Ве́чер

На Го́споди, воззва́х: стихи́ры святы́х на 6, глас 6.

Подо́бен: Все отло́жше:

Всю́ отложи́вше на Небесе́х надежду,/ сокро́вище некра́домо себе́ святи́и сокро́вищствоваша:/ ту́не прия́ша, ту́не даю́т неду́гующим врачева́ния./ Зла́та или́ сребра́ ева́нгельски не стяжа́ша,/ челове́ком же и ското́м благодея́ния препода́ша,/ да все́ми послушли́ви бы́вше Христу,/ со дерзнове́нием мо́лятся о душа́х на́ших.

Ве́щи возгнуша́шася на земли́ тле́емыя,/ Небе́сножи́телие же во пло́ти/ я́коже А́нгели яви́шася,/ единому́дреннии сожи́теле,/ сопру́г единонра́вный святы́х и единоду́шный./ Те́мже стра́ждущим всем врачева́ния подаю́т,/ безсре́бренно да́рующе благодея́ния тре́бующим,/ я́же ле́тным сим досто́йно почти́м пра́здником,/ Христу́ со дерзнове́нием моля́щияся/ о душа́х на́ших.

Всю все́льшая в себе́ Тро́ицу, дво́ица приснопа́мятная,/ Косма́ и Дамиа́н Богому́дрии,/ я́ко пото́цы источа́ют от исто́чника живоно́снаго/ во́ды врачева́ний;/ и́хже и мо́щи стра́сти осяза́нием врачу́ют,/ и са́мая то́кмо имена́/ неду́ги от челове́ков отго́нят,/ всех притека́ющих спаси́тельная приста́нища о Христе́,/ и со дерзнове́нием мо́лятся о душа́х на́ших.

Все отри́нувше стра́стное мучи́тельство/ и вся́ко размышле́ние лука́ваго зми́я попра́вше о Христе́,/ святи́и безме́здницы, Космо́ и Дамиа́не,/ светообра́зни яви́стеся, я́ко свети́ла,/ озаря́юще всю подсо́лнечную Богозна́меньми всегда́,/ тьму отгоня́юще и неду́ги благода́тию/ и всем спаси́телие явля́ющеся,/ ве́рою неукло́нною/ творя́щим сла́вную па́мять ва́шу, прему́дрии.

Сла́ва, глас 6. Анато́лия:

Безконе́чна есть святы́х благода́ть,/ ю́же от Христа́ прия́ша,/ те́мже и мо́щи их/ от Боже́ственныя си́лы непреста́нно де́йствуют чудеса́,/ и́хже и имена́, ве́рою призыва́ема,/ неисце́льныя боле́зни исцеля́ют./ И́миже, Го́споди, и нас душе́вных и теле́сных страсте́й свободи́,/ я́ко Человеколю́бец.

И ны́не:

Богоро́дице, Ты еси́ лоза́ и́стинная:

Или́ Крестобогоро́дичен.

Подо́бен: Все отло́жше:

А́гнца своего́ А́гница нескве́рная дре́вле и Непоро́чная Влады́чица/ на Дре́ве Кре́стнем я́ко узре́,/ ма́терски восклица́ше/ и, дивя́щися, вопия́ше:/ Ча́до сладча́йшее,/ что́ зре́ние сие́ но́вое и пресла́вное?/ Ка́ко со́нм безблагода́тный суди́щу Пила́тову предаде́ Тя/ и осужда́ет на смерть Живота́ вся́ческих?/ Но воспева́ю Твое́ неизрече́нное, Сло́ве, снизхожде́ние.

На стихо́вне Окто́иха.

(А иде́же храм святы́х или́ восхо́щет кто святы́м пе́ти полиеле́й, тогда́ на стихо́вне стихи́ры, и на у́трени по кафи́змах седа́льны, и кано́н Богоро́дице, и святы́х кано́на два, и хвали́тны, и славосло́вие).

На стихо́вне стихи́ры, глас 2:

Исто́чник исцеле́ний/ еди́наго то́кмо в ле́те исцелева́ше,/ храм же безсре́бреников все мно́жество исцеля́ет неду́гующих,/ неоску́дно бо есть и неиждива́емое бога́тство святы́х./ Тех моли́твами, Христе́, поми́луй нас.

Стих: Ди́вен Бог во святы́х Свои́х,/ Бог Изра́илев.

Феофа́ново:

Любо́вию Боже́етвенною/ и жела́нием бу́дущих де́тельне пожи́вше,/ спаси́тельныя пути́ испра́висте./ Те́мже, чистоту́ душе́вную нескве́рно соблю́дше,/ ве́щным до конца́ противоста́сте;/ Ду́хом же Боже́ственным позлати́вшеся,/ беззла́тно исцеле́ние неду́гующим подаете́,/ дво́ица свяще́нная, светоза́рный соу́зе,/ просвеще́нный Боже́ственный сопру́же, безсре́бреницы,/ в ско́рбех и неду́зех посеща́юще нас/ и душ на́ших неду́ги безме́здно врачу́юще.

Стих: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Ге́рманово:

Вели́ких сподо́бльшеся даро́в, всехва́льнии,/ в смире́нном житии́ на земли́ пожи́сте;/ и, проходя́ще всю́ду,/ ту́не неду́гующих стра́сти врачу́юще,/ яви́стеся Ангелов собесе́дницы,/ Космо́ с Дамиа́ном мудрым, бра́тия прекра́сная,/ и на́ша стра́сти моли́твами ва́шими уврачи́те.

Сла́ва, глас 6:

Всегда́ иму́ще Христа́, де́йствующа в вас,/ святи́и безсре́бреницы,/ чудоде́йствуете в ми́ре,/ немощству́ющия врачу́ете,/ и́бо врачевство́ ва́ше исто́чник есть неисчерпа́емый:/ че́рплемь же, па́че преистека́ет/ и, излива́емь, изоби́лует;/ на ки́йждо день истощава́емь, и умножа́ется,/ всем подая́ и неоскудева́емь пребыва́я;/ и че́рплющии насыща́ются врачева́ний,/ то́йжде пребыва́ет неиждиву́щ./ Что у́бо вас нарече́м?/ Цели́тельных ли враче́в душ же и теле́с?/ Цели́телей страсте́й неисце́льных,/ ту́не исцеля́ющих всех,/ прие́мших дарова́ние от Спа́са Христа́,/ подаю́щаго нам ве́лию ми́лость.

И ны́не, Богоро́дичен:

Никто́же, притека́яй к Тебе́,/ посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

Или́ Крестобогоро́дичен.

Подо́бен: Тридне́вен:

Ви́дящи Тя распина́ема, Христе́,/ Тебе́ Ро́ждшая вопия́ше:/ что стра́нное е́же ви́жу та́инство, Сы́не Мой?/ Ка́ко на Дре́ве умира́еши, пло́тию пове́шен,/ Жи́зни Пода́телю?

Тропа́рь, глас 8:

Святи́и безсре́бреницы и чудотво́рцы, Космо́ и Дамиа́не,/ посети́те не́мощи на́ша:/ ту́не прия́сте, ту́не дади́те нам.

На У́трени

По 1-й кафи́зме седа́лен Окто́иха или́ святы́х, глас 4.

Подо́бен: Ско́ро предвари́:

В ми́ре Богоуго́дно житие́ стяжа́вше, богатносве́тнии,/ исцеле́ния нам, радость прие́млющим,/ извеще́ние святы́м, че́стне научи́вшеся, подаете́:/ яви́стеся бо, пресла́внии, вра́чеве боля́щих,/ Христу́, споспешеству́ющу вам, Космо́ и Дамиа́не, святи́и безме́здницы.

Сла́ва, и ны́не, Богоро́дичен:

Пое́м тя, Богоневе́сто и Ма́ти Христа́ Бо́га,/ сла́вяще Рождество́ Твое́ непостижи́мое,/ и́мже изба́вихомся от ле́сти диа́воли и вся́ческих бед,/ Влады́чице Богоро́дице, и ве́рно взыва́ем:/ поми́луй ста́до Твое́, Еди́на Всепе́тая.

По 2-й кафи́зме седа́лен, глас 8.

Подо́бен: Повеле́нное та́йно:

От безме́здных сокро́вищ чудеса́ содева́юще,/ пречи́стых даро́в благода́тных яви́стеся раче́нием Боголе́пне,/ бога́тство восприе́мше Небе́сное и сла́ву оста́вльше земну́ю./ Тем песнь прино́сим всех Соде́телю,/ благода́ть дарова́вшему вам исцеле́ний.

Сла́ва, и ны́не, Богоро́дичен:

Непреме́ннаго Бога я́ко ро́ждшая,/ измене́ннаго мя при́сно грехо́м,/ утверди́ се́рдце мое́, Блага́я, моли́твами ма́терними Твои́ми,/ я́ко да и аз зову́ Ти, Богоро́дице Мари́е:/ поми́луй ста́до Твое, е́же стяжа́ла еси́, Всенепоро́чная.

Велича́ние:

Велича́ем вас,/ чудотво́рцы сла́внии, Космо́ и Дамиа́не,/ и чтим святу́ю па́мять ва́шу,/ наста́вницы заблу́ждшим, исцели́тели боля́щим/ и собесе́дницы А́нгелом.

По полиеле́и седа́лен, глас 8.

Подо́бен: Прему́дрости:

Исцеле́ний да́телие и чудотво́рцы/ и чуде́с свети́льники светоприе́мнии всем яви́стеся духо́вною благодатию:/ страсте́й бо пла́мень ве́рою прохлажда́ете/ и ве́рных в ней смысл согрева́ете./ Тем врачевство́ душе́вное стяжа́вше, Боже́ственную це́рковь ва́шу,/ к ней же прибега́юще, вопие́м:/ Богоно́сцы безсре́бреницы,/ моли́те Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять ва́шу.

Сла́ва, и ны́не, Богоро́дичен:

Я́ко Де́ву и еди́ну в жена́х, Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ Огнь бо всели́ся в Тя Божества́/ и я́ко Младе́нца млеко́м пита́еши Зижди́теля и Го́спода./ Тем, А́нгельский и челове́ческий род, досто́йно сла́вим пресвято́е Рождество́ Твое́ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му Рождеству́ Твоему́.

Степе́нна, 1-й антифо́н, 4-го гла́са. Проки́мен, глас 4: Святы́м, и́же суть на земли́ Его́, удиви́ Господь вся хоте́ния Своя́ в них. Стих: Предзре́х Го́спода пре́до мно́ю вы́ну: Вся́кое дыха́ние: Ева́нгелие от Ма́рка, зача́ло 23.

По 50-м псалме́ стихи́ра, глас 2:

Се коль добро́ и коль красно́,/ е́же жи́ти бра́тии вку́пе в Ду́се Святе́м,/ я́коже рече́ Богооте́ц Дави́д,/ любо́вию нелицеме́рною и ве́рою несомне́нною,/ сло́вом и́стинным,/ я́ко ря́сны зла́ты, друг дру́зе себе́ придержа́ща./ Прииди́те, ны́не благослови́м Го́спода,/ да́вшаго нам святы́я Своя́ безме́здники, Косму́ и Дамиа́на,/ врачи́ боля́щих, свети́ла те́мных,/ прогони́тели де́монов,/ и́миже боля́щии исцеля́ются,/ и́миже ме́ртвии воскреса́ют,/ и́миже прокаже́ннии очища́ются, по гла́су Госпо́дню:/ ту́не у́бо прия́ша, ту́не же и подаю́т боля́щим исцеле́ния./ И́хже моли́твами, Христе́ Бо́же, просвети́ ду́ши на́ша.

О́ба кано́на Окто́иха без му́ченичнов и святы́х кано́н на 6. А иде́же храм, кано́н Богоро́дицы со ирмосо́м на 6 и святы́х о́ба кано́на на 8. Кано́н, его́же краегране́сие: Сла́вныя врачи́ земны́м пе́ти подоба́ет. Глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь / пои́м, вопия́ше.

Озаря́еми сла́вою Боже́ственною, Богосве́тлии безсре́бреницы,/ озари́те на́ша ду́ши, разоря́юще страстну́ю мглу,/ я́ко да вас ве́рою почита́ем.

Тлетво́рных очи́щшеся пе́рвее страсте́й боле́зней преложе́нием,/ очища́ете на́ша лю́тыя неду́ги, му́дрии,/ и боле́зни душе́вныя облегча́ете.

От всех Влады́ки дар прия́сте, святи́и, чуде́с дарова́ния,/ на́ша исцели́те мно́гия и неудобьисце́льныя пло́ти стра́сти, моли́мся.

Моле́ние, безсре́бреницы и вра́чеве, Бо́гу принеси́те,/ я́ко да изба́вит ны искуше́ний и скорбе́й мно́гих/ и тре́петнаго и стра́шнаго тогда́ муче́ния.

Богоро́дичен: Зако́нов есте́ственных кроме́ ро́ждши, Чи́стая,/ Законода́теля Иису́са Изба́вителя,/ Его́же моли́ изба́вити ны, Богоро́дице, мно́гих беззако́ний на́ших.

Други́й кано́н, его́же краегране́сие: Пе́сньми почита́ю му́дрыя безсре́бреники. Творе́ние Иоа́нна Дамаскина́. Глас 1.

Песнь 1

Ирмо́с: Пои́м, вси лю́дие,/ от го́рькия рабо́ты фарао́ни Изра́иля Изме́ншему/ и во глубине́ морсте́й нога́ми немо́крыми Наста́вльшему/ песнь побе́дную,/ я́ко просла́вися.

От благода́ти Нача́льныя Тро́ицы,/ дво́ица чу́дная и честна́я свеща́ема,/ всем исцеле́ния приходя́щим ве́рно подае́т, при́сно источа́ющи.

Тайноучи́ми живоно́сным словесе́м,/ я́ко свети́ла в ми́ре возсия́вше,/ страстну́ю мглу удо́бь разгоня́ете теплото́ю ве́ры, всеблаже́ннии.

Зако́ну покаря́ющеся Спа́сову, всесла́внии,/ сладостра́стие у́бо плотско́е отри́нуша:/ доброде́тельными же душа́ми светле́йше просвеща́ющеся,/ в ми́ре преизя́ществоваша, досточу́днии.

Богоро́дичен: Во все́го челове́ка в Твою́ утро́бу всели́выйся, Богома́ти, неизрече́нне облече́ся,/ из Отца́ возсия́вый Сын, безле́тне Пребоже́ственный,/ Тому́ воспои́м, я́ко просла́вися.

Песнь 3

Ирмо́с: Несть свят,/ я́коже Ты, Го́споди, Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Мир пое́т ва́ша, святи́и, мно́гая благодея́ния/ и чуде́с мно́жества, чудотво́рцы и вра́чеве,/ А́нгел всех равностоя́тели.

Вас обои́х, светода́телей, мо́лим,/ звезд на высоте́ лежа́щих Це́ркве та́йно, Космо́ и Дамиа́не,/ сердца́ ве́рных озари́те.

Ка́пли источа́юще при́сно, святи́и, исцеле́ния,/ омы́йте всех душе́вную скве́рну/ и страстны́я пло́ти то́ки вся уста́вите.

Се совокупи́вшеся лю́дие, святи́и, отвсю́ду/ ва́ша воспе́ти вели́кия да́ры внутрь це́ркве ва́шея,/ но всех моле́ния испо́лните.

Богоро́дичен: Свята́я Влады́чице Чи́стая,/ Пресвято́е Сло́во воплоти́вшая сло́вом,/ безслове́сных мя страсте́й, пою́ща Тя благоче́стно/ Боже́ственными словесы́, изба́ви, Пренепоро́чная.

Ин

Ирмо́с: Утверди́ мене́, Христе́, на недви́жимом ка́мени за́поведей Твои́х/ и просвети́ мя све́том лица́ Твоего́, / несть бо свят па́че Тебе́, Человеколю́бче.

Врачева́ний исто́чники, даро́в же Боже́ственных струи́,/ невеще́ственнаго Све́та светле́йшая прия́телища вси досто́йне воспои́м.

Я́ко теле́сныя и душе́вныя врачу́юще стра́сти/ и боле́зни приходя́щих к вам, всечестни́и,/ усе́рдно ны́не я́ко благоде́телие исцеля́ете.

Пло́дными доброде́тельми украша́еми,/ вся́ку тле́емую сла́дость жите́йскую я́ве отрази́сте,/ к Бо́жией добро́те непреста́нно взира́юще.

Богоро́дичен: В ви́де на́шем пре́жде Неви́димый яви́ся, о Богороди́тельнице,/ сте́кшуся с пло́тию Божеству́ во утро́бе Твое́й пресвяте́й, Богоневе́сто.

Седа́лен, глас 8.

Подо́бен: Прему́дрости:

От исто́чника бе́здны, Иису́са,/ чуде́с струи́ благоле́пно поче́рпше, святи́и,/ та́йными ту́чами страсте́й мра́чныя о́блаки отгоня́ете/ и неду́гующим челове́ком исцеле́ния подае́те./ Тем, получи́вше здра́вое весе́лие,/ ва́ми, пресла́внии, удивля́еми, зове́м:/ Богоно́снии безсре́бреницы, моли́те Христа́ Бо́га/ согреше́ний оставле́ние дарова́ти/ пра́зднующим любо́вию святу́ю па́мять ва́шу.

Сла́ва, и ны́не, Богоро́дичен:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Препе́тая,/ беззако́нию мя су́ща скве́рное оби́телище/ и бесо́м игра́лище в ра́зуме бы́вша,/ потщи́ся от тех злоде́йства мя изба́вити/ и све́тлое жили́ще доброде́телей соверши́, Светоно́сная, Нетле́нная,/ отжени́ о́блак страсте́й, и Вы́шняго прича́стия сподо́би,/ и Све́та невече́рняго моли́твами Твои́ми.

Крестобогоро́дичен:

А́гнца, и Па́стыря, и Изба́вителя А́гница, зря́щи на Кресте́,/ восклица́ше, пла́чущи, и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие,/ е́же терпи́ши за милосе́рдие ми́лости./ Долготерпели́ве Го́споди,/ ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Христо́с моя́ Си́ла,/ Бог и Госпо́дь,/ честна́я Це́рковь/ Боголе́пно пое́т, взыва́ющи/ от смы́сла чи́ста, о Госпо́де пра́зднующи.

Боже́ственное ро́ждие вои́стинну благопло́дно,/ ло́зы Боже́ственныя, та́йное вино́ иска́пающия,/ в весе́лии му́дрыя безсре́бреники ублажи́м.

Ору́жие яви́стеся, устреля́ющее враги́ неви́димыя,/ и́хже и нас стрел изба́вите, заступа́юще на́шу жизнь,/ му́дрии безсре́бреницы.

Не есть челове́к, и́же кто не стяжа́ благи́я вас моли́твенники ко Христу́,/ святи́и безсре́бреницы,/ Его́же моли́те огня́ ве́чнаго нас изба́вити.

Вас, блаже́ннии, и́же призыва́ет,/ и на земли́, и в мо́ри бед вся́ких свобожда́ется,/ тем изба́вите нас сопроти́внаго обстоя́ния.

Богоро́дичен: Всели́вся Госпо́дь, Чи́стая, посреде́ Тебе́, вмести́лище свято́е,/ исто́чник мно́гих явля́ет исцеле́ний и очище́ние страсте́й,/ Богоро́дице Присноде́во.

Ин

Ирмо́с: Разуме́х, Всеси́льне,/ Твое́ смотре́ние/ и со стра́хом просла́вих Тя, Спа́се.

Рече́нию Боже́ственному я́ве возсле́дующе,/ не зла́та блиста́ния, ниже́ сребра́, Боже́ственнии, стяжа́сте.

Сия́юще Боже́ственными чудесы́, безсре́бреницы/ вся благоде́тельствуют, благода́ть подаю́ще.

Вра́чеве му́дрии показа́стеся страсте́й боле́знем,/ исцели́тельныя ру́ки простира́юще.

Богоро́дичен: Да залани́тствятся ны́не ли́ца, Богоро́дицу Тя не испове́дающих,/ Пречи́стая Влады́чице.

Песнь 5

Ирмо́с: Бо́жиим Све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Боже́ственное привлеко́ша просвеще́ние,/ сия́ния исто́чник всеусе́рдне возлюби́вше,/ и просвеща́ют нас всегда́ чуде́с заря́ми великоимени́тии.

Кра́сный сопру́г су́ще, му́дрии,/ бразды́ возде́лавше душ Богозна́меньми,/ при́сно пожина́юще стра́сти, я́коже пле́велы,/ и здра́вия клас стори́чествующе.

Вжиля́еми кре́постию Христо́вою,/ в зло́бе си́льнаго всю кре́пость погуби́сте,/ его́же мучи́тельства нас изба́вите,/ неусы́пнии предста́тели на́ши, безсре́бреницы.

Ше́ствовати стези́ нам пра́выя/ и твори́ти во́лю Бо́жию укрепи́те, святи́и,/ уставляю́ще стра́сти серде́ц на́ших/ и теле́с неду́ги облегчева́юще.

Богоро́дичен: Изба́ви мя, Влады́чице Блага́я, искуше́ний врага́,/ и гее́нны муче́ния, и обдержа́щаго мя плене́ния/ и не посрами́ мене́, песносло́вящаго Тя.

Ин

Ирмо́с: От но́щи у́тренююще, пое́м Тя, Христе́,/ Отцу́ собезнача́льна и Спа́са душ на́ших,/ мир ми́рови пода́ждь, Человеколю́бче.

Я́ко пото́ки Богото́чныя, источа́ете ве́рным благодея́ния во́ды,/ душе́вныя же ку́пно и теле́сныя исцеля́юще неду́ги,/ сла́внии безсре́бреницы.

Исто́чник благода́ти, честни́и безсре́бреницы, разверза́юще,/ всем здра́вие раздае́те,/ ве́рою и любо́вию к вам ны́не притека́ющим.

Све́тлии и всему́дрии зве́зды,/ и́же зе́млю я́ве онебеси́вше подо́бием све́тлости А́нгельския,/ непреста́нно озаря́ют нас.

Богоро́дичен: Превы́шша яви́лася еси́ всех,/ Творца́, Отцу́ собезнача́льнаго, заче́нши, Ма́ти Де́во,/ и ро́ждшая ми́ру Спа́са и Го́спода.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Живу́ще, му́ченицы, ра́достно на Небесе́х,/ в честны́й храм ваш приити́ потщи́теся/ и на́ша неду́ги теле́сныя и серде́чныя стра́сти исцели́те.

В Боже́ственное благоле́пие оде́явшеся кра́сно, я́ко в сугу́бицу , святи́и,/ на́ги ны су́ща доброде́телей Боже́ственно оде́йте/ и страсте́й безче́стия ны́не обнажи́те.

Я́ко украше́нием чуде́с оде́яни всегда́,/ спаси́телие ми́ру яви́стеся,/ мирска́го у́бо вре́да вся ны изба́вите, святи́и,/ и страсте́й нече́стия и муче́ния.

Умертви́вше, святи́и, стра́сти вся пло́ти смертоно́сныя благода́тию,/ животво́рными чуде́с приложе́ньми оживли́ете стра́ждущия/ и врат сме́рти избавля́ете.

Богоро́дичен: Не опали́в утро́бы Твоея́, Огнь сый, Иису́с,/ из Тебе́ пло́тию происхо́дит;/ Сего́, Чи́стая, моли́ огни́ и вся́ких мук изба́вити/ ве́рою воспева́ющия Тя.

Ин

Ирмо́с: Проро́ка спасл еси́ от ки́та, Человеколю́бче,/ и мене́ из глубины́ прегреше́ний/ возведи́, молю́ся.

Спаси́тельныя цели́тели, благоде́тели Богому́дрыя,/ Косму́ же и Дамиа́на Боже́ственныя, усе́рдно да почти́м.

Целому́дрие соблю́дше и ра́зумом укра́шени,/ Косма́ и Дамиа́н Боже́ственнии со Христо́м ра́дуются.

Единому́дренно пожи́вше, единоду́шно по́стничествовавше,/ ку́пно врачева́ния подая́ти нам вве́рени бы́сте.

Богоро́дичен: Све́т Непристу́пный родила́ еси́ пло́тию, Пречи́стая,/ ве́сь ми́р просвеща́юща заря́ми Божества́.

Конда́к, глас 2.

Подо́бен: Тве́рдыя:

Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии,/ но ва́шим посеще́нием ра́тников де́рзости низложи́те,/ мир исцеля́юще чудесы́.

И́кос:

Вся́каго ра́зума и му́дрости прехо́дит сло́во му́дрых враче́в,/ и всем зна́ние подаю́т:/ Высоча́йшаго бо благода́ть прие́мше,/ неви́димо здра́вие да́руют всем./ Отню́дуже и мне по́вести благода́ть дарова́ся пе́ти,/ я́ко Богоно́сныя уго́дники Христо́вы и служи́тели,/ исцеле́ний мно́жество подаю́щия,/ боле́зней бо вся избавля́ют,/ мир исцеля́юще чудесы́.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Впери́сте ум на Небе́сная до́брых приложе́ньми/ и бы́сте о́бщницы Боже́ственных даро́в,/ крила́ти су́ще орли́, всю прохо́дите зе́млю, чудоде́йствующе при́сно.

Просвети́стеся, я́коже добросия́нное, безсре́бреницы, зла́то,/ Боже́ственною благода́тию исцеле́ний обогати́сте мно́жества./ Тем уще́дрите ны, обурева́емыя лю́тых нахожде́ний искуше́ньми.

Преложи́вше Го́споду чи́сты ва́ша ду́хи, безсре́бреницы,/ дар от Него́ прия́сте нечи́стыя ду́хи прогони́ти всегда́,/ и́хже зло́бы го́рькия изба́вите всех нас.

Усну́сте пра́ведно до́лжным сном, му́дрии безсре́бреницы,/ и неусы́пнии моли́твенницы есте́ о ве́рных;/ тем душ на́ших при́сно и теле́с лю́тыя стра́сти успи́те.

Богоро́дичен: Моля́щи не преста́й Человеколю́бца, Бо́га на́шего, Всенепоро́чная,/ я́ко да прии́мем всеконе́чне отпуще́ние злых/ и полу́чим на Небесе́х угото́ванная блага́я любя́щим Его́.

Ин

Ирмо́с: Тебе́ у́мную, Богоро́дице, пещь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Всеце́лы Бо́гу Богому́дренне яви́стеся, вси Бо́га вмести́тельны,/ мир бо весь Бо́га ра́ди оста́висте,/ стопа́м после́дующе Спа́совым, всесла́внии,/ Боголе́пне отце́в Бо́га почита́юще.

Преесте́ственно, вра́чеве всеизря́днейшии,/ немощны́х я́звы рукоде́йствы та́инственными вся исцеля́ете,/ лечбы́ спаси́тельныя от сокро́вищ почерпа́юще Боже́ственных/ и воспева́юще Бо́га пресла́внаго.

Венце́м Твоего́ Ца́рствия, Влады́ко, и багряни́цею све́тлою/ украси́л еси́ Боголе́пне превозлю́бльшия добро́ту непости́жную, Христе́, Твоея́ красоты́,/ и ве́рным благоде́тели о́бщия сия́ показа́л еси́.

Богоро́дичен: Восто́ку свы́ше, Пречи́стая, я́вльшуся на земли́,/ показа́лася еси́ всеблаголе́пная дверь и всесве́тлая,/ мир озаря́ющи луча́ми чистоты́/ и ве́рным лучи́ чуде́с при́сно посыла́ющи.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́,/вся бо твори́ши, Христе́, то́кмо е́же хоте́ти:/ Тя превозно́сим во вся ве́ки.

Неду́гов вся́ческих су́ще ра́тницы, посо́бием Боже́ственнаго Ду́ха, святи́и, утоли́те на́ших душ неду́гования/ и теле́с облегчи́те боле́зни.

Ви́дителие Госпо́дни ны́не красоты́ су́ще и́стинно,/ присеща́йте сей кра́сный Богоно́сный храм ваш/ и исто́чник чуде́с мно́гих соверша́йте.

От исто́чника ра́йска исходя́ще, я́ко ре́ки две,/ все напая́ете лице́ земли́ исцеле́ний струя́ми,/ неду́гов изсуша́юще ту́чи.

Блаже́нныя наде́жды прии́мше, от всех досто́йно блажите́ся/ я́ко испо́лнителие, блаже́ннии, Бо́га на́шего Боже́ственных хоте́ний,/ безсре́бреницы я́вльшеся.

Вра́чеве неисце́льных страсте́й, безсре́бреницы,/ неисце́льныя стра́сти на́ша исцели́те,/ и искуше́ний бу́рю утоли́те, и уны́ния разжени́те о́блаки.

Тро́ичен: Со А́нгелы святы́ми песносло́вим Отца́, и Сло́ва, и Ду́ха Свята́го,/ Еди́но в Трех Ипоста́сех Божество́,/ Еди́но Ца́рство и Еди́ну Власть.

Ин

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те вся дела́ Госпо́дня Го́спода,/ по́йте и превозноси́те во вся ве́ки.

Уме́рше ми́ра сего́ кра́сным и сребролю́бия неду́г отсе́кше,/ наименова́ни бы́сте, му́дрии, все́ми безсре́бреницы, вопию́щими:/ вся дела́ Го́спода по́йте и превозноси́те во вся ве́ки.

Ве́чныя прича́стницы жи́зни бы́сте проявле́нне,/ жизни бо тле́емыя вся оста́висте кра́сная, согласне зову́ще:/ благослови́те вся дела́ Господа, пойте и превозноси́те во вся веки.

Изба́ви вся, Владыко Христе, лю́тых боле́зней моли́твами безсре́бреников/ и сподо́би при́сно согла́сне зва́ти Тебе́:/ благослови́те вся дела́ Го́спода, по́йте и превозноси́те во вся ве́ки.

Богоро́дичен: Ра́дующеся, вси ве́рнии, и благода́тию укре́пльшеся,/ и́же Рождество́м Твои́м изба́влени бы́вше, Чи́стая Ма́ти Де́во, непреста́нно вопие́м:/ благослови́те вся дела́ Го́спода, по́йте и превозноси́те во вся ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́ же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Сей храм ваш чудесы́ всеблаголе́пно, я́ко звезда́ми све́тлыми, украша́ется/ и, согла́сно веселя́ся, всегда́ блажи́т/ и честну́ю ва́шу па́мять пра́зднует благоче́стно,/ честни́и безсре́бреницы.

Я́ко свет, я́ко два вели́ка со́лнца,/ разу́мную твердь украша́ете, безсре́бреницы,/ и зна́мений заря́ми просвеща́ете всех ве́рных сердца́./ Тем зове́м: разреши́те тьму страсте́й на́ших, моли́мся.

В се́ла Вы́шняя вселя́еми, святи́и,/ посреде́ нас бы́ти неви́димо милосе́рдуйте,/ и́же посреде́ Боже́ственнаго хра́ма ва́шего/ пе́сни возсыла́ющих Вседержи́телю/ и блажа́щих приле́жно вас, всехва́льнии.

Земля́ с Вы́шними весели́тся в све́тлый Боже́ственный пра́здник ваш, святи́и:/ его́же соверша́ющих, нас изба́вите тьмы, и боле́зней, и вся́кия тесноты́,/ и е́же во а́де лю́таго, му́дрии, муче́ния.

Богоро́дичен: Тре́петное рожде́ние иму́щи, Всечи́стая,/ в Стра́шный день испыта́ния, молю́ся, стра́шнаго отве́та изба́ви мя/ и спаса́емых стоя́ния прича́стника сотвори́, ве́рно пою́ща Тя, Богора́дованная.

Ин

Ирмо́с: Тебе́, све́тлую свещу́ и Ма́терь Бо́жию,/ пречу́дную сла́ву и вы́шшую всех тва́рей,/ пе́сньми велича́ем.

Пе́сньми му́друю дво́ицу Све́та у́мнаго,/ облиста́ющую зарю́ и просвеще́ние всем подаю́щу,/ непреста́нно ублажа́ем.

Кре́пость душе́внаго здра́вия творя́ще ве́рным,/ и теле́сныя врачу́ете вве́рении вам стра́сти, я́ко спаси́телие,/ те́мже и воспева́еми есте́ при́сно.

Богосве́тлая свети́ла, у́мне Не́бо честны́я Це́ркве светодая́ния ли́тием,/ ны́не свет подаю́ще, непреста́нне озаря́ют.

От Честны́я Тро́ицы Богозва́нная дво́ица похваля́ема,/ источа́ет прося́щим врачева́ний всем подая́ния,/ любо́вию тех блажа́щим.

Богоро́дичен: Тебе́, све́та о́блак, и святы́й киво́т,/ и всесве́тлую дверь мы́сленнаго Со́лнца,/ я́ко Богоро́дицу пе́сньми велича́ем.

Свети́лен.

Подо́бен: Ду́хом во святи́лищи:

Благода́ть врачева́ний от Бо́га прие́мше, безсре́бреницы блаже́ннии,/ е́же врачева́ти неду́жныя/ и исцеля́ти вся ве́рно притека́ющия к Боже́ственному ва́шему хра́му./ Сего́ ра́ди согла́сно ублажа́ем досто́йне честну́ю ва́шу па́мять.

Богоро́дичен: Родила́ еси́, Пречи́стая, Бо́жие Бо́га Сло́во,/ ми́рови спаси́тельное соверша́ющаго всему́дре строе́ние изря́дное./ Сего́ ра́ди Тя вси песносло́вим досто́йне,/ я́ко моля́щуюся к Нему́, изба́витися нам неду́гов и вся́ких бед.

На хвали́тех стихи́ры на 4, глас 1.

Анато́лиево:

Благода́ть исцеле́ний от Бо́га прие́мше,/ безсре́бренно стра́сти душ и теле́с на́ших те́пле исцеля́ете,/ всеми́рнии безсре́бреницы,/ те́мже ва́ми Христо́с, ве́рным да́нное здра́вие да́руя,/ свети́ла неле́стная вас показу́ет вселе́нней./ Того́ умоли́те спасти́ся душа́м на́шим.

От Вы́шняго Про́мысла/ бе́здну исцеле́ний поче́рпше,/ всем источа́ете ве́рным исцеле́ния, безсре́бреницы:/ преесте́ственне бо неду́гующих стра́сти/ рукоде́йствии та́инственными,/ от сокро́вищ Ду́ха лечбы́ предлага́юще спаси́тельныя,/ стра́ждущих исцеля́ете./ Те́мже храм че́стен бы́вше Живонача́льныя Тро́ицы,/ в вас бо я́ве оби́тель сотвори́:/ Е́йже моли́теся/ спасти́ся душа́м на́шим.

Глас 2. Ге́рманово:

Ра́дуется лик святы́х во ве́ки,/ Ца́рство бо Небе́сное насле́доваша,/ земля́, мо́щи их прие́мши,/ благово́ние возве́я:/ раби́ Христо́вы бы́ша,/ всели́вшеся в жизнь ве́чную.

Вра́чеве немощству́ющих,/ сокро́вища врачева́ний,/ спаси́телие ве́рных, безсре́бреницы всесла́внии,/ в ну́ждах зову́щия и боля́щия исцели́те,/ с Феодо́тиею моля́ще Бо́га блага́го/ изба́витися нам от се́тей вра́жиих.

