На Го́споди, воззва́х: стихи́ры му́чеников, глас 8.

Подо́бен: О, пресла́внаго чудесе́:

Му́ченицы Христо́вы прехва́льнии,/ одержа́щу иногда́/ е́ллинскому безу́мию/ и влеку́щу всех/ в беззако́нныя я́мы/ пути́ пра́ваго не оста́висте/ и безбо́жию не приложи́стеся,/ но пострада́сте нра́ва до́блестию/ и жизнь, мече́м умерщвле́ни, насле́довасте.

Фео́гния и Ру́фа, Антипа́тра,/ Феости́ха и Арте́му,/ Ма́гна и Феодо́та,/ сла́внаго Фавма́сия/ и Боже́ственнаго Филимо́на,/ страда́нии све́тло облиста́вшия/ и су́щия во тьме просвети́вшия,/ ве́рою почти́м/ и пе́сньми ублажи́м,/ свяще́нную сих пра́зднующе па́мять, веселя́щеся.

Цве́ти му́чеников кра́снии,/ полк свяще́нный,/ Богособра́нное совокупле́ние,/ Це́рковь изря́дная,/ сонм Богоизбра́нен,/ лик святы́й, собо́р блаже́нный,/ за Тро́ицу подви́гшеся,/ Сей моли́теся, Сию́ умоли́те о нас,/ я́ко да прии́мем грехо́в оставле́ние.

Ины стихи́ры преподо́бнаго, глас и подо́бен то́йже:

Преподо́бне Ме́мноне блаже́нне,/ предочи́стив ду́шу воздержа́нием,/ был еси́ чи́сто Ду́ха и красно́ оби́телище;/ те́мже лука́встия ду́хи отгоня́еши/ и неду́ги притека́ющим к тебе́/ исцеля́еши всегда́./ О нас, восхваля́ющих тя,/ Христу́ моли́ся.

Преподо́бне Ме́мноне сла́вне,/ облада́в страстьми́ душе́вными,/ нача́льник был еси́ мона́хов,/ к трудо́м помазу́я воздержа́ния усе́рдно сих,/ и́хже и предста́вил еси́ Всеви́дцу Сло́ву./ Пожи́в же житие́ блаже́нно и скве́рны неприме́сно,/ с ни́ми нас всегда́ помина́й,/ восхваля́ющих тя.

Преподо́бне Ме́мноне пребога́те,/ воды́ дре́вле исто́чник/ истещи́ сотвори́л еси́,/ в Госпо́дню хвалу́ и душа́м в снабде́ние./ От глубины́ мо́ря корабли́ спасл еси́,/ пру́жия вре́да моли́твами сохрани́л еси́,/ чудеса́ безме́рная соверша́еши всегда́./ О нас, восхваля́ющих тя,/ Христу́ моли́ся.

Сла́ва, и ны́не, пра́здника, или́ Богоро́дичен:

Плоть от крове́й Твои́х/ прие́м, Первове́чный Бог/ Тя Предста́тельницу показа́ челове́ком, Чи́стая,/ Те́мже изба́ви рабы́ Твоя́ от вся́кия беды́, и обстоя́ния,/ и се́тей лука́ваго врага́/ и сия́ния причасти́тися сподо́би избра́нных,/ вся сла́вящия и покланя́ющияся Тебе́.

Крестобогоро́дичен:

Тя ви́дящи, пригвожда́ема/ на Кресте́, Иису́се,/ и стра́сти прие́млюща во́лею,/ Де́ва и Ма́ти Твоя́, Влады́ко,/ увы́ Мне, – вопия́ше, – Ча́до Мое́ сла́дкое!/ ра́ны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли всех изба́вивый милосе́рдием Твои́м?

Тропа́рь му́ченикам, глас 8:

Святи́и девяточи́сленнии му́ченицы,/ от разли́чных градо́в во еди́н лик совокупи́вшеся ма́нием Боже́ственным,/ му́жественно за Христа́ пострада́сте,/ неви́димаго врага́ победи́сте,/ злове́рныя кня́зи и мучи́тели посрами́сте ва́шим терпе́нием,/ огне́м же любве́ Бо́жия разжиза́еми,/ веще́ственно вас огнь му́чащий в хлад преложи́сте,/ те́мже даде́ся вам от Христа́ Бо́га благода́ть/ тряса́вичную исцеля́ти боле́знь,/ от нея́же и многови́дных страсте́й,/ ми́лостивно спаса́йте и нас предста́тельством ва́шим, мо́лимся.

Кано́н му́чеников, глас 4.

Песнь 1

Ирмо́с: Триста́ты кре́пкия,/ рожде́йся от Де́вы,/ безстра́стия во глубине́ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́ побе́дное воспою́ пе́ние.

Боже́ственными добро́тами наслажда́ющеся вкупе́,/ и пото́ка пи́щнаго напита́ющеся бога́тно,/ и прича́стием обожа́еми, му́ченицы венцено́сцы,/ вас блажа́щия от лю́тых бед изба́вите.

Я́коже со́лнечныя лучи́, возсия́вше, заря́ми тве́рдых по́двиг, страда́льцы,/ и чуде́с сия́нии вся просвеща́ете,/ страсте́й нощь решите́ и де́монов мрак разоря́ете.

Умерщвле́ни на земли́ я́звами боле́зней,/ к неболе́зненней жи́зни преидо́сте вку́пе, ю́нии многострада́льнии./ Те́мже то́чите исцеле́ния, вся́ку боле́знь облегча́юще/ Богоприя́тными моли́твами, пребога́тии.

Богоро́дичен: Родила́ еси́ Бо́га из чи́стых Твои́х крове́й,/ вопло́щшася па́че ума́ зра́ком и́же по нас, Ма́ти Пренепоро́чная./ Те́мже вси Тя, ро́дове родо́в, ублажа́ют, святы́х му́ченик утвержде́ние.

Ин кано́н преподо́бнаго, глас то́йже.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Боже́ственною Пресвята́го Ду́ха блиста́яся благода́тию, светоно́сне Ме́мноне,/ и честно́е творя́щия твое́/ успе́ние све́тлою моли́твою твое́ю страсте́й мглу очи́сти.

Преподо́бне, твой крест взем, после́довал еси́ распе́ншемуся Сло́ву нас ра́ди/ и плотска́я движе́ния воздержа́нием, преподо́бне,/ и ни́зу лега́нием умертви́л еси́.

Поще́нием, и моли́твами, и слеза́ми Бо́гу соединя́яся,/ прия́л еси́ благода́ть от Него́ цели́ти неду́ги и отгони́ти ду́хи,/ Ме́мноне Богому́дре преблаже́нне.

Богоро́дичен: Обле́кся из Тебе́ Бог в челове́ка за бла́гость,/ сугу́б про́йде, Пресвята́я Чи́стая, де́йствы и естествы́./ Его́же моли́ всегда́ просвети́ти пою́щия Тя.

Песнь 3

Ирмо́с: Не му́дростию, и си́лою,/ и бога́тством хва́лимся,/ но Тобо́ю, О́тчею Ипоста́сною Му́дростию, Христе́:/ несть бо свят, па́че Тебе́,/ Человеколю́бче.

Ме́ртвым истука́нным пожре́ти ника́коже восхоте́вше,/ Поже́ршемуся нас ра́ди же́ртва жива́ принесо́стеся,/ о́троцы прекра́снии, святи́и му́ченицы.

Зако́ны Боже́ственными, укрепля́еми си́лою Ду́ха,/ беззако́ннующих сове́ты и ловле́ния низложи́сте/ и, зако́нне пострада́вше, сла́ву улучи́сте.

Да восхва́лится Арте́ма и Филимо́н, Феости́х и Магн,/ Руф сла́вный, и Антипа́тр, и Фавма́сий,/ Фео́гний и Феодо́т великоимени́тии.

Богоро́дичен: Ору́жия вся вра́жия ны́не до конца́ оскуде́ша,/ Тебе́ ро́ждшей Христа́, уя́звлена копие́м, Всенепоро́чная,/ о Не́мже му́ченицы, уязви́вшеся, пострада́ша.

Ин

Ирмо́с: Весели́тся о Тебе́/ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Я́коже со́лнце на земли́, доброде́телей просвеще́нием просия́л еси́,/ всех ду́ши, преподо́бне, благода́тию просвеща́я духо́вною.

Желе́зом твоя́ чре́сла препоя́сана име́л еси́ страсте́й на умерщвле́ние,/ я́ве, преподо́бне Ме́мноне, оде́явся безстра́стием.

Человеколюби́в быв немощны́м,/ от Бо́га прия́л еси́ благода́ть мно́гу, преподо́бне,/ стра́сти цели́ти неисце́льныя.

Богоро́дичен: Сло́во Бо́жие в Твое́ нескве́рное чре́во всели́ся/ и земны́м, Пречи́стая, всяк грех отъя́ло есть.

Седа́лен, глас 1.

Подо́бен: Гроб Твой:

Лик светови́ден свяще́нных страда́лец, совокупле́ние красно́,/ Богособра́нен собо́р, девяточи́сленный соста́в,/ пострада́вше кре́пко, попра́вше вра́жие мучи́тельство/ и причто́стеся А́нгельским лико́м, Го́сподеви предстоите́.

Сла́ва, преподо́бнаго, глас 8.

Подо́бен: Прему́дрости:

Я́ко звезду́ тя вси светови́дну, доброде́тельми/ и чуде́с заря́ми мир просвеща́юща, восхваля́ем, блаже́нне:/ прича́стник бо Боже́ственныя све́тлости был еси́,/ и к сия́нию, Ме́мноне, преше́л еси́ незаходи́мому./ Те́мже светоно́сную и святу́ю па́мять твою́ почита́ем,/ всегда́ Спа́са сла́вяще, и ве́рно вопие́м ти:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

И ны́не, пра́здника, или́ Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́м безчи́сленных согреше́ний мои́х,/ и я́ко к те́плому заступле́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ воплоще́нному безсе́менно/ моли́ся приле́жно о всех рабе́х Твои́х/ непреста́нно моля́щих Ти ся, Богоро́дице Пречи́стая,/ моля́щи Его́ при́сно, согреше́ний оставле́ние дарова́ти/ воспева́ющим досто́йно сла́ву Твою́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Сожже́ния страда́льцы и Богожре́нная заколе́ния,/ приноше́ние соверше́нно, же́ртвы прия́тны,/ приведо́стеся во́лею поже́ршемуся и смерть умертви́вшему./ Те́мже вас ублажа́ем.

Чу́до вели́кое показу́юще, сля́ченныя испра́висте, страда́льцы, ру́ки,/ и во́днаго труда́ изба́висте прибе́гшаго с любо́вию к ра́це ва́шей,/ наро́чита му́жа иногда́, досточу́днии.

Да ублажа́тся досто́йно Арте́ма и Антипа́тр,/ Феости́х и Руф, Магн, и Филимо́н, и Фео́н,/ и Фео́гн с сла́вным Феодо́том, пострада́вший, зову́т:/ сла́ва, Христе́, си́ле Твое́й.

Богоро́дичен: И́же в не́дрех О́тчих неизрече́нно седя́й,/ на Твои́х объя́тиих седи́т, Де́во, я́ко Младе́нец,/ Его́же блаже́нную страсть вообража́юще, добропобе́днии о́троцы изво́лиша умре́ти.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Струя́ми, преподо́бне, сле́зными твое́ се́рдце очи́стив,/ во́ды на безво́днем ме́сте истека́ти устро́ил еси́,/ Бо́гу тя просла́вльшу, Ме́мноне, я́ко Своего́ уго́дника.

Пресла́вным житие́м, я́ко звезда́, сия́я,/ свяще́нными чудесы́ твои́ми,/ друго́е ты не́бо показа́лся еси́, блаже́нне, ве́рою зову́щим:/ сла́ва си́ле Твое́й, Го́споди.

Зако́ном, преподо́бне, повину́яся Влады́чним, я́же под тобо́ю су́щия наста́вил еси́,/ упа́с, преподо́бне, многоусугу́бив же, я́ко раб послушли́в,/ Дарова́вшему тебе́ тала́нт.

Богоро́дичен: Привлече́нный ум мой, Богороди́тельнице, к сла́достем теле́сным/ Твои́м хода́тайством, молю́ся, утверди́,/ Я́же еди́на ро́ждшая Благода́вца Бо́га.

Песнь 5

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне, Оте́ческия сла́вы сия́ние Божества́,/ от но́щи у́тренююще,/ воспева́ем Тя, Человеколю́бче.

Я́коже мы́сленное у́глие, вже́гше ум,/ попали́сте вои́стинну хвра́стную вся́ку пре́лесть, блаже́ннии,/ и запале́ние угаси́сте и́дольское росо́ю ве́ры.

Разделе́ния в телесе́х не име́сте мно́зех,/ за Неразде́льную пострада́ти, страда́льцы, Тро́ицу иду́ще,/ те́мже разруши́сте диа́вола ополче́ние вся́ко.

Воспева́ет чудеса́ ва́ша/ от лука́ваго легео́на разреши́выйся де́монска, му́ченицы Богови́днии,/ к честны́м ковче́гом ва́шим прише́дый со усе́рдием.

Богоро́дичен: Избавля́ющи яви́ся нас от бед и прегреше́ний,/ тлетво́рных страсте́й, и скорбе́й, и обстоя́ний,/ ве́рою пою́щия Тя, Богоро́дице, Присноде́во.

Ин

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющий Тя.

Ум твой, чи́стыми воззре́нии к Бо́гу весь быв, Богоблаже́нне,/ плотски́х сласте́й яви́ся вы́шши.

Сый врач теле́с, пребога́те,/ отжени́ ско́тския душ боле́зни благода́тию Ду́ха.

Блаже́н еси́ ты, и добро́ тебе́ есть,/ побе́ждшу зло́бу вра́жию/ и стра́сти, преблаже́нне, умертви́вшу.

Богородичен: Родила́ еси́ Бо́га и Де́ва пребыла́ еси́, Богоневе́сто,/ сего́ ра́ди ублажа́ет Тя весь челове́ческий язы́к, ра́дуяся.

Песнь 6

Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в,/ но, я́ко Бог, из глубины́ возведи́ живо́т мой,/ Многоми́лостива.

Честна́ смерть яви́ся Боже́ственных страда́льцев пред Тобо́ю, Бо́же вся́ческих,/ и́хже ны́не почита́я, врачевство́ безме́здное боля́щим яви́л еси́.

Возвы́сивше ру́це и сердца́ высо́ким нра́вом к Вы́шнему мужеу́мно,/ лука́ваго возноше́ния, му́ченицы Богоно́сцы, низложи́сте.

Богоро́дичен: Я́коже стог, чре́во Твое́, Чи́стая, яви́ся,/ пшени́цу нося́щий безcме́ртия,/ всех ве́рных ду́ши пита́ющую и му́ченики просвеща́ющую.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею кро́вию.

Еди́нем то́чию зва́нием пру́зи отгоня́ются и всяк вред де́монский:/ Бо́га бо, Ме́мноне, ве́лий уго́дник, позна́лся еси́,/ вельми́ тя, о́тче, просла́вльшаго.

Победи́в плотска́го наве́та мудрова́ние,/ Ду́ха благода́ть прия́л еси́ отгоня́ти неду́ги/ и боля́щия греха́ми цели́ти ду́ши, досточу́дне.

О, чу́до!/ Ка́ко от еди́наго то́кмо призыва́ния спаса́ются твоего́, пресла́вне Ме́мноне,/ ве́рнии пла́вающий, тебе́ ви́дяще приспева́юща и волн молву́ кротя́ща?

Богоро́дичен: Умертви́ пло́ти моея́, Де́во, мудрова́ние,/ Умертви́теля сме́рти и Жизнода́вца я́ко заче́нши/ и ро́ждши па́че сло́ва и смы́сла, Пречи́стая.

