НА ВЕЧЕ́РНИ:

На Го́споди, воззва́х: стихи́ры, глас 4.

Подо́бен: Дал еси́ зна́мение:

Му́ченик свяще́нен,/ и святи́тель благоприя́тен,/ и па́стырь и́стинен, столп непревра́тен,/ благоче́стия степе́нь,/ забра́ло Це́ркве, святи́телей добро́та,/ исто́чник чуде́с, Анти́по, был еси́./ Те́мнее тя ублажа́ем благоче́стно пе́сньми/ и Боже́ственное твое́ днесь соверша́ем торжество́.

Пра́вилом слове́с твои́х/ церко́вный, сла́вне, я́ко ко́рмчий изря́ден,/ кора́бль упра́вил еси́,/ вы́ше волн пла́вая преле́стных/ и всескве́рными козньми́ чужда́го не погруже́н;/ пострада́в же кре́пко и врага́ победи́в,/ ко Христу́ преше́л еси́,/ Его́же стра́сти поревнова́л еси́.

Ми́ро твоя́ мо́щи источа́ют всегда́,/ святи́телю Богодухнове́нне:/ Христо́во же благоуха́ние вои́стинну был еси́,/ пре́лести злосмра́дие низложи́в/ терпели́вно, я́ко страда́лец, му́чениче, сопротивле́нием./ Те́мже тя мо́лим:/ помяни́ вся, ве́рою тя помина́ющия,/ ко Го́споду дерзнове́ние стяжа́в.

Сла́ва, и ны́не, Богоро́дичен:

Одожди́ ми, Влады́чице,/ Твоея́ ми́лости бе́здну,/ и опа́льшееся зно́ем страсте́й се́рдце мое́,/ я́ко Ми́лостива, напо́й, Отрокови́це,/ и умиле́ния ка́пли точи́ти/ непреста́нно сотвори́, молю́ся,/ и́миже утеше́ния сподо́блюся, Чи́стая,/ е́же получи́ти и́мут/ и́же и́скренно пла́кавшиися.

Крестобогоро́дичен:

Распина́ема Христа́ Человеколю́бца ви́дящи Пречи́стая/ и ре́бра ископова́ема копие́м,/ пла́чущи, вопия́ше:/ что́ сие́, Сы́не Мой?/ Что́ Ти безблагода́тнии лю́дие возда́ша,/ за я́же сотвори́л еси́ до́брая им?/ и тщи́шися безча́дствовати Мя, Вселюбе́знейший./ Удивля́юся, Благоутро́бне, Твоему́ во́льному распя́тию.

Тропа́рь, глас 4: И нра́вом прича́стник:

Или́ сей, глас то́йже:

И́дольския ле́сти упраздни́л еси́, Анти́по,/ и, диа́вольскую попра́в си́лу,/ пред богобо́рцы дерзнове́нно Христа́ испове́дал еси́./ Те́мже со А́нгельскими чи́ны в Вы́шних водворя́яся,/ Влады́це всех славосло́вие принося́,/ и о нас моле́бное благодаре́ние предлага́еши,/ благода́ть цельбы́ да́руя./ Сего́ ра́ди тя чтим,/ священному́чениче Анти́по,/ моли́ Христа́ Бо́га,/ да спасе́т ду́ши на́ша.

Кано́н, его́же краегране́сие: Све́тлаго в му́ченицех Анти́пу честву́ю. Творе́ние Ио́сифово. Глас 4.

Песнь 1

Ирмо́с: Мо́ря че́рмную пучи́ну/ невла́жными стопа́ми/ дре́вний пешеше́ствовнв Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Заре́ю трисо́лнечныя благода́ти осия́емь,/ све́тлый твой сей пра́здник соверша́ющия озари́,/ страстна́го избавля́я, му́чениче Анти́по, омраче́ния.

Сло́во Бо́жие тя, всему́дре,/ свиде́теля и́стинна свои́х показа́ страсте́й,/ злоче́стие потребля́ющаго и де́монов вся́кое лука́вство побежда́ющаго.

Умертви́в плотска́я мудрова́ния мно́гими поще́нии,/ свяще́нства Боже́ственнаго свяще́нною украси́лся еси́ оде́ждею/ и безкро́вно поже́рл еси́ тебе́ ра́ди ме́ртва Бы́вшаго.

Богоро́дичен: Све́та Твоего́ блиста́ньми озари́, Отрокови́це Всенепоро́чная,/ в нощи́ страсте́й и искуше́ний одержи́мое се́рдце мое́,/ Пра́вды Со́лнце всем неизрече́нно возсия́вшая.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Источи́л еси́ ре́ки уче́ния, ве́рных напоя́ющия,/ и му́тныя во́ды многобо́жия изсуши́л еси́.

Кре́постию, блаже́нне, Христо́вою, гоня́щих кре́пость ссекл еси́,/ и терпели́вно пострада́л еси́,/ и му́ченически венча́лся еси́.

Де́моном служа́щия чествова́ти Бо́га и́стиннаго уве́рил еси́,/ плоть ме́ртвенную, преподо́бне,/ бога́тством благоутро́бия поне́сшаго.

Богоро́дичен: Избавля́ющаго челове́ки плене́ния вра́жия, Чи́стая,/ Изба́вителя родила́ еси́,/ те́мже благоче́стно Тя сла́вим.

Седа́лен, глас 3.

Подо́бен: Боже́ственныя ве́ры:

Боже́ственными у́гльми Боже́ственныя любве́ разжже́н, му́чениче Анти́по,/ безбо́жия пла́мень угаси́л еси́/ и, в разжже́н вложе́н быв коно́б, к Невече́рнему Све́ту отше́л еси́./ О́тче преподо́бне, Христа́ Бо́га моли́/ грехо́в оставле́ние дарова́ти нам.

Сла́ва, и ньше, Богоро́дичен:

Боже́ственнаго естества́ не отлу́чься, плоть быв во чре́ве Твое́м,/ но Бог вочелове́чься и пребы́сть,/ И́же по рождестве́ Ма́терь Тя Де́ву, я́ко пре́жде рождества́,/ сохрани́в Всенепоро́чную, еди́н Госпо́дь:/ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница Сло́ва, нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ у́вы Мне, Ча́до Мое́!/ Ка́ко стра́ждеши во́лею, хотя́ изба́вити от страсте́й безче́стия челове́ка?

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лце Пра́ведное,/ ста в чи́не свое́му/ досто́йно взыва́ющи:/ сла́ва си́ле Твое́й, Го́споди.

Не поколеба́ столпа́ твоего́ се́рдца/ пребеззако́ннующих противле́ние, му́чениче страстоте́рпче;/ те́мже, распаля́емь ре́вностию ве́ры,/ яви́лся еси́ огня́ си́льнейши.

Дрема́нием нече́стия одержи́мыя возбужда́я, прехва́льне, уче́нии Свята́го Ду́ха,/ к ра́зуму воздви́гл еси́ и́стиннаго позна́ния.

Смири́л еси́ вы́сость де́монскую,/ к Бо́гу возвыше́ньми, Анти́по, прилежа́,/ и восхожде́ньми Боже́ственными обожа́емь, и Богови́ден познава́емь.

Богоро́дичен: По рождестве́, я́ко пре́жде рождества́,/ сохрани́лася еси́, Де́во Ма́ти нетле́нная,/ Зижди́теля бо всех родила́ еси́,/ из Тебе́ челове́ческое те́ло во́лею поне́сшаго.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Возше́л еси́ на го́ру доброде́телей, блаже́нне,/ и в ра́зум вшел еси́ кра́йнейшаго мра́ка,/ и Бо́гу бесе́довал еси́.

Глаго́л твои́х плени́цами/ из глубины́ безбо́жия улови́л еси́, святи́телю, заблу́ждшия челове́ки/ и благода́тию спасл еси́.

Те́ло огню́ на снедь преда́л еси́,/ свы́ше, святи́телю, от Бо́га Боже́ственную ро́су бога́тно прие́мля.

Богоро́дичен: Сый в зра́це Бо́жии Пребоже́ственный всели́ся во чре́во Твое́,/ зрак мой понесы́й Госпо́дь, Всенепоро́чная.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Распе́н воздержа́нием удеса́, блаже́нне, в поще́нии подвиза́вся,/ му́ченическими венча́лся еси́ по́двиги,/ я́же подъя́л еси́ ума́, Анти́по, тве́рдостию.

Стоя́л еси́ пред суди́щем,/ пропове́дуя воплоще́ние тебе́ ра́ди Истощи́вшагося,/ и Пила́тову суди́щу Предста́вшаго, страстоте́рпче,/ и Кресто́м врага́ умори́вшаго.

Боля́щим врачевство́ есть це́рковь,/ в не́йже, блаже́нне му́чениче, терпели́вое твое́ лежи́т те́ло,/ Боже́ственную зарю́ дарова́ний испуща́ет Ду́ха.

Богоро́дичен: Святы́й Иису́с, всели́выйся во утро́бу Твою́,/ И́же во святы́х, Де́во, почива́яй/ и прославля́яй ве́рою и́стинною Сего́, Отрокови́це, сла́вящия.

Конда́к, глас 4.

Подо́бен: Вознесы́йся:

Апо́столов сопресто́льник и святи́телей украше́ние/ был еси́, блаже́нне,/ му́ченически просла́вився,/ возсия́л еси́, я́коже со́лнце, всех просвеща́я,/ Анти́по свяще́нне,/ разруши́л еси́ безбо́жия нощь глубо́кую./ Сего́ ра́ди тя почита́ем,/ я́ко Боже́ственнаго су́ща священному́ченика/ и целе́б пода́теля.

Икос:

Ве́рно любо́вию совоку́пльшеся в па́мять свяще́ннаго страда́льца,/ сего́ пе́сньми восхва́лим днесь,/ я́ко да благода́ти от него́ наслади́мся:/ ду́ши бо спаса́ет от страсте́й и бед, я́ко му́ченик и я́ко ве́рен святи́тель и побо́рник моля́щим его́ от души́./ Те́мже вопие́м ему́:/ от бед изба́ви ны при́сно свои́ми мольба́ми, о́тче наш Анти́по.

Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Ю́ныя три о́троки изобразу́я, Анти́по му́дре,/ я́коже посреди́ пе́щи, стал еси́ лю́то разжже́ннаго ме́днаго сосу́да, взыва́я:/ благослове́н еси́ в хра́ме сла́вы Твоея́, Го́споди.

Да Све́та непристу́пнаго яви́шися прича́стник,/ тьму лука́вых духо́в, Бо́гом просвеще́н, мимоте́кл еси́,/ благослове́н еси́, Бо́же мой, – зовы́й, – Го́споди.

Стра́сти разли́чны рукоде́йством, Анти́по, ду́ха утоля́еши челове́ков, му́чениче,/ Христо́вым подо́бяся страсте́м,/ благослове́н еси́, Бо́же мой, – зовы́й, – Го́споди.

Богоро́дичен: От крове́й, Отроко́вице, деви́ческих Твои́х/ вои́стинну вопло́щся Сло́во, Отцу́ Собезнача́льное,/ на́ше сокруше́ние исправля́я./ Благослове́на Ты в жена́х еси́, Пренепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Ны́не не в зерца́лех зри́ши, ни в гада́ниих до́брых после́днее,/ лице́м же па́че к лицу́, преше́дшим се́нем, вопия́ ра́достно тя Просла́вльшему:/ благослови́те, вся дела́ Госпо́дня, Го́спода.

Тя, Началопа́стыря Христа́ Боже́ственное овча́ до́бре упа́сшаго Того́ ста́да, прему́дре,/ я́ко а́гнца, беззако́ннии всесожига́ют огне́м, Анти́по, пою́ща:/ благослови́те, вся дела́ Госпо́дня, Го́спода.

На ка́мени Боже́ственных за́поведей се́рдца твоего́ утверди́л еси́ стопы́,/ лю́тых мук ве́тры, ласка́тельными же бу́рями не поколеба́лся еси́,/ песнопоя́, Анти́по прему́дре:/ благослови́те, вся дела́ Госпо́дня, Го́спода.

Богоро́дичен: Я́ко Ма́ти всех Творца́, я́ко Боже́ственный храм Вседержи́теля,/ я́ко земля́ неора́нная, неде́ланный клас прозя́бшая,/ Де́во Ма́ти, ве́рны вопию́щия сохрани́:/ благослови́те, вся дела́ Госпо́дня, Го́спода.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Иера́ршески, святи́телю, свяще́нное сконча́л еси́ тече́ние,/ свяще́ннейшую жизнь твою́ свяще́ннейше соверши́в,/ ра́дуяся, поте́кл еси́, к тебе́ Люби́мому, Анти́по му́чениче свяще́ннейше.

Я́ко доброде́тельными ви́ды удобре́н быв,/ сла́вою муче́ния, всеблаже́нне, освяти́ся/ и преше́л еси́ к кра́сному Го́споду, прича́стием обожа́емь, Богоприя́тне.

Ты Госпо́днею любо́вию разжже́гся, му́чениче Анти́по,/ в разжже́н усе́рдно вшел еси́ сосу́д, всесожига́емь,/ и Бо́гу прия́тна, о́тче, же́ртва прине́слся еси́.

Свяще́нных твои́х моще́й свяще́нная, блаже́нне, ра́ка ми́ро исцеле́ний то́чит,/ злосмра́дныя стра́сти отгоня́щи/ и твою́ сла́вящия па́мять я́ве благоуха́ющи.

Богоро́дичен: Нося́щая Христа́ на руку́, манове́нием нося́щаго вся,/ Сего́, я́ко Бо́га и Влады́ку, Чи́стая, моли́ уще́дрити ны,/ Богоро́дицу Чи́стую испове́дающия Тя всегда́, Непоро́чная.

