НА МА́ЛОЙ ВЕЧЕ́РНИ
На Го́споди воззва́х: стихи́ры, глас 1.
Подо́бен: О, ди́вное чу́до:
О, ди́вное чу́до!/ Просвеще́нный свы́ше,/ в Бо́лгарстей стране́/ явля́ется христолюби́вый Авраа́мий,/ про́поведию о Христе́/ побежда́ет и посрамля́ет злове́рныя,/ претерпе́в же от них мно́гия му́ки,/ коне́чне мече́м во главу́ усека́ется,/ и, та́ко сочета́вся Христу́,/ мо́лит спасти́ся/ душа́м на́шим.
О, ве́лие дарова́ние гра́ду Влади́миру!/ а́ки бога́тство Небе́сное/ принесо́шася в о́нь из страны́ Бо́лгарския/ нетле́нныя мо́щи свята́го му́ченика Авраа́мия/ на облегче́ние вся́ких скорбе́й/ и исцеле́ние боле́зней,/ на отгна́ние мглы страсте́й,/ кому́ждо в приключи́вшихся печа́лех на утеше́ние/ и всем нам во извеще́ние,/ я́ко ты, чудотво́рче,/ на Небеси́ мо́лиши Христа́ Бо́га/ спасти́ся душа́м на́шим.
О, неизрече́нная прему́дрость Бо́жия!/ И́хже предуста́ви Бог, тех и призва́;/ и́хже призва́, сих и оправда́;/ а и́хже оправда́, сих и просла́ви;/ на тебе́, му́чениче, сбы́сться сие́ сло́во апо́стола./ Ви́дя Госпо́дь, я́ко избра́н еси́ сосу́д/ и Сы́на Бо́жия Христа́ пропове́дал еси́,/ претерпе́в за Него́ му́ки,/ сотвори́ тя сла́вна чудесы́,/ я́же показу́еши всем, чту́щим любо́вию святу́ю па́мять твою́./ Те́мже моли́ся, страстоте́рпче,/ спасти́ся душа́м на́шим.
Сла́ва, глас то́йже:
Ны́не наста́ па́мять му́ченика Авраа́мия:/ сего́ ра́ди, ве́рнии, соше́дшеся,/ с ве́рою и любо́вию восхва́лим его́ пе́сньми и возопие́м ему́:/ ра́дуйся, всем страстоте́рпцем соприча́стниче/ и испове́дниче Христо́в Авраа́мие,/ я́ко вене́ц нетле́нный прия́л еси́ на версе́ твое́м, всече́стне./ Ра́дуйся, я́ко ны́не водворя́ешися с му́ченическими ли́ки,/ Све́та невече́рняго сподобля́емь./ Ра́дуйся, я́ко Тро́ице предстои́ши со А́нгелы,/ Ю́же непреста́нно моли́/ спасти́ся душа́м на́шим.
И ны́не, Богоро́дичен, глас то́йже:
Небе́сных чино́в ра́дование,/ на земли́ челове́ков кре́пкое предста́тельство,/ Пречи́стая Де́во, спаси́ ны,/ и́же к Тебе́ прибега́ющим:/ я́ко на Тя упова́ние по Бо́зе, Богоро́дице, возложи́хом.
На стихо́вне стихи́ры, глас 2:
Дом пра́выя ве́ры был еси́, му́чениче Авраа́мие,/ е́юже испове́дав Христа́ и мучи́телей посрами́в,/ вене́ц нетле́нный прия́л еси́ на Небеси́,/ иде́же моли́, му́чениче,/ дарова́ти душа́м на́шим ве́лию ми́лость.
Стих: Возвесели́тся пра́ведник о Го́споде/ и упова́ет на Него́.
Дом му́жества и кре́пости яви́лся еси́,/ страда́льче и му́чениче Авраа́мие!/ И́стинную ве́ру пред враги́ пропове́дал еси́,/ угаси́в злове́рие излия́нием кро́ве твое́й,/ ника́коже во уме́ твое́м мы́сля отрещи́ся Христа́ Бо́га,/ Ему́же моли́ся/ дарова́ти душа́м на́шим ве́лию ми́лость.
Стих: Насажде́ни в дому́ Госпо́дни,/ во дво́рех до́му Бо́га на́шего процвету́т.
Дом тве́рдаго испове́дания Христо́вы ве́ры/ яви́лся еси́, страстоте́рпче Авраа́мие,/ многообра́зная муче́ния претерпе́л еси́,/ желе́зом уязвля́емь, огне́м распаля́емь и мече́м скончава́емь,/ непрекло́нен пребы́л еси́ во испове́дании Христа́ Бо́га,/ Его́же моли́/ дарова́ти душа́м на́шим ве́лию ми́лость.
