НА МА́ЛОЙ ВЕЧЕ́РНИ:

На Го́споди, воззва́х: стихи́ры, глас 4.

Подо́бен: Я́ко до́бля:

До́лу влеку́щаго мудрова́ния/ совле́клся еси́, му́дре,/ на высоту́ простира́яся,/ та́мо приобща́тися су́щим жела́я, о́тче Зоси́мо,/ е́же и получи́л еси́ ны́не,/ плотски́я тя́жести изреши́вся;/ и о нас моли́ся,/ ве́рою чту́щих честну́ю па́мять твою́.

Пра́востию смы́сла помышля́я/ и разсмотря́я многомяте́жную, о́тче, жития́ бу́рю,/ ти́хое же и невла́емое приста́нище безмо́лвия,/ е́же и предпоче́т па́че,/ о́но же досто́йно отве́ргл еси́/ и, изреши́вся се́тей многоплете́ннаго сладостра́стия,/ моли́ спасти́ся нам.

Целому́др и кро́ток/ от ю́ности был еси́,/ о́тче Зоси́мо блаже́нне,/ пра́востию се́рдца и ума́ чистото́ю/ доброде́тели удержа́в,/ и́миже Бо́гу прибли́жился еси́./ Его́же ны́не моли́/ от тли и бед изба́вити/ ве́рою творя́щих честну́ю па́мять твою́.

Сла́ва, глас 4:

Стеце́мся, мона́шеское мно́жество,/ соше́дшеся, пра́здник соста́вим:/ честна́я бо па́мять отца́ на́шего Зоси́мы,/ сердца́ на́ша озаря́ет неви́димо,/ до́брыми возсия́ющи де́лы./ Сего́ ра́ди, согла́сно воспева́юще, рцем:/ ра́дуйся, ве́рный ра́бе Христа́ Бо́га;/ ра́дуйся, по́стников све́тлая похвало́;/ ра́дуйся, мона́шествующих наста́вниче;/ ра́дуйся, исцеле́ний исто́чниче./ О нас, преподо́бне, моли́ всех Царя́, Христа́ Бо́га на́шего,/ изба́витися от собла́зн льсти́ваго/ и спасти́ся душа́м на́шим.

И ны́не, пра́здника.

На стихо́вне, в Трио́ди.

Сла́ва, глас 4:

Прииди́те, празднолю́бцы,/ псало́мскую песнь воскре́сшему из ме́ртвых Христу́ принесе́м:/ днесь бо разу́мная весна́ возсия́ нам,/ подаю́щи цве́ты слове́сныя,/ вселюбе́зная па́мять отца́ на́шего Зоси́мы./ Ю́же досто́йно почита́юще,/ прие́млем исто́чники исцеле́ния,/ излива́ющияся нам от всечестны́я ра́ки незави́стно,/ подвиза́ бо ся терпели́вно на земли́/ и Небе́сныя да́ры прия́т./ Те́мже того́ ны́не мо́лим/ моли́тися непреста́нно Христу́ Бо́гу/ мир вселе́нней дарова́ти/ и душа́м на́шим ве́лию ми́лость.

И ны́не, пра́здника.

НА ВЕЛИЦЕЙ ВЕЧЕРНИ

На Го́споди, воззва́х: поста́вим стихи́ры на 8, в Трио́ди 3 и преподо́бнаго 5, глас 8:

Подо́бен: О пресла́внаго чудесе́:

О́тче преподо́бне Зоси́мо,/ впери́в ум твой к Бо́гу ве́рою,/ мирска́го смеше́ния/ возгнуша́лся еси́ непостоя́ннаго/ и, крест твой взем,/ Всеви́дцу после́довал еси́,/ те́ло непокори́вое по́двиги воздержа́ния/ по́мыслу порабо́тив/ си́лою Боже́ственнаго Ду́ха.

О́тче Богому́дре Зоси́мо,/ ты от утро́бы ма́терни/ Христу́ прибли́жился еси́,/ и всем смы́слом Тому́ прилежа́л еси́,/ и, от твои́х по́двиг Бо́гу Вседержи́телю/ плоды́ досто́йныя принося́, преподо́бне,/ доброде́тельными цве́ты украша́емь,/ тем блага́х наслажде́ние обре́л/ и восприя́л еси́, досточу́дне.

Преподо́бне о́тче прему́дре Зоси́мо,/ боля́щим ты яви́лся еси́ исцеле́ние,/ и хромы́м хожде́ние/ ми́лостивно сотворя́еши,/ и всем, притека́ющим с ве́рою/ к цельбоно́сному гро́бу твоему́/ и прося́щим по́мощи и заступле́ния,/ ты же моли́твами твои́ми/ исцеле́ние неду́гующим неску́дно подава́еши.

И́ны стихи́ры, глас 2.

Подо́бен: Ки́ими похва́льными:

Ки́ими похва́льными венцы́/ увязе́м отца́ на́шего Зоси́му?/ Доброде́телей сокро́вище,/ сосу́д чистоты́, прия́телище благода́ти,/ исто́чник исцеле́ний,/ его́же ра́ди враго́в шата́ние Христо́с низложи́,/ име́яй ве́лию ми́лость.

Ки́ими пе́сненными добро́тами/ похва́лим на́шего наста́вника?/ Пусты́ннаго граждани́на,/ целому́дрия храни́теля,/ боля́щих врача́ безме́здна,/ его́же ра́ди враго́в шата́ние Христо́с низложи́,/ име́яй ве́лию ми́лость.

Ки́ими смире́нными устна́ми/ ублажи́м до́брых рачи́теля?/ По́стника и́стинна,/ бе́дным помо́щника,/ в мо́ри обурева́емых предста́теля,/ прибега́ющим приста́нище,/ его́же ра́ди враго́в шата́ние Христо́с низложи́,/ име́яй ве́лию ми́лость.

Сла́ва, глас 6. Самогла́сен:

Прииди́те, по́стническое сосло́вие,/ духо́вный лик соста́вим,/ пе́ния трубо́ю возглаша́юще,/ благода́рственными гла́сы отцу́ на́шему возопие́м, глаго́люще:/ ра́дуйся, Христо́в подви́жниче Зоси́мо,/ любо́вию бо Сего́ оста́вил еси́ мир, преподо́бне;/ ра́дуйся, и́же те́ло твое́ посто́м и труды́ изнуря́я/ ве́чныя ра́ди и блаже́нныя вои́стинну жи́зни;/ ра́дуйся, чи́стый те́лом и душе́ю,/ озаря́яся непреста́нно сия́нием Христа́ Бо́га./ Нам же, творя́щим честну́ю па́мять твою́,/ моли́ изба́витися вся́каго гне́ва,/ и тли, и муче́ния, блаже́нне.

И ны́не, пра́здника.

Вход. Проки́мен дне, и паремии́.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие – сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры, по сте́блию потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань, разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́./ Сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 5):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́,/ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры самогла́сны, глас 4:

Све́тлая па́мять успе́ния твоего́,/ преподо́бне о́тче Зоси́мо,/ нам сердца́ просвеща́ет:/ чту́ще бо честны́я твоя́ мо́щи,/ врачевство́ страсте́й, неудо́бь цели́мых,/ прославля́ем просла́вльшаго тя Го́спода/ и твоя́ труды́ и по́двиги венча́вша благода́тию;/ усе́рдно и мы, подвиго́в и трудо́в е́мшеся,/ твое́ю стезе́ю ходи́ти ко Христу́ Бо́гу,/ Его́же моли́ спасти́ и просвети́ти ду́ши на́ша.

Глас 2: Во успе́нии твое́м, блаже́нне,/ учи́тельница нам быва́ет твоя́ ра́ка,/ при́сно бо излива́ющимися чудесы́ вопие́т,/ возводя́ к трудо́м и подвиго́м, глаго́ля:/ возлюби́те Го́спода,/ да обря́щете благода́ть ве́чную,/ и ничто́же па́че Его́ почти́те,/ да егда́ прии́дет, обря́щете поко́й со избра́нными Его́,/ его́же да и мы улучи́м/ твои́ми моли́твами.

