Ве́чер

На Го́споди, воззва́х: стихи́ры на 6, глас 1.

Подо́бен: Прехва́льнии му́ченицы:

Богому́дре блаже́нне,/ очервле́ньми свое́я кро́ве/ свяще́нную твою́ и боже́ственную оде́жду уясни́л еси́,/ от си́лы бо благоче́стно в си́лу/ и от сла́вы в сла́ву преше́л еси́./ И ны́не моли́ся/ дарова́ти душа́м на́шим// мир и ве́лию ми́лость.

Же́ртву пе́рвее Бо́гу принося́ Безкровную,/ я́ко свяще́нник зако́ннейший,/ я́ко всепло́дие и прия́тну же́ртву/ тебе́ само́го кро́вию/ я́ко му́ченик и́стиннейший/ по́слежде Христу́ прине́сл еси́,/ богоглаго́ливе всече́стне.// Его́же моли́ о пою́щих тя.

Му́чеников во́инства/ Христу́, о́тче, приве́л еси́,/ уче́нии твои́ми, Анфи́ме, и наказа́нии,/ уча́ и наказу́я/ и я́ве о́браз, богому́дре, тебе́ само́го предлага́я./ С ни́миже моли́ся/ дарова́ти душа́м на́шим// мир и ве́лию ми́лость.

И́ны стихи́ры преподо́бнаго, глас и подо́бен то́йже:

О́тче Феокти́сте,/ твоя́ све́тлая па́мять/ мона́хов собо́ры весели́т/ добро́тами твоего́ жития́/ и чуде́с благода́тьми,/ и дарова́ний све́тлостьми./ Христа́ моли́ дарова́ти душа́м на́шим// мир и ве́лию ми́лость.

О́тче Феокти́сте,/ твоего́ терпели́ваго воздержа́ния/ де́мони ужасо́шася/ и упраздни́шася твои́ми непреста́нными моли́твами, всехва́льне:/ Христа́ бо поспе́шствующа стяжа́л еси́./ Его́же ны́не моли́/ дарова́ти душа́м на́шим// мир и ве́лию ми́лость.

О́тче Феокти́сте,/ Бо́жие зда́ние был еси́;/ е́же по о́бразу бо сохрани́в,/ и́стинствуя житие́м,/ и честна́го твоего́ о́браза/ зва́ние показа́л еси́, всечу́дне./ Христа́ моли́ дарова́ти душа́м на́шим// мир и ве́лию ми́лость.

Сла́ва, глас 6, самогла́сен:

Свяще́нник зако́ннейший,/ да́же до кончи́ны твоей был еси́,/ блаже́нне Анфи́ме,/ священноде́йствуя бо Боже́ственная и неизглаго́ланная Та́инства,/ кровь излии́л еси́ за Христа́ Бо́га/ и же́ртву благоприя́тну себе́ приве́л еси́./ Тем, дерзнове́ние име́я к Нему́,/ приле́жно моли́ся/ с ве́рою и любо́вию соверша́ющих твою́ пречестну́ю па́мять/ и почита́ющим сию́// изба́витися напа́стей и вся́ких бед и обстоя́ний.

И ны́не, Богоро́дичен или́ Крестобогоро́дичен, глас то́йже.

Подо́бен: Тридне́вен:

Предстоя́щи Дре́ву иногда́,/ во вре́мя распя́тия Де́ва,/ и с де́вственником ученико́м/ пла́чущи, вопия́ше:/ увы́ Мне, ка́ко стра́ждеши,// всех, Христе́, сый Безстра́стие?

На стихо́вне Окто́иха.

Сла́ва, преподо́бнаго, глас 6:

Преподо́бне о́тче,/ во всю зе́млю изы́де веща́ние исправле́ний твои́х./ Те́мже на Небесе́х обре́л еси́ мзду трудо́в твои́х./ Де́монская разори́л еси́ по́лчища/ и а́нгельския дости́гл еси́ чи́ны,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,// мир испроси́ душа́м на́шим.