Конда́к, глас 2.

Подо́бен: Вы́шних ища́:

Тве́рдый и всесве́тлый лик му́ченик девяти́,/ Трисо́лнечнаго Божества́ испове́дницы,/ на суди́щи Тому́ нача́льно взыва́ху:/ кровь и ду́ши на́ша с телесы́,/ я́ко непоро́чную же́ртву, прино́сим Тебе́, Влады́ко,/ в ли́цех Небе́сных Твои́х сопричти́, я́ко Бог Ми́лостивый.

Песнь 7

Ирмос: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди, Бо́же оте́ц на́ших.

Иска́пают ва́ши тру́дове, му́ченицы, Боже́ственный струи́ исцеле́ний всегда́,/ боле́зней ре́ки изсуша́юще/ и скве́рну вся́ку отмыва́юще страсте́й, досточу́днии.

Ра́довахуся страстоте́рпцы, внегда́ скорбе́ти им, ра́достию неизглаго́ланною,/ поя́ху, усека́еми мече́м:/ благослове́н еси́, Го́споди, Бо́же оте́ц на́ших.

Тяготу́ неду́гов, стра́сти серде́чныя и боле́зни теле́сныя,/ вся́ку же находя́щую скорбь/ нам облегчи́те, сла́внии страда́льцы.

Богоро́дичен: Яви́вшися всем му́чеником, Чи́стая Ма́ти Бо́жия, держа́ва ве́лия,/ яви́лася еси́ челове́ком заступле́ние,/ Тя пою́щим всегда́ свяще́нными пе́сньми.

Ин

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Сле́зными ту́чами страсте́й погаси́л еси́ пещь,/ ны́не же огне́м, блаже́нне, вои́стинну/ попаля́еши чуде́с твои́х ве́щный всегда́ неду́гов вред благода́тию.

Всеусе́рдно Творца́ твоего́, блаже́нне, возлюби́л еси́./ Те́мже пло́ти и ми́ра, Ме́мноне му́дре, взыва́я вне был еси́:/ благослове́н еси́ в хра́ме сла́вы Твоея́, Го́споди.

Я́коже дре́во, при исхо́дищих воздержа́ния, о́тче, насажде́н быв,/ возда́л еси́ плоды́ чуде́с де́йство, Ме́мноне пребога́те,/ во бла́го вре́мя изоби́луя.

От пруго́в вред прибы́вший уста́вил еси́/ повеле́нии Боже́ственными, Ме́мноне му́дре, ре́чными удави́в вода́ми,/ благослове́н еси́, Бо́же мой, – зовы́й, – возопи́л еси́.

Богоро́дичен: Бу́ри безме́рных согреше́ний, Отрокови́це, изба́ви мя,/ еди́на смире́нных по́мощь кре́пкая и прегреше́ний очище́ние:/ благослове́нна Ты в жена́х еси́, Всенепоро́чная Влады́чице.

Песнь 8

Ирмо́с: Изба́вителю всех, Всеси́льне,/ посреде́ пла́мене блаточе́ствовавшия, снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Ра́достную хвалу́ принесе́м/ вели́кия нам засту́пники, страстоте́рпцы му́ченики Пода́вшему, вопию́щим:/ вся дела́, благослови́те Госпо́дня Го́спода.

Укорени́вшеся на ка́мени ве́ры благоро́дне,/ я́коже ве́тви, му́ченицы, плоды́ нам страда́ния принесо́ша, ве́рою пою́щим:/ благослови́те, вся дела́ Госпо́дня, Го́спода.

Вра́чеве страсте́й великоимени́тии, души́ моея́ стра́сти исцели́те,/ и гее́нны изба́вите, и тьмы о́ныя кроме́шния,/ моля́ще Христа́ Бо́га на́шего.

Богоро́дичен: Законода́вца Христа́ родила́ еси́,/ зако́нно страда́вшия венча́вшаго, страстоте́рпцы му́ченики,/ Его́же моли́ зако́ном греха́ побежде́на мя, Отрокови́це, исцели́ти.

Ин

Ирмо́с: Ру́це распросте́р, Дании́л/ львов зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Я́ко у́тро, просия́л еси́, я́ко звезда́,/ я́ко вели́кое со́лнце, Ме́мноне Богодухнове́нне,/ ду́ши просвети́л еси́ благода́тию наста́вника тя поста́вльшим изря́дна,/ и учи́теля свяще́нна, и наказа́теля чу́дна, вопию́ща:/ вся дела́, благослови́те Госпо́дня Го́спода.

Глубо́ку я́зву врагу́, ражда́ющу смерть, преблаже́нне, дал еси́,/ егда́ благода́тию Ду́ха смире́ну стяжа́л еси́ му́дрость,/ высокому́дрый того́ нрав в зе́млю смиря́я и се́ти душетле́нныя его́ попира́я.

Ви́дети сподо́бился еси́ та́мо блаже́нство, и наслажде́ние ве́чнующее, свя́те,/ и святы́х све́тлости, пожи́в житие́ до́бре,/ и ны́не вопие́ши ра́достно:/ благослови́те, вся дела́ Госпо́дня, Го́спода.

Ме́сто, безво́дное пре́жде, ны́не же во́дно,/ пропове́дует, преподо́бне, ко Го́споду ве́ру твою́/ и благода́ть чуде́с твои́х, я́же соверши́л еси́, вопия́ Пода́телю до́брых:/ благослови́те, вся дела́ Госпо́дня, Го́спода.

Богоро́дичен: Неду́говавшую тягото́ю лю́тых и пото́пльшуюся сми́ренную ду́шу мою,/ Богоблагода́тная Влады́чице, посеще́ния сподо́би/ и здра́ву до конца́ покажи́, зову́щую:/ благослови́те, вся дела́ Госпо́дня, Го́спода.

Песнь 9

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благослове́ние процвела́ еси́./ Тем Тя вси велича́ем.

Се отверзо́шася вам Небе́сная врата́, пострада́вшим, –/ рече́ Христо́с страстоте́рпцем:/ вни́дите и приими́те, ра́дующеся, воздая́ния боле́зней досто́йная,/ от ве́ка хра́брствовавшим.

Кра́сни в ра́нах теле́сных бы́сте и А́нгелом уподо́бистеся,/ ны́не же предстоите́ всех красоте́, ра́дующеся при́сно,/ прича́стием я́ве удобря́еми кра́сных, всечестни́и.

Ста́нем в дому́ Бо́жий, восхваля́юще Антипа́тра, Феости́ха же,/ Ру́фа и Филимо́на страда́ния, Боже́ственнаго Фавма́сия чудеса́,/ Ма́гна и Арте́ма, Фео́гния и Феодо́та непобе́дное.

День спасе́ния нам возсия́ святы́х торжество́,/ е́же соверша́юще моле́бно, вопие́м им с ве́рою:/ му́чеников светоза́рный ве́рше, всех сердца́ озари́те.

Богоро́дичен: Обле́кся из Тебе́ Царь в теле́сную багряни́цу,/ про́йде, весь красе́н, из утро́бы Твоея́, и вся враги́ победи́,/ и побе́ду страда́льцем подаде́, Чи́стая еди́на Присноде́во.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Возмо́гл еси́, укрепля́емь, держа́вою Богонача́льною,/ Ме́мноне Богому́дре, всю вра́жию си́лу пребори́ти,/ те́мже вене́ц я́ко победоно́сец прие́м,/ о нас Христу́ моли́ся.

Я́коже от исто́чника, твоея́ ра́ки струи́ исцеле́ний истека́ют,/ боле́зни и скве́рны си́лою Боже́ственнаго Ду́ха очища́ют/ и напоя́ют, преподо́бне, помышле́ния чту́щих тя.

Днесь па́мять твоя́, о́тче, я́коже со́лнце, просвеща́ет всяк во́зраст и ра́зум:/ Све́та бо дела́, Ме́мноне, соверши́л еси́/ и к Све́ту незаходи́мому, ны́не отше́д, всели́лся еси́.

