НА ВЕЧЕ́РНИ

Пое́м Блаже́н муж: 1-й антифо́н. На Го́споди, воззва́х: стихи́ры на 8, пра́здника 3 и апо́стола 5, глас 4.

Подо́бен: Я́ко до́бля:

Тро́стию благода́тною,/ из глубины́ су́етства/ челове́ки извле́кл еси́, досточу́дне,/ Учи́теля манове́нием/ повину́яся, Иа́кове,/ просве́щшаго по всему́ твою́ мысль/ и апо́стола и че́стна Богогла́сника/ тя, преблаже́нне, показа́вшаго/ Сего́ непостижи́маго Божества́.

Духо́вное сия́ние/ на тя сни́де в ви́де о́гненне/ и тя, блаже́нне, Боже́ственное прия́телище соде́ла,/ кре́пко отгоня́ща безбо́жия тьму/ и мир просвеща́юща/ све́тлостию прему́дрых твои́х слове́с,/ тайнопове́дателю, апо́столов ве́рше,/ Христо́в самови́дче Иа́кове.

Блиста́нии пропове́дания/ во тьме спя́щия неве́дения, сла́вне Иа́кове, просве́щ/ показа́л еси́ сы́ны/ ве́рою Влады́ки и Бо́га,/ Его́же стра́сти поревнова́л еси́ и сме́рти,/ и сла́вы был еси́ прича́стник,/ я́ко прему́др, и я́ко Богогла́сник,/ и я́ко учени́к и́стинен.

Сла́ва, глас 8:

Прииди́те, Небе́снаго та́инства пропове́дателя/ и сказа́теля Ева́нгелия/ псало́мскими пе́сньми Иа́кова вси восхва́лим:/ сей бо река́ яви́ся мы́сленнаго рая́,/ душе́вныя бразды́ Небе́сными ту́чами напая́я/ и плодоно́сны показу́я Христу́ Бо́гу,/ подаю́щему всем моли́твами его́/ очище́ние, и просвеще́ние, и ве́лию ми́лость.

И ны́не, пра́здника.

Вход. Проки́мен дне, и чте́ния 3.

Собо́рнаго Посла́ния Иа́ковля чте́ние (глава́ 1, стихи́ 1 – 12):

Иа́ков, Бо́гу и Го́споду Иису́су Христу́ раб,/ обемана́десяте коле́нома, и́же в разсе́янии, ра́доватися./ Вся́ку ра́дость име́йте, бра́тие моя́,/ егда́ во искуше́ния впа́даете разли́чна,/ ве́дяще, я́ко искуше́ние ва́шея ве́ры соде́ловает терпе́ние,/ терпе́ние же де́ло соверше́нно да и́мать,/ я́ко да бу́дете соверше́ни и всеце́ли, ни в чем же лише́ни./ А́ще же кто от вас лише́н есть прему́дрости,/ да про́сит от даю́щаго Бо́га всем нелицеприе́мне/ и не поноша́ющаго, и да́стся ему́./ Да про́сит же ве́рою, ничто́же сумня́ся:/ сумня́й бо ся уподо́бися волне́нию морско́му, / ве́тры возмета́ему и развева́ему./ Да не мнит бо челове́к он, я́ко прии́мет что от Бо́га./ Муж двоеду́шен, неустро́ен во всех путе́х свои́х./ Да хва́лится же брат смире́нный в высоте́ свое́й,/ бога́тый же во смире́нии свое́м,/ зане́, я́ко цвет травны́й, ми́мо и́дет./ Возсия́ бо со́лнце со зно́ем и изсуши́ траву́,/ и цвет ея́ отпаде́, и благоле́пие лица́ ея́ поги́бе:/ си́це бога́тый в хожде́нии свое́м увяда́ет./ Блаже́н муж, и́же претерпи́т искуше́ние,/ зане́, иску́сен быв, прии́мет вене́ц жи́зни,/ его́же обеща́ Бог лю́бящим Его́.

Собо́рнаго Посла́ния Иа́ковля чте́ние (глава́ 1, стихи́ 13 – 27):

Никто́же искуша́емь да глаго́лет,/ я́ко от Бо́га искуша́емь есть:/ Бог бо несть искуси́тель злым,/ не искуша́ет же Той никого́же,/ Ко́ждо же искуша́ется, от своея́ по́хоти влеко́мь и прельща́емь./ Та́же по́хоть, заче́нши, ражда́ет грех,/ грех же соде́ян ражда́ет смерть./ Не льсти́теся, бра́тия моя́ возлю́бленная:/ вся́ко дая́ние бла́го, и всяк дар соверше́н свы́ше есть,/ сходя́й от Отца́ све́тов,/ у Него́же несть премене́ния, или́ преложе́ния стень./ Восхоте́в бо, породи́ нас сло́вом и́стины,/ во е́же бы́ти нам нача́ток не́кий созда́нием Его́./ Те́мже, бра́тия моя́ возлю́бленная,/ да бу́дет всяк челове́к скор услы́шати/ и ко́сен глаго́лати, ко́сен во гнев./ Гнев бо му́жа пра́вды Бо́жия не соде́ловает./ Сего́ ра́ди отло́жше вся́ку скве́рну и избы́ток зло́бы,/ в кро́тости приими́те всажде́нное сло́во,/ могу́щее спасти́ ду́ши ва́ша./ Быва́йте же творцы́ сло́ва, а не то́чию слы́шатели,/ прельща́юще себе́ саме́х,/ Зане́ а́ще кто есть слы́шатель сло́ва, а не творе́ц,/ таковы́й уподо́бися му́жу, смотря́щу лице́ бытия́ своего́ в зерца́ле./ Усмотри́ бо себе́ и оты́де, / и а́бие забы́, како́в бе./ Прини́кий же в зако́н соверше́н свобо́ды и, пребы́в,/ сей не слы́шатель забы́тлив быв, но творе́ц де́ла,/ сей блаже́н в де́лании свое́м бу́дет./ А́ще кто мни́тся ве́рен бы́ти в вас/ и не обуздава́ет язы́ка своего́,/ но льстит се́рдце свое́,/ сего́ су́етна есть ве́ра./ Ве́ра бо чиста́ и нескве́рна пред Бо́гом и Отце́м сия́ есть,/ е́же посеща́ти си́рых и вдови́ц в ско́рбех их/ и нескве́рна себе́ блюсти́ от ми́ра.

Собо́рнаго Посла́ния Иа́ковля чте́ние (глава́ 2, стихи́ 1 – 13):

Бра́тие моя́, не на лица́ зря́ще,/ име́йте ве́ру Го́спода на́шего, Иису́са Христа́ сла́вы./ А́ще бо вни́дет в со́нмище ва́ше муж,/ злат пе́рстень нося́, в ри́зе све́тле,/ вни́дет же и нищ в ху́де оде́жде,/ и воззрите́ на нося́щаго ри́зу све́тлу и рече́те ему́:/ ты ся́ди зде до́бре./ И ни́щему рече́те:/ ты ста́ни та́мо или́ ся́ди зде, на подно́жии мое́м./ И не разсмотри́сте в себе́,/ и бы́сте судии́ помышле́ний злых./ Слы́шите, бра́тие моя́ возлю́бленная,/ не Бог ли избра́ ни́щия ми́ра сего́ бога́ты в ве́ре/ и насле́дники Ца́рствия, е́же обеща́ лю́бящим Его́?/ Вы же укори́сте ни́щаго./ Не бога́тии ли наси́луют вам,/ и ти́и влеку́т вы на суди́ща?/ Не ти́и ли ху́лят до́брое и́мя, нарече́нное на вас?/ А́ще у́бо зако́н соверша́ете ца́рский, по Писа́нию:/ возлю́биши и́скренняго своего́, я́коже себе́ сама́го,/ до́бре творите́./ А́ще ли на лица́ зрите́, то грех содева́ете,/ облича́еми от зако́на, я́коже престу́пницы./ И́же бо весь зако́н соблюде́т, согреши́т же во еди́ном,/ бысть всем пови́нен./ Реки́й бо: не прелюбы́ сотвори́ши,/ рекл есть: и не убие́ши,/ а́ще ли не прелюбы́ сотвори́ши, убие́ши нее,/ был еси́ престу́пник зако́на./ Та́ко глаго́лите и та́ко твори́те,/ я́ко зако́ном свобо́дным хотя́ще суд прия́ти./ Суд бо без ми́лости не сотво́ршему ми́лости,/ и хва́лится ми́лость на суде́.

На стихо́вне стихи́ры свята́го, глас 8.

Подо́бен: О, пресла́внаго чудесе́:

Блаже́нне Богови́дче Иа́кове,/ ты, Сло́ва глас а́бие восприе́м,/ о оте́ческом небре́гл еси́/ угожде́нии и любви́./ Оста́вль у́бо жития́ смуще́ние,/ в мы́сленное же преше́д мо́ре,/ сие́ возмути́л еси́/ благоче́стия уче́нии/ и заря́ми преми́рными твои́ми, Богоблаже́нне.

Стих: Во всю зе́млю изы́де веща́ние их/ и в концы́ вселе́нныя глаго́лы их.

Сло́ва самови́дче Иа́кове,/ Нача́льнику жи́зни/ и Отцу́ бу́дущих угожда́я дея́нии,/ Исма́ила всескве́рнаго/ пе́рвенства, блаже́нне, лиши́л еси́,/ чре́во я́ко бо́га вменя́юща./ Его́же и запя́л еси́,/ и на́га показа́л еси́ оте́ческаго покро́ва,/ благослове́ния же и насле́дия неприча́стна.

Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет твердь.

Князь поста́влен был еси́, сла́вне,/ ны́не по всей земли́,/ о тебе́ я́коже пре́жде написа́ся,/ уче́ник быв вся Сотво́ршаго,/ и ре́вностию твое́ю тепле́йшею,/ и дерзнове́нием непобеди́мым/ уби́йство претерпе́л еси́,/ от честна́го двоена́десятих учени́к, блаже́нне, совокупления/ пе́рвее убива́емый.

Сла́ва, глас 1:

Христу́ после́довал еси́, Боже́ственный Иа́кове,/ и мир возненави́дел еси́,/ сего́ уче́ния, в сокро́вищи твое́м скрыв,/ показа́лся еси́ апо́стол./ Те́мже шед во язы́ки / и сих пре́лестию и страстьми́ омрачи́вшияся ду́ши/ за́поведьми Спа́са просвети́л еси́/ ве́ровати в Тро́ицу Единосу́щную.

И ны́не, пра́здника.

Тропа́рь, глас 3:

Апо́столе святы́й Иа́кове,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Ин тропа́рь, глас то́йже:

Апо́стол Христо́в был еси́ избра́нный/ и Богосло́ву возлю́бленному брат единоро́дный,/ всехва́льне Иа́кове,/ пою́щим тя грехо́в оставле́ние испроси́/ и душа́м на́шим ве́лию ми́лость.

Сла́ва, и ны́не, пра́здника.

НА У́ТРЕНИ

На Бог Госпо́дь, тропа́рь пра́здника, два́жды. Сла́ва, апо́стола: И ны́не, пра́здника.

По 1-й кафи́зме седа́лен апо́стола.

Сла́ва, и ны́не, пра́здника.

По 2-й кафи́зме седа́лен, глас 4:

Лучу́, я́ко со́лнце, пра́вды испусти́ тя Христо́с,/ просвети́ти всю зе́млю, апо́столе сла́вный Иа́кове,/ Боже́ственными твои́ми моли́твами озаря́еши/ и Боже́ственным Све́том невече́рним всех просвеща́еши,/ ве́рою соверша́ющих святу́ю па́мять твою́.

Сла́ва, и ны́не, пра́здника.

По полиеле́и седа́лен, глас 8.

Подо́бен: Прему́дрости:

Заря́ми свы́ше напо́лнився и све́тлостию Боже́ственною просвети́вся, апо́столе Иа́кове,/ на Фаво́рстей горе́ преобразу́ющегося ви́дел еси́ Зижди́теля и Го́спода/ и глас услы́шати досто́йно получи́л еси́./ Те́мже и вели́ким воздая́нием сподо́бился еси́,/ я́ко самови́дец быв, и учени́к благода́ти, и свиде́тель та́ин Бо́жиих./ Моли́ Христа́ Бо́га согреше́ний оставле́ние дарова́ти/ чту́шим любо́вию святу́ю па́мять твою́.

Слава, и ныне, праздника.

Та ́же степе́нна, 1-й антифо́н 4-го гла́са. Проки́мен, глас 4: Во всю зе́млю изы́де веща́ние их/ и в концы́ вселе́нныя глаго́лы их. Стих: Небеса́ пове́дают сла́ву Бо́жию: Вся́кое дыха́ние: Ева́нгелие от Иоа́нна, зача́ло 67. По 50-м псалме́ стихи́ра, глас 1: Христу́ после́довал еси́: (пи́сана на стихо́вне сла́ва) или́ стихи́ра, глас 6: Прему́дре ло́вче: (сла́ва на хвали́тех).

Кано́н пра́здника, со ирмосо́м на 6. И апо́стола на 8, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бо́гови воспева́юща.

Твое́ю мре́жею, я́ко лове́ц иску́сен, от прегреше́ний глубины́ возве́д, блаже́нне,/ ду́шу мою́ просвети́ светолу́чными сия́нии/ и похвали́ти твою́ досто́йно, о Богоявле́нне Иа́кове, па́мять, учениче́, сподо́би.

Преве́чный Отцу́, Собезнача́льный, пресоверше́нный же Бог,/ вопло́щен, яви́ся на земли́ я́ко Челове́к/ и соде́йственника благода́ти показа́, блаже́нне,/ и служи́теля тя прему́дра, си́лою Его́ укрепля́ема.

Разуме́ твоея́ души́ благоро́дие/ и тве́рдость учениче́, и непобори́му мысль, сла́вне,/ тя Прове́дец Бог Свои́м служи́телем лу́чша поста́ви,/ язы́ком возвеща́юща.

Богоро́дичен: Сове́та Вели́каго, о́тче, А́нгел,/ от Де́вы Ма́тере я́влься ми́ру, плоть при́емь,/ я́ко доброде́тельми укра́шена ученика́ тя показу́ет и Богогла́сника, Иа́кове,/ словеса́ Его́ вети́йствующа.

Катава́сия пра́здника.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, еди́не Человеколю́бче.

Свы́ше тя дыха́ние ну́ждное Уте́шителя разже́гше,/ му́дра Богогла́сника, вети́йствующа я́ве вели́чия показа́ вопло́щшагося Сло́ва,/ Его́же и самови́дец был еси́.

Тя, я́коже стрелу́ избра́нну, сло́вом изощре́нну, в сердца́ враго́в вонзи́,/ растерза́я ду́ши сопроти́вных, прему́дре,/ и пленя́я, таи́нниче, сих коры́сти, Иа́кове.

Нескве́рныя твоея́ души́ ти́хость Влады́це узре́ся,/ и пре́жде зва́ния, блаже́нне, достоприя́тен Ему́ яви́лся еси́, о Иа́кове,/ и смотре́ния Его́ учени́к был еси́.

Свяще́нным твои́м, му́дре, житие́м и светоно́сным,/ е́же к Бо́гу сро́дством, всеблаже́нне, украша́емь я́сно,/ и соо́бщник показа́лся еси́,/ измла́да бо яви́лся еси́ Сло́ва ссе́льник.

Богоро́дичен: Дверь яви́ся мы́сленная Восто́ка свы́ше,/ су́щим на земли́ я́вльшагося, Де́во:/ Тобо́ю бо к нам Сло́во прии́де/ спасти́ всех от безслове́сия, Пречи́стая.

Конда́к и и́кос пра́здника.

Седа́лен апо́стола, глас 2:

Улови́в язы́ки апо́стол сла́вный/ и научи́в концы́ земны́я Тебе́ кла́нятися со Отце́м и Ду́хом, Христе́ Бо́же,/ того́ ра́ди утверди́ Це́рковь Твою́/ и ве́рным низпосли́ благослове́ние Твое́,/ Еди́не Ми́лостиве и Человеколю́бче.

Сла́ва, и ны́не, пра́здника, или́ Богоро́дичен:

Прему́дрость и Сло́во в Твое́м чре́ве заче́нши неопа́льно, Ма́ти Бо́жия,/ ми́ру родила́ еси́ мир Содержа́щаго,/ и во объя́тиях понесла́ еси́ вся Нося́щаго,/ Пита́теля всех и Творца́ тва́ри./ Те́мже молю́ Тя, Всесвята́я Де́во, и ве́рно сла́влю Тя/ изба́вится ми от прегреше́ний, и в День Суда́,/ егда́ предста́ти и́мам пред лице́м Созда́теля моего́,/ Влады́чице Де́во Чи́стая, Твою́ по́мощь тогда́ пода́ждь ми:/ вся бо мо́жеши, ели́ка хо́щеши, Всепе́тая.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра Отча́/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Пропове́дник Христо́в быв, Боже́ственный Иа́кове,/ ты, зван, у́бо ско́ро после́довал еси́,/ оте́ческую любо́вь презре́в и ве́чная измени́в теку́щими;/ тем неизрече́ннаго Небе́снаго насле́дия сподо́бился еси́, блаже́нне приснопа́мятне.

О, те́плаго жела́ния твоего́ ко Влады́це Христу́!/ Ты бо Сего́ зело́ возжела́л еси́, сия́нием Того́ просве́щся,/ я́коже и вообрази́тися, и яви́тися всем свет вторы́й,/ пе́рваго заря́ми озари́вся и сла́вою,/ всече́стне блаже́нне Иа́кове.

Житие́ че́стно име́л еси́ и пречу́дно,/ жела́нием бо жела́ние неодержи́мо прие́мь,/ жела́нии Богонача́лия соверше́ннаго блаже́нства дости́гл еси́, Богови́дче,/ со Безпло́тными поя́:/ си́ле Твое́й сла́ва, Человеколю́бче.

Всего́ себе́ манове́нию отда́в Влады́чню, учениче́ Богозра́чне,/ доброде́тельми взя́лся еси́ явле́нно к высоте́ и Боже́ственному вои́стинну кра́ю,/ и отту́ду целе́б ре́ки источа́еши па́мять твою́ ве́рно сла́вящим.

Богоро́дичен: Ты ве́рных похвала́ еси́, Безневе́стная,/ Ты Предста́тельница, Ты и прибе́жище христиа́н,/ стена́ и приста́нище,/ к Сы́ну бо Твоему́ мольбы́ но́сиши, Всенепоро́чная, и спаса́еши от бед/ ве́рою и любо́вию Богоро́дицу Чи́стую Тебе́ зна́ющия.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Нов, я́коже Илия́, ре́вностию разжига́емь,/ непоко́ршияся пропове́данию твоему́ попали́ти восхоте́л еси́, сла́вне,/ но возбрани́ тебе́ Хоти́тель милосе́рдия, науча́я кро́тости благода́тней.

Вшед, доброде́телию коне́чною впери́м/ любве́ ра́ди лу́чших, престо́л Влады́ки возжела́л еси́, прему́дре,/ нача́льная держа́ти, не я́ко жела́я сла́вы су́етныя,/ но зре́ти посреди́ Его́же возжела́л еси́.

Превзы́де уста́вы, Спа́се, Иа́ков челове́чества,/ во Твою́ бо си́лу, я́ко в ри́зу, обле́кся,/ исцеле́ния то́чит ре́ки и чуде́с и просвеща́ет ве́рою концы́.

Све́тел тя о́блак Сло́ва, облиста́юща сла́вою обоже́на,/ на Фаво́рстей горе́ осени́, блаже́нне Иа́кове,/ и глас слы́шати Оте́ческий сподо́бился еси́,/ известву́яй Того́ Сыновство́.

Песнь 6

Ирмо́с: Бе́здна грехо́в и прегреше́ний бу́ря мя смуща́ет/ и во глуби́ну ну́жднаго ре́ет мя отча́яния,/ но Твою́ кре́пкую ру́ку мне простри́, я́ко Петро́ви,/ о Упра́вителю! и спаси́.

Струи́, я́ко от исто́чника, исцеле́ний непреста́нно излива́я/ и просвеще́ние уче́ния благоче́стно источа́я, му́дре,/ ду́ши, благоче́стно любо́вию, Иа́кове, приступа́ющая, просвеща́еши, преблаже́нне.

