НА ВЕЧЕ́РНИ

Стихи́ры, глас 1.

Подо́бен: Всехва́льнии му́ченицы:

О́тче Гео́ргие,/ Христо́ве честне́й и пречи́стей/ че́стно поклони́лся еси́ ико́не, всему́дре,/ богобо́рцов на́глости ника́коже ужаса́яся,/ си́лою Того́ укрепля́емь./ Его́же ны́не моли́/ дарова́ти душа́м на́шим/ мир и ве́лию ми́лость.

О́тче Гео́ргие,/ я́рость нечести́вых претерпе́л еси́,/ гне́вающихся безслове́сне,/ я́же и ви́дел еси́ превознося́щияся/ злочести́вым шата́нием/ и па́ки сокруша́емы лю́те/ я́вственно промышле́нием,/ ко отмще́нию несмы́сленных/ дви́жимо, сла́вне.

О́тче Гео́ргие,/ Бо́гу соде́йственник быв/ я́ко иере́й и земледе́латель,/ стори́чествующ плод Влады́це –/ ду́ши приве́л еси́/ ны́не спасе́нных сло́вом твои́м./ И ны́не моли́ся/ дарова́ти душа́м на́шим/ мир и ве́лию ми́лость.

Сла́ва, и ны́не, Богоро́дичен:

Ра́дуйся, купино́ неопали́мая,/ Сове́та Вели́каго А́нгела,/ ра́дуйся, еди́на ро́ждшая./ Ра́дуйся, изволе́ние Честны́я Тро́ицы./ Ра́дуйся, земны́м утвержде́ние./ Ра́дуйся, рая́ клас прозя́бши невозде́ланный,/ Царя́ и Го́спода,/ прозябе́ния изсуша́юща зло́бы.

Крестобогоро́дичен:

Своего́ А́гнца А́гница и непоро́чная Влады́чица/ на Кресте́ я́ко ви́девши, зра́ка не иму́ща, ниже́ добро́ты, –/ увы́ Мне,– рыда́ющи, глаго́лаше, –/ где добро́та Твоя́ за́йде, Сладча́йший?/ Где благоле́пие,/ где благода́ть блиста́ющая о́браза Твоего́,/ Сы́не Мой любе́знейший?

Кано́н, глас 8.

Песнь 1

Ирмо́с: Песнь возсле́м, лю́дие, чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:/ пои́м Тебе́, еди́ному Влады́це.

Зарю́ благоутро́бия мне, Христе́,/ испо́лньшемуся прегреше́ний и грехи́ лю́тыми, возсия́й, Ще́дре,/ и мрак отжени́ моего ослепле́ния мольба́ми Твоего́ иера́рха.

Всю возде́лал еси́, му́дре, боле́зньми и по́ты твои́ми воздержа́ния зе́млю/ и, се́я в се́рдцы пшени́цу Ду́ха,/ клас безстра́стия прине́сл еси́, Гео́ргие блаже́нне.

На ра́мена крест твой взем,/ и земны́я красоты́ мироде́ржцу тьмы отве́ргл еси́, Христу́ после́довав,/ и сокро́вище стяжа́л еси́ невеще́ственнаго Ца́рствия Его́.

Богоро́дичен: Ору́жие и приста́нище тве́рдое, и сте́ну, и кре́пость, и Боже́ственное основа́ние,/ и мост, и покро́в, Твое́, Богоневе́сто, иму́ще предста́тельство,/ от бед избавля́емся всех.

Песнь 3

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

На высоту́ вшед, блаже́нне, доброде́телей,/ и во глубины́ ду́ха досто́йно воззре́в,/ и виде́ния прия́телище быв, преподо́бне,/ водворя́ешися со А́нгельскими ли́ки.

Обнища́в ду́хом, обогати́лся еси́, му́дре, Ца́рством невеще́ственным,/ в не́мже ста́ду твоему́ сокро́вища ве́чная ве́рно предугото́вал еси́,/ те́мже тя ублажа́ем.

Простото́ю, преподо́бне, и кро́тостию душе́вною/ уподо́бился еси́ нра́вы твои́ми и исправле́ньми Иа́кову/ и показа́лся еси́ чистото́ю ду́ха Изра́иль, ум, зряй Бо́га.

Богоро́дичен: Безо́тча родила́ еси́, безма́терня пре́жде Тебе́,/ и я́ко Младе́нца дои́ла еси́, Пита́ющаго вся,/ Его́же моли́ спасти́ся ве́рно пою́щим Тя госпо́дственно, Богоро́дицу Чи́стую.

Седа́лен, глас 8.

Подо́бен: Прему́дрости:

Смире́ния высото́ю све́тел быв,/ возноше́ния вра́жия до конца́ потреби́л еси́, хра́брствовав све́тло;/ ми́лостив же быв, о́тче преподо́бне,/ оби́льным подая́нием а́лчущия удовли́л еси́./ Те́мже нестаре́ющуюся по сме́рти наследо́вал еси́ пи́щу,/ ра́дуяся во ве́ки, Гео́ргие иера́рше блаже́нне./ Моли́ Христа́ Бо́га прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию, вси ублажа́ем, ро́ди челове́честии,/ Огнь бо всели́ся в Тя Божества́, и я́ко Младе́нца дои́ши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́.

Ты душе́вный кора́бль спасл еси́ от страсте́й ве́щнаго треволне́ния,/ во приста́нище устреми́лся еси́/ и тишину́ воздержа́ния, о́тче преподо́бне.

Ангелови́ден ра́зум стяжа́в,/ Тро́йческое от А́нгел песнопе́ние послу́шал еси́,/ быв во изступле́нии смы́сла твоего́, прехва́льне.

Ты, мы́сленною пра́щею вооружи́вся,/ я́коже ино́го Голиа́фа, князя тьмы, гордя́щася, низложи́л еси́, иера́рше, дави́дски/ и Боже́ственною ве́рою твое́ю.

Богоро́дичен: Наде́жда и предста́тельство ми́ра, Богоро́дице,/ моли́ из Тебе́ Воплоще́ннаго о рабе́х Твои́х,/ Тя бо свято́е очисти́лище стяжа́вше, от греха́ избавля́емся.

Песнь 5

Ирмо́с: От но́щи неве́дения/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.

Тя, я́ко чистоты́ столп и целому́дрия ключ, приснопа́мятне, ве́дуще вси,/ да улучи́м у́бо ми́лость моли́твами твои́ми.

Богови́дным прозре́нием во свяще́нный оде́ялся еси́ чин,/ Непоро́чней Де́ве я́ко непоро́чна тя в сие́ призва́вшей.

Ми́лости щедро́тство всажде́но име́я и всегда́ соживу́що,/ был еси́ ни́щим бога́тныя пи́щи де́лателище.

Богоро́дичен: Небе́снаго Влады́ку во утро́бе заче́нши, Всенепоро́чная,/ была́ еси́ вы́шши Небе́с и всея́ тва́ри.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.

Дух Всесвяты́й в тебе́ обре́т селе́ние,/ духо́в лука́вых отгна́в легео́ны моли́твами твои́ми.

Тишины́ яви́лся еси́ река́ и струя́ кро́тости,/ от ни́хже напая́емся пото́ка сла́дости, преподо́бне о́тче.

Умертви́в плотски́я сла́сти, ду́хом ожи́л еси́,/ и мене́ же, страстьми́ па́дшаго, возста́ви, сла́вне.

Богоро́дичен: Сло́во во утро́бе, и́же от Отца́ безле́тно возсия́вша,/ в ле́то зачала́ еси́ Бо́га Сло́ва/ па́че сло́ва, Присноде́во.

Песнь 7

Ирмо́с: О́троки ороси́вый в пещи́/ и Де́ву сохрани́вый,/ ро́ждшую Тя, по рождестве́,/ благослове́н еси́, Бо́же оте́ц на́ших.

Осия́нием Ду́ха Боже́ственнаго,/ е́же отсю́ду проразуме́л еси́ к лу́чшим преста́вление твое́,/ и ны́не лику́еши, преподо́бне, во о́нех оби́телех.

Я́ко звезде́, я́вльшуся тебе́,/ житие́м и заре́ю Боже́ственною чу́вствы просвеще́нну,/ преставле́ние, преподо́бне, твое́ звезда́ провозвести́.

В черто́г Вы́шняго Ца́рствия, оде́ян, вшел еси́ досто́йно/ и восклони́вся с Женихо́м, преподо́бне,/ на трапе́зе невеще́ственныя сла́дости.

Богоро́дичен: Небе́сныя Тя си́лы, я́ко Ма́терь Жи́зни всех,/ по до́лгу дорино́сят и воспева́ют, Влады́чице,/ я́ко Предста́тельство душ на́ших.

Песнь 8

Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Богоуправля́емое име́я се́рдце,/ страсте́й мои́х мра́чную, о́тче, отжени́ бу́рю/ и ко приста́нищу тишины́ твоея́ наста́ви.

Насажде́н при Боже́ственных исхо́дищах любве́ вод,/ дре́во жи́зни возрасти́/ и плоды́ благоче́стия во вре́мя отда́л еси́.

Я́ко врач неисце́льных неду́гов/ и отгони́тель нечи́стых духо́в, блаже́нне Гео́ргие,/ и моего́ греха́ неду́г уврачи́.

Богоро́дичен: Кто изрече́т Боже́ственное рождество́ Твое́, Богороди́тельнице Мари́е?/ Вся́ко бо естество́ диви́тся земноро́дных и А́нгел,/ и Тя ублажа́ют.

Песнь 9

Ирмо́с: Проявле́нное на горе́ законополо́жнику во огни́ и купине́/ рождество́ Присноде́вы/ в на́ше ве́рных спасе́ние/ пе́сньми немо́лчными велича́ем.

Твои́х слез исто́чники безстра́стия возде́лал еси́, преподо́бне, рай непоро́чно/ и многооби́лен плод изно́сиши,/ пита́я доброде́тельми Боже́ственное ста́до.

Ты чи́сто Бо́гу прине́сл еси́ служе́ние/ и, ве́ры, преподо́бне, тече́ние соверши́в,/ ны́не прия́л еси́ вене́ц пра́вды из руки́ Христа́ Подвигополо́жника.

Днесь игра́ет и лику́ет ве́рных мно́жество,/ мона́хов стада́, свяще́нников собо́ри:/ тя бо вси о́браз спасе́ния обрето́ша, и пра́вилу изображе́ние.

Богоро́дичен: Богому́жно Твое́ рождество́, Всенепоро́чная Отрокови́це,/ я́ко Бо́га су́ща и Зижди́теля веко́в моля́щи не оскудева́й непреста́нно,/ спасти́ ду́ши воспева́ющих Тя.

НА МА́ЛОЙ ВЕЧЕ́РНИ

На Го́споди, воззва́х: стихи́ры на 4, глас 6:

Трисве́тлаго Божества́ заря́ми просвеща́емь,/ преподо́бне Дании́ле,/ озари́л еси́ ве́рных сердца́/ сло́вом и́стины и непоро́чным житие́м./ Просвети́ у́бо и нас,/ любо́вию чту́щих тя.

Благода́тию Ду́ха Свята́го озаря́емь,/ от ю́ности Бо́га возлюби́л еси́, преподо́бне:/ крест бо взем, после́довал еси́ Христу́./ Того́ моли́ о хва́лящих тя.

Мир оста́вив и вся кра́сная его́ презре́в,/ Христо́ви сраспя́лся еси́,/ неукло́нно к Тому́ зря, о́тче Дании́ле./ К Тому́ и на́ша сердца́ напра́ви,/ плене́нныя страстьми́.

Сла́ва, глас 2:

Прииди́те, по́стник сосло́вие/ и христолюби́вии лю́дие,/ днесь восхва́лим блаже́ннаго отца́,/ и́ноков вои́стинну украше́ние/ и похвалу́ земли́ Русстей,/ па́мять его́ духо́вно пра́зднующе/ и с ли́ки святы́х А́нгел похваля́юще Христа́,/ просла́вльшаго Своего́ уго́дника,/ при́сно моля́щагося о душа́х на́ших.

И ны́не, Богоро́дичен:

Ра́дуйся, Мари́е Богоро́дице,/ хра́ме неразруши́мый,/ па́че же святы́й,/ я́коже вопие́т проро́к:/ свят храм Твой,/ ди́вен в пра́вде.

На стихо́вне стихи́ры, глас 2.

Подо́бен: До́ме Евфра́фов:

Дом Ду́ху Пресвято́му,/ о́тче преподо́бне, был еси́/ и, стра́сти умертви́в,/ де́монския полки́/ победи́л еси́.

Стих: Честна́ пред Го́сподем/ смерть преподо́бных Его́.

Дом прече́стен/ во сла́ву Святы́я Тро́ицы/ воздви́гл еси́,/ собра́в и́нок мно́жество,/ вы́ну моли́ о пою́щих тя.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Приста́нище благоути́шно/ духо́вным твои́м ча́дом был еси́,/ кро́тко тех наставля́я/ к све́ту Богоразу́мия,/ блаже́нне.

Сла́ва, глас 8:

Днесь гра́да Пересла́вля лю́дие духо́вно торжеству́ют,/ зря́ще блаже́ннаго отца́,/ побе́дным венце́м от Бо́га венча́нна,/ и си́це, похваля́юще, воспева́ют:/ ра́дуйся, свяще́нная главо́,/ благоути́шное на́ше по Бо́зе приста́нище,/ не премолчи́, о нас моля́ся ко Го́споду.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 1.

Подо́бен: Прехва́льнии му́ченицы:

Днесь град Пересла́вль тобо́ю хва́лится,/ о́тче наш Дании́ле,/ в нем бо, яко со́лнце, оте́честву твоему́ возсия́л еси́/ благода́тию нетле́ния и чуде́с./ Бу́ди у́бо вы́ну пред Бо́гом хода́тай нам/ и испроси́ душа́м на́шим мир и ве́лию ми́лость.

Безстра́стия рачи́тель быв в житии́ твое́м/ и по́двиги по́стными себе́ украси́в,/ Христу́ сообра́зен был еси,/ Его́же моли́, преподо́бние,/ дарова́ти душа́м на́шим мир и ве́лию ми́лость.

Стра́сти умертви́в, неви́димых враг полки́ победи́л еси́,/ просвети́в же у́мныя о́чи се́рдца,/ Боже́ственных виде́ний сподо́бился еси́./ Просвети́ у́бо и на́ша очеса́ серде́чныя,/ во е́же ви́дети и возвеща́ти/ чу́дный свет ве́ры Правосла́вныя/ и просла́вити Отца́ на́шего Небе́снаго,/ ча́юще от Него́ ми́ра и ве́лия ми́лости.

Чу́дный свет ви́дел еси́, преподо́бне,/ а́ки мно́гим свеща́м, горя́щим ту,/ иде́же погреба́л еси́ стра́нныя,/ отню́дуже разже́гся Боже́ственною ре́вностию,/ храм на ме́сте том воздви́гл еси́,/ во е́же моли́тися о них./ Ны́не же и о нас моли́ся ко Го́споду,/ да пода́ст душа́м на́шим мир и ве́лию ми́лость.

Возде́я преподо́бныя ру́це/ и преклоня́я коле́на твоя́,/ приле́жно к Бо́гу моли́лся еси́/ не то́чию о спасе́нии твое́м и бра́тии твоея́,/ но и о устрое́нии всего́ ми́ра/ и благостоя́нии святы́х Бо́жиих церкве́й,/ те́мже и о нас помоли́ся ко Го́споду, я́ко о твое́м ста́де,/ дарова́ти душа́м на́шим мир и ве́лию ми́лость.

Сла́ва, глас 5:

Прииди́те, христоимени́тии лю́дие,/ восхва́лим преподо́бнаго отца́ на́шего Дании́ла,/ в после́дняя ле́та нам возсия́вшаго/ и чуде́с заря́ми мир озари́вшаго,/ и возопии́м к нему́, глаго́люще:/ ра́дуйся, па́стырю и учи́телю наш;/ ра́дуйся, покро́ве и прибе́жище духо́вным ча́дом твои́м;/ ра́дуйся, гра́ду на́шему/ похвало́ и утвержде́ние.

И ны́не, Богоро́дичен: В Чермне́м мо́ри:

Вход. Проки́мен дне. И чте́ния преподо́бническая.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зами бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцаря́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (гла́вы 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, суди́и конце́в земли́./ Внуши́те, держа́щий мно́жества/ и гордя́щиися о наро́дех язы́ков,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шник преста́влен бы́сть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 2:

О́тче преподо́бне Дании́ле,/ от ю́ности Христу́ после́довати потща́лся еси́,/ поревнова́в бо преподо́бному Симео́ну Сто́лпнику,/ у́жем  влася́ным те́ло обви́,/ че́рвие же, яко би́серие, себе́ вмени́в,/ со благодаре́нием страда́льчески терпе́л еси́./ Моли́ся о душа́х на́ших.

О́тче преподо́бне Дании́ле,/ Христо́вою любо́вию распала́емый,/ а́ще и боле́зненно терпе́л еси́ отья́тие у́жа,/ блага́го же изволе́ния не отре́клся еси́:/ ну́ждно роди́телие отторго́ша у́же от многострада́льнаго те́ла твоего́,/ любве́ же, я́же ко Христу́, отъя́ти не возмого́ша,/ Ему́же приле́жно моли́ся о душа́х на́ших.

О́тче Дании́ле,/ оте́чество твое́, град Пересла́вль, иногда́ оста́вив,/ водвори́лся еси́ в пусты́ни, ча́я Бо́га;/ дости́г же оби́тели преподо́бнаго Пафну́тия,/ прия́л еси́ от руку́ его́ А́нгельский о́браз,/ еще́ же и преподо́бнаго Левки́я пусты́нника учени́к был еси́./ С ни́миже ны́не моли́ся Христу́/ спасти́ся душа́м на́шим.

Сла́ва, глас 8:

Ра́дуйся, преподо́бным сожи́телю,/ пусты́нником собесе́дниче,/ земны́й А́нгеле, Небе́сный челове́че,/ послуша́ния ревни́телю и чистоты́ рачи́телю,/ вдови́цам и сирота́м прибе́жище,/ до́брый вои́стинну и безме́здный врачу́/ и всех, притека́ющих к тебе́, хода́таю,/ не премолчи́, о нас моля́ся ко Го́споду.

И ны́не, Богоро́дичен:

Ра́дуйся, вселе́нныя похвало́;/ ра́дуйся, хра́ме Госпо́день;/ ра́дуйся, горо́ приосене́нная;/ ра́дуйся, всех прибе́жище;/ ра́дуйся, све́щниче златы́й;/ ра́дуйся, Мари́е, Ма́ти Христа́ Бо́га;/ ра́дуйся, Боже́ственная трапе́зо;/ ра́дуйся, всех упова́ние.

На стихо́вне стихи́ры, глас 1.

Подо́бен: Небе́сным чино́м:

Ревни́телю благоче́стия,/ изря́дный де́лателю виногра́да Христо́ва,/ о́тче преподо́бне,/ доброде́телей исправле́ния яви́в,/ наста́вник и́ноком был еси́,/ не преста́й моля́ся о чту́щих тя.

Стих: Честна́ пред Го́сподем/ смерть преподо́бных Его́.

Сосу́д че́стен Уте́шителя Свята́го Ду́ха был еси́,/ А́нгелом собесе́дниче,/ во пло́ти бо сый, Безпло́тных житие́м пожи́л еси́,/ озаря́яся Боже́ственною благода́тию./ Ми́лостивно избавля́й нас от бед/ твои́ми моли́твами.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Соизволе́нием преподо́бных твои́х наста́вник/ па́ки прише́л еси́ в оте́чествие твое́,/ не ми́ра мудрова́ние гоня́,/ но послужи́ти хотя́ гра́ду,/ в не́мже роди́лся и воспита́лся еси́,/ той и ны́не спаса́й моли́твами твои́ми.

Сла́ва, глас 3:

Ка́ко не диви́мся/ Богому́дрому твоему́ житию́, о́тче Дании́ле,/ ты бо победи́тель страсте́й и безпло́тных враг низложи́тель показа́лся еси́,/ и, на ра́мена своя́ усо́пших стра́нных, на распу́тиих пове́рженных,/ телеса́ взима́я,/ со псалмопе́нием в скуде́льнице погреба́л еси́,/ и оби́тель над мощми́ их во сла́ву Святы́я Тро́ицы воздви́гл еси́./ Сего́ ра́ди мо́лим тя:/ и нас, чад твои́х, не забу́ди,/ при́сно моля́ся о душа́х на́ших.

И ны́не, Богоро́дичен.

Тропа́рь, глас 3:

От ю́ности, блаже́нне,/ всего́ себе́ Го́сподеви возложи́в,/ вы́ну повину́яся Бо́гу,/ проти́вяся же диа́волу,/ стра́сти грехо́вныя победи́л еси́,/ тем сам храм Бо́жий быв,/ и оби́тель кра́сну во сла́ву Пресвяты́я Тро́ицы воздви́гнув,/ и со́бранное тобо́ю в ней ста́до Христо́во/ богоуго́дно упа́с,/ преста́вился еси́ к ве́чным оби́телем,/ о́тче Дании́ле./ Моли́ Триипоста́снаго во Еди́ном Существе́ Бо́га/ спасти́ся душа́м на́шим.

Сла́ва, и ны́не, Богоро́дичен: Тя, хода́тайствовавшую спасе́ние ро́да на́шего:

НА У́ТРЕНИ

На Бог Госпо́дь: тропа́рь преподо́бнаго, дважды. Сла́ва, и ны́не, Богоро́дичен.

По 1-м стихосло́вии седа́лен, глас 8:

Угоди́ти хотя́ Христу́ Бо́гу,/ разли́чными доброде́тельми, я́коже драги́м ка́мением, себе́ украси́л еси́, преподо́бне,/ и, ева́нгельски после́довав Христу́,/ кра́сная ми́ра сего́ уме́ты бы́ти вмени́./ Те́мже со А́нгелы на Небесе́х водворя́яся/ и Святе́й Троице предстоя́,/ непреста́нно моли́ о всех нас.

Сла́ва, и ны́не, Богоро́дичен:

Безневе́стная Богоро́дице Де́во,/ еди́на ве́рных Предста́тельнице,/ бед и скорбе́й вся изба́ви, на Тя упова́ние иму́щия,/ и ду́ши на́ша спаси́ моли́твами Твои́ми.

По 2-м стихосло́вии седа́лен, глас 2:

Го́рдаго велиа́ра смиренному́дрием победи́л еси́,/ благода́ть разсужде́ния духово́м стяжа́в,/ ду́хом же впери́в себе́ к Небе́сным,/ воздви́гни и нас всех к све́ту Богоразу́мия, блаже́нне,/ и моли́ спасти́ся душа́м на́шим.

Сла́ва, и ны́не, Богоро́дичен:

Милосе́рдия су́щи исто́чник,/ ми́лости сподо́би нас, Богоро́дице,/ при́зри на лю́ди согреши́вшия,/ яви́ я́ко при́сно силу́ Твою́:/ на Тя бо упова́юще, ра́дуйся, вопие́м Ти,/ я́коже иногда́ Гаврии́л, Безпло́тных Архистрати́г.

По полиеле́и седа́лен, глас 3:

Боже́ственною ре́вностию разже́гся,/ о́браз и пра́вило и́ноком был еси́:/ до́бре ста́до Христо́во упа́сл еси́/ и чистоте́ А́нгельскаго жития́ духо́вная ча́да твоя́ научи́./ Но я́коже о них, та́ко и о нас Христу́ Бо́гу моли́ся/ и испроси́ нам ве́лию ми́лость.

Сла́ва, и ны́не, Богоро́дичен:

О́тча не́дра не отлу́чся,/ плоть бысть во чре́ве Твое́м Бог Сло́во,/ Иже по рождестве́ Ма́терь Тя Де́ву, я́ко пре́жде рождества́, сохрани́в нетле́нну./ Того́ приле́жно моли́ дарова́ти нам ве́лию ми́лость.

Степе́нна, 1-й антифо́н 4-го гласа. Проки́мен, глас 4: Честна́ пред Го́сподем/ смерть преподо́бных Его́. Стих: Что́ возда́м Го́сподеви о всех, я́же воздаде́ ми? Всякое дыхание: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Мзда твоя́ мно́га на Небесе́х,/ я́ко возлюби́л еси́ мно́го,/ мно́гими по́двиги восходя́ к Бо́гу,/ к Нему́же и прибли́жився, призира́й на лю́ди,/ тре́бующия от Бо́га ми́лости, блаже́нне.

Кано́н Богоро́дичен со ирмосо́м на 6 и преподо́бному на 8. Кано́н преподо́бному, глас 2.

Песнь 1

Ирмо́с: Во глубине́ постла́ иногда́/ фараони́тског всево́инство преоруже́нная си́ла,/ вопло́щшееся же Сло́во всезло́бныи́ грех потреби́ло есть:/ препросла́вленный Госпо́дь, сла́вно бо просла́вися.

Распали́лся еси́ к Бо́гу жела́нием/ и на вся́кое вре́мя ум име́л еси́ к Нему́ впере́н, преподо́бне,/ вы́ну  возводи́л еси́ к Тому́ о́ми твои́, поя́:/ препросла́вленный Госпо́дь, сла́вно бо просла́вися.

Поревнова́в Симео́ну Сто́лпнику,/ у́жем влася́ным те́ло обви́/ и от него́ че́рвие, я́ко би́серие, вмени́,/ наде́ждою же бу́дущих благ укрепля́яся, к Бо́гу вы́ну взыва́ше:/ препросла́вленный Госпо́дь, я́ко просла́вися.

Страстьми́ содержи́ми, мо́лим тя, преподо́бне,/ сокруши́ти ты́я помози́ нам/ и от бед изба́ви ны.

Ду́хом горя́ще, ча́да твоя́, мо́лим тя:/ к ти́хому приста́нищу нас возведи́/ и лю́тых обстоя́ний свободи́.

Напра́ви ны на путь покая́ния/ и на стези́ жи́зни Богоуго́дныя наста́ви,/ мо́лим тя, о́тче Дании́ле.

Богоро́дичен: Пречи́стая Богоро́дице,/ утиши́ боле́зни се́рдца моего́,/ Христа́ безболе́зненно па́че ума́ и сло́ва ро́ждшая.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Просвети́ся житие́ твое́, блаже́нне,/ и посреде́ оте́ц преподо́бных, я́ко со́лнце, возсия́л еси́,/ ревнова́в их чу́дным подвиго́м.

По двоюна́десяте ле́ту послуша́ния твоего́/ па́ки град Пересла́вль прише́ствием твои́м освяти́л еси́/ и был еси́ ему́ во утвержде́ние.

Ты на́ше утвержде́ние, о́тче Дании́ле,/ утверди́ у́бо нас в де́лании за́поведей Христо́вых,/ да пое́т тя дух наш.

Мо́лим тя, о́тче Дании́ле,/ озло́бленных нас от бед свободи́/ и ми́рное житие́ на́ше устро́й моли́твами твои́ми.

Ско́рый нам помо́щниче и до́брый наш врачу́,/ преподо́бне о́тче,/ теле́сныя же и душе́вныя на́ша неду́ги уврачу́й.

Богоро́дичен: Укроти́ неуста́вное  мои́х помышле́ний, Де́во Влады́чице Чи́стая,/ и отыми́ от души́ печа́ль,/ Я́же всех Ра́дость ро́ждшая.

Седа́лен, глас 3:

При́сно пеки́йся о доброде́телех,/ жела́ние имел еси́, преподо́бне, е́же Безкро́вней Же́ртве вы́ну соверша́тися/ над погребе́нными тобо́ю мощми́ стра́нных;/ трие́ же и́ноцы совеща́ша ти о триле́тнем отложе́нии того́,/ и́хже сове́та любе́зно послу́шав,/ воздви́гл еси́ це́рковь, при́сно Бо́гу моля́ся./ Моли́ у́бо и о нас,/ да спасе́т Госпо́дь ду́ши на́ша.

Слава, и ныне, Богородичен:

Прибе́жище и си́ла нам еси́, Богоро́дице,/ кре́пкая ми́ру Помо́щнице,/ моли́твами Твои́ми спаси́ рабы́ Твоя́.

Песнь 4

Ирмо́с: Прише́л еси́ от Де́вы, не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Пеку́щу ти ся, преподо́бние, о зда́нии це́ркве,/ Боже́ственный свет, а́ки от мно́жества свещ, над мощми́ стра́нных ви́дел еси́ и взыва́л еси́:/ сла́ва си́ле Твое́й, Го́споди.

Боже́ственнаго светоявле́ния сподо́бився,/ благо́е наме́рение и жела́ние о зда́нии це́ркве/ ди́вным трие́м стра́нником откры́л еси́, преподо́бне,/ ти́и же три ле́та пожда́ти совеща́ша./ По сих же наде́ждою на Бо́га утверди́вся,/ во благовре́мении храм созда́л еси́, вопия́:/ сла́ва си́ле Твое́й, Го́споди.

Стра́нных прие́мля и сам взыску́я Небе́снаго Иерусали́ма,/ о́нех ди́вных стра́нников во исхо́де души́ от те́ла твоего́ ви́дел еси́, преподо́бне о́тче, и вопия́ше:/ сла́ва си́ле Твое́й, Го́споди.

Страсте́й на́ших смуще́ние и бу́рю прегреше́ний утиши́, преподо́бне о́тче,/ да послу́жим Бо́гу в преподо́бии и и́стине.

Услы́ши нас, преподо́бне, уми́льно призыва́ющих тя,/ и подража́тели сотвори́ доброде́телей твои́х,/ да, спаса́еми тобо́ю, вни́дем в ра́дость Го́спода на́шего.

Стена́ и утвержде́ние бу́ди нам, о́тче Дании́ле,/ вся́ких враг избавля́я нас и богоуго́дно пожи́ти наставля́я,/ в насле́дие жи́зни ве́чныя.

Богоро́дичен: Пречи́стая Богоневе́сто, Влады́чице ми́ра,/ Ты мя спаси́, от бед пременя́ющи/ и страсте́й молву́ отгоня́ющи.

Песнь 5

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Просвеще́ния от Боже́ственныя благода́ти ища́й/ и чи́сто имы́й душе́вное о́ко,/ к Отцу́ све́тов вопия́ше:/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Священнои́нок не́кий, слы́шав пречу́ден звон/ на ме́сте, иде́же оби́тель хотя́ше бы́ти,/ и ви́дев у́мныма очи́ма мно́гия служб монасты́рских сосу́ды,/ пове́да ти сия́;/ ты же, ра́дуяся, блаже́нне, Царю́ сил вопия́ше:/ ино́го, ра́зве Тебе́, бо́га не зна́ю.

Вельмо́жа при́сная обои́ бра́та, во опа́ле ца́рстей бы́вша,/ моли́твами твои́ми, блаже́нне, па́ки ми́лостивно от царя́ честь получи́ста/ и наказу́ема от Тебе́ доброде́тельному житию́, к Бо́гу зовя́ста:/ ино́го, ра́зве Тебе́, бо́га не зна́ем.

Имы́й дерзнове́ние к Бо́гу,/ умоли́, преподо́бне о́тче,/ от наве́т вра́жиих изба́витися нам.

Благ быва́я живы́м, и над мертвеца́ми не возбрани́л еси́ благода́ти:/ тех бо собира́я, че́стне погреба́л еси́,/ я́ко у́ды Христо́вы.

Благ и ми́лостив сый, преподо́бне,/ благода́ть и ми́лость у Бо́га обре́л еси́,/ и́хже и нас о́бщники соде́лай твои́ми, блаже́нне, моли́твами.

Богоро́дичен: Неду́гующую ду́шу мою́ исцели́,/ ро́ждшая всех Взе́млющаго неду́ги,/ Пресвята́я Влады́чице.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Человеколю́бию Тови́та подража́яй,/ о погребе́нии стра́нных промышля́ше/ и на свою́ ра́му ты́я ноша́ше.

От сподо́бльшейся светоявле́ния/ и в скуде́льницу прише́дшей жены́,/ слы́шав о виде́нии е́ю мно́жества горя́щих свещ,/ уразуме́л еси́, преподо́бне,/ я́ко Бог благоволи́т о ме́сте,/ иде́же оби́тель твою́ созда́л еси́.

Я́ко Богосве́тлое свети́ло, на тве́рди це́ркве сия́ющее,/ ве́рных сердца́ озари́л еси́, преподо́бне, све́том Богоразу́мия.

Ми́лостивно при́зри на предстоя́щия ти, о́тче Дании́ле,/ и от напа́стей и печа́лей сохрани́ нас.

Ум наш освяти́ и просвети́ све́том за́поведей Христо́вых/ и мы́слити поле́зная всегда́ наста́ви ны.

К тебе́ припа́дающе, усе́рдно и со слеза́ми вопие́м, блаже́нне:/ умоли́ Влады́ку Христа́ мир ста́ду твоему́ дарова́ти.

Богоро́дичен: Вопие́м Ти вси, и́стинней Богома́тери:/ прогне́вавшия Бо́га рабы́ Твоя́ гее́нны изба́ви,/ ма́тернее дерзнове́ние к Сы́ну Твоему́ иму́щая.

