На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры пра́здника 3 и святы́х 5, глас 4.

Подо́бен: Зва́нный свы́ше:

Ярости царя́ богоме́рзкаго и христоненави́стнаго/ ника́коже убоя́вся, прему́дре Михаи́ле,/ ни ослабе́л еси́ щаде́ния ра́ди живота́,/ ни жела́нием ца́рства,/ его́же самово́льне оста́вил еси́,/ но Христа́ Еди́наго Бо́га испове́дал еси́:/ Тому́ Еди́ному от души́ покланя́юся, рекл еси́,/ и сла́дце умру́ за Уме́ршаго мене́ ра́ди./ Его́же моли́, страстоте́рпче Михаи́ле,/ со страда́вшим с тобо́ю Фео́дором боля́рином,// спасти́ вас почита́ющия.

Пощади́ ю́ность твою́, мучи́тель рече́,/ и поклони́ся мно́ю жела́емому бо́гу, со́лнцу же и огню́,/ да со мно́ю ца́рствуеши./ Ты же, му́чениче, рекл еси́:/ да не бу́дет мне, о пребеззако́нниче, Христа́ отврещи́ся/ и ло́жным бого́м твои́м поклони́тися./ Что бо мне тобо́ю прети́мая му́ка/ или́ настоя́щее житие́/ проти́ву бу́дущаго Ца́рствия?/ Его́же получи́ти моли́, прему́дре Михаи́ле с до́блим Фео́дором боля́рином,// любо́вию вас непреста́нно почита́ющим.

Царь богоме́рзкий и весьма́ отчужде́нный Бо́га/ покуша́шеся ле́стию, Михаи́ле,/ вас отврати́ти от ве́ры су́щия во Христа́/ и ласка́ньми свои́ми увеща́ти тща́шеся./ Глаго́лаше бо:/ а́ще покло́нитеся со мно́ю превожделе́нному моему́ бо́гу,/ сла́вы ми́ра сего́ со мно́ю насладите́ся./ Но наде́жди погреши́в,/ и в де́лех рук свои́х увязе́ гре́шник./ Моли́твами, Христе́, Твои́х уго́дник/ такова́го безчелове́чия изба́ви ду́ши на́ша,// я́ко Еди́н Милосе́рд и Человеколю́бец.

И́ны стихи́ры, глас 2.

Подо́бен: Терпя́ще муче́ния:

Претерпе́сте муче́ния боле́зни,/ пролия́сте кровь, я́ко во́ду,/ тем во страсте́х свои́х мног плод принесо́сте,/ о пречу́дне Михаи́ле и прему́дре Фео́доре!/ Христо́вы за́поведи соблюда́юще/ и те́ми утвержда́ющеся,/ уче́ньми наста́вника своего́,/ зми́я злонача́льнаго попра́сте/ и побе́дными венцы́ увязо́стеся// от Христа́, Бо́га и Спа́са душ на́ших.

Со́лнца све́тлаго, Михаи́ла, похва́лим,/ и лучу́ светлосо́лнечную, Фео́дора, почти́м,/ свети́льника пресве́тлая, сия́юща заря́ми, о́ба крепкоду́шна,/ зако́нную ве́ру пра́вяща,/ я́ко доброхра́бра пострада́ста,/ пе́рвым му́чеником подо́бящеся, глаго́лаху:/ не поклони́мся тва́ри па́че Творца́,/ но, ма́ло претерпе́вше,/ венцы́ све́тлыя прии́мем// от Христа́, Бо́га и Спа́са душ на́ших.

Коего́ждо смотря́юще, Михаи́ле,/ устраша́ющихся мук,/ и иду́щих сквозе́ огнь, и покланя́ющихся со́лнцу,/ к себе́ глаго́ласте:/ лу́чше нам есть, Фео́доре, не ити́ сквозе́ огнь,/ ни поклони́тися де́моном сла́вы ра́ди тле́нныя,/ да ве́чнаго живота́ прича́стницы бу́дем/ с пострада́вшими Христа́ ра́ди/ и с ни́ми наслади́мся ве́чных благ// от Христа́, Бо́га и Спа́са душ на́ших.

Сла́ва, глас 6:

А́ще и тьма́ми благ земны́х обещава́ешися/ да́ти ми и ца́рствие тле́нное,/ е́же и сам пома́ле и не хотя́ оста́виши,/ страда́льче, рекл еси́,/ ника́коже Христа́ отмета́юся,/ но Еди́наго Того́ Творца́ Небесе́ и земли́ испове́дую/ и несомне́нно ве́рую./ Его́же моли́, страда́льцев похвало́ Михаи́ле/ с до́блим Фео́дором боля́рином// спасти́ся душа́м любо́вию вас почита́ющих.

И ны́не, пра́здника, глас то́йже:

Днесь Дре́во яви́ся,/ днесь род евре́йский поги́бе,/ днесь ве́рными цари́ ве́ра явля́ется,/ и Ада́м дре́ва ра́ди испаде́,/ и па́ки Дре́вом де́мони вострепета́ша:// Всеси́льне Го́споди, сла́ва Тебе́.

Вход. Проки́мен дне. Чте́ния три.

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе, и соберу́тся кня́зи от них./ Кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели, и Аз Свиде́тель, глаго́лет Госпо́дь Бог,/ и о́трок, Его́же избра́х./ Да позна́ете, и ве́руете Ми, и разуме́ете, я́ко Аз есмь,/ пре́жде Мене́ не бысть ин бог и по Мне не бу́дет./ Аз есмь Бог, и несть ра́зве Мене́ спаса́яй./ Аз возвести́х и спасо́х; уничижи́х, и не бе в вас чу́ждий./ Вы Мне свиде́тели, и Аз Госпо́дь Бог,/ и еще́ от нача́ла Аз есмь, и несть от рук Мои́х избавля́яй./ Сотворю́, и кто отврати́т то?/ Си́це глаго́лет Госпо́дь Бог, избавля́яй вас, Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ Ибо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, веля́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ я́ко зла́то в горня́ле, искуся́ их и, я́ко всепло́дие же́ртвенное, прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющийся Нан разуме́ют и́стину, и ве́рнии в любви́ пребу́дут Ему́./ Яко благода́ть и ми́лость в преподо́бных Его́, и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гови быв, возлю́блен бысть, и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга. Уго́дна бо бе Го́сподеви душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ поло́жше в помышле́нии таково́е./ Яко благода́ть и ми́лость в преподо́бных Его́, и посеще́ние во избра́нных Его́.

На стихо́вне стихи́ры, глас 2.

Подо́бен: Ки́ими похва́льными:

Ки́ими му́дрыми словесы́/ ублажи́м Христо́ва страда́льца,/ непобеди́ма кре́постию, Михаи́ла, тве́рдаго душо́ю,/ страны́ на́шея украше́ние и всея́ земли́ просвеще́ние,/ и Фео́дора, сове́тника блага́го по благоче́стию?/ Имже досто́йную сла́ву дарова́ Христо́с, Бог наш,// име́яй ве́лию ми́лость.

Стих: Воззва́ша пра́веднии,// и Госпо́дь услы́ша их.

Ки́ими, смире́ннии, устна́ми/ восхва́лим целому́дренный великому́ченики,/ Михаи́ла с Фео́дором,/ оста́вльшия земна́я и после́довавшия Христу́?/ Ов у́бо муче́ния страда́нием,/ ов же кро́вию зе́млю освяща́ют/ и не престаю́т моля́ще Христа́// дарова́ти нам ве́лию ми́лость.

Стих: Мно́ги ско́рби пра́ведным,/ и от всех их изба́вит я Госпо́дь.

Ки́ими, земни́и, устна́ми/ возвели́чим многопе́таго Михаи́ла кре́пкаго/ и Фео́дора до́блественнаго,/ поло́жших ду́ши за́поведи ра́ди Боже́ственныя?/ Ов бо сме́рти подо́бяся Влады́чней,/ ов же ре́вностию разгара́яся,/ и́хже венча́ Христо́с, Бог наш,// име́яй ве́лию ми́лость.

Сла́ва, глас 8:

Добро́тою по́двиг свои́х украси́вшеся/ и от крове́й свои́х одея́ние нося́ще, святи́и,/ те́мже я́ко пресве́тлая свети́ла/ в ми́ре я́вльшеся Ду́ха благода́тию,/ просвеща́юще оте́чество ва́ше,/ благочести́выя и кня́жеския о́трасли,/ страстоте́рпче и испове́дниче Христо́в Михаи́ле,/ ку́пно с Фео́дором,/ пред лице́м Госпо́дним с му́ченики всегда́ предстоя́ще,/ моли́те спасти́ся душа́м на́шим,// любо́вию благоче́стно соверша́ющих па́мять ва́шу.

И ны́не, пра́здника, глас то́йже:

Глас проро́ка Твоего́ Моисе́я, Бо́же,/ испо́лнися, глаго́ляй:/ у́зрите Живо́т ваш, ви́сящь пред очесы́ ва́шими./ Днесь Крест воздвиза́ется,/ и мир от ле́сти свобожда́ется,/ днесь Христо́во Воскресе́ние обновля́ется,/ и концы́ земли́ ра́дуются,/ в кимва́лех дави́дски песнь Тебе́ принося́ще и глаго́люще:/ соде́лал еси́ спасе́ние посреде́ земли́, Бо́же,/ Крест и Воскресе́ние,/ и́хже ра́ди нас спасл еси́, Бла́же и Человеколю́бче,// Всеси́льне Го́споди, сла́ва Тебе́.

