На вели́цей вече́рни

Обы́чная кафи́сма.

На Го́споди, воззва́х: стихи́ры на 6.

Обновле́ния 3, глас 6, самогла́сны:

Обновле́ния почита́ти,/ ве́тхий зако́н и до́бре име́ющся,/ па́че же но́вая почита́ти обновле́ньми./ Обновля́ются бо о́строви к Бо́гу, я́ко глаго́лет Иса́ия,/ я́же разуме́ти подоба́ет от язы́к це́ркви ны́не устроя́емыя/ и водруже́ние прие́млющия тве́рдое Бо́гом./ Те́мже и мы настоя́щая обновле́ния// духо́вно да торжеству́им.

Обновля́йтеся, бра́тие,/ и, ве́тхаго челове́ка отложи́вше,/ в но́вости жи́зни жи́тельствуйте,/ всем узду́ наложи́вше, от ни́хже смерть:/ вся у́ды нака́жем,/ вся́кую лука́вую дре́ва снедь возненави́девше,/ и сего́ ра́ди то́чию помина́юще, дре́вних да бежи́м./ Та́ко да обновля́ется челове́к,// си́це чти́тся обновле́ний день.

Анато́лия: Положи́л еси́ столп кре́пости/ Це́рковь Твою́, Христе́,/ Преве́чный Сло́ве,/ основа́л еси́ бо сию́ на ка́мени ве́ры./ Те́мже недви́жна пребыва́ет во век,/ иму́щи Тя тоя́ ра́ди в после́дняя/ невра́щно бы́вша Челове́ка./ Благодаря́ще у́бо, воспева́ем Тя, глаго́люще:/ Ты еси́ пре́жде веко́в, и на век, и еще́ Царь наш,/ сла́ва Тебе́.

И́ны стихи́ры свята́го, глас 4, на 3.

Подо́бен: Дал еси́ зна́мение:

Христо́с, призре́в/ на твоя́ благотворе́ния, Корни́лие,/ и боже́ственныя моли́твы,/ А́нгела тебе́ свята́го посыла́ет,/ всего́ тя просвеща́юща,/ и апо́столов свяще́нных верхо́внаго,/ обновля́юща водо́ю и ду́хом/ тя вседомо́вно, достосла́вне,// и науча́юща лу́чшим Ду́ха благода́тию.

Ма́стию пома́зан свяще́нства,/ поте́кл еси́/ спаси́тельное пропове́дание возвести́ти страна́м,/ искореня́я пре́лести те́рние, богому́дре,/ и насажда́я неле́стное уче́ние в душа́х Ду́хом./ Те́мже тя блажи́м,/ я́ко иера́рха богоприя́тна/ и непобеди́ма му́ченика,// веселя́щеся, Корни́лие.

Нра́вом твоея́ бла́гости/ после́дствующе, нему́дрии/ яви́шася разу́мни;/ у́мер же и естества́ зако́ном всели́вся, блаже́нне, во гроб,/ сего́ исто́чник соверша́еши мно́гих чуде́с,/ му́дре Корни́лие,/ исцеля́я боля́щия/ и отгоня́я ду́хи лука́вствия// Ду́хом Святы́м, богодохнове́нне.

Сла́ва, обновле́ния, глас 6. Самогла́сен.

Иоа́нна Мона́ха:

Па́мять обновле́ний соверша́юще, Го́споди,/ Тя, святы́ни Да́теля, сла́вяще, мо́лим,/ освяти́тися на́шим чу́вством душ,/ моли́твами сла́вных страстоте́рпец,// Бла́же Всеси́льне.

И ны́не, предпра́зднства, глас то́йже:

Днесь Дре́во яви́ся,/ днесь род евре́йский поги́бе,/ днесь ве́рными цари́ ве́ра явля́ется,/ и Ада́м дре́ва ра́ди испаде́,/ и па́ки Дре́вом де́мони вострепета́ша:// Всеси́льне Го́споди, сла́ва Тебе́.

Аще ли в пято́к ве́чера: И ны́не, Богоро́дичен пе́рвый настоя́щаго гла́са.

Вход. Проки́мен дне, и чте́ния.

Царств тре́тиих чте́ние (глава́ 8):

Ста Соломо́н пред лицо́м же́ртвенника Госпо́дня, пред всем собо́ром Изра́илевым,/ и возде́в ру́це свои́ на не́бо, и рече́:/ Го́споди Бо́же Изра́илев,/ несть Бог, я́коже Ты на Небеси́ горе́ и на земли́ до́ле./ Аще бо не́бо, и не́бо небесе́ не довле́ют Тебе́,/ ка́ко дом сей, его́же созда́х и́мени Твоему́?/ Оба́че и при́зриши на моли́тву мою́, Го́споди Бо́же Изра́илев,/ услы́шати моле́ние и моли́тву,/ е́юже раб Твой мо́лится пред Тобо́ю к Тебе́ днесь./ Да бу́дут о́чи Твои́ отве́рсты на дом сей день и нощь,/ на ме́сто сие́, о не́мже глаго́лал еси́:/ бу́дет и́мя Мое́ та́мо, е́же услы́шати моли́тву,/ е́юже мо́лится раб Твой на ме́сте сем, во дни и но́щи;/ и послу́шати мольбу́ раба́ Твоего́, и люде́й Твои́х Изра́иля./ Ели́ка а́ще помо́лятся к Тебе́ на ме́сте сем,/ и Ты услы́шиши на ме́сте жили́ща Твоего́ на Небеси́,/ и сотвори́ши, и ми́лостив бу́деши им.

