В 4-й день

И свята́го проро́ка и богови́дца Моисе́я

Ве́чер

На Го́споди, воззва́х: стихи́ры на 6, глас 6.

Подо́бен: Все отло́жше:

Кро́вию обагри́в/ твою́ свяще́нную оде́жду,/ вшел еси́ во Свята́я Святы́х,/ свят ты быв, Вави́ло сла́вне,/ и Я́ве всегда́ наслажда́яся обожа́ния,/ украша́ем и муче́нием сия́я,/ и А́нгел показу́яся/ чисте́йшими причаще́нии./ Тем тя чтим/ и любо́вию пра́зднуем/ твое́ свяще́ннейшее торжество́,// достоблаже́нне.

Желе́зом око́ван,/ непреткнове́нно стезю́ ше́ствовал еси́, преподо́бне,/ к Небе́сному Гра́ду веду́щую,/ честны́ми ра́нами,/ Вави́ло всему́дре,/ я́коже у́тварию обложе́н./ В него́же вшед, я́ко победи́тель и́стиннейший,/ и му́ченик непобеди́м,/ и священноде́йственник свяще́ннейший,/ пое́ши со А́нгелы/ песнопе́ние Боже́ственное чи́сто:// Свят, Свят, Свят, Тро́ице Единосу́щная.

Ста́ду предста́тельствуя/ слове́сному, иера́рше,/ па́лицею зна́ния/ на зла́це воспита́л еси́ сие́ ве́ры,/ и от звере́й спасл еси́,/ и Бо́га возвесели́л еси́,/ с высоты́ тя па́ствующаго,/ Его́же пред безбо́жными, блаже́нне, пропове́дуя,/ я́ко незло́биво закла́лся еси́ а́гня, ра́дуяся,/ с незло́бивыми о́троки,/ и приве́лся еси́ с ни́ми же́ртва благово́нна всеце́ла,// Вави́ло всечу́дный.

И́ны стихи́ры проро́ка, глас 4.

Подо́бен: Зва́нный свы́ше:

Научи́вся Бо́жиим та́йнам,/ добро́ты неизрече́нныя и сла́вы чудеса́м,/ Моисе́е богови́дче всехва́льне,/ се́ньми и начерта́нии/ и во о́бразех сия́ провозвести́л еси́,/ тем Боже́ственнаго сия́ния Первонача́льнаго Нача́ла/ безо́бразными о́бразы и невеще́ственными вещьми́/ вво́диши воображе́нная нам,/ и, е́же обожи́тися над фарао́ном,/ я́ко Бог, блаже́нне,/ обе́том и благода́тию стяжа́в,// моли́ о всех чту́щих тя.

Ты, доброде́тельми превше́д,/ в виде́нии был еси́ близ всех Бо́га,/ посреде́ ви́хра и мра́ка же и о́блака внутрь быв,/ весь просла́вился еси́./ Отту́ду прия́т скрижа́ли Боже́ственных Писа́ний/ и равноа́нгельно благода́тию/ я́сно блиста́вши душе́вными очесы́,/ вку́пе и теле́сными,/ и спокрыва́еши злове́рное ослепле́ние,/ явля́я ве́рным открове́ние,/ ты и сло́вом подава́вши,// моли́ спасти́ся нам.

В богоде́льней и огнено́сней/ Боже́ственней любви́/ был еси́ собесе́дник,/ я́ко Дру́гу друг, Бо́гу,/ и, лицо́м к Лицу́, Моисе́е треблаже́нне,/ на Творца́ своего́ воззре́в,/ ви́диши за́дняя заре́ю Сего́ Я́ве/ и, чрез сква́жню навы́кнув,/ пло́тию Сло́ва бу́дущее тебе́ Богоявле́ние./ Те́мже и столп предыды́й,/ пресла́вно пред людьми́ богому́дрыми предхо́диши//и спаса́еши ве́рно хва́лящия тя.

Сла́ва, священному́ченика, глас 6. Самогла́сен:

Восхо́дный степе́нь/ Це́рковь стяжа́ свяще́нныя твоя́ по́двиги,/ священному́чениче Вави́ло,/ ю́же и храни́ши незы́блену и ненаве́тну от волко́в держа́вных,/ пропове́дующую до́блести твоя́/ и велича́ющую с тобо́ю младе́нцы,// за Христа́ заколе́нныя с тобо́ю, блаже́нне.

И ны́не, Богоро́дичен или́ Крестобогоро́дичен.

Подо́бен: Тридне́вен:

Зача́тие Твое́ безсе́менно/ и рожде́ние безболе́зненно помышля́ющи,/ удивля́юся зело́:/ ка́ко си́це, я́ко злоде́й,/ благоволи́л еси́ умре́ти, Сы́не?// Пречи́стая взыва́ше.

На стихо́вне Окто́иха.

Сла́ва, священному́ченика, глас 6:

Суди́щу мучи́телеву предстоя́/ и подвиза́яся за благоче́стие, взыва́л еси́:/ се аз и де́ти, я́же мне даде́ Бог;/ с ни́миже венча́вся на Небесе́х,/ Вави́ло священному́чениче,/ моли́ непреста́нно,// сете́й врага́ изба́витися душа́м на́шим.

И ны́не, Богоро́дичен или́ Крестобогоро́дичен.

Подо́бен: Тридне́вен:

Лю́ди беззако́ннейшия,/ без пра́вды пригвожда́ющия Тя на Дре́ве,/ Де́ва и Чи́стая Ма́ти Твоя́ зря́щи,/ я́коже Симео́н прорече́,// утро́бою, Спа́се, уязвля́шеся.

Тропа́рь, глас 4:

И нра́вом прича́стник,/ и престо́лом наме́стник апо́столом быв,/ дея́ние обре́л еси́, богодухнове́нне,/ в виде́ния восхо́д:/ сего́ ра́ди, сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Вави́ло,/ моли́ Христа́ Бо́га// спасти́ся душа́м на́шим.

И проро́ка, глас 2:

Проро́ка Твоего́ Моисе́я па́мять, Го́споди, пра́зднующе,/ тем Тя мо́лим:// спаси́ ду́ши на́ша.

Или́ сей, глас то́йже:

На высоту́ доброде́телей возше́л еси́, проро́че Моисе́е,/ и сего́ ра́ди сподо́бился еси́ ви́дети сла́ву Бо́жию,/ скрижа́ли благодатныя Зако́на прия́т,/ и начерта́ний благода́ть в себе́ нося́,/ и проро́ков был еси́ честна́я похвала́/ и благоче́стия вели́кое та́инство.

На у́трени

Кано́н Окто́иха еди́н и святы́х два.

Кано́н священному́ченика. Иоа́нна мона́ха. Глас 6.

Песнь 1

Ирмо́с: Яко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,// Бо́гу побе́дную песнь пои́м, вопия́ше.

Свои́ми кровьми́, я́ко Моисе́й Чермно́е мо́ре, безво́лненно проше́д, Вави́ло блаже́нне,/ Бо́гу побе́дную песнь вопия́л еси́:/ воспои́м Го́споду, я́ко просла́вися.

Ты земны́х преоби́дел еси́ жела́ние,/ Боже́ственному повину́в жела́ние, е́же жи́ти, Вави́ло блаже́нне,/ Христо́ву гряды́й ви́дети красоту́.

Пребоже́ственныя Тро́ицы я́ко сый рачи́тель,/ с тремя́ у́мерл еси́ о́троки, ра́дуяся, Вави́ло блаже́нне,/ при́сно приводя́ ду́ши сия́ жела́нием.

Богоро́дичен: Своего́ прие́мши Соде́теля, я́ко Сам восхоте́,/ из безсе́меннаго чре́ва Твоего́ па́че ума́ воплоща́ема, Чи́стая,/ тва́рей и́стинно показа́лася еси́ Влады́чица.

Ин кано́н проро́ка, его́же краегране́сие:

Моисе́й, проро́ков пе́рвый, да похва́лится словесы́.

В Богоро́дичнах же: Кли́ментово. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Моисе́й проро́ков да восхва́лится пе́рвый,/ я́ко пред Бо́гом бесе́довав пе́рвый Я́ве лице́м к Лицу́,/ не в гада́ниих рече́ний, но я́ко в ви́де пло́ти ви́дев Того́.

Я́ко боже́ственна народоводи́теля и изба́вителя тя/ ро́ду твоему́ Изра́илю, Моисе́е богови́дче, даде́ Бог,/ Отцу́ я́коже помоли́ся,/ обетова́ния пома́занием провозвеща́я твое́ рожде́ние.

Му́дрости тя сокро́вище обрето́ша родны́я доброде́тели, сокрове́но зна́нием Бо́жиим,/ я́коже в ковче́зе, богови́дче Моисе́е;/ тем тя воспита́ше цари́ца и Боже́ственный Про́мысл.

Богоро́дичен: Устраши́ся Моисе́й, ви́дев пресла́вное в пе́рвых виде́ние,/ купине́ и пла́меню стра́нное смеше́ние, Бо́га из Де́вы Ма́тере прообразу́ющее Нетле́ннаго,/ Его́же, мину́в времена́, ви́де пло́тию.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Несть свят, я́коже Ты, Го́споди Бо́же мой,/ возвы́сивый рог ве́рнаго Твоего́ Вави́лы/ и венча́в его́ венце́м испове́дания Твоего́.

Му́чеников бысть кре́пость, Го́споди, Крест Твой,/ утверди́вый о́троки с блаже́нным Вави́лою/ и низложи́вый те́ми пре́лести безбожныя де́рзости.

Кре́пость оскуде́, Христе́, диа́воля в коне́ц:/ незло́бивыми бо детьми́ и боже́ственным Вави́лою побежда́ется кре́пкий/ и посмева́емь есть, от них поруга́емь.

Богоро́дичен: Боже́ственнаго рождества́ Твоего́, Чи́стая,/ вся́кий естества́ чин прехо́дит чу́до:/ Бо́га бо преесте́ственно зачала́ еси́ во утро́бе/ и, ро́ждши, пребыва́вши Присноде́ва.

Ин

Ирмо́с: Лук си́льных изнемо́же,/ и немощству́ющии препоя́сашася си́лою,// сего́ ра́ди утверди́ся в Го́споде се́рдце мое́.

Весьма́ неизрече́ннаго зна́ния испо́лнился еси́, богови́дче,/ Дух Святы́й чрез А́нгела/ дре́вних научи́ тя зна́нию я́сно.

Нося́й све́тло Боже́ственныя зари́,/ богозна́меньми удиви́л еси́ Еги́пет,/ претворя́я стихи́й пресла́вне естество́, прему́дре.

Озаря́ет кра́сное добро́ты твоея́/ от Боже́ственныя зари́ све́тлое, блаже́нне, жи́тельство/ и к Боже́ственней несы́тно вся привлече́ красоте́.

Богоро́дичен: Взя́лся еси́ стра́шным виде́нием ко ужа́сному зре́нию, прему́дре,/ но возбрани́ глас Го́спода,/ ро́ждшагося из Де́вы пло́тию.

Конда́к проро́ка, глас 2:

Лик проро́ческий с Моисе́ем и Ааро́ном/ весе́лием днесь весели́тся,/ я́ко коне́ц проро́чествия их на нас испо́лнися:/ днесь сия́ет Крест, и́мже нас спасл еси́;// тех моли́твами, Христе́ Бо́же, поми́луй нас.

Седа́лен священному́ченика, глас 3.

Подо́бен: Боже́ственныя ве́ры:

Точа́ ве́ры испове́дание, пре́лесть угаси́л еси́ злосла́вия, обличи́в и́дольское безбо́жие,/ и, всесожже́ние Боже́ственное быв, чудотворе́ньми ороша́еши концы́:/ о́тче преподо́бне, Христа́ Бо́га моли́ дарова́ти нам ве́лию ми́лость.

Сла́ва, ин седа́лен, проро́ка, глас 4:

Проро́ков всех тя пе́рваго я́ко су́ща, благоче́стно ве́дуще, восхваля́ем ве́рнии:/ пе́рвый бо Бо́га ви́дел еси́,/ я́коже мо́щно бя́ше челове́ку ви́дети.

И ны́не, Богоро́дичен:

Пречи́стыя ру́ки Твоя́, Де́вомати, просте́рши,/ покры́й упова́ющия на Тя и Сы́ну Твоему́ зову́щия:/ всем пода́ждь, Христе́, ми́лости Твоя́.

Крестобогоро́дичен:

На Дре́ве ви́дящи воздви́жена Сы́на Твоего́, Пречи́стая,/ утро́бою ма́тернею растерза́ема, жа́лостно взыва́ла еси́:/ увы́ Мне, ка́ко заше́л еси́, Све́те Мой безле́тный?

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,// от смы́сла чи́ста о Го́споде пра́зднующи.

Христо́с моя́ си́ла, Бог и Госпо́дь, пред суди́щем вопия́л еси́,/ мучи́тельских преще́ний небоя́знен, священному́чениче Вави́ло,/ в Го́споде ра́дуяся.

Же́ртву непоро́чну, стра́шну, безкро́вну Го́споду принося́,/ и себе́ само́го заколе́ние кро́вию, священному́чениче Вави́ло,/ нескве́рно приве́л еси́.

Дете́й, преподобне, младо́е мудрова́ние, я́ко мудр детоучи́тель,/ духо́вным воспита́в млеко́м, священному́чениче Вави́ло,/ в соверше́ние испра́вил еси́.

Богоро́дичен: Яко и́стинно невеща́нна и непости́жна/ Твоего́, Богоро́дице, благоле́пнаго суть рождества́/ су́щим на земли́ и на Небеси́, Присноде́во, та́инства.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Гугна́нию язы́ка и гла́са твоего́ уясни́вшуся Боже́ственным Про́мыслом, богови́дче,/ вити́я та́йн Бо́жиих яви́лся еси́ глаго́лы/ и ра́нами я́звил еси́ Еги́пет.

Коль пресла́вно зва́ние твое́, о богови́дче!/ Коль стра́шна дела́ твои́х чуде́с!/ Яви́ся бо Сый тебе́ Бог/ и, сла́вою возвы́сив тя, Изра́илю спаси́теля посла́.

Вся́каго перворо́дна порази́л еси́ еги́петскаго,/ я́ко Христо́с де́монов умертви́ держа́ву:/ о́браз бо бу́дущаго тобо́ю де́йствуемая и́стинно бы́ша, сла́вне.

Богоро́дичен: Не приближа́йся се́мо, Моисе́й слы́шав,/ Бо́жию гла́су вопию́щу из пла́мене купины́:/ свя́то бо ме́сто в ле́поту преднаписа́/ пло́тию роди́тися Христу́ из Чи́стыя.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши/ любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,// от мра́ка грехо́внаго взыва́юща.

Боже́ственную благода́ть Твою́, Иису́се,/ священному́ченик Вави́ла и́стинно с высоты́ прия́ше,/ я́ко и де́ти ю́ныя к Твое́й любви́ приведе́ и сме́рти к преоби́дению.

Боже́ственным зна́нием Твои́м осия́вся,/ священному́ченик Вави́ла вся уча́ше, Го́споди,/ Тя ве́дети, Еди́наго Бо́га, Су́що Го́спода,/ от мра́ка и льсти взыва́юща.

Боже́ственным избра́нием Твои́м прозна́менався священному́ченик Вави́ла слове́сное пасти́ ста́до Твое́,/ Тебе́ прино́сит, Сло́ве Бо́жий, кровь свою́,/ к стези́ спасе́ния всех му́дре путеводя́.

Богоро́дичен: Богоро́дицу Тя от души́, Влады́чице ми́ра блага́я, испове́дующия спаса́й:/ Тя бо Предста́тельницу непобеди́му и́мамы,/ су́щую Богороди́тельницу.