Взя́лся еси́ ко оби́телем ве́чным, Бо́га я́ко досто́йно зря,/ и к стадо́м преподо́бных приче́лся еси́, Ме́мноне блаже́нне,/ с ни́миже нас помина́й, на земли́ поми́нающих тя.

Богоро́дичен: Глас Ти вопие́м, Де́во, ра́достно Арха́нгелов:/ ра́дуйся, кля́твы разруше́ние, преподо́бных сла́во, му́чеников похвало́,/ пророко́в про́поведь и челове́ков спа́сение.

НА МАЛОЙ ВЕЧЕРНИ

На Го́споди, воззва́х: стихи́ры, глас 4.

Подо́бен: Яко благ:

Я́ко звезда́ многосве́тлая,/ святи́телю Васи́лие, вруче́нное ти ста́до утвержда́я, прехва́льне,/ украси́л еси́ луча́ми правове́рия догма́тов/ и е́реси тьму от него́ отгна́л еси́, всече́стне./ Те́мже мо́лимся ти:/ моли́ся изба́витися от бед и скорбе́й/ творя́щим па́мять твою́.

Сия́ет днесь па́мять святи́теля Васи́лия,/ просвеща́я вселе́нную,/ я́ко пресве́тлое со́лнце, во Остро́зе,/ озаря́я ве́рных сердца́/ и приходя́щия к ра́це моще́й его/ врачу́я от боле́зненных неду́гов;/ те́мнее, сла́вяще па́мять его́,/ усе́рдно лобыза́ем святи́теля мо́щи,/ моля́ся, да отжене́т тьму е́ресей от ста́да своего́/ си́лою от Де́вы Возсия́вшаго.

От Христо́вы Це́ркве,/ преблаже́нне Васи́лие,/ отгна́л еси́ мы́сленныя во́лки/ жезло́м за́поведей Христо́вых,/ и сию́ кре́пко о́крест огради́л еси́/ слове́сною кре́постию,/ и преста́вился еси́ Христу́,/ Ему́же неле́ностно послужи́л еси́,/ цел и неруши́м./ Те́мже, свя́те, моли́ Го́спода,/ да изба́вит от тли и бед/ ве́рою творя́щия всечестну́ю па́мять твою́.

Сла́ва, и ны́не, глас 2:

Возсия́, я́коже со́лнце, твоя́, святи́телю, па́мять,/ просвеща́ющи мы́сленная ве́рных сердца́,/ ю́же све́тло соверша́ем днесь,/ святи́телю Васи́лие, моле́бно тя призыва́я:/ ра́дуйся, дре́во целому́дренное,/ е́же не поработи́ ду́шу,/ но досто́йным воздержа́нием, я́ко щито́м Ду́ха, обложи́ся;/ ра́дуйся, па́стырю и учи́телю христоимени́тых люде́й свои́х;/ ра́дуйся, церко́вное украше́ние,/ архиере́ом добро́то, мона́шествующим похвало́,/ Васи́лие преосвяще́нне, моли́ся Христу́,/ да пода́ст мир вселе́нней и спасе́т ду́ши на́ша.

На стихо́вне стихи́ры, глас 6:

Васи́лие блаже́нне,/ припа́дая ти, молю́ся:/ уще́дри и просвети́, о́тче прему́дре, ду́шу мою́,/ я́ко да че́стно узрю́ Светода́вца Ще́драго.

Стих: Честна́ пред Го́сподем/ смерть преподо́бных Его́.

Хотя́щий ми сотвори́ти зло врази́,/ рыка́я, и́щут поги́бели мое́й,/ изба́ви мя, молю́ся ти, святи́телю Богому́дре,/ зане́ я́ко име́я дерзнове́ние к Бо́гу,/ всеблаже́нне иера́рше Васи́лие,/ от лука́вых муже́й спаси́ мя.

Стих: Свяще́нницы Твои́ облеку́тся в пра́вду/ и преподо́бнии Твои́ возра́дуются.

Приста́нище ти́хое, сте́ну необори́мую,/ столп утвержде́ния/ и дверь покая́ния стяжа́хом, ве́рнии,/ сего́ ра́ди, припа́дающе, мо́лимся ти, о́тче Васи́лие:/ огради́ нас моли́твами, я́ко му́дрый наста́вник/ и побо́рник о душа́х на́ших.

Сла́ва, и ны́не, глас то́йже:

Супоста́т ры́кает на ста́до Твое́, Пречи́стая,/ лука́вии ка́ждый день и́щут снедь себе́ сотвори́ти,/ но Ты, Богоро́дице, изба́ви его́/ от вся́каго вре́да и хище́ния.

Тропа́рь пи́сан на вели́цей вече́рни.

НА ВЕЛИЦЕЙ ВЕЧЕРНИ́

Блаже́н муж: 1-й антифо́н. На Го́споди, воззва́х: стихи́ры на 8, глас 6,

Подо́бен: Все отло́жше:

Всеосвяще́н Богоно́сец показа́лся еси́,/ святи́телю Васи́лие,/ пома́зание Бо́жие име́я,/ я́ко Ду́хом Святы́м обложе́н,/ и, све́тло входя́ вы́ну во Свята́я Святы́х,/ Богонача́льными светлостьми́ озаря́емь,/ причаща́лся еси́ Святы́х Та́ин благода́ти,/ те́мже, я́ко и́стинен святи́тель,/ со дерзнове́нием моли́ся/ о душа́х на́ших.

Просвети́ся житие́ твое́/ доброде́тельными светлостьми́/ и сим ста́до свое́ научи́л еси́,/ отгна́вши от него́ ле́сти тьму,/ те́мже показа́лся еси́ светоза́рное со́лнце,/ преблаже́нне Васи́лие,/ всели́выйся, иде́же сия́ет Свет невече́рний,/ и сын днесь благода́ти Свята́го Ду́ха яви́лся еси́./ Сего́ ра́ди не забу́ди,/ о́тче приснопа́мятне,/ твою́ честну́ю па́мять соверша́ющих/ и любо́вию ублажа́ющих тя.

Ум твой манове́нием/ е́же к Бо́гу, пресла́вне,/ ве́рою удобря́емь,/ яви́ тя Богому́дра наста́вника,/ зане́ умерщвля́л еси́ вожделе́ния пло́ти/ и тле́нное благода́тию в нетле́ние обрати́вый,/ Безпло́тным сочета́лся еси́, о́тче Васи́лие,/ све́тлый свети́льниче/ и моли́твенниче о душа́х,/ любо́вию чту́щих святу́ю па́мять твою́.

Ины стихи́ры, глас 2.

Подо́бен: Егда́ от Дре́ва:

В Захо́лмии пожи́л еси́,/ блаже́нне Васи́лие,/ яви́выйся до́брый па́стырь Христо́вы Це́ркве,/ егда́ же отту́ду во Остро́г преше́л еси́,/ посто́м, бде́нием и моли́твами/ удруча́л еси́ те́ло свое́,/ благоугожда́я Бо́гу,/ И́же просла́ви святы́я мо́щи твоя́, Богоно́сне,/ я́же исцеля́ют неду́ги всех,/ и́же ве́рою и любо́вию/ соверша́ют всесла́вную па́мять твою́;/ те́мже мо́лимся ти:/ изба́ви и нас от вся́ких зол и обстоя́ний/ моли́твами твои́ми.

Победи́тель тезоимени́тый/ вои́стинну ве́рным лю́дем яви́лся еси́,/ огражда́я их от напа́стей,/ о́тче Васи́лие,/ всегда́ бо призыва́ем предваря́еши ско́ро/ притека́ющих под кров твой,/ спаса́я в день и нощь ве́рныя/ от зловре́дных лука́ваго.

Зерца́ло Се́рбской земли́/ напосле́док дней яви́лся еси́, о́тче Васи́лие,/ сего́ ра́ди прииди́те, лю́дие,/ целу́ем святы́я и чудотво́рныя мо́щи/ Богоно́снаго отца́ на́шего,/ и́же разреша́ет грехо́вныя плени́цы,/ прогоня́я ду́хи лука́выя/ и свобожда́я ве́рныя рабы́ своя́,/ о ни́хже мо́лится Христу́ Бо́гу,/ да изба́вит и спасе́т ду́ши их.

