НА ВЕЧЕ́РНИ:

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

С похвала́ми па́мять твоя́/ сотворя́ется све́тло,/ святи́телю Васи́лие,/ и ра́дости наполня́ет правосла́вныя собо́ры,/ я́ко пра́вду возлю́бльшаго,/ и целому́дрия чистоту́, и кро́тость,/ и ти́хость всегда́ изря́дно/ поче́тша и соверше́нно.

Па́влу Боже́ственному подо́бяся,/ во изгна́ниих терпели́вно,/ святи́телю Васи́лие,/ жизнь сконча́л еси́ в ну́ждах и ско́рбех,/ неоску́дно утесня́емь/ и прехожде́ния при́сно творя́,/ ны́не же безпеча́льное и неизме́нное/ от Бо́га обре́л еси́ селе́ние и наслажде́ние.

Я́ко святи́тель Богоприя́тен,/ мы́сленнаго селе́ния назира́еши незаходи́мая/ и преми́рная зре́ти сподо́бился еси́,/ оде́ян в преподо́бие,/ пра́вдою обложе́н,/ и благоле́пия красоту́ разу́мных/ лице́м к лицу́ зри́ши, пребога́те.

Сла́ва, и ны́не, Богоро́дичен:

Спаси́ мя, Влады́чице Пречи́стая,/ я́же Спа́са Христа́ неизрече́нно ро́ждшая,/ Тя бо еди́ну стяжа́х Предста́тельницу,/ и необори́мую сте́ну,/ и покро́в, и ра́дование,/ и души́ моея́ Боже́ственное утеше́ние./ Ты у́бо мя изба́ви неусыпа́ющаго че́рвия/ и огня́ ве́чнующаго,/ Ма́ти Христа́ Бо́га.

Крестобогоро́дичен:

Что зри́мое виде́ние,/ е́же Мои́ма очи́ма ви́дится, о Влады́ко:/ содержа́й всю тварь на Дре́во воздви́жен быв/ и умира́еши, всем дая́й жизнь?/ Богоро́дица, пла́чущися, глаго́лаше,/ егда́ узре́ на Кресте́ возноси́ма/ из Нея́ неизрече́нно возсия́вшаго/ Бо́га и Челове́ка.

Кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Несказа́нный Свет тебе́ и трисия́нен/ в неподви́жимем Ца́рствии Небе́снем возсия́, о́тче,/ и пра́ведных весе́лие досто́йно тя прия́т.

Отверзо́шася врата́ тебе́ еде́мская,/ и к святи́телем приложи́лся еси́ святи́тель,/ и перворо́дных Це́ркви сочета́лся, достосла́вне.

Зако́нно пострада́в и чи́сто свяще́нство до конца́ соблю́д,/ с Небе́сными ликова́ти свяще́нники сподо́бился еси́.

Богоро́дичен: Пло́ти по ипоста́си соедини́вся И́же от Тебе́ прия́тием,/ всех Зижди́тель про́йде несказа́нно, Богома́ти,/ и челове́ком приближи́тися благоизво́ли.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Досточу́дная и пресла́вная па́мять твоя́/ ра́достно правосла́вных увеселя́ет собо́ры.

О́блак телесе́ совле́к, преподо́бне,/ и, сою́зов разреши́вся, к Бо́гу прибли́жился еси́.

Кончи́ну блаже́нную и наслажде́ние, преподо́бне, избра́нных,/ я́ко избра́нен, досто́йно прия́л еси́.

Богоро́дичен: Имея́ Тя Помо́щницу, не постыжду́ся, Пречи́стая Ма́ти Бо́жия,/ име́я Тя Предста́тельницу, враг мои́х изба́влюся.

Седа́лен, глас 3.

Подо́бен: Боже́ственныя ве́ры:

Вели́кое со́лнце вселе́нней возсия́л еси́ доброде́тельми твои́ми:/ сия́ньми и чуде́с светлостьми́ просвети́л еси́ ве́рных составле́ния/ и потреби́л еси́ страсте́й омраче́ние,/ о́тче Васи́лие, Христа́ Бо́га моли́ дарова́ти нам ве́лию ми́лость.

Сла́ва, и ны́не, Богоро́дичен:

Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

Крестобогоро́дичен:

Нескве́рная А́гница Сло́ва, нетле́нная Де́во Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́!/ Ка́ко стра́ждеши во́лею, хотя́ изба́вити от страсте́й безче́стия челове́ка?

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Моли́твы творя́ к Бо́гу, вознесе́нную мысль низложи́л еси́ злому́дренныя е́реси/ и Це́рковь, о́тче, возвесели́л еси́.

В ски́ниях Небе́сных тя Подвигополо́жник, о́тче, всели́,/ неосла́бное твое́ противле́ние к противобо́рцем прие́м.

Преда́ний ра́ди храни́мых Це́ркве Бо́жия отгна́ния претерпе́л еси́/ и, побе́ды прие́мля, сконча́лся еси́.

Богоро́дичен: Бо́га, Его́же родила́ еси́, Чи́стая Де́во, Сего́ моли́/ рабо́м Твои́м дарова́ти согреше́ний проще́ние.

Песнь 5

Ирмо́с: У́тренююще, вопие́м Ти,/ Го́споди, спаси́ ны:/ Ты бо еси́ Бог наш,/ ра́зве Тебе́, ино́го не ве́мы.

Боже́ственная все́льшися благода́ть в тя, Богоно́се,/ па́стыря ве́рнейша Це́ркве тя показа́.

Умертви́в пло́ти твоея́ мудрова́ние и стра́сти,/ жи́зни ду́ху после́довал еси́, сла́вне.

Целому́дренно и пра́ведно житие́ твое́ соверши́в, Богому́дре,/ прия́л еси́ доброде́телей воздая́ние.

Богоро́дичен: Су́щи Пресвяты́й храм,/ безстра́стия исто́чника родила́ еси́, Де́во Ма́ти Всенепоро́чная.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глуби́ны зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́.

Просвеща́емь красото́ю Небе́сных сия́ний,/ престо́л, и́же на земли́, остави́л еси́, преподо́бне,/ и насле́дие нетле́нно в земли́ кро́тких, я́ко кротча́йший, восприя́л еси́.

Пре́лести смея́ся ху́льных ерети́к,/ Боже́ственному и благоче́стному правосла́вных ра́зуму преусе́рдно научи́л еси́,/ ико́ну чествова́ти Спа́сову, досточу́дне.

Жела́ние твое́ к Бо́гу испо́лнися, пресла́вне:/ преста́вися бо к Нему́, бо́жественно ра́дуяся,/ и ны́не све́тлости святы́х, о́тче, зри́ши и красоты́.

Богоро́дичен: Ме́ртвости и тли изба́вися челове́чество/ естество́м бо Жизнода́вца безсе́менно родила́ еси́, Де́во Всенепоро́чная,/ на благодея́ние восхваля́ющих Тя ве́рно.

Конда́к, глас 2.

Подо́бен: Вы́шних ища́:

Вы́шняго све́том озари́вся, блаже́нне,/ просвеща́еши вся,/ и́же любо́вию честву́ющия твое́, о́тче, честно́е страда́ние./ Васи́лие священнострада́льне,/ моля́ Христа́ Бо́га/ непреста́нно о всех нас.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

О, несказа́ннаго весе́лия, его́же сподо́бился еси́, всеблаже́нне, прия́ти,/ в невеще́ственнем Све́те живы́й, и поя́:/ благослове́н еси́, Го́споди Бо́же, во ве́ки.

Венце́м Боже́ственнаго благоле́пия, всеблаже́нне, красно́ удобря́емь,/ лику́еши, вопи́я с Вы́шними вои́нствы:/ благослове́н еси́, Го́споди Бо́же, во ве́ки.

Таи́нник сый Тро́ицы, та́йнам служи́тель Небе́сным,/ Влады́ку нам ми́лостива сотвори́, вопию́щим:/ благослове́н Бог оте́ц на́ших.

Богоро́дичен: Е́вы дре́внюю кля́тву преложи́ла еси́, Чи́стая,/ на благослове́ние, Сы́на Бо́жия ро́ждши./ Ему́же вси, благослове́н еси́, – зове́м, – во ве́ки вся.

Песнь 8

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зе́ло прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Ско́рбных жития́ и лю́таго слия́ния изба́влен,/ ра́дость, всеблаже́нне, и весе́лие е́же па́че сло́ва прия́л еси́, поя́:/ благослови́те, вся дела́, Го́спода и превозноси́те Его́ во ве́ки.