В незаходи́мыя заше́л еси́ мо́ря ото́ки,/ пристра́стия ми́ра бе́гая,/ до́блим Ге́рманом наставля́емь,/ в чу́днаго Савва́тия селе́ние,/ иде́же и мона́шеское мно́жество собра́л еси́,/ наставля́я сих посто́м и труды́ на стези́ доброде́телей,/ возвыша́я сих к Боже́ственному раче́нию./ Иде́же ны́не в незаходи́мая вшел еси́/ пресве́тлаго све́та Пресвяты́я Тро́ицы, о́тче,/ руководя́ нас моли́твами твои́ми.

Глас 8: Преподо́бне о́тче, всече́стне Зоси́мо,/ до́брыми де́тельми возше́д, я́ко на колесни́цу, восте́кл еси́,/ побе́дныя по́чести от Него́ прие́мля:/ те́ло твое́ трудолю́бное,/ я́ко ма́сти, нам во гро́бе оста́вил еси́, о́тче,/ источа́ти исцеле́ния и прогони́ти ду́хи лука́выя./ Те́мже тя ублажа́ем, всече́стне.

Сла́ва, глас 5:

Возсия́ весна́, прииди́те, наслади́мся,/ просия́ Воскресе́ние Христо́во,/ прииди́те, возвесели́мся,/ отца́ на́шего па́мять, чернори́зцы озаря́ющи, показа́ся./ Те́мже, празднолю́бцы, прииди́те, духо́вне торжеству́ем:/ сей бо до́бре ра́това диа́вола/ и сего́ посрами́, Крест Христо́в на ра́му нося́,/ со страстьми́ и похотьми́ те́ло свое́ пропина́я,/ бо́дростию свяще́нство свое́ украша́я./ И ны́не, свяще́нно в незаходи́мая заше́д,/ во све́те Богонача́льнаго свяще́нства предстоя́,/ се́нем ему́ разре́шшимся./ Те́мже тому́ возопии́м:/ преподо́бне, моли́ спасти́ся душа́м на́шим.

И ны́не, пра́здника.

На стихо́вне стихи́ры, глас 6:

На го́ру доброде́телей восходя́,/ до́лу влеку́щая помышле́ния оттряса́я,/ Крест Спаси́телев на ра́мо взем,/ усе́рдно Тому́ после́довал еси́./ И ны́не, добро́ты Его́ наслажда́яся,/ помина́й нас, чту́щих тя.

Стих: Честна́ пред Го́сподем/ смерть преподо́бных Его́.

Небе́сных благ жела́я,/ мирска́я сла́дкая отве́ргл еси́,/ ненасы́тимыя сла́дости рачи́тель,/ а́лчбою и жа́ждею томя́ себе́,/ е́же ны́не вои́стинну обре́л еси́,/ о́тче Зоси́мо.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Воздержа́нием сла́сти восхлаща́я/ и сле́зными исто́чники пла́мень погаша́я страсте́й,/ те́мже ны́не зе́млю кро́тких насле́довал еси́,/ свеселя́ся преподо́бным и пра́ведным,/ о́тче наш Зоси́мо.

Сла́ва, глас 8:

Преподо́бне о́тче,/ ми́ра красоты́ и сла́вы вре́менныя/ отню́д возненави́дел еси́,/ мона́шеское же житие́ па́че возлюби́л еси́/ и А́нгелом собесе́дник бы́ти сподо́бился еси́/ и свети́льник многосве́тлый Русския земли́,/ чудесы́, я́коже второ́е со́лнце, сия́я./ Всех нас помина́й,/ соверша́ющих свяще́нную па́мять твою́:/ мы бо, ча́да твоя́/ и о́вцы слове́сных твои́х уче́ний,/ тя на по́мощь призыва́ем,/ прося́ще тобо́ю прия́ти/ мир и ве́лию ми́лость.

И ны́не, пра́здника.

Тропа́рь, глас 4:

Изволе́нием Боже́ственнаго ра́зума/ всели́лся еси́ в пусты́ню/ и та́мо, впери́в ум твой в Небе́сныя оби́тели,/ ра́вно А́нгелом житие́ на земли́ пожи́в,/ в моли́твах, и труде́х, и поще́ниих/ о́браз был еси́ твои́м ученико́м./ Отону́дуже Бог, ви́дя твое́ благо́е изволе́ние,/ умно́жи тебе́ ча́да в пусты́ни, слез твои́х тече́ньми напая́емей./ Но, я́ко име́я дерзнове́ние к Бо́гу,/ помина́й ста́до, е́же собра́л еси́, му́дре,/ и не забу́ди, я́коже обеща́лся еси́,/ посеща́я чад твои́х,/ Зоси́мо преподо́бне, о́тче наш.

НА УТРЕНИ

По 1-й стихоло́гии седа́лен, глас 4:

Во ото́це пу́сте, я́коже во вселе́нней пожи́л еси́,/ отню́дуже и в мо́ри пусты́ню град показа́л еси́./ Зоси́мо о́тче, моли́ спасти́ся нам.

Сла́ва, и ны́не, пра́здника.

По 2-й стихоло́гии седа́лен, глас 4:

Превозше́л еси́ вра́жия прило́ги, благода́тию вжиля́емь,/ посто́м и бде́нием ум чи́стя и моли́твою Бо́гу приближа́яся,/ отню́дуже и бесо́м прогони́тель яви́лся еси́, Зоси́мо,/ моли́ спасти́ся нам.

Сла́ва, и ны́не, пра́здника.

По полиеле́и седа́лен, глас 8:

Посту́ прилежа́ и бде́нию, о́тче, безгне́вием и кро́тостию украша́яся,/ мона́хов чи́ны собра́л еси́,/ доброде́телей о́бразы тем предлага́я и зако́ны вообража́я;/ и́миже к ра́зуму Боже́ственному возводя́,/ преподо́бне Зоси́мо, моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию, вси ублажа́ем, ро́ди челове́честии,/ Огнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме стихира, глас 6:

Преподо́бне о́тче,/ слу́хи твоя́ приле́жно Ева́нгелию вдав,/ услы́шал еси́ Боже́ственнаго гла́са, зову́ща в Небе́сное Ца́рство,/ и до́бре после́довал еси́ ему́,/ ми́ра кра́сная уме́ты вмени́л еси́,/ Еди́наго добро́ты жела́я Христа́,/ Ему́же приле́жно моли́ся/ ми́ру посла́ти мир,/ Це́рквам единомы́слие/ стране́ побе́дное одоле́ние/ и душа́м на́шим ве́лию ми́лость.

Кано́н пра́здника в Трио́ди на 6 и преподобнаго на 8.

Кано́н, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко еди́н сла́вно просла́вися.

Боже́ственною, о́тче, любо́вию прилепи́лся еси́ от ю́ности Христу́,/ плотски́я стра́сти увяди́л еси́ воздержа́нием, Зоси́мо прему́дре, Бо́гом помога́емь./ И ны́не нам све́та мы́сленнаго испо́лнитися помоли́ся Го́сподеви, пою́щим:/ сла́вно бо просла́вися.

Претруди́л еси́ те́ло, пребога́те,/ и стра́сти плотски́я, о́тче, порабо́тил еси́, Зоси́мо,/ я́сно прия́л еси́ све́тлость благода́ти/ и, се́ю просве́щься, Боже́ственне взыва́л еси́:/ Го́сподеви пои́м, сла́вно бо просла́вися.

Кре́постию Ду́ха возмо́г,/ держа́ву низложи́л еси́ и си́лу вра́жию/ и, похвалу́ побе́дную и по́чести прие́мь, преподо́бне,/ чуде́сными сия́нии просвети́лся еси́, Го́сподеви поя́:/ сла́вно бо просла́вися.

Богоро́дичен: Зако́н кроме́ есте́ственных родила́ еси́ законода́вца Бо́га, Челове́ка бы́вша./ Того́ я́ко Бла́га моли́, Всенепоро́чная, на́ша беззако́ния презре́ти, вопию́щих всегда́:/ Го́сподеви пои́м, сла́вно бо просла́вися.

Други́й кано́н преподобнаго, глас 6.

Песнь 1

Ирмо́с: Я́ко по су́ху, пешеше́ствовав Изра́иль,/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь/ пои́м, вопия́ше.