Сла́ва, глас 6:
Дне́сь све́тло пра́зднуем свяще́нную па́мять/ му́ченика и чудотво́рца Авраа́мия,/ пропове́дав бо Христа́,/ прия́т от мучи́телей сме́рть непови́нную/ и ны́не водворя́ется с ли́ки му́чеников,/ поя́ и славосло́вя Го́спода,/ Его́же мо́лит дарова́ти душа́м на́шим ве́лию ми́лость.
И ны́не, Богоро́дичен, глас то́йже:
Богоро́дице, Ты еси́ лоза́ и́стинная,/ возрасти́вшая нам Плод живота́./ Тебе́ мо́лимся, моли́ся, Влады́чице,/ со Авраа́мием му́чеником и со все́ми святы́ми,/ поми́ловати ду́ши на́ша.
Тропа́рь пи́сан на вели́цей вече́рни.
НА ВЕЛИ́ЦЕЙ ВЕЧЕ́РНИ
На Го́споди воззва́х: стихи́ры, глас 2.
Подо́бен: Ки́ими похва́льными:
Ки́ими духо́вными пе́сньми/ восхва́лим му́ченика и чудотво́рца Авраа́мия,/ всем ве́рным те́плаго засту́пника,/ земли́ Русстей удобре́ние/ и ве́рою лобыза́ющим честны́е мо́щи его́ – тве́рдое огражде́ние,/ его́же ра́ди моли́тв Христо́с Бог/ да́рует нам ве́лию ми́лость.
Ки́ими благогове́йными усты́/ воспои́м Авраа́мия, Христо́ва страстоте́рпца,/ тече́ние соверши́вша благоче́стно,/ моли́твами свои́ми устроя́юща вся блага́я душа́м и телесе́м на́шим/ от Вседержи́тельныя руки́ Христа́ Бо́га,/ име́ющаго мно́жество щедро́т и ве́лию ми́лость.
Ки́ими похва́льными венцы́/ почти́м пресла́внаго страстоте́рпца Авраа́мия,/ предстои́т бо Престо́лу Влады́ки Христа́ Бо́га на́шего,/ ве́лию благода́ть от Него́ прие́м,/ всем притека́ющим с ве́рою то́чит цельбы́ от моще́й свои́х/ и умоля́ет Христа́ Бо́га/ дарова́ти всем мир и ве́лию ми́лость.
Сла́ва, глас 8:
Прииди́те, благове́рнии лю́дие,/ восхва́лим вели́каго страстоте́рпца и чудотво́рца Авраа́мия,/ и́же пострада́ Христа́ ра́ди/ и живо́т свой за Него́ положи́,/ и ны́не пребыва́ет у Него́ в Го́рних селе́ниих,/ и пра́ведною свое́ю душе́ю, я́ко со́лнце, сия́ет,/ на земли́ же чудесы́ свои́ми,/ а́ки луча́ми све́та, всех осиява́ет:/ честны́я бо его́ мо́щи,/ а́ки многоцеле́бный исто́чник,/ подаю́т всем, с ве́рою притека́ющим, благода́ть и исцеле́ние./ Те́мже мо́лим его́ испроси́ти нам у Христа́ Бо́га/ спасе́ние и ве́лию ми́лость.
И ны́не, Богоро́дичен.
Вход. Проки́мен дне. И чте́ния.
Проро́чества Иса́иина чте́ние (глава́ 43):
Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́, я́же от нача́ла, кто слы́шана сотвори́т вам?/ Да приведу́т свиде́тели своя́ и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель,– глаго́лет Госпо́дь Бог,–/ и о́трок Мой, Его́же избра́х./ Да позна́ете и ве́руете Ми, и уразуме́ете, я́ко Аз е́смь;/ пре́жде Мене́ не бы́сть ин бог и по Мне не бу́дет./ Аз е́смь Бог, и не́сть, ра́зве Мене́, спаса́яй./ Аз возвести́х и спасо́х, уничижи́х и не бе в вас чужди́й./ Вы Мне свиде́тели, и Аз Госпо́дь Бог./ И еще́ от нача́ла Аз е́смь,/ и не́сть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зами бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их,/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т:/ су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющийся На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и, бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же е́сть му́дрость челове́ком/ и во́зраст ста́рости – житие́ нескве́рно./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́,/ или́ ле́сть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 3:
Прииди́те, мучениколю́бцы вси,/ пе́сньми и псалмы́ духо́вными/ возблагодари́м Христа́ Бо́га на́шего,/ дарова́вшаго нам му́ченика и чудотво́рца Авраа́мия,/ и́же с весе́лием претерпе́ ка́зни лю́тых мучи́телей/ за Христа́ Бо́га на́шего,/ от Него́же по́двигов по́честь прия́,/ и ны́не в ве́чных селе́ниих с ли́ки му́ченик/ про́сит очище́ния душа́м на́шим/ и ве́лия ми́лости.