Сла́ва, глас 4. Феофа́ново:

Исто́чник исцеле́ний иму́ще,/ святи́и безсре́бреницы,/ исцеле́ния подае́те всем тре́бующим,/ я́ко велича́йших даро́в сподо́бльшеся/ от приснотеку́щаго Исто́чника, Спа́са Христа́./ Рече́ бо к вам Госпо́дь,/ я́ко единоревни́телем апо́столов:/ се дах вам власть над ду́хи нечи́стыми,/ я́коже ты́я изгони́ти,/ и лечи́ти всяк неду́г и вся́кую я́зю./ Те́мже в повеле́ниих Его́ до́бре пожи́вше,/ ту́не прия́сте, ту́не подае́те,/ врачу́юще стра́сти душ и теле́с на́ших.

И ны́не, Богоро́дичен.

Подо́бен: Я́ко до́бля:

Ра́дуйся, прибе́жище христиа́н и утвержде́ние;/ ра́дуйся, ле́ствице Небе́сная;/ ра́дуйся, сокро́вище де́вства;/ ра́дуйся, Богоро́дице, киво́те слове́сный Боже́ственныя сла́вы./ Ра́дуйся, похвало́ всего́ ми́ра и утвержде́ние,/ па́дших воззва́ние,/ ски́ния всесве́тлая, свята́я и всекра́сная.

Крестобогоро́дичен.

Подо́бен то́йже:

Распина́ема Христа́ Человеколю́бца ви́дящи, Пречи́стая,/ и ре́бра ископова́ема копие́м,/ пла́чущи, вопия́ше:/ что сие́, Сы́не Мой?/ Что Ти безблагода́тнии лю́дие возда́ша,/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший:/ удивля́юся, Благоутро́бне, Твоему́ во́льному распя́тию.

А́ще же славосло́вию вели́кому бы́ти, то на Хвали́тех и сии́ стихи́ры две приложи́, да бу́дет на 6. А́ще же ни, на стихо́вне Окто́иха. Та́же стих: Се что добро́, или́ что красно́,/ но е́же жи́ти бра́тии вку́пе.

Глас 6:

Све́тлая и просвеще́нная возсия́ днесь/ па́мять безсре́бреников Христо́вых,/ све́тло облиста́ющи луча́ми чуде́с по всей земли́ мир./ Прииди́те у́бо, празднолю́бцы,/ ве́рно торжеству́ем;/ прииди́те, к моще́м святы́х усе́рдно вси стеце́мся,/ я́ко да ско́рое исцеле́ние от них прии́мем неоску́дне:/ безме́здно бо подаю́т всем де́йством Свята́го Ду́ха/ исцеле́ний дарова́ния.

Сла́ва, глас 8:

Кто не удиви́тся, кто не просла́вит,/ кто не воспое́т ве́рно му́дрых и пресла́вных безсре́бреников чудеса́?/ Я́ко и по свято́м их преставле́нии/ всем подаю́т, притека́ющим ве́рою, бога́тно врачева́ния,/ и честны́я и святы́я мо́щи тех то́чат благода́ть врачева́ний./ О дво́ица свята́я! О честны́я главы́!/ О му́дросте и сла́во от Бо́га да́нныя вам благода́ти!/ Те́мже пе́сньми зове́м Благоде́телю Бо́гу,/ показа́вшему ты́я на врачева́ния душ и теле́с на́ших.

И ны́не, Богоро́дичен: Влады́чице, приими́:

Крестобогоро́дичен.

Подо́бен: Му́ченицы Твои́:

Не терплю́, Ча́до,/ ви́дящи Тя, на Дре́ве усну́вша,/ бо́дрость всем подаю́щаго:/ я́ко да дре́вле преступле́ния плодо́м/ сном поги́бельным усну́вшим/ Боже́ственную и спаси́тельную бо́дрость пода́си,/ Де́ва глаго́лаше, пла́чущи,/ Ю́же велича́ем.

На Литурги́и

Блаже́нны Окто́иха на 4 и от кано́на святы́х песнь 3. Проки́мен, глас 4: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них. Стих: Предзре́х Го́спода пре́до мно́ю вы́ну,/ я́ко одесну́ю мене́ есть, да не подви́жуся. Апо́стол к Кори́нфяном, зача́ло 153. Аллилу́ия, глас 2. Стих: Се что добро́, или́ что красно́,/ но е́же жи́ти бра́тии вку́пе. Ева́нгелие от Матфе́я, зача́ло 34, от полу́. Прича́стен: Ра́дуйтеся, пра́веднии:

На Ма́лой Вече́рни

На Го́споди, воззва́х:

Сла́ва, глас 4:

Сокро́вища Боже́ственных дарова́ний,/ помо́щницы стра́ждущих,/ вра́чеве неду́гующих,/ вси прехва́льнии Безсре́бреницы,/ в ну́ждах призыва́ющия вас посети́те/ и испроси́те у Всеблага́го Бо́га/ соверша́ющим па́мять ва́шу/ проще́ние прегреше́ний и избавле́ние от се́тей вра́жиих,/ Це́ркви же умире́ние/ и всем ве́рным ве́лию ми́лость.

На стихо́вне стихи́ры, глас 5:

Ра́дуйся, Безсре́бреников кра́сный ли́че,/ Бо́га возлюби́вшии от всея́ души́ и се́рдца, помышле́ния и кре́пости,/ я́ко Богому́дрии,/ па́ки же возлюби́вшии вседуше́вно, блаже́ннии, бли́жняго па́че себе́,/ е́же и де́лы показа́сте,/ места́ пременя́юще и зело́ состра́ждуще,/ всем безме́здно подае́те исцеле́ния./ Христу́ моли́теся/ дарова́ти на́м ве́лию ми́лость.

Стих: Ди́вен Бог во святы́х Свои́х,/ Бог Изра́илев.

Ра́дуйся, Безсре́бреников сла́вное собра́ние,/ себе́ оби́тели Тро́ицы Пребоже́ственныя показа́вшии, всему́дрии,/ непоро́чностию души́ и телесе́,/ све́тлая яви́стеся зерца́ла,/ и от Нея́ ны́не я́сно осиява́еми,/ бы́сте я́коже со́лнца всесве́тлая,/ всю бо подсо́лнечную чуде́с озаря́ете луча́ми,/ тьму страсте́й прогоня́юще./ Те́мже мо́лим вас/ у Христа́ испроси́ти нам ве́лию милость.

Стих: Се что́ добро́ или́ что́ красно́,/ но е́же жи́ти бра́тии вку́пе.

Ра́дуйся, Безсре́бреников свято́е сосло́вие,/ весь мир назира́ющии,/ и по сме́рти, я́коже при жи́зни, любо́вию горя́щии/ и сострада́нием ко всем, всеблаже́ннии,/ о́бщии спаси́телие и тепле́йшии засту́пницы/ во храм ваш приходя́щим,/ исто́чницы цельбоно́снии,/ от ни́хже че́рпающе врачева́ния,/ любо́вию вас почита́ем, Христу́ моля́щихся/ ниспосла́ти нам ве́лию ми́лость.

Сла́ва, глас 2:

Всех ми́луеши, Пантелеи́моне Богому́дре,/ с ве́рою тя призыва́ющих,/ гото́вый предста́тель в ну́ждах,/ изба́витель в беда́х и ско́рбех/ и безме́здный цели́тель в неду́зех,/ тезоиме́ние име́я и́стинствующее/ ми́лостивому нра́ву твоему́,/ страстоте́рпче Христа́ Бо́га./ Те́мже и нас, притека́ющих к тебе́/ вся́кия ну́жды и лю́тых боле́зней изба́ви,/ моля́ся о спасе́нии душ на́ших.

И ны́не, Богоро́дичен: О чудесе́ но́ваго:

Тропа́рь Безме́здником, глас 8:

Святи́и безсре́бреницы и чудотво́рцы,/ посети́те не́мощи на́ша:/ ту́не прия́сте, ту́не дади́те нам.

На Вели́цей Вече́рни

На Го́споди, воззва́х: стихи́ры, глас 4: Прииди́те, ве́рнии,/ пе́сньми почти́м всех святы́х Безсре́бреников,/ любо́вию к ним взыва́юще:/ ра́дуйтеся, немощству́ющих безме́зднии вра́чеве,/ ра́дуйтеся, стяжа́вшии неоску́дную благода́ть исцеле́ний;/ ра́дуйтеся, моли́твенницы те́плии,/ о спасе́нии ду́ш на́ших.

До́блия ны́не воспое́м/ Безсре́бреники вся вку́пе,/ о́бщее нося́щия именова́ние,/ Боже́ственныя блюсти́тели на́ша,/ ре́вностию ве́ры и любо́вию е́же к Бо́гу/ отда́вшия себе́ тве́рдо к о́бщему всех благотворе́нию,/ от ни́хже мно́зи за Христа́ пострада́ша,/ и со дерзнове́нием мо́лятся/ о спасе́нии душ на́ших.

Честна́я похвале́ния Це́ркве просла́вим/ сла́вныя Безме́здники,/ непобеди́мыя побо́рники,/ засту́пники при́сныя ве́рно прибега́ющим во вся́ких ско́рбех,/ ре́ки приснотеку́щия,/ излива́ющия струи́ исцеле́ний,/ вся во всех предваря́юще/ и моля́щеся о спасе́нии душ на́ших.

Я́ко дерзнове́ние иму́щии/ ко Всеми́лостивому Спа́су на́шему/ ми́ловати всех и спаса́ти от бед,/ изба́вите от страсте́й и боле́зней/ и вся́ких лю́тых искуше́ний/ ве́рою и любо́вию воспева́ющих вас,/ вси Богоблаже́ннии Безсре́бреницы,/ и моли́теся о спасе́нии душ на́ших.

За́поведи Госпо́дни до́бре соблю́дше,/ и сребролю́бия неду́г вконе́ц отсе́кше,/ ту́не неду́ги исцеля́ете,/ Космо́ и Дамиа́не пресла́внии./ Те́мже достодо́лжно ублажа́ем вас,/ всечестни́и чудотво́рцы,/ моля́щихся о спасе́нии душ на́ших.

Пантелеи́моне, безме́здный целе́бниче,/ ви́дев тя Многоми́лостивый Бог/ ми́лостию и сострада́нием богатя́щася,/ бога́тую тебе́ благода́ть дарова́/ цели́ти вся неду́жныя./ Уврачу́й у́бо боле́зни душ и теле́с/ тя с ве́рою призыва́ющих/ и моли́ся о спасе́нии душ на́ших.

Сла́ва, глас 3:

Блаже́нный лик святы́х/ восхва́лим днесь Безсре́бреников:/ апо́стола и Евангели́ста Луку́,/ врача́ неду́жных преизря́дна;/ Анти́пу, Харала́мпия и Вла́сия,/ всечестны́х священному́чеников;/ Спиридо́на и Моде́ста,/ пресве́тлых Це́ркве свети́льников;/ три единоиме́нныя и единонра́вныя дво́ицы –/ Космы́ и Дамиа́на Богому́дрых,/ Ки́ра со Иоа́нном сла́вным,/ Боже́ственнаго Пантелеи́мона и Ермола́я,/ Диоми́да же и Сампсо́на/ с Моки́ем, Фо́тием и Аники́тою,/ Арте́мия, Фалале́я и Три́фона.

На литии́ стихи́ры, глас 1:

Па́мять святу́ю и све́тлую/ всех пречестны́х Безсре́бреников/ по до́лгу соверши́м днесь, бра́тие,/ духо́вно веселя́щеся,/ суть бо о́бщии предста́телие на́ши,/ помо́щницы и спаси́телие,/ вся́ких неду́гов и скорбе́й избавля́ющии/ с ве́рою к ни́м прибега́ющим.

Глас 2:

Неистощи́мое, святи́и Безме́здницы,/ сострада́ния же и бла́гости бога́тство ва́ше/ не мо́жет ум челове́чь пости́гнути,/ язы́к же благоглаго́ливый изрещи́/ мно́жество чуде́с ва́ших./ Те́мже с весе́лием зове́м вам:/ ра́дуйтеся, ре́ки дарова́ний приснотеку́щия.

Глас 4:

С Небесе́ дар чуде́с/ прии́мше от Христа́ Бо́га,/ вся исцеля́ете безме́здно стра́сти,/ в вас бо яви́ся благода́ть Ду́ха,/ де́йствующая исцеле́ний си́лу./ Изба́вите убо лю́тых боле́зней/ и вся́кия тесноты́ воспева́ющих вас,/ Богому́дрии Безсре́бреницы, мо́лим вы.

Сла́ва, глас 8:

Кто не удиви́тся, кто не просла́вит,/ кто не воспое́т ве́рно/ му́дрых и пресла́вных Безсре́бреников чудеса́?/ Я́ко и по свято́м их преставле́нии/ всем подаю́т притека́ющим ве́рою бога́тно врачева́ния,/ и честны́я и святы́я мо́щи тех/ то́чат благода́ть врачева́ний./ О честны́я главы́!/ О му́дросте и сла́во, от Бо́га да́нныя вам благода́ти!/ Те́мже пе́сньми зове́м Благоде́телю Бо́гу,/ показа́вшему ты́я на врачева́ние душ и теле́с на́ших.

На стихо́вне стихи́ры воскре́сны.

Сла́ва, глас 6:

Све́тлая и просвеще́нная/ возсия́ днесь па́мять/ всех Безсре́бреников Христо́вых,/ све́тло облиста́ющи луча́ми чуде́с / по всей земли́ мир./ Прииди́те, у́бо ве́рно торжеству́ем,/ прииди́те, к моще́м святы́х усе́рдно вси стеце́мся,/ я́ко да ско́рое исцеле́ние/ от ни́х прии́мем неоску́дне:/ безме́здно бо подаю́т всем,/ де́йством Свята́го Ду́ха,/ исцеле́ний дарова́ния.

На У́трени

По полиеле́и седа́льны:

В Вы́шних селе́ниих лику́юще,/ ни́жних не оставля́ете, Богоблаже́ннии Безсре́бреницы,/ призыва́ющия бо вас ми́лостивно посеща́ете,/ премно́гих зол избавля́юще,/ я́ко храни́телие жи́зни на́шея.

Ка́ко по достоя́нию восхва́лим/ любо́вь ва́шу, святи́и, к Бо́гу и бли́жним,/ ея́же ра́ди благоде́тельствуете всем по́мощи ва́шея тре́бующим./ Не преста́йте у́бо помога́ти нам,/ прося́щим заступле́ния ва́шего.

Сла́ва: Спаси́телие ве́рных и зол прогони́телие,/ исцеле́ния боля́щим ту́не подава́ете, досточу́днии./ Но и нас посети́те, неду́гов и страсте́й свобожда́юще,/ любо́вию воспева́ющих вас.

И ны́не, Богоро́дичен: Со святы́ми Безме́здники моли́, Присноде́во,/ из Тебе́ ро́ждшагося всех Творца́ и Бо́га/ пода́ти житию́ на́шему благоустрое́ние,/ изба́витися же нам мук/ и ча́сти избра́нных сподо́битися Твои́м предста́тельством.

Кано́н, глас 4

(по 8-ми тропаре́й во вся́кой пе́сни).

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Ве́рою прося́щу ми да́тися сло́ву прему́дрости/ моли́те, светоза́рнии Госпо́дни служи́тели,/ я́ко да воспою́ ра́дуяся вку́пе честно́е ва́ше торжество́.

Безсре́бреников па́мять чту́ще днесь,/ чи́стым се́рдцем и непоро́чною со́вестию те́х воспои́м,/ я́ко да прии́мем предста́тельством их благода́ть врачева́ния.

Земля́ израсти́ ва́с, Божественнии Безме́здницы,/ Не́бо же и́мать ду́хи ва́ши, сла́внии,/ Небе́сную бо жизнь на земли́ пожи́вше, ны́не та́мо свеселите́ся.

Душ врачевству́ па́че теле́с научи́вся хи́трости,/ и обою́ду вседо́бр показа́лся еси́, Луко́, Бо́жиею му́дростию вдохнове́н,/ е́юже врачу́еши призыва́ющих тя́.

Стра́сти душ ку́пно и теле́с/ твои́х певце́в уврачи́, всеблаже́нне Луко́,/ та́инственным рукоде́ланием греха́ гни́лость изрезу́я, Богому́дре апо́столе.

Боля́щим врачевство́ есть це́рковь,/ в ней же, священному́чениче Анти́по, терпели́вое твое́ лежи́т те́ло,/ Боже́ственную зарю́ дарова́ний испуща́ет Ду́ха.

Сла́ва: Свяще́нных твои́х моще́й свяще́нная ра́ка ми́ро исцеле́ний то́чит,/ злосмра́дныя стра́сти отгоня́ющи/ и твою́, Анти́по, сла́вящия па́мять благоуха́ющи.

И ны́не: Саму́ю Тебе́ приво́дим ро́ждшую Тя пло́тию, Присноде́ву,/ на мольбу́ держа́ве Твое́й, Христе́, и Безсре́бреник собо́р./ Тех моли́твами умири́ живо́т наш.

Песнь 3

Ирмо́с: Твоя́ песносло́вцы, Богоро́дице,/живы́й и незави́стный источниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве венце́в сла́вы сподо́би.

Я́коже свети́ла на Боже́ственней тве́рди Це́ркве,/ ве́рныя озаря́ете све́том чуде́с,/ я́же соверша́ти не престае́те, сла́внии, неду́ги исцеля́юще.

Ра́вно тече́ние соверши́вше, ра́вных даро́в сподо́бистеся,/ и по́честей ра́вных на Небеси́ получи́сте,/ чудоде́йственнии Безме́здницы.

Любо́вию к Бо́гу и бли́жним связа́еми,/ всю зло́бу де́монов разруша́ете благода́тию:/ сего́ ра́ди ва́ше, досточу́днии, соверша́ем торжество́.

Огнь Боже́ственный внутрь нося́щим ва́м,/ страстны́й пла́мень наш угаси́те, Богоблаже́ннии,/ в ве́ре смы́сл согрева́юще.

Тро́йственный сопру́г Безме́здников Космы́ и Дамиа́на/ всечестны́й ны́не воспева́ем,/ де́лы едина́ковых, я́коже и именова́нием.

Све́тлии житие́м, тве́рдии ве́рою и ре́вностию ра́внии/ возсия́ша из Ри́ма, от Аси́и же и Арави́и./ Те́мже на́ми вку́пе да почте́ни бу́дут.

Сла́ва: Прииди́те, исцели́теся от неду́г, боля́щии:/ тричи́сленная бо дво́ица благода́тию Тро́ицы обогаще́нна,/ врачева́ния подае́т ве́рою пою́щим ю.

И ны́не: Цели́теля душ и теле́с ро́ждшая,/ исцеле́ние пода́ждь нам, Богоро́дице,/ еле́й милосе́рдия Твоего́ излива́ющи ко здра́вию и спасе́нию на́шему.

Конда́к, глас 2:

Благода́ть прии́мше исцеле́ний,/ простира́ете здра́вие су́щим в ну́ждах,/ вра́чеве, чудотво́рцы пресла́внии;/ но ва́шим посеще́нием ра́тников де́рзости низложи́те,/ мир исцеля́юще чудесы́.

И́кос:

Вся́каго ра́зума и му́дрости прехо́дит сло́во му́дрых враче́в,/ и всем зна́ние подаю́т:/ Высоча́йшаго бо благода́ть прие́мше,/ неви́димо здра́вие да́руют всем./ Отню́дуже и мне по́вести благода́ть дарова́ся пе́ти,/ я́ко Богоно́сныя уго́дники Христо́вы и служи́тели,/ исцеле́ний мно́жество подаю́щия:/ боле́зней бо вся избавля́ют,/ мир исцеля́юще чудесы́.

Седа́льны Безме́здником, глас 8:

Я́ко кри́ни, я́ко шипцы́, Ду́хом преукра́шени, благово́ние всем воспуща́ете./ Сего́ ра́ди к вам прибега́ем, Богоно́снии Безсре́бреницы,/ моли́теся Христу́ Бо́гу прегреше́ний оставле́ние дарова́ти/ пра́зднующим любо́вию святу́ю па́мять ва́шу.

Сла́ва: Блаже́нныя наде́жды прии́мше,/ от всех досто́йно блажите́ся,/ я́ко исполни́телие Бо́га на́шего Боже́ственных хоте́ний,/ вра́чеве неисце́льных неду́гов я́вльшеся, великоимени́тии Безме́здницы./ Стра́сти у́бо на́ша исцели́те и уны́ния разжени́те о́блаки,/ с ве́рою вас призыва́ющих.

И ны́не: Прииди́те, Всецари́цу во гла́сех велича́ем,/ и пою́ще, возопии́м:/ Я́же ра́дости вина́, Де́во всепе́тая, чту́щих Тя спаса́й,/ и покры́й от искуше́ний вся́ческих, и боле́зней, и скорбе́й./ И́маши бо я́ко Ма́терь Бо́жия дерзнове́ние ми́ловати нас./ Сего́ ра́ди мо́лим Тя:/ моли́ся Сы́ну Твоему́ и Бо́гу да́ти проще́ние рабо́м Твои́м.

Песнь 4

Ирмо́с: Неизсле́дный Бо́жий Сове́т,/ е́же от Де́вы воплоще́ния Тебе́, Вы́шняго,/ проро́к Авваку́м усмотря́я зовя́ше:/ сла́ва си́ле Твое́й, Го́споди.

Се сла́вная и всея́сная Богосве́тлых враче́в па́мять возсия́,/ и весели́т сердца́ христоимени́тых люде́й,/ притека́ющих к целе́бным моще́м их.

Пантелеи́мона, прехва́льнаго великому́ченика,/ со Ермола́ем, сла́вным огласи́телем его́,/ зело́ ле́по есть воспомяну́ти днесь,/ я́ко в Безсре́бреницех нача́льных.

Усты́ вси́ и се́рдцем воспои́м страстоте́рпцы Христо́вы,/ Ермола́я и Пантелеи́мона,/ ра́дуйтеся, – зову́ще, – предста́телие и засту́пницы оби́тели сея́ и цели́телие на́ши.

Ермола́я свяще́нными мольба́ми и Пантелеи́мона, ми́лости тезоимени́та,/ не отри́ни от нас ми́лости Твоя́, Всеми́лостиве Го́споди,/ но обы́чно уще́дрив, от злых изба́ви.

Све́тлый яви́лся еси́ житие́м и боре́нии светле́йший, Пантелеи́моне,/ зва́нием свы́ше богате́я, е́же возвеща́еши де́лы,/ всех призыва́ющих тя на по́мощь ми́луя.

К твоему́ покро́ву прибега́ющих, Целе́бниче, отъе́млеши вся́ку боле́знь,/ и ны́не посети́ с ве́рою моля́щихся тебе́/ и изба́ви неду́г многообра́зных.

Сла́ва: Добро́то честны́х Безсре́бреник,/ благоле́пие святы́х му́ченик, врачу́ неду́гующих,/ бу́ди, Пантелеи́моне, хода́тай о нас ко Пресвяте́й Тро́ице.

И ны́не: Я́коже ча́ша преисполня́ется, Владыко, благода́ть Твоя́/ и мно́гое бога́тство человеколю́бия/ Всеблаго́ю Ма́терию Твое́ю и Безсре́бреники пречестны́ми.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Ки́ра и Иоа́нна Боже́ственную любо́вь/ и му́ченическую за Христа́ смерть воспои́м,/ боре́нием бо сла́вным му́жески противуста́вше,/ яви́шася похвала́ му́чеников.

Свети́ла сия́ют два – Кир и Иоа́нн,/ чуде́с сия́ния от исто́чника еди́наго светоно́снаго,/ немощны́м источа́юще нетле́нную благода́ть,/ и́хже да ублажи́м.

Христо́вы ору́жницы, неду́гующим вра́чеве,/ Ки́ре и Иоа́нне пребога́тии,/ чуде́с де́йство от Всеще́драго Бо́га прии́мшии,/ исцели́те пою́щия вы.

Моки́я пе́сньми восхваля́ю, Фо́тия же и Аники́ту,/ в ли́це Богоно́сных Безме́здников су́щия,/ ско́рыя помо́щники призыва́ющих их в беда́х и ско́рбех.

Тя́ иму́щи све́тла би́сера и че́стна во у́вязе́нии свое́м,/ честна́я Це́рковь украша́ется,/ всеблаже́нне Моки́е, врачу́ безме́здный.

Яви́стеся я́ко вели́ции свети́льницы,/ просвеща́юще луча́ми исцеле́ний и Боже́ственных по́двиг всю тварь,/ страда́льцы Христо́вы Фо́тие и Аники́то.

Сла́ва: Исцеля́ете стра́сти ве́рных,/ изобрази́вше страсть блаже́нную ва́шими страстьми́,/ и отъе́млете неду́ги, и отгоня́ете лю́тыя ду́хи,/ Фо́тие и Аники́то сла́внии.

И ны́не: Не́мощь и разслабле́ние, всемо́щная Влады́чице, душ и теле́с на́ших/ преложи́ в кре́пость и здра́вие,/ во е́же бо́дренно твори́ти повеле́ния Сы́на Твоего́ и Бо́га.

Песнь 6

Ирмо́с: Боже́ственное сие́ и всечестно́е / соверша́юще пра́зднество,/ Богому́дрии, Богома́тере,/ прииди́те рука́ми воспле́щим,/ от Нея́ ро́ждшагося Бо́га сла́вим.

Всечестно́е соверша́юще пра́зднество ва́ше, христоподража́телие прехва́льнии и хода́тае тепле́йшии,/ е́же у вас про́сим ве́рно по́мощи.

Повеле́нию Боже́ственному повину́ющеся, Богому́дрии,/ не восхоте́сте ничесо́же взя́ти в возме́здие,/ ту́не прия́сте, ту́не дае́те, я́же к животу́ и спасе́нию.

Сампсо́на преподо́бнаго с Диоми́дом/ днесь честна́я похвале́ния ли́ка Безсре́бреник вси почти́м,/ моли́твенники предлага́юще сих к Бо́гу и Царю́ всех.

Твои́м пресла́вным, о́тче, врачевство́м, е́же боле́зньми стяжа́л еси́,/ посеща́ти не оскуде́й, мо́лимся,/ в сострада́нии облегча́я боле́зни и труды́ душ на́ших.

Боже́ственною оде́ян, му́чениче Диоми́де, си́лою,/ уставля́еши боле́зни, разрешаеши неду́ги и отгоня́еши ду́хи лука́выя,/ я́ко в Безме́здницех преизря́дный.

Бога́тыми тя украси́ благода́ть Духа дарова́нии:/ моли́твами бо твои́ми, Арте́мие сла́вне,/ всяк неду́г престае́т в лю́дех, прибега́ющих к тебе́.

Сла́ва: Страсте́й тли́тельных изми́ ны, великому́чениче,/ искуше́ний же и скорбе́й тя призыва́ющия с ве́рою,/ подража́телю Спа́сов, Арте́мие, Тро́ицы уго́дниче.

И ны́не: Изба́ви нас, Пречи́стая Влады́чице,/ вся́каго гне́ва, гла́да же и всегуби́тельства,/ и ве́чнаго муче́ния, Дево, свободи́ Арте́мия предста́тельством.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но о́гненное преще́ние му́жески попра́вше,/ ра́довахуся пою́ще:/ препе́тый отце́в Госпо́дь и Бог благослове́н еси́.

Ка́ко восхва́лим вас, всехва́льнии, превосходя́щии и ум и сло́во на́ше,/ и зело́ удивля́ющии чудесы́, о ни́хже зове́м:/ отце́в Госпо́дь Бог благослове́н еси́.

Не возлюби́сте отню́дь суеты́ Богому́дрии, ниже́ сла́дких жития́,/ но вся во уме́ты вмени́сте, Христа́ иму́ще, Ему́же взыва́ете:/ Госпо́дь Бог благослове́н еси́.

Ка́ко не воспое́м печа́ть и хвалу́ сла́внаго ли́ка Безме́здников,/ честну́ю дво́ицу – Фалале́я же и Три́фона доблему́дрых,/ чуде́с непрестаю́щее творя́щих мно́жество.

Яви́шася исцеле́ние ве́рным крове́й твои́х ка́пли, Фалале́е,/ неду́ги отмыва́юще и огнепале́ния лю́тая угаша́юще,/ благода́тию Христа́ Венцеда́вца.

Гу́си пасы́й в лузе́х, от Бо́га прия́л еси́ благода́ть исцеле́ний,/ великому́чениче Три́фоне – безме́здный врачу́,/ исцеля́ти челове́ческия не́мощи и неду́ги.

Стру́пи твои́, му́чениче Три́фоне, я́ко ми́ро благоуха́ют,/ кровь твоя́ источа́ет исцеле́ния,/ оста́нцы же те́ла твоего́ ду́ши освяща́ют каса́ющихся им.

Сла́ва: Теле́сныя боле́зни изба́ви и душе́внаго неможе́ния рабы́ Твоя́,/ Триипоста́сный Бо́же,/ и сохрани́ неврежде́нны от всех жите́йских искуше́ний.

И ны́не: Источа́еши с Безсре́бреники честны́ми/ исцеле́ний струи́ боля́щим, Дево, всю́ду:/ Тя́ бо исто́чника милосе́рдия показа́ милости Госпо́дь, из Тебе́ воплоти́выйся.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте дела́,/ и превозноси́те Его́ во вся ве́ки.

Свя́т еси́, Вседержи́телю, прославля́я святы́я Твоя́:/ ми́р бо те́х ра́ди избавля́еши от бе́д/ и просвеща́еши пою́щия и превознося́щия Тя́ во ве́ки.

В се́ла Вы́шняя вселя́еми, всеприснопа́мятнии,/ милосе́рдовати не престае́те о су́щих на земли́/ и благоде́тельствуете пою́щим и превознося́щим Го́спода во ве́ки.

Слове́сным тя́ и безслове́сным благоде́теля/ е́же к Бо́гу присвое́ние показа́, блаже́нне Вла́сие, исправле́ний твои́х;/ те́мже у́бо прия́л еси́ исцеле́ний дарова́ния.

Святи́тель преподо́бен сый, Вла́сие,/ страсте́й Христо́вых ра́ны но́сиши,/ да́вшаго Ти благода́ть врачева́ти вся болезни;/ те́мже дарова́нии благи́ми на́м бу́ди на по́мощь.

Ум тво́й Спиридо́не, безстра́стием просвети́в и смире́нием украси́вся,/ дарова́нми Ду́ха обогати́лся еси́ отгоня́ти ду́хи/ и реши́ти неду́ги ве́рно чту́щим тя́.

Река́ су́щих в тебе́ дарова́ний вся́ко напоя́ет, преподо́бне Спиридо́не, се́рдце;/ всем да́рует здра́вие,/ вся Бо́га к сла́ве возставля́ет просла́вльшаго тя́.

Благослови́м Отца́, и Сы́на, и Свята́го Ду́ха, Го́спода.

Ми́лостива еси́, Тро́ице Неразде́льная,/ ми́луеши бо всех я́ко всеще́дра,/ те́мже прибега́ем к Тебе́, и́же грехми́ отягча́еми, взыва́юще:/ очи́сти рабы́ Твоя́.

И ны́не:

О и́же на Тя́ наде́жды возложи́вших, Влады́чице,/ с Безсре́бреники моли́ся, я́ко да бу́дущаго осужде́ния изба́вимся/ и вхо́да в Ца́рствие Небе́сное сподо́бимся.

Песнь 9

Ирмо́с: Вся́к земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Па́мять соверша́юще о́бщих засту́пников на́ших,/ приле́жно возопии́м к ни́м:/ от вся́каго вре́да, и ско́рби, и неду́гов лю́тых изми́те воспева́ющия вы́.

Во святи́телех чудоде́йственника и в страстоте́рпцех помо́щника безме́зднаго,/ неду́жных врача́ и язвы моровы́я прогони́теля,/ Харала́мпия да ублажи́м.

Ве́лий защи́тник ве́рных/ и изба́витель от бе́д показа́лся еси́, Богому́дре Харала́мпие,/ вся́каго у́бо свободи́ гне́ва и всегуби́тельства сла́вящия тя́.

Теле́снии неду́зи и душе́внии преста́ют,/ твои́м, Харала́мпие, моще́м почита́емым и лобыза́емым:/ Христо́с бо дарова́ сия́ целе́бны и лю́тых отрази́тельны.

Свети́льника Це́ркве, на све́щнице Сио́на поста́вленнаго,/ восхва́лим дне́сь Моде́ста, милосе́рдия луча́ми сия́юща,/ челове́ков и ското́в боле́зни исцеля́юща.

Иерусали́ма до́льняго па́стырь был еси́,/ сострада́тельствуя слове́сным и безслове́сным,/ и Го́рняго гра́да еси́ все́льник,/ иде́же помина́й помина́ющия тя́.

Сла́ва: Приими́те, христоподража́тельнии Безсре́бреницы, сие́ ма́лое песнопе́ние на́ше,/ и мно́гим грехо́м пови́нным су́щим,/ проще́ние на́м у Тро́ицы испроси́те.

И ны́не: Спа́се Благи́й, препе́тыя Твоея́ Матере мольба́ми/ и все́х прехва́льных Безме́здников,/ ми́лость Твою́ и по́мощь с Небесе́ ниспосли́ на́м, призыва́ющим Тя́.

Свети́лен воскре́сен, сла́ва:

Я́ко зве́зды пресве́тлыя, разу́мную твердь украша́ете, святи́и Безсре́бреницы,/ и зна́мений заря́ми ве́рныя просвеща́ете./ Те́мже мо́лим ва́с, Богоно́снии:/ разжени́те тьму́ страсте́й на́ших ва́шим ко Го́споду предста́тельством.

На хвали́тех стихи́ры 4, глас 1:

Стих: Хвали́те Его́ в тимпа́не и ли́це,/ хвали́те Его́ во стру́нах и орга́не.

Возсия́ дне́сь пра́зднество/ всех святы́х Безсре́бреников,/ ли́к А́нгельский торжеству́ет/ и мы, земноро́днии, ликовству́ем,/ мо́лятся бо приснопа́мятнии/ о чту́щих любо́вию святу́ю па́мять их.

Стих: Хвали́те Его́ в кимва́лех доброгла́сных, хвали́те Е́го в кимва́лех восклица́ния,/ вся́кое дыха́ние да хва́лит Го́спода.

Дождеро́дныя о́блаки преизя́ществующа,/ многотеку́щими благода́тей чудесы́/ всю зе́млю, сла́внии, напоя́ете,/ песнопе́ния Бо́гу приноси́ти понужда́юще.

Стих: Се что́ добро́ или́ что́ красно́,/ но е́же жи́ти братии вку́пе.

Исцеля́ти стра́сти души́ и телесе́/ хи́трость от Христа́ прие́мше,/ преесте́ственно исцеля́ете вся, чудотво́рцы,/ нечелове́ческими лечба́ми враче́бными,/ но Боже́ственными, Безме́здницы, дохнове́ньми.

Стих: Святы́м, и́же суть на земли́ Его́,/ удиви́ Госпо́дь вся хоте́ния Своя́ в них.

Добро́то Безсре́бреников, благоле́пие му́чеников,/ оби́тели сея́ засту́пниче, Пантелеи́моне досточу́дне,/ бу́ди неду́гом на́шим цели́тель/ и моли́твенник при́сный о душа́х на́ших.

На Литурги́и

Блаже́нны от 3-й пе́сни кано́на: три пе́рвых тропаря́ святы́х и Богоро́дичен.