НА ВЕЧЕ́РНИ:

На Го́споди, воззва́х: стихи́ры, глас 1.

Подо́бен: Всехва́льнии му́ченицы:

Сло́вом Боже́ственнаго ра́зума/ лю́ди неразу́мия, прему́дрии,/ всеконе́чне изба́висте/ и приведо́сте спаса́емы сия́/ Сло́ву, возсия́вшему/ из Нерожде́нна Отца́, апо́столи./ Того́ моли́те/ дарова́ти душа́м на́шим/ мир и ве́лию ми́лость.

Пу́да, и Ариста́рха я́ве,/ и Боже́ственнаго Трофи́ма,/ и́стинныя Христопропове́дники, восхва́лим:/ пре́лести бо зи́му/ теплото́ю Боже́ственныя благода́ти разори́ша/ и ны́не к незаходи́мому сия́нию всели́шася,/ воздая́ния трудо́в прие́мше/ и прича́стием неизрече́нным обожа́еми.

Па́влу после́дующе,/ сла́вному учи́телю, сла́внии,/ мно́ги беды́ подъя́сте,/ в юзи́лищах заключа́еми,/ приобща́ющеся боле́знем,/ мече́м же наконе́ц, во главы́ усека́еми, пострада́ете./ Христу́ моли́теся/ дарова́ти душа́м на́шим/ мир и ве́лию ми́лость.

Сла́ва, и ны́не, Богоро́дичен:

Увы́ Мне! что бу́ду,/ ум и ду́шу и те́ло оскверни́х прегреше́ньми?/ что сотворю́? ка́ко же избежу́ пла́мене нестерпи́маго,/ нереши́мых уз и ве́чных?/ Но, о Всенепоро́чная!/ Пре́жде конца́ моли́ Сы́на Твоего́/ пода́ти ми оставле́ние.

Крестобогоро́дичен:

Де́ва Нескве́рная,/ иногда́ на дре́ве ви́девши,/ Его́же роди́ из безсе́менныя утро́бы,/ не терпя́щи утро́бнаго уязвле́ния,/ власы́ терза́юще, глаго́лаше:/ ма́нием Содержа́й тварь всю,/ ка́ко, я́ко осужде́нный,/ на Крест вознесе́н еси́,/ вся́ко хотя́й спасти́ челове́чество?

Кано́н, его́же краегране́сие: Бо́жиим ученико́м Боже́ственную воспева́ю песнь. Творе́ние Ио́сифово. Глас 6.

Песнь 1

Ирмо́с: Я́ко по су́ху, пешеше́ствовав Изра́иль,/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь/ пои́м, вопия́ше.

Престо́лу Бо́жию предстоя́ще, я́ко слуги́,/ я́ко Христо́вы служи́тели, я́ко свети́льницы мы́сленнии,/ просвеще́ние проси́те нам, чту́щим ва́шу па́мять, апо́столи.

На земли́ за милосе́рдие я́влься,/ ученики́ избра́ и служи́тели вас, со ины́ми мно́жайшими,/ Его́ возвеща́ющия всю́ду Боже́ственное хоте́ние.

Свяще́ннейший лик, свяще́нных Христо́вых се́дмьдесят сочта́вшеся учени́к,/ с Па́влом всю зе́млю уче́ньми Боже́ственнаго све́та просвети́сте.

Свяще́ннейший Пуд и сла́вный му́дрый Ариста́рх с Трофи́мом,/ я́ко зве́зды светоза́рныя, возсия́ша на земли́,/ пре́лести омраче́ние отгоня́ще.

Богоро́дичен: Да ни́жния с Вы́шними премно́жеством милосе́рдия, Пречи́стая, совокупи́т,/ Бог плоть прия́т от Тебе́/ и пребы́сть, е́же бе, и по воплоще́нии.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Су́ще с Па́влом сла́вным,/ с ним весь мир, я́ко зве́зды с со́лнцем, проидо́сте,/ све́том пропове́дания свяще́ннаго неве́дения тьму отгоня́ще.

Вели́кими боле́зньми плотски́ми/ боле́зненный отъя́ша грех от среды́ Сло́ва ученицы́,/ безболе́зненный ве́рным в Вы́шних поко́й обручи́вше.

