НА ВЕЧЕ́РНИ

На Го́споди, воззва́х: стихи́ры преподо́бныя, глас 6.

Подо́бен: Всю отложи́вше:

Тебе́ у́бо возбраня́ше/ честны́х взира́ния/ скверн пре́жде привлече́нное скверне́ние;/ твое́ же чу́вство/ и твоя́, Богому́драя, соде́янных со́весть/ к лу́чшим тебе́ обраще́ние соде́яша./ На ико́ну бо воззре́вши/ благослове́нныя Богоотрокови́цы,/ всех пока́явшися прегреше́ний твои́х,/ всехва́льная, пре́жних,/ со дерзнове́нием Честно́му Дре́ву поклони́лася еси́.

Место́м поклони́вшися/ ра́достно святы́м,/ доброде́тели напу́тное, спаси́тельнейшее отсю́ду прия́ла еси́,/ и зело́ потекла́ еси́ до́брое ше́ствие,/ и, струю́ преве́зшися Иорда́нскую,/ в Крести́телеве обита́лищи/ усе́рдно всели́лася еси́,/ и страсте́й свере́пство жи́тельством омрачи́ла еси́,/ истончава́ющи те́ла воздержа́нием,/ приснопа́мятная ма́ти,/ плотска́я стремле́ния.

В пусты́ню всели́вшися,/ твои́х страсте́й о́бразы благоче́стно истреби́ла еси́,/ Богови́днейшее изображе́ние в души́ написа́вши,/ доброде́телей ви́ды,/ и толи́ко просия́ла еси́,/ я́ко и на вода́х легко́ преходи́ти стопа́ми,/ и над земле́ю взима́тися/ во твои́х к Бо́гу моле́ниих./ И ны́не со дерзнове́нием,/ пресла́вная Мари́е,/ Христу́ предстоя́щи,/ моли́ся о душа́х на́ших.

Сла́ва, глас 2. Самогла́сен:

Душе́вная ловле́ния,/ и стра́сти плотски́я мече́м воздержа́ния посе́кла еси́,/ и мы́сленная согреше́ния молча́нием поста́ удави́ла еси́,/ и струя́ми слез твои́х пусты́ню всю напои́ла еси́,/ и прозябла́ еси́ нам покая́ния плоды́./ Те́мже твою́ па́мять, преподо́бная, пра́зднуем.

И ны́не, Богоро́дичен, или́ Крестобогоро́дичен:

Дре́ву кре́стному Тя, Иису́се, пригвожде́на/ зря́щи, Неискусобра́чная, пла́чущи, глаго́лаше:/ Ча́до сла́дкое, почто́ оста́вил еси́ Мя,/ ро́ждшую Тя, еди́ну,/ Све́те непристу́пный, Пребезнача́льнаго Отца́?/ Потщи́ся и просла́вися,/ я́ко да сла́ву получа́т Боже́ственную/ и́же Боже́ственныя стра́сти Твоя́ сла́вящии.

Тропа́рь, глас 8:

В тебе́, ма́ти, изве́стно спасе́ся, е́же по о́бразу,/ прии́мши бо крест, после́довала еси́ Христу́/ и, де́ющи, учи́ла еси́ презира́ти у́бо пло́ть, прехо́дит бо/ прилежа́ти же о души́ ве́щи безсме́ртней./ Те́мже и со А́нгелы сра́дуется, преподо́бная Мари́е, дух твой.

Кано́н, глас 4.

Пе́снь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.

Скве́рну прегреше́ний очи́сти смире́нныя моея́ души́, Твое́ю ми́лостию, Христе́,/ мглу и омраче́ние страсте́й отжени́ моли́твами преподо́бныя Твоея́.

Страстьми́ плотски́ми оскверни́вши душе́вное благоро́дие,/ воздержа́нием па́ки, о честна́я, твой ум просвети́ла еси́,/ туча́ми слез твои́х ду́шу уясни́вши.

Еги́пта страсте́й избе́гла еси́, я́ко от грехо́вна исто́чника,/ и, фарао́на изба́вльшися лю́таго оскверне́ния, безстра́стия ны́не зе́млю насле́довала еси́,/ и со А́нгелы лику́еши при́сно.

Богоро́дичен: Зря́щи Твою́ ико́ну, Влады́чице, Богороди́тельнице Чи́стая,/ и ро́ждшагося Сло́ва от Твоея́ пречи́стыя, Де́во, утро́бы,/ и пору́чницу Тя к Сему́ те́пле про́сит пресла́вная.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Возсмерде́шася душе́вныя и согни́шася твоя́ ра́ны,/ но исто́чником слез твои́х сия́ омы́ла еси́ те́пле.

Побежде́ни бы́ша тобо́ю де́монстии полцы́,/ и страстна́я взыгра́ния слеза́ми ура́нила еси́.

Я́ко у́тренний о́блак и я́коже ка́пля, ка́плющи, была́ еси́/ всем, пролива́ющи во́ды покая́ния спаси́тельнаго.

Богоро́дичен: Тя Предста́тельницу, Чи́стая, и спасе́ние, и кре́пость иму́щи,/ Креста́ свята́го дре́ву, честна́я, поклони́ся.

Ин конда́к, глас 3:

Блуда́ми пе́рвее преиспо́лнена вся́ческими,/ Христо́ва неве́ста дне́сь покая́нием яви́ся,/ а́нгельское жи́тельство подража́ющи,/ де́мона креста́ ору́жием погубля́ет./ Сего́ ра́ди Ца́рствия неве́ста яви́лася еси́, Мари́е пресла́вная.

Седа́лен, глас 8.

Подо́бен: Прему́дрости:

Взыгра́ния вся плотска́я обузда́вши боле́зньми по́стническими,/ му́жественное показа́ла еси́ души́ твоея́ мудрова́ние,/ Креста́ бо возжеле́вши о́браз ви́дети, себе́, приснопа́мятная, ми́ру распя́ла еси́,/ отону́дуже и к ре́вности жития́ непоро́чнаго усе́рдно воздви́гла еси́ себе́,/ всеблаже́нная, Мари́е пресла́вная./ Моли́ Христа́ Бо́га грехо́в оставле́ние пода́ти/ честву́ющим любо́вию святу́ю па́мять твою́.

Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию, вси ублажа́ем, ро́ди челове́честии,/ О́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мляй Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Пе́снь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Удали́лася еси́, бежа́вши, су́щих в ми́ре и сла́дких всех,/ еди́на же Еди́ному чи́сто приобщи́лася еси́/ кра́йним воздержа́нием и терпе́нием дел твои́х.

Теле́сная движе́ния и разжже́ния воздержа́нием пои́стинне изсуши́ла еси́,/ отону́дуже ду́шу украси́ла еси́, Мари́е всесла́вная,/ Боже́ственными виде́нии и де́тельми.

Доброде́тельною твое́ю си́лою, слеза́ми и посто́м кра́йним,/ моли́твою же и ва́ром, зимо́ю и нагото́ю/ прия́телище была́ еси́ Свята́го Ду́ха че́стно.

Богоро́дичен: К Твое́й ико́не прибе́гши, и из Тебе́ Рожде́ннаго, Мари́е Де́во,/ Тобо́ю ны́не обре́те жи́знь безсме́ртную, в раи́ лику́ющи.

Пе́снь 5

Ирмо́с: Ты, Го́споди, мой свет/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

В след Христа́ после́довала еси́, ра́дующися,/ нося́щи крест свой на ра́ме, Мари́е,/ и де́моны ура́нила еси́.

Показа́ла еси́ нам покая́ния лечбу́,/ показа́ла еси́ и стезю́,/ веду́щую па́ки к жи́зни неги́блющей.

Ты бу́ди ми, честна́я, засту́пница непобеди́ма/ и изба́ви страсте́й мя, боле́зни же вся́кия/ мольба́ми твои́ми ко Го́споду.

Богоро́дичен: На Твою́, Влады́чице Чи́стая, ико́ну взира́ше,/ Тебе́ всегда́ моля́щися,/ страсте́й напа́дания преподо́бная посрамля́ше.

Пе́снь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

По́том грехо́вную скве́рну омы́ла еси́,/ к нетле́нней же сла́ве твое́ю мы́слию смотря́ющи,/ ны́не обрела́ еси́ благопло́дие боле́зней твои́м, сла́вная.

Всем гре́шником, Мари́е, житие́ твое́ о́браз показа́ся,/ безме́рно согреши́вшим,/ в житии́ воста́ти и скве́рну очи́стити слеза́ми.

Уще́дри смире́нную мою́ ду́шу, Человеколю́бче,/ ю́же оскверни́х, де́я нечи́стая хоте́ния пло́ти моея́,/ но Ты мя преподо́бныя моли́твами поми́луй.

Богоро́дичен: Все́ю твое́ю душе́ю и се́рдцем возлюби́ла еси́ от Де́вы рожде́ннаго Бо́га Сло́ва,/ Жива́го и воплоще́нна,/ глас тебе́, преподо́бная, прине́сша.

Конда́к, глас 4.

Подо́бен: Вознесы́йся:

Греха́ мглы избежа́вши,/ покая́ния све́том озари́вши твое́ се́рдце, сла́вная,/ пришла́ еси́ ко Христу́,/ Сего́ Всенепоро́чную и святу́ю Ма́терь/ Моли́твенницу ми́лостивную принесла́ еси́./ Отону́дуже и прегреше́ний обрела́ еси́ оставле́ние/ и со А́нгелы при́сно сра́дуешися.

И́кос: 

Зми́я, дре́вле во Еде́ме запе́ншаго Е́ве пре́лестию дре́ва,/ низве́ргла еси́ в ров Дре́вом Кре́стным, сла́вная Мари́е,/ и, отбе́гши сла́сти, чистоты́ возжела́ла еси́,/ отону́дуже и с де́вами сподо́билася еси́ вну́трь черто́га вни́ти твоего́ Влады́ки,/ с си́ми наслади́тися досто́йно./ Того́ у́бо приле́жно моли́,/ я́ко да мно́гих грехо́в разреше́ние пода́ст/ и Своея́ жи́зни нас сподо́бит со А́нгелы при́сно ра́доватися.

Пе́снь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Ско́рбную и те́сную ше́ствовавши стезю́ я́ве,/ добро́тою доброде́телей уясни́вши ду́шу,/ Небе́сную дости́гла еси́ жи́знь неконча́емую,/ иде́же Свет безконе́чный е́сть Христо́с.

Я́же в ми́ре попра́вши вре́менная вся,/ ны́не лику́еши со все́ми во́инствы А́нгельскими, воспева́ющи:/ благослове́н еси́ в хра́ме сла́вы Твоея́, Го́споди.

Кова́рства вра́жия и ору́жия оскуде́ша вся/ кре́пким посто́м и моли́твою твое́ю, преподо́бная, и слеза́ми,/ и ны́не у́бо отго́нятся и страсте́й настоя́ния, Мари́е честна́я.

Богоро́дичен: Неискусобра́чно я́же Бо́га безпло́тна поро́ждши вои́стинну/ и Де́ва пребы́вши пои́стинне,/ Твое́ю си́лою, Всечестна́я, отгна́ла еси́ страсте́й и де́монов во́инства.

Пе́снь 8

Ирмо́с: Ру́це распросте́р, Дании́л/ льво́в зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Ве́сь сия́нием доброде́телей озари́вши ум, Мари́е сла́вная, Бо́гу бесе́довавши,/ пло́ть бо истни́вши посто́м мно́гим и по́мыслом благочести́вым, пе́ла еси́, ра́дующися:/ благослови́те, вся дела́ Госпо́дня, Го́спода.

Креста́ зна́мением себе́ огради́вши,/ Иорда́нския нога́ми немо́кренными твои́ми во́ды преплы́вши, Мари́е, ве́рно/ и Небе́снаго Христа́, Те́лу и Кро́ви Его́, прича́щшися, –/ ны́не отпуща́еши рабу́ Твою́, –/ рекла́ еси́.

Свяще́нник Боже́ственный Зоси́ма, таи́нник благода́ти,/ быстрину́ я́ко ви́де тя Иорда́нскую, сла́вная, преше́дшу немо́кренными нога́ми,/ стра́хом и тре́петом одержи́мь быв, ра́дуяся, поя́ше:/ благослови́те, вся дела́ Госпо́дня, Го́спода.

Богоро́дичен: Тобо́ю, Пренескве́рная, тлю и скве́рну всю оттрясе́,/ и облече́ся, Влады́чице, в ри́зу безсме́ртну,/ и Тобо́ю Твоему́ Сы́ну преподо́бная вопия́ше:/ благослови́те, вся дела́ Госпо́дня, Го́спода.

Пе́снь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем.

Ны́не нетле́нною и Боже́ственною вои́стинну пи́щею насыща́ема/ и Све́том наслажда́ющися мы́сленным и Невече́рним в Небе́сных се́лех,/ иде́же А́нгельстии чи́ни о нас Бо́га мо́лят.

Сла́вы теку́щия и тле́нныя же возгнуша́вшися, Мари́е,/ сла́ву и жи́знь насле́довала еси́ блаже́нную./ Христа́ моли́ о соверша́ющих твою́ всесвяту́ю па́мять всегда́.

Ви́ждь мою́ ско́рбь, преподо́бная, и стена́ние се́рдца,/ ви́ждь тесноту́ жи́зни моея́,/ спаси́ мя от греха́ моего́/ и ду́шу мою́ уще́дри твои́ми хода́тайствы ко Го́споду.

Богоро́дичен: Влады́чице Чи́стая Богоро́дице, гре́шников спасе́ние,/ приими́ мольбу́ сию́,/ изба́ви мя от грех мои́х,/ Твоему́ Сы́ну прибега́юща,/ моли́твами преподо́бныя Твоея́.

Свети́лен.

Подо́бен: Све́те неизме́нный:

О́браз покая́ния нам даде́ся, Мари́е,/ твои́м бо те́плым умиле́нием возврати́ побежде́ние,/ Засту́пницу стяжа́вши Богоро́дицу Мари́ю,/ с Не́юже о нас помоли́ся.

Богоро́дичен:

Свет возсия́вший безле́тный от Отца́ пре́жде век/ в ле́то ны́не напосле́док из Тебе́, Де́во, яви́ся на спасе́ние ми́ра,/ к Нему́же не преста́й о лю́дех Твои́х моля́щися.

Моли́тва

О вели́кая Христо́ва уго́днице, преподо́бная Мари́е! На Небеси́ Престо́лу Бо́жию предстоя́щи, на земли́ же ду́хом любве́ с на́ми пребыва́ющи, име́ющи дерзнове́ние ко Го́споду, моли́ спасти́ рабы́ Его́, к тебе́ с любо́вию притека́ющия. Испроси́ нам у Великоми́лостиваго Влады́ки и Го́спода ве́ры непоро́чное соблюде́ние, градо́в и ве́сей на́ших утвержде́ние, от гла́да и па́губы избавле́ние, скорбя́щим – утеше́ние, неду́гующим – исцеле́ние, па́дшим – возста́ние, заблу́ждщим – укрепле́ние, в дела́х благи́х преспе́яние и благослове́ние, сирота́м и вдови́цам – заступле́ние и отше́дшим от сего́ жития́ – ве́чное упокое́ние, всем же нам в де́нь стра́шнаго Суда́ одесну́ю страны́ о́бщники бы́ти и блаже́нный глас Судии́ ми́ра услы́шати: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра, и та́мо пребыва́ния во ве́ки получи́ти. Ами́нь.

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 4, те же, что и на хвали́тех (зри ниже́)

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х./ Тем на Небесе́х обре́л еси́ мзду трудо́в твои́х,/ де́монския погуби́л еси́ полки́/ и А́нгельския дости́гл еси́ чи́ны,/ и́хже житию́ безпоро́чно поревнова́л еси́,/ дерзнове́ние име́я ко Христу́ Бо́гу,/ мир испроси́ душа́м на́шим.

И ны́не, Богоро́дичен, или́ пра́здника.

На стихо́вне стихи́ры, глас 2.

Подо́бен: До́ме Евфра́фов:

Мона́хов наста́вниче,/ о́тче Евфи́мие,/ украси́вся доброде́тельми,/ Влады́це твоему́ предстои́ши,/ просвети́ пою́щия тя.

Стих: Честна́ пред Го́сподем/ сме́рть преподо́бных Его́.

Яви́лся еси́/ сосу́д избра́н/ и Бо́гу освяще́н,/ наста́вниче о́тче наш Евфи́мие,/ моли́ о пою́щих тя.

Стих: Что возда́м Го́сподеви о всех,/ я́же воздаде́ ми?

Дом доброде́тели/ све́тлостию, преподо́бне,/ ду́шу твою́/ Бо́гу соверши́л еси́,/ о́тче Евфи́мие.

Сла́ва, глас 8:

Преподо́бне о́тче,/ ми́ра красоты́ и пи́щи вре́менныя отню́д возненави́дев,/ мона́шеское житие́ па́че возлюби́л еси́,/ и А́нгелом собесе́дник бы́ти сподо́бился еси́,/ и, свети́льник многосве́тлый Русския земли́,/ чудесы́, я́ко второ́е со́лнце, сия́еши./ Но всех нас помина́й,/ соверша́ющих свяще́нную па́мять твою́,/ мы бо ча́да твоя́,/ и о́вцы слове́сных твои́х уче́ний,/ и тя на по́мощь призыва́ем,/ прося́ще тобо́ю прия́ти мир и ве́лию ми́лость.

И ны́не, Богоро́дичен или́ пра́здника.

Тропа́рь пи́сан на вели́цей вече́рни.

Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 5.

Подо́бен: Преподо́бне о́тче:

Преподо́бне о́тче, всеблаже́нне Евфи́мие,/ благода́ть прие́м Пресвята́го Ду́ха,/ от млады́х ногте́й Бо́га возлюби́л еси́/ и де́монов полки́ погуби́л еси́,/ те́сный пу́ть ше́ствовав,/ по́стником ты был еси́ похвала́/ и Боже́ственнаго Ду́ха орга́н./ Того́ у́бо моли́, Тому́ помоли́ся, преподо́бне,/ дарова́ти душа́м на́шим мир и ве́лию ми́лость.

Преподо́бне о́тче, Богоно́се Евфи́мие,/ я́ко светоза́рная звезда́, преше́л еси́ от восто́ка на за́пад,/ от земли́ изше́д Ни́жняго Нова́града,/ присе́льник был еси́ гра́ду Су́ждалю,/ и Бо́га узре́л еси́ мы́сленными очесы́,/ обещава́юща ти возда́ние бога́тно./ Того́ у́бо моли́, Тому́ помоли́ся, преподо́бне,/ дарова́ти душа́м на́шим мир и ве́лию ми́лость.

Преподо́бне о́тче, Богоно́се Евфи́мие,/ в незаходи́мая вшел еси́,/ и Свято́му Ду́ху прекра́сна оби́тель яви́лся еси́,/ ми́ра красоты́ отню́д возненави́дев,/ высо́кия черто́ги доброде́тельми предугото́вив,/ и, чуде́с дар прие́м от Бо́га,/ был еси́ о Христе́ собесе́дник/ и спо́стник преподо́бному Се́ргию./ С ни́мже моли́ Христа́ Бо́га/ дарова́ти душа́м на́шим мир и ве́лию ми́лость.

И́ны стихи́ры, глас 4.

Подо́бен: Я́ко до́бля:

Те́сный пу́ть ше́ствовал еси́,/ неукло́нным ду́хом,/ к животу́ веду́щим, препла́вая,/ по́стником ты был еси́ похвала́, Евфи́мие,/ кре́пко низложи́в де́монская наве́тования./ Тем получи́л еси́/ Небе́снаго Ца́рствия насле́дник бы́ти/ и непрестаю́щия наслажда́ешися красоты́.

Пресве́тлое житие́ твое́ А́нгелы удиви́/ и де́монская шата́ния я́ве устраши́,/ ве́рных же собра́ния све́тло украси́,/ к Небе́сному Христо́ву жили́щу/ повелева́я ше́ствовати всегда́./ Его́же моли́, от тли и бед изба́витися/ ве́рою творя́щим всечестну́ю па́мять твою́.

Пе́ние и похвалу́ Христу́/ приноси́л еси́ на всяк де́нь, о́тче,/ в пусты́ни жи́тельствуя,/ еди́ному Бо́гу возложи́в ду́шу и помышле́ние,/ я́ко вели́кий Моисе́й, в незаходи́мая вшел еси́./ Тем победи́л еси́ неви́димаго врага́/ и был еси́ чи́стое прия́телище,/ Боже́ственнаго Ду́ха орга́н.

Сла́ва, глас 6:

Мирски́й мяте́ж оста́вив/ и взем крест, после́довал еси́ Христу́ невозвра́тным по́мыслом,/ преподо́бнаго Диони́сия учени́к,/ любо́вию Христо́вою утверди́вся,/ ве́сь от ю́ности Бо́гу освяти́лся еси́,/ к Нему́ доброде́тельми приближа́яся,/ тле́нная бо земна́я небре́гл еси́,/ Небе́сное же обре́л еси́ бога́тство, ра́дуяся./ Кто испове́сть труды́ твоя́ и боле́зни?/ Или́ кий язы́к изрече́т жесто́кое твое́ житие́,/ бде́ние же и сухояде́ние,/ е́же на земли́ лега́ние,/ ума́ смире́ние и усте́н безмо́лвие,/ моле́ние непреста́нное и разсужде́ние доброразсу́дное,/ ху́дость ри́зную, па́мять сме́ртную?/ Ты врач, Богому́дре, был еси́,/ источа́я исцеле́ния душа́м и телесе́м челове́ческим,/ о́тче Евфи́мие,/ моли́ Христа́ Бо́га/ дарова́ти нам ве́лию ми́лость.

И ны́не, Богоро́дичен: Кто Тебе́ не ублажи́т:

Вход. Проки́мен дне. Чте́ния 3 (зри ниже́).

На лити́и стихи́ры, глас 2:

Воспое́м, ве́рнии,/ Боже́ственнаго и пречестна́го Христо́ва во́ина,/ преподо́бнаго Евфи́мия,/ на стра́сти бо вельми́ подвиза́ся в жи́зни вре́менней,/ в пе́ниих и поще́ниих о́браз быв свои́м ученико́м./ Того́ и Христо́с да́ром обогати́,/ Ему́же воззове́м:/ помина́й нас, чту́щих пресве́тлую па́мять твою́.

Исправле́ние ве́ры и о́браз кро́тости/ яви́ тя ста́ду Своему́/ пра́вды Со́лнце мы́сленное, Христо́с Бог,/ преподо́бне Евфи́мие,/ и́бо во гра́де Су́ждале благоуха́еши,/ иде́же сия́ют све́тло Боже́ственная твоя́ исправле́ния./ Тем мо́лимся тебе́:/ моли́ непреста́нно спасти́ ду́ши на́ша.

Глас 5: Богому́дре о́тче, сла́вне Евфи́мие,/ по́стников ты был еси́ похвала́,/ ми́ра красоты́ отню́д возненави́дев от ю́ности,/ Бо́га возлюби́л еси́/ и те́сный пу́ть ше́ствовал еси́./ Су́ждальский пресве́тлый свети́льниче/ и всея́ Руси́ те́плый засту́пниче,/ моли́ся о нас ко Го́споду,/ да спасе́т тебе́ ра́ди ду́ши на́ша.

Глас 6: Любо́вию Христо́вою, Богому́дре, просвеща́емь,/ душетле́нныя стра́сти победи́в,/ и я́ко па́стырь и́стинный упа́сл еси́ слове́сное ста́до,/ ко отце́м преста́вился еси́ в до́брей ста́рости/ и Бо́гу со А́нгелы, Евфи́мие, предстои́ши./ Того́ моли́ поми́ловати ду́ши на́ша.

Сла́ва, глас 6:

Дне́сь созыва́ет нас преподо́бнаго всеми́рное торжество́./ Прииди́те у́бо, празднолю́бцы,/ све́тло пра́зднуем в па́мять его́, глаго́люще:/ ра́дуйся, свети́льниче многосве́тлый,/ возводя́ ко Христу́ мона́хов мно́жества;/ ра́дуйся, гра́да Су́ждаля похвала́ и удобре́ние,/ и всех ве́рных благоути́шное приста́нище,/ и очище́ние боля́щих во гресе́х;/ ра́дуйся, Небе́сных чино́в сия́ние ви́дети сподо́бився,/ с ни́миже ны́не ра́дуешися, во сла́ве предстоя́ Христу́,/ Его́же моли́, преподо́бных удобре́ние, Евфи́мие,/ изба́вити ны от ви́димых и неви́димых враг/ и спасти́ ду́ши на́ша.

И ны́не, Богоро́дичен или́ пра́здника.

На стихо́вне стихи́ры, глас 6:

Преподо́бне о́тче Евфи́мие,/ земны́х маловре́меннаго жития́ избе́гл еси́,/ мона́шеское житие́ возлюби́в,/ и, А́нгелом собесе́дник и преподо́бным быв сожи́тель,/ де́монская погуби́л еси́ ополче́ния,/ мы бо пра́вый пу́ть тобо́ю ходи́ти уве́дехом/ и тя на по́мощь призыва́ем,/ прося́ще тобо́ю прия́ти мир и ве́лию ми́лость.

Стих: Честна́ пред Го́сподем/ сме́рть преподо́бных Его́.

Преподо́бне о́тче Евфи́мие,/ свети́льниче многосве́тлый Русския земли́,/ чудесы́ во гра́де Су́ждале,/ я́коже второ́е со́лнце, сия́я,/ но всех нас помина́й,/ соверша́ющих па́мять твою́./ Мы бо ча́да твоя́/ и твою́ па́мять све́тло пра́зднуем,/ о́тче преподо́бне,/ моли́ Христа́ Бо́га,/ да спасе́т ду́ши на́ша.

Стих: Что возда́м Го́сподеви о всех,/ я́же воздаде́ ми?

Преподо́бне о́тче Евфи́мие,/ ду́шу твою́ с те́лом очи́стив,/ и Свята́го Ду́ха прекра́сная оби́тель яви́лся еси́,/ И́же сла́вна тя конца́м, преблаже́нне, соде́я,/ в чудеса́х же вели́каго свети́льника,/ просвети́вша во мра́це су́щия,/ я́ко наста́вника мона́хов,/ соше́дшеся, велему́дренно ублажа́ем.

Сла́ва, глас 8:

Мона́хов мно́жества/ наста́вника тя почита́ем о́тче наш Евфи́мие,/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен или́ пра́здника.

Тропа́рь, глас 3:

Я́ко светоза́рная звезда́,/ прише́л еси́ от восто́ка на за́пад,/ оста́вив оте́чество твое́, Ни́жний Но́вград,/ и, доше́д Богоспаса́емаго гра́да Су́ждаля,/ в нем оби́тель сотвори́л еси́,/ и собра́л еси́ мона́хов мно́жества,/ и, прие́м дар чуде́с от Бо́га, о́тче Евфи́мие,/ был еси́ о Христе́ собесе́дник/ и спо́стник преподо́бному Се́ргию./ С ни́мже у Христа́ Бо́га испроси́ нам здра́вие, и спасе́ние,/ и душа́м на́шим ве́лию ми́лость.

И ны́не, Богоро́дичен или́ пра́здника.

НА У́ТРЕНИ

По 1-й стихоло́гии седа́лен, глас 8:

Мно́гим воздержа́нием, преподо́бне, житие́ украси́в,/ пу́ть показа́в, веду́щ в жи́знь доброде́тели смире́нием,/ ми́ра бо отве́ргся, и вся, я́же в ми́ре кра́сная, преоби́дев,/ Ева́нгельским уче́нием после́довал еси́,/ жесто́ким же житие́м пло́ть твою́ изнуря́я,/ го́рдаго зми́я воздержа́нием смири́л еси́./ Те́мже на Небесе́х водворя́ешися, Трисо́лнечному Божеству́ предстоя́./ Богогла́се Евфи́мие, моли́ Христа́ Бо́га/ согреше́ний оставле́ние дарова́ти/ чту́щим святу́ю па́мять твою́.

Сла́ва, и ны́не, Богоро́дичен:

Небе́сную две́рь и киво́т, пресвяту́ю го́ру,/ све́тлый о́блак воспои́м, неопали́мую купину́, слове́сный рай,/ Е́вы воззва́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́рови и оставле́ние дре́вних согреше́ний./ Сего́ ра́ди вопие́м Ей: моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся всесвято́му рождеству́ Твоему́.

По 2-й стихоло́гии седа́лен, глас 4:

Подо́бен: Ско́ро предвари́:

Посто́м украси́вшуся тебе́, и чистото́ю душе́вною,/ я́ко луча́ми пресве́тлыми, просвеща́еши ве́рныя, Евфи́мие блаже́нне./ Тем, твой святы́й светоно́сный де́нь ве́рою соверша́юще, благоче́стно вопие́м:/ я́ко име́я дерзнове́ние к Бо́гу, моли́ спасти́ся нам.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к жи́зни нетле́ния./ Те́мже Тя по до́лгу блажи́м вси, Де́во препросла́вленная,/ я́коже прорекла́ еси́.

По полиеле́и седа́лен, глас 1.

Подо́бен: Ка́мени запеча́тану:

Просвеща́емь светолу́чными заря́ми, преблаже́нне Евфи́мие,/ наслажде́ние Небе́сное прия́л еси́, ра́дуяся,/ я́ко вои́стинну чисте́йший хлеб Творцу́ был еси́,/ душе́вный ра́зум к вы́шним впери́в, сла́вне./ Сла́ва Да́вшему ти терпе́ние,/ сла́ва Венча́вшему тя,/ сла́ва Даю́щему тобо́ю всем исцеле́ние.

Сла́ва, и ны́не, Богоро́дичен:

Гаврии́лу веща́вшу Тебе́, Де́во,– ра́дуйся!/ со гла́сом воплоща́шеся всех Влады́ка/ в Тебе́, святе́м киво́те,/ я́коже рече́ пра́ведный Дави́д:/ яви́лася еси́, ши́ршая Небе́с,/ поноси́вши Зижди́теля Твоего́./ Сла́ва Все́льшемуся в Тя,/ сла́ва Проше́дшему из Тебе́,/ сла́ва Свободи́вшему нас рождество́м Твои́м.

Степе́нна, 1-й антифо́н 4-го гла́са. Проки́мен: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 8:

Пое́м в пе́снех и све́тлостех,/ па́мять твою́ почита́юще, о́тче Евфи́мие,/ я́ко бо многосве́тлая звезда́ возсия́л еси́ от восто́ка/ и озари́л еси́ за́падную страну́./ От ю́ности, прему́дре, мирски́й мяте́ж оста́вил еси́/ и на ра́мо и́го ле́гкое восприя́л еси́,/ я́ко преоби́дев тле́нная и до́лу влеку́щая мудрова́ния/ и к вы́шнему тече́нию, преблаже́нне, ра́достно устреми́вся,/ в незаходи́мая всели́лся еси́ богосия́нно,/ наш па́стырю и́стинный,/ моли́ Христа́ Бо́га спасти́ся душа́м на́шим.

Кано́н преподо́бнаго Евфи́мия, его́же краегране́сие: Ра́дуйся, Боже́ственная мона́шествующих сла́ва. Глас 2.

Пе́снь 1

Ирмо́с: Гряди́те, лю́дие,/ пои́м пе́снь Христу́ Бо́гу,/ разде́льшему мо́ре и наста́вльшему лю́ди,/ и́же изведе́ из рабо́ты еги́петския,/ я́ко просла́вися.

Ра́дуйся, исто́чниче, точа́щий струю́ оби́льную,/ от нея́же почерпа́ем целе́б благода́ть, прегреше́ний избавля́емся,/ любо́вию приходя́щии к тебе́, приснопа́мятне.

Святы́ню прие́м от Христа́ Бо́га от утро́бы, сла́вне,/ и яви́лся еси́ избра́нный сосу́д,/ духо́вную благода́ть всю прие́мый.

Да жи́зни прича́стник нетле́нныя яви́шися,/ привре́менная, о́тче му́дре, пренебре́гл еси́/ и, к Бо́гу преше́д, непреста́нно мо́лиши спасти́ся всем нам.

Богоро́дичен: Словесе́м прему́дрым Твои́х усте́н после́дующе,/ ра́дующеся, Пренепоро́чная, Тя ублажа́ем,/ бы́вшую нам вину́ неизрече́ннаго блаже́нства.

Пе́снь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ не́сть свят, я́коже Бог наш,/ и не́сть пра́веден, па́че Тебе́, Го́споди.

Всесве́тлый, Богому́дре, показа́лся еси́ столп, путево́ждствуя чи́ны мона́хов,/ о́блак же, осеня́ющ жре́бий Бо́жий и ли́ца неви́димых враг помрача́ющ/ благода́тию всех Царя́.

Стои́ши пред лице́м твоего́ Влады́ки, неосла́бным манове́нием моля́ся/ изба́витися ста́ду твоему́ от рабо́ты тьмы́, преподо́бне, и мучи́тельства страсте́й,/ твои́х бо моли́тв послу́шает Бог.

Пло́ти твоея́ двиза́ния умертви́в кре́пким поще́нием, Богоглаго́льниче,/ был еси́ оби́телище Влады́чне,/ Его́же умоли́ изба́витися скорбе́й и страсте́й смуще́ния/ к тебе́ прибега́ющим.

Богоро́дичен: Сви́ток Тя прови́де Иса́ия, в не́мже пло́тски Сло́во зна́менася,/ раздра́в рукописа́ние первозда́ннаго, е́же преступле́нием подписа́,/ и подаде́ оставле́ние рабо́ты нам.

Седа́лен, глас 8.

Подо́бен: Прему́дрости:

Отре́кся пло́ти Христа́ ра́ди и духо́вный яви́вся лю́дем води́тель,/ услы́шал еси́ словеса́ Боже́ственных та́йных уче́ний,/ мона́хов же яви́лся еси́ пра́вило пра́вости/ и стра́сти вся кре́пко попра́л еси́./ Тем и де́монская кова́рства до конца́ изгуби́л еси́,/ ко Христу́ зря всегда́, Богоно́се Евфи́мие,/ Его́же моли́ грехо́в оставле́ние пода́ти/ честву́ющим любо́вию святу́ю па́мять твою́.

Сла́ва, и ны́не, Богоро́дичен:

Со́лнца о́блаче разу́мнаго,/ Боже́ственнаго Све́та свети́льниче златокова́нный,/ нескве́рная, небла́зная, всенепоро́чная Влады́чице,/ омраче́нную ду́шу мою́ ослепле́нием страсте́й/ безстра́стия заре́ю просвети́, молю́ся,/ и оскверне́ное ми се́рдце омы́й пото́ки умиле́ния, покая́ния же слеза́ми,/ и от тиме́ния мя очи́сти дел мои́х, да любо́вию зову́ Ти:/ Богоро́дице Присноде́во,/ моли́ Христа́ Бо́га прегреше́ний оставле́ние пода́ти ми,/ Тебе́ бо име́ю наде́жду, раб Твой.

Пе́снь 4

Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.

Жела́нием Боже́ственным распали́вся,/ разгре́яв твое́ се́рдце, жела́нная пости́гл еси́ до конца́, Богому́дре о́тче,/ оста́вив землены́х пристра́стие,/ единосе́льник Вы́шних был еси́ служи́телей.

Ласка́ния све́рстников, преподо́бне, попра́л еси́ всеобра́зно,/ вни́де бо раче́ние Соде́теля в тя, Богому́дре, те́пле,/ и до́льних мра́чная жела́ния до конца́ отри́нул еси́.

На па́жить чи́сту возгна́в воздержа́ния ста́до твое́, о́тче,/ ко исто́чнику приве́л еси́ нему́тному безстра́стия,/ разу́мныя зве́ри побежда́я,/ е́же ны́не моли́твами твои́ми спаса́й.

Богоро́дичен: Се Тя ро́ди сла́вят родо́в, я́коже прорекла́ еси́, Отрокови́це:/ Созда́теля бо была́ еси́ пала́та и Боже́ственный храм,/ в не́мже всели́ся Высоча́йший, пло́тию обло́жся да спасе́т нас.

Пе́снь 5

Ирмо́с: Просвеще́ние во тьме́ лежа́щих,/ спасе́ние отча́янных, Христе́ Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м:/ ино́го бо, ра́зве Тебе́, бо́га не зна́ю.

Ве́сь Бо́гу прилежа́, о́тче, в пусты́нях мраз зи́мный терпе́л еси́ до́блественно, и ле́тний нося́ вар,/ и был еси́ дом му́дрости Бо́жия,/ доброде́тельным сия́нием многообра́зно украша́емь.

Му́жески наступи́л еси́ на поще́ние, чревонеи́стовства зми́я не прие́м сове́тника, о́тче,/ но а́лчбою, и моли́твами непреста́нными, и чистото́ю соедини́вся Бо́гу,/ прича́стник был еси́ пи́щи безсме́ртныя.

Доброде́телей вшед во о́блак,/ скрижа́ли прия́л еси́, блаже́нне, я́ко Моисе́й, Богоначерта́нныя:/ мона́шествующих мно́жества научи́л еси́ от веще́ственных всех ошаява́тися,/ возводя́ на го́ру Боже́ственнаго зна́ния.

Богоро́дичен: Яви́ся, Чи́стая, пра́отцу ле́ствица, Небе́с вы́шши,/ иму́щи тве́рдое водруже́ние:/ из Тебе́ бо Бог, вопло́щся, показа́ся и совокупи́ разстоя́щаяся пре́жде./ Тем Тя, Богоро́дицу, ве́рнии, сла́вим.

Пе́снь 6

Ирмо́с: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гла́се хвале́ния,/ и́стины же ду́хом пожру́ Тебе́.

Пострека́емь Влады́чнею любо́вию, оста́вил еси́ вся до́льная/ и Тому́ после́довал еси́, на ра́мо и́го ле́гкое взем му́жески,/ благоду́шия тезоимени́те.

Нака́зан неизрече́нных ра́зуму, блаже́нне,/ науча́л еси́ твое́ ста́до Небе́сная разумева́ти/ и страсте́й наше́ствия отгоня́ти твои́ми поуче́ньми.

Житие́ твое́ равноа́нгельно, о́тче, бы́сть,/ дерзнове́ние тебе́ даде́ держа́й вся Госпо́дь/ страсте́й изба́вити твое́ ста́до./ Те́мже Христа́ о всех нас умоли́.

Богоро́дичен: Разуме́в Твое́ неизрече́нное, Чи́стая, та́инство,/ го́ру присе́нную Авваку́м Тя провозвести́:/ из Тебе́ бо Соде́тель, за милосе́рдие вопло́щся,/ дре́вняя отъя́т изрече́ния.

Конда́к, глас 2.

Подо́бен: Вы́шних ища́:

Волне́ний мно́жество невла́жно преходя́,/ безпло́тныя враги́ струя́ми слез твои́х погрузи́л еси́,/ Богому́дре Евфи́мие преподо́бне,/ тем и чуде́с дар прия́л еси́,/ моли́ непреста́нно о всех нас.

И́кос:

Отве́рзи моя́ устна́, преблаже́нне, Богоприя́тными твои́ми моли́твами,/ Бо́гу предстоя́, всесла́вне Евфи́мие,/ да воспою́ Боже́ственное твое́ житие́/ и возглаго́лю досто́йно доброде́тели твоя́,/ я́же на земли́ Христа́ Бо́га ра́ди соверша́л еси́,/ столп бо яви́лся еси́ и пра́вило мона́хов све́тло,/ равноа́нгельно стяжа́в житие́,/ в незаходи́мая вои́стинну всели́лся еси́,/ моли́ непреста́нно о всех нас.

Пе́снь 7

Ирмо́с: Купина́ в горе́ огненеопа́льная/ и росоно́сная пе́щь халде́йская я́ве предписа́ Тя, Богоневе́сто:/ Боже́ственный бо, Невеще́ственный в веще́ственнем чре́ве, о́гнь неопа́льно прия́ла еси́./ Те́мже из Тебе́ ро́ждшемуся пое́м:/ благослове́н еси́, Бо́же оте́ц на́ших.

Авраа́мский стяжа́в нрав, прему́дре,/ от земли́ изше́д Ни́жняго Нова́града, пресе́льник был еси́ Су́ждалю,/ и Бо́га узре́л еси́, обещава́юща ти возда́ние бога́тно./ Тем, веселя́ся, усе́рдно пел еси́:/ благослове́н Бог оте́ц на́ших.

Распаля́емь ду́хом, преподо́бне, ко́зни вра́жия разори́л еси́,/ ору́жием огра́ждься нас ра́ди пригво́ждшагося на Кресте́./ Тем, веселя́ся, усе́рдно пел еси́:/ благослове́н Бог оте́ц на́ших.

К горе́ моли́твы приступи́л еси́,/ и, вшед во о́блак Ду́ха, Бо́жия за́дняя ви́дел еси́,/ и, сла́ву прие́мь разсужде́ния,/ был еси́, о́тче, столп непоколе́блен./ Тем приле́жно моли́ изба́витися искуше́ния вра́жия пою́щим тя.

Богоро́дичен: Зако́на Испо́лнителя чревоноси́ла еси́, пре́жде век су́ща Го́спода вся́ческих,/ Сы́на, Прему́дрость же и Си́лу,/ напосле́док, Пречи́стая, па́че естества́ на обновле́ние земны́м./ Тем благоче́стно, Чи́стая, из Тебе́ ро́ждшемуся зове́м:/ благослове́н Бог оте́ц на́ших.

Пе́снь 8

Ирмо́с: В пе́щь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода,/ и превозноси́те во вся ве́ки.

Сле́зными твои́ми тече́нии огнепа́льныя стра́сти поже́гл еси́,/ гее́нскаго пла́мене страх отгна́л еси́, о́тче му́дре,/ соверше́нною любо́вию Созда́теля своего́,/ примеси́вся стра́хом во вся ве́ки.

Я́коже Ено́х, к Бо́гу преста́вився, от Него́ прия́т был еси́, о́тче,/ и с вы́шними ликостоя́нии водворя́ешися, и пое́ши:/ вся дела́ Госпо́дня, Го́спода по́йте и превозноси́те во вся ве́ки.

Ны́не нетле́нных даро́в наслажда́яся/ и трисо́лнечныя све́тлости исполня́яся, блаже́нне,/ певцы́ твоя́ страсте́й тьмы́ моли́твами твои́ми изба́ви,/ да досто́йно Христа́ славосло́вим.

Богоро́дичен: Кля́тву разруши́ла еси́ дре́внюю, Пречи́стая, земны́х,/ неизрече́нным сло́вом Бо́га заче́нши,/ воплоще́нна из Тебе́ за милосе́рдие, Пренепоро́чная Влады́чице,/ Его́же превозно́сим во ве́ки.

Пе́снь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Просвеще́н добро́тою по́стническою, о́тче,/ и оде́ян ри́зою нетле́ния, Евфи́мие, и венце́м даро́в укра́шен,/ Влады́це всех предстои́ши, ра́дуяся.

В пребыва́лища присноживу́щая всели́лся еси́, блаже́нне,/ иде́же апо́столов собо́р и мно́жество му́ченик,/ преподо́бных собра́ние, проро́ков ликова́ния,/ воздая́ния боле́зней от Бо́га прии́м досто́йно, Богому́дре достосла́вне.

Всесве́тел, Богоглаго́льниче, был еси́,/ заря́ми све́та трисо́лнечнаго све́тло озаря́емь,/ испроси́ прегреше́ний разреше́ние,/ и лю́тых избавле́ние, и злых отчужде́ние/ всем, любо́вию к тебе́ притека́ющим.

Богоро́дичен: Воплоти́вся неизрече́нно Влады́ка всех из Тебе́, Богороди́тельнице Мари́е,/ соверше́н бы́сть челове́к, поро́ждься,/ я́ко пре́жде рождества́ Де́ву сохрани́ Тя чи́сту,/ Его́же моли́ спасти́ от бед ду́ши на́ша.

Свети́лен.

Подо́бен: Жены́, услы́шите:

Мирска́го злостра́стия, я́ко тру́дна, избе́гл еси́/ и воздержа́нием пло́ть увяди́л еси́,/ обнови́л же еси́ душе́вную кре́пость, преподо́бне,/ и сла́вою обогати́лся еси́ Небе́сною, приснопа́мятне,/ тем моля́ся не преста́й о нас ко Го́споду.

Богоро́дичен:

Ужа́сное Твое́ предста́тельство, Мари́е Богоукраше́нная,/ и стра́шная Твоя́ сла́ва по всей земли́./ О Тебе́ вси ны́не хва́лимся,/ Тя Хода́таицу иму́ще к Сы́ну и Созда́телю Твоему́,/ неусы́пною Твое́ю моли́твою да спасе́мся вси.

На хвали́тех стихи́ры, глас 4.

Подо́бен: Я́ко до́бля:

Труды́ по́стническими твою́ ду́шу вооружи́в,/ плотска́я увяди́л еси́, преподо́бне, мудрова́ния,/ и ум, сла́вне, соде́лал еси́ Боже́ственныя Тро́ицы жили́ще,/ и возвы́сился еси́, иде́же му́чеников во́инства/ и добро́та недомы́сленная,/ проро́ков ликова́ния, преподо́бных собра́ния,/ пра́ведных ра́дование./ С ни́миже ны́не ра́дуешися,/ в сла́ве предстоя́ Христу́,/ со дерзнове́нием моли́ся о душа́х на́ших.

Бла́гости навы́к, трезвя́ся,/ от ю́ности бо́дрствуя во всех, благо́ю со́вестию,/ умо́м преочище́нным и душе́ю,/ преподо́бне Евфи́мие,/ Небе́сных чино́в сия́ния/ уви́дети сподо́бился еси́./ С ни́миже ны́не ра́дуешися,/ во сла́ве предстоя́ Христу́,/ со дерзнове́нием моли́ся о душа́х на́ших.

Пресве́тлое житие́ твое́,/ преподо́бне Евфи́мие,/ А́нгелы удиви́ и де́монская шата́ния я́ве устраши́,/ ве́рных же собра́ния све́тло украси́,/ к Небе́сному Христо́ву жили́щу/ повелева́я ше́ствовати всегда́./ Его́же моли́ от тли и бед изба́витися/ ве́рою творя́щим всечестну́ю па́мять твою́.

Сла́ва, глас 8:

Прииди́те, празднолю́бцы, духо́вный лик совокупи́вше,/ честно́е торжество́ на́шего засту́пника ра́достно восхва́лим/ и благода́рственныя пе́сни принесе́м, глаго́люще:/ ра́дуйся, преподо́бне Евфи́мие,/ свети́льниче све́тлый,/ и́же ми́ра концы́ просвеща́я чудесы́./ Ра́дуйся, и́же те́ло изнури́в,/ я́ко вои́стинну во́ин Христа́ Бо́га,/ на стра́сти вельми́ подвиза́лся еси́ в жи́зни привре́менней/ ве́чныя ра́ди блаже́нныя жи́зни./ Ра́дуйся, похвало́ мона́хов и удобре́ние/ и сто́лпе неподви́жимый, скорбя́щих Боже́ственная ра́досте/ и оби́димым те́плый побо́рниче./ И ны́не, преблаже́нне Евфи́мие,/ не преста́й моля́ся Христу́ Бо́гу/ о и́же ве́рою и любо́вию творя́щих/ приснора́достную и всепра́зднственную па́мять твою́.

И ны́не, Богоро́дичен или́ пра́здника.

Славосло́вие вели́кое.

НА ЛИТУРГИ́И

Блаже́нны свята́го, от кано́на пе́сни 3-я и 6-я. Проки́мен, глас 7: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех: Апо́стол к Гала́том, зача́ло 213. Аллилу́ия, глас 8: Блаже́н муж, боя́йся Го́спода: Ева́нгелие от Луки́, зача́ло 24. Прича́стен: В па́мять ве́чную:

Моли́тва

Преподо́бне и преблаже́нне о́тче наш Евфи́мие, вонми́ нам, к тебе́ смире́нно припа́дающим и твоего́ заступле́ния те́пле прося́щим. Ве́си не́мощи на́ша, ве́си грехи́ на́ша, но и усе́рдие на́ше не утаи́ся от Тебе́. Умоли́ Ми́лостиваго Спаси́теля на́шего, Го́спода Иису́са Христа́, дарова́ти нам оставле́ние мно́гих согреше́ний на́ших и утверди́ти нас на пути́ де́лания за́поведей Его́. Огради́ нас твои́ми моли́твами от всех искуше́ний и бед, отврати́ належа́щия нам ско́рби и напа́сти, да́руй нам в здра́вии, ми́ре, тишине́ и благоугожде́нии Бо́гу провожда́ти дни жития́ на́шего; испроси́ нам вре́мя на покая́ние и отве́т благоприя́тен на стра́шнем Суди́щи Христо́ве, да с тобо́ю и со все́ми избра́нными сла́вим ве́чно Отца́ и Сы́на и Свята́го Ду́ха. Ами́нь.

НА МА́ЛОЙ ВЕЧЕ́РНИ

На Го́споди воззва́х: стихи́ры, глас 1.

Подо́бен: О, ди́вное чу́до:

О, ди́вное чу́до!/ Просвеще́нный свы́ше,/ в Бо́лгарстей стране́/ явля́ется христолюби́вый Авраа́мий,/ про́поведию о Христе́/ побежда́ет и посрамля́ет злове́рныя,/ претерпе́в же от них мно́гия му́ки,/ коне́чне мече́м во главу́ усека́ется,/ и, та́ко сочета́вся Христу́,/ мо́лит спасти́ся/ душа́м на́шим.

О, ве́лие дарова́ние гра́ду Влади́миру!/ а́ки бога́тство Небе́сное/ принесо́шася в о́нь из страны́ Бо́лгарския/ нетле́нныя мо́щи свята́го му́ченика Авраа́мия/ на облегче́ние вся́ких скорбе́й/ и исцеле́ние боле́зней,/ на отгна́ние мглы страсте́й,/ кому́ждо в приключи́вшихся печа́лех на утеше́ние/ и всем нам во извеще́ние,/ я́ко ты, чудотво́рче,/ на Небеси́ мо́лиши Христа́ Бо́га/ спасти́ся душа́м на́шим.

О, неизрече́нная прему́дрость Бо́жия!/ И́хже предуста́ви Бог, тех и призва́;/ и́хже призва́, сих и оправда́;/ а и́хже оправда́, сих и просла́ви;/ на тебе́, му́чениче, сбы́сться сие́ сло́во апо́стола./ Ви́дя Госпо́дь, я́ко избра́н еси́ сосу́д/ и Сы́на Бо́жия Христа́ пропове́дал еси́,/ претерпе́в за Него́ му́ки,/ сотвори́ тя сла́вна чудесы́,/ я́же показу́еши всем, чту́щим любо́вию святу́ю па́мять твою́./ Те́мже моли́ся, страстоте́рпче,/ спасти́ся душа́м на́шим.

Сла́ва, глас то́йже:

Ны́не наста́ па́мять му́ченика Авраа́мия:/ сего́ ра́ди, ве́рнии, соше́дшеся,/ с ве́рою и любо́вию восхва́лим его́ пе́сньми и возопие́м ему́:/ ра́дуйся, всем страстоте́рпцем соприча́стниче/ и испове́дниче Христо́в Авраа́мие,/ я́ко вене́ц нетле́нный прия́л еси́ на версе́ твое́м, всече́стне./ Ра́дуйся, я́ко ны́не водворя́ешися с му́ченическими ли́ки,/ Све́та невече́рняго сподобля́емь./ Ра́дуйся, я́ко Тро́ице предстои́ши со А́нгелы,/ Ю́же непреста́нно моли́/ спасти́ся душа́м на́шим.

И ны́не, Богоро́дичен, глас то́йже:

Небе́сных чино́в ра́дование,/ на земли́ челове́ков кре́пкое предста́тельство,/ Пречи́стая Де́во, спаси́ ны,/ и́же к Тебе́ прибега́ющим:/ я́ко на Тя упова́ние по Бо́зе, Богоро́дице, возложи́хом.

На стихо́вне стихи́ры, глас 2:

Дом пра́выя ве́ры был еси́, му́чениче Авраа́мие,/ е́юже испове́дав Христа́ и мучи́телей посрами́в,/ вене́ц нетле́нный прия́л еси́ на Небеси́,/ иде́же моли́, му́чениче,/ дарова́ти душа́м на́шим ве́лию ми́лость.

Стих: Возвесели́тся пра́ведник о Го́споде/ и упова́ет на Него́.

Дом му́жества и кре́пости яви́лся еси́,/ страда́льче и му́чениче Авраа́мие!/ И́стинную ве́ру пред враги́ пропове́дал еси́,/ угаси́в злове́рие излия́нием кро́ве твое́й,/ ника́коже во уме́ твое́м мы́сля отрещи́ся Христа́ Бо́га,/ Ему́же моли́ся/ дарова́ти душа́м на́шим ве́лию ми́лость.

Стих: Насажде́ни в дому́ Госпо́дни,/ во дво́рех до́му Бо́га на́шего процвету́т.

Дом тве́рдаго испове́дания Христо́вы ве́ры/ яви́лся еси́, страстоте́рпче Авраа́мие,/ многообра́зная муче́ния претерпе́л еси́,/ желе́зом уязвля́емь, огне́м распаля́емь и мече́м скончава́емь,/ непрекло́нен пребы́л еси́ во испове́дании Христа́ Бо́га,/ Его́же моли́/ дарова́ти душа́м на́шим ве́лию ми́лость.

Сла́ва, глас 6:

Дне́сь све́тло пра́зднуем свяще́нную па́мять/ му́ченика и чудотво́рца Авраа́мия,/ пропове́дав бо Христа́,/ прия́т от мучи́телей сме́рть непови́нную/ и ны́не водворя́ется с ли́ки му́чеников,/ поя́ и славосло́вя Го́спода,/ Его́же мо́лит дарова́ти душа́м на́шим ве́лию ми́лость.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная,/ возрасти́вшая нам Плод живота́./ Тебе́ мо́лимся, моли́ся, Влады́чице,/ со Авраа́мием му́чеником и со все́ми святы́ми,/ поми́ловати ду́ши на́ша.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди воззва́х: стихи́ры, глас 2.

Подо́бен: Ки́ими похва́льными:

Ки́ими духо́вными пе́сньми/ восхва́лим му́ченика и чудотво́рца Авраа́мия,/ всем ве́рным те́плаго засту́пника,/ земли́ Русстей удобре́ние/ и ве́рою лобыза́ющим честны́е мо́щи его́ – тве́рдое огражде́ние,/ его́же ра́ди моли́тв Христо́с Бог/ да́рует нам ве́лию ми́лость.

Ки́ими благогове́йными усты́/ воспои́м Авраа́мия, Христо́ва страстоте́рпца,/ тече́ние соверши́вша благоче́стно,/ моли́твами свои́ми устроя́юща вся блага́я душа́м и телесе́м на́шим/ от Вседержи́тельныя руки́ Христа́ Бо́га,/ име́ющаго мно́жество щедро́т и ве́лию ми́лость.

Ки́ими похва́льными венцы́/ почти́м пресла́внаго страстоте́рпца Авраа́мия,/ предстои́т бо Престо́лу Влады́ки Христа́ Бо́га на́шего,/ ве́лию благода́ть от Него́ прие́м,/ всем притека́ющим с ве́рою то́чит цельбы́ от моще́й свои́х/ и умоля́ет Христа́ Бо́га/ дарова́ти всем мир и ве́лию ми́лость.

Сла́ва, глас 8:

Прииди́те, благове́рнии лю́дие,/ восхва́лим вели́каго страстоте́рпца и чудотво́рца Авраа́мия,/ и́же пострада́ Христа́ ра́ди/ и живо́т свой за Него́ положи́,/ и ны́не пребыва́ет у Него́ в Го́рних селе́ниих,/ и пра́ведною свое́ю душе́ю, я́ко со́лнце, сия́ет,/ на земли́ же чудесы́ свои́ми,/ а́ки луча́ми све́та, всех осиява́ет:/ честны́я бо его́ мо́щи,/ а́ки многоцеле́бный исто́чник,/ подаю́т всем, с ве́рою притека́ющим, благода́ть и исцеле́ние./ Те́мже мо́лим его́ испроси́ти нам у Христа́ Бо́га/ спасе́ние и ве́лию ми́лость.

И ны́не, Богоро́дичен.

Вход. Проки́мен дне. И чте́ния.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́, я́же от нача́ла, кто слы́шана сотвори́т вам?/ Да приведу́т свиде́тели своя́ и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель,– глаго́лет Госпо́дь Бог,–/ и о́трок Мой, Его́же избра́х./ Да позна́ете и ве́руете Ми, и уразуме́ете, я́ко Аз е́смь;/ пре́жде Мене́ не бы́сть ин бог и по Мне не бу́дет./ Аз е́смь Бог, и не́сть, ра́зве Мене́, спаса́яй./ Аз возвести́х и спасо́х, уничижи́х и не бе в вас чужди́й./ Вы Мне свиде́тели, и Аз Госпо́дь Бог./ И еще́ от нача́ла Аз е́смь,/ и не́сть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зами бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их,/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т:/ су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющийся На́нь разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и, бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же е́сть му́дрость челове́ком/ и во́зраст ста́рости – житие́ нескве́рно./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́,/ или́ ле́сть прельсти́т ду́шу его́./ Раче́ние бо зло́бы помрача́ет до́брая,/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 3:

Прииди́те, мучениколю́бцы вси,/ пе́сньми и псалмы́ духо́вными/ возблагодари́м Христа́ Бо́га на́шего,/ дарова́вшаго нам му́ченика и чудотво́рца Авраа́мия,/ и́же с весе́лием претерпе́ ка́зни лю́тых мучи́телей/ за Христа́ Бо́га на́шего,/ от Него́же по́двигов по́честь прия́,/ и ны́не в ве́чных селе́ниих с ли́ки му́ченик/ про́сит очище́ния душа́м на́шим/ и ве́лия ми́лости.

Прииди́те, правове́рнии,/ до́бляго му́ченика Авраа́мия/ свяще́нное торжество́ соверши́м дне́сь:/ любве́ бо ра́ди Христо́вы/ кра́сная ми́ра сего́ вся презре́/ и вда́ся мучи́телем на муче́ние, не убоя́вся мук,/ и на Небеса́ восте́кл взира́ти/ добро́ту неизрече́нную Спа́са на́шего,/ Его́же про́сит поми́ловатися душа́м на́шим.

Прииди́те вси, возра́дуемся дне́сь Го́сподеви/ в па́мять страстоте́рпца Авраа́мия:/ егда́ бо пренесе́ние честны́х его́ моще́й бя́ше в град Влади́мир,/ тогда́ вели́кий кня́зь Гео́ргий со кня́зи и святи́тели/ срето́ша их с ве́лиею ра́достию,/ лю́дие же, зря́ще многострада́льное и нетле́нное твое́ те́ло,/ со слеза́ми вопия́ху:/ о страстоте́рпче! ко́е благохвале́ние/ честно́му твоему́ пренесе́нию сотвори́м?/ Недоуме́ем и удивля́емся твоему́ милосе́рдию,/ е́же на нас показа́л еси́;/ страстоте́рпче у́бо Авраа́мие,/ сохрани́ моли́твами твои́ми и вся,/ сла́вящия святы́я по́двиги твоя́,/ и пребу́ди вы́ну моли́твенником/ о спасе́нии душ на́ших.

Сла́ва, глас 5:

Дне́сь красу́ется град Влади́мир/ Боже́ственным сокро́вищем моще́й твои́х,/ оби́тель твоя́, ликовству́ющи, ра́дуется,/ и правосла́внии твои́ми чудесы́, му́чениче Авраа́мие, хва́лятся,/ ты же моли́ Христа́ Бо́га на́шего/ дарова́ти нам ве́лию ми́лость.

И ны́не, Богоро́дичен.

На стихо́вне стихи́ры, глас 8:

Помина́им, бра́тие,/ страстоте́рпца Христо́ва Авраа́мия/ и подража́им тве́рдой ве́ре его́,/ многострада́льное его́ те́ло/ обле́кшей в нетле́ние,/ преднапису́ющи о́браз о́бщаго воскресе́ния.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Ве́лие Бо́жие дарова́ние тебе́,/ му́ченице Авраа́мие,/ всю бо кре́пость мучи́телей победи́л еси́,/ и прия́л еси́ нетле́нный вене́ц от руки́ Вседержи́теля,/ на земли́ сия́вши мно́гими чудесы́,/ на Небеси́ предстои́ши Царю́ и Влады́це/ и мо́лиши Его́ всем нам дарова́ти/ мир и ве́лию ми́лость.

Стих: Храни́т Госпо́дь вся ко́сти их,/ и ни еди́на от них сокруши́тся.

Притеце́м, бра́тие,/ к ра́це моще́й страстоте́рпца Авраа́мия/ и подиви́мся, ка́ко храни́т Госпо́дь/ вся ко́сти избра́нных Свои́х/ и ни еди́на от них сокруши́тся./ Те́мже у́бо ве́рою и любо́вию/ просла́вим Христа́ Бо́га,/ подаю́щаго нам мир и ве́лию ми́лость.

Сла́ва, глас 6:

Сра́дуйтеся нам, Русстии собо́ри, дне́сь/ в све́тлой па́мяти страстоте́рпца Авраа́мия,/ подаю́щаго от нетле́ннаго сокро́вища моще́й свои́х/ благоуха́ние Свята́го Ду́ха./ Те́мже у́бо соше́дшеся, о́бщий лик тому́ соста́вим,/ пе́сньми Боже́ственными зову́ще:/ помина́й ны, му́чениче,/ и за ны Христу́ моли́ся,/ дарова́ти нам ми́лость в Де́нь су́дный.

И ны́не, Богоро́дичен: Творе́ц и Изба́витель:

Тропа́рь, глас 4:

Дне́сь, благове́рнии лю́дие, соше́дшеся,/ восхва́лим до́бляго сего́ му́ченика и страда́льца Авраа́мия,/ сей бо, укрепля́емь си́лою Бо́жию,/ ду́шу свою́ положи́ за Христа́,/ мно́го пострада́в от злове́рных болга́р./ Сего́ ра́ди от Го́спода вене́ц прия́т/ и ны́не предстои́т Ему́/ и мо́лится о гра́де сем/ и о всех нас, чту́щих па́мять его́.

Сла́ва, и ны́не, Богоро́дичен.

НА У́ТРЕНИ

На Бог Госпо́дь: тропа́рь свята́го два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1:

Све́тлый и всепра́зднственный твой де́нь, му́чениче Авраа́мие,/ созыва́ет нас духо́вно пра́здновати,/ и честны́я мо́щи твоя́ усе́рдно почита́ти,/ и сла́вити еди́наго Бо́га в Тро́ице./ Те́мже псало́мски вопие́м ти:/ возвесели́тся пра́ведник о Го́споде и упова́ет на Него́.

Сла́ва, и ны́не, Богоро́дичен:

Упова́ние христиа́н, Пресвята́я Де́во,/ Его́же родила́ еси́ Бо́га па́че ума́ и сло́ва,/ непреста́нно моли́ с вы́шними си́лами/ да́ти оставле́ние грехо́в на́ших, исправле́ние жития́/ ве́рою и любо́вию при́сно сла́вящих Тя.

По 2-м стихосло́вии седа́лен, глас 4:

Кро́вь твою́, я́ко алава́стр ми́ра,/ Христо́ви прине́сл еси́, му́чениче Авраа́мие./ Те́мже преблаги́й и вели́кий Дарова́тель Бог/ просла́ви тя и возвы́си чудесы́ Свои́ми бога́тыми,/ сего́ ра́ди па́мять твою́ с ве́рою почита́ем, досточу́дне.

Сла́ва, и ны́не, Богоро́дичен:

Де́во Всенепоро́чная, Всеще́драго Бо́га ро́ждшая,/ Того́ моли́ непреста́нно оставле́ние согреше́ний на́ших дарова́ти/ и пре́жде конца́ покая́ние/ ве́рою и любо́вию почита́ющим Тя, Всепе́тая.

По полиеле́и седа́лен, глас 8:

От младе́нчества душе́ю к Бо́гу прилепи́лся еси́, му́чениче Авраа́мие,/ сего́ ра́ди венце́м му́ченическим от Христа́ увязе́ся, Небе́сныя да́ры прие́млеши,/ и́миже подае́ши от всех неду́г здра́вие/ приходя́щим к тебе́ с ве́рою/ и любо́вию чту́щим святу́ю па́мять твою́.

Сла́ва, и ны́не, Богоро́дичен:

Я́ко Де́ву в жена́х, без се́мене ро́ждшую Бо́га пло́тию,/ вси блажи́м, ро́ди челове́честии,/ О́гнь бо всели́ся в Тя Боже́ственный,/ и я́ко Младе́нца дои́ши Зижди́теля и Го́спода./ Те́мже А́нгельстии собо́ри и челове́честии ро́ди досто́йно сла́вят пресвято́е рождество́ Твое́, и мы согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ воспева́ющим досто́йно па́мять Твою́.

Та́же степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Вся́кое дыха́ние: Ева́нгелие от Матфе́я, зача́ло 36.

По 50-м псалме́, стихи́ра, глас 6:

Измла́да предъизбра́ тя Госпо́дь/ в Небе́сное селе́ние, му́чениче Авраа́мие,/ и от Вседержи́тельныя Его́ десни́цы/ нетле́нный вене́ц на версе́ твое́м положи́ся,/ и осия́н еси́ от Него́ Боже́ственным све́том,/ и вы́ну насыща́ешися от таковы́я ра́дости и весе́лия,/ и мо́лиши за вся лю́ди, живу́щия в Правосла́вии/ и честны́я твоя́ мо́щи ве́рно почита́ющия и вопию́щия:/ сла́ва Бо́гу, сотво́ршему ди́вная Своя́ чудеса́.

Кано́н, глас 4.

Пе́снь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л е́сть.

Неисче́тне в ми́лости, Христе́ Спа́се ми́ра,/ вразуми́ нас, недосто́йных пра́зднственно соверши́ти па́мять страда́льца Твоего́./ Ты же, страстоте́рпче, пода́ждь нам ра́зум чист вся жите́йская презре́ти/ и еди́наго на потре́бу спасе́ния иска́ти.

Преве́чный Бог дарова́ тебе́ си́лу/ вра́жия возноше́ния сокруши́ти и вся му́ки претерпе́ти,/ ты же нам, гре́шным, пода́ждь ра́зум похва́льная тебе́ принести́/ и моли́ся за всех, тя восхваля́ющих.

Богому́дре страстоте́рпче Христо́в Авраа́мие,/ не возгнуша́йся нас, греха́ми оскверне́нных,/ и не отри́ни сего́ тебе́ от нас ма́лаго хвале́ния,/ но приими́ е и о всех, воспева́ющих тя, Го́споду моли́ся,/ да вси па́мять твою́, ра́дующеся, пра́зднуем.

Богоро́дичен: Яви́ милосе́рдие Твое́, Госпоже́ Пречи́стая, на ны недосто́йныя,/ я́ко к Тебе́ прибега́ем с пла́чем серде́чным и вопие́м:/ поми́луй нас, Еди́на всех гре́шных спасе́ние.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Наста́ честна́я па́мять твоя́, страстоте́рпче Авраа́мие,/ в ней же, лику́юще, воспева́ем тя и лобыза́ем честны́я мо́щи твоя́,/ вся́ких дарова́ний духо́вных нас сподобля́ющия.

От честны́х моще́й твои́х мно́гое исцеле́ние источа́еши, му́чениче,/ и град, в не́мже храни́тся нетле́нное те́ло твое́,/ от вся́ких бед покрыва́еши,/ сего́ ра́ди любо́вию па́мять твою́, страстоте́рпче, пра́зднуем.

Несу́щий мо́щи твоя́ от Бо́лгарския страны́ во град Влади́мир/ не зна́яху тяготы́ ни но́щию, ни днем./ Мы же ны́не, точи́ло о́крест ра́ки твое́й стоя́ще, мо́лим тя:/ сохраня́й чту́щия па́мять твою́ от вся́ких бед.

Богоро́дичен: Су́ще во гресе́х мно́зех, к Тебе́ вопие́м, Всепречи́стая:/ очи́сти ны Твои́м милосе́рдием, да не поги́бнем до конца́,/ Ты бо всех скверн Очисти́теля родила́ еси́.

Ин конда́к, глас 3:

Укрепи́вся, сла́вне, любо́вию Госпо́днею/ и Того́ честны́й Крест на ра́мо взем, и́го Госпо́дне,/ посрами́л еси́ диа́воля кова́рствия/ и пострада́л еси́ да́же до сме́рти,/ и сего́ ра́ди, досточу́дне, яви́ся страда́лец вели́к, Авраа́мие,/ и ору́жником храбротаи́нник/ и уча́стник Бо́жия благода́ти.

Седа́лен, глас 4:

Дне́сь све́тло пра́зднуется па́мять твоя́, му́чениче Авраа́мие:/ возбужда́еши бо всех к весе́лию чудесы́ твои́ми/ и непреста́нными о нас к Бо́гу моли́твами.

Пе́снь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Христо́во благоуха́ние яви́лся еси́, му́чениче,/ в спаса́емых тобо́ю от неду́гов душе́вных же и теле́сных,/ те́мже вси правове́рнии сла́вят Го́спода,/ Его́же ра́ди от злове́рных болга́р пострада́л еси́.

Мо́щи твоя́, му́чениче,/ утвержда́ют обита́телей страны́ сея́ в ве́ре и благоче́стии;/ те́мже и мы с любо́вию вопие́м ти:/ ра́дуйся, страстоте́рпче и чудотво́рче Авраа́мие.

Покрови́теля жи́зни на́шей и моли́твенника к Бо́гу/ почита́ем тя, страстоте́рпче Авраа́мие:/ на стезю́ нас покая́ния напра́ви,/ му́чеников соприча́стниче, А́нгелов сограждани́не пресла́вне.

Богоро́дичен: Ка́ко присту́пим к Тебе́, Херуви́м и Серафи́м честне́йшей,/ и ка́ко воззри́м на Тя, обремене́ннии грехи́ мно́гими?/ Но, о Пречи́стая Влады́чице,/ Сама́ очи́сти ны и ве́чныя му́ки изба́ви.

Пе́снь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

По пренесе́нии святы́х моще́й твои́х во град Влади́мир, му́чениче Авраа́мие,/ вели́кий кня́зь Гео́ргий с подру́жием свои́м и ча́ды и вси обита́тели гра́да/ па́мять твою́ усе́рдно всегда́ творя́ху,/ зна́юще тя на Небесе́х Христу́ предстоя́ща/ и непреста́нно покрыва́юща почита́ющих тя,/ и́хже и ны́не сохраня́й от всех бед.

Пла́мень угаси́ на́ших плотски́х обурева́ний и нечи́стых на́ших помышле́ний,/ да пла́мене гее́нскаго огня́ твои́ми моли́твами, Авраа́мие, изба́вимся.

Ду́шу и помышле́ние к тебе́ простира́ем, страстоте́рпче Авраа́мие:/ согре́й на́ше се́рдце любо́вию, я́же к Бо́гу,/ да зако́ну Его́ усе́рдно после́дующе,/ пре́йдем по́прище на́шего жития́ непреткнове́нно.

Богоро́дичен: Бо́га родила́ еси́ Ты, Пречи́стая, восхоте́вшаго спасти́ гре́шники,/ к Нему́же и́маши всегда́ мно́гое дерзнове́ние, я́ко Ма́ти:/ моли́ся о нас Ему́,/ любо́вию воспева́ющих Тя, Влады́чице.

Пе́снь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Ви́дя тя иско́нный враг, мно́гия доброде́тели на земли́ творя́ща,/ злове́рных болга́р подви́же на тя,/ да приобщи́шися скве́рней ве́ре их,/ ты же кро́вию запечатле́л еси́ пра́вую ве́ру твою́/ и си́це Небе́сное Ца́рствие восприя́л еси́.

Пречестно́е те́ло твое́, страстоте́рпче Авраа́мие,/ обогаща́ет всех не земны́м и тле́нным бога́тством, но Небе́сным,/ его́же кро́вию дости́гл еси́,/ те́мже и нас получи́ти то сподо́би, любо́вию воспева́ющих тя.

Омы́вся кро́вию, я́ко водо́ю,/ и всех мучи́телей ужаси́в кре́пким твои́м за Христа́ страда́нием,/ ны́не на Небеси́ лику́еши/ и та́мо за всех ве́рных неусы́пно мо́лишися,/ да тве́рдо содержа́т Правосла́вную ве́ру.

Богоро́дичен: Соблюди́ христиа́нское жи́тельство, Богоро́дице,/ гре́шных к покая́нию обрати́,/ чи́сты вся поста́ви пред Сы́ном Твои́м, Пренепоро́чная Де́во,/ и сподо́би нас моли́твами Твои́ми Небе́снаго Ца́рствия.

Конда́к, глас 8:

Я́ко многоце́нное сокро́вище,/ принесено́ бы́сть от Бо́лгарския страны́ во град Влади́мир/ пречестно́е те́ло твое́, му́чениче Авраа́мие,/ и́мже подае́ши всем чту́щим пресла́вную па́мять твою́ оби́лие исцеле́ний,/ предстоя́ на Небеси́ Христу́ Бо́гу/ и моля́ Его́ о спасе́нии душ на́ших.

И́кос:

Я́ко пресве́тлая звезда́, в Бо́лгарстей земли́ возсия́л еси́/ благи́ми твои́ми дея́нии и апо́стольскою про́поведию, страстоте́рпче Авраа́мие,/ и та́мо же му́чен был еси́ за Христа́./ Ны́не же чудесы́, я́ко све́тлыми луча́ми, сия́вши,/ боля́щим исцеле́ние подае́ши, здра́вствующим же ра́дование и весе́лие./ Те́мже дне́сь соше́дшеся, ве́рно зове́м ти:/ ра́дуйся, избра́нниче Госпо́день,/ всея́ Русския земли́ засту́пниче и всем Христиа́ном помо́щниче.

Пе́снь 7

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Вся на́ша земля́ возра́довася,/ зря́щи тя, от всех ве́рных срета́ема/ и благода́рными гла́сы, а́ки мусики́йскими труба́ми, восхваля́ема,/ и дне́сь ра́дуется, с на́ми лику́ющи и па́мять твою́ прославля́ющи.

Кре́пость и исцеле́ние приима́ху от Тебе́, му́чениче Авраа́мие, немощству́ющии пло́тию,/ ско́рбнии же ду́хом и удруче́ннии печа́льми жите́йскими/ обрета́ху душе́вное утеше́ние в умиле́нием призыва́нии свята́го и́мене твоего́,/ прославля́юще ди́внаго во святы́х Свои́х Христа́ Бо́га на́шего.

Весели́ся, Богоспаса́емый гра́де Влади́мире,/ и наслажда́йтеся, вси ве́рнии, Христо́ва благоуха́ния/ от святы́х моще́й страстоте́рпца Авраа́мия,/ я́же не то́кмо теле́сныя боле́зни исцелева́ют,/ но и душе́вныя стра́сти вся врачу́ют.

Богоро́дичен: Ум наш плени́ в послуша́ние ве́ры,/ дух и ду́шу всесоверше́нны соблюди́/ и те́ло в прише́ствие Го́спода на́шего Иису́са Христа́ непоро́чно сохрани́/ моли́твами Твои́ми, Богороди́тельнице.

Пе́снь 8

Ирмо́с: Ру́це распросте́р, Дании́л/ льво́в зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.

Си́лою Бо́жиего укрепля́емь, отрази́л еси́ сове́ты беззако́нных,/ и́же ру́це твоя́ и но́зе неща́дно отсека́ху./ Те́мже и главу́ прекло́нь под меч, вопия́л еси́:/ благослови́те, вся дела́ Госпо́дня, Го́спода.

Устраши́ти тя не возмого́ша неве́рнии,/ ниже́ поколеба́ти тве́рдаго ума́ твоего́ отреще́ся Христа́,/ я́ко адама́нт, пребы́л еси́ кре́постию ве́ры твое́й, поя́ непреста́нно:/ благослови́те, вся дела́ Госпо́дня, Го́спода.

Прииди́те, вси правове́рнии,/ воспросла́вим па́мять страстоте́рпца Авраа́мия/ и облобыза́ем с ве́рою честны́я мо́щи его́,/ источа́ющия цельбы́ неду́гов душе́вных вку́пе и теле́сных всем воспева́ющим:/ благослови́те, вся дела́ Госпо́дня, Го́спода.

Богоро́дичен: Победи́, Пречи́стая, врага́ ви́димыя и неви́димыя,/ низложи́ти нас тща́щихся,/ и страсте́й нас вся́ких изба́ви, да пое́м торже́ственне:/ благослови́те, вся дела́ Госпо́дня, Го́спода.

Пе́снь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Ве́лия сла́ва ты еси́ на́ша и похвала́,/ страстоте́рпче Христо́в Авраа́мие:/ вели́ку бо ве́ру во Христа́ Иису́са име́я,/ второ́е крести́лся еси́ в Него́ кро́вию твое́ю/ и дости́гл еси́ Небе́снаго жития́,/ его́же улучи́ти сподо́би и нас моли́твами твои́ми.

Псалмы́ и пе́сньми восхваля́ем тя, му́чениче,/ озаря́еши бо нас всегда́ чудесы́ твои́ми,/ и́хже кто дово́лен исчести́, ра́зве Да́вый тебе́ сия́?/ Ему́же моли́ся, да спасе́т вся лю́ди,/ с ве́рою и любо́вию соверша́ющия святу́ю па́мять твою́.

Вои́стинну никто́же, притека́яй к тебе́, му́чениче Христо́в Авраа́мие,/ то́щь благода́ти твоея́ отхо́дит,/ ея́же и нас испо́лни, мо́лимся.

Богоро́дичен: Вои́стинну и́стиннаго Бо́га пло́тию, Богоро́дице, родила́ еси́,/ Его́же ми́лостива нам в де́нь Суда́ соде́лай,/ да безконе́чно с Ним Тя велича́ем.

Свети́лен:

Све́та немерца́ющаго дости́гл еси́, му́чениче Авраа́мие,/ за кре́пкое твое́ страда́ние Христо́вы ра́ди ве́ры от злове́рных,/ и ны́не, пребыва́я во Ца́рствии Небе́снем,/ ра́дуешися и весели́шися со все́ми му́ченическими ли́ки./ Моли́ о нас, чту́щих святу́ю па́мять твою́.

Сла́ва, и ны́не, Богоро́дичен:

Свет нам возсия́ пресве́тлый от Твоея́ де́вственныя утро́бы,/ Христо́с Бог наш, Пречи́стая Влады́чице,/ те́мже Тя мо́лим, Цари́цу и Богоро́дицу:/ моли́ Сы́на Твоего́ и Бо́га на́шего,/ да, прости́в нам согреше́ния на́ша,/ спасе́т нас, я́ко Благ и Человеколю́бец.

На хвали́тех стихи́ры, глас 1:

Весели́ся и торжеству́й, гра́де Влади́мире,/ име́я в себе́ мо́щи му́ченика и чудотво́рца Авраа́мия,/ и́же дне́сь предстои́т Невече́рнему Све́ту,/ зрит неизрече́нную Его́ добро́ту/ и при́сно мо́лит/ дарова́ти душа́м на́шим мир и ве́лию ми́лость.

Красу́йся и лику́й, оби́тель Бо́жия Ма́тере,/ торжеству́йте, вси правове́рнии,/ зря́ще честны́я мо́щи му́ченика и чудотво́рца Авраа́мия,/ источа́ющия исцеле́ния всем,/ притека́ющим к ним с ве́рою и воспева́ющим Христа́,/ подаю́щаго всем мир и ве́лию ми́лость.

Ра́дуются чи́ни а́нгельстии и святы́х ли́ки/ и веселя́тся зря́ще пра́ведную ду́шу, возноси́му на Не́бо,/ и преставля́ему к Боже́ственному Престо́лу,/ и сочетава́ему с ли́ки му́чеников,/ с ни́миже и моли́ся Христу́/ дарова́ти душа́м на́шим мир и ве́лию ми́лость.

Сла́ва, глас 8:

Кто не воспое́т дне́сь торжество́/ свята́го му́ченика и чудотво́рца Авраа́мия,/ пра́выя ве́ры ревни́теля/ и злове́рныя посрами́теля:/ той бо, му́ченическою кро́вию вшед в све́тлый Христо́в черто́г,/ а́ки светлолу́чными заря́ми,/ просвеща́ет нас благотво́рными чудесы́ свои́ми/ и мо́лит Христа́ Бо́га о всех,/ ве́рою и любо́вию соверша́ющих па́мять страстоте́рпца.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

На Литурги́и слу́жба му́ченическая.

Моли́тва

Святы́й му́чениче Авраа́мие, до́блий во́ине Христа́, Царя́ Небе́снаго, в ско́рбех и напа́стех пресла́вный наш помо́щниче и защи́тниче! Ничто́же возмо́же отлучи́ти тя от любве́ ко Го́споду Иису́су: ни ле́стная обеща́ния благ вре́менных, ни преще́ния, ни му́ки от злых враго́в святе́йшия Христо́вы ве́ры; ты, я́ко лев, изше́л еси́ на бра́нь проти́ву волко́в мы́сленных, духо́в зло́бы, подви́гших на тя, ра́ди до́браго твоего́ испове́дания, единоплеме́нный тебе́ наро́д болга́рский, и, я́ко о́гненная стрела́, тех порази́л еси́ си́лою благода́ти Свята́го Ду́ха и кре́пкия, я́ко сме́рть, любве́ твоея́ к Бо́гу. А́ще и пролия́л еси́ кро́вь твою́ за Христа́ Бо́га на́шего, погуби́в вре́менную жи́знь, оба́че безсме́ртною душе́ю, я́ко оре́л, воспари́л еси́ в Го́рния оби́тели Отца́ на́шего, насле́довав там ве́чную жи́знь, сла́ву и блаже́нство неизрече́нное, и оста́вив нам нетле́нныя оста́нки твоя́, я́ко крин многоце́нный и благоуха́нный. Ве́руем, страстоте́рпче святы́м, я́ко, предстоя́ со А́нгелы и все́ми святы́ми Престо́лу сла́вы Триипоста́снаго Бо́га, усе́рдныя и Богоприя́тныя возно́сиши моли́твы не то́кмо о нас и о гра́де на́шем, но и о всей святе́й Христо́вой Це́ркви и правосла́вием оте́честве Русстем. Ве́руем, пресла́вный чудотво́рче, я́ко ты, си́лою Всемогу́щаго Го́спода Иису́са Христа́, чрез святы́я мо́щи твоя́, источа́еши оби́льныя да́ры благода́тныя по́мощи во спасе́ние всем, с ве́рою к тебе́ притека́ющим, наипа́че же испра́шиваеши кончи́ну с покая́нием тебе́ чту́щим и благосе́рдно помога́вши немощны́м младе́нцем, да вси от ма́ла до вели́ка единоду́шно прославля́ем неисповеди́мое вели́чие бла́гости Бо́жией. Те́мже ве́рою и любо́вию ко святы́м моще́м твои́м припа́дающе и благогове́йно о́ныя лобыза́юще, умоля́ем тя, до́брый на Небеси́ наш моли́твенниче и засту́пниче: помога́й нам, гре́шным и смире́нным, твои́ми моли́твами во всех ско́рбех, ну́ждах и обстоя́ниих на́ших, сохраня́й нас и град сей от вся́каго зла и вся́кия напа́сти, наипа́че же споспешеству́й ве́чному спасе́нию на́шему и всех, прося́щих от Тебе́ по́мощи и заступле́ния. Ей, смире́нно мо́лим тя, уго́дниче Бо́жий: моли́ Христа́ Бо́га на́шего, да даст Он мир и тишину́ всем правосла́вным Христиа́ном и да отврати́т от нас вся́кий гнев, на ны дви́жимый, да изба́вит нас от сете́й вра́жиих, томле́ния во у́зах греха́ и муче́ний а́дских и да сподо́бит нас, недосто́йных, одесну́ю Себе́ ста́ти на Суде́ Свое́м пра́ведном и вни́ти в ве́чный поко́й святы́х Его́, иде́же пра́зднующих глас непреста́нный и неизрече́нная сла́дость зря́щих добро́ту лица́ Его́; и та́ко возмо́жем с тобо́ю и все́ми святы́ми безконе́чно прославля́ти Отца́, и Сы́на, и Свята́го Ду́ха, Тро́ицу Единосу́щную и Неразде́льную. Ами́нь.

Тропа́рь, глас 3:

Всечестны́й канона́рше Геро́нтие,/ правилонача́льный бы́вый в це́ркви/ и в пра́виле и́ночестем возсия́вший све́тло,/ моли́ Христа́ Бо́га,/ да прегреше́ний оставле́ние пода́ст душа́м на́шим.

Конда́к, глас 1:

Канона́ршествуя, честны́й канона́рше Геро́нтие,/ и пе́ние церко́вное пою́щим предводи́тельствуя в це́ркви,/ уподо́бился вои́стинну А́нгелом,/ пою́щим Бо́га на Небеси́,/ и́хже и житию́ подража́я, и, с нйми лику́я,/ помина́й ны, любо́вию хва́лящих тя.

Ин тропа́рь, о́бщий, преподо́бным Геро́нтию и Лео́нтию канона́рхам, в Да́льних пеще́рах почива́ющим, глас 3:

Дво́ице свята́я,/ правилонача́льная, бы́вшая в це́ркви/ и в пра́виле и́ночестем возсия́вшая све́тло,/ всечестни́и канона́рси,/ моли́те Христа́ Бо́га,/ да прегреше́ний оставле́ние пода́ст душа́м на́шим.

Ин конда́к, о́бщий, преподо́бным Геро́нтию и Лео́нтию канона́рхам, в Да́льних пеще́рах почива́ющим, глас 1:

Канона́ршествующе, честни́и канона́рси,/ и пе́ние церко́вное пою́щим предводи́тельствующе в це́ркви,/ подо́бистеся вои́стинну А́нгелом,/ пою́щим Бо́га на Небеси́,/ и́хже житию́ подража́вше,/ и, с ни́ми ны́не лику́юще,/ помина́йте ны, любо́вию хва́лящих вас.