При́тчей чте́ние (глава́ 3):

Бог Прему́дростию основа́ зе́млю, утото́ва же Небеса́ ра́зумом./ В чу́встве Его́ бе́здны разверго́шася, о́блацы же источи́ша ро́су./ Сыне, да не премине́ши,/ соблюди́ же Мой сове́т и мысль, да живе́т душа́ твоя́,/ и благода́ть бу́дет на твое́й вы́и:/ бу́дет же исцеле́ние пло́тем твои́м и попече́ние косте́м твои́м./ Да хо́диши наде́яся в ми́ре во всех путе́х твои́х,/ нога́ же твоя́ не по́ткнется./ Аще бо ся́деши, безбоя́знен бу́деши;/ а́ще же поспи́ши, сла́достно поспи́ши./ И не убои́шися боя́зни наше́дшия, ниже́ стремле́ний нечести́вых находя́щих./ Госпо́дь бо бу́дет на всех путе́х твои́х, и утверди́т твою́ но́гу, да не позы́блешися./ Не отрецы́ся благотвори́ти тре́бующему, внегда́ а́ще и́мать рука́ твоя́ помога́ти./ Не рцы: отше́д возврати́ся, и у́тро дам, си́льну ти су́щу благотвори́ти;/ не ве́си бо, что породи́т находя́й день./ Не де́лай на дру́га твоего́ зла, прише́льствующа и упова́юща на тя./ Не любовра́жствуй на челове́ка всу́е, да не что на тя соде́лает зло́е./ Не стяжи́ злых муже́й поноше́ния, ниже́ ревну́й путе́м их./ Нечи́ст бо пред Го́сподем вся́кий законопресту́пник,/ с пра́ведными же не сочетава́ется./ Кля́тва Госпо́дня в доме́х нечести́вых,/ дворы́ же пра́ведных благословля́ются./ Госпо́дь го́рдым проти́вится, смире́нным же дае́т благода́ть.

При́тчей чте́ние (глава́ 9):

Прему́дрость созда́ Себе́ дом и утверди́ столпо́в седмь./ Закла́ Своя́ же́ртвенная, и раствори́ в ча́ши Свое́й вино́, и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне;/ и тре́бующим ума́ рече́:/ прииди́те, яди́те Мой хлеб, и пи́йте вино́, е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́ и испра́вите ра́зум в ве́дении./ Наказу́яй злы́я, прии́мет себе́ безче́стие;/ облича́яй же нечести́ваго, опоро́чит себе́, обличе́ние бо нечести́вому ра́ны ему́./ Не облича́й злых, да не возненави́дят тя./ Облича́й прему́дра, и возлю́бит тя./ Даждь прему́дрому вину́, и прему́дрший бу́дет./ Сказу́й пра́ведному, и приложа́т приима́ти./ Нача́ло прему́дрости страх Госпо́день,/ и сове́т святы́х ра́зум./ Разуме́ти бо зако́н, по́мысла есть блага́го./ Сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На стихо́вне стихи́ры предпра́зднства, глас 5.

Самоподо́бен:

Ра́дуйся, живоно́сный Кре́сте,/ благоче́стия непобеди́мая побе́да,/ дверь ра́йская,/ ве́рных утвержде́ние,/ Це́ркве огражде́ние,/ и́мже тля разори́ся и упраздни́ся,/ и попра́ся сме́ртная си́ла,/ и вознесо́хомся от земли́ к Небе́сным;/ ору́жие непобеди́мое,/ бесо́в сопротивобо́рче,/ сла́ва му́чеников,/ преподо́бных я́ко вои́стину удобре́ние,/ приста́нище спасе́ния,// да́руяй ми́ру ве́лию ми́лость.

Стих: Возноси́те Го́спода Бо́га на́шего// и покланя́йтеся подно́жию но́гу Его́, я́ко свя́то есть.

Ра́дуйся, Госпо́день Кре́сте,/ и́мже разреши́ся от кля́твы челове́чество,/ су́щия ра́дости зна́мение,/ прогоня́яй враги́ во твое́м воздви́жении, всече́стне,/ нам помо́щниче, царе́й держа́во,/ кре́пость пра́ведных,/ свяще́нников благоле́пие,/ вообража́емый, и лю́тых избавля́яй,/ жезл си́лы, и́мже пасе́мся,/ ору́жие ми́ра, его́же со стра́хом обстоя́т Ангели,/ Христа́ Боже́ственная сла́ва,;/ подаю́щаго ми́ру ве́лию ми́лость.

Стих: Бог же, Царь наш пре́жде ве́ка,// соде́ла спасе́ние посреде́ земли́.

Ра́дуйся, слепы́х наста́вниче,/ немощны́х врачу́,/ воскресе́ние всех уме́рших,/ воздви́гнувый ны, во тлю па́дшия,/ Кре́сте честны́й,/ и́мже разруши́ся кля́тва, и процвете́ нетле́ние,/ и земни́и обожи́хомся,/ и диа́вол всеконе́чно низве́ржеся./ Днесь воздвиза́ема тя ви́дяще рука́ми архиере́йскими,/ возно́сим Вознесе́ннаго посреде́ тебе́/ и тебе́ покланя́емся,// почерпа́юще бога́тно ве́лию ми́лость.

Сла́ва, обновле́ния, глас 2. Анато́лиево:

Обновле́ние соверша́юще всесвяще́ннаго хра́ма Твоего́ Воскресе́ния,/ Тебе́ сла́вим, Го́споди, освяти́вшаго сего́,/ и соверши́вша самосоверше́нною Твое́ю благода́тию,/ и крася́щагося в нем свяще́нствуемыми от ве́рных/ та́инственными и свяще́нными же́ртвами,/ и прие́млюща от рук раб Твои́х/ безкро́вныя и пречи́стыя же́ртвы,/ воздава́юща же пра́во принося́щим// грехо́в очище́ние и ве́лию ми́лость.

И ны́не, предпра́зднства, глас то́йже:

Боже́ственное сокро́вище, в земли́ кры́емое,/ Жизнода́вца Крест,/ на небесе́х показа́ся царю́ благочести́вому,/ и побе́ды на враги́ подписа́ние явля́ет разу́мно;/ его́же ра́достно ве́рою и любо́вию боже́ственно восте́к к высоте́ зре́ния,/ тща́нием же того́ от земны́х недр изнесе́,// во избавле́ние ми́ра и спасе́ние душ на́ших.

Тропа́рь обновле́ния, глас 4:

Якоже вы́шния тве́рди благоле́пие,/ и ни́жнюю споказа́л еси́ красоту́ свята́го селе́ния сла́вы Твоея́, Го́споди,/ утверди́ сие́ во век ве́ка/ и приими́ на́ша в нем непреста́нно приноси́мая Тебе́ моле́ния, Богоро́дицею,/ всех Животе́ и Воскресе́ние.

Сла́ва, му́ченика, глас то́йже:

И нра́вом прича́стник,/ и престо́лом наме́стник апо́столом быв,/ дея́ние обре́л еси́, богодухнове́нне,/ в виде́ния восхо́д;/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Корни́лие,/ моли́ Христа́ Бо́га,/ спасти́ся душа́м на́шим.

И ны́не, предпра́зднства, глас то́йже:

Животворя́щий Крест Твоея́ бла́гости,/ его́же дарова́л еси́ нам недосто́йным, Го́споди,/ Тебе́ прино́сим в моли́тву:/ спаси́ лю́ди и град Твой моля́щийся, Богоро́дицею,/ Еди́не Человеколю́бче.

На у́трени

По 1-м стихосло́вии седа́лен, глас 4.

Подо́бен: Ско́ро предвари́:

Вся просвети́ прише́ствием Христо́с,/ мир обнови́ Ду́хом Боже́ственным Свои́м,/ ду́ши обновля́ются, дом бо возложи́ся ны́не во сла́ву Госпо́дню,/ иде́же и обновля́ет ве́рных сердца́ Христо́с, Бог наш,/ во спасе́ние челове́ков.

Сла́ва, и ны́не, то́йже.

По 2-м стихосло́вии седа́лен, глас 4.

Подо́бен: Ско́ро предвари́:

Пра́зднственный днесь обновле́ний, ве́рнии, день дости́же нас,/ повелева́ющий избра́нию Христо́ву всем обнови́тися/ и све́тлым лице́м пе́сни Влады́це из глубины́ се́рдца воспе́ти ве́рно,/ я́ко Изба́вителю и нас обновля́ющему.

Сла́ва, и ны́не, то́йже.

Кано́ны три: обновле́ния, со ирмосо́м на 6, предпра́зднства на 4, и свята́го на 4.

Кано́н обновле́ния, творе́ние Иоа́нна Мона́ха. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Столпо́м путеводя́й дре́вле избра́ннаго Изра́иля,/ ба́нею креще́ния, Христе́, в Сио́не насади́л еси́ Це́рковь, зову́щу:/ воспои́м песнь Бо́гу на́шему.

Днесь непристу́пныя Твоея́ сла́вы прише́ствие,/ и́же на земли́, водруже́нный Тебе́ храм Не́бо устро́й,/ в не́мже согла́сно воспои́м песнь Бо́гу на́шему.

Не зако́ном Це́рковь, Го́споди, украша́ется,/ ни ра́бских просте́ртием рук,/ но, Креста́ благода́тию хва́лящися, пое́т Тебе́:/ воспои́м песнь Бо́гу на́шему.

Богоро́дичен: Безсе́менно, Отчею во́лею, от Боже́ственнаго Ду́ха/ Бо́жия зачала́ еси́ Сы́на и пло́тию породила́ еси́,/ из Отца́ безма́терня и нас ра́ди из Тебе́ безо́тча.

Ин кано́н предпра́зднства

по алфави́ту без Богородичнов. Ио́сиф. Глас то́йже.

Песнь 1

Ирмо́с: Триста́ты кре́пкия,/ Рожде́йся от Девы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́// побе́дное воспою́ пе́ние.

Весели́ся, Не́бо, и земле́, ра́дуйся:/ пресвяты́й бо Крест происхо́дит,/ освяща́я ны благода́тию, сего́ целу́ющия,/ я́ко исто́чника святы́ни и всех обоже́ния вину́.

Ше́ствовати благоче́стно небе́сную стезю́/ укрепи́ нас, пресвяты́й Кре́сте, ве́рно покланя́ющияся тебе́,/ я́ко да проти́вных укло́ньшеся про́пастей,/ о́бщницы Боже́ственныя сла́вы бу́дем.

Зна́нны Творцу́ тобо́ю бы́вше, всечестны́й Кре́сте,/ се́рдцем и душе́ю объе́млем, всегда́ тя предлежа́ща зря́ще,/ и умо́м просвеща́емся, всевино́вное Сло́во сла́вяще.

Богоро́дичен: Град Бо́га Всецаря́, благоприя́тное сокро́вище честно́е, Богоро́дице Всенепоро́чная,/ сохрани́ Твой жре́бий, всегда́ благохва́лящий Тя/ и почита́ющий ве́рою Рождество́ Твое́.

Ин кано́н свята́го, его́же краегране́сие:

Чуде́с твои́х сла́ву пою́, блаже́нне. Ио́сиф. Глас 5.

Песнь 1

Ирмо́с: Коня́ и вса́дника в мо́ре Чермно́е,/ сокруша́яй бра́ни мы́шцею высо́кою,/ Христо́с истрясе́,/ Изра́иля же спасе́,// побе́дную песнь пою́ща.

Сие́ твое́ светоно́сное и боже́ственное успе́ние,/ и пресве́тлую па́мять, и свяще́нное торжество́ торжеству́ющия/ моли́твами твои́ми просвети́, иера́рше богоблаже́нне.

Яви́лся еси́ и пре́жде соверше́ннаго, му́дре, та́инств навыче́ния/ ми́лостынями и моли́твами, Корни́лие, упраждня́яся, всеблаже́нне,/ и всех Го́спода мы́сли ища́ пра́востию.

Зако́нов спаси́тельных я́ве научи́лся еси; пло́ти Соедини́вшагося кра́йния ра́ди бла́гости,/ апо́столов верхо́вному ма́нием Влады́чним, блаже́нне, научи́вшу тя.

Богоро́дичен: Распаля́еши ве́рных сердца́ при́сно сла́вити Тя несы́тною любо́вию,/ Богороди́тельнице Влады́чице:/ сла́ва бо еси́ челове́ков,/ ро́ждшая сла́вы Го́спода, Чи́стая.

Катава́сия: Крест начерта́в:

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Освяти́л еси́ на земли́ Це́рковь Твою́, Христе́, Ду́хом,/ пома́зав сию́ днесь/ Твоего́ ра́дования еле́ем.

Яви́л еси́, Бла́же,/ рукотворе́нную ски́нию днесь па́че ума́,/ сла́вы Твоей строи́тельно бы́вшее жили́ще.

Основа́ние Тя, Христе́, Це́рковь неруши́мо иму́щи,/ Твои́м Кресто́м венча́ется,/ я́коже ца́рскою диади́мою.

Богоро́дичен: Ты еди́на на земли́/ па́че естества́ благи́х Хода́таица, Ма́ти Бо́жия, была́ еси́:/ те́мже Тебе́, е́же ра́дуйся, прино́сим.

Ин

Ирмо́с: Не му́дростию и си́лою и бога́тством хва́лимся,/ но Тобо́ю, о́тчею Ипоста́сною Му́дростию, Христе́:// несть бо свят па́че Тебе́, Человеколю́бче.

Сла́ву Христо́ву тя, быва́ющу ве́рою, сла́вим,/ прославля́еми твои́м, пресла́вне Госпо́день Кре́сте, честны́м объя́тием/ и просвеща́еми.

В весе́лии прише́дше, ве́рнии,/ почерпе́м, я́ко от исто́чника чи́ста, Креста́, присноживу́щия во́ды/ и, спаса́еми, Бо́га восхва́лим.

Жизнь сый Иису́с, пове́шен, умертви́ся на Дре́ве кре́стнем,/ его́же ны́не ве́рно объе́млюще,/ стра́сти отгоня́ем, сме́рти хода́таи.