По́двиги Боже́ственными вои́стинну вра́жию зло́бу разори́сте всю/ и, хра́мы и́дольския низлага́юще,/ Бо́гу челове́ки хра́мы сотвори́сте.

Богоро́дичен: Пита́еши млеко́м всех Пита́теля, Де́во,/ рожде́ннаго без тли из Пречи́стаго Твоего́ чре́ва/ и сокруше́нныя тле́ю челове́ки па́ки назида́юща.

Седа́лен, глас 1.

Подо́бен: Гроб Твой, Спа́се:

Я́ко у́тро, боголе́пно возсия́вше ми́ру,/ тьму глубо́кую отгна́сте ве́рою пре́лести, апо́столи, и ду́ши просвети́сте./ Те́мже вся светоза́рная Це́рковь пое́т днесь светоно́сную ва́шу па́мять,/ Христа́ велича́ющи.

Сла́ва, и ны́не, Богоро́дичен:

Упова́ние христиа́н, Пресвята́я Де́во,/ Его́же родила́ еси́, Бо́га, па́че ума́ же и сло́ва,/ непреста́нно моли́ с Вы́шними си́лами/ пода́ти оставле́ние грехо́в на́ших всех и исправле́ние жития́/ ве́рою и любо́вию при́сно Тя сла́вящим.

Крестобогоро́дичен:

Нескве́рная А́гница, А́гнца и Па́стыря, пове́шена на Дре́ве, ме́ртва зря́щи,/ пла́чущи, веща́ше, ма́терски восклица́ющи:/ ка́ко претерплю́ Твое́, е́же па́че сло́ва, Сы́не Мой, сни́тие/ и во́льныя стра́сти, Бо́же Преблаги́й?

Песнь 4

Ирмо́с: Христо́с моя́ си́ла,/ Бог и Госпо́дь,/ Честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Пресу́щная Тро́ица я́ко трисве́тлую возжже́ свещу́, свяще́нныя/ Пу́да же, и Трофи́ма, и Ариста́рха,/ зе́млю Боже́ственным сло́вом озаря́ющия.

Па́влу яви́стеся му́дрии спу́тницы,/ гоне́ния с ним многови́дна и беды́, сла́внии,/ бу́дущия ра́ди жи́зни, веселя́щеся, претерпе́сте.

Кро́вными тече́нии освяти́сте всю тварь, стра́ждуще,/ скве́рныя кро́ви, де́моном приноси́мыя,/ Христо́вою си́лою упраздни́сте, апо́столи.

Богоро́дичен: Кре́пость моя́, Пречи́стая, и прибе́жище,/ и необори́мая стена́, и к Бо́гу Моли́твенница су́щи,/ ве́чнаго мя пла́мене и гее́нны свободи́.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Истука́нныя низложи́ша и хра́мы и́дольския, сла́внии,/ созида́юще благода́тию, я́коже ски́нию, па́дшую преступле́ньми, сердца́ челове́ков,/ я́ко Богопропове́дницы.

Мо́ре, ко́ни пресла́внии вои́стинну су́ще Бо́жии, безбо́жия возмути́вше,/ потопля́емыя в нем пе́рвее/ пропове́данием Боже́ственным оживи́сте.

Посеща́еми от Бо́га, Боже́ственными посеще́нии ва́шими/ в боле́зни су́щия идолонеи́стовства и потопля́ющияся спасо́сте,/ спаси́тели нам бы́вше.

Богоро́дичен: Свяще́нно свяще́нный дре́вле Иса́ия,/ просве́щся Ду́хом Боже́ственным, возопи́:/ се Де́ва прии́мет воплоща́ема Бо́га, за милосе́рдие необъя́тнаго.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Прему́дрый Трофи́м, и Ариста́рх вку́пе, и Пуд чу́дный,/ я́ко ученицы́ Сло́ва и свяще́ннии Па́влу спу́тницы,/ свяще́нными пе́сньми да восхва́лятся.

Вод испо́лнены Ду́ха, прему́дрии, я́ко вои́стинну су́ще,/ вся́ку ду́шу напои́сте уче́ния,/ от среды́ изъе́мше пла́мене преле́стнаго Боже́ственною благода́тию.

Соедине́ни Ду́хом, разлуче́ния никоего́же име́сте телесе́м:/ вку́пе бо во главы́ с Па́влом пропове́дником усе́чени бы́сте,/ с ним и прославля́еми.

Богоро́дичен: Стра́нно Твое́ зача́тие,/ стра́нно, Отрокови́це, и стра́шно е́же па́че ума́ Твое́ рождество́,/ устра́ншияся дре́вле от Бо́га, Тому́ примиря́ющи/ и добро́ту пе́рвую воздаю́щи.

Конда́к, глас 4.

Подо́бен: Яви́лся еси́ днесь:

Яви́ся апо́стольский честны́й сей пра́здник,/ просвеща́я нас и грехо́вную мглу прогоня́я, зову́щим:/ яви́ся Свет, и прии́де избавле́ние.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Нече́стия угаси́сте пещь ту́чами честна́го пропове́дания,/ я́ко апо́столи и я́ко Боже́ственнии су́щи страда́льцы,/ крове́й то́ками и́дольскую вещь попали́сте, му́дрии,/ те́мже сла́вими есте́.

Двуна́десяти ученико́в яви́стеся втори́и ученицы́ Христо́вы, сла́внии,/ с Па́влом бо проше́дше всю зе́млю, беды́ подъя́сте мно́ги/ и с ним свяще́нную кончи́ну прия́сте.

Украси́стеся кра́сными ва́шими ра́нами, Ариста́рше и Трофи́ме,/ просвети́стеся па́че вся́каго, сла́внии, зла́та с Пу́дом свяще́нным вои́стинну,/ о нас всегда́ моля́ще Христа́.

Богоро́дичен: Блаже́нна от Свята́го яви́лася еси́ Ду́ха, Сове́та Вели́каго А́нгела вопло́щши,/ Сего́ Боже́ственныя ученики́, в мир я́ко Боже́ственныя мо́лния посла́вша, Чи́стая,/ просвети́ти ве́рныя.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Посека́юще коре́ния безбо́жия серпо́м Боже́ственным, насади́сте ве́ру и́стинную/ и соверше́н ра́зум во благочести́вых сердца́х, Богогла́снии.

Сло́вом Боже́ственным сердца́ обнови́сте/ и, ра́зума се́мя се́явше, клас, му́дрии, многопло́ден пожа́сте,/ спасе́нных, апо́столи, мно́жество.

Непрекло́ннии столпи́ Це́ркве Христо́вы,/ виногра́да Боже́ственнаго Боже́ственное гро́здие, сла́дость жи́зни иска́пающе,/ Ариста́рх, и Пуд, и Трофи́м да почту́тся.

Богоро́дичен: Сокру́шшееся, Де́во, челове́чество обнови́ла еси́ все но́вым рождество́м Твои́м,/ естества́ соу́зы па́че естества́ обно́вльши,/ Обра́дованная, Бо́га Жива́го Ма́ти.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и/ Тя ублажа́ем.

Кре́пость отъя́та бысть го́рдаго, паде́ же возноси́мое его́ шата́ние,/ не́мощию бо плотско́ю святи́и сему́ спле́тшеся,/ победи́ша, и погуби́ша, и мучи́тельства его́ ве́рныя изба́виша.

Я́коже персть, пре́лести истни́вше, неле́стни челове́ком наста́вницы яви́стеся/ и А́нгелом согра́ждане бы́сте, воспева́юще с ни́ми:/ Свят, Свят, Свят Оте́ц, и Сын, и Дух Святы́й.

Плотски́я исцеля́юще неду́ги и душе́вныя, апо́столи Госпо́дни, боле́зни/ и творя́ще ди́вная чудеса́,/ вся, и́же в неразу́мии, привлеко́сте к ра́зуму све́та и́стиннаго,/ те́мже блажи́ми есте́.

Ума́ невеще́ственнаго ны́не наслажда́етеся, на Небесе́х пра́зднующаго, апо́столи,/ блаже́нное упова́ние прие́мше,/ Трофи́ме Богопропове́дниче, Пу́де всеизря́дне, сла́вный Ариста́рше,/ о нас воспомина́ние твори́те.

Богоро́дичен: Пла́мене гее́нскаго мя свободи́, Я́же па́че ума́ Огнь ро́ждши нестерпи́мый,/ и ду́шу мою́ к любви́ возжзи́, Пречи́стая,/ Прише́дшаго огнь ра́зума, Отрокови́це, на зе́млю воврещи́, Богора́дованная.