Пребоже́ственный Све́те трисо́лнечне,/ страсте́й те́мностию омраче́на всего́ мя, просвети́в, очи́сти/ моли́твами Твоего́ раба́, Человеколю́бче,/ и сего́ чту́щу сло́во ми вдохни́.

Пою́щу светоно́сную па́мять твою́ свет ми низпосли́,/ я́ко Богонача́льному Све́ту предстоя́, преподо́бне Зоси́мо,/ страсте́й мои́х тьму моли́твами твои́ми отгоня́я.

Кро́ток, и ми́лостив, и чист быв,/ кро́тких зе́млю дости́гл еси́, о́тче,/ укроти́ настоя́щую бу́рю се́рдца моего́,/ да, в тишине́ Боже́ственней быв, песносло́влю твоя́ по́двиги.

Богоро́дичен: Твоего́ прии́мши Соде́теля, я́ко Сам восхоте́,/ из безсе́менна чре́ва Твоего́ па́че ума́ воплоще́нна, Чи́стая,/ тва́рей вои́стинну яви́лася еси́ Влады́чица.

Катава́сия пра́здника.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Плоть твою́ умертви́л еси́ воздержа́нием, преподо́бне,/ ду́шу же Боже́ственными дарова́нии просвети́л еси́.

Все у́бо жела́ние ко Влады́це Твоему́ обрати́л еси́,/ я́рость же на бе́сы, Богоно́се, вооружи́л еси́.

Име́я споспешеству́ющую ти Бо́жию си́лу, прему́дре,/ я́ко чу́ден, чудеса́ источа́еши и отго́ниши неду́ги.

Богоро́дичен: В ложесна́ Твоя́ с потща́нием, Всенепоро́чная, всели́ся Зижди́тель/ на благодея́ние ве́рно воспева́ющим Тя.

Ин

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Целому́дрие, о́тче, притяжа́в,/ и́мже на Боже́ственную любо́вь возше́л еси́,/ прие́мь да́ры исцеля́ти неду́ги душ и теле́с на́ших.

Ум твой Небе́сныя добро́ты созерца́ти, от земны́х отлучи́в,/ прилежа́ти наказа́л еси́, Зоси́мо,/ иде́же ны́не водворя́ешися.

Образ быв твои́м ученико́м к доброде́тели, о́тче,/ и́хже возводя́ к высоте́ Боже́ственнаго раче́ния,/ доброде́тели прилежа́ти наказу́я.

Богоро́дичен: Боже́ственнаго рождества́ Твоего́, Чи́стая,/ вся́каго естества́ чин прехо́дит чу́до:/ Бо́га бо Присносу́щна прии́мши во чре́ве,/ и, ро́ждши, пребыва́еши при́сно Де́ва.

Конда́к пра́здника.

Седа́лен, глас 4:

Страстно́е порабо́тил еси́ плотско́е мудрова́ние,/ ду́ху го́ршее покори́в, о́тче пресла́вне,/ сокруши́л еси́ вы́и бесо́м и посто́м возсия́л еси́ в ми́ре,/ я́ко лучи́ со́лнечных сия́ний, твоя́ доброде́тели показу́я./ Сего́ ра́ди тя воспева́ем.

Сла́ва, глас 8:

Кро́тость и любо́вь, преподо́бне, име́я, доброде́тельми возше́л еси́ на высоту́,/ я́же и твои́м ученико́м вообрази́л еси́, предста́тель мона́хом,/ прия́т от Бо́га де́йство благода́ти помога́ти бе́дствующим./ И ны́не притека́ющим, исцеле́ния точа́, здра́вие подае́ши, вопию́щим ти:/ Зоси́мо преподо́бне о́тче наш, моли́ Христа́ Бо́га/ грехо́в оставле́ние пода́ти/ чту́щим любо́вию святу́ю па́мять твою́.

И ны́не, пра́здника.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Прему́дрости пе́рвее ты рачи́тель яви́лся еси́, прему́дре,/ житие́ бо непоро́чно пожи́л еси́,/ очище́н изря́дно душе́ю и мы́слию, согла́сно взыва́я:/ сла́ва си́ле Твое́й, Го́споди.

Очи́стив ум твой от страстны́я молвы́, сла́вне,/ и чу́вства, му́дре, упра́вив, к нему́тней тишине́, о́тче,/ устреми́лся еси́ в морски́й о́стров и усе́рдно воспева́л еси́:/ сла́ва си́ле Твое́й, Го́споди.

Земны́я печа́ли воздержа́тельно оттря́с,/ Небе́сныя наде́жды стяжа́ Твой уго́дник, Влады́ко,/ преподо́бный Зоси́ма, со усе́рдием поя́:/ сла́ва си́ле Твое́й, Го́споди.

Богоро́дичен: Яви́ся в мир от Де́вы я́ко Челове́к,/ дарова́ побе́ду преподо́бным Свои́м,/ Кресто́м бо Его́ бе́сы прогна́ша, ве́рою зову́ще:/ сла́ва си́ле Твое́й, Го́споди.

Ин

Ирмо́с: Христо́с моя́ си́ла,/ Бог и Госпо́дь,/ Честна́я Це́рковь/ боголе́пно пое́т взыва́ющи,/ от смы́сла чи́ста о Го́споде пра́зднующи.

Кро́тостию, о́тче, наве́ты нося́,/ терпя́ же и от твои́х, на тя воста́ющих, оте́ческим нра́вом после́дуя,/ тех житие́ в себе́ име́л еси́.

Терпе́ние и безгне́вие име́я, отхо́диши, из кинови́и гони́м,/ возвраща́яся же, призыва́емь, смиря́лся еси́, я́ко отроча́,/ по Христо́ву словеси́.

Укоре́ние и доса́ды прие́мля, подо́бился еси́ молча́нию Иису́са, моего́ Бо́га,/ младе́нец беззло́бием Ца́рство насле́дуя,/ уязвля́я же гордя́щася врага́.

Богоро́дичен: Я́ко вои́стинну неизрече́нна и непостижи́ма/ Твоего́, Богоро́дице, Боголе́пнаго суть рождества́,/ су́щим на земли́ и Небе́сным, Присноде́во, та́инства.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Умо́м очище́нным, пресла́вне,/ зри́ши добро́ту неизрече́нную Христа́,/ вся́ческих Бо́га на́шего.

Умертви́ на́ша мудрова́ния, Человеколю́бче, плотска́я,/ и взыгра́ния Богоприя́тными преподо́бнаго Твоего́ моли́твами.

Свы́ше нас назира́еши, преблаже́нне,/ и управля́еши живо́т наш,/ творя́щих любо́вию, преподо́бне, па́мять твою́.

Богоро́дичен: Исцели́ неду́гующаго ума́ моего́ омраче́ние,/ врача́ ро́ждшая, Христа́, Всенепоро́чная Влады́чице.

Ин

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Но́сиши со о́наго по́лу мо́ря чуде́снаго Савва́тия мо́щи/ и твое́й оби́тели сие́ ца́рственное сокро́вище сниска́л еси́,/ его́же доброде́тели в себе́ нося́, Зоси́мо преподо́бне.

Ненаселе́ная населя́ется, о́тче, тобо́ю,/ я́ко бо заря́ просия́ша твоя́ доброде́тели;/ е́юже осия́вшеся, в пусты́ню, я́коже и во град,/ мона́шеское мно́жество сти́чется.

Обеща́нное дре́вле, при Савва́тии чу́днем,/ ны́не тобо́ю испо́лнися, о́тче:/ по́стник бо мно́жество к тебе́ прише́дше,/ и доброде́телем прилежа́т, тобо́ю просвеща́еми, Зоси́мо.

Богоро́дичен: Богоро́дицу Тя от души́, Влады́чице ми́ра Блага́я, испове́дающия спаса́й,/ Тебе́ бо заступле́ние непобеди́мо и́мамы,/ и́стинную Богороди́тельницу.

Песнь 6

Ирмо́с: Моли́тву проли́ю ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Яко сна о́браз тле́нный, всего́ ми́ра сла́ву зря,/ еди́наго жива́го Бо́га сла́вы возлюби́л еси́ прича́стник бы́ти:/ ю́же, преподо́бне, пра́ведно сподо́бился еси́ зре́ти.

Лука́вый умертви́ся змий свяще́нными твои́ми моли́твами, Богоблаже́нне,/ и того́ реша́ются зло́бы, и́же зна́мение от Тебе́ испроси́вше,/ и уго́дник све́тел Бо́жий позна́н был еси́ ве́рен.

Богому́дрым по́мыслом украси́вся, я́же на земли́ преоби́дел еси́ вся,/ и Небе́сное, преблаже́нне о́тче, насле́дие, прему́дре,/ разсуди́л еси́, Зоси́мо,/ и ны́не я́ве на Небесе́х живе́ши, ра́дуяся.

Богоро́дичен: Госпо́дь с Тобо́ю, Пречи́стая, я́коже изво́лил есть/ и всех нас от о́бласти льсти́ваго хода́тайством Твои́м изба́вил есть./ Те́мже Тя ны́не по до́лгу ро́дове родо́в ублажа́ют.

Ин

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Слеза́ми твои́ми, о́тче, потопи́л еси́ у́мныя еги́птяны,/ и́миже очи́стився, чи́стому прибли́жился еси́/ и благода́ть привлече́ исцеле́ния, благоутро́бне./ Бе́дствующия ны зле, тре́бующия твоея́ по́мощи, спаси́.

Сла́ное  о́тче, неве́рия мо́ре/ истека́ющими от Тебе́ си́лами и зна́меньми возмуща́ется,/ и злоча́стие благоче́стием ло́пи  изменя́ется,/ и тьма неве́дения Богоразу́мием просвеща́ется, Зоси́мо.

Предста́тельствовати стра́ждущим благода́ть, о́тче, име́я, ника́коже ме́дли,/ но предвари́ и ру́ку по́мощи пода́ждь нам, зле страстьми́ одержи́мым:/ вси бо, призыва́ющии тя ве́рно, от бед спаса́ются.

Богоро́дичен: Пречи́стая Влады́чице, ро́ждшая земны́м Окорми́теля и Го́спода,/ страсте́й мои́х непостоя́нное и лю́тое разжени́ смуще́ние/ и тишину́ пода́ждь се́рдцу моему́.

Конда́к, глас 8:

Христо́вою любо́вию уязви́ся, преподо́бне,/ и Того́ Крест сла́вный, на ра́мо взем,/ поне́сл еси́, боже́ственне вооружи́вся,/ и непреста́нныя моли́твы, я́ко копие́ в руце́, имы́й,/ кре́пко ссекл еси́ бесо́вская ополче́ния./ Тем зове́м ти:/ ра́дуйся, преподо́бне о́тче Зоси́мо, мона́хов удобре́ние.

И́кос:

Услы́шав Христо́в глас, оста́вил еси́ плотска́я мудрова́ния,/ бога́тство же и сла́ву, я́ко прах, вмени́в,/ на стра́сти, я́ко безпло́тен, подвиза́лся еси́,/ и Безпло́тных ликостоя́нию уподо́бился еси́,/ и ра́зума дарова́ние прия́л еси́,/ е́же пода́ждь в пе́снех пою́щим ти си́це:/ ра́дуйся, Зоси́мо преподо́бне и Богоно́се,/ Небе́сный челове́че и земны́й А́нгеле./ Ра́дуйся, я́ко кроме́ ми́ра су́етнаго пусты́ню соде́лав в морско́м о́строве,/ в нем оби́тель соста́вил еси́./ Ра́дуйся, я́ко в ней мно́жество мона́хов собра́ся,/ и от них слы́шиши си́це глаго́лемое:/ ра́дуйся, мона́шествующим спасе́ния хода́тай;/ ра́дуйся, уныва́ющих о́браз утеше́ния;/ ра́дуйся, мона́хом от наве́т вра́жиих изба́вителю;/ ра́дуйся, скорбе́й губи́телю на́шего естества́,/ я́ко отго́ниши по́мыслы зло́бныя;/ ра́дуйся, скорбя́щих душо́ю сла́дкое утеше́ние и ра́дости Боже́ственныя пода́телю;/ ра́дуйся, наш предста́телю и изба́вителю;/ ра́дуйся, преподо́бне о́тче Зоси́мо, мона́хов удобре́ние.

Песнь 7

Ирмо́с: От Иуде́и, доше́дше, о́троцы,/ в Вавило́не иногда́,/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Всем жела́нием прилепи́лся еси́, воздержа́нием тве́рдым твоему́ Влады́це,/ Того́ ны́не пита́ешися сия́нии, зовы́й:/ оте́ц на́ших Бо́же, благослове́н еси́.

Просвети́в твое́ се́рдце, священнонача́льник бысть о́тча соста́ва,/ наказу́я и уча́ вся, изводя́ всяк ум к Бо́жиим во́лям, поя́:/ о́тец на́ших Бо́же, благослове́н еси́.

Плод Боже́ствен Влады́це прине́сл еси́ – житие́, треблаже́нне,/ и же́ртву прия́тну и непоро́чну, зовы́й:/ оте́ц на́ших Бо́же, благослове́н еси́.

Богоро́дичен: Се Де́ва Боже́ственное Отроча́ породи́,/ Его́же ны́не Богоно́снии отцы́ позна́вше Бо́га и Го́спода, вопия́ху:/ о́тец на́ших Бо́же, благослове́н еси́.

Ин

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

В мо́ри явля́яся, от бед спаса́еши, Зоси́мо преподо́бне,/ призыва́юще бо тя на по́мощь, и те́пла помо́щника всем ве́дяще быва́юща,/ и бы́стра засту́пника стяжа́вше, зову́т:/ благослове́н Бог оте́ц на́ших.

Я́же от лю́таго бе́са наси́луемая жена́ пра́ведне тобо́ю запреща́ется,/ безу́мне Изба́вителя не призва́вшая и тя, к Нему́ моли́твенника, Зоси́мо./ Та́я исцеле́ние от напа́сти получи́, пою́щи:/ благослове́н Бог оте́ц на́ших.

И́же злы́ми при́сно обурева́емии и страстьми́ содержи́мии, к тебе́ прибега́ем,/ Бо́гови моли́твенника тя предлага́юще, Зоси́мо преподо́бне./ Те́мже ми́лостивно посеща́й нас, о́тче, да, тобо́ю спасе́ни, пое́м:/ благослове́н Бог оте́ц на́ших.

Богоро́дичен: Очисти́лище естеству́ Ты еси́, еди́на Богоблаже́нная,/ на ра́мех бо Херуви́мских седя́щаго Бо́га дла́ньма носи́ла еси́, вопию́щи:/ благослове́н Бог оте́ц на́ших.

Песнь 8

Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

С похвала́ми быва́ет, Богоно́се, па́мять твоя́:/ пра́вды бо яви́лся еси́ показа́тель,/ му́жества, и му́дрости, и целому́дрия, о́тче преподо́бне Зоси́мо,/ Соде́телю и Изба́вителю взыва́я:/ благослови́те, вся дела́ Госпо́дня, Го́спода.

Невозвра́тно ше́ствовал еси́ веду́щими к Небеси́ Боже́ственными стезя́ми,/ о́тче преподо́бне Зоси́мо досточу́дне,/ от злых, веду́щих до конца́, укрепи́лся еси́, поя́:/ благослови́те, вся дела́ Госпо́дня, Го́спода.

Богоно́снаго вси хвала́ми почти́м, я́ко испо́лнена я́ве благода́ти/ и Боже́ственными сия́ньми просвеще́на, изря́дне Соде́телю и Изба́вителю вопия́ше:/ благослови́те, вся дела́ Госпо́дня, Го́спода.

Богоро́дичен: Вода́ еси́ неисчерпа́емая, Де́во,/ от нея́же вси, пию́ще, благода́ти исполня́емся/ и, душо́ю и те́лом освяща́еми, пое́м:/ благослови́те, вся дела́ Госпо́дня, Го́спода.

Ин

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.

