На Го́споди, воззва́х: стихи́ры Ианнуа́рия, глас 4.

Подо́бен: Я́ко до́бля:

Свяще́нник свяще́ннейший,/ страда́лец зако́нен,/ о Ианнуа́рие, ты был еси́,/ не чужди́ми кровьми́,/ но твои́ми па́че/ в са́мое то Не́бо вшед,/ иде́же Предте́ча всех е́сть Иису́с,/ при́сно Сего́, о́тче, зря и ви́дя,/ Его́же А́нгели ви́дят.

И мече́м усека́емь,/ и на о́гнь помета́емь,/ и звере́м дае́мь, досточу́дне,/ и в темни́це затворя́емь на дни мно́ги, непрекло́нен умо́м/ си́лою Боже́ственною пребы́л еси́/ и сконча́л еси́ по́двиг, зако́нно пострада́в,/ свяще́нне чудоно́сне,/ Безпло́тных собесе́дниче.

Дисиде́рия, и Проку́ла,/ Со́сса, Фа́вста, Евтихи́я,/ Ианнуа́рия сла́внаго/ и му́драго Акути́она/ согла́сно почти́м,/ я́ко му́дрыя священноде́йственники,/ я́ко венцено́сцы му́ченики,/ я́ко гра́да свята́го гра́жданы,/ моли́твенники же тех, блажа́щих и́стинны су́ща.

И́ны стихи́ры свята́го Фео́дора, глас 4.

Подо́бен: Дал еси́ зна́мение:

Пред непра́ведным суди́щем, великому́чениче Фео́доре, предстоя́,/ обличи́л еси́ и́дольское безбо́жие,/ и бие́н быв непра́ведно,/ простре́н, преблаже́нне, на сковраде́ разжже́нне,/ лю́те пеко́м,/ и полива́емь росо́ю Ду́ха,/ И́же тя тве́рдо укре́пльшаго/ разори́ти свере́пство лю́таго борца́.

Колесни́ца Бо́га на́шего я́вственна был еси́,/ чи́стым се́рдцем твои́м Сего́ носи́ма име́я, блаже́нне,/ колесни́це же привя́зан,/ реши́ши от уз/ и Христо́ве привяза́я любви́/ и́же тя связа́вшия;/ с ни́миже вве́ржен быв в пе́щь,/ не опали́лся еси́, Фео́доре,/ возвелича́я Го́спода с те́ми, досточу́дне.

На Кресте́ Просте́ршему ру́це подо́бяся, блаже́нне,/ распя́тся, Фео́доре,/ пребы́л же еси́, ви́ся на три дни,/ до́ндеже в ру́це Бо́гу пре́дал еси́ ду́шу,/ тече́ние сконча́л еси́ страда́ния,/ му́чеников верх,/ Це́ркве пре́дний сто́лпе,/ ве́рных удобре́ние,/ А́нгелов собесе́дниче.

Сла́ва, и ны́не, Богоро́дичен:

Одожди́ ми, Влады́чице,/ Твоея́ ми́лости бе́здну/ и опа́льшееся зно́ем страсте́й се́рдце мое́,/ я́ко Ми́лостива, напо́й, Отрокови́це,/ и умиле́ния ка́пли точи́ти/ непреста́нно сотвори́, молю́ся,/ и́миже утеше́ния сподо́блюся, Чи́стая,/ е́же получи́ти и́мут/ и́же и́скренно пла́кавшиися.

Крестобогоро́дичен:

Распина́ема Христа́ Человеколю́бца/ ви́дящи, Пречи́стая,/ и ре́бра ископава́ема копие́м,/ пла́чущи, вопия́ше:/ что сие́, Сы́не Мой?/ Что Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне,/ Твоему́ во́льному распя́тию.

Кано́н свята́го Ианнуа́рия, глас 4.

Пе́снь 1

Ирмо́с: Триста́ты кре́пкия,/ рожде́йся от Де́вы,/ безстра́стия во глубине́, души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́ побе́дное воспою́ пе́ние.

Сый с во́инствы невеще́ственных А́нгел,/ и прича́стием све́та незаходи́маго ду́шу свяще́нно просвеща́я,/ просвети́ ми се́рдце,/ светоно́сный твой дне́сь пра́здник восхваля́ющу, блаже́нне.