Сосу́д вместя́щ Влады́ка обре́т тя, преблаже́нне,/ Своего́ бога́тнаго и честна́го дая́ния,/ оби́лует дарова́нии, и́же па́че ума́ та́инств,/ служи́телю присносу́щныя жи́зни.

Умерщвле́ние нас ра́ди Влады́ка восхоте́ восприя́ти,/ ме́ртвых вину́ и́стиннаго воскресе́ния,/ я́ко му́дра таи́нника, блаже́нне, тя взят соде́тельника,/ в нощи́, в не́йже предая́шеся.

Богоро́дичен: Бе́здну щедро́т ро́ждшая, Богоро́дице Де́во,/ от печа́льных жития́ ду́шу мою́ спаси́ и ра́дости духо́вныя две́ри ми отве́рзи,/ на Тя бо еди́ну наде́жду мою́ возложи́х.

Конда́к, глас 2.

Подо́бен: Вы́шних ища́:

Глас Боже́ственный слы́шав, призыва́ющ тя,/ любо́вь отца́ презре́л еси́/ и прите́кл еси́ ко Христу́, Иа́кове, с сро́дником твои́м, сла́вне,/ с ни́мже сподо́бился еси́ ви́дети/ Госпо́дне Боже́ственное преображе́ние.

Ико́с:

Вку́пе сый с бра́том в се́лех Небе́сных,/ и́же свята́я ны́не ага́ряны попира́ющий, нога́ми скве́рными и нечи́стыми ходя́щия,/ Боже́ственными ва́шими моли́твами отжени́те,/ и мучи́телем у мышле́ния отсе́кше,/ и и́же от них мно́жества ра́ди согреше́ний на́ших держи́мых,/ ны́не свобожде́ния сподо́бите:/ я́ко да во еди́но собра́вшеся, ви́дим Госпо́дне Боже́ственное преображе́ние.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́,/ сего́ ра́ди о́троцы в пещи́ ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Ча́шу испи́л еси́, я́коже обеща́лся Влады́це Христу́,/ креще́нием Сего́ ты крести́лся еси́, Богоблаже́нне./ Ему́же ны́не усе́рдно зове́ши, ра́дуяся:/ благослове́н Бог оте́ц на́ших.

Заре́ю осия́емь Боговиде́ния, яви́лся еси́, Иа́кове./ Сего́ ра́ди тя венце́м Ца́рствия Благода́тель Христо́с украша́ет, со А́нгелы пою́ща:/ благослове́н Бог оте́ц на́ших.

Се тебе́ испо́лни обеща́ния Великода́вец,/ к Нему́ возне́сся подо́бием страда́ний Его́,/ Ему́же предстоя́, ны́не зове́ши, ра́дуяся:/ благослове́н Бог оте́ц на́ших.

Богоро́дичен: Дво́ицу у́бо естество́м, но не Лице́м, Ма́ти, пропове́дуем, из Тебе́ воплоще́ннаго./ Его́же пло́тию изобража́ем и покланя́емся зра́ка воображе́нию,/ Тебе́ ра́ди Бо́гу прими́ршиися, Чи́стая.

Песнь 8

Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Авраа́мское предложе́ние ты, Богови́дче, стяжа́л еси́,/ призва́вшему тя Христу́ после́дуя,/ и пресве́тел служи́тель был еси́ Ему́,/ я́ко Соде́телю и Изба́вителю, поя́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Крепча́йше яви́ся гро́ма твое́ провозглаше́ние, зако́ннаго о́браза шуме́ние./ Христа́ бо возгреме́л еси́ вселе́нней всей,/ Бо́га, и Соде́теля, и Изба́вителя, поя́:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Удиви́лся еси́, сла́вне, муче́ния све́тлостию/ и благоче́стия и́стинным просвеще́нием,/ я́ко князь апо́стол поста́влен был еси́ по всей земли́,/ Соде́телю и Изба́вителю поя́:/ о́троцы, благослови́те, свяще́нницы, воспо́йте,/ лю́дие, превозноси́те Христа́ во ве́ки.

Богоро́дичен: Вити́йстии язы́цы Тебе́ воспе́ти не мо́гут,/ о Богороди́тельнице, Мари́е Богоневе́сто!/ Бо́га бо родила́ еси́, су́щаго над все́ми, Отрокови́це Чи́стая,/ Соде́теля и Изба́вителя, Ему́же вопие́м:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.

Свя́то преше́д твое́ житие́, святы́х селе́ния дости́гл еси́,/ иде́же, ра́дуяся, зарю́ зри́ши трисия́нную;/ ея́же наслажда́яся, прему́дре,/ испо́лнены весе́лия певцы́ твоя́ и ра́дости, преблаже́нне, покажи́/ твои́ми моли́твами, о Иа́кове!

Ви́дети тя злоде́и и уби́йцы, я́коже твоего́ Влады́ки пре́жде, не терпя́ше:/ тех бо дея́ния укоря́я, твоего́ жития́ предложе́нием обличи́л еси́,/ убива́ют мече́м подража́теля Христу́, распя́тому пло́тию за челове́ки,/ о Богоглаго́ливе преблаже́нне!

Ору́жием Небе́сным томле́н быв, ра́нами И́род поги́бе,/ я́ко Твоя́, Сло́ве, служи́тели и ученики́, и́хже апо́столы наре́кл еси́,/ убива́ти не дово́лен бысть окая́нный./ Те́мже тя, пра́ведному промышле́нию Благода́теля, уди́вльшеся, велича́ем.

Богоро́дичен: Яви́лася еси́, о Де́во, Ма́ти Бо́жия,/ па́че естества́ ро́ждши пло́тию Бо́га Сло́ва,/ Его́же Оте́ц отры́гну от се́рдца Своего́,/ пре́жде всех век, я́ко Благ,/ Его́же ны́не и теле́с превы́шша разумева́ем,/ а́ще и в те́ло облече́ся.

Свети́лен.

Подо́бен: Жены́, услы́шите:

Иа́кова воспое́м Зеведе́ова вси:/ со Христо́м бо взы́де на го́ру Фаво́рскую,/ и зри́тель бысть Боже́ственнаго преображе́ния,/ и, соше́д, пропове́даша в четвероконе́чную всю/ с Петро́м и Иоа́нном.

Сла́ва, и ны́не, пра́здника.

На хвали́тех стихи́ры пра́здника 3, и апо́стола 3, глас 8 со стихо́вны (зри выше).

Слава, апостола, глас 6. Самогла́сен:

Прему́дрый ло́вче, святы́й учениче́,/ де́лателю Спа́сов/ и сказа́телю Того́ страсте́й,/ и́же тварь ве́рою обте́к,/ и прельще́ныя язы́ки собра́в,/ и Бо́гу приве́д, я́ко кади́ло до́брое, на Небеса́ возве́лся еси́./ Те́мже, предстоя́ Судии́,/ моли́ изба́витися нам от беззако́ний на́ших/ и в День Су́дный спасти́ся муче́ния.

И ны́не, пра́здника.

Славосло́вие вели́кое.

НА ЛИТУРГИ ́И

Блаже́нны пра́здника, песнь рядова́я и апо́стола песнь 3-я, на 4. Проки́мен, глас 8: Во всю зе́млю изы́де веща́ние их: Стих: Небеса́ пове́дают сла́ву Бо́жию: Апо́стол Дея́ний, зача́ло 29. Аллилу́ия , глас 1: Испове́дят Небеса́ чудеса́ Твоя́, Го́споди. Ева́нгелие от Луки́, зача́ло 17. Прича́стен: Во всю зе́млю:

НА ВЕЛИЦЕЙ ВЕЧЕРНИ

На Го́споди, воззва́х: стихи́ры, глас 8.

Подо́бен: О, пресла́внаго чудесе́:

Всетво́рче Царю́ Бо́же наш,/ ди́вен еси́ во святы́х Твои́х,/ прославля́я Твоя́ уго́дники,/ за усе́рдную к Тебе́ любо́вь/ дарова́л еси́ ве́рным Твои́м лю́дем/ иера́рха блаже́ннаго – Дона́та чудотвори́теля,/ в его́же днесь па́мять сла́вим Тя,/ Триипоста́сне Го́споди.

Все́льшаяся благода́ть Твоя́, Влады́ко,/ в Богому́дрый Твой сосу́д,/ предви́денный Тобо́ю измла́да,/ в освяще́ннаго Дона́та,/ соде́ла в ми́ре чудеса́ пресла́вная/ уго́дною бо он к Тебе́ моли́твою:/ в свое́й стране́ в су́шу дождь испроси́/ и от дще́ри царе́вы изгна́ де́мона./ Его́же моли́твами да́руй и нам ве́лию ми́лость.

Всепрему́дрый Соде́телю наш,/ Бо́же Триипоста́сне Еди́ный,/ хвали́мый от у́мных Твои́х сил непреста́нно,/ и от нас, бре́нных, приими́ днесь хвале́ние,/ сла́вишися бо в Твое́м иера́рхе,/ блаже́нном епи́скопе Дона́те,/ и́же стра́сти па́губныя в ми́ре сем победи́,/ сподо́бися чуде́сных Твои́х дарова́ний,/ пре́йде в Небе́сныя оби́тели/ моли́ти Тя о нас, жи́зни Пода́теля нам, Го́спода.

И́ны стихи́ры, глас 4.

Подо́бен: Я́ко до́бля:

Блаже́нне о́тче Дона́те,/ ты мудрова́нием ду́ха плотско́е мудрова́ние умертви́л еси́,/ жили́ще быв Ду́ха Свята́го,/ во всей жи́зни твое́й бо́дренно подвиза́лся еси́,/ моли́твами и посто́м благоугожда́я Влады́це Христу́./ Ему́же в Небе́сных предстоя́, моли́ся о нас,/ дарова́ти нам мир и ве́лию ми́лость.

Влады́ку Христа́ подража́я,/ кро́ток и ми́лостив, му́дре о́тче наш Дона́те, был еси́,/ архиере́йства гра́да Еври́я сподоби́вся,/ упа́сл еси́ лю́ди Бо́жия на па́жити ева́нгельской,/ о́браз в доброде́телех себе́ сама́го подава́я,/ просвети́л еси́ всю подсо́лнечную,/ просла́вив Просла́вльшаго тя./ Предста́тельство и по́мощь во вся́ких ско́рбех/ при́сно сотворя́й пою́щим тя.

Преизря́дно Це́рковь Христо́ву,/ ве́рных собра́ние украси́л еси́,/ богозда́нно пе́рвая бо добро́та в тебе́ яви́ся,/ пресла́вная чудеса́ тобо́ю повсю́ду сотворя́ющи,/ и́бо и чу́вственнаго и вреди́тельнаго в воде́ зми́я стра́шна уби́в,/ во́ду без вре́да лю́дем пи́ти сотвори́л еси́./ Те́мже тому́ удивля́шеся, мо́лим тя:/ моли́ Бо́га спасти́ся нам.

Сла́ва, глас 8:

Прииди́те, благочести́вых люде́й собра́ние,/ воздади́м сла́ву и хвалу́ Всетворцу́ Бо́гу на́шему,/ глаго́люще согла́сно: аллилу́ия./ Я́ко Он, Всемо́щный, сотвори́ всем днесь вели́чие,/ просла́ви бо Своего́ уго́дника,/ святи́теля Дона́та блаже́ннаго,/ столпа́ Це́ркве Святы́я неподви́жима,/ исто́чника чуде́с преизоби́льнаго,/ во вся́ких ско́рбех лю́дем ве́рным ско́раго помо́щника,/ и́же и́стинною ве́рою и богоприя́тною моли́твою ко Го́споду Бо́гу/ ме́ртваго му́жа воскреси́/ и от разреше́ния до́лга жену́ его́ свободи́, обличи́в злоде́теля;/ от царе́вны де́вы де́мона, му́чащаго ю, прогна́;/ два́жды в су́шу дождь с небе́с сведе́;/ моля́щим его́ исполня́ет проше́ния./ Те́мже к нему́ возопии́м:/ ра́дуйся, о́тче Богому́дрый,/ па́стырю и сострада́телю наш,/ чудотво́рче Дона́те,/ преди́вный и ми́лостивый,/ и моли́ о нас Человеколю́бца Бо́га/ да насле́дим вси Ца́рство Небе́сное.

И ны́не, Богоро́дичен: Царь Небе́сный:

Вход. Проки́мен дне. И чте́ния святи́тельская (зри 26 апреля).

На лити́и стихи́ры, глас 4:

На сла́ву Бо́жию стеце́мся вси/ и у́зрим о́браз Бо́жий и подо́бие соблю́дшаго,/ всечестна́го иера́рха Христо́ва Дона́та,/ и́же в чудесе́х сия́ет/ и просвеща́ет ве́рных сердца́ и мы́сли благода́рно,/ де́лы бо богоуго́дными дости́же край жела́ний –/ соверше́нную любо́вь Христа́ Го́спода Иису́са,/ и ны́не, в Небесе́х со А́нгелы ликовству́я,/ мо́лится о честву́ющих па́мять его́ ве́рно.

Нова́го Ри́ма – гра́да Константи́ня/ благове́рнии вси лю́дие,/ в па́мять днесь Богоно́снаго иера́рха Дона́та/ прииди́те и восхвали́те ку́пно с на́ми:/ и́же богоизбра́нное бысть жили́ще Всесвяты́я Тро́ицы,/ отню́ду же благода́ть прие́м,/ архиере́й святы́й чудеса́ сотворя́ет,/ удиви́ царя́, правосла́вна самоде́ржца,/ и весь наро́д, та́мо су́щий./ По проше́нию царе́ву, ходи́в по гра́ду в моли́твах к Бо́гу/ и изведе́ с высоты́ небе́сныя на су́хость земну́ю дождь преве́лий;/ на не́мже ри́за в дожди́ том мно́гом ни ка́плею омочи́ся./ Сух бо святи́тель во храм святы́й прии́де,/ воспева́я сла́ву Христу́ Бо́гу,/ и мо́лится Ему́ о всех нас.

Боже́ственный ра́дости и весе́лия духо́внаго испо́лнение,/ яви́ся светоно́сная твоя́ па́мять,/ о́тче Богому́дре Дона́те./ Во псалме́х у́бо и пе́снех све́тло торжеству́ет/ твоя́ па́ства гра́да Еври́я и окре́стныя его́,/ име́ющи в себе́ свети́льника богоуго́днаго и па́стыря чудотвори́ваго,/ зе́млю суху́ю у них напои́вшаго/ и преизоби́льно плоды́ возрасти́ти сотво́ршаго,/ ми́лость же и любо́вь всем лю́дем, в беда́х су́щим, подаю́щаго./ Сего́ же ра́ди наследи́л еси́ ве́чное блаже́нство,/ предстоя́ Триипоста́сному Божеству́,/ моли́ изба́витися нам от вся́ких бед и скорбе́й/ и насле́дити прекра́сный град – Иерусали́м Го́рний.

Сла́ву воплоти́вшагося Сы́на Бо́жия/ на земли́ пропове́дуя,/ я́ко архиере́й достосла́вный,/ о́тче преподо́бне Дона́те,/ сла́ву мирску́ю и бога́тство вмени́в во ничто́же,/ от страсте́й ду́шу и те́ло моли́твою и посто́м очи́стил еси́,/ нас ра́ди обнища́вшего Христа́ возлюби́в./ Без преткнове́ния учи́л еси́ лю́ди Госпо́дни/ благоче́стию, чистоте́, и́стине,/ о́браз явле́нный и прописа́ния ева́нгельский жи́зни быв всем наро́дом./ Сего́ же ра́ди просла́вился еси́ чудотворе́ниями по вселе́нней,/ тем воше́д в Го́рняя Небеса́,/ моли́ Всеблага́го Бо́га,/ сла́вити и воспева́ти Его́ нам во ве́ки.

Сла́ва, глас 5:

Кто возглаго́лет, Всетво́рче Бо́же наш,/ суде́б Твои́х бе́здну,/ и́миже на земли́ спаса́еши лю́ди Твоя́,/ да избра́нныя Твоя́, правосла́вно живу́ще все,/ в вечнора́достных Твои́х кро́вех водворя́тся/ и зре́ния Твоего́, в Тро́ице сла́вимаго, сподо́бятся./ Богоизбра́нныя бо Твоя́ и чи́стыя сосу́ды, епи́скопы святы́я,/ Це́ркве Боже́ственныя па́стыри поставля́еши,/ и́же Тя, Вседержи́теля и ми́ра всего́ Прави́теля,/ де́лом и сло́вом пропове́даша,/ научи́ша наро́ды благоче́стию,/ ве́ровати в Тя и служи́ти Бо́гу,/ в Тро́ице жи́ву и и́стинну,/ и чудесы́ преславными о́ныя удиви́ша./ Си́цев бе му́дрый и ве́рный архиере́й Твой,/ оте́ц наш Дона́т преподо́бный./ От ю́ности своея́ возлюби́ Тя/ и, я́ко на тве́рди тве́рдельное со́лнце,/ доброде́телями просвети́ся/ и осия́ вся ми́ра концы́./ Христоподража́телен быв терпе́нием, кро́тостию и ми́лостию ко всем челове́ком,/ чуде́с благода́ть почерпе́,/ преста́вися к Тебе́, Влады́це,/ моли́твами его́ спаси́ нас, Го́споди.

И ны́не, Богоро́дичен:

Храм и дверь еси́,/ пала́та и престо́л Царе́в,/ Де́во Всечестна́я,/ Е́юже Изба́витель мой, Христо́с Госпо́дь,/ во тьме спя́щим яви́ся,/ Со́лнце сый пра́вды, просвети́ти хотя́,/ я́же созда́ по о́бразу Своему́ руко́ю Свое́ю./ Те́мже, Всепе́тая,/ я́ко ма́терне дерзнове́ние к Нему́ стяжа́вшая,/ непреста́нно моли́ спасти́ся душа́м на́шим.

На стихо́вне стихи́ры, глас 1.

Подо́бен: Всехва́льнии му́ченицы:

Бо́га Отца́, Сы́на и Свята́го Ду́ха,/ в Тро́ице Единосу́щна, пропове́дал еси́,/ всему́дре о́тче Дона́те,/ я́ко везде́ Сый и вся исполня́ет/ и призыва́ет во оби́тели Небе́сныя челове́ки,/ учи́л еси́ па́ству Ему́ при́сно служи́ти,/ архиере́й быв правосла́вный./ Тем моли́ о нас Христа́ Го́спода,/ да сподо́бимся мы во ве́ки с Ним жи́ти.

Стих: Свет возсия́ пра́веднику/ и пра́вым се́рдцем весе́лие.

Ди́вный сосу́д Вы́шняго,/ в Це́ркви Христо́вой поста́вленный,/ всече́стне Дона́те чудотво́рче,/ из него́же ре́ется благода́ть исцеле́ний ве́рным,/ и пра́вило доброде́телей изве́стное,/ любви́ струя́ неистощи́мая,/ сла́во правосла́вных,/ тре́бующих ско́рая по́мощь,/ твои́ми моли́твами испроси́ нам у Христа́/ несконча́емое в Небесе́х насле́дие.

Стих: Весели́теся, пра́веднии, о Го́споде,/ и испове́дайте па́мять святы́ни Его́.

На высоте́ восхожде́ние/ в се́рдце твое́м име́в непреста́нно, о́тче,/ де́ятелей чудотво́рных сподо́бился еси́/ и, кро́ток быв, кро́тких вои́стинну насле́довал еси́ зе́млю,/ иде́же зри́ши несре́дственно Боже́ственную Тро́ицу./ Сего́ ра́ди тя почита́ем и ра́достию взыва́ем:/ ра́дуйся, архиере́ю Дона́те,/ учи́телю Це́ркве Богодарова́нный.

Сла́ва, глас 6:

Ева́нгелия Христо́ва послу́шателя,/ и́стиннаго па́стыря, Богоно́снаго свети́льника,/ возсия́вшаго среди́ не́дра церко́внаго/ благоче́стием, и чистото́ю, и чу́дною добро́тою,/ отца́ чудотво́рца Дона́та сла́внаго,/ церко́вныя вси пито́мцы,/ восхва́лим днесь ра́достне:/ ра́дуйся, о́тче, Бргозри́тельный у́ме,/ челове́че Небе́сный, земны́й А́нгеле;/ ра́дуйся, виногра́да душ христиа́нских де́лателю;/ ра́дуйся, Христо́в дру́же и́скренний;/ ра́дуйся, в послуша́ние зову́щим тя гото́вый помо́щник;/ ра́дуйся, руководи́телю изве́стный в Ца́рство Небе́сное,/ в не́мже ны́не обита́я,/ призира́й, свя́те, на моля́щия тя:/ да пода́ст Христо́с Бог всем лю́дем/ мир и ве́лию ми́лость.

И ны́не, Богоро́дичен: Творе́ц и Изба́витель:

На благослове́нии хле́бов тропари́ о́ба, по еди́ножды, и Богоро́дице Де́во: еди́ножды.

А иде́же несть всено́щнаго бде́ния, на вели́цей вече́рни по Ны́не отпуща́еши: глаго́лем тропа́рь еди́ножды. Сла́ва, и ны́не, Богоро́дичен воскресен.

Тропа́рь: глас 8:

Благи́й яре́м Христо́в и бре́мя легко́ Ева́нгельскаго уче́ния взем,/ иера́рше Дона́те Богоблаже́нне,/ вельми́ подвиза́лся еси́ во вре́менней жи́зни,/ архиере́й у́бо Богоуго́ден быв,/ до́бре пасы́й лю́ди Бо́жия,/ просвети́в ты́я уче́нием,/ чудотворе́нием вселе́нную удиви́л еси́./ Сего́ ра́ди мо́лим тя:/ да изба́вит нас Христо́с Бог от вся́ких бед/ и Небе́снаго блаже́нства сподо́бит.

Ин тропа́рь, глас 4:

Блаже́н де́латель и украси́тель Це́ркве Христо́вы,/ о́тче Дона́те, был еси́,/ непреста́нно попече́ние о ста́де твое́м стяжа́в,/ науча́я и руководя́ о́но в любви́ Сы́на Бо́жия,/ не то́кмо бо в твое́м гра́де мно́гий наро́д,/ но в Константино́поле самоде́ржца и в нем вся лю́ди/ удиви́л еси́/ пресла́вными чудесы́ твои́ми./ Богоуго́дныя у́бо мольбы́/ сотворя́я ко Христу́ Бо́гу,/ помо́щник скор всем яви́ся,/ предстоя́ Всесвяте́й Тро́ице,/ в Вы́шних моли́ Ю о всех нас,/ да спасе́т ду́ши на́ша.

НА У ́ТРЕНИ

На Бог Госпо́дь: тропари́, о́ба по еди́ножды. Сла́ва, и ны́не, Богоро́дичен: Е́же от ве́ка:

По 1-м стихосло́вии седа́лен, глас 1.

Подо́бен: Ка́мени запеча́тану:

Возсия́л еси́ в ми́ре, святи́телю Дона́те,/ чудесы́ просвеща́я ве́рно приходя́щия к тебе́,/ престо́л же архиере́йский, я́ко мудр па́стырь, украси́в,/ мно́жае присво́ился еси́ Христу́ и лику́еши со А́нгелы на Небесе́х, о нас моля́ся./ Сла́ва укре́пльшему тя Бо́гу,/ слава Венча́вшему тя,/ сла́ва Де́ющему тобо́ю всем исцеле́ния.

Сла́ва, и ны́не, Богоро́дичен:

Пречи́стая Де́во Богоро́дице Мари́е,/ ру́це Твои́ Боже́ственныя, и́миже Созда́теля понесла́ еси́, вопло́щшагося благосты́нею,/ просте́рши, умоли́ Его́/ изба́вити ны от искуше́ний, и бед, и страсте́й, хва́лящия Тя любо́вию и вопию́щия:/ сла́ва Все́льшемуся в Тя,/ сла́ва Проше́дшему из Тебе́,/ сла́ва Изба́вившему нас рождество́м Твои́м.

По 2-м стихосло́вии седа́лен, глас 3.

Подо́бен: Красоте́ де́вства:

Ве́ру правосла́вную име́я,/ всеусе́рдно во след Христа́ Го́спода поте́кл еси́, преподо́бне иера́рше Дона́те,/ ум твой впери́в к любви́ Его́,/ непреста́нно в моли́твах и посте́х пребыва́л еси́,/ день и нощь всем благотворя́,/ приве́л еси́ Христу́ доброде́тельми твои́ми мно́гий наро́д,/ те́мже и нас помяни́ ко Го́споду, спасти́ ду́ши на́ша.

Сла́ва, и ны́не, Богоро́дичен:

Богоблаже́нная Де́во Мари́е,/ недомы́сленно и непостижи́мо есть та́инство Бо́жие о Тебе́,/ Богообра́дованная Влады́чице,/ Бо́га бо во чре́ве Твое́м заче́нши, пло́тию родила́ еси́./ Его́же во дву естеству́, в Еди́ной же Ипоста́си,/ Бо́га и Челове́ка, Тобо́ю научи́хомся сла́вити,/ Его́же моли́, да сподо́бимся соверше́ннаго зре́ния Его́/ ве́чно со все́ми святы́ми.

По полиеле́и седа́лен, глас 8.

Подо́бен: Прему́дрости:

Сло́во воплоти́вшагося Челове́ка Иису́са/ благоче́стно соблю́л еси́, преблаже́нне о́тче Дона́те, в се́рдце твое́м,/ И́же рече́: кто соблюде́т, сме́рти не и́мать во ве́ки./ Сие́ де́ло в тебе́ испо́лнися,/ тем бо Боже́ственным сло́вом и жив сый ты, вели́ка и ужа́сна сотвори́л еси́ чудеса́:/ воскреси́л еси́ ме́ртва челове́ка;/ вредя́щаго во исто́чнице лю́таго зми́я уби́;/ дожди́ с небесе́ во оживле́ние лю́дем свед;/ де́монов полки́ от челове́к прогна́л еси́/ и досто́йно Христо́ву Це́рковь упа́сл./ Храм свят во сла́ву Го́спода Бо́га созда́в,/ по успе́нии твое́м живе́ши на Небесе́х,/ отну́дуже всем по́мощь подава́й, чту́щим святу́ю па́мять твою́.

Сла́ва: Богоно́сным апо́столом нра́вом, де́лы и чудесы́/ уподо́бился еси́, о́тче всему́дре Дона́те./ Да́нный бо тебе́ тала́нт со мно́гим при́купом Единоро́дному Сы́ну Бо́жию прине́сл еси́,/ научи́в любви́ Бо́жией,/ ве́ре правосла́вней,/ Богому́дрым бо твои́м смы́слом от Це́ркве отгна́л еси́ вся ерети́ческая по́лчища/ и, мно́гая пресла́вная чудеса́ соде́лав в прославле́ние И́мени Го́спода Вседержи́теля, преше́л еси́ во двор Небе́сный./ Те́мже мо́лим тя:/ моли́ Христа́ Бо́га прегреше́ний оставле́ние и насле́дие Небе́сное и нам дарова́ти,/ чту́щим любо́вию святу́ю па́мять твою́.

И ны́не, Богоро́дичен:

Предви́денная Бо́гом Всенепоро́чная Де́во, Мари́е Богоро́дице,/ Ма́терь Пресу́щественному Бо́га Отца́ Сло́ву и Безле́тному яви́лася еси́,/ Его́же в после́дняя ле́та сего́ ми́ра пло́тию родила́ еси́ па́че ума́./ И Тя, Богома́ти, я́ко Богоизбра́нное Свое́ оби́телище земно́е,/ пресели́ с пло́тию в Небе́сныя кро́вы,/ иде́же ны́не одесну́ю Сы́на и Бо́га предстои́ши, Всецари́це А́нгелом и челове́ком,/ сла́вою и че́стию венча́нная/ и благода́ть и по́мощь на земли́ обита́ющим подава́ющая, о Обра́дованная./ Мо́лим Тя, Влады́чице:/ моли́ Богонача́льную Всесвятю́ Тро́ицу,/ да спасе́т лю́ди Своя́ по Свои́м щедро́там и премно́гому человеколю́бию.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 36.

По 50-м псалме́, стихи́ра, глас 6:

Сла́ва Вездесу́щему Всеблаго́му Бо́гу,/ благоволи́вшему да́ти слове́сному Своему́ ста́ду/ Богому́драго па́стыря и учи́теля, святи́теля Дона́та,/ и́же Всесвяты́я Тро́ицы Боже́ственныя дом избра́нный бысть;/ да́ры чудоде́тельныя в себе́ име́я,/ весь мир благоде́тельствова/ и воздви́же вся́ку ду́шу челове́чу сла́вити всетворя́щаго/ и в мо́лениях по́мощь подава́ющаго Бо́га,/ кому́ждо всем потре́бная и поле́зная./ Те́мже, о иера́рше, о́тче всеблаже́нне,/ сподо́бивыйся он век получи́ти,/ моли́ся о нас, е́же та́мо моля́щим тя бы́ти.

Кано́н свято́му иера́рху Дона́ту, глас 4.

Песнь 1

Ирмо́с: Боже́ственным покрове́н/ медленноязы́чный мра́ком,/ извити́йствова Богопи́санный зако́н:/ ти́ну бо оттря́с очесе́ у́мнаго,/ ви́дит Су́щаго/ и науча́ется Ду́ха ра́зуму,/ хваля́ Боже́ственными пе́сньми.

Боже́ственное Твое́, Всецарю́, о ро́де челове́ческом промышле́ние:/ воздви́гл бо еси́, я́ко друга́го Моисе́я,/ руково́дствити лю́ди Твоя́ иера́рха, блаже́ннаго Дона́та,/ и́же в Твое́й благода́ти воспе́ Тебе́ благода́рныя пе́сни.

Боже́ственному Престо́лу при́сно со избра́нными предстоя́,/ невече́рния зари́, о́тче преподо́бне, исполня́емь,/ нам, ве́рно честву́ющим тя, испроси́ у Христа́ Го́спода све́та,/ от мракоро́дныя грехо́в тьмы просвети́тися и воспе́ти, я́ко Бог просла́вися.

Боже́ственных слове́с ева́нгельскаго Богопропове́дания измла́да научи́вся, блаже́нне,/ впери́л еси́ о́ная кре́пце, я́ко коры́сть мно́гу в тых обреты́й,/ удо́бь огорсти́л  еси́ всяк путь доброде́тели во спасе́ние,/ учи́л бо еси́ вся умнослове́сныя воспева́ти Бо́гу, я́ко просла́вися.

Богоро́дичен: Боже́ственная багряни́це Небе́снаго Царя́ сла́вы, Пречи́стая Де́во Мари́е,/ Твои́ми бо кровьми́ Ипоста́сное Бо́га Отца́ Сло́во/ в на́ше челове́чество обагри́ся и злоро́дную истреби́ кля́тву, пострада́в за нас пло́тию./ Ему́же чрез Тебе́ верно вопие́м:/ в щедро́тах безме́рных Бог Иису́с сла́вно просла́вися.

Песнь 3

Ирмо́с: Разве́рзе утро́бы неча́дствовавшия у́зы,/ доса́ду же неудоботерпи́му благоча́дствующия,/ еди́на моли́тва проро́чицы дре́вле А́нны,/ нося́щий дух сокруше́н,/ к Си́льному и Бо́гу ра́зумов.

Разве́рзл еси́ бде́нными твои́ми к Бо́гу моли́твами мрак страсте́й, Богоно́се о́тче,/ вся вра́жия досажда́ющий тебе́ прило́ги сокруше́нным ду́хом до конца́ отрази́в,/ церко́вную па́ству до́бре упа́сл еси́,/ при́сно, Всеси́льне, – зовя́, – Го́споди.

Разве́рзи нам, всеблаже́нне святи́телю,/ всеще́дрыя хля́би  Всеще́драго Бо́га на́шего предста́тельством твои́м,/ я́коже жа́ждою изнемо́гшия в ме́сте безво́дне,/ сухо́й земле́ исто́чник разве́рзл еси́,/ да наводни́мся его́ благода́тию, в разуме́ пою́ще:/ Всеси́льне Бо́же.

Разве́рзеся иногда́ ми́лость твоя́, о́тче, ко жи́телем страны́,/ в не́йже во исто́чнице злоя́дный змий угнезди́ся, вреди́ сме́ртно во́ды пи́ти./ Его́же, я́ко челове́к Бо́жий, безбоя́зненно уби́в,/ во́ду пи́ти всем сотвори́л еси́,/ напо́й и нас исто́чником во спасе́ние ми́лости твоея́, да зове́м:/ Всеси́льне Го́споди.

Богоро́дичен: Разве́рзе утро́бу Твою́, Пречи́стая Де́во, Единоро́дный Сын Бо́жий,/ преесте́ственно из Пречи́стою боку́ Твое́ю проше́д,/ во избавле́ние всех люде́й от вра́жиих ко́зней./ Те́мже, Благода́тная Мари́е, разжени́ ви́димыя и неви́димыя враги́ на́ши/ и разве́рзенныя их на ны че́люсти сокруши́, да ра́достно вопие́м:/ Всеси́льне Го́споди.

Седа́лен, глас 8.

Подо́бен: Прему́дрости:

Вели́каго свети́льника светоза́рнаго, Це́ркве столпа́ неразори́маго,/ преизя́щнаго чудотво́рца Дона́та восхва́лим,/ и́же благода́тию воплоти́вшагося Христа́, Сы́на Бо́жия,/ я́ко Его́ сотвори́тельный орга́н, соде́я преве́лия чудеса́ в ми́ре,/ и́хже самоде́ржец царь и Константи́нова гра́да весь наро́д зри́тели бы́ша/ и па́ствы его́ архиере́йскаго престо́ла лю́дие, у них бы́вшая, ви́деша./ К нему́ же возопие́м усе́рдно, зову́ще:/ архиере́ю, благода́ти Бо́жия испо́лненный,/ всем тре́бующим исполня́еши проше́ния,/ моли́ся Христу́ Бо́гу прегреше́ний оставле́ние дарова́ти/ пра́зднующим с любо́вию святу́ю па́мять твою́.

Сла́ва, и ны́не, Богоро́дичен:

Ра́дуйся, престо́ле огнезра́чный Бо́жий,/ ра́дуйся, Отрокови́це, седа́лище ца́рское,/ о́дре, упещре́нно по́стланный,/ златопорфи́рный черто́зе, хлами́до червленожа́ркая,/ укра́шенный хра́ме, молниено́сная колесни́це, свети́льниче многосве́тлый./ Ра́дуйся, Богоро́дице, дванадесятосте́нный гра́де,/ и дверь златокова́нная, и черто́же светоза́рный,/ светлопозлаще́нная трапе́зо, Богоукра́шенная ски́ние,/ ра́дуйся, сла́вная Неве́сто, Со́лнце ка́плющая./ Ра́дуйся, еди́на души́ моея́ благоле́пие.

Песнь 4

Ирмо́с: Царю́ царе́й,/ Яковы́й от Якова́го,/ Еди́н, Сло́ве, произше́дый,/ от Отца́ Безвино́внаго Равномо́щнаго Твоего́ Ду́ха/ апо́столом и́стинно посла́л еси́/ я́ко Благоде́теля, пою́щим:/ сла́ва держа́ве Твое́й, Го́споди.

Царю́ царе́й в пресве́тлых Небесе́х ны́не предстоя́щий,/ зре́ния Единосу́щнаго в Трие́х Ипоста́сех Божества́ сподо́бивыйся,/ Боже́ственный иера́рше Дона́те,/ моли́ся, о́тче, о призыва́ющих тя,/ да, спа́сшеся от вся́ких зде скорбе́й, пое́м:/ сла́ва си́ле Твое́й, Го́споди.

Царя́ Христа́ Бо́га на́шего, слове́сному Его́ ста́ду и́стинный архиере́й быв,/ труды́ и по́двиги во уче́нии ева́нгельскаго жития́ в позо́р  всем предложи́л еси́, о́тче,/ твои́ми у́бо уче́нии и благоприя́тством вселе́нную воздви́гл еси́ гласи́ти:/ сла́ва си́ле Твое́й, Го́споди.

Царь Небе́сный, за человеколю́бие Свое́ яви́выйся нам,/ прозре́ тя досто́йна благода́ти Своея́ сосу́да,/ очи́стившагося вся́каго мирска́го пристра́стия и плотски́х по́хотей./ Его́же, Бо́га и́стинна, ты, блаже́нне, словесы́ и чудодея́нием воспе́л еси́:/ сла́ва си́ле Твое́й, Го́споди.

Богоро́дичен: Цари́це Небесе́ и земли́, Богома́ти Влады́чице Де́во,/ воспита́вшая пресладча́йшаго Сы́на Перворо́днаго, Иису́са Го́спода пречи́стыми сосцы́ Твои́ми,/ во избавле́ние от грех всего́ ми́ра,/ моли́ Его́, Человеколю́бца, да пода́ст нам чи́сте взыва́ти:/ сла́ва си́ле Твое́й, Го́споди.

Песнь 5

Ирмо́с: Реши́тельное очище́ние грехо́в,/ огнедохнове́нную приими́те Ду́ха ро́су,/ о ча́да снегообра́зная, церко́вная!/ Ны́не от Сио́на бо изы́де Зако́н –/ языкоогнеобра́зная Ду́ха благода́ть.

Разреши́вшаго у́зы сме́ртныя Го́спода Иису́са благода́тию,/ разреши́л еси́, о́тче блаже́нне, заимода́тельное рукописа́ние, воскреси́в ме́ртва,/ и́же поноси́ злоде́телю, хотя́щему взя́ти второ́е до́лжное,/ разреши́ и на нас востаю́щия враго́в ко́зни,/ подая́ нам Ду́ха благода́ть.

Реше́ние грехо́вных плени́ц/ мно́гим, испове́дающимся чи́сте от се́рдца, сотвори́л еси́, всече́стне,/ в ча́да церко́вная приве́д, напои́л еси́ о́ныя из Сио́на исше́дшим зако́ном, Богоразу́мне,/ уча́ вся ве́рныя мольба́ми и посто́м приима́ти Ду́ха благода́ть.

Реши́л еси́, преподо́бне, зе́льную печа́ль/ царя́ и цари́цы благочести́вых, и́же моли́ли тя,/ отгна́в от дще́ри их царе́вны му́чащаго ю де́мона,/ благодари́ша бо Бо́га, ра́достне диви́шася живу́щей в тебе́ Ду́ха благода́ти.

Богоро́дичен: По рождестве́ Твое́м стра́ннем пребыла́ еси́ Де́вою,/ я́коже пре́жде: Бог бо бе рожде́йся, и претворя́яй вся во́лею,/ Безму́жная Мари́е Богоневе́стная.

Песнь 6

Ирмо́с: Очище́ние нам, Христе́,/ и спасе́ние, Влады́ко,/ возсия́л еси́ от Де́вы,/ да, я́ко проро́ка от зве́ря морска́го пе́рсей Ио́ну,/ от тли исхити́ши/ всего́ Ада́ма всеро́дна па́дшаго.

Очище́ние Це́ркве твоея́ бо́дрым пасо́мством от ерети́ческаго злове́рства/ и от вся́каго собла́зна сотвори́в, Богоно́се о́тче,/ зве́ря, челове́ческих душ губи́теля, уби́л еси́ моли́твами твои́ми.

Очище́ние душе́внаго твоего́ Богозри́тельнаго смы́сла, о́тче Дона́те, соде́ловая,/ от пристра́стнаго жития́ и царе́вых трудо́в за труд не восхоте́л еси́ взя́ти,/ да от тлеро́дныя земли́ удо́бь исхити́шися.

Очище́ние чу́дно бе́дствующей жене́/ от напра́снаго заимоистяза́тельнаго до́лга сотвори́л еси́, преподо́бне:/ ми́лостивно бо, ея́ скорбь услы́шав, воздви́гл му́жа уме́рша,/ и́же обличи́ оби́ду творя́щаго.

Богоро́дичен: Очище́ние, Богороди́тельнице Де́во, тлеро́днаго сладостра́стия правове́рным подала́ еси́,/ из Тебе́ бо произше́д, Влады́ка Христо́с возста́ви ны, па́дшия,/ же́ртву хвале́ния Ему́ при́сно возноси́ти.

Конда́к, глас 8.

Подо́бен: Взбра́нной Воево́де:

Красото́ Це́ркве, утверди́вшияся на ка́мени – Боговоплоще́нном Спа́се Христе́,/ Богоправи́мое доброде́телей прави́ло,/ Дона́те, досточу́дный чудотво́рче,/ я́ко иера́рх име́еши дерзнове́ние всетворя́щему Бо́гу о лю́дех моли́тися,/ враго́в ви́димых и неви́димых предста́тельством твои́м свободи́ вопию́щия:/ сла́ва в Тро́ице Еди́ному Бо́гу.

И́кос:

Досто́йно в ми́ре жи́тельствуя,/ Боже́ственным любви́ Бо́жия пла́менем Боголюби́вое се́рдце твое́ распаля́я/ и Небе́сным духо́внаго исправле́ния огне́м умовре́дныя прегреше́ний людски́х пле́велы пожига́я,/ богомы́сленно Триипоста́снаго Бо́га пропове́дал еси́,/ Его́же Боже́ственным дарова́нием чуде́с ре́ки, Дона́те всехва́льне, источи́л еси́./ Те́мже вопие́м ти:/ ра́дуйся, от ю́ности воздержа́нию научи́вся;/ ра́дуйся, в мла́дости седи́нами ума́ благоукраси́вся./ Ра́дуйся, чи́стое житие́ в достосла́вном де́встве соверши́вый;/ ра́дуйся, посто́м и моли́твами Всеблаго́му Бо́гу на́шему угоди́вый./ Ра́дуйся, победи́в вся преле́стнаго сего́ земна́го ми́ра сла́сти;/ ра́дуйся, от лука́ваго де́мона приснонаноси́мыя отрази́в стра́сти./ Ра́дуйся, я́ко досто́ин па́стырь, на престо́л архиере́йский возведе́нный;/ ра́дуйся, па́ству твою́ на па́жити ева́нгельской до́бре пасы́й, ублаже́нный./ Ра́дуйся, испо́лнен я́влься ми́лостивых ко всем благотворе́нии;/ ра́дуйся, Богопоста́вленный столп архиере́йских удобре́ний./ Ра́дуйся, чуде́с во Христе́ пресла́вных в по́льзе сотвори́тель;/ ра́дуйся, в любо́вь Христо́ву мно́гих научи́тель./ Ра́дуйся, тебе́, приве́тствующе, вопие́м:/ сла́ва в Тро́ице Еди́ному Бо́гу.

Песнь 7

Ирмо́с: Согла́сная возшуме́ орга́нская песнь/ почита́ти златосотворе́нный безду́шный истука́н;/ Уте́шителева же светоно́сная благода́ть повеству́ет,/ е́же вопи́ти:/ Тро́ице Еди́ная, Равноси́льная, Безнача́льная, благослове́нна еси́.

Согла́сно покори́в те́ло ду́ху,/ Пренача́льней Боже́ственней Тро́ице боготворе́нным тобо́ю орга́ном/ воспе́л еси́, блаже́нне Дона́те, досто́йную песнь: аллилу́ия,/ Ю́же моли́, мо́лим тя, да благода́ть Ду́ха научи́т ны зва́ти ве́чно:/ Тро́ице Свята́я, благослове́нна еси́.

Согла́сно отце́в святы́х догма́ты о Тро́йческом Богонача́лии,/ е́же ве́ровати, е́же сла́вити Еди́но Божество́ в Трие́х Ипоста́сех, кре́пце содержа́в,/ я́сно во вселе́нную пропове́дал еси́, всехва́льне,/ Ю́же ны́не несре́дственно на Небе́сных гора́х зри́ши, поя́ сла́дце:/ Тро́ице Безнача́льная, благослове́нна еси́.

Согла́сно друголю́бием пода́ждь нам, иера́рше Христо́в,/ почита́ти во псалме́х и пе́нии Всеси́льнаго Бо́га и Творца́ на́шего/ и велича́ти Боговлады́чицу Де́ву Мари́ю,/ да безме́рная Его́ ми́лость предста́тельством Всечи́стыя Ма́тере/ возста́вит па́дшия ны́не ра́достне глаго́лати:/ Тро́ице Еди́ная, благослове́нна еси́.

Богоро́дичен: Согла́сно прореко́ша святи́и проро́цы о Тебе́, Де́во Всечи́стая,/ я́ко роди́ши Бо́га воплоще́нна,/ мы же, сбытие́ в соверше́нстве ви́дяще,/ велича́ем Тя, Ма́терь Бо́га Вы́шняго,/ и сла́вим неизрече́нное Твое́ рождество́, моля́ще же Тя, глаго́лем:/ спаси́ ны, Влады́чице, от бед и скорбе́й, благослове́нна еси́.

Песнь 8

Ирмо́с: Разреша́ет у́зы и ороша́ет пла́мень/ Трисве́тлый Богонача́лия о́браз, пою́т о́троцы:/ благослови́т же Еди́наго Спа́са и Вседе́теля,/ я́ко Благоде́теля,/ сотворе́нная вся́ческая тварь.

Разреши́вшаго смерть Кресто́м Свои́м/ и пла́мене пагубоно́сных страсте́й богоподража́тельныя избавля́ющаго,/ Небе́снаго Царя́ богомы́сленне благослови́л еси́, о́тче, зовы́й:/ благослови́ Вседе́теля, вся́ческая тварь.

Разреше́ние в ско́рбех и печа́лех наде́ждою на Всемо́щнаго Бо́га мно́гим пешехо́дцем/ волновоздвиза́емаго сего́ мо́ря по́дал еси́, досточу́дне Дона́те,/ уче́нии бо твои́ми уте́шены, вопие́м:/ благослови́ Го́спода, вся́ческая тварь.

Разреши́л еси́ тучено́сныя небе́сныя о́блаки излия́ти дождь мно́гий/ мольба́ми твои́ми лити́йными, преподо́бне,/ царь бо самоде́ржец и вси Константино́поля гра́ждане,/ богоуго́дную твою́ по́мощь ви́девше, любо́вне глаго́лаша:/ благослови́ Го́спода, вся́ческая тварь.

Богоро́дичен: Разреши́ла еси́, Богора́дованная Де́во, прама́терния кля́твы весь род челове́ч:/ воплоще́нный бо Твой Сын и Бог наш пострада́ за ны и умири́ Кро́вию Свое́ю Бо́га Отца́,/ да в животе́ ве́чнем спасе́мся, воспева́юще:/ благослови́ Святу́ю Тро́ицу и велича́й Богоро́дицу, вся́ческая тварь.

Песнь 9

Ирмо́с: Ра́дуйся, Цари́це,/ матероде́вственная Сла́во,/ вся́ка бо удобообраща́тельная благоглаго́ливая уста́/ вити́йствовати не мо́гут,/ Тебе́ пе́ти досто́йно,/ изумева́ет же ум всяк Твое́ рождество́ разумети,/ те́мже Тя согла́сно сла́вим.

Ра́дуйся, Богоизбра́нное христиа́нское свети́ло,/ просвети́вшее Богоразу́мия све́том вселе́нную, архиере́е Дона́те,/ незы́блемая Правосла́вия твердь,/ утверди́ ду́ши на́ша в ве́ре и любви́ пребыва́ти/ и присносу́щнаго Бо́га при́сно и согла́сно сла́вити.

Ра́дуйся, всехва́льне Дона́те, боготка́нная правосла́внаго благоче́стия ри́зо,/ многоце́нными превели́ких доброде́телей би́серми боголе́пно удобре́нная,/ моли́ све́том оде́яющася Бо́га/ в све́тлую ве́чныя жи́зни ри́зу оде́ятися нам,/ да Его́ Творца́ согла́сно сла́вим.

Ра́дуйся, богонасажде́ннаго са́да прему́дрый де́лателю,/ созда́вый храм че́стен и украси́вший той преизя́ществом во сла́ву Христа́, Безсме́ртнаго Царя́,/ и, испо́лнив те дни жи́зни и успну́в, ны́не чи́сте зри́ши в Небесе́х Бо́га,/ у Него́ же испроси́ нам во благоду́шии повсю́ду Его́ согла́сно сла́вити.

Богоро́дичен: Ра́дуйся, Богома́ти, Де́во Мари́е, наде́ждо и предста́тельство христиа́нское,/ воплоти́вшемуся из Тебе́ Сы́ну Иису́су Христу́ и Тебе́, Влады́чице,/ в па́мять уго́дника ва́шего, Дона́та святи́теля, во усе́рдии моле́ние прино́сим:/ подади́те нам в Небе́сном жили́ще Тро́ицу со А́нгелы сла́вити.

Свети́лен.

Подо́бен: Жены́, услы́шите:

Богоявле́ния све́том свы́ше просвеще́нный/ и окропле́нный и́стины благода́тию, Богому́дре о́тче Дона́те,/ смире́ния Богочелове́ка Иису́са ревни́тель был еси́,/ благоугоди́в Ему́ архиере́йскою пра́востию и чудесы́ просвети́вся,/ те́мже, соверша́юще твою́ па́мять, сла́вим Го́спода Бо́га.

Сла́ва, и ны́не, Богоро́дичен:

Златоте́чная Бо́жия реко́, небе́сными наводне́нная даро́в Ду́ха,/ неботе́чную ра́дости небе́сныя струю́ источа́й на скорбя́щия ду́ши на́ша/ и да́руй нам Твою́ по́мощь, да зове́м Ти:/ ра́дуйся, Ма́ти Госпо́дня.

На хвали́тех стихи́ры, глас 2.

Подо́бен: Егда́ от Дре́ва:

Све́тлое днесь наста́ торжество́/ Богоно́снаго отца́ иера́рха Дона́та,/ прииди́те, вси благоу́мствующии,/ восхва́лим све́тлаго сего́ свети́льника и чудотво́рца вели́ка,/ сподо́бившагося Го́рняго со А́нгелы жития́,/ я́ко да того́ мольба́ми к Бо́гу/ прии́мем скорбе́й ку́пно и прегреше́ний избавле́ние.

На высоте́ смире́ния,/ кро́тости же и целому́дрия воспери́вся,/ псало́мски в дому́ Бо́жий,/ я́ко крин благово́нный, процве́л еси́,/ о́тче Богому́дре Дона́те,/ облагово́нил еси́ Богопропове́дническими уче́нии Христо́ву Це́рковь,/ Боже́ственная бо благода́ть/ излия́ся из уст твои́х/ благове́рующим во спасе́ние.

Равноа́нгельное на земли́ житие́ пожи́вый/ и упра́вивый до́бре ста́до Христо́во,/ непреходя́щее селе́ние со А́нгелы и архиере́и насле́дил еси́,/ Богоно́се о́тче Дона́те./ Свята́я бо твоя́ душа́/ на Не́бо к ликостоя́нием А́нгельским Бо́гом преселе́на бысть,/ чудотвори́вое же те́ло твое́/ в со́зданием тобо́ю хра́ме положи́ся на исцеле́ние притека́ющим.

Благово́ннейшее ми́ро врачева́ний/ источа́еши нам днесь, Дона́те о́тче,/ в Боже́ственней па́мяти твое́й,/ и отгоня́еши, му́дре, мглу скорбе́й и стра́сти теле́сныя,/ и плоды́ земны́ми, дожди́ подая́,/ обогаща́еши вся, вопию́щий Христу́:/ Ты еси́ неистоще́нное Ми́ро,/ благоуха́ющее пою́щия Тя, Го́споди.

Сла́ва, глас 5:

Христа́ Боговоплоще́нна,/ И́стиннаго Па́стыря усе́рдный подража́тель,/ апо́стольских пропове́даний согла́сниче,/ иера́рше прему́дре Дона́те,/ благово́нного Сло́ва Бо́жия па́житию/ слове́сную па́ству Христо́ву богоуго́дно воспита́в,/ на пра́вую стезю́ спасе́ния путево́дствив/ и чудоде́лиями вся на вселе́нней умносло́вцы удиви́в,/ врачу́я не́мощи вся́кия,/ я́ко Богоуго́дный па́стырь удосто́ился еси́/ нетле́нную ве́чныя жи́зни мзду восприя́ти в Го́рнем Сио́не/ от Пастыренача́льника Го́спода Иису́са./ Его́же моли́, всеблаже́нне,/ сохрани́тися от хи́щных неви́димых волко́в честву́ющим тя/ и сподо́битися всем Небе́снаго Ца́рствия.

И ны́не, Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и прибе́жище душ на́ших.

Славосло́вие вели́кое, и про́чее, и отпу́ст, и час пе́рвый.

НА ЛИТУРГИ ́И

Блаже́нны от кано́на свята́го, пе́сни 3-я и 6-я. А́ще Пятидеся́тница – песнь пра́зднику. Проки́мен, глас 7: Восхва́лятся преподо́бнии во сла́ве/ и возра́дуются на ло́жах свои́х. Стих: Воспо́йте Го́сподеви песнь но́ву, хвале́ние Его́ в Це́ркви преподо́бных. Апо́стол ко Евре́ем, зача́ло 311: Бра́тие, иму́ще у́бо Архиере́я вели́ка: Коне́ц: по чи́ну Мелхиседе́кову. Аллилу́ия, глас 2. Стих: Блаже́н муж, боя́йся Го́спода, в за́поведех Его́ восхо́щет зело́. Стих: Гото́во се́рдце его́ упова́ти на Го́спода. Ева́нгелие от Луки́, зача́ло 67: Рече́ Госпо́дь: не бо́йся, ма́лое ста́до: Коне́ц: Сын Челове́ческий прии́дет . Прича́стен: В па́мять ве́чную:

(службу зри 31 января)

Тропа́рь, глас 4:

Наслади́вся, Богому́дре, воздержа́ния/ и жела́ние пло́ти твоея́ обузда́в,/ на престо́ле святи́тельства сел еси́/ и, я́ко звезда́ многосве́тлая,/ просвеща́я ве́рных сердца́/ заря́ми чуде́с твои́х,/ о́тче наш святи́телю Ники́то,/ и ны́не моли́ Христа́ Бо́га,/ да спасе́т ду́ши на́ша.

Конда́к, глас 6.

Подо́бен: Е́же о нас:

Архиере́йства са́ном почти́вся/ и чи́сте Чисте́йшему предстоя́,/ приле́жно моле́ние за лю́ди твоя́ приноси́л еси́,/ я́ко и дождь моли́твою свел еси́,/ овогда́ же и гра́да запале́ния угаси́л еси́./ И ны́не, святи́телю Ники́то,/ моли́ Христа́ Бо́га/ спасти́ лю́ди твоя́ моля́щияся,/ да вси вопие́м ти:/ ра́дуйся, святи́телю, о́тче преди́вный.

НА МА́ЛЕЙ ВЕЧЕ́РНИ

На Го́споди, воззва́х: стихи́ры на 4, глас 2.

Подо́бен: Егда́ от Дре́ва:

Святи́телю Игна́тие пречу́дне,/ бысть Фиваи́да Русская земля́ се́верная,/ и́ноческих по́двигов и трудо́в твои́х нача́ло,/ иде́же Подвигополо́жника Го́спода Иису́са,/ в моли́твеннем де́лании тебе́ укрепля́юща, обре́л еси́.

Егда́, в во́зраст прише́д,/ нача́льник мона́хов соде́лался еси́,/ тогда́ оби́тель се́верная во и́мя Се́ргия преподо́бнаго прия́т тя, о́тче,/ и та́мо позна́л еси́ ме́ру скорбе́й вели́ких и боле́зней тя́жких,/ та́же и утеше́ния от при́сных бра́тий твои́х, и посеще́ния я́вльшагося ти Ду́ха Уте́шителя сподо́бился еси́.

Страны́ ю́жныя, близ По́нта лежа́щия,/ послуша́нием Святе́й Це́ркви дости́гл еси́, о́тче,/ во святи́тельстем зва́нии твое́м/ яви́лся еси́ оте́ц и наста́вник наро́дов и племе́н Кавка́зских,/ жа́ждавших сло́ва Христо́ва.

Егда́ же вре́мя отше́ствия твоего́ прибли́жися,/ святи́телю Госпо́день Игна́тие,/ тогда́ во оби́тели и́ночестей на бре́зе Во́лжстем,/ труды́ сло́ва и моли́твы полага́я,/ со упова́нием к Бо́гу отше́л еси́,/ в Не́мже обре́т поко́й и мир мног.

Сла́ва, и ны́не, пра́здника.

На сти́ховне стихи́ры, глас 1.

Подо́бен: Небе́сных чино́в:

Уче́ньми отца́ духо́внаго наставля́ем,/ о́тче Игна́тие,/ пра́вилом жи́зни и́ноческия обуча́лся еси́/ и, в послуша́ниих разли́чных/ упражня́яся усе́рдно, / путь святы́х соверши́л еси́.

Стих: Честна́ пред Го́сподем,/ смерть преподо́бных его́.

Му́дрость стяжа́в духо́вную,/ та́кожде и зна́ние писа́ний оте́ческих,/ ча́да послуша́ния/ во мно́жестве приобре́л еси́, о́тче,/ и́хже к Ца́рству Небе́сному и ве́чному/ духо́вно руководи́л еси́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Возлюби́в ду́шу бли́жняго твоего́,/ е́же ко Го́споду Спа́су привести́ ю,/ любо́вь духо́вную к ча́дом твои́м явля́я,/ псало́мски восклица́л еси́:/ прииди́те, ча́да, послу́шайте мене́,/ стра́ху Госпо́дню научу́ вас.

Сла́ва, и ны́не, пра́здника.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н.

На Го́споди, воззва́х: стихи́ры пра́здника 3 и свята́го 5, глас 5.

Подо́бен: Ра́дуйся:

Ра́дуйся и весели́ся све́тло,/ земле́ Русская,/ но́ваго святи́теля Бо́жия, Игна́тия, яви́вшая,/ и́же ве́ру Христо́ву писа́ными свои́ми изъясни́/ и, зако́ны Ду́ха воспису́я,/ стезю́ жития́ духо́внаго я́сно соде́ла.

Ра́дуйся, святи́телю Игна́тие преди́вне,/ измла́да путь за́поведей Христо́вых возлюби́в,/ избра́нник Госпо́день преди́вен яви́лся еси́,/ горни́ло же искуше́ний и бед преше́д,/ учи́тель правосла́вным лю́дем показа́ся,/ жи́зни ве́чныя зако́ны духо́вныя изъясня́я.

Ра́дуйся, и́же во и́ночестем чи́не/ и́мя Богоно́сца восприя́л еси́,/ си́це и сам, святи́телю Игна́тие,/ ско́рби и боле́зни, я́ко священному́ченик, терпя́,/ чрез все житие́ твое́/ и́мя Христо́во внутрь се́рдца своего́ запечатле́л еси́,/ моли́твою непреста́нною укрепля́яся.

Ра́дуйся, святи́телю Христо́в богому́дре,/ Бо́га и́стиннаго и жи́ва взыска́в,/ да́же до конца́ дний твои́х предстоя́л еси́ Христу́,/ моли́твою непреста́нною и любо́вию укрепля́яся,/ та́же терпе́нием скорбе́й находя́щих утвержда́яся.

Сла́ва, глас 4:

К пра́вде ве́чней и жи́зни неконча́емей устреми́лся еси́,/ святи́телю Игна́тие пречу́дне,/ и, сия́ бли́жним твои́м испове́дуя,/ к любви́ Бо́жией призыва́л еси́,/ ны́не же в незаходи́мей сла́ве жития́ непрестаю́щаго/ в Ца́рствии Христо́ве сия́еши.

И ны́не, пра́здника.

Вход. Проки́мен дне. И чте́ния.

При́тчей чте́ние (главы́ 3 и 8):

Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те прему́дрость, и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных, все же честно́е недосто́йно ея́ есть./ Долгота́ бо дней и лета живота́ в десни́це ея́, в шу́йце же ея́ бога́тство и сла́ва./ От уст ея́ исхо́дит пра́вда, зако́н же и ми́лость на язы́це но́сит./ Послу́шайте у́бо Мене́, о ча́да, честна́я бо реку́: и блаже́н челове́к, и́же пути́ Моя́ сохрани́т;/ исхо́ди бо Мои́, исхо́ди живота́, и уготовля́ется хоте́ние от Го́спода./ Сего́ ра́ди молю́ вас и предлага́ю Мой глас сыново́м челове́ческим:/ я́ко Аз прему́дрость устро́их, сове́т и ра́зум, и смысл Аз призва́х./ Мой сове́т и утвержде́ние, Мой ра́зум, Моя́ же кре́пость./ Аз мене́ лю́бящия люблю́, и́щущий же Мене́ обря́щут благода́ть./ Разуме́йте у́бо, незло́бивии, кова́рство, ненака́зании же, прилага́йте сердца́./ Послу́шайте Мене́ и па́ки, честна́я бо реку́: и отве́рзу от усте́н пра́вая,/ я́ко и́стине поучи́тся горта́нь Мой, ме́рзки же предо Мно́ю устны́ лжи́выя./ С пра́вдою вси глаго́лы уст Мои́х: ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Научу́ бо вас и́стине, да бу́дет о Го́споде наде́жда ва́ша и испо́лнитеся Ду́ха.

Прему́дрости Соломо́новы чте́ние (главы́ 10, 6, 8 и 9):

Уста́ пра́веднаго ка́плют прему́дрость, устне́ же муже́й му́дрых ве́дят благода́ть./ Уста́ му́дрых поуча́тся прему́дрости, пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т и во благи́х свои́х плод пра́вды обы́мет./ Свет пра́ведным всегда́, и от Го́спода обря́щут благода́ть и сла́ву./ Язы́к му́дрых до́брая свесть, и в се́рдце их почи́ет му́дрость./ Лю́бит Госпо́дь преподо́бная сердца́, прия́тии же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю, пре́жде да́же разуме́ти ю, и удо́бь у́зрится от лю́бящих ю./ У́треневавый к ней не утруди́тся, и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи, и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́, и возлюби́х ю, и поиска́х от ю́ности моея́./ И взыска́х неве́сту привести́ себе́, я́ко всех Влады́ка возлюби́ ю./ Таи́бница бо есть Бо́жия хи́трости и обрета́тельница дел Его́./ Труды́ ея́ суть доброде́тели: целому́дрию же и ра́зуму та учи́т, пра́вде и му́жеству,/ и́хже потре́бнее ничто́же есть в житии́ челове́ком./ А́ще же и мно́гаго иску́сства жела́ет кто, весть дре́вняя и бы́ти хотя́щая разсмо́трит./ Свесть изви́тия слове́с и разреше́ния гада́ний, зна́мения и чудеса́ проразуме́ет, и сбытия́ време́н и лет;/ и всем сове́тник есть благ, я́ко безсме́ртие есть в ней и благосла́вие во обще́нии слове́с ея́./ Сего́ ра́ди бесе́довах ко Го́споду, и помоли́хся Ему́, и рех от всего́ се́рдца моего́:/ Бо́же отце́в и Го́споди ми́лости, сотвори́вый вся сло́вом Твои́м/ и му́дростию Твое́ю устро́ивый челове́ка, да владе́ет бы́вшими от Тебе́ тварьми́ и да управля́ет мир в преподо́бии и пра́вде./ Даждь ми Твои́х престо́лов приседя́щую прему́дрость и не отлучи́ мене́ от о́трок Твои́х, я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́ и от Престо́ла сла́вы Твоея́,/ да су́щи со мно́ю, научи́т мя, что благоуго́дно есть пред Тобо́ю,/ и наста́вит мя в ра́зум, и сохрани́т мя в сла́ве свое́й./ Помышле́ния бо сме́ртных вся боязли́ва, и погреши́тельна умышле́ния их.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гови быв, возлю́блен бысть, и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга. Уго́дна бо бе Го́сподеви душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ поло́жше в помышле́нии таково́е./ Я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 1:

Мысль спаси́тельную,/ е́же после́довати уче́нию святы́х оте́ц,/ наре́кл еси́, о́тче преподо́бне, звезду́ твою́,/ путево́дствующую тя/ и освеща́ющую те́сный путь/ ума́ и се́рдца твоего́ к Бо́гу.

Мысль блага́я,/ путево́дствующая тя, о́тче богому́дре,/ на исто́чники воды́ живы́я/ приведе́ во оби́тели ино́ческия,/ иде́же в по́двизех мно́зех/ Бо́га приобре́л еси́.

Сла́ва, глас то́йже:

Страну́ и́стины обре́л еси́, о́тче преподо́бне,/ уче́ние святы́х оте́ц,/ и, тех писа́нием чрез все житие́ твое́ усе́рдно после́довав, взыва́л еси́:/ си́и суть зве́зды небе́сныя, испуща́ющия согла́сный и еди́ный свет,/ си́и суть корабли́, иду́щии к при́стани еди́ней,/ сей лик, воспева́яй еди́ную Боже́ственную песнь,/ и, тех уче́нию после́дуя,/ ду́шу твою́ к ве́чней жи́зни упра́вил еси.

И ны́не, пра́здника.

На стихо́вне стихи́ры, глас 6:

Песнь свяще́нную воспе́л еси́, преподо́бне о́тче,/ под се́нию Креста́ Госпо́дня,/ песнь хвалы́ и благодаре́ния,/ те́мже и лю́дем Бо́жиим, в стра́нствии су́щим,/ воздава́ти хвалу́ Бо́гови у подно́жия Дре́ва Кре́стнаго/ помози́ твои́ми моли́твами.

Стих: Честна́ пред Го́сподем/ смерть преподо́бных его́.

Изъясни́л еси́ нам, о́тче, писа́нии твои́ми,/ что есть ча́ша Христо́ва./ Сию́ ча́шу скорбе́й и напа́стей,/ о́тче преподо́бне,/ я́ко дар Бо́жий, с благодаре́нием приима́ти в житии́ на́шем/ помози́ нам твои́ми моли́твами.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Жите́йское мо́ре страсте́й и скорбе́й/ душе́ю тве́рдою преше́л еси́, я́ко кораблеце́м,/ те́мже ду́ши на́ша, во́лнами грехо́вными обурева́емыя,/ сохрани́ в спаси́тельнем корабли́ Це́ркве Христо́вы,/ я́ко моли́твенник изря́дный.

Сла́ва, и ны́не, пра́здника.

Тропа́рь, глас 8:

Правосла́вия побо́рниче,/ покая́ния и моли́твы де́лателю и учи́телю изря́дный,/ архиере́ев богодухнове́нное украше́ние,/ мона́шествующих сла́во и похвало́:/ писа́нии твои́ми вся ны уцелому́дрил еси́./ Цевни́це духо́вная, Игна́тие богому́дре,/ моли́ Сло́ва Христа́ Бо́га,/ Его́же носи́л еси́ в се́рдце твое́м,/ дарова́ти нам пре́жде конца́ покая́ние.

Ин тропа́рь, глас то́йже:

Избра́нник возлю́блен Христо́ви яви́лся еси́,/ Тому́ скорбьми́ мно́гими и моли́твою непреста́нною прилепи́вся,/ благода́ть Ду́ха Свята́го стяжа́в,/ учи́тель изря́ден лю́дем был еси́./ Помина́й нас, святи́телю Игна́тие, богоно́се Русский,/ да уче́нии и моли́твами твои́ми покая́ние спаси́тельное обря́щем/ и любо́вию серде́чною Христу́ усво́имся.

Сла́ва, и ны́не, пра́здника.

НА У́ТРЕНИ

На Бог Госпо́дь: тропа́рь пра́здника два́жды. Сла́ва, святи́теля. И ны́не, пра́здника.

По 1-м стихосло́вии седа́лен, глас 2:

Моли́твами и скорбьми́ мно́гими в житии́ твое́м Христу́ соедини́вся,/ учи́тель изря́ден и помо́щник лю́дем твои́м яви́лся еси́, святи́телю Игна́тие,/ моли́ о чту́щих па́мять твою́, блаже́нне.

Сла́ва, и ны́не, пра́здника.

По 2-м стихосло́вии седа́лен, глас 8:

Рекл еси́, о́тче: е́же размышля́ти о вочелове́чении Бо́га Сло́ва,/ о спаси́тельных страда́ниих и Воскресе́нии Его́,/ степе́нь есть виде́ния духо́внаго,/ е́же моли́твами твои́ми сподо́би ны стяжа́ти, о́тче преподо́бне.

Сла́ва, и ны́не, пра́здника.

По полиеле́и седа́лен, глас 5.

Подо́бен: Преподо́бне о́тче:

Преподо́бне о́тче, святи́телю всече́стне, ты учи́л еси́,/ я́ко моли́тва, ве́ра пра́вая и терпе́ние скорбе́й потре́бны, во е́же спасти́ся./ Помози́ нам, свя́тче Бо́жий,/ да уче́ньми твои́ми огражда́еми, спасе́ние душ на́ших улучи́м.

Сла́ва, и ны́не, пра́здника.

По 50-м псалме́ стихи́ра, глас 6:

Позна́л еси́ та́йну святы́я трапе́зы Госпо́дни/ в сия́нии свети́ла вели́каго:/ я́коже со́лнце, учи́л еси́, во вся́цей ка́пли росы́ отображе́но есть,/ та́кожде и в трапе́зе Госпо́дни/ ки́йждо приобще́н есть Христу́ всеце́ло по Божеству́ и челове́честву./ К сему́ же та́инству со стра́хом Бо́жиим и неосужде́нно приступа́ти/ твои́ми моли́твами, свя́те Игна́тие, нас сподо́би.

Кано́н пра́здника на 6 и свята́го на 8.

Кано́н свята́го, глас 8.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бого́ви воспева́юща.

Путь ду́ховный, к Бо́гу Жи́ву веду́щий, преше́л еси́, святи́телю Игна́тие,/ я́сно указу́я нам, ка́ко подоба́ет стезю́ жития́ земна́го преходи́ти,/ уче́нию Христо́ву вне́млюще.

Пе́рвую степе́нь в ле́ствице доброде́телей Ева́нгельских, нищету́ духо́вную, узре́л еси́, о́тче,/ и той после́довати, ту́ю возлюби́ти,/ то́ю пути́ духо́внаго нача́ло полага́ти заве́т твой дал еси́.

Нищета́ ду́ха, рекл еси́, соль есть всех жертв духо́вных,/ нищета́ бо ду́ха блаже́нство пе́рвое нарече́ся во Святе́м Ева́нгелии Христо́ве,/ е́йже вси про́чии блаже́нства, кро́тость, милосе́рдие, се́рдца чистота́, после́дуют и е́ю соверша́ются.

Богоро́дичен: Ма́ти Све́та, Пречи́стая Богороди́тельнице,/ житие́ спаси́тельно на земли́ с Сы́ном и Бо́гом Твои́м соверши́вшая,/ нас, недосто́йных, укрепи́, от грехо́в изба́ви и к пра́вде ве́чней ше́ствовати утверди́.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Пра́вду Христо́ву в житии́ свое́м воспису́я, святи́телю Христо́в Игна́тие,/ обре́л еси́ на пути́ сем, е́же пла́кати и рыда́ти о соде́янных злых/ и к Спаси́телю ми́ра притека́ти.

В ю́ности пла́чем и́ноческим го́рце воспла́кал еси́ в ке́ллии свое́й/ о разруше́нии хра́ма се́рдца челове́ческаго,/ Бо́гом созда́ннаго Богослуже́ния возвы́шеннаго ра́ди, о плене́нии души́ и ума́,/ от сих же всех то́кмо еди́нем Богочелове́ком Спаси́телем изба́вимся.

И па́ки плач стяжа́л еси́, о́тче, в и́ночестем житии́ твое́м,/ егда́ вся прегра́ды, от Бо́га удаля́ющия тя, препобеди́л еси́./ Сего́ пла́ча ра́ди помяни́ нас, чту́щих святу́ю па́мять твою́.

Богоро́дичен: Де́во Пречи́стая, печа́ли на́ша и ско́рби утоля́ющая,/ плач спаси́тельный подава́й нам,/ да о бе́здне зол на́ших и непра́вд воспла́чем пред Тобо́ю.

Конда́к и и́кос пра́здника.

Седа́лен, глас 3:

Поуча́л еси́, о́тче достохва́льне,/ я́ко моли́тву чи́сту стяжа́ти, та́же чу́вство покая́ния и пла́ча возлюби́ти/ дово́льно есть, во е́же спасе́ние ве́чное улучи́ти,/ его́же и нас, гре́шных, сподо́би моли́твами твои́ми, свя́те.

Сла́ва, и ны́не, пра́здника.

Песнь 4

Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти/ си́ле Твое́й сла́ва, Человеколю́бче.

Та́йны жития́ и́ноческаго взыску́я, блаже́нне Игна́тие,/ позна́л еси́, я́ко ка́ятися подоба́ет и труд и́ноческий ничто́же и́но есть,/ е́же де́лание непреста́ннаго покая́ния.

В покая́нии, слеза́х и пла́че о соде́янных злых/ узре́л еси́, о́тче, спасе́ния путь, к Го́рней жи́зни веду́щий,/ и́же предлежи́т и вся́кому нося́щему и́мя Христо́во.

Рекл еси́, о́тче преподо́бне, я́ко до́лжно есть покая́нием стра́сти отсека́ти,/ та́же покая́нием доброде́лание стяжа́ти,/ и, а́ще не у́зрит о́ко на́ше, я́ко гре́шни есмы́,/ не и́мамы спасе́ния ве́чнаго улучи́ти.

Богоро́дичен: Ма́ти Бо́жия, гре́шных Спору́чнице и Помо́щнице,/ путь наш, к Бо́гу веду́щий, покая́нием и́стинным укрепи́,/ зре́нием греха́ и испове́данием его́ напра́ви.

Песнь 5

Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Пла́чем и покая́нием непреста́нным ду́шу твою́ снабдева́я, о́тче Игна́тие,/ де́латель моли́твы яви́лся еси́, сию́ от во́зраста младе́нческаго возлюби́в,/ и в основа́ние жи́зни духо́вныя положи́л еси́.

Моли́твою усе́рдною житие́ твое́ от ю́ности укрепля́я,/ да́же до кончи́ны по́двиг твой моли́твенный ко Христу́ Бо́гу соблюда́л еси́,/ и́мже о Бо́зе Спа́се утвержда́яся.

В во́зраст му́жеский прише́д, мона́хов нача́льник быв и многообра́зныя ско́рби испыту́я,/ в моли́тве тве́рдей и непреста́нней со мно́гими слеза́ми/ осла́бу и отра́ду и́стинную почерпа́л еси́, о́тче всеблаже́нне.

Богоро́дичен: Де́во Пречи́стая, Ма́ти Христа́ Бо́га,/ вене́ц моли́твы неусыпа́ющия,/ о нас, гре́шных, мольбу́ Бо́гу принеси́/ и моле́нием Твои́м от напа́стей и скорбе́й нас изба́ви.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Яви́лся еси́ учи́тель моли́твы серде́чныя, о́тче наш Игна́тие,/ я́сно наставля́я, ка́ко до́лжни есмы́ пред Лице́м Христо́вым предстоя́ти/ и моли́тву покая́ния твори́ти.

Подоба́ет на моли́тве, поуча́л еси́, о́тче,/ вста́ти в ли́це прокаже́нных, слепы́х, глухи́х, хромы́х/ и та́ко ко Христу́, от се́рдца сокруше́ннаго,/ от нищеты́ ду́ха на́шего, моли́тву тща́тися твори́ти.

Егда́ тишина́ возве́ет в се́рдце на моли́тве, поуча́л еси́, о́тче,/ и мир ко всем, смире́ние, сострада́ние и любо́вь к челове́ком,/ тогда́ позна́ем, я́ко благода́ть Ду́ха Свя́та сие́ соде́ла.

Богоро́дичен: Ма́ти Бо́жия, Ду́ха Свята́го прия́телище непостижи́мое,/ о сме́ртных нас моли́ся/ и моли́тву на́шу к Бо́гу упра́ви.

Конда́к, глас 8.

Подо́бен: А́ще и во Гроб:

А́ще и соверша́л еси́ стезю́ жития́ земна́го, святи́телю Игна́тие,/ оба́че непреста́нно зрел еси́ зако́ны бытия́ ве́чнаго,/ сему́ поуча́я ученики́ словесы́ мно́гими,/ и́мже после́довати и нам, свя́тче, помоли́ся.

И́кос:

Рекл еси́, о́тче, в писа́ниих твои́х,/ я́ко подоба́ет име́ти страх Бо́жий,/ во е́же вступи́ти в соверше́нство всех доброде́телей, любо́вь Бо́жию,/ и та́ко Отцу́ Небе́сному уподо́битися./ Сему́ уче́нию после́довати и нам, свя́тче, помоли́ся.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

В зи́мнем обнаже́нии ве́твей древе́сных поуча́лся еси́, о́тче, та́йне воскресе́ния ме́ртвых,/ я́коже бо дре́во во вре́мя свое́ ли́ствием покрыва́ется, та́ко и ко́сти челове́ческия оживу́т/ и, обле́кшеся пло́тию, в мир но́вый вступи́ти и́мут.

Позна́л еси́, о́тче, ели́ко возмо́жно,/ та́йну кончи́ны бытия́ челове́ческаго, та́йну естества́ а́нгельскаго и души́ челове́ческия,/ и возда́л еси́ благодаре́ние Бо́гу.

Еди́наго то́кмо Бо́га, Ду́ха И́стины, испове́дал еси́,/ И́же Еди́н всесоверше́н есть,/ Ему́же покланя́ющеся, тя, о́тче, велича́ем.

Богоро́дичен: Де́во Мари́е, Ма́ти Неизрече́ннаго Све́та,/ нас, гре́шных, от мы́сленных паде́ний огради́,/ Боже́ственное же уче́ние Це́ркве Святы́я в сердца́х на́ших укрепи́.

Песнь 8

Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Возлюби́л еси́, о́тче, служи́ти бра́тии сло́вом Бо́жиим,/ и бысть тебе́ служе́ние сие́ в по́двиг жития́ твоего́,/ нам же в ра́дование непрело́жное, вопию́щим ти:/ не оста́ви нас, о́тче, сло́вом и моли́твами твои́ми.

В служе́нии Сло́ву услы́шал еси́ в души́ твое́й глас увере́ния во спасе́нии,/ сего́ ра́ди преи́скренне возлюби́л еси́ бли́жних твои́х/ и са́мое то Сло́во Бо́жие.

Поуча́л еси́ бли́жних твои́х, святи́телю,/ я́ко Спаси́тель наш есть Огнь Небе́сный,/ И́же и в словесе́х Его́ Ева́нгельских де́йствует.

Богоро́дичен: Ма́ти Бо́жия, Бо́га Сло́ва ро́ждшая, даждь сло́во рабо́м Твои́м,/ е́же сказа́ти та́йну всеми́лостиваго заступле́ния Твоего́,/ в та́йне рожде́ния Сло́ва, Христа́ Бо́га, я́вльшуюся.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с/ Тем Тя, Богоро́дицу,/ А́нгелов и челове́к чинонача́лия велича́ют.

Мно́ги труды́ и боле́зни подъя́в в житии́ твое́м, святи́телю всече́стне,/ Кресту́ Христо́ву, све́тло сия́ющу, поклони́лся еси́/ и мо́литву твою́ ко Христу́ просте́рл еси́.

Скорбьми́ обурева́емый, зрел еси́ в виде́нии в ке́ллии свое́й Стра́нника, посети́вшаго тя./ Отку́ду ше́ствуеши? И где селе́ние Твое́? Почто́ досе́ле оставля́л еси́ е? –/ сла́дце вопия́л еси́, о́тче, я́вльшемуся ти Христу́.

В хожде́нии пред Го́сподем позна́л еси́, о́тче, судьбы́ оте́чества твоего́,/ та́же и кончи́ну твою́ я́сно прови́дел еси́,/ к Бо́гу Сло́ву, Христу́ возлю́бленному, моли́твенно устремля́яся.

Богоро́дичен: Ма́ти Бо́жия, сия́ние неизрече́ннаго Све́та,/ стопы́ на́ша к жи́зни ве́чней направи́,/ проща́ющи вся зла́я, на́ми соде́янная.

Свети́лен пра́здника.

Сла́ва, святи́теля:

И́мя Богоно́сца пресла́внаго в мона́шестем о́бразе твое́м восприе́м,/ о́тче Игна́тие, святи́телю всече́стне,/ Христа́ моли́твою непреста́нною внутрь се́рдца твоего́ всели́л еси́/ и был еси́ учи́тель, к Све́ту невече́рнему веды́й,/ богоно́сец вои́стину досточу́дный яви́вся.

И ны́не, пра́здника.

На хвали́тех стихи́ры пра́здника 3 и свята́го 3.

Стихи́ры свята́го, глас 8:

В житии́ твое́м поуча́л еси́, о́тче преподо́бне,/ я́ко се́рдце челове́ческое обрета́ет поко́й,/ егда́ в за́поведех Христо́вых пребыва́ет,/ изобрази́ти бо в души́ о́браз Христо́в/ бла́го есть и спаси́тельно,/ сего́ же и нас дости́гнути/ ми́лостивно сподо́би моли́твами твои́ми.

Христу́ после́довал еси́ усе́рдно, святи́телю Игна́тие,/ вся мирска́я отложи́в и Крест Госпо́день на ра́мо взем,/ те́мже пути́ соверше́нства дости́гл еси́,/ к сему́ и нас приведи́, о́тче,/ моли́твами твои́ми.

Прииди́те, собо́ри люде́й Бо́жиих,/ припаде́м усе́рдно ко исто́чнику приснотеку́щему,/ святи́телю Игна́тию, богоно́сцу Русскому,/ и восхва́лим, усе́рдно прося́ще:/ моли́твами твои́ми, святи́телю,/ пода́й просвеще́ние душа́м на́шим.

Сла́ва, и ны́не, пра́здника.

НА ЛИТУРГИ́И

Слу́жба пра́здника и святи́теля.

От Святыя Пасхи до Пятидесятницы

Тропа́рь, глас 4:

Почерпе́м, челове́цы, цельбы́ душа́м и те́лом моли́твою,/ Река́ бо всем предтече́т – Пречи́стая Цари́ца Богоро́дица,/ источа́ющи нам чу́дную во́ду/ и измыва́ющи серде́ц че́рности,/ грехо́вныя стру́пы очища́ющи,/ ду́ши же освяща́ющи ве́рных/ Боже́ственною благода́тию.

Конда́к глас 8.

Подо́бен: Взбра́нной:

От неистощи́мыя/ Ты, Исто́чниче Богоблагода́тный, подае́ши ми, точа́ши, во́ды/ Твоея́ благода́ти,/ приснотеку́щий па́че сло́ва,/ я́ко бо Сло́во ро́ждшая па́че смы́сла,/ молю́тися, ороси́ мя благода́тию, да зову́ Ти:/ ра́дуйся, Водо́ спаси́тельная.

НА МА́ЛОЙ ВЕЧЕ́РНИ

На Го́споди, воззва́х: пое́м стихи́ры подо́бны, пра́здника две и Богоро́дице две, глас 1.

Подо́бен: Небе́сных чино́в:

Сладколю́бящаго Боже́ственнаго зра́ка Твоего́, Влады́чице,/ и́же к нам, хва́лим чуде́сное прише́ствие,/ его́же Боже́ственным Твои́м про́мыслом посреде́ воды́/ наста́вила еси́, Пречи́стая,/ и хра́му оби́тели Твоея́,/ я́ко дар боголе́пный, возложи́ла еси́.

Посеще́нием посети́ла еси́, Чи́стая, жре́бий Твой/ ико́нами Твои́ми чрез мно́жайшая чудеса́,/ те́мже и прокля́тое Ты во́инство опустоши́вши,/ испо́лнила еси́ вся́кия ра́дости мона́шествующия в нем,/ и́же от Бо́га в насле́дии Твое́м.

Сла́ва, пра́здника. И ны́не, Богоро́дичен, глас 2:

Дух Святы́й, со Отце́м, Де́во, и Сы́ном,/ Свята́я и Покланя́емая Тро́ица,/ в Тя всели́ся, Богоневе́сто:/ в Тебе́ Сло́во воплоти́ся,/ Тобо́ю спасе́ние ми́рови бысть,/ Тобо́ю мир и Тобо́ю ми́ра возсозда́ние,/ Ма́ти Бо́жия была́ еси́/ и храм одушевле́нный всего́ Божества́ яви́лася еси́,/ ико́ною Твое́ю, Пренепоро́чная,/ освяща́еши оби́тель Твою́ и ста́до,/ и к Нему́ сладколюби́выми моли́твами/ всех спаса́еши, почита́ющих Тя.

Све́те Ти́хий: Проки́мен: Госпо́дь воцари́ся: И Сподо́би, Го́споди:

На стихо́вне стихи́ры, пра́здника 2 и Богоро́дицы, глас 2.

Подо́бен: До́ме Евфра́фов:

Еди́на сладколю́биши/ Го́спода Сла́вы,/ Богоро́дице Де́во,/ те́мже и Еди́на/ Сего́ о всех умилостивля́еши.

Сла́ва, пра́здника. И ны́не, Богоро́дичен, глас 2:

Дух Святы́й, Отец и Сын,/ Трисо́лнечное Божество́,/ Тебе́ проро́ками Богоро́дицу предвозвести́ ми́рови/ и зра́ком, и́же на ико́не Твое́й,/ весь мир освяща́ет Твое́ю благода́тию:/ Тобо́ю па́ства сия́ спаса́ется/ и Горы́ вся оби́тели и чи́ны,/ Тобо́ю от ага́рян изба́вихомся/ и Тобо́ю спасе́ние получи́ти наде́емся,/ упова́ние на́ше, Де́во, сла́ва Тебе́.

Ны́не отпуща́еши: Трисвято́е. Тропа́рь пра́здника и Богоро́дицы, глас 7 (пи́сан на вели́цей вече́рни)

на велицей вече́рни

На Го́споди, воззва́х: стихи́ры на 10: пра́здника 6 и Богоро́дицы 4, глас 8.

Подо́бен: О, пресла́внаго чудесе́:

Днесь све́тло возблиста́/ Сы́на Твоего́, Ма́ти, Боже́ственное Воскре́сение,/ и ра́дуются в нем челове́ческая собра́ния,/ А́нгелов же во́инства и вся тварь/ Тя ублажа́ют, Одушевле́нное Не́бо, Божества́ святы́й До́ме,/ и по «Изря́дне» – ра́дуйся, ра́дуйся – Тебе́ зову́т,/ жре́бия Твоего́ вси мона́шествующий, Богора́дованная.

Днесь ра́дости пе́ния/ Тебе́, Богоро́дице, оби́тель Твоя́,/ ра́дующися, приноша́ет, я́ко мо́щно,/ Храни́тельницу Тя иму́щи/ и Хода́таицу к Твоему́ Сы́ну,/ Его́же Твои́ми рука́ми носи́ла еси́, Влады́чице./ Те́мже и обогаща́еши ю ны́не пресвято́ю ико́ною Твое́ю,/ ю́же от Боже́ственнаго Твоего́ про́мысла/ дарова́ла еси́ сей оби́тели Твое́й,/ я́ко бога́тство и я́ко свяще́нное наслажде́ние.

Друго́е не́бо Тя показа́ Твой Сын, Де́во,/ вопло́щен во утро́бе Твое́й,/ я́ко друго́е нам не́бо/ Твой храм соверши́ла еси́/ о́бразом Твои́м, Богоневе́сто,/ от сего́ нечести́вых отгоня́ются полки́ дале́че,/ от сего́ и сове́ты, и́же на нас, злосла́вных разоря́ются,/ мы же Твой к нам собо́р сла́вим,/ мно́гия Твоя́ чудеса́ помина́юще, Присноде́во.

Твой сла́вим собо́р, и́же в Филофе́и  и и́же в Богоро́дице  честны́я ико́ны Твоея́:/ восхоте́ла бо еси́ нас посети́ти то́ю,/ я́ко Ма́терь, о ча́дех веселя́щаяся/ и, я́ко Цари́ца, о Свое́й держа́ве пеку́щаяся./ Ты бо Зижди́теля на объя́тиих Твои́х Младе́нца носи́ла еси́,/ Ему́же Сладколю́бящая Ма́ти, вои́стинну предстои́ши,/ доя́щи и Де́ва,/ Детопита́тельница и Неискусому́жная.

Сла́ва, пра́здника. И ны́не, Богоро́дицы, глас 6:

Прииди́те, ве́рнии,/ Боже́ственное к нам Богоро́дицы пра́зднуем прише́ствие/ Ея́ свято́ю ико́ною,/ се́ю бо Влады́чица на́ша посети́ нас,/ се́ю нечести́вых во́инство от Горы́ исчезе́/ и се́ю безмо́лвие жре́бия сохраня́ется./ Я́ко бо сла́ва Де́вы изря́дна,/ та́ко и Ея́ чудеса́/ изря́дна суть и преми́рна,/ я́ко у́бо правосмы́слящия награжда́ет,/ неблагода́рныя же отмща́ет./ Но, я́ко Го́спода лю́бящая и нося́щая, Ма́ти Чи́стая,/ моли́ся о нас, моля́щих Ти ся.

Вход. Проки́мен дне. И чте́ния 3.

Бытия́ чте́ние (глава́ 28):

Изы́де Иа́ков от студенца́ кля́твеннаго и и́де в Харра́нь./ И обре́те ме́сто, и спа та́мо./ За́йде бо со́лнце,/ и взят от ка́мения ме́ста того́, и положи́ возгла́вие себе́,/ и спа на ме́сте о́ном./ И сон ви́де,/ и се ле́ствица утвержде́на на земли́, ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся:/ земля́, иде́же ты спи́ши на ней, тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки,/ и возблагословя́тся о тебе́ вся коле́на земна́я и о се́мени твое́м./ И се Аз с тобо́ю,/ сохраня́яй тя на вся́ком пути́, а́може а́ще по́йдеши,/ и возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти ми вся, ели́ка глаго́лах тебе́./ И воста́ Иа́ков от сна своего́, и рече́:/ я́ко есть Госпо́дь на ме́сте сем,/ аз же не ве́дех./ И убоя́ся, и рече́:/ я́ко стра́шно ме́сто сие́,/ несть сие́, но дом Бо́жий,/ и сия́ врата́ Небе́сная.

Проро́чества Иезекии́лева чте́ние (гла́вы 43 и 44):

Та́ко глаго́лет Госпо́дь:/ бу́дет от дне осма́го, и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы, – глаго́лет Адонаи́ Госпо́дь./ И обрати́ мя на путь врат святы́х вне́шних,/ зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми,/ и бу́дут затворе́на./ Я́ко игу́мен ся́дет в них сне́сти хлеб,/ по пути́ ела́мских врат вни́дет/ и по пути́ его́ изы́дет./ И введе́ мя по пути́ врат святы́х,/ су́щих к се́веру, пря́мо хра́му,/ и ви́дех:/ и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ себе́ дом/ и утверди́ столпо́в седмь./ Закла́ своя́ же́ртвенная, и раствори́ в ча́ши свое́й вино́,/ и угото́ва свою́ трапе́зу./ Посла́ своя́ рабы́,/ созыва́ющи с высо́ким пропове́данием на ча́шу, глаго́лющи:/ иже есть безу́мен, да уклони́тся ко мне./ И тре́бующим ума́ рече́:/ Прииди́те, яди́те мой хлеб/ и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ние бо нечести́вому, ра́ны ему́./ Не облича́й злых, да не возненави́дят тебе́;/ облича́й прему́дра, и возлю́бит тя./ Даждь прему́дрому вину́, и прему́дрший бу́дет;/ сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум./ Разуме́ти бо зако́н по́мысла есть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ры пре́жде пра́здника, та́же Богоро́дицы, глас 5:

Днесь Всечи́стая Де́ва зде жи́ти изво́ли:/ Боже́ственный бо Ея́ о́браз, самособо́ю к нам мореше́ствовав,/ та́инства бысть па́мяти,/ и вся́ких чуде́с в показа́ние:/ не ме́ньше бо, я́же во И́верстей и в други́х оби́телех,/ настоя́щее показу́ется нам чудоде́йствие./ Свята́я бо Богоро́дица,/ я́же Боже́ственною благода́тию прише́льствующи в них,/ и сию́ ико́ну чуде́сну соде́ла, Всечи́стая,/ я́ко да те́ми заступле́ньми/ от бед злых спаса́ет ду́ши на́ша.

Сла́ва, пра́здника. И ны́не, Богоро́дицы, глас 8:

Ка́ко не диви́мся Твоему́ о нас промышле́нию, Пречи́стая?/ Жре́бий бо Твой посети́ти изво́лила еси́/ Сладколю́бящею Боже́ственною Твое́ю ико́ною./ Те́мже и спасла́ еси́ нас от ра́тник ва́рваров,/ от ага́рянскаго плене́ния/ и от вся́ких боле́зней и бед,/ и, Его́же яко Младе́нца на объя́тиих Твои́х носи́ла еси́,/ и дои́ла еси́, и сла́дце целова́ла еси́,/ Сей Твой жре́бий сей/ Тебе́ предложи́ сохраня́ти, Богоро́дице,/ о не́мже не оскуде́й промышля́ти ны́не же и во ве́ки.

На стихо́вне глаго́лем самогла́сны пра́здника. Та́же Богоро́дицы, глас 4.

Стих: Лицу́ Твоему́ помо́лятся/ бога́тии лю́дстии.

О, пресла́внаго чудесе́!/ сы́ны тьмы, во́инство неве́рное от Горы́ изри́ну/ Све́та Ма́терь, Всеблюсти́тельница свяще́нных оби́телей Горы́./ Сея́ есть посеща́ющая нас и весь жре́бий/ чудотво́рными Ея́ Боже́ственными ико́нами./ Сия́ есть спасе́ние душ на́ших и безнаде́жных наде́жда,/ Всецари́ца и Влады́чица.

Сла́ва, пра́здника. И ны́не, Богоро́дицы, глас 5:

Исцеле́ний иму́ще исто́чник храм Твой, Богоро́дице,/ благода́ть обрето́хом,/ чрез Твою́ бо в нем святу́ю ико́ну/ благода́ть почерпа́ем врачева́ний/ и мучи́тельскаго плене́ния изба́вихомся./ Те́мже и собо́р Твой достодо́лжно торжеству́юще/ и всено́щное пе́ние Тебе́ принося́ще, Богоро́дице, взыва́ем:/ Я́же пречи́стою Твое́ю ико́ною присеща́ющи нас,/ Сы́на Твоего́ Ца́рствия наслади́тися сподо́би/ неисче́тною Твое́ю бла́гостию, Ма́ти Присноде́во.

Ны́не отпуща́еши: Трисвято́е. Тропа́рь пра́здника, глас 7. И Богоро́дицы, глас то́йже:

Одержа́щей е́реси,/ о честне́й ико́не Твое́й, Де́во,/ я́ве промышля́еши:/ мореше́ствием Твое́й оби́тели/ я́ко дар досто́ин приноша́еши./ Сию́ же мы Сладколю́бящую пра́ве нарица́юще,/ Тя ублажа́ем.

НА У́ТРЕНИ

По 1-м стихосло́вии седа́лен пра́здника.

Сла́ва, то́йже. И ны́не, Богоро́дицы, глас 1.

Подо́бен: Ка́мени запеча́тану:

О́браз зра́ка Твоего́, Богоро́дице Пречи́стая,/ преесте́ственно просла́вленный, покланя́ющеся, сла́вим,/ и́мже мы гла́да и губи́тельства, ва́рваров и враго́в наше́ствия/ и бед вся́ческих и искуше́ний избавля́еми, Тебе́ вопие́м:/ сла́ва Всеблаго́му Твоему́ Сове́ту,/ сла́ва благоутро́бию Твоему́,/ сла́ва Твоему́ к нам, Чи́стая, Боже́ственному промышле́нию.

По 2-м стихосло́вии седа́лен пра́здника.

Сла́ва то́йже. И ны́не Богоро́дицы, глас 1.

Подо́бен: Гроб Твой, Спа́се:

Изри́нула еси́ во́инство, губя́щее, Отрокови́це Чи́стая,/ ста́до Твоего́ жре́бия, и́же во Афо́не./ Те́мже и па́мять твори́м такова́го Твоего́ промышле́ния,/ е́же сотвори́ла еси́ чрез Твой о́браз,/ и́же водрузи́ла еси́ во святе́м Твое́м хра́ме,/ его́же пе́сньми сла́вим.

По полиеле́и седа́лен, Богоро́дицы, глас 1.

Подо́бен: Гроб Твой, Спа́се:

Твой Боже́ственный собо́р сла́вим/ и пра́здник твори́м днесь ди́вныя Твоея́ ико́ны,/ ю́же от инода́льныя страны́ чрез пла́вания к нам принесла́ еси́,/ и чудеса́ почита́ем, и́миже во́инство безбо́жное опустоши́ла еси́ Твое́ю си́лою, Де́во,/ и Твое́ ста́до спасла́ еси́.

Сла́ва, ин седа́лен Богоро́дицы, глас и подо́бен то́йже:

Те́пле сладкоцелу́еши вся́ческих Влады́ку,/ хода́тайствуеши о ста́дех, и́хже насле́дила еси́,/ бельце́в и мона́шествующих во Афо́не, Влады́чице,/ и́мже посла́ла еси́ Твой Пресвяты́й о́браз на дсце,/ я́ко тем подае́ши Боже́ственныя Твоя́ благода́ти.

И ны́не, пра́здника.

Та́же степе́нна, 1-й антифо́н 4-го гла́са. Проки́мен, глас 4: Похвали́, Иерусали́ме, Го́спода,/ хвали́ Бо́га Твоего́, Сио́не. Стих: Я́ко укрепи́ вереи́ врат Твои́х, благослови́ сы́ны Твоя́ в Тебе́. Вся́кое дыха́ние: Ева́нгелие от Матфе́я, зача́ло 116. Воскресе́ние Христо́во: три́жды. Поми́луй мя, Бо́же: с пе́нием. Сла́ва: Моли́твами апо́столов. И ны́не: Моли́твами Богоро́дицы: и Воскре́с Иису́с:

Кано́ны пра́здника с ирмоса́ми, на 8 и Богоро́дицы, на 6, глас 1.

Песнь 1

Ирмо́с: Воскресе́ния день,/ просвети́мся, лю́дие,/ Па́сха, Госпо́дня Па́сха;/ от сме́рти бо к Жи́зни/ и от земли́ к Небеси́/ Христо́с Бог нас/ преведе́, побе́дную пою́щия.

Воскресе́ния день Влады́ки Христа́,/ и Ма́терь Того́, Де́ву Чи́стую,/ прииди́те, вси, и́же в Горе́ мона́шествующий,/ согла́сно ве́рно воспои́м,/ благода́рственное пою́ще.

Воскресе́ние Спа́са Христа́/ и па́мять, е́же па́че наде́жды, чудоде́йствия Твоего́, Чи́стая,/ и́мже показа́ла еси́ нас сы́ны дне,/ тьму отгна́вши от честна́го жре́бия Твоего́,/ согла́сно ве́рно воспои́м,/ благода́рственное пою́ще.

Очи́стим чу́вствия и у́зрим мы́сленными очесы́/ Бо́жий Про́мысл,/ и́бо Богоневе́стная из Горы́ Афо́нския/ ны́не во́инство христоненави́стное пресла́вно изгна́.

Не́бо и земля́ ны́не да веселя́тся/ в Боже́ственном Христо́вом возста́нии,/ Де́ву же да пое́т лик безсупру́жных,/ и́бо днесь во́инство христоненави́стное из Горы́ изгна́.

Исча́дие Ага́ри, вто́ргся к нам, –/ даде́ся Гора́, – рече́, – во власть ны́не мою́:/ но у́бо солга́ся лю́те,/ из Горы́ бо того́ Храни́тельница Богоро́дица изгна́.

Небеса́ у́бо досто́йно ны́не веселя́тся/ Боже́ственным Воскресе́нием Сы́на Твоего́, Чи́стая,/ мы же пра́здник соверша́ем и Тебе́,/ в не́мже посла́ла еси́ нам честны́й о́браз Твой.

Катава́сия: Воскресе́ния день:

Песнь 3

Ирмос: Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник,/ из гро́ба одожди́вша Христа́,/ в Не́мже утвержда́емся.

Прииди́те, пи́во пие́м ра́дости,/ честна́я в безсупру́жных составле́ния,/ и́бо Де́ва Чи́стая печа́ль на́шу преложи́/ в весе́лие спаси́тельное.

Прииди́те, пи́во пие́м но́вое,/ от исто́чника присноживо́тнаго Богома́тере,/ и́бо ве́сну нам благода́рную показа́,/ я́ко пре́жде и н́ыне Богоневе́стная.

Ны́не вся исполня́ются ра́дости,/ я́же в Горе́ Афо́нстей честна́я жили́ща,/ Богоро́дицу Чи́стую Предста́тельницу держа́вну иму́ще,/ Е́юже утверди́шася.

Вчера́ порабо́тихомся лю́те,/ мучи́тельству неве́рных па́дше вси,/ ны́не же Предста́тельница на́ша/ све́тлое дарова́ нам возрожде́ние.