Лоза́ плодови́та, о́тче, душа́ твоя́ бысть,/ вино́ умиле́ния иска́пающи нам,/ стра́сти очища́ющее и ду́ши боже́ственне веселя́щее,/ от малоду́шия возставля́ющее./ Те́мже и, благоду́шны бы́вше, усе́рдно пое́м:/ благослови́те, вся дела́ Госпо́дня, Го́спода.

Подобонра́вное доброде́телей, о́тче Зоси́мо, отцу́ Савва́тию/ и равноподви́жное исправле́ние совокупи́ тя в преми́рных ему́./ Отону́дуже, явля́ющеся вку́пе, спаса́ете пою́щия:/ благослови́те, вся дела́ Госпо́дня, Го́спода.

Дво́ице Богоуго́дная, равноче́стнии отцы́, еди́но досто́яние ве́чныя сла́вы стяжа́вше,/ от лю́тых нас изыма́ти не преста́йте, вопию́щих,/ я́ко равномо́щно дерзнове́ние иму́ще ко всех Влады́це:/ по́йте, благослови́те, вся дела́ Госпо́дня, Го́спода.

Богоро́дичен: Златоза́рный Тя, Де́во, све́щник предвообрази́,/ прия́ла бо еси́ несказа́нно Свет Непристу́пный и сия́нием Твои́м озаря́еши концы́./ Те́мже Тя пое́м, Чи́стая, и превозно́сим во ве́ки.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Струя́ми твои́х слез очи́щся,/ ны́не Све́та наслажда́ешися, о́тче преподо́бне, трисия́ннаго./ Тому́ предстоя́ я́ве, светоза́рными просвеща́емь луча́ми, свы́ше назира́еши нас,/ твою́ па́мять творя́щих, всеблаже́нне.

Я́ко вели́кое со́лнце, нам вели́чием по́двиг твои́х/ осия́л еси́, Богому́дре, вся земны́я концы́,/ к Све́ту, от Све́та возсия́вшему, у́мер, преше́л еси́./ Тем вопие́м ти:/ просвети́ на́ша помышле́ния, о́тче преподо́бне.

Процве́л еси́ в по́стнических по́двизех,/ прехва́льне о́тче наш, я́ко ши́пок благоуха́нен/ и, я́ко кедр, облагоуха́л еси́ со́вести ве́рных сердца́ доброде́тельми и чудесы́;/ тем отжени́ стра́сти смердя́щия, преподо́бне.

Богоро́дичен: Просвети́, Пречи́стая Де́во, се́тующее се́рдце мое́ при́сно преступле́нии/ и жите́йскими мно́гими молва́ми/ и не оста́ви мя враго́м бы́ти в ра́дость, я́ко да сла́влю Тя/ и я́ко да Тя любо́вию пою́, Препе́тая.

Ин

Ирмо́с: Бо́га челове́ком невозмо́жно ви́дети,/ на Него́же не сме́ют чи́ни А́нгельстии взира́ти/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем.

Предста́вил еси́ себе́ же́ртву чи́сту Бо́гу, преподо́бне о́тче,/ все жела́ние доброде́тельми возложи́в,/ и́миже сия́я, просвеща́еши приближа́ющихся/ к прославля́ющему тя по успе́нии Го́сподеви,/ предста́теля показа́вшему су́щим в ну́ждах.

Высото́ю де́лания к Небеси́ взя́тся, о́тче вселюбе́зне,/ ко о́ному блаже́нству преложи́лся еси́,/ Его́же в житии́ боле́зненне не преста́л еси́, взыску́я,/ и, труда́ми поко́й обре́т,/ та́мо певцы́ твоя́ хода́тайством твои́м возведи́.

Приими́ с любо́вию ти песнь приноси́мую, преподо́бне о́тче,/ и пода́ждь оставле́ние прегреше́ний/ и страсте́й премене́ние, и Боже́ственнаго све́та осия́ния сподо́би,/ та́мо управля́я, иде́же ты во све́тлых се́лех тро́ичныя зари́,/ Зоси́мо, пребыва́еши.

Богоро́дичен: Ме́ртвым воскресе́ние ны́не дарова́ся/ Твои́м несказа́нным и неизрече́нным рождество́м, Богоро́дице Всечи́стая:/ Жизнь бо от Тебе́, пло́тию обло́жшися, всем возсия́/ и сме́ртное смеше́ние я́ве разруши́.

Свети́лен:

Насажде́ну ти в дому́ Бо́жии,/ вои́стинну, я́ко фи́никс, псало́мски процвета́ет твоя́ оби́телъ,/ умножа́я тебе́ ча́да,/ и́же твою́, о́тче Зоси́мо, па́мять пра́зднуют све́тло.

Сла́ва, и ны́не, пра́здника.

На хвали́тех стихи́ры пра́здника 3, и преподобнаго 3, глас 8.

Подо́бен: О, пресла́внаго чудесе́:

Име́я Боже́ственную благода́ть учи́теля,/ целоу́мием тя наставля́ющую/ к жела́нию Боже́ственному,/ отону́дуже мирска́го мяте́жа отре́кся,/ к ра́зуму и́стинному возве́лся еси́,/ боле́зненными себе́ труды́ удруча́я,/ повину́я же лу́чшему го́ршее,/ Зоси́мо преподо́бне,/ моли́ спасти́ся нам.

Доброде́тели удержа́ти тща́ся,/ и́миже Бо́гу присво́итися разумева́я,/ к Нему́же восте́кл еси́,/ Его́же и светоли́тие прие́мля,/ хода́тайствуй о нас/ ми́рно житие́ прейти́,/ спасти́ся от собла́зн льсти́ваго/ и святы́х ра́дости о́бщником бы́ти/ твои́ми моли́твами.

Цельбоно́сному твоему́ гро́бу предстоя́ще,/ о́тче наш Зоси́мо,/ прие́млем оби́льно благода́ть:/ всяк бо, приходя́й с ве́рою, не посрами́тся,/ прие́млет бо, и́хже тре́бует,/ прославля́ющу тя Го́споду,/ я́ко благоуго́дна раба́ бы́вша твоему́ Влады́це,/ и Того́ за́поведи сохра́ньша./ Те́мже тя чтим и ублажа́ем.

Сла́ва, глас 8:

Мона́хов мно́жества/ наста́вника тя чтем, о́тче Зоси́мо;/ твое́ю бо стезе́ю пра́во ходи́ти позна́хом./ Блаже́н еси́, Христу́ рабо́тав/ и вра́жию низложи́в си́лу,/ А́нгелом собесе́дниче, и преподо́бным единокро́вне,/ и Савва́тию соприча́стниче./ С ни́миже моли́ся Го́сподеви/ поми́ловатися душа́м на́шим.

И ны́не, пра́здника.

Славосло́вие вели́кое. И отпу́ст.

НА ЛИТУРГИИ

Блаже́нны от кано́на святаго, песнь 3-я, на 4. И 2-го кано́на, песнь 6-я, на 4. Проки́мен, глас 7: Честна́ пред Го́сподем/ смерть преподо́бных Его́. Стих: Что́ возда́м Го́сподеви: Апо́стол, зача́ло 213. Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник:

На Го́споди, воззва́х: стихи́ры Симео́на, глас 4.

Подо́бен: Дал еси́ зна́мение:

Со́лнца светле́е/ просвеще́на па́мять твоя́ ве́рным возсия́,/ тварь просвеща́ющи Боже́ственными блиста́нии,/ Симео́не всеблаже́нне,/ и страсте́й мглу, и бесо́в тьму отгоня́щи./ Те́мже тя ублажа́ем/ и моле́бно воспева́ем,/ я́ко свети́льника всеми́рна/ и я́ко моли́твенника те́пла.

Му́дре му́чениче,/ стяжа́в земны́ми Небе́сная,/ и теку́щими немимоиду́щая,/ и тле́нными сла́ву нетле́нную восприя́л еси́, ра́дуяся,/ му́ками же и ра́нами/ терпели́вно за словеса́ Бо́жия венцы́ и Ца́рство./ В не́мже, ра́дуяся, со страда́вшими с тобо́ю, сла́вне,/ о всех моли́ся, ве́рою восхваля́ющих тя.

Стре́лы слове́с твои́х/ беззако́ннующих собра́ния,/ Симео́не му́чениче, уязви́ша./ Те́мже глас да́ша Небе́снии о́блацы,/ ли́цы Безило́тных совокупи́шася ра́достно,/ твои́х подвиго́в дивя́щеся терпе́нию./ Те́мже, ра́дующеся, и мы почита́ем ве́рою/ свято́е твое́ успе́ние,/ Спа́са прославля́юще.

И́ны стихи́ры преподо́бнаго Ака́кия, глас 8.

Подо́бен: О, пресла́внаго чудесе́:

Я́ко святи́тель Богоприя́тен,/ разу́мныя се́ни/ зри́ши незаходи́мая/ и преми́рная ви́дети сподо́бился еси́,/ оде́ян в преподо́бие,/ пра́вдою обложе́н и благоле́пием,/ и красоту́ мы́сленных/ лице́м к лицу́/ зри́ши, блаже́нне.

Преподо́бне о́тче Ака́кие,/ впери́в ум к Бо́гу ве́рою,/ мирска́го смеше́ния/ возгнуша́лся еси́ неуста́внаго/ и, крест твой взем,/ Всеви́дцу после́довал еси́,/ те́ла невоздержа́нное/ де́тельми поще́ния/ по́мыслу си́лою порабо́тив Боже́ственнаго Ду́ха.

Боже́ственнаго Собо́ра согла́сник/ и верхо́вен я́влься,/ с Кири́ллом, Ака́кие,/ лю́таго Несто́рия поги́бели пре́дал еси́,/ обличи́в сего́, блаже́нне, безу́мие/ и посрами́в су́етство словесы́ духо́вными./ Те́мже ублажа́ет тя вся́ка душа́,/ ве́рою пра́зднующи/ Боже́ственную па́мять твою́.

Сла́ва, и ны́не, Богоро́дичен, глас и подо́бен то́йже:

Спаси́ мя, Влады́чице Пречи́стая,/ Я́же Спа́са Христа́ неизрече́нно ро́ждшая:/ Тя бо еди́ну стяжа́х Предста́тельницу,/ и необори́мую сте́ну, и покро́в, и ра́дование,/ и души́ моея́ Боже́ственное утеше́ние./ Ты у́бо мя изба́ви неусыпа́ющаго че́рвия/ и огня́ ве́чнующаго,/ Ма́ти Христа́ Бо́га.

Крестобогоро́дичен, подо́бен то́йже:

Тя ви́дящи, пригвожда́ема на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ – увы́ Мне, – вопия́ше, –/ Ча́до сла́дкое!/ ра́ны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли всех изба́вивый милосе́рдием Твои́м?

Кано́н преподобнаго Симео́на, его́же краегране́сие: Венча́ю блаже́ннаго тя Симео́на песнопе́нии. Творе́ние Ио́сифово. Глас 5.

Песнь 1

Ирмо́с: Коня́ и вса́дника в мо́ре Чермно́е,/ сокруша́яй бра́ни, мы́шцею высо́кою/ Христо́с истрясе́, Изра́иля же спасе́,/ побе́дную песнь пою́ща.

Венце́м нетле́ния оде́явся и престо́лу Госпо́дню, всеблаже́нне, предстоя́,/ ве́рою чту́щия твое́ свято́е страда́ние/ моли́твами твои́ми при́сно спаса́й.

Че́стен сосу́д яви́лся еси́ Боже́ственнаго Ду́ха, Симео́не Богоно́се,/ И́мже пома́зався, упа́сл еси́ лю́ди бога́тны/ па́лицею Боже́ственных уче́ний, му́чениче, на воде́ разу́мней.

Уста́вил еси́ пре́лести, му́дре, тече́ния сла́дких твои́х слове́с Боже́ственными тече́нии/ и кро́вными ка́плями, святи́телю сла́вне,/ сего́ ра́ди ве́рно пое́м тя.

Богоро́дичен: Но́сиши рука́ми, Де́во, вся Нося́щаго/ и пита́еши я́ко Младе́нца Пода́теля млека́./ Того́ у́бо моли́ лю́ди Твоя́ вся уще́дрити, ве́рно пою́щия Тя.

Ин кано́н свята́го Ака́кия, творе́ние Ио́сифово. Глас 8.

Песнь 1

Ирмо́с: Посе́ченый несеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́,/ и непроходи́мое про́йде Изра́иль./ Песнь же воспева́шеся,/ Го́сподеви пои́м, сла́вно бо просла́вися.

Вся́ку зло́бу побе́ждь змии́ну, в незло́бии души́ я́ко пожи́в, Ака́кие му́дре,/ зло́бы мя исхити́ и страсте́й смертоно́сных/ и до́брыми о́бразы удобри́,/ я́ко да восхвалю́ тя, до́бре подви́гшася.

Пресве́тлая прозябе́ тя ле́торасль красну́ Мелити́на, вели́кий Ака́кие, износя́ща плоды́ сла́дки/ и наслажда́юща сердца́ па́че ме́да ве́рных,/ страсте́й отгоня́ща душетле́нную, преподо́бне, го́ресть Боже́ственною благода́тию.

Рожде́ние сый роди́телей, Ака́кие,/ я́коже Саму́ил свяще́нный, Бо́гу прине́слся еси́,/ пре́дан от млады́х ногте́й, воспита́тися в дому́ свяще́ннем/ и служи́ти Бо́гу Вседержи́телю,/ твою́ просве́щшему ду́шу Боже́ственными дея́нии.

Богоро́дичен: Я́же недоуме́нно Бо́га вопло́щшая/ и отсту́пльшия нас к Нему́ примири́вшая, Препе́тая Чи́стая,/ стра́сти се́рдца моего́ стра́стию Сы́на Твоего́, молю́, исцели́/ и спаси́ мя, всегда́ пою́ща: сла́вно бо просла́вися.

Песнь 3

Ирмо́с: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, еди́не Бла́же и Человеколю́бче.

Красно́ души́ движе́ния творя́ и ходя́ стезе́ю, к Бо́гу веду́щею,/ вся́каго безпу́тия лука́ваго уклони́лся еси́/ и взя́лся еси́ к жи́зненней две́ри, сла́вне, ве́чнаго поко́я.

Удали́в по́мысл от страсте́й плотски́х,/ безкро́вны, о́тче, прине́сл еси́ же́ртвы Сло́ву, поже́ршемуся нас ра́ди,/ и, Сего́ возвеща́я па́че сло́ва Боже́ственное воплоще́ние,/ пожре́н был еси́, я́ко а́гнец незло́бив.

Свя́то твое́ проводи́в житие́, пребога́те, со святы́ми ны́не всели́лся еси́,/ страда́ньми просвети́в твою́ ду́шу, и возсия́в со́лнца, блаже́нне, светле́е,/ и сын све́та быв.

Богоро́дичен: Кля́твы прароди́тельныя нас свободи́ла еси́,/ благослове́ньми всех венча́вшаго Сло́ва вопло́щши,/ Чи́стая, при́сно благослове́нная,/ страстоте́рпцев удобре́ние и согреша́ющих очище́ние.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,/ и пое́т Тя дух мой.

Зако́ну преклони́лся еси́ живонача́льному, преподо́бне,/ и от души́ вся́кое беззако́ние умерщвля́ющее возненави́дел еси́.

Тебе́ Дух Святы́й, духо́вными, му́дре, дея́нии светови́дна всего́ бы́вша,/ свяще́нника поставля́ет.

Источи́ язы́к твой, я́коже реку́, му́дре, уче́ния,/ му́тный пото́к пре́лести Боже́ственною си́лою изсуша́юща.

Богоро́дичен: Две́ре непроходи́мая, покая́ния ми отве́рзи две́ри, Чи́стая,/ и к путе́м мя пра́вым напра́ви.

Седа́лен, глас 1:

Подо́бен: Гроб Твой, Спа́се:

Я́ко со́лнце, нам свята́я твоя́ возсия́ па́мять, му́дре Симео́не святи́телю,/ страда́вших с тобо́ю ве́рных озаря́ющи, ю́же днесь сотворя́юще, вопие́м:/ моли́те о нас, страстоте́рпцы, еди́наго Человеколю́бца.

Сла́ва, ин, глас 3.

