НА ВЕЧЕ́РНИ:

Стихи́ры, глас 4.

Подо́бен: Я́ко до́бля:

Орли́ я́ко крила́ти,/ всю зе́млю претеко́сте,/ честна́я уче́ния разсева́юще,/ и пле́велы истерза́юще ле́сти благода́тию,/ и многокла́сен плод де́лающе, всехва́льнии,/ его́же держа́т мы́сленныя жи́тницы во ве́ки,/ Де́лателю безсме́ртному бога́тно соблю́даемь.

Иродио́на, Ага́ва и Асинкри́та,/ Ру́фа же и Боже́ственнаго Фле́гонта ублажи́м,/ Лозы́ су́ще плодови́тыя ро́зги,/ иска́пающа нам сла́дость спаси́тельную,/ веселя́щу жа́ждущая сердца́/ ве́рою и́стинною/ Боже́ственное сих соверша́ющих торжество́.

Небеса́ бы́вше, высока́ мы́слию,/ сла́ву возвеща́юще Бо́га на́шего,/ вопло́щшагося во́лею, Богови́дцы апо́столи,/ наста́вницы благочести́вых,/ це́рквей основа́ния,/ столпи́ непоколеби́мии,/ благоче́стия приста́нища,/ неизглаго́ланных та́ин служи́теле,/ световоди́теле душ на́ших.

Сла́ва, и ны́не, Богоро́дичен:

Я́же Бо́га Невмести́маго/ во чре́ве Твое́м вмести́вшая,/ человеколю́бно Челове́ка бы́вша,/ и на́ше смеше́ние из Тебе́ прии́мша,/ и обожи́вша я́ве,/ не пре́зри мене́, Всечи́стая, ны́не скорбя́ща,/ но уще́дри ско́ро/ и разли́чныя вражды́ же/ и вре́да лука́ваго свободи́.

Крестобогоро́дичен:

На Кресте́ Тя я́ко узре́/ пригвожде́нна, Го́споди,/ А́гница и Ма́ти Твоя́ дивля́шеся/ и – что́ виде́ние сие́,– взыва́ше,–/ Сы́не вожделе́нне?/ Сия́ Тебе́ неве́рный собо́р воздаде́ беззако́нный,/ и́же мно́гих Твои́х чуде́с наслади́выйся./ Но сла́ва неизглаго́ланному/ соше́ствию Твоему́, Влады́ко.

Кано́н, его́же краегране́сие: Апо́столом исплете́м Боже́ственную песнь. Творе́ние Ио́сифово. Глас 3.

Песнь 1

Ирмо́с: Во́ды дре́вле/ ма́нием Боже́ственным/ во еди́но со́нмище совокупи́вый/ и раздели́вый мо́ре изра́ильтеским лю́дем,/ сей Бог наш препросла́влен есть,/ Тому́ еди́ному пои́м, я́ко просла́вися.

Апо́столов святы́х всесвяту́ю согла́сно торжеству́им па́мять/ и ты́я воспои́м весе́лием души́:/ Пресвято́е бо мо́лят Сло́во очище́ние дарова́ти нам и ми́лость.

Многобо́жнаго неи́стовства согни́тие отгна́вше сло́ва со́лию Боже́ственнаго,/ ду́ши, сла́внии, обуя́вшия дре́вле вся, уздра́висте/ и спасе́ны Зижди́телю всех предста́висте:/ тем и прославля́етеся.

Сла́вный Иродио́н, Руф, и Фле́гонт, и Ага́в,/ и Асинкри́т, вку́пе и Ерм пе́сньми да ублажа́тся,/ бли́жнии бы́вше Изба́вителя на́шего дру́зи,/ и му́дрии апо́столи,/ и Боже́ственнии пропове́дницы.

Богоро́дичен: Ми́лостивая Богоро́дице, апо́столов похвало́,/ и страстоте́рпцев сла́ва, и ве́рных утвержде́ние,/ утверди́, молю́ся, претворя́емый наве́ты лестца́ ум мой,/ помраче́нный преступле́ньми.

Песнь 3

Ирмо́с: И́же от не су́щих вся приведы́й,/ сло́вом созида́емая,/ соверша́емая Ду́хом,/ Вседержи́телю Вы́шний,/ в любви́ Твое́й утверди́ мене́.

Церко́вная бы́вше очеса́,/ мно́гим отверзо́сте о́чи ви́дети добро́ту недомы́сленную,/ Богови́днии ученицы́ Боже́ственнаго Сло́ва.

Дом Тро́ицы показа́лся еси́ светови́ден, Ру́фе пресла́вне,/ и сло́вом благода́ти тре́бища низве́ргл еси́,/ и созда́л еси́ Го́споду Це́ркви.

Сло́вом твои́м Боже́ственным обнови́в, Ру́фе му́дре, сердца́,/ насе́яв спаси́тельная уче́ния, и многопло́ден клас спа́сшихся пожа́л еси́ спасе́ние.

Богоро́дичен: По Существу́ Сый Боже́ственному непристу́пен, Пречи́стая,/ присту́пен мне ны́не бысть/ и пло́ти прия́тием весь соедини́ся кра́йняго ра́ди благоутро́бия.

Седа́лен, глас 4.

Подо́бен: Вознесы́йся:

Научи́вшеся от исто́чника прему́дрости,/ умудри́сте пре́жде неразу́мием служа́щия умовре́дно истука́нным, му́дрии./ Те́мже блажи́ми есте́ в век ве́ка, престо́лу предстоя́ще Святы́я Тро́ицы,/ но приле́жно моли́теся обрести́ разреше́ние прегреше́ний на́ших, пресла́внии.

Сла́ва, и ны́не, Богоро́дичен:

По Бо́зе во Твой, Богоро́дице, прибега́ю смире́нный покро́в Боже́ственный, припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, му́ки, и трепе́щу./ Моле́ние сотвори́, Чи́стая, к Сы́ну Твоему́ от сих изба́вити мя.

Крестобогоро́дичен:

И́же от Безнача́льнаго Отца́ рожде́ннаго напосле́док Тя пло́тию ро́ждшая,/ на Кресте́ ви́сяща, зря́щи, Христе́, – увы́ Мне, любе́знейший Иису́се,– вопия́ше,–/ ка́ко сла́вимый я́ко Бог от А́нгел,/ от беззако́нных ны́не челове́к, Сы́не, хотя́, распина́ешися?/ Пою́ Тя, Долготерпели́ве.

Песнь 4

Ирмо́с: Положи́л еси́ к нам тве́рдую любо́вь, Го́споди,/ Единоро́днаго бо Твоего́ Сы́на за ны на смерть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди.

Врачева́ние ве́рным язы́ком Боже́ственное принося́ще,/ зе́млю нече́стия лука́вную, разоре́нию, му́дрии, преда́сте и созда́сте ду́ши в ве́ре,/ сего́ ра́ди ублажа́етеся.

В си́лу тобо́ю, Иродио́не блаже́нне, облече́ся град Па́трский преявле́нно:/ пе́рвый бо ты престо́л украси́л еси́,/ Боже́ственными просвеща́емь светоли́тии Свята́го Ду́ха.

Град Па́трский граждани́ном тобо́ю вели́ким обогати́ся,/ блаже́нне Иродио́не, вои́стинну,/ к Сио́ну вы́шнему приводя́щим сий в пра́вду,/ те́мже почита́ет тя Боже́ственными песнопе́ньми.

Богоро́дичен: Сло́вом свяще́нным О́тчее Сло́во зачала́ еси́,/ вся́каго безслове́сия челове́ки, Богороди́тельнице Де́во, избавля́юща./ Те́мже словесы́ всегда́ велегла́сно Боже́ственными Тя сла́вим.

Песнь 5

Ирмо́с: На земли́ неви́димый яви́лся еси́/ и челове́ком во́лею сожи́л еси́, Непостижи́мый,/ и, к Тебе́ у́тренююще,/ воспева́ем Тя, Человеколю́бче.

На зе́млю прише́дша, е́же спасти́ заблу́ждшаго,/ пропове́дасте Сло́во, Боже́ственнии апо́столи,/ и от ле́сти вся челове́ки изба́висте.

Странноле́пно проро́чествия тебе́ благода́ть/ от Бо́га излия́ся бога́тно, Богому́дре Ага́ве,/ провозглаша́еши бо сказа́ние хотя́щих бы́ти явле́нно.

Яви́лся еси́ иногда́, прозна́менуя Па́влу/ наве́ты, и у́зы, и озлобле́ния, проро́че Ага́ве,/ егда́ ру́ки твоя́ о́наго по́ясом связа́л еси́.

Богоро́дичен: Еди́на на земли́ рождество́ име́ла еси́ стра́нно,/ еди́нех нас примиря́ющи еди́ному Пребезнача́льному Отцу́./ Сего́ ра́ди еди́ну Тя, я́ко Ма́терь Бо́га, чтим.