Прииди́те, правове́рнии,/ до́бляго му́ченика Авраа́мия/ свяще́нное торжество́ соверши́м дне́сь:/ любве́ бо ра́ди Христо́вы/ кра́сная ми́ра сего́ вся презре́/ и вда́ся мучи́телем на муче́ние, не убоя́вся мук,/ и на Небеса́ восте́кл взира́ти/ добро́ту неизрече́нную Спа́са на́шего,/ Его́же про́сит поми́ловатися душа́м на́шим.
Прииди́те вси, возра́дуемся дне́сь Го́сподеви/ в па́мять страстоте́рпца Авраа́мия:/ егда́ бо пренесе́ние честны́х его́ моще́й бя́ше в град Влади́мир,/ тогда́ вели́кий кня́зь Гео́ргий со кня́зи и святи́тели/ срето́ша их с ве́лиею ра́достию,/ лю́дие же, зря́ще многострада́льное и нетле́нное твое́ те́ло,/ со слеза́ми вопия́ху:/ о страстоте́рпче! ко́е благохвале́ние/ честно́му твоему́ пренесе́нию сотвори́м?/ Недоуме́ем и удивля́емся твоему́ милосе́рдию,/ е́же на нас показа́л еси́;/ страстоте́рпче у́бо Авраа́мие,/ сохрани́ моли́твами твои́ми и вся,/ сла́вящия святы́я по́двиги твоя́,/ и пребу́ди вы́ну моли́твенником/ о спасе́нии душ на́ших.
Сла́ва, глас 5:
Дне́сь красу́ется град Влади́мир/ Боже́ственным сокро́вищем моще́й твои́х,/ оби́тель твоя́, ликовству́ющи, ра́дуется,/ и правосла́внии твои́ми чудесы́, му́чениче Авраа́мие, хва́лятся,/ ты же моли́ Христа́ Бо́га на́шего/ дарова́ти нам ве́лию ми́лость.
И ны́не, Богоро́дичен.
На стихо́вне стихи́ры, глас 8:
Помина́им, бра́тие,/ страстоте́рпца Христо́ва Авраа́мия/ и подража́им тве́рдой ве́ре его́,/ многострада́льное его́ те́ло/ обле́кшей в нетле́ние,/ преднапису́ющи о́браз о́бщаго воскресе́ния.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Ве́лие Бо́жие дарова́ние тебе́,/ му́ченице Авраа́мие,/ всю бо кре́пость мучи́телей победи́л еси́,/ и прия́л еси́ нетле́нный вене́ц от руки́ Вседержи́теля,/ на земли́ сия́вши мно́гими чудесы́,/ на Небеси́ предстои́ши Царю́ и Влады́це/ и мо́лиши Его́ всем нам дарова́ти/ мир и ве́лию ми́лость.
Стих: Храни́т Госпо́дь вся ко́сти их,/ и ни еди́на от них сокруши́тся.
Притеце́м, бра́тие,/ к ра́це моще́й страстоте́рпца Авраа́мия/ и подиви́мся, ка́ко храни́т Госпо́дь/ вся ко́сти избра́нных Свои́х/ и ни еди́на от них сокруши́тся./ Те́мже у́бо ве́рою и любо́вию/ просла́вим Христа́ Бо́га,/ подаю́щаго нам мир и ве́лию ми́лость.
Сла́ва, глас 6:
Сра́дуйтеся нам, Русстии собо́ри, дне́сь/ в све́тлой па́мяти страстоте́рпца Авраа́мия,/ подаю́щаго от нетле́ннаго сокро́вища моще́й свои́х/ благоуха́ние Свята́го Ду́ха./ Те́мже у́бо соше́дшеся, о́бщий лик тому́ соста́вим,/ пе́сньми Боже́ственными зову́ще:/ помина́й ны, му́чениче,/ и за ны Христу́ моли́ся,/ дарова́ти нам ми́лость в Де́нь су́дный.
И ны́не, Богоро́дичен: Творе́ц и Изба́витель:
Тропа́рь, глас 4:
Дне́сь, благове́рнии лю́дие, соше́дшеся,/ восхва́лим до́бляго сего́ му́ченика и страда́льца Авраа́мия,/ сей бо, укрепля́емь си́лою Бо́жию,/ ду́шу свою́ положи́ за Христа́,/ мно́го пострада́в от злове́рных болга́р./ Сего́ ра́ди от Го́спода вене́ц прия́т/ и ны́не предстои́т Ему́/ и мо́лится о гра́де сем/ и о всех нас, чту́щих па́мять его́.
