Вече́р

На Го́споди, воззва́х: стихи́ры на 6, глас 8.

Подо́бен: Что вы нарече́м, святи́и:

Стра́сти победи́в теле́сныя/ воздержа́ния уздо́ю,/ чудоде́йственне Кириа́че,/ безстра́стия во све́тлую, о́тче, оде́ялся еси́ ри́зу,/ и всю зло́бу обнажи́л еси́/ дре́вле пра́отцы обнажи́вшаго,/ и ны́не обита́еши в раи́, всегда́ веселя́ся.// Моли́ спасти́ся душа́м на́шим.

Нося́ крест на ра́мех твои́х,/ после́дствовал еси́ Христу́ невозвра́тным по́мыслом,/ жите́йских сласте́й небре́г, Кириа́че,/ и стра́сти умертви́в теле́сныя/ спротяже́нными бде́нии и моли́твами,/ благода́ть взял еси́, преподо́бне,/ лечи́ти неду́ги.// Моли́ спасти́ся душа́м на́шим.

В пусты́ню всели́лся еси́, преподо́бне,/ пи́щу, Кириа́че, го́рькое бы́лие творя́,/ и, чу́вство огорчева́я,/ душе́вный сла́сти/ из ко́рене истерза́л еси́, блаже́нне,/ тем тя Небе́сное наслажде́ние по кончи́не прия́т,/ а́нгельски пожи́вша.// Моли́ спасти́ся душа́м на́шим.

Сла́ва, глас 8:

Мона́хов мно́жества/ наста́вника тя почита́ем, о́тче наш Кириа́че,/ твое́ю бо стезе́ю вои́стину пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ Ангелов собесе́дниче, преподо́бных соприча́стниче и пра́ведных,/ с ни́миже моли́ся Го́сподеви,// поми́ловатися душа́м на́шим.

И ны́не, Богоро́дичен или́ Крестобогоро́дичен.

Подо́бен: О, пресла́внаго чудесе́:

А́гница, А́гнца я́ко ви́де/ на Дре́ве просте́рта во́лею кре́стнем,/ вопия́ше Ма́терски,/ боле́знующи с пла́чем:/ Сы́не Мой, что стра́нное сие́ виде́ние?/ Всем жизнь дая́й, я́ко Госпо́дь,/ ка́ко умерщвля́ешися, Долготерпели́ве,/ земны́м подая́ воскресе́ние?// Сла́влю Твое́ мно́гое, Бо́же Мой, снизхожде́ние.

На стихо́вне Окто́иха.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монов разруши́л еси́ полки́,/ А́нгелов пости́гл еси́ чи́ны,/ и́хже житию́ непоро́чно поревнова́л еси́./ Дерзнове́ние име́я ко Го́споду,// мир испроси́ душа́м на́шим.

И ны́не, Богоро́дичен или́ Крестобогоро́дичен.

Подо́бен: Тридне́вен:

Ви́дящи Тя распина́ема, Христе́,/ Тебе́ Ро́ждшая вопия́ше:/ что стра́нное, е́же ви́жу, та́инство, Сы́не Мой?/ Ка́ко на Дре́ве умира́еши,/ пло́тию пове́шен,// жи́зни Пода́телю?

Тропа́рь, глас 1:

Пусты́нный жи́тель, и в телеси́ А́нгел,/ и чудотво́рец показа́лся еси́, богоно́се о́тче наш Кириа́че,/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою притека́ющих к тебе́./ Сла́ва Да́вшему тебе́ кре́пость,/ сла́ва Венча́вшему тя,// сла́ва Де́йствующему тобо́ю всем исцеле́ния.

На у́трени

О́ба кано́на Окто́иха без му́ченичнов.

И свята́го на 6. Творе́ние Стефа́ново, его́же краегране́сие: Кириа́че, бу́ди к Бо́гу предста́тель. Глас 8.

Песнь 1

Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:// пои́м Тебе́, Еди́ному Влады́це.

Сла́ву боже́ственнаго ра́зума, Христе́, пода́ждь ми и благода́ть/ преподо́бнаго досто́йно Кириа́ка воспе́ти, того́ моли́твами:/ Ты бо еси́ па́че сло́ва Сокро́вище му́дрых уче́ний.

Песнь принося́щаго тебе́ ны́не, Кириа́че блаже́нне, благосе́рдно прии́м,/ боже́ственней причасти́тися мне Христа́ умоли́ лучи́ и светозаре́нию/ и су́що получи́ти спасе́ния.

Си́лою Влады́чнею кре́пко утвержда́емь, Того́же стопа́ми, о́тче, после́довав,/ нача́льники тьмы, Кириа́че всеблаже́нне, победи́л еси́/ и к вы́шнему дости́гл еси́ поко́ю.

Ра́вну показа́л еси́ на земли́ к безпло́тным реть,/ все покори́в плотско́е мудрова́ние Живоно́сному Ду́ху,/ тем в Небе́сных ны́не лику́еши с ни́ми дво́рех, богоно́сне.

Богоро́дичен: Пе́сньми Пречи́стую Мари́ю, ве́рнии, похва́лим,/ Богома́терь облагода́тствованную, покро́в боже́ственный, ти́хое приста́нище,/ всех ве́рных спасе́ние.

Песнь 3

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:// несть пра́веден па́че Тебе́, Го́споди.

Непреста́нно ше́ствовав жи́зни стезю́,/ измла́да бо возлюби́л еси́ Творца́ твоего́, преподо́бне,/ Его́же жа́ждая иска́л еси́, еле́ня подо́бяся тече́нию на исто́чники вод.

На серде́чней досце́ написа́ние твое́ прие́м, богоглаго́ливе,/ персто́м Ду́ха,/ я́ко одушевле́нная кни́га,/ де́йственно соблю́л еси́ Христо́вы живи́тельныя за́поведи.

Удержав, преподо́бне, в поста́х чре́во,/ ла́комственная жела́ния и плотску́ю сла́дость ты умертви́л еси́,/ с чистото́ю, о́тче, пожи́в чрез все житие́.

Веселя́ся, разу́мный Тро́ице храм тебе́ само́го сотвори́л еси́,/ ум очища́я, и те́ло, и дух, треблаже́нне,/ и был еси́ прия́телище Трисо́лнечнаго Све́та.

Богоро́дичен: Де́ва родила́ еси́, Неискусобра́чная,/ и Де́ва пребыла́ еси́, Ма́ти безневе́стная,/ Богоро́дице Мари́е, Христа́ Бо́га на́шего моли́, спасти́ся нам.

Ин конда́к, глас 8.

Подо́бен: Взбра́нной:

Я́ко побо́рника кре́пкаго и засту́пника/ чту́щи тя свяще́нная ла́вра всегда́,/ пра́зднует ле́тне па́мяти./ Но, я́ко име́я дерзнове́ние ко Го́споду,/ от враго́в находя́щих соблюди́ ны, да зове́м:// ра́дуйся, о́тче треблаже́нне.

Седа́лен,глас 5.

Подо́бен: Собезнача́льное:

Воздержа́нием житие́ твое́ украси́л еси́,/ и, у́ды умертви́в,/ победи́л еси́ вра́жия прило́ги, о́тче преподо́бне,/ и пусты́ни насе́льник, свети́льник же ми́ра у́мный, Кириа́че, яви́лся еси́./ Тем моли́ся Го́споду поми́ловати ду́ши на́ша.

Сла́ва, и ны́не, Богоро́дичен:

Тя приста́нище, и сте́ну, и прибе́жище, и наде́жду,/ и покро́в, и Предста́тельницу те́плую обре́тше, ве́рнии,/ к Тебе́ притека́ем, и вопие́м приле́жно, и взыва́ем ве́рно:/ поми́луй, Богоро́дице, на Тя упова́ющия и от прегреше́ний изба́ви.

Крестобогоро́дичен:

Кресто́м Сы́на Твоего́, Богора́дованная,/ и́дольская лесть вся упраздни́ся и де́монская кре́пость попра́ся,/ сего́ ра́ди, ве́рнии, по до́лгу Тя всегда́ пое́м, и благослови́м,/ и, Богоро́дицу и́стинно испове́дающе Тя, велича́ем.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра о́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Ужасе́ся твоего́ со́лнце воздержа́ния и кре́пости,/ ле́ты мно́гими тя гне́вающася не возмо́же отню́д ви́дети,/ ниже́ во дни пи́щи прие́млюща, преподо́бне,/ благомо́щно песнопою́ща бде́нии непреста́нными:/ си́ле Твое́й сла́ва, Человеколю́бче.

Зако́ны но́выми и Ве́тхим Заве́том, му́дре,/ ра́зумом, блаже́нне, святы́х муже́й поуча́яся,/ вся́кия доброде́тели вид навы́к, му́дрыя пчелы́ нра́ву ревну́я,/ и сосу́д быв избра́нен, вопия́л еси́:/ си́ле Твое́й сла́ва, Человеколю́бче.

Бога́тство сла́дости, хвала́ и ра́дость преподо́бных еси́, Христе́ Бо́же,/ того́ ра́ди любя́й Тя Кириа́к/ вся в ми́ре уте́шная вмени́ уме́ты,/ тем и в пусты́нях непроходи́мых/ любе́зне наслажда́шеся Твоея́ красоты́.

Вем дре́вле Ме́ррския сладча́йшия во́ды проро́ка,/ зе́лий же го́рькую ядь преложи́в ты, Кириа́че, в сла́дкое вкуше́ние,/ дерзнове́ние показу́еши я́ве ко Го́споду,/ и́стинно Своя́ рабы́ Боже́ственною си́лою сла́вящему.

Я́ко учени́к и подража́тель Влады́ки Христа́,/ ра́бия лу́нствующася сы́на, о́тче, моли́твою исцеля́еши,/ благода́ть прие́м неду́ги отгоня́ти/ и де́монския полки́ низлага́ти/ о́бразом Боже́ственнаго Креста́.

Богоро́дичен: Ты ве́рных хвала́ еси́, Безневе́стная,/ Ты Предста́тельница, Ты и прибе́жище христиа́н,/ стена́ и приста́нище,/ к Сы́ну бо Твоему́ мольбы́ но́сиши, Всенепоро́чная,/ и от бед спаса́еши ве́рою и любо́вию/ Богоро́дицу Чи́стую Тя сла́вящия.

Песнь 5

Ирмо́с: Вску́ю мя отри́нул еси́/ от Лица́ Твоего́, Све́те незаходи́мый,/ и покры́ла мя есть чужда́я тьма, окаяннаго?/ Но обрати́ мя и к све́ту за́поведей Твои́х// пути́ моя́ напра́ви, молю́ся.

От Христа́ прие́м непобеди́мую благода́ть Ду́ха,/ низложи́л еси́ у́бо держа́вно лю́таго мироде́ржца,/ душе́вныя стра́сти удержа́в, Кириа́че,/ безстра́стия венце́м венча́лся еси́.

Кре́пок яви́лся еси́, боле́зньми поще́ния терпе́в тве́рдо,/ до ста́рости пребы́в глубоча́йшия неосла́блен, преподо́бне,/ в пусты́нях, я́ко ца́рских дворо́в в черто́зех,/ со мно́гим весе́лием живя́.

Всено́щная соверша́я, блаже́нне, бде́ния/ и к Бо́гу исходя́ не го́рдостно, моли́твою Невеще́ственному бесе́дуеши Уму́/ и све́тлыя приима́л еси́, Кириа́че, све́та лучи́,/ светода́тельне умо́м просвеща́емь.

Светоно́сия испо́лнився и проро́ческаго дарова́ния, преподо́бне,/ чи́стый твой язы́к провозвести́/ му́чащаго дре́вле неду́га Ориге́нова, вредоу́мнаго и душетле́ннаго,/ отню́д соверше́нное истребле́ние.

Богоро́дичен: Разу́мно уве́де проро́ков сосло́вие Твоя́ та́инства,/ Небе́сную бо дверь Влады́ка Тя показа́, Чи́стая,/ и из Тебе́, Де́во, воплоти́вся,/ пра́вды су́щим во тьме возсия́ Со́лнце.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Те́бе бо возопи́х, и услы́ши мя,// Бо́же спасе́ния моего́.

Бог положе́нием быв/ Христа́ обоже́нием, су́щаго естество́м Бо́га,/ есте́ственныя ра́ны неможе́ния исправля́л еси́, блаже́нне,/ неду́жныя исцеля́я, бесну́ющияся а́бие леча́ боже́ственною благода́тию.

Избежа́л еси́ к тебе́ приходя́щаго мно́жества наро́да/ и па́ки стра́шныя пото́ки пости́гл еси́,/ уклоня́яся, приснопа́мятне,/ тщих похва́л челове́ческих сла́виц.

Я́ко сна тле́ннаго ми́ра всю сла́ву зря,/ Еди́наго Живу́щаго Бо́га лу́чшия сла́вы возлюби́л еси́ прича́стник бы́ти,/ ея́же, му́дре, пра́ведно сподо́бился еси́.

Богоро́дичен: Я́ко одушевле́нный киво́т, прия́ла еси́ Сло́во Безнача́льное,/ я́ко свято́е святи́лище, Созда́теля вмести́ла еси́,/ я́ко престо́л огнеобра́зный, но́сиши Влады́ку, Богома́ти, всея́ тва́ри.

Конда́к, глас 2.

Подо́бен: Вы́шних ища́:

Чистото́ю душе́вною боже́ственно вооружи́вся/ и непреста́нную моли́тву, я́ко копие́, вручи́в кре́пко,/ ссекл еси́ де́монская ополче́ния,/ Кириа́че, о́тче наш,// моли́ся непреста́нно о всех нас.

И́кос:

Ка́ко восхвалю́ окая́нный аз твоя́ по́двиги, преподо́бне о́тче?/ Слез же ка́ко пучи́ну отры́гну?/ Ты бо, в житии́ преизя́ществуя, а́нгельский пости́гл еси́ лик./ Вся не́гли воздержа́нием стра́сти умертви́л еси́, му́дре,/ и, плоть порабо́тив, покори́л еси́ сию́ ду́ху,/ моли́тву же име́я, я́ко меч, тьмы предста́теля низложи́л еси́,/ моли́ся непреста́нно о всех нас.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.

Зако́нов и слове́с богодохнове́нных/ наслади́ горта́нь поуче́нием па́че ме́да Твой ве́рнейший уго́дник:/ благослове́н еси́, Го́споди, песнопоя́, Бо́же, во ве́ки.

Блаже́нне богоглаго́ливе, приво́диши пою́щия тя Христу́/ очище́ны от ти́ны страсте́й моли́твами твои́ми,/ вопию́щия, Кириа́че, и глаго́лющия:/ благослове́н еси́, Го́споди Бо́же, во ве́ки.

Львов избежа́в свере́пства, Дании́л просла́вися,/ слуги́ же тех имя́ше повелева́я Кириа́к, зовы́й Тебе́:/ благослове́н еси́, Го́споди Бо́же, во ве́ки.

Всю Ду́ха благода́ть всели́, Христе́,/ рачи́тель бо Твоея́ пречи́стыя добро́ты/ бысть вседу́шно Кириа́к, зовы́й Тебе́:/ благослове́н еси́, Го́споди Бо́же, во ве́ки.

Тро́ичен: Дея́нию приложи́в виде́ние,/ Триипоста́сное пропове́дал еси́ Существо́, во Отце́ и Сы́не и Ду́се,/ зовы́й, Кириа́че богоприя́тне:/ благослове́н еси́, Го́споди Бо́же, во ве́ки.

Богоро́дичен: Угаси́ пла́мень страсте́й мои́х и укроти́ ересе́й бу́рю, Богома́ти:/ Тя бо и́мамы Предста́тельницу христиа́не и Побо́рницу/ и Тя ве́рою воспева́ем во ве́ки.

Песнь 8

Ирмо́с: Победи́тели мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:// благослови́те, вся дела́ Госпо́дня, Го́спода.

Тече́ньми слез напои́л еси́, блаже́нне,/ свяще́нную твою́ ду́шу умиле́нием боже́ственным/ и многопло́дну показа́л еси́, поя́:/ благослови́те, вся дела́, Го́спода и превозноси́те Его́ во ве́ки.

Фесви́тянин дре́вле су́шею пресуши́ ту́чныя ка́пли,/ ты же дождя́ проли́тие на во́зраст жа́твы низве́л еси́, всеблаже́нне, поя́:/ благослови́те, вся дела́, Го́спода и превозноси́те Его́ во ве́ки.

Ты злосла́вных лесть обличи́л еси́,/ Ориге́на ученико́в мудрова́ния, до́блими по́двиги:/ благослови́те, поя́, правосла́вно Го́спода и превозноси́те Его́ во ве́ки.

Тро́ичен: Тро́ицы Еди́но благоче́стно научи́л еси́, о́тче, Существо́,/ в трех со́лнцех я́ко еди́ну зарю́ же и све́тлость:/ благослови́те, глаго́ля, правосла́вно Го́спода и превозноси́те Его́ во ве́ки.

Богоро́дичен: Ада́ма, Де́во, падшаго яви́лася еси́ дщи,/ Бо́жия же Ма́ти Обнови́вшаго мое́ существо́,/ Его́же пое́м, вся дела́, я́ко Го́спода и превозно́сим во вся ве́ки.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к.// Те́мже Пречи́стую Богоро́дицу, ве́рнии, велича́ем.

Верте́п тя, му́дре, прия́т, прие́мшаго исто́чник благода́тный,/ чудоде́йствовавша боже́ственнаго дре́вле отца́ Харито́на моисе́йски, Кириа́че,/ и стена́ незы́бленна па́стве онаго был еси́ и храни́тель тверде́йший.

Су́що раче́нием жи́зни крест на ра́мена взем,/ житие́, Кириа́че, поуче́ние положи́л еси́ сме́рти,/ тем и ны́не к нестаре́ющейся преста́вился еси́ сла́дости нетле́нней,/ Небе́сным лико́м во све́те при Бо́зе сликовству́еши при́сно.

Облиста́в заре́ю, разже́гся Ду́ха, и яви́лся еси́ превы́шним ликостоя́нием све́тел,/ но озари́ мой ум, блаже́нне, разу́мным и трисия́нным Све́том Божества́ моли́твами твои́ми/ и от страсте́й мя и прегреше́ний спаси́.

Венча́вшеся победи́тельною диади́мою, Харито́не богоглаго́ливе и Кириа́че блаже́нне,/ и предстоя́ще в высоча́йших Христу́,/ па́ству свою́ оте́чески от бед избавля́юще,/ ны́не призира́йте пра́зднующую ва́ша па́мяти.

Богоро́дичен: Напрязи́, и благопу́тствуй, и ца́рствуй, Сы́не Богома́тере,/ исма́ильтянина врага́ покаря́я, ра́тующаго ны, христолюби́вому во́инству,/ моли́твами, мо́лимся, Ро́ждшия Тя неискусому́жно,/ я́ко Бог и Человеколю́бец.

Свети́лен.

Подо́бен: Ду́хом:

Ду́шу очи́стив, преподо́бне, страсте́й омраче́ния/ зе́льным посто́м и моли́твою непреста́нною,/ зерца́ло, о́тче, был еси́ боже́ственных осия́ний,/ возвожде́ния посыла́я нам ны́не,/ свети́льниче мона́хов, Кириа́че богоно́се.

Сла́ва, и ны́не, Богоро́дичен:

И́стинно Богоро́дицу Тя испове́дуем, Влады́чице, Тобо́ю спа́сшиися,/ и́бо Бо́га неизрече́нно родила́ еси́, разруши́вшаго Кресто́м смерть,/ к Себе́ же привле́кша преподо́бных собо́ры,/ с ни́миже Тя восхваля́ем, Де́во.

На стихо́вне Окто́иха.

Сла́ва, глас 5:

Преподо́бне о́тче,/ не дал еси́ сна твои́м очесо́м,/ ни ве́ждом твои́м дрема́ния,/ до́ндеже ду́шу и те́ло от страсте́й свободил еси́/ и тебе́ сама́го угото́вал еси́ Ду́ху жили́ще,/ прише́д бо Христо́с со Отце́м,/ оби́тель у тебе́ сотвори́,/ и, Единосу́щныя Тро́ицы уго́дник быв,/ великопропове́дниче о́тче наш Кириа́че,// моли́ся о душа́х на́ших.

И ны́не, Богоро́дичен или́ Крестобогоро́дичен.

Подо́бен: Ра́дуйся:

Егда́ Гро́зда невсажде́нна,/ Его́же, я́ко розга́, прорасти́,/ узре́ на Дре́ве ви́сяща/ и копие́м пробода́ема Боже́ственная ре́бра:/ что се, глаголаше, Сы́не и Бо́же?/ Ка́ко, И́же неду́ги вся и стра́сти исцели́вый,/ Страсть прие́млеши,/ Безстра́стный по естеству́ сый Божество́м?/ Что Ти невозблагода́тнии лю́дие,/ Благоде́телю, сия́ возда́ша вме́сто благодея́ний?/ вопия́ше Пречи́стая./ Но Того́ Страстьми́ от страсте́й мя изба́вити/ моли́ся непреста́нно,// я́ко да сла́влю Тя.

На литурги́и

Блаже́нны Окто́иха, на 4, и преподобнаго, песнь 3-я на 4. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́йя, глас 6: Блаже́н муж, боя́йся Го́спода: Стих: Си́льно на земли́ бу́дет се́мя Его́. Ева́нгелие от Луки́, зача́ло 24. Прича́стен: В па́мять ве́чную бу́дет пра́ведник: