На Го́споди, воззва́х: стихи́ры пра́здника 3, и апо́стола 3, глас 4.

Подо́бен: Я́ко до́бля:

Свяще́нник свяще́ннейший,/ страда́лец зако́нен,/ сро́дник Зижди́теля и́стинный,/ чудотво́рец досточу́ден,/ свети́льник пресве́тел,/ заблу́ждших вождь, Симео́не, показа́лся еси́,/ столп непоколе́блен честны́я Це́ркве,/ и Вы́шняго насле́дник Ца́рствия,/ и А́нгелом равноче́стный.

По боле́знех теле́сных,/ святи́телю пресла́вне,/ по вся́цей му́це многоболе́зненней,/ по премно́гих боре́ниих/ Кресту́ прибли́жился еси́,/ подо́бяся Христу́, распе́ншемуся во́лею./ Те́мже, ра́дующеся, святу́ю твою́ па́мять соверша́юще, Симео́не,/ моли́твами твои́ми/ разреше́ние согреше́ний прие́млем.

В Це́рковь Небе́сную/ свяще́нно вшел еси́,/ свяще́нно облива́емь, блаже́нне, кро́вию,/ и Тро́ице предстои́ши,/ бога́тно сия́я отту́ду/ блиста́нии истека́ющими, пребога́те./ Те́мже днесь, Симео́не,/ твою́ па́мять светоно́сную соверша́юще,/ чу́вствия души́ просвеща́ем.

Сла́ва, и ны́не, пра́здника, или́ Богоро́дичен:

Ту́чами Ду́ха Пресвята́го,/ мою́ мысль ороси́,/ Я́же ка́плю ро́ждшая, Христа́,/ неизче́тно безме́рная беззако́ния челове́ков/ щедро́тами измы́вшую;/ изсуши́ исто́чник страсте́й мои́х/ и пото́ка мя сподо́би/ пи́щи живы́я при́сно/ моли́твами Твои́ми.

Крестобогоро́дичен:

На Кресте́ Тя я́ко узре́/ пригвожде́на, Го́споди,/ А́гница и Ма́ти Твоя́ дивля́шеся,/ и, что́ виде́ние сие́, – взыва́ше, –/ Сы́не вожделе́ние?/ Сия́ Ти неве́рный собо́р воздаде́ беззако́нный,/ и́же мно́гих Твои́х чуде́с наслади́выйся./ Но сла́ва неизглаго́ланному соше́ствию Твоему́, Влады́ко.

Тропа́рь, глас 1:

Христо́ва тя сро́дника, Симео́не священнонача́льниче,/ и му́ченика тве́рда свяще́нно восхваля́ем,/ пре́лесть потреби́вшаго/ и ве́ру соблю́дшаго./ Те́мже, днесь всесвяту́ю твою́ па́мять пра́зднующе,/ грехо́в разреше́ние моли́твами твои́ми прие́млем.

Ин тропа́рь, глас 4:

В ми́ре ра́дуешися, Симео́не Иерусали́мский,/ любе́зно Христу́ Бо́гу,/ те́ло душе́вное чи́сто сохрани́в,/ претерпе́вый страсть теле́сную, долготерпели́ве, кре́пко,/ и в коне́ц на кресте́ ра́спят бысть./ Ты бо, И́стинному Рачи́телю подо́бяся,/ и от ми́ра ско́ро отлучи́ся,/ лю́тыя я́звы на себе́ понесе́/ и мо́лишися о душа́х на́ших.

Кано́н пра́здника со ирмосо́м на 6 и свята́го на 6. Творе́ние Ио́сифово. Глас 4.

Песнь 1

Ирмо́с: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Симео́не свяще́нне, Влады́це, венцено́сец, предстоя́,/ любо́вию па́мять твою́ творя́щим всесвяще́нную/ согреше́ний разреше́ние проси́.

Ве́трилом окриля́емь, святи́телю, кре́стным,/ я́ко вои́стинну хла́дом ду́ха,/ бу́ри ми́мо текл еси́ пре́лести, всесла́вне.

Ми́ром Боже́ственным пома́за свяще́нника тя лю́дем/ И́же от коле́на Иу́дова прозябы́й Христо́с,/ Симео́не свяще́нне и А́нгелом собесе́дниче.

Богоро́дичен: Я́ко су́щи тва́рей вы́шши,/ всех Творца́ и Бо́га во чре́ве зачала́ еси́, Де́во,/ и родила́ еси́ челове́ком на избавле́ние.

Песнь 3

Ирмо́с: Лук си́льных изнемо́же,/ и немощству́ющий препоя́сашася си́лою./ Сего́ ра́ди утверди́ся в Го́споде се́рдце мое́.

Манове́нием к Бо́гу обожа́емь, весь, Симео́не, светови́ден был еси́,/ муче́ния облиста́я сия́нием, свяще́нне.

У́тро су́щим во тьме возсия́л еси́,/ Пра́вды показу́я Со́лнце,/ из о́блака, Де́вы Отрокови́цы, челове́ком возсия́вшее.

Мирски́я сла́сти возненави́дел еси́,/ святи́телей красота́ ле́потна был еси́/ и страда́нием Небе́сныя сла́вы, о́тче, сподо́бился еси́.

Богоро́дичен: Весь похвале́ний побежда́ется зако́н о Тебе́, Богороди́тельнице Всенепоро́чная:/ Бог бо из Тебе́, я́коже весть, нас ра́ди Челове́к бысть.

Седа́лен, глас 4.

Подо́бен: Яви́лся еси́ днесь:

Я́ко звезду́ вели́ку,/ Це́рковь, стяжа́вши днесь Богогла́снаго Симео́на, просвеща́ется, зову́щи:/ ра́дуйся, му́чеников честны́й нача́льниче.

Сла́ва, и ны́не, пра́здника, или́ Богоро́дичен:

Пречи́стеи ру́це Твои́, Де́во Ма́ти, просте́рши,/ покры́й упова́ющия на Тя и Сы́ну Твоему́ зову́щия:/ всем пода́ждь, Христе́, ми́лости Твоя́.

Крестобогоро́дичен:

На Дре́ве ви́дящи воздви́жена Сы́на Твоего́, Пречи́стая,/ утро́бою ма́тернею растерза́ема, жа́лостно взыва́ла еси́:/ увы́ Мне, ка́ко заше́л еси́, Све́те Мой Безле́тный?

Песнь 4

Ирмо ́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Священноде́йствовав же́ртвы безкро́вныя за тя пожре́нному,/ и сам поже́рлся еси́, я́ко а́гнец,/ и Тому́ прине́слся еси́, Богому́дре пребога́те.

Сотро́шася пред лице́м твои́м, святи́телю, нече́стия го́ры,/ и хо́лми де́монов вси растая́шася,/ Христу́ укрепля́ющу тя.

Высоча́йшее житие́ имы́й, преблаже́нне,/ хотя́й, возне́слся еси́ на дре́во,/ Боже́ственней стра́сти подо́бяся мир возне́сшаго.

Богородичен: Прови́дя рождество́ Твое́, Пречи́стая,/ Тя Авваку́м пропису́ет, я́ко присе́нную го́ру,/ из нея́же еди́н Бог наш проше́л есть.

Песнь 5

Ирмос: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Бла́же,/ Твой мир да́руяй.

Во́лею, блаже́нне, пре́дал еси́ себе́/ весь сожещи́ся огне́м муче́ния, блаже́нне Симео́не,/ во благово́ние та́йно соблюда́емь.

Я́ко овча́ непоро́чное, пре́дал еси́ себе́ пострада́ти усе́рдно, подо́бяся Христу́,/ нас ра́ди пло́тию пострада́вшему и стра́сти отгна́вшему.

Храм Боже́ственнаго Ду́ха быв, прему́дре,/ хра́мы и́дольския низложи́л еси́ си́лою твои́х моли́тв/ и заблужде́нныя к све́ту наста́вил еси́.

Богородичен: О нас моли́ Христа́, от Твои́х чи́стых крове́й, Пречи́стая Отрокови́це,/ в плоть веще́ственную обле́кшася и челове́ки обно́вльша.

Песнь 6

Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

Научи́лся еси́ пресла́вно от Боже́ственнаго сия́ния,/ я́же к Боже́ственному тя наставля́юща животу́, пребога́те,/ и неизрече́ннаго яви́лся еси́, святи́телю, испо́лнен ра́зума.

Вод тя живото́чных испо́лнена духо́вных,/ я́коже и́ну реку́, из Еде́ма исходя́щую, Симео́не,/ Боже́ственная Це́рковь ра́дуется, иму́щи.

Сел еси́ на высо́це престо́ле,/ наме́стник быв Иа́кова и нра́вом прича́стник,/ святи́тельство же муче́нием просвети́в, блаже́нне.

Богоро́дичен: Исцели́ неисце́льныя стра́сти, Богоневе́сто, души́ моея́,/ врача́ Христа́ ро́ждши челове́ком,/ страстьми́ Свои́ми исцели́вша стра́сти.

Конда́к, глас 4.

Подо́бен: Яви́лся еси́ днесь:

Я́ко звезду́ преве́лию, Це́рковь, иму́щи днесь Богоглаго́ливаго Симео́на,/ светово́дится, зову́щи:/ ра́дуйся, му́чеников честны́й ве́нче.

Песнь 7

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Те́ло му́кам преда́в по Христе́ усе́рдно,/ не измени́лся еси́, ни ослабе́л, взыва́я, чу́дне:/ благослове́н Бог оте́ц на́ших.

Боже́ственною, преблаже́нне, любо́вию разже́гся,/ мы́слию огня́ веще́ственна сильне́йши, вопия́, был еси́:/ благослове́н Бог оте́ц на́ших.

Я́ко Влады́ка, о́тче, на Крест воздви́глся еси́,/ изравне́нием стра́сти украша́яся, и пое́ши, веселя́ся:/ оте́ц на́ших Бо́же, благослове́н еси́.

Богоро́дичен: Де́во Богома́ти Отрокови́це, де́монов стру́пе/ и А́нгелов благоукраше́ние, челове́ков спасе́ние,/ смире́нную ду́шу мою́ вра́жия ле́сти изба́ви.

Песнь 8

Ирмо́с: На Кресте́ пло́тию пригвожде́ннаго/ и показа́вшаго нам ору́жие во спасе́ние,/ о́троцы, превозноси́те Христа́ Бо́га на́шего во ве́ки,

Всю зарю́ Уте́шителеву чи́стым твои́м, Симео́не, прие́м се́рдцем,/ тьму де́монов несве́тлую потреби́л еси́, ве́рныя просвети́в.

Мо́ре лю́таго злове́рия изсуши́в,/ струя́ми Боже́ственных уче́ний твои́х вся́ку напои́л еси́ ду́шу,/ клас ве́ры плодонося́щую.

Яви́лся еси́ свяще́нник, твое́ю кро́вию, му́чениче, вшед в Це́рковь Боже́ственну,/ иде́же всегда́ зри́ши/ тебе́ ра́ди, я́ко непоро́чно а́гня, Поже́ршагося.

Богоро́дичен: Да Тя гла́сы благода́рственными, возвесели́вшую наш род, воспое́м:/ покры́й и сохрани́ нас, Богоневе́сто, от вся́каго вре́да.

Песнь 9

Ирмо́с: Рождество́ Твое́ нетле́нно яви́ся:/ Бог из бо́ку Твое́ю про́йде,/ я́ко плотоно́сец яви́ся на земли́/ и с челове́ки поживе́./ Тя, Богоро́дице, тем вси велича́ем.

Я́коже столп о́гнен, преблаже́нне, яви́лся еси́, лю́ди предводя́ но́выя из еги́петския ле́сти,/ и к земли́ обетова́ния Боже́ственнаго, му́чениче, священнотаи́нниче всечестне, преве́л еси́.

Си́мон Симео́н сугу́бо зва́ние име́л еси́,/ сугу́бо естество́м су́щее Сло́во пред безбо́жными богосло́вив и Кресту́ прибли́жився:/ те́мже тя вси, соше́дшеся, ублажа́ем.

День пра́здника па́мять твою́ соверша́ет Це́рковь,/ с Боже́ственным тя почита́ющи Иа́ковом, Симео́не, моле́бно:/ его́же седа́лище прия́л еси́, свяще́нне.

Богоро́дичен: Све́том мя озари́ Боже́ственным, Све́та жили́ще, Де́во,/ страсте́й мои́х тьму и сласте́й глубо́кую нощь,/ Богороди́тельнице Пречи́стая, отгоня́щи.

НА ЛИТУРГИ ́И

Проки́мен, глас 8: Во всю зе́млю изы́де веща́ние их,/ и в концы́ вселе́нныя глаго́лы их. Стих: Небеса́ пове́дают сла́ву Бо́жию: Апо́стол к Кори́нфяном, зача́ло 131. Аллилу́ия, глас 1: Испове́дят Небеса́ чудеса́ Твоя́, Го́споди. Ева́нгелие от Матфе́я, зача́ло 56. Прича́стен: Во всю зе́млю:

Тропа́рь, глас 8:

Уче́нию повину́яся Богоно́снаго Феодо́сия,/ поста́влен бысть от него́ вождь бы́ти свято́му его́ ста́ду,/ е́же до́бре пасы́й,/ це́рковь Богоро́дицы, во́лею Тоя́ осно́ванную чу́дне,/ соверши́л еси́ благоле́пно,/ приснопа́мятне Стефа́не,/ в не́йже нам, моля́щимся, испроси́ от Христа́ Бо́га ве́лию ми́лость.

Ин тропа́рь, глас 2:

Я́ко сый Богоно́снаго Феодо́сия учени́к/ и и́стинный жития́ его́ подража́тель,/ пе́рвый по нем бре́мя настоя́тельства понесы́й,/ те́мже и моще́й его́ честны́х самови́дец бы́ти сподо́бился еси́,/ я́же с про́чими святоле́пно прине́с,/ насле́дил еси́ с те́мже Ца́рство Небе́сное,/ Е́же получи́ти и нам, чту́щим тя, Стефа́не,/ Го́сподеви моли́ся.

Ин тропа́рь, глас 8:

Правосла́вия наста́вниче,/ благоче́стия учи́телю и чистоты́,/ Волы́нския па́ствы свети́льниче,/ архиере́ев Богодухнове́нное удобре́ние,/ Стефа́не прему́дре,/ уче́ньми свои́ми вся просвети́л еси́, цевни́це духо́вная,/ моли́ Христа́ Бо́га спасти́ся душа́м на́шим.

Конда́к, глас 6:

Зави́дя враг честно́му ти житию́,/ изри́нул тя бя́ше злоко́знством свои́м от нача́льства па́ствы,/ но ты, изгна́н быв,/ и на ино́м ме́сте це́рковь Богоро́дицы воздви́гл еси́,/ за что и Та са́ном почте́ тя архиере́йства,/ в не́йже ты до́бре упа́с вруче́нная ти о́вцы,/ пре́йде во весе́лии ко Христу́, Стефа́не,/ Ему́же моли́ся о нас, рабе́х твои́х.

Ин конда́к, глас 1:

Проходя́, всеблаже́нне, доброде́тельми от си́лы в си́лу/ и всех, с тобо́ю су́щих, о́ными провозвыша́я,/ всем служи́л еси́, Стефа́не, и угожда́л,/ тем избра́н был еси́ всем,/ в дому́ Бо́жия Ма́тере су́щим, в старе́йшину./ Последи́ же и на степе́нь архиере́йства возведе́н был еси́,/ и, ста́до Христо́во добре упа́с,/ моли́ Его́ о нас, ча́дех твои́х.

Ин конда́к, глас 4:

Стефа́н, испо́лнь ве́ры и благоче́стия,/ соверши́тель Бо́гом основа́нныя це́ркве Пече́рския,/ днесь, я́ко вели́кое свети́ло, всем возсия́,/ Христо́во ста́до богоуго́дно упа́с/ в неусы́пных стра́жех нощны́х./ Его́же чту́ще, прино́сим песнь/ еди́ному Тебе́, Христу́, всех Влады́це,/ моля́ще поми́ловати нас/ того́ благоприя́тными моли́твами.