Сла́ва, и ны́не, Богоро́дичен.
НА У́ТРЕНИ
На Бог Госпо́дь: тропа́рь свята́го два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Све́тлый и всепра́зднственный твой де́нь, му́чениче Авраа́мие,/ созыва́ет нас духо́вно пра́здновати,/ и честны́я мо́щи твоя́ усе́рдно почита́ти,/ и сла́вити еди́наго Бо́га в Тро́ице./ Те́мже псало́мски вопие́м ти:/ возвесели́тся пра́ведник о Го́споде и упова́ет на Него́.
Сла́ва, и ны́не, Богоро́дичен:
Упова́ние христиа́н, Пресвята́я Де́во,/ Его́же родила́ еси́ Бо́га па́че ума́ и сло́ва,/ непреста́нно моли́ с вы́шними си́лами/ да́ти оставле́ние грехо́в на́ших, исправле́ние жития́/ ве́рою и любо́вию при́сно сла́вящих Тя.
По 2-м стихосло́вии седа́лен, глас 4:
Кро́вь твою́, я́ко алава́стр ми́ра,/ Христо́ви прине́сл еси́, му́чениче Авраа́мие./ Те́мже преблаги́й и вели́кий Дарова́тель Бог/ просла́ви тя и возвы́си чудесы́ Свои́ми бога́тыми,/ сего́ ра́ди па́мять твою́ с ве́рою почита́ем, досточу́дне.
Сла́ва, и ны́не, Богоро́дичен:
Де́во Всенепоро́чная, Всеще́драго Бо́га ро́ждшая,/ Того́ моли́ непреста́нно оставле́ние согреше́ний на́ших дарова́ти/ и пре́жде конца́ покая́ние/ ве́рою и любо́вию почита́ющим Тя, Всепе́тая.
По полиеле́и седа́лен, глас 8:
От младе́нчества душе́ю к Бо́гу прилепи́лся еси́, му́чениче Авраа́мие,/ сего́ ра́ди венце́м му́ченическим от Христа́ увязе́ся, Небе́сныя да́ры прие́млеши,/ и́миже подае́ши от всех неду́г здра́вие/ приходя́щим к тебе́ с ве́рою/ и любо́вию чту́щим святу́ю па́мять твою́.
Сла́ва, и ны́не, Богоро́дичен:
Я́ко Де́ву в жена́х, без се́мене ро́ждшую Бо́га пло́тию,/ вси блажи́м, ро́ди челове́честии,/ О́гнь бо всели́ся в Тя Боже́ственный,/ и я́ко Младе́нца дои́ши Зижди́теля и Го́спода./ Те́мже А́нгельстии собо́ри и челове́честии ро́ди досто́йно сла́вят пресвято́е рождество́ Твое́, и мы согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ воспева́ющим досто́йно па́мять Твою́.
Та́же степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние: Ева́нгелие от Матфе́я, зача́ло 36.
По 50-м псалме́, стихи́ра, глас 6:
Измла́да предъизбра́ тя Госпо́дь/ в Небе́сное селе́ние, му́чениче Авраа́мие,/ и от Вседержи́тельныя Его́ десни́цы/ нетле́нный вене́ц на версе́ твое́м положи́ся,/ и осия́н еси́ от Него́ Боже́ственным све́том,/ и вы́ну насыща́ешися от таковы́я ра́дости и весе́лия,/ и мо́лиши за вся лю́ди, живу́щия в Правосла́вии/ и честны́я твоя́ мо́щи ве́рно почита́ющия и вопию́щия:/ сла́ва Бо́гу, сотво́ршему ди́вная Своя́ чудеса́.
Кано́н, глас 4.
Пе́снь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.
Неисче́тне в ми́лости, Христе́ Спа́се ми́ра,/ вразуми́ нас, недосто́йных пра́зднственно соверши́ти па́мять страда́льца Твоего́./ Ты же, страстоте́рпче, пода́ждь нам ра́зум чист вся жите́йская презре́ти/ и еди́наго на потре́бу спасе́ния иска́ти.
Преве́чный Бог дарова́ тебе́ си́лу/ вра́жия возноше́ния сокруши́ти и вся му́ки претерпе́ти,/ ты же нам, гре́шным, пода́ждь ра́зум похва́льная тебе́ принести́/ и моли́ся за всех, тя восхваля́ющих.
Богому́дре страстоте́рпче Христо́в Авраа́мие,/ не возгнуша́йся нас, греха́ми оскверне́нных,/ и не отри́ни сего́ тебе́ от нас ма́лаго хвале́ния,/ но приими́ е и о всех, воспева́ющих тя, Го́споду моли́ся,/ да вси па́мять твою́, ра́дующеся, пра́зднуем.
Богоро́дичен: Яви́ милосе́рдие Твое́, Госпоже́ Пречи́стая, на ны недосто́йныя,/ я́ко к Тебе́ прибега́ем с пла́чем серде́чным и вопие́м:/ поми́луй нас, Еди́на всех гре́шных спасе́ние.
Пе́снь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.
Наста́ честна́я па́мять твоя́, страстоте́рпче Авраа́мие,/ в ней же, лику́юще, воспева́ем тя и лобыза́ем честны́я мо́щи твоя́,/ вся́ких дарова́ний духо́вных нас сподобля́ющия.
От честны́х моще́й твои́х мно́гое исцеле́ние источа́еши, му́чениче,/ и град, в не́мже храни́тся нетле́нное те́ло твое́,/ от вся́ких бед покрыва́еши,/ сего́ ра́ди любо́вию па́мять твою́, страстоте́рпче, пра́зднуем.
Несу́щий мо́щи твоя́ от Бо́лгарския страны́ во град Влади́мир/ не зна́яху тяготы́ ни но́щию, ни днем./ Мы же ны́не, точи́ло о́крест ра́ки твое́й стоя́ще, мо́лим тя:/ сохраня́й чту́щия па́мять твою́ от вся́ких бед.
Богоро́дичен: Су́ще во гресе́х мно́зех, к Тебе́ вопие́м, Всепречи́стая:/ очи́сти ны Твои́м милосе́рдием, да не поги́бнем до конца́,/ Ты бо всех скверн Очисти́теля родила́ еси́.
Ин конда́к, глас 3:
Укрепи́вся, сла́вне, любо́вию Госпо́днею/ и Того́ честны́й Крест на ра́мо взем, и́го Госпо́дне,/ посрами́л еси́ диа́воля кова́рствия/ и пострада́л еси́ да́же до сме́рти,/ и сего́ ра́ди, досточу́дне, яви́ся страда́лец вели́к, Авраа́мие,/ и ору́жником храбротаи́нник/ и уча́стник Бо́жия благода́ти.
Седа́лен, глас 4:
Дне́сь све́тло пра́зднуется па́мять твоя́, му́чениче Авраа́мие:/ возбужда́еши бо всех к весе́лию чудесы́ твои́ми/ и непреста́нными о нас к Бо́гу моли́твами.
Пе́снь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Христо́во благоуха́ние яви́лся еси́, му́чениче,/ в спаса́емых тобо́ю от неду́гов душе́вных же и теле́сных,/ те́мже вси правове́рнии сла́вят Го́спода,/ Его́же ра́ди от злове́рных болга́р пострада́л еси́.
Мо́щи твоя́, му́чениче,/ утвержда́ют обита́телей страны́ сея́ в ве́ре и благоче́стии;/ те́мже и мы с любо́вию вопие́м ти:/ ра́дуйся, страстоте́рпче и чудотво́рче Авраа́мие.
Покрови́теля жи́зни на́шей и моли́твенника к Бо́гу/ почита́ем тя, страстоте́рпче Авраа́мие:/ на стезю́ нас покая́ния напра́ви,/ му́чеников соприча́стниче, А́нгелов сограждани́не пресла́вне.
Богоро́дичен: Ка́ко присту́пим к Тебе́, Херуви́м и Серафи́м честне́йшей,/ и ка́ко воззри́м на Тя, обремене́ннии грехи́ мно́гими?/ Но, о Пречи́стая Влады́чице,/ Сама́ очи́сти ны и ве́чныя му́ки изба́ви.
Пе́снь 5
Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
По пренесе́нии святы́х моще́й твои́х во град Влади́мир, му́чениче Авраа́мие,/ вели́кий кня́зь Гео́ргий с подру́жием свои́м и ча́ды и вси обита́тели гра́да/ па́мять твою́ усе́рдно всегда́ творя́ху,/ зна́юще тя на Небесе́х Христу́ предстоя́ща/ и непреста́нно покрыва́юща почита́ющих тя,/ и́хже и ны́не сохраня́й от всех бед.
Пла́мень угаси́ на́ших плотски́х обурева́ний и нечи́стых на́ших помышле́ний,/ да пла́мене гее́нскаго огня́ твои́ми моли́твами, Авраа́мие, изба́вимся.
Ду́шу и помышле́ние к тебе́ простира́ем, страстоте́рпче Авраа́мие:/ согре́й на́ше се́рдце любо́вию, я́же к Бо́гу,/ да зако́ну Его́ усе́рдно после́дующе,/ пре́йдем по́прище на́шего жития́ непреткнове́нно.