И ны́не, Богоро́дичен или́ Крестобогоро́дичен, глас то́йже.

Подо́бен: Тридне́вен:

Ви́дящи Тя распина́ема, Христе́,/ Тебе́ Ро́ждшая вопия́ше:/ что стра́нное, е́же ви́жду, та́инство, Сы́не Мой?/ Ка́ко на Дре́ве умира́вши,/ пло́тию пове́шен,// жи́зни Пода́телю?

Тропа́рь, глас 4:

И нра́вом прича́стник,/ и престо́лом наме́стник апо́столом быв,/ дея́ние обре́л еси́, богодухнове́нне,/ в виде́ния восхо́д:/ сего́ ра́ди, сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Анфи́ме,/ моли́ Христа́ Бо́га// спасти́ся душа́м на́шим.

Сла́ва, преподо́бнаго, глас 8:

Слез твои́х тече́ньми пусты́ни безпло́дное возде́лал еси́/ и и́же из глубины́ воздыха́ньми во сто трудо́в уплодоноси́л еси́/ и был еси́ свети́льник вселе́нней,/ сия́я чудесы́, Феокти́сте, о́тче наш,// моли́ Христа́ Бо́га спасти́ся душа́м на́шим.

И ны́не, Богоро́дичен или́ Крестобогоро́дичен.

На у́трени

Кано́н Окто́иха еди́н и святы́х два.

Кано́н священному́ченика, его́же краегране́сие: Цвет тя пою́ па́стырей и му́чеников. Глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,// я́ко Еди́н сла́вно просла́вися.

Двоплете́н благоче́стия архиере́йства и страда́ния прие́м вене́ц,/ от Христа́ ублажа́ешися, пресла́вне.

Тебе́, Первопа́стырю,/ священноде́йственник Твой, я́ко незло́биво и чи́сто а́гня,/ беззако́нных рука́ми приведе́ся.

Разори́л еси́, иера́рше, еретико́в тве́ржы,/ благочести́вым дерзнове́нием,/ пропове́дав Тро́ицу несозда́нную.

Богоро́дичен: Пречи́стая Богоро́дице,/ я́же воплоще́нное Присносу́щное и Пребоже́ственное Сло́во па́че естества́ ро́ждши,/ пое́м Тя.

Ин кано́н преподобнаго, глас то́йже. Его́же краегране́сие: Твоя́ по́двиги, о Феокти́сте, сказу́ю. Феофа́ново.

Песнь 1

Ирмо́с: Посе́ченный несеко́маго пресече́,/ и ви́де со́лнце зе́млю, ю́же не ви́де:/ лю́таго врага́ вода́ потопи́,/ и непроходи́мое про́йде Изра́иль./ Песнь же воспева́шеся:// Го́сподеви пои́м, сла́вно бо просла́вися.

Безстра́стия жела́нием сре́чемь, пло́ти взыгра́ния, о́тче, увяди́л еси́,/ Феокти́сте му́дре, Бо́гом помогаем./ И ны́не нам све́та мы́сленнаго испо́лнитися/ помоли́ся Го́споду, пою́щим: сла́вно бо просла́вися.

Прилепи́вся тебе́ вели́кий Евфи́мий Боже́ственною, о́тче, любо́вию,/ и, спребыва́я, Феокти́сте, кре́пко,/ стезю́ воздержа́ния про́йде де́тельне и́стинно/ и тебе́ совзыва́ше:/ Го́споду пои́м, сла́вно бо просла́вися.

Подтесни́л еси́ те́ло, преблаже́нне,/ и стра́сти плотски́я, о́тче, порабо́тив, Феокти́сте,/ я́ко прия́л еси́ све́тлость благода́ти/ и, се́ю просвети́вся, боже́ственне взыва́л еси́:/ Го́споду пои́м, сла́вно бо просла́вися.

Богоро́дичен: Тя спасе́ния наде́жду иму́ще, Де́во Ма́ти Бо́жия,/ Сло́во я́ко ро́ждшую, богоразу́мно прему́дрии в воздержа́нии просия́ша,/ Евфи́мий, любе́зный всем, и боже́ственный Феокти́ст,/ Го́споду зову́ще: сла́вно бо просла́вися.

Песнь 3

Ирмо́с: Ты еси́ Утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой.

Яви́лся еси́ священному́ченик,/ священноде́йствуя пе́рвее, преподо́бне, Изба́вителю:/ пото́м же я́ко же́ртву себе́ само́го священноде́йствовал еси́.

Был еси́ не нае́мник, но ве́рнейший па́стырь, преподо́бне,/ твою́ кровь пролива́я, боголюбе́зне, за ста́до твое́.

Изря́дне упа́сл еси́ Влады́ки твоего́ ста́до, архиере́е,/ тем на ме́сте зла́чне всели́лся еси́.

Богоро́дичен: Даждь нам по́мощь мольба́ми Твои́ми, Пречи́стая,/ прило́ги отрева́ющи лю́тых обстоя́ний.

Ин

Ирмо́с: Ты еси́ Утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой.

Плоть у́бо умертви́л еси́ твою́ воздержа́нием, преподо́бне,/ ду́шу же Боже́ственных благода́тей дарова́ньми просвети́л еси́.

Все у́бо жела́ние ко Влады́це твоему́ обрати́л еси́,/ я́ростию же на де́моны, богоно́се, вооружи́лся еси́.

Богоро́дичен: Пе́ния воспева́юще, богонауче́ннии, Влады́чице,/ Тя по́стницы, я́ко Бо́га ро́ждшую,/ Богоро́дицу просла́виша.

Конда́к преподобному́ченика Феокти́ста, глас 4:

В по́стницех присовокупи́вся вели́кому Евфи́мию,/ в по́двизех я́ко А́нгел на земли́ яви́ся,/ очища́я, преподо́бне, сердца́ ве́рных/ Боже́ственными зна́меньми повсегда́,// сего́ ра́ди любо́вию, Феокти́сте, тя почита́ем.

Седа́лен Анфи́ма, глас 1.

Подо́бен: Лик а́нгельский:

Кровь твоя́, му́дре, та́йно вопия́ше от земли́ к Бо́гу, я́ко А́велева, богому́дре:/ Я́ве бо пропове́дал еси́ Тро́ицу Несозда́нную./ Те́мже, Анфи́ме, па́стырски просия́в,/ отгна́л еси́ ересе́й зве́ри, я́ко храни́тель ве́ры.

Сла́ва, преподобнаго, глас 4.

Подо́бен: Яви́лся еси́ днесь:

Отце́в нача́льник наре́клся еси́ и ми́ру был еси́ пресве́тлое свети́ло,/ преподо́бне о́тче Феокти́сте./ Тем непреста́нно чтим па́мять твою́.

И ны́не, Богоро́дичен:

Пречи́стыя ру́ки Твоя́, Де́во Ма́ти, просте́рши,/ покры́й упова́ющия на Тя и Сы́ну Твоему́ зову́щия:/ всем пода́ждь, Христе́, ми́лости Твоя́.

Крестобогоро́дичен:

На Дре́ве ви́дящи воздви́жена Сы́на Твоего́, Пречи́стая/ утро́бою Ма́тернею растерза́ема, жа́лостно вопия́ла еси́:/ увы́ Мне, ка́ко заше́л еси́,/ Све́те Мой Безле́тный?

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Волко́в собо́рища а́гнцы творя́ сло́вом, блаже́нне,/ умертви́лся еси́ те́лом,/ дух же пре́дал еси́ Го́споду.

Я́ко благово́нная и всечестна́я,/ Всецарю́ прия́тна же́ртва твоя́,/ и принося́щаго в богому́дрии,/ и приноша́емаго пребеззако́нными рука́ми.

Пома́зался еси́ у́бо, преподо́бне,/ свяще́нническою ма́стию пе́рвее,/ соверши́лся же еси́ второ́е страда́льческою твое́ю, о́тче, кро́вию.

Богоро́дичен: Очище́ние нам да́руй неве́дений, я́ко Безгре́шен,/ и умири́ мир Твой, Бо́же,/ моли́твами Ро́ждшия Тя.

Ин

Ирмо́с: Всел еси́ на ко́ни, апо́столы Твоя́, Го́споди,/ и прия́л еси́ рука́ма Твои́ма узды́ их,/ и спасе́ние бысть ежде́ние Твое́ ве́рно пою́щим:// сла́ва си́ле Твое́й, Го́споди.

Прему́дрости пе́рвый ты рачи́тель яви́лся еси́, прему́дре;/ житие́ бо непоро́чно пожи́л еси́,/ очище́н изря́дне душе́ю и мы́слию, согла́сно взыва́я:/ сла́ва си́ле Твое́й, Го́споди.

Очи́стив ум твой от страстны́я молвы́, сла́вне,/ и чу́вства му́дре упра́вив,/ к нему́тней тишине́, о́тче, устреми́лся еси́, усе́рдно воспева́я:/ сла́ва си́ле Твое́й, Го́споди.

Земны́я печа́ли воздержа́тельно оттря́с,/ Небе́сныя наде́жди стяжа́ Твой уго́дник, Влады́ко,/ боже́ственный Феокти́ст со Евфи́мием, поя́:/ сла́ва си́ле Твое́й, Го́споди.

Богоро́дичен: я́ко яви́лся еси́ в ми́ре от Де́вы, я́ко Челове́к,/ дарова́л еси́ побе́ду преподо́бным Твои́м:/ Твои́м бо Кресто́м де́моны си́и прогна́ша,/ ве́рою зову́ще: сла́ва си́ле Твое́й, Го́споди.

Песнь 5

Ирмо́с: У́тренююще вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́ ино́го не ве́мы.

Безкро́вну Же́ртву прине́сл еси́ Го́споду,/ само́го же себе́ кро́вию плодоприне́сл еси́, Анфи́ме.

Дух тя Боже́ственный просвети́, иера́рше;/ тем пресла́вную торжеству́ем па́мять твою́.

Боже́ственный у́бо твой язы́к иска́па спасе́ние,/ ток же кро́ве твоея́ духо́вное ра́дование.

Богоро́дичен: Ути́ши непостоя́нную бу́рю страсте́й мои́х,/ Бо́га Ро́ждшая Ко́рмчию и Го́спода.

Ин

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.

Умертви́ на́ша мудрова́ния, Человеколюбче,/ и плотска́я взыгра́ния/ благоприя́тными преподо́бнаго Твоего́ моли́твами.

Свы́ше нас назира́еши, всеблаже́нне,/ и управля́вши житие́ на́ше,/ соверша́ющих любо́вию, му́дре, па́мять твою́.

Богоро́дичен: Сообита́тельная дво́ица,/ преизря́дная и богозва́нная,/ воплоще́ннаго из Де́вы Чи́стыя/ Бо́га пропове́дует, неизрече́нно нам возсия́вшаго.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,// многоми́лостиве Христе́ Бо́же наш.

Крести́л еси́ водо́ю лю́ди и Святы́м Ду́хом,/ я́коже крести́лся еси́,/ крести́лся же еси́ и твое́ю, о́тче, кро́вию.

Я́ко розга́ Лозы́ жи́зненныя,/ избра́н и че́стен,/ мно́жайший израсти́л еси́ Влады́це твоему́ плод, всеблаже́нне.

Не преста́й, моле́ния творя́ ко Христу́, блаже́нне,/ о ста́де твое́м/ и кровь предложи́в моле́бную.

Богоро́дичен: Храм Тя Бо́жий, и киво́т,/ и черто́г одушевле́н,/ и дверь Небе́сную,/ Богоро́дице, ве́рнии, возвеща́ем.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мои́ а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Я́ко со́лнце, су́щим на земли́ возсия́л еси́,/ све́том благоче́стия просвеща́я/ и доброде́телей разсева́я сия́ние,/ и целому́дрия уча́ све́тлости, Феокти́сте,/ твои́ми моли́твами и ны́не вселе́нную умири́.

Богому́дрым по́мыслом ублажи́вся,/ я́же на земли́ преоби́дел еси́ вся,/ и Небе́сное, преблаже́нне о́тче, насле́дие, всему́дре,/ предразсуди́л еси́, Феокти́сте,/ и ны́не Я́ве на Небеса́х живе́ши, ра́дуяся.

Богоро́дичен: Привлеко́стеся добро́тою любве́ Христо́вы, благоле́пныя и Боже́ственныя,/ пло́тию я́вльшагося в ми́ре от Святы́я Чи́стыя Богома́тере,/ и яви́стеся мона́хов изве́стнаго жития́ прописа́ния.

Конда́к священному́ченика Анфи́ма, глас 4.

Подо́бен: Вознесы́йся:

Во свяще́нницех благоче́стно пожи́в/ и муче́ния путь сконча́в,/ и́дольская угаси́л еси́ служе́ния,/ побо́рник быв твоему́ ста́ду, богому́дре./ Те́мже тя и почита́ет ны́не, та́йно вопию́ще:/ от бед изба́ви нас/ твои́ми моли́твами, приснопа́мятне Анфи́ме.

И́кос:

Пода́в мне зна́ние Боже́ственное,/ мрак неве́дения от моего́ се́рдца отжени́ моли́твами твои́ми,/ я́ко да пою́ твою́ ве́рно святу́ю па́мять,/ в не́йже а́нгельстии ли́цы с му́ченическими днесь веселя́тся Боже́ственне/ и челове́цы пе́сньми похва́льными твою́ главу́, я́коже цве́ты спле́тше, венча́ют досто́йно,/ прося́ще от Тебе́ прия́ти согреше́ний оставле́ние/ и злых жития́ реше́ние,/ враго́в же ви́димых изба́витися и неви́димых/ твои́ми моли́твами, о́тче наш Анфи́ме.

Песнь 7

Ирмо́с: От Иуде́и доше́дше о́троцы/ в Вавило́не иногда́,/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Я́ко до́брая и я́ко ту́чная же́ртва твоя́ яви́ся, преблаже́нне Анфи́ме:/ Самому́ бо Влады́це кро́вию прине́слся еси́,/ принося́й Безкровная,/ отце́в, вопия́, Бо́же, благослове́н еси́.

Пасы́йся и упа́с,/ отобою́ду, о́тче, бога́тство собра́л еси́,/ и, сие́ снабде́в, соблю́л еси́ печа́тию страда́ния,/ поя́ Христу́: отце́в на́ших Бо́же, благослове́н еси́.

В ве́рных це́ркви Триипоста́сное Естество́ богосло́вил еси́/ и, пред се́ю, богоно́се, непра́ведных судо́м убива́ем,/ пел еси́: отце́в на́ших Бо́же, благослове́н еси́.

Богоро́дичен: От де́вственнаго чре́ва вопло́щься яви́лся еси́ на спасе́ние на́ше./ Те́мже, Твою́ Ма́терь ве́дуще Богоро́дицу,/ благода́рно взыва́ем: отце́в на́ших Бо́же, благослове́н еси́.

Ин

Ирмо́с: Отроцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.

Всем жела́нием прилепи́вся воздержа́нием тве́рдым твоему́ Влады́це,/ Того́ ны́не пита́ешися сия́нии, зовы́й:/ благослове́н еси́, Го́споди Бо́же, во ве́ки.

Плод боже́ствен Влады́це прине́сл еси́ житие́ твое́, треблаже́нне,/ и же́ртву прия́тну и непоро́чну, зовы́й:/ благослове́н еси́, Го́споди Бо́же, во ве́ки.

Коне́ц боле́зней обре́л еси́, о́тче, наслажде́ние е́же в раи́,/ от те́снаго бо пути́ дости́гл еси́ к простра́нству Ца́рствия, веему́дре,/ благословя́ Христа́ во ве́ки.

Богоро́дичен: Се Де́ва Боже́ственное Отроча́ породи́,/ Его́же ны́не богоно́снии позна́вше Бо́га и Го́спода, вопия́ху:/ благослове́н еси́, Го́споди Бо́же, во ве́ки.

Песнь 8

Ирмо́с: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.

Священному́ченика благосла́внаго в па́мяти,/ ве́рнии, весели́теся, вопию́ще:/ Тя превозно́сим, Христе́, во ве́ки.

Иера́рха му́ченическим зря́ще благоле́пно укра́шена венце́м,/ Го́спода пое́м и превозно́сим во ве́ки.

Тро́ицы уго́дника/ и кровь Тоя́ ра́ди излия́вшаго почти́м,/ Го́спода пою́ще и превознося́ще во вся ве́ки.

Богоро́дичен: Свеща́тельну Тя и златоза́рну/ всели́выйся в Тя Свет Непристу́пный, Де́во,/ показа́ свещу́ во вся ве́ки.

Ин

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

С похвала́ми быва́ет, богоно́се, па́мять твоя́:/ пра́вды бо яви́лся еси́ пита́тель,/ му́жества, му́дрости и целому́дрия, о́тче му́дре,/ Соде́телю и Изба́вителю взыва́я:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Богоно́снаго вси благохвале́ньми почти́м,/ я́ко испо́лнена Я́ве благода́ти/ и Боже́ственными сия́ньми просвеще́на изря́дне,/ Соде́телю и Изба́вителю вопию́ща:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Во гро́бе те́ло твое́ святи́тель погребе́/ и благоду́шия све́тлый тезоимени́т:/ ду́шу же Ангели на Небеса́ принесо́ша,/ Соде́телю ра́достно песнопою́ще:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Богоро́дичен: Любому́дрствовати вожделе́вше, Му́дрости жела́нием Ипоста́сныя, по́стницы богому́дрии,/ ми́ру, Всенепоро́чная, я́вльшияся, Отрокови́це, из Тебе́/ и боголе́пно доброде́тели насади́вшияся,/ Юже де́ти благосло́вят, свяще́нницы пою́т,/ лю́дие превозно́сят во вся ве́ки.

Песнь 9

Ирмо́с: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние, // пе́сньми немо́лчными велича́ем.

Ты у́бо овца́м па́стырь ве́рен показа́лся еси́,/ Па́стырю же овча́ приве́лся еси́ на же́ртву/ и сугу́бу прия́л еси́ сла́ву:/ тем тя честву́юще ублажа́ем.

Ты начерта́ния воздержа́нием, преблаже́нне,/ благоче́стия шары́⁴ себе́ вообрази́в,/ и́стинно по Бо́жию о́бразу ду́шу твою́ показа́л еси́, блаже́нне.

Твоя́ преда́ния, о́тче, невре́дна соблюда́юще/ и страда́ние честву́юще,/ благоче́стно Тро́ицу во Еди́ном Божества́ Естестве́/ пе́сньми непреста́нно блажи́м.

Богоро́дичен: Противля́ющихся, Христе́, Твое́й Це́ркви/ мы́шцы сокруши́ Богоро́дицы ра́ди/ и ве́рныя лю́ди Твоя́ утверди́, да Тя непреста́нно велича́ем.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// Ангелов и челове́к чинонача́лия велича́ют.

Струя́ми твои́х слез очи́стився,/ ны́не Све́та наслажда́ешися, Феокти́сте, Трисия́ннаго,/ Тому́ предстоя́ Я́ве и отону́дными изря́днейше просвеще́н луча́ми,/ свы́ше назира́еши нас, твою́ па́мять соверша́ющих, всеблаже́нне.

Любо́вию и наде́ждею вооружи́вся и ве́рно огражде́н,/ разори́л еси́ хи́трости и кова́рства вра́жия/ и, победи́тель быв, ны́не венцено́сец живе́ши/ с Боже́ственными ли́ки А́нгел и преподо́бных о́крест Престо́ла Всецаря́.

Целому́дренно и пра́ведно и благочести́во на земли́ с челове́ки пожи́вше,/ на Небесе́х сия́ете, богому́дрии по́стницы, со безпло́тных чи́нми,/ Заре́ю пита́ющеся Богонача́льною,/ от Нея́же и по́двигов пра́ведно венцы́, я́ко победоно́сцы, прия́сте.

Богоро́дичен: Боже́ственная и богому́драя и свяще́нная дво́ице отцо́в пресве́тлая,/ ва́шими мольба́ми ми́ру мир от Бо́га низпосла́тися проси́те/ и Це́рквам и́стинно единоу́мие и ве́ру,/ моли́твами благоприя́тными Богоро́дицы, преблаже́ннии.

Свети́лен.

Подо́бен: Ученико́м:

Лик приведи́ днесь ле́тный весь, Никомиди́йский, ра́дуяся, гра́де,/ добраго па́стыря твоего́, и взыгра́й, назира́теля име́яй, соблюда́юща тя,/ вре́да враг вы́шша.

Богоро́дичен: Со апо́столы моля́, Богоро́дице, Твоего́ Сы́на и Го́спода/ поми́ловатися всем пою́щим Тя, и сла́вящим,/ и во ико́нах Тя честву́ющим, и покланя́ющимся досто́йно,/ и любо́вию облобыза́ющим.

На стихо́вне Окто́иха.

Сла́ва, глас 4. Самогла́сен. Ефре́ма Кари́йскаго:

Никомиди́йскому великогра́ду/ всяк град и страна́ спра́зднует днесь/ в па́мять честна́го его́ граждани́на,/ я́бо концы́ земни́и пле́щут,/ веселя́щеся ны́нешним торжество́м священному́ченика./ Сему́ и мы, пе́сньми, я́ко цве́ты, венцы́ спле́тше, возопии́м:/ ра́дуйся, па́стырю до́брый, я́же ду́шу положи́вый за о́вцы,/ же́ртва и жрец, иере́й и овча́./ Тебе́ мо́лимся:/ с пострада́вшими с тобо́ю Христа́, Анфи́ме, моли́/ ста́до твое́ сие́ от иноплеме́нных волко́в изба́вити// и Небе́сныя огра́ды с тобо́ю сподо́битися.

И ны́не, Богоро́дичен или́ Крестобогоро́дичен.

Подо́бен: Я́ко до́бля:

Распина́ема Христа́ Человеколю́бца/ ви́дящи Пречи́стая/ и ре́бра ископава́ема копие́м,/ пла́чущи, вопия́ше: что сие́, Сы́не Мой?/ Что Тебе́ неблагода́рнии лю́дие возда́ша/ за я́же сотвори́л еси́ до́брая им,/ и тщи́шися безча́дствовати Мя, Вселюбе́знейший?/ Удивля́юся, Благоутро́бне,// Твоему́ во́льному распя́тию.

На литурги́и

Блаже́нны Окто́иха на 4. И Анфи́ма песнь 3 на 4. Проки́мен, глас 7: Честна́ пред Го́сподем,/ смерть преподо́бных Его́. Стих: что возда́м Го́сподеви о всех, я́же воздаде́ ми? Апо́стол ко Евре́ем, зача́ло 334. Аллилу́йя, глас 2: Свяще́нницы Твои́ облеку́тся в пра́вду: Стих: Блаже́н муж, боя́йся Го́спода: Ева́нгелие от Иоа́нна, зача́ло 36. Прича́стен: В па́мять ве́чную:

Блаже́ннаго Иоа́нна Ми́лостиваго Власа́таго, Росто́вскаго чудотво́рца