дне́сь све́тло пра́зднует сла́вная Фессалоники́я,/ всяк град и страну́ созыва́ющи в па́мять ва́шу/ с высо́ким пропове́данием, о Агафопо́де и Феоду́ле!

Взя́стеся к неизрече́нней сла́ве светоявле́нно, я́коже страстоте́рпцы,/ ея́же сподо́битися ве́рою ва́шу соверша́ющим па́мять всегда́,/ я́ко дерзнове́ние иму́ще, моли́теся, пречестни́и.

Богоро́дичен: Све́том мя Твоего́ благоутро́бия, во тьме́ неразу́мия лежа́щаго, озари́,/ еди́на, Светода́вца Ро́ждшая,/ Изба́вителя и Го́спода, святы́я венча́ющаго.