Вели́кий засту́пник/ и те́плый хода́тай к Бо́гу/ о обрета́ющихся в ско́рбех и беда́х был еси́,/ блаже́нне Васи́лие,/ священнопропове́дниче Христо́в на земли́ су́щим,/ и́же с на́ми вопию́т к тебе́:/ спаси́ ны от вся́ких зол,/ о́тче Васи́лие,/ моли́твами твои́ми.

Сла́ва, глас 8:

До́блестьми твои́ми, о́тче Васи́лие,/ просвети́л еси́ ве́рных сердца́;/ кто бо слы́ша безме́рное твое́ смире́ние,/ терпе́нию твоему́ не удиви́тся?/ К ни́щим милосе́рд был еси́,/ подава́я по́мощи тре́бующим,/ всех науча́я стра́ху Госпо́дню,/ и ны́не неувяда́емым венце́м увяза́лся еси́, о́тче,/ моля́ся о душа́х на́ших.

И ны́не, Богоро́дичен: Царь Небе́сный:

Вход. Проки́мен дне и чте́ния три святи́тельская

(зри 23 апреля).

На лити́и стихи́ры, глас 2:

Ра́ка моще́й твои́х, о́тче Васи́лие,/ зари́ испуща́ет,/ цельбы́ подава́я приходя́щим к ней,/ от неду́гов свобожда́я их;/ сего́ ра́ди весели́ся и лику́й,/ Це́рковь Остро́жская с окре́стными стра́ны,/ возсия́ ти бо све́тлая па́мять блаже́ннаго Васи́лия,/ и́же всегда́ мо́лится о душа́х на́ших.

О́тче Васи́лие,/ по возвраще́нии из Афо́нския горы́/ яви́лся еси́ па́стве свое́й,/ я́ко па́стырь и учи́тель,/ наставля́я ю и́стинней ве́ре;/ она́ же, ра́дуяся, прославля́ет святу́ю па́мять твою́,/ я́же и по сме́рти твое́й показу́ет све́тлость жития́ твоего́,/ на е́же взира́я, взыва́ем ти богогла́сными пе́сньми:/ о́тче Богоно́сне,/ спаси́ служа́щия в Захо́лмии и Скенде́рии бра́тия на́ша/ от наве́тов вра́жиих.

Глас 4: О́тче Васи́лие,/ ра́ка моще́й твои́х пропове́дует/ си́лу благода́ти Всесвята́го Ду́ха, / И́же чрез мо́щи явля́ет ми́лость ве́рным,/ огражда́я Остро́г,/ в не́мже благоуха́ние цельбы́ подае́т,/ показу́я тя подо́бна апо́столом чудесы́,/ и́миже да́льняя, я́ко и бли́жния просвеща́еши/ и от бед пресла́вно избавля́еши;/ те́мже, Богоблаже́нне,/ свободи́ от лю́тых зол и ва́рваров/ всех, блажа́щих и любо́вию призыва́ющих тя.

Поте́кл еси́ хвали́ти/ своего́ Го́спода и Влады́ку, о́тче Васи́лие,/ напосле́док дней яви́выйся крестоно́сным людем,/ я́ко Богоблагода́тный па́стырь и учи́тель;/ те́мже ны́не наслажда́яся благи́х,/ стяжа́л еси́ дерзнове́ние к Бо́гу,/ Ему́же простри́ моли́твы/ о душа́х сла́вящих тя.

Пресла́вное житие́ твое́/ вселе́нней ди́вна тя показа́, Богому́дре о́тче:/ преподо́бным украше́ние был еси́,/ я́ко со́лнце, на земли́ лучи́ распросте́рши,/ озари́л еси́ ве́рных сердца́,/ соверша́ющих святу́ю па́мять твою́,/ всеблаже́нне Васи́лие.

Сла́ва, глас 6:

Святи́телем удобре́ние,/ отце́м красоту́,/ исто́чника чуде́с и ве́рных засту́пника,/ соше́дшеся, о празднолю́бцы,/ пе́сньми и похвала́ми воспои́м, глаго́люще:/ ра́дуйся, Захо́лмии и Скенде́рии храни́телю,/ Че́рныя Горы́ и Примо́рия сто́лпе непребори́мый и председа́телю;/ ра́дуйся, всесве́тлый свети́льниче,/ и́же се́рбския концы́ просвеща́еши чудесы́;/ ра́дуйся, скорбя́щих Боже́ственная ра́досте/ и оби́димых те́плый предста́телю,/ и ны́не, о́тче Васи́лие,/ моли́ся о чту́щих при́сно ра́достную па́мять твою́,/ огражда́я ве́рное твое́ ста́до правосла́вное.

И ны́не, глас 8:

Ра́дуйся, зако́на исполне́ние;/ ра́дуйся, хра́ме Святы́я Тро́ицы, Неве́сто Пречи́стая;/ ра́дуйся, Боже́ственное носи́ло всех Царя́;/ ра́дуйся, огню́ невеще́ственный,/ я́ко клеща́ми нося́щи на рука́х Твои́х у́глия,/ но́вый раю́, вертогра́де затворе́нный,/ трапе́зо пресве́тлая, голуби́це нескве́рная,/ престо́ле Вы́шняго, о́дре Божественномы́сленный,/ его́же Дух Святы́й осени́,/ Отрокови́це Свята́я.

На стихо́вне стихи́ры, глас 8:

О́тче святы́й Васи́лие,/ я́ко заря́ разу́мнаго све́та,/ церко́вное свети́ло, красота́ мона́шествующим,/ по́стнаго жития́ пра́вило,/ бу́ди нам засту́пник,/ свобожда́я от губи́тельнаго врага́ ду́ши на́ша,/ моли́твами твои́ми.

Стих: Честна́ пред Го́сподем/ смерть преподо́бных Его́.

Вели́кую власть от Бо́га прие́мь,/ о́тче Васи́лие,/ мно́жества лука́вых бесо́в отгоня́еши,/ спаса́я от озлобле́ний всех,/ ве́рою и любо́вию притека́ющих к ра́це моще́й твои́х.

Стих: Что́ возда́м Го́сподеви о всех,/ я́же воздаде́ ми?

Ка́ко досто́йно воспое́м вели́каго святи́теля Васи́лия, честна́го ума́ богоза́рное свети́ло,/ е́же освяща́ет и Боже́ственным ра́зумом просвеща́ет ве́рное ста́до,/ я́ко испове́датель глубины́ та́ин спасе́ния,/ те́мже согла́сно рцем ему́ вси:/ ра́дуйся, отце́в о́тче Васи́лие.

Сла́ва, глас то́йже:

Ты был еси́ па́стырь до́брый/ и учи́тель те́плый, святи́телю Васи́лие,/ всегда́ тя хва́ляще, вопие́м ти:/ тобо́ю Бог укра́си Це́рковь Свою́,/ и те́ло твое́, многоле́тно в земли́ пребы́вшее,/ нетле́нно яви́ся лю́дем твои́м;/ те́мже не преста́й моли́тися/ о чту́щих святу́ю па́мять твою́.

И ны́не, Богоро́дичен: Безневе́стная Де́во:

Тропа́рь свята́го, глас 4:

От ю́ности твоея́ всего́ себе́ Го́сподеви отда́л еси́,/ пребыва́я в моли́твах, труде́х и посте́х, о́тче Богоно́сне,/ о́браз был еси́ доброде́тели своему́ ста́ду;/ сего́ ра́ди ви́дя Бог твое́ благо́е произволе́ние,/ поставля́ет тя Свое́й Це́ркви па́стыря и до́бляго архиере́я/ и по преставле́нии твое́м соблюде́ свято́е те́ло твое́ неруши́мо, святи́телю Васи́лие./ Те́мже, я́ко име́я дерзнове́ние,/ моли́ся Христу́ Бо́гу/ спасти́ся душа́м на́шим.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Гроб Твой, Спа́се:

Служи́тель быв Христу́, всече́стне,/ научи́л еси́ лю́ди и просвети́л их Боже́ственным креще́нием,/ вразумля́я, наста́вил еси́, о́тче Васи́лие, ста́до твое́./ Те́мже пропове́дника тя и́стины вси имену́ем, уго́дниче Христо́в,/ моли́ся спасти́ся душа́м на́шим.

