В сей день отдае́тся пра́здник Введе́ния (Вхо́да) Пресвяты́я Богоро́дицы.

На Го́споди, воззва́х:стихи́ры пра́здника, глас 1.

Подо́бен: О, ди́внаго чудесе́!

Днесь, ве́рнии, ликовству́им,/ во псалме́х и пе́снех Го́сподеви пою́ще/ и чту́ще Того́ свяще́нную сень,/ одушевле́нный киво́т,/ невмести́мое Сло́во вмести́вшую,/ приво́дится бо Го́сподеви,/ па́че естества́ пло́тию младе́нствующи,/ и святи́тель вели́кий Заха́рия/ прие́млет с весе́лием Сию́, я́ко Бо́жие жили́ще.

Днесь храм одушевле́нный святы́я сла́вы/ Христа́ Бо́га на́шего,/ еди́на в жена́х благослове́нная Чи́стая,/ приво́дится в храм зако́нный жи́ти во святы́х,/ и ра́дуются с Не́ю Иоаки́м и А́нна ду́хом,/ и де́вственнии ли́цы Го́сподеви пою́т,/ псало́мски воспева́юще и чту́ще Ма́терь Его́.

Ты, проро́ков пропове́дание,/ апо́столов сла́ва, и му́чеников похвала́,/ и всех земноро́дных обновле́ние,/ Де́во Ма́ти Бо́жия,/ Тобо́ю бо Бо́гу примири́хомся./ Те́мже чтим Твое́ в храм Госпо́день вхожде́ние/ и со А́нгелом вси пе́сненно,/ ра́дуйся, Тебе́, Пречи́стая, вопие́м,/ Твои́ми моли́твами спаса́емии.

И́ны стихи́ры свята́го Кли́мента, глас 2.

Подо́бен: Егда́ от Дре́ва:

Розга́ лозы́ жи́зненныя быв,/ о́тче иера́рше,/ кра́сныя изне́сл еси́ гро́зды Ду́хом догма́тов, всему́дре,/ ка́плющия всегда́ спаси́тельное вино́ Боже́ственнаго позна́ния/ и веселя́щия всех благочести́вых сердца́,/ и́стинно тя чту́щих,/ Кли́менте Богоно́сне всеблаже́нне.

Петра́ верхо́внаго учени́к, о́тче, быв,/ на ка́мени того́ созда́л еси́,/ я́ко ка́мень честны́й, тебе́ сама́го, всехва́льне,/ тве́рдостию слове́с твои́х/ все разврати́л еси́ зда́ние многобо́жное,/ хра́мы же воздви́гл еси́ Боже́ственныя в честь Тро́ицы,/ о Не́йже подвиза́лся еси́, блаже́нне,/ и муче́ния вене́ц прия́л еси́.

Я́коже светода́тельное со́лнце,/ от за́падов возсия́л еси́, о́тче,/ просвеща́я зе́млю/ заре́ю догма́тов твои́х и ра́нами све́тло,/ пости́гл же еси́ страны́ восто́чныя, треблаже́нне,/ заше́л еси́, умерщвля́емь,/ и возсия́л еси́, Кли́менте, ко Христу́,/ и та́мо су́щими луча́ми бога́тно,/ непреста́нно по Боже́ственному причаще́нию просвеща́емь.

Сла́ва, и ны́не, глас 8:

По рождестве́ Твое́м, Богоневе́сто Влады́чице,/ пришла́ еси́ в храм Госпо́день/ воспита́тися во свята́я святы́х,/ я́ко освяще́на,/ тогда́ и Гаврии́л по́слан бысть к Тебе́, всенепоро́чней,/ пи́щу Тебе́ принося́,/ Небе́сная вся удиви́шася,/ зря́ще Ду́ха Свята́го, в Тя все́льшася./ Те́мже, Пречи́стая и нескве́рная,/ я́же на Небеси́ и на земли́ сла́вима,/ Ма́ти Бо́жия, спаси́ род наш.

На стихо́вне стихи́ры пра́здника, глас 5 (зри Мине́ю ноября́ 21-й день).Стихо́вна свята́го Петра́, глас 1.

Подо́бен: Небе́сных чино́в:

Пресу́щныя Тро́ицы Единосу́щное преотмща́я, всеблаже́нне,/ я́ко Несозда́нныя Еди́ницы,/ А́рия низложи́л еси́,/ показа́в нам Сы́на неразде́льное,/ я́ко Того́жде су́ща Отцу́ и Ду́ху Божества́.

Стих: Свяще́нницы Твои́ облеку́тся пра́вдою,/ и преподо́бнии Твои́ возра́дуются.

Гоня́щих преста́ уби́йственное стремле́ние,/ крове́й лия́ние ны́не в неявле́нное сконча́ся,/ обоя́ запеча́ташася, Пе́тре му́дре,/ свяще́нным твои́м свиде́тельством,/ я́ко отрочи́щу Моисе́еву ста тече́ние,/ камы́ком Сепфо́ры иногда́.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Па́стырски пожи́в, священному́чениче Христо́в,/ му́ченическия по́двиги показа́л еси́ до́блественно,/ еди́н чрез обоя́ вене́ц прие́м,/ обою́ду украша́емь,/ свяще́нством и боле́зньми страда́льческими,/ сего́ ра́ди моли́ спасти́ся нам.

Сла́ва, глас 4. Самогла́сен:

Руко́ю Бо́жиею пома́зався во иере́я,/ верхо́внаго соиме́нне, и де́лы, соприча́стниче,/ слове́сныя о́вцы Ева́нгельскими препита́л еси́ зла́ками,/ я́ко мудр и и́стинен па́стырь,/ и Ма́рка прее́мник досто́йно показа́лся еси́,/ страстоте́рпческою кро́вию ве́ры тече́ние соверши́л еси́,/ о лю́дех предпоже́рся, и Христу́ сообразу́яся,/ моли́ся о душа́х на́ших.

И ны́не, глас 6:

Днесь, собо́ри ве́рных, соше́дшеся,/ духо́вне да торжеству́им/ и Богоотрокови́цу Де́ву и Богоро́дицу,/ в храм Госпо́день приводи́му,/ благоче́стно восхва́лим,/ предъи́збранную от всех родо́в,/ во оби́телище всех Царя́ Христа́ и Бо́га;/ де́вы, свещи́ нося́ще, предъиди́те,/ Присноде́вы чту́ще честно́е происхожде́ние,/ ма́тери, печа́ль всю отложи́вше,/ ра́достно спосле́дствуйте Ма́тери Бо́га быва́ющей/ и ра́дости ми́ра хода́таице./ Вси у́бо ра́достно, е́же ра́дуйся,/ со А́нгелом возопии́м Обра́дованней,/ при́сно моля́щейся о душа́х на́ших.

Тропа́рьКли́мента и Петра́ о́бщий, глас 4:

Бо́же оте́ц на́ших,/ творя́й при́сно с на́ми по Твое́й кро́тости,/ не отста́ви ми́лость Твою́ от нас,/ но моли́твами их/ в ми́ре упра́ви живо́т наш.

Тропа́рьКли́мента, глас 4:

И́же от Бо́га чудоде́йствы/ пресла́вно удивля́я вселе́нныя концы́ ми́ра,/ свяще́нный страда́льче,/ па́че естества́ мо́рю соста́вы вода́м содева́еши разделе́ние/ в честне́й па́мяти твое́й/ всегда́ притека́ющим усе́рдно в Богозда́нную ти це́рковь/ чуде́сным твои́м моще́м,/ и по всенаро́дном хожде́нии/ мо́ре во еди́но тече́ние чудоде́тельне твори́ши,/ Кли́менте преди́вный,/ моли́ Христа́ Бо́га спасти́ся душа́м на́шим.

Тропа́рь Петра́, глас 8.

Подо́бен: Прему́дрости:

От вы́шняго суда́ Христо́ва предста́тельствова ста́ду,/ на па́житех благожи́зненных упа́сл еси́ всему́дрыми твои́ми догма́ты,/ отгна́в А́рия, я́ко во́лка некро́ткаго,/ вше́дшаго в них безбо́жными уче́нии./ Те́мже и ду́шу твою́ положи́л еси́ за них,/ па́стырь наре́клся еси́, я́ко рече́ Госпо́дь,/ иера́рше Пе́тре блаже́нне,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не.

Тропа́рь пра́здника: Днесь благоволе́ния Бо́жия предображе́ние: (зри Мине́ю ноября́ 21-й день).

На У́трени

НаБог Госпо́дь: Тропа́рь пра́здника, два́жды. Сла́ва, святы́х: Бо́же оте́ц на́ших: И ны́не, пра́здника.

По 1-м стихосло́вии седа́лен, глас 1.

Подо́бен: Лик А́нгельский:

Пра́ведных плод Иоаки́ма и А́нны прино́сится Бо́гу во святи́лище свято́е,/ пло́тию младе́нствующи, Пита́тельница жи́зни на́шея,/ Ю́же благослови́ свяще́нный Заха́рия,/ Сию́ вси я́ко Ма́терь Бо́жию ве́рно да ублажи́м.

Сла́ва, и ны́не, то́йже.

По 2-м стихосло́вии седа́лен, глас 4.

Подо́бен: Удиви́ся Ио́сиф:

Пре́жде зача́тия, Чи́стая, освяти́лася еси́ Бо́гу/ и, ро́ждшися на земли́, дар принесла́ся еси́ ны́не Ему́,/ исполня́ющи оте́ческое обеща́ние:/ в Боже́ственнем же хра́ме, я́ко су́що Боже́ственный храм,/ от младе́нства чи́сте со свеща́ми све́тлыми отдана́ бы́вши,/ яви́лася еси́ прия́телище непристу́пнаго и Боже́ственнаго Све́та./ Вели́ко вои́стинну предше́ствие Твое́, еди́на Богоневе́сто и Присноде́во.

Сла́ва, и ны́не, то́йже.

Та́же кано́н пра́здника со ирмосо́м на 6 и святы́х о́ба кано́на на 8. Кано́н пра́здника, глас 1.

Песнь 1

Ирмо́с:Песнь побе́дную пои́м вси Бо́гу,/ Сотво́ршему ди́вная чудеса́ мы́шцею высо́кою/ и спа́сшему Изра́иля, я́ко просла́вися.

Стеце́мся днесь, Богоро́дицу почита́юще пе́сньми,/ и торжеству́им духо́вный пра́здник,/ в храм бо Бо́гу дар прино́сится.

Пе́сньми да воспои́м Богоро́дицы сла́вное предше́ствие,/ к хра́му бо днесь, я́ко храм Бо́жий,/ прино́сится проро́чески дар многоце́нный.

Тро́ичен: Тро́ице единосу́щная, О́тче, и Сло́ве, и Ду́ше Святы́й,/ Тя ве́рно сла́вим я́ко Творца́ всех/ и Тебе́ вопие́м благоче́стно: спаси́ ны, Бо́же.

От ба́гра крове́й Твои́х червлени́цею, Пречи́стая, оде́явся,/ проше́д, обнови́ Царь и Бог род весь челове́ческий/ благоутро́бием Свои́м.

Ин кано́н свята́го Кли́мента. Творе́ние Феофа́ново. Глас 8.

Песнь 1

Ирмо́с:Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

От Петра́ Боже́ственнаго научи́вся, апо́столов верхо́внаго,/ и от него́ навы́к Боже́ственное зна́ние, о́тче,/ и́дольскую лесть обличи́л еси́.

Ло́зу Богонасажде́ну на земли́,/ плоды́ доброде́тельныя уче́ний всеблагочести́вых Христо́с тя предлага́ет,/ и́стинно су́щий цвету́щ виногра́д.

Во вся концы́ протече́/ вои́стинну Боже́ственных повеле́ний твое́ веща́ние, Кли́менте му́дре,/ и вся просвети́ Тро́ицу Богосло́вити во еди́нстве Божества́.

Богоро́дичен: Се прорече́ния проро́ческая о Тебе́ прия́ша коне́ц вои́стинну,/ Сло́во бо без се́мене заче́нши, Богороди́тельнице,/ пло́тию родила́ еси́.

Ин кано́н свята́го Петра́, его́же краегране́сие: Восхваля́ю трибога́таго Петра́. Творе́ние Феофа́ново. Глас то́йже.

Песнь 1

Ирмо́с:Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Во светле́йших селе́ниих житие́ име́я,/ просвеще́ние ми пода́ждь/ моли́твами твои́ми, Пе́тре всеблаже́нне.

Зна́нию науче́н и свяще́нством украша́емь,/ всебла́женне Пе́тре,/ Христу́ прине́слся еси́ кро́вию.

У́тварь упещре́нная,/ я́коже многоце́нное возложе́ние, Христо́ве Це́ркви/ от Бо́га дарова́лся еси́, блаже́нне.

Богоро́дичен: Пречи́стая Богоро́дице,/ воплоще́нное, Присносу́щное и Пребоже́ственное Сло́во па́че естества́ ро́ждшую,/ пое́м Тя.

Катава́сия:Христо́с ражда́ется:

Песнь 3

Ирмо́с:Да утверди́тся се́рдце мое́ в во́ли Твое́й, Христе́ Бо́же,/ и́же над вода́ми Не́бо утвержде́й второ́е/ и основа́вый на вода́х зе́млю, Всеси́льне.

Торжеству́им, празднолю́бцы, и сра́дуимся ду́хом,/ во святе́м пра́зднице учрежда́ющеся днесь Дще́ре Царе́вы/ и Ма́тере Бо́га на́шего.

Иоаки́ме, ра́дуйся днесь, и весели́ся, А́нно, ду́хом,/ рожде́нную из вас Го́споду приводя́ще триле́тствующу,/ я́ко ю́ницу чи́сту, всенепоро́чную.

Тро́ичен: Свет Оте́ц, Свет Сын Его́, Свет Дух Уте́шительный,/ я́ко от Со́лнца бо Еди́наго Тро́ица, сия́ющи, Боже́ственно озаря́ет/ и соблюда́ет ду́ши на́ша.

Тя проро́цы пропове́даша киво́т, Чи́стая, святы́ни,/ кади́льницу Злату́ю, и све́щник, и трапе́зу,/ и мы я́ко Боговмести́мую Ски́нию воспева́ем Тя.

Ин

Ирмо́с:Страх Твой, Го́споди,/ всади́ в сердца́ раб Твои́х,/ и бу́ди нам утвержде́ние,/ Тя во и́стине призыва́ющих.

Бога́тно излия́ся Ду́ха благода́ть в твоя́ устна́, му́дре,/ е́юже вся просвети́л еси́ Боже́ственными твои́ми уче́нии/ и Христу́ приве́л еси́.

Огне́м воздержа́ния ты попали́л еси́ страсте́й огнепа́льная стремле́ния/ и храм себе́ соверши́в/ Ду́ха Боже́ственнаго, доблему́дренне о́тче.

На го́ру Боже́ственных доброде́телей возше́д/ и мра́ком покры́вся разу́мным,/ узре́л еси́ неизрече́нную в чи́стей души́ твое́й духо́вную зарю́.

Богоро́дичен: Неизрече́нно зачала́ еси́, Пречи́стая, Спа́са и Го́спода,/ изба́вльшаго нас от лю́тых,/ Тя во и́стине призыва́ющих.

Ин

Ирмо́с:Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

Возше́л еси́, е́здя, я́ко на колесни́це,/ твое́ю кро́вию, прему́дре, к Небе́сным,/ иде́же предте́ча наш Христо́с вни́де, еди́н безгре́шный.

Жизнь тле́нную оста́вил еси́/ и жизнь безсме́ртную обре́л еси́, блаже́нне,/ иде́же венцено́сец лику́еши, моля́ спасти́ся душа́м на́шим.

Я́коже фи́никс процве́л еси́ благопло́днейший,/ я́ко ма́слина плодоро́дна яви́лася еси́, Богодохнове́нне, во дво́рех Госпо́дних,/ я́ко сми́рна и лива́н и я́ко ми́ро благово́ннейшее.

Богоро́дичен: Я́ко две́ри спаси́тельныя и рай кра́сный,/ Све́та присносу́щнаго о́блак,/ су́щу святу́ю Де́ву воспое́м вси, глаго́люще Ей: ра́дуйся.

Конда́к Кли́мента и Петра́ о́бщий, глас 4.

Подо́бен: Яви́лся еси́ днесь:

Це́ркве недви́жимии и Боже́ственнии пи́ргове,/ благоче́стия Боже́ственнии столпи́ вои́стинну кре́пцыи,/ Кли́менте с Петро́м всехва́льнии,/ ва́шими моли́твами соблюди́те вся.

Конда́к Кли́мента, глас 2.

Подо́бен: Тве́рдыя:

Боже́ственнаго виногра́да священнооде́янна/ всем лоза́ яви́ся,/ ка́плющи сла́дость прему́дрости,/ моли́твами твои́ми, всече́стне,/ да тебе́ истка́ну, я́ко багряни́цу,/ песнь мы́сленную принесе́м,/ Кли́менте свя́те,/ спаси́ рабы́ твоя́.

И́кос Кли́мента.

Подо́бен: Уясни́ ми:

Ка́ко возмогу́ аз, стра́нный,/ воспе́ти и глаго́лати по́двиги ны́не Боже́ственнаго священному́ченика?/ ка́ко в мо́ре вве́ржен бысть и глубине́ пре́дан бысть морсте́й,/ но Христо́с Бог, Его́же возлюби́ вельми́,/ даст и па́ки возлюби́вшим, я́ко дар многоце́нный,/ и отроча́ даст роди́телема, све́тло игра́ющее,/ и спаси́ ско́ро рабы́ твоя́.

Конда́к Петра́, глас 3.

Подо́бен: Де́ва дне́сь:

Правосла́вными повеле́нии Це́рковь просвети́л еси́,/ за ню́же и пострада́в, Богоблаже́нне о́тче,/ А́рия отсту́пника отгна́в,/ те́мже твою́ пречестну́ю па́мять соверша́юще,/ правосла́вно вопие́м:/ ра́дуйся, Пе́тре, ка́меню ве́ре.

И́кос Петра́:

В ди́вней Александри́и потщи́мся ше́ствовати умо́м/ и у́зрим вели́кая стра́нная, та́мо соверша́ема,/ ка́ко на же́ртву себе́ предлага́ет, я́ко овча́ незло́бивое,/ первосвяще́нник и вели́кий побо́рник Петр/ и ны́не созыва́ет нас зде, и святу́ю свою́ главу́ предложи́в, я́коже снедь честну́ю,/ ея́же наслади́вшеся вси, правосла́вно возопие́м:/ ра́дуйся, Пе́тре, ка́меню ве́ре.

Седа́лен Кли́мента, глас 4.

Подо́бен: Я́вился еси́:

Возсия́в, я́коже со́лнца заря́,/ и блиста́еши, преподо́бне, всему́ ми́ру све́тло уче́нии твои́ми,/ Богогла́се Кли́менте светоно́сне, му́чеников похвало́.

Ин седа́лен Кли́мента, глас 8.

Подо́бен: Прему́дрости:

Я́ко многопло́дна лоза́, на земли́ простре́н мук пресече́нием,/ кра́сныя возрасти́л еси́, досточу́дне, гро́зны,/ спасе́ныя сла́дости принесе́, иска́плюща и сердца́ всех ве́рных веселя́ща./ Тем, соше́дшеся, святу́ю твою́ па́мять твори́м, ра́дующеся,/ и Христа́ велича́ем:/ святи́телю многостра́стне, моли́ Христа́ Бо́га спасти́ся душа́м на́шим.

Седа́лен Петра́, глас 8, то́йже, что и тропа́рь: От Вы́шняго суда́:(зри день сей вы́ше).

И ны́не, пра́здника, глас 4.

Подо́бен: Удиви́ся Ио́сиф:

Непоро́чная А́гница и нескве́рный черто́г,/ в дом Бо́жий Богоро́дица Мариа́м с весе́лием вво́дится пресла́вно,/ Ю́же А́нгели Бо́жии дорино́сят ве́рно,/ и вси ве́рнии блажа́т при́сно/ и благода́рственно пою́т Ей непреста́нно ве́лиим гла́сом,/ на́ша сла́ва и спасе́ние Ты еси́, Всенепоро́чная.

Песнь 4

Ирмо́с:Ду́хом прови́дя, проро́че Авваку́ме,/ Словесе́ воплоще́ние, пропове́дал еси́, вопия́:/ внегда́ прибли́житися ле́том, позна́ешися,/ внегда́ приити́ вре́мени, пока́жешися./ Сла́ва си́ле Твое́й, Го́споди!

Проро́че Иса́ие, прорцы́ нам, Де́ва кто есть,/ иму́щая во чре́ве?/ Я́же из Иу́дина ко́рене прозя́бши/ и ро́ждшися из Дави́да Царя́,/ се́мене свята́го плод благосла́вный.

Начина́йте, де́вы, и воспо́йте пе́сни,/ рука́ма держа́щи свещи́, чи́стыя Богоро́дицы предше́ствие хва́ляще,/ ны́не гряду́щия во храм Бо́жий, ку́пно с на́ми пра́зднующи.

Тро́ичен: Тро́ицу ли́цы, Еди́ницу о́бразом, благоче́стно сла́вим Бо́га и́стинна,/ Его́же пою́т А́нгельская и Арха́нгельская чинонача́лия/ я́ко тва́ри Влады́ку и челове́цы, верно́ покланя́ющеся при́сно.

Моли́ непреста́нно, Пресвята́я Чи́стая,/ Его́же пло́тию родила́ еси́, Сы́на Твоего́ и Бо́га,/ от многообра́зных се́тей диа́волих и от вся́ких искуше́ний находя́щих/ вся изба́вити рабы́ Твоя́.

Ин

Ирмо́с:Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча,/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

От за́пада прише́д, блаже́нне, к восто́ку,/ Петру́ примеси́лся еси́ апо́столу:/ и того́ Боже́ственными светлостьми́ и уче́нии просвеща́емь,/ с ним возвеща́я спаси́тельное Сло́во,/ за́падную всю проте́кл еси́ страну́.

Други́й Моисе́й, Кли́менте му́дре, был еси́,/ зако́ны Боже́ственныя всем излага́я/ и свяще́нная пиша́ уче́ния, и церко́вное все вчиня́еши исполне́ние./ Отсю́ду законополо́жника тя и учи́теля вси иму́ще, ве́рою чтим.

По́стническими по́ты очи́стився,/ священнонача́льник, блаже́нне, яви́лся еси́,/ к благочести́вей ве́ре Христо́вей вся возводя́ Боже́ственными твои́ми сказа́нии,/ пострада́в же зако́нно,/ подо́бне боле́зни сплете́ вене́ц, приснопа́мятне.

Богоро́дичен: С Бо́гом Тя засту́пницу стяжа́хом,/ Ты бо Ма́ти Бо́жия была́ еси́ Творца́ и Соде́теля,/ наш о́браз прие́мша, Пренепоро́чная,/ и Того́ спа́сша от тли и сме́рти и сла́вою Боже́ственною просла́вльшаго.

Ин

Ирмо́с:Из горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися, Богови́дно усмотри́,/ и со стра́хом славосло́вяше си́лу Тво́ю.

Доброде́телей ше́ствовав стезе́ю, о́тче,/ пости́гл еси́ оби́тели вы́шния, Богоно́сне,/ свяще́нства пома́занием укра́шен и муче́ния сия́я кро́вию.

Ту́чами пото́ков твои́х крове́й, блаже́нне,/ угаси́л еси́ пещь пре́лести/ и гоня́щих погуби́л еси́ мрак, священному́чениче достосла́вне.

Но́вый Петр не́кий нам яви́лся еси́,/ и́стинно апо́стольскими сия́я дарова́нии,/ священноде́тель же и свиде́тель страсте́й Влады́ки твоего́, всебога́те.

Богоро́дичен: Всех до́брых исполне́ние ро́ждши,/ испо́лни на́ша, Де́во, моле́ния,/ грехо́в нам избавле́ния прося́щи,/ и просвеще́ния, и ве́лия ми́лости.

Песнь 5

Ирмо́с:Све́тлый нам возсия́й свет присносу́щный,/ у́тренюющим о судьба́х за́поведей Твои́х,/ Влады́ко Человеколю́бче, Христе́ Бо́же наш.

Да светлоно́сим, правосла́внии, вси стека́ющеся и сла́вяще Богома́терь,/ я́ко Го́споду днесь приво́дится, я́ко же́ртва благоприя́тна.

Да веселя́тся пра́отцы днесь, Влады́чице,/ и да ра́дуется ро́ждшая Тя со отце́м Твои́м,/ я́ко плод их Го́споду прино́сится.

Тро́ичен: Пребезнача́льное и Присносу́щное Еди́но Божество́ славосло́вяще, поклони́мся,/ Тре́ми Ли́цы естество́м Неразде́льное/ и сла́вою Равноче́стное.

Приста́нище благоути́шное/ и необори́мую сте́ну стяжа́хом – моли́тву Твою́ во обстоя́ниих , Богороди́тельнице,/ всегда́ избавля́еми бед и скорбе́й.

Ин

Ирмо́с:Просвети́ нас повеле́нии Твои́ми, Го́споди,/и мы́шцею Твое́ю высо́кою/ Твой мир пода́ждь нам,/ Человеколю́бче.

Во све́те за́поведей ходя́ Госпо́дних,/ ча́до вои́стинну яви́лся еси́ Того́, блаже́нне, нело́жное.

Всего́ на земли́ ты отре́клся еси́ пристра́стия, священнонача́льниче,/ да бу́дущее благосла́вие получи́ши и све́тлости сла́вы Христо́вы.

Му́ченическими укра́шен светлостьми́,/ со А́нгелы ны́не предстои́ши Влады́це,/ о пою́щих моли́ся.

Богоро́дичен: Ма́ти Бо́жия,/ ве́рою Тя пою́щия от бед изба́ви моли́твами Твои́ми, Де́во,/ я́ко Тя предста́тельницу ве́мы , Чи́стая.

Ин

Ирмо́с:У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

На ка́мень возше́д ве́ры, страстоте́рпче,/ неукло́нен пребы́л еси́ во искуше́нии сопроти́вных.

Ору́жием пла́менным Ду́ха Свята́го, иера́рше,/ А́рия вредосло́вца Боже́ственным судо́м закла́л еси́.

Кре́постию укрепля́емь, сла́вне, Спа́совою,/ вра́жию си́лу и кре́пость попра́л еси́.

Богоро́дичен: Де́ву по рождестве́, пое́м Тя, Богоро́дице,/ Ты бо Бо́га Сло́ва пло́тию ми́ру родила́ еси́.

Песнь 6

Ирмо́с:Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Пра́зднуим, ве́рнии, пра́здник духо́вный Ма́тере Бо́жия,/ воспева́юще благоче́стно:/ есть бо святе́йша Небе́сных умо́в.

Пе́сньми духо́вными восхва́лим, ве́рнии, Ма́терь Све́та,/ я́ко днесь нам яви́ся, предходя́щи в храм Бо́жий.

Тро́ичен: Оте́ц, и Сын, и Дух пра́вый,/ Триипоста́сная Еди́нице и нераздели́мая Тро́ице,/ поми́луй покланя́ющияся Боже́ственней держа́ве Твое́й.

Во чре́ве Твое́м вмеще́н Невмести́мый все́ми, Богома́ти,/ быв, из Тебе́ произы́де, Пречи́стая,/ сугу́б естество́м Бог и Челове́к.

Ин

Ирмо́с:Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Ре́вностию разжже́н Госпо́дни любве́, му́дре,/ и́дольскую лесть обличи́л еси́ кре́пко слове́сными противле́нии/ и чуде́сными явле́нии, всехва́льне.

Недрема́нно соблю́л еси́ о́ко се́рдца твоего́,/ за зло́бу ника́коже воздрема́в, сла́вне,/ Боже́ственными восхожде́нии вчиня́я доброде́телей к верхо́вному.

Я́ко иера́рх че́стен,/ вяза́ти и реши́ти прегреше́ния власть прии́м от Спа́са Христа́,/ мно́гих мои́х прегреше́ний долг разреши́, возводя́ к покая́нию.

Богоро́дичен: Твои́ми мольба́ми, Чи́стая,/ бед и напа́стей исхи́ти мя лю́тых и изба́ви мя, молю́ся,/ Ты бо стена́ еси́ неразруши́ма,/ и приста́нище, и покро́в,/ и необори́мое утвержде́ние.

Ин

Ирмо́с:Ри́зу мне пода́ждь све́тлу,/ одея́йся све́том я́ко ри́зою,/ многоми́лостиве Христе́, Бо́же наш.

Целому́дренно и пра́ведно Бо́гу ты жи́тельствовав,/ коне́ц блаже́нный от Него́ прия́л еси́, всеблаже́нне Пе́тре.

Всесоверше́нную же́ртву и прия́тну,/ тебе́ сама́го прине́сл еси́, Пе́тре ди́вный,/ же́ртва тебе́ ра́ди бы́вшему Бо́гу.

Слове́с духо́вных испо́лнився,/ Ду́хом дви́жимь орга́н был еси́,/ песнопоя́, Богоглаго́ливе, неизрече́нная.

Богоро́дичен: Еди́на сло́вом пло́тию Сло́во ро́ждшая,/ изба́ви, мо́лимся, сете́й вра́жиих ду́ши на́ша.

Конда́к, глас 4.

Подо́бен: Вознесы́йся:

Пречи́стый храм Спа́сов,/ многоце́нный черто́г и Де́ва,/ свяще́нное сокро́вище сла́вы Бо́жия,/ днесь вво́дится в дом Госпо́день,/ благода́ть совводя́щи,/ я́же в Ду́се Боже́ственном,/ Ю́же воспева́ют А́нгели Бо́жии:/ Сия́ есть селе́ние Небе́сное.

И́кос:

Неизрече́нных Бо́жиих и Боже́ственных та́ин зря,/ в Де́ве благода́ть явля́емую и исполня́ему я́вственно,/ ра́дуюся и о́браз разуме́ти недоуме́юся стра́нный и неизрече́нный:/ ка́ко и́збранная Чи́стая еди́на/ яви́ся па́че всея́ тва́ри ви́димыя и разумева́емыя?/ Те́мже восхвали́ти хотя́ Сию́,/ ужаса́юся зело́ умо́м же и сло́вом,/ оба́че дерза́я, пропове́даю и велича́ю:/ Сия́ есть селе́ние Небе́сное.

Песнь 7

Ирмо́с:Пещь, Спа́се, ороша́шеся,/ о́троцы же, лику́юще, поя́ху:/ отце́в Бо́же, благослове́н еси́.

Ликовству́им, празднолю́бцы, днесь,/ воспои́м чи́стую Влады́чицу,/ Иоаки́ма и А́нну досто́йно чту́ще.

Проро́чествуй, Дави́де, глаго́ля Ду́хом:/ приведу́тся де́вы в след Тебе́,/ приведу́тся Тебе́ во храм Цари́цы Ма́тери.

Тро́ичен: Просла́вим Тро́ицу неразде́льную,/ воспои́м еди́но Божество́,/ со Отце́м Сло́во и Ду́ха Всесвята́го.

Моли́, Его́же родила́ еси́, Го́спода,/ я́ко благоутро́бна естество́м су́ща, Богороди́тельнице,/ спасти́ ду́ши воспева́ющих Тя.

Ин

Ирмо́с:О́троцы благочести́вии в Вавило́не/ о́бразу злато́му не поклони́шася,/ но посреде́ пе́щи о́гненныя, ороша́еми,/ песнь воспе́ваху, глаго́люще:/ превозноси́мыи́ отце́в и нас Бо́же, благослове́н еси́.

Я́коже у́тро, возсия́л еси́,/ просвеща́я земли́ вся концы́/ и нощь преле́стную отгоня́, Богогла́се, и́дольскаго безбо́жия,/ благослове́н еси́, вопия́, Бо́же оте́ц на́ших.

Вся спасти́ хотя́ Бог твои́ми моли́твами,/ прозре́ние дарова́ Сиси́нию,/ и души́, и телеси́ очеса́ отве́рз, о́тче,/ отту́ду просвеща́ется Боже́ственною ба́нею.

Струи́ исцеле́ний то́чиши от Боже́ственныя твоея́ ра́ки, Кли́менте сла́вне,/ страсте́й мно́гих избавля́еши всегда́ притека́ющия к тебе́ и пою́щия:/ благослове́н Бог оте́ц на́ших.

Богоро́дичен: Подоба́ше без се́мене воплоща́емому из Тебе́ проити́, Де́во пречи́стая,/ Ты бо возрасла́ еси́ всех, Чи́стая, пребо́льши./ Те́мже Ти непреста́нно зове́м:/ благослове́н Плод чре́ва Твоего́.

Ин. Ирмо́с то́йже.

Житие́м Боголе́пным укра́шен/ и Боже́ственным све́том просвеща́емь,/ небе́сных в нехо́дная вшел еси́, веселя́ся и вопия́, му́дре, Сотво́ршему:/ благослове́н Бог оте́ц на́ших.

Я́ко да пресве́тло благоугоди́ши Христу́ Бо́гу, Богоблаже́нне,/ в ру́ки беззако́нных тя сама́го пре́дал еси́ во́лею, поя́, пребога́те:/ благослове́н Бог оте́ц на́ших.

Весь просвеще́н, сподо́бился еси́ ви́дети Христа́,/ тебе́ показу́юща свою́ ри́зу, лю́те расте́рзану, истка́нную свы́ше, преподо́бне,/ благослове́н еси́, вопи́я, Бо́же оте́ц на́ших.

Богоро́дичен: Вся, я́ко чиста́, прия́ла еси́ во утро́бе Твое́й Сло́во воплоща́емо,/ но Того́ моли́ очи́стити ми прегреше́ний ду́шу и те́ло, Пречи́стая,/ к Тебе́ чи́стою ве́рою прири́щущаго.

Песнь 8

Ирмо́с:Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Весели́тся днесь све́тло Иоаки́м,/ и А́нна непоро́чная Го́споду Бо́гу прино́сит же́ртву,/ да́нную ей от обеща́ния святу́ю Дщерь.

Хва́лятся святи́и Дави́д и Иессе́й, и Иу́да чти́тся,/ из ко́рене бо их израсте́ плод, Де́ва чи́стая,/ из Нея́же роди́ся Бог преве́чный.

Тро́ичен: Да пое́тся Трисвяты́й, Оте́ц, и Сын, и Дух Святы́й,/ неразде́льная Еди́ница, еди́но Божество́,/ держа́щее дла́нию всю тварь во вся ве́ки.

Безнача́льное начина́ется Сло́во пло́тию,/ роди́вся я́ко благоволи́, Бог же и Челове́к, из Отрокови́цы Де́вы,/ возсозида́я ны, пре́жде па́дшия, ра́ди кра́йняго благоутро́бия.

Ин

Ирмо́с:Мусики́йским орга́ном согласу́ющим/ и лю́дем безчи́сленным, покланя́ющимся о́бразу в Деи́ре,/ три о́троцы, не повину́вшеся,/ Го́спода воспева́ху/ и славосло́вяху во вся ве́ки.

Учени́к быв Петро́в,/ Боже́ственныя нра́вы того́ подража́я, Кли́менте страда́льче,/ те́мже и престо́ла прее́мник и́стинно показа́лся еси́, просвеща́я всю тварь,

Та́йно очервлени́в твоя́ устна́ ча́шею му́дрости, Кли́менте,/ изры́гнул еси́ Боже́ственных уче́ний пучи́ну,/ потопля́ющую демоностра́шие,/ душа́м же челове́ческим источа́ющую спасе́ние.

Я́ко пречестну́ю у́тварь, Це́рковь, стяжа́вши твоя́ Боже́ственная законоположе́ния,/ о тебе́ хва́лится/ и вся подвиза́ет твою́ па́мять ве́рою почита́ти во вся ве́ки.

Богоро́дичен: Мари́е Де́во Богоро́дице,/ Бо́га Спа́са челове́ком ро́ждшая пло́тию,/ спаси́ ве́рою пою́щия Твое́ Рождество́/ и превознося́щия во вся ве́ки.

Ин

Ирмо́с:На горе́ святе́й просла́вльшася/ и в купине́ огне́м/ Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Жиру́ющую соску́тал еси́ па́губу/ А́риева зле́йшаго хуле́ния, от ве́рных собо́рища отсе́к/ и отгна́в церко́вных, Богому́дре, огра́д.

Первостои́тель ли́ка А́нгельскаго Петр яви́ся,/ Боже́ственный верхо́вник, столп же му́чеников был еси́,/ всему́дре Пе́тре Богоно́се,/ и священноде́йствитель Боже́ственных та́инств.

Научи́вся от Боже́ственнаго вдохнове́ния бу́дущих ра́зуму, Богоглаго́ливе,/ и е́же от земли́ проуве́дев твое́ преставле́ние муче́нием/ к вы́шних Го́споду сла́вы Христу́ во ве́ки вся.

Богоро́дичен: Во утро́бу Де́вы все́льшагося/ и от Нея́ стра́шно и па́че сло́ва дре́вняго Ада́ма обно́вльшаго,/ Го́спода по́йте и превозноси́те во вся ве́ки.

На 9-й пе́сни Честне́йшую: не пое́м, но пое́м припе́в пра́здника: Велича́й, душе́ моя́,/ приведе́нную во храм Госпо́день/ и благослове́нную рука́ми иере́евыми.

Песнь 9

Ирмо́с:Светоно́сный о́блак, в о́ньже всех Влады́ка,/ я́ко дождь с небесе́ на руно́ сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

К сим тропаре́м то́йже припе́в.

Из пра́ведных произы́де Иоаки́ма и А́нны/ обеща́ния плод – Богоотрокови́ца Мари́я,/ и, я́ко кади́ло прия́тное, пло́тию младе́нствующи,/ приво́дится во святи́лище свято́е, я́ко свята́я во святы́х обита́ти.

Младе́нствующую естество́м/ и па́че естества́ я́вльшуюся, Ма́терь Бо́жию восхва́лим пе́сньми,/ в храм бо зако́нный Го́споду днесь приво́дится,/ в воню́ благово́ния пра́ведных, я́ко плод духо́вный.

Тро́ичен: Велича́й, ду́ше моя́,/ Триипоста́снаго и неразде́льнаго Божества́ держа́ву.

Триипоста́сное Естество́, и Неразде́льную Сла́ву,/ и в Божестве́ еди́ном пое́мую непреста́нно,/ на Небеси́ и на земли́ Тро́ицу неразлу́чную просла́вим,/ с Сы́ном Отцу́ и Ду́ху покланя́ющеся благоче́стно.

Велича́й, душе́ моя́,/ честне́йшую и сла́внейшую Го́рних во́инств, Де́ву Пречи́стую, Богоро́дицу.

Под Твое́ благоутро́бие прибега́ющия ве́рно/ и покланя́ющияся благоче́стно Сы́ну Твоему́, Де́во Богороди́тельнице,/ я́ко Бо́гу и Го́споду ми́ра,/ моли́ся от тли и бед изба́вити и вся́ческих искуше́ний.

Ин

Ирмо́с:Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Тече́ние твое́ соверши́в мно́гими по́двиги/ и несомне́нно соблю́д ве́ру Христо́ву,/ пра́ведным венце́м украси́лся еси́.

Я́ко спасл еси́ о́трока дре́вле,/ удержа́на в мо́ри ле́тным обхожде́нием, му́чениче Христо́в,/ си́це глубины́ грехо́вныя и мене́ спаси́.

Любо́вию тя чту́щия, Кли́менте страстоте́рпче,/ от напа́стей, и бед, и скорбе́й спаси́,/ моля́ Зижди́теля Христа́.

Богоро́дичен: Ра́дости мое́ се́рдце испо́лни, Де́во,/ я́же ра́дости прие́мшая исполне́ние,/ грехо́вную печа́ль потребля́ющи.

Ин

Ирмо́с:Проявле́нное на горе́ законополо́жнику во огни́ и купине́/ рождество́ Присноде́вы/ в на́ше ве́рных спасе́ние,/ пе́сньми немо́лчными велича́ем.

Предопределе́ннаго свяще́нно иера́ршествовати,/ и свяще́нства коне́ц благосла́вно прии́мша,/ и Христо́ву подража́вша страсть, Петра́ чу́днаго воспои́м.

Жезло́м укре́пльшася си́лы Госпо́дни,/ и свяще́нствовавша, и свяще́нствованна,/ и Христу́ прине́сшагося же́ртва, Петра́ Богоно́снаго воспои́м.

Всесмеше́ннаго заре́ю Тро́ичною,/ и светле́йшаго ея́ насла́ждшася сия́ния,/ и нам спасе́ния прося́ща, Петра́ Богоприя́тнаго воспои́м.

Дае́ши оби́льно души́ мое́й спасе́ние,/ я́ко первосвяще́нник бо и́маши власть вяза́ти и реши́ти прегреше́ний вины́,/ твои́ми моле́нии, свяще́ннейший.

Богоро́дичен: Ты еси́, Богоро́дице, ору́жие на́ше и стена́,/ Ты еси́ заступле́ние к Тебе́ прибега́ющих,/ Тебе́ и ны́не на моли́тву подвиза́ем,/ да изба́вимся от враг на́ших.

Свети́лен.

Подо́бен: Жены́, услы́шите:

Ны́не благонаро́чит яви́ся нам день,/ иму́щи свяще́нных прее́мник, свяще́нных апо́стол,/ Петра́ ку́пно и Кли́мента,/ пропове́дники ве́ры и непобе́димыя му́ченики,/ и́хже ле́тнюю па́мять ве́рно соверша́ем вси.

Сла́ва, и ны́не, пра́здника:

Ю́же дре́вле предвозвести́ проро́ческое сосло́вие/ – ста́мну, и жезл, и скрижа́ль, и несеко́мую го́ру –/ Мари́ю Богоотрокови́цу ве́рно да восхва́лим,/ днесь бо вво́дится во свята́я святы́х воспита́тися Го́сподеви.

На хвали́тех стихи́ры на 6, пра́здника 3, глас 1.

Подо́бен: Небе́сных чино́в:

Свещено́сицы де́вы,/ Присноде́ву светло́ провожда́юще,/ проро́чествуют и́стинно Ду́хом бу́дущее,/ храм бо Бо́жий, Богоро́дица су́щи,/ в храм со сла́вою де́вственною/ младе́нствующи вво́дится.

Обеща́ния свята́го и плод благосла́вный,/ Богоро́дица вои́стинну яви́ся ми́ру,/ я́ко всех превы́шшая,/ и́же благоче́стно приводи́ма в храм Бо́жий,/ моли́тву ро́ждших исполня́ет,/ соблюда́ема Боже́ственным Ду́хом.

Небе́сным воспи́тана, Де́во, хле́бом,/ ве́рно в храме Госпо́дни,/ родила́ еси́ ми́ру Жи́зни Хлеб – Сло́во,/ Ему́же я́ко храм избра́нный и всенепоро́чный,/ предобручи́лася еси́ Ду́хом та́инственно,/ обручена́ Бо́гу и Отцу́.

Стихи́ры свята́го Кли́мента, глас 5.

Подо́бен: Ра́дуйся, Живоно́сный Кре́сте:

Ра́дуйся, светоза́рное и кра́сное/ Боже́ственнаго Ду́ха, му́дре, оби́телище,/ лоза́ му́жества, та́йно бы́вши благопло́дна, всеблаже́нне, и гобзу́ющая,/ из ней же иска́па уче́ние спаси́тельное,/ мсто , напоя́ющее и веселя́щее сердца́/ всегда́ чту́щих тя, всебога́те,/ му́чениче непобеди́мый,/ Небе́сный челове́че,/ церко́вный сто́лпе,/ благочести́вым утвержде́ние,/ Христа́ моли́/ посла́ти душа́м на́шим ве́лию ми́лость.

Ра́дуйся, Богосло́вия скрижа́ли,/ неизрече́нных сказа́тель Писа́ний,/ ра́зум та́йный,/ Це́ркви кре́пкий сто́лпе и основа́ние непоколеби́мое,/ пра́вило изве́стнейшее,/ тайнописа́тель мудре́йший,/ Богоглаго́ливый язы́к,/ вся́ку е́ресь отсека́ющ,/ я́коже меч обоюдуо́стр,/ орга́н сладковеща́нный,/ ум Небе́сный,/ Кли́менте всеблаже́нне,/ священнострада́льцем основа́ние и укрепле́ние,/ Христа́ моли́/ посла́ти душа́м на́шим ве́лию ми́лость.

И́ны стихи́ры свята́го Кли́мента, глас и подо́бен то́йже:

Ра́дуйся, Ангелообра́зне святи́телю,/ апо́стольское украше́ние обре́тся,/ Христо́ве стра́сти во́льней, свя́те,/ после́довати изво́лил еси́,/ Петру́ превозлю́бленный яви́ся, блаже́нне,/ ро́да земна́, отца́ же и ма́тере и бра́тия всей отве́ргся, прему́дре./ Тем Богоуго́дно вене́ц свой воспри́ят,/ Кли́менте свя́те,/ и престо́льник обре́теся Христу́,/ помоли́ся за ны,/ дарова́ти душа́м на́шим ве́лию ми́лость.

Ра́достно припа́даем ти, блаже́нне, всече́стне,/ творя́ще успе́ние,/ Христу́ бо и́збран яви́ся учени́к, свя́те,/ а совозлю́блен Петру́ насто́льник, блаже́нне, обрете́ся,/ дея́нии же и ве́рою ты ся венча́вая, Богогла́сне,/ укра́сися, Кли́менте Богодухнове́нне,/ украше́ние Це́ркви и уста́ свя́та,/ Бо́жия уче́ния пучи́нниче ,/ Христу́ помоли́ся/ дарова́ти душа́м на́шим ве́лию ми́лость.

Яви́ся в страсте́х свяще́нник/ и в свяще́нных страстоте́рпец,/ в зако́не же непоро́чен,/ обоя́ко угожда́я Бо́гу, Кли́менте блаже́нне освяще́нне,/ к Нему́ же взъи́де нога́ма, препоя́сався ве́рою,/ благове́ствуя Христо́ву ми́ру и́стину,/ испове́дание и зако́н судьбы́,/ еще́ же разлива́я и разсека́емыя кро́вию/ источа́я исто́чники целе́нию страстя́ми,/ Христу́ помоли́ся,/ дарова́ти душа́м на́шим ве́лию ми́лость.

Стихи́ры свята́го Петра́, глас 3, зри на стихо́вне(зри день сей вы́ше).

И́ны стихи́ры свята́го Петра́, глас 5.

Подо́бен: Ра́дуйся, Живоно́сный Кре́сте:

Име́я благочести́вое помышле́ние/ над страстьми́ самоде́ржца,/ претерпе́ неукло́нно мече́м/ го́рькую кончи́ну и смерть, всеблаже́нне,/ и́мже Боже́ственнаго блаже́нства получи́/ и сла́дкаго Спа́сова прича́стия,/ и красоты́ наслади́тися сподо́би,/ Пе́тре блаже́нне, ка́меню ве́ры,/ коне́ц Боже́ственных му́ченик,/ святи́телем удобре́ние,/ Христа́ моли́/ посла́ти душа́м на́шим ве́лию ми́лость.

Светя́ся свяще́нною оде́ждею/ и муче́ния венце́м украша́ем,/ предста́ Христо́ви, всех Священнонача́льнику и Бо́гу,/ и я́вльшуся первому́ченику,/ сугу́бое прие́м от Него́ воздая́ние,/ Его́же испове́да, О́тцу Единосу́щна,/ и Собезнача́льна Ро́ждшему, и Сопресто́льна,/ А́рия злоимени́таго отсе́к, всебога́те,/ и изве́рже отню́д ве́рнаго собо́рища,/ Того́ ны́не моли́/ дарова́ти ми́рови ве́лию ми́лость.

Сла́ва, свята́го Петра́, глас 4: Руко́ю Бо́жиею: (зри на стихо́вне,день сей выше).

И ны́не, пра́здника, глас 2:

Днесь в храм приво́дится Всенепоро́чная Де́ва/ во оби́телище Всецаря́ Бо́га,/ и всея́ жи́зни на́шея Пита́теля./ Днесь Чисте́йшая Святы́ня,/ я́ко триле́тствующая Ю́ница,/ во свята́я святы́х вво́дится./ Той возопии́м, я́ко А́нгел:/ ра́дуйся, еди́на в жена́х Благослове́нная.

Славосло́вие вели́кое и отпу́ст.

На Литурги́и

Блаже́нны пра́здника обо́их кано́нов, песнь 9-я на 8. По вхо́де Тропа́рь пра́здника и святы́х. Сла́ва, конда́к святы́х. И ны́не пра́здника. Проки́мен, песнь Богоро́дицы, глас 3:Вели́чит душа́ Моя́ Го́спода:Стих: Я́ко призре́ на смире́ние Рабы́ Своея́:Святы́х проки́мен, глас 7: Честна́ пред Го́сподем смерть преподо́бных Его́. Апо́стол пра́здника, ко Евре́ем, зача́ло 320. И святы́х, к Филипписи́ом, зача́ло 246. Аллилу́ия, глас 8: Слы́ши, Дщи, и виждь: Ева́нгелие пра́здника, от Луки́, зача́ло 54, и святы́х, от Матфе́я, зача́ло 11. Прича́стен: Ча́шу спасе́ния: И святы́х: В па́мять ве́чную:

Подоба́ет ве́дати, я́ко а́ще случи́тся отда́ние пра́здника Вхо́да Пресвяты́я Богоро́дицы в неде́лю, оставля́ется возсле́дование свята́го Петра́ и пое́тся, егда́ хо́щет екклисиа́рх.

В суббо́ту на Ма́лой Вече́рни

Стихи́ры воскре́сны и Богоро́дицы по обы́чаю, Тропа́рь воскре́сен и пра́здника.

На Вели́цей Вече́рни

По обы́чной кафи́зме на Го́споди, воззва́х: стихи́ры воскре́сны 3, и восто́чен еди́н, Анато́лиев, и пра́здника подо́бны 3, глас 1:Днесь ве́рнии: и свята́го Кли́мента подо́бны 3. Сла́ва, пра́здника, глас 8: По Рождестве́ Твое́м: И ны́не, Богоро́дичен пе́рвый настоя́щаго гла́са. Вход. Проки́мен дне. На литии́ стихи́ры пра́здника. Сла́ва, и ны́не, пра́здника. На стихо́вне стихи́ры воскре́сны. Сла́ва, и ны́не, пра́здника. На благослове́нии хле́бов: Богоро́дице Де́во:три́жды. А иде́же несть всено́щнаго, глаго́лем Тропа́рь воскре́сен. Сла́ва, Кли́мента (зри день сей вы́ше).

И ны́не, пра́здника.

На У́трени

НаБог Госпо́дь: тропа́рь воскре́сен два́жды. Сла́ва, Кли́мента. И ны́не, пра́здника. По кафи́змах седа́льны воскре́сны с Богоро́дичны их. Полиеле́й и тропари́: А́нгельский собо́р: ипакои́ гла́са и степе́нна, проки́мен и Ева́нгелие воскре́сно. Воскресе́ние Христо́во:псало́м 50 и стихи́ра воскре́сна. Кано́н воскре́сен со ирмосо́м на 4, и Богоро́дицы на 2, и пра́здника пе́рваго гла́са на 4, и Кли́мента на 4. Катава́сия: Христо́с ражда́ется:По 3-й пе́сни конда́к пра́здника и и́кос. И Кли́мента (зри день сей вы́ше).

Сла́ва и ны́не, пра́здника. По 6-й пе́сни конда́к воскре́сен и и́кос. На 9-й пе́сни стихосло́вим Честне́йшую: Свети́лен воскре́сен. Сла́ва, свята́го. И ны́не, пра́здника. На хвали́тех стихи́ры воскре́сны 4 и пра́здника со Сла́вным на 4, с припе́вы пра́здничными. Сла́ва, стихи́ра Ева́нгельская. И ны́не, Преблагослове́нна еси́:Славосло́вие вели́кое. Тропа́рь воскре́сен то́чию, ектении́, и отпу́ст, и час 1-й. На часе́х тропа́рь воскре́сен. Сла́ва, пра́здника. И ны́не, Богоро́дичен часо́в. По О́тче наш: конда́к пра́здника и воскре́сен глаго́лем, пременя́юще.

На Литурги́и:

Блаже́нны гла́са на 6 и пра́здника песнь 9-я на 4. По вхо́де тропа́рь воскре́сен, и пра́здника, и свята́го. Та́же конда́к воскре́сен. Сла́ва, свята́го. И ны́не, пра́здника. Проки́мен, Апо́стол, аллилу́ия и Ева́нгелие гла́са и пра́здника. Прича́стен: Хвали́те Го́спода: и пра́здника.

На Ма́лой Вече́рни

Стихи́ры на 4, глас 1.

Подо́бен: Небе́сных чино́в:

Прииди́те, празнолю́бцы вси,/ собо́рную песнь воспои́м бо́дренно:/ спаса́й нас от вся́ких искуше́ний моли́твами твои́ми/ и вся́кия ско́рби, Кли́менте Богодухнове́нне,/ почита́ющия тя.

Храм твой и ра́ка моще́й твои́х/ врачевство́ подаю́т душа́м и телесе́м,/ я́ко исто́чник исцеле́ний/ и бич бесово́м прогони́тельный,/ и о́браз твой честны́й, Кли́менте всему́дре,/ печа́льным есть утеше́ние.

Мирска́го сноше́ния отступи́в/ и земна́го пристра́стия,/ невеще́ственное житие́ соверши́л еси́/ и Безпло́тным счисли́лся еси́,/ с ни́миже ны́не пребыва́я, Кли́менте приснопа́мятне,/ пою́щих тя сохраня́й.

Сла́ва, глас 6:

Сра́дуйтеся нам, вси слове́нстии ро́ди,/ началопа́стырь бо наш и о́бщий всех предста́тель,/ в дне́шний день в честне́м хра́ме свое́м призира́я,/ всем помога́ет свои́ми моли́твами./ Те́мже, по до́лгу восхваля́юще, вопие́м к нему́:/ покры́й нас кро́вом моли́твы твоея́,/ велича́йший Кли́менте святи́телю, мо́лим тя!

И ны́не, пра́здника, глас 8:

Дави́д провозглаша́ше тебе́, Пречи́стая,/ прови́дя освяще́ние вхо́да Твоего́ в храм,/ в не́мже концы́, днесь пра́зднующе,/ славосло́вят Тя, Всепе́тая,/ Я́же бо пре́жде Рождества́ Де́ва/ и по Рождестве́ пребы́вши нетле́нна, Ма́ти Сло́ва жи́зни./ Днесь в хра́ме Заха́рия весели́тся,/ восприе́м Тя, Влады́чице,/ и свята́я святы́х ра́дуются,/ подъе́мши Тя, исто́чника жи́зни на́шея./ Те́мже и мы псало́мски вопие́м Ти:/ о нас моли́ Сы́на Твоего́ и Бо́га на́шего/ дарова́ти нам ве́лию ми́лость.

На стихо́вне стихи́ры, глас 2.

Подо́бен: До́ме Евфра́фов:

Воспои́м Бо́гови,/ да́вшему врачевство́/ душа́м и телесе́м/ безсре́бренное рабо́м,/ Кли́мента Боже́ственнейшаго.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Изба́вителя сострада́тельна,/ и предста́теля те́пла,/ и Небе́снаго граждани́на/ стяжа́вше тя, Кли́менте о́тче наш,/ досто́йно ублажа́ем.

Стих: Моисе́й и Ааро́н во иере́ех Его́/ и Самуи́л в призыва́ющих И́мя Его́.

Ми́ро излия́нное/ и́мя твое́, Богому́дре,/ тем возлюби́ша тя про́чее/ ду́ши ве́рных доброде́тельныя,/ я́коже отрокови́цы Боголюбе́зныя.

Сла́ва, и ны́не, Богоро́дичен:

Богоро́дице Честна́я,/ апо́столов украше́ние/ и святи́телей сла́во,/ моли́ о нас Сы́на Твоего́,/ во е́же спасти́ся нам.

Тропари́ свята́го и пра́здника зри на вели́цей вече́рни ( зри день сей ни́же)

На Вели́цей Вече́рни

Пе́рвыя кафи́змы 1-й антифо́н Блаже́н муж: На Го́споди, воззва́х: поста́вим стихо́в 8 и пое́м пре́жде 4 стихи́ры пра́здника (зри день сей вы́ше).

И́ны стихи́ры, свята́го Кли́мента О́хридскаго, глас 2.

Подо́бен: Ки́ими похва́льными:

Ки́ими похва́льными венцы́/ днесь Кли́мента увенча́им?/ сло́ву Бо́жию бу́йство пло́ти подру́чно покори́вшаго,/ непреподо́бныя стра́сти возненави́девшаго/ и за́поведи Ева́нгелия испо́лнившаго,/ к наказа́нию Боже́ственному свои́ми веща́ньми всех наста́вльшаго,/ песнопе́нием и ико́нным украше́нием Це́рковь обогати́вшаго/ и ко спасе́нию соверше́ннейшему лю́ди руководи́вшаго си́лою Христа́ Бо́га на́шего,/ И́же име́яй ве́лию ми́лость.

Ки́ими вдохнове́нными пе́сньми/ днесь Кли́мента воспои́м?/ розгу́ лозы́ и́стинныя,/ житие́м доброде́тельным выспрь прозя́бшую/ и Бо́гом де́лателем возде́ланную,/ плоды́ мно́гими гобзу́ющую/ и да́ры Ду́ха плодонося́щую – словеса́ Богодухнове́нная,/ я́коже цветы́ ра́йския благоу́ханныя,/ и по́двиги нетле́нныя,/ я́коже от гроздо́в вино́, сердца́ веселя́щее,/ благода́тию Христа́ Бо́га на́шего,/ И́же име́яй ве́лию ми́лость.

Ки́ими благоглаго́ливыми словесы́/ днесь Кли́мента почти́м?/ Небе́снаго му́жа на земли́ во пло́ти,/ требога́тное сокро́вище доброде́телей собра́вшаго,/ ны́не же со А́нгелы ду́хом пребыва́ющаго;/ я́коже зерца́лом пре́жде в гада́нии,/ му́дрость Бо́жию смотре́вшаго,/ ны́не же непосре́дне лице́м к лицу́/ Свет Боже́ственный блаже́нне зря́щаго,/ Христа́ Бо́га на́шего,/ И́же име́яй ве́лию ми́лость.

Сла́ва, глас 6:

Доброде́телей воскормля́емь млеко́м,/ дости́гл еси́ верх соверше́нства,/ любве́ бо возже́гся огне́м/ и стра́сти испепели́в до конца́ злосмра́дныя,/ был еси́ воздержа́ния и кро́тости пра́вило,/ ми́лости исто́чник и сострада́ния бе́здна./ Но, о быстре́йшая по́моще и ско́рое заступле́ние/ тя ве́рно призыва́ющих, Кли́менте, святе́йший о́тче,/ предста́ни и ны́не ду́хом/ и изба́ви нас от му́чащаго греха́,/ я́ко мно́гое име́яй дерзнове́ние ко Го́споду.

И ны́не, пра́здника, глас 8:

По Рождестве́ Тво́ем, Богоневе́сто Влады́чице,/ пришла́ еси́ в храм Госпо́день/ воспита́тися во свята́я святы́х,/ я́ко освяще́нна./ Тогда́ и Гаврии́л по́слан бысть к Тебе́, Всенепоро́чней,/ пи́щу Тебе́ принося́./ Небе́сная вся удиви́шася,/ зря́ще Ду́ха Свята́го, в Тя все́льшася./ Те́мже, Пречи́стая и Нескве́рная,/ я́же на Небеси́ и на земли́ сла́вима,/ Ма́ти Бо́жия, спаси́ род наш!

Вход. Све́те ти́хий: проки́мен дне и чте́ния три (зри Мине́ю ноября́ 23-й день).

На литии́ стихи́ры, глас 1:

Вели́кая и́стины труба́,/ Кли́мент, святи́тель чу́дный,/ вся празднолю́бцы днесь к весе́лию созыва́ет./ Све́тлое у́бо торжество́ предусря́щим/ до́браго па́стыря, вси ве́рнии,/ пе́сньми сла́вяще свяще́нныя его́ труды́,/ я́ко да моли́твами его́/ прии́мем от Христа́ ве́лию ми́лость.

Глас 2:

Ми́ру излия́вшуся на тя благода́ти/ и Христо́во благоуха́ние тя соде́лавшу,/ пома́зался еси́ священноде́йствовати Ева́нгелие Ца́рствия Небе́снаго/ и благово́ния ра́зума его Бо́лгарскую всю зе́млю испо́лнити./ Те́мже, гла́сы моле́бныя раб твои́х/ благосе́рдно прие́мля, Кли́менте приснопа́мятне,/ проси́ да́тися нам ве́лией ми́лости.

Сла́ва, глас 6:

Благода́ть чуде́с свы́ше прие́м/ и ро́ды слове́нския просвети́в сло́вом Ева́нгелия,/ святи́телей еси́ сла́ва же и похвала́/ и всея́ Болга́рии великопропове́дный апо́стол,/ Кли́менте, о́тче всеблаже́нне./ Дерзнове́ние у́бо име́я ко Го́споду,/ Того́ моли́ спа́стися душа́м на́шим.

Глас 5:

Во оде́жду свяще́нства оде́ян,/ побо́рниче Ду́ха велича́йший,/ престо́лу предста́л еси́ мучи́теля/ и в темни́цу затворе́н был еси́,/ бе́дствуя про́поведи ра́ди Ева́нгелия Христо́ва/ и му́ченическое показу́я противле́ние./ Свобо́ду же Бо́гом улучи́в,/ к бо́лгаром новокреще́нным прите́кл еси́/ и сло́вом твои́м непосты́дно/ посе́ял еси́ се́мя Се́ющаго,/ И́же име́яй ве́лию и бога́тую ми́лость.

И ны́не, пра́здника, глас то́йже:

Возсия́ день ра́достен и пра́здник всече́стен:/ днесь бо, я́же пре́жде Рождества́ и по Рождестве́ Де́ва пребы́вши,/ в храм Госпо́день приво́дится,/ и ра́дуется Заха́рия ста́рец, роди́тель Предте́чев,/ и вопие́т ве́село:/ прибли́жися Предста́тельница скорбя́щих в храм святы́й,/ я́ко Свята́ освяти́тися во оби́телище Всецаря́./ Да весели́тся Иоаки́м пра́отец,/ и А́нна да ра́дуется,/ я́ко принесо́ша Бо́гу, я́ко триле́тствующую ю́ницу,/ Непоро́чную Влады́чицу./ Ма́тери, сра́дуйтеся, де́вы, взыгра́йте,/ и непло́ды, сликовству́йте,/ я́ко отве́рзе нам Небе́сное Ца́рство пронарече́нная Всецари́ца,/ ра́дуйтеся, лю́дие, и весели́теся.

На стихо́вне стихи́ры, глас 6.

Подо́бен: Все отло́жше:

Весь от ю́ности возложи́вся Влады́це,/ Богому́дре Кли́менте,/ вне пло́ти был еси́/ и вся́каго мирска́го сноше́ния,/ страсте́й тече́ние изсуши́в гу́бою доброде́телей,/ и ум свобо́дный земна́го пристра́стия/ привле́кл еси́ к мы́сленным селе́нием,/ иде́же ны́не, приближа́яся/ Престо́лу Христа́ Бо́га на́шего,/ со дерзнове́нием моли́ся о душа́х на́ших.

Стих: Свяще́нницы Твои́, Го́споди, облеку́тся в пра́вду,/ и преподо́бнии Твои́ возра́дуются.

Воздержа́ние во́льное и труд по́двига восприи́м,/ Богому́дре Кли́менте,/ житие́ равноа́нгельное и невеще́ственное/ на земли́ показа́л еси́./ Те́мже и мзду́ прия́л еси́ толи́ких трудо́в,/ дарова́ния Ду́ха,/ па́стырь быв слове́снаго ста́да,/ и мо́ре чуде́с неизчерпа́емое,/ свяще́нства соверше́ние и мона́шествующих пра́вило,/ проро́к же бу́дущих нело́жный/ и слове́ном апо́стол Христа́ Бо́га на́шего,/ Его́же приле́жно моли́ о душа́х на́ших.

Стих: Моисе́й и Ааро́н во иере́ех Его́/ и Самуи́л в призыва́ющих И́мя Его́.

Кири́ллу после́дуя, просвети́телю Слове́нскому,/ Богому́дре Кли́менте,/ и Мефо́дию святи́телю по стопа́м ше́ствуя,/ я́коже скрижа́ль доброде́тели,/ житие́ их проо́бразно сотвори́л еси́./ Нау́ма же име́я,/ сосу́да Ду́ха, сподви́жника/ в труде́х равноапо́стольных,/ и весь лик честны́х учени́к,/ Бо́лгар утверди́л еси́/ в ве́ре чи́стей Христа́ Бо́га на́шего,/ Его́же со дерзнове́нием моли́ о душа́х на́ших.

Сла́ва, глас 6:

Я́коже жизнь твоя́ Боже́ственна,/ та́ко и коне́ц твой свяще́нный,/ святи́телю Кли́менте блаже́нне,/ в не́мже все мно́жество О́хридское, собра́вшеся,/ я́коже ви́деша тя бездыха́нна,/ глаго́лы жа́лостными вопия́ху, глаго́люще:/ рцы после́днее сло́во рабо́м твои́м,/ немо́лчный пропове́дниче слове́ном!/ Где оставля́еши ча́да твоя́,/ я́же ущедри́л еси́ я́ко оте́ц благоутро́бный?/ Оба́че а́ще и во гро́бе возле́гл еси́,/ но горе́ тя стяжа́хом предста́теля/ и к Бо́гу моли́твенника/ любо́вию чту́щии тя.

И ны́не, пра́здника, глас то́йже:

Днесь, собо́ри ве́рных, соше́дшеся,/ духо́вне да торжеству́им/ и Богоотрокови́цу Де́ву и Богоро́дицу,/ в храм Госпо́день приводи́му,/ благоче́стно восхва́лим,/ предъизбра́нную от всех родо́в/ во оби́телище всех Царя́ Христа́ и Бо́га./ Де́вы, свещи́ нося́ще, предъиди́те,/ Присноде́вы чту́ще честно́е происхожде́ние;/ ма́тери, печа́ль всю отложи́вше,/ ра́достно спосле́дствуйте Ма́тери Бо́га быва́ющей/ и ра́дости ми́ра Хода́таице./ Вси у́бо ра́достно, е́же ра́дуйся!/ со А́нгелом возопии́м Обра́дованней,/ при́сно моля́щейся о душа́х на́ших.

На благослове́нии хле́бов тропа́рь свята́го два́жды и пра́здника еди́ножды.

Тропа́рь святи́теля Кли́мента, глас 4:

Словесы́ наста́вил еси́ язы́ки в ве́ру Христо́ву,/ де́лы же возвы́сил еси́ себе́ к Боже́ственней жи́зни,/ святи́телю Кли́менте равноапо́стольне,/ чудесы́ сия́я приступа́ющим к тебе́ ве́рно/ и зна́меньми озаря́я Це́рковь пресла́вно,/ сего́ ра́ди честну́ю твою́ па́мять сла́вим.

Ин тропа́рь святи́теля, глас то́йже:

Я́ко труба́ Арха́нгела Бо́жия/ оглаша́еши ро́ди слове́нстии на вся ве́ки/ и к чудеси́ пресла́вному утвержде́ния люде́й твои́х в Правосла́вии/ прилага́еши неиждива́емо чудеса́ ве́лия да́же доны́не./ Те́мже с любо́вию почита́ем присночестну́ю па́мять твою́,/ святи́телю Кли́менте равноапо́стольне, и мо́лим:/ моли́ся о душа́х на́ших.

Тропа́рь пра́здника, глас 4:

Днесь благоволе́ния Бо́жия предображе́ние/ и челове́ков спасе́ния пропове́дание:/ в хра́ме Бо́жии я́сно Де́ва явля́ется/ и Христа́ всем предвозвеща́ет./ Той и мы велегла́сно возопии́м:/ ра́дуйся, смотре́ния/ Зижди́телева исполне́ние.

На У́трени

На Бог Госпо́дь: тропа́рь пра́здника два́жды. Сла́ва, тропа́рь свята́го. И ны́не, пра́здника.

По 1-м стихосло́вии седа́лен, глас 3.

Подо́бен: Боже́ственныя ве́ры:

Боже́ственными догма́ты воспита́н,/ наста́вил еси́ к Боже́ственней ве́ре ро́ды Бо́лгарския, приве́д креще́нием/ и сотвори́в я лю́ди избра́ны,/ страсте́й разли́чных изба́вил еси́,/ о́тче преподо́бне, Христа́ Бо́га моли́/ дарова́тися нам ве́лией ми́лости.

Сла́ва, и ны́не, пра́здника, глас 1.

Подо́бен: Лик А́нгельский:

Пра́ведных плод Иоаки́ма и А́нны прино́сится Бо́гу во святи́лище свято́е,/ пло́тию младе́нствующи, Пита́тельница жи́зни на́шея,/ Ю́же благослови́ свяще́нный Заха́рия,/ Сию́ вси я́ко Ма́терь Бо́жию ве́рно да ублажи́м.

По 2-м стихосло́вии седа́лен, глас 4.

Подо́бен: Удиви́ся Ио́сиф:

От младе́нческаго во́зраста зако́ну Бо́жию бога́тно научи́вся,/ лю́ди утверди́л еси́ Боговеща́нными уче́ньми твои́ми/ и честны́м твои́м житие́м всех наста́вил еси́ презира́ти плоть и я́же в ми́ре кра́сная,/ к Небеси́ же при́сно зре́ти и Боже́ственному наслажде́нию,/ е́же нам получи́ти моли́ся,/ ве́рою почита́ющим честну́ю па́мять тво́ю.

Сла́ва, и ны́не, пра́здника, глас и подо́бен то́йже:

Пре́жде зача́тия, Чи́стая, освяти́лася еси́ Бо́гу/ и, ро́ждшися на земли́, дар принесла́ся еси́ ны́не Ему́,/ исполня́ющи оте́ческое обеща́ние./ В Боже́ственнем же хра́ме, я́ко су́що Боже́ственный храм,/ от младе́нства чи́сте со свеща́ми све́тлыми отдана́ бы́вши,/ яви́лася еси́ прия́телище Непристу́пнаго и Боже́ственнаго Све́та./ Вели́ко вои́стинну предше́ствие Твое́, Еди́на Богоневе́сто и Присноде́во.

На полиеле́и велича́ние:

Велича́ем тя,/ святи́телю о́тче Кли́менте,/ и́же уче́ньми твои́ми ро́ды слове́нския просвети́л еси́/ и ко Христу́ приве́л еси́.

По полиеле́и седа́лен, глас 8.

Подо́бен: Прему́дрость и Сло́во:

Апо́стол Христо́вых ре́вность восприи́м,/ объя́л еси́ се́рдцем всю зе́млю Бо́лгарскую,/ пропове́дуя лю́дем Христо́во Ева́нгелие/ и изводя́ от пре́лести мно́жества неизче́тная./ Те́мже тече́ние – по Па́влу – соверши́в,/ вене́ц прия́л еси́ досто́йный трудо́в твои́х, святи́телю блаже́нне,/ моли́ Христа́ Бо́га грехо́в оставле́ние дарова́ти/ пра́зднующим любо́вию честну́ю па́мять тво́ю.

Сла́ва, и ны́не, пра́здника, глас 8.

Подо́бен: Повеле́нное та́йно:

Да ра́дуется Дави́д песнопи́сец/ и да ликовству́ет Иоаки́м со А́нною,/ я́ко Плод Святы́й из них произы́де,/ Мари́я светоно́сная, Боже́ственная свеща́,/ и ра́дуется, входя́щи в храм,/ Ю́же и зря, благослови́ Варахи́ин сын и, ра́дуяся, взыва́ше:/ ра́дуйся, чу́до всеми́рное.

Та́же степе́нна, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Услы́шите сия́, вси язы́цы,/ внуши́те, вси, живу́щии по вселе́нней. Вся́кое дыха́ние: Ева́нгелие от Иоа́нна, зача́ло 35.

По 50-м псалме́ стихи́ра самогла́сна, глас 6:

Филосо́фию вы́шнюю восприи́м/ и в глубину́ прему́дрости вни́кнув,/ Всецарю́ соедини́лся еси́,/ святи́телю Кли́менте,/ и, я́коже зерца́ло нескве́рное, изобрази́л еси́/ бога́тство Боже́ственных Писа́ний./ Те́мже язы́к е́ллинский слове́ном уясни́в/ и наро́ды просвети́в благоче́стием,/ коне́ц от Бо́га блаже́нный улучи́л еси́/ и мо́лишися о нас,/ и́же ве́рою и любо́вию тя сла́вящих.

Та́же кано́н пра́здника, на 4 (зри день сей вы́ше).

Кано́н святи́телю дре́вний, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

Припе́в: Святи́телю Кли́менте, равноапо́стольне,/ моли́ Бо́га о нас.

Прииди́те, пе́сньми духо́вными восхва́лим све́тлую па́мять святи́теля Кли́мента,/ и́мже вся Це́рковь просвеще́нна Хри́ста сла́вит.

Я́коже со́лнце, в ми́ре сия́я, святи́телю Кли́менте,/ просвеща́еши вселе́нную житие́м твои́м,/ и́мже и мене́ просвети́, молю́ся.

Наста́ светоза́рная па́мять твоя́, святи́телю Кли́менте,/ озаря́ющи всех, в святе́й твое́й це́ркви ве́рных соше́дшихся и тя сла́вящих.

Богоро́дичен: Дверь Небе́сную, Ю́же проро́цы пропове́даша,/ Де́ву, Христа́ ро́ждшую, в пе́снех по достоя́нию возвели́чим.

Вторы́й кано́н святи́телю, творе́ние Дими́трия Хоматиа́на, архиепи́скопа О́хридскаго, глас 4.

Песнь 1

Ирмо́с: Триста́ты кре́пкия, Рожде́йся от Де́вы,/ во глубине́ безстра́стия/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Невеще́ственным просвеще́нием светя́ся/ и житие́ чи́стое произволя́я,/ жи́тельством доброде́тельным собесе́дник А́нгелов/ и свет ве́рным был еси́, блаже́нне.

Показа́л еси́ лю́дем стези́ благоче́стия,/ заблу́ждшим в путе́х поги́бели пре́лестию сатани́нскою./ Те́мже тя я́ко Богоглаго́льника/ и Госпо́дня апо́стола пе́сньми сла́вим, приснопа́мятне.

Тимофе́я я́сно подража́я, вме́сто Па́вла, всея́ земли́ просвети́теля,/ пропове́дником ве́ры Мефо́дию и Кири́ллу после́довал еси́./ Сего́ ра́ди с ни́ми просла́вился еси́, Богому́дре.

Возлюби́л еси́ Бо́га от всего́ се́рдца/ и ми́ра кра́сных отве́рглся еси́ всеце́ло./ Сего́ ра́ди молю́ тя:/ плотски́я рабо́ты моли́твами твои́ми измени́ мя,/ я́ко злосе́рдие к Бо́гу ражда́ющия.

Богоро́дичен: Соблюда́ти честны́я за́поведи Спа́са/ укрепи́ мя Твои́ми те́плыми заступле́нии, Пречи́стая,/ я́ко да любо́вию Тя сла́влю,/ в Рождестве́ сла́ву де́вства невреди́му соблю́дшую.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́нии́ кра́ю, ве́рных утвержде́ние,/ Еди́не Человеколю́бче.

Прииди́те вси, почти́м краси́теля церко́внаго Кли́мента,/ моля́ще не преста́ти ста́ду своему́ мир/ и душа́м на́шим ми́лость посыла́ти.

К тво́ей святы́ни припа́дающе, блаже́нне,/ умиле́нным гла́сом тебе́ вопие́м:/ призри́ на ны моли́твами твои́ми, мо́лим тя.

Луча́ми кни́жнаго уче́ния напая́я весь мир слове́нский,/ сия́еши, я́коже со́лнце, златоза́рными словесы́,/ и́миже озари́ нас, мо́лим тя.

Богоро́дичен: Неизрече́нно ро́ждши Оте́ческую Зарю́,/ Вседе́теля всей тва́ри и Спа́са душ на́ших,/ утверди́ ны в любви́ Твое́й, Пречи́стая.

Ин

Ирмо́с: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́,/ несть бо свят, па́че Тебе́, Человеколю́бче.

Му́дростию слове́с твои́х ве́ру уясни́л еси́/ и научи́л еси́ лю́ди, в пре́лесть многобо́жия уклони́вшияся,/ Тро́ицу че́ствовати Еди́ную.

Си́лою Ду́ха Уте́шителя загради́в ху́льныя на Него́ уста́,/ и ересе́й нача́льники, кре́пко зауши́в, посрами́л еси́.

Непоро́чным житие́м Бо́гу послужи́в, блаже́нне о́тче,/ я́коже дре́вний Ааро́н, всепло́дие прине́сл еси́,/ о ста́де твое́м моля́ся.

Ка́пли сле́зныя несть во мне ко омове́нию душе́вных скверн,/ ты у́бо омы́й мя моли́твами твои́ми,/ струю́ покая́ния мне источа́я.

Богоро́дичен: Ту́чная горо́, Ю́же Дави́д предзри́ше Ду́хом,/ молю́ Тя приле́жно, Влады́чице,/ обрати́ мя, заблу́ждшаго в гора́х отча́яния.

Конда́к святи́теля, глас 3.

Подо́бен: Де́ва днесь:

Храм твой, свя́те, врачевство́ духо́вное/ пресла́вно показу́ется ве́рно приступа́ющим,/ всех бо разли́чных боле́зней избавля́ет,/ стра́сти же душ вся́ческия усыпа́ет./ Сего́ ра́ди тя, всеблаже́нне,/ те́пла предста́теля имену́ем.

И́кос:

Воспои́м вси ны́не Бо́лгарских люде́й иера́рха,/ благогове́йно приступа́юще в хра́ме его́,/ и Боже́ственную ра́ку моще́й его́ целу́им, к не́му глаго́люще:/ о́тче Богому́дре, ты еси́ па́стырь наш и учи́тель,/ ты град и род твой соблюда́ти не оскудева́й,/ на твоя́ бо приле́жныя моли́твы упова́юще,/ тя, всеблаже́нне, те́пла предста́теля имену́ем.

Седа́лен, глас 8.

Подо́бен: Прему́дрость и Сло́во:

Похвала́ми согла́сно почти́м святи́теля вели́каго,/ напои́вшаго всех словесы́ кни́жными/ и весь мир Слове́нский просвети́вшаго заря́ми духо́вными./ Тем, соше́дшеся, досто́йно просла́вим святы́я по́двиги его́/ и к нему́ возопии́м:/ Кли́менте сла́вне,/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника, глас 4.

Подо́бен: Удиви́ся Ио́сиф:

Непоро́чная А́гница и Нескве́рный Черто́г,/ в дом Бо́жий Богоро́дица Мариа́м с весе́лием вво́дится пресла́вно,/ Ю́же А́нгели Бо́жии дорино́сят ве́рно,/ и вси ве́рнии блажа́т при́сно,/ и благода́рственно пою́т Ей непреста́нно ве́лиим гла́сом:/ на́ша сла́ва и спасе́ние Ты еси́, Всенепоро́чная.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра о́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Тя ми́рови Христо́с па́стыря подаде́,/ поручи́в ти ста́до избра́нное, блаже́нне./ Тем, я́ко со́лнце, сия́еши,/ озаря́я моля́щих ти ся.

Очи́стив ду́шу, и те́ло, и ум, му́дре Кли́менте,/ я́ко зла́то, на земли́ све́тел был еси́,/ сосу́д досто́ин Пресвята́го Ду́ха.

Вся тварь днесь прославля́ет труды́ твоя́, святи́телю Кли́менте./ Просвети́ ны у́бо/ и отпуще́ние грехо́в пода́ждь моли́твами твои́ми.

Богоро́дичен: Безсе́менно заче́ншая Творца́ всех, Пренепоро́чная,/ пречи́стеи ру́це возде́вши,/ в ми́ре покры́й ны крыло́ма Твои́ма/ и от гряду́щаго гне́ва изба́ви ны.

Ин

Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ нетле́нною дла́нию и спасе́ зову́щия:/ сла́ва, Христе́, си́ле Твое́й.

Честна́я мирополо́жница святы́х моще́й твои́х де́моны прогоня́ет,/ стра́сти изцеля́ет неизце́льныя и многообра́зных избавля́ет обстоя́ний притека́ющия./ Те́мже ве́рно тя сла́вим.

И уме́рша тя почита́ем я́ко жи́ва, блаже́нне,/ неги́блемыя бо жи́зни но́сиши де́йство, я́ко чуде́с благода́ть прие́м,/ те́мже зове́м:/ сла́ва Облагодати́вшему тя.

Исто́чник изцеле́ний опису́ет/ еди́наго изцеле́ния де́йство на вся́кое ле́то²²² ,/ Кли́ментова же ра́ка неизче́тная мно́жества неду́гов вся́ческих прогоня́ет всегда́.

Помышле́ньми согреша́ю всегда́, и словесы́, и дея́ньми,/ те́мже удали́хся от лица́ Твоего́, Го́споди./ Но, обрати́в, спаси́ мя я́ко блу́днаго,/ непреста́нными Твоего́ святи́теля моли́твами.

Богоро́дичен: Непрело́жна Влады́ку родила́ еси́ пло́тию, Де́во,/ спасти́ восхоте́вшаго челове́ка./ Те́мже к блу́дному житию́ отвраще́нна мя/ к покая́нию обрати́ предста́тельствы Твои́ми.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

К твое́й святы́ни вси припа́даем, Кли́менте, святи́телю Спа́сов,/ умиле́нными глаго́лы со слеза́ми вопию́ще:/ не забу́ди моли́твенники твоя́.

А́нгельское житие́ име́в на земли́,/ ра́вную со А́нгелы честь восприе́млеши,/ с ни́миже ны́не предстоя́ Влады́це, моли́ся о ста́де твое́м.

Свяще́нную слу́жбу всегда́ Бо́гу вознося́,/ всех ко благоче́стию приводи́л еси́ словесы́ духо́вными,/ и́миже и мене́ озари́, молю́ тя.

Богоро́дичен: Ма́тернее дерзнове́ние к Сы́ну Твоему́ иму́щи,/ на спасе́ние челове́ков рожде́нному,/ не пре́зри моли́тв на́ших, Пречи́стая,/ Тя бо по Бо́зе Еди́ну помо́щницу и́мамы.

Ин

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,/ воспева́ем, Человеколю́бче.

Си́лою Ду́ха про́поведь твою́ посе́ял еси́ в слу́хи лю́бящих суету́, о́тче,/ и многопло́дный клас благоче́стия собра́л еси́.

Умерщвле́ние изволя́я носи́ти Христо́во во пло́ти твое́й всегда́,/ жи́ва Сего́ в тебе́ име́л еси́, по Па́влу,/ И́же тя в зе́млю живы́х всели́.

Гла́сы тво́их раб прие́мля, пребога́те,/ изба́ви нас от вся́ких боле́зней, и обстоя́ний,/ и осужде́ния бу́дущаго моли́твами твои́ми.

Изцеле́ний река́ сый, ди́вне,/ мои́х губи́тельных страсте́й тече́ние изсуши́ твои́ми моли́твами/ и сле́зными тече́нии ду́шу мою́ очи́сти.

Богоро́дичен: Ма́тернее приве́тствие с де́вством на Тебе́ сочета́ся, Чи́стая,/ Зижди́теля бо родила́ еси́ па́че разуме́ния./ Те́мже, Матероде́ву Тя разуме́юще, сла́вим.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Тучено́сен о́блак яви́лся еси́ всем Це́рквам, Кли́менте свя́те./ И ны́не моли́ся Влады́це ро́су духо́вную излия́ти на нас, певцы́ твоя́.

Све́тится Це́рковь О́хридская, труды́ твоя́ почита́ющи,/ в ню́же прише́д, сохрани́ от бед честву́ющих честну́ю па́мять твою́.

Я́ко гром, греми́ громогла́сным язы́ком Небе́сное уче́ние,/ и я́ко кимва́л, звяца́я златоза́рными устна́ми,/ всю зе́млю огласи́л еси́, блаже́нне Кли́менте, Богогла́се.

Богоро́дичен: Не преста́й о нас моля́щися, Богоро́дице Де́во,/ я́ко ве́рным Ты еси́ утвержде́ние и кре́пость Боже́ственная.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́ щшися/ ра́ди ми́лости от ребр Твои́х/ исте́кшею кро́вию.

Восте́кл еси́, я́коже звезда́, осиява́я концы́ слове́нския/ и к све́ту Богопозна́ния возставля́я/ стра́стне во тьме неве́дения спя́щия.

Намасти́ еле́ем твои́х заступле́ний/ гла́вы окружа́ющих честну́ю ра́ку моще́й твои́х/ и почита́ющих честна́я твои́ исправле́ния.

Погуби́л еси́ ерети́ческое злоче́стие,/ на Ду́ха в высоту́ взе́млющее хуле́ние,/ держа́ву же благочести́вых догма́т укрепи́л еси́.

Покажи́ мя превы́шша злоде́йства злосе́рдных,/ и́маши бо дерзнове́ние к Влады́це, святи́телю вели́кий,/ и бу́ди ми крепча́йшее прибе́жище.

Богоро́дичен: Ми́лостива соде́лай Сы́на Твоего́, Богома́ти,/ благоче́стно Тя, Богоро́дицу, испове́дающим/ и пода́ждь нам ми́лости Твоя́ пребога́тыя.

Конда́к и и́кос пра́здника (зри день сей вы́ше ).

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.

Гроб твой честны́й со стра́хом обстоя́ще, святи́телю,/ умиле́нным гла́сом вопие́м ти,/ грехо́в избавле́ние прося́ще.

Не отврати́ лица́ твоего́, блаже́нне Кли́менте,/ но моли́ся к Изба́вителю Христу́ Бо́гу,/ да ми́лости Своея́ сподо́бит ны.

Простри́ на моли́тву пречестне́и ру́це твои́, Кли́менте свя́те,/ и защити́ от всех зол,/ укрепля́я и освяща́я нас.

Богоро́дичен: Безсе́менно вмести́вши Творца́ во чре́ве Свое́м/ и неизрече́нно роди́вши,/ Того́ умоли́ я́ко Ма́ти спасти́ ду́ши на́ша.

Ин

Ирмо́с: Спасы́й во огни́ Авраа́мския Твоя́ о́троки/ и халде́и уби́в,/ я́же пра́вда пра́ведно уловля́ше,/ Препе́тый Го́споди, Бо́же оте́ц на́ших,/ благослове́н еси́.

От ве́ждей твои́х дрема́ние отря́сл еси́, бо́дрствуя в моли́твах,/ и неусы́пною стра́жею дале́че от па́ствы твоея́ губи́тели отгна́л еси́, вопия́:/ Бо́же оте́ц на́ших, благослове́н еси́.

Апо́столов лик украша́еши я́ко све́тлый Богоглаго́льник,/ страстоте́рпцев мно́жество восполня́еши я́ко без кро́ве му́ченик,/ свяще́нников собра́ние составля́еши я́ко знамено́сный святи́тель, вопия́:/ Бо́же оте́ц на́ших, благослове́н еси́.

Не скры́ся от Тебе́ и детовожде́ние младе́нцев,/ но и сия́ о́бразом письме́н соверша́л еси́, к благоче́стию вопию́щия:/ Бо́же оте́ц на́ших, благослове́н еси́.

Лю́тыми страстьми́ неи́стовствующую ду́шу мою́, треблаже́нне,/ благи́ми дея́ньми лозу́ покажи́,/ до́брыя розги́ иму́щую и плоды́ нося́щую, вопию́щи:/ Бо́же оте́ц на́ших, благослове́н еси́.

Богоро́дичен: Сове́та Вели́каго А́нгела роди́ Отрокови́ца,/ Его́же я́ко А́нгелов Творца́ и челове́ков Спаси́теля сла́вим, глаго́люще:/ Бо́же оте́ц на́ших, благослове́н еси́.

Песнь 8

Ирмо́с: Седмери́цею пещь/ халде́йский мучи́тель/ благочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Со Безпло́тными Си́лами водворя́яся и Христу́ Бо́гу с ни́ми предстоя́,/ помоли́ся о творя́щих честну́ю па́мять твою́, пою́щих:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

При́зри на птенцы́, и́хже воспита́л еси́ под кро́вом твои́м,/ и наслади́л еси́ слове́с твои́х медото́чных,/ и, просте́р ру́це, благослови́ ученики́ твоя́, пою́щия:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Вку́пе с блаже́нным Кири́ллом и светоза́рным Мефо́дием/ процве́л еси́, я́коже на горе́./ Вку́пе и моли́теся при́сно о ста́де ва́шем, воспева́ющем:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Богоро́дичен: Ма́ти Бо́жия, Спа́са пло́тию ро́ждшая,/ соу́з нас страсте́й разреши́/ и моли́ся спасти́ся нам, пою́щим:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Ин

Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препояса́вшеся,/ благоче́стия рачи́тели/ о́троцы, взыва́юще:/ благослови́те, вся дела́ Госпо́дня, Го́спода.

Пригвозди́в себе́ к па́че ума́ благи́м и презре́в ви́димая,/ вы́шше сил твою́ жизнь соблю́л еси́/ и яви́лся еси́ честны́й сосу́д Ду́ха, воспева́я:/ благослови́те, вся дела́ Госпо́дня, Го́спода.

Воды́ живы́я вожделе́в, я́ко еле́нь жа́ждущий,/ и напи́вся, исто́чник неистощи́мый был еси́ догма́тов Боже́ственных/ и чуде́с ужа́сных вопию́щим:/ благослови́те, вся дела́ Госпо́дня, Го́спода.

Приста́нище бу́ди мне, вла́ющемуся в пучи́не жите́йстей,/ и утиши́ искуше́ний свире́пыя во́лны/ призыва́ющему тя, предста́теля, и воспева́ющему:/ благослови́те, вся дела́ Госпо́дня, Го́спода.

Богоро́дичен: Заре́ю те́плых Твои́х моле́ний/ просвети́ потемне́нную страстьми́ мою́ ду́шу, Благода́тная,/ и све́том покая́ния сы́на мя покажи́ Све́та У́мнаго, вопию́ща:/ благослови́те, вся дела́ Госпо́дня, Го́спода.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с,/ тем Тя, Богоро́дицу,/ А́нгелов и челове́к чинонача́лия велича́ют.

Не помяни́ безчи́сленных мои́х грехо́в, блаже́нне святи́телю,/ но, просте́р свы́ше пречи́стеи ру́це твои́,/ возведи́ мя, во гресе́х лежа́щаго поги́бельных.

Тя молю́, Кли́менте святи́телю, и ру́це к тебе́ простира́ю,/ и сле́зы испуща́ю, и коле́не преклоня́ю,/ прося́ отпуще́ния безчи́сленны́х мои́х прегреше́ний моли́твами твои́ми.

Испроси́, блаже́нне, с Небесе́ побе́ду на проти́вныя враги́ благочести́вым лю́дем,/ христолюби́вое же во́инство и правосла́вный наро́д изба́ви от вся́ких зол,/ я́ко да досто́йно тя ублажа́ем.

Богоро́дичен: А́нгелов Творца́ безсе́менно заче́нши/ и ро́ждши пло́тию Спа́са на́шего,/ Того́ приле́жно моли́, Богоро́дице,/ да́ти нам грехо́в отпуще́ние,/ я́ко да досто́йно Тя велича́ем.

Ин

Ирмо́с: Ка́мень нерукосе́чный/ от несеко́мыя горы́ – Тебе́, Де́во,/ краеуго́льный отсече́ся –/ Христо́с, совокупи́вый разстоя́щаяся естества́./ Тем, веселя́щеся,/ Тя, Богоро́дице, велича́ем.

Глаго́лы живота́ ве́чнаго вложи́в освяще́нному твоему́ ста́ду, треблаже́нне,/ и соверши́в е догма́тами благоче́стия,/ восте́кл еси́ в Небе́сная селе́ния.

Да лу́чшия сла́вы в Вы́шних сподо́бишися,/ житие́ на земли́ показа́л еси́ вся́каго рабостра́стия свобо́дное./ Те́мже и насле́дие име́л еси́ свобо́дныя митропо́лии.

Горе́ тя Це́рковь перворо́дных весели́т, треблаже́нне,/ до́ле же тя прославля́ет чуде́с благода́ть,/ ю́же ти Бог дарова́,/ прославля́емый всегда́ во святы́х Свои́х.

Тя, Христо́ва иера́рха, свети́льника церко́внаго почита́юще,/ Кли́менте Богоно́се, гла́сы пе́сненными мо́лим:/ не пре́зри, преподо́бне, раб твои́х моли́твы.

Богоро́дичен: Усты́, душе́ю и се́рдцем Тя, Богоро́дицу, испове́дающих, Де́во,/ от бед изба́ви и вся́кия ско́рби,/ я́ко иму́щи дерзнове́ние ко из Тебе́ ро́ждшемуся Го́споду.

Свети́лен, глас 3.

Подо́бен: Не́бо звезда́ми:

Я́ко со́лнце, просвети́вый Це́рковь твою́, му́дре,/ чудеса́ источа́еши во всю́ вселе́нную,/ Кли́менте свяще́нне, архиере́йская сла́во.

Сла́ва, и ны́не, пра́здника, глас 2.

Подо́бен: Жены́, услы́шите:

Ю́же дре́вле предвозвести́ проро́ческое сосло́вие:/ ста́мну, и жезл, и скрижа́ль, и несеко́мую го́ру –/ Мари́ю Богоотрокови́цу ве́рно да восхва́лим,/ днесь бо вво́дится во свята́я святы́х воспита́тися Го́сподеви.

На хвали́тех 3 стихи́ры пра́здника (зри день сей вы́ше ).

И́ны стихи́ры, свята́го Кли́мента О́хридскаго, глас 8.

Подо́бен: О, пре́славнаго чудесе́:

Кли́менте Богому́дре, о́тче наш,/ воздержа́нием плотски́х страсте́й/ и спротяже́нным жи́зни твое́й по́стничеством/ ум впери́л еси́ к раче́нию высо́кому/ Боже́ственнаго незаходи́маго Све́та/ и превожделе́ннаго Небе́снаго блаже́нства,/ и́хже сла́дости в прича́стии всегда́ был еси́,/ предстоя́ ду́хом Престо́лу Всецаря́ Христа́,/ Его́же моли́, да спасе́т ду́ши на́ша я́ко Милосе́рд.

Кли́менте, Богому́дре, о́тче наш,/ святи́тельства оде́жду от Бо́га прии́м,/ па́стырь до́брый гра́да О́хридскаго был еси́/ и лю́ди Госпо́дни до́бре упа́сл еси́,/ Болга́рию всю к благоче́стию приве́д/ Боже́ственными словесы́ и поуче́нии/ и чуде́с пресла́вных показа́ньми./ Те́мже тя почита́ем, Христа́ сла́вяще,/ Его́же моли́, да спасе́т ду́ши на́ша я́ко Милосе́рд.

Кли́менте, Богому́дре, о́тче наш,/ со́лнца светоза́рнее от за́пад возсия́л еси́,/ лучи́ слове́с твои́х испуска́я/ и концы́ вселе́нныя просвеща́я./ Основа́ние непоколеби́мое Це́ркве яви́вся/ и столп незы́блемь благоче́стия,/ ересе́й тьму в бе́гство обрати́л еси́/ и Христа́ правосла́вно просла́вил еси́,/ Его́же моли́, да спасе́т ду́ши на́ша я́ко Милосе́рд.

Сла́ва, глас 8:

Святи́теля Христо́ва Кли́мента вси восхва́лим,/ похвалу́ Слове́нскую и правосла́вных утвержде́ние,/ Бо́лгаров сла́ву и вселе́нныя неусы́пнаго предста́теля,/ непреста́нно к нему́ глаго́люще:/ ра́дуйся, Кли́менте, отце́в свяще́ннейше;/ радуйся, чуде́с исто́чниче и изцеле́ний некра́домое сокро́вище;/ ра́дуйся, архиере́ев сла́во и мона́шествующих похвало́./ И ны́не све́тло соверша́ющим честну́ю твою́ па́мять/ проси́ согреше́ний проще́ния и спасе́ния душ на́ших.

И ны́не, пра́здника, глас 2:

Днесь в храм приво́дится Всенепоро́чная Де́ва,/ во оби́телище Всецаря́ Бо́га/ и всея́ жи́зни на́шея Пита́теля./ Днесь Чисте́йшая святы́ня,/ я́ко триле́тствующая Ю́ница,/ во Свята́я святы́х вво́дится./ Той возопии́м, я́коже А́нгел:/ ра́дуйся, Еди́на в же́нах благослове́нная.

Славосло́вие вели́кое и отпу́ст.

На Литурги́и

Блаже́нны от кано́на Богоро́дицы, песнь 3-я, и свята́го, песнь 3-я. Проки́мен, глас 1: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Услы́шите сия́, вси язы́цы,/ внуши́те, вси, живу́щии по вселе́нней . Апо́стол ко Евре́ем, зача́ло 318. Аллилу́ия, глас 2: Уста́ пра́веднаго поуча́тся прему́дрости,/ и язы́к его́ возглаго́лет суд. Ева́нгелие от Луки́, зача́ло 54. Прича́стен: Ча́шу спасе́ния: или́: В па́мять ве́чную бу́дет пра́ведник: