НА ВЕЧЕ́РНИ

Поем Блаже́н муж: 1-й антифон. На Го́споди, воззва́х: стихи́ры на 8, пра́здника 3 и апо́стола 5, глас 1.

Подо́бен: Небе́сных чино́в:

Богогла́сных слове́с написа́теля, ве́рнии,/ и Еги́пта вели́каго наста́вника,/ досто́йно воспое́м, вопию́ще:/ Ма́рко му́дре, уче́нии и моли́твами твои́ми/ к невла́емому житию́ наставля́ти всех нас/ не преста́й, Христо́в учениче́.

Спутеше́ственник был еси́ сосу́да избра́ннаго/ и с ним проше́л еси́ всю Македо́нию;/ в Ри́ме же учени́к быв Петру́,/ сла́док сказа́тель показа́лся еси́/ и почи́л еси́, пострада́в боголе́пно, во Еги́пте,/ Ма́рко, дру́же Христо́в.

Изсо́хшия и олядене́вшия ду́ши оживи́л еси́/ све́тлыми кропле́нии Ева́нгелия./ Те́мже твою́, Боже́ственный Ма́рко,/ све́тло с на́ми Александри́я днесь/ торжеству́ет па́мять и восхваля́ет,/ покланя́ющися твои́м моще́м.

Сла́ва, глас 6:

Излия́ся благо́дать во устна́х твои́х,/ Ма́рко апо́столе,/ и был еси́ па́стырь Христо́вы Це́ркве,/ уча́ слове́сныя о́вцы/ ве́ровати в Тро́ицу Единосу́щную,/ во Еди́ном Божестве́.

И ны́не, пра́здника.

Вход. Проки́мен дне. Чте́ния три (зри 30 апреля).

На стихо́вне стихи́ры, глас 1.

Подо́бен: Всехва́льнии му́ченицы:

О Ма́рко Богому́дре,/ прему́драго кни́жника трость/ и скоропи́сца был еси́,/ Христо́во воплоще́ние богодохнове́нне напису́яй/ и я́сно веща́яй жи́зни безконе́чныя глаго́лы,/ в не́йже моли́ся написа́тися пою́щим тя/ и чту́щим сла́вную па́мять твою́.

Стих: Во всю зе́млю изы́де веща́ние их/ и в концы́ вселе́нныя глаго́лы их.

О Ма́рко всехва́льне,/ Христа́ благовеству́яй,/ вселе́нную проте́кл еси́,/ я́коже со́лнце,/ погубля́яй всю заря́ми ве́ры/ многобо́жия тьму./ И ны́не моли́ся/ дарова́ти душа́м на́шим/ мир и ве́лию ми́лость.

Стих: Небеса́ пове́дают сла́ву Бо́жию,/ творе́ние же руку́ Его́ возвеща́ет твердь.

О Ма́рко апо́столе,/ в ни́хже пре́жде умно́жися злоче́стия безу́мие,/ ты пропове́дал еси́,/ еги́петскую тьму/ просвеще́нием слове́с твои́х отгоня́я,/ Богопропове́дниче пребога́те./ И ны́не моли́ся/ дарова́ти душа́м на́шим/ мир и ве́лию ми́лость.

Сла́ва, глас 8:

Прииди́те, Небе́снаго та́инства пропове́дника/ и служи́теля Ева́нгелия,/ псалмы́ и пе́сньми Ма́рка вси восхва́лим:/ сей бо река́ показа́ся мы́сленнаго рая́,/ душе́вныя бразды́ Небе́сными ту́чами напая́я/ и плодоно́сны показу́я Христу́ Бо́гу,/ подаю́щему всем моли́твами его́/ очище́ние, и просвеще́ние, и ве́лию ми́лость.

И ны́не, пра́здника.

Тропа́рь, глас 3:

Апо́столе святы́й и Евангели́сте Ма́рко,/ моли́ Ми́лостиваго Бо́га,/ да прегреше́ний оставле́ние/ пода́ст душа́м на́шим.

Ин тропа́рь, глас то́йже:

У верхо́внаго Петра́ научи́вся,/ апо́стол Христо́в был еси́/ и, я́ко со́лнце, страна́м возсия́л еси́,/ Александри́ом удобре́ние быв, блаже́нне:/ тобо́ю Еги́пет от пре́лести свободи́ся,/ ева́нгельским твои́м уче́нием просве́щ вся,/ я́ко свет, столп церко́вный./ Сего́ ра́ди твою́ па́мять чту́ще, све́тло пра́зднуем,/ Ма́рко Богогла́се,/ моли́ тобо́ю благовести́маго Бо́га/ да согреше́ний оставле́ние пода́ст душа́м на́шим.

Сла́ва, и ны́не, пра́здника.

НА У́ТРЕНИ

На Бог Госпо́дь, тропа́рь пра́здника, два́жды. Сла́ва, апо́стола. И ны́не, пра́здника.

По 1-й стихоло́гии седа́лен, глас 1.

Подо́бен: Гроб Твой:

Я́ко у́тро, благоле́пно возсия́л еси́ миру,/ тьму глубо́кую пре́лести ве́рою отгна́л еси́, апо́столе,/ и ду́ши просвети́л еси́;/ те́мже вся светоза́рне Це́рковь пое́т днесь светоно́сную твою́ па́мять,/ Христа́ велича́ющи.

Сла́ва, и ны́не, пра́здника. По 2-й стихоло́гии седа́лен, глас 4.

Подо́бен: Вознесы́йся:

Научи́вся от Исто́чника жи́зни прему́дрости,/ умудри́л еси́ пре́жде неразу́мием служа́щия умовре́дне истука́нным, прему́дре./ Те́мже ублажа́ешися во век ве́ка,/ престо́лу предстоя́ Святы́я Тро́ицы/ и приле́жно моля́ся/ обрести́ прегреше́ний разреше́ние, Ма́рко апо́столе.

Сла́ва, и ны́не, пра́здника.

По полиеле́и седа́лен, глас 8.

Подо́бен: Прему́дрости:

И́дольскую горды́ню низложи́в, Спа́совы стра́сти жела́я, Ма́рко апо́столе,/ яви́лся еси́ ми́ру с Небесе́, всем источа́я чудеса́,/ и язы́ком был еси́, преблаже́нне, учи́тель./ Те́мже твою́ па́мять по досто́инству почита́ем,/ в пе́снех сла́вяще и ве́рно велича́юще:/ Богогла́се пребога́те, моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, пра́здника.

Степе́нна, 1-й антифо́н 4-го гласа. Проки́мен, глас 4: Во всю зе́млю изы́де веща́ние их/ и в концы́ вселе́нныя глаго́лы их. Стих: Небеса́ пове́дают сла́ву Бо́жию: Вся́кое дыха́ние: Ева́нгелие от Луки́, зача́ло 50. По 50-м псалме́ стихи́ра, глас 6: Излия́ся благода́ть: пи́сана на Го́споди, воззва́х: Сла́вник.

Кано́н пра́здника со ирмосо́м на 6 и свята́го на 8, глас 1.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.

Ма́рка Богови́дца восхваля́я, призыва́ю благода́ть Ду́ха:/ я́ко да вдохну́в ми све́тло, отжене́т неве́дение/ и Боже́ственное бога́тство прему́дрости да́рует.

Твоего́ Богогла́снаго све́том просвети́в, Спа́се, благода́тным,/ в мир посла́л еси́, Сло́ве Бо́жий, благи́х я́ко вино́вный,/ Твое́ прише́ствие нам благовеству́юща.

Петру́ прему́дрому учени́к быв и того́ обогати́вся сыновство́м,/ Ма́рко всесла́вне, таи́нник показа́лся еси́ та́ин Бо́жиих/ и снасле́дник сла́вы его́ был еси́.

Богоро́дичен: И́же еги́птяны во глубине́ потопи́в о́блаком Ду́ха,/ Сей прии́де от Тебе́, Чи́стыя, еги́птяном по́слежде/ и Ма́рком тех от пре́лести измени́.

Катава́сия: Воскресе́ния день:

Песнь 3

Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жься,/ препоя́ши мя с высоты́ си́лою,/ е́же вопи́ти Тебе́, Святы́й ,/ одушевле́нный хра́ме/ неизрече́нныя сла́вы Твоея́, Человеколю́бче.

Тя, Ипоста́сную, Христе́, Прему́дрость пропове́да, луча́ми Твои́ми озаря́емь,/ всему́ ми́ру я́вльшуюся, Влады́ко,/ и жизнь даю́щую, и челове́ки просвеща́ющу,/ уго́дник Твой сла́вный Марк, Человеколю́бче.

Струю́ прие́м, Христе́, прему́дрости приснотеку́щую, я́ко река́, шумя́щи,/ земны́я напои́ Богоразу́мия све́том концы́,/ явля́я Твое́ су́ще и́стинно прорече́ние,/ самовидец Твой Марк, Человеколю́бче.

Петру́ после́дуя, му́дре, я́ве,/ Ева́нгелие я́ко учени́к его́ вообрази́л еси́,/ Богосло́вия свет прие́м от него́, апо́столе,/ и Бо́жие плотско́е прише́ствие возвести́в я́сно.

Богоро́дичен: Еги́пта пе́рвее, деви́ческими рука́ми носи́мый,/ де́монская тре́бища Ты потря́сл еси́/ и сему́ па́ки Ма́рка посла́л еси́ вразуми́ти всем Твое́ вочелове́чение/ и Боже́ственную, Христе́, Твою́ та́йну.

Конда́к и и́кос пра́здника.

Седа́лен, апо́стола, глас 1.

Подо́бен: Гроб Твой:

На высоту́ возше́д доброде́телей Боже́ственный Марк,/ возгреме́л еси́ нам спаси́тельных догма́т вели́кия та́йны,/ Боже́ственный пропове́дник быв./ Те́мже ве́рою тя мо́лим, преблаже́нне,/ вся́кия ско́рби, согреше́ний и бед нас свободи́.

Сла́ва, и ны́не, пра́здника.

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше Свято́му/ во спасе́ние на́ше и обновле́ние.

Во всю зе́млю веща́ние твое́ изы́де,/ и в концы́, прему́дре, вселе́нныя твои́х я́сно глаго́л си́ла,/ дави́дски све́тло пропове́дающи спасе́ние на́ше и обновле́ние.

Яви́ся, Спа́се, я́ко мо́лния, апосто́л вселе́нней прему́дрый,/ и́стины ра́дость благовеству́я, Богосия́нием светоли́тия просвеща́емь/ во спасе́ние на́ше и обновле́ние.

Но́зе твои́ проро́чески украси́шася,/ и́бо па́че сло́ва нам благовести́л еси́ проявле́нно мир, Богоприя́тне,/ пло́тию Я́вльшагося конце́м во спасе́ние на́ше и обновле́ние.

Богоро́дичен: На о́блаце Сло́во деви́честем се́де,/ еги́петский сове́ты и богобо́рныя мы́сли, обуи́в, разори́,/ уче́нии Боже́ственнаго Ма́рка, я́ко Милосе́рд,/ во спасе́ние на́ше и обновле́ние.

Песнь 5

Ирмо́с: Просвети́вый сия́нием прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.

Иска́пал еси́ сла́дость благоче́стия слове́с твои́х Боже́ственных ту́чу,/ всю́ду луча́ми осиява́емь, я́влься благода́тию я́ве мы́сленнаго Со́лнца,/ Ма́рко всеблаже́нне Богоприя́тне.

Из до́му Госпо́дня исто́чник изше́л еси́/ и напоя́еши олядене́вшая сердца́ струя́ми бога́тно духо́вными,/ плод вме́сто непло́дствия приноси́ти уча́, апо́столе.

Ты Петра́ вели́каго сын был еси́/ и, сего́ уче́ньми просвеща́емь всегда́,/ ду́ши просвети́л еси́ к тебе́ те́пле присту́пльших,/ блаже́нне, Богови́дче апо́столе.

Богоро́дичен: Я́ко Челове́к от Де́вы ро́ждься, еги́птяном, Христе́, посла́лся еси́,/ от Отца́ возсия́в пре́жде всея́ тва́ри,/ и́мже Ма́рка пома́зал еси́, Му́дре,/ тех науча́юща Богоразу́мия та́инством.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния./ Спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

Низложи́л еси́ бровь беззако́нных, Го́споди, и досажде́ние го́рдое смири́л еси́,/ Апо́стола Твоего́ показа́в победоно́сца си́лою Твое́ю,/ Ты бо кре́пость немощству́ющих и исправле́ние.

Вене́ц наде́жды, сла́вне, и́мже ны́не венча́емся,/ словесы́ твои́ми пропове́дал еси́, му́дре Ма́рко, Зижди́теля тва́ри,/ И́же в на́шу сла́ву исплете́н естество́м пло́ти.

Петр тя верхо́вный, сла́вне, я́ве та́йно научи́ Ева́нгелие списа́ти честно́е,/ показа́в служи́теля тя Боже́ственныя благода́ти,/ ты бо нам Богоразу́мия свет просте́рл еси́.

Богоро́дичен: Еги́пта, и́же пе́рвее во тьме су́ща, Го́споди,/ Де́вою Богома́терию просвети́л еси́, я́ко Младе́нец проше́д,/ того́ обличи́л еси́ су́етство уче́нии Богогла́снаго Ма́рка, Человеколю́бче.

Конда́к, глас 2.

Подо́бен: Вы́шних ища́:

С высоты́ прии́м благода́ть Ду́ха,/ ри́торская плете́ния разруши́л еси́, апо́столе,/ и, язы́ки вся улови́в, Ма́рко всесла́вне,/ твоему́ Влады́це приве́л еси́,/ Боже́ственное пропове́дав Ева́нгелие.

И́кос:

Верхо́внаго апо́стола учени́к быв,/ с ним Христа́, Сы́на Бо́жия, пропове́дал еси́,/ на ка́мени и́стины утверди́в ле́стию коле́блющияся./ На не́мже и мене́ утверди́в, души́ моея́ испра́ви стопы́,/ я́ко да вра́жиих се́тей изба́влься, непреткнове́нно сла́влю тя:/ ты бо всех просвети́л еси́, Ма́рко му́дре,/ Боже́ственное пропове́дав Ева́нгелие.

Песнь 7

Ирмо́с: Тебе́, у́мную, Богоро́дице, пе́щь,/ разсмотря́ем, ве́рнии:/ я́коже бо о́троки спа́се три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Боже́ственными блиста́нии освеща́емь,/ возломле́нием та́йно возпосыла́еши зареви́дныя лучи́, Ма́рко преблаже́нне:/ Сло́во бо пропове́дал еси́ воплоща́емое, Безле́тное,/ хва́льнаго отце́в Бо́га и препросла́вленнаго.

Богоде́льными, Вседе́телю, си́лами Богогла́снаго ученика́ вооружи́в,/ чудоде́йственника сего́ соверши́л еси́:/ неду́ги бо отгна́ и я́зи исцели́л е́сть,/ прехва́льнаго Тя пропове́дуя Бо́га и препросла́вленнаго.

Учени́ческаго ли́ка старе́йшаго учи́теля име́я, Боже́ственнаго Петра́,/ подо́бен сему́ яви́лся,/ все бо испра́вил еси́ церко́вное исполне́ние/ прехва́льнаго отце́в Бо́га и препросла́вленнаго.

Богоро́дичен: Столп сам во Еги́пте поста́вил еси́, Ева́нгелия твоего́ писа́ние/ Ро́ждшемуся без се́мене от Богома́тере,/ рече́нием после́дуя Иса́ии, пресла́вне,/ прехва́льнаго возвеща́я Бо́га и препросла́вленнаго.

Пе́снь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Ро́ждшееся Сло́во от Отца́ пре́жде всех век,/ в естество́ челове́ческое обле́кшася Христа́, пропове́дал еси́, сла́вне, и вопия́л:/ вся дела́ Госпо́дня, Го́спода по́йте и превозноси́те во вся ве́ки.

Да́вшаго избавле́ние себе́ за на́ше согреше́ние/ и стра́сть па́дших, воздви́гшаго Христа́ просла́вил еси́, сла́вне, вопия́:/ вся дела́ Госпо́дня, Го́спода по́йте и превозноси́те во вся ве́ки.

Петро́ву Марк повину́яся прему́дрому учи́тельству,/ прему́дре писа́нии вообрази́л еси́ ве́рным честно́е Ева́нгелие, вопию́щим:/ вся дела́ Госпо́дня, Го́спода по́йте и превозноси́те во вся ве́ки.

Богоро́дичен: Де́ва, Емману́ила нося́щи я́ко Младе́нца, предста́ еги́птяном,/ и́мже, я́ко све́тлая звезда́, Марк посыла́ется, взыва́я:/ вся дела́ Госпо́дня, Го́спода по́йте и превозноси́те во вся ве́ки.

Пе́снь 9

Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная./ И ны́не, на нас напа́стей свире́пеющую угаси́ти, мо́лимся, пе́щь,/ да Тя, Богоро́дице,/ непреста́нно велича́ем.

Дости́г исто́чника неизрече́нна, трисо́лнечнаго, Богоявле́ние, сия́ния,/ чисте́йша наслажда́ешися и яснейша обоже́ния, е́же па́че ума́,/ со А́нгелы лику́я непреста́нно, преблаже́нне.

Петро́ва о́бщник быв уче́ния и Боже́ственнаго пропове́дания,/ в Небе́сных живе́ши селе́ниих,/ с ни́мже, Богоглаго́ливе преблаже́нне, и мо́лишися о нас, Ма́рко апо́столе.

Свет, трисия́нно совокупля́емь,/ еди́нственно же па́ки стра́нно устроя́емь,/ пропове́дал еси́ благоче́стно, досточу́дне, просвеща́емь заре́ю благода́ти./ Те́мже тя мо́лим: о нас при́сно мо́лися.

Богоро́дичен: Марк, честны́й апо́стол, еги́птяном святи́тель дарова́ся;/ к ни́мже, я́ко Младе́нец вопло́щся, прии́де,/ от Де́вы Чи́стыя Богома́тере, Госпо́дь сла́вы,/ Его́же досто́йно велича́ем.

Свети́лен.

Подо́бен: Жены́, услы́шите:

Прему́дрости Небе́сныя научи́вся, апо́столе,/ плете́ния вити́йская и чи́сла звездосло́вцев разори́л еси́ язы́ком твои́м,/ о Ма́рко пресла́вне, и, учени́к быв Петро́в,/ ми́ру пропове́дал еси́ Ева́нгельская словеса́.

Сла́ва, и ны́не, пра́здника.

На хвали́тех стихи́ры, пра́здника 3. И апо́стола 3, глас 1.

Подо́бен: Всехва́льнии му́ченицы:

Ма́рко всеблаже́нне,/ от сла́достнаго пото́ка пил еси́,/ я́ко из Еде́ма устреми́вшаяся/ пресве́тло чи́стая река́ ми́ра,/ облива́яй вода́ми/ Ева́нгельския твоея про́поведи/ земли́ лице́,/ церко́вныя тве́рди напая́я/ Богодохнове́нными уче́нии.

Ма́рко пресла́вне,/ Моисе́й у́бо пре́жде/ еги́птяны в мо́ри потопи́,/ но ты, прему́дре,/ от мо́ря пре́лести тех извле́кл еси́/ си́лою же к тем с пло́тию Прише́дшаго/ и тех рукотворе́нная низложи́вша/ мы́шцею высо́кою.

О Ма́рко всесвяще́нне,/ во све́те Ду́ха живы́й,/ духо́вен ве́сь был еси́,/ и ны́не, всебога́те,/ и́же ко Влады́це неоску́дными зре́нии/ и блаже́ннейшими осия́нии,/ положе́ньми обожа́емь/ та́инства глави́зну,/ и кончи́ну обре́л еси́ многовожделе́нну.

Сла́ва, глас 6. Самогла́сен:

Прему́дрый ло́вче, святы́й учениче́,/ де́лателю Спа́сов и сказа́телю Того́ страсте́й,/ и́же тва́рь ве́рою обте́к,/ и прельще́нныя язы́ки собра́в,/ и Бо́гу приве́д,/ я́ко кади́ло до́брое, на Небеса́ возведе́ся./ Те́мже, предстоя́ Судии́,/ моли́ изба́витися нам от беззако́ний на́ших/ и в Де́нь Су́дный изба́витися муче́ния.

И ны́не, пра́здника.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на пра́здника, пе́снь рядова́я и свята́го пе́снь 3-я. Проки́мен, глас 8: Во всю зе́млю: Стих: Небеса́ пове́дают сла́ву Бо́жию: Апо́стол, зача́ло 63. Аллилу́ия, глас 1: Испове́дят Небеса́ чудеса́ Твоя́: Ева́нгелие от Ма́рка, зача́ло 23. Прича́стен: Во всю зе́млю:

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры, глас 5:

Преподо́бне о́тче Сильве́стре,/ измла́да Христа́ возлюби́в,/ мир многомяте́жный оста́вил еси́/ и в пусты́ню всели́лся еси́,/ иде́же Го́споду во дни и в нощи́ порабо́тав,/ вене́ц сла́вы Небе́сныя стяжа́л еси́./ Те́мже, я́ко име́я дерзнове́ние ко Го́споду,/ моли́ спасти́ся душа́м на́шим.

Ди́внаго во отце́х Се́ргия благослове́ние восприи́м,/ я́ко опло́том огражде́н,/ в край полу́нощный прите́кл еси́,/ и ту бде́нием, поще́нием и моли́твою те́ло свое́ изнури́вый,/ я́ко звезда́ пресве́тлая, яви́лся еси́, преподо́бне,/ те́мже све́том благода́ти, я́же в тебе́,/ озари́ нас, моля́щихтися.

Я́коже во дни до́бляго жития́ твоего́/ ве́рнии в оби́тель честну́ю твою́,/ благогове́юще, притека́ху,/ си́це и ны́не мно́зи от край да́льних/ притека́ют поклони́тися моще́м твои́м,/ о́тче преподо́бне,/ мы, та́кожде о́чи серде́ц на́ших/ к тебе́ обраща́юще, те́пле мо́лимся:/ исцели́ неду́ги на́ша душе́вныя,/ вку́пе же и теле́сныя.

И́ны стихи́ры, глас 8:

Прииди́те, лю́дие,/ восхва́лим преподо́бнаго отца́,/ просла́вившаго чудесы́ мно́гими пусты́ню Обно́рскую/ и све́том дел свои́х озари́вшаго сердца́ ве́рных,/ его́же моли́твами ны́не та́кожде мно́зи,/ от тьмы́ грехо́вныя избавля́еми су́ще,/ приво́дятся к све́ту Богове́дения.

Поноше́ния и озлобле́ния, ра́дуяся, прия́л еси́/ в суетном и многомяте́жном ми́ре сем,/ ны́не же водворя́ешися в Небе́сных черто́зех/ и с ли́ки святы́х, ра́дуяся,/ предстои́ши Творцу́ веко́в, Бо́гу на́шему,/ Того́ моли́ о душа́х на́ших.

Сло́во благода́ти, со́лию растворе́но,/ слы́шавше лю́дие,/ притека́вший к тебе́ в пусты́ни умудре́ния ра́ди,/ умудри́ у́бо и нас, мо́лимся ти, преподо́бне,/ моли́твами твои́ми и де́йствием благода́ти, я́же в тебе́.

Вся тле́нная и су́етная ве́ка сего́ бла́га/ отри́нув в житии́,/ сподо́бился еси́ вене́ц нетле́ния прия́ти/ от руки́ Госпо́дни,/ его́же и нас да сподо́бит Госпо́дь/ моли́твы ра́ди твоея́, о́тче преподо́бне.

Сла́ва, глас 6:

Прииди́те, ве́рнии,/ восхва́лим просия́вшаго в пусты́ни Обно́рстей свети́льника/ и, припа́дше к многоцеле́бным моще́м его́, возопии́м:/ ра́дуйся, по́стников похвало́;/ ра́дуйся, неду́гующих врачу́;/ ра́дуйся, де́монския си́лы прогони́телю;/ ра́дуйся, всем ве́рующим ве́рное в беда́х/ приста́нище и заступле́ние.

И ны́не, Богоро́дичен: Кто Тебе́ не ублажи́т:

Вход, проки́мен дне и чте́ния 3 преподо́бническая (зри 17 апреля).

На лити́и стихи́ры, глас 3:

По́двигом до́брым подвиза́лся еси́, блаже́нне,/ и житие́м благоче́стным о́браз был еси́ ста́ду твоему́,/ е́же му́дре упа́сл еси́,/ и, от пусты́ни исходя́ к лю́дем, и́щущим зре́ти тя,/ духо́вне бесе́довал еси́,/ да́руя коему́ждо мир и утеше́ние,/ Сильве́стре преподо́бне.

Сосу́д избра́н Ду́ху Свято́му/ от ю́ности яви́лся еси́, преподо́бне,/ егда́ бо житие́ по́стное провожда́л еси́,/ открове́ние свы́ше прия́л еси́,/ я́ко процвете́т пусты́ня твоя́/ и ста́до и́ноков прии́дет в ню;/ и свет неизрече́нный осиява́ше сокрове́нное селе́ние твое́,/ сла́ву доброде́телей твои́х возвеща́я,/ Сильве́стре блаже́нне.

Поще́нием и житие́м многотру́дным/ пло́ть твою́ умерщвля́я, преподо́бне,/ кла́дязь в пусты́ни ископа́л еси́,/ и́же, до дне́сь оби́льно источа́я струи́ водны́я,/ вку́пе источа́ет моли́твами твои́ми цельбу́ притека́ющим с ве́рою и упова́нием/ на по́мощь и заступле́ние твое́,/ Сильве́стре Богоно́сне.

Сла́ва, глас 2:

Ки́ими похва́льными венцы́/ увязе́м Сильве́стра вседо́бляго,/ и́же я́ко А́нгел земны́й/ и челове́к Небе́сный в пусты́ни поживе́?/ Ки́ими пе́сньми восхва́лим блаже́ннаго,/ и́же и в житии́ свое́м/ милосе́рдие лю́дем по́мощь благода́тную подая́ше,/ и по успе́нии свое́м, со А́нгелы ликовству́я,/ исцеле́ния к ра́це его́ притека́ющим неоску́дно да́рует?/ Припаде́м у́бо к нему́, бра́тие, моля́щеся,/ да испро́сит нам у Бо́га мир и ве́лию ми́лость.

И ны́не, Богоро́дичен.

На стихо́вне стихи́ры, глас 8:

Ве́ру те́плую имы́й/ в си́лу живоно́сну из ме́ртвых воста́вша Христа́,/ храм Воскресе́ния в пусты́ни Обно́рстей воздви́гл еси́,/ тем и си́лою Христа́, воскре́сшаго и ад попра́вшаго,/ бе́сы мно́гажды изгоня́л еси́,/ и от нас у́бо, мо́лим тя, преблаже́нне,/ отжени́ стра́сти душевре́дныя,/ от лука́ваго в ны вселя́емыя.

Стих: Честна́ пред Го́сподем/ сме́рть преподо́бных Его́.

Посто́м презе́льным/ вся́кое пло́ти мудрова́ние умерщвля́я/ и то́чию бы́лие тра́вное в сне́дь име́я,/ егда́, я́ко челове́к, изнемо́гл еси́, о́тче свяще́нне,/ по́мощь от Го́спода прии́де к тебе́:/ А́нгел бо Бо́жий, во о́бразе чу́днаго му́жа, явле́йся,/ укрепи́ тя и показа́,/ ка́ко си́ла Бо́жия в не́мощи соверша́ется./ Мы же, вы́ну не́мощни су́ще, мо́лим тя, преподо́бне:/ моли́ся ко Го́споду,/ да пода́ст мир и утвержде́ние душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ко Го́споду отходя́,/ глаго́лал еси́ бра́тии твое́й, преподо́бне:/ внемли́те, о бра́тия моя́ возлю́бленная,/ Бо́га бо́йтеся, и страх Его́ в се́рдцы свое́м име́йте,/ и за́поведи Госпо́дни сохраня́йте,/ Святы́я же Це́ркве не отлуча́йтеся,/ и в ны́нешнем ве́це потерпи́те ма́ло,/ да прича́стницы бу́дете Ца́рствию Бо́жию./ Мо́лим у́бо тя, преподо́бне:/ испроси́ нам от Го́спода по́мощь,/ заве́т твой святы́й соблюда́ти.

Сла́ва, глас то́йже:

Мона́хов мно́жества,/ наста́вника тя почита́ем, о́тче наш Сильве́стре,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче и преподо́бных соприча́стниче и пра́ведных./ С ни́ми же моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

Тропа́рь, глас 6:

И́же измла́да Христа́ возлюби́в/ и ве́рою к Нему́ прибли́жся,/ изнури́л еси́, в пусты́ни живы́й, многострада́льное те́ло твое́./ Тем, блаже́нне Сильве́стре, со А́нгелы ликовству́я,/ моли́ Христа́ Бо́га мир ми́рови дарова́ти/ и бу́ди помо́щник ве́рою призыва́ющим тя на по́мощь/ и чту́щим святу́ю па́мять твою́.

Ин тропа́рь, глас 4:

Я́ко добр блаже́ннаго Се́ргия учени́к,/ ве́ре и благоче́стию его́ подража́я,/ стяжа́л еси́ даро́в Ду́ха Свята́го сокро́вище/ и си́лы мно́ги соде́лал еси́ о Го́споде/ во спасе́ние и утеше́ние ве́рных./ Не оста́ви у́бо и нас, с ве́рою притека́ющих к тебе́,/ Сильве́стре преподо́бне.

НА У́ТРЕНИ

По 1-м стихосло́вии седа́лен, глас 4:

Вменя́я вся тщету́ бы́ти за превосходя́щее разуме́ние Христа́ Иису́са, Го́спода на́шего,/ Его́ еди́наго вожделе́л еси́,/ Его́ еди́наго, я́ко би́сера многоце́ннаго, взыска́л еси́,/ с Ни́мже водворя́яся дне́сь в Небе́сных черто́зех,/ моли́ся, уго́дниче Бо́жий, да сподо́бимся бы́ти ве́чных благ прича́стницы.

Сла́ва, и ны́не, Богоро́дичен:

Пречи́стая Де́во Богоро́дице,/ приими́ моли́тву раб Твои́х/ и от бед привре́менных и от мук ве́чных изба́ви нас, воспева́ющих Тебе́:/ Благода́тная, ра́дуйся.

По 2-м стихосло́вии седа́лен, глас 2:

Пречи́стому Твоему́ о́бразу покланя́емся, Всеми́лостиве,/ к нему́ же Сильве́стр блаже́нный воздева́ше ру́це, моля́йся./ Пощади́ нас, Спа́се, моли́твами отца́ Богоно́снаго.

Сла́ва, и ны́не, Богоро́дичен:

В бе́здну зол впа́дшии, глас моле́бный возно́сим к Тебе́, Влады́чице:/ изведи́ ны милосе́рдою десни́цею Твое́ю из глубины́ грехо́вныя/ и возведи́ на го́ру доброде́телей, Пречи́стая.

По полиеле́и седа́лен, глас 8:

Обогати́л еси́ ве́рныя сокро́вищем чуде́с твои́х, преподо́бне Сильве́стре,/ мо́лим у́бо тя:/ да не оскуде́ют ми́лости твоя́ к гре́шным рабо́м твои́м,/ лобыза́ющим честны́я мо́щи твоя́ и чту́щим святу́ю па́мять твою́.

Сла́ва, и ны́не, Богоро́дичен:

Заступле́ние еси́, Де́во Чи́стая, и прибе́жище/ всем, обурева́емым волна́ми жите́йскими,/ не́сть бо ины́я, ра́зве Тебе́, наде́жды нам, гре́шным,/ в бе́здну грехо́вную впа́дшим.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.

По 50-м псалме́ стихи́ра, глас 2:

Сла́вны и прехва́льны труды́ твоя́, преподо́бне Сильве́стре:/ ко Го́споду бо еди́ному горя́ любо́вию/ и в Нем еди́ном ве́рою и наде́ждою утвержда́яся,/ вся подъя́л еси́ Его́ ра́ди;/ ны́не же, от руку́ Его́ вене́ц сла́вы восприя́в,/ моли́ся, преподо́бне, да сподо́бимся Небе́снаго насле́дия соприча́стницы бы́ти.

Кано́н, глас 6.

Пе́снь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь/ пои́м, вопия́ше.

Пода́ждь ми си́лу, Многоми́лостиве Го́споди,/ пе́сньми восхвали́ти просла́вленного Тобо́ю Богоно́снаго отца́ Сильве́стра,/ да бу́дет ми предста́тель пред непристу́пным вели́чеством Сла́вы Твоея́.

Мона́шествующих Богодухнове́нное удобре́ние яви́лся еси́, преподо́бне,/ бра́тию сло́вом, со́лию растворе́нным,/ и де́лы благи́ми во благоче́стии утвержда́я.

Глаго́лал еси́, о́тче Сильве́стре, бра́тии твое́й,/ я́ко а́ще стя́жеши по сме́рти дерзнове́ние ко Го́споду,/ хода́тай бу́деши о оби́тели твое́й./ Те́мже, вене́ц сла́вы прии́м, моли́ся о недосто́йных рабе́х твои́х.

Богоро́дичен: Его́же родила́ еси́ неизрече́нно, Сы́на и Бо́га,/ моли́, Де́во Всесвята́я, сохрани́тися достоя́нию Твоему́/ от бед малове́рия и злых помысло́в шата́ния.

Ин кано́н, глас то́йже.

Пе́снь 1. Ирмо́с то́йже

Уподо́бился еси́ купцу́, и́щущему би́сера многоце́ннаго,/ оста́вль бо кров о́тчий, и вменя́я вся тщету́ бы́ти, да Христа́ приобря́щеши,/ Тому́ после́довал еси́,/ Его́ ра́ди стра́сти и озлобле́ния претерпе́л еси́,/ с Ни́мже и прославля́ешиея дне́сь, о́тче Богому́дре.

В терпе́нии мно́зе стяжева́я ду́шу свою́, преподо́бне,/ слеза́ми же ороша́я посте́лю свою́,/ обре́л еси́ невозмуща́емое поко́ище,/ его́же и нас сподо́бит Госпо́дь.

Предзря́ Го́спода пред собо́ю вы́ну/ и от пути́ за́поведей Его́ николи́же уклоня́яся,/ обеща́лся еси́ во исхо́де живота́ твоего́ бы́ти моли́твенником о бра́тии;/ сицево́е обетова́ние при́сно па́мятуем, су́ще многогре́шнии.

Богоро́дичен: Бо́га пло́тию неизрече́нно ро́ждшая, Всесвята́я Ма́ти Де́во,/ приими́ моли́тву на́шу/ и изба́ви нас от вся́кия ну́жды и печа́ли.

Катава́сия по уста́ву.

Пе́снь 3

Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

За́поведь твою́ блюсти́ повелева́я, преподо́бне,/ наказа́л еси́ за́поведь преступи́вшаго,/ но, прии́м сего́ покая́ние,/ благосе́рде исцели́л еси́ слепо́тствовавшаго.

Богоно́снаго Се́ргия благослове́ние прии́м, блаже́нне,/ взыска́л еси́ пусты́ни и о́браз был еси́ дво́ице учени́к его́,/ и́же, стопа́м твои́м после́довавшее близ тебе́ водвори́шася и святоле́пныя оби́тели устро́иша.

Ско́рбию испо́лнил еси́ сердца́ бра́тии,/ жи́знь вре́менную оставля́я, Сильве́стре,/ ны́не же ра́достию исполня́еши взира́ющих на нетле́нныя мо́щи твоя́.

Богоро́дичен: Милосе́рдия исто́чниче, Влады́чице Пресвята́я,/ бу́ди покро́в всем, прибега́ющим к Тебе́ с ве́рою тве́рдою,/ наде́ждою несумне́нною и любо́вию чи́стою.

Ин. Ирмо́с то́йже

Ревну́я, я́ко добр во́ин Христо́в, о зако́не Госпо́днем,/ в зако́не поуча́л еси́ бра́тию твою́, о́тче преподо́бне;/ мы та́кожде поуча́емся словесы́ и дея́ньми твои́ми во спасе́ние душ на́ших.

Преподо́бному Се́ргию после́дствуя и того́ житию́ подража́я,/ пусты́ню возлюби́л еси́/ и та́мо, на ка́мени ве́ры утвержда́яся по́мыслы твои́ми,/ основа́л еси́ Богоблагослове́нную оби́тель во спасе́ние притека́ющих к ней.

Зе́ло мно́гими напа́стьми и тружде́нием/ отяготи́лся еси́ в су́етном ве́це сем,/ мно́жайше восприе́млеши блага́я по отше́ствии твое́м во оби́тель Отца́ Небе́снаго.

Богоро́дичен: Милосе́рдия две́ри отве́рзи нам, Благослове́нная Богоро́дице,/ наде́ющиися на Тя, да не поги́бнем,/ но да изба́вимся Тобо́ю от бед:/ Ты бо еси́ спасе́ние ро́да христиа́нскаго.

Ин конда́к, глас 6:

По́двигом до́брым подвиза́лся еси́, преподо́бне,/ и ду́шу твою́, я́ко же́ртву чи́сту и непоро́чну, Бо́гу прине́сл еси́,/ по успе́нии твое́м явля́ешися те́плый наш пред Бо́гом моли́твенник,/ сего́ ра́ди, ве́рою притека́юще к тебе́, взыва́ем:/ ра́дуйся, преподо́бне о́тче Сильве́стре.

Ин и́кос:

Свети́льник, нога́ма твои́ма положи́вый зако́н Госпо́день и свет стезя́м твои́м,/ се́рдце же утверди́вый на ка́мени ве́ры,/ в не́йже стоя́ и хваля́ся упова́нием сла́вы Бо́жия,/ избе́гл еси́ жите́йския тли, преподо́бне,/ и к све́ту Ца́рствия Бо́жия упра́влен сый, призира́еши на ны, моля́ся ко Го́споду,/ да обря́щемся сы́нми Све́та/ и Ца́рствие Бо́жие насле́дити сподо́бимся.

Седа́лен, глас 4:

Блаже́нства Го́рняго взыску́я,/ вся кра́сная ми́ра сего́ оста́вил еси́, преподо́бне,/ чад твои́х духо́вных наказу́я, я́ко вся мирска́я прехо́дят,/ еди́но же пребыва́ет вы́ну сокро́вище благоче́стия.

Сла́ва, и ны́не, Богоро́дичен:

На Престо́ле со Отце́м и Святы́м Ду́хом ве́чно ца́рствующего/ нескусому́жно родила́ еси́, Присноде́во, Сы́на Бо́жия,/ тем Тя, я́ко Богома́терь, пе́сньми немо́лчными ублажа́ем.

Пе́снь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Си́ла Христо́ва в тебе́ откры́ся, преподо́бне,/ бесо́в бо изгоня́еши,/ слепы́м зре́ние, глухи́м слы́шание, немощству́ющим исцеле́ние подае́ши.

Ду́хом горя́, Го́сподеви рабо́тая и то́ки слез источа́я,/ мно́зи благоче́стия плоды́ в пусты́ни Обно́рстей возрасти́л еси́,/ и́миже до дне́сь пита́ются к тебе́ с ве́рою притека́ющии.

Труды́, бде́ние и сухояде́ние изнури́ша те́ло твое́, Сильве́стре,/ оба́че, свы́ше укрепле́н, Спа́са просла́вил еси́, взыва́я;/ сла́ва си́ле Твое́й, Го́споди.

Богоро́дичен: Помози́, Пресвята́я Богоотрокови́це, правосла́вным лю́дем,/ да сотру́т си́лы сопроти́вных,/ и страну́ на́шу ненаве́тну от злых и ми́ра испо́лнь соблюди́.

Ин. Ирмо́с то́йже

Благоуха́я ми́рами доброде́телей/ и не во еди́ном от благода́тных дарова́ний лиша́яся, всечестны́й Сильве́стре,/ ве́мы, я́ко с ли́ки пра́ведных предстои́ши ны́не/ пред Престо́лом Го́спода Вседержи́теля и мо́лишися за нас,/ да насле́дницы бу́дем жи́зни ве́чныя.

Честву́юще святы́я мо́щи твоя́ и помина́юще гове́ние и поще́ние твое́, труды́ и бде́ние,/ хва́лим и превозно́сим просла́вившаго тя Го́спода,/ Ему́же предстои́ши дне́сь, моля́ся о душа́х на́ших.

Сла́вим Отца́, Сы́на и Свята́го Ду́ха Бо́га,/ да́рующаго благода́ть святы́м Свои́м/ и тех моли́твами избавля́ющего нас от лю́тых обстоя́ний.

Богоро́дичен: Всесвята́я Ма́ти Де́во,/ Спа́са и Просвети́теля душ на́ших ро́ждшая,/ моли́ся, да, изба́вльшеся от тьмы́ грехо́вныя,/ сподо́бимся с ли́ки святы́х водвори́тися в селе́ниих Небе́сных.

Пе́снь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Очесы́ у́мными во вся дни живота́ твоего́ на Го́спода воскре́сшаго взира́яй,/ в пусты́ни храм Воскресе́ния воздви́гл еси́,/ в не́мже святы́я мо́щи твоя́ почива́ющи,/ я́вственне преднапису́ют ме́ртвеннаго телесе́ на́шего во о́браз безсме́ртныя сла́вы облече́ние.

Кня́зи, и боля́ре, и простцы́ прихожда́ху к ме́сту селе́ния твоего́, Сильве́стре,/ и от уст твои́х глаго́лы наказа́ния духо́внаго в сла́дость слу́шаху.

Прише́льца иногда́, в пусты́ню прише́дша,/ зрак твой, смире́ния и поще́ния испо́лнь, удиви́,/ и сего́ стяжа́л еси́, я́ко пе́рваго от учени́к твои́х.

Богоро́дичен: Пренепоро́чная Де́во,/ моли́твами Твои́ми пода́ждь нам из пусты́ни Сильве́стра досточу́днаго/ цве́ты доброде́телей благоуха́нныя вы́ну износи́ти.

Ин. Ирмо́с то́йже

Седя́щия иногда́ во тьме́ неве́дения и мра́чнаго неве́рия/ водворе́нием свои́м в пусты́ни Обно́рстей просвети́л еси́,/ умудря́я вы́ну словесы́ и дея́ньми, я́ко пропове́дник Бо́жия благода́ти./ Мы же мо́лимся, да моли́твами твои́ми испро́сиши у Христа́ Бо́га/ свет ве́ры и спасе́ние душа́м на́шим.

Вожделева́юще слы́шати сла́достныя глаго́лы уст твои́х, преподо́бне о́тче Сильве́стре,/ мно́зи от стран да́льних притека́ху к тебе́,/ та́кожде и мы, чту́ще святу́ю па́мять твою́,/ к тебе́ с ве́рою притека́ем.

Я́коже иногда́ неве́домаго прише́льца умудри́л и смири́л еси́, о́тче преподо́бне,/ та́кожде и нас, не умудре́нных во спасе́нии, ниже́ ве́дущих,/ ка́ко подоба́ет непра́вая и стро́потная оставля́ти,/ моли́твами твои́ми умудри́ и озари́.

Богоро́дичен: Богода́нной души́ моея́ свети́льник угаси́х/ и све́та стезе́й Госпо́дних не уве́дех,/ оба́че, Ма́ти Све́та, из мра́ка грехо́внаго вопию́:/ озари́ мя, омраче́ннаго и заблу́ждшаго, и напра́ви к приста́нищу спасе́ния.

Пе́снь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Мо́ря жите́йскаго треволне́ний отбе́г, в пусты́ню прите́кл еси́/ и, ти́хое приста́нище обреты́й,/ в Бо́зе еди́ном живо́т твой полага́л еси́, преподо́бне.

Деви́цу иногда́, бесо́м лю́те му́чиму, чу́дным явле́нием твои́м исцели́л еси́,/ егда́ спя́щей бы́лие тра́вное по́дал еси́./ Тем чу́до узре́вшии восхвали́ша тя, преподо́бне.

Обе́т изрече́ еди́н от ве́рных ти храм созда́ти,/ иде́же мо́щи твоя́ святы́я почива́ху,/ его́же и созда́л е́сть./ Те́мже от бед и скорбе́й изба́вил еси́ его́, блаже́нне.

Богоро́дичен: В храм Твой, Влады́чице, сходя́щеся, вопие́м Ти:/ Ты еси́ покро́в ме́сту сему́ свято́му,/ иде́же Сильве́стр Богоно́сный жи́тельствоваше./ Спаси́ у́бо ны, зде покланя́ющияся тебе́,/ и всем христиа́ном бу́ди Помо́щница.

Ин. Ирмо́с то́йже

Мо́ря жите́йскаго треволне́ний отбе́г и в пусты́ни всели́вся,/ та́мо на всяк час моля́ся и тружда́яся,/ я́ко до́бль во́ин Христо́в,/ вся сопроти́вныя си́лы дале́че отгна́л еси́.

Мно́зи, притека́юще к ра́це твое́й, о́тче, прие́млют цельбу́;/ молю́ся, пода́ждь и мне,/ немоществу́ющему душе́ю и те́лом, врачева́ние.

Я́коже иногда́ благочести́вый храмозда́тель/ изба́влен бы́сть моли́твами твои́ми от напа́стей,/ та́ко и нас, с ве́рою притека́ющих к ра́це твое́й,/ моли́твами твои́ми заступи́ от обдержа́щих нас зол.

Богоро́дичен: Лю́тыя пло́ти моея́ стра́сти утоли́, Пресвята́я Де́во,/ и заблу́ждшаго мя к ти́хому приста́нищу напра́ви.

Конда́к, глас 6:

По́двигом до́брым подвиза́лся еси́, преподо́бне,/ и ду́шу твою́, я́ко же́ртву чи́сту и непоро́чну,/ Ду́ху Свято́му прине́сл еси́,/ и по сме́рти твое́й ста́до твое́ духо́вное соблюда́еши,/ и в боле́знех ско́ро посеща́еши./ Те́мже мо́лим тя, преблаже́нне:/ с ли́ки преподо́бных моли́ Христа́ Бо́га,/ да спасе́т правосла́вныя христиа́ны/ и пода́ст лю́дем в ми́ре глубо́це устро́итися, да зове́м ти:/ ра́дуйся, Сильве́стре, и́ноком духо́вный па́стырю и наста́вниче.

И́кос:

И́ноков вои́стинну началово́ждь яви́лся еси́, Богому́дре Сильве́стре,/ смире́нию бо Христо́ву после́дуя,/ крест Его́ на ра́мена подъя́л еси́,/ и терпе́нием, поще́нием и моли́твою ста́ду твоему́ о́браз был еси́./ Те́мже и бра́тия, я́ко отца́ и наста́вника тя почита́юще,/ зря́ще тя ко Го́споду отходя́ща, ско́рбию исполня́хуся;/ и́мже веща́л еси́ глаго́лы утеше́ния:/ потерпи́те, – глаго́ля, – ма́ло в ны́нешнем ве́це, бра́тия возлю́бленная,/ и венцы́ прии́мете от Христа́ Бо́га и Спа́са душ на́ших./ Его́же моли́, преподо́бне, мир ми́рови дарова́ти/ и душа́м на́шим ве́лию ми́лость.

Пе́снь 7

Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Изря́ден подвигополо́жник был еси́, преподо́бне,/ во́ду на ра́менах твои́х нося́ и бы́лие еди́ное вкуша́я./ Тем просла́ви тя благослове́нный Бог оте́ц на́ших.

Не отхожда́ху лю́дие от ке́ллии твоея́, преподо́бне,/ словесе́м твои́м духоно́сным внима́юще,/ и, восхваля́юще Го́спода, взыва́ху:/ благослове́н Бог твой и Бог оте́ц на́ших.

Чудесы́ мно́гими просла́ви тя Христо́с Бог наш,/ и́миже удивля́еми, лю́дие всея́ страны́ Русския восклица́ют:/ благослове́н Бог оте́ц на́ших.

Богоро́дичен: Та́йну хра́мов, зде красу́ющихся, уразуме́им, ве́рнии, и возглаго́лем:/ покры́й нас, Богома́ти, честны́м Твои́м покро́вом,/ и помози́ моли́твами твои́ми, блаже́нне Сильве́стре,/ да дости́гнем сла́внаго из ме́ртвых воскресе́ния и сре́тения Госпо́дня на возду́се.

Ин. Ирмо́с то́йже

Богому́дрыя глаго́лы, я́ко благопло́дныя се́мена,/ восприя́в в се́рдце свое́ от до́бляго Се́ргия,/ возрасти́л еси́ я, о́тче Сильве́стре, в дре́во бла́госенноли́ственное;/ сего́ ра́ди мно́зи, прите́кше к тебе́, обрета́ют под се́нию благода́ти, я́же в тебе́,/ мир и спасе́ние душе́вное.

А́ще и мно́гою зело́ тьмо́ю объя́та бы́сть пусты́ня Обно́рская,/ но свет благоче́стия твоего́ озари́ ю и показа́ тя свети́льника су́ща,/ испо́лнена еле́ем Бо́жия благода́ти.

Ликовству́я, принесе́м дне́сь, ве́рнии, хвалу́ и благодаре́ние Бо́гови:/ нетле́нием бо просла́ви уго́дника Своего́/ и дарова́ ему́ благода́ть исцеле́ний.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице.

Пе́снь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

В ве́ре Боже́ственней вы́ну утвержда́яся,/ ве́рою, я́ко столп непоколеби́мый, стоя́,/ храм во сла́ву Воскре́сшаго Го́спода в пусты́ни Обно́рстей воздви́гл еси́,/ в не́мже де́йствием благода́ти Бо́жией си́лы мно́зи соде́яшася/ и процвете́ святы́ня Госпо́дня, показу́я,/ я́ко ты, о́тче преподо́бне Сильве́стре,/ вои́стинну был еси́ избра́нный сосу́д благода́ти и храм Бо́жий.

Святы́я Це́ркве не отлуча́йтеся, – глаго́лал еси́ бра́тии твое́й, преподо́бне,/ наказу́я, я́ко да во хра́ме воспева́ют ве́рнии Го́спода/ и превозно́сят Его́ во ве́ки.

О́троцы блаже́ннии во огни́, я́ко зла́то в горни́ле, искуша́еми, Го́спода воспева́ху;/ си́це Сильве́стр Богому́дрый, огне́м терпе́ния искуша́емь и очища́емь, взыва́ше:/ Го́спода по́йте и превозноси́те во вся ве́ки.

Богоро́дичен: Проле́й мольбы́ к Сы́ну Твоему́, неизрече́нно милосе́рдому,/ да спасе́т ны от вся́каго зла́го обстоя́ния,/ Присноде́во Богоблагода́тная.

Ин. Ирмо́с то́йже

Во едине́ние ве́ры, в сою́з же любви́/ поуче́ньми твои́ми приводи́л еси́ бра́тию;/ сицевы́х благ, я́ко би́сера, и́щуще, притека́ем к предста́тельству твоему́,/ преподо́бне о́тче Сильве́стре.

Я́ко ве́рный в дому́ Бо́жий раб, благоугожда́я Бо́гови,/ си́лою и де́йствием благода́ти Его́ мно́гая соверши́л еси́ зна́мения,/ озаря́я словесы́ и де́лы твои́ми сердца́ ве́рных./ Моли́ся у́бо, о́тче,/ да зна́менается и на нас, гре́шных, свет лица́ Бо́жия.

Си́лою и де́йством Победи́теля сме́рти и а́да/ до́блестно побежда́л еси́ вся сопроти́вныя си́лы,/ вы́ну сла́вя и превознося́ Го́спода.

Богоро́дичен: Засту́пнице ро́да христиа́нскаго,/ к Тебе́ притека́юще, мо́лимся:/ бу́ди нам, обурева́емым волно́ю жите́йских попече́ний, покро́в и заступле́ние,/ да благослови́м и превозно́сим Тя во вся ве́ки.

Пе́снь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Незри́мый лю́дем в пусты́ни пребыва́л еси́,/ с Бо́гом неви́димым духо́вне бесе́дуя, Сильве́стре блаже́нне,/ тем и ангелоподо́бен был еси́./ Сего́ ра́ди тя ублажа́ем.

Сла́вы от челове́к не ища́,/ от челове́к сокрове́н был еси́, сокрове́нне в Бо́зе пребыва́я,/ но, я́ко сла́вою Бо́жиею просла́вленна, ты ублажа́ем.

Благосе́рдно приими́, Богому́дре Сильве́стре, пе́сни сия́,/ во сла́ву и́мене твоего́ сложе́нныя,/ и помоли́ся о мне, гре́шнем рабе́ твое́м.

Богоро́дичен: Богоро́дице Де́во, упова́ние христиа́ном,/ бу́ди стена́ кре́пкая и огражде́ние всем ве́рующим,/ да Тя, я́ко Ма́терь Бо́га Сло́ва Премилосе́рдую, велича́ем.

Ин. Ирмо́с то́йже

Я́ко пустыннолюби́вая го́рлица, в пусты́ни Обно́рстей всели́вся,/ стяжа́л еси́ неоску́дная сокро́вища благода́ти;/ тоя́ моли́твами твои́ми, преподо́бне Сильве́стре, да сподо́бити нас Всеблаги́й Бог.

Вся уме́ты вмени́в Христа́ ра́ди/ и Ему́ после́довав небоя́зненно, в пусты́ни водворя́яся,/ с Ни́мже и воцари́лся еси́ дне́сь, преподо́бне,/ во оби́телех Отца́ Небе́снаго.

Предстоя́ же пред Го́сподем и дерзнове́ние к Нему́ име́я,/ моли́ся, да и мы, одержи́ми лю́тыми грехи́ и напа́стьми мно́гими,/ услы́шим сладча́йший глас Его́:/ до́брый ра́бе, благи́й и ве́рный,/ вни́ди в ра́дость Го́спода твоего́.

Богоро́дичен: Богоро́дице, христиа́ном Помо́щнице,/ Твое́ предста́тельство стяжа́вше, раби́ Твои́,/ благода́рно Тебе́ вопие́м:/ ра́дуйся, Пречи́стая Богоро́дице Де́во,/ и от всех нас бед моли́твами Твои́ми изба́ви,/ еди́на, вско́ре предста́тельствующая.

Свети́лен:

В черто́г Го́спода сла́вы возше́д/ и оде́жду имы́й, убеле́нну све́том доброде́телей,/ моли́ Христа́ Бо́га, преподо́бне,/ да да́рует всем правосла́вным в ве́ре сконча́ти живо́т свой/ и облещи́ся в оде́жду нетле́ния.

Богоро́дичен:

Ри́зу пода́ждь нам све́тлу, Богома́ти,/ зла́том благи́х дел преиспещре́нну,/ да прославля́ем вы́ну Твое́ благоутро́бие.

На хвали́тех стихи́ры на 4, глас 8:

Прииди́те, лю́дие,/ ублажи́м Сильве́стра досточу́днаго,/ в де́брех пусты́нных а́нгельски жи́тельствовавша/ и ле́ствицею доброде́телей Небесе́ дости́гши,/ и со слеза́ми возопии́м ему́, глаго́люще:/ моли́ Бо́га о нас, преподо́бне о́тче наш.

Ру́бищем иногда́ облече́н был еси́, преподо́бне,/ ны́не же оде́ждою сла́вы боготка́нною укра́шен еси́:/ гла́дом иногда́ пло́ть твою́ изможда́л еси́,/ ны́не же хле́ба живо́тнаго насыща́ешися./ Тем, Престо́лу Сла́вы предстоя́,/ помяни́ нас, гре́шных, преподо́бне,/ и моли́ спасти́ся всем нам.

Я́коже исходи́л еси́ иногда́ из пусты́ни к лю́дем,/ приходя́щим к тебе́, преподо́бне,/ и любо́вне к ним бесе́довал еси́,/ сло́во спасе́ния возвеща́я,/ си́це и нас не отжени́,/ усе́рдно притека́ющих к тебе́,/ и уще́дри нас, моля́щихся тебе́.

Дом Ду́ха Свята́го вои́стинну показа́лся еси́,/ о́тче Сильве́стре,/ мо́щи бо твоя́ источа́ют чуде́с мно́жество,/ и вси, те́пле ве́рующии, исцеле́ние безме́здное улуча́ют./ Мо́лим у́бо тя, блаже́нне,/ дарова́ти здра́вие телесе́м и душа́м на́шим.

Сла́ва, глас 6:

Что́ возда́мы, преподо́бне,/ за ми́лости твоя́ неизрече́нныя?/ Я́ко на прося́щих по́мощи твоея́ призира́еши/ и прибега́ющим к тебе́ с ве́рою/ засту́пник те́плый явля́ешися./ Приими́ же́ртву моле́ний на́ших/ и вознеси́ ю к Престо́лу Всевы́шняго,/ иде́же водворя́ешися, моля́ о душа́х на́ших.

И ны́не, Богоро́дичен:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы,/ поми́ловати ду́ши на́ша.

Славосло́вие вели́кое и отпу́ст

НА ЛИТУРГИ́И

Блаже́нны от кано́на, пе́сни 3-я и 6-я. Проки́мен, глас 4: Честна́ пред Го́сподем/ сме́рть преподо́бных Его́. Стих: Что́ возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Матфе́я, зача́ло 10. Прича́стен: В па́мять ве́чную:

Моли́тва

О честна́я главо́! Ду́ха Свята́го обита́лище и А́нгелов собесе́дниче, преблаже́нне о́тче Сильве́стре! Житие́м богоуго́дным вене́ц сла́вы Небе́сныя стяжа́вый и у Го́спода дерзнове́ние ве́лие имы́й, моли́ся о рабе́х твои́х, с ве́рою твоея́ по́мощи тре́бующих и с упова́нием на милосе́рдие твое́ к тебе́ прибега́ющих. Испроси́ у Го́спода Человеколю́бца всем лю́дем, коему́ждо для блага́го жи́тельствования и спасе́ния потре́бная: Це́ркви – мир и тишину́, правосла́вным христиа́ном – на враги́ побе́ду и одоле́ние, неду́жным – исцеле́ние, си́рым – вспоможе́ние, немощству́ющим ве́рою – в ве́ре утвержде́ние, ю́ным – в благоче́стии воспита́ние, всем лю́дем – безмяте́жие и от всех бед и скорбе́й избавле́ние, воззыва́емым от жи́зни сея́ вре́менныя – свято́е напу́тствие, преста́вльшимся – блаже́нное в Го́споде упокое́ние. Услы́ши, Богоно́сне, усе́рдное моле́ние гре́шных и недосто́йных раб твои́х и ми́лости твоя́ бога́тыя изле́й на ны, да, щедро́тами твои́ми обогаща́еми, сла́вим всечестно́е и великоле́пое И́мя Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.

Тропа́рь, глас 1:

Возсия́ нам, я́ко со́лнце светоза́рное от восто́ка в велеле́пии,/ Твоя́, Влады́чице, ико́на,/ озаря́ющи чуде́с сия́нием пресла́вно всех, приходя́щих к ней с ве́рою и любо́вию/ и моля́щихся усе́рдно к Твоему́, е́же о Сы́не Твое́м и Бо́зе, вели́чию./ Сла́ва Бо́гу, Евфроси́ном сию́ да́вшему нам!/ Сла́ва Приве́дшему ю от Царьгра́да!/ Сла́ва Даю́щему то́ю всем исцеле́ния.

Конда́к, глас 8:

Препросла́вленная Вы́шняго Ма́терь/ созыва́ет к песнопе́нию нас Своего́ о́браза прише́ствием от Царьгра́да/ и возбужда́ет зре́нием того́ на по́двиг,/ побежда́ти сопроти́вных си́лу,/ и к Ней, я́ко на́шея ра́дости вино́вней, пе́ти:/ ра́дуйся, Неве́сто Неневе́стная.

Моли́тва

К Тебе́, Пресвяте́й Госпоже́ Богоро́дице, недосто́йнии раби́ Твои́ прибега́ем: Ты бо, Преблага́я, еди́на незло́бивая и велемо́щная к Сы́ну Твоему́, Христу́ Бо́гу на́шему, за ны, гре́шныя, Хода́таица и Непосты́дная Предста́тельница. Ве́си, я́ко зело́ преогорчи́хом бла́гость Его́ преступле́нием Боже́ственных Его́ за́поведей. Не́сть бо греха́, его́же мы, непотре́бнии, не сотвори́хом, всяк страх отве́ргши, того́ ра́ди и Ду́ха благода́ти и да́ра преесте́ственнаго сыноположе́ния отверго́хомся и вся́каго отвраще́ния и ка́зни досто́йни сотвори́хомся. Ве́си, Преблага́я Засту́пнице, я́ко и Твоя́ ми́лости и дарова́ния мы, безу́мнии, забве́нию преда́хом и Твоего́ милосе́рдия недосто́йни соде́яхомся. Коли́ко бо Тя, Госпоже́ Богороди́тельнице, на умоле́ние Сы́на Твоего́ и Бо́га на́шего подвиза́хом, обеща́вше Ти, Пречи́стая, от злых исправле́ние, толи́ко Твое́ ма́тернее к Нему́ за ны, гре́шныя, предста́тельство и заступле́ние нивочто́же вмени́хом, неблагода́рни и злонра́вии су́ще. Ны́не стыд нося́ще и ниже́ досто́йни воззре́ти на пречи́стый о́браз Твой, пред ни́мже предста́хом. Но, о све́те душ на́ших, све́тлое зерца́ло бла́гости Бо́жия! И мы ве́мы, коли́ко мо́жет Твое́ ма́тернее ко Христу́ Бо́гу на́шему дерзнове́ние, ве́мы, я́ко никто́же, прибега́яй к Тебе́, Благосе́рдая, с покая́нием и умиле́нием, посра́млен от Тебе́ бы́сть, или́ призыва́яй Тебе́, Пречи́стая, не услы́шан от Тебе́ изы́де: чтит бо Сын Твой Тя, Богоневе́сто, я́ко Ма́терь Свою́, ми́лостивно прие́мля моле́ния Твоя́. Сего́ ра́ди и ужаса́емся воззре́ти к Све́ту Твоея́ стра́шныя и Богоподо́бныя сла́вы, оскверне́ны иму́ще о́чи душе́вныя, оба́че коле́на душ и теле́с на́ших преклоня́юще, мо́лим Тя, Боголе́пная Мари́е, я́ко Ма́терь и Цари́цу на́шу: умилосе́рдися на ны, непотре́бныя рабы́ Твоя́, и, и́миже ве́си судьба́ми, взыщи́ ны, поги́бшия, просвети́ наш ум све́том Твоего́ Богове́дения, да, им озаре́ни су́ще, вся́кое зло́е помышле́ние и всяк безсту́дных дея́ний о́браз до конца́ отсече́м, всем же се́рдцем за́поведи Госпо́дни возлю́бим и в них непоро́чно ходи́ти начне́м. Ерети́ческая возста́ния прекрати́, разсе́янныя же собери́, заблу́ждшия возврати́ во еди́но ста́до Сы́на Твоего́, Христа́ Бо́га на́шего, ста́рость поддержи́, ю́ныя вразуми́, вдови́ц и сиро́т защити́, боля́щия исцели́, страну́ же на́шу ми́ром огради́ и во ве́ки незы́блему соблюди́, всем же нам преспе́яние в ве́ре и де́лех благи́х в долготу́ дней да́руй. Пре́жде отше́дшия отцы́ и бра́тию на́шу во све́тлостех ра́йских и селе́ниих пра́ведных упоко́й, с ни́ми и нас всех в покая́нии и испове́дании приими́ и сопричти́, да и мы, Преблага́я на́ша Засту́пнице, Богома́ти и Влады́чице, спасе́ни су́ще Твои́м хода́тайством, восхваля́я Тя, просла́вим со все́ми святы́ми пречестно́е и пресвято́е И́мя Отца́ и Сы́на и Свята́го Ду́ха, Еди́наго в Тро́ице сла́вимаго Бо́га, ны́не, и при́сно, и во ве́ки. Ами́нь.