Духо́вными уче́нии те́пле противля́яся,/ языковре́дия ху́льников, о́тче, удо́бне разреши́л еси́, священнотаи́нниче,/ благослови́те, – поя́, – вся дела́, Го́спода и превозноси́те Его́ во ве́ки.

Я́ко красно́ ме́сто, в не́же всели́лся еси́, священноявле́нне,/ я́ко красно́, о́тче, селе́ние, иде́же пребыва́еши, поя́:/ благослови́те, вся дела́, Го́спода и превозноси́те Его́ во ве́ки.

Богоро́дичен: Предста́тельницу, вси ве́рнии, стяжа́хом Тя, Пречи́стая,/ и, Твои́ми моли́твами лю́тых изба́вльшеся, Христу́ вопие́м:/ благослови́те, вся дела́, Го́спода и превозноси́те Его́ во ве́ки.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Свя́то твое́ житие́, о́тче, препроводи́л еси́/ и, Бо́гу угоди́в де́лы твои́ми,/ Небе́сное Ца́рство прия́л еси́, му́дре.

Тече́ние сконча́в,/ ве́ру же соблю́д и по́двиг соверши́в, Васи́лие,/ пра́вды прия́л еси́, ра́дуяся, вене́ц.

Зва́ние, преблаже́нне, получи́л еси́ Боже́ственное/ и соверше́нное жела́ний исполне́ние,/ ныне у́бо моли́ не преста́й о ста́де твое́м.

Богоро́дичен: То́ка слез мои́х не отврати́ся,/ Я́же от вся́каго лица́ вся́ку сле́зу отъе́мшаго,/ Де́во, Христа́ ро́ждшая.

Тропа́рь, глас 4:

Днесь све́тло красу́ется град Му́ром,/ я́ко зарю́ со́лнечную, восприе́мши, Влады́чице,/ чудотво́рную Твою́ ико́ну,/ к не́йже ны́не мы притека́юще и моля́щеся, Тебе́ взыва́ем си́це:/ о Пречу́дная Влады́чице Богоро́дице,/ моли́ся из Тебе́ воплоще́нному Христу́ Бо́гу на́шему,/ да изба́вит град сей и вся гра́ды и страны́ христиа́нския/ невреди́мы от всех наве́т вра́жиих/ и спасе́т ду́ши на́ша, я́ко Милосе́рд.

Моли́тва

О Пресвята́я Де́во, Ма́ти Го́спода Вы́шних сил, Небесе́ и земли́ Цари́це, гра́да и страны́ на́шея Всемо́щная Засту́пнице! Услы́ши нас, моля́щихся Тебе́, и испроси́ у Бо́га, Сы́на Твоего́, па́стырем на́шим ре́вность и бде́ние о душа́х, градоправи́телем – му́дрость и си́лу, судия́м – пра́вду и нелицеприя́тие, наста́вником – ра́зум и смиренному́дрие, супру́гом – любо́вь и согла́сие, ча́дом – послуша́ние, оби́димым – терпе́ние, оби́дящим – страх Бо́жий, скорбя́щим – благоду́шие, ра́дующимся – воздержа́ние. Нам же всем ниспосли́ дух ра́зума и благоче́стия, дух милосе́рдия и кро́тости, дух чистоты́ и пра́вды. Ей, Госпоже́ Пречи́стая! умилосе́рдися на немощны́я лю́ди Твоя́: разсе́янныя собери́, заблу́ждшия на путь пра́вый наста́ви, неду́гующия уврачу́й, ста́рость поддержи́, ю́ныя уцелому́дри, младе́нцы воспита́й и при́зри на всех нас призре́нием ми́лостиваго Твоего́ заступле́ния. Ми́лостива нам бу́ди зде и на Стра́шном Суде́ Сы́на Твоего́. Ты бо еси́, Госпоже́, сла́ва Небе́сных и упова́ние земны́х, Ты по Бо́зе на́ша наде́жда и Засту́пница всех, притека́ющих к Тебе́ с ве́рою. Тебе́ убо мо́лимся и Тебе́, яко Всемогу́щей Помо́щнице, са́ми себе́ и друг дру́га и всю жизнь на́шу предае́м, ны́не, и при́сно, и во ве́ки веко́в. Ами́нь.