Богоро́дичен: Бо́га родила́ еси́ Ты, Пречи́стая, восхоте́вшаго спасти́ гре́шники,/ к Нему́же и́маши всегда́ мно́гое дерзнове́ние, я́ко Ма́ти:/ моли́ся о нас Ему́,/ любо́вию воспева́ющих Тя, Влады́чице.
Пе́снь 6
Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.
Ви́дя тя иско́нный враг, мно́гия доброде́тели на земли́ творя́ща,/ злове́рных болга́р подви́же на тя,/ да приобщи́шися скве́рней ве́ре их,/ ты же кро́вию запечатле́л еси́ пра́вую ве́ру твою́/ и си́це Небе́сное Ца́рствие восприя́л еси́.
Пречестно́е те́ло твое́, страстоте́рпче Авраа́мие,/ обогаща́ет всех не земны́м и тле́нным бога́тством, но Небе́сным,/ его́же кро́вию дости́гл еси́,/ те́мже и нас получи́ти то сподо́би, любо́вию воспева́ющих тя.
Омы́вся кро́вию, я́ко водо́ю,/ и всех мучи́телей ужаси́в кре́пким твои́м за Христа́ страда́нием,/ ны́не на Небеси́ лику́еши/ и та́мо за всех ве́рных неусы́пно мо́лишися,/ да тве́рдо содержа́т Правосла́вную ве́ру.
Богоро́дичен: Соблюди́ христиа́нское жи́тельство, Богоро́дице,/ гре́шных к покая́нию обрати́,/ чи́сты вся поста́ви пред Сы́ном Твои́м, Пренепоро́чная Де́во,/ и сподо́би нас моли́твами Твои́ми Небе́снаго Ца́рствия.
Конда́к, глас 8:
Я́ко многоце́нное сокро́вище,/ принесено́ бы́сть от Бо́лгарския страны́ во град Влади́мир/ пречестно́е те́ло твое́, му́чениче Авраа́мие,/ и́мже подае́ши всем чту́щим пресла́вную па́мять твою́ оби́лие исцеле́ний,/ предстоя́ на Небеси́ Христу́ Бо́гу/ и моля́ Его́ о спасе́нии душ на́ших.
И́кос:
Я́ко пресве́тлая звезда́, в Бо́лгарстей земли́ возсия́л еси́/ благи́ми твои́ми дея́нии и апо́стольскою про́поведию, страстоте́рпче Авраа́мие,/ и та́мо же му́чен был еси́ за Христа́./ Ны́не же чудесы́, я́ко све́тлыми луча́ми, сия́вши,/ боля́щим исцеле́ние подае́ши, здра́вствующим же ра́дование и весе́лие./ Те́мже дне́сь соше́дшеся, ве́рно зове́м ти:/ ра́дуйся, избра́нниче Госпо́день,/ всея́ Русския земли́ засту́пниче и всем Христиа́ном помо́щниче.
Пе́снь 7
Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Вся на́ша земля́ возра́довася,/ зря́щи тя, от всех ве́рных срета́ема/ и благода́рными гла́сы, а́ки мусики́йскими труба́ми, восхваля́ема,/ и дне́сь ра́дуется, с на́ми лику́ющи и па́мять твою́ прославля́ющи.
Кре́пость и исцеле́ние приима́ху от Тебе́, му́чениче Авраа́мие, немощству́ющии пло́тию,/ ско́рбнии же ду́хом и удруче́ннии печа́льми жите́йскими/ обрета́ху душе́вное утеше́ние в умиле́нием призыва́нии свята́го и́мене твоего́,/ прославля́юще ди́внаго во святы́х Свои́х Христа́ Бо́га на́шего.
Весели́ся, Богоспаса́емый гра́де Влади́мире,/ и наслажда́йтеся, вси ве́рнии, Христо́ва благоуха́ния/ от святы́х моще́й страстоте́рпца Авраа́мия,/ я́же не то́кмо теле́сныя боле́зни исцелева́ют,/ но и душе́вныя стра́сти вся врачу́ют.
Богоро́дичен: Ум наш плени́ в послуша́ние ве́ры,/ дух и ду́шу всесоверше́нны соблюди́/ и те́ло в прише́ствие Го́спода на́шего Иису́са Христа́ непоро́чно сохрани́/ моли́твами Твои́ми, Богороди́тельнице.
Пе́снь 8
Ирмо́с: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Си́лою Бо́жиего укрепля́емь, отрази́л еси́ сове́ты беззако́нных,/ и́же ру́це твоя́ и но́зе неща́дно отсека́ху./ Те́мже и главу́ прекло́нь под меч, вопия́л еси́:/ благослови́те, вся дела́ Госпо́дня, Го́спода.
Устраши́ти тя не возмого́ша неве́рнии,/ ниже́ поколеба́ти тве́рдаго ума́ твоего́ отреще́ся Христа́,/ я́ко адама́нт, пребы́л еси́ кре́постию ве́ры твое́й, поя́ непреста́нно:/ благослови́те, вся дела́ Госпо́дня, Го́спода.
Прииди́те, вси правове́рнии,/ воспросла́вим па́мять страстоте́рпца Авраа́мия/ и облобыза́ем с ве́рою честны́я мо́щи его́,/ источа́ющия цельбы́ неду́гов душе́вных вку́пе и теле́сных всем воспева́ющим:/ благослови́те, вся дела́ Госпо́дня, Го́спода.
Богоро́дичен: Победи́, Пречи́стая, врага́ ви́димыя и неви́димыя,/ низложи́ти нас тща́щихся,/ и страсте́й нас вся́ких изба́ви, да пое́м торже́ственне:/ благослови́те, вся дела́ Госпо́дня, Го́спода.
Пе́снь 9
Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Ве́лия сла́ва ты еси́ на́ша и похвала́,/ страстоте́рпче Христо́в Авраа́мие:/ вели́ку бо ве́ру во Христа́ Иису́са име́я,/ второ́е крести́лся еси́ в Него́ кро́вию твое́ю/ и дости́гл еси́ Небе́снаго жития́,/ его́же улучи́ти сподо́би и нас моли́твами твои́ми.
Псалмы́ и пе́сньми восхваля́ем тя, му́чениче,/ озаря́еши бо нас всегда́ чудесы́ твои́ми,/ и́хже кто дово́лен исчести́, ра́зве Да́вый тебе́ сия́?/ Ему́же моли́ся, да спасе́т вся лю́ди,/ с ве́рою и любо́вию соверша́ющия святу́ю па́мять твою́.
Вои́стинну никто́же, притека́яй к тебе́, му́чениче Христо́в Авраа́мие,/ то́щь благода́ти твоея́ отхо́дит,/ ея́же и нас испо́лни, мо́лимся.
Богоро́дичен: Вои́стинну и́стиннаго Бо́га пло́тию, Богоро́дице, родила́ еси́,/ Его́же ми́лостива нам в де́нь Суда́ соде́лай,/ да безконе́чно с Ним Тя велича́ем.
Свети́лен:
Све́та немерца́ющаго дости́гл еси́, му́чениче Авраа́мие,/ за кре́пкое твое́ страда́ние Христо́вы ра́ди ве́ры от злове́рных,/ и ны́не, пребыва́я во Ца́рствии Небе́снем,/ ра́дуешися и весели́шися со все́ми му́ченическими ли́ки./ Моли́ о нас, чту́щих святу́ю па́мять твою́.
Сла́ва, и ны́не, Богоро́дичен:
Свет нам возсия́ пресве́тлый от Твоея́ де́вственныя утро́бы,/ Христо́с Бог наш, Пречи́стая Влады́чице,/ те́мже Тя мо́лим, Цари́цу и Богоро́дицу:/ моли́ Сы́на Твоего́ и Бо́га на́шего,/ да, прости́в нам согреше́ния на́ша,/ спасе́т нас, я́ко Благ и Человеколю́бец.
На хвали́тех стихи́ры, глас 1:
Весели́ся и торжеству́й, гра́де Влади́мире,/ име́я в себе́ мо́щи му́ченика и чудотво́рца Авраа́мия,/ и́же дне́сь предстои́т Невече́рнему Све́ту,/ зрит неизрече́нную Его́ добро́ту/ и при́сно мо́лит/ дарова́ти душа́м на́шим мир и ве́лию ми́лость.
Красу́йся и лику́й, оби́тель Бо́жия Ма́тере,/ торжеству́йте, вси правове́рнии,/ зря́ще честны́я мо́щи му́ченика и чудотво́рца Авраа́мия,/ источа́ющия исцеле́ния всем,/ притека́ющим к ним с ве́рою и воспева́ющим Христа́,/ подаю́щаго всем мир и ве́лию ми́лость.
Ра́дуются чи́ни а́нгельстии и святы́х ли́ки/ и веселя́тся зря́ще пра́ведную ду́шу, возноси́му на Не́бо,/ и преставля́ему к Боже́ственному Престо́лу,/ и сочетава́ему с ли́ки му́чеников,/ с ни́миже и моли́ся Христу́/ дарова́ти душа́м на́шим мир и ве́лию ми́лость.