Моли́тва

О пресла́вный священному́чениче Анти́по и ско́рый помо́щниче Христиа́ном в боле́знех! Ве́рую от всея души́ и помышле́ния, я́ко даде́ся тебе́ от Го́спода дар боля́щия исцеля́ти, неду́гующия врачева́ти и разсла́бленныя укрепля́ти. Сего́ ра́ди к тебе́, я́ко благода́тному врачу́ боле́зней, аз, не́мощный, прибега́ю и, твой досточти́мый о́браз с благогове́нием лобыза́я, молю́ся: твои́м предста́тельством у Царя́ Небе́снаго испроси́ мне, боля́щему, исцеле́ние от удруча́ющия мя зубны́я боле́зни, а́ще бо и недосто́ин есмь тебе́, бла́гостнейшаго отца́ и при́снаго засту́пника моего́, но ты, быв подража́тель человеколю́бия Бо́жия, сотвори́ мя досто́йна твоего́ заступле́ния чрез мое обраще́ние от злых дел к благо́му житию́, уврачу́й оби́льно дарова́нною тебе́ благода́тию я́звы и стру́пы души́ и те́ла моего́, да́руй ми здра́вие и спасе́ние и во всем благо́е поспеше́ние, да, та́ко ти́хое и безмо́лвное житие́ пожи́в во вся́ком благоче́стии и чистоте́, сподо́блюся со все́ми свя́тыми сла́вити всесвято́е И́мя Отца́, и Сы́на, и Свята́го Ду́ха. Ами́нь.

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 8.

Подо́бен: Му́ченицы Твои́, Го́споди:

Преподо́бне о́тче Иа́кове,/ разгоре́ся се́рдце твое́ Ду́хом Бо́жиим,/ любве́ бо ра́ди Христо́вы/ возлюби́л еси́ чин и́ноческий/ и вся земна́я возненави́дел еси́,/ кроме́ славосло́вия Бо́жия и церко́внаго украше́ния,/ те́мже воспали́ любы́ Бо́жия ду́шу твою́,/ е́же ты всегда́ зре́ти лице́ Бо́жие./ Ему́же вы́ну предстоя́, преподо́бне,/ моли́ся о душа́х на́ших.

Преподо́бне о́тче Иа́кове,/ посто́м и моли́твами Бо́гу угоди́л еси́/ и ми́лостынями Ми́лостиваго Бо́га умили́л еси́,/ сего́ ра́ди Ца́рствие Небе́сное насле́довал еси́,/ лука́выя же ду́хи низве́ргл еси́ посо́бием Бо́жиим/ и тьмы кня́зя посрами́л еси́./ Моли́ся у́бо Христу́ Бо́гу/ дарова́ти нам ве́лию ми́лость.

Преподо́бне о́тче Иа́кове,/ люби́телю пусты́ни, смире́ния рачи́телю,/ це́рквам строи́телю, наста́вниче и́ноком,/ и́же вождь до́брый всем лю́дем/ на пути́ ко спасе́нию был еси́/ и яви́лся еси́ стори́цею прине́сший плод доброде́тели./ Моли́ Христа́ Бо́га/ дарова́ти нам ве́лию ми́лость.

Святи́телю Ио́не Всерусскому/ собесе́дник был еси́, преподо́бне,/ и от него́ наставля́емь и учи́м Сло́ву Бо́жию,/ сего́ ра́ди моли́ ку́пно с ним Го́спода,/ да пода́ст правосла́вным лю́дем/ на сопроти́вныя свы́ше побе́ду и одоле́ние/ и на вся враги́ устраше́ние,/ и умири́т мир ми́лостию Свое́ю,/ и пода́ст нам вся блага́я Своя́,/ моли́тв ра́ди святы́х ва́ших.

Сла́ва, глас 6:

Преподо́бне о́тче и свя́те Иа́кове,/ на земли́ преходя́щее вре́мя прежи́л еси́,/ посто́м и моли́твами Бо́гу угожда́я,/ сего́ ра́ди ны́не на Небеси́ лику́еши/ и со А́нгелы пребыва́еши,/ дерзнове́ние име́я ко Христу́ Бо́гу,/ мир испроси́ душа́м на́шим.

И ны́не, пра́здника.

На стихо́вне стихи́ры, глас 5.

Подо́бен: Ра́дуйся:

Ра́дуйся, преподо́бне о́тче Иа́кове,/ устро́ивый в пусты́ни оби́тель/ и именова́вый ю во имя Спа́сова Предте́чи Иоа́нна,/ иде́же положены́ бы́ша святы́я мо́щи твоя́,/ на ни́хже почива́яй Дух Святы́й/ то́чит цельбы́ мно́ги/ приходя́щим челове́ком с ве́рою,/ вся́кими неду́ги стра́ждущим,/ и́же исцеле́ние прие́млют/ святы́х ра́ди моли́тв твои́х.

Стих: Честна́ пред Го́сподем/ сме́рть преподо́бных Его́.

Ра́дуйся, преподо́бне о́тче Иа́кове,/ собра́вый в пусты́ню и́нок мно́жество/ и, с ни́ми всено́щным стоя́нием Бо́га моля́,/ воздержа́нием поста́ ду́шу удобри́л еси,/ и чи́сту Бо́гу предста́вил еси́ ю,/ и прия́л еси́ дар мздовоздая́ния –/ Небе́сный вене́ц на главе́ свое́й со ученики́ свои́ми,/ и́же после́доваша житию́ твоему́ свято́му;/ и ны́не моли́ся Го́сподеви о созда́нней тобо́ю оби́тели,/ и о христиа́нех всех, призыва́ющих и́мя твое́ свято́е,/ е́же спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ра́дуйся, о́тче Иа́кове преподо́бне,/ я́ко утоли́л еси́ пло́ти возста́ния/ мно́гим терпе́нием и до́лгим алка́нием,/ от чресл бо ма́терних соблюда́емый Бо́гом,/ имел еси́ бде́ние неусы́пное;/ того́ ра́ди отве́рзеся тебе́, о́тче, Ца́рство Небе́сное,/ и Боже́ственнаго Ду́ха благода́ть/ всели́ся в се́рдце твое́м,/ и сла́вна тя показа́ Госпо́дь во мно́зех стране́х./ Моли́ся у́бо, преподо́бне,/ о творя́щих честну́ю па́мять твою́,/ яко да получи́м от Го́спода благода́ть/ и душа́м на́шим мир и ве́лию ми́лость.

Сла́ва, глас 6:

Е́же по о́бразу Бо́жию соблю́д невреди́мо,/ ум влады́ку на стра́сти па́губныя по́стнически поста́вив,/ и во е́же по подо́бию, я́коже мо́щно, возше́л еси́,/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху,/ те́мже и и́ноком яви́лся еси руководи́тель,/ благотеку́щим утеше́ние,/ пра́вило доброде́телей изве́стнейшее./ И ны́не на Небесе́х зре́ти Святу́ю Тро́ицу сподо́бивыйся,/ о́тче наш Иа́кове,/ моли́ся непреста́нно о нас,/ ве́рою и любо́вию чту́щих тя.

