НА ВЕЧЕ́РНИ:

Стихи́ры, глас 4.

Подо́бен: Я́ко до́бля:

Многоимени́тно сочета́ние/ многоразли́чныя му́ки/ страда́лец претерпе́ тве́рдо/ и ко еди́ному Бо́гу на́шему/ пре́йде, ра́дуяся,/ со тьма́ми свяще́нных Безпло́тных сил весели́тся,/ я́ко зми́евы мно́гия ты́сящи победи́ша/ противле́нием тве́рдым и Ду́ха благода́тию.

Пресла́вный Макси́м/ и вели́кий Тере́нтий,/ Помпии́й прему́дрый,/ Мака́рий и Африка́н Боже́ственный/ да почту́тся пе́сньми,/ с ни́ми и про́чее му́ченик сосло́вие,/ и́же кро́вию свое́ю Вы́шнее Ца́рство купи́ша,/ сла́вы непрее́мныя исполня́еми.

Ни глад, ниже́ беда́,/ ни живо́т, ниже́ смерть,/ любве́, сла́внии, Сотво́ршаго/ вас разлучи́ти возмого́ша./ Те́мже насле́довасте Ца́рство Небе́сное,/ и сла́дость неизживу́щую,/ и не иму́щее конца́ весе́лие,/ но испроси́те и нам/ благопода́тно очище́ние и ми́лость.

Сла́ва, и ны́не, Богоро́дичен:

Я́же Бо́га невмести́маго/ во чре́ве Твое́м вмести́вшая,/ человеколю́бно Челове́ка бы́вша,/ и на́ше смеше́ние из Тебе́ прии́мша,/ и обожи́вша я́ве,/ не пре́зри мене́, Всечи́стая, ны́не скорбя́ща,/ но уще́дри ско́ро/ и разли́чныя вражды́ же и вре́да лука́ваго свободи́.

Крестобогоро́дичен:

А́гнца, и Па́стыря, Тя/ на Дре́ве я́ко ви́де/ А́гница ро́ждшая, рыда́ше/ и ма́терски Тебе́ веща́ше:/ Сы́не возжеле́нне,/ ка́ко на Дре́ве Кре́стнем пове́шен еси́, Долготерпели́ве?/ Ка́ко ру́це и но́зе Твои́, Сло́ве,/ пригвозди́шася от беззако́нных,/ и кровь Твою́ излия́л еси́, Влады́ко?

Кано́н, его́же краегране́сие: Мно́жество мя спаси́ добропобе́дных му́чеников. Творе́ние Ио́сифа. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Мно́жество страда́лец сла́вных,/ Христа́ умоли́те, мно́жество иму́щаго щедро́т,/ мно́жества ума́лити зол мои́х,/ я́ко да восхваля́ю ва́ше торжество́.

Служа́ще живо́му и и́стинному Бо́гу, страстоно́сцы,/ безду́шным че́сти бого́м ника́коже принесо́сте/ и жива́я Жизнода́вцу же́ртва принесо́стеся.

Пропове́даша безбо́жнии повеле́ние богоме́рзкое,/ и посреди́ суди́ща четы́редесять страда́лец пропове́даша Сло́во воплоще́нное,/ безслове́сия мир изба́вльшее.

Богоро́дичен: Пою́ Тя, Де́во, я́ко Бо́га, Всепе́тая,/ воплоти́ла еси́ еди́на от Твои́х честны́х крове́й, Пресвята́я,/ и па́че сло́ва стра́шно породила́ еси́.

Песнь 3

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Усты́ пропове́даша свяще́нными свои́ми Го́спода страда́льцы пред мучи́тели,/ стра́ждуще терпели́вно.

На у́ды ссещи́ся за Христа́ я́ве преда́шася страда́льцы,/ стра́стию разжже́нием Того́ возлюби́вше.

Разреши́ша соу́з суеты́ свя́заннии за Христа́,/ и́же с Боже́ственным бы́вше Тере́нтием.

Богоро́дичен: Спаси́ мя, ро́ждшая Преблага́го Го́спода Ма́ти Чи́стая,/ утиши́ души́ моея́ многомяте́жную бу́рю.

Седа́лен, глас 4.

Подо́бен: Вознесы́йся:

Четы́редесять Христо́вы страстоте́рпцы,/ си́лою Христо́вою вооруже́ни,/ бесо́вския полки́ низложи́вше ве́рою,/ уме́рше же, к безсме́ртному концу́, ра́дующеся, преидо́ша/ и нам испроша́ют прегреше́ний оставле́ние,/ при́сно творя́щим тех торжество́.

Сла́ва, и ны́не, Богоро́дичен:

Грехолюби́в сый, молю́ Тя, Безгре́шнаго Бо́га ро́ждшую,/ взе́млющаго грехи́ ми́ра, Пречи́стая,/ многогре́шную ду́шу мою́ уще́дрити и грехи́ моя́ мно́гия очи́стити:/ гре́шным бо Ты еси́ очище́ние,/ и спасе́ние ве́рных, и заступле́ние.

Крестобогоро́дичен:

И́же от Безнача́льнаго Отца рожде́ннаго напосле́док Тя пло́тию ро́ждшая,/ на Кресте́ ви́сяща, зря́щи, Христе́, – увы́ Мне, любе́знейший Иису́се, – вопия́ше, –/ ка́ко сла́вимый я́ко Бог от А́нгел,/ от беззако́нных ны́не челове́к, Сы́не, хотя́, распина́ешися?/ Пою́ Тя, Долготерпели́ве.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Украси́стеся, му́ченицы, вдая́нием боле́зней,/ сия́юще па́че сапфи́ра и зла́та тве́рдых подвиго́в показа́ньми.

Живоно́сное де́йство от Живонача́льныя Тро́ицы прие́мше,/ вся́ку боле́знь, вся́ку ме́ртвость душ и теле́с отго́ните.

Не отве́ржемся Го́спода/ и де́моном безу́мным не пожре́м, – Богому́дрии вопия́ху,/ истязу́еми боле́зньми и му́ками.

Богоро́дичен: Тя, Всенепоро́чная Влады́чице,/ напа́стьми обстои́м, на по́мощь призыва́ю:/ ускори́ и спаси́ мя, Я́же Спа́са Сло́ва ро́ждшая.

Песнь 5

Ирмо́с: У́тренююще вопие́м Ти,/ Го́споди: спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Низложи́сте пре́лести тве́рдость, страстоте́рпцы,/ растерза́ньми терпе́ния, всехва́льнии.

Крове́й тече́ньми изсуши́вше пре́лести глубину́, блаже́ннии,/ вся́ку ду́шу напои́сте.

Па́жить многоцве́тна показа́стеся,/ благово́ние Свята́го Ду́ха, Боже́ственнии, испуща́юще, му́ченицы.

Богоро́дичен: Избавля́я, яви́ся, Пречи́стая, Сын Твой, род челове́ческий,/ из Тебе́ ро́ждься Человеколю́бец.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Кре́постию Твое́ю, Иису́се, утвержде́ни, низложи́ша вра́жию си́лу/ и си́льни яви́шася вои́стинну, не́мощию плотско́ю бра́вшеся и пове́ргше кре́пкаго, честни́и и добропобе́днии му́ченицы.

Победи́в многообра́знаго зми́я,/ и сего́ нога́ми твои́ми сокруши́л еси́ я́ко вои́стинну главу́,/ победоно́сен на верх твой вене́ц прия́л еси́, Тере́нтие, му́чениче Христо́в,/ святы́х А́нгел соприча́стниче.

Цельбы́ ра́ка му́ченик источа́ет, и стра́сти очища́ет,/ и душ омыва́ет скве́рну, и де́монов погружа́ет полки́,/ всех же благочести́вых сердца́ напая́ет благода́тию.

Богоро́дичен: Присе́нну прозря́ше Тя го́ру проро́к Авваку́м, Богоро́дице,/ из нея́же Бог па́че сло́ва про́йде, воплоща́емь,/ и мир спасе́, бу́рею лю́таго греха́ тя́жко одержи́мый.

Конда́к, глас 2.

Подо́бен: В моли́твах:

Му́ченическая честна́я па́мять прии́де днесь,/ веселя́щи вся́ческая,/ Тере́нтия прему́драго и дружи́ны его́./ Те́мже у́бо стеце́мся, да прии́мем исцеле́ния,/ си́и бо благода́ть от Бо́га прия́ша Ду́ха Свята́го/ исцеля́ти неду́ги душ на́ших.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

У́ши, благопослушли́вы к Боже́ственному исполне́нию,/ Боже́ственная повеле́ния стяжа́вше, му́дрии, поя́сте преусе́рдно:/ благослове́н еси́, Го́споди Бо́же, во ве́ки.

Зако́ны, Боже́ственныя страстоте́рпцы, противоположи́сте повеле́нием беззако́нных,/ веля́щих Христа́ отврещи́ся,/ Ему́же вопие́м:/ благослове́н еси́, Го́споди Бо́же, во ве́ки.

Удеса́ ка́знем отда́вше, отверго́стеся те́ла/ любве́ ра́ди я́вльшагося на земли́ и плоть взе́мша,/ Ему́же песнопое́те, му́ченицы:/ Бо́же, благослове́н еси́.

Богоро́дичен: Истле́вшия дре́вле родонача́льники преступле́нием безме́стнаго согреше́ния,/ во утро́бе Христа́ неизрече́нно заче́нши,/ исправля́еши, Пренепоро́чная, Плодо́м чре́ва Твоего́.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

На суди́щи мучи́тельстем, Богому́дрый Тере́нтий и Африка́н,/ Макси́м же и Помпии́й,/ Алекса́ндр, и Зифо́н, и сла́вный Фео́дор,/ вку́пе трегу́бицею спострада́вшая десяти́ца и трегу́бица еди́ницы,/ Спа́са всех Христа́ испове́давше, до́блественно пострада́ша.

За Христа́ му́чими, и волу́ями жи́лами бие́ми,/ и неми́лостивно страда́льцы стру́жеми,/ трезу́бцы сре́чеми, и звере́м поверга́еми,/ и разжже́нными рожны́ в ре́бра опаля́еми, вопия́ху:/ свяще́нницы, благослови́те, лю́дие, превозноси́те Его́ во ве́ки.

Глаго́л жи́зни нося́ще,/ добропобе́днии му́ченицы умерщвле́нныя в пре́лести спасо́ша, враги́ умори́ша/ и, Христо́ву смерть и светоза́рныя изобража́юще стра́сти,/ му́ками многообра́зными блаже́нную кончи́ну прия́ша,/ пою́ще Его́ во вся ве́ки.

Богоро́дичен: Умерщвле́нную оживи́, па́дшую возста́ви,/ уя́звенную ду́шу мою́ исцели́/ копие́м, Всенепоро́чная, пробо́дшим Боже́ственная ре́бра/ из утро́бы Твоея́ вопло́щшагося Спа́са,/ Его́же о́т роды благословя́т, свяще́нницы пою́т,/ лю́дие превозно́сят во вся ве́ки.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к:/ те́мже Пречи́стую Богоро́дицу, ве́рнии, велича́ем.

Целе́ние точи́т ра́ка му́ченик,/ от исто́чника Боже́ственнаго Ду́ха напая́ема при́сно./ Преусе́рдно, прииди́те, почерпе́м, те́ло, се́рдце и ду́шу освяща́юще/ и Спа́са Христа́ велича́юще ве́рно, мучениколю́бцы.

Я́ко цве́ти Боже́ственнаго села́,/ я́коже шипцы́ та́йнии, процвето́сте/ и благово́ния честна́го Це́рковь напо́лнисте,/ пре́лесть злосмра́дную вра́жию дале́че отгна́вше/ Боже́ственною благода́тию, му́ченицы Христо́вы четы́редесяте.

Днесь Макси́ма, ве́рнии,/ и Алекса́ндра вку́пе, и Фео́дора,/ Зифо́на и Помпии́я,/ Африка́на же и Тере́нтия/ с про́чими страда́льцы ве́рно восхва́лим и ублажи́м,/ воспева́юще тех по́двиги.

Земля́ у́бо кровь ва́шу и телеса́ пострада́вшая в себе́ прия́т,/ Не́бо же – Боже́ственныя ду́хи,/ А́нгельская во́инства, че́стно собра́вшеся в побе́де, му́дрии,/ и Христо́с я́ко победи́тели венча́.

Богоро́дичен: Просвети́, две́ре све́та, ду́шу мою́,/ лю́тыми помраче́нную преступле́ньми,/ омраче́нную и бе́дствующую,/ и дне прича́стника Боже́ственнаго покажи́,/ я́ко да сла́влю Тя, Предста́тельницу ве́рных непосты́дную.

Тропа́рь, глас 8:

Благослове́н еси́, Христе́ Бо́же наш,/ укрепи́вый Боже́ственнаго патриа́рха,/ низпосла́вый тому́ свы́ше Свою́ благода́ть,/ и́мже и нас свободи́л еси́ от рабо́ты вра́жия,/ Человеколю́бче, сла́ва Тебе́.

Ин тропа́рь, глас 7:

Святи́телю и му́чениче Григо́рие,/ за лю́ди твоя́ ду́шу положи́вый/ и в светоно́сный день Христо́ва Воскресе́ния пострада́вый,/ моли́ся Страда́вшему за ны и Воскре́сшему/ Це́рковь Правосла́вную незы́блему всегда́ храни́ти,/ па́стве же твоей и Ру́сстей земле́, святы́я мо́щи твоя́ с любо́вию ле́та мно́га храни́вшей,/ дарова́ти мир и ве́лию ми́лость.