Ин

Ирмо́с: Ты, Го́споди, мои́ Свет,/ в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Ударя́еши Чермно́е и твори́ши разделе́ния мно́гая/ жезло́м твои́м, о богови́дче,/ да пока́жеши в сем Креста́ Боже́ственную си́лу.

О, дерзнове́ния прелюбе́знаго!/ О, простоты́ души́ чи́стыя!/ Аще позна́л еси́ мя па́че всех, к Бо́гу богови́дец рече́,/ разу́мно мне яви́ся.

Ка́менем покры́вся, не ви́дел еси́ Бо́жия Лица́,/ я́ко утае́на, о богови́дче,/ воплоще́ние же позна́л еси́ Сло́ва, я́ко за́дняя.

Богоро́дичен: Вшел еси́ чу́вственне во мрак/ и навы́кл еси́ неизрече́нная, о богови́дче,/ я́ко хо́щет из Де́вы Бог пло́тию роди́тися, Спас.

Песнь 6

Ирмо́с: Жите́йское мо́ре/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мои́,// Многоми́лостиве.

Жите́йское мо́ре преле́стное зря волну́емо бу́рею,/ Вави́ла, пресла́вный страда́лец, вопия́ше:/ возведи́ из тли жизнь мою́, Многоми́лостиве.

Христу́ подо́бяся, за па́ству ду́шу твою́ пре́дал еси́,/ о сла́вный му́чениче и страда́льче, Вави́ло блаже́нне,/ и преле́стныя сте́ны разори́л еси́.

Дете́й непостоя́нное утверди́ му́дре/ свои́ми страда́ньми Вави́ла, приснопа́мятный страда́лец,/ к жи́зни Небе́сней от земли́ преводя́, пресла́вный.

Богоро́дичен: Пречи́стая Влады́чице, ро́ждшая земны́м Ко́рмчию Го́спода,/ страсте́й мои́х непостоя́нное и лю́тое укроти́ смуще́ние/ и тишину́ пода́ждь се́рдцу моему́.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию.

Во́инство стяжа́в Бо́жие Изра́иль си́льное,/ седмь у́бо зло́бы ханане́йския язы́ки погуби́л еси́,/ лю́дем ты в насле́дие дав зе́млю их.

Неизглаго́ланно вшед во мрак Боже́ственный, Моисе́е,/ иде́же Бог бя́ше, зовы́й тя,/ пи́санныя скрижа́ли пе́рстом Его́ законныя прия́л еси́,/ я́ко вели́к уго́дник Его́.

Поста́ви послу́шати Бог гла́са Своего́ богови́дца Моисе́я,/ Себе́ Само́го ему́ яви́в,/ да пока́жет стра́шное со сла́вою та́инство Свое́.

Богоро́дичен: Ма́нием Боже́ственным Тя преднапису́ет Моисе́й сла́вный/ ковче́г, Богоро́дице, заря́ми Ду́ха всю́ду, я́ко зла́том, покрове́н/ в сла́ву Бо́жию.

Конда́к священному́ченика, глас 8.

Подо́бен: Я́ко нача́тки:

Я́ко благоче́стия пропове́дника и страда́льцев утвержде́ние,/ Це́рковь сла́вит тя, Вави́ло сла́вне, освеща́ема днесь;/ но, я́ко име́я дерзнове́ние ко Го́споду,/ в ми́ре соверше́нием велича́ющия и восхваля́ющий тя сохрани́ти Христу́// моли́ся, о многострада́льне.

И́кос:

Мирску́ю Я́ве суету́ помышля́я, ми́ра отчужде́нный,/ и Стра́сти Христо́вы подража́в, плотски́я стра́сти умертви́л еси́,/ и, крест твой взем, после́довал еси́, му́чениче, Зижди́телю твоему́,/ и, пребыва́я с Ним ны́не, моли́ся о честву́ющих тя и́стинно,/ о многострада́льне.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших.

Небе́сная чинонача́лия днесь,/ победоно́сцы зря́ще ю́ныя на пре́лесть и чу́днаго Вави́лу,/ вопия́ху сра́дующеся Христу́:/ благослове́н еси́, Го́споди Бо́же отце́в на́ших.

Влады́чня светоно́сная уясни́ благода́ть соше́дшияся ве́рныя,/ венцено́сный же сла́вный Вави́ла повелева́ет сра́дующимся вопи́ти:/ благослове́н еси́, Го́споди Бо́же отце́в на́ших.

Мучи́телей у́бо недоуме́яшеся умышле́ние, помоществова́ти не су́щим бого́м,/ Пресвято́й же Тро́ице чу́дный Вави́ла повелева́ет вопи́ти:/ благослове́н еси́, Бо́же отце́в на́ших.

Богоро́дичен: Тобо́ю, Ма́ти Де́во, Свет возсия́ вселе́нней све́тел:/ Ты бо Зижди́теля всех родила́ еси́, Бо́га,/ Его́же моли́, Всечистая, низпосла́ти нам, ве́рным, ве́лию ми́лость.

Ин

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.

В боговиде́ниих неизглаго́ланных Боже́ственный писа́тель быв,/ весь му́дрый вид ски́нии ты сло́вом ухи́трив,/ началозда́телю Веселеи́лу предложи́л еси́ дея́ние, богови́дче Моисе́е.

Свяще́нствовати дерзну́в Корре́й с тобо́ю, яви́ся низше́д во ад жив,/ всежре́бийно Бо́гу тебе́ честно́е, Моисе́е, храня́щу,/ ца́рствия и свяще́нства вку́пе.

Воево́дствующу тебе́ иуде́йскому язы́ку дре́вле, Моисе́е,/ яви́ся Михаи́л, нача́льник Небе́сных и те́ла твоего́ Боже́ственный храни́тель:/ злонача́льника бо противоглаго́люща той посрами́.

Богоро́дичен: Ааро́нов Тя Боже́ственный жезл прозя́бнути показа́ всем, Богоро́дице,/ реше́ние грехо́в, очище́ние бо земны́м была́ еси́,/ я́коже ропта́вшим на Бо́га о́но стра́шное преще́ние.

Песнь 8

Ирмо́с: Из пла́мене преподо́бным ро́су источи́л еси́/ и праведнаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,// Тя превозно́сим во вся ве́ки.

Бо́га Отца́ Соде́теля, Единосу́щна Сы́на и Бо́жия Ду́ха/ в пла́мени ю́ноши пе́ти повелева́ются:/ да благослови́т Го́спода вся тварь и превозно́сит во вся ве́ки.

Па́мять днесь, бра́тие, священному́ченика Вави́лы/ я́же в пла́мени ю́ноши пе́ти повелева́ют:/ благослови́те Го́спода, вся дела́, и превозноси́те Его́ во ве́ки.

Ю́нии днесь ученицы́ иере́я и му́ченика Вави́лы с ста́рцем венча́вшеся,/ в пещи́ ю́нош песнь пе́ти повелева́ют:/ благослови́те Го́спода, вся дела́, и превозноси́те Его́ во ве́ки.

Богоро́дичен: Бо́га родила́ еси́ пло́тию, содержа́щаго руко́ю вся,/ и на объя́тиих Сего́, Де́во, носи́ла еси́,/ Его́же пое́м я́ко Го́спода, дела́, и превозно́сим во вся ве́ки.

Ин

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:// благослови́те, вся дела́ Госпо́дня, Го́спода.

Уго́дник и́стинно Бо́жий, я́ко кро́ток, слы́шал еси́ и де́лы был еси́,/ тем позна́н бысть тебе́ Госпо́дь па́че всех проро́ков, Моисе́е,/ и, всели́вся в тя, ве́рно пе́ти научи́:/ благослови́те, вся дела́ Госпо́дня, Го́спода.

Я́ко таи́нник Бо́жий и служи́тель и царь Изра́илев, Моисе́е богови́дче, я́влься,/ Христа́ пропове́дал еси́ приити́ в пло́ти,/ прописа́в Его́ в себе́ стра́шное и Боже́ственное Прише́ствие,/ Его́же и о́браз одушевле́н яви́лся еси́ я́ве, и проро́к ве́рен.

Сло́ва проро́чествием лю́ди и Зако́на повеле́ньми наста́вил еси́ ве́рно,/ зна́меньми и чудесы́ напра́вив и чуде́с показа́нии:/ от Бо́га бо показа́вся нача́льник, богови́дче Моисе́е;/ тем приложи́лся еси́ ко отце́м твои́м со сла́вою мно́гою.

Богоро́дичен: Никто́же предуслы́ша пре́жде тебе́, богови́дче сла́вне Моисе́е, уго́дниче Христо́в,/ зане́ вся изре́кл еси́ Де́вы смотре́ния,/ пропису́ющия Тоя́ Боже́ственное рождество́,/ в пла́мени бо купины́ ви́дел еси́ зрак неви́димый.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю же, Всечи́стая, яви́ся челове́ком/ Сло́во воплоще́нно,/ Его́же велича́юще,// с Небе́сными во́и Тя ублажа́ем.

Бог челове́ком путь показа́ Кресто́м к высоте́ Небе́сней благовосхо́ден,/ сего́ ра́ди смерть побежда́ется земны́ми,/ де́ти бо ю́ныя сея́ не убоя́шася, с чу́дным Вави́лою, я́же ублажа́ем.

Я́ко Свет сый, Христе́, Всечи́стый, стра́стныя мглы ду́шу мою́ очи́сти/ моли́твами, Влады́ко, Твои́х страстоте́рпец, Вави́лы и дете́й,/ и́хже ле́тнюю па́мять соверша́юще, благосла́вно торжеству́ем.

Страсте́й врачева́ния почерпе́м, сла́вней Це́ркви страда́лец притека́юще:/ в ту бо приидо́ша а́нгельстии ли́цы, и ду́си пра́ведных всех,/ и Влады́чица с чу́дным Вави́лою, врачева́ния подава́ющи.

Богоро́дичен: Сы́на, безле́тно от Отца́ возсия́вша, Ты, во чре́ве несказа́нно заче́нши, родила́ еси́,/ Богома́ти Чи́стая, Де́во Пресвята́я,/ моли́ о рабе́х Твои́х Еди́наго Человеколю́бца Бо́га, спасти́ род наш.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́.// Тем, веселя́щеся, Тя, Богоро́дице, велича́ем.

Был еси́, богови́дче, самови́дец Госпо́день и по сме́рти,/ не во мра́чных гада́ниих, я́ко в ка́мени пе́рвее,/ но в челове́честей пло́ти Христа́ ви́дев, облиста́юща Божество́м.

Гора́ Фаво́р просла́вися па́че Сина́йския бога́тно,/ иде́же Моисе́й из ме́ртвых и Фесви́тянин от стран живу́щих/ Христа́ со апо́столы зря́ху преобразу́ющася, я́ко Су́що Бо́га.

Спаси́ мя ми́лостивною твое́ю моли́твою и моли́тв дерзнове́нием,/ я́ко Изра́иля от бед, Моисе́е богови́дче, и лю́тых, и ну́ждных,/ христиа́н исполне́ние от вся́каго вре́да, пою́щих Тя.

Богоро́дичен: Ста́мну Тя злату́ю, и скрижа́ль, и Боже́ственную трапе́зу, Де́во,/ пе́рвее Моисе́й написа́в, Я́ве пока́зоваше Бо́га роди́тися из Тебе́,/ Его́же ви́девше пло́тию, ве́рно песнь скончава́ем Твою́.

Свети́лен.

Подо́бен: Не́бо звезда́ми:

Жрец ку́пно и же́ртва, Вави́ло, яви́лся еси́ Бо́жия,/ жря Ему́ безкровно и свои́ми кровьми́ поже́рся с соверше́нными младе́нцы,/ с ни́миже Тя ны́не восхваля́ем.

Богоро́дичен: Твоему́ о́бразу, Де́во, не покланя́ющияся, и Сы́на и Бо́га Твоего́, ве́рою чи́стою/ низложи́, я́ко безбожныя, и гее́нне преда́ждь.

На литурги́и

Проки́мен, глас 4: Святы́м, я́же суть на земли́ Его́,// удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну. Апо́стол ко Евре́ем, зача́ло 330. Аллилу́йя, глас 4: Воззва́ша пра́веднии, и Госпо́дь услы́ша их. Ева́нгелие от Луки́, зача́ло 67. Прича́стен: Ра́дуйтеся, пра́веднии, о Го́споде:

На ма́лей вече́рни

На Го́споди, воззва́х: стихи́ры, глас 1:

Воспои́м, бра́тие, светлопра́зднственную песнь,/ новоявле́ннаго уго́дника Бо́жия ублажа́юще/ и к тому́ вознося́ще моли́тву,/ во е́же очи́стити серде́ц на́ших очеса́/ и па́мятию чуде́с его́ просвети́ти ду́ши на́ша.

Иоаса́фе, уго́дниче Христо́в,/ всех доброде́телей подви́жник был еси́,/ на земли́ у́бо ско́рби поне́с,/ на Небеси́ же ра́дость ве́чную от Бо́га прие́м,/ услы́ши моле́ние чад твои́х/ и моли́ спасти́ и просвети́ти ду́ши на́ша.

Ни́щия и ско́рбныя возлюби́вый/ и о гре́шных лю́дех моли́тву всегда́ возноси́вый,/ сам от Христа́ возлю́блен был еси́,/ Иоаса́фе святи́телю:/ помина́й нас, по́двиги твоя́ почита́ющих,/ и моли́тву сотвори́ ко Го́споду/ спасти́ и просвети́ти ду́ши на́ша.

Кто исчи́слит мно́жество исцеле́ний,/ от чудотво́рных моще́й твои́х источа́емых, уго́дниче Христо́в?/

Кто не подиви́тся вели́кому твоему́ заступле́нию?/ Ко́е ли се́рдце челове́ческое любо́вию твое́ю не умили́тся?/ Ди́вно просла́вися в тебе́ Госпо́дь,// просвеща́яй и спаса́яй ду́ши на́ша.

Сла́ва, глас 6:

О́трочеству твоему́ наче́ншуся, преподо́бне,/ под кров Влады́чицы прия́т был еси́,/ я́коже роди́тель твой виде́нием в том уве́рися;/ сконча́вшуся же земно́му житию́ твоему́,/ ино́е виде́ние лю́ди уверя́ет,/ я́ко дух твой просла́влен есть от Бо́га./ Тому́ и о нас моли́ся, святи́телю Христо́в,// поми́ловатися душа́м на́шим.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся: моли́ся, Влады́чице,/ со святы́ми апо́столы,// поми́ловати ду́ши на́ша.

На стихо́вне стихи́ры, глас 2.

Подо́бен: До́ме Евфра́фов:

Иоаса́фе, святи́телю Бо́жий,/ моли́твы непреста́нныя кади́ло/ и предста́телю о лю́дех тепле́йший,/ и нас, пою́щих тя, не отри́ни,// но помо́щник бу́ди нам при́сный.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Воспои́м, бра́тие,/ уго́дника Христо́ва Иоаса́фа,/ того́ подвиза́юще на моли́тву/ от бед изба́витися нам// и дарова́тися нам пре́жде конца́ покая́нию.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Не довле́ют тебе́, святи́телю Христо́в,/ челове́ческая благохвале́ния,/ зане́ от Пречи́стыя Богоро́дицы/ во млады́х ле́тех твои́х.// я́ко избра́нник Бо́жий свиде́тельствован был еси́.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду трудо́в твои́х,/ де́монская разори́л еси́ по́лчища/ и дости́гл еси́ чино́в а́нгельских,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,// мир испроси́ душа́м на́шим.

И ны́не, Богоро́дичен, глас то́йже:

Вели́ких дарова́ний, Чи́стая Де́во Богома́ти, Ты сподо́билася еси́:/ я́ко родила́ еси́ пло́тию Еди́наго от Тро́ицы Христа́ Жизнода́вца,/ во спасе́ние душ на́ших.

Тропа́рь пи́сан на вели́цей вече́рни.

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры на 8, глас 8:

Ди́вен Бог во святы́х Свои́х,/ в ро́дех христиа́нских чудоде́йствуяй/ и но́выя избра́нники Своя́ явля́яй:/ зрим бо и ны́не Иоаса́фа уго́дника/ от Христа́ прославля́ема,/ и красото́ю доброде́телей свои́х страну́ на́шу озаря́юща,/ и дерзнове́ние ве́лие иму́ща/ мир вселе́нней дарова́ти// и душа́м на́шим ве́лию ми́лость.

Лик святы́х Твои́х, Го́споди, на Небеса́х умно́жися/ преставле́нием святи́теля Твоего́ Иоаса́фа,/ его́же и на земли́ Це́рковь воспева́ет:/ того́ у́бо моли́твы о нас приими́, Человеколюбче,// я́ко име́яй ве́лию ми́лость.

Нощне́й тьме огустева́ющей,/ умножа́ется зве́здный блеск/ и к тому́ о́чи заблу́ждших ра́достно возво́дятся;/ та́ко и умно́жившейся на земли́ грехо́вней тьме,/ возведе́м горе́ о́чи на́ши, бра́тие,/ и, сия́ние доброде́телей святи́теля узре́вше,/ к Небе́сному Оте́честву потщи́мся,/ его́же да не лиши́т Госпо́дь нас, гре́шных,// име́яй ве́лию ми́лость.

Глас 5:

Подо́бен: Ра́дуйся:

Ра́дуйся, свяще́нная главе́,/ святи́телю Бо́жий Иоаса́фе,/ па́стырей богому́дрое пра́вило/ и и́ноков наста́вниче предо́брый;/ ра́дуйся, боля́щих цели́телю пресла́вный/ и скорбя́щих уте́шителю ми́лостивый./ Моли́ся при́сно ко Го́споду/ и нам подража́телем тебе́ бы́ти/ и, грехо́вная вся презре́вшим,// Еди́ному Бо́гу рабо́тати.

Ра́дуйся, страсте́й сопротивобо́рче/ и духовнаго де́лания тру́дниче;/ ра́дуйся, пра́ведниче, смиренному́дрия испо́лненный,/ го́рдых ми́ра сего́ обличи́телю/ и лени́вых гро́зный кара́телю./ Не преста́й моля́ся ко Го́споду о нас,// во е́же спасти́ся нам.

Ра́дуйся, Небе́сный жи́телю,/ на зе́млю ми́лостивным о́ком призира́яй/ и моли́твы певцо́в твои́х прие́мляй;/ ра́дуйся, очеса́ твоя́ всегда́ на Не́бо возводи́вый/ и о земны́х стяжа́ниих небреги́й./ Научй у́бо и нас, святи́телю Христо́в,/ на Небесе́х сокро́вище стяжа́ти// и твою́ та́мо сла́ву я́ве узре́ти.

Сла́ва, глас 2:

Ки́ими похва́льными венцы́/ увенча́ем святи́теля Христо́ва,/ Госпо́дню сла́ву непреста́нно возвеща́вшаго/ и благоче́стие пра́вое повсю́ду насади́вшаго,/ за́поведей Христо́вых живу́ю скрижа́ль,/ на ли́ца челове́ков не взира́вшаго,/ но ду́ши всех ко спасе́нию приводи́вшаго;/ сего́ бо венцы́ нетле́нными венча́ет Христо́с Бог наш,// име́яй ве́лию ми́лость.

И ны́не, Богоро́дичен, глас то́йже: Пре́йде сень зако́нная:

Вход. Проки́мен дне и чте́ния три святи́тельская.

При́тчей чте́ние: Па́мять пра́веднаго с похвала́ми:

Прему́дрости Соломо́новы чте́ние: Уста́ пра́веднаго ка́плют прему́дрость: Прему́дрости Соломо́новы чте́ние: Похваля́ему пра́веднику, возвеселя́тся лю́дие: (зри страни́цы 205–208).

На лити́и стихи́ра хра́ма. И свята́го, глас 1:

Подоба́ше непоро́чно соблюде́нному святи́теля де́вственному те́лу/ и нетле́нием ве́чным просла́витися:/ сие́ бо, доброде́тельми преподо́бнаго очища́емо,/ еще́ жи́ву ему́ су́щу,/ храм Свята́го Ду́ха быва́ет/ и по преставле́нии его́ исто́чите чуде́сных дарова́ний явля́ется,/ и́мже со умиле́нием дивя́щеся,/ ко уго́днику вознесе́м моли́тву// о спасе́нии душ на́ших.

Сла́ва, глас 6:

Ди́вный во святы́х Госпо́дь/ в житии́ святи́теля Иоаса́фа просла́вися,/ и по преставле́нии его́ нетле́нными мощми́ чудоде́йствует,/ и безчи́сленныя лю́ди/ ве́ровати и упова́ти на по́мощь Небе́сную науча́ет./ Потщи́мся у́бо, о бра́тие,/ е́же еди́но на потре́бу иска́ти,/ и ду́ши на́ша покая́нием очища́ти,/ святи́теля в по́мощь призыва́юще,// и в Тро́ице воспева́емаго Бо́га прославля́ти во ве́ки.

И ны́не, Богоро́дичен, глас то́йже: Творе́ц и Изба́витель:

На стихо́вне стихи́ры, глас 7:

Украси́теся, черто́зи Небе́снии,/ отве́рзитеся, две́ри до́му Бо́жия:/ се бо от земли́ вознесе́ся пра́ведная душа́ святи́теля/ и со А́нгелы водворя́ется,/ и́мже житие́м свои́м поревнова́./ Того́ моли́твами, Христе́ Бо́же,// пощади́ и спаси́ ду́ши на́ша.

Стих: Честна́ пред Го́сподем/ смерть преподо́бных Его́.

Пра́ведных ду́ши в руце́ Бо́жией,/ и не ко́снется их му́ка,/ но и ме́ртвенное те́ло пра́веднаго Иоаса́фа/ тле́нию неприча́стно пребыва́ет/ и растле́нным грехми́ душа́м исто́чник благода́ти явля́ется,/ еще́ же и боля́щим здра́вие да́рует,/ егда́ моли́тв уго́дника Бо́жия воспро́сят/ и к нему́ с ве́рою притека́ют.

Стих: Что возда́м Го́сподеви о всех,/ я́же воздаде́ ми?

Поревну́им о благоче́стии, бра́тие,/ зрим бо сие́ ве́чною сла́вою венча́емо:/ возненави́дим горды́ню и сребролю́бие,/ я́ко, та́я отри́нув, святи́тель Христо́в/ на Небеси́ и на земли́ ве́чную сла́ву прия́т/ и сокро́вище обре́те неиждива́емое;/ те́мже и о гре́шных лю́дех моли́тися дерзнове́ние/ и исцеле́ний благода́ть от Бо́га стяжа́,/ да и беззаконныя путе́м Бо́жиим научи́т,/ и нечести́выя ко Го́споду обрати́т.

Сла́ва, и ны́не, Богоро́дичен, глас то́йже: Под кров Твой, Влады́чице:

Тропа́рь, глас 3:

Святи́телю, Христу́ Бо́гу возлю́бленне,/ пра́вило ве́ры и о́браз милосе́рдия лю́дем был еси́,/ бде́нием же, посто́м и моли́твою,/ я́ко свети́льник пресве́тлый, просия́л еси́/ и просла́влен от Бо́га яви́лся еси́:/ те́лом у́бо в нетле́нии почива́я,/ ду́хом же Престо́лу Бо́жию предстоя́,/ чудеса́ пресла́вная источа́вши./ Моли́ Христа́ Бо́га,/ да утверди́т нас в Правосла́вии и благоче́стии/ и спасе́т ду́ши на́ша.

Ин тропа́рь, глас 2:

Моли́твенниче изде́тска преизря́дный,/ богоизбра́нный святи́телю Христо́в Иоаса́фе,/ пра́вило ве́ры и о́браз милосе́рдия благоче́стным житие́м всем явля́вши/ и с ве́рою к тебе́ притека́ющим оби́льно исцеле́ния источа́вши./ Моли́ Христа́ Бо́га,/ да утверди́т правове́рие, мир и благоче́стие/ и спасе́т ду́ши на́ша.

Сла́ва, и ны́не, Богоро́дичен.

На у́трени

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4:

Да возвели́чится Иоаса́ф, святи́тель Христо́в,/ да насле́дит угото́ванное ему́ ве́чное Ца́рство:/ той бо Христу́ ве́рно служа́ше, о ме́ньшей бра́тии Его́ при́сно пеки́йся,/ и ка́ющияся в любо́вь свою́ приима́ше,/ и ны́не мо́лится о душа́х на́ших.

Сла́ва, и ны́не, Богоро́дичен:

Те́плое заступле́ние су́щим в беда́х, и Помо́щницу на́шу,/ и к Бо́гу примире́ние, Е́юже от тли изба́вихомся,/ Богоро́дицу, ве́рнии, ублажа́ем.

По 2-м стихосло́вии седа́лен, глас 8:

В житии́ твое́м, уто́дниче Христо́в, посто́м и труды́ те́ло твое́ изнури́л еси́,/ сего́ ра́ди по сме́рти твое́й нетле́нием процвете́ и исто́чник исцеле́ний ве́рным быва́ет./ Моли́ приле́жно Христа́ Бо́га спасти́ся душа́м на́шим.

Сла́ва, и ны́не, Богоро́дичен:

Я́ко всенепоро́чная Неве́ста Творца́,/ я́ко неискусому́жная Ма́ти Изба́вителя,/ я́ко вмести́лище Вы́шняго су́щи, Всепе́тая,/ беззако́ний мя су́ща скве́рное жили́ще и в ра́зуме бы́вша бесо́м игра́лище/ потщи́ся от сих злоде́йствия мя изба́вити, све́тлое жили́ще доброде́телию соде́лавши;/ Светоприе́мнице нетле́нная, отжени́ о́блак страсте́й/ и сподо́би го́рния све́тлости и неле́стнаго осия́ния Све́та Невече́рняго Твоего́.

По полиеле́и седа́лен, глас 2:

Прииди́те, вси ве́рнии, почита́юще па́мять святи́теля Иоаса́фа,/ излие́м сердца́ на́ша в моли́тве,/ да пребу́дет с на́ми ду́хом свои́м, и на блага́я дея́ния да наста́вит нас,/ и да научи́т искуше́ния пло́ти побежда́ти и Еди́ному Бо́гу угожда́ти.

Сла́ва, и ны́не, Богоро́дичен:

Боже́ственнаго Естества́ не отлу́чься, Плоть бысть во чре́ве Твое́м,/ но Бог и вочелове́чься пребы́сть,/ Иже по рождестве́ Ма́терь Тя Де́ву, я́коже пре́жде рождества́, сохрани́ всенепоро́чну, Еди́н Госпо́дь./ Того́ приле́жно моли́ дарова́ти нам ве́лию ми́лость.

Степе́нна, 1-й антифо́н 4-го гла́са. Проки́мен, глас 4:

Уста́ моя́ возглаго́лют прему́дрость// и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней. Вся́кое дыха́ние: Ева́нгелие от Иоа́нна, зача́ло 36.

По 50-м псалме́ стихи́ра, глас 6:

Непреста́нною моли́твою, учи́тельным сло́вом,/ вели́ким милосе́рдием и доброде́тельным житие́м/ о́браз ве́рным был еси́, богому́дре Иоаса́фе,/ всех ко Христу́ приводя́ и на путь спасе́ния наставля́я;/ твоего́ пастыренача́льства не лиши́ и нас, вели́кий святи́телю Бо́жий,/ почита́ющих па́мять твою́ ве́рно.

Кано́н Богоро́дицы на 6 и свята́го на 8.

Кано́н святи́телю Иоаса́фу, его́же краегране́сие:

Иоаса́фе святи́телю, моли́ся о царе́ и лю́дех.

Глас 4.

Песнь 1

Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́// побе́дное воспою́ пе́ние.

Иоаса́фа святи́теля воспева́юще по́двиги, очи́стим по́мыслы ума́ на́шего, бра́тие,/ того́ подвиза́юще на моли́тву о проще́нии грех на́ших/ и благода́тнаго умиле́ния дарова́нии.

О твое́м благоче́стии измла́да потща́вшеся, роди́телие твои́, уго́дниче Христо́в,/ досто́йную мзду трудо́в свои́х в тебе́ стяжа́ша,/ я́ко от младе́нчества твоего́ благочести́вым нра́вом ра́дость тем был еси́.

А́нне пра́ведней уподо́бися оте́ц твой, святи́телю:/ та бо Дщерь свою́ во Свято́е Святы́х вводи́му ви́де,/ сей же тя от Тоя́жде Пресвяты́я Богоро́дицы архиере́йскою сла́вою венча́нна/ в виде́нии чу́днем позна́ти сподо́бися. Себе́ сама́го пла́чу окая́нный аз, от ю́ности страстя́м порабо́тився:/ поми́луй мя предста́тельством твои́м, святи́телю,/ от ю́ности стра́сти порабо́тивый и еди́ному Бо́гу до сме́рти послужи́вый.

Богоро́дичен: Го́ру святу́ю, превы́шнее носи́ло,/ Ма́терь Бо́жию и Де́ву и́стинную по рождестве́ воспои́м.

Катава́сия 4-го сентября́: Крест начерта́в, Моисе́й:

10-го декабря́; Спасе́ лю́ди чудоде́йствуяй Влады́ка: или́: Христо́с ражда́ется:

Песнь 3

Ирмо́с: С высоты́ снизше́л еси́ во́лею на зе́млю,/ превы́ше вся́каго нача́ла,/ и смире́нное возне́сл еси́ из а́да преиспо́дняго/ естество́ челове́ческое:// несть бо свят па́че Тебе́, Человеколю́бче.

А́ще и ча́до послу́шное роди́телем твои́м был еси́, Иоаса́фе,/ но, Го́спода па́че сих возлюби́в, из оте́ческаго до́ма спасе́ния ра́ди удали́лся еси́/ и, науче́ние кни́жное восприи́м, во оби́тель и́ноческую себе́ заключи́л еси́.

Фариее́йскаго возноше́ния чужд яви́лся еси́, о́тче преподо́бне,/ мона́шеское же смире́ние от ю́ности возлюби́в, та́йными по́двиги плоть смиря́л еси́/ и ду́шу твою́ моли́твою пред Отцо́м Небе́сным просвеща́л еси́.

Е́же жи́ти ми Христо́с, и смерть приобре́тение,/ глаго́лал еси́ в себе́, Христо́в уго́дниче,/ и, боле́знем плоть твою́ сокруша́ющим, труды́ ко трудо́м Го́спода ра́ди прилага́л еси́.

Свято́е послуша́ние восприи́м и свяще́нства оде́ждою укра́шен,/ Иоаса́ф, уго́дник Христо́в, учи́тель добр отроко́м быва́ет,/ сло́вом и житие́м тех благоче́стию науча́я и во млады́х ле́тех ум зре́лый явля́я.

Богоро́дичен: Неискусобра́чная, Бо́га пло́тию ро́ждшая,/ стра́стными прило́ги преклоне́на мя утверди́:/ несть бо, Чи́стая, ра́зве Тебе́ помо́щница.

Седа́лен, глас 6:

Ка́я доброде́тель не обре́те в души́ твое́й обита́лища?/ Ко́его по́двига не был еси́ побо́рник?/ Нищета́ бо духо́вная, и о Ца́рствии Небе́снем плач, и нра́ва кро́тость, и пра́вды иска́ние,/ и ко бли́жним милосе́рдие, и се́рдца чистота́ во твое́м непоро́чнем житии́ просия́ша./ Тех у́бо дарова́ний о́бщники ны, моля́щияся, сотвори́/ и о душа́х на́ших предста́тель бу́ди, Иоаса́фе, избра́нниче Бо́жий.

Сла́ва, и ны́не, Богоро́дичен:

Благослове́нную нареки́й Твою́ Ма́терь,/ прише́л еси́ на Страсть во́льным хоте́нием,/ возсия́в на Кресте́, взыска́ти хотя́ Ада́ма, глаго́ля А́нгелом:/ сра́дуйтеся Мне, я́ко обре́теся поги́бшая дра́хма./ Вся му́дре устро́ивый, Бо́же наш, сла́ва Тебе́.

Песнь 4

Ирмо́с : Седя́й в сла́ве/ на Престо́ле Божества́,/ во о́блаце ле́гце/ прии́де Иису́с Пребоже́ственный/ нетле́нною дла́нию/ и спасе́ зову́щия:// сла́ва, Христе́, си́ле Твое́й.

Вем и аз путь, ко спасе́нию веду́щий,/ но ле́ности пло́ти моея́ не побежда́ю, увы́ мне!/ Сего́ ра́ди тя, святи́телю, призыва́ю в моли́тву,/ да жела́ние спасе́ния во мне утверди́ши.

Я́корь спасе́ния име́я наде́жду на Го́спода, служе́ние игу́менское прия́л еси́/ и, к попече́нием о строи́тельстве домо́внем понужда́емь,/ ду́шу твою́ устроя́ти ко спасе́нию не преста́л еси́;/ сему́ и мене́, многосу́етнаго, науча́й, о́тче преподо́бне.

Труды́ ко трудо́м прилага́я и оби́тель Лу́бенскую от разруше́ния воздвиза́я,/ по земли́ же Рустей за ми́лостынею стра́нствуя,/ святи́тель Иоаса́ф цари́цу во благоче́стии утвержда́ет/ и вся лю́ди спасе́нию душ науча́ет.

Име́я в се́рдце свое́м при́сную к нйи́щим любо́вь,/ Иоаса́ф, Христо́в уго́дник, оте́ческое попече́ние о монасты́рских тру́дницех явля́ет/ и от доста́тка своего́ щедро́ты бли́жним свои́м отверза́ет.

Богоро́дичен: Госпоже́ Всепе́тая, Богороди́тельнице,/ моя́ помышле́ния Твои́ми моли́твами очи́стивши,/ покажи́ мя благопло́дна, Ма́ти всех Бо́га.

Песнь 5

Ирмо́с: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы// и к Све́ту у́мному вознося́й Моего́ Божества́.

Тебе́, святи́телю Христо́в, молю́ в сокруше́нии се́рдца:/ я́коже в житии́ твое́м ка́ющияся проща́л еси́,/ та́ко, и моего́ се́рдца сокруше́ние зря,/ умоли́ Го́спода грехо́м мои́м проще́ние дарова́ти.

Еле́нь на исто́чники водны́я устремля́ется,/ ты же, уго́дниче, ко сла́ве Це́ркве Христо́вы вся дея́ния и по́мыслы твоя́ при́сно устремля́л еси́/ и та́ко оби́тели святи́теля Афана́сия и преподо́бнаго Се́ргия/ ели́ко строе́нием церко́вным, толи́ко и благоче́стием бра́тии украси́л еси́.

Лю́дие, слы́шите и чуди́теся уго́дника смиренному́дрию,/ сей бо свята́го Афана́сия в виде́нии зрит и тому́ вопроси́вшу отвещава́ет:/ хощу́, да мене́, я́коже гре́шника, нака́жеши.

Ю́наго Соломо́на, не бога́тства, но му́дрости от яви́вшагося Го́спода прося́ща,/ похваля́ет Вы́шний и вселе́нная при́сно прославля́ет,/ но того́ мудре́йший Иоаса́ф показу́ется,/ наказа́ния грехо́м свои́м от я́вльшагося святи́теля испроша́я.

Богоро́дичен: Воплоти́ся Бог по Ипоста́си, Чи́стая,/ из Тебе́ пло́ти соединя́емь, пребы́в неизме́нен,/ по Боже́ственному Существу́ безпло́тен.

Песнь 6

Ирмо́с : Возопи́, прообразу́й погребе́ние тридне́вное,/ проро́к Ио́на, в ки́те моля́ся:// от тли изба́ви мя, Иису́се, Царю́ Сил.

Моли́твами преподобнаго Се́ргия,/ твои́ми же труды́ во сла́ву святы́х Бо́жиих, па́че же се́рдца чистото́ю/ от Го́спода еще́ на земли́ возвели́чен был еси́, уго́дниче,/ и святи́тельским са́ном во спасе́ние па́ствы твоея́ облече́н был еси́.

О́гненную ре́вность о испра́влении церко́внем/ явля́л еси́ в Белогра́дстем преде́ле, Иоаса́фе святи́телю;/ те́мже и днесь подава́й Це́ркви мир, ве́рным утвержде́ние.

Любве́ сыно́вния не отпа́л еси́, на высоте́ святи́тельства пребыва́я,/ и роди́телю твоему́ земно́е поклоне́ние возда́л еси́, Христу́ посреде́ вас су́шу;/ у́бо и мое́ смири́ прего́рдое се́рдце и моли́твами твои́ми вразуми́ мя.

И́нок нестяжа́телен на престо́ле архиере́йетва пребы́л еси́, святи́телю,/ по́двиги поста́ и моли́твы умножа́я, до́брое о себе́ и о лю́дех вознося́ моле́ние,/ иере́и же и вся лю́ди за́поведем Бо́жиим науча́я.

Богоро́дичен: Вся́каго существа́ вы́шшее/ Сло́во Бо́жие воплоще́нно нам родила́ еси́;/ те́мже Богоро́дицу Тя устна́ми и душо́ю пропове́дуем.

Конда́к, глас 8.

Многоразли́чныя по́двиги жития́ твоего́ кто испове́сть?/ Многообра́зныя ма́лости Бо́жия, тобо́ю явле́нныя, кто исчи́слит?/ Дерзнове́ние же твое́ у Преча́стыя Богоро́дицы и Всеще́драго Бо́га до́бре ве́дуще,/ во умиле́нии серде́чнем зове́м ти:/ не лиши́ и нас твоея́ по́мощи и заступле́ния,// святи́телю Христо́в и чудотво́рче Иоаса́фе.

И́кос:

Пречи́стою Богома́терию от ю́ности в сосу́д благода́ти избра́нный,/ благочести́вым житие́м вои́стину до́брый па́стырь слове́сных ове́ц яви́лся еси́, святи́телю:/ те́мже прия́л еси́ дар исцеле́ний от возлюби́вшаго тя Христа́ Бо́га на́шего./ Сего́ ра́ди зове́м ти:/ не лиши́ и нас твоея́ по́мощи и заступле́ния,/ святи́телю Христо́в и чудотво́рче Иоаса́фе.

Песнь 7

Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:// благослове́н еси́, Го́споди, Бо́же оте́ц на́ших.

Святи́телю Иоаса́фу диви́мся, о лю́дие,/ ве́дуще сего́, а́ки Никола́я Чудотво́рца, бе́дных хи́жины та́йно посеща́юща,/ или́ тем дрова́ свои́ма рука́ма уготовля́юща,/ и бие́ния от привра́тника прие́млюща.

Я́звы грехо́вныя на душа́х челове́ческих прови́дел еси́, святи́телю,/ и та́йная прегреше́ния их с любо́вию и долготерпе́нием облича́л еси́;/ те́мже и нас моли́твою твое́ю к покая́нию и исправле́нию жития́ приведи́/ и ду́ши на́ша предста́тельством твои́м поми́луй.

О́ному власти́телю уподо́бихся аз, окая́нный,/ и́же, сам беззако́нен быв, ко у́зником зело́ же́сток явля́шеся;/ но я́коже того́ науче́нием твои́м испра́вил еси́, о́тче Иоаса́фе, святи́телю Христо́в,/ та́ко и мене́ науча́ ко бли́жним ми́лостива, к себе́ же же́стока бы́ти.

Царя́ Небе́снаго до́брый во́ине и ста́да Христо́ва ве́рный па́стырю,/ моли́тву сотвори́ о лю́дех твои́х,/ да ти́хое житие́ на земли́ пожи́вше,/ жи́зни ве́чныя на Небесе́х сподо́бимся.

Богоро́дичен: Преве́чно от Отца́ возсия́вша Бо́га Сло́ва/ во утро́бе пло́тию заче́ншую вси ублажа́ем,/ я́ко Ма́терь всех Бо́га.

Песнь 8

Ирмо́с: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:// вся дела́, благослови́те, по́йте Го́спода.

Афана́сию о́ному, тобо́ю возлю́бленному, подража́тель быв, святи́телю,/ потщи́лся еси́ земно́е житие́ во стра́нничестем по́двизе сконча́ти/ и, кончи́ну свою́ прозре́в, пути́ дале́кому небоя́зненно вда́лся еси́.

Рекл еси́ лю́дем, от па́ствы твоея́ отходя́: не и́мате мене́ жи́ва узре́ти./ Те́мже в зало́г обще́ния та́мо гробни́цу тебе́ устро́ити повеле́л еси́./ И нас у́бо научи́ час сме́ртный па́мятовати/ и о души́ свое́й попече́ние непреста́нно храни́ти.

Ели́ка твоя́ о мона́шестем житии́ бя́ше ре́вность, толи́ка и ко твои́м при́сным любы́:/ зане́ не по пло́ти то́чию свои́ тебе́ бы́ша, но и ду́хом еди́но в Бо́зе с тобо́ю яви́шася./ Того́ ра́ди восхоте́л еси́ роди́тели твоя́ пре́жде кончи́ны твоея́ посети́ти/ и благослове́ние Бо́жие тем препода́ти.

Игу́мен, близ ме́ста твоея́ пра́ведныя кончи́ны подвиза́выйся,/ о часе́ преставле́ния твоего́ виде́нием известву́ется/ и свиде́тель ве́рен о твое́м от Бо́га прославле́нии а́бие быва́ет./ И на мне у́бо твоея́ моли́твы си́лу покажи́, Христо́в уго́дниче,/ и то́ю от мучи́тельства страсте́й свободи́ мя.

Богоро́дичен: Всесвята́я Де́во, Бо́га Сло́ва ро́ждшая пло́тию,/ души́ моея́ мрак Твои́ми моли́твами отгна́вши, просвети́ взыва́юща:/ благослови́те, вся дела́ Госпо́дня, Го́спода.

Песнь 9

Ирмо́с: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́.// Тя, Богоро́дице, тем вси велича́ем.

Любы́ николи́же отпа́дает, глаго́лет Боже́ственный Дух./ И́стина сия́ в чудесе́х любве́ твоея́ извести́ся, святи́телю Христо́в,/ я́ко боля́щим исцеле́ние и скорбя́щим утеше́ние от твои́х нетле́нных моще́й источа́вши.

Ю́жский Русския земли́ преде́л благодаре́ний о чудесе́х твои́х испо́лнися издре́вле,/ ны́не же и от да́льних стран се́верных притека́ющия зрим/ и исцеле́нныя страда́льцы, о твое́м заступле́нии ра́дующияся.

Де́ти стра́ждущия па́че ины́х возлюби́л еси́, святи́телю Христо́в,/ тем исцеле́ния и благода́тную по́мощь умножа́я/ и роди́тели их от ско́рби к ра́дости пременя́я.

Елиссе́я проро́ка косте́й прикоснове́нием воста́ уме́рый,/ твои́х же моще́й целова́нием безчи́сленнии исцели́шася лю́дие./ И мене́ у́бо припа́дающа исцели́ от грехо́вных страсте́й/ и ве́ру укрепи́ многогре́шныя души́ моея́, о́тче преподо́бне.

Христе́ Бо́же, моли́твами Иоаса́фа, уго́дника Твоего́,/ мир Це́ркви пода́ждь и благостоя́ние,/ от гла́да же и па́губы избавле́ние и согреше́ний на́ших проще́ние.

Богоро́дичен: Плод чре́ва Твоего́, Ра́дость ро́ждшая,/ соде́я ликостоя́теля песнь пе́ти Тебе́ велегла́сно:/ ра́дуйся, провещава́ше.

Свети́лен.

Подо́бен: Жены́, услы́шите:

Свети́льник све́тлый Иоаса́ф да воспое́тся посреде́ Це́ркве,/ я́ко и́нок преподо́бен и святи́тель че́стен,/ нему́дрых наказа́тель и ве́ры учи́тель,/ боля́щих врач чудотворя́й, бесо́в изгони́тель/ и о вселе́нней предста́тель тепле́йший.

Сла́ва, и ны́не, Богоро́дичен:

Ве́лие и пресла́вное Рождества́ Твоего́ та́инство, Богора́дованная Отрокови́це и Богома́ти Де́во,/ проро́цы пропове́даша, апо́столи научи́ша, му́ченицы испове́даша,/ А́нгели же воспева́ют, и челове́цы покланя́ются.

На хвали́тех стихи́ры на 4, глас 4.

Подо́бен: Яко до́бля:

Святи́теля Госпо́дня о́браз/ целу́юще, ве́рнии,/ очи́стим себе́ от скве́рны/ пло́ти и ду́ха/ и па́мятию чуде́с его́/ сердца́ на́ша умили́м,/ в покая́нии те́пле зову́ще Христу́:/ Го́споди, уго́дника Твоего́ моли́твами/ вложи́ в нас тому́ подража́ти жела́ние.

Никто́же тощ от Тебе́ исхо́дит,/ святи́телю Бо́жий Иоаса́фе,/ и исцеле́ние те́ла и души́ освяще́ние/ всяк прие́млет,/ а́ще с ве́рою по́мощь твою́ призове́т/ и, о гресе́х свои́х покая́ние принося́,/ житие́ свое́ испра́вити потщи́тся./ Тому́ у́бо и нас научи́, свя́те,// и моли́тву сотвори́ о спасе́нии душ на́ших.

Слеза́ми умиле́ния/ ли́ца своя́ ороша́юще, ве́рнии,/ целу́им уго́дника о́браз честны́й,/ я́ко ре́ку чуде́с и исцеле́ний исто́чник неоску́дный,/ я́ко Боже́ственныя си́лы зна́мение ясне́йшее,/ е́же в на́ша малове́рная времена́/ в сердца́х ве́ру умножа́ет,/ неве́рныя же к ве́ре возво́дит// и святи́теля Бо́жия чти́ти всех науча́ет.

Сла́ва, глас 8:

О, пресла́внаго чудесе́!/ О, Боже́ственнаго к нам гре́шным долготерпе́ния!/ я́ко умно́жившимся собла́зном на земли́ и ве́ре зело́ ума́ленней,/ чуде́сная умножа́ются святи́теля исцеле́ния./ Зри́те у́бо, лю́дие/ и вся ве́рная Христо́вы Це́ркве ча́да,/ коли́ко мо́жет моли́тва пра́веднича,/ ка́ко дре́вних чуде́с подо́бие днесь нам явля́ется./ Сла́ва Тебе́, Христе́ Бо́же,/ я́ко Ты еси́ святы́ми чудоде́йствуяй;/ сотвори́ ны досто́йны толи́кия благода́ти бы́ти,/ слы́шатели и свиде́тели чуде́с свята́го Иоаса́фа су́щия,/ и изба́ви нас от безме́рных грехо́в,// и ра́дость спасе́ния Твоего́ пода́ждь нам.

 Ины́не, Богоро́дичен, глас то́йже:

Влады́чице, приими́ моли́твы раб Твои́х,// и изба́ви нас от вся́кия ну́жды и печа́ли.

Славосло́вие вели́кое, и отпу́ст.

На Литурги́и слу́жба вся святи́тельская.

Пра́зднование Пресвяте́й Влады́чице Богоро́дице ра́ди ико́ны Ей, имену́емыя «Неопали́мая Купина́»