Тропа́рь, глас 4:

Жизнь ва́шу му́ченически соверши́вше,/ испове́дания венцы́ украси́вшеся, к Небе́сным востеко́сте,/ Михаи́ле прему́дре с до́блим Фео́дором,/ моли́те Христа́ Бо́га/ сохрани́ти оте́чество ва́ше,/ град же и лю́ди,// по вели́цей Его́ ми́лости.

Ин тропа́рь, глас 3:

Блаже́ннии апо́столом равноче́стнии,/ прия́ли есте́ вене́ц от Христа́,/ зане́же того́ досто́йни,/ Михаи́ле богому́дре и Фео́доре ди́вне,/ мир ми́рови испроси́те/ и душа́м на́шим ве́лию ми́лость.

Сла́ва, и ны́не, пра́здника.

На у́трени

Тропа́рь пра́здника, два́жды. Сла́ва, святы́х. И ны́не, пра́здника.

По 1-м стихосло́вии седа́лен пра́здника, глас 7:

Це́рковь вопие́т Ти, Христе́ Бо́же,/ в пе́вке и ке́дре и кипари́се, покланя́ющися Тебе́:/ побе́ды лю́дем Твои́м Богоро́дицею да́руяй, поми́луй нас.

Сла́ва, и ны́не, то́йже.

По 2-м стихосло́вии седа́лен, глас 4:

Крест Твой, Го́споди, я́ко свет сия́я,/ те́мная ополче́ния отгоня́ет/ и ве́рный просвеща́ет, пою́щия:/ Крест есть ми́ру похвала́.

Сла́ва, и ны́не, то́йже.

По полиеле́и седа́лен, глас 4:

И́же А́нгелов равноче́стны венцы́ от Христа́ прия́сте,/ за Него́же пострада́сте, Михаи́ле богому́дре и Фео́доре преди́вне,/ мир ми́ру испроси́те и душа́м на́шим ве́лию ми́лость.

Сла́ва, и ны́не, пра́здника.

На полиеле́и велича́ние му́ченическое.

И́но велича́ние:

Велича́ем тя,/ благове́рный кня́же Михаи́ле, и с боля́рином твои́м Фео́дором,/ и чтим святу́ю па́мять ва́шу,/ и́же за Христа́ кровь свою́ излия́сте/ и ны́не мо́лите за нас Христа́, Бо́га на́шего.

Степе́нна, 1-й антифо́н 4-го гла́са. Проки́мен, глас 4: Воззва́ша пра́ведниц,/ и Госпо́дь услы́ша их.

 Стих: Мно́ги ско́рби пра́ведным, и от всех их изба́вит я Госпо́дь.

 Ева́нгелие о́т Матфе́я, зача́ло 36.

По 50-м псалме́ стихи́ра, глас 8:

Власть земну́ю/ и ца́рство до́льнее оста́вив,/ потща́лся еси́ приити́ к Царю́ Вседержи́телю, Христу́ Бо́гу,/ всехва́льне Михаи́ле/ с Фео́дором му́дрым, пострада́вшим с тобо́ю,/ и поко́я доидо́сте Небе́снаго,/ и ны́не почива́ете у пра́отца Авраа́ма./ Тем о нас моли́теся ко Царю́, Влады́це на́шему,/ я́ко да ми́лостив бу́дет нам в день стра́шнаго Его́ Прише́ствия, ва́шу творя́щим пресве́тлую па́мять.

Кано́н пра́здника на 6.

И святы́х два кано́на на 8. Творе́ние не́гли иеромона́ха Святы́я Горы́ Пахо́мия, кроме́ Богоро́дичнов. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Твои́ми моли́твами, страстоте́рпче Михаи́ле,/ благода́ть мне и просвеще́ние с Небесе́ да́руй,/ я́ко да возмогу́ похвали́ти до́блести и страда́ния твоя́.

Боже́ственным жела́нием разжига́емь, Михаи́ле свя́те с Фео́дором боля́рином,/ па́ки к ва́шему Оте́честву возвраща́етеся,/ иде́же муче́ния венцы́ от десни́цы Вы́шняго прия́сте;/ изря́дно помина́йте вас почита́ющих.

Ца́рствия ве́чнующаго и ника́коже мимотеку́щаго воспомина́я наслажде́ние, свя́те,/ ца́рство земно́е преоби́дев, и вме́сто ски́птра крест взял еси́,/ и самозва́н к подвиго́м устреми́лся еси́,/ ку́пно со страда́вшим с тобо́ю Фео́дором боля́рином.

Богоро́дичен: Святы́х Святе́йшая была́ еси́, Де́во Чи́стая,/ святы́х Свята́го на руку́ Христа́ носи́вши,/ Боже́ственною си́лою тварь содержа́щаго.

Ин кано́н святы́х, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Посли́ мне, Го́споди, оставле́ние мно́гих мои́х согреше́ний/ и сло́во мне да́руй,/ да с ра́достию возмогу́ похвали́ти Тя,/ просла́вльшаго святы́я Твоя́ му́ченики.

Песнь возсле́м, благочести́вии,/ целому́дренным смы́слом/ Михаи́ла сла́внаго и Фео́дора благочести́ваго,/ ку́пно о́ба, сла́вяще.

Благоро́дства дар от Бо́га прие́м,/ благоче́стие душе́вное возлюби́в,/ па́че же и целому́дрие,/ и доброде́тельми удобря́яся, Михаи́ле.

Богоро́дичен: Прокля́ся смерть Тобо́ю/ и а́дово жа́ло притупи́ся, Ма́ти Чи́стая,/ Ты бо Безсме́ртнаго Влады́ку/ пло́тию ми́ру родила́ еси́.

Катава́сия пра́здника: Крест начерта́в:

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди, // и прибе́жище, и утвержде́ние.

Яря́ся, зверь нечести́вый уби́ти вас повелева́ет,/ сего́ скве́рным повеле́нием повину́тися не хотя́щих,/ и тва́ри па́че Творца́ не послужи́сте, но Христу́ вопия́сте: свят еси́, Го́споди.

Любо́вию твоего́ Влады́ки снеда́емь быв, Михаи́ле, ку́пно с Фео́дором боля́рином,/ ничто́же земна́го вмени́сте и Того́ жела́нием муче́ния ча́шу испи́сте усе́рдно,/ Христу́ вопию́ще: свят еси́, Го́споди.

Самозва́н от да́льних стран оте́чество твое́ прише́д посети́ти/ и злоимени́таго царя́ богобо́рную пре́лесть обличи́ти,/ от него́же пострада́в, же́ртва Бо́гу прине́слся еси́.

Богоро́дичен: Возста́вила еси́, Чи́стая,/ па́ки па́дший мой о́браз,/ ро́ждшая Виновнаго па́че есте́ственнаго Воскресе́ния.

Ин

Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой.

Всю мысль ва́шу ко Христу́, му́дрии, возложи́сте/ и, я́ко бра́тнею совоку́пльшеся любо́вию,/ благоче́стно сконча́ете тече́ние.

Многоле́тни у́бо те́лом, душа́ми же соверше́ни, святи́и,/ я́ко благочести́вии о́ба,/ Бо́га возлюби́ли есте́ и и́долом не поклони́стеся.

Сла́ву возненави́десте мимотеку́щую и тле́нную/ и доброде́тельни яви́стеся сосу́ди, сла́внии, в житии́ ва́шем.

Богоро́дичен: Тя вси и́мамы прибе́жище и сте́ну на́шу, христиа́не,/ и Тя сла́вим немо́лчно, Ма́ти Безневе́стная.

Конда́к и и́кос пра́здника.

Та́же седа́лен святы́х, глас 1.

Подо́бен: Ка́мени запеча́тану:

Ка́мение тве́рдо яви́стеся/ и непребори́ми бы́сте мучи́телей преще́нием,/ Михаи́ле сла́вне и Фео́доре прему́дре./ Сего́ ра́ди русстии собо́ри вопию́т ра́достно:/ сла́ва Укре́пльшему вы,/ сла́ва Венча́вшему вы,/ сла́ва Просве́щшему ва́ми весь мир.

Сла́ва, и ны́не, пра́здника, глас 8.

Подо́бен: Поведе́нное та́йно:

Прообража́ше та́инственно дре́вле Иису́с Нави́н Креста́ о́браз,/ егда́ ру́це простре́ крестови́дно, Спа́се мой,/ и ста со́лнце, до́ндеже враги́ низложи́, противостоя́щая Тебе́, Бо́гу;/ ны́не бо за́йде, на Кресте́ Тя зря,/ и, держа́ву сме́ртную разруши́в,/ весь мир совоздви́гл еси́.

Ин

В раи́ мя пре́жде дре́во обнажи́ вкуше́нием, врага́ внес ме́ртвость,/ Дре́во же кре́стное, животу́ одея́ние челове́ком нося́,/ водрузи́ся на земли́, и мир весь испо́лнися вся́кия ра́дости./ Его́же зря́ще возноси́ма,/ Бо́гу ве́рою, лю́дие, согла́сно зове́м:/ испо́лнь сла́вы храм Твой.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Богоме́рзкаго и злочести́ваго царя́ непра́ведна/ и лука́внейша па́че всея́ земли́ безбо́жную ве́ру укори́сте,/ и, лю́таго де́мона обличи́вше пре́лесть,/ я́ко а́гнцы, за Христа́ закла́ни бы́сте,/ и, я́ко со́лнце, по кончи́не просия́ли есте́.

Усты́ све́тлыми вити́йствуя,/ испове́дал еси́ благоче́стно Еди́наго Бо́га, Михаи́ле, с пострада́вшим с тобо́ю Фео́дором;/ и сего́ ра́ди злочести́вый царь, не терпя́,/ повелева́ет уби́ти вас, на са́мей кончи́не Христа́ испове́дающия.

О я́рости царя́ злочести́ваго и непра́веднаго убие́ния!/ О терпе́ния непобеди́мых страда́лец!/ Иже по ве́ре до́бре подви́гшеся, Христу́ вопия́ху:/ сла́ва си́ле Твое́й, Го́споди.

Богоро́дичен: Неискусобра́чно родила́ еси́, о Де́во,/ и по Рождестве́ яви́лася еси́ де́вствующи па́ки./ Тем немо́лчными гла́сы: ра́дуйся, Тебе́, Влады́чице,/ ве́рою несомне́нною вопие́м.

Ин

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

В немра́чнем зерца́ле,/ Боже́ственных умо́в си́лою Бо́жиею укрепи́вшеся,/ я́ко со́лнце просвети́стеся, Михаи́ле с Фео́дором.

Мра́чным не принесо́сте же́ртвы де́моном, му́ченицы непобеди́мии,/ Светода́вца же Бо́га возлюби́сте,/ по благоче́стии изво́ливше смерть.

Исцели́те, прехва́льнии, души́ моея́ боле́зни,/ Христу́ Бо́гу моля́щеся,/ и утиши́те моли́твами ва́шими души́ моея́ мяте́ж.

Богоро́дичен: Бо́гу, Его́же родила́ еси́, Пречи́стая Мари́е,/ Тому́ помоли́ся,/ е́же рабо́м Твои́м пода́ти прегреше́ний оставле́ние.

Песнь 5

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Дивлю́ся, о царю́, твоему́ безу́мию и су́етному глаго́лу,/ испове́дниче Михаи́ле, рекл еси́, и с благоро́дным Фео́дором:/ тва́ри па́че Творца́ ника́коже да бу́дет нам покланя́тися,/ она́ бо челове́ка ра́ди сотворе́на есть.

Злочести́вый он законопресту́пный До́ман, и́же пе́рвее ве́ры христиа́нския отве́ргся,/ не терпя́ твоего́ испове́дания, зле огорчи́ся,/ ноже́м отре́зует главу́ твою́ честну́ю,/ испове́дниче Христо́в Михаи́ле.

Аще честна́я свята́я телеса́ ва́ша и небрего́ма пребы́ша/ от кровоя́дец о́нех, пове́ржена псом на снеде́ние,/ но Бог соблюда́ше о́ная/ и столпо́м о́гненным осиява́ше, пресве́тлыми заря́ми.

Богоро́дичен: Бог в Тя, Богома́ти, всели́ся,/ челове́ка назида́я,/ во тлю па́дшаго пре́лестию зми́я.

Ин

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Теба́ ино́го не ве́мы.

Па́че живота́ за Христа́ пострада́ти изво́листе,/ му́чениче Михаи́ле с блаже́нным Фео́дором,/ и с Ним ца́рствуете присно.

Помышля́ше мучи́тель увеща́ти вас,/ прельсти́ти хотя́ тле́нною сла́вою,/ но, Бо́жиею си́лою укрепи́вшеся, посрами́сте его́.

Да́руйте просвеще́ние и мир, прехва́льнии, ми́ру/ и разреши́те моли́твами ва́шими грехопаде́ния на́ша.

Богоро́дичен: Де́ву по Рождестве́ пое́м Тя, Богоро́дице,/ Ты бо Бо́жие Сло́во пло́тию ми́ру родила́ еси́.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.

Недово́лен злочести́вый быв мучи́тель о убие́нии благочести́ваго Михаи́ла,/ покуша́шеся и страда́льца Фео́дора ле́стию увеща́ти:/ а́ще бо, рече́, бого́м мои́м покло́нишися, со мно́ю во сла́ве бу́деши/ и име́нию господи́на твоего́ насле́дник бу́деши.

Мне да не бу́дет, о царю́ пребеззако́нне,/ Христа́ отврещи́ся и ло́жным твои́м бого́м поклони́тися,/ мне бо е́же жи́ти Христо́с/ и е́же умре́ти за Него́ приобре́тение.

От ю́ности житие́ твое́ чи́сто яви́ся/ Пресвято́го Ду́ха дарова́нием, Фео́доре,/ посреде́ бо злочести́вых мучи́телей твоему́ господи́ну побо́рник был еси́/ и с ним на Небеса́х при́сно весели́шися.

Богоро́дичен: Излия́ пе́рвее яд во у́ши Е́вины змий вселука́вый,/ Ты же сего́ еди́на оттрясла́ еси́, Богома́ти,/ Истреби́теля сему́ ро́ждши.

Ин

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,// Бо́же спасе́ния моего́.

Тьма нареко́шася сы́нове Ага́рины,/ моле́ния к Бо́гу вам принося́щим,/ ноже́м главы́ ва́ша отре́заша,/ хода́таи венце́м ва́шим, Михаи́ле, Боже́ственным бы́вше.

Победи́ли есте́ мучи́телеву горды́ню, преблаже́ннии:/ того́ ра́ди псом на снедь/ помета́ема бы́ша телеса́ ва́ша,/ но сохране́на бы́ша Бо́жиею благода́тию невре́дна.

Единогла́сно, соше́дшеся, воспои́м/ па́мять благочести́ваго кня́зя, в Руси возсия́вшаго:/ ра́дуйся, глаго́люще, обра́дованный от Го́спода,/ Его́же непреста́нно моли́ от тли изба́вити жизнь на́шу.

Богоро́дичен: Уясня́ют проро́честии гла́си Бо́жию Роди́тельницу,/ пое́м же Тя и мы и мо́лим,/ ви́дяще сбытие́ честны́х прорица́ний,/ Бо́га бо и́стинно и чистоты́ вмести́лище была́ еси́.

Конда́к, глас 8.

Подо́бен: Взбра́нной Воево́де:

Ца́рство земно́е в ничто́же вмени́в,/ сла́ву, я́ко преходя́щую, оста́вил еси́,/ самозва́н прише́д к подвиго́м,/ Тро́ицу пропове́дал еси́ пред нечести́вым мучи́телем,/ страстоте́рпче Михаи́ле с до́блим Фео́дором,/ Царю́ Сил предстоя́ще,/ моли́те без вре́да сохрани́ти Оте́чество ва́ше, град же и лю́ди,// да вас непреста́нно почита́ем.

И́кос:

Кто по́двиги ва́ша и боле́зни возмо́жет извеща́ти, страстоте́рпцы,/ я́же му́жески претерпе́сте за ве́ру Госпо́дню?/ и́ дарова́ний, и́хже сподо́бистеся, не довле́ют уста́ челове́ческая испове́дати./ Прему́дростию бо укра́шени и му́жеством,/ бога́тство и сла́ву привре́менную возненави́десте,/ Михаи́ле сла́вный, и с пострада́вшим с тобо́ю ди́вным Фео́дором,/ с ним не разлучи́стеся на земли́ и на Небеси́./ Тем моли́те без вре́да сохрани́ти Оте́чество ва́ше, град же и лю́ди,/ да вас непреста́нно почита́ем.

Ин конда́к, глас 2.

Подо́бен: Тве́рдыя:

Ве́рою укре́пльшеся, святи́и, муче́ния претерпе́сте/ и кровьми́ свои́ми погаси́сте пла́мень сопроти́вных безбо́жия,/ Христа́ же испове́дасте, с Отцо́м и Ду́хом,// Михаи́ле и Фео́доре, Его́ моли́те за всех нас.

Ин конда́к, глас 2:

Вы́шних и́щуще, ни́жняя оста́вили есте́,/ колесни́цу на Небеса́ кровь свою́ сотвори́ли есте́,/ тем собесе́дницы первому́чеником бы́сте,/ Михаи́ле и Фео́доре,// с ни́миже Христа́ Бо́га моля́ще непреста́нно за вся ны.

Ин конда́к, глас 3:

Я́ко свети́ла, в Руси́ возсия́вше,/ муче́ния луча́ми сла́вными отрази́сте,/ страстоте́рпцы сла́внии, Михаи́ле и Фео́доре,/ тем вопия́сте:// ничто́же нас отлучи́т от любве́ Христо́вы.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.

Ни любви́ сопру́жницы, ни чад разлуче́нию внима́л еси́,/ но сия́ вся в ру́ки преда́в Бо́жия,/ я́ко Творца́ и Промы́сленника всех, вопия́л еси́:/ благослове́н Бог отце́в на́ших.

Поревнова́в му́жеству пре́жде бы́вших му́чеников,/ тех блаже́нство и сла́ву получи́л еси́,/ достохва́льне Михаи́ле, ку́пно с Фео́дором, вопию́ще:/ благослове́н Бог отце́в на́ших.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице.

Ин

Ирмо́с: От Иуде́и доше́дше, о́троцы/ в Вавило́не иногда́/ ве́рою тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Прииди́те, рустии собо́ри,/ богоизбра́нное ста́до днесь воспои́м пе́сньми,/ похваля́юще му́ченики Христо́вы, Михаи́ла с Фео́дором, благоче́стно пою́ще:/ отце́в на́ших Бо́же, благослове́н еси́.

Оста́вил еси́ земно́е ца́рство и любве́ жены́ отврати́лся еси́/ и дете́й ласка́ния, му́чениче Михаи́ле,/ взира́я на высоту́ к Творцу́ твоему́, вопия́л еси́:/ отце́в на́ших Бо́же, благослове́н еси́.

Во́инством духо́вным препоя́савшеся, Михаи́ле всече́стне и Фео́доре прехва́льне,/ земно́е бога́тство оста́вльше,/ на Небесе́х побе́дныя венцы́ от Христа́ прия́сте, зову́ще: / отце́в на́ших Бо́же, благослове́н еси́.

Богоро́дичен: Черто́г Тя, Пречи́стая, Сло́ва воплоще́ния/ и престо́л и ло́жницу правому́дрствующе имену́ем/ и веселя́щеся пои́м:/ отце́в и нас Бо́же, благослове́н еси́.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:// благослови́те, вся дела́ Госпо́дня, Го́спода.

Взира́л еси́ на воздая́ния, су́щая на Небесе́х, всече́стне,/ я́же лю́бящим Христо́с предугото́ва/ и вопию́щим Ему́ от души́:/ благослови́те, вся дела́ Госпо́дня, Го́спода.

Боже́ственная му́ченик страда́ния вои́стину превзыдо́ша похвале́ния,/ па́че сло́ва и помышле́ния,/ я́ко тле́нным те́лом безпло́тныя враги́ победи́ша, вопию́ще:/ благослови́те, вся дела́ Госпо́дня, Го́спода.

Непоколеби́мь в по́двизех пребы́л еси́,/ па́че же нечести́вых сердца́ поколеба́л еси́, ви́девших тя непрело́нна,/ свя́те Михаи́ле, ку́пно с Фео́дором вопию́ща:/ благослови́те, вся дела́ Госпо́дня, Го́спода.

Богоро́дичен: Та́инство стра́нно, и́стинно, под со́лнцем еди́на показа́ла еси́,/ Бо́га бо родила́ еси́, Чи́стая,/ Неви́димаго и Безнача́льнаго, Невмести́маго, всем Непостижи́маго, Ему́же вопие́м:/ благослови́те, вся дела́ Госпо́дня, Го́спода.

Ин

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Не насы́тишася кро́ве ва́шея пога́нии,/ но и главы́ ва́ша ноже́м отре́заша,/ не устыде́вшеся, Михаи́ле, благоро́дия́ и воспита́нных во благоче́стии,/ но благода́ть Бо́жия храня́ше вас чрез А́нгела./ Тем с Фео́дором лику́еши, вопия́:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Прославля́я святы́я Своя́ му́ченики, Госпо́дь/ столп о́гнен яви́ над телесы́ их, я́ве сия́ющь но́щию./ Того́ ви́девшии к друг дру́гу глаго́лаху: что сие́ пресла́вное виде́ние?/ И пропове́даша всем Христа́, сохра́ньшаго Своя́ уго́дники, вопию́ще:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Прославля́ем Тя, о́тче и Сы́не и Святы́й Ду́ше, со А́нгелы зову́ще трисвяты́ми гла́сы, Трисо́лнечное Божество́:/ приими́ за ны моля́щую Тя святу́ю дво́ицу, Михаи́ла с Фео́дором,/ пою́щую Тебе́ непреста́нно:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Богоро́дичен: Све́та сосу́д яви́вшися, Чи́стая, просвети́ мя/ и в повеле́нии Све́та ходи́ти ми поспеши́, Чи́стая,/ от чре́ва Твоего́ возсия́вша, просвети́вша ве́рных сердца́, пою́щих:/ де́ти, благослови́те, свяще́нницы, воспо́йте,/ лю́дие, превозноси́те Его́ во ве́ки.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вши разстоя́щаяся естества́.// Тем веселя́щеся, Тя, Богоро́дице, велича́ем.

Прииди́те, чи́стым се́рдцем и тре́звою со́вестию/ великому́ченика Михаи́ла с сове́тником кре́пким Фео́дором/ па́че зла́та светя́щася зря́ще, велича́ем.

Све́тлая ва́ша, пребога́тии, побе́дная храбо́рствия на враги́/ ви́дев Всеви́дящее о́ко, по́двиги ва́ша/ венцы́ одоле́ния венча́ет Спас душ на́ших.

Во́инства А́нгелов удиви́шася,/ му́чеников же ли́цы и пра́ведных собо́ри согла́сно похвали́ша Христа́,/ таково́е терпе́ние вам дарова́вшаго.

Непобеди́мая честна́я му́ченик дво́ица, на Небесе́х живу́щи,/ певцы́ своя́ помина́й, соверша́ющих во хвале́нии свяще́нная ва́ша страда́ния,/ вас непреста́нно велича́ющих.

Богоро́дичен: Земля́ изба́вися от кля́твы дре́вний Рождество́м Твои́м./ Те́мже Тя, Богороди́тельнице, велича́ем.

Ин

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бы́сть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.

Положе́ни бы́сте на земли́, я́ко ме́ртвии, но в Небе́сная пресели́стеся./ Тем дерзнове́ния испо́лнистеся, сла́внии,/ врагу́ пога́ному восхоте́вшу поруга́тися телесе́м ва́шим,/ но стра́хом Госпо́дним отгна́сте, блаже́ннии.

Торжество́ у́бо Михаи́ла па́че со́лнца просвети́ся во всех страна́х,/ и Фео́дора предо́бляго,/ Церкве́й украше́ние страда́ния ва́ша, му́чеников сла́ва,/ и архиере́ев похвала́, и христиа́н утвержде́ние.

Шу́яго мя стоя́ния изба́ви на Суде́, о Тро́ице Свята́я,/ и облегчи́ ми страсте́й волне́ния,/ и к приста́нищу непотопле́на приведи́ мя, моли́твами святы́х му́ченик,/ да Тя непреста́нно велича́ем.

Богоро́дичен: О, чудесе́, пребо́льша ума́! / Чу́до ве́лие и́стинно и пресла́вно,/ ка́ко вмести́ся во утро́бу Твою́ Бог, ника́коже вмести́мый?/ Его́же о хва́лящих Тя умоли́, Де́во,/ от бед избавля́ющи и от беззако́нных враг всегда́.

Свети́лен:

Да просла́вим вси Бо́га,/ просла́вльшаго святы́я Своя́ великому́ченики,/ Михаи́ла ку́пно с Фео́дором,/ ти́и бо пострада́ша за Христа́, и венцы́ от Него́ прия́ша,/ и ны́не, в вы́шних предстоя́ще, о ми́ре мо́лятся.

Сла́ва, и ны́не, пра́здника.

На хвали́тех стихи́ры на 4, глас 4.

Подо́бен: Дал еси́ зна́мение:

Дал еси́ зна́мение/ Це́ркви Твое́й, Христе́, великому́ченик,/ Михаи́ла ку́пно и до́бляго Фео́дора,/ Тя возлюби́вших,/ все́ми Владу́щаго,/ чи́стым се́рдцем и душо́ю соверше́нною,/ обои́х побо́рников ве́ры/ и исто́чник чуде́с,/ сокруши́вших де́монская ополче́ния.

От ко́рене изра́сл еси́ честна́го,/ Михайле благоро́дне,/ и́стину возлюби́в,/ и нетле́нный Христо́в изво́лил еси́ живо́т/ и Ца́рство неруши́мо,/ с Фео́дором ди́вным зако́нно пострада́вше,/ и венцы́ от Него́ побе́ды прия́сте,/ му́ченицы святи́и/ и моли́твенницы о душа́х на́ших.

За́поведи учи́теля ва́шего соблю́дше,/ не повеле́вшаго вам де́моном поклони́тися,/ Христо́в испо́лнисте зако́н/ и Того́ повеле́ния:/ земну́ю сла́ву в ничто́же вмени́сте,/ небре́гше повеле́ния царе́ва,/ тва́ри повелева́ющаго поклони́тися./ Михаи́ле, похвало́ русская, с Фео́дором сла́вным,/ моли́теся о душа́х на́ших.

Сла́ва, глас 8:

Да весели́тся ра́достию все челове́чество днесь,/ и да лику́ют новоизбра́ннии лю́дие,/ похваля́юще страстоте́рпца вели́каго кня́зя Михаи́ла,/ ку́пно с боля́рином его́, до́блим Фео́дором,/ к ни́м си́це глаго́люще:/ ра́дуйтеся, я́ко Христа́ испове́дасте,/ диа́вола же обличи́сте;/ ра́дуйтеся, я́ко мучи́теля безбо́жнаго посрами́сте;/ ра́дуйтеся, я́ко вку́пе пострада́сте/ и вку́пе Тро́ице предстоите́,// моля́щеся всегда́ спасти́ся душа́м на́шим.

И ны́не, пра́здника. Глас проро́ка Твоего́: пи́сан на стихо́вне ве́чера.

Славосло́вие вели́кое, и отпу́ст.

На литурги́и

Блаже́нны пра́здника, песнь 8-я, и святы́х, песнь 3-я. Проки́мен, глас 4: Святы́м, и́же суть на земли́ Его́,// удиви́ Госпо́дь вся хоте́ния Своя́ в них. Стих: Предзре́х Го́спода предо мно́ю вы́ну, я́ко одесну́ю мене́ есть, да не подви́жуся. Апо́стол ко Ефесе́ем, зача́ло 233. Аллилу́йя: Воззва́ша пра́веднии, и Госпо́дь услы́ша их. Ева́нгелие от Иоа́нна, зача́ло 52. Прича́стен: Ра́дуйтеся, пра́веднии, о Го́споде:

Святаго благове́рнаго кня́зя Оле́га Бря́нскаго, во и́ноцех Лео́нтия