Сла́ва, и ны́не, Богоро́дичен:

Безневе́стная Чи́стая Богоро́дице Де́во,/ еди́на Предста́тельнице ве́рных и покро́ве,/ изба́ви всех от бед и скорбе́й и лю́тых обстоя́ний,/ на Тебе́ упова́ние иму́щих, Отрокови́це,/ и ду́ши на́ша спаси́ Боже́ственными мольба́ми Твои́ми.

По 2-м стихосло́вии седа́лен, глас 4.

Подо́бен: Удиви́ся Ио́сиф:

От ю́ности взем крест свой, благоче́стно Христу́ после́довал еси́,/ плотско́е мудрова́ние воздержа́нием победи́л еси́,/ ми́ра отбе́гши, мона́шескому житию́ отда́выйся,/ те́мже, о́тче, Дух Святы́й в тя бряца́ет и на святи́тельское седалище возведе́ тя,/ иде́же возвели́чил еси́ Влады́ку Христа́ и Его́ Пречи́стую Ма́терь разли́чными дарова́ньми и чудесы́,/ посе́м ра́ка моще́й твои́х украси́ся, святи́телю Васи́лие.

Сла́ва, и ны́не, Богоро́дичен:

Де́во Всенепоро́чная,/ превы́ше Бо́га ро́ждши, моли́ непреста́нно Его́ со святи́телем Васи́лием/ оставле́ние прегреше́ний и исправле́ние жития́ да́ти нам всем,/ ве́рою и любо́вию пою́щим Тя по до́лгу, еди́на Всепе́тая.

По полиеле́и седа́лен, глас 8.

Подо́бен: Прему́дрости:

Стра́сти посто́м и моли́твою обузда́в,/ яви́лся еси́ вели́кий святи́тель/ и па́ству твою́ пресла́вно упасл еси́, о́тче Васи́лие,/ креще́нием просвети́л еси́ ю и наказа́л сла́вити Еди́наго Бо́га в Трие́х Ли́цех./ Ве́рою приходя́щия к Святе́й Це́ркви и к ра́це моще́й твои́х/ спаса́й моли́твами к Бо́гу,/ да пода́ст оставле́ние грехо́в чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную дверь и ковче́г,/ всесвяту́ю го́ру и всесве́тлый о́блак воспои́м,/ неопали́мую купину́, слове́сный рай,/ Е́вино воззва́ние, всей вселе́нней вели́кое сокро́вище,/ в не́мже обре́теся спасе́ние ми́ру, оставле́ние людски́х согреше́ний,/ те́мже и вопие́м Ей:/ о Богома́ти, моли́ Христа́ Бо́га/ спасти́ ду́ши покланя́ющихся пресвято́му рождеству́ Твоему́.

Таже степе́нна, 1-й антифо́н, 4-го гла́са. Проки́мен, глас 4: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Уста́ пра́веднаго поуча́тся прему́дрости, и язы́к его́ возглаго́лет суд. Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Насле́дниче Бо́жий,/ соприча́стниче блаже́нных селе́ний,/ служи́телю Христо́в, свя́те Васи́лие,/ по и́мени твоему́ та́ко и житие́ твое́ просия́ нам,/ со седи́нами проявля́шеся све́тлость ра́зума твоего́/ и незло́бие души́ твоея́,/ кро́тость сло́ва прославля́ше свято́е житие́ твое́,/ е́же, собра́вшеея, велича́ем/ и, в успе́нии блажа́ще тя, мо́лим:/ помози́ дости́гнути и нам та́мо,/ иде́же еси́, Богоно́сне Васи́лие.

Канон Богоро́дице со ирмосо́м на 6 и свято́му на 8. Глас 6.

Песнь 1

Ирмос: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

С Вы́шними ли́ки, яко святи́тель и служи́тель Бо́жий,/ предста́л еси́, па́стырю до́брый Захо́лмии,/ до́бре упа́сши вруче́нное ти ста́до,/ о нас приле́жно моли́ся, получи́ти ве́чных благ моли́твами твои́ми, о́тче Васи́лие.

Избра́н был от Го́спода служи́ти свято́му Ева́нгелию че́стно, преблаже́нне,/ захолми́йстии лю́дие, стяжа́в тя па́стыря,/ вразумля́хуся уче́нии твои́ми, свя́те Васи́лие.

Ра́зумом Бо́жиим обогаща́емь,/ сло́во живо́тно от се́рдца источи́л еси́,/ напая́я ду́ши и сердца́ ве́рных, олядене́вшия страстьми́,/ чуде́с заря́ми твои́ми, Богоблаже́нне Васи́лие.

Просвети́ ду́шу и се́рдце мое́, молю́ся Ти, Светода́вче, тва́ри Соде́телю,/ пода́ждь мне дар пе́ния воспева́ти Твоего́ уго́дника, пресла́внаго Васи́лия,/ научи́вшаго нас твори́ти во́лю Твою́, Бо́же мой.

Обре́л еси́ Небе́сную прему́дрость, я́ко вруче́нный ти тала́нт,/ иже умножа́я, Богоно́сне Васи́лие, разори́л еси́ де́монов ле́сти/ и умудри́л лю́ди Боже́ственным уче́нием.

Зачина́ется Преве́чный, и обновля́ется естество́ на́ше,/ рожде́ннаго от Отрокови́цы пропове́дуя,/ име́ющаго два естества́ во Еди́ней Ипоста́си.

Богоро́дичен: Свяще́ннейший лик проро́чески проявля́ше издале́ча/ хотя́щей Ти бы́ти и́стинней Ма́тери Бо́жией,/ те́мже и мы, сла́вяще Тя, воспева́ем, яко Вы́шшую Херуви́м и всея́ тва́ри, Богома́ти.

Катава́сия по уста́ву.

Песнь 3

Ирмо ́с, глас 1: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.

Иска́пает Боже́ственная сла́дость из уст твои́х, о́тче Васи́лие,/ па́ству твою́ напои́л еси́,/ христоимени́тыя лю́ди, блаже́нне Васи́лие.

Гроб, иде́же лежи́т честно́е те́ло твое,/ благово́ние источа́ет, я́коже рай Бо́жий,/ облагоуха́я ве́рныя и служа́щия в оби́тели твое́й,/ те́мже, ра́дуяся, пресла́вне, не забу́ди и нас, о́тче Васи́лие.

Скендери́йская убо страна́ прие́млет те́ло твое́,/ дух же твой отхо́дит в Вы́шний Иерусали́м,/ иде́же лику́ет с проро́ки, апо́столы и все́ми святы́ми,/ с ни́ми же ку́пно моли́ся о нас Человеколю́бцу Бо́гу, Богоблаже́нне Васи́лие.

Святи́телю Васи́лие, уче́ньми свои́х святы́х уст/ из уст неприя́зненных волко́в лю́ди своя́ изба́вил еси́ и приве́л Творцу́,/ подава́я всем дар исцеле́ния.

Сло́во Безнача́льное, во пло́ти явле́нное,/ дарова́вшее нам па́стыря и учи́теля,/ я́коже просла́вил еси́, Христе́, Своего́ слугу́,/ не забу́ди па́ству его́,/ я́же прославля́ет своего́ иера́рха, ди́внаго во святы́х Твои́х, блаже́ннаго Васи́лия.

Богоро́дичен: Разуме́ти, Чи́стая, рождества́ Твоего́ неизрече́нныя глуби́ны/ недоуме́ет ум челове́ческий,/ Бог бо, Себе́ смири́в щедро́ты ра́ди во чре́ве Твое́м, всего́ мя обнови́.

Седа́лен, глас 4

Подо́бен: Яви́лся еси́ днесь вселе́нней:

Правосла́вно, свя́те Васи́лие, Це́рковь Христо́ву упа́сл еси́,/ ерети́ческия отгоня́я го́рькия пле́велы,/ сего́ ра́ди в Вы́шних водворя́ешися, блаже́нне.

Сла́ва, и ны́не, Богоро́дичен:

Сло́во О́тчее, Христа́ Бо́га на́шего,/ из Тебе́ воплоти́вшагося, Богоро́дице Де́во, велича́я,/ ублажа́ем Тя, Чи́стая Богоневе́сто.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующие.

Ты, о́тче свяще́нне Васи́лие, испо́лнен Свята́го Ду́ха,/ лука́выя ду́хи отгна́л еси́,/ духо́вными ве́ры уче́ньми твои́ми просвеща́я ста́до твое́.

Еди́ницу Несозда́нную богосло́вствуя,/ в Трие́х Ли́цы разделя́ему, несеко́мую и несме́сну,/ просвеща́еши свяще́нным Богосло́вием ста́до твое́, блаже́нне Васи́лие.

Нача́льный богогла́сен Бо́жиим прича́стием яви́лся еси́, о́тче Васи́лие,/ просвеща́еши омраче́нныя, я́ко рачи́тель доброде́тели,/ науча́я сла́вящия па́мять твою́.

Возше́л еси́ на ле́ствицу доброде́телей, блаже́нне,/ показу́я путь спасе́ния своему́ ста́ду,/ сего́ ра́ди правосла́внии лю́дие от Захо́лмии, Скенде́рии и Че́рныя Горы́,/ почита́я тя, лобыза́ют святы́я мо́щи твоя́, о́тче Васи́лие.

Естество́м несказа́ннаго, милосе́рдием пребога́таго,/ Христа́ просла́вил еси́ на земли́, пребога́те о́тче,/ те́мже и просла́влен, наслажда́ешися блаже́нства, свя́те Васи́лие.

Богоро́дичен: Кля́тва прама́тере на́шея Е́вы разори́ся Тобо́ю, Богома́ти,/ Ты бо нам Исто́чника спасе́ния родила́ еси́,/ И́стины присносу́щаго Живота́.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Бо́жиим све́том озаря́емь,/ лю́бящих Бо́га ду́ши озари́л еси́, свя́те,/ просвеща́я их богове́дением сло́ва открове́нна,/ и́мже просвети́ и нас, чту́щих святоле́пную па́мять твою́, Васи́лие.

Боже́ственным све́том и чи́стым по́мыслом возвыша́яся,/ непоро́чен яви́лся еси́ слуга́ Христа́ Спа́са, о́тче Васи́лие,/ сего́ ра́ди моли́ся и о ста́де свое́м,/ спасти́ся ему́ от злых наве́тов ага́рянских.

Благода́тию призыва́емь, разруши́л еси́ и́дольския безбо́жия словесы́ Ева́нгельскими;/ я́коже име́я дерзнове́ние, защити́ и нас моли́твами твои́ми, блаже́нне Васи́лие,/ от злых обстоя́ний, наве́тующих на ны.

Мно́гим чудотворе́нием утеша́я ста́до свое́ правосла́вное,/ ше́ствовал еси́ ко Афо́нстей горе́/ и, отту́ду возвраща́яся, благовести́л еси́ лю́дем свято́е уче́ние Христо́во,/ и́мже просвеща́й и нас, священнотаи́нниче Васи́лие.

Бо́жиим определе́нием прише́л еси́ в Остро́жскую страну́,/ пото́м же посети́л еси́ Скендери́йскую о́бласть, поучи́в ю зако́ну Бо́жию,/ те́мже и лю́дие ве́рнии, живу́щии в них, прие́мше тя,/ хва́лят тя и велича́ют яко своего́ предста́теля, о́тче Васи́лие.

Щито́м Правосла́вия охраня́еши лю́ди своя́/ от па́губных е́ресей, блаже́нне Васи́лие,/ огражда́я их от злово́ния благоуха́нием Богоно́сных моще́й твои́х,/ до́брый па́стырю Васи́лие.

Богоро́дичен: По стра́ннем рождестве́ Твое́м, пребыла́ еси́ Де́вою, Мари́е Богоневе́сто,/ мо́лимся Ти:/ чу́дным покро́вом Твои́м спаси́ неду́гующия/ и защити́ правосла́вныя лю́ди Твоя́.

Песнь 6

Ирмо́с, глас 1: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Язы́к твой, Ду́хом изощре́н разу́мно,/ я́ко трость скоропи́сца,/ написа́ в сердца́ благочести́вых сло́во бога́тное и всесвяще́нное/ Бо́жиим манове́нием, о́тче блаже́ннейший Васи́лие.

Поуча́яся Боже́ственным, вшел еси́ во Свята́я Святы́х,/ просвеща́я Ду́хом ве́рныя,/ я́ко Тро́ическою заре́ю освяще́н, о́тче Васи́лие.

Ко спасе́нию устроя́я люде́й Бо́жиих,/ Явльшагося во пло́ти пропове́дуеши, па́стырю,/ и, я́ко учи́тель Захолми́йский и Черного́рский, наставля́еши ста́до твое́,/ Те́мже, уго́дниче Бо́жий, спаси́ служа́щия и приходя́щия в оби́тели твое́й,/ и́же усе́рдно лобыза́ют честну́ю ра́ку моще́й твои́х.

От напа́стей и разли́чных бед и скорбе́й,/ наноси́мых ве́рным от лука́вых,/ изба́ви ны, о́тче, я́ко уго́дник Христо́в,/ чту́щия свято́е твое́ успе́ние, блаже́нне Васи́лие.

Заступле́ние ве́рным и весе́лие ра́достное печа́льным,/ обогати́ ны духо́вною ра́достию,/ жела́ющий и прося́щия твоего́ заступле́ния, новоявле́нне Васи́лие.

Богоро́дичен: Ты была́ еси́, Де́во Всепе́тая,/ дверь Царя́ Небе́снаго и храм сла́вы Его́,/ отве́рзи и нам две́ри милосе́рдия/ и введи́ нас моли́твами Твои́ми в жили́ще сла́вы Небе́сныя.

Конда́к, глас 8.

Подо́бен: Взбра́нной Воево́де:

Я́ко от младе́нства себе́ порабо́тив Го́сподеви,/ посто́м и бде́нием свое́ те́ло удруча́я, му́дре,/ сосу́д че́стен Ду́ху Пресвято́му яви́лся еси́,/ сего́ ра́ди поставля́ет тя па́стырем Своея́ Церкви́,/ юже до́бре пасл еси́./ Те́мже ко Го́споду отхо́диши, Его́же возлюби́л еси́./ Мо́лимся ти, помяни́ и нас, ве́рою чту́щих святу́ю па́мять твою́, да вси зове́м ти:/ ра́дуйся, всече́стне о́тче Васи́лие.

И́кос:

Воспое́м ны́не хвала́ми святи́теля, па́стыря и учи́теля/ Захолми́йскаго, Скендери́йскаго, Че́рныя Го́ры и Примо́рия,/ я́ко да моли́твами его́ изба́вимся нече́стия и наве́тов лука́ваго,/ и́бо он яви́ся лю́дем свои́м нескве́рнен и нетле́нен,/ прине́сши Христу́ себе́ в непоро́чную же́ртву, Бо́гу благоприя́тну,/ я́ко святи́тель, освяще́н те́лом и душе́ю,/ те́мже, ве́рнии лю́дие, прииди́те и восхвали́те Це́ркви и́стиннаго предста́теля,/ до́бляго побо́рника ве́ры Правоела́вныя, преди́внаго чудотво́рца,/ ми́лостиваго моли́твенника о душа́х на́ших, пресла́внаго Васи́лия.

Песнь 7

Ирмос: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Просвеща́емь благода́тию по Боже́ственному манове́нию,/ был еси́ светода́тельная звезда́,/ в после́днее вре́мя просия́в заря́ми, му́дре, пою́щим:/ благослове́н Бог оте́ц на́ших.

Святе́йшая Це́рковь озари́ тя,/ во е́же украси́ти ю доброде́тельными дея́ньми,/ живу́щей в тебе́ Неразде́льней Тро́ице, Е́йже вопие́м:/ благослове́н Бог оте́ц на́ших.

Вещми́ су́етными весь ум челове́ческий обуя́,/ ему́же даждь цельбу́ сло́вом твои́м, Васи́лие, науча́я лю́ди пе́ти:/ благослове́н Бог оте́ц на́ших.

Диви́мся пресла́вным чудесе́м твои́м, блаже́нне Васи́лие,/ и́миже неду́ги исцеля́еши и от бед избавля́еши,/ те́мже, повину́яся веле́нию твоему́, вопие́м Го́сподеви:/ благослове́н Бог оте́ц на́ших.

На́шему смире́нию бу́ди засту́пник, о́тче Васи́лие,/ и науча́й нас всегда́ пе́ти:/ благослове́н еси́, Бо́же оте́ц на́ших.

Богоро́дичен: Седя́й в не́дрех неопи́санно Бо́га Отца́/ ны́не, Пречи́стая, почи́ в не́дрех Твои́х опи́санно,/ Твои́м обложе́н зра́ком спасе́ния ра́ди на́шего,/ Ему́же усе́рдно вопие́м:/ Препе́тый и Превозноси́мый во ве́ки.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Го́рдаго зми́я твои́м смире́нием стерл еси́, блаже́нне Васи́лие,/ возвыша́яся Бо́гу свои́м честны́м ра́зумом;/ те́мже тя чтим, Христа́ превознося́ще во ве́ки.

Богосло́вствуя о воплоще́нном Сло́ве,/ лю́ди своя́ от рабо́ты и ле́сти спасл еси́,/ отгони́вый ага́рянская безбо́жия, о́тче Васи́лие.

Возра́сл еси́, я́ко цвет благоуха́ния, в Захо́лмии, о́тче Богоно́сне,/ Скенде́рия же, тя прие́мля,/ всем прино́сит, яко во́ни, целе́бныя да́ры.

Иска́павый Бо́жия благода́ти сла́дость, я́ко гора́ ма́слина,/ те́ло твое́ слу́жит оби́тели твое́й,/ е́юже хва́лимся, воспева́юще дела́ Бо́жия.

Лико́в преми́рных приснотеку́щий светоно́сный исто́чник,/ благода́ти храм, Пречи́стая Де́во,/ сохрани́ нас моли́твами уго́дника Бо́жия Васи́лия.

Богоро́дичен: Избавля́еши нас пе́рвыя кля́твы Твои́м рождество́м, Благослове́нная Отрокови́це,/ се́го ра́ди вопие́м Ти гла́сом Гаврии́ла:/ ра́дуйся, Вино́вная всех спасе́нию.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

В земли́ кро́тких яви́лся еси́, о́тче Васи́лие, кро́ток,/ и незло́бив быв, с Вы́шними совокупля́яся во́инствы,/ я́ко доброде́тельными́ светлостьми́ укра́шен, блаже́нне.

Престо́л украша́я све́тло во всех, даже посреде́ злочести́вых градо́в,/ в нихже пожи́в, яко А́нгел,/ святи́тельством пома́зан, о́тче Богому́дре.

Па́мять твоя́ днесь составля́ет пра́здник,/ апо́стольский лик и му́ченический собо́р ра́дуется,/ пра́ведных похвало́, свети́ло Черного́рское,/ е́же ве́рнии, пе́сньми восхваля́юще, вопию́т ти:/ изба́ви нас от вся́ких напа́стей и бед, блаже́нне Василие.

Пресла́вная па́мять твоя́ нам возсия́,/ просвеща́ющи ве́рных, и́же мо́лятся ти, да помяне́ши их/ и моли́твами твои́ми изба́виши вся лю́ди твоя́, о́тче му́дре Васи́лие.

Умертви́ на́ша плотски́я стра́сти и по́хоти,/ уста́ви бу́рю душе́вных волне́ний,/ укрепи́ же всех нас, и́же ве́рою и любо́вию почита́ют/ блаже́нную па́мять твою́, новоявле́нне Васи́лие.

Богоро́дичен: Я́коже ка́пля небе́сная, во Твое́ чре́во, о Пресвята́я Де́во, дождь сни́де,/ изсуша́я пото́ки льсти́выя,/ и всем ве́рующим избавле́ние Тобо́ю, Пречи́стая, дарова́ся.

Свети́лен.

Подо́бен: Посети́л ны:

Сла́вно красу́ется днесь светоза́рное торжество́ во святе́й сла́ве лица́ Бо́жия,/ я́ко прии́де день па́мяти святи́теля, его́же велича́юще, мо́лим:/ да помяне́т по и́мени служа́щих во оби́тели его́/ и всех нас, хва́лящих па́мять его́.

Сла́ва, и ны́не, Богоро́дичен:

На Тя, Пречи́стая, упова́ние к Бо́гу возлага́ем: моля́щеся Ти:/ да от Христа́ Го́спода испро́сиши нам невреди́мым до конца́ сохрани́тися.

На хвали́тех стихи́ры, глас 8.

Подо́бен: О, пресла́внаго чудесе́:

Святи́телю Васи́лие,/ всел еси́ на ле́ствицу Боже́ственнаго ра́зума/ и к Бо́гу прибли́жился,/ исцеле́ния дар прие́мый,/ и́мже исцеля́еши неду́ги неисце́льныя/ и отгоня́еши ду́хи нечи́стыя,/ тем, па́мять твою́ пра́зднующе,/ ра́достию се́рдца Христа́ велича́ем,/ возвели́чившаго Своего́ уго́дника.

О́тче чу́дне Васи́лие,/ име́я светови́ден ум,/ свы́ше облиста́емь,/ ста́до твое́ до́бре упа́сл еси́./ Захо́лмия и Скенде́рия тобо́ю хва́лятся,/ Че́рная Го́ра с Примо́рием показу́ют чудеса́ твоя́,/ оби́тель же твоя́ со служа́щими в ней украша́ется тобо́ю./ Стра́сти ути́шив,/ бесо́вское де́йство уста́вил еси́,/ безстра́стием же, яко крыло́ма, возлете́л еси́ та́мо,/ иде́же неизрече́нная и недомы́слимая добро́та,/ тем ны́не моли́ся/ о всех нас, честву́ющих твое́ успе́ние.

О́тче отце́в, свяще́нства пра́вило,/ целому́дрия о́браз,/ мона́шествующих кре́пость был еси́, Васи́лие./ Сего́ ра́ди лику́й, Це́ркве Остро́жская, со служа́щими в тебе́,/ и́бо прии́де день па́мяти твоего́ утвержде́ния,/ любве́ свети́льника, исто́чника чуде́с,/ Боже́ственнаго Ду́ха сосу́д,/ пра́здник блаже́ннаго Васи́лия,/ его́же блажа́ще,/ усе́рдно хвала́ми почти́м.

Сла́ва, глас 6:

Преподо́бне треблаже́нне,/ святе́йший о́тче Васи́лие,/ па́стырю до́брый ве́рнаго своего́ ста́да,/ учениче́ Христо́в,/ положи́вый ду́шу о о́вцах,/ ны́не, всехва́льне, моли́твами твои́ми/ испроси́ нам ве́лию и бога́тую ми́лость.

И ны́не, Богоро́дичен:

Бо́га, от Тебе́ воплоти́вшагося,/ разуме́хом, Богоро́дице Де́во,/ Того́ моли́, Пречи́стая,/ о спасе́нии душ на́ших.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Апостол ко Евреем, зача́ло 335. Аллилу́ия: Свяще́нницы Твои́ облеку́тся в пра́вду, и преподо́бнии Твои́ ра́достию возра́дуются. Ева́нгелие от Луки́, зача́ло 24. Прича́стен: В па́мять ве́чную: