Вече́р

Блаже́н муж: 1-й антифо́н.

На Го́споди, воззва́х: стихи́ры на 6, глас 4.

Подо́бен: Дал еси́ зна́мение:

Стра́сти теле́сныя/ воздержа́нием увяди́л еси́/ и приле́жным моле́нием,/ зми́я льсти́ваго слез ту́чами потопи́л еси́, блаже́нне,/ и благоугоди́л еси́ Бо́гу попремно́гу,/ Харито́не преподо́бне;/ тем украси́ тя Небе́сными дарми́/ Иису́с Человеколю́бец// и Спас душ на́ших.

По́том поще́ния/ угаси́л еси́ у́глие страсте́й, досточу́дне,/ огню́ приобща́яся ра́нами и боле́зньми,/ испове́дав пред беззако́нными мучи́тели/ вопло́щшагося Сло́ва истоща́ние,/ и свиде́тель был еси́,/ упещре́н ра́нами/ многообра́зных мук,// богоно́се Харито́не пребога́те.

В пусты́нях и гора́х/ ты, бе́гая, удали́лся еси́,/ ду́шу соблю́д нескве́рну, свяще́ннейше,/ и Тро́ицы дом, Харито́не, показа́лся еси́,/ Ея́же си́лою/ свяще́нныя созда́л еси́ до́мы, блаже́нне,/ и огра́ды на спаси́тельное мона́шествующих устрое́ние,/ честву́ющих па́мять твою́ святу́ю,// приснопа́мятне.

Сла́ва, глас 4. Иоа́нна мона́ха:

Богоно́се Харито́не,/ ты и по сме́рти на Небеса́х живе́ши во Христе́,/ Его́же ра́ди ми́ру тя распя́л еси́,/ вне бо пло́ти и ми́ра быв,/ па́че ви́димых пожи́л еси́ и́стинно:/ не бо жил еси́ тебе́ самому́,/ живя́ше же па́че в тебе́ Христо́с Бог наш.// Того́ моли́ спасти́ся душа́м на́шим.

И ны́не, Богоро́дичен: Иже Тебе́ ра́ди:

Вход. Проки́мен дне. Чте́ния три преподо́бническая 

На стихо́вне стихи́ры, глас 1.

Подо́бен: Всехва́льнии му́ченицы:

Харито́не прехва́льне,/ твое́ житие́ возложи́л еси́/ доброде́телей попече́нием:/ песносло́вием бо правове́рною ве́рою/ Христа́ похваля́ют,/ твои́м покаря́ющеся уче́нием,/ и́мже, предстоя́,/ утверди́тися умоли́ в ми́ре// Боже́ственнаго Ду́ха.

Стих: Честна́ пред Го́сподем// смерть преподо́бных Его́.

Харито́не богодохнове́нне,/ твое́ житие́ у́бо ра́вно А́нгелом/ земны́м объяви́ся,/ Небе́сным же я́ко благово́нная же́ртва/ и до́брое кади́ло/ твое́ испове́дание принесе́ся./ И ны́не моли́ся,/ дарова́ти душа́м на́шим// мир и ве́лию ми́лость.

Стих: Блаже́н муж боя́йся Го́спода,/ в за́поведех Его́ восхо́щет зело́.

Харито́не пребога́те,/ страсте́й победи́тель был еси́/ и разбо́йники победи́л еси́,/ венцено́сцем сликовству́я, блаже́нне;/ о всех помина́й,/ соверша́ющих твою́ па́мять,/ ны́не Христу́ моли́ся/ дарова́ти душа́м на́шим/ мир и ве́лию ми́лость.

Сла́ва, глас 8:

Мона́хов мно́жества/ наста́вника тя почита́ем, о́тче наш Харито́не,/ твое́ю бо стезе́ю вои́стину пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных,/ с ни́миже моли́ся Го́споду,/ поми́ловатися душа́м на́шим.

И ны́не, Богоро́дичен: Безневе́стная Де́во:

Тропа́рь, глас 8:

Слез твои́х тече́ньми пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нныя,/ сия́я чудесы́, Харито́не, о́тче наш;// моли́ Христа́ Бо́га спасти́ся душа́м на́шим.

Сла́ва, и ны́не, Богоро́дичен: И́же нас ра́ди рождёйся:

На у́трени

Тропа́рь два́жды. Сла́ва, и ны́не, Богоро́дичен.

По 1-м стихосло́вии седа́лен, глас 4.

Подо́бен: Вознесы́йся:

Земны́х и тле́нных наслажде́ние презре́в, Христу́ после́довал еси́/ и пусты́нныя жи́тели возлюби́л еси́ па́че ми́ра красоты́ и сла́дости привре́менныя,/ отону́дуже сподо́бился еси́ и свиде́тельства, и по́стничества лико́м сочета́тися,/ с ни́миже моли́ спасти́ся рабо́м твои́м.

Сла́ва, и ны́не, Богоро́дичен:

На Престо́ле херуви́мстем седя́й/ и в не́дрех Отчих водворя́яйся,/ я́ко на Престо́ле святе́м седи́т Своём, Влады́чице, в не́дрех Твои́х:/ вопло́щся бо, Бог и́стинно воцари́ся над все́ми язы́ки, и разу́мно ны́не пое́м Ему́,/ Его́же умоли́ спасти́ся рабо́м Твои́м.

По 2-м стихосло́вии седа́лен, глас 8.

Подо́бен: Прему́дрости:

Иоа́нна нра́вом Крести́теля/ и Илии́ Фесви́тянина доброде́телем посто́м подража́я,/ безплотно пожи́л еси́, со А́нгелы сла́вя Тро́ицу Безнача́льную/ и разбо́йников нахожде́ния побежда́я му́жеством./ Тем и страда́нием кре́пко подвиза́лся еси́,/ Христо́ву Боже́ственному воплоще́нию кла́няяся с Божество́м, Харито́не блаже́нне./ Моли́ Христа́ Бо́га грехо́в оставле́ние дарова́ти/ честву́ющим любо́вию святу́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х Тя, безсе́менно Бо́га пло́тию ро́ждшую,/ вси блажи́м, ро́ди челове́честии:/ Огнь бо всели́ся в Тя Божества́,/ и, я́ко Младе́нца, дои́ши Зижди́теля и Го́спода./ Те́мже, а́нгельский и челове́ческий род,/ досто́йно сла́вим всесвято́е Рождество́ Твое́ и согла́сно вопие́м Ти:/ моли́ Христа́ Бо́га прегреше́ний оставле́ние дарова́ти пою́щим досто́йно сла́ву Твою́.

По полиеле́и седа́лен, глас 4.

Подо́бен: Вознесы́йся:

Земны́х и тле́нных наслажде́ние презре́в, Христу́ после́довал еси́/ и пусты́нныя жи́тели возлюби́л еси́ па́че ми́ра красоты́ и сла́дости привре́менныя,/ отону́дуже сподо́бился еси́ и свиде́тельства, и по́стничества лико́м сочета́тися,/ с ни́миже моли́ спасти́ся рабо́м твои́м.

Сла́ва, и ны́не, Богоро́дичен:

По Бо́зе в Твой, Богоро́дице, прибега́ю, смире́нный, покро́в боже́ственный,/ припа́дая, молю́ся: поми́луй, Пречи́стая,/ я́ко превзыдо́ша главу́ мою́ греси́, и бою́ся, Влады́чице, мук и трепе́щу,/ моле́ние сотвори́, Чи́стая, к Сы́ну Твоему́, от сих изба́вити мя.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем,/ смерть преподо́бных Его́. Стих: Что возда́м Го́сподеви о всех, я́же воздаде́ ми?

Вся́кое дыхание: Ева́нгелие от Матфе́я, зача́ло 10.

По 50-м псалме́ стихи́ра, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ тем на Небесе́х обре́л еси́ мзду трудо́в твои́х,/ де́монов погуби́л еси́ полки́,/ А́нгелов пости́гл еси́ чи́ны,/ и́хже житию́ непоро́чно поревнова́л еси́./ Дерзнове́ние име́я ко Христу́ Бо́гу,// мир испроси́ душа́м на́шим.

Кано́н Богоро́дицы со ирмосо́м на 6 и преподо́бнаго на 8.

Кано́н Богоро́дицы, его́же краегране́сие:

Пою́ похвалу́ живоно́сней Отрокови́це. Глас 2.

Песнь 1

Ирмо́с: Нетре́ну, необы́чну,/ немо́кренно морску́ю ше́ствовав стезю́,/ избра́нный вопия́ше Изра́иль:// Го́сподеви пои́м, я́ко просла́вися.

Невеще́ственная дре́вле ле́ствица и стра́нно олядене́вший  путь мо́ря/ Твое́ явля́ше Рождество́, Чи́стая, е́же пое́м вси,/ я́ко просла́вися.

Си́ла Вы́шняго, Ипоста́сь соверше́нная, Бо́жия Му́дрость,/ вопло́щшаяся, Пречи́стая, из Тебе́, челове́ком приобщи́ся,/ я́ко просла́вися.

Про́йде сквозе́ дверь непрохо́дную заключе́нныя утро́бы Твоея́/ Пра́вды Со́лнце, Чи́стая, и ми́ру возсия́,/ я́ко просла́вися.

Кано́н свята́го, творе́ние Иоа́нна мона́ха. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Мо́ря стра́стнаго пучи́ну преплы́в,/ живоно́сным ору́жием Креста́/ фарао́на лука́ваго мы́сленнаго, блаже́нне,/ боже́ственною си́лою потопи́л еси́.

Го́споду возложе́н, блаже́нне, от ма́терних пеле́н,/ пред мучи́тельским суди́щем/ Христа́ богому́дренно пропове́дал еси́,/ Моисе́йски бо низложи́л еси́ противобо́рных шата́ния.

Пре́лести оста́вив Еги́пет, Харито́не преподо́бне,/ и пустынногра́жданин быв,/ чи́сто бесе́довал еси́ Чи́стому/ и прия́л еси́ Небе́сное насле́дие.

Богоро́дичен: Безсе́менно о́тчею во́лею/ от Боже́ственнаго Ду́ха Бо́жия Ты зачала́ еси́ Сы́на/ и пло́тию родила́ еси́,/ из Отца́ безма́терня и нас ра́ди из Тебе́ безо́тча.

Катава́сия: Отве́рзу уста́ моя́:

Песнь 3

Ирмо́с: Лук сокруши́ся си́льных/ держа́вою Твое́ю, Христе́,// и си́лою немощству́ющии препоя́сашася.

И́же вре́мене вне вся́каго, я́ко време́н Творе́ц,/ из Тебе́, Де́во, во́льно Младе́нец созда́ся.

Чре́во, простра́ннейшее Небе́с, воспои́м,/ и́мже Ада́м на Небеса́х, ра́дуяся, жи́тельствует.

Ин

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Весели́тся о тебе́ ученико́в слове́сная па́ства твоя́ духо́вно, преподо́бне,/ твое́й обща́щися све́тлости.

Мудрова́ние плотско́е, я́ко вино́вное вражды́ на Бо́га,/ жи́зни Духу, преподобне Харито́не, повину́л еси́.

Низложи́л еси́ дави́дски/ иноплеме́нника Голиа́фа, преподо́бне, мы́сленнаго си́лу/ всеору́жием Ду́ха.

Богоро́дичен: Ты еди́на су́щим на земли́/ па́че естества́ благи́х Хода́таица, Ма́ти Бо́жия, была́ еси́./ Тем Тебе́: ра́дуйся! зове́м.

Седа́лен, глас 8.

Подо́бен: Прему́дрости:

Страда́ния боле́зньми искуси́вся,/ поще́ния страда́ньми утверди́вся,/ зла́та светле́йший благоче́стием облиста́л еси́/ и чи́стое прия́телище был еси́ Ду́ха:/ лука́вых духо́в тьму разгна́л еси́./ Тем собра́в мона́шествующих мно́жества,/ па́стырь их был еси́ и свети́льник светле́йший, Харито́не блаже́нне./ Моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

В напа́сти многоплете́нныя впад от враг ви́димых и неви́димых,/ бу́рею одержи́мь безчи́сленных согреше́ний мои́х,/ и я́ко к те́плому защище́нию и покро́ву моему́, Чи́стая,/ ко приста́нищу притека́ю Твоея́ бла́гости./ Те́мже, Пречи́стая, из Тебе́ Воплоще́нному безсе́менно/ моли́ся приле́жно о всех рабе́х Твои́х,/ непреста́нно моля́щихся Тебе́, Богоро́дице Пречи́стая,/ моля́щи Его́ при́сно согреше́ний оставле́ние дарова́ти/ воспева́ющим досто́йно сла́ву Твою́.

Песнь 4

Ирмо́с: Услы́шах, Го́споди,/ сла́вное Твое́ смотре́ние/ и просла́вих, Человеколю́бче,// непостижи́мую Твою́ си́лу.

Се превознесе́ся Боже́ственная гора́ до́му Госпо́дня/ превы́ше Сил, Богома́терь я́вственнейши.

Зако́нных естества́ кроме́,/ еди́на, Де́во, ро́ждши Влады́чествующаго тва́рию,/ сподо́билася еси́ боже́ственнаго зва́ния.

Ин

Ирмо́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,// кре́пость моя́ и хвале́ние.

Веселя́ся преподо́бный о Го́споде, я́ко победи́тель,/ вопия́ше на враги́ безпло́тныя:/ Бог мой кре́пость моя́ и Госпо́дь.

Венча́ша тя благода́ти, Харито́не,/ страда́льческим венце́м Христо́ва Ца́рства:/ пре́лести бо пия́нство искорени́л еси́, блаже́нне.

Муча́щия пре́жде сконча́ния твоего́, Харито́не,/ воздержа́ния боле́зньми сла́сти умертви́в,/ живоно́сною ме́ртвостию, преподо́бне, оде́ялся еси́.

Богоро́дичен: Неизрече́нно Твое́ рождество́ показа́ся,/ Богороди́тельнице, еди́на Чи́стая и Благослове́нная:/ тем Ти припа́дающе: ра́дуйся! взыва́ем.

Песнь 5

Ирмо́с: Угль Иса́ии проявле́йся,/ Со́лнце из де́вственныя утро́бы возсия́,/ во тьме заблу́ждшим// богоразу́мия просвеще́ние да́руя.

О́блацы, весе́лия сла́дость кропи́те су́щим на земли́:/ я́ко Отроча́ даде́ся Сый пре́жде век,/ из Де́вы вопло́щся, Бог наш.

Житию́ и пло́ти мое́й свет возсия́/ и дря́хлость греха́ разруши́/ напосле́док от Де́вы без Се́мене вопло́щся Вы́шний.

Ин

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Ты, преподо́бне,/ Све́та нескве́рнено зерца́ло, Вы́шняго просвеще́ния,/ све́тло яви́лся еси́, Харито́не всеблаже́нне.

Ты, преподо́бне,/ сугу́быми сия́вши благода́тьми,/ страда́ния бо ра́нами благоче́стно озари́лся еси́ и боле́зньми по́стничества.

Ты, преподо́бне,/ душа́м врач яви́лся еси́,/ Боже́ственныя от млады́х ногте́й взыска́в му́дрости, всеблаже́нне.

Богоро́дичен: Тя ору́жие непобеди́мое на враги́ предлага́ем,/ Тя держа́ву и наде́жду на́шего спасе́ния, Богоневе́сто, стяжа́хом.

Песнь 6

Ирмо́с: Глас глаго́л моле́бных/ от боле́зненныя, Влады́ко, души́ услы́шав,/ от лю́тых мя изба́ви:// Еди́н бо еси́ на́шего спасе́ния вино́вен.

Естество́ челове́ческое, рабо́тающее греху́, Влады́чице Чи́стая,/ Тобо́ю свобо́ду улучи́:/ Твой бо Сын, я́ко А́гнец, за всех закала́ется.

Вопие́м Ти вси, и́стинней Ма́тери Бо́жией:/ прогне́вавшия рабы́ изба́ви,/ еди́на бо дерзнове́ние к Сы́ну и́маши.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию.

Не песо́к, но Христа́ основа́ние положи́в,/ назда́л еси́, о́тче, доброде́тель, зла́та честне́йшую,/ и Тро́ицы Пресвяты́я дом был еси́.

Орга́н зло́бы змий зна́ется,/ но, твои́ми, богоно́се, угожде́нии, Харито́не, побежде́н,/ непра́ведныя от пра́веднаго Про́мысла отмща́ет.

Ничто́же тебе́ от Христо́вы любве́ отлучи́:/ ни ураня́емо те́ло, ни сме́ртный суд претя́щий,/ во едине́нии Боже́ственнем наслажда́яся, блаже́нне.

Богоро́дичен: О чу́до, всех чуде́с нове́е!/ я́ко Де́ва во чре́ве вся́ческая Содержа́щаго сло́вом,/ неискусому́жно заче́нши, не тесновмести́.

Конда́к, глас 2.

Подо́бен: В моли́твах:

Наслади́вся, богому́дре, воздержа́ния/ и пло́ти твоея́ вожделе́ния обузда́в,/ яви́лся еси́ ве́рою возраща́ем/ и, я́ко жи́зни дре́во посреде́ рая́, процве́л еси́,// Харито́не всеблаже́нне свяще́ннейший.

И́кос:

Отве́рзи моя́ уста́, преблаже́нне,/ благоприя́тными твои́ми моли́твами,/ предстоя́ Бо́гу, всесла́вне преподобному́чениче,/ да воспою́ боже́ственное твое́ житие́/ и возглаго́лю досто́йно доброде́тели твоя́,/ я́же на земли́ те́плою любо́вию соверши́л еси́./ Испове́дник бо был еси́ крепча́йший,/ воздержа́ние же ве́рою испра́вил еси́, бде́ние и чистоту́ возлюби́в,/ Харито́не всеблаже́нне свяще́ннейший.

Песнь 7

Ирмо́с: Вети́и яви́шася о́троцы любому́дрейшии дре́вле,/ от богоприя́тныя бо души́, богосло́вяще устна́ми, поя́ху:/ Пребоже́ственный отце́в и наш Бо́же,// благослове́н еси́.

Зря́ше в нощи́ у́бо Иа́ков, я́ко в гада́нии, Бо́га,/ воплоще́н же из Тебе́ све́тлостию яви́ся пою́щим:/ Пребоже́ственный отце́в Бог и препросла́влен.

Зна́мения, е́же в Тебе́, неизрече́ннаго провозвеща́я сплете́ния, со Иа́ковом бо́рется,/ чрез е́же во́льно соедини́ся челове́ком, Чи́стая,/ Пребоже́ственный отце́в Бог и препросла́влен.

Ме́рзок не пропове́дуяй Тя, Сы́на Де́вы, Еди́наго Всепе́тыя Тро́ицы,/ и несумне́нною мы́слию, и язы́ком вопия́:/ Пребоже́ственный отце́в Бог и препросла́влен.

Ин

Ирмо́с: В пещи́ авраа́мстии о́троцы перси́дстеи́/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея́, Го́споди.

И́же в пещи́ авраа́мским подо́бяся ре́вностию благоче́стия,/ веле́ние мучи́тельско, богоно́сне, попра́л еси́:/ благослове́н еси́, зовы́й, Бо́же мой, Го́споди.

Я́ко в пещи́ искуше́ния разжже́ния боже́ственна,/ хладода́тельная с Небеса́ благода́ть посети́ тебе́, преподо́бне:/ благослове́н еси́, зовы́й, Бо́же мой, Го́споди.

Я́ко уя́звлен Тро́ическим Бо́жиим раче́нием,/ той равночи́сленныя огра́ды духо́вне пою́щия возложи́л еси́:/ благослове́н еси́ в хра́ме сла́вы Твоей, Го́споди.

Богоро́дичен: Вы́шняго освяще́нное Боже́ственное селе́ние, ра́дуйся,/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице.

Песнь 8

Ирмо́с: О подо́бии зла́те небре́гше, треблаже́ннии ю́ноши,/ неизме́нный и живы́й Бо́жий о́браз ви́девше,/ среди́ огня́ воспева́ху:/ осуществова́нная да пое́т Го́спода вся тварь// и превозно́сит во вся ве́ки.

Ви́ден бысть на земли́ чрез Тебе́ и с челове́ки поживе́/ и́же бла́гостию несравне́нный и си́лою,/ Ему́же, песнопою́ще, вси ве́рнии, зове́м:/ осуществова́нная да пое́т Го́спода вся тварь/ и превозно́сит во вся ве́ки.

Вои́стину Тя, Чи́стую, возвеща́юще сла́вим, Богоро́дице:/ Ты бо родила́ еси́ Еди́наго от Тро́ицы воплоще́нна,/ Ему́же со Отце́м и Ду́хом вси песнопое́м:/ да пое́т Го́спода вся тварь/ и превозно́сит во вся ве́ки.

Ин

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́гроцы, взыва́юще:// благослови́те, вся дела́ Госпо́дня, Го́спода.

Пе́рси, разжига́емы огне́м непра́ведне, преподо́бне,/ лесть погаси́л еси́, сам же неопали́мь пребы́л еси́, де́йством Свята́го Ду́ха/ и ко благоче́стию лю́ди пе́ти возста́вил еси́:/ благослови́те, вся дела́ Госпо́дня, Го́спода.

Во Христа́ обле́клся еси́ вои́стину, дре́вняго челове́ка совле́кся/ и обличи́в, преподо́бне, тьмы миродержи́теля/ ра́нами муче́ния, с весе́лием вопия́:/ благослови́те, вся дела́ Госпо́дня, Го́спода.

Па́влов нело́жне, Харито́не, быв учени́к,/ того́ стопа́м после́довал еси́, преподо́бне,/ и наста́вник показа́лся еси́ мона́хом,/ всем быв пра́вило доброде́тели вопию́щим:/ благослови́те, вся дела́ Госпо́дня, Го́спода.

Богоро́дичен: Ты еди́на во всех роде́х, Де́во Чи́стая, яви́лася еси́ Ма́ти Бо́жия,/ Ты Божества́ была́ еси́ пребыва́лище, Всенепоро́чная,/ не опа́льшися огне́м Непристу́пнаго Све́та./ Тем вси Тя благослови́м, Мари́е Богоневе́сто.

Песнь 9

Ирмо́с: Весь еси́ жела́ние, весь сла́дость,/ Сло́ве Бо́жий, Де́вы Сы́не,/ Бо́же бого́в, Го́споди, святы́х Пресвяты́й;// тем Тя вси с Ро́ждшею велича́ем.

Жезл кре́пости даде́ся естеству́ тле́нному/ Сло́во Бо́жие во утро́бе Твое́й, Чи́стая,/ и сие́ возста́ви, ко а́ду попо́лзшееся./ Тем Тя, Всечи́стая, я́ко Богоро́дицу велича́ем.

Ю́же изво́лил еси́, Влады́ко,/ приими́ ми́лостивно Моли́твенницу Ма́терь Твою́ о нас,/ и Твоей бла́гости вся́ческая испо́лнятся,/ да Тя вси, я́ко Благоде́теля, велича́ем.

Ин

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́.// Тем, веселя́щеся, Тя, Богоро́дице, велича́ем.

Ни гроб, хода́тай забве́ния,/ покры́ти возмо́же твои́х, преподо́бне Харито́не, доброде́телей:/ твоя́ бо па́мять ве́чнующая со́лнечно возсия́,/ ю́же досто́йно велича́ем.

Прииди́те, ле́тнюю па́мять духо́вно соверша́юще, бра́тие,/ доброде́тельми подража́юще,/ богоно́сцу поревну́им и с ним возопии́м:/ Тя велича́ем, Трисвяты́й.

Страстьми́ коле́блющияся/ и бу́рею грехо́вною, испове́дниче, погружа́емыя,/ ко Христу́ я́ко дерзнове́ние име́я, всегда́ сохраня́й,/ благоче́стно тя велича́ющия.

Богоро́дичен: Ра́дуйся и весели́ся, Неве́сто Царя́ вели́каго,/ созерца́ющая све́тло Твоего́ Жениха́ красоту́,/ па́че зла́та сия́ющую и па́че со́лнца облиста́вшую.

Свети́лен.

Подо́бен: Жены́, услы́шите:

Страда́нием у́бо пе́рвее до́бре искуси́вся,/ второ́е же посто́м тече́ние боже́ственное соверши́в,/ на Небеса́ возше́л еси́ и Христу́ предстои́ши,/ Харито́не, о́тче преподо́бне,/ за ны моля́ся те́пле, пою́щия тя.

Сла́ва, и ны́не, Богоро́дичен:

Ра́дость неизрече́нную ро́ждши, Го́спода,/ ра́дости нас Небе́сныя прича́стники сотвори́,/ всех Тебе́ почита́ющих вои́стину, Пречи́стая,/ и от души́ вопию́щих Ти:/ не забу́ди Твои́х рабо́в, Благослове́нная Мари́е.

На хвали́тех стихи́ры на 4, глас 4.

Подо́бен: Дал еси́ зна́мение:

Благода́ть Ду́ха,/ Харито́не о́тче, тебе́ возсия́вши,/ све́тло просвети́ тя,/ отсю́ду ума́лил еси́ страсте́й нощь/ и безстра́стия день пости́гл еси́,/ чи́сте чисте́йшему Све́ту совоку́плься,/ в Не́мже жи́тельствуя,/ не забу́ди, богогла́се,// ве́рою пою́щих свяще́нную твою́ па́мять.

Благода́ть, жела́нную тебе́,/ Харито́не, нося́ Небе́сную,/ земны́х небре́гл еси́,/ сего́ ра́ди, я́ко безпло́тен, страда́тельное избра́л еси́ житие́,/ я́ко присносу́щныя, сла́дости пото́ка/ благоче́стно наслади́тися хотя́, богоприя́тне,/ и слеза́ми изсуши́л еси́/ му́тный исто́чник, преподо́бне, страсте́й,// и напои́л еси́ душепи́щныя кла́сы.

Благода́ть исцеле́ний, Харито́не,/ от благода́ти Боже́ственныя досто́йно прия́л еси́,/ отсю́ду духо́в тебе́ лука́вых низлага́ется пре́лесть,/ и, неду́г неудо́бных/ тли отбе́г, преше́л еси́, преподо́бне,/ источа́еши бо, я́ко во́ды,/ благода́тныя твоя́ струи́,/ от ни́хже напая́еми,// воспева́ем па́мять твою́.

Сла́ва, глас 5:

Преподо́бне о́тче,/ глас ева́нгельский Госпо́день услы́шав,/ мир оста́вил еси́,/ бога́тство и сла́ву в ничто́же вмени́в./ Те́мже всем вопия́л еси́:/ возлюби́те Бо́га, и обря́щете благода́ть ве́чную,/ ничто́же предпочти́те па́че любве́ Его́,/ да егда́ прии́дет во сла́ве Свое́й,/ обря́щете поко́й со все́ми святы́ми./ Его́же моли́твами, Христе́,// сохрани́ и спаси́ ду́ши па́ша.

И ны́не, Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу// и прибе́жище душ на́ших.

Славосло́вие вели́кое. И отпу́ст.

На литурги́и

Блаже́нны от кано́на, пе́сни 3-я и 6-я. Проки́мен, глас 7: Восхва́лятся преподо́бнии во сла́ве// и возра́дуются на ло́жах свои́х. Стих: Воспо́йте Го́сподеви песнь но́ву:

 Апо́стол к Кори́нфяном, зача́ло 176. Аллилу́йя, глас 6: Блаже́н муж, боя́йся Го́спода: Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную:

 

Собо́р святы́х Ки́ево-Пече́рских, и́же в пеще́ре преподобнаго Анто́ния, близ Вели́каго монастыря́

Ве́чер

Блаже́н муж: 1-й антифо́н.

На Го́споди, воззва́х: стихи́ры на 6, глас 6.

Подобен: Все отло́жше:

Цевни́цею пе́сней духо́вных лику́юще,/ созыва́ем вся празднолю́бных собо́ры/ восхвали́ти трудолю́бных богоно́сных оте́ц сочета́ние./ И сему́ во основа́ние полага́ем/ вели́каго и чу́днаго Анто́ния/ и Феодо́сия богому́драго,/ и́хже ра́ди и всех оте́ц Пече́рских моли́твами/ про́сим человеколю́бия Твоего́, Христе́, всех Царю́,/ пода́ждь лю́дем Твои́м благода́ть и спаси́ от бед ду́ши// в па́мяти их ве́рно хва́лящих Тя.

Воспое́м вси пе́сньми благогове́йно/ Анто́ния Пече́рскаго,/ верхо́внаго отце́м и всему́ собо́ру нача́ло,/ и сего́ доброде́телем неле́ностнаго ревни́теля,/ све́тлую лучу́, богоно́снаго Варлаа́ма,/ вку́пе хвала́ми почти́м/ и во гла́се ра́дования воззове́м, глаго́люще:/ преподо́бнии отцы́ на́ши всеблаже́ннии,/ проси́те от Христа́ Бо́га ми́лость улучи́ти// любо́вию па́мять ва́шу соверша́ющим.

Ра́дуйся, благоплодови́тая Русская земле́,/ воспита́вшая гра́жданы вы́шняго Иерусали́ма,/ воспо́й шу́мом весе́лаго пра́зднования/ и ты, ту́чная горо́ Пече́рская,/ собра́вшая во́ины Царю́ Небе́сному/ и показа́вшая кре́пкия му́жи жела́ний духо́вных,/ к ни́мже рцем ны́не, глаго́люще:/ богоно́снии отцы́, мы́сленная свети́ла,/ просвети́те све́том ва́шея благода́ти// ду́ши любо́вию собо́р ваш почита́ющих.

Сла́ва, глас 8:

Кто изглаго́лет си́лы Госпо́дни/ или́ кий язы́к изрече́т земноро́дных/ чу́дное житие́ ва́ше,/ богоно́снии отцы́ на́ши Пече́рстии?/ Ка́ко страда́ния претерпе́сте,/ и каковы́ по́двиги понесо́сте,/ бде́нием, посто́м и слеза́ми плоть свою́ изможда́юще,/ моли́твами и смире́нием сокруша́юще горды́ню вра́жию,/ и, в ме́ртвеннем те́ле, а́ки А́нгели, просия́вше,/ в Небе́сныя кро́вы пресели́стеся./ Отню́дуже посети́те в дне́шний день хвала́ми воспева́ющих/ честно́е ва́ше по́стническое о Бо́зе собра́ние,/ и проси́те от Христа́ Бо́га// улучи́ти нам ве́лию ми́лость.

И ны́не, Богоро́дичен, глас то́йже: Царь Небе́сный:

Та́же вход. Проки́мен дне. И чте́ния три преподо́бническая.

Прему́дрости Соломо́новы чте́ние: Пра́ведных ду́ши в руце́ Бо́жией:

Прему́дрости Соломо́новы чте́ние: Пра́ведницы во ве́ки живу́т:

Прему́дрости Соломо́новы чте́ние: Пра́ведник а́ще пости́гнет сконча́тися: .

На стихо́вне стихи́ры, глас 4.

Подо́бен: Я́ко до́бля:

Пе́рвейший лик богоно́сных оте́ц,/ во пеще́ре посто́м просия́вших,/ а́ки до́брых ору́жников Христо́вых,/ прииди́те, лю́дие, пе́сньми предусря́щем:/ се бо от мы́сленнаго Сио́на/ со ско́ростию к нам прихо́дят,/ несу́ще от исполне́ния своего́,/ и подаю́т благода́ть неоску́дну// че́стно собо́р их почита́ющим.

Стих: Воззва́ша пра́веднии,// и Госпо́дь услы́ша их.

Е́же на тве́рди чу́вственней и́ноческое собра́ние,/ я́ко зве́зды мы́сленныя,/ честно́е не́бо озари́вшее,/ днесь во святе́м хра́ме соше́дшеся, лю́дие,/ свещи́ нося́ще, предсрета́йте,/ и моле́бными гла́сы воззови́те, глаго́люще:/ богоно́снии и преблаже́ннии,/ моли́теся о пою́щих любо́вию// ва́ше сочета́ние.

Стих: Весели́теся о Го́споде// и ра́дуйтеся, пра́веднии.

Веселя́щеся, ли́цы христолюби́вых люде́й,/ стецы́теся празднолю́бне днесь с на́ми/ и, похва́льныя венцы́ плету́ще,/ собо́р богоно́сных оте́ц целу́йте,/ всех по и́мени единоку́пно призыва́юще,/ и́же в пеще́ре посто́м просия́ша/ и озаря́ют луча́ми своея́ благода́ти/ ду́ши любо́вию велича́ющих// и ве́рно па́мять их соверша́ющих.

Сла́ва, глас 6:

Царю́ Сла́вы присносу́щныя,/ Крест Свой, а́ки копие́, водрузи́вшу,/ стече́ся по́стническое собра́ние,/ и ста на горе́ Пече́рстей полк богознамени́тый преподо́бных оте́ц,/ нося́ще ору́жие на врага́ непобеди́мо,/ и́мже до конца́ де́монская ополче́ния низложи́ша./ И, прише́дше в Небе́сное селе́ние, восприя́ша побе́дныя венцы́ от Христа́, Бо́га и Спа́са на́шего,// и мо́лятся непреста́нно о душа́х на́ших.

И ны́не, Богоро́дичен, глас то́йже: Богоро́дице, Ты еси́ лоза́ и́стинная:

Тропа́рь, глас 4:

Столп огнезра́чный и светоно́сное со́лнце,/ возсия́вшее на горе́ Пече́рстей,/ вели́каго Анто́ния со всем собо́ром богоно́сных оте́ц/ приво́дим Тебе́, Христе́, в моли́тву,/ и́хже ра́ди, мо́лим,/ пода́ждь оби́тели на́шей благода́ть// и душа́м на́шим ве́лию ми́лость.

Ин тропа́рь, глас 2:

Егда́ снидо́сте во гро́бы/ и саме́х себе́ заключи́сте,/ тогда́, стра́сти умертви́вше плотски́я,/ спогребо́стеся Христу́, богоно́снии,/ и диа́вольския в подзе́мных разруша́ете огра́ды.// Сего́ ра́ди А́нгели венцы́ с Небе́с вам подаю́т.

На у́трени

По 1-м стихосло́вии седа́лен, глас 4.

Подо́бен: Яви́лся еси́:

Мно́гими скорбьми́ путь жи́зни сея́ преидо́сте/ и, доспе́вше кра́я у́мнаго жела́ния,/ в черто́г Боже́ственныя сла́вы всели́стеся./ И ны́не, ра́дующеся со всех Царе́м и Бо́гом,/ моли́теся, я́ко да и мы ва́шего весе́лия прича́стницы бу́дем,/ ваш собо́р почита́ющии, отцы́ всеблаже́ннии.

Сла́ва, и ны́не, Богоро́дичен:

Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т и очище́ние прегреше́ний/ всем пою́щим Тя, Чи́стую Ма́терь и Де́ву.

По 2-м стихосло́вии седа́лен, глас 3:

Брак А́гнчий в черто́зе Небе́снем услы́шавше,/ и зва́нию Царя́ Вы́шняго ко всем бы́вшу,/ вся мирска́я пристра́стия оста́висте, отцы́ богоно́снии,/ и, сле́зными струя́ми ри́зы своя́ испра́вше,/ чи́сти внидо́сте в трапе́зу Христа́ Бо́га./ Но пре́жде да́же не затворя́тся две́ри того́ вхо́да,/ моли́теся, я́ко да и мы, покая́нием вше́дше, вам прича́стницы бу́дем.

Сла́ва, и ны́не, Богоро́дичен:

Черто́г, присносу́щною сла́вою укра́шен, ви́дяще вы́ну,/ жела́ние и́мамы совни́ти вонь, //но, оде́жды не иму́ще, стыди́мся,/ да не свя́зани от А́нгел и изве́ржени бу́дем./ Ты, су́щи оде́жда наги́х дерзнове́ния, Де́во Мари́е,/ украси́ ны и введи́ внутрь Ца́рствия Христо́ва.

Велича́ние:

Велича́ем вас,/ преподо́бнии отцы́ на́ши Пече́рстии,/ и чтим святу́ю па́мять ва́шу,/ вы бо мо́лите о нас// Христа́, Бо́га на́шего.

Стих 1: Радуйтеся, пра́веднии, о Го́споде, пра́вым подоба́ет похвала́. Стих 2: Се́ющии слеза́ми ра́достию по́жнут. Стих 3: Восхва́лятся преподо́бнии во сла́ве и возра́дуются на ло́жах свои́х. Стих 4: Весели́теся о Го́споде и ра́дуйтеся, пра́веднии, и хвали́теся, вси пра́вии се́рдцем.

Сла́ва, и ны́не: Аллилу́йя: три́жды.

По полиеле́и седа́лен, глас 8.

Подобен: Прему́дрости:

Зва́нию Го́спода своего́ после́дующе, крест, а́ки жезл, в ру́це восприе́мше,/ не убоя́стеся стра́ха, предстоя́щаго во тьме,/ но упова́нием преидо́сте к безбе́дному приста́нищу,/ и, по́двигов свои́х обре́тше воздая́ние, весели́теся в Све́те Непристу́пнем./ Те́мже вас почита́ем, отцы́ всеблаже́ннии,/ я́ко при́сно моля́щих Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять ва́шу.

Сла́ва, и ны́не, Богоро́дичен:

Я́ко еди́ну в жена́х благослове́нную и де́вам похвалу́ и украше́ние,/ в бра́нех непребори́мую по́мощь, немощны́м утвержде́ние/ и ско́рое посеще́ние в печа́ли су́щим иму́ще Тя, Богоневе́стная Де́во,/ днесь в пречестне́м Твое́м хра́ме припа́даем и мольбы́ на́ша к Тебе́ прино́сим,/ я́ко да мо́лиши Христа́ Бо́га согреше́ний оставле́ние дарова́ти/ благоче́стно покланя́ющимся пресвято́му Рождеству́ Твоему́.

Степе́нна, 1-й антифо́н 4-го гла́са. Проки́мен, глас 4: Ди́вен Бог во святы́х Свои́х, Бог Изра́илев. Стих: В це́рквах благослови́те Бо́га, Го́спода от исто́чник Изра́илевых. Вся́кое дыха́ние: Ева́нгелие от Матфе́я, зача́ло 10.

По 50-м псалме́: Сла́ва: Моли́твами преподо́бных оте́ц на́ших Пече́рских: И ны́не: Моли́твами Богоро́дицы:

Стихи́ра, глас 8: Кто изглаго́лет си́лы Госпо́дни: зри на Го́споди, воззва́х: сла́вник.

Кано́н Богоро́дицы со ирмосо́м на 6.

И преподо́бных на 8. Глас 8.

Песнь 1

Ирмо́с: Песнь возсле́м, лю́дие,/ чу́дному Бо́гу на́шему,/ свободи́вшему Изра́иля от рабо́ты,/ песнь побе́дную пою́ще и вопию́ще:// пои́м Тебе́, Еди́ному Влады́це.

В па́мяти преподо́бных Твои́х даждь, Христе́ мой, по́мощь свы́ше/ и научи́ мя, умудря́я Святы́м Твои́м Паракли́том,/ да принесу́ пе́сненное хвале́ние Тебе́, Еди́ному Влады́це.

Собо́р богоно́сных оте́ц о Бо́зе собра́ся,/ лю́дие, прииди́те в поклоне́ние, несу́ще с собо́ю одушевле́нныя же́ртвы,/ се бо призыва́ют ны, да принесе́м сла́ву Царю́ всех, Еди́ному Влады́це.

И́хже изведе́ восто́к и Русская страна́/ и израсти́ Пече́рская гора́, а́ки богонасажде́нная древеса́,/ сих плоды́ объе́млюще, лю́дие, стецы́теся почти́ти, и песнь принесе́м Влады́це.

Рай мы́сленный еси́, Пече́рская свята́я горо́,/ умно́жившая у́мная древеса́, блаже́нныя отцы́, и́хже исчести́ по еди́ному не могу́ще,/ о всех вку́пе хвалу́ и песнь прино́сим Еди́ному Влады́це.

Благоплодови́тое дре́во и ма́сличная ветвь,/ от Афо́на принесе́нная на сию́ го́ру, вели́кий Анто́ний,/ его́же плода́ми увеселя́юще ду́ши на́ша,/ прино́сим песнь Тебе́, Христу́, всех Влады́це.

Стефа́н, испо́лнь ве́ры и благоче́стия, соверши́тель Бо́гом основа́нныя Це́ркве,/ и Ни́кон, ико́нами украси́вый, я́ко вели́кая свети́ла просия́ша,/ и́хже чту́ще, прино́сим песнь Еди́ному Тебе́, Христу́, всех Влады́це.

Тро́ичен: Сла́ву Тебе́ принося́ще, Тро́ице Пресвята́я,/ привожду́ моли́твенника Варлаа́ма чу́днаго, презре́вшаго сла́ву ро́да боля́рска,/ его́же ра́ди сла́ву мою́ в ми́ре сем в персть всели́,/ да та́мо обря́щу сла́ву о Тебе́, всех Влады́це.

Богоро́дичен: В пе́рвое благоро́дие Приве́дшая род челове́ческий святы́м Рождество́м Твои́м,/ обезче́щена мя бесо́вскими ла́янии, приведи́ ко сла́ве у́мней, да вы́ну пою́ Ти:/ ра́дуйся, сла́во правосла́вных, Чи́стая Ма́ти Де́во.

Песнь 3

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:// несть пра́веден, па́че Тебе́, Го́споди.

Аще и несть красно́ пе́ние во устна́х мои́х, оба́че приношу́ ти, Ефре́ме богоно́се,/ ты бо, оста́вив рабо́тати земно́му кня́зю, послужи́л еси́ Царю́ Небе́сному/ и прия́л еси́ мзду от руки́ Госпо́дни.

Иса́ию чту, велегла́снаго в да́ре чуде́снем, и сего́ пою́,/ я́ко обдержа́щаго Росто́ва архиере́йство,/ моля́, да Вы́шняго Па́стыря па́стве прилучи́т мя, заблу́ждшее овча́,/ и введе́т во огра́ду Его́ свои́ми моли́твами.

Пресви́тером красоту́ и целе́бником, Дамиа́на блаже́ннаго похваля́ю,/ любо́вию бо ко всем горя́, еле́ем и моли́твою целя́ше,/ того́ врачевство́м и мене́ исцели́, Влады́ко Человеколю́бче.

Тя, Иереми́е, хвала́ми почита́ти досто́йно, почте́нный бо свы́ше прозорли́вства да́ром,/ был еси́ та́йн по открове́нию Бо́жию челове́ческих прови́дец,/ в забве́нии мя су́ща грехо́в неисче́тных воспомяни́, блаже́нне,/ и бу́деши наста́вник покая́нию моему́.

Матфе́е, ви́девый бесо́вския вхо́ды я́ве/ и исправля́яй даю́щия вину́ прило́гом стра́стным,/ я́ко ве́дый мы́сленныма очи́ма мое́ неисправле́ние, наста́ви,/ да велича́ю тя вы́ну, преподо́бне.

Па́стырю до́брый и свети́льниче Су́ждалю, Си́моне, ку́пно с Ники́тою затво́рником,/ я́ко люби́теле вели́кия Ла́вры и ревни́теле и́ноческому исправле́нию,/ па́дша мя испра́вите ва́шим, отцы́, наказа́нием.

Тро́ичен: Сла́ву Твою́, Тро́ице Свята́я, в жи́зни сей преподо́бнии в души́ свое́й сохрани́ша,/ тем сподо́бишася от Тебе́ присносу́щныя сла́вы, ея́же и мы да не лиши́мся,/ собо́р их днесь Тебе́ в моли́тву представля́ем.

Богоро́дичен: Сло́вом неизглаго́ланное весе́лие су́щи преподо́бных,/ ра́дости мя о́ных прича́стника сотвори́ и сла́вы святы́х не лиши́,/ я́ко вся Тебе́ о Бо́зе возмо́жна и твори́ши, ели́ка хо́щеши, Мари́е Богоневе́сто.

Ин конда́к, глас 8:

Отцы́ всечестни́и, ли́че богокра́сный,/ чуде́с мно́гих исто́чницы, ми́ро источа́ющии,/ сокро́вища краснобога́тная Госпо́дня, в земли́ сокрове́нная,/ не преста́йте, мо́лим вы, о нас моли́тися ко Го́споду, да зове́м вам:// ра́дуйтеся, всему́ ми́ру свети́льницы.

Седа́лен, глас 8:

Зве́зды мы́сленныя, озаря́ющия Русскую зе́млю,/ богоно́сных оте́ц собо́р почита́ти дерза́ю,/ но, страстьми́ омраче́нную имы́й ду́шу, умо́м недоуме́ю;/ разжени́те тьму непостоя́нныя мы́сли,/ да че́стно воспою́ песнь вам, отцы́ преблаже́ннии.

Сла́ва, и ны́не, Богоро́дичен:

Звезды́ незаходи́мыя Ма́ти и заре́ таи́нственнаго Дне,/ ра́дуйся, Тобо́ю бо узре́хом Свет и Со́лнце и́стинныя Пра́вды,/ Ея́же луча́ми озаре́ни, вы́ну Тя пое́м, Отрокови́це Богоблаже́нная.

Песнь 4

Ирмо́с: Из горы́ приосене́нныя, Сло́ве, проро́к,/ единыя Богоро́дицы,/ хотя́ща воплоти́тися богови́дно усмотри́,// и со стра́хом славословите си́лу Твою́.

Из горы́ по предуве́дению Бо́жию свети́ла яви́шася на земли́ богоно́снии отцы́/ и просвети́ша Русскую зе́млю све́тлостию жития́ своего́,/ е́же мы чту́ще, удивля́емся и славосло́вим, Христе́, си́лу Твою́.

Удивля́емся, я́ко, во пло́ти су́ще, вы́шше естества́ по́двиг прие́мше, А́нгелом уподо́бишася,/ ду́ши бо своя́ впери́вше в любо́вь Бо́жию, ничто́же в ми́ре па́че тоя́ предпочто́ша,/ от нея́же в немощне́й пло́ти прия́ша, Христе́, си́лу Твою́.

Стефа́н кре́пкий в посте́ бе, и Анаста́сий дерзнове́ние име́ к Бо́гу,/ в проше́нии бо свое́м вся получа́ху,/ и́хже трудолю́бие чтый, славосло́влю, Христе́ мой, си́лу Твою́.

Исаа́кий, прельще́нный тьмо́ю в све́те и све́том исправле́ния тьму прельсти́вый,/ я́ко и ны́не сы́нове тьмы и́мене его́ боя́тся;/ от такова́го искуше́ния изба́витися нам, мо́лится преподо́бный Твой, Христе́,/ да славосло́вим при́сно си́лу Твою́.

Илии́ Му́ромскаго, непребори́маго во́ина, почита́ти по́двиги дерза́ю,/ в руце́ иму́щаго от ору́жия я́зву,/ в се́рдце же любы́ к Тебе́, Христе́, глубоча́йшую ему́ соде́ла ра́ну,/ и се́ю па́че венча́ется, славосло́вя си́лу Твою́.

Ни́конову во искуше́нии сла́вим кре́пость, я́ко претерпе́ мно́го от неве́рных,/ но мно́жае терпе́нием стяжа́ смире́ние и спасе́ние,/ его́же моли́твами и мы да спасе́мся,/ всемогу́щую, Христе́, славосло́вим си́лу Твою́.

Тро́ичен: Во Еди́ном Существе́ Триипоста́сное прославля́ем Божество́,/ Отца́ и Сы́на и Ду́ха Пресвята́го,/ Еди́наго же Тя пое́м Бо́га,/ и, покланя́ющеся в па́мяти преподо́бных оте́ц на́ших, славосло́вим си́лу Твою́.

Богоро́дичен: В Тебе́ упова́ние имы́й, не устраша́юся бесо́вских нападе́ний/ и, о Тебе́ дерзнове́ние стяжа́в, сопротивля́юся страхова́нием сатани́нским,/ ве́дый, я́ко Ты еси́, Влады́чице, гром, устраша́яй враги́.

Песнь 5

Ирмо́с: Страсте́й мя мглы, я́ко от глубо́кия но́щи, избавля́яй,/ у́треневати сподо́би дух мой, молю́ся,// во све́те дне повеле́ний Твои́х, Христе́.

Страсте́й мглу всю и по́хоть вре́дну отло́жше,/ терпе́нием востеко́ша на предлежа́щий по́двиг преподо́бнии Твои́, Го́споди./ Те́мже озари́шася от Тебе́ благода́тию,/ ходя́ще во све́те повеле́ний Твои́х, Спа́се.

Ти́та свяще́нника, попра́вшаго смире́нием гне́внаго бе́са,/ и Лавре́нтия затво́рника, дерзнове́ние иму́щаго на лука́выя ду́хи, сла́вим па́мять:/ си́и бо сохрани́ша за́поведи Твоя́ и сла́вятся во све́те Твое́м, Спа́се.

Сисо́я, просия́вшаго в посте́, восхвали́ти а́ще и дерза́ю,/ но по достоя́нию того́ ублажи́ти не могу́,/ к Тебе́ у́бо Еди́ному прибега́ю,/ Ты от Твои́х даро́в пода́ждь ми си́лу восхвали́ти уго́дника Твоего́, Спа́се.

Фео́фил, в чудесе́х изя́щный, пое́тся,/ той бо еще́ в жи́зни сей мно́гия чудоде́йствием удивля́ше,/ ны́не же бо́льшее прие́м дарова́ние, ины́м посо́бствовати,/ я́ко сохрани́ повеле́ния Твоя́, Спа́се.

Васи́лия и Фео́дора со му́ченики почита́ем,/ я́ко, бе́сом оклевета́ни, от кня́зя муче́ние непови́нне прия́ша,/ ов стрело́ю кончи́ну, ов же огне́м и ды́мом;/ но единоку́пно в Ца́рствии Твое́м прославля́ются, Спа́се.

Про́хор хвали́мь есть в чудоде́йствии свое́м и труде́х,/ я́ко пти́ца бо пита́шеся зе́лием несе́янным,/ про́чим же от лободы хлеб све́тел и от пе́пела соль, претвори́в, подава́ше,/ его́же чудоде́йствию удивля́ющеся, славосло́вим Тя, Спа́се.

Ду́хом води́мь, сын Вы́шняго нарече́ся Иоа́нн, просве́щся посто́м,/ сло́вом бо пита́шеся Бо́жиим па́че, не́жели пи́щею,/ тем легко́, а́ки крила́т, протече́ жизнь сию́,/ от Тебе́ прие́м си́лу Твою́, Спа́се.

Богоро́дичен: Вся сла́ва Твоя́, Дщи Царе́ва, внутрь,/ оде́яна и преукраше́на предстои́ши Тро́ическому Престо́лу,/ отню́дуже сия́ющи па́че со́лнца луча́ми бла́гости Твоея́,/ при́зри на ны, да вы́ну пое́м, Ма́ти Де́во, си́лу Твою́.

Песнь 6

Ирмо́с: Содержи́ма мя приими́, Человеколю́бче, грехи́ мно́гими/ и припа́дающа щедро́там Твои́м,// я́ко проро́ка, Го́споди, и спаси́ мя.

Одержи́мь есмь любо́вию восхвали́ти ваш собо́р, отцы́ богоно́снии,/ вы бо хвали́ми есте́ от Бо́га и челове́к,/ я́ко в жи́зни сей сла́ву ми́ра сего́ презре́сте,/ да испо́лните повеле́ния Христо́ва.

Кий язы́к изрече́т сла́ву ва́шу, о преподо́бнии,/ ю́же мно́гими труды́ стяжа́сте, благода́тию же наверши́сте?/

И сия́ зна́мения явля́ют чуде́сная ва́ша благотворе́ния и исцеле́ния,/ и́миже и нас, немощны́х, не пре́зрите,/ да возмо́жем испо́лните повеле́ния Христо́ва.

Ага́пите многочуде́сне, исцеле́ния дая́й неоску́дно,/ и Елла́дие преподо́бне, с други́м Авраа́мием,/ я́ко мно́гое иму́ще дерзнове́ние ко всех Влады́це, не пре́зрите рабы́ ва́ша,/ но моли́теся, изба́витися нам от вра́жиих наве́тов и всегда́ твори́те во́лю Бо́жию.

Иоа́нне многолю́бне, и по сме́рти бра́ту подвиже́нием те́ла любо́вь показа́вый,/ и Фео́филе, славолю́бия оскверне́ние слеза́ми омы́вый,/ я́ко зде и та́мо неразлу́чни су́ще, ку́пно помоли́теся к Бо́гу,/ е́же бы и нам возыме́ти к Нему́ любо́вь и́стинную и к бли́жнему на́шему нелицеме́рную.

Дамиа́не, исцеля́яй стра́сти теле́сныя моли́твою и еле́ем, с Са́ввою чудотво́рцем,/ не пре́зрите нас, изнемо́гших душе́вными страстьми́,/ но от целе́бнаго да́ра моли́тв ва́ших уврачу́йте серде́чныя на́ша стру́пы, да прия́тны Бо́гу принесе́м моли́твы.

Некта́рие послушли́ве с Се́ргием, тебе́ единонра́вным,/ я́ко преда́вшии ду́ши своя́ под и́го послуша́ния Христо́ва,/ преклони́те моли́твою свое́ю на́ше непоко́рство под яре́м послушли́ваго Иису́са,/ во е́же усе́рдно исполните нам повеле́ния Его́.

Сла́ва Смоле́нскому гра́ду, Мерку́рий па́стырь,/ па́стырей Нача́льника своего́ о́вцы пасы́й до́бре,/ ду́хом же горя́ вы́ну неразлу́чну бы́те от ли́ка преподо́бных Пече́рских,/ те́мже по сме́рти чудотво́рне приплы́ в кла́де³⁷ и в пеще́ре святе́й почива́ет те́лом,/ душе́ю же ра́дуется с преподо́бными во сла́ве ве́чней.

Богоро́дичен: К преподо́бных селе́нию от дел восхо́да не имы́й,/ к Тебе́ прибега́ю, Влады́чице Богоро́дице,/ Ты бо еси́ дверь Небе́сная и проро́ком ви́денная ле́ствица,/ по благода́ти у́бо Твое́й даждь восхожде́ние в се́рдце мое́м и отве́рзи ми две́ри ми́лости Твое́й.

Конда́к, глас 2:

Лик по́стнический, собра́вшийся у́мне,/ мы́сленныма зря́ще очи́ма,/ прииди́те, лю́дие, хвала́ми почти́м,/ и, покланя́ющеся моще́м их,/ любо́вныя принесе́м да́ры,/ ти́и бо суть к Бо́гу хода́таи/ и моли́твенницы о душа́х на́ших.

И́кос:

Восхвали́ти по еди́ному кто возмо́жет святы́я Твоя́, Бла́же?/ Изочту́ их, и па́че песка́ умно́жатся./ Но Сам, Влады́ко Христе́, исчита́яй мно́жество звезд и всем имена́ нарица́яй,/ приими́ всех их мольбы́ о нас и яви́ щедро́ты Твоя́ на лю́дех Твои́х,/ ве́мы бо, я́ко мно́го и́мут дерзнове́ние к вели́честву Твоему́/ и хода́тайствуют к Тебе́, я́ко при́сно моли́твенницы о душа́х на́ших.

Песнь 7

Ирмо́с: О́троки ороси́вый в пещи́/ и Де́ву сохрани́вый/ ро́ждшую Тя по Рождестве́,// благослове́н еси́, Бо́же оте́ц на́ших.

О́троческую песнь принести́ сопосо́бствуй ми, ли́че богокра́сный оте́ц Пече́рских,/ да наставле́нием ва́шим со христолюби́выми людьми́ безстра́стно воспою́:/ благослове́н Бог оте́ц на́ших.

Пи́мене многоболе́зненне, и́же не то́чию с благодаре́нием проте́кл еси́ в боле́зни жизнь сию́,/ но и ины́м подава́л еси́ моли́твою в боле́знех отра́ду,/ ты, ны́не в неболе́зненнем сый поко́и, от боле́зни мя премени́, да пою́:/ благослове́н Бог оте́ц на́ших.

Зла́то чи́сто и сребро́, седмери́цею дарова́ний искуше́но, Евста́фие пра́ведне,/ пра́ведно де́латель был еси́ и отсю́ду в де́лание доброде́телей у́мных преше́л еси́,/ и́миже ду́шу твою́ укра́сив, предста́вил еси́ чи́сту, а́ки зла́то, и пое́ши:/ благослове́н Бог оте́ц на́ших.

Времена́ и ле́та многочуде́сныя Це́ркве,/ жития́ и доброде́тели оте́ц первонача́льных писа́нием нам изъяви́вый/ и дело́м их ревни́тель усе́рдный бы́вый, Не́сторе сла́вне,/ с ни́миже тя ны́не ублажа́юще, пое́м:/ благослове́н Бог оте́ц на́ших.

Евстра́тие, му́чеником добро́то, вторы́й Илия́ колесни́чник яви́лся еси́,/ но он а́ки на Не́бо взя́тся, ты же в са́мый о́гненною колесни́цею вшел еси́ Небе́сныя две́ри,/ гла́су призыва́ющу тя от велеле́пия сла́вы, иде́же гла́сом ра́дования пое́ши:/ благослове́н Бог оте́ц на́ших.

В чудесе́х благодарови́тых сла́вимии, блаже́ннии отцы́, Елла́дие и Луко́ икона́м,/ я́ко до́брии де́лателие за́поведей Влады́чних бы́вше,/ ны́не прия́сте возме́здие от пото́ка сла́дости и ра́достно пое́те:/ благослове́н Бог оте́ц на́ших.

Тро́ичен: Дух Пресвяты́й спослу́шествует ду́хови на́шему, отцы́ богоно́снии,/ я́ко есте́ ча́да Бо́жия и снасле́дницы Христо́ви,/ и, Ему́же рабо́тасте, с Ним и прославля́етеся, пою́ще:/ благослове́н Бог оте́ц на́ших.

Богоро́дичен: Дух Святы́й на́йде на Тя, и си́ла Вы́шняго, осени́вши,/ показа́ Тя Ма́терь Чи́стую и по Рождестве́,/ Еюже изба́вльшеся от чужда́го рабо́ты, блажа́т Тя вси ро́ди,/ я́ко ублажи́ Тя благослове́нный Бог оте́ц на́ших.

Песнь 8

Ирмо́с: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго/ Го́спода по́йте// и превозноси́те во вся ве́ки.

Проя́вльшаго на горе́ святе́й Пече́рстей вас, свети́ла вели́кая, отцы́ богоно́снии,/ отню́дуже благода́тныя лучи́ простро́сте/ и всю Русскую зе́млю чудесы́ просвети́сте,/ те́мже пое́м Го́спода и превозно́сим во ве́ки.

Не многобу́рное мо́ре, но пеще́ра свята́я явля́ет ва́ша мо́щи,/ а́ки би́серие драго́е, уго́дницы Бо́жии,/ и обогаща́ете чуде́с излия́нии всех к вам с ве́рою приходя́щих/ и превознося́щих Го́спода хвала́ми во ве́ки.

Матфе́й, гряду́щих прови́дец,/ и Иоа́нн, во мно́гом страда́нии светле́йший па́че ины́х, с Моисе́ом, чистоты́ зерца́лом,/ а́ки ка́мение честно́е, в пеще́ре сокрове́нное,/ явля́ются чудесы́ всем с ве́рою к ним приходя́щим и превознося́щим хвала́ми Го́спода во ве́ки.

Ефре́м евну́х, у́мная голуби́ца,/ ветвь ма́сличную студи́йскаго уста́ва принесы́й во оби́тель святу́ю,/ и Аре́фа, украше́н ста́рческими нра́вы, с прозорли́вым Иереми́ем,/ сла́вими да бу́дут, и́же научи́ша всех сла́вити Го́спода во ве́ки.

Ма́рко гробокопа́тель трудолю́бцем показа́ся зерца́ло,/ ка́ющимся наста́вник, ме́ртвым воскреси́тель,/ его́же сло́ва, а́ки гла́са Льво́ва, со стра́хом послу́шаху,/ и ны́не стра́шен есть бесо́м, я́ко живе́т с Го́сподем во ве́ки.

Григо́рий не от Кесари́и, но от Пече́рския Ла́вры чудотво́рец показа́ся,/ моли́твою три дни и три но́щи та́тей неподви́жимых со овощми́ удержа́вый,/ потопле́нием же в воде́ жизнь сконча́в, ны́не ра́дуется с Се́ргием преподо́бным на воде́ упокое́ния,/ пою́ще Го́спода во ве́ки.

Тро́ичен: Сла́ва бу́ди Ера́зму, украси́вшему ико́нами це́рковь Пече́рскую,/ и Они́симу, по́льзы имени́ту,/ и́мже причисля́ется Матфе́й ди́вный, проро́ческое дарова́ние име́вый:/ в ни́хже трие́х Тро́ическое и́мя сла́вится во вся ве́ки.

Богоро́дичен: Сла́вити Тя всегда́ кто не хо́щет, Чи́стая Де́во,/ чужд есть спасе́ния своего́:/ сла́ва бо Твоя́ всем простре́ся во спасе́ние,/ сла́вящим Тя, Мари́е Богоневе́сто.

Песнь 9

Ирмо́с: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние// пе́сньми немо́лчными велича́ем.

В горе́ святе́й, в те́мней пеще́ре ку́щи своя́ водрузи́сте, отцы́ преблаже́ннии,/ Бо́жий рай сотвори́сте и огусти́сте доброде́тельми и чудесы́, а́ки благоплодови́тыми древесы́,/ от ни́хже приходя́щии ве́рно прие́млют исцеле́ния плоды́/ и вас хвала́ми велича́ют.

Спиридо́н, незло́бия крин, и Никоди́м победоимени́тый, о́ба просфо́рницы святи́и,/ хле́бы чи́сты в дар творя́ще Бо́гу, и себе́ во благово́нную же́ртву сотвори́ша,/ причисля́ется к сим и Анато́лий,/ и́хже вси велича́ем.

Ангелому́дрый Али́пий с Григо́рием византи́йским, иску́снейшии иконопи́сцы,/ неиску́сная дела́ на́ша ва́пами благи́х дея́ний испра́вите,/ да светлообра́зно предста́вше Христу́,/ сла́вою вас велича́ем.

Пи́мен по́стник, благово́нный цвет, и Ефре́м свяще́нник,/ си́и суть до́брая ма́слина, и́хже дарова́нием благода́ти умасти́вшеся,/ благодаря́т ве́рнии и славословле́нии вы́ну/ всех Творца́ велича́ют.

Ону́фрий, молча́ния люби́тель, и Иса́ия, го́рлица пустыннолю́бная, с Сильве́стром блаже́нным,/ триплете́нная вервь на бе́сы, от ни́хже нанесе́нныя стра́стныя прило́ги до конца́ удави́вше,/ и́мут дарова́ния и ины́м посо́бствовати,/ тем вси их велича́ют.

Равноапо́стольный Влади́мир с богому́дрыми Рома́ном и Дави́дом,/ с ни́миже и Нико́ла Свято́ша, четвери́ца князе́й Русскихпое́тся,/ и на тех, я́ко на колесни́це у́мней, Бог почи́л есть,/ тем вси их велича́ют.

Тро́ичен: Сла́ва му́ченицам, светоно́сная Варва́ра,/ и Евфроси́ния от По́лоцка, сия́ние де́вам,/ и Иулиани́я, издаю́щая немощны́м цельбу́ еле́й благода́ти,/ сих ра́ди трие́х дев спаси́ всех, Тро́ице Свята́я,/ и́же Тя с поклоне́нием велича́ют.

Богоро́дичен: Ра́дуйся, сла́во святы́х, Пречи́стая Де́во;/ ра́дуйся, кораблю́ во многобу́рней жи́зни сей хотя́щим спасти́ся;/ ра́дуйся, ка́меню, напои́вый жа́ждущия благ ве́чных./ Сие́ ра́дуйся вси Тебе́ прино́сим/ и пе́сньми велича́ем.

Свети́лен:

Русския земли́ иера́рхов пе́сньми пое́м:/ от ни́хже пе́рвейшаго Михаи́ла, Иларио́на, Петра́, Алекси́я и Ио́ну,/ Фо́тия и Киприа́на, Ефре́ма, Никола́я и Ники́ту,/ Мака́рия священному́ченика, Лео́нтия и Симео́на,/ и все па́стырское сосло́вие приво́дим в моли́тву,/ и́хже ра́ди, Христе́, спаси́ ду́ши на́ша.

Богоро́дичен:

А́гнца Непоро́чнаго и Вы́шняго Па́стыря и́стинная Ма́ти,/ овча́ есмь святы́я Твоей огра́ды,/ но пусты́ми дея́нии во смра́дная беззако́ния уклони́хся;/ наста́ви мя, молю́ся, и спаси́ от волко́в мы́сленных ду́шу мою́.

На хвали́тех стихи́ры, глас 2.

Подо́бен: Егда́ от Дре́ва:

Единоу́мною душо́ю и единомы́сленным се́рдцем/ согласи́стеся, отцы́ преблаже́ннии,/ вся мирска́я пристра́стия отри́нувше/ и крест свой по словеси́ Госпо́дню взе́мше,/ во́льною нището́ю после́довати/ обнища́вшему нас ра́ди Христу́ Бо́гу,/ от Него́же ны́не обогати́стеся/ нетле́нными сокро́вищи на Небеси́,/ от ни́хже низпосли́те и нам,/ да и мы обогати́мся/ и прии́мем ва́шим хода́тайством/ от всех Влады́ки ве́лию ми́лость.

Ра́дуйся, ли́че богосо́бранных оте́ц,/ я́ко, единоду́шно жизнь а́нгельски в ми́ре сем пожи́вше,/ в те́мней пеще́ре положи́сте селе́ние свое́/ и, мно́гими труды́ Бо́гови присво́ившеся,/ прия́сте от Него́ усыновле́ние./ Но, я́ко Ми́лостивому предстоя́ще,/ ми́лостивно при́зрите на ны/ и хода́тайством уми́лостивите Человеколю́бца Христа́,/ е́же обрести́ нам грехо́в проще́ние/ и улучи́ти ми́лость в День Су́дный,// к вам припа́дающе, мо́лимся.

Возсия́ днесь светле́е со́лнца/ всепра́зднственная па́мять богоно́сных оте́ц/ и озаря́ет празднолю́бное сосло́вие/ луча́ми благода́ти многоразли́чных чуде́с./ Те́мже и мы, о всеблаже́ннии,/ с ве́рою к вам притека́ем/ и припа́даем к моще́м ва́шим,/ прося́ще в ну́ждах на́ших ско́раго ва́шего посеще́ния;/ вы же не пре́зрите моле́ния на́шего,/ но, я́ко иму́ще дерзнове́ние ко Влады́це,// испроси́те нам ве́лию ми́лость.

Сла́ва, глас 8:

Вели́ких че́стей пе́сненныя да́ры,/ преблаже́ннии отцы́ на́ши Пече́рстии,/ любо́вию прино́сим вам, глаго́люще:/ ра́дуйтеся, земли́ Росси́йстей украше́ние;/ ра́дуйтеся, и́ночествующим похвало́;/ ра́дуйтеся, до́брии ору́жницы Царя́ Небе́снаго;/ ра́дуйтеся, светоно́сныя зве́зды мы́сленныя тве́рди;/ ра́дуйтеся, вы́шняго Сио́на гра́ждане;/ ра́дуйтеся, мироуха́ннии цве́ти ра́йстии;/ ра́дуйтеся, засту́пницы на́ши в ско́рбех и спасе́нию хода́таи;/ и, я́ко иму́щии дерзнове́ние ко Влады́це,// приле́жно моли́теся о душа́х на́ших.

И ны́не, Богоро́дичен, глас то́йже: Влады́чице, приими́ моли́твы раб Твои́х:

Славосло́вие вели́кое и отпу́ст.

На литурги́и

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех:

 Апо́стол к Кори́нфяном, зача́ло 176. Аллилу́йя, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя Его́. Ева́нгелие от Матфе́я, зача́ло 43. Прича́стен: Ра́дуйтеся, пра́веднии, о Го́споде:

 

На вели́цей вече́рни

Блаже́н муж: 1-й антифо́н.

На Го́споди, воззва́х: стихи́ры на 8, глас 8.

Подо́бен: О, пресла́внаго чудесе́:

Бу́ди благослове́нна, земле́ Росто́вская,/ в ма́лем селе́нии Ва́рнице/ благочести́вую чету́ всему́ ми́ру яви́вшая,/ Кири́лла и Мари́ю приснопа́мятных,/ до́брый о́браз честно́го супру́жества,/ досто́йныя роди́тели Се́ргия вели́каго./ Ти́и бо ны́не Престо́лу Бо́жию/ вку́пе предстоя́ще,// мо́лятся о спасе́нии душ на́ших.

Имени́тии и сла́внии боя́рскаго ро́да насле́дницы,/ князе́м росто́вским ве́рнии служи́телие,/ всехва́льнии Кири́лле и Мари́е,/ безве́стную Ва́рницу ле́поте гра́дстей предпоче́тшии,/ иде́же благоче́стно пожи́вше,/ вои́стину дре́во добропло́дное яви́стеся,/ плод прекра́сный израсти́вше,/ Се́ргия вели́каго,// с ни́мже моли́теся о душа́х на́ших.

Преподо́бне о́тче Кири́лле,/ печа́льника земли́ Ру́сския благослове́нный роди́телю,/ в годи́ну тя́жких испыта́ний,/ многоча́стне в стан неве́рных князе́м росто́вским сше́ствуя,/ блага́я оте́честву и Це́ркви/ устроя́ти вспомоществова́л еси́./ Ны́не же в селе́ниих Небе́сных водворя́яся,/ моли́ся Го́споду,// да спасе́т от рабо́ты грехо́вныя ду́ши на́ша.

Преподо́бная ма́ти Мари́е,/ благоче́стием и целому́дрием сия́ющи,/ житие́м твои́м Бо́гу угоди́ла еси́,/ Той же сотвори́ тя досто́йну/ избра́нный сосу́д Ду́ха Свято́го чревоноси́ти/ и служи́теля усе́рднаго Святы́я Тро́ицы ми́ру яви́ти./ Ны́не же с ним в селе́ниих пра́ведных водворя́ющися,/ моли́ся Го́споду,// спасти́ся душа́м на́шим.

Сла́ва, глас 5:

Прииди́те, ве́рнии,/ похва́льными словесы́ роди́тели Се́ргия преподо́бнаго возсла́вим,/ достохва́льную чету́, добре́йшия супру́ги,/ таково́му младе́нцу сподо́бльшияся бы́ти роди́тели./ Бог предугото́ва их к ди́вному сему́ рождеству́,/ бы́ста бо уго́дницы Бо́жии,/ пра́ведницы пред Ним и людьми́/ и вся́кими доброде́тельми укра́шеннии,/ ти́и и ны́не предстоя́т Престо́лу Святы́я Тро́ицы/ и мо́лятся о душа́х на́ших.

И ны́не, Богоро́дичен, глас то́йже: В Чермне́м мо́ри:

Вход. Проки́мен дне. Чте́ния три преподо́бническая.

Прему́дрости Соломо́новы чте́ние: Пра́ведных ду́ши в руце́ Бо́жией:

Прему́дрости Соломо́новы чте́ние: Пра́ведницы во ве́ки живу́т:

Прему́дрости Соломо́новы чте́ние: Пра́ведник а́ще пости́гнет сконча́тися: 

На лити́и стихи́ры, глас 3:

В хра́ме стоя́щей Мари́и блаже́нней/ и глаго́лы Ева́нгелия гото́вей слы́шати,/ внеза́пу взыгра́ся младе́нец во чре́ве ея́/ и гла́сом ве́лиим возопи́,/ благове́стника Сло́ва Бо́жия себе́ предзна́менуя.

В хра́ме стоя́щей Мари́и всехва́льней,/ пре́жде да́же не пева́емей пе́сни Херуви́мстей,/ па́ки во утро́бе ея́ младе́нец возгласи́,/ со А́нгелы прославля́я/ гряду́щаго на во́льная страда́ния Христа́ Жизнода́вца.

В хра́ме стоя́щей Мари́и пресла́вней,/ иере́ю же Свята́я святы́м возгласи́вшу,/ се уже́ тре́тие возопи́ младе́нец во утро́бе ея́,/ проро́чески себе́ назна́менуя/ благогове́йнаго служи́теля тайн Те́ла и Кро́ве Госпо́дних.

Сла́ва, глас 8:

Что убо отроча́ сие́ бу́дет?/ В стра́се и тре́пете ки́йждо друг дру́га вопроша́ху,/ слы́шавший трикра́тное младе́нца возглаше́ние./ Ты же, Мари́е блаже́нная,/ в зна́мении сем предзре́ла еси́ избра́ние твоего́ ча́да/ на служе́ние Триеди́ному Бо́гу/ и поклоне́ние Ему́ в ду́се и и́стине.

И ны́не, Богоро́дичен, глас то́йже:

А́з, Де́во Свята́я Богоро́дице,/ к покро́ву Твоему́ прибега́ю,/ ве́м, я́ко обря́щу Тобо́ю спасе́ние,/ мо́жеши бо, Чи́стая, помощи́ мне́.

На стихо́вне стихи́ры, глас 8:

О ве́ры сла́вныя, о любве́ благи́я!/ Всечестни́и Кири́лл и Мари́я,/ я́коже и во дни дре́вния/ А́нна, ма́ти Самуи́ла проро́ка,/ в служе́ние и дар Бо́гу,/ Дарова́телю вся́ческих благ,/ пре́жде да́же не роди́тися их младе́нцу,// в сове́те свое́м того́ прино́сят.

Стих: Честна́ пред Го́сподем// смерть преподо́бных Его́.

Богому́дрии Кири́лле и Мари́е,/ ча́до ва́ше Варфоломе́я,/ е́же есть сын ра́дости, нарекли́ есте́,/ той бо вои́стину/ Русстей земли́ яви́ся ра́дование,/ ско́рый помо́щник и пресла́вный чудотво́рец.

Стих: Что возда́м Го́сподеви о всех,// я́же воздаде́ ми?

Промышле́нием Бо́жиим води́мии,/ преподо́бнии Кири́лле и Мари́е,/ в зе́млю Ра́донежскую пресели́стеся,/ ю́же и доброде́тельми ва́шими украси́ли есте́,/ по́двиги благоче́стия показа́вше,/ и лю́ди, в ней живу́щия,// путе́м Христо́вым ше́ствовати поуча́ли есте́, блаже́ннии.

Сла́ва, глас 4:

В по́двизе роди́тельстем до́бре труди́вшеся, святи́и,/ в не́мже и ча́да ва́ша,/ Петра́, Стефа́на и Варфоломе́я избра́ннейшаго,/ в ре́вностнем служе́нии Триеди́ному Бо́гу/ и Пречи́стей Бо́жией Ма́тери воспита́сте./ Ны́не и нам моли́твами ва́шими помози́те, блаже́ннии,// путе́м Христо́вым неле́ностно ше́ствовати.

И ны́не, Богоро́дичен, глас то́йже: При́зри на моле́ния:

Тропа́рь, глас 3:

Блаже́нств Христо́вых прича́стницы,/ честна́го супру́жества и попече́ния о ча́дех до́брый о́бразе,/ пра́веднии Кири́лле и Мари́е,/ плод благоче́стия, Се́ргия преподо́бнаго, нам яви́вшии,/ с ни́мже усе́рдно моли́те Го́спода/ низпосла́ти нам дух любве́ и смиренному́дрия,/ да в ми́ре и единомы́слии/ просла́вим Тро́ицу Единосу́щную.

На у́трени

На Бог Госпо́дь: тропа́рь преподо́бных два́жды. Сла́ва, и ны́не, Богоро́дичен.

По 1-м стихосло́вии, седа́лен, глас 5: Благослове́на бу́ди, досто́йная супру́жеская чето́,/ всехва́льнии Кири́лле и Мари́е,/ ма́тери бо проро́ка Самуи́ла Анне подража́вшии,/ и я́ко та, та́кожде и вы младе́нца, а́ще роди́тся му́жеска по́ла,/ Бо́гу служи́ти в сове́те свое́м положи́ли есте́.

Сла́ва, и ны́не, Богоро́дичен:

Вели́чия Твоя́, Богоблагода́тная, кто испове́сть?/ Бо́га бо пло́тию родила́ еси́,/ ключи́ де́вства неруши́мы сохра́ньши/ и чистото́ю богоприя́тнаго существа́ Твоего́ вся Небе́сныя си́лы превозше́дши./ Те́мже пе́сньми немо́лчными восхваля́ем Тя,/ еди́на Благослове́нная.

По 2-м стихосло́вии седа́лен, глас 6:

Страннолю́бия доброде́тель яви́сте, святи́и,/ в дому́ бо ва́шем на всяк день/ вси тре́бующии по́мощи прибе́жище и любо́вь, я́же во Христе́, обрета́ху.

Сла́ва, и ны́не, Богоро́дичен:

Милосе́рдия две́ри отве́рзи нам, Благослове́нная Богоро́дице,/ наде́ющиися на Тя, да не поги́бнем,/ но да изба́вимся Тобо́ю от бед,/ Ты бо еси́ спасе́ние ро́да христиа́нскаго.

По полиеле́и седа́лен, глас 1:

Ве́чная ва́ша па́мять, достоблаже́ннии Кири́лле и Мари́е,/ я́ко в род и род благоче́стным житие́м ва́шим/ ве́рнии лю́дие спасе́ние улуча́ти поуча́ются.

Сла́ва, и ны́не, Богоро́дичен:

Упова́ние Христиа́ном, Пресвята́я Де́во,/ Бо́га, Его́же родила́ еси́ па́че ума́ и сло́ва,/ непреста́нно моли́ с Вы́шними си́лами и с преподо́бными Кири́ллом и Мари́ею/ да́ти оставле́ние согреше́ний на́ших.

Та́же степе́нна, 1-й антифо́н 4-го гла́са. Проки́мен, глас 4: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми?

Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Прииди́те, вси ве́рнии,/ роди́тели Се́ргия вели́каго восхва́лим,/ си́и бо в ли́це святы́х земли́ на́шея/ предстоя́т Престо́лу Пресвяты́я Тро́ицы/ и приле́жно мо́лятся/ о спасе́нии душ на́ших.

Кано́н Богоро́дицы на 6 и преподо́бных на 8.

Кано́н преподо́бных, глас 8, его́же краегране́сие: Прославля́ю роди́тели Се́ргия вели́каго.

Песнь 1

Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,// песнь Бо́гови воспева́юща.

Преподо́бнаго Се́ргия, игу́мена земли́ Ру́сския,/ све́тлостьми доброде́телей возсия́вшаго,/ роди́телие сподо́бистеся бы́ти, Кири́лле и Мари́е присноблаже́ннии.

Ре́вностно храня́ще за́поведь апо́стола, страннолю́бия не забыва́ти,/ любо́вию к бли́жним распала́еми,/ вои́стину удосто́истеся, блаже́ннии, А́нгела Бо́жия странноприя́ти.

О́бразу ва́шего благочести́ваго супру́жескаго жития́ мно́зи лю́дие удиви́шася, преподо́бнии./ Сего́ бо ра́ди Бог вас просла́ви и дарова́ плод благосла́вный,/ его́же Варфоломе́я, сы́на ра́дости, нареко́сте.

Богоро́дичен: Сла́вим Тя, Богоневе́сто, ро́ждшую Христа́, Бо́га на́шего,/ Его́же моли́ поми́ловати и спасти́ ду́ши на́ша.

Песнь 3

Ирмо́с: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,// я́ко несть свят па́че Тебе́, Еди́не Человеколю́бче.

Лю́дие чудя́хуся, егда́ услы́шаша/ трикра́тное возглаше́ние младе́нца во чре́ве твое́м, Мари́е приснопа́мятная./ Что у́бо отроча́ сие́ бу́дет?/ недоумева́юще друг дру́га вопроша́ху.

Аще роди́тся младе́нец му́жеска по́ла,/ да́руем его́ Це́ркви, да послу́жит Благоде́телю всех Бо́гу,/ си́це рекли́ есте́, боголюби́вии супру́зи,/ испо́лненнии ве́ры сла́вныя и любве́ благи́я.

Вели́кия ми́лости сподо́бистеся от Бо́га добронра́вным житие́м ва́шим, блаже́ннии,/ те́мже и нам испроси́те богоприя́тными ва́шими моли́твами/ оставле́ние грехо́в, ми́лости Бо́жия и Ца́рства Небе́снаго.

Богоро́дичен: Лю́таго мироде́ржца сете́й изба́ви нас, о Богома́ти,/ несть бо те́плыя Засту́пницы, ра́зве Тебе́, Влады́чице.

Седа́лен, глас 2:

Прииди́те, ве́рнии, ра́достными пе́сньми просла́вим преподо́бных Кири́лла и Мари́ю/ и, с любо́вию лобыза́юще честны́я мо́щи их, си́це возопии́м:/ ра́дуйтеся, блаже́ннии, в боголю́бии пожи́вшии, милосе́рдие к бли́жним име́вшии,/ о́браз честна́го супру́жества и попече́ния о ча́дех яви́вшии,/ смире́ние стяжа́вшии и в по́стничестве пребы́вшии./ Ны́не же, предстоя́ще Святе́й Тро́ице, моли́твами ва́шими, святи́и,/ оте́чество на́ше от сопроти́вных защити́те,/ боле́зни исцели́те и вся́ких искуше́ний изба́вите/ ве́рою чту́щих па́мять ва́шу.

Сла́ва, и ны́не, Богоро́дичен:

Не и́мамы ины́я по́мощи и наде́жды,/ ра́зве Тебе́, Пречи́стая Ма́ти Бо́жия,/ Ты бо Бо́га пло́тию родила́ еси́ па́че сло́ва и ра́зума,/ Его́же моли́, Безневе́стная, с преподо́бными Кири́ллом и Мари́ею,/ пода́ти нам мир и ве́лию ми́лость.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.

Я́ко святы́й Предте́ча взыгра́ся ра́дощами во чре́ве ма́тере своея́,/ та́ко и сын твой, Мари́е преподо́бная, взыгра́ся во утро́бе моля́щейся ти Го́споду в це́ркви./ Ты же, уразуме́вши зна́мение сие́,/ стра́хом и тре́петом объя́та бы́вши, взыва́ла еси́:/ си́ле Твое́й сла́ва, Человеколю́бче.

Юдо́ли плаче́вней прича́стницы бы́вше,/ оба́че по́двиг супру́жества пресла́вне соверши́вше и во и́ночестве до́бре пожи́вше, преподо́бнии,/ ны́не наслажда́етеся Небе́сныя трапе́зы./ Моли́теся ко Го́споду, да умудри́т правосла́вныя супру́ги во благоче́стии пребыва́ти,/ и́ночествующия же ре́вностно обе́ты соблюда́ти.

Ра́дости исполня́ются днесь русстии собо́ри,/ иму́ще вас, блаже́ннии, те́плыя моли́твенники/ и усе́рдныя засту́пники своему́ земно́му оте́честву.

Богоро́дичен: О Всепе́тая Ма́ти, ми́ра спасе́ние!/ Не оста́ви ве́рою Тя призывающих,/ Ты бо еси́ Засту́пница усе́рдная ро́да христиа́нскаго.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х// пути́ моя́ напра́ви, молю́ся.

Днесь па́мять ва́ша, блаже́ннии, созыва́ет лю́ди на духо́вную трапе́зу./ Те́мже сподо́бите и нас досто́йно сея́ вкуси́ти,/ и пи́щи ра́йския во оби́телех Отца́ Небе́снаго вку́пе с ва́ми наслажда́тися.

Иму́ще житие́ благоче́стием сия́ющее, достосла́внии роди́телие,/ вои́стину дре́во благослове́нное яви́стеся,/ плод Бо́гу уго́дный израсти́вше.

Теплоту́ ва́шея любве́ к Бо́гу, пра́ведная чето́, и ре́вность ко и́ноческому житию́/ от ю́ности восприя́т Се́ргий достохва́льный:/ вы бо яви́стеся пе́рвии учи́телие сы́на ва́шего доброде́тельному житию́.

Богоро́дичен: Еди́ну Чи́стую, еди́ну Благослове́нную, ве́рнии, ублажи́м,/ к Сы́ну бо Своему́ ми́лостивно ру́це простира́ет,/ да обрати́мся к све́ту за́поведей Его́ и Той пути́ на́ша испра́вит.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся, / к Тебе́ бо возопи́х, и услы́ши мя,// Бо́же спасе́ния моего́.

Ле́тняя ва́ша па́мять весели́т сосло́вие и́ноков, преподо́бнии Кири́лле и Мари́е./ Вои́стину блаже́ни есте́, я́ко имена́ ва́ша прославля́ются с сы́ном ва́шим, Се́ргием преподо́бным,/ его́же велича́ют игу́мена земли́ Ру́сския.

И́стину в житии́ взыску́юще, преподо́бнии,/ о теле́сных небрего́сте и земна́я преоби́десте,/ те́мже, ми́ра отре́кшеся, во оби́тель Хотько́вскую всели́стеся,/ иде́же в по́двизе и́ночества к Небе́сным востеко́сте.

Сохрани́те от зол ва́шими те́плыми к Бо́гу моли́твами, преподо́бнии,/ всех жи́тельствующих во оби́тели Хотъко́встей,/ е́йже вы нача́льницы и покрови́телие.

Богоро́дичен: Его́же родила́ еси́, Сы́на Твоего́ и Бо́га,/ моли́ти не преста́й, Богоневе́сто,/ да изба́вит оби́тель Твою́ от вся́каго зла и спасе́т ду́ши на́ша.

Конда́к, глас 4:

Днесь, ве́рнии, соше́дшеся,/ восхва́лим дво́ицу блаже́нную, благове́рнаго Кири́лла и Мари́ю добронра́вную,/ ти́и бо мо́лятся вку́пе со возлю́бленным сы́ном свои́м, преподо́бным Се́ргием,/ ко Еди́ному во Свято́й Тро́ице Бо́гу,/ оте́чество на́ше в правове́рии утверди́ти,/ до́мы ми́ром огради́ти,/ ю́ныя от напа́стей и собла́знов изба́вити,/ ста́рость укрепи́ти// и спасти́ ду́ши на́ша.

И́кос:

А́нгели земни́и и челове́цы Небе́снии вои́стину яви́стеся, преподо́бнии Кири́лле и Мари́е, от ю́ности ва́шея чи́стую со́весть пред Бо́гом иму́щии и до́бре во благоче́стии вку́пе пожи́вшии. Мы же, таково́е богоуго́дное житие́ ва́ше прославля́юще, гла́сы хвале́бными взыва́ем си́це: ра́дуйтеся, от ю́ности ва́шея Христа́ возлюби́вшии и Тому́ еди́ному порабо́тавшии; ра́дуйтеся, целому́дрия храни́телие и душе́вныя и теле́сныя чистоты́ рачи́телие; ра́дуйтеся, ду́ши и телеса́ ва́ша в обита́лище Ду́ха Свята́го угото́вившии; ра́дуйтеся, испо́лненнии прему́дрости и ра́зума Боже́ственнаго; ра́дуйтеся, я́ко от земли́ на Не́бо преидо́сте и та́мо со А́нгелы Тро́ице предстои́те; ра́дуйтеся, я́ко со безпло́тными ли́ки трисвяту́ю песнь Ей воспева́ете; ра́дуйтеся, на Небеси́ и на земли́ от Го́спода просла́вленнии; ра́дуйтеся, обре́тшии ме́сто ве́чнаго всесве́тлаго упокое́ния. Ра́дуйтеся, преподо́бнии Кири́лле и Мари́е, усе́рднии о нас пред Бо́гом моли́твенницы.

Песнь 7

Ирмо́с: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:// благослове́н еси́, Бо́же оте́ц на́ших.

Ра́ка моще́й ва́ших днесь чудеса́ источа́ет/ ве́рою притека́ющим к вам, блаже́ннии, и́же и воспева́ют:/ благослове́н еси́, Бо́же оте́ц на́ших.

Первопрестольный град и окре́стнии гра́ды и ве́си/ прославля́ют вас своя́ изба́вители и цели́тели от смертоносныя я́звы./ Сего́ ра́ди днесь, я́коже пре́жде, спаса́йте почита́ющих вас, преподо́бнии,/ да благода́рственно воспева́ют:/благослове́н еси́, Бо́же оте́ц на́ших.

Измла́да тя́жкою боле́знию одержи́ма,/ деви́ца не́кая внеза́пное исцеле́ние прия́т ва́шими и сы́на ва́шего к Бо́гу моли́твами./ С не́юже и мы благода́рственно взыва́ем:/ благослове́н еси́, Бо́же оте́ц на́ших.

Богоро́дичен: Я́ко Де́ву и еди́ну в жена́х, безсе́менно ро́ждшую Бо́га плотию,/ прославля́ем Тя, о Богома́ти,/ и таково́му Бо́жию смотре́нию уди́вльшеся, взыва́ем:/ благослове́н еси́, Бо́же оте́ц на́ших.

Песнь 8

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Воспои́м, ве́рнии, всечестную дво́ицу, Кири́лла и Мари́ю богоблаже́нных,/ от них бо возсия́ нам Се́ргий досточудный,/ украше́ние Це́ркве Правосла́вныя и мона́шествующих утвержде́ние.

Единому́дренни и единоду́шни доброде́тельми бы́сте, целому́дреннии супру́зи,/ помози́те и нам в чистоте́ и свя́тости житие́ провожда́ти,/ вас бо те́плыя хода́таи к Бо́гу стяжа́хом.

Любо́вь Христо́ву, я́же есть тве́рдое основа́ние супру́жеския жи́зни,/ со тща́нием, блаже́ннии, храни́ли есте́./ Сего́ ра́ди мо́лим вас:/ помози́те супру́гом правосла́вным в любви́ сей пребыва́ти/ и домо́м их благослове́ние Бо́жие стяжа́ти.

Богоро́дичен: Изба́ви нас от бед и мно́гих собла́знов, Всенепоро́чная,/ Тебе́ бо вси стяжа́хом прибе́жище и утвержде́ние/ и спасе́ние душ на́ших.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́, / я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.

Ка́ко ублажи́м вы, предо́брая дво́ице? Ка́ко просла́вим благо́е единоду́шие?/ Аще и земни́и бы́сте, но Небе́сных достиго́сте, блаже́ннии,/ иде́же Святе́й Тро́ице предстои́те и мо́лите спасти́ся любо́вию вас почита́ющим.

А́нгельски на земли́ пожи́вше,/ А́нгела земна́го и челове́ка Небе́снаго, преподо́бнаго Се́ргия, ми́ру яви́сте, святи́и,/ ны́не же со А́нгелы вку́пе водворя́етеся/ и с ни́ми Трисвяту́ю песнь в вы́шних Бо́гови воспева́ете.

Госпо́дь оби́тель Хотько́вскую ва́ми просла́ви, преподо́бнии и́ноцы,/ е́юже Це́рковь Ру́сская украша́ется и вам си́це вопие́т:/ ра́дуйтеся, всехва́льнии, оте́чества на́шего при́снии моли́твенницы.

Богоро́дичен: О Всепе́тая Ма́ти! / Все упова́ние на Тя возлага́ем,/ сохрани́ нас под кро́вом Твои́м.

Свети́лен:

Ра́дуется днесь све́тло Це́рковь Ру́сская,/ почита́ющи па́мять ва́шу пречестну́ю, Кири́лле блаже́нный и Мари́е достохва́льная,/ ва́ми бо о́браз ве́ры и благоче́стия показа́ся/ и свети́льник оте́честву на́шему, Се́ргий преподо́бный, яви́ся.

Сла́ва, и ны́не, Богоро́дичен:

Я́же Свет Боже́ственный неизрече́нно ро́ждшая,/ нас, омраче́нных прило́гами лука́ваго и в ле́ности живу́щих, просвети́, Всенепоро́чная,/ и к доброде́телем наста́ви.

На хвали́тех стихи́ры на 4, глас 4:

Приспе́ днесь пра́здник преподо́бных Кири́лла и Мари́и,/ ра́дости духо́вныя испо́лненный,/ прииди́те, русстии собо́ри,/ све́тло торжеству́им/ и сих хвала́ми и пе́сньми почти́м:/ ра́дуйтеся, Небе́снии челове́цы и земни́и А́нгели,/ земли́ Русския засту́пницы и храни́телие// и моли́твенницы о душа́х на́ших.

За́поведь страннолю́бия соблюли́ есте́, святи́и,/ лю́дем бо, в путьше́ствии су́щим,/ дом свой прибе́жище явля́сте./ Ны́не же в Небе́сных черто́зех пребыва́юще,/ нам, в стра́нствии жития́ су́щим,/ в кро́ве Бо́га Небе́снаго помози́те водвори́тися// ва́шими моли́твами, блаже́ннии.

Доброде́тельми сия́юще,/ благоче́стно в ми́ре пожи́ли есте́,/ свя́те Кири́лле и Мари́е пресла́вная,/ смиренному́дрием и чистото́ю укра́шеннии./ Ны́не же хода́таи к Бо́гу бу́дите о оте́честве ва́шем/ и грехо́в оставле́ние испроси́те// чту́щим любо́вию святу́ю па́мять ва́шу.

Блаже́нства непоро́чных вожделе́вше,/ путе́м за́поведей Госпо́дних теко́сте/ и, суеты́ жите́йския изба́витися хотя́ще,/ во оби́тель Пресвяты́я Богоро́дицы всели́стеся,/ иде́же земно́е стра́нствие сконча́вше,/ Вы́шняго Сио́на достиго́сте./ Сего́ ра́ди моли́теся, преподо́бнии, // и нам прича́стником Небе́снаго Ца́рствия яви́тися.

Сла́ва, глас 8:

Прииди́те, празднолю́бцы,/ пе́сньми духо́вными благоче́стно восхва́лим/ честну́ю дво́ицу, благочести́вую чету́,/ Кири́лла и Мари́ю приснопа́мятных,/ и́же, во оби́тель Хотько́вскую прите́кше,/ ве́чное упокое́ние обрето́ша./ Мы же, ра́це моще́й их моли́твенно предстоя́ще,/ я́ко покрови́телем и нача́льником оби́тели сея́,/ вку́пе вси согла́сно взыва́ем:/ ра́дуйтеся, преподо́бнии Кири́лле и Мари́е,// оби́тели Хотько́вския пресла́вное похвало́ и утвержде́ние.

И ны́не, Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас// от вся́кия ну́жды и печа́ли.

Славосло́вие вели́кое. Ектении́ и отпу́ст.

На литурги́и

Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́йя, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 10. Прича́стен: Ра́дуйтеся, пра́веднии, о Го́споде, пра́вым подоба́ет похвала́.

 

 

Святаго благове́рнаго кня́зя му́ченика Вячесла́ва Че́шскаго

Вечер:

Стихи́ры, глас 8.

Подо́бен: О, пресла́внаго чудесе́:

Трисве́тлыми заря́ми/ пресве́тло укра́шен па́че со́лнца,/ су́щим в беда́х возсия́л еси,/ Вячесла́ве преди́вный,/ разреша́я свя́занных без пра́вды,/ и боле́зни вся́кия отго́ниши/ зову́щим ве́рно тя на по́мощь,/ любо́вию пою́щим// всечестно́е ти успе́ние.

Гряди́те, вси ве́рнии,/ па́мять пречу́дную духо́вно пра́зднуем/ Христо́ва служи́теля Вячесла́ва днесь,/ оста́вль бо земно́е служи́тельство тле́нное,/ Небе́сное Ца́рство прия́т/ и в ру́це Влады́чни/ пресвяту́ю свою́ ду́шу днесь предаде́,/ прославля́я Го́спода,// уди́вльшаго па́мять его́.

И́ны стихи́ры, глас то́йже.

Подо́бен: И́же в Еде́ме рай:

Любо́вию ведо́мь вы́шняго зва́ния,/ в це́рковь Христо́ву идя́ше, преблаже́нне,/ у нея́же прия́т вене́ц ца́рский,/ и нетле́нен, и непреиду́щ,/ и́мже озари́лся еси́, я́ко со́лнце,/ за́паду и се́верным страна́м све́тлую зарю́ испусти́в чуде́с,/ пою́щим па́мять ти прехва́льную,// свя́те Вячесла́ве непобеди́мый.

Проли́тием пречи́стыя кро́ве ти,/ Вячесла́ве прехва́льне,/ Це́рковь Христо́ву украси́л еси́, я́ко ца́рскою багряни́цею,/ е́юже укра́шшися,/ вся страны́ собира́ет на лик,/ пресвяще́нную ти па́мять све́тло пра́здновати/ и ве́рно Благоде́телю и Творцу́ всех вопи́ти:// сла́ва Ти, Христе́, уди́вльшему па́мять свята́го Своего́.

И́на стихи́ра, глас 4.

Подо́бен: Я́ко до́бля:

Я́ко вели́ка помо́щника су́щим в беда́х,/ сне́мшеся, вси восхва́лим,/ я́ко прия́т дар благода́ти от Спа́са Христа́:/ бе́дныя избавля́ти,/ и печа́льных утеша́ти,/ и боле́зни вся́ки исцеля́ти/ зову́щим ве́рою на по́мощь/ и любо́вию творя́щим// пречу́дное его́ пра́зднество.

Тропа́рь, глас 4:

Днесь А́нгели с челове́ки/ ра́дуются вку́пе о́бщим весе́лием,/ Не́бо и земля́ све́тло лику́ют, свя́те Вячесла́ве,/ и мы, гре́шнии, приле́жно ти вопие́м:/ помоли́ся к Влады́це о нас,/ изба́вити ны от напа́сти ви́димых и неви́димых враг,// чту́щия пресве́тлую па́мять твою́.

Ин тропа́рь, глас то́йже:

Страны́ Че́шския кня́же преди́вный,/ правосла́вное насле́дие блаже́нныя Людми́лы умно́живый,/ о́бразе кро́тости и смире́ния, му́дрости и безстра́шия,/ ве́рность за́поведем Христо́вым в житии́ твое́м сохранивы́й,/ и́стинную ве́ру в окруже́нии язы́чества утвержда́я,/ те́мже и вене́ц сла́вы от Царя́ царе́й прия́л еси́,/ и ны́не правосла́вных ми́ра всего́ назида́еши,/ моли́, свя́те Вячесла́ве, Всеблага́го Бо́га// умири́ти мир и спасти́ ду́ши на́ша.

На у́трени

Аще хо́щеши чести́ седа́лен, зри тропа́рь, глас 4, или́ седа́лен му́ченика о́бщий.

Кано́н свята́го, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема:// Бо́гу побе́дную песнь пои́м, вопия́ше.

Лику́им днесь, ве́рнии, ра́достно,/ све́тлыми душа́ми пою́ще Спа́са/ на па́мять пречу́дную Христо́ва служи́теля Вячесла́ва.

Влады́чним Страсте́м сла́вне уподо́бился еси́,/ я́ко а́гня непоро́чно, без пра́вды убива́емь,/ тем с ли́ки му́ченик, богоблаже́нне, ны́не весели́шися.

Смерть хода́таицу жи́зни прии́м,/ вся́ческим Влады́це ны́не в сла́ве предстои́ши,/ ея́же и нам улучи́ти умоли́, свя́те, творя́щим твою́ па́мять пречу́дную.

Кто испове́сть твоя́ чудеса́, сла́вне,/ я́же твори́ши в ми́ре без числа́?/ Вы́ну бо всем ве́рным оби́льно дае́ши исцеле́ние.

Богоро́дичен: Впа́дша мя в разбо́йники душегу́бными де́лы и сме́ртию потопле́на/ воздви́гни, молю́ Ти ся, Госпоже́:/ Сы́ну Своему́ и Бо́гу за мене́ помоли́ся.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́выи́ нас на ка́мени// испове́дания Твоего́.

Любо́вию Христо́вою при́сно разжиза́емь к це́ркви святе́й,/ та́мо, преблаже́нне, я́ко а́гнец незло́бив,/ непра́ведное претерпе́л еси́ убие́ние.

Кро́вию ти пресве́тлою Це́рковь твоя́ укра́шшися,/ све́тлы лучи́ испуща́ет чуде́с,// пою́щи па́мять ти, достосла́вне.

Заря́ми Тро́ичными измла́да просве́щся,/ Христу́ насле́дник, свя́те, бысть,/ Его́же моли́ посла́ти мир душа́м на́шим.

Богоро́дичен: Чу́до Бо́жия Рождества́ Ти, Чи́стая,/ вся́каго естества́ прехо́дит чин:/ Бо́га бо Пресу́щна зача́т во чре́ве и, ро́ждши, пребыва́еши Присноде́ва.

Ин конда́к, глас 3:

Кня́же во́ине страны́ Боге́мии преди́вныя,/ смире́нным кня́жеским служе́нием спасе́ние стяжа́вый,/ у Ца́рскаго Престо́ла, свя́те Вячесла́ве,/ вене́ц сла́вы му́ченика за Христа́ прия́л еси́/ и ны́не усе́рдно мо́лишися о ве́рных,/ Ду́хом Бо́жиим к ве́чному блаже́нству угото́ванных,/ страну́ Че́шскую храни́т в Правосла́вии с любо́вию призыва́я,// во е́же спасти́ся душа́м на́шим.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи// от смы́сла чи́ста, о Го́споде пра́зднующи.

Благоде́тельно измла́да в ве́ре чи́сте воспита́н,/ чи́стыми свои́ми труды́ любо́вию Влады́це после́довал еси́,/ наде́ждею Нань льсти́ваго врага́ посрами́в.

Све́тлостию сия́я, свя́те Вячесла́ве,/ грехи́ омраче́ны су́щия просвети́ твои́ми моли́твами,/ с ли́ки му́ченик имы́й дерзнове́ние за нас моли́тися.

Мечи́ ссека́емь, свя́те, непобеди́ме,/ врага́ лука́ваго мече́м терпе́ния ссекл еси́;/ тем и вене́ц прия́т из руки́ Вседержи́теля.

Богоро́дичен: Неизглаго́ланы и непостижи́мы, богоподо́бны вои́стину суть/ Твоего́, Богоро́дице, Рождества́/ земны́м и Небе́сным, Присноде́во, та́йны.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Твои́ми страстьми́, прехва́льне,/ неболе́зненную жизнь восприя́в, свя́те Вячесла́ве,/ стра́ждущим всем яви́ся заступле́ние, на по́мощь ве́рно тя зову́щим.

Па́че со́лнца, блаже́нне, просвети́л еси́ се́вера, и ю́га, и за́пада концы́/ пресве́тлыми заря́ми чуде́с твои́х./ Тем нас озари́, свя́те, па́мять твою́ пра́зднующих.

Су́щим в беда́х помо́щник ты бысть,/ ни́щим кормле́ние, печа́льным уте́ха,/ тем и по сме́рти, свя́те, вся избавля́еши ве́рно тя зову́щия на по́мощь.

Богоро́дичен: Богоро́дицу Тя от души́ испове́дующия, Влады́чице ми́ру Блага́я, спаса́й,/ Тя бо заступле́ние, Непоро́чная, и́мамы,/ су́щую вои́стину Богоро́дицу.

Песнь 6

Ирмо́с: Жите́йское мо́ре/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,// Многоми́лостиве.

Житие́ чи́сто поще́нием стяжа́в, Вячесла́ве преди́вне,/ и А́нгелом сограждани́н яви́вся,/ с ни́миже моли́ о спасе́нии душ на́ших.

Княже́ние земно́е оста́вил еси́ вре́менное/ и ца́рское украше́ние прия́т из десни́цы Влады́чни,/ тле́нными ве́чная, я́ко мудр, стяжа́в.

Приими́ похвале́ние из окая́нных усте́н, свя́те,/ не могу́ща похвале́ния ти досто́йна исплести́/ и моли́ Ми́лостиваго Бо́га дарова́ти нам ве́лию ми́лость.

Богоро́дичен: Пречи́стая Влады́чице, ро́ждшая земны́м Ко́рмчию и Го́спода,/ по́хотем ми злолю́тым устро́й смуще́ние/ и тишину́ пода́ждь се́рдцу моему́.

Конда́к, глас 1.

Подо́бен: Лик а́нгельский:

С ли́ки а́нгельскими предстоя́, блаже́нне кня́же Вячесла́ве,/ наслажда́ешися Боже́ственныя и неизрече́нныя добро́ты,/ и, отту́ду благоде́тельныя да́ры поче́рп чуде́с,/ всем притека́ющим ве́рою под твою́ святы́ню// источа́еши цельба́м дарова́ние.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:// благослове́н еси́, Бо́же оте́ц на́ших.

Ста́рый злоде́й зави́де свято́му твоему́ житию́/ и науща́ет на убие́ние безу́мнаго ти собра́та./ Ты же чи́стою со́вестию немо́лчно Творцу́ своему́ вопия́ше:/ благослове́н Бог оте́ц на́ших.

Ве́село лику́ет Пра́га днесь, пресла́вный ти град, почита́я па́мять твою́,/ и, чудесы́ твои́ми озаря́я све́тло, вся страны́ созыва́ет вопи́ти:/ благослове́н Бог оте́ц на́ших.

Ле́стию прелука́ваго дре́вле очервле́на бысть земля́ твоя́ братоуби́йственною руко́ю;/ ны́не же, кро́вию ти окропи́вшися, благоуха́ния же́ртву Христо́ви приноша́ет, вопию́щи:/ благослове́н Бог оте́ц на́ших.

Богоро́дичен: Тобо́ю нам, Деви́це, свет возсия́, те́мным,/ Ты бо родила еси́ Зижди́теля всем и Бо́га,/ у Него́же проси́, Пречи́стая, при́сно посыла́ти нам, ве́рным, ве́лию ми́лость.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти.// Тя превозно́сим во вся ве́ки.

Весе́лия добро́тами нас озаря́еши, пресла́вне,/ па́че со́лнца в земли́ Боге́мстей благода́тными заря́ми свы́ше освяще́н,/ превозноша́я Христа́ во ве́ки.

Те́ло твое́ свято́е, блаже́нне, прии́м,/ Пра́га днесь, прехва́льный ти град, преди́вная чудеса́ ми́рови провозвеща́ет,/ превозноша́я Христа́ во ве́ки.

Кро́тостию укра́шен, преди́вне, и ра́зумом благове́рия просве́щен,/ Тро́ицы Пресвято́й яви́лся еси́ вои́стину пропове́дник,/ превозноша́я Христа́ во ве́ки.

Богоро́дичен: От Све́та Светода́вца Словесе́ зача́т и неизрече́нно родила́ еси́ Пресу́щаго,/ Дух бо Бо́жий, Деви́це, в Тя всели́ся:/ тем Тя пое́м, Чи́стая, во ве́ки вся.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю же, Всечи́стая, яви́ся челове́ком/ Сло́во Воплоще́нно,/ Его́же велича́юще,/ с Небе́сными во́и// Тя ублажа́ем.

Ве́лия благода́ти сподо́бився, сла́вне,/ просвети́л еси́ всю вселе́нную,/ исцеле́ния всем оби́льно подава́я.

Приими́, свя́те, ра́дость а́нгельскую/ и, предстоя́ Зижди́телю своему́,/ о нас помоли́ся, тебе́ велича́ющих.

Прии́м ны́не блаже́нный поко́й,/ не преста́й моля́ся, пресла́вне,/ свята́го блаже́нства причасти́тися вы́ну тя велича́ющим.

Богоро́дичен: Богоро́дице, ро́ждшая Сло́во па́че словесе́,/ Зижди́теля Своего́, Де́во,/ Того́ умоли́ спасти́ся душа́м на́шим.

Свети́лен.

Подо́бен: От земли́ преста́вися:

От земли́ преступи́л еси́ ко Влады́це, преблаже́нне Вячесла́ве,/ прииди́ ны́не духо́вно и присети́ ми́лостию/ пою́щих днесь честно́е ти пра́зднество.

Преподобнаго отца́ на́шего Иродио́на Илоезёрскаго