Песнь 6

Ирмо́с: Бе́здна после́дняя грехо́в обы́де мя,/ и исчеза́ет дух мой,/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́.

Положи́, свещи́ я́ко светоза́рны, вас Сло́во, вселе́нную просвеща́ющия,/ и тьму реша́щия, Богови́дцы апо́столи,/ и показу́ющия путь спаси́тельный.

Ме́ртвость пропове́дуя Безсме́ртнаго,/ умерщвле́нных к Животу́ преставля́ше му́дрый Асинкри́т,/ апо́столов похвала́, Ирка́нии же тве́рдое огражде́ние.

Обре́те тя, Асинкри́те, реку́, вод испо́лнену Ирка́ния Ду́ха,/ и, честны́ми напое́нии твои́ми напои́вшися,/ принесе́ красне́йшая Влады́це прозябе́ния.

Богоро́дичен: Зако́на Тя образова́ше киво́т,/ прие́мшую зако́на Боже́ственнаго исполне́ние,/ и пло́тию ро́ждшую, и по рождестве́ пребы́вшую Присноде́ву,/ я́ко пре́жде рождества́, Богоневе́сто.

Конда́к, глас 2.

Подо́бен: Вы́шних ища́:

Яви́стеся Христо́вы ученицы́ и апо́столи всечестни́и,/ Иродио́не сла́вне, Ага́ве и Ру́фе,/ Асинкри́те, Фле́гонте со Е́рмом,/ при́сно моли́теся Го́сподеви/ пода́ти нам согреше́ний проще́ние, пою́щим вас.

Песнь 7

Ирмо́с: Пре́жде о́бразу злато́му,/ перси́дскому чти́лищу,/ о́троки не поклони́шася трие́,/ пою́ще посреде́ пе́щи:/ отце́в Бо́же, благослове́н еси́.

Основа́вше до́бре на ка́мени ве́ры язы́ков исполне́ния,/ ка́мение дре́вле чту́щия всу́е/ просвети́сте я́ве, Богоглаго́ливии.

Попали́л еси́, Фле́гонте свяще́нне,/ огне́м Боже́ственных слове́с твои́х вся́ко ле́стное те́рние/ и сердца́, окая́нно уга́сшая,/ теплото́ю Ду́ха вжегл еси́ явле́нно.

Марафо́нстии жи́тели, предста́теля тя велича́йша, и учи́теля изря́дна,/ и свети́льника, и наста́вника иму́ще, Фле́гонте сла́вне,/ почита́ют тя непреста́нно.

Богоро́дичен: Нов рай нам, жи́зни дре́во, Чи́стая, стяжа́вши, была́ еси́,/ его́же снедь сне́дию умерщвле́нныя оживи́,/ Чи́стая Богороди́тельнице.

Песнь 8

Ирмо́с: Вавило́нская пещь о́троки не опали́,/ ниже́ Божества́ Огнь Де́ву растли́./ Тем со о́троки, ве́рнии, возопие́м:/ благослови́те, дела́ Госпо́дня, Го́спода.

Да ублажи́тся Ага́в, Фле́гонт и Асинкри́т, Руф и Ерм сла́вный и Иродио́н днесь,/ Сло́ва бы́вше Боже́ственнии апо́столи, и свети́ла ми́ра,/ и язы́ков учи́телие.

Ерм пресла́вный Далма́тии бысть всея́ наста́вник и просвеще́ние:/ на сию́ бо, я́ко со́лнце многосве́тло, на́йде,/ творя́ ди́вная и просвеща́я сердца́, неви́дящая пе́рвее.

Сло́во, я́ко свети́льник сия́ющ, Е́рме, нося́, сла́вне,/ су́щия в нощи́ лю́тых седя́щия просвети́л еси́,/ исцеле́ния и зна́мения творя́ вели́ка,/ привле́кл еси́ к ве́ре неве́рных исполне́ние.

Богоро́дичен: Тя предста́тельство и́мамы, Пречи́стая, раби́ Твои́,/ и к Сы́ну Твоему́ и Бо́гу Хода́таицу непосты́дну,/ от бед ны спаси́ и лю́тых напа́стей,/ да ве́рою и любо́вию при́сно Тя сла́вим.

Песнь 9

Ирмо́с: Купино́ю и огне́м пропи́санную/ в Сина́и законополо́жнику Моисе́ю/ и Бо́жий во чре́ве неопа́льно заче́ншую Огнь,/ всесве́тлую и негаси́мую свещу́,/ су́щую Богоро́дицу пе́сньми, чту́ще, велича́ем.

Свяще́ннейший лик соста́вим ве́рно,/ единомышле́нием души́ блажа́ще те́пло Е́рма и Иродио́на, Ру́фа, Ага́ва,/ Асинкри́та же вели́каго и Фле́гонта Боже́ственнаго,/ я́ко Сло́ва самови́дцы бы́вшия.

Я́ко ма́слины та́йныя явле́ни вои́стинну, Богоглаго́ливии,/ на́ша умасти́ша ду́ши и ли́ца благода́тию/ и изба́виша от безбо́жнаго наси́лия и тьмы неразу́мия./ Те́мже и досто́йно ублажа́ются.

Стена́ний ны мно́гих, и рабо́ты вра́жия,/ и ве́тхаго запина́теля изба́висте, му́дрии Изба́вителевы апо́столи,/ и показа́сте стези́, веду́щия Боже́ственною наде́ждею к Ца́рству Небе́сному.

Шестосве́тная свеще́ святы́х учени́к,/ моли́ приле́жно Трисо́лнечную Зарю́ просвети́ти ду́ши на́ша,/ всесве́тлую соверша́ющих ва́шу па́мять,/ и изба́вити от тьмы и ве́чнаго осужде́ния.

Богоро́дичен: Я́коже пламеноно́сная клеща́, прия́ла еси́ во утро́бе угль разу́мный,/ попаля́ющ на́ша стра́сти, и просвеща́ющ ду́ши на́ша,/ и реша́щ тьму идолонеи́стовства, Чи́стая Де́во многопе́тая.

ВЕ́ЧЕР

На Го́споди, воззва́х: стихи́ры, глас 4.

Подо́бен: Я́ко до́бля:

Святи́телем удобре́ние/ и ревни́теля благоче́стия/ пе́сньми днесь, лю́дие, почти́м,/ любо́вию похва́льныя венцы́ плету́ще/ и кла́няющеся ра́це моще́й достоблаже́ннаго отца́,/ моле́бными гла́сы воззове́м:/ свя́те иера́рше Христо́в Ни́фонте,/ я́ко име́я дерзнове́ние к Бо́гу,/ не забу́ди, приле́жно моля́ся,/ предста́тельствовати о ста́де твое́м вы́ну.

Язы́к медото́чных твои́х усте́н,/ святи́телю преблаже́нне Ни́фонте,/ трость Ду́ха Свята́го су́щи,/ низложи́ горды́ню тя ненави́дящих,/ и ны́не горды́нею на ста́до твое́ востаю́щия посрами́ враги́/ и нас, во правосла́вных догма́тех укрепля́я,/ заступле́нием твои́м спаси́,/ я́ко да от чи́стыя со́вести/ любо́вию прино́сим о тебе́ Бо́гу хвале́ние.

Озаре́н све́том Бо́жия благода́ти,/ просия́л еси́, я́коже со́лнце, в ми́ре/ и луча́ми твои́х доброде́телей/ просвети́л еси́ мно́гия страны́,/ те́мже, указа́нием от е́же свы́ше,/ избра́н был еси́, преподо́бне,/ от всех согла́сно па́стырь слове́сному ста́ду,/ о не́мже и по отше́ствии твое́м моли́ся приле́жно,/ сохрани́тися от враго́в ненаве́тованну.

Сла́ва, глас 2:

Прииди́те, новгоро́дстии правосла́вных собо́ри,/ торжество́ днесь в ле́тней па́мяти преблаже́ннаго отца́/ любо́вию с на́ми соста́вльше,/ дади́м сла́ву Изба́вителю Бо́гу,/ я́ко даде́ нам па́стыря, и учи́теля,/ и моли́твенника о душа́х на́ших.

И ны́не, Богоро́дичен или́ Крестобогоро́дичен.

На стихо́вне, в Трио́ди.

Сла́ва, глас 4:

Храм Ду́ху Свято́му се́рдце свое́ устроя́я,/ хра́мы моли́твенныя ко умноже́нию сла́вы Бо́жия воздви́гнул еси́,/ я́же боголе́пно предукра́сив,/ слове́сныя своя́ о́вцы а́ки в Небе́сную огра́ду собира́л еси́/ и предлага́л им па́жить сла́дкаго и Богодухнове́ннаго твоего́ уче́ния,/ наставля́я и вразумля́я на путь благоче́стия и спасе́ния,/ нань же и нас моли́твами твои́ми наста́ви,/ преподо́бне о́тче,/ я́ко да всегда́ прославля́ем Еди́наго Бо́га/ и Спа́са душ на́ших.

И ны́не, Богоро́дичен или́ Крестобогоро́дичен.

Тропа́рь, глас 3:

Я́ко сый нра́вом правосла́вных/ Восто́чныя Це́ркве преда́ний и́стинный защи́тник,/ сподо́бился еси́ вели́каго во отце́х Феодо́сия/ ви́дети по сме́рти, я́ко жи́ва,/ возвеща́юща тебе́ Ца́рствия Небе́снаго насле́дие,/ его́же неизрече́нных добро́т/ ны́не с ним неразлу́чно наслажда́яся,/ моли́ и о нас, ча́дех свои́х, Ни́фонте прехва́льне.

Сла́ва, и ны́не, Богоро́дичен.

НА У́ТРЕНИ

Кано́н святи́телю, глас 1.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая проти́вныя сотре́,/ изра́ильтяном путь глубины́ новосоде́лавшая.

Твоя́ десни́ца, Христе́ мой,/ да наста́вит мя в дне́шний день пе́ти па́мять уго́дника Твоего́,/ стира́я запина́ющия ми враги́/ и путь, страстьми́ обветша́вший, во утро́бе мое́й обновля́я.

Благода́ть Паракли́та Твоего́ посла́в, Христе́, рабу́ Твоему́,/ призва́л еси́ в след Тебе́ тещи́:/ и́же а́бие отве́ржеся ми́ра и возлюби́ зако́н Твой,/ путь в любви́ Твое́й обновля́ющ.

Твое́ю мы́шцею наста́влен преподо́бный Твой, Го́споди,/ прии́де к безбу́рному приста́нищу/ в пречестну́ю Ма́тере Твоея́ Пече́рскую оби́тель,/ и бысть и́нок, и́ночествуя доброде́тельными нра́вы.

Просия́ дале́че доброде́тель твоя́, о́тче,/ ю́же ви́дяще, мно́зи велича́ху тя,/ и прославля́ху Небе́снаго Отца́, да́вшаго тебе́ благода́ть сицеву́ю,/ ея́же и мы да не лиши́мся твои́ми, о́тче, исправле́нии.

Богоро́дичен: Бу́ди ми Руководи́тельница, Богоневе́стная Де́во,/ руководя́щи на спасе́нную стезю́,/ и ду́шу мою́, страстьми́ обветша́вшую, обновля́ющи, Мари́е, Твои́ми щедро́тами.

Песнь 3

Ирмо́с: Еди́не, ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Человеколю́бче.

Еди́н путь прав ви́дя ве́рный раб Твой,/ е́же прия́ти в жи́зни сей Крест Твой/ и Тебе́, Влады́це своему́, после́довати,/ а́бие к Тому́ спе́шно поте́кл есть,/ тем ны́не неизрече́нныя сла́вы Твоея́ насыща́ется, Человеколю́бче.

Еди́ному Бо́гу от чи́стаго се́рдца моли́твы твоя́ непреста́нно возсыла́я,/ немощна́го врага́ ко́зни разруши́л еси́, уби́в того́ копие́м ве́ры,/ тем прия́л еси́, святи́телю, вене́ц сла́вы от Христа́ Человеколю́бца.

Бде́нием и посто́м горе́ возлете́в,/ не изводи́л еси́ ума́ своего́ до́лу к скоротеку́щим/ и сицевы́м дея́нием стяжа́л еси́ виде́ние Бо́жия сла́вы,/ ю́же и нам улучи́ти моли́ Иису́са Человеколю́бца.

Та́ко просвети́ся житие́ твое́ пред челове́ки,/ я́ко ви́девше доброде́тели твоя́, о́тче,/ избра́ша тя на престо́л архиере́йский Нову́гра́ду, ему́же и был еси́ па́стырь,/ Пастыренача́льнику приводя́ своя́ о́вцы, Иису́су Человеколю́бцу.

Богоро́дичен: Пастыренача́льника Ма́ти Чи́стая су́щи,/ заблу́ждшее мя овча́ на путь пра́вый наста́ви и упра́ви живо́т мой,/ да, Тобо́ю упра́влен, сподо́блюся насы́титися сла́вы Иису́са Человеколю́бца.

Седа́лен, глас 4:

Ре́вностию зело́ о Правосла́вии подвиза́яся,/ умножа́л еси́ в па́стве твое́й сла́ву Бо́жию,/ и ны́не у́бо прославля́яся иде́же глас пра́зднующих непреста́нно,/ моли́ о чту́щих па́мять твою́, Ни́фонте, о́тче свяще́ннейший.

Сла́ва, и ны́не, Богоро́дичен:

Я́ко ро́ждшая сла́вы Го́спода,/ шу́ияго нас безсла́внаго стоя́ния свобо́ждши,/ прича́стники сла́вы святы́х бы́ти сподо́би/ и просла́ви чту́щих рождество́ Твое́, Чи́стая.

Песнь 4

Ирмо́с: Го́ру Тя, благода́тию Бо́жиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Изра́илеву провозглаша́ше свято́му/ во спасе́ние на́ше и обновле́ние.

Горо́ю высокоу́мия ходя́щих смири́л еси́, блаже́нне,/ не дав междоусо́бныя бра́ни сотвори́ти,/ но благослови́л еси́ ми́ром,/ приве́д тех ко спасе́нию и любви́ обновле́нию.

Словесе́м апо́стольским после́дуя,/ благовре́менно и безвре́менно настоя́л еси́, о́тче,/ все́ю си́лою завещава́я свои́м овца́м не удаля́тися от за́поведей Госпо́дних/ и от пра́вильных Це́ркве Его́ преда́ний,/ я́ко та суть на спасе́ние на́ше и обновле́ние.

Де́рзость твою́, святи́телю, кто испове́сть,/ глаго́лал бо еси́ о свиде́ниих Госпо́дних пред цари́, не стыдя́ся диади́мы,/ тем был еси́ вторы́й Предте́ча, облича́я дея́ния беззако́нныя.

Те́ло свое́ не Христу́, но блуже́нию беззако́нным бра́ком предаю́щих князе́й/ дерзнове́нно обличи́л еси́,/ апо́стольски повелева́я Це́ркви свое́й и всему́ кли́ру/ сицевы́х, безчи́нно ходя́щих, отмета́тися.

Богоро́дичен: Беззако́ннующа мя испра́ви/ и разсвире́певшия во мне страсти смири́, Богоро́дице,/ да Тобо́ю тех свобо́дь быв, обря́щу отра́ду,/ Ты бо еси́ Еди́на всех нас спасе́ние и обновле́ние.

Песнь 5

Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ све́том Твоего́ Богоразу́мия/ правосла́вно пою́щих Тя.

Втора́го тя Фео́дора Студи́йскаго пое́т Це́рковь Русская, блаже́нне,/ де́рзости ра́ди и испове́дания/ и призыва́ет к духо́вному весе́лию любо́вию, о́тче, хва́лящих тя.

Ты непра́вильно ходя́щим сопротивоста́л еси́, преподо́бне,/ ника́коже соизволя́я без благослове́ния Вселе́нскаго Константи́ня гра́да Патриа́рха произвести́ на престо́л архиере́я/ и нече́стно да́ти во́лка в па́стыря овца́м, благоче́стно Христа́ сла́вящим.

Че́сти досто́ин еси́, свя́те,/ я́ко на честь святи́тельства главо́ю Кли́мента свята́го возводя́щим не соизво́лил еси́,/ па́че же обличи́в, с человекоуго́дники сих собо́р осуди́л еси́.

И́стинный сын Восто́чнаго Вселе́нскаго престо́ла сый,/ сыно́м Русским не соизволя́л еси́ от пе́рвенства своего́ отстава́ти,/ но достове́рно испове́дал еси́ то испе́рва рукописа́нием утвержде́но бы́ти,/ да изволе́нием приро́днаго па́стыря своего́, Константи́ня гра́да Патриа́рха,/ все твори́мо бу́дет.

Богоро́дичен: Благослове́нием род челове́ческий Венча́вшая,/ благослове́ния избра́нных нас сподо́би/ и сла́ву Сладча́йшаго Сы́на Твоего́ зре́ти даждь правове́рно хва́лящим Тя.

Песнь 6

Ирмо́с: Обы́де нас после́дняя бе́здна,/ несть избавля́яй,/ вмени́хомся, я́ко о́вцы заколе́ния,/ спаси́ лю́ди Твоя́, Бо́же наш,/ Ты бо кре́пость немощству́ющих и исправле́ние.

Обы́де тя зло́бою архиере́й, ненави́дяй пра́вды,/ не сообща́лся бо еси́ ему́, я́ко непра́ведно престо́л похи́тившу,/ но ты, о́тче, не устраши́лся еси́ того́, име́яй наде́жду на Бо́га,/ И́же есть кре́пость немощны́х и исправле́ние.

Удержа́ти тя, блаже́нне, не удержа́ннаго, покуша́яся, архиере́й/ наусти́ кня́зя в заточе́ние тя посла́ти/ и удержа́ самаго́, язы́ка же твоего́ не удержа́,/ обличи́л бо еси́ того́, я́ко незако́нно престо́л похи́тивша.

Словеса́ твоя́ бы́ша меч беззако́нным,/ и́мже посе́кл еси́ тех неи́стовство,/ сего́ ра́ди и ненави́дяху тя и престо́ла отлучи́ша,/ но ты не малоду́шествовал еси́, о́тче,/ блаже́нства изгна́нных пра́вды ра́ди наде́яся.

Обличе́ние твое́, святи́телю Ни́фонте, я́зва бысть нечести́вым,/ снеда́ше бо их я́ко законопресту́пных,/ и распыха́хуся сердцы́, скреже́щуще зубы́ зве́рски,/ хотя́ще тя растерза́ти.

Богоро́дичен: Обыдо́ша нас мы́сленнии зве́ри, скреже́щуще зубы́,/ и ра́дуются о поги́бели на́шей,/ но Ты, я́ко сильна́ в кре́пости, Де́во, сокруши́ им че́люсти/ и нас испра́ви проти́ву тем ста́ти,/ Ты бо еси́ кре́пость немощны́м и исправле́ние.

Конда́к, глас 5:

Ре́вности дре́вних оте́ц/ в тве́рдом и́стинных догма́т хране́нии подо́бяся,/ крепкоу́мне Ни́фонте,/ не восхоте́л еси́ восхи́тившему самово́льне престо́л Митропо́лии Кли́му сослужи́тель бы́ти,/ избра́нному же на се от всех, поко́рся,/ священноле́пне с ним служи́л еси́/ и, жизнь свою́ сконча́в,/ обре́л еси́ безконе́чное Ца́рство Христо́во.

Песнь 7

Ирмо́с: Тебе́, у́мную, Богоро́дице, пещь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Ты, о́тче блаже́ннейший, в оби́тели многочуде́сней, я́ко в Черто́зе Небе́сном живы́й,/ ра́дуйся, благода́рственная воздава́л еси́ всех Цари́це и Сладча́йшему Сы́ну Ея́, поя́:/ отце́в Бо́же, благослове́н еси́.

Дерзнове́нно став, преподо́бне, Правосла́вия ра́ди,/ лиши́лся еси́ от законопресту́пных престо́ла своего́,/ но престо́л тебе́ гото́вяшеся во огра́де Небе́сной,/ я́ко и́стинному свиде́телю пра́вды.

Ви́дя Пастыренача́льник о́вцы твоя́, укосне́нием твои́м смяте́нны,/ па́ки тя па́стыря им подае́т,/ и́бо зло творя́й пра́ведным судо́м Бо́жиим сам зло сугу́бо прия́т/ и отлучи́вый тя престо́ла сам отпаде́ престо́ла.

Христолюби́вый князь Гео́ргий, Изясла́ва пра́ведно с престо́ла княже́ния изгна́в,/ со мно́гою че́стию отпусти́ тя на престо́л твой,/ на не́мже узре́вше тя, о́вцы твоя́, преподо́бне, с ра́достию воспе́ша:/ отце́в Бо́же, благослове́н еси́.

Богоро́дичен: Пра́ведно низпа́дший род челове́ческий от Бо́жия благода́ти/ возста́вила еси́ пречи́стым рождество́м Твои́м, Богома́ти,/ сего́ ра́ди ра́достно пое́т Ти во вся ро́ды, Благослове́нная.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

В пещи́ искуше́ний и в пла́мени ласка́ния законопресту́пных/ егда́ тебе́ неопали́вшася слы́ша Вселе́нский Константи́ня гра́да Патриа́рх,/ ублажи́ му́жество твое́, о́тче, и причте́ тя к дре́вним испове́дником,/ с ни́миже ны́не пое́ши Го́спода во ве́ки.

Ви́дя твое́ дерзнове́ние, в кни́зе живы́х напи́сано,/ Патриа́рх Константи́ня гра́да присла́ и свое́ к тебе́ напи́санное посла́ние,/ в не́мже ублажа́ше твою́ о Правосла́вии ре́вность,/ ю́же помина́юще, и сы́нове русстии превозно́сят Го́спода во ве́ки.

Сугу́бым жела́нием распала́емь, святи́телю, спе́шно прише́л еси́ в град Ки́ев,/ жела́я Богома́тери в оби́тели Пече́рской и преподо́бным отце́м поклони́тися,/ та́кожде от гряду́щаго архиере́я благослове́ние прия́ти./ Те́мже ди́вно виде́ние ви́дети сподо́бился еси́,/ я́ко святы́й Феодо́сий глаго́ла тебе́:/ отсе́ле бу́деши с на́ми неразлу́чно, сла́вя и поя́ Го́спода во ве́ки.

Я́ко птене́ц, любя́ гнездо́, на холме́ Пече́рском от Чи́стыя Голуби́цы созда́нное,/ любе́зно жела́л еси́ в нем жи́ти неисхо́дно,/ а́ще же и привлече́ тя жела́ние сицево́е,/ но Бо́жий Про́мысл угото́ваше отше́ствие твое́ от вре́менных к ве́чным.

Богоро́дичен: Птене́ц есмь, в Твое́й огра́де, Влады́чице моя́, рожде́нный,/ но низпадо́х, уловле́н бесо́вскими прило́ги,/ оба́че молю́ся: приведи́ мя па́ки во о́ну,/ да иде́же нача́ло, та́мо и кончи́ну прииму́ благу́ю/ и со святы́ми отцы́ превозношу́ си́лу Твою́ во ве́ки.

Песнь 9

Ирмо́с: О́браз чи́стаго рождества́ Твоего́/ огнепали́мая купина́ показа́ неопа́льная/ и ны́не на нас напа́стей свире́пеющую угаси́ти, мо́лимся, пещь,/ да Тя, Богоро́дице,/ непреста́нно велича́ем.

О́бразом чу́днаго виде́ния извести́ тебе́, свя́те, всех Влады́ка,/ я́ко и́маши по труде́х в поко́йная отыти́ места́,/ иде́же сла́вят немо́лчно Тро́ицу Пресвяту́ю а́нгельския си́лы,/ Ю́же и мы с ни́ми велича́ем.

В то́нок сон низве́дся,/ возмне́лся еся́, о́тче, в це́ркви Пече́рской стоя́, простира́ти к Пречи́стей Богоро́дице мольбу́,/ да ви́диши лице́ блаже́ннаго Феодо́сия,/ и бысть, я́коже восхоте́л еси́.

По жела́нию твоему́, в виде́нии не́кто от бра́тий, пое́мь, преподо́бне,/ приведе́ тя ко блаже́нному Феодо́сию,/ его́же ра́достне узре́в, я́лся еси́ за но́зе и благослове́ния сподо́бился еси́./ Жела́нием сего́ и мы одержи́ми, Тро́ицу Пресвяту́ю велича́ем.

О сла́дкаго гла́са!/ О, до́браго целова́ния отца́ на́шего,/ рече́ бо: отсе́ле бу́деши с на́ми, и показа́ ти сви́ток, в не́мже бе напи́сано: се аз и де́ти мои́./ Сей глас и мы да услы́шим, мо́лимся Бо́жией Ма́тери,/ и при́сно Сию́ с тобо́ю, о́тче, велича́ем.

Богоро́дичен: Ра́дуйся, сви́тче, Пресвята́я Де́во,/ в Тебе́ бо написа́ся пе́рстом Бо́жиим Предве́чное Сло́во./ Ты же нас напиши́ во сви́тце с рабы́ Твои́ми,/ вы́ну бо о сем Тебе́ мо́лимся и пе́сньми Тя велича́ем.

Светилен:

А́нгельски на земли́ пожи́в,/ А́нгелом сожи́тель яви́лся еси́,/ преста́вився бо от ни́жних, к Вы́шним отше́л еси́,/ иде́же предстоя́ Влады́це всех Бо́гу,/ моли́ о чту́щих па́мять твою́, Ни́фонте блаже́нне.

Сла́ва, и ны́не, Богоро́дичен:

Вы́шних чинонача́лий превы́шшая су́щи,/ нас, ни́жних, не отступа́й,/ но при́сно с на́ми бу́ди, свобожда́ющи от вся́ких наве́тов,/ Твою́ бо кре́пкую о нас по́мощь ви́дяще,/ никто́же воста́нет на ны.

На хвали́тех стихи́ры, глас 4:

В благонаро́читый день па́мяти Богоно́снаго отца́/ прииди́те, христоимени́тии лю́дие, ра́достно взыгра́ем,/ пе́сни похва́льныя принося́ще,/ и, сла́достию духо́вною учрежда́ющеся,/ любо́вию возопии́м:/ Ни́фонте, о́тче свяще́ннейший,/ моли́ся Христу́ Бо́гу/ о спасе́нии душ на́ших.

Плодоно́сим ти, о́тче преподо́бне,/ в дне́шний день любо́вию пе́сненныя да́ры,/ помина́юще исправле́ния твои́х доброде́телей,/ и мо́лимся Христу́ Бо́гу,/ я́ко да, вре́дных помышле́ний избежа́вше,/ испра́вим жизнь на́шу в благи́х дея́ниих/ и Небе́сныя по́чести не лиши́мся/ моли́твами твои́ми.

Кто по достоя́нию восхвали́ти возмо́жет/ святы́я Твоя́, Христе́ Бо́же,/ я́ко, любо́вию Твое́ю уязви́вшеся,/ вся земна́я презре́ша,/ и, во пло́ти су́ще, безпло́тнаго врага́ победи́ша,/ и ны́не с Безпло́тными на Небеси́ веселя́тся,/ и́хже ликостоя́ния и нас сподо́би/ святи́теля Твоего́ моли́твами.

Сла́ва, глас 6:

Святи́телем удобре́ние и отце́в сла́ву,/ исто́чника чуде́с и ве́рных ско́раго посо́бника,/ днесь, празднолю́бнии лю́дие, в пречестны́й храм соше́дшеся,/ хвала́ми воспое́м, глаго́люще:/ ра́дуйся, подви́жниче до́брый;/ ра́дуйся, бо́дрый па́стырю слове́сных ове́ц;/ ра́дуйся, мы́сленнаго во́лка от ста́да твоего́ жезло́м ве́ры отгна́вый/ и всеце́ло е к Пастыренача́льнику твоему́ приведы́й,/ Ему́же при́сно и о нас моли́ся,/ я́ко да сохрани́мся от всех враго́в невреди́ми/ и бу́дем насле́дницы жи́зни ве́чныя.

И ны́не, Богоро́дичен: Богоро́дице, Ты еси́ лоза́ и́стинная:

Славосло́вие вели́кое и отпу́ст.

На Литурги́и слу́жба о́бща святи́телю.

И́на слу́жба и́же во святы́х отца́ на́шего Ни́фонта, епи́скопа Вели́каго Нова́гра́да

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры пра́здника 4 и святи́телю стихи́ры, глас 8.

Подо́бен: О, пресла́внаго чудесе́:

О́тче Богому́дре, святи́телю Христо́в Ни́фонте,/ ты от ю́ности моли́твами свои́ми и посто́м,/ и бде́нием же, и ми́лостынею/ Бо́гови соедини́ся,/ те́мже Ду́ху Свято́му дом и жили́ще показа́ся,/ отню́ду же архиере́й Це́ркви Христо́вы был еси́/ и лю́дем и учи́тель, и наста́вник благоче́стно показа́ся,/ те́мже мо́лим:/ моли́ Христа́ Бо́га спасти́ся душа́м на́шим.

Святи́телю Христо́в, преподо́бне Ни́фонте,/ ты, повину́яся за́поведи Вседержи́теля Бо́га,/ от ю́ности своея́ Того́ стопа́м, святи́телю, после́довал еси́,/ и наста́вник и учи́тель вели́кому Но́вугра́ду был еси́;/ те́мже от Го́спода неоску́дну благода́ть прия́л еси́,/ де́йствовати пресла́вная чудеса́/ и ду́хи прогони́ти лука́выя от всех,/ и́же любо́вию чту́щих тя.

О́тче вели́кий, архиере́ю Ни́фонте,/ ты от Го́спода дарова́ние чудесе́м прия́л еси́:/ еще́ в жи́зни сый,/ сподо́бился еси́ в виде́нии,/ в Боже́ственнем алтари́ ви́дети вели́ких оте́ц/ Анто́ния и Феодо́сия, учи́телей свои́х,/ сказу́ющих отше́ствие твое́ к Бо́гу/ и водворе́ние со все́ми святы́ми отцы́ в Небе́сных оби́телех,/ ты же, о́тче, ра́достно от святы́х извеще́ния прия́л еси́,/ по ма́ле же и сам сподо́бился еси́ с ни́ми вселе́ния./ Моли́ спасти́ся душа́м на́шим.

О́тче Христо́в, уго́дниче Ни́фонте,/ ты кро́ток и незло́бив в сей жи́зни/ да́же и до исхо́да души́ своея́ пребы́л еси́,/ до́ндеже обре́л еси́ люби́мых оте́ц Анто́ния и Феодо́сия/ и с ни́ми, о́тче, всели́лся еси́ во дво́рех Го́спода на Небе́сных кру́зех,/ иде́же глас пра́зднования и весе́лия,/ и за ны моли́ Влады́ку Го́спода непреста́нно,/ спасти́ся душа́м на́шим.

Сла́ва, глас 6, самогла́сен:

Егда́ Бо́гу ти поспешеству́ющу,/ святи́телю Христо́в Ни́фонте,/ предуве́дев свое́ е́же к Бо́гу из телеси́ пресла́вное изше́ствие,/ вели́каго и сто́льнаго гра́да Ки́ева дости́гл еси́/ и во оби́тель Пече́рскую Пречи́стыя Богома́тере прише́л еси́,/ Е́йже жела́л еси́ помоли́тися,/ иде́же и яре́м Христо́в сподо́бился еси́ прия́ти,/ и та́мо святу́ю ду́шу свою́ че́стно Го́сподеви пре́дал еси́;/ и святы́я твоя́ мо́щи положе́ны бы́ша че́стно/ с вели́кими отцы́ Анто́нием и Феодо́сием,/ е́же в житии́ свое́м мно́го жела́л еси́,/ сие́ обре́л еси́, о́тче свяще́нне, по своему́ жела́нию,/ и ны́не моли́ся о нас ко Го́споду со отцы́ преподо́бными,/ спасти́ся душа́м на́шим.

И ны́не, пра́здника.

Вход. Проки́мен дне и чте́ния три святи́тельская (зри чте́ния святи́тельская).

На лити́и стихи́ры, глас 4. Самогла́сны:

Вели́каго архиере́я и святи́теля Христо́ва/ Ни́фонта блаже́ннаго/ свяще́нную па́мять днесь сверша́юще Боже́ственными пе́сньми,/ прииди́те, вси лю́дие вели́каго Нова́гра́да,/ и свяще́нных мно́жества, и ли́ки оте́ц,/ почти́м того́, о нас всегда́ моля́щася,/ прося́ще ниспосла́ти мно́жество щедро́т/ и спасе́ние душа́м на́шим.

Твоего́ жития́ вели́каго ра́ди и чистоты́,/ святи́телю Христо́в Ни́фонте,/ сы́на тя све́та и дне Христо́с показу́ет/ и архиере́я и па́стыря Це́ркви Своея́ соде́ловает,/ е́йже послужи́л еси́ на престо́ле Вели́каго Нова́гра́да,/ я́ко па́стырь изря́ден,/ и ко оби́телем Небе́сным восхо́диши./ О нас при́сно моли́, спасти́ся душа́м на́шим.

На земли́, я́ко А́нгел, с пло́тию пожи́л еси́,/ всеблаже́нне святи́телю Христо́в Ни́фонте,/ и над страстьми́ воцари́ся,/ ху́ждшее покори́л еси́ лу́чшему,/ те́мже прии́де к непреходя́щему Ца́рствию./ Моли́ при́сно Бо́га/ ве́рно чту́щим тя грехо́в оставле́ние дарова́ти/ и ве́лию ми́лость.

Сла́ва, глас 5:

Преподо́бне о́тче,/ святи́телю Христо́в Ни́фонте пресла́вне,/ учи́вся в ста́де Боже́ственных оте́ц Анто́ния и Феодо́сия,/ поче́рпл еси́, я́ко гу́ба напоя́ема,/ сих Боже́ственному поревнова́в пути́,/ пожи́в, сподо́бился еси́ честна́го архиере́йства,/ и был досто́ин иере́й Христа́ Бо́га,/ и, очища́ем Боже́ственными заря́ми/ и просвеща́яся умо́м и мы́слию,/ вознесе́ся в виде́ния та́йная ко изря́дному блаже́нству,/ о́тче преподо́бне, моли́твенниче о душа́х на́ших.

И ны́не, Богоро́дичен.

На стихо́вне стихи́ры, глас 2.

Подо́бен: До́ме Евфра́фов:

Святи́телю Христо́в и Богоно́се Ни́фонте,/ ты яви́ся от млады́х ногте́й/ Христу́ Бо́гу на́шему/ сосу́д освяще́н/ и жили́ще Пресвята́го Ду́ха.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Святи́телем похвала́/ и свяще́нником сла́ва,/ пра́вило и́ночествующим,/ уго́дниче Христо́в Ни́фонте, яви́ся/ и Це́ркви утвержде́ние.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Услы́ши моле́ние/ чад твои́х, о́тче святи́телю Ни́фонте,/ и не премолчи́, моля́ся за рабы́ своя́ ко Влады́це,/ и серде́чная проше́ния не пре́зри,/ но подава́й с ти́хостию лю́бящим тя утеше́ние.

Сла́ва, глас 6:

Твоя́ вели́кая и всечестна́я Ла́вра,/ ю́же ты соста́ви мно́гими труды́ и моли́твами,/ о́тче святи́телю Христо́в Ни́фонте,/ в приснослову́щем гра́де Пско́ве/ над Ми́рожею реко́ю,/ я́ко труба́, вопие́т к Бо́гу,/ вели́кий же Но́вград вельми́ тя похваля́ет,/ наслади́вшеся уче́ний твои́х медото́чных,/ град же Ки́ев и Пече́рская оби́тель/ пресве́тло па́мять твою́ пра́зднуют,/ тя, я́ко сте́ну неразори́му и столп непоколеби́м, иму́ще./ Мы же, ча́да твоя́, и́ноцы,/ уче́нием твои́м наставля́еми/ и ны́не пресла́вное твое́ успе́ние пра́зднующе, мо́лимся:/ моли́ спасти́ся душа́м на́шим.

И ны́не, пра́здника.

Тропа́рь, глас 4:

От мирска́го мяте́жа из млады́х ногте́й/ исшед в ти́хое приста́нище,/ честны́я оби́тели Пече́рския дости́гл еси́/ и, та́мо яре́м Христо́в восприи́м на ся,/ ра́вно А́нгелом житие́ поживе́,/ отню́ду же прише́д, святи́телю Христо́в Ни́фонте, в вели́кий Но́вград,/ и архиере́йский престо́л восприя́л еси́/ и мно́ги лю́ди уче́нием свои́м ко Христу́ приве́л еси,/ Его́же моли́, святи́телю преподо́бне, спасти́ся душа́м на́шим.

Сла́ва, и ны́не, Богоро́дичен или пра́здника.

НА УТРЕНИ

На Бог Госпо́дь: тропа́рь свято́му, два́жды. Сла́ва, и ны́не, Богоро́дичен или́ пра́здника.

По 1-м стихосло́вии седа́лен, глас 4.

Подо́бен: Вознесы́йся:

Днесь святи́теля Христо́ва Ни́фонта па́мять возсия́ нам,/ солнцеобра́зно луча́ми сия́юща,/ светоявле́нием и уче́нием свои́м всех простира́ет к доброде́тели и глаго́лет:/ прииди́те, жела́емых наслади́теся.

Сла́ва, и ны́не, пра́здника или́ Богоро́дичен:

Стена еси́ непобеди́мая нам, христиа́ном, Богоро́дице Де́во,/ к Тебе́ бо прибега́ем, невреди́ми пребыва́юще,/ и, па́ки согреша́юще, и́мамы Тя Моли́твенницу,/ тем, благодаря́ще, вопие́м:/ ра́дуйся, Обра́дованная, Госпо́дь с Тобо́ю.

По 2-м стихосло́вии седа́лен, глас 3.

Подо́бен: Боже́ственныя ве́ры:

Я́ко со́лнце пресве́тлое, возсия́л еси́/ вели́кому Нову́гра́ду и Пско́встей земли́ доброде́тельми свои́ми,/ и сия́нии све́тлых уче́ний свои́х просвети́л еси́ ве́рных соста́вы,/ и потреби́л еси́ страсте́й омраче́ние, о́тче святи́телю Христо́в Ни́фонте,/ моли́ Бо́га даровати нам ве́лию ми́лость.

Сла́ва, и ны́не, пра́здника или́ Богоро́дичен:

Боже́ственная бысть сень Сло́ва, еди́на Пречи́стая Богома́ти,/ чистото́ю А́нгелы превозше́дши,/ па́че всех мене́, персть бы́вша, оскверне́на плотски́ми прегреше́нии,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.

По полиеле́и седа́лен, глас 8.

Подо́бен: Прему́дрости:

Смиренному́дрен был еси́, о́тче святи́телю Христо́в Ни́фонте,/ те́мже просла́вися, я́ко Боже́ственный архиере́й/ принося́ же́ртву поже́ршемуся за нас во́лею Христу́ Бо́гу на́шему,/ Того́ моли́, о́тче честны́й, грехо́в оставле́ние дарова́ти нам, рабо́м твои́м,/ чту́щим любо́вию Боже́ственную па́мять твою́.

Сла́ва, и ны́не, Богоро́дичен:

Обнови́ла еси́, Пречи́стая, Боже́ственным рождество́м Твои́м/ истле́вшее страстьми́ земноро́дных умерщвле́нное существо́/ и возста́вила еси́ всех к жи́зни нетле́ния,/ те́мже Тя по до́лгу вси ублажа́ем, Де́во Препросла́вленная, и вопие́м Ти:/ моли́ Христа́ Бо́га согреше́ний оставле́ние дарова́ти/ воспева́ющим досто́йно сла́ву Твою́.

Та́же степе́нна, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней. Вся́кое дыха́ние: Ева́нгелие от Иоа́нна, зача́ло 35 от полу́.

По 50-м псалме́ стихи́ра, глас 6:

Челове́че Бо́жий,/ ве́рный ра́бе,/ святи́телю Христо́в, о́тче Ни́фонте,/ слуго́ Госпо́день,/ му́же жела́ний,/ сосу́де избра́нный Христо́в,/ сто́лпе и утвержде́ние Це́ркве Христо́вы,/ не преста́й моля́ся о нас, рабе́х свои́х, ко Го́споду.

Кано́н пра́здника со ирмосо́м на 6 и святи́телю на 8, нося́ краегране́сие сицево́: И́ноком столп и святи́телем красота́, да пое́тся блиста́тельный Ни́фонт. Творе́ние священнои́нока Варлаа́ма мни́ха. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Скве́рну прегреше́ний мои́х очи́сти Твое́ю ми́лостию, Христе́,/ мглу омраче́ния страсте́й отжени́/ моли́твами святи́теля Твоего́ Ни́фонта.

Бога́тыя и светоно́сныя благода́ти испо́лнен,/ в честне́м ме́сте Пече́рския оби́тели и́ночествовал еси́/ и та́мо, я́ко безпло́тен, к доброде́телей приведе́ ум свой,/ о́тче чу́дне Ни́фонте.

Кре́постию наста́влен быв от Ду́ха Свята́го измла́да,/ в огра́де преподо́бных оте́ц Анто́ния и Феодо́сия пребы́л еси́ во вся́цем воздержа́нии/ и отто́ле на архиере́йский престо́л возведе́н бысть Вели́кому Нову́гра́ду,/ о́тче святи́телю Ни́фонте.

Богоро́дичен: От Тебе́, Обра́дованная Всечестна́я,/ нам яви́ся Пра́ведное Со́лнце – Христо́с/ и све́том просвети́ седя́щия пе́рвее в тве́рдех.

Катава́сия пра́здника.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Умертви́в плотско́е мудрова́ние воздержа́нием зе́льным,/ и всено́щным стоя́нием, и моли́твами, о́тче свяще́нне Ни́фонте,/ Животворя́щему Ду́ху прибли́зился еси́.

Боже́ственнаго Ду́ха благода́тию, вше́дшаго в тя,/ мно́ги огра́ды и хра́мы во и́мя святы́х воздви́гл еси́, и́ноческому чи́ну во спасе́ние,/ и с ни́ми, о́тче свяще́нне Ни́фонте,/ в ра́йских селе́ниих препочи́л еси́, веселя́ся.

На высоту́ доброде́телей вшел еси́, Ни́фонте святи́телю,/ и, прия́в свяще́нное пома́зание,/ высото́ю своего́ жития́ на седа́лище высо́це/ послужи́л еси́ своему́ Влады́це Христу́, я́ко архиере́й вели́кий.

Це́рковь Христо́ва свети́льника тя стяжа́вши, святи́телю Ни́фонте,/ доброде́тельными твои́ми уче́нии, прему́дре, просвеща́ется, глаго́лющи:/ Ты, Го́споди, ми кре́пость и утвержде́ние.

Богоро́дичен: Ты еси́ еди́на су́щим на земли́ челове́ком блага́я Хода́таица,/ Ма́ти Бо́жия па́че естества́,/ те́мже Тебе́, Госпоже́ Влады́чице, лю́дие Твои́, ра́дуяся, зове́м:/ поми́луй нас.

Седа́лен, глас 4.

Подо́бен: Ско́ро предвари́:

Све́тло житие́ твое́ всем яви́ся, святи́телю Христо́в Ни́фонте,/ всепра́зднственная же па́мять твоя́, чудесы́ блиста́ющи,/ удивля́ет сто́льнаго гра́да Ки́ева наро́ды,/ иде́же честны́я твоя́ мо́щи положе́ны бы́ша,/ и и́нок мно́жества ревну́ющих по Бо́зе доброде́тельному твоему́ житию́,/ те́мже тя мо́лим:/ моли́ спасти́ся душа́м на́шим.

Сла́ва, и ны́не, пра́здника или́ Богоро́дичен:

Пое́м Тя, Богоневе́сто, Ма́ти Христа́ Бо́га,/ сла́вяще рождество́ Твое́ непостижи́мое,/ и́мже изба́вихомся от ле́сти диа́воли и вся́кия беды́, Влады́чице Богоро́дице,/ и ве́рно вопие́м Тебе́, Госпоже́, раби́ Твои́:/ поми́луй ста́до Твое́, Еди́на Пренепоро́чная.

Песнь 4

Ирмо́с: Любве́ ра́ди, Ще́дре, Твоего́ о́браза,/ на Кресте́ Твое́м стал еси́,/ и раста́яшася язы́цы,/ Ты бо еси́, Человеколю́бче,/ кре́пость моя́ и хвале́ние.

Всечестны́я твоя́ мо́щи, святи́телю Ни́фонте,/ дом Пресвята́го Ду́ха бысть,/ во гро́бе бо лежа́ со отцы́ Ки́евския пеще́ры,/ ду́хи лука́выя от челове́к прогоня́еши/ си́лою И́же в тебе́ живу́щаго Ду́ха Свята́го.

Отверзо́шася тебе́, о́тче, святи́телю Христо́в Ни́фонте, Еде́мския две́ри/ ра́ди доброде́тельнаго жития́ твоего́ к Бо́гу и чистоты́,/ и к святи́телем приложи́ся, святи́телю,/ перворо́дных Це́ркви сочета́ся, достосла́вне.

Просвеща́ется красото́ю и зва́нием Небе́сных сия́ний престо́л,/ и́же на земли́ Вели́каго Нова́гра́да оста́вил еси́, святи́телю Ни́фонте,/ и насле́дие нетле́нно в земли́ кро́тких,/ я́ко кро́ток, восприя́л еси́ со святы́ми.

Богоро́дичен: И́же во Твою́ утро́бу, Де́во, Богоприя́тную/ па́че естества́ всели́выйся Христо́с Бог наш,/ Сей по рождестве́ Боже́ственною си́лою Свое́ю/ Тя, Де́ву, соблюде́ Пречи́сту.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Я́ко вели́ко облиста́л еси́ со́лнце, от сла́внаго вели́каго Нова́гра́да/ заре́ю слове́с твои́х и чуде́с, сия́ние испуща́я во всю Ру́сскую зе́млю,/ Ни́фонте о́тче, святи́телю Бо́жий,/ и вся озаря́я, благоче́стно тя ублажа́ющия.

Па́че ме́да услажда́ющее, Вели́каго Нова́гра́да наро́дом/ позна́ся уче́ние медото́чнаго и чи́стаго твоего́ язы́ка,/ сим наслажда́ющее ду́ши свяще́нными испове́дании/ и грехо́вную сим показу́ющее го́ресть,/ досточу́дне о́тче, свяще́нне Ни́фонте.

Сла́ва святи́телем и ве́рным лю́дем засту́пник вои́стинну ты еси́,/ стране́ на́шей на враги́ испроси́ побе́ды и одоле́ние/ и во благоче́стии утверди́ ны непоколеби́мы,/ о́тче досточу́дне Ни́фонте.

Богоро́дичен: Вси ро́ди челове́честии благоче́стно блажа́т Тя, Госпоже́ Пречи́стая Богоро́дице,/ вои́стинну ро́ждшую па́че естества́ и сло́ва/ Блаже́ннаго нам Го́спода, Сы́на Бо́жия.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Прему́дрости рачи́тель быв Боже́ственный,/ Богодухнове́нне о́тче свяще́нне Ни́фонте,/ и благоче́стия венце́м венча́ся, и все́ми о́бразы и де́лы/ учени́к быв светоно́сным отце́м Анто́нию и Феодо́сию.

Жела́ние твое́ к Бо́гу испо́лнися,/ пресла́вне святи́телю Христо́в о́тче Ни́фонте,/ преста́ви бо ся к Нему́, Боже́ственно ра́дуяся,/ в немерца́ющий свет и в непреходи́мую ра́дость,/ и ны́не све́тлости святы́х, о́тче, зри́ши и красоты́.

Благоле́пия венце́м укра́шен, сия́еши ны́не, святи́телю Ни́фонте,/ я́ко и́стинный архиере́й, пра́вдою вои́стинну оде́явся,/ и преда́ние Спа́сово возлюби́л еси́,/ те́мже и зва́нию  Боже́ственному после́довал еси́, вопию́щу ти:/ вни́ди в ра́дость Го́спода своего́.

Кро́ток, и незло́бив, и ми́лостив во всей жи́зни свое́й, о́тче Ни́фонте, был еси́,/ Влады́ки своего́ Христа́ стопа́м после́дуя,/ зе́млю кро́тких со святы́ми дости́гл еси́,/ сего́ ра́ди тя собо́ры благочести́вых воспева́ют Боже́ственными пе́сньми.

Богоро́дичен: Кля́твы пе́рвыя прама́тери Е́вы/ рождество́м Твои́м, Госпоже́, Деви́це Чи́стая, свободи́хомся,/ Ты бо, Христа́ ро́ждши, Де́во,/ благослове́ние всем источи́ла еси́.

Конда́к, глас 8.

Подо́бен: Взбра́нной:

Возложи́в себе́ от ю́ности Бо́гу, преподо́бне,/ мир тле́нных нивочто́же вмени́в/ и па́че всех Христа́ возлюби́в,/ Тому́ от всея́ души́ любо́вию после́довал еси́/ и, я́ко светоза́рное со́лнце,/ от Ки́ева просия́ во вся концы́ Ру́сския земли́ доброде́телию,/ и бысть па́стырь вели́кому Нову́гра́ду,/ и, до́бре упа́с ста́до Христо́во слове́сных ове́ц на па́житех духо́вных,/ к Бо́гу отше́л еси́,/ и ны́не со А́нгелы Влады́чню Престо́лу предстоя́,/ нас помина́й, раб свои́х, да зове́м ти:/ ра́дуйся, о́тче Ни́фонте,/ святи́телем изря́дная похвало́.

И́кос:

Челове́к бо сый естество́м, о́тче,/ но па́че челове́ка подвиза́ся посто́м и бде́нием, в моли́твах и труде́х/ о́браз мно́гим бысть,/ сего́ ра́ди тя Бог архиере́я це́ркви Своея́ Прему́дрости Бо́жия устроя́ет/ и вели́каго Нова́гра́да лю́дем неле́ностна учи́теля,/ те́мже тя мо́лим:/ моли́ся, архиере́ю, Благоде́телю всех Бо́гу/ дарова́ти побе́ды на враги́/ и нам обрести́ ми́лость в День Су́дный,/ да велегла́сно тебе́ вопие́м:/ ра́дуйся, о́тче преподо́бне, и́же измла́да Госпо́день яре́м взем,/ де́монов победи́л еси́ полки́ моли́твами свои́ми;/ ра́дуйся, в Богохрани́мом гра́де Пско́ве оби́тель превели́ку и чу́дну устро́ивый над Ми́рожею реко́ю/ во сла́ву Боголе́пнаго Преображе́ния Христо́ва/ и и́нок мно́жество собра́вый сла́вити Бо́га./ Ра́дуйся, и́же сподо́бился еси́ в виде́нии ви́дети в Боже́ственном алтари́ Анто́ния и Феодо́сия Пече́рских,/ возвеща́ющих твое́ отше́ствие к Бо́гу;/ ра́дуйся, сподо́бивыйся со блаже́нными отцы́ Пече́рскими честны́м твои́м моще́м положе́нным бы́ти,/ иде́же и́го Госпо́дне прия́т./ Ра́дуйся, о́тче Ни́фонте, святи́телем изря́дная похвало́.

Песнь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Боже́ственная и пресве́тлая па́мять твоя́, святи́телю Ни́фонте,/ я́ко светоза́рное яви́ся со́лнце,/ светоно́сно просвеща́ющее ве́рныя лю́ди вели́каго Нова́гра́да,/ и́же без сумне́ния Христо́ви вопию́щия:/ оте́ц на́ших Бо́же, благослове́н еси́.

Уста́вы оте́ческия утверди́л еси́, му́дре о́тче Ни́фонте,/ це́рковь Прему́дрости Бо́жия свяще́нства ле́потами преукра́сил еси́/ и сохрани́л еси́ ю уче́нии свои́ми невоева́нну,/ наказу́я взыва́ти:/ оте́ц на́ших Бо́же, благослове́н еси́.

Ки́евска ме́ста я́ко досто́ин еси́,/ и та́мо положе́но бысть в пеще́ре честно́е те́ло твое́, святи́телю Ни́фонте, со отцы́,/ дух же твой возлете́ на Небеса́,/ со А́нгелы и апо́столы и со святи́тели ликовству́я,/ Святе́й Тро́ице предстоя́, моли́ся приле́жно за град и лю́ди твоя́, свя́те, Христу́ вопию́щия:/ оте́ц на́ших Бо́же, благослове́н еси́.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́нна Ты еси́ в жена́х, Всенепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телню препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

На Небесе́х чи́нове А́нгельстии лику́ют,/ и на земли́ ве́рных собо́ры све́тло пра́зднуют/ па́мять твою́, святи́телю Христо́в Ни́фонте, веселя́щеся и глаго́люще:/ честна́ пред Го́сподем смерть преподо́бных Его́, и пе́сньми сла́вяще Христа́:/ благослови́те, вся дела́ Госпо́дня, Го́спода.

Ки́евстии свяще́ннии, и и́ночестии собо́ры, и про́стии лю́дие,/ пресла́вне святи́телю Христо́в Ни́фонте, воспева́ют тя/ на ме́сте, иде́же лежи́т те́ло твое́,/ источа́ющее исцеле́ния струи́, и стра́сти потопля́ющее,/ и ве́рных сердца́ ороша́ющее Боже́ственною благода́тию:/ благослови́те, вся дела́ Госпо́дня, Го́спода.

Чи́сто житие́ свое́ сконча́л еси́,/ Чи́стыя Де́вы Богоро́дицы вои́стинну служи́тель бысть/ и святи́тель Бо́гови и́стинен,/ ревни́тель Правосла́вия и свяще́ние ве́ре,/ и стена́ лю́дем избра́нным, Богоблаже́нне.

Богоро́дичен: Стряса́ем прах ме́ртвенный, нетле́нии бы́вше,/ Боже́ственным рождество́м Твои́м, Пречи́стая,/ есте́ственную бо и́стинную Жизнь и присносу́щную, Чи́стая Влады́чице, родила́ еси́,/ те́мже Тя благослови́м, Мари́е Богоневе́стная:/ благослови́те, вся дела́ Госпо́дня, Го́спода.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Днесь день пра́здничный,/ па́мять твоего́ преставле́ния, Христо́в святи́телю Ни́фонте,/ созыва́ет святи́телей собо́ры, и́ноков стада́/ на весе́лие духо́вное и трапе́зу неги́бнующия сне́ди,/ пи́щу нетле́нныя жи́зни предлага́я нам.

Чи́стым се́рдцем и Боже́ственным восхожде́нием/ ум свой впери́в, Еди́наго Бо́га зре́ти добро́ту сподо́бился еси́/ и отту́ду светоли́тием просвеща́еши ве́рныя,/ Богому́дре святи́телю Христо́в, Ни́фонте свяще́нне.

Оби́тели, в не́йже сподо́бился еси́ яре́м Христо́в прия́ти,/ вся дни свои́ ве́рою и ду́хом, кроме́ телесе́, неразлу́чен, о́тче, пребы́л еси́,/ те́мже и по преставле́нии свое́м та́мо сподо́бился еси́ положи́тися,/ иде́же чудесе́м дарова́ния от Го́спода прия́л еси́,/ святи́телю Христо́в Ни́фонте.

Днесь пресве́тлая па́мять твоя́, святи́телю Ни́фонте, возсия́вши,/ всех ве́рных сердца́ просвеща́ет,/ те́мже и о пе́ние произве́дшему ти моли́ Христа́ Бо́га,/ сохрани́тися ему́ от лука́ваго ловле́ния/ и получи́ти ми́лость в День Су́дный.

Богоро́дичен: Исто́чник безсме́ртия нам источи́ла еси́, Де́во, и оставле́ния во́ду,/ Христа́ ро́ждши, И́мже очища́емся от вся́кия скве́рны грехо́вныя,/ Богоневе́сто, Ма́ти Христо́ва.

Свети́лен:

Благода́ть Свята́го Ду́ха, все́льшаяся в тя,/ святи́теля тя показа́ и́стинна,/ Христо́с тебе́ вручи́ ста́до Свое́ па́ствити на па́житех духо́вных,/ сего́ же ра́ди потща́лся еси́ наставля́ти лю́ди/ и ны́не на Небесе́х живе́ши, ра́дуяся.

Сла́ва, и ны́не, Богоро́дичен:

По Бо́зе упова́ние иму́ще на Тя,/ Пречи́стая Богоро́дице, мо́лим Ти ся:/ ко из Тебе́ Ро́ждшемуся мольба́ми/ невреди́мы нас до конца́ сохрани́.

На хвали́тех стихи́ры, глас 2.

Подо́бен: Егда́ от Дре́ва:

Воздержа́нием стра́сти плотски́я,/ о́тче пречестны́й и святи́телю Христо́в Ни́фонте,/ по́мыслу поработи́л еси́,/ безстра́стия быв красе́н сосу́д, преблаже́нне,/ вме́стен живо́тным сия́нием,/ и свяще́ния масть  прии́м от руки́ Госпо́дни,/ и бесо́вския полки́ потреби́л еси́,/ и страсте́м прогони́тель я́влься, досточу́дне.

Чи́стая мирополо́жница Боже́ственнаго Ду́ха,/ о́тче святи́телю, был еси́/ и чудесе́м исто́чник незави́стен всем яви́ся,/ иноку́ющим столп и святи́телем красота́/ и кро́ткаго своего́ Учи́теля Христа́ подража́тель те́плый,/ те́мже, земны́й А́нгел и Небе́сный челове́к быв,/ да восхва́лится ны́не свяще́нными пе́сньми/ святи́тель Христо́в Ни́фонт.

В безмо́лвное приста́нище/ Пече́рския оби́тели Пречи́стыя Богоро́дицы дости́гл еси́,/ и та́мо, душе́вный твой кора́бль/ жите́йскаго мяте́жа устрани́в,/ я́ко от волн морски́х, отбега́я ми́ра,/ и́же к Бо́гу манове́ньми от земли́ возлете́,/ и яви́ся пло́тию А́нгелом подо́бен/ и всем челове́ком сла́вен,/ о́тче святи́телю Христо́в Ни́фонте.

Сла́ва, глас 6:

Излия́ся благода́ть во устну́ твое́ю,/ преподо́бне о́тче, святи́телю Христо́в Ни́фонте,/ и бысть па́стырь Христо́вы це́ркви Прему́дрости Бо́жия Вели́каго Нова́гра́да,/ уча́ наро́ды, слове́сныя о́вцы, ве́ровати в Единосу́щную и Нераздели́мую Тро́ицу/ во Еди́ном Божестве́.

И ны́не, пра́здника.

Славосло́вие вели́кое и отпу́ст.

НА ЛИТУРГИ́И

Блаже́нны пра́здника и от кано́на свята́го песнь 3-я на 4. Проки́мен, глас 4: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щии по вселе́нней. Апо́стол ко Евре́ем, зача́ло 318. Аллилу́ия, глас 2: Уста́ пра́веднаго поуча́тся прему́дрости. Стих: Зако́н Бо́га его́ в се́рдце его́, и не за́пнутся стопы́ его́. Ева́нгелие от Иоа́нна, зача́ло 36. Прича́стен: В па́мять ве́чную:

Тропа́рь, глас 8:

Послуша́ние свято́е, нарица́ющееся живо́т,/ преподо́бне о́тче Ру́фе, прие́м,/ живо́т ве́чный о́ным пости́гл еси́,/ иде́же живя́, не забу́ди и нас, хва́лящих тя.

Конда́к, глас 6:

Честна́ смерть твоя́, преподо́бне Ру́фе, пред Го́сподем,/ че́стне бо и преподо́бне жизнь твою́ в послуша́нии свято́м препроводи́л еси́./ Тем тя у́бо почита́ем,/ я́ко послу́шником о́браз и наста́вник.