НА ВЕЧЕ́РНИ:

На Го́споди, воззва́х: стихи́ры, глас 2.

Подо́бен: Егда́ от Дре́ва:

Сло́вом управля́я ду́ши,/ Боже́ственный строи́тель показа́лся еси́,/ тайново́ждь же ве́рен,/ се́мена спаси́тельная влага́я/ и жня многого́бзенный плод, Богоно́се,/ сей Влады́це твоему́ прино́сиши, ра́дуяся,/ Ему́же ны́не предстоя́, блаже́нне,/ помяни́ ста́до твое́ сие́,/ при́сно чту́щее тя, Богодухнове́нне.

Кро́ток быв и прост,/ правосла́вия ре́вностию яви́лся еси́, ра́туя,/ ве́рою бо, я́ко броня́ми, обложе́н/ и, я́ко копие́м, воздержа́нием, Ники́то Богому́дре,/ вся́кую ху́льную е́ресь обличи́л еси́,/ Боже́ственный Спа́са о́браз почита́я/ и служа́, Богоно́се,/ уста́вом оте́ческим я́ве после́дуя.

Егда́ во изгна́ниих тя го́рьких/ и в темне́йших ме́стех/ темне́йший мучи́тель заключи́ зве́рским суровство́м,/ ра́йское селе́ние во уме́ обнося́,/ ра́дуяся же ду́хом, о́тче, претерпе́л еси́,/ Его́же ны́не благоле́пие ви́дети/ вои́стинну сподо́бился еси́, блаже́нне,/ боле́зней воздая́ния прие́мля.

Сла́ва, и ны́не, Богоро́дичен:

Еди́на Невмести́маго Бо́га/ нетесноме́стно во чре́ве носи́ла еси́,/ Челове́ка бы́вша за бла́гость, Пресвята́я Богоневе́сто./ Те́мже молю́ Тя:/ утесня́ющих мя страсте́й измени́,/ я́ко да, те́сную и пра́вую стезю́, ше́ствовав,/ дости́гну, я́же к жи́зни, Де́во, водя́щую.

Крестобогоро́дичен:

Егда́ нескве́рная А́гница ви́де Своего́ А́гнца,/ на заколе́ние я́ко Челове́ка во́лею влеко́ма,/ пла́чущи, глаго́лаше:/ безча́дствовати Мя ны́не тщи́шися, Христе́, ро́ждшую Тя,/ что сие́ сотвори́л еси́, Изба́вителю вся́ческих?/ Оба́че воспева́ю и сла́влю Твою́,/ ю́же па́че ума́ и сло́ва,/ кра́йнюю бла́гость, Человеколю́бче.

Кано́н, его́же краегране́сие, кроме́ Богоро́дичнов: Твое́ честву́ю всесве́тлое житие́, о́тче. Глас 2.

Пе́снь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло е́сть,/ препросла́вленным Госпо́дь, сла́вно бо просла́вися.

Све́том Боже́ственнаго блиста́ния, о́тче, озаря́емь,/ твою́ жи́знь Бо́гу освяти́л еси́,/ изде́тска избра́в де́вства светоно́сную све́тлость,/ е́юже уподо́бился еси́ безпло́тных чистоте́.

Наста́вником Боже́ственным и Честны́м Ду́хом пома́зан Богови́дным,/ мона́шествующих о́бразом чи́сто бесе́довал еси́/ и пребы́л еси́ многосве́тлою осия́емь заре́ю, Богоно́се,/ житие́ чисте́йшо стяжа́в.

Укрепи́вся си́лою Креста́, стра́сти увяди́л еси́ плотски́я/ и ум просвети́л еси́, о Ники́то всему́дре, прилежа́нием уче́ний духо́вных,/ Боже́ственнаго зре́ния бога́тство неиждива́емо пло́дствовав.

Целому́дрием, блаже́нне, просве́щся и чистото́ю,/ ко свяще́нному возведе́н был еси́ нача́льству:/ свяще́нства бо светле́йшею украси́лся еси́ оде́ждею,/ Боже́ственных та́инств, преподо́бне, хода́тай познава́емь.

Богоро́дичен: Превы́шши яви́лася еси́, Чи́стая,/ вся́кия ви́димыя и неви́димыя, Присноде́во, тва́ри,/ Зижди́теля бо родила́ еси́, я́ко благоволи́ воплоти́тися во утро́бе Твое́й,/ Его́же со дерзнове́нием моли́ спасти́ пою́щия Тя.

Пе́снь 3

Ирмо́с: Процвела́ е́сть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Небе́сное стяжа́в жи́тельство, преподо́бне,/ светови́ден и све́тел, благоче́стия, о Ники́то, был еси́ свети́льник,/ мно́гими укра́шен дарова́ньми.

Умертви́в мудрова́ния пло́ти твое́й, преподо́бне,/ доброде́телию оживи́л еси́ богому́дренно души́ Боже́ственное/ и жи́зни нетле́нныя сподо́бился еси́.

Ра́дуяся, препроводи́л еси́ твое́ житие́, сла́вне,/ преиспещре́н добро́тами и кра́сными богате́я дарова́ньми,/ в ни́хже утверди́ся се́рдце твое́.

Возсия́л еси́, я́ко со́лнце, мона́шествующих чино́м,/ доброде́тельми украша́емь, о Ники́то Богому́дре преподо́бне!/ Тем тя, ра́дующеся, ублажа́ем.

Богоро́дичен: Просвеща́ющаго концы́, Пресвята́я, родила́ еси́, пло́тию несозда́ннаго/ и пре́жде всех Отцу́ Собезнача́льнаго,/ те́мже Тя, Богоро́дицу, ве́рою чтим.

Седа́лен, глас 4.

Подо́бен: Ско́ро предвари́:

Водвори́лся еси́ в гора́х безмо́лвия, му́дре,/ воспита́лся еси́ во граде́х воздержа́ния я́ве,/ возвы́сився обою́ду, оста́вил еси́ долере́тныя сла́сти,/ жи́знь дости́гл еси́ Небе́сную, во оби́тель всели́вся,/ в ней же мо́лиши о нас Бо́га.

Сла́ва, и ны́не, Богоро́дичен:

Де́во Всенепоро́чная, я́же Пресу́щнаго Бо́га ро́ждшая,/ со безпло́тными Того́ непреста́нно моли́/ оставле́ние прегреше́ний и исправле́ния жития́ да́ти нам пре́жде конца́,/ ве́рою и любо́вию пою́щим Тя по до́лгу,/ еди́на Всепе́тая.

Крестобогоро́дичен:

Де́во Пренепоро́чная, Ма́ти Христа́ Бо́га,/ ору́жие про́йде Твою́ пресвяту́ю ду́шу,/ егда́ распина́ема ви́дела еси́ во́лею Сы́на и Бо́га Твоего́,/ Его́же, Благослове́нная, моля́щи не преста́й/ проще́ние прегреше́ний нам дарова́ти.

Пе́снь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Кореносе́чец страсте́й, Богоно́се, показу́емь,/ души́ чистото́ю богобо́рных исто́ргнул еси́ вся́кую душегу́бную пре́лесть,/ священнотаи́нниче прече́стне.

Взем побе́ды, пребога́те, вене́ц,/ в се́лех Небе́сных ны́не почива́еши, блаже́нне,/ стра́сти оттря́с и в безстра́стие, о́тче, оде́явся.

Же́ртву я́ко непоро́чну, о́тче, житие́ твое́ Христу́ прине́сл еси́,/ Боже́ственныя любве́ испо́лнен/ и по́стничества украша́емь добро́тою, преблаже́нне.

Вити́йства душетле́нныя, Богому́дре, е́реси я́сно изобличи́л еси́,/ Христо́ву чтущ Боже́ственную ико́ну, и Богома́тере, и святы́х всех,/ свяще́ннейший.

Богоро́дичен: Я́ко похвалу́, я́ко держа́ву ми́ра и утвержде́ние,/ я́ко приста́нище благоути́шно, я́ко весе́лию вино́вну,/ Тя, Пречи́стая, сла́вим,/ крася́щиися вси в сла́ве Твое́й.

Пе́снь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику Отцу́ Твоему́/ от но́щи неве́дения/ приведе́ние и́мамы.

Я́ко кро́ток, в земли́ кро́тких всели́лся еси́, Ники́то му́дре,/ побо́рник быв по и́стине, всеприснопа́мятне,/ и испове́дания венце́м све́тло украша́емь.

К Боже́ственному Све́ту ны́не преста́вился еси́, преподо́бне,/ Све́та быв сын возлю́блен,/ в ра́дости и красоте́ с ли́ки А́нгельскими ра́достно веселя́ся.

Неизрече́нныя сла́дости ра́йския был еси́ ны́не прича́стник,/ приста́нище бо всеблагоути́шное обурева́емым показа́лся еси́/ и а́лчущих, блаже́нне, препита́тель был еси́.

Богоро́дичен: Глаго́лы Твои́ помина́юще, ны́не Тя ублажа́ем:/ Тобо́ю, Пренепоро́чная, блаже́нство несказа́нное/ и жи́знь нестаре́емую и́стинно восприя́хом.

Пе́снь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Блаже́нных наде́жд получи́л еси́, о́тче всеблаже́нне,/ блаже́нства Влады́чня быв насле́дник и Боже́ственнаго осия́ния.

Светоно́сныя свещи́ име́я сугу́бы испове́дания твоего́ и по́стничества,/ в Небеса́ вмести́лся еси́,/ Богоно́се Ники́то пребога́те.

Наслажда́яся безконе́чныя и Боже́ственныя сла́дости/ в Небе́сных ны́не, о́тче, ски́ниих,/ о нас моли́ всех Влады́ку и Го́спода.

Богоро́дичен: Ны́не к Тебе́ прибега́ю, Пречи́стая,/ спаси́ мя мольба́ми Твои́ми и соблюди́,/ ели́ка бо хо́щеши, мо́жеши, я́ко Ма́ти Всемогу́щаго.

Конда́к, глас 2.

Подо́бен: Вы́шних ища́:

Небе́сный ум и житие́ стяжа́в,/ сия́еши я́сно, я́коже со́лнце, све́тлостию дел,/ просвеща́еши су́щия во тьме́ жите́йстей, о́тче Ники́то,/ и, приводя́ всех к Бо́гу,/ моли́ непреста́нно о всех нас.

Пе́снь 7

Ирмо́с: Богопроти́вное веле́ние/ беззако́ннующаго мучи́теля, высо́к пла́мень вознесло́ е́сть:/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Твоя́ кро́тость вельми́ в пе́рсть смири́ мучи́теля суровство́,/ ча́стыми мольба́ми сего́ умори́вши,/ ве́сть бо во́лю твори́ти боя́щихся Его́ Госпо́дь.

Гром догма́тов твои́х/ и светоно́сная мо́лния жития́ твоего́ мир уясни́,/ ве́рныя озаря́ющи Боговеща́нными сия́ньми, словесы́ же и дея́нии све́тло,/ священнотаи́нниче Богоблаже́нне.

Кре́постию вжиля́емь Уте́шителя,/ де́монских полко́в и се́тей ерети́ческих, Богому́дре, избежа́л еси́/ и к Небе́сней высоте́ возше́л еси́,/ с ли́ки безпло́тных ны́не водворя́йся.

Богоро́дичен: Храм была́ еси́ свяще́н вся хоте́нием, Де́во, Созда́вшего,/ Того́ бо вмести́ла еси́, все́ми Невмести́маго, мир обновля́юща./ Те́мже Тя, Богоро́дицу, пропове́дуем.

Пе́снь 8

Ирмо́с: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Вся́ко превзоше́д чу́вство, треблаже́нне,/ мы́сленному ны́не прибли́жился еси́ Све́ту, всече́стне,/ Боговиде́ния сподобля́емь и просвеще́ния исполня́емь, зовы́й:/ благослови́те, вся дела́ Госпо́дня, Го́спода.

Ме́ртвостию страсте́й я́ве облече́н,/ к живоно́сному возше́л еси́ ликова́нию, всеблаже́нне,/ благоче́стием разжиза́емь и доброде́тельми осия́емь, зовы́й:/ превозноси́те, вся дела́ Госпо́дня, Го́спода.

Вся́ку доброде́тель, Богому́дре, от младе́нства извы́к,/ при кончи́не по́двиг твои́х венце́м украша́емь благода́тным показа́лся еси́/ и по́честь прия́л еси́, поя́:/ превозноси́те, вся дела́ Госпо́дня, Го́спода.

Свы́ше нас ны́не назира́еши, о́тче, твоему́ Влады́це предстоя́,/ побе́ды, тезоимени́те, дерзнове́ние мно́го име́я/ и душе́внаго прося́, сла́вне, спасе́ния, священноявле́нне, ста́ду твоему́.

Богоро́дичен: Ты Отцу́ неразлу́чнаго, в ложесна́х богому́жно пожи́вша,/ безсе́менно зачала́ еси́ и несказа́нно родила́ еси́, Богороди́тельнице Пречи́стая:/ те́мже Тя, спасе́ние всех нас, познава́ем.

Пе́снь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Боже́ственныя све́тлости, я́ко чист, сподо́бился еси́,/ доброде́телей ви́ды облиста́яся/ и испове́дания венце́м я́ве украша́емь,/ те́мже всепра́зднственный пра́здник твой ублажа́ем.

Смы́сленно, блаже́нне, твою́ жи́знь соверши́л еси́, повеле́ньми Спа́са управля́емь,/ ны́не же, се́ни преше́дшей,/ прера́достно жи́знь ве́чную досто́йно получи́л еси́,/ богоявле́нно, свяще́ннейше.

Теку́щих бы́стро прете́кл еси́ мяте́ж,/ к ти́хому же, Ники́то, Ца́рства Христо́ва, ра́дуяся, устреми́лся еси́ приста́нищу,/ к нему́же нас наста́ви, о́тче,/ тя блажа́щия и твою́ па́мять почита́ющия.

Богоро́дичен: Тя свиде́ния се́нь прообразова́,/ в не́йже скрижа́ли, и ста́мна, и златы́й ковче́г,/ я́коже бо она́ о́ныя,/ та́ко и Ты Безнача́льнаго Сло́ва во утро́бе вмести́ла еси́,/ Богоро́дице, воплоща́ема.

Тропа́рь, глас 5:

Ра́дуйся, Богоневе́сто, же́зле та́йный,/ Цвет Неувяда́емый процве́тший,/ ра́дуйся, Влады́чице, Е́юже ра́дости наполня́емся/ и жи́знь насле́дствуем.