Богоро́дичен: Яви́вшися, души́ моей тьму отжени́,/ грехо́вныя у́зы, Чи́стая Де́во, расто́ргни/ и спаса́ мя, ро́ждшая Всеще́драго.

Ин

Ирмо́с: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую,/ на недви́жимом, Христе́, ка́мени за́поведей Твои́х// Це́рковь Твою́ утверди́, Еди́не Бла́же и Человеколю́бче.

Святаго просвеще́ние прия́л еси́ Ду́ха/ и Боже́ственную благода́ть от боже́ственных уст, всю прие́м вседомо́вно/ боже́ственнаго верховнаго апо́стола прише́ствием,/ возвеща́ющаго спаса́тельная уче́ния.

Возвы́сився доброде́тельми, я́ко кедр высокора́стный,/ и плоды́ благово́нны нам израста́в, уче́ний пода́ние,/ благода́ть чуде́с и исцеле́ний де́йство,/ блаже́нне иера́рше Корни́лие.

Велича́йшаго сподо́бився благосла́вия, Корни́лие,/ с верхо́вным и ины́ми мно́гими,/ поте́кл еси́, пропове́дуя всю́ду пропове́дание боже́ственное,/ и́мже мы просвеща́еми, тьмы неве́дения изба́вихомся.

Богоро́дичен: Чистоты́ светови́дное была́ еси́ селе́ние,/ Светода́теля носи́вши воплоща́ема,/ Челове́ка яви́вшася по нам за человеколю́бие и тлю разори́вша,/ Пречи́стая Де́во Богоневе́сто, нетле́нное челове́ков воззва́ние.

Конда́к, глас 4.

Подо́бен: Яви́лся еси́:

Не́бо многосве́тлое це́рковь показа́ся,/ вся просвеща́ющая ве́рныя, в не́йже стоя́ще, зове́м:// сей дом утверди́, Го́споди.

Та́же седа́лен, глас 8.

Подо́бен: Повеле́нное:

Свиде́тельства ски́нию Христо́с показа́,/ и боже́ственный Моисе́й на земли́ водрузи́,/ и храм обновля́ет Соломо́н в же́ртвах,/ мы же, к но́вому Иерусали́му ве́рою прибега́юще,/ дави́дски дади́м боже́ственное воспева́ние Распе́ншемуся нас ра́ди,/ прося́ще проще́ния всех, и́миже согреши́хом.

Сла́ва, свята́го, глас 4.

Подо́бен: Яви́лся еси́:

Нача́ток святы́й тя Це́рковь от язы́к прия́т,/ просвеща́ющаго сию́ доброде́тельными твои́ми дея́ньми,/ священнотаи́нниче богому́дре Корни́лие.

И ны́не, предпра́зднства, глас то́йже.

Подо́бен: Удиви́ся Ио́сиф:

Просте́р Моисе́й ру́ки к высоте́ небе́сней,/ прообразова́ше Крест, Боже́ственное ору́жие ве́рных,/ на не́мже Христо́с грехи́ пригвозди́./ Тем враг пла́каше, стражда́ боле́зненно чу́вствы, глаго́лаше:/ древяно́е мя копие́ прободе́ посреде́ се́рдца моего́./ Христо́с вся от а́дских уз реши́т.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Не же́ртвами безслове́сных Це́рковь,/ но Твое́ю честно́ю из ребр живоно́сною Кро́вию окропля́ется,/ ле́потно взыва́ющи:/ сла́ва си́ле Твое́й, Го́споди.

Селе́ния Госпо́дня возлю́бленная/ жела́ющим ви́дети открове́нно сла́ву лица́ Его́/ согла́сно зову́т:/ сла́ва си́ле Твое́й, Го́споди.

Образу́ющи пома́зание, Це́рковь избра́нных люде́й Твои́х/ многоце́нным ми́ром днесь помазу́ется,/ Боже́ственную Ду́ха благода́ть неви́димо прие́млющи.

Богоро́дичен: Неискусобра́чно родила́ еси́, о Де́во,/ и по рождестве́ яви́лася еси́ де́вствующи па́ки,/ те́мже немо́лчными гла́сы: е́же ра́дуйся,/ Тебе́, Влады́чице, ве́рою несумне́нною зове́м.

Ин

Ирмо́с: Любве́ ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,// кре́пость моя́ и хвале́ние.

Солнцезра́чен ви́дится/ покланя́емый от ве́рных челове́ков Крест Госпо́день,/ его́же целу́юще, душа́ми просвеща́емся.

Бог Госпо́дь, воплоща́ем яви́ся/ и возвы́сився на Дре́ве,/ тому́ покланя́ющияся просвеща́ет,/ при́сно от лю́тых избавля́яй.

Очище́ние нам и оставле́ние согреше́ний,/ Сло́ве Бо́жий, пода́ждь,/ ве́рно покланя́ющимся днесь/ предлежа́щему Кресту́ Твоему́ честно́му.

Богоро́дичен: Не истощи́в Оте́ческих недр,/ Сло́во в Твои́х не́дрех, Отрокови́це,/ восклони́ся, я́ко Младе́нец,/ хотя́ обнови́ти мя, тли подлежа́щаго.

Ин

Ирмо́с: Боже́ственное Твое́ разуме́в истоща́ние/ прозорли́во, Авваку́м, Христе́, со тре́петом вопия́ше Тебе́:/ во спасе́ние люде́й Твои́х,// спасти́ пома́занныя Твоя́ прише́л еси́.

Ду́ха благода́ть прии́м,/ я́коже со́лнце светоза́рное, зе́млю проше́л еси́, Корни́лие,/ отгоня́я тьму идоло-неи́стовства, прехва́льне.

Я́ко вели́ка река́, исходя́,/ все лице́ земли́ напая́вши боже́ственными уче́нии,/ и пле́велы подавля́я многобо́жия, Корни́лие.

Мертв всему́ ми́ру быв,/ Умерщвле́ннаго нас ра́ди Боже́ственное воста́ние/ всем страстьми́ уме́ршим возвести́л еси́,/ Корни́лие всеблаже́нне.

Богоро́дичен: Му́дрости чи́стое оби́телище о́тчия/ преесте́ственно, Чи́стая Де́во, была́ еси́,/ Еюже мы зло́бы ны́не хитреца́ изба́вихомся.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет святы́й, обраща́яй из мра́чна неве́дения// ве́рою воспева́ющия Тя.

Ты дре́вле на Сина́и/ ски́нию нерукотворе́нную показа́л еси́ богови́дцу Моисе́ю,/ пропису́я, Христе́, Це́рковь Твою́.

Ты, Го́споди, ски́нию на земли́ устро́ил еси́,/ Ты чино́м Небе́сным челове́ков ликостоя́ния/ сочетава́еши си́лою Твое́ю.

Тя, Го́споди, исто́чник жи́зни ве́мы,/ Ты, Свя́те, мир, прише́д,/ благовести́л еси́, Христе́, Це́ркви Твое́й.

Богоро́дичен: Тя ору́жие тве́рдое на враги́ предлага́ем,/ Тя держа́ву и наде́жду на́шего спасе́ния, Богоневе́сто, стяжа́хом.

Ин

Ирмо́с: Просвеще́ние Твое́, Го́споди, низпосли́ нам/ и от мглы прегреше́ний разреши́ ны, Гла́же,// Твой мир да́руяй.

На стра́сти укрепи́ нас тлетво́рныя,/ тя почита́ющих и целу́ющих, честны́й Кре́сте,/ святы́я Стра́сти святе́йшее зна́мение.

Просвеще́ние днесь, сердцы́ и душа́ми,/ до́брыми ви́ды присту́пим, ве́рнии,/ и свяще́нному и боже́ственному Дре́ву Креста́ поклони́мся.

Ме́ррския ослажда́я пре́жде во́ды Моисе́й,/ зна́менуя дре́вом тебе́, честны́й Кре́сте,/ и́мже сла́дость спаси́тельную челове́ком иска́пал еси́.

Богоро́дичен: За ны помоли́ся Христу́,/ от Твои́х чи́стых крове́й, Пречи́стая Отрокови́це,/ Пло́тию веще́ственною оде́янну и земныя обно́вльшу.

Ин

Ирмо́с: Одея́йся све́том, я́ко ри́зою,/ к Тебе́ у́тренюю и Тебе́ зову́:/ ду́шу мою́ просвети́ омраче́нную, Христе́,// я́ко Еди́н Благоутро́бен.

Весь возложи́вся Вседержи́телю,/ глухи́м куми́ром че́сти не прине́ся еси́, священнотаи́нниче,/ от скверно- уби́йственных челове́к понуждаемь.

Высочайшаго неви́димаго Бо́га, Корни́лие,/ в моли́твах призва́л еси́/ и храм низложи́л еси́ ме́рзких куми́ров, вельми́ удивляемь.

Вседержи́теля храня́ повеле́ния,/ в темни́це у́зы претерпе́л еси́/ и уз отреши́л еси́ злове́рия безу́мныя, богому́дре.

Богоро́дичен: Одожди́ ми, Пречи́стая, грехо́в оставле́ние,/ посети́ мя, немощству́юща/ и вла́ема напа́стьми жите́йскими и страстьми́ теле́сными.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х// исте́кшею Кро́вию.

Добро́ты Царь Христо́с возжела́/ ны́не избра́нныя Це́ркве и язы́ков ма́терь показа́,/ от рабо́ты сынотвори́мых Ду́хом.

Трепе́щут вражде́бных де́монов полцы́,/ Христо́ве Це́ркви Креста́ о́бразом знамену́емей/ и осеня́емей свяща́тельным Ду́ха осия́нием.

Не песо́к, но Христа́ основа́ние иму́щи,/ я́же от язы́к Це́рковь венча́ется добро́тою непристу́пною/ и диади́мою ца́рскою украша́ется.

Богоро́дичен: О, чу́до, всех чуде́с нове́е!/ Я́ко Де́ва, во утро́бе вся Содержа́щаго неискусому́жно заче́нши,/ не тесновмести́.

Ин

Ирмо́с: Приидо́х во глубины́ морски́я,/ и потопи́ла мя есть бу́ря мно́гих грехо́в,// но, я́ко Бог, из глубины́ возведи́ живо́т мой, Многоми́лостиве.

Прободе́н на тебе́ в ре́бра, Зижди́тель, Кре́сте, во́льно пове́шен,/ Кровь и во́ду источа́ет,/ и́миже назда́хомся, ве́рно тя целу́ющий.

Дре́во Госпо́дне жизнода́рное,/ исто́чник безсме́ртия, избавле́ние всего́ ми́ра,/ спаси́ ны, целу́ющия тя, я́ко храни́теля на́шего спаси́тельнаго.

Ору́жие нам кре́пкое показа́лся еси́,/ и́мже побежда́ем вся наве́ты проти́вных, боже́ственный Кре́сте,/ пра́востию душе́вною свяще́нно тя целу́ющий.

Богоро́дичен: Святый храм во святы́х Почива́ющаго/ была́ еси́, Богороди́тельнице:/ те́мже ны, ве́рно пою́щия Тя, освяща́еши, Де́во Ма́ти.

Ин

Ирмо́с: Неи́стовствующееся бу́рею душетлённою, Влады́ко Христе,/ страстёй мо́ре укроти́/ и от тли возведи́ мя,Ц я́ко Благоутро́бен.

Чи́сто творя́ моли́твы твоя́,/ Ангела Бо́жия явственно ви́дел еси́,/ науча́юща тя лу́чшая и спасе́нная иму́щим.

Просвети́вся Ду́хом, светода́тельная показа́лся еси́ звезда́,/ светоза́рными сия́нии концы́ просвеща́я,/ священнотаи́нниче Корни́лие.

Позна́в Го́спода сла́вы, и́же ле́стию пре́жде помраче́н,/ прозира́еши, блаже́нне, моли́твою твое́ю/ и вседомо́вно прие́млеши Боже́ственное очище́ние.

Богоро́дичен: Сла́вы Госпо́дь от крове́й Твои́х де́вственных воплоти́ся,/ Еди́н, я́ко весть, Всепе́тая,/ спаса́я ны бла́гостию.

Конда́к, глас 2.

Подо́бен: Тве́рдыя:

Обновле́ния ду́ха в сердца́х/ и просвеще́ние вну́тренним да́руй/ ве́рою соверша́ющим свяще́нная обновле́ния хра́ма до́му Твоего́,/ ему́же благоволи́л еси́ созда́тися в Твое́ Боже́ственное и́мя,// Еди́не во святы́х Прославля́емый.

И́кос:

Па́мять соверша́я обновле́ний,/ мудре́йший дре́вле Соломо́н Бо́гу/ живо́тных безслове́сных приноша́ше всесожже́ния и же́ртвы,/ егда́ же ны́не и́стина и Благода́ть прии́де на зе́млю,/ же́ртвы а́бие преложи́, же́ртвовав Же́ртву на спасе́ние на́ше в Себе́, я́ко Человеколю́бец./

Це́рковь освяти́ и непоколеби́му сию́ покажи́,/ Еди́н во святы́х Прославля́емый.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:// благослове́н еси́ в хра́ме сла́вы Твоея, Го́споди.

Росода́тельный у́бо пе́щный пла́мень показа́ся дре́вле,/ ны́не же от еле́а пома́зание духо́вное освяща́ет зову́щия:/ благослове́н еси́ в хра́ме сла́вы Твоея́, Го́споди.

Я́ко в пещи́ богоприя́тней, но́вей сей ски́нии,/ вси, и́же от Изра́иля духо́внаго, ороша́еми, взыва́ем:/ благослове́н еси́ в хра́ме сла́вы Твоея́, Го́споди.

Уя́звленнии сладча́йшим боже́ственным жела́нием, прииди́те,/ в черто́зе сем ца́рстем счета́емся Жениху́ Христу́:/ благослове́н еси́ в хра́ме, зову́ще, сла́вы Твоея́, Го́споди.

Богоро́дичен: Вы́шняго освяще́нное Боже́ственное селе́ние, ра́дуйся:/ Тобо́ю бо даде́ся ра́дость, Богоро́дице, зову́щим:/ благослове́нна Ты в жена́х еси́, Всенепоро́чная Влады́чице.

Ин

Ирмо́с: Ю́ноши три в Вавило́не,/ веле́ние мучи́телево на бу́йство прело́жше,/ посреде́ пла́мене вопия́ху:/ благослове́н еси́, Го́споди, // Бо́же оте́ц на́ших.

Дре́вле в благослове́ниих дете́й Иа́ков тя проначерта́, честны́й Кре́сте,/ но мы тя ны́не покланя́ющеся чтим,/ просвеще́ние почерпа́юще.