Во́инство светови́дно, свяще́нный собо́р пострада́ с тобо́ю терпели́вно,/ му́дре священноде́йственне,/ с ни́миже вся́ко разори́л еси́ зми́ево кова́рство,/ претерпе́в многоплете́нныя смы́слом му́ки.

Стопа́м Христа́, вели́каго и пе́рваго Па́стыря, му́дре, после́дуя,/ обагре́нии муче́ния уясни́л еси́ твоего́ святи́тельства оде́жду,/ сего́ ра́ди тя почита́ем ума́ пра́востию.

Богоро́дичен: Блаже́ни су́ть лю́дие, Богоро́дице, сла́вящии Тя, Ма́терь Бо́жию нело́жную,/ и при́сно блажа́щии Тя, Чи́стая,/ я́коже прорекла́ еси́, свяще́нно прорица́ющи,/ егда́ Христа́ вну́трь носи́ла еси́.

Ин кано́н свята́го Фео́дора, глас 4.

Пе́снь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Дар благоприя́тен и Влады́це возлю́блен,/ му́чеником украше́ние яви́лся еси́, Фео́доре,/ сего́ ра́ди тебе́, я́ко дар, приношу́ пе́ние,/ пода́ждь ми твою́ по́мощь.

Красе́н те́лом, удобре́н же Ду́хом сый,/ отлучи́лся еси́ к боре́нием льсти́ваго/ и, сего́ разрази́в, побе́ды вене́ц прия́л еси́.

Глаго́лы преоби́дел еси́ злочести́ваго, Фео́доре,/ себе́ же уго́дника Госпо́дня и́скрення, и во́ина Христа́ Царя́,/ и соверше́нна му́ченика я́ве показа́л еси́.

Богоро́дичен: Всели́ся во чре́во Твое́ естество́м Непристу́пный,/ жи́тели показа́ нас, Пренепоро́чная, рая́ неизрече́нным милосе́рдием,/ от Него́же изгна́ни бы́хом за́вистию змии́ною.

Пе́снь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Заре́ю Свята́го Ду́ха огражде́н,/ посреде́ пе́щи ликова́л еси́,/ ю́ношам и́же пе́рвее преподо́бным, преблаже́нне, подо́бяся.

Чи́ни свяще́нных сил посреде́ пе́щи/ с тобо́ю, Богому́дре, ликова́ху,/ с ни́миже пое́ши Благоде́теля, пребыва́я неопали́м.

Река́, ме́двена уче́ний медото́чных твои́х, Ианнуа́рие прему́дре,/ вои́стинну язы́к твой бы́сть,/ мы́сли зря́щих тя наслажда́ющи.

Богоро́дичен: Расто́ргни плени́цы, Богоневе́сто, грехо́в мои́х,/ я́же у́зы расто́ргши а́довы рождество́м Твои́м/ и ра́дости вся испо́лньши.

Ин

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Храм быв Ду́ха Боже́ственнаго,/ хра́мы же истука́нныя, му́дре, па́губныя потреби́л еси́/ и словесы́ обличи́л еси́ ме́рзкая приноше́ния беззако́ннующих, Фео́доре.

Я́ростию и гне́вным произволе́нием бия́ше тя беззако́нный судия́,/ зако́ны Бо́га на́шего утвержда́юща, Фео́доре,/ Его́же зря пред собо́ю, непоколеби́м пребы́л еси́.

Положи́лся еси́ усе́рдно на сковраде́ разжже́нне, страда́льче,/ ре́вностию разгара́емь Бо́га Вседержи́теля/ и Того́ распаля́емь Боже́ственною любо́вию, Фео́доре.

Богоро́дичен: Безле́тный естество́м под ле́том из Тебе́ ви́ден бы́сть,/ роди́ся подо́бием пло́ти,/ ле́тняя моя́ прегреше́ния за милосе́рдие неизрече́нное презря́, Всенепоро́чная.

Седа́лен, глас 4.

Подо́бен: Вознесы́йся:

Свяще́ния оде́жду обагри́в крове́й твои́х омоче́нии,/ светле́йшу я́ве показа́л еси́, уго́дниче Христо́в./ Те́мже вшел еси́ во оби́тели ве́чныя,/ источа́я чту́щим тя исцеле́ний пучи́ну/ и моля́ всегда́ Бо́га всем да́ти прегреше́ний проще́ние.

Сла́ва, глас то́йже. Му́ченичен:

Спаси́тельных даро́в тезоимени́таго и насле́дника того́ блаже́нства,/ я́ко подо́бника и му́ченика Христа́ Бо́га, прииди́те, восхва́лим,/ честну́ю его́ па́мять ны́не торжеству́юще и к нему́ вопию́ще:/ великому́чениче, моли́ся, согреше́ний дарова́ти нам оставле́ние.

И ны́не, Богоро́дичен:

По Бо́зе во Твой, Богоро́дице,/ прибега́ю смире́нный покро́в Боже́ственный, припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, му́ки, и трепе́щу./ Моле́ние сотвори́, Чи́стая, к Сы́ну Твоему́ от сих изба́вити мя.

Крестобогоро́дичен:

И́же от Безнача́льнаго Отца́ рожде́ннаго напосле́док Тя пло́тию ро́ждшая,/ на Кресте́ ви́сяща, зря́щи, Христе́,/ увы́ Мне, любе́знейший Иису́се, – вопия́ше, –/ ка́ко сла́вимый я́ко Бог от А́нгел,/ от беззако́нных ны́не челове́к, Сы́не, хотя́, распина́ешися?/ Пою́ Тя, Долготерпели́ве.

Пе́снь 4

Ирмо́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы,/ Ты бо еси́, Человеколю́бче,/ кре́пость моя́ и хвале́ние.

Вси Со́сса диа́кона и страда́льца и свяще́ннаго Фа́вста,/ Проку́ла же вели́каго и Дисиде́рия же согла́сно почти́м.

Дрема́нием нече́стия, Проку́ле му́чениче,/ ты ника́коже воздрема́лся еси́,/ бодростьми́ Боже́ственными все успи́л еси́ безбо́жных зломы́слие.

Но́ва я́ко Дании́ла тя, звере́й посреде́ сострада́льцы спаса́ет,/ невре́дна изводи́ма, о Ианнуа́рие,/ Христо́с Бог наш.

Богоро́дичен: Возвели́чим еди́ну Благослове́нную,/ Ея́же ра́ди вельми́ всех благослови́ вои́стинну Всепреблаги́й,/ от Сея́ воплоща́емь.

Ин

Ирмо́с: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Возле́зша на сковраду́, небе́сный А́нгел, предста́в, ороша́ет,/ неопа́льно соблюда́я тя, Фео́доре, ре́чных вод потече́нии,/ и тру́сом, и шу́мом, стра́шными показа́нии.

Тебе́, ве́рно чудоде́йствующу, пре́лести прилежа́й,/ к ве́ре внеза́пу, му́чениче, я́коже ка́мень, валя́ется,/ и к ли́ку му́ченик устроя́ется Диоско́р, огне́м скончава́емь.

Во блюсти́тельнице поло́жься я́ко храни́тель Зижди́теля повеле́нием,/ ю́же от младе́нства име́л еси́ ве́ру, Бо́гу сохрани́л еси́/ и сию́ неблюду́щих я́ко безу́мных гнуша́лся еси́/ соверше́нным ра́зумом, пресла́вне.

Многоболе́зненных мук искуше́ния претерпе́л еси́/ и мно́гих боле́зней, му́чениче, цели́ти сподо́бился еси́,/ неболе́зненных жили́щ насле́дник быв/ и безпеча́льныя вои́стинну жи́зни и наслажде́ния.

Богоро́дичен: Без боле́зни родила́ еси́ Бо́га Безпло́тнаго,/ боле́зни, Отрокови́це, Е́вы прама́тере реша́ща и боле́зни а́довы избавля́юща/ боле́знену иму́щих жи́знь согреша́ющих.

Пе́снь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Кро́вию свяще́нною оде́жду твою́, пребога́те, соверши́л еси́ светле́йшу/ и к Це́ркви Вы́шней я́ко свяще́нник прише́л еси́.

Исте́кши на земли́ многочестне́й кро́ви твое́й,/ был еси́ исцеле́ний река́,/ страсте́й изсуша́я пото́ки.

Непра́веднаго судию́ ослепле́на моли́твою твое́ю просвети́л еси́,/ милосе́рдию Влады́ки всех подо́бяся, пребога́те.

Богоро́дичен: Пое́м Тя, Ея́же ра́ди су́щим во тьме́/ Свет незаходи́мый возсия́, Богоро́дице, всех Влады́ка,/ и любо́вию ублажа́ем.

Ин

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Вельми́ безбо́жную пре́лесть обличи́л еси́,/ те́мже к колесни́це привяза́лся еси́, пребыва́еши же цел,/ ко́нем о́гненным, тя подъе́мшим, пла́менныя колесни́цы, Фео́доре,/ я́коже Илию́ сла́внаго.

Разгне́вався беззако́нный, в пе́щь горя́щую тя вку́пе с Сокра́том и Боже́ственным Диони́сием вве́рже;/ с ни́миже проро́ческую свяще́нную пел еси́ пе́снь,/ доблему́дренне Фео́доре.

Да похва́лится в пе́снех Боже́ственный Диони́сий вку́пе с Сокра́том до́блим,/ посреде́ пе́щи копие́м уя́звени бы́вше;/ му́ченицы бы́ша кре́пцы, Боже́ственным наказа́нием Фео́дора повину́вшеся.

Богоро́дичен: Вои́стинну су́щи и вресноту́, Пренепоро́чная еди́на Богоро́дице,/ облада́ти мне порабо́щшими мя страстьми́ укрепи́,/ я́ко да свобо́дным по́мыслом, ра́дуяся, ублажа́ю Тя, ве́рных спасе́ние.

Песнь 6

Ирмо́с: Приидо́х во глубины́ морски́я,/ и потопи́ла мя е́сть бу́ря мно́гих грехо́в,/ но, я́ко Бог, из глубины́ возведи́ живо́т мой,/ Многоми́лостиве.

Глаго́лы зна́мения ви́дя тя, собо́р беззако́нных, де́юща, священнотаи́нниче,/ ко Творцу́ от души́ прихо́дит, пресла́вно просвеща́емь.

Яви́лся еси́ пре́жде конца́, святи́телю,/ и по Боже́ственней кончи́не, творя́ мно́жество чуде́с,/ дар Свята́го Ду́ха от младе́нства прие́м.

Ны́не свяще́нным согла́сием Фа́вста и Со́сса вси,/ Дисиде́рия с Евти́хием и му́драго Акути́она воспое́м,/ и с Проку́лом Богоно́сным.

Богоро́дичен: Во благодея́ние челове́ком от Твои́х Чи́стых крове́й воплоща́ется Бог Сло́во./ Его́же приле́жно, Богома́ти, моли́/ спасти́ся душа́м на́шим.

Ин

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

А́нгела Боже́ственным прише́ствием о́гнь у́бо пе́щи угаса́ше;/ се́рдце же твое́, преблаже́нне, дерзнове́ния исполня́шеся,/ е́же к Зижди́телю, манове́нием прохлажда́ющееся.

Глаго́лы святы́я я́ко услы́ша тебе́ ро́ждшия мучи́тель,/ му́чениче Фео́доре, сию́ мечу́ предаде́,/ му́ченически боже́ственне тече́ние сконча́вшу.

Вожделе́вши, я́ко ю́ница, Фили́ппа с сы́ном умре́ти,/ с спе́хом прии́де, посреде́ суди́лища самозва́нна,/ му́ченик сла́ву прие́млющи.

Богоро́дичен: Се гора́ свята́я, се мирополо́жница Ду́ха,/ мост, к Бо́гу всех преводя́й, Богоро́дица Де́ва,/ Ю́же ублажа́ем.

Конда́к, глас 3:

Свяще́ния пома́занием и муче́ния кро́вию украси́стеся,/ сла́вне Ианнуа́рие и Фео́доре,/ и сия́ете всю́ду, в Вы́шних лику́юще,/ и нас назира́йте, в храм ваш прише́дшия/ и в нем непреста́нно зову́щия:/ всех нас соблюди́те, моля́ще Человеколю́бца Бо́га.

Пе́снь 7

Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди, Бо́же оте́ц на́ших.

Отроко́м Боже́ственным уподо́бился еси́ посреде́ пла́мене, о Ианнуа́рие!/ Соше́ствием А́нгела, лику́я о́крест и пе́сньми та́йными Спа́са поя́:/ благослове́н еси́, Го́споди, Бо́же оте́ц на́ших.

Безболе́знен по́мысл твой благода́тию Боже́ственною соблюда́я,/ и пре́жде страда́ния неду́ги исцели́л еси́ вся́кия,/ па́стырь, и му́ченик, и вели́к чудотво́рец познава́емь.

Стоя́л еси́ пред суди́щем, му́чениче, мучи́телей,/ стражда́ терпели́вно, и злочести́выя посрамля́я,/ и прельще́нным всем показу́я и́стину.

Богоро́дичен: Умертви́ моя́ движе́ния, Пречи́стая, плотска́я,/ я́же Живо́т ро́ждшая,/ оживи́, Чи́стая, ду́шу мою́, умерщвле́нную страстьми́ и мно́гими грехи́.

Ин

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся пою́ще:/ препе́тый отце́в Госпо́дь и Бог, благослове́н еси́.

Соблюда́емь росо́ю Ду́ха, я́коже о́троцы трие́,/ неопали́м посреди́ огня́, Богому́дре Фео́доре, с си́ми пел еси́:/ препе́тый оте́ц на́ших Бо́же, благослове́н еси́.

Е́ллинскую пре́лесть обличи́л еси́, му́чениче Фео́доре, сло́вом благода́ти,/ бога́тно истека́ющим от усте́н твои́х, и взыва́л еси́:/ оте́ц на́ших Бо́же, благослове́н еси́.

Уве́да твое́ прозва́ние и страда́ние тебе́ ро́ждшая,/ и пре́жде зача́тия, Фео́доре вели́кий, му́чениче многострада́льно, вопию́щи:/ оте́ц на́ших Бо́же, благослове́н еси́.

Богоро́дичен: Очище́ние ми бу́ди, Всенепоро́чная, к ро́ждшемуся из Тебе́/ отсече́ния лю́тых долго́в хода́тайствующей ми,/ и Ца́рствия Бо́жия Боже́ственный вход,/ и пи́щи наслажде́ние, и све́та прича́стие.

Пе́снь 8

Ирмо́с: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Да восхва́лится вели́кий Проку́л со Аку́тием, и Евтихи́й,/ и Боже́ственный Дисиде́рий,/ Фавст же и Сосс доблему́дреннии,/ Спа́са сла́внии му́ченицы.

Тя лик страда́лец блаже́нный верхо́вника притяжа́,/ попра́, священнотаи́нниче сла́вне, верх де́монов,/ и безбо́жия вознесе́нную горды́ню потреби́.

Я́коже о́троцы, о́гнь попра́л еси́ и звере́й стремле́ния обузда́л еси́,/ я́коже Дании́л, всеизря́дне, и я́ко Па́вел, во главу́ усе́клся еси́,/ благоче́стно сконча́в тече́ние твое́.

Богоро́дичен: Всели́выйся несказа́нно во чре́во Твое́,/ Себе́ жили́ще показа́ Тя, Пречи́стая Богоневе́сто,/ Ему́же непреста́нно вопие́м:/ вся дела́, благослови́те Госпо́дня Го́спода.

Ин

Ирмо́с: О́троки благочести́выя в пещи́/ Рождество́ Богоро́дичо спасло́ е́сть./ Тогда́ у́бо образу́емое,/ ны́не же де́йствуемое/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

На крест вознесе́н быв,/ три дни сотвори́л еси́, на сем пове́шен быв, Фео́доре,/ стра́сть Влады́ки твоего́, при́сно по́мнимую,/ треми́ часы́ бы́вшую, изобража́я я́ве:/ Го́спода по́йте, дела́, и превозноси́те Его́ во ве́ки.

Положе́н был еси́ на дре́во,/ боле́знены прие́мля я́звы, уязви́л еси́ зми́я борца́,/ вкуше́нием дре́ва сме́рть боле́зненну, Фео́доре, соде́лавша Ада́му и того́ вну́ком./ Те́мже тя чтим во вся ве́ки.

Вопие́т Перги́я твоя́ по́двиги, боле́зни, страда́ние,/ ра́ны, стра́сть блаже́нную, сме́рть честну́ю,/ ея́же ра́ди к безсме́ртней жи́зни, Фео́доре, преше́л еси́:/ благослови́те, – зовы́й, – вся дела́, Го́спода и превозноси́те Его́ во ве́ки.

Богоро́дичен: О, глубина́ неизрече́ннаго та́инства!/ Созда́вый руко́ю дре́вле челове́ка/ зи́ждется, воплоща́емь, во утро́бу Присноде́вы вшед,/ и спаса́ет мя, со стра́хом зову́ща:/ Го́спода по́йте, дела́, и превозноси́те Его́ во ве́ки.

Пе́снь 9

Ирмо́с: Е́ва у́бо неду́гом преслуша́ния кля́тву всели́ла е́сть:/ Ты же, Де́во Богоро́дице,/ прозябе́нием чревоноше́ния/ ми́рови благослове́ние процвела́ еси́./ Тем Тя вси велича́ем.

Ианнуа́рия честна́я боре́ния, по́двиги и бие́ния,/ е́же до кро́ве, му́жество, боле́зни и ну́ждную сме́рть,/ чуде́с же неизме́рную пучи́ну с весе́лием возвели́чим.

Ви́ден был еси́ на высоте́ честна́го, сла́вне, муче́ния, я́коже незаходи́мое со́лнце;/ я́ко Боже́ственныя зве́зды, му́ченик мно́жество веды́й/ и ны́не просвеща́ет концы́ страда́ний вели́ких све́тлостию.

Па́мять твоя́ светоно́сная возсия́,/ лучи́ Бо́жественного Ду́ха ве́сь мир озаря́ющи,/ омраче́ние зол отгоня́щи,/ в не́йже тя мо́лим, Богодухнове́нне, просвети́ вся, пою́щия тя.

Богоро́дичен: Све́та, и́же в тебе́, сия́нии, ослепле́нную ду́шу мою́ просвети́,/ и руко́ю наста́ви, Отрокови́це, в пути́ спасе́нных ходи́ти,/ и преле́стна отбе́гнути преткнове́ния,/ я́ко да ве́рою ублажа́ю тя.

Ин

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Стопа́м Христо́вым после́дуя, прему́дре,/ пе́рваго му́ченика распя́тие претерпе́л еси́,/ у́зы и я́звы гвозди́нныя прие́м,/ и от земли́ восте́кл еси́ к Небе́сным, венцено́сец по́честь прие́м,/ Ца́рство Бо́жие непрее́мное.

Яви́лся еси́, я́ко зла́то, Фео́доре, светосия́нно,/ посреде́ стоя́ огня́, соше́ствием честна́го А́нгела,/ распала́емь Влады́ки жела́нием, неопалим, пребы́л еси́,/ с ни́мже пе́снь спасе́нную поя́, свяще́нно ра́дуяся.

Ста́нем благоче́стно в до́му Бо́га на́шего,/ страда́льца Его́ ве́рою блажа́ще, му́жеским умо́м подви́гшагося,/ и вра́жие шата́ние победи́вша,/ и побе́ды свы́ше вене́ц из руки́ Христо́вы прие́мшаго.

Взя́тся ко оби́телем Вы́шним, ра́дуяся, му́чениче Фео́доре,/ дости́гл еси́ Безпло́тных чи́ны,/ с те́лом безпло́тныя де́моны кре́пко побе́ждь,/ и мо́лишися ве́рою о чту́щих тя/ долго́в прия́ти избавле́ние.

Богоро́дичен: Просвети́, Чи́стая, души́ моея́ о́чи, Богороди́тельнице,/ да не пости́гнет мене́ грехо́вная тьма́ тя́жкая,/ ниже́ глубина́ покры́ет мя отча́яния,/ но Сама́ мя спаси́ и упра́ви, Предста́тельнице ве́рных непосты́дная.