Конда́к, глас 8:

Невече́рняго Све́та пресве́тлое свети́ло,/ жития́ чистото́ю просвеща́ющее всех,/ яви́лся еси́, о́тче Дании́ле:/ о́браз бо и пра́вило и́ноком был еси́,/ сирота́м же оте́ц и пита́тель вдови́цам./ Сего́ ра́ди и мы, ча́да твоя́, вопие́м ти:/ ра́дуйся, ра́досте и ве́нче наш;/ ра́дуйся, мно́гое имы́й к Бо́гу дерзнове́ние;/ ра́дуйся, гра́ду на́шему ве́лие утвержде́ние.

Икос:

Ди́вен на земли́ А́нгелом показа́лся еси́/ и челове́ком пресве́тлое свети́ло, блаже́нне, был еси́./ Те́мже, ра́дуйся, и мы тебе́ усе́рдно зове́м:/ ра́дуйся, бесо́вския полки́ до конца́ низри́нувый и стра́шен тем бы́вый;/ ра́дуйся, над страстьми́ воцари́выйся./ Ра́дуйся, прекра́сный до́ме Святы́я Тро́ицы;/ ра́дуйся, неукло́нно ше́ствовавый стезе́ю к Безсме́ртному животу́./ Ра́дуйся, вдови́цам, и сирота́м, и всем, су́щим в напа́стех, помо́щниче;/ ра́дуйся, и́стинный вождю́, духо́вных твои́х чад направля́яй на путь спасе́ния./ Ра́дуйся, до́брый па́стырю, подража́вый Пастыренача́льнику Спа́су Христу́;/ ра́дуйся, предста́телю за ны Христу́ Бо́гу на́шему./ Ра́дуйся, Русстей стране́ и гра́ду на́шему утвержде́ние.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́ема, поя́ху:/ благослове́н еси́, Бо́же оте́ц на́ших.

В по́двизех по́стных просия́вый, преподо́бне,/ безстра́стие стяжа́л еси́, поя́:/ благослове́н Бог оте́ц на́ших.

Кре́пкаго подви́жника огнь страсте́й не опали́,/ но Боже́ственная благода́ть ороси́ и све́тла житие́м показа́, зову́ща:/ благослове́н Бог оте́ц на́ших.

Не на песце́ суеты́ мирски́я,/ но на ка́мени ве́ры основа́ние положи́в, блаже́нне,/ во сла́ву Святы́я Тро́ицы оби́тель созда́/ и духо́вная твоя́ ча́да зва́ти научи́:/ благослове́н Бог оте́ц на́ших.

Послуша́нием и милосе́рдием, посто́м же и моли́твою Бо́гу благоугоди́л еси́:/ сего́ ра́ди просла́ви тя пред А́нгелы и челове́ки благослове́нный Бог оте́ц на́ших.

Услы́ши нас, чад твои́х, моля́щих ти ся,/ и ви́димых и неви́димых враг изба́ви,/ да моли́твами твои́ми дерзнове́ния сподо́бимся, е́же зва́ти:/ оте́ц на́ших Бо́же, благослове́н еси́.

Теле́сныя и душе́вныя на́ша не́мощи, любо́вию притека́ющих к тебе́,/ исцели́ти сподо́би, преподо́бне о́тче, да с тобо́ю зове́м:/ оте́ц на́ших Бо́же, благослове́н еси́.

Богоро́дичен: Прему́дрости испо́лни всех и кре́пости Боже́ственныя,/ Ипоста́сная прему́дросте Вы́шняго,/ Богоро́дицы ра́ди, ве́рою вопию́щих:/ оте́ц на́ших Бо́же, благослове́н еси́.

Песнь 8

Ирмо́с: В пе́щь о́гненную ко отроко́м евре́йским снизше́дшаго,/ и пла́мень в ро́су прело́жшаго Бо́га/ по́йте, дела́, я́ко Го́спода/ и превозноси́те во вся ве́ки.

Огне́м Боже́ственныя любве́ попали́л еси́ плотски́я стра́сти/ и обрати́л еси́ в бе́гство де́монская ополче́ния, зовы́й:/ по́йте, вся дела́, Го́спода и превозноси́те Его́ во ве́ки.

Прославля́яй избра́нныя Своя́, Бог/ просла́ви и тебе́, преподо́бне,/ чи́стаго ра́ди жития́ твоего́,/ и, я́ко свети́ло, показа́л еси́, при́сно осиява́ющее ве́рою зову́щих:/ по́йте, вся дела́, Го́спода и превозноси́те Его́ во ве́ки.

Дале́че изы́де свята́го и́мене твоего́ сла́ва, преподо́бне,/ и всем на по́льзу был еси, зря́щим тя:/ всех бо науча́л усе́рдно воспева́ти Го́спода/ и превозноси́ти Его́ во ве́ки.

Моле́бно притека́ющии к моще́м твои́м, преподо́бне,/ по́мощи от Тебе́ про́сим,/ пою́ще и превознося́ще Христа́ во ве́ки.

Неможе́ние душ на́ших и теле́сныя боле́зни исцели́, преподо́бне,/ и научи́ нас прославля́ти Христа́ во ве́ки.

От Всесвята́го Ду́ха, блаже́нне, бога́тую благода́ть прие́мь,/ исцеля́еши ве́рою пою́щия и превознося́щия Христа́ во ве́ки.

Богоро́дичен: Напа́стей Ты прило́ги отгоня́еши/ и страсте́й нахо́ды, Де́во,/ те́мже Тя пое́м во вся ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Христу́, Сыну Бо́жию, ве́рою послужи́л еси́, преподо́бне,/ сего́ ра́ди Оте́ц Небе́сный оби́тель у тебе́ сотвори́л есть,/ с Ним и Пресвяты́м Свои́м Ду́хом.