Ны́не глаго́ли, Горо́ Честна́я:/ обновля́юся стра́нно Богома́терию,/ неве́рному бо во́инству бежа́вшу,/ торжество́ но́вое и све́тлое Той составля́ю.

Я́ко дре́вле Петра́ Твой Сын в воде́,/ Богоро́дице, удиви́,/ та́ко и Ты честну́ю Твою́ ико́ну/ в то́йже воде́ просла́вила еси́.

Седа́лен пе́рвее пра́здника, та́же Богоро́дицы.

Сла́ва, и ны́не, глас 5.

Подо́бен: Собезнача́льное Сло́во:

Фео́филу ски́птры зле управля́ющу,/ свята́я Твоя́ ико́на, бежа́вши, идя́ше/ по воде́ пла́ванием над волна́ми,/ и, прише́дши любе́зно, приста́ держа́вно во оби́тели Твое́й Богоспаса́емей,/ и водрузи́ся, я́ко на престо́л Херуви́мский,/ в хра́ме Твое́м, Чи́стая.

Песнь 4

Ирмос: На Боже́ственней стра́жи/ Богоглаго́ливый Авваку́м/ да ста́нет с на́ми и пока́жет/ светоно́сна А́нгела,/ я́сно глаго́люща:/ днесь спасе́ние ми́ру,/ я́ко воскре́се Христо́с,/ я́ко всеси́лен.

На Боже́ственней стра́жи,/ ста́вше во Христе́, бра́тие,/ ума́ движе́нии и дея́ния испра́вляюще,/ вси в весе́лии рцем:/ днесь спасе́ние Горе́/ Де́вою Чи́стою, на́шею Предста́тельницею.

На ста́до Твое́, Чи́стая,/ просте́рши взор благосе́рдно,/ призыва́ющия Тя спаса́еши от вся́ких скорбе́й,/ враги́ бо Твоя́, Влады́чице,/ днесь из Горы́ изво́диши,/ нам вопию́щим Ти, е́же очи́сти.

При́сно смуща́ет мя мно́жество неча́емых напа́стей, –/ вопие́т вся, я́же во Афо́не, Твоя́ па́ства, Влады́чице, –/ не пре́зри у́бо, но предвари́, изми́ мя, Де́во,/ воспева́ющую при́сно вели́чия Твоя́.

Я́ко Храни́тельницу свяще́нных на́ших оби́телей,/ Чи́стая, венча́ем Тя,/ ны́не от любве́ Боже́ственныя пе́сни плету́ще:/ приими́ пе́ние и па́ки ны в ру́ки беззако́нных не преда́ждь,/ Христа́ умилостивля́ющи.

Богооте́ц у́бо Дави́д/ пред се́нным ковче́гом скака́ше, игра́я,/ лю́дие же Христо́вы безсупру́жнии, и́же в Горе́, Чи́стая,/ игра́юще пред о́бразом Твои́м,/ боже́ственно Тебе мо́лятся,/ я́коже Дави́д прорече́.

Богооте́ц у́бо Дави́д/ пред се́нным ковче́гом скака́ше, игра́я,/ ве́рнии же, мы днесь,/ пред све́тлым о́бразом Твои́м/ ли́ки соста́вльше песноно́сныя,/ Тебе́ ра́достно Сладколю́бящая зове́м.

Песнь 5

Ирмос: У́тренюем у́тренюю глубоку́,/ и вме́сто ми́ра песнь принесе́м Влады́це,/ и Христа́ у́зрим,/ Пра́вды Со́лнце,/ всем жизнь возсия́юща.

У́тренюем вси боже́ственно/ и с пе́нием дея́ния принесе́м доброде́тельная, Де́ве вопию́ще:/ не преста́й, Влады́чице, су́щия в Горе́ храня́щи.

У́тренюем днесь вси/ и Чи́стей Богоро́дице Тебе́ принесе́м Боже́ственную песнь,/ нас от скорбе́й изба́вльшей всех/ и от нечи́стаго сове́тования.

Безме́рное Твое́ благоутро́бие/ к су́щим в Горе́ оби́телем со у́жасом зря́ще, Чи́стая,/ на Твое́ тве́рдое предста́тельство наде́ющеся,/ Па́сху пра́зднуем весе́лую.

Безме́рное Твое́ благоутро́бие, и́же в Горе́, ны́не зря́ще,/ Тебе́ пригла́шаем:/ ра́дуйся, Храни́тельнице мона́шествующих, о Всечи́стая,/ ра́дуйся, Предста́тельнице и Побо́рнице.

Присту́пим, свещено́снии,/ исходя́щу Христу́ из Гро́ба, я́ко Жениху́,/ и торжеству́ем, Богоро́дице взыва́юще:/ ра́дуйся, Го́ры Спаси́тельнице.

Присту́пим, свещено́снии,/ к прише́дшей нам Богоро́дицы Чи́стыя ико́не,/ и тоя́ удиви́мся о́браза подо́бию,/ и чуде́с волна́м.

Песнь 6

Ирмос: Снизше́л еси́ в преиспо́дняя земли́/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,/ воскре́сл еси́ от Гро́ба.

Снидо́хом во грехи́ мно́гия/ и пра́ведное на ся Бо́жие негодова́ние привлека́хом./ Но, о Влады́чице,/ Ты исхи́тила еси́ нас из ро́ва поги́бели.

Сни́де, я́ко в преиспо́дняя земли́,/ нечи́стое во́инство,/ прогна́но све́том Твои́м, Богоро́дице,/ сего́ ра́ди мона́шествующий/ благода́рственную песнь Тебе́ прино́сят, Отрокови́це.

Храня́щи, о Влады́чице, Го́ру Твою́ невреди́му/ от враг мы́сленных и чу́вственных же/ и спаса́еши на́ше жи́тельство,/ прие́мши пе́сни от нас всегда́.

Храня́щи, Чи́стая, Го́ру Твою́,/ наше́дшим неве́рным,/ в наказа́нии лю́тых на́ших грехопаде́ний,/ не пре́дала еси́ нас в ру́ки их,/ но истреби́ в коне́ц.

Спа́се наш Христе́,/ воскресе́ние душ на́ших,/ мольба́ми Ро́ждшия Тя/ изба́ви всех от бед и скорбе́й/ и сподо́би нас неизрече́нныя Твоея́ Сла́вы.

Спаси́тельницу на́шу же и Храни́тельницу,/ о Всенепоро́чная Чи́стая, Тя ве́мы вся,/ я́же в Горе́ оби́тели,/ сего́ ра́ди Тебе́ согла́сно составля́ем пе́ние.

Конда́к Богоро́дицы, глас 8.

Подо́бен: Взбра́нной:

Иже в хра́ме и оби́тели Твое́й приходя́щия Ти/ и богоуго́дно спаси́тельная гоня́щия/ и почита́ющия Твой святы́й о́браз,/ сим да́руй, Де́во, Твоя́ ми́лости,/ от вся́ких изба́вльши сих скорбе́й, Тебе́ вопию́щия:/ ра́дуйся, Еди́на Богоневе́стная.

И́кос:

А́нгели неви́димо со стра́хом окружа́ют Боже́ственную Твою́, Де́во, ико́ну/ сию́, уди́вльши  до́бре, чрез мо́ре во Твою́ оби́тель посла́ла еси́./ Мы же, ра́дующеея сла́ве Твое́й, вопие́м Ти, е́же ра́дуйся, си́це:/ ра́дуйся, Христа́ Сладколю́бящая;/ ра́дуйся, на объя́тиих Того́ нося́щая./ Ра́дуйся, стоя́щая в хра́ме, я́ко Всецари́ца;/ ра́дуйся, соблюда́ющая нас, я́ко Храни́тельница./ Ра́дуйся, я́ко приклони́лася еси́, е́же соблюда́ти Твою́ оби́тель;/ ра́дуйся, я́ко зде суди́ла еси́ присели́тися, и до ны́не пребыва́еши./ Ра́дуйся, спасе́ние ве́рных раб Твои́х;/ ра́дуйся, благоукраше́ние свята́го хра́ма Твоего́./ Ра́дуйся, Е́юже от ва́рвар избавля́емся;/ ра́дуйся, Е́юже от бед спаса́емся./ Ра́дуйся, на́ша Предста́тельнице и Покро́ве;/ ра́дуйся, всем упова́ние изве́стное./ Ра́дуйся, Еди́на Богоневе́стная.

И чте́тся синакса́рь ме́сяца и Пятидеся́тницы.

В то́йже день пра́зднуем обновление свята́го Христова Воскресе́ния и свята́го апо́стола Фомы́ осяза́ния. В то́йже день па́мять твори́ти прия́хом о чудотворе́нии Пресвяты́я Богоро́дицы, егда́ о́бщим моле́нием отгна́ одержа́вшия Святы́я оби́тели Святы́я Горы́ безбо́жныя ага́ряны; сего́же ра́ди и настоя́щее бде́ние прия́хом ежего́дно твори́ти. Святы́ми моли́твами Всепречи́стыя Сладколю́бящия Твоея́ Ма́тере и свята́го апо́стола Твоего́ Фомы́, Христе́ Бо́же наш, поми́луй и спаси́ нас. Ами́нь.

Песнь 7

Ирмо́с: О́троки от пе́щи изба́вивый,/ быв Челове́к,/ стра́ждет, яко сме́ртен,/ и стра́стию сме́ртное/ в нетле́ния облачи́т благоле́пие,/ еди́н благослове́н/ отце́в Бог и препросла́влен.

О́троки от пе́щи изба́вивый,/ призре́л еси́, Го́споди, я́ко Милосе́рд, прегреше́ния на́ша/ и изба́вил ны еси́ от лю́таго обстоя́ния Ма́тери Твоея́ мольба́ми,/ я́ко Бог препросла́вленный.

О́троки от пе́щи изба́вивый,/ изба́ви, Влады́чице, Го́ру, Тобо́ю Святоиме́нную, Чи́стая,/ от неве́рных враг Человеколю́бец,/ Еди́н благослове́нный отце́в Бог и препросла́вленный.

Же́ны с ми́ры Богому́дрыя вслед Тебе́ теча́ху, Влады́ко Христе́,/ Небе́сное Тя Ми́ро ро́ждшую,/ вся, я́же в Горе́, оби́тели, иму́щи Боже́ственную Блюсти́тельницу,/ нечести́вых злово́ния изба́вихомся.

Сме́рти пра́зднуем умерщвле́ние,/ а́дово разруше́ние,/ стра́нное же нечести́вых бе́гство,/ от пребыва́ния Твоего́ в Святе́й Горе́, Всенепоро́чная./ Те́мже пое́м Тя,/ Боже́ственное на́ше предста́тельство, Богоневе́стная.

Сме́рти пра́зднуем умерщвле́ние, Христо́во Воскресе́ние,/ нечести́вых люде́й посрамле́ние и бе́гство/ и, взыгра́юще, пое́м Тя, Влады́чице,/ Еди́ну в жена́х Благослове́нную и Богоро́дицу пресла́вную.

Я́ко вои́стинну свяще́нный и ра́достный сей/ спаси́тельный, Боже́ственный пра́здник,/ воспомина́ние безбо́жных от нас бе́гство,/ в оньже Боже́ственное, я́ко свет, Пречи́стая, умилостивле́ние всем возсия́.

Песнь 8

Ирмо́с: Сей нарече́нный и Святы́й День –/ еди́н суббо́т царь и госпо́дь,/ пра́здников пра́здник/ и торжество́ есть торже́ств,/ в о́ньже благослови́м Христа́ во ве́ки.

Сей нарече́нный и святы́й день,/ в о́ньже мы пое́м Цари́це пе́ние:/ неча́емых бо реши́тельница бысть нам Всенепоро́чная,/ те́мже благослови́м Сию́ во ве́ки.

Сей нарече́нный и святы́й день,/ Воста́ния Госпо́дня и Чи́стыя Богоро́дицы,/ соде́яннаго Ею нам па́че наде́жды чу́да,/ Е́юже благослови́м Христа́ во ве́ки.

Прииди́те, и́ночестии, и́же во Афо́не, собо́ри,/ с любо́вию благода́рственно Богоро́дицу воспое́м,/ Влады́чицу, Предста́тельницу на́шу и Храни́тельницу,/ Пита́тельницу, вра́ча и сокро́вище во ве́ки.

Возведи́ о́крест о́чи Твои́, Чи́стая,/ и виждь ча́да Твоя́,/ лю́те сотре́нная десятиле́тним мучи́тельством Исма́иля нечести́ваго, и́же от Ага́ри,/ и сохраня́й сия́,/ Тобо́ю благословя́щая Христа́ во ве́ки.

О́тче Вседержи́телю, и Сло́ве, и Ду́ше,/ оби́тели, и́же во Афо́не,/ сохраня́й невреди́мы от враго́в лю́таго нало́га,/ на Тя бо упова́ем и благослови́м, в них живу́щий, во ве́ки.

О́тче Вседержи́телю, и Сло́ве, и Ду́ше,/ Безнача́льное Существо́, Непостижи́мое Естество́, Бо́же всех,/ Твоя́ лю́ди изми́ вся́кия ско́рби/ Святы́я Богоро́дицы моли́твами.

Песнь 9

Ирмо́с: Свети́ся, свети́ся,/ Но́вый Иерусали́ме,/ сла́ва бо Госпо́дня/ на тебе́ возсия́,/ лику́й ны́не/ и весели́ся, Сио́не./ Ты же, Чи́стая, красу́йся, Богоро́дице,/ о воста́нии Рождества́ Твоего́.

Припе́в: Велича́й, душе́ моя́,/ Чи́стую Де́ву и Еди́ну Богоро́дицу/ Предста́тельницу мона́шествующих во Афо́не.

Свети́ся, свети́ся,/ Но́вый Иерусали́ме,/ и ты, Горо́ Афо́нская,/ Предста́тельница бо твоя́ ны́не/ добро́ту пе́рвую да́рует тебе́/ и тьмы отгоня́ет нечести́вых Богоневе́стная.

Припе́в: Велича́й, душе́ моя́,/ Ю́же велича́ют вся́ческая, Де́ву,/ и трепе́щут безбо́жных ага́рян собра́ния.

Свети́ся ны́не,/ свяще́нная Горо́ Афо́нская,/ Боже́ственная бо в тебе́ Предста́тельница Всенепоро́чная/ неве́рнаго во́инства я́же на нас ловле́ния/ ма́нием Боже́ственным разруши́, мир нам дарова́вши.

Припе́в: Днесь всяк чин мона́шествующих Горы́/ па́мять творя́щий благода́ти Твоея́,/ сликовству́ет, Де́во Богоро́дице.

О, Боже́ственнаго, о, любе́знаго,/ о, обеща́ния кра́снаго!/ Оби́телем бо, су́щим во Афо́не, обеща́лася еси́ бы́ти Предста́тельницею,/ Храни́тельницею и Блюсти́тельницею,/ Ю́же, ве́рнии, иму́ще наде́жду, многи́х лю́тых избавля́емся.

Припе́в: Днесь ра́дуется весь мона́шествующих лик/ воста́нием Христо́вым/ и па́мять твори́т Твоего́ чудесе́, Де́во.

О, Боже́ственныя и еди́ныя сла́вы Го́рния,/ ю́же наслажда́ешися, Богоро́дице Де́во, я́ко Всецари́ца,/ красу́йся про́чее и моле́ние твори́ всегда́ о Твое́м жре́бии,/ подпа́вшем злоде́йственному.

Сла́ва: Тебе́, Бо́га Отца́, Бо́га Сы́на и Сло́ва и Бо́га Ду́ха,/ Еди́наго в Тро́ице Бо́га/ сла́влю Еди́наго.

О О́тче, и Сло́ве, и Боже́ственный Ду́ше и Честны́й,/ о Тро́ице, Бо́же мой,/ Боже́ственными моли́твами Твои́х слуг Афо́нския Горы́,/ нас, почита́ющих Тя, Ца́рствия Твоего́ сподо́би.

И ны́не: О Всечи́стая Отрокови́це,/ о Ма́ти, Де́во Чи́стая,/ не преста́й Го́ру Афо́нскую всегда́ покрыва́ти благода́тию Твое́ю, Влады́чице,/ и Сы́на Твоего́ о нас умилостивля́ти, Присноде́во.

Све́тильны праздника два, та́же Богоро́дицы.

Подо́бен: Не́бо звезда́ми:

Твое́ю, Богоро́дице, благода́тию/ покрыва́еши и соблюда́еши всех, су́щих в жре́бии Твое́м,/ от наше́ствия нечести́вых/ и са́мым о́бразом Твои́м утеша́еши лю́ди Твоя́.

На хвали́тех поставля́ем стихо́в 6, пра́здника 3 и Богоро́дицы 3, глас 2.

Подо́бен: Егда́ от Дре́ва:

Егда́ злоче́стия зима́/ на святы́я ико́ны ноша́шеся/ тогда́ Всенепоро́чная Свой о́бразный зрак/ спасе́ от рук беззако́ннующих/ и того́ наста́ви, иде́же потре́бно спаса́тися,/ иде́же Боголюбе́зное ста́до Филофе́йскаго монастыря́/ прия́т его́ с чу́дом.

Егда́ ико́на, я́ко жива́,/ Сладколю́бящия Зижди́теля Чи́стыя Отрокови́цы/ ди́вно прохожда́ше, я́ко на колесни́це, во́ду/ и прии́де в Горы́ селе́ний,/ вре́да отбега́ющи ерети́ческаго,/ тогда́ мона́шествующих и бельце́в вся ли́ки, взыгра́юще,/ сей покланя́хуся, ра́дующеся.

Прииди́те, пе́сньми почти́м о́браз, его́же освяти́,/ Ма́терь Бо́жия Свята́я,/ и, его́ целу́юще, прирце́м:/ сим, Боговме́стная, нас посети́ла еси́,/ сим отгна́ла еси́ род противобо́жный,/ те́мже сим нас покажи́/ насле́дники жре́бия Твоего́, Влады́чице,/ и Сы́на Твоего́ Ца́рствия.

Сла́ва, глас 6, пра́здника. И ны́не, Богоро́дицы, глас то́йже:

Ви́де о ико́не Твое́й су́щая во святе́й Горе́ Твое́й оби́тель,/ я́коже ви́де в рождестве́ Твое́м, Пресла́вная, град Дави́дов Вифлее́м:/ та́мо бо па́стырие ви́деша и удиви́шася,/ зде вси падо́ша и поклони́шася;/ та́мо безсе́менно рождество́ Твое́,/ зде без корабля́ водоше́ствие исхо́да Твоего́;/ тогда́ Ду́хом Святы́м зача́тие,/ ны́не чрез благода́ть Сы́на Твоего́ Твое́ прише́ствие;/ И́родово бо тогда́ су́етное во́инство губя́щее/ рождеству́ Твоему́ ничто́же соде́я;/ безбо́жных же зде воображе́нии лю́дие,/ преще́ния творя́ще жре́бию Твоему́, напра́сно  прогна́шася./ Ве́лия Твоя́ ми́лость и благоутро́бие Твое́ чуде́сно есть,/ Пресвята́я Влады́чице.

Славосло́вие вели́кое. И отпу́ст.

НА ЛИТУРГИ ́И

Блаже́нны от кано́на, песнь 3-я Фомы́ и песнь 6-я Богоро́дицы. Апо́стол и Ева́нгелие обои́м. Подо́бно и прича́стен.

Тропа́рь, глас 4:

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́ на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,/ Тя бо и едину на́дежду и́мамы.

Не умолчи́м никогда́, Богоро́дице,/ си́лы Твоя́ глаго́лати, недосто́йнии,/ а́ще бо Ты не бы предстоя́ла, моля́щи,/ кто бы нас изба́вил от толи́ких бед,/ кто же бы сохрани́л до ны́не свобо́дны,/ не отсту́пим, Влады́чице, от Тебе́,/ Твоя́ бо рабы́ спаса́еши при́сно от вся́ких лю́тых.

Кано́н, глас 1

Песнь 1

Ирмо́с: Воскресе́ния день,/ просвети́мся, лю́дие,/ Па́сха, Госпо́дня Па́сха:/ от сме́рти бо к Жи́зни/ и от земли́ к Небеси́/ Христо́с Бог нас/ преведе́, побе́дную пою́щия.

Очи́стим чу́вствия, и у́зрим/ в непристу́пном све́те/ Ма́терь Све́та,/ и ра́дуемся, реку́ще:/ ра́дуйся, Ма́ти Госпо́дня.

Небеса́ у́бо досто́йно да веселя́тся,/ земля́ же да ра́дуется,/ да пра́зднует же оби́тель сия́,/ почита́ющая заступле́ние Богома́тери.

Умерщвле́ние преде́л сломи́ла еси́,/ ве́чную Жизнь ро́ждшая, Христа́,/ из гро́ба возсия́вшаго днесь,/ Де́во Всенепоро́чная,/ и мир просвети́вшаго.

Воскре́сшаго ви́девши Сы́на Твоего́ и Бо́га,/ ра́дуйся со апо́столы, Богоблагода́тная Чи́стая,/ и е́же – ра́дуйся – пе́рвее,/ яко всех ра́дости вина́, восприя́ла еси́,/ Богома́ти Всенепоро́чная.

Песнь 3

Ирмо́с: Прииди́те, пи́во пие́м но́вое,/ не от ка́мене непло́дна чудоде́емое,/ но нетле́ния исто́чник,/ из гро́ба одожди́вша Христа́,/ в Не́мже утвержда́емся.

Ны́не вся испо́лнишася ра́дости неизрече́нныя,/ ви́димая же и неви́димая,/ ны́не пра́зднует све́тло ста́до Твое́, Влады́чице,/ Тобо́ю обеща́нное заступле́ние.

Виждь, Чи́стая, и́ноков собо́ры па́ствы Твоея́,/ окружа́ющих всечестны́й о́браз Твой,/ грехо́в разреше́ния прося́щих,/ и жития́ исправле́ния,/ и прича́стия Боже́ственныя сла́вы Твоея́, Всенепоро́чная.

Тече́т благода́ть незави́стная/ от Твоего́, Богоро́дице, о́браза,/ всем источа́ющи, моля́щимся те́пло,/ зол избавле́ние, и здра́вие, и ми́лость.

Все́ю душе́ю и мы́сли пра́востию/ в па́стве Твоей вси лику́юще,/ псалмы́, и пе́сньми духо́вными,/ и пе́нием Боже́ственным,/ обстоя́т о́браз Твой, Пречи́стая,/ Ты же, неотсту́пна су́ши,/ пода́ждь по́мощь, Богоневе́сто.

Ипакои́, глас 4:

Предвари́вшия у́тро я́же о Мари́и/ и обре́тшия ка́мень, отвале́н от гро́ба,/ слы́шаху от А́нгела: во Све́те Присносу́щнем Су́щаго/ с ме́ртвыми что и́щете, я́ко Челове́ка?/ Ви́дите гро́бныя пелены́, тецы́те и ми́ру пропове́дите,/ я́ко воста́ Госпо́дь, умертви́вый смерть,/ я́ко есть Сын Бо́га, спаса́ющаго род челове́ческий.

Песнь 4

Ирмо́с: На Боже́ственней стра́жи/ Богоглаго́ливый Авваку́м/ да ста́нет с на́ми и пока́жет/ светоно́сна А́нгела,/ я́сно глаго́люща:/ днесь спасе́ние ми́ру,/ яко воскре́се Христо́с,/ я́ко всеси́лен.

Се Пречи́стая гряде́т:/ услы́шав преподо́бный/ тече́т во сре́тение,/ и свет ве́лий осени́ его́,/ па́че со́лнца сия́ющь,/ и зрит Пречи́стую со двема апо́столома,/ све́тлостию Ея́ блиста́ющими,/ и паде́, моля́ся о заступле́нии.

Не ужаса́йся, избра́нниче Мой,/ глаго́лет Богома́ти:/ приидо́х посети́ти Тебе́,/ услы́шана бысть моли́тва твоя́ о ученице́х твои́х/ и о всех, о ни́хже мо́лишися,/ и о оби́тели твое́й про́чее да не скорби́ши,/ – веща́ла еси́, Влады́чице.

Богооте́ц у́бо Дави́д/ пред се́нным ковче́гом скака́ше, игра́я,/ Твои́м же заступле́нием/ весели́тся блаже́нное ста́до Твое́,/ сбытие́ слове́с Твои́х зря́ще, Богоневе́сто.

Реку́ Тя сла́дкую/ и пото́к насыще́ния,/ ма́нну Небе́сную,/ мед от ка́мене,/ изоби́лие и благода́ть приснотеку́щую стяжа́вше, Отрокови́це,/ во оби́тели обита́ющии/ благода́рно поют о Твое́м заступле́нии.

Песнь 5

Ирмо́с: У́тренюем у́тренюю глубоку́,/ и вме́сто ми́ра песнь принесе́м Влады́це,/ и Христа́ у́зрим,/ Пра́вды Со́лнце,/ всем жизнь возсия́юща.

Безме́рное Твое́ предста́тельство,/ е́же показу́еши при́сно, Всепречи́стая, ста́ду Твоему́,/ зря́ще, вопие́м Ти ны́не весе́лою душе́ю:/ ра́дуйся, Мари́е Богоневе́сто.

Приступи́м, свещено́снии,/ ко о́бразу Де́вы днесь,/ мно́жество мона́шествующих,/ и спра́зднуем любопра́зднственными чи́нми/ посеще́ние Богома́тери.

Неотсту́пна у́бо бу́ду от оби́тели твоея́,/ – веща́ла еси́, Влады́чице,/ избра́ннику Твоему́ Се́ргию,/ – отны́не всем изоби́льствует/ в житии́ и по твое́м ко Го́споду отхожде́нии:/ и се со сло́вом де́ло явля́еши, Цари́це.

Пева́емая Отрокови́це Де́во,/ чудеса́ Твоего́ заступле́ния/ удивля́ют челове́ком помышле́ния,/ па́че бо сло́во спасе́ние/ улучи́ Тобо́ю храни́мая оби́тель.

Песнь 6

Ирмо́с: Снизше́л еси́ в преиспо́дняя земли́/ и сокруши́л еси́ вереи́ ве́чныя,/ содержа́щия свя́занныя, Христе́,/ и тридне́вен, я́ко от ки́та Ио́на,/ воскре́сл еси́ от Гро́ба.

При́зри благосе́рдно/ на па́ству Твою́, Пречи́стая,/ и, я́коже обеща́лася еси́,/ потре́бная подава́й неоску́дно,/ снабдя́щи и покрыва́ющи/ Твоея́ по́мощи и заступле́ния те́пле и́щущия.

Спа́се мой Преблаги́й/ и вся́ческих Тво́рче,/ Чи́стыя Богоро́дицы благоприя́тными мольба́ми/ соблюди́ Твоя́ певцы́ невреди́мы от вся́ких бед.

Да изба́вится от всех злоключе́ний/ чту́щая Тя оби́тель, Богоро́дице Де́во,/ вражды́, огня́ и гла́да,/ во единомы́слии воспева́ющи,/ Помо́щницу Тя иму́щи.

Пое́м Тя и покланя́емся Ти, Богома́ти,/ не пре́зри моле́ний рабо́в Твои́х,/ заступи́ в беда́х на́ших,/ я́ко су́щи ми́лостива.

Конда́к, глас 8:

Аще и во гроб снизше́л еси́, Безсме́ртне,/ но а́дову разруши́л еси́ си́лу/ и воскре́сл еси́, я́ко Победи́тель, Христе́ Бо́же,/ жена́м мироно́сицам веща́вый: ра́дуйтеся!/ и Твои́м апо́столом мир да́руяй,/ па́дшим подая́й воскресе́ние.

И́кос:

Е́же пре́жде со́лнца Со́лнце, заше́дшее иногда́ во гроб,/ предвари́вша ко у́тру,/ и́щущия я́ко дне мироно́сицы де́вы,/ и друга́ ко друзе́й вопия́ху:/ о други́ни!/ прииди́те, воня́ми пома́жем Те́ло Живоно́сное и погребе́ное,/ плоть Воскреси́вшаго па́дшаго Ада́ма,/ лежа́щую во гро́бе;/ и́дем, потщи́мся, я́коже волсви́, и поклони́мся/ и принесе́м ми́ра, я́ко да́ры,/ не в пелена́х, но в плащани́це обви́тому,/ и пла́чем, и возопии́м:/ о Влады́ко, воста́ни,/ па́дшим подая́й воскресе́ние.

Песнь 7

Ирмо́с: О́троки от пе́щи изба́вивый,/ быв Челове́к,/ стра́ждет я́ко сме́ртен,/ и стра́стию сме́ртное/ в нетле́ния облачи́т благоле́пие,/ еди́н благослове́н/ отце́в Бог и препросла́влен.

О́троки от пе́щи Изба́вльшаго, Чи́стая,/ Ты родила́ еси́ нетле́нною Твое́ю, Богора́дованною утро́бою,/ по рождестве́, я́ко пре́жде рождества́, Сохра́ншаго Тя,/ Его́же и моля́щи непреста́й о нас, воспева́ющих Тя.

Вси ны́не собери́теся,/ пле́щуще пра́зднственная во оби́тели сей/ и Христо́ву Ма́терь просла́вите,/ еди́ну, па́че Херуви́м несравне́нную/ и Серафи́м препросла́вленную.

Я́ко вои́стинну свяще́нный,/ и спаси́тельный и зарено́сный, Де́во,/ о́браз посе́щения Твоего́/ покланя́ющимся бо сему́/ здра́вие раздае́ши и ми́лость/ теле́с же и душ,/ и взыска́ющим наде́жная еси́ Помо́щница,/ Бо́га пло́тию ро́ждшая.

Мона́шествующий и вси челове́цы,/ стра́хом и ра́достию ны́не поклони́мся о́бразу/ посеще́ния Богоотрокови́цы,/ моля́щеся с преподо́бным Се́ргием,/ и е́же ра́дуйся: Гаврии́лово,/ Благода́тная, вопию́ще.

Песнь 8

Ирмо́с: Сей нарече́нный и Святы́й День –/ еди́н суббо́т царь и госпо́дь,/ пра́здников пра́здник/ и торжество́ есть торже́ств,/ в о́ньже благослови́м Христа́, во ве́ки.

Сей нарече́нный и святы́й день/ всех созыва́ет к духо́вному весе́лию,/ сря́щим у́бо сей ра́достно и возопие́м:/ ра́дуйся, Богоро́дице, во вся ве́ки.

Прииди́те, мона́хов мно́жества,/ испо́лнимся Боже́ственнаго благоуха́ния,/ заступле́нием Бо́жия Ма́тери/ и, Сию́ прославля́юще, поклони́мся,/ пою́ще при́сно во вся ве́ки.

Возведи́ о́крест о́чи Твои́, Чи́стая, и виждь:/ се бо приидо́ша к Тебе́,/ я́ко Богосве́тлая свети́ла,/ от за́пада, и се́вера, и мо́ря,/ и восто́ка ча́да Твоя́,/ поклони́тися Твоему́ всепречи́стому о́бразу.

Пресвята́я Тро́ице, Бо́же наш, сла́ва Тебе́.

О́тче Вседержи́телю, и Сло́ве, и Ду́ше,/ Безнача́льное Существо́ и Непостижи́мое Естество́,/ Бо́же всех,/ оби́тель сию́ изми́ от вся́кия ско́рби/ мольба́ми вои́стинну Чи́стыя Еди́ныя Богоро́дицы.

Песнь 9

Ирмо́с: Свети́ся, свети́ся,/ Но́вый Иерусали́ме,/ сла́ва бо Госпо́дня/ на тебе́ возсия́,/ лику́й ны́не/ и весели́ся, Сио́не,/ Ты же, Чи́стая, красу́йся, Богоро́дице,/ о воста́нии Рождества́ Твоего́.

Свети́ся, ра́дуйся, мона́шествующих мно́жество,/ изря́днее же игра́й, оби́тель сия́,/ лику́й ны́не и весели́ся све́тло,/ и́бо обрела́ еси́ Чи́стую Де́ву,/ Блюсти́тельницу Непобеди́мую.

О, Боже́ственнаго, о, любе́знаго,/ о, неистощи́маго пролия́ния Твои́х безме́рных чуде́с,/ и́миже, Чи́стая, оби́тель сию́ обогаща́еши,/ и́бо сла́ва ея́ в Твое́м заступле́нии:/ Ты врата́рница ея́ и утвержде́ние.

О Ма́ти Де́во!/ в моли́тву прино́сим Тебе́ мольбы́ уго́дника Твоего́,/ мо́лим Тя вси:/ изба́ви нас от вся́кия напа́сти и озлобле́ния.

Да сохрани́ши, Де́во, стадонача́льника оби́тели Твоея́/ ра́дуйся, Неискусобра́чная Честна́я,/ сохрани́ ста́до Твое́ от вся́каго озлобле́ния,/ Еди́на Богоневе́стная.

Тропарь, глас 3:

Пра́веднаго Ла́заря Боголюби́выя се́стры,/ Ма́рфо и Мари́е пресла́вныя,/ чи́стым се́рдцем Христа́ в житии́ ва́шем возлюби́ли есте́,/ мироно́сиц взе́мше чин,/ и Его́, я́ко Сы́на Бо́жия, безбоя́зненно испове́дали есте́,/ сего́ ра́ди ны́не во оби́телех Отца́ Небе́снаго/ со А́нгелы и все́ми свя́тыми сла́вно ца́рствуете./ Умоли́те, Его́же возлюби́ли есте́,/ и нам, гре́шным, в ве́ре и любви́ Христо́вой утверди́тися/ и Ца́рствия Небе́снаго сподо́битися.

Моли́тва

О святы́я и всехва́льныя учени́цы Христо́вы, Боголюби́выя Ма́рфо и Мари́е! Умоли́те возлю́бленнаго ва́ми и вас возлюби́вшаго Сладча́йшаго Иису́са, Его́же вы испове́дали есте́, Христа́, Сы́на Бо́жия, да даст и нам, гре́шным, грехо́в оставле́ние, в ве́ре пра́вой нелицеме́рное и тве́рдое стоя́ние. Всели́те в сердца́ на́ша дух стра́ха Бо́жия, смире́ннаго на Бо́га упова́ния, терпе́ния и к бли́жним милосе́рдия. Изба́вите нас моли́твами ва́шими от искуше́ний жите́йских, бед и напа́стей, да, ти́хое и ми́рное житие́ пожи́вше зде, с по́мыслы непоро́чными и се́рдцем чи́стым, с дерзнове́нием ве́ры и упова́ния предста́нем на о́ный Стра́шный Суд и, до́брый отве́т на нем возда́вше, ра́дости ве́чныя в Ца́рствии Небе́снем сподо́бимся. Аминь.

Моли́тва ина́я, еди́ныя жены́ моля́щийся, наипа́че в ке́лии наедине́ что́мая

О блаже́нныя и свя́тыя же́ны, ве́рою и любо́вию Христу́ Бо́гу после́довавшия и во оби́тели Отца́ Небе́снаго всели́вшияся! К вам ны́не аз, гре́шная, прибега́ю и смире́нно молю́: научи́те мя и помози́те ми ходи́ти пред Бо́гом путьми́ ва́шими непреткнове́нно и ве́чную ку́пно с ва́ми жизнь насле́довати.

О Ма́рфо пра́ведная, тве́рдым испове́данием ве́ры твоея́ Христу́ угоди́вшая, укрепи́ сла́бую ве́ру мою́. О слу́жбе Го́споду и бра́тиям нелицеме́рне и всеусе́рдне прилежа́вшая, помози́ и мне служе́ние мое́ безро́потне и вседу́шне проходи́ти. Сестру́ твою́ иногда́, в ско́рби су́щу, ко Христу́ воззва́ла еси́, о́тай ре́кши: Учи́тель прише́л есть и глаша́ет тя. Ны́не у́бо предста́ни мне в тру́дный час испыта́ния ве́ры и любве́ моея́ и в глубине́ се́рдца возвести́ ми, яко Госпо́дь Иису́с незри́мо гряде́т, да путе́м испы́таний привлече́т мя к Себе́! Испроси́ мне, о ма́ти свята́я, у Го́спода на́шего си́лу и кре́пость, да, воста́вши ско́ро, притеку́ к Нему́, поклоню́ся Ему́ и в смире́нней любви́ Его́ мир и спасе́ние души́ обря́щу.

И ты, о Боголюби́вая Мари́е, у ногу́ Иису́сову еди́ное на потре́бу обре́тшая, помоли́ся Ему́ благу́ю часть спаса́емых и мне, гре́шней, улучи́ти. Ми́ро благово́нное в дар благодаре́ния Христу́ Жизнода́вцу прине́сшая, умоли́ ны́не Его́ и души́ мое́й пода́ти ми́ро моли́твы и покая́ния сле́зы, чистоты́ и до́брых дел благоуха́ние, я́ко да во обновле́нное все́ми си́ми се́рдце мое́ Госпо́дь прии́дет и оби́тель Себе́ сотвори́т.

К вам, о святы́я пра́ведныя же́ны, Ма́рфо и Мари́е, припа́даю и смире́нно молю́: не оста́вите мя в дни тя́жких испыта́ний, да не соблазню́ся тле́нными и кра́сными ми́ра сего́, наипа́че же в час го́рький разлуче́ния души́ моея́ с те́лом предста́ните мне и о́бщаго Влады́ку на́шего умоли́те, да при́зрит на мя в оскуде́нии сил мои́х ми́лостивым о́ком и, прости́в вся прегреше́ния моя́, возста́вит мя к жи́зни несконча́емей в блаже́нных оби́телех Отца́ Небе́снаго. Ами́нь.

Тропа́рь, глас 4:

Во святы́х ди́вная,/ Иве́рии свети́ло,/ благове́рная цари́це Тама́ро,/ на гора́х высо́ких хра́мы воздви́гшая,/ да в них моле́ния возсыла́ют ко Го́споду,/ мольба́ми твои́ми кре́пость дарова́вшая во́ем христолюби́вых люде́й страны́ И́верския,/ десни́цею же свое́ю по́лчища ага́рянская низпрове́ргшая,/ моли́ Христа́ Бо́га/ спасти́ся душа́м на́шим.

(службу зри 25 октября)

Тропа́рь, глас 4:

Апо́столом сотаи́ннице, ми́лостивая Тави́фо,/ оби́тели же́нския нача́ло положи́ла еси́/ и бе́дным одея́ние была́ еси́,/ послу́шнице смире́нная,/ сло́ву апо́стола Петра́ повину́вшися,/ из ме́ртвых си́лою Христо́вою возста́ла еси́/ и ны́не на Небесе́х све́тло пра́зднуеши./ Те́мже моли́ Христа́ Бо́га/ всем, помина́ющим тя, дарова́ти живо́т ве́чный.

Конда́к, глас 8:

Первонача́льная Це́рковь ликовству́ет,/ Иоппи́я тобо́ю, Тави́фо, просвеща́ется,/ из ме́ртвых твоему́ воскресе́нию ра́дующися,/ и мы, па́мять твою́ ны́не пра́зднующе,/ сла́вим Победи́теля сме́рти – Христа́ Бо́га,/ о́бщаго свята́го Воскресе́ния ча́юще.

Моли́тва

О пресла́вная учени́це Христо́ва, све́тлая звездо́ Иоппи́йская, свята́я пра́ведная Тави́фо! К тебе́, ны́не на Небесе́х су́щей, с ве́рою притека́ем в моли́тве, ты же, я́ко ми́лостивая в жи́зни свое́й бы́вша, не лиши́ и нас, смире́нных, милосе́рдия твоего́. Принеси́ усе́рдныя моле́ния твоя́ Спаси́телю всех, Христу́ Бо́гу, да да́рует нам, хла́дным, любо́вь, малове́рным – те́плую ве́ру, леня́щимся – ре́вностное трудолю́бие, гордя́щимся – ти́хое смире́ние, и́нокиням – свято́е послуша́ние, нача́льствующим – ра́зум и милосе́рдие, боля́щим – здра́вие и облегче́ние, бе́дным – по́мощь и заступле́ние, уныва́ющим – Бо́жие упова́ние, оби́телям – мир и спасе́ние, лю́дем – во благо́м поспеше́ние, всем в ско́рбех – утеше́ние. Наипа́че моли́ Го́спода на́шего, апо́столом Петро́м тя воскреси́вшаго, да и мы сподо́бимся по о́бщем всех Воскресе́нии ста́ти в Це́ркви Его́ одесну́ю и с тобо́ю сла́вити Отца́, и Сы́на, и Свята́го Ду́ха во ве́ки веко́в. Ами́нь.

(Службу зри 1 апреля)