На ма́лей вече́рни
На Го́споди, воззва́х: стихи́ры, глас 1:
Воспои́м, бра́тие, светлопра́зднственную песнь,/ новоявле́ннаго уго́дника Бо́жия ублажа́юще/ и к тому́ вознося́ще моли́тву,/ во е́же очи́стити серде́ц на́ших очеса́/ и па́мятию чуде́с его́ просвети́ти ду́ши на́ша.
Иоаса́фе, уго́дниче Христо́в,/ всех доброде́телей подви́жник был еси́,/ на земли́ у́бо ско́рби поне́с,/ на Небеси́ же ра́дость ве́чную от Бо́га прие́м,/ услы́ши моле́ние чад твои́х/ и моли́ спасти́ и просвети́ти ду́ши на́ша.
Ни́щия и ско́рбныя возлюби́вый/ и о гре́шных лю́дех моли́тву всегда́ возноси́вый,/ сам от Христа́ возлю́блен был еси́,/ Иоаса́фе святи́телю:/ помина́й нас, по́двиги твоя́ почита́ющих,/ и моли́тву сотвори́ ко Го́споду/ спасти́ и просвети́ти ду́ши на́ша.
Кто исчи́слит мно́жество исцеле́ний,/ от чудотво́рных моще́й твои́х источа́емых, уго́дниче Христо́в?/
Кто не подиви́тся вели́кому твоему́ заступле́нию?/ Ко́е ли се́рдце челове́ческое любо́вию твое́ю не умили́тся?/ Ди́вно просла́вися в тебе́ Госпо́дь,// просвеща́яй и спаса́яй ду́ши на́ша.
Сла́ва, глас 6:
О́трочеству твоему́ наче́ншуся, преподо́бне,/ под кров Влады́чицы прия́т был еси́,/ я́коже роди́тель твой виде́нием в том уве́рися;/ сконча́вшуся же земно́му житию́ твоему́,/ ино́е виде́ние лю́ди уверя́ет,/ я́ко дух твой просла́влен есть от Бо́га./ Тому́ и о нас моли́ся, святи́телю Христо́в,// поми́ловатися душа́м на́шим.
И ны́не, Богоро́дичен, глас то́йже:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся: моли́ся, Влады́чице,/ со святы́ми апо́столы,// поми́ловати ду́ши на́ша.
На стихо́вне стихи́ры, глас 2.
Подо́бен: До́ме Евфра́фов:
Иоаса́фе, святи́телю Бо́жий,/ моли́твы непреста́нныя кади́ло/ и предста́телю о лю́дех тепле́йший,/ и нас, пою́щих тя, не отри́ни,// но помо́щник бу́ди нам при́сный.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Воспои́м, бра́тие,/ уго́дника Христо́ва Иоаса́фа,/ того́ подвиза́юще на моли́тву/ от бед изба́витися нам// и дарова́тися нам пре́жде конца́ покая́нию.
Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.
Не довле́ют тебе́, святи́телю Христо́в,/ челове́ческая благохвале́ния,/ зане́ от Пречи́стыя Богоро́дицы/ во млады́х ле́тех твои́х.// я́ко избра́нник Бо́жий свиде́тельствован был еси́.
Сла́ва, глас 6:
Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду трудо́в твои́х,/ де́монская разори́л еси́ по́лчища/ и дости́гл еси́ чино́в а́нгельских,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,// мир испроси́ душа́м на́шим.
И ны́не, Богоро́дичен, глас то́йже:
Вели́ких дарова́ний, Чи́стая Де́во Богома́ти, Ты сподо́билася еси́:/ я́ко родила́ еси́ пло́тию Еди́наго от Тро́ицы Христа́ Жизнода́вца,/ во спасе́ние душ на́ших.
Тропа́рь пи́сан на вели́цей вече́рни.
На вели́цей вече́рни
Блаже́н муж: 1-й антифо́н.
На Го́споди, воззва́х: стихи́ры на 8, глас 8:
Ди́вен Бог во святы́х Свои́х,/ в ро́дех христиа́нских чудоде́йствуяй/ и но́выя избра́нники Своя́ явля́яй:/ зрим бо и ны́не Иоаса́фа уго́дника/ от Христа́ прославля́ема,/ и красото́ю доброде́телей свои́х страну́ на́шу озаря́юща,/ и дерзнове́ние ве́лие иму́ща/ мир вселе́нней дарова́ти// и душа́м на́шим ве́лию ми́лость.
Лик святы́х Твои́х, Го́споди, на Небеса́х умно́жися/ преставле́нием святи́теля Твоего́ Иоаса́фа,/ его́же и на земли́ Це́рковь воспева́ет:/ того́ у́бо моли́твы о нас приими́, Человеколюбче,// я́ко име́яй ве́лию ми́лость.
Нощне́й тьме огустева́ющей,/ умножа́ется зве́здный блеск/ и к тому́ о́чи заблу́ждших ра́достно возво́дятся;/ та́ко и умно́жившейся на земли́ грехо́вней тьме,/ возведе́м горе́ о́чи на́ши, бра́тие,/ и, сия́ние доброде́телей святи́теля узре́вше,/ к Небе́сному Оте́честву потщи́мся,/ его́же да не лиши́т Госпо́дь нас, гре́шных,// име́яй ве́лию ми́лость.
Глас 5:
Подо́бен: Ра́дуйся:
Ра́дуйся, свяще́нная главе́,/ святи́телю Бо́жий Иоаса́фе,/ па́стырей богому́дрое пра́вило/ и и́ноков наста́вниче предо́брый;/ ра́дуйся, боля́щих цели́телю пресла́вный/ и скорбя́щих уте́шителю ми́лостивый./ Моли́ся при́сно ко Го́споду/ и нам подража́телем тебе́ бы́ти/ и, грехо́вная вся презре́вшим,// Еди́ному Бо́гу рабо́тати.
Ра́дуйся, страсте́й сопротивобо́рче/ и духовнаго де́лания тру́дниче;/ ра́дуйся, пра́ведниче, смиренному́дрия испо́лненный,/ го́рдых ми́ра сего́ обличи́телю/ и лени́вых гро́зный кара́телю./ Не преста́й моля́ся ко Го́споду о нас,// во е́же спасти́ся нам.
Ра́дуйся, Небе́сный жи́телю,/ на зе́млю ми́лостивным о́ком призира́яй/ и моли́твы певцо́в твои́х прие́мляй;/ ра́дуйся, очеса́ твоя́ всегда́ на Не́бо возводи́вый/ и о земны́х стяжа́ниих небреги́й./ Научй у́бо и нас, святи́телю Христо́в,/ на Небесе́х сокро́вище стяжа́ти// и твою́ та́мо сла́ву я́ве узре́ти.
Сла́ва, глас 2:
Ки́ими похва́льными венцы́/ увенча́ем святи́теля Христо́ва,/ Госпо́дню сла́ву непреста́нно возвеща́вшаго/ и благоче́стие пра́вое повсю́ду насади́вшаго,/ за́поведей Христо́вых живу́ю скрижа́ль,/ на ли́ца челове́ков не взира́вшаго,/ но ду́ши всех ко спасе́нию приводи́вшаго;/ сего́ бо венцы́ нетле́нными венча́ет Христо́с Бог наш,// име́яй ве́лию ми́лость.
И ны́не, Богоро́дичен, глас то́йже: Пре́йде сень зако́нная:
Вход. Проки́мен дне и чте́ния три святи́тельская.
При́тчей чте́ние: Па́мять пра́веднаго с похвала́ми:
Прему́дрости Соломо́новы чте́ние: Уста́ пра́веднаго ка́плют прему́дрость: Прему́дрости Соломо́новы чте́ние: Похваля́ему пра́веднику, возвеселя́тся лю́дие: (зри страни́цы 205–208).
На лити́и стихи́ра хра́ма. И свята́го, глас 1:
Подоба́ше непоро́чно соблюде́нному святи́теля де́вственному те́лу/ и нетле́нием ве́чным просла́витися:/ сие́ бо, доброде́тельми преподо́бнаго очища́емо,/ еще́ жи́ву ему́ су́щу,/ храм Свята́го Ду́ха быва́ет/ и по преставле́нии его́ исто́чите чуде́сных дарова́ний явля́ется,/ и́мже со умиле́нием дивя́щеся,/ ко уго́днику вознесе́м моли́тву// о спасе́нии душ на́ших.
Сла́ва, глас 6:
Ди́вный во святы́х Госпо́дь/ в житии́ святи́теля Иоаса́фа просла́вися,/ и по преставле́нии его́ нетле́нными мощми́ чудоде́йствует,/ и безчи́сленныя лю́ди/ ве́ровати и упова́ти на по́мощь Небе́сную науча́ет./ Потщи́мся у́бо, о бра́тие,/ е́же еди́но на потре́бу иска́ти,/ и ду́ши на́ша покая́нием очища́ти,/ святи́теля в по́мощь призыва́юще,// и в Тро́ице воспева́емаго Бо́га прославля́ти во ве́ки.
И ны́не, Богоро́дичен, глас то́йже: Творе́ц и Изба́витель:
На стихо́вне стихи́ры, глас 7:
Украси́теся, черто́зи Небе́снии,/ отве́рзитеся, две́ри до́му Бо́жия:/ се бо от земли́ вознесе́ся пра́ведная душа́ святи́теля/ и со А́нгелы водворя́ется,/ и́мже житие́м свои́м поревнова́./ Того́ моли́твами, Христе́ Бо́же,// пощади́ и спаси́ ду́ши на́ша.
Стих: Честна́ пред Го́сподем/ смерть преподо́бных Его́.
Пра́ведных ду́ши в руце́ Бо́жией,/ и не ко́снется их му́ка,/ но и ме́ртвенное те́ло пра́веднаго Иоаса́фа/ тле́нию неприча́стно пребыва́ет/ и растле́нным грехми́ душа́м исто́чник благода́ти явля́ется,/ еще́ же и боля́щим здра́вие да́рует,/ егда́ моли́тв уго́дника Бо́жия воспро́сят/ и к нему́ с ве́рою притека́ют.
Стих: Что возда́м Го́сподеви о всех,/ я́же воздаде́ ми?
Поревну́им о благоче́стии, бра́тие,/ зрим бо сие́ ве́чною сла́вою венча́емо:/ возненави́дим горды́ню и сребролю́бие,/ я́ко, та́я отри́нув, святи́тель Христо́в/ на Небеси́ и на земли́ ве́чную сла́ву прия́т/ и сокро́вище обре́те неиждива́емое;/ те́мже и о гре́шных лю́дех моли́тися дерзнове́ние/ и исцеле́ний благода́ть от Бо́га стяжа́,/ да и беззаконныя путе́м Бо́жиим научи́т,/ и нечести́выя ко Го́споду обрати́т.
Сла́ва, и ны́не, Богоро́дичен, глас то́йже: Под кров Твой, Влады́чице:
Тропа́рь, глас 3:
Святи́телю, Христу́ Бо́гу возлю́бленне,/ пра́вило ве́ры и о́браз милосе́рдия лю́дем был еси́,/ бде́нием же, посто́м и моли́твою,/ я́ко свети́льник пресве́тлый, просия́л еси́/ и просла́влен от Бо́га яви́лся еси́:/ те́лом у́бо в нетле́нии почива́я,/ ду́хом же Престо́лу Бо́жию предстоя́,/ чудеса́ пресла́вная источа́вши./ Моли́ Христа́ Бо́га,/ да утверди́т нас в Правосла́вии и благоче́стии/ и спасе́т ду́ши на́ша.
Ин тропа́рь, глас 2:
Моли́твенниче изде́тска преизря́дный,/ богоизбра́нный святи́телю Христо́в Иоаса́фе,/ пра́вило ве́ры и о́браз милосе́рдия благоче́стным житие́м всем явля́вши/ и с ве́рою к тебе́ притека́ющим оби́льно исцеле́ния источа́вши./ Моли́ Христа́ Бо́га,/ да утверди́т правове́рие, мир и благоче́стие/ и спасе́т ду́ши на́ша.
Сла́ва, и ны́не, Богоро́дичен.
На у́трени
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
Да возвели́чится Иоаса́ф, святи́тель Христо́в,/ да насле́дит угото́ванное ему́ ве́чное Ца́рство:/ той бо Христу́ ве́рно служа́ше, о ме́ньшей бра́тии Его́ при́сно пеки́йся,/ и ка́ющияся в любо́вь свою́ приима́ше,/ и ны́не мо́лится о душа́х на́ших.
Сла́ва, и ны́не, Богоро́дичен:
Те́плое заступле́ние су́щим в беда́х, и Помо́щницу на́шу,/ и к Бо́гу примире́ние, Е́юже от тли изба́вихомся,/ Богоро́дицу, ве́рнии, ублажа́ем.
По 2-м стихосло́вии седа́лен, глас 8:
В житии́ твое́м, уто́дниче Христо́в, посто́м и труды́ те́ло твое́ изнури́л еси́,/ сего́ ра́ди по сме́рти твое́й нетле́нием процвете́ и исто́чник исцеле́ний ве́рным быва́ет./ Моли́ приле́жно Христа́ Бо́га спасти́ся душа́м на́шим.
Сла́ва, и ны́не, Богоро́дичен:
Я́ко всенепоро́чная Неве́ста Творца́,/ я́ко неискусому́жная Ма́ти Изба́вителя,/ я́ко вмести́лище Вы́шняго су́щи, Всепе́тая,/ беззако́ний мя су́ща скве́рное жили́ще и в ра́зуме бы́вша бесо́м игра́лище/ потщи́ся от сих злоде́йствия мя изба́вити, све́тлое жили́ще доброде́телию соде́лавши;/ Светоприе́мнице нетле́нная, отжени́ о́блак страсте́й/ и сподо́би го́рния све́тлости и неле́стнаго осия́ния Све́та Невече́рняго Твоего́.
По полиеле́и седа́лен, глас 2:
Прииди́те, вси ве́рнии, почита́юще па́мять святи́теля Иоаса́фа,/ излие́м сердца́ на́ша в моли́тве,/ да пребу́дет с на́ми ду́хом свои́м, и на блага́я дея́ния да наста́вит нас,/ и да научи́т искуше́ния пло́ти побежда́ти и Еди́ному Бо́гу угожда́ти.
Сла́ва, и ны́не, Богоро́дичен:
Боже́ственнаго Естества́ не отлу́чься, Плоть бысть во чре́ве Твое́м,/ но Бог и вочелове́чься пребы́сть,/ Иже по рождестве́ Ма́терь Тя Де́ву, я́коже пре́жде рождества́, сохрани́ всенепоро́чну, Еди́н Госпо́дь./ Того́ приле́жно моли́ дарова́ти нам ве́лию ми́лость.
Степе́нна, 1-й антифо́н 4-го гла́са. Проки́мен, глас 4:
Уста́ моя́ возглаго́лют прему́дрость// и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней. Вся́кое дыха́ние: Ева́нгелие от Иоа́нна, зача́ло 36.
По 50-м псалме́ стихи́ра, глас 6:
Непреста́нною моли́твою, учи́тельным сло́вом,/ вели́ким милосе́рдием и доброде́тельным житие́м/ о́браз ве́рным был еси́, богому́дре Иоаса́фе,/ всех ко Христу́ приводя́ и на путь спасе́ния наставля́я;/ твоего́ пастыренача́льства не лиши́ и нас, вели́кий святи́телю Бо́жий,/ почита́ющих па́мять твою́ ве́рно.
Кано́н Богоро́дицы на 6 и свята́го на 8.
Кано́н святи́телю Иоаса́фу, его́же краегране́сие:
Иоаса́фе святи́телю, моли́ся о царе́ и лю́дех.
Глас 4.
Песнь 1
Ирмо́с: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́// побе́дное воспою́ пе́ние.
Иоаса́фа святи́теля воспева́юще по́двиги, очи́стим по́мыслы ума́ на́шего, бра́тие,/ того́ подвиза́юще на моли́тву о проще́нии грех на́ших/ и благода́тнаго умиле́ния дарова́нии.
О твое́м благоче́стии измла́да потща́вшеся, роди́телие твои́, уго́дниче Христо́в,/ досто́йную мзду трудо́в свои́х в тебе́ стяжа́ша,/ я́ко от младе́нчества твоего́ благочести́вым нра́вом ра́дость тем был еси́.
А́нне пра́ведней уподо́бися оте́ц твой, святи́телю:/ та бо Дщерь свою́ во Свято́е Святы́х вводи́му ви́де,/ сей же тя от Тоя́жде Пресвяты́я Богоро́дицы архиере́йскою сла́вою венча́нна/ в виде́нии чу́днем позна́ти сподо́бися. Себе́ сама́го пла́чу окая́нный аз, от ю́ности страстя́м порабо́тився:/ поми́луй мя предста́тельством твои́м, святи́телю,/ от ю́ности стра́сти порабо́тивый и еди́ному Бо́гу до сме́рти послужи́вый.
Богоро́дичен: Го́ру святу́ю, превы́шнее носи́ло,/ Ма́терь Бо́жию и Де́ву и́стинную по рождестве́ воспои́м.
Катава́сия 4-го сентября́: Крест начерта́в, Моисе́й:
10-го декабря́; Спасе́ лю́ди чудоде́йствуяй Влады́ка: или́: Христо́с ражда́ется:
Песнь 3
Ирмо́с: С высоты́ снизше́л еси́ во́лею на зе́млю,/ превы́ше вся́каго нача́ла,/ и смире́нное возне́сл еси́ из а́да преиспо́дняго/ естество́ челове́ческое:// несть бо свят па́че Тебе́, Человеколю́бче.
А́ще и ча́до послу́шное роди́телем твои́м был еси́, Иоаса́фе,/ но, Го́спода па́че сих возлюби́в, из оте́ческаго до́ма спасе́ния ра́ди удали́лся еси́/ и, науче́ние кни́жное восприи́м, во оби́тель и́ноческую себе́ заключи́л еси́.
Фариее́йскаго возноше́ния чужд яви́лся еси́, о́тче преподо́бне,/ мона́шеское же смире́ние от ю́ности возлюби́в, та́йными по́двиги плоть смиря́л еси́/ и ду́шу твою́ моли́твою пред Отцо́м Небе́сным просвеща́л еси́.
Е́же жи́ти ми Христо́с, и смерть приобре́тение,/ глаго́лал еси́ в себе́, Христо́в уго́дниче,/ и, боле́знем плоть твою́ сокруша́ющим, труды́ ко трудо́м Го́спода ра́ди прилага́л еси́.
Свято́е послуша́ние восприи́м и свяще́нства оде́ждою укра́шен,/ Иоаса́ф, уго́дник Христо́в, учи́тель добр отроко́м быва́ет,/ сло́вом и житие́м тех благоче́стию науча́я и во млады́х ле́тех ум зре́лый явля́я.
Богоро́дичен: Неискусобра́чная, Бо́га пло́тию ро́ждшая,/ стра́стными прило́ги преклоне́на мя утверди́:/ несть бо, Чи́стая, ра́зве Тебе́ помо́щница.
Седа́лен, глас 6:
Ка́я доброде́тель не обре́те в души́ твое́й обита́лища?/ Ко́его по́двига не был еси́ побо́рник?/ Нищета́ бо духо́вная, и о Ца́рствии Небе́снем плач, и нра́ва кро́тость, и пра́вды иска́ние,/ и ко бли́жним милосе́рдие, и се́рдца чистота́ во твое́м непоро́чнем житии́ просия́ша./ Тех у́бо дарова́ний о́бщники ны, моля́щияся, сотвори́/ и о душа́х на́ших предста́тель бу́ди, Иоаса́фе, избра́нниче Бо́жий.
Сла́ва, и ны́не, Богоро́дичен:
Благослове́нную нареки́й Твою́ Ма́терь,/ прише́л еси́ на Страсть во́льным хоте́нием,/ возсия́в на Кресте́, взыска́ти хотя́ Ада́ма, глаго́ля А́нгелом:/ сра́дуйтеся Мне, я́ко обре́теся поги́бшая дра́хма./ Вся му́дре устро́ивый, Бо́же наш, сла́ва Тебе́.
Песнь 4
Ирмо́с : Седя́й в сла́ве/ на Престо́ле Божества́,/ во о́блаце ле́гце/ прии́де Иису́с Пребоже́ственный/ нетле́нною дла́нию/ и спасе́ зову́щия:// сла́ва, Христе́, си́ле Твое́й.
Вем и аз путь, ко спасе́нию веду́щий,/ но ле́ности пло́ти моея́ не побежда́ю, увы́ мне!/ Сего́ ра́ди тя, святи́телю, призыва́ю в моли́тву,/ да жела́ние спасе́ния во мне утверди́ши.
Я́корь спасе́ния име́я наде́жду на Го́спода, служе́ние игу́менское прия́л еси́/ и, к попече́нием о строи́тельстве домо́внем понужда́емь,/ ду́шу твою́ устроя́ти ко спасе́нию не преста́л еси́;/ сему́ и мене́, многосу́етнаго, науча́й, о́тче преподо́бне.
Труды́ ко трудо́м прилага́я и оби́тель Лу́бенскую от разруше́ния воздвиза́я,/ по земли́ же Росси́йстей за ми́лостынею стра́нствуя,/ святи́тель Иоаса́ф цари́цу во благоче́стии утвержда́ет/ и вся лю́ди спасе́нию душ науча́ет.
Име́я в се́рдце свое́м при́сную к нйи́щим любо́вь,/ Иоаса́ф, Христо́в уго́дник, оте́ческое попече́ние о монасты́рских тру́дницех явля́ет/ и от доста́тка своего́ щедро́ты бли́жним свои́м отверза́ет.
Богоро́дичен: Госпоже́ Всепе́тая, Богороди́тельнице,/ моя́ помышле́ния Твои́ми моли́твами очи́стивши,/ покажи́ мя благопло́дна, Ма́ти всех Бо́га.
Песнь 5
Ирмо́с: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы// и к Све́ту у́мному вознося́й Моего́ Божества́.
Тебе́, святи́телю Христо́в, молю́ в сокруше́нии се́рдца:/ я́коже в житии́ твое́м ка́ющияся проща́л еси́,/ та́ко, и моего́ се́рдца сокруше́ние зря,/ умоли́ Го́спода грехо́м мои́м проще́ние дарова́ти.
Еле́нь на исто́чники водны́я устремля́ется,/ ты же, уго́дниче, ко сла́ве Це́ркве Христо́вы вся дея́ния и по́мыслы твоя́ при́сно устремля́л еси́/ и та́ко оби́тели святи́теля Афана́сия и преподо́бнаго Се́ргия/ ели́ко строе́нием церко́вным, толи́ко и благоче́стием бра́тии украси́л еси́.
Лю́дие, слы́шите и чуди́теся уго́дника смиренному́дрию,/ сей бо свята́го Афана́сия в виде́нии зрит и тому́ вопроси́вшу отвещава́ет:/ хощу́, да мене́, я́коже гре́шника, нака́жеши.
Ю́наго Соломо́на, не бога́тства, но му́дрости от яви́вшагося Го́спода прося́ща,/ похваля́ет Вы́шний и вселе́нная при́сно прославля́ет,/ но того́ мудре́йший Иоаса́ф показу́ется,/ наказа́ния грехо́м свои́м от я́вльшагося святи́теля испроша́я.
Богоро́дичен: Воплоти́ся Бог по Ипоста́си, Чи́стая,/ из Тебе́ пло́ти соединя́емь, пребы́в неизме́нен,/ по Боже́ственному Существу́ безпло́тен.
Песнь 6
Ирмо́с : Возопи́, прообразу́й погребе́ние тридне́вное,/ проро́к Ио́на, в ки́те моля́ся:// от тли изба́ви мя, Иису́се, Царю́ Сил.
Моли́твами преподобнаго Се́ргия,/ твои́ми же труды́ во сла́ву святы́х Бо́жиих, па́че же се́рдца чистото́ю/ от Го́спода еще́ на земли́ возвели́чен был еси́, уго́дниче,/ и святи́тельским са́ном во спасе́ние па́ствы твоея́ облече́н был еси́.
О́гненную ре́вность о испра́влении церко́внем/ явля́л еси́ в Белогра́дстем преде́ле, Иоаса́фе святи́телю;/ те́мже и днесь подава́й Це́ркви мир, ве́рным утвержде́ние.
Любве́ сыно́вния не отпа́л еси́, на высоте́ святи́тельства пребыва́я,/ и роди́телю твоему́ земно́е поклоне́ние возда́л еси́, Христу́ посреде́ вас су́шу;/ у́бо и мое́ смири́ прего́рдое се́рдце и моли́твами твои́ми вразуми́ мя.
И́нок нестяжа́телен на престо́ле архиере́йетва пребы́л еси́, святи́телю,/ по́двиги поста́ и моли́твы умножа́я, до́брое о себе́ и о лю́дех вознося́ моле́ние,/ иере́и же и вся лю́ди за́поведем Бо́жиим науча́я.
Богоро́дичен: Вся́каго существа́ вы́шшее/ Сло́во Бо́жие воплоще́нно нам родила́ еси́;/ те́мже Богоро́дицу Тя устна́ми и душо́ю пропове́дуем.
Конда́к, глас 8.
Многоразли́чныя по́двиги жития́ твоего́ кто испове́сть?/ Многообра́зныя ма́лости Бо́жия, тобо́ю явле́нныя, кто исчи́слит?/ Дерзнове́ние же твое́ у Преча́стыя Богоро́дицы и Всеще́драго Бо́га до́бре ве́дуще,/ во умиле́нии серде́чнем зове́м ти:/ не лиши́ и нас твоея́ по́мощи и заступле́ния,// святи́телю Христо́в и чудотво́рче Иоаса́фе.
И́кос:
Пречи́стою Богома́терию от ю́ности в сосу́д благода́ти избра́нный,/ благочести́вым житие́м вои́стину до́брый па́стырь слове́сных ове́ц яви́лся еси́, святи́телю:/ те́мже прия́л еси́ дар исцеле́ний от возлюби́вшаго тя Христа́ Бо́га на́шего./ Сего́ ра́ди зове́м ти:/ не лиши́ и нас твоея́ по́мощи и заступле́ния,/ святи́телю Христо́в и чудотво́рче Иоаса́фе.
Песнь 7
Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:// благослове́н еси́, Го́споди, Бо́же оте́ц на́ших.
Святи́телю Иоаса́фу диви́мся, о лю́дие,/ ве́дуще сего́, а́ки Никола́я Чудотво́рца, бе́дных хи́жины та́йно посеща́юща,/ или́ тем дрова́ свои́ма рука́ма уготовля́юща,/ и бие́ния от привра́тника прие́млюща.
Я́звы грехо́вныя на душа́х челове́ческих прови́дел еси́, святи́телю,/ и та́йная прегреше́ния их с любо́вию и долготерпе́нием облича́л еси́;/ те́мже и нас моли́твою твое́ю к покая́нию и исправле́нию жития́ приведи́/ и ду́ши на́ша предста́тельством твои́м поми́луй.
О́ному власти́телю уподо́бихся аз, окая́нный,/ и́же, сам беззако́нен быв, ко у́зником зело́ же́сток явля́шеся;/ но я́коже того́ науче́нием твои́м испра́вил еси́, о́тче Иоаса́фе, святи́телю Христо́в,/ та́ко и мене́ науча́ ко бли́жним ми́лостива, к себе́ же же́стока бы́ти.
Царя́ Небе́снаго до́брый во́ине и ста́да Христо́ва ве́рный па́стырю,/ моли́тву сотвори́ о лю́дех твои́х,/ да ти́хое житие́ на земли́ пожи́вше,/ жи́зни ве́чныя на Небесе́х сподо́бимся.
Богоро́дичен: Преве́чно от Отца́ возсия́вша Бо́га Сло́ва/ во утро́бе пло́тию заче́ншую вси ублажа́ем,/ я́ко Ма́терь всех Бо́га.
Песнь 8
Ирмо́с: Изба́вителю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:// вся дела́, благослови́те, по́йте Го́спода.
Афана́сию о́ному, тобо́ю возлю́бленному, подража́тель быв, святи́телю,/ потщи́лся еси́ земно́е житие́ во стра́нничестем по́двизе сконча́ти/ и, кончи́ну свою́ прозре́в, пути́ дале́кому небоя́зненно вда́лся еси́.
Рекл еси́ лю́дем, от па́ствы твоея́ отходя́: не и́мате мене́ жи́ва узре́ти./ Те́мже в зало́г обще́ния та́мо гробни́цу тебе́ устро́ити повеле́л еси́./ И нас у́бо научи́ час сме́ртный па́мятовати/ и о души́ свое́й попече́ние непреста́нно храни́ти.
Ели́ка твоя́ о мона́шестем житии́ бя́ше ре́вность, толи́ка и ко твои́м при́сным любы́:/ зане́ не по пло́ти то́чию свои́ тебе́ бы́ша, но и ду́хом еди́но в Бо́зе с тобо́ю яви́шася./ Того́ ра́ди восхоте́л еси́ роди́тели твоя́ пре́жде кончи́ны твоея́ посети́ти/ и благослове́ние Бо́жие тем препода́ти.
Игу́мен, близ ме́ста твоея́ пра́ведныя кончи́ны подвиза́выйся,/ о часе́ преставле́ния твоего́ виде́нием известву́ется/ и свиде́тель ве́рен о твое́м от Бо́га прославле́нии а́бие быва́ет./ И на мне у́бо твоея́ моли́твы си́лу покажи́, Христо́в уго́дниче,/ и то́ю от мучи́тельства страсте́й свободи́ мя.
Богоро́дичен: Всесвята́я Де́во, Бо́га Сло́ва ро́ждшая пло́тию,/ души́ моея́ мрак Твои́ми моли́твами отгна́вши, просвети́ взыва́юща:/ благослови́те, вся дела́ Госпо́дня, Го́спода.
Песнь 9
Ирмо́с: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́.// Тя, Богоро́дице, тем вси велича́ем.
Любы́ николи́же отпа́дает, глаго́лет Боже́ственный Дух./ И́стина сия́ в чудесе́х любве́ твоея́ извести́ся, святи́телю Христо́в,/ я́ко боля́щим исцеле́ние и скорбя́щим утеше́ние от твои́х нетле́нных моще́й источа́вши.
Ю́жский Росси́йския земли́ преде́л благодаре́ний о чудесе́х твои́х испо́лнися издре́вле,/ ны́не же и от да́льних стран се́верных притека́ющия зрим/ и исцеле́нныя страда́льцы, о твое́м заступле́нии ра́дующияся.
Де́ти стра́ждущия па́че ины́х возлюби́л еси́, святи́телю Христо́в,/ тем исцеле́ния и благода́тную по́мощь умножа́я/ и роди́тели их от ско́рби к ра́дости пременя́я.
Елиссе́я проро́ка косте́й прикоснове́нием воста́ уме́рый,/ твои́х же моще́й целова́нием безчи́сленнии исцели́шася лю́дие./ И мене́ у́бо припа́дающа исцели́ от грехо́вных страсте́й/ и ве́ру укрепи́ многогре́шныя души́ моея́, о́тче преподо́бне.
Христе́ Бо́же, моли́твами Иоаса́фа, уго́дника Твоего́,/ мир Це́ркви пода́ждь и благостоя́ние,/ от гла́да же и па́губы избавле́ние и согреше́ний на́ших проще́ние.
Богоро́дичен: Плод чре́ва Твоего́, Ра́дость ро́ждшая,/ соде́я ликостоя́теля песнь пе́ти Тебе́ велегла́сно:/ ра́дуйся, провещава́ше.
Свети́лен.
Подо́бен: Жены́, услы́шите:
Свети́льник све́тлый Иоаса́ф да воспое́тся посреде́ Це́ркве,/ я́ко и́нок преподо́бен и святи́тель че́стен,/ нему́дрых наказа́тель и ве́ры учи́тель,/ боля́щих врач чудотворя́й, бесо́в изгони́тель/ и о вселе́нней предста́тель тепле́йший.
Сла́ва, и ны́не, Богоро́дичен:
Ве́лие и пресла́вное Рождества́ Твоего́ та́инство, Богора́дованная Отрокови́це и Богома́ти Де́во,/ проро́цы пропове́даша, апо́столи научи́ша, му́ченицы испове́даша,/ А́нгели же воспева́ют, и челове́цы покланя́ются.
На хвали́тех стихи́ры на 4, глас 4.
Подо́бен: Яко до́бля:
Святи́теля Госпо́дня о́браз/ целу́юще, ве́рнии,/ очи́стим себе́ от скве́рны/ пло́ти и ду́ха/ и па́мятию чуде́с его́/ сердца́ на́ша умили́м,/ в покая́нии те́пле зову́ще Христу́:/ Го́споди, уго́дника Твоего́ моли́твами/ вложи́ в нас тому́ подража́ти жела́ние.
Никто́же тощ от Тебе́ исхо́дит,/ святи́телю Бо́жий Иоаса́фе,/ и исцеле́ние те́ла и души́ освяще́ние/ всяк прие́млет,/ а́ще с ве́рою по́мощь твою́ призове́т/ и, о гресе́х свои́х покая́ние принося́,/ житие́ свое́ испра́вити потщи́тся./ Тому́ у́бо и нас научи́, свя́те,// и моли́тву сотвори́ о спасе́нии душ на́ших.
Слеза́ми умиле́ния/ ли́ца своя́ ороша́юще, ве́рнии,/ целу́им уго́дника о́браз честны́й,/ я́ко ре́ку чуде́с и исцеле́ний исто́чник неоску́дный,/ я́ко Боже́ственныя си́лы зна́мение ясне́йшее,/ е́же в на́ша малове́рная времена́/ в сердца́х ве́ру умножа́ет,/ неве́рныя же к ве́ре возво́дит// и святи́теля Бо́жия чти́ти всех науча́ет.
Сла́ва, глас 8:
О, пресла́внаго чудесе́!/ О, Боже́ственнаго к нам гре́шным долготерпе́ния!/ я́ко умно́жившимся собла́зном на земли́ и ве́ре зело́ ума́ленней,/ чуде́сная умножа́ются святи́теля исцеле́ния./ Зри́те у́бо, лю́дие росси́йстии/ и вся ве́рная Христо́вы Це́ркве ча́да,/ коли́ко мо́жет моли́тва пра́веднича,/ ка́ко дре́вних чуде́с подо́бие днесь нам явля́ется./ Сла́ва Тебе́, Христе́ Бо́же,/ я́ко Ты еси́ святы́ми чудоде́йствуяй;/ сотвори́ ны досто́йны толи́кия благода́ти бы́ти,/ слы́шатели и свиде́тели чуде́с свята́го Иоаса́фа су́щия,/ и изба́ви нас от безме́рных грехо́в,// и ра́дость спасе́ния Твоего́ пода́ждь нам.
Ины́не, Богоро́дичен, глас то́йже:
Влады́чице, приими́ моли́твы раб Твои́х,// и изба́ви нас от вся́кия ну́жды и печа́ли.
Славосло́вие вели́кое, и отпу́ст.
На Литурги́и слу́жба вся святи́тельская.
Пра́зднование Пресвяте́й Влады́чице Богоро́дице ра́ди ико́ны Ей, имену́емыя «Неопали́мая Купина́»
На вече́рни
На Го́споди, воззва́х: стихи́ры на 8, глас 2.
Подо́бен: Егда́ от Дре́ва:
Прииди́те, ве́рнии, с любо́вию к горе́ святе́й/ и та́мо у́зрим виде́ние Боже́ственное,/ его́же вели́кий во проро́цех Моисе́й Богови́дец нам та́инственно возвеща́ет,/ ка́ко купина́ горя́ше огне́м и неопали́ма бысть,/ сим проявля́ющи обра́зно ве́лию и непостижи́мую та́йну/ безсе́меннаго Рождества́ Твоего́, Богоро́дице./ Я́ко Огнь Божества́ неопали́мо в ложесна́х Твои́х вмести́ла еси́/ и по Рождестве́ ключи́ де́вства невреди́мо сохрани́ла еси́./ Те́мже ублажа́ем Тя вси ро́ди,// я́ко ро́ждшую Спа́са и Изба́вителя душ на́ших.
Пребыва́вши в Рождестве́ и по Рождестве́ Де́ва,/ огне́м неопали́мыя купины́ дре́вле прообразова́нная Моисе́ови, Богороди́телънице,/ и созыва́вши ве́рных собо́ры/ ико́ны Твоея́ честно́е явле́ние благохвали́ти в пе́снех духо́вных./ Я́ко в ней зало́г благоволе́ния Твоего́ ро́ду христиа́нскому дарова́ла еси́/ в покро́в и защи́ту от о́гненнаго запале́ния и молниено́снаго гро́ма./ Се бо и на ико́не зря́ще Тя, в подо́бии неопали́мыя купины́ изображе́нную,/ да́ры бла́гости Твоея́ от нея́ неоску́дно прие́млем/ и Тя ублажа́ем по до́лгу,// я́ко ро́ждшую Спа́са и Изба́вителя душ на́ших.
Пла́мень страсте́й на́ших угаша́еши моли́твою Твое́ю, Богоро́дице Де́во,/ предста́тельствующи за нас непреста́нно у Престо́ла Сы́на Твоего́ и Бо́га на́шего,/ я́ко вои́стину ве́лие дерзнове́ние и́маши к Нему́/ и ничто́же невозмо́жно есть хода́тайству Твоему́./ Ибо само́й ико́не Твое́й дарова́ Он си́лу Боже́ственную/ соверша́ти мно́гая и преди́вная чудеса́,/ си́ми уверя́я нас,/ я́ко никто́же прибега́яй к покро́ву заступле́ния Твоего́ посра́млен оты́дет./ Сего́ ра́ди пое́м моли́тв Твои́х си́лу/ и ублажа́ем Тя, Наде́жде христиа́н,/ ро́ждшую Спа́са и Изба́вителя душ на́ших.
Пода́ждь по́мощь Твою́ держа́вную нам, Богоро́дице,/ егда́, грех ра́ди на́ших,/ о́гненнаго запале́ния наказа́ние на нас прии́дет внеза́пно/ или́ гро́ми и мо́лнии с небесе́ нас устраша́т./ Тогда́ ико́ною Твое́ю свято́ю нас защити́ и изба́ви/ и яви́ся Утоли́тельница гне́ва Бо́жия, на нас пра́ведно подви́женнаго./ Мно́го бо мо́жет Ма́терняя моли́тва ко Творцу́,/ и всеси́льно хода́тайство Твое́ пред Лице́м Всевы́шняго,/ Его́же умоля́ти не преста́й за род христиа́нский,/ я́же в пе́снех немо́лчных ублажа́ет Тя,// ро́ждшую Спа́са и Изба́вителя душ на́ших.
Сла́ва, и ны́не, глас то́йже: Пре́йде сень зако́нная:
Вход. Проки́мен дне. Чте́ния три.
Бытия́ чте́ние: Изы́де Иа́ков от студенца́ клятвеннаго: (зри страни́цы 233–234).
Исхо́да чте́ние (глава́ 3):
Вни́де Моисе́й в го́ру Бо́жию Хори́в./ Яви́ся же ему́ А́нгел Госпо́день в пла́мени о́гненне из купины́,/ и ви́де, я́ко купина́ горя́ше огне́м и купина́ не сгара́ше./ Рече́ же Моисе́й:/ прише́д узрю́ виде́ние вели́кое сие́,/ что я́ко не сгара́ет купина́?/ Я́коже ви́де Госпо́дь, я́ко приступа́ет ви́дети,/ призва́ его́ Госпо́дь из купины́, глаго́ля: Моисе́е, Моисе́е!/ Он же рече́: что́ есть?/ И рече́: не прибли́жися се́мо,/ иззу́й сапо́г от ногу́ твое́ю,/ ме́сто бо, на не́мже ты стои́ши, земля́ свята́ есть./ И рече́ ему́:/ Аз есмь Бог отца́ твоего́,/ Бог Авраа́мов, и Бог Исаа́ков, и Бог Иа́ковль./ Отврати́ же Моисе́й лице́ свое́,/ стыдя́ше бо ся зре́ти пред Бо́гом./ Рече́ же Госпо́дь к Моисе́ю:/ ви́дя ви́дех озлобле́ние люде́й Мои́х, и́же во Еги́пте,/ и вопль их услы́шах от наси́льствующих в де́лех;/ вем бо боле́знь их, и снидо́х, е́же изъя́ти их от руки́ еги́птян,/ и извести́ их от земли́ о́ныя,/ и ввести́ их в зе́млю бла́гу и мно́гу,/ в зе́млю, точа́щу мед и млеко́.
Проро́чества Иезеки́илева чте́ние: Та́ко глаго́лет Госпо́дь: бу́дет от дне осма́го и про́чее: (зри страни́цу 234).
На лити́и стихи́ры, глас 6. Самогла́сны:
Я́ко вои́стину дре́вняго киво́та честне́йшая/ яви́ся свята́я ико́на Твоя́, Богородице Влады́чице,/ на не́йже боже́ственнаго ли́ка Твоего́ подо́бие созерца́ем./ На руку́ бо Твое́ю Богомладе́нца Предве́чнаго,/ Го́спода Иису́са Христа́, держи́ши,/ Ангелов и челове́ков Творца́,/ и всему́ ми́ру явля́вши/ из Тебе́ безсе́менно вопло́щшагося Бо́га Сло́ва,/ Ему́же раболе́пно кла́няющеся,/ песносло́вим Тя, вои́стину Богоро́дицу,/ и мо́лим Ти ся приле́жно:/ умири́ мир и спаси́ ду́ши на́ша/ Ма́терним предста́тельством Твои́м к Ро́ждшемуся от Тебе́,// еди́на Благослове́нная.
Предстоя́т честне́й ико́не Твое́й христолюби́вии лю́дие/ и с любо́вию ей покланя́ются, Богоро́дице Влады́чице,/ почерпа́юще оби́льныя от нея́ да́ры щедро́т Твои́х:/ в неду́зех врачество, в беда́х избавле́ние,/ в ско́рбех утеше́ние,/ и́бо всем вся блага́я и душеполе́зная да́руеши/ с ве́рою прося́щим пред пречи́стым о́бразом Твои́м./ Сего́ ра́ди се́рдцем и усты́ благогове́йно лобыза́ем/ Боже́ственнаго ли́ка Твоего́ подо́бие/ и мо́лим Ти ся приле́жно:/ умири́ мир и спаси́ ду́ши на́ша/ всеси́льными моли́твами Твои́ми к Ро́ждшемуся от Тебе»,// еди́на Благослове́нная.
Пе́рвее написа́вшейся ико́не Твое́й/ боже́ственным Евангели́стом Луко́ю/ и к Тебе́ принесе́нней, Богоро́дице Влады́чице,/ благоволи́ла еси́ о ико́не сей, я́ко ми́лостива су́щи,/ и, благослови́вши ю,/ рекла́ еси́ со вла́стию:/ с сим о́бразом благода́ть Моя́ и си́ла./ И воспе́ла еси́, ра́дующися,/ я́коже и Бо́га внегда́ носи́ла еси́ во чре́ве,/ песнь проро́ческую:/ се́ от ны́не ублажа́т Мя вси ро́ди./ Те́мже, ви́дяще с гла́сом де́йство чуде́с мно́жества,/ от ико́ны Твоея́ явле́нное и присноявля́емое по всей вселе́нней,/ немо́лчными славословле́нии Тя ублажа́ем/ и мо́лим Ти ся приле́жно:/ умири́ мир и спаси́ ду́ши на́ша/ благоприя́тным хода́тайством Твои́м к Ро́ждшемуся от Тебе́,// еди́на Благослове́нная.
Гора́ еси́ вели́кая и пресла́вная/ па́че горы́ Сина́йския, Богоро́дице Влады́чице:/ та бо, не терпя́щи сни́тия Сла́вы Бо́жия,/ огне́м возгара́шеся, и гро́ми и мо́лнии та́мо бы́ша./ Ты же Огнь Божества́, Бо́га Сло́ва,/ неопа́льно во чре́ве Твое́м вмести́ла еси́/ и млеко́м пита́ла еси́ Пита́теля вселе́нныя./ К Нему́же дерзнове́ние Ма́тернее иму́щи,/ спаса́й от бед ве́рно пра́зднующий Твой честны́й пра́здник,/ в не́мже песносло́вим ми́лости Твой и щедро́ты/ и мо́лим Ти ся приле́жно:/ умири́ мир и спаси́ ду́ши на́ша/ Боже́ственным моле́нием Твои́м к Ро́ждшемуся от Тебе»,// еди́на Благослове́нная.
Сла́ва, и ны́не, глас 8:
Па́че ски́нии Моисе́евы, по о́бразу Небе́сному сотворе́нныя,/ всю Тя Бог освяти́, Богоро́дице,/ и па́че Ааро́ня киво́та испо́лни благода́ти Бо́жия изоби́льно,/ ея́же и ико́на Твоего́ подо́бия прича́стна показа́ся,/ источа́ет бо освяще́ние и цельбу́ душа́м и телесе́м челове́ческим/ и уставля́ет си́лу о́гненную прису́тствием свои́м./ Ейже с любо́вию покланя́ющеся,/ про́сим, Всеблага́я, и вопие́м:/ огня́ вре́меннаго и ве́чнаго изба́ви нас,// Благослове́нная Помо́щнице.
На стихо́вне стихи́ры, глас 6:
Велича́ем Тя, Богоро́дице Де́во,/ возвели́чившую род наш:/ из Тебе́ бо воплоти́ся Изба́витель па́дшаго челове́чества,/ Имже Ада́м и Е́ва кля́твы свободи́шася/ и от мра́чных удо́лий а́дских во Еде́м па́ки введо́шася,/ сый Бог наш,// спаса́яй при́сно Тя велича́ющия.
Стих: Слы́ши, Дщи, и виждь,// и приклони́ у́хо Твое́.
Велича́ем Тя, Богоро́дице Де́во,/ Засту́пницу усе́рдную ро́да христиа́нскаго,/ покро́вом ми́лости Твоей покрыва́ющую всю вселе́нную./ Се бо ико́на Твоя́ свята́я чуде́с мно́жество источа́ет/ и, я́ко у́тварь драга́я, Це́ркви Христо́вой дарова́ся бла́гостию Творца́,/ все́льшагося в Тя пло́тию и просла́вльшаго Тя сла́вою Божества́./ Из Тебе́ бо вои́стину, а не привиде́нием/ воплоти́ся Сый Бог наш,// спаса́яй при́сно Тя велича́ющия.
Стих: Лицу́ Твоему́ помо́лятся// бога́тии лю́дстии.
Велича́ем Тя, Богоро́дице Де́во,/ я́ко одушевле́нный киво́т Божества́,/ пе́нии хвале́бными честву́ем Тя,/ еди́ну Избра́нную и Благослове́нную в жена́х:/ ложесна́ бо Твоя́ престо́л Себе́ сотвори́/ Сый Бог наш,/ спаса́яй при́сно Тя велича́ющия.
Сла́ва, и ны́не, глас то́йже:
От святы́я ико́ны Твоей,/ Влады́чице Преблага́я,/ исцеле́ний струи́ истека́ют,/ и́миже напая́ются благода́тно ду́ши на́ша/ и врачу́ются безме́здно телеса́ на́ша;/ те́мже Тя, Целе́бницу ми́лостивую,// при́сно в пе́снех велича́ем.
Тропа́рь, глас 4:
И́же во огни́ купины́ неопали́мыя, дре́вле Моисе́ем ви́денныя,/ та́йну воплоще́ния Своего́ от неискусобра́чныя Де́вы Мари́и Прообразова́вый,/ Той и ны́не, я́ко чуде́с Творе́ц и всея́ тва́ри Созда́тель,/ ико́ну Ея́ святу́ю чудесы́ мно́гими просла́ви,/ дарова́в ю ве́рным во исцеле́ние неду́гом/ и в защище́ние от о́гненнаго запале́ния./ Сего́ ра́ди вопие́м Преблагослове́нней:/ наде́ждо христиа́н, от лю́тых бед, огня́ и гро́ма изба́ви на Тя упова́ющия/ и спаси́ ду́ши на́ша, я́ко милосе́рда.
Ин тропа́рь, глас то́йже:
И́же в купине́, огне́м горя́щей и несгара́емей,/ показа́вый Моисе́ови пречи́стую Твою́ Ма́терь, Христе́ Бо́же,/ Огнь Божества́ неопа́льне во чре́ве прии́мшую/ и нетле́нну по Рождество́ пребы́вшую,/ Тоя́ моли́твами пла́мене страсте́й изба́ви нас/ и от о́гненных запале́ний град Твой сохрани́,// я́ко Многоми́лостив.
На у́трени
На Бог Госпо́дь: тропа́рь Богоро́дицы, три́жды.
По 1-м стихосло́вии седа́лен, глас 4.
Подо́бен: Яви́лся еси́ днесь:
Яви́ся в огнепа́льней купине́ на Сина́и/ Твоего́, Влады́чице, нетле́ннаго Рождества́ проо́браз,/ я́коже богосло́вцы Це́ркве Христо́вой богому́дренно испове́дуют./ Купина́ бо, огне́м горе́вшая, неопа́льна пребыва́ше./ Та́ко и Ты Огнь Божества́ во чре́ве Твое́м неопа́льно носи́ла еси́,/ вопло́щшагося от Тебе́ Бо́га Сло́ва,/ Его́же моли́ спасти́ся нам, пою́щим Тя.
Сла́ва, и ны́не, то́йже.
По 2-м стихосло́вии седа́лен, глас 4.
Подо́бен: Удиви́ся:
Удиви́ся богови́дец Моисе́й, ви́дев купину́, огне́м горя́щу и несгара́ему,/ и устраши́ся Боже́ственнаго тайноявле́ния,/ в не́мже благоволи́ Госпо́дь/ воплоще́ния Своего́ от Де́вы неискусому́жныя проо́браз ми́ру яви́ти,/ я́ко в после́дняя ле́та, спасти́ хотя́ па́дшее челове́чество,/ пло́ти дебельство́м Божества́ Своего́ сла́ву сокры́ет/ и с на́ми поживе́т, спаса́я ду́ши на́ша от поги́бели ве́чныя.
Сла́ва, и ны́не, то́йже.
По полиеле́и седа́лен, глас 6.
Подо́бен: А́нгельския Си́лы:
А́нгельския Си́лы боголе́пно Тебе́ слу́жат, Небесе́ и земли́ Цари́це Богоро́дице,/ и Твой пресвяты́й о́браз обстоя́т неви́димо./ Тех бо Творца́ и Го́спода воплоти́ла еси́ и на руку́ Твое́ю, я́ко Младе́нца, носи́ла еси́,/ Иже го́рняя с до́льними совокупи́ и А́нгелы с челове́ки ликовствова́ти устро́и,/ пою́щия во гла́сех ра́дования Твое́ нетле́нное Рождество́.
Сла́ва, и ны́не, то́йже.
Степе́нна, 1-й антифо́н 4-го гла́са.
Проки́мен, глас 4: Помяну́ и́мя Твое́// во вся́ком ро́де и ро́де.
Стих: Слы́ши, Дщи, и виждь, и приклони́ у́хо Твое́.
Вся́кое дыха́ние:
Ева́нгелие от Луки́, зача́ло 4.
По 50-м псалме́ стихи́ра, глас 2:
Весели́тся днесь гора́ Сина́йская и све́тло торжеству́ет,/ Ма́тери Госпо́дни светоно́сное пра́зднество соверша́ющи на ме́сте том,/ иде́же неопали́мая купина́ вели́ким во проро́цех Моисе́ем ви́дена бысть./ Зде бо и до ны́не благода́ть Бо́жия обита́ет/ и чуде́с мно́жество явля́ет ве́рным,// благоче́стно Богоро́дицу в пе́снех велича́ющим.
Кано́н, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.
Ум помраче́нный мой просвети́, Де́во,/ огнено́сным сия́нием Твоея́ сла́вы,/ па́мять, в славосло́вии изнемога́ющую, укрепи́/ и воспламени́ хла́дное мое́ се́рдце Боже́ственною любо́вию,/ да Тебе́, Купине́ Неопали́мей, пе́ние хвале́бное воспою́ досто́йно, Чи́стая.
Храм Трисо́лнечнаго Све́та прекра́сный,/ украси́ моя́ чу́вства, молю́ся,/ да целому́дренною мы́слию и нескве́рными усты́/ огнезра́чныя ико́ны Твоея́ явле́ние воспою́ досто́йно, Чи́стая.
К Твое́й пресве́тлаго зра́ка ико́не припа́даю, окая́нный:/ ду́шу мою́ озари́ благода́тно, яви́ и те́ло нескве́рно/ и, от лю́тых мя неду́гов свободи́вши,/ покажи́ прича́стника насле́дия Небе́снаго, Богоневе́стная.
Неду́гующа страстьми́ многоразли́чными,/ от ико́ны Твоея́ Боже́ственныя исцеле́ния сподо́би мя, о Богома́ти Влады́чице,/ да сла́влю чудеса́ Твоя́ и пою́ Тя, благи́х вино́вную,/ Ве́чную Бла́гость воплоти́вшую, ми́ра благу́ю Засту́пницу.
Песнь 3
Ирмо́с: Небе́снаго кру́га/ Верхотво́рче, Господи,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний Кра́ю, ве́рных Утвержде́ние,// Еди́не Человеколюбче.
Низложи́ нало́ги бесо́вския, стужа́ющия мне, Влады́чице,/ го́рдость в доброде́тели, лицеме́рие в свя́тости, тщесла́вие во бде́нии,/ высокоу́мие в благогове́нии и неблагода́рность о благодея́ниих Сы́на Твоего́,/ еди́на Всепе́тая Де́во.
Стра́нна мя любоче́стия сотвори́, молю́ Тя, Де́во,/ и чу́жда любопы́тства о челове́ческих согреше́ниих,/ де́рзость и изли́шнее на ми́лость Сы́на Твоего́ упова́ние отдали́ от мене́,/ да досто́йны Ему́ плоды́ принесу́, еди́на Пречи́стая.
Нача́ло от земли́ прие́мшую ху́дость моего́ естества́ познава́я,/ молю́ Тя, Де́во, даждь ми презре́ние славолю́бия, бе́гство челове́ческия хвалы́,/ позна́ние собственнаго греха́ и собственныя не́мощи,/ еди́на Богоблаже́нная.
Кра́ткий всех веще́й и всего́ ми́ра коне́ц,/ сме́ртный час и муче́ние бу́дущее за суету́ дея́ний тщесла́вных/ помышля́ти сподо́би мя, Де́во,/ да благода́тию Сы́на Твоего́ к пути́ и́стиннаго покая́ния наста́влен,/ ве́чнаго избе́гну прокля́тия, Пренепоро́чная.
Седа́лен, глас 8:
Вели́чия Твоя́ кто испове́сть, Богоро́дице?/ Явле́нием бо огнезра́чныя ико́ны Твоея́ возвесели́ла еси́ ду́ши правосла́вных,/ мно́гия неду́ги е́ю врачу́ющи, от огня́ же и гро́ма защища́ющи/ и́же по Бо́зе на Тя упова́ние возлага́ют./ О Всеми́лостивая Влады́чице, не лиши́ у́бо и нас Твоего́ заступле́ния,/ спаси́ правосла́вных христиа́н от вся́каго зла,/ да Тобо́ю хва́лящеся, не постыди́мся во ве́ки.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.
Жестокосе́рдием отягче́ннаго мя облегчи́,/ немилосе́рдием к тре́бующим окамене́нную утро́бу мою́ умягчи́,/ бу́рею сребролю́бия объя́таго мя ути́ши,/ во огни́ неопали́мыя купины́ прообразова́нная Влады́чице.
Во упова́нии тле́нных и вре́менных веще́й не оста́ви мя/ и пла́мень хище́ния непра́веднаго угаси́ во мне пла́менем огня́ Боже́ственнаго,/ Неопали́мая Купина́ я́вльшаяся, Богоневе́стная Влады́чице.
Идолослуже́ние в лихоиме́нии и заблужде́ние от и́стиннаго благоче́стия и правосла́вныя ве́ры/ потреби́ от мене́, Влады́чице, и не попусти́ мя па́сти паде́нием ерети́ческим,/ да восхваля́ю и́мя Твое́ благослове́нное до кончи́ны живота́ моего́ в Правосла́вии непоро́чно,/ еди́на Присноде́во.
Ум мой, молю́ Тя, Богоро́дице, благоустро́й к позна́нию ве́чных и́стин Христо́ва Ева́нгелия,/ к разсмотре́нию тле́нности вре́менных благ напра́ви мой по́мысл/ и щедролю́бие да́руй ми неоску́дное,/ да благода́тию Христо́вою укра́шен, пою́ Тя, еди́на Присноде́во.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколюбче.
Огнь нечистоты́ и вся́кия скве́рны во мне, безсту́днем,/ мо́рем бла́гости Твоея́ потопи́, и мглу грехо́вную разжени́,/ и се́рдце мое́ ра́дости испо́лни, Всенепоро́чная.
Срамосло́вию безобра́зному не даждь во мне ме́ста, Влады́чице,/ селе́ние собла́знов замени́ в души́ мое́й зре́нием со́бственных грехо́в,/ храм мя чистоты́ и целому́дрия соде́лай,/ да нескве́рными усты́ велича́ю Тя вы́ну, Всенепоро́чная.
Смерть, суд и муче́ния ве́чныя, гре́шником угото́ванная, в па́мяти мое́й углуби́, Влады́чице,/ да поне́ после́дняя сия́ в па́мяти содержа́,/ лю́тая беззако́ния оста́влю и плоды́ покая́ния и́стиннаго принесу́,/ велича́я Тя при́сно, еди́но души́ моея́ упова́ние.
Любо́вь сея́ жи́зни изли́шнюю и плотска́го поко́я раче́ние/ отложи́ от мене́, молю́ Тя, Де́во Чи́стая,/ да су́етных попече́ний избе́г, Тобо́ю получу́ нетле́нное на Небеси́ бога́тство,/ еди́на души́ моея́ Покрови́тельнице.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.
Ра́дости су́етныя, к преогорче́нию бли́жняго приводя́щия, чу́жда мя соде́лай,/ Купино́ Неопали́мая ве́рными имену́емая, Пречу́дная Цари́це,/ даждь ми сопеча́ловатися и́скреннему моему́ в бе́дствиих, Человеколюби́вая Влады́чице,/ и памятозло́бия изба́ви мя, приле́жно молю́ Тя, Всенепоро́чная Де́во.
За́висти в по́мысле мое́м не даждь вкореня́тися,/ виде́нием несгара́емыя купины́ прообразова́нная Моисе́ю и ро́ждшаяся от ко́рене свя́та, Де́во,/ и братоненавиде́ния изба́ви мя, Чи́стая,/ да не зло́бою мра́чною оскверне́н быв,/ лишу́ся Бо́жия благода́ти и жи́зни ве́чныя, Всенепоро́чная Влады́чице.
Терпе́ние в беда́х утверди́ во мне, Всечи́стая,/ с ра́дующимися духо́вную ра́дость, к се́тующим сожале́ние да́руй ми, Пресвята́я,/ и братолю́бие низпосли́ мне свы́ше, Любве́ Пучи́ну ро́ждшая Де́во/ и любо́вь ве́лию при́сно явля́ющая ро́ду христиа́нскому.
Жела́ние кра́йнее согре́й во мне вся́кому бли́жнему от души́ благотвори́ти, Блага́я,/ да не ка́ко злоб лю́тых душа́ моя́ испо́лнится, и живо́т мой а́ду прибли́жится,/ и пре́дан бу́ду без ми́лости, я́ко несотвори́вый ми́лости, во тьму кроме́шнюю,/ Всенепоро́чная Богоневе́сто.
Конда́к, глас 8:
Предочи́стим чу́вствия душ и теле́с на́ших,/ да ви́дим та́инство Боже́ственное,/ обра́зно явле́нное дре́вле вели́кому во проро́цех Моисе́ю купино́ю,/ горе́вшею огне́м и не сгара́вшею,/ в не́йже Твоего́ безсе́меннаго Рождества́, Богоро́дице, предвозвеще́ние испове́дуем/ и, благогове́йно покланя́ющеся Тебе́ и ро́ждшемуся от Тебе́ Спа́су на́шему,/ со стра́хом вопие́м: ра́дуйся, Влады́чице,/ покро́ве, и прибе́жище, и спасе́ние душ на́ших.
И́кос:
Прови́дя ди́вный Моисе́й в неопали́мей купине́ на Сина́и та́йну, от ве́ка утае́нную,/ Безле́тнаго, в ле́те роди́тися восхоте́вшаго, рожде́ние от Чи́стыя и Неискусобра́чныя Де́вы,/ у́жасом содержи́мь, вопия́ше:/ Сия́ земля́ вои́стину свята́ есть,/ я́ко Плод спаси́тельный ми́ру из Нея́ произы́дет,/ и́мже го́ресть паде́ния Ада́мова услади́тся./ Сего́ послу́шая, и мы, та́инства Бо́жия собы́тие позна́вший,/ ублажа́ем Тя, Богоро́дице, возвели́чившую па́дшее челове́чество/ и милосе́рдием неизрече́нным призрева́ющую на род христиа́нский,/ те́мже и зове́м Ти:/ ра́дуйся, Влады́чице, покро́ве, и прибе́жище, и спасе́ние душ на́ших.
Песнь 7
Ирмо́с: От Иудёи доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.
Весе́лие мирско́е пресецы́ и душетле́нное пристра́стие умертви́ во мне, Де́во,/ презре́ние вре́менных, жела́ние ве́чных благ и нетле́нную ра́дость пода́ждь ми с пою́щими:/ отце́в Бо́же, благослове́н еси́.
Безчи́нное весе́лие и изли́шество, ум вредя́щее, душе́ скве́рну ражда́ющее, отлучи́ от мене́, Де́во,/ и сподо́би во здра́вии душе́внем и теле́снем духо́внаго утеше́ния наслажда́тися с пою́щими:/ отце́в Бо́же, благослове́н еси́.
Грехо́м, смерть лю́тую ражда́ющим, оскверни́х ду́шу мою́,/ но Ты, Пречи́стая Влады́чице, огнезра́чная и неопали́мая Купина́ я́вльшися,/ ти́ну страсте́й мои́х изсуши́ огне́м Бо́жия благода́ти и наста́ви мя на богоуго́дное житие́,/ украси́ же воздержа́нием и целому́дрием и даждь ми чи́стым се́рдцем пе́ти:/ отце́в Бо́же, благослове́н еси́.
К Твое́й огнезра́чней ико́не взира́я, молю́ Тя, Влады́чице,/ омраче́ннаго мя самолю́бием све́том зра́ка Твоего́ просвети́/ и, по́хоти плотски́я укроти́вши во мне, огне́м Бо́жия любве́ хла́дное се́рдце мое́ воспламени́,/ да Ро́ждшемуся от Тебе́ досто́йно возмогу́ пе́ти:/ отце́в Бо́же, благослове́н еси́.
Песнь 8
Ирмо́с: Царя́ Небе́снаго,/ Его́же пою́т во́и а́нгельстии,// хвали́те и превозноси́те во вся ве́ки.
Возмуще́ние души́ моей утоли́, Всенепоро́чная,/ от клеветы́ наве́тующих изба́ви мя,/ вражду́ грехо́вную во мне укроти́ и не́нависть мра́чную отврати́ от мене́, Де́во,/ да прославля́ю Тя, Чи́стая, во ве́ки.
Огнь я́рости, во мне зело́ разжже́нный, росо́ю благода́тныя моли́твы Твоей угаси́,/ хулу́, умножа́ющую души́ мое́й озлобле́ние, и вся́кий вид зло́бы, гнездя́щийся в се́рдце мое́м, искорени́, Де́во,/ да Тя прославля́ю, Чи́стая, во ве́ки.
Образ Христо́в ева́нгельскими доброде́тельми напиши́ в души́ мое́й, Богоблагода́тная,/ укрепи́ и утверди́ мя во вся́ком де́ле бла́зе, от вся́кия же зло́бы отврати́ се́рдце мое́,/ да ми́рными усты́ прославля́ю Тя, Чи́стая, во ве́ки.
Кро́тким о́ком Твои́м виждь мое́ смире́ние, Пренепоро́чная Богоневе́сто,/ и приклони́ у́хо Твое́ к моли́тве се́рдца моего́,/ кро́тостию и незло́бием благоукраси́ мя, помраче́ннаго безобра́зием зло́бных страсте́й,/ и сотвори́ прича́стника блаже́нства, кро́тким обетова́ннаго,/ да ра́дуяся прославля́ю Тя, Чи́стая, во ве́ки.
Песнь 9
Ирмо́с: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще.
Ско́рби се́рдца моего́ утиши́, Ра́досте скорбя́щих,/ уны́ние душегуби́тельное отыми́ от мене́, Утоли́тельнице печа́ли,/ и ле́ность ко взыска́нию доброде́телей искорени́ во мне, Взыска́ние поги́бших,/ да Тебе́, Де́во Чи́стая, непреста́нно велича́ю.
Малоду́шием боле́знующаго мя оживи́, Цели́тельнице боля́щих,/ отча́янием па́дшаго мя возста́ви, Одиги́трие заблу́ждших,/ грехми́ умерщвле́ннаго мя воскреси́, Спору́чнице гре́шных,/ да Тебе́, Де́во Непоро́чная, непреста́нно велича́ю.
Усе́рдие во мне твори́ти во́лю Бо́жию возбуди́/ и ре́вность ко сла́ве Бо́жией воспламени́ в се́рдце мое́м,/ Купино́ огнезра́чная и неопали́мая,/ и благогове́йна служи́теля Христо́ва соде́лай мя, Де́во,/ Предводи́тельнице моего́ спасе́ния.
Слеза́ми покая́ния и умиле́ния изсо́хшую в зно́й страсте́й ду́шу мою́ умягчи́, я́ко руно́ ороше́нное Гедео́на,/ и сокруше́ние к исправле́нию даждь ми, Де́во,/ да ве́чная бла́га унасле́дую и с ли́ки избра́нных Бо́жиих воспою́ Тя,/ Хода́таицу моего́ спасе́ния.
Свети́лен:
Ико́ну Твою́ всечестну́ю в зало́г благоволе́ния Твоего́ ве́рным дарова́ла еси́, Влады́чице,/ покрыва́ющи и сохраня́ющи е́ю от о́гненнаго запале́ния на Тя упова́ющия./ О Ма́ти Царя́ Христа́ Бо́га, бу́ди и нам, гре́шным,/ прибе́жище спасе́ния в неча́янных беда́х и Хода́таица ве́чныя жи́зни.
На хвали́тех стихи́ры на 4, глас 6:
О, вели́кия бла́гости/ и неисче́тнаго милосе́рдия Твоего́, Влады́чице!/ Удивля́вши нас пресла́вными чудесы́,/ и́хже источа́ет ико́на Твоя́ свята́я,/ во о́бразе неопали́мыя купины́ Тя изобразу́ющая/ и о́гненнаго естества́ си́лу укроща́ющая/ си́лою Твое́ю Боже́ственною./ ю́же с весе́лием прие́млюще,/ Тя, Чи́стую Богоотрокови́цу,// достодо́лжно пе́сньми почита́ем и ублажа́ем.
О, благосе́рдаго Твоего́/ о нас промышле́ния, Влады́чице!/ В годи́ну бед и обстоя́ний,/ егда́ внеза́пное запале́ние о́гненное/ обы́мет жили́ща на́ша,/ чу́дную ико́ну Твою́/ посыла́еши нам в по́мощь и защи́ту/ и е́ю укроща́вши свире́пство огня́,/ я́ко Ма́ти су́щи/ стихи́ями облада́ющаго Влады́ки Христа́./ Те́мже велегла́сно пропове́дуем Твоя́ чудеса́/ и ми́лость мно́гу к ро́ду христиа́нскому/ и пе́сньми хвале́бными// немо́лчно Тя велича́ем и ублажа́ем.
О, пресла́внаго чудесе́!/ Ка́ко огнезра́чная ико́на Твоя́, Влады́чице,/ огня́ си́лу угаша́ет/ и све́тлыми луча́ми Бо́жия благода́ти/ умы́ просвеща́ет и сердца́ весели́т?/ Вои́стину бо торжество́ благоче́стия/ явле́ние ико́ны Твоея́ познава́юще,/ пра́зднуем сие́ в пе́снех духо́вных ра́достно/ и Тя, Богоблагода́тная Де́во, Вино́вницу ра́дости на́шей,// славословле́ния гла́сы восхваля́ем и ублажа́ем.
Сла́ва, и ны́не, глас то́йже:
О чу́до чуде́с,/ Богоневе́стная Ма́ти и Де́во!/ Чудотвори́ти не престае́ши и ны́не/ ико́ною Твое́ю пречестно́ю,/ отра́ду и утеше́ние е́ю да́руеши/ стра́нником земны́м в юдо́ли ско́рби и пла́ча./ Из Тебе́ бо воплоти́ся/ Обнови́тель па́дшаго естества́ челове́ча,/ сый Бог наш,/ дарова́вый нам Тебе́ в покро́в и защи́ту,/ Иже слы́шит моли́тву Твою́,/ за нас приноси́мую,/ и преклоня́ется к моле́нию Твоему́ Ма́тернему,/ егда́ умоля́вши бла́гость Его́ за лю́ди согреши́вшия./ Те́мже не преста́й, благосе́рдая Влады́чице,/ предста́тельствовати за вся ны, чту́щия Тя,// я́ко вои́стину еси́ Хода́таица непосты́дная на́шего спасе́ния.
Славосло́вие вели́кое, ектении́ и отпу́ст.
Н литурги́и
Блаже́нны от кано́на, пе́сни 3-я и 6-я.
Проки́мен, глас 3, песнь Богоро́дицы: Вели́чит душа́ Моя́ Го́спода,// и возра́довася дух Мой о Бо́зе, Спа́се Мое́м.
Стих: Я́ко призре́ на смире́ние Рабы́ Своей, се бо от ны́не ублажа́т Мя вси ро́ди.
Апо́стол к Филипииси́ем, зача́ло 240.
Аллилу́йя, глас 8.
Стих: Слы́ши, Дщи, и виждь, и приклони́ у́хо Твое́.
Ева́нгелие от Луки́, зача́ло 54.
Прича́стен: Ча́шу спасе́ния прииму́:
Молитва
О Пресвята́я и Преблагослове́нная Ма́ти Сладча́йшаго Го́спода на́шего Иису́са Христа́! Припа́даем и покланя́емся Тебе́ пред свято́ю и пречестно́ю ико́ною Твое́ю, е́юже ди́вная и пресла́вная чудеса́ содева́еши, от о́гненнаго запале́ния и молниено́снаго гро́ма жили́ща на́ша спаса́вши, неду́жныя исцеля́вши и вся́ко благо́е проше́ние на́ше во бла́го исполня́вши. Смире́нно мо́лим Тя, всеси́льная ро́да на́шего Засту́пнице: сподо́би ны, немощны́я и гре́шныя, Твоего́ Ма́терняго заступле́ния и благопопече́ния. Спаси́ и сохрани́, Влады́чице, под кро́вом ми́лости Твоея́ Це́рковь святу́ю, град сей (или́: весь сию́, или́: оби́тель сию́), всю страну́ на́шу правосла́вную и вся ны, припа́дающия к Тебе́ с ве́рою и любо́вию и со умиле́нными слеза́ми Твоего́ заступле́ния прося́щия. Ей, Госпоже́ Всеми́лостивая! Умилосе́рдися на нас, обурева́емых грехи́ мно́гими и не иму́щих дерзнове́ния ко Христу́ Го́споду проси́ти Его́ о поми́ловании и проще́нии: Тебе́ у́бо предлага́ем к Нему́ на умоле́ние, Ма́терь Его́ су́щую. Простри́ к Нему́, о Всеблага́я, богоприи́мнеи ру́це Твои́ и предста́тельствуй за нас пред Его́ бла́гостию, прося́щи нам проще́ния прегреше́ний на́ших, благоче́стнаго ми́рнаго жития́, благи́я христиа́нския кончи́ны и добраго отве́та на стра́шнем суде́ Его́. В час же гро́знаго посеще́ния Бо́жия, а́ще огне́м возгоря́тся до́мове на́ши, а́ще ли молниено́сным гро́мом устраша́еми бу́дем, яви́ нам ми́лостивное Твое́ заступле́ние и держа́вное вспоможе́ние да спаса́еми вееси́льными Твои́ми ко Го́споду моли́твами, вре́меннаго наказа́ния Бо́жия зде избе́гнем, ве́чное же блаже́нство ра́йское та́мо унасле́дуем и со все́ми святы́ми воспое́м пречестно́е и великоле́пое и́мя покланя́емыя Тро́ицы, Отца́ и Сы́на и Свята́го Ду́ха, и Твое́ ве́лие к нам милосе́рдие, во ве́ки веко́в. Ами́нь.