Аще и почте́н был еси́, преподо́бне, от вели́каго кня́зя, я́ко восприе́мник чад его́,/ оба́че кро́ток и смире́н был еси́,/ коего́ждо че́стию бо́льша себе́ творя́.

И́стинный учени́к был еси́ Спа́са Христа́,/ нищету́ духо́вную возлюби́в,/ сла́ву же ве́ка сего́ нивочтоже вмени́в,/ тем тя при́сно ублажа́ем.

То́ка слез на́ших не отврати́ся, о́тче Дании́ле,/ всегда́ к Бо́гу моля́ся о чту́щих тя.

Ра́дости испо́лни сердца́ на́ша и грехо́вныя печа́ли потреби́,/ я́ко да сла́вим тя.

Благода́тными заря́ми просвети́, преподо́бне о́тче, ве́рных сердца́,/ мрак неве́дения отгоня́я от нас,/ любо́вию тя сла́вящих.

Богоро́дичен: Твоего́ несказа́ннаго рождества́ пропису́я проро́к,/ кни́гу запечатле́нну прови́де,/ ея́же никто́же разуме́/ и не пости́же та́инства вочелове́чения от Тебе́ Бо́га Сло́ва.

Свети́лен:

Воздержа́нием плоть твою́ умертви́л еси́, о́тче преподо́бне,/ труды́ же и по́двиги святу́ю твою́ жизнь украси́л еси́,/ и ны́не во све́те Святы́я Тро́ицы пребыва́я,/ разжени́ мрак душ на́ших моли́твами твои́ми.

Сла́ва, и ны́не, Богоро́дичен:

Сия́нием, Де́во, из Тебе́ возсия́вшаго Све́та/ ум мой озари́, се́рдце просвети́, тьму грехо́вную отгоня́ющи/ и мглу ле́ности моея́ потребля́ющи.

На хвали́тех стихи́ры, глас 8:

Богоно́сче преблаже́нне,/ все плотско́е мудрова́ние ду́хови повину́в,/ и стремле́ния страсте́й укроти́в,/ был еси прия́телище Пресвята́го Ду́ха,/ собра́в же и́ночествующих мно́жество уче́ньми твои́ми,/ я́ко ле́ствицею восхо́дною,/ на высоту́ доброде́телей возве́л еси́ я./ Помина́й у́бо и нас, преподо́бне о́тче, чту́щих тя.

Днесь возсия́ пресве́тлая па́мять твоя́,/ созыва́ющи многочи́сленное по́стник сосло́вие/ и преподо́бных ликостоя́ния,/ днесь А́нгели и че́ловеки, торжеству́юще,/ восхваля́ют просла́вльшаго тя Го́спода;/ те́мже и мы, притека́юще к моще́м твои́м,/ исцеле́ний да́ры оби́льно прие́млем/ и венча́вшаго тя Христа́ сла́вим,/ Спа́са душ на́ших.

Измла́да возлюби́в Христа́ Бо́га на́шего,/ не дал еси́ сна очи́ма твои́ма,/ ни ве́ждома дрема́ния/ и вся́кую доброде́тель и пра́вду,/ я́же подоба́ет святы́м, соблю́л еси́,/ све́тел яви́вся о́браз ста́ду твоему́./ Сего́ ра́ди тя вси, преподо́бне, ублажа́ем.

Сла́ва, глас 4:

Преподо́бне о́тче Дании́ле,/ измла́да в доброде́телех подвиза́вся,/ был еси́ сосу́д че́стен Бо́жия благода́ти,/ источа́яй чудеса́ исцеле́ний/ с любо́вию чту́щим святу́ю па́мять твою́;/ сего́ ра́ди и мы, ча́да твоя́,/ усе́рдно вопие́м ти, глаго́люще:/ ра́дуйся, освяще́нная главо́;/ ра́дуйся, гра́ду на́шему похвало́ и утвержде́ние./ Приле́жно моли́ся Христу́ Бо́гу/ о спасе́нии душ на́ших.

И ны́не, Богоро́дичен, глас тойже:

Ра́дуйся, Свята́я Богоневе́сто;/ ра́дуйся, Свет ми́рови ро́ждши ве́рным;/ ра́дуйся, стено́ и покро́ве всех нас,/ Бо́га, яко Благода́теля,/ за ны непреста́нно моли́.

Славосло́вие вели́кое. Ектении́ и отпу́ст.

На Литурги́и слу́жба вся преподо́бническая.

Моли́тва

О, преподо́бне и Богоно́сне о́тче наш Дании́ле, всесмире́нно к тебе́ припа́даем и тебе́ мо́лимся: не отступа́й от нас ду́хом твои́м, но всегда́ помина́й нас во святы́х и благоприя́тных моли́твах твои́х ко Го́споду на́шему Иису́су Христу́. Моли́ся Ему́, да не потопи́т нас бе́здна грехо́вная, и да не бу́дем враго́м, ненави́дящим нас, в ра́дование; да прости́т Христо́с Бог наш твои́м предста́тельством за нас вся согреше́ния на́ша, и Свое́ю благода́тию водвори́т среди́ нас единоду́шие и любо́вь, и изба́вит нас от ко́зней и наве́тов диа́вольских, от гла́да, огня́, вся́кия ско́рби и ну́жды, от боле́зней душе́вных и теле́сных и от напра́сныя сме́рти; да сподо́бит Он нас, притека́ющих к тебе́, в и́стинней ве́ре и покая́нии пожи́ти, христиа́нския непосты́дныя и ми́рныя кончи́ны живота́ на́шего дости́гнути, и насле́довати Ца́рство Небе́сное, и сла́вити Пресвято́е И́мя Его́ со Безнача́льным Его́ Отце́м и Пресвяты́м Ду́хом во ве́ки веко́в. Ами́нь.