Сла́ва, глас 8:
Кто не воспое́т дне́сь торжество́/ свята́го му́ченика и чудотво́рца Авраа́мия,/ пра́выя ве́ры ревни́теля/ и злове́рныя посрами́теля:/ той бо, му́ченическою кро́вию вшед в све́тлый Христо́в черто́г,/ а́ки светлолу́чными заря́ми,/ просвеща́ет нас благотво́рными чудесы́ свои́ми/ и мо́лит Христа́ Бо́га о всех,/ ве́рою и любо́вию соверша́ющих па́мять страстоте́рпца.
И ны́не, Богоро́дичен, глас то́йже:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
На Литурги́и слу́жба му́ченическая.
Моли́тва
Святы́й му́чениче Авраа́мие, до́блий во́ине Христа́, Царя́ Небе́снаго, в ско́рбех и напа́стех пресла́вный наш помо́щниче и защи́тниче! Ничто́же возмо́же отлучи́ти тя от любве́ ко Го́споду Иису́су: ни ле́стная обеща́ния благ вре́менных, ни преще́ния, ни му́ки от злых враго́в святе́йшия Христо́вы ве́ры; ты, я́ко лев, изше́л еси́ на бра́нь проти́ву волко́в мы́сленных, духо́в зло́бы, подви́гших на тя, ра́ди до́браго твоего́ испове́дания, единоплеме́нный тебе́ наро́д болга́рский, и, я́ко о́гненная стрела́, тех порази́л еси́ си́лою благода́ти Свята́го Ду́ха и кре́пкия, я́ко сме́рть, любве́ твоея́ к Бо́гу. А́ще и пролия́л еси́ кро́вь твою́ за Христа́ Бо́га на́шего, погуби́в вре́менную жи́знь, оба́че безсме́ртною душе́ю, я́ко оре́л, воспари́л еси́ в Го́рния оби́тели Отца́ на́шего, насле́довав там ве́чную жи́знь, сла́ву и блаже́нство неизрече́нное, и оста́вив нам нетле́нныя оста́нки твоя́, я́ко крин многоце́нный и благоуха́нный. Ве́руем, страстоте́рпче святы́м, я́ко, предстоя́ со А́нгелы и все́ми святы́ми Престо́лу сла́вы Триипоста́снаго Бо́га, усе́рдныя и Богоприя́тныя возно́сиши моли́твы не то́кмо о нас и о гра́де на́шем, но и о всей святе́й Христо́вой Це́ркви и правосла́вием оте́честве Русстем. Ве́руем, пресла́вный чудотво́рче, я́ко ты, си́лою Всемогу́щаго Го́спода Иису́са Христа́, чрез святы́я мо́щи твоя́, источа́еши оби́льныя да́ры благода́тныя по́мощи во спасе́ние всем, с ве́рою к тебе́ притека́ющим, наипа́че же испра́шиваеши кончи́ну с покая́нием тебе́ чту́щим и благосе́рдно помога́вши немощны́м младе́нцем, да вси от ма́ла до вели́ка единоду́шно прославля́ем неисповеди́мое вели́чие бла́гости Бо́жией. Те́мже ве́рою и любо́вию ко святы́м моще́м твои́м припа́дающе и благогове́йно о́ныя лобыза́юще, умоля́ем тя, до́брый на Небеси́ наш моли́твенниче и засту́пниче: помога́й нам, гре́шным и смире́нным, твои́ми моли́твами во всех ско́рбех, ну́ждах и обстоя́ниих на́ших, сохраня́й нас и град сей от вся́каго зла и вся́кия напа́сти, наипа́че же споспешеству́й ве́чному спасе́нию на́шему и всех, прося́щих от Тебе́ по́мощи и заступле́ния. Ей, смире́нно мо́лим тя, уго́дниче Бо́жий: моли́ Христа́ Бо́га на́шего, да даст Он мир и тишину́ всем правосла́вным Христиа́ном и да отврати́т от нас вся́кий гнев, на ны дви́жимый, да изба́вит нас от сете́й вра́жиих, томле́ния во у́зах греха́ и муче́ний а́дских и да сподо́бит нас, недосто́йных, одесну́ю Себе́ ста́ти на Суде́ Свое́м пра́ведном и вни́ти в ве́чный поко́й святы́х Его́, иде́же пра́зднующих глас непреста́нный и неизрече́нная сла́дость зря́щих добро́ту лица́ Его́; и та́ко возмо́жем с тобо́ю и все́ми святы́ми безконе́чно прославля́ти Отца́, и Сы́на, и Свята́го Ду́ха, Тро́ицу Единосу́щную и Неразде́льную. Ами́нь.