Подо́бен: Боже́ственныя ве́ры:

Побе́ды вене́ц от Го́спода за воздержа́ние, ра́дуйся, прия́л еси́,/ испове́данием, Богоно́се, украша́емь,/ и ересе́й всю обличи́л еси́ суету́ Боже́ственными твои́ми повеле́нии, о́тче преподо́бне,/ Христа́ Бо́га моли́ дарова́ти нам ве́лию ми́лость.

И ны́не, Богоро́дичен:

Боже́ственнаго естества́ не отлу́чься, плоть быв во чре́ве Твое́м,/ но Бог вочелове́чься и пребы́сть, и́же по рождестве́ Ма́терь Тя Де́ву,/ я́ко пре́жде рождества́, сохрани́в Всенепоро́чную, еди́н Госпо́дь./ Того́ приле́жно моли́ дарова́ти нам ве́лию ми́лость.

Крестобогоро́дичен:

Нескве́рная А́гница Сло́ва, нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, – Ча́до Мое́, – ка́ко стра́ждеши во́лею,/ хотя́ изба́вити от страсте́й безче́стия челове́ка?

Песнь 4

Ирмо́с: Боже́ственное Твое́ разуме́в истоща́ние/ прозорли́во, Авваку́м, Христе́, со тре́петом вопия́ше Тебе́:/ во спасе́ние люде́й Твои́х,/ спасти́ пома́занныя Твоя́ прише́л еси́.

Ведо́м свя́зан, разреши́л еси́ хи́трости лука́ваго, священнотаи́нниче пребога́те,/ пострада́в до́блественне, венцы́ нетле́ния восприя́л еси́.

Глаго́л твои́х стрела́ми/ уязви́л еси́, священному́чениче Симео́не, беззако́ннующих собо́ры/ и огне́м крове́й многобо́жную лесть попали́л еси́.

Соста́вим ли́ки, блажа́ще Богоно́снаго Симео́на, и Ана́нию сла́внаго,/ и с ни́ми подо́бныя, му́жески пострада́вшия му́ченики.

Богоро́дичен: Из Тебе́ Пра́вды Со́лнце возсия́в па́че ума́,/ вселе́нную просвети́, Богора́дованная Отрокови́це,/ и пре́лести зи́му разруши́.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Подо́бник был еси́ Боже́ственным апо́столом, о́тче Ака́кие,/ о́нех бо вла́стию, е́же вяза́ти и реши́ти, обогати́лся еси́.

Цевни́ца яви́лся еси́ Ду́ха, уче́ния возглаша́ющи, о́тче, спаси́тельная,/ Несто́рия безу́мнаго неи́стовную пре́лесть потребля́ющи.

Пресве́тлою моли́твою твое́ю, о́тче,/ дождь земли́ пода́л еси́/ и сея́ упои́л еси́ изсо́хшия ле́том, блаже́нне, бразды́.

Украси́стеся, преподо́бне, твои́ лани́те,/ я́же Боже́ственная повеле́ния, ве́рным благоуха́юща/ и смра́дную пре́лесть отгоня́юща.

Богоро́дичен: Умерщвле́на мя оживи́ и заблужде́ннаго ско́ро обрати́,/ незаблу́дный путь су́щи и Наста́вница всех, Влады́чице.

Песнь 5

Ирмо́с: Одея́йся све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,/ я́ко еди́н Благоутро́бен.

Столп и утвержде́ние Це́ркви Бо́жии я́влься, преблаже́нне,/ твои́м страда́нием непрекло́нну и непоколеби́му сию́ во ве́ки соблюди́/ хода́тайствы твои́ми.

Пе́сньми ублажа́ем житие́ твое́,/ гоне́ния же и сопротивле́ния, Симео́не пребога́те,/ и́хже ра́ди сподо́бился еси́ блаже́нныя кончи́ны.

Ми́ром Боже́ственнаго пома́зания па́стырь бы́в,/ за ста́до пожре́н был еси́, блаже́нне, я́коже ове́н наро́чит,/ и перворо́дных Це́ркви возвесели́л еси́.

Богоро́дичен: Да обря́щу Тя, Влады́чице,/ изыма́ющую мя в час Суда́ осужде́ния, ве́рно сла́вяй Тя,/ и мук изба́влюся, жду́щих мя.

Ин

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Чу́дно твое́ житие́ яви́ся, дарова́нии бо Боже́ственнаго Ду́ха обложи́вся,/ реки́ безчи́нная стремле́ния моли́твою уста́вил еси́,/ ключ ей и преде́л ка́мень положи́в, святи́телю Ака́кие.

Посреде́ Собо́ра Боже́ствен был еси́, отце́в побо́рник свяще́нных веле́ний,/ с Кири́ллом Боже́ственным, блаже́нне, Чи́стую Де́ву испове́дая, Бо́жию Ма́терь,/ и льсти́ваго побежда́я Несто́рия.

Па́че ме́да услажда́ющее мелити́няном позна́ся сло́во твое́,/ наслажда́юще сих ду́ши свяще́нными испове́дании и грехо́вную показу́юще го́ресть,/ досточу́дне о́тче Ака́кие.

Богоро́дичен: Не истощи́в не́дра весьма́ Роди́теля Пресу́щный,/ в Твои́х не́дрех Младе́нец ви́ден бысть, Де́во, держи́м,/ в мою́ нищету́ премно́гую обле́кся бога́тством милосе́рдия еди́н Человеколю́бец.

Песнь 6

Ирмо́с: Неи́стовствующееся бу́рею душетле́нною,/ Влады́ко, Христе́, страсте́й мо́ре укроти́/ и от тли возведи́ мя,/ я́ко Благоутро́бен.

Яви́лся еси́ Боже́ственнаго испо́лнен утеше́ния, блаже́нне Симео́не,/ мече́м кончи́ну блаже́нную прие́м со святы́ми,/ све́тло пострада́вшими му́ченики.

Ю́нии и ста́рцы, мона́си и свяще́нницы,/ до́брым по́двигом подви́гшеся за Христа́,/ я́коже а́гницы, пожре́ни бы́ша.

Блаже́нно житие́ пожи́вше, страда́льцы,/ кончи́ну от Христа́ прия́сте блаже́нную,/ мече́м сконча́стеся, ра́дующеся.

Богоро́дичен: Из Тебе́ возсия́, Пресвята́я, Соде́тель,/ и заре́ю Боже́ственнаго ра́зума/ су́щия в нощи́ неразу́мия просвети́.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Чи́стыя Ма́тере Бо́жия че́стен воздви́гл еси́ храм,/ храм пре́жде сего́ сам сотвори́лся еси́ Ду́ха, свяще́нне Ака́кие,/ Его́же освяти́в, реку́ чуде́с показа́л еси́.

Твоя́ святы́я гла́сы, я́же к ста́ду твори́л еси́,/ пресеца́ше ла́стовица, глася́щи, Ака́кие,/ но, прии́мши твоего́ язы́ка зако́н, непрело́жно сохрани́.

Я́ко ви́де тя царь, ра́бски прише́дша,/ твоя́ проше́ния испо́лни,/ Небе́снаго бо Царя́ позна́, Богоно́се о́тче, досточу́дна уго́дника.

Богоро́дичен: Ума́ моего́ побежде́ния и се́рдца возноше́ния,/ Твое́ю ми́лостию, Чи́стая, исцели́, молю́ся,/ и одержа́щаго мя греха́ изба́ви, ве́рою Тя ублажа́ющаго.

Песнь 7

Ирмо́с: Превозноси́мый отцо́в Госпо́дь/ пла́мень угаси́, о́троки ороси́,/ согла́сно пою́щия:/ Бо́же, благослове́н еси́.

Све́щник явля́я ра́зум,/ свет позна́лся еси́, преподо́бне, во тьме спя́щим неве́дения/ и разори́л еси́ огнеслужи́телей тьму, пострада́в пресла́вно.

Яви́лся еси́ посреди́ му́ченик, водя́ сонм,/ с ни́миже, сконча́вся мече́м, взыва́л еси́, Симео́не Богоно́сне:/ Бо́же, благослове́н еси́.

Собо́р многочи́сленных му́ченик почти́м,/ че́стно совокупля́емь от разли́чных градо́в,/ священноде́йственник Боже́ственных и мона́хов Богоно́сных.

Богоро́дичен: Исцели́, Пренепоро́чная, стра́сти се́рдца моего́,/ уста́ви смуще́ние ума́ моего́ обурева́емое, и спаси́ мя, пою́ща:/ Бо́же, благослове́н еси́.

Ин

Ирмо́с: От Иуде́и, доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отцо́в Бо́же, благослове́н еси́.

Ми́лованием соверше́нным украша́емь, о́тче, ни́щим дово́лен был еси́/ и всем боля́щим здра́вие позна́лся еси́, воспева́ющим хода́тай:/ оте́ц на́ших Бо́же, благослове́н еси́.

Стужа́ющия боля́щих зря му́хи, о́тче, отгна́л еси́,/ ника́коже приступи́ти к ним повеле́л еси́, поя́, Ака́кие:/ оте́ц на́ших Бо́же, благослове́н еси́.

Грозд, я́коже изгне́т, смы́сла нам вино́ раствори́л еси́,/ веселя́щее сердца́ ра́зумы вели́кими, и вопи́ти повелева́я:/ оте́ц на́ших Бо́же, благослове́н еси́.

Богоро́дичен: Я́ко вину́ Тя вси на́шего спасе́ния, Богоблагода́тная,/ пое́м всегда́, раби́ Твои́, и ве́рою ублажа́ем, глаго́люще:/ оте́ц на́ших Бо́же, благослове́н еси́.

Песнь 8

Ирмо́с: Тебе́, Вседе́телю,/ в пещи́ о́троцы, всеми́рный лик спле́тше, поя́ху:/ дела́ вся́кая, Го́спода по́йте/ и превозноси́те во вся ве́ки.

Угль мы́сленный, Симео́не, показу́емь огню́ не послужи́л еси́, преблаже́нне,/ вещь же го́рьку многобо́жия попали́в,/ к незаходи́мому сия́нию, преподо́бне, преста́вился еси́.

Исцели́ на́ша не́мощи, му́чениче, мрак отжени́ серде́ц на́ших/ и ве́чныя жи́зни покажи́ прича́стники/ твои́ми ко Влады́це всех хода́тайствы.

Во́инство че́стно, собо́р Бо́жий му́ченик воспое́м, сточи́сленное,/ и́мже нача́льник бя́ше Симео́н до́блий,/ я́ко па́стырь и вели́к Це́ркве столп.

Богоро́дичен: Да честно́е Твое́ прояви́т рождество́ купина́,/ неопали́ма ви́дена бысть, Пречи́стая:/ Огнь бо Боже́ственный во утро́бе прие́мши, ника́коже опали́лася еси́./ Те́мже Тя пое́м.

Ин

Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

С Вы́шними ликостоя́нии, со святы́ми все́ми Пресвята́го Го́спода/ освяти́ти и спасти́ нас, о́тче, моли́.

Восклица́ние жа́бам, молву́ творя́щим,/ ти́хим твои́м сло́вом запрети́л еси́ не веща́ти,/ но пребы́ти немы́м, Ака́кие, показа́л еси́.

На буесло́вяща написа́в Несто́рия словеса́,/ я́коже ка́мение честно́е,/ Це́рковь утверди́л еси́ на ка́мени, блаже́нне, непоро́чныя ве́ры.

Тро́ичен: Возопие́м ве́рою Тро́ице с Вы́шними чи́нми:/ Свят, Свят, Свят Оте́ц, и Сын, и Дух Святы́й.

Богоро́дичен: Исто́чник су́щи, Отрокови́це, нетле́ния,/ истле́вша мя мно́гими греха́ потопле́ньми Твоего́ исцеле́ния сподо́би.

Песнь 9

Ирмо́с: Иса́ие, лику́й, Де́ва име́ во чре́ве/ и роди́ Сы́на Емману́ила,/ Бо́га же и Челове́ка, Восто́к И́мя Ему́./ Его́же велича́юще, Де́ву ублажа́ем.

Я́ко прия́тно кади́ло, прине́слся еси́ всех Царю́,/ я́ко заколе́ние свяще́нно, я́ко предобра́ же́ртва прия́тная,/ я́ко ми́ро, я́ко приноше́ния, я́ко ши́пок благово́нен, святи́телю досточу́дне.

Утвержде́ние быв, святи́телю, всем ве́рным,/ поже́рлся еси́, я́коже ове́н, и к мы́сленным преста́вился еси́ ца́рством/ и Царю́ всех и Бо́гу, блаже́нне, предстои́ши,/ Боже́ственною сла́вою облиста́емь.

Свята́я па́мять твоя́, я́коже вели́кое со́лнце,/ нам возсия́, Симео́не, днесь, му́дре, и и́же с тобо́ю му́ченик,/ с ни́миже нам проси́ от Христа́ благода́ти, и ми́лости,/ и согреше́ний избавле́ния.

Богоро́дичен: Све́тлыми сия́ньми, Пречи́стая Ма́ти Бо́жия, озари́ мой ум,/ тьмо́ю лю́таго неразу́мия одержи́мый,/ я́ко да, улучи́в Боже́ственное просвеще́ние,/ вели́чия Твоя́ возвещу́, Присноде́во.

Ин

Ирмо́с: Уста́вы прешла́ еси́ естества́,/ Соде́теля заче́нши и Го́спода,/ и дверь спасе́ния ми́ров и была́ еси́./ Тем Тя, Богоро́дице,/ непреста́нно велича́ем.

Кре́пкою твое́ю моли́твою, о́тче, Небеса́ затворе́на отве́рзл еси́/ и ка́мень пресла́вно истека́ти прину́дил еси́/ в сла́ву Спа́са, тя просла́вльшаго, Ака́кие.

Я́ко вели́ко облиста́л еси́ со́лнце от Мелити́ны заре́ю слове́с твои́х,/ и чуде́с сия́ние пуща́я, Ака́кие,/ и вся озаря́я, благоче́стно тя ублажа́ющия.

Прему́дростию слове́с украша́емь,/ и сия́нии мно́гих исцеле́ний, Ака́кие, и святи́тельства сия́я добро́тами,/ преше́л еси́ от мирски́х к преми́рному наслажде́нию.

Боже́ственная па́мять твоя́ днесь поднебе́сныя созыва́ет/ воспе́ти твоя́ боле́зни, и по́двиги, и исправле́ния, Ака́кие преблаже́нне,/ просвети́телю серде́ц на́ших.

Богоро́дичен: Све́та кра́снаго жили́ще яви́лася еси́ вои́стинну,/ вся́ческая просве́щшаго, Всепе́тая Де́во,/ те́мже мя просвети́, зло́бою помрачи́вшагося,/ я́ко да ве́рою велича́ю Тя.

(слу́жбу зри 30 а́вгуста)

Тропа́рь, глас 4:

От ю́ности, Богому́дре, жела́нием духо́вным в пусты́ню всели́вся,/ еди́наго Христа́ возжела́л еси́ усе́рдно стопа́м в след ходи́ти,/ те́мже и а́нгельстии чи́ни зря́ще тя, удиви́шася,/ ка́ко с пло́тию к неви́димым ко́знем подвиза́вся, прему́дре,/ победи́л еси́ полки́ страсте́й воздержа́нием/ и яви́лся еси́ равноа́нгелен на земли́,/ Алекса́ндре преподо́бне,/ моли́ Христа́ Бо́га,/ да спасе́т ду́ши на́ша.

Конда́к, глас 8:

Я́ко многосве́тлая звезда́ днесь в страна́х русских возсия́л еси́, о́тче,/ всели́вся в пусты́ню, Христо́вым стопа́м после́довати усе́рдно возжеле́л еси́/ и, Того́ свято́е и́го на ра́мо твое́ взем – честны́й крест,/ умертви́л еси́ труды́ по́двиг твои́х теле́сныя взыгра́ния,/ те́мже вопие́м ти:/ спаси́ ста́до твое́, е́же собра́л еси́, му́дре, да зове́м ти:/ ра́дуйся преподо́бне Алекса́ндре, о́тче наш.