Тропа́рь зри на вели́цей вече́рни.

НА ВЕЛИЦЕЙ ВЕЧЕРНИ

На Го́споди, воззва́х: стихи́ры. Глас 1.

Подо́бен: Небе́сных чино́в:

О́тче Иа́кове преподо́бне,/ твоя́ пресве́тлая па́мять/ свяще́нная собра́ния весели́т до́бре,/ твое́ же житие́, чуде́с оби́льное,/ я́ко заря́ сия́ет све́тлая,/ и ны́не мо́лим тя:/ Христо́ви моли́ся/ дарова́ти душа́м на́шим/ мир и ве́лию ми́лость.

О́тче святы́й Иа́кове,/ вре́менных и плотски́х мудрова́ний чужда́яся,/ духо́вная и пребыва́ющая возлюби́л еси́,/ сме́ртную же па́мять в се́рдцы стяжа́л еси́,/ и ны́не Христу́ моли́ся/ дарова́ти душа́м на́шим/ мир и ве́лию ми́лость.

О́тче Иа́кове преподо́бне,/ до́блестей испо́лненный,/ на Небеса́ восте́кл еси́/ и побе́дныя по́чести прия́л еси́/ от Христа́ Бо́га на́шего,/ те́ло же твое́, положено́ во гро́бе, о́тче,/ оста́вил еси́ источа́ти нам исцеле́ние,/ и ны́не Христо́ви моли́ся/ дарова́ти душа́м на́шим/ мир и ве́лию ми́лость.

Сла́ва, глас 6:

Днесь созыва́ет нас преподо́бнаго све́тлое торжество́./ Прииди́те у́бо, празднолю́бцы,/ да пра́зднуим па́мять его́, глаго́люще:/ ра́дуйся, Иа́кове, свети́льниче све́тлый,/ приводя́й ко Христу́ и́ноков мно́жество./ Ра́дуйся, по́стником похвало́ и удобре́ние,/ и всем ве́рным благоути́шное приста́нище,/ и от неду́г избавле́ние./ Ра́дуйся, Небе́сных чино́в восприя́тия сподо́бивыйся,/ с ни́миже ны́не ра́дуешися во сла́ве,/ предстоя́ Христу́ Бо́гу,/ Его́же моли́ изба́вити нас ви́димых и неви́димых враг/ и спасти́ ду́ши на́ша.

И ны́не, пра́здника.

Вход. Проки́мен дне и чте́ния три преподо́бническая (зри 7-ое апреля).

На лити́и стихи́ры самогла́сны.

Глас 5:

Преподо́бне о́тче,/ не дал еси́ сна твои́ма очи́ма,/ ни ве́ждома твои́ма дрема́ния,/ до́ндеже ду́шу и те́ло от страсте́й свободи́л еси́,/ те́мже и Христо́с, прише́д со Отце́м,/ оби́тель у тебе́ сотвори́./ И от Того́ благода́ть прии́м, преподо́бне Иа́кове,/ моли́ Единосу́щную Тро́ицу/ спасти́ся душа́м на́шим.

Богому́дре о́тче Иа́кове,/ по́стником был еси́ похвала́ и утвержде́ние,/ мир отню́д возненави́дев от ю́ности,/ Бо́га возлюби́л еси́,/ и те́сным путе́м ше́ствовал еси́,/ и и́ноческое житие́ возлюби́л еси́./ Пресве́тлый свети́льниче и ве́рным всем те́плый засту́пниче,/ моли́ся Го́сподеви/ спасти́ся душа́м на́шим.

Богому́дре о́тче,/ ду́шу с те́лом очи́стив,/ Свято́му Ду́ху себе́ оби́тель яви́,/ те́мже сла́вна тя Госпо́дь, Иа́кове, соде́ла,/ в чудесе́х же вели́каго свети́льника,/ просвети́вша во мра́це су́щая,/ я́ко наста́вника и́ноком, соше́дшеся,/ велегла́сно ублажа́ем.

Преподо́бне о́тче Иа́кове,/ от Го́спода просвеще́ние прии́м/ и душетле́нныя стра́сти победи́в,/ в до́брых по́двизех подвиза́лся еси́ на неви́димаго врага́,/ и, того́ ко́зней, блаже́нне, избежа́в, всели́лся еси́ в преми́рная селе́ния,/ и та́мо с ли́ки пра́ведных сочета́лся еси́;/ с ни́миже дерзнове́ние име́я ко Го́споду,/ мир испроси́ душа́м на́шим/ и ве́лию ми́лость.

Сла́ва, глас 6:

Преподо́бне о́тче,/ ми́ра красоты́ и сла́сти вре́менныя отню́д возненави́дев,/ и́ноческое житие́ па́че возлюби́л еси́/ и А́нгелом собесе́дник бы́ти сподо́бился еси́/ и, я́ко свети́льник многосве́тлый Ру́сския земли́,/ чудеса́ми свои́ми сия́еши,/ те́мже усе́рдно мо́лимся тебе́:/ помина́й всех нас, соверша́ющих свяще́нную па́мять твою́,/ мы бо ча́да твоя́/ и о́вцы слове́сныя твои́х уче́ний/ и тя на по́мощь призыва́ем,/ прося́ще тобо́ю прия́ти/ мир и ве́лию ми́лость.

И ны́не, пра́здника.

На стихо́вне стихи́ры, глас 4.

Подо́бен: Дал еси́ зна́мение:

Житие́ нескве́рно,/ терпе́ние, и кро́тость, и любо́вь нелицеме́рну,/ и воздержа́ние приме́рно,/ всено́щное стоя́ние/ и умиле́ние Боже́ственное,/ ве́ру, и наде́жду, и ми́лование, о́тче, стяжа́л еси́/ и, а́ки А́нгел, пожи́л еси́ с пло́тию на земли́,/ блаже́нне Иа́кове,/ моли́твенниче о душа́х на́ших.

Стих: Честна́ пред Го́сподем/ смерть преподо́бных Его́.

Земны́й А́нгел и Небе́сный челове́к был еси́, преподо́бне,/ учи́тель умиле́ния, ми́лования струя́,/ чуде́с мно́жество, гре́шником засту́пниче,/ ма́слина вои́стинну плодови́та Бо́жия,/ еле́ем трудо́в умаща́я сердца́ всех ве́рных,/ восхваля́ющих па́мять твою́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ум твой просвеща́я Боже́ственными словесы́/ и теле́сных страсте́й удаля́яся,/ о́браз земны́м себе́ яви́л еси́,/ укра́шен же быв Боже́ственными доброде́тели,/ и, руководи́мый Всесвята́го Ду́ха де́йством,/ Бо́гови уго́ден был еси́,/ о́тче наш Иа́кове,/ и́ноком украше́ние.

Слава, глас 6:

Преподо́бне о́тче,/ во мно́гия страны́ изы́де веща́ние твои́х наставле́ний,/ и́миже на Небесе́х обре́л еси́ мзду трудо́в твои́х,/ бесо́вския полки́ победи́л еси́/ и А́нгельским чино́м причте́н был еси́,/ и́хже житию́ поревнова́л еси́,/ дерзнове́ние имы́й ко Го́споду,/ мир испроси́ душа́м на́шим и ве́лию ми́лость.

И ны́не, пра́здника.

Тропа́рь, глас 4:

Небе́снаго жела́я,/ земна́я возненави́дел еси́/ и, взем крест свой, после́довал еси́ Христу́/ и от Него́ прие́м дарова́ния чуде́с,/ исцеля́ти неду́жныя;/ но, я́ко име́я дерзнове́ние ко Святе́й Тро́ице,/ испроси́ правосла́вным христиа́ном здра́вие и спасе́ние,/ на враги́ же побе́ду/ и не забу́ди, посеща́я чад свои́х,/ припа́дающих к цельбоно́сному гро́бу твоему́,/ Иа́кове, преподо́бне о́тче наш.

НА УТРЕНИ

По 1-м стихосло́вии седа́лен, глас 1.

Подо́бен: Лик а́нгельский:

Житие́ земно́е благоче́стно преше́л еси́/ и к ве́чным оби́телем преста́вился еси́,/ честно́е же те́ло твое́ во гро́бе сокрове́нно и в созда́нней оби́тели твое́й положено́ бысть,/ и яви́ е Госпо́дь нетле́нно и по преставле́нии твое́м всем явле́но,/ те́мже моли́ Христа́ Бо́га о пра́зднующих всечестну́ю па́мять твою́,/ Иа́кове Богому́дре, о́тче наш.

Сла́ва, и ны́не, Богоро́дичен:

Ра́дуйся, Пречи́стая, душа́м снабде́ние,/ обурева́емым приста́нище невла́емое,/ согреша́ющим исправле́ние изве́стное./ Ра́дуйся, утеше́ние ско́рбным душа́м и Помо́щнице непобеди́мая./ Ра́дуйся, преми́рная ко Го́споду Хода́таица о всех христиа́нех.

По 2-м стихосло́вии седа́лен, глас 5:

Пусты́ннаго жи́теля почти́м,/ вся прило́ги страсте́й плотски́х попра́вшаго тве́рдым воздержа́нием,/ и притеце́м к честно́му гро́бу его́, иде́же лежа́т честны́я и многоцеле́бныя мо́щи его́, и глаго́лем:/ о преблаже́нне Иа́кове, моли́ся Го́сподеви со Предте́чею Христо́вым Иоа́нном/ поми́ловатися душа́м на́шим.

Сла́ва, и ны́не, Богоро́дичен:

Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́/ и носи́ла еси́ на Пречи́стую руку́ воплоти́вшееся Сло́во, непрело́жно и неизме́нно,/ те́мже со А́нгелом Тебе́ вопие́м:/ ра́дуйся, Благода́тная, Госпо́дь с Тобо́ю.

По полиеле́и седа́лен, глас 8:

Егда́ Боже́ственная любо́вь воспали́ ду́шу твою́, свя́те,/ тогда́ вся сро́дники своя́ оста́ви, и плотски́я стра́сти укроти́,/ и, и́ночество восприя́в, в пусты́ню вни́де,/ и вся страши́лища бесо́вская претерпе́ Бо́жиим хране́нием,/ иде́же, я́ко кедр, умно́жися и проро́чествия дар прии́м,/ те́мже неотъе́млемо бога́тство на Небеси́ дарова́ тебе́ Бог, Иа́кове преподо́бне,/ моли́ Христа́ Бо́га согреше́нием оставле́ние пода́ти/ любо́вию чту́щим святу́ю па́мять твою́.

Сла́ва, и ны́не, Богоро́дичен:

Вопло́щшееся Сло́во от утро́бы Твоея́ ро́ждши, Пречи́стая,/ мене́, растле́ннаго грехи́, от прило́г вра́жиих сохрани́, Ма́ти Бо́жия,/ и се́рдце мое́ очи́сти, Богоблагода́тная, Ма́терними Твои́ми моли́твами,/ да и аз благода́рно воззову́ Ти:/ Мари́е Богоро́дице, моли́ Сы́на Твоего́ и Бо́га на́шего/ поми́ловати ста́до Твое́, е́же стяжа́, Всенепоро́чная.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 6:

Пресла́внаго строи́теля,/ и до́му Предте́чева украси́теля,/ и первоугоди́вшим Бо́гу отце́м ревни́теля,/ по́стником похвалу́, и немощны́м цели́теля,/ и бесо́м прогони́теля, Иа́кова почти́м,/ процвете́ у́бо, я́ко крин,/ и умно́жи ста́до Христо́во слове́сных ове́ц,/ сохраня́я их моли́твами свои́ми в преподо́бии и пра́вде.

Кано́н преподо́бному, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е море,/ я́ко Еди́н сла́вно просла́вися.

Я́ко Безпло́тен, блаже́нне Иа́кове, на земли́ поживе́/ и ны́не с ли́ки преподо́бных сочета́лся еси́,/ с ни́миже ра́дуяся, нас, чту́щих тя, помина́й, приснопа́мятне.

Греха́ми мно́гими помраче́нное мое́ се́рдце просвети́, блаже́нне Иа́кове,/ те́плыми моли́твами твои́ми.

Умо́м очище́нным Бо́гови порабо́тился еси́,/ целому́дрием теле́сным и чистото́ю/ ду́шу и те́ло свое́ просвети́л еси́, блаже́нне Иа́кове.

Богоро́дичен: Прему́дрость и Сло́во О́тчее несказа́нно ро́ждшая,/ души́ моея́ лю́тую исцели́ я́зву/ и серде́чную укроти́ боле́знь.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Ду́хом разжже́н быв, Иа́кове о́тче, труды́ подъя́л еси́,/ возвы́сився смире́нием, горды́ню бесо́вскую смири́л еси́, преподо́бне,/ сла́ва и́ноком и утвержде́ние.

По у́зкому пути́ ходи́л еси́ в житии́ свое́м,/ простра́ннаго пути́ удаля́яся, о́тче,/ неви́димаго зми́я посрами́л еси́, смире́нием огражда́яся.

Моле́бный глас мой услы́ши, о́тче Иа́кове преблаже́нне,/ не забу́ди раба́ твоего́,/ воспева́ющаго честны́я твоя́ по́двиги.

Богоро́дичен: Уста́ви неуста́вное се́рдце мое́, Чи́стая Ма́ти Бо́жия,/ Сы́ну Твоему́ моля́щися при́сно о рабе́ Твое́м.

Седа́лен, глас 8:

Ра́зума тве́рдостию украша́яся, плотски́я тя́гости отве́рг,/ зми́еву горды́ню попра́л еси́/ и, оби́тель быв избра́нная Свято́му Ду́ху,/ неукло́нным ра́зумом порабо́тился еси́ Христу́, всеблаже́нне Иа́кове./ Того́ моли́ грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко еди́ну в жена́х Де́ву Тя обре́тше, без се́мени ро́ждшую Бо́га пло́тию,/ вся блажи́м Тя, ро́ди челове́честии:/ Сло́во бо всели́ся в Тя Боже́ственное,/ Его́же, я́ко Младе́нца, пита́ла еси́, Зижди́теля и Го́спода;/ те́мже А́нгельский собо́р и челове́ческий род досто́йно сла́вим пречи́стое рождество́ Твое́,/ и мы вси согла́сно вопие́м Ти:/ моли́ Христа́ Бо́га согреше́нием на́шим оставле́ние дарова́ти восхваля́ющим Тя.

Песнь 4

Ирмо́с: Всел еси́ на ко́ни, апо́столы Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бысть ежде́ние Твое́/ ве́рно пою́щим:/ сла́ва си́ле Твое́й, Го́споди.

Ходи́л еси́ в путя́х пра́вых,/ и, та́ко неукло́нно ше́ствуя, дости́гл еси́, блаже́нне, широты́ ра́йския,/ и А́нгельским лико́м сочета́лся еси́.

В пусты́ню жела́нием, преподо́бне, всели́вся,/ подвиза́лся еси́ кре́пкими по́двиги, поще́нием/ и моли́твами день и нощь ко Го́споду,/ научи́ ны вопи́ти:/ сла́ва си́ле Твое́й, Го́споди.

Храм Бо́гови боголе́пен воздви́гл еси́/ и той во и́мя рождества́ Предте́чи именова́л еси́,/ в не́мже сла́вится при́сно честно́е и́мя твое́, Иа́кове преподо́бне.

Богоро́дичен: Ра́дуйся, Влады́чице Де́во,/ це́рквам еси́ красо́та и ве́рным похвала́ и держа́ва,/ непреста́нно моли́ся, Богоро́дице, Сы́ну Своему́/ сохрани́ти правосла́вныя лю́ди от вся́каго зла́го обстоя́ния.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Просвеща́я ум свой Боже́ственными словесы́,/ теле́сных страсте́й устрани́лся еси́/ и, превы́ше быв земны́х,/ соблю́л еси́ о́браз в себе́ Боже́ственный не омраче́н.

Не забу́ди, блаже́нне Иа́кове, посеща́ти чад твои́х,/ соверша́ющих свяще́нную па́мять твою́,/ я́ко да твои́ми моли́твами изба́вимся вся́кия ну́жды и печа́ли.

Нощь грехо́вная покры́ла мя есть,/ но озари́ мя покая́нием, преподо́бне,/ да омы́ю скве́рну грехо́вную окая́нныя моея́ души́.

Богоро́дичен: Всесве́тлым озарена́ еси́ све́том, Богора́дованная Ма́ти:/ Ты бо честне́йши родила́ еси́ Христа́ всех Бо́га,/ Его́же моли́, да изба́вит ны от вся́ких напа́стей.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Ма́слина вои́стинну Бо́жия плодови́та быв труды́ твои́ми,/ моли́ся, Иа́кове преподо́бне,/ за ве́рно на по́мощь призыва́ющих тя.

Земны́й А́нгел и Небе́сный челове́к был еси́, преподо́бне,/ и учи́тель умиле́ния, ми́лования струя́, и исто́чник чудесе́м.

Сле́зными пото́ки и тру́дными по́ты у́глия сла́дости грехо́вныя погаси́л еси́./ Те́мже в чудесе́х сла́вна тя показа́ Госпо́дь, Иа́кове блаже́нне,/ и украси́ вы́шними дарова́нии.

Богоро́дичен: Умертви́ся смерть Тобо́ю/ и а́дово жа́ло притупи́ся, Ма́ти Чи́стая:/ Ты бо Безсме́ртнаго Влады́ку Христа́ пло́тию ми́рови родила́ еси́.

Конда́к, глас 8.

Подо́бен: Взбра́нной:

Серде́чная о́чи, досточу́дне, ко Го́споду впери́в/ и теле́сныя стра́сти из ко́рене исторга́я,/ неболе́зненную жизнь в боле́знех восприя́л еси́, преподо́бне,/ боле́знем же лю́тым дае́ши исцеле́ние прося́щим с ве́рою у тебе́,/ те́мже мо́лим тя, досточу́дне,/ исцели́ на́ша боле́зни душе́вныя и теле́сныя, да зове́м ти:/ ра́дуйся, Иа́кове Богому́дре, о́тче наш.

Икос:

Покая́ния две́ри отве́рзи ми, всеблаже́нне,/ да омы́ю скве́рну окая́нныя моея́ души́/ и те́ла моего́ вся чу́вства очи́сти, да зову́ ти благода́рственная:/ ра́дуйся, по́стником вои́стинну преди́вное удобре́ние;/ ра́дуйся, исто́чниче пресла́дкий, напая́ющий ве́рных сердца́ уче́ньми./ Ра́дуйся, нощь на́шего неразу́мия отгна́вый смиренному́дрием;/ ра́дуйся, прелюби́мая весно́, израсти́вшая нам нелицеме́рную любо́вь./ Ра́дуйся, прекра́сный кри́не, любвеоби́льным взо́ром ко Господу влеки́й;/ ра́дуйся, чудесы́ свои́ми мно́гих удивля́яй./ Ра́дуйся, возжеле́нная соверши́вый;/ ра́дуйся, ве́рным по Бо́зе кре́пкая наде́ждо./ Ра́дуйся, се́рдцем свои́м прилепля́яйся ко Христу́ день и нощь;/ ра́дуйся, оби́тели своея́ храни́телю./ Ра́дуйся, па́стырю и нача́льниче слове́сных ове́ц./ Ра́дуйся, Иа́кове Богому́дре о́тче наш.

Песнь 7

Ирмо́с: А́нгелом о́троки из огня́ спасы́й/ и гремя́щую пещь преложи́вый на ро́су,/ благослове́н еси́, Бо́же оте́ц на́ших.

А́нгельским житие́м, блаже́нне Иа́кове, пожи́л еси́,/ труды́ подвиго́в твои́х умно́жил еси́/ и процве́л еси́, я́ко фи́никс, воспева́я:/ благослове́н еси́, Го́споди, Бо́же оте́ц на́ших.

Восхваля́я тя, о́тче Иа́кове преподо́бне, взыва́ем ти:/ моли́ Христа́ Бо́га лука́вства диа́воля изба́вити нас, воспева́ющих:/ благослове́н еси́, Го́споди, Бо́же оте́ц на́ших.

В путе́х жития́ заблу́ждшаго и зимо́ю грехо́вною олядене́вшаго,/ согре́й мя, Иа́кове преподо́бне, и научи́ вопи́ти:/ благослове́н еси́, Бо́же оте́ц на́ших.

Богоро́дичен: Прия́ла еси́ вои́стинну Боже́ственное Сло́во во чре́во Свое́/ и Сие́ па́че естества́, Пречи́стая, родила́ еси́./ Его́же моли́ изба́вити от бед раб Твои́х, вопию́щих:/ благослове́н Бог оте́ц на́ших.

Песнь 8

Ирмо́с: От Отца́ пре́жде век Рожде́ннаго/ и от Ма́тере в после́дняя Воплоще́ннаго,/ свяще́нницы, благослови́те,/ лю́дие, превозноси́те во вся ве́ки.

И́нок и́стинен был еси́,/ простра́ннаго пути́ удаля́яся, широты́ ра́йския дости́гл еси́/ и та́мо дре́ву живо́тному причаща́ешися во ве́ки.

Дом духо́вный доброде́тели был еси́,/ и правоты́ пра́вило испра́вил еси́, Иа́кове пречу́дне,/ и бу́дущих благ сподо́бился,/ дре́ву живо́тному причаща́ешися во ве́ки.

Лико́м преподо́бных сочета́лся еси́,/ и по́стническим житие́м украси́лся еси́, Иа́кове преподо́бне,/ и ны́не в ра́йских оби́телех дре́ву живо́тному причаща́ешися во ве́ки.

Богоро́дичен: В ле́тех бы́вша, от Отца́ же безле́тно возсия́вшаго,/ Богома́ти, нам родила́ еси́./ Его́же моли́ спасти́ пою́щия Тя во ве́ки.

Песнь 9

Ирмо́с: Чи́стую сла́вно почти́м, лю́дие, Богоро́дицу,/ огнь Божества́ прии́мшую во чре́ве неопа́льно,/ пе́сньми велича́ем.

Чи́стое и кра́сное храни́лище доброде́телей был еси́, Иа́кове блаже́нне,/ те́мже тя непреста́нно велича́ем.

От се́рдца боле́знь, от о́чию сле́зы,/ от души́ покая́ние приими́, преподо́бне,/ и ко Го́споду те́пле принеси́,/ я́ко да непреста́нно тя велича́ем.

Всече́стне о́тче Иа́кове,/ сохрани́ певца́ своего́ неви́димою си́лою от находя́щих бед и скорбе́й,/ изба́ви же и всех, почита́ющих свяще́нную па́мять твою́,/ и наста́ви на путь покая́ния,/ я́ко да получи́м у Го́спода ве́лию ми́лость/ и тя непреста́нно велича́ем.

Богоро́дичен: А́нгели и Арха́нгели, проро́цы и апо́столи/ и весь лик преподо́бных с блаже́нным Иа́ковом/ ко Христу́ приле́жно и с Пречи́стою Его Ма́терию, за весь мир моли́теся,/ да вас при́сно велича́ем.

Свети́лен.

Подо́бен: Жены́, услы́шите:

Дух Святы́й тя, преподо́бне Иа́кове, оби́тель Себе́ сотвори́,/ и, на тебе́ почива́яй, насле́дника тя Ца́рствию учини́ Небе́сному/ и ли́ку преподо́бническому причте́,/ и по успе́нии твое́м сла́вна тя показа́, преподо́бне,/ моли́ся о спасе́нии душ на́ших.

Сла́ва, и ны́не, Богоро́дичен:

Еди́н Чи́стый, Еди́н Госпо́дь, Тя еди́ну избра́,/ честне́йшу всея́ тва́ри, Пренепоро́чная,/ от чи́стых крове́й Твои́х воплоти́тися.

На хвали́тех стихи́ры, глас 4.

Подо́бен: Зва́нный свы́ше:

От вели́каго святи́теля Ио́ны благослове́ние восприя́,/ и того́ уче́ние положи́ в се́рдце свое́м,/ и нра́ву того́ после́довал еси́,/ поще́нием и ну́ждами утверди́ вся/ и духо́вныя ра́дости испо́лнився./ Прия́телище был еси́ Пресвято́му Ду́ху,/ и уче́нии свои́ми всех учени́к свои́х научи́л еси́/ ходи́ти по и́стинному спаси́тельному пути́,/ и, на высоту́ доброде́телей возводя́/ и Христа́ непреста́нно славосло́вя,/ слез твои́х проли́тием/ огнь грехо́вный угаси́л еси́/ и Бо́гу угоди́л еси́,/ те́мже мо́лим тя:/ помина́й нас, о́тче Иа́кове,/ чту́щих па́мять твою́,/ и моли́ спасти́ся душа́м на́шим.

Пре́жде бы́вшая пусты́ня,/ ны́не же нарече́ся Предте́чева оби́тель,/ строе́ние по́тов и трудо́в твои́х,/ в не́йже многоле́тне потруди́вся честны́ма твои́ма рука́ма,/ пресла́вне Иа́кове,/ оте́честву пресве́тлый свети́льниче,/ у́зкий путь преше́л еси́/ и широты́ ра́йския дости́гл еси́,/ те́мже вси ве́си и гра́дове Русстии ублажа́ют тя,/ со дерзнове́нием зову́ще:/ име́ем тя, о́тче Иа́кове, те́плаго к Бо́гу моли́твенника,/ псалмы́ тя воспева́ем/ и притека́юще к честны́м моще́м твои́м,/ исцеле́ния да́ры прие́млем,/ и ны́не Христу́ моли́ся/ спасти́ся душа́м на́шим.

Пречестна́я оби́тель,/ строе́ние трудо́в твои́х,/ име́ет в себе́ ча́да мно́га,/ па́че же всего́ сокро́вище неоскудева́емое,/ честны́я и многоцеле́бныя мо́щи твоя́,/ преподо́бне Иа́кове,/ от ни́хже с ве́рою приходя́щии челове́цы прие́млют исцеле́ния./ Те́мже вси зове́м тебе́, я́ко предста́телю:/ преподо́бне о́тче наш,/ бу́ди те́плый моли́твенник ко Го́споду/ о душа́х на́ших.

Сла́ва, глас 2:

Преподо́бне о́тче Иа́кове,/ с ю́ных лет Бо́гом храни́м был еси́/ от вся́каго лука́вства и злонра́вия,/ Той бо, руководя́й тя, я́ко Авраа́ма, до исхо́да души́ твоея́,/ дарова́ тебе́ чудеса́ мно́гая в жи́зни сей,/ та́кожде и по преставле́нии/ просла́ви тя во мно́гия страны́,/ и сла́вна тя показа́ повсю́ду,/ и на Небеса́х с ли́ки преподо́бных причте́ тя,/ и ны́не све́тло неизрече́нным све́том сия́еши,/ Богому́дре Иа́кове.

И ны́не, пра́здника.

НА ЛИТУРГИИ

Блаже́нны от кано́на пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Ева́нгелие от Матфе́я, зача́ло 43. Прича́стен: В па́мять ве́чную бу́дет пра́ведник:

Моли́тва

О преподо́бне и Богому́дре о́тче наш Иа́кове! Ве́мы, я́ко с ли́ки А́нгельскими и все́ми святы́ми предстои́ши при́сно Престо́лу Го́спода Вседержи́теля и ве́лие и́маши к Нему́ дерзнове́ние моли́тися о всех, с ве́рою и умиле́нными слеза́ми в по́мощь тя призыва́ющих. Не премолчи́ у́бо, вопия́ за ны, недосто́йныя, ко Го́споду Бо́гу, да отврати́т гнев Свой, пра́ведно за беззако́ния на́ша на ны дви́жимый, и да изба́вимся вся́ких скорбе́й, бед же и напа́стей и злых обстоя́ний и благоче́стно поживе́м в ны́нешнем ве́це, ходя́ще в за́поведех и оправда́ниих Госпо́дних непоро́чно. О преблаже́нне и Боголюбе́зне о́тче наш Иа́кове! Умоли́ Го́спода, да не оскуде́ют в стране́ на́шей и́стинные ревни́тели и́ноческаго жития́ и подража́тели свято́му и Богоуго́дному житию́ твоему́; сохрани́ предста́тельством твои́м к Бо́гу страну́ на́шу от огня́, гла́да, меча́, наше́ствия иноплеме́нных и от вся́каго зла и всем, с ве́рою и любо́вию притека́ющим к тебе́ испроси́ у Го́спода Бо́га грехо́в проще́ние, телесе́м здра́вие, исправле́ние грехо́внаго жития́ и ве́чное спасе́ние, да с тобо́ю и все́ми святы́ми сподо́бимся прославля́ти в Тро́ице сла́вимаго Бо́га, Отца́ и Сы́на и Свята́го Ду́ха, во ве́ки веко́в. Ами́нь.

(слу́жбу зри 4 октября́)

Тропа́рь, глас 3:

Возвести́телю пути́ спаси́тельнаго,/ и́стинный храни́телю апо́стольских преда́ний,/ сто́лпе непоколеби́мый, благоче́стия учи́телю/ и Правосла́вия наста́вниче, святи́телю Варсоно́фие,/ Влады́ку всех моли́/ мир вселе́нней дарова́ти/ и душа́м на́шим ве́лию ми́лость.

Ин тропа́рь, глас 4:

Ти́хостию нра́ва направля́емый,/ святи́телю Варсоно́фие,/ в ти́хое приста́нище дости́гл еси́,/ смиренному́дрия ра́ди удо́бно избежа́в сопроти́вных сете́й,/ свято́ю душо́ю твое́ю на Небеса́ возлете́л еси́,/ иде́же Христу́ предстоя́,/ моли́ спасти́ся нам, почита́ющим па́мять твою́.

Ин тропа́рь, глас 8:

По Бо́жием зако́не ревни́телю,/ лю́тый разруши́телю неприя́зненныя ле́сти,/ я́ко ми́ром, по́том свои́м во труде́х и бде́ниих подвиза́ся/ посреде́ Каза́нскаго ца́рствия,/ оби́тель стро́я боголе́пнаго Преображе́ния/ и вели́кому своему́ учи́телю Гу́рию после́дуя,/ с ни́мже вели́кий сою́з име́я духо́вный,/ я́коже в животе́, та́коже и по преставле́нии:/ обре́тением честны́х моще́й ва́ших во еди́но вре́мя/ и мно́гими чудесы́ вас Бог просла́ви;/ и, ра́достию восходя́ в Небе́сныя оби́тели,/ тве́рдый ка́мене ве́ры,/ от иноплеме́нник мно́ги ско́рби претерпе́л еси́,/ до́брый вво́дниче в ве́чную жизнь,/ в ню же, мо́лим тя, введи́ ны,/ преподо́бне о́тче наш Варсоно́фие,/ и моли́ Христа́ Бо́га спасти́ся душа́м на́шим.

Конда́к, глас 6:

Воздержа́нием те́ло ду́ху порабо́тив,/ ду́шу же равноа́нгельну сотвори́л еси́,/ сего́ ра́ди святи́тельства са́ном поче́тся,/ чи́сте Чисте́йшему предстои́ши./ Моли́ Христа́ Бо́га, святи́телю,/ спасти́ лю́ди твоя́, свя́те,/ да вси вопие́м ти:/ ра́дуйся, о́тче преподо́бне Варсоно́фие,/ гра́ду на́шему Каза́ни похвала́ и утвержде́ние.

Ин конда́к, глас 5:

Я́коже звезда́ всесве́тлая, доброде́тельми сия́ющи, был еси́,/ обогати́в себе́ моли́твою, и посто́м,/ и те́ло свое́ вери́гами удруча́я,/ в поло́не  же от иноплеме́нник мно́го пострада́л еси́./ Непоколеби́м ве́рою мно́гая ле́та,/ А́нгелом ку́пно соедини́м,/ бесо́вская ополче́ния огорчава́ше./ После́дуя безме́здником Косме́ и Дамиа́ну,/ враче́бною хи́тростию мно́гия исцели́л еси́./ Те́мже ны́не честно́е и боготру́дное те́ло твое́,/ от землены́х недр обрете́нное,/ чудесы́ Госпо́дь просла́ви,/ исцеля́еши бо многонеду́жныя не то́кмо у гро́ба,/ но и от честны́х вери́г/ подае́ши неоску́дно целе́бныя да́ры приходя́щим с ве́рою.

Моли́тва

Прини́кни, святи́телю Варсоно́фие, с Го́рних селе́ний на притека́ющих к тебе́ и вонми́ моле́нию их, умоли́ Го́спода Бо́га дарова́ти нам, е́же ко спасе́нию на́шему мы про́сим от Него́ при святы́х моща́х твои́х. Умоли́ Го́спода Бо́га дарова́ти стране́ на́шей кре́пкий и ненаруши́мый мир, благочи́ние, просвеще́ние умо́в и серде́ц и земли́ плодоно́сие, па́стырем –святы́ню, зако́ном – пра́вду и си́лу, военача́льником – му́дрость и непобеди́мое му́жество, градонача́льником – суд, во́инству – пре́данность оте́честву и неодоли́мую хра́брость, всем же правосла́вным христиа́ном –здра́вие и благоче́стие. Сохраня́й нас от всех наве́тов вра́жиих, да сло́вом и де́лом прославля́ется Всесвято́е И́мя Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.

Тропа́рь, глас 1:

Пусты́нное и безмо́лвное житие́ ва́ше по́стнически препроводи́вше,/ Христо́в бо крест на ра́мо взе́мше/ и Того́ стопа́м усе́рдно после́довавше,/ на неви́димаго врага́ му́жески ополчи́стеся/ и того́ ко́зни сокруши́сте,/ моли́твами и слеза́ми, чистото́ю Бо́гови прибли́жившеся,/ преподо́бнии отцы́ на́ши Евфи́мие и Харито́не./ Я́ко со́лнце, осиява́ете светоза́рными луча́ми чуде́с ва́ших,/ всех нас спаси́те, с ве́рою призыва́ющих вас/ и творя́щих честну́ю ва́шу па́мять,/ и, я́ко иму́щии дерзнове́ние ко Спа́су,/ мир ми́рови испроси́те и спасти́ся душа́м на́шим.