Глаго́лы прия́ша коне́ц ны́не/ боже́ственных проро́ков, Кре́сте свяще́ннейше:/ всех бо Госпо́дь на тебе́ возвы́сися,/ вся от тли избавля́я.

Усты́ тя и се́рдцем, всечестны́й Кре́сте, ны́не объе́млюще,/ освяще́ние, здра́вие и спасе́ние всегда́ почерпа́ем,/ души́ же и телесе́.

Богоро́дичен: Де́во Благослове́нная, моли́ся о нас, моля́щихся Тебе́,/ на Тя бо наде́емся вси и Тебе́ вопие́м:/ Влады́чице, не пре́зри па́ствы Твоея́.

Ин

Ирмо́с: Превозноси́мый отце́в Госпо́дь/ пла́мень угаси́, о́троки ороси́,/ согла́сно пою́щия:// Бо́же, благослове́н еси́.

Ты язы́ков нача́ток был еси́, Корни́лие,/ пе́рвый бо креще́ние прия́л еси́ свято́е и Ду́ха благода́ть,/ я́ко пре́жде богоглаго́ливии.

Велича́йшая чудеса́ соверша́я Боже́ственною благода́тию,/ к ве́ре улови́л еси́ дре́вле злому́дрствующия,/ науча́я воспева́ти: Бо́же, благослове́н еси́.

В земли́ кры́ем и купино́ю покрове́н,/ боже́ственными сказа́ньми, му́дре,/ яви́лся еси́ чуде́с точа́ благода́ть и неду́ги отгоня́я.

Цевни́це, сладковоспе́вшая уче́ния спаси́тельная/ и всех, Корни́лие, ду́ши услажда́ющая,/ показа́лся еси́, воспева́я: Бо́же, благослове́н еси́.

Тро́ичен: Вси Триипоста́сную Еди́ницу да просла́вим:/ Отца́ Пребезнача́льнаго, Сы́на Единосу́щнаго и Ду́ха Свята́го,/ песнопою́ще: Бо́же, благослове́н еси́.

Богоро́дичен: Яви́лася еси́ челове́ческое смеше́ние обожи́вши боже́ственным Твои́м Рождество́м,/ Де́во Всенепоро́чная./ Тем Тя по до́лгу, ве́рнии, славосло́вим.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́,/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:// благослови́те, вся дела́ Госпо́дня, Го́спода.

Днесь ри́зою у́мною, свы́ше истка́нною от Боже́ственныя благода́ти,/ Це́рковь Твоя́, Го́споди, я́коже неве́ста, украси́ся/ и своя́ созыва́ет к весе́лию лю́ди, во е́же пе́ти:/ благослови́те, вся дела́ Госпо́дня, Го́спода.

Днесь вторы́й Ада́м, Христо́с, показа́ рай мы́сленный,/ но́вую сию́ ски́нию,/ принося́щую вме́сто дре́ва зна́ния живоно́сное Креста́ ору́жие, пою́щим:/ благослови́те, вся дела́ Госпо́дня, Го́спода.

Тро́ичен: Отца́ Безнача́льнаго Тя, Сы́на, и Ду́ха Свята́го,/ Еди́но Божество́, соверше́нно, безнача́льно,/ несеко́мо, единосу́щно, несли́тно,/ во Ипоста́сех трех чту́ще, пое́м:/ благослови́те, вся дела́ Госпо́дня, Го́спода.

Богоро́дичен: Ты еди́на во всех ро́дех, Де́во Пречи́стая,/ Ма́ти Бо́жия показа́лася еси́./ Ты Божества́ была́ еси́ обита́лище, Всенепоро́чная,/ не опали́вшися огне́м непристу́пнаго Све́та./ Тем вси Тя благослови́м, Мари́е Богоневе́сто.

Ин

Ирмо́с: Изба́вителю всех всеси́льней посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:// вся дела́, благослови́те, по́йте Го́спода.

Спаси́тельному ору́жию и нерасте́рзному,/ ве́рных гото́вой по́мощи, кре́пкому защище́нию,/ Кресту́ Госпо́дню ны́не поклони́мся, пред все́ми предлежа́щу.

Высо́це на дре́ве возве́си впреки́ зми́я, я́ко писа́ся, Моисе́й,/ пропису́я тя, всечестно́е Дре́во,/ и́мже пре́лести мы́сленных змие́в избавля́емся.

Свеще́ние душ на́ших еси́, светода́вче Кре́сте всече́стне:/ тя бо объе́млюще, нача́ла тьмы же и вла́сти отража́ем/ Боже́ственною твое́ю си́лою.

Богоро́дичен: Чи́стую и Де́ву почти́м,/ безнача́льное Сло́во и несозда́нное преесте́ственно ро́ждшую в на́ше спасе́ние,/ пе́сненно вопию́ще: благослови́м, Де́во, Рождество́ Твое́.

Ин

Ирмо́с: Тебе́, Вседе́телю,/ в пещи́ о́троцы, всеми́рный лик спле́тше, поя́ху;/ дела́ вся́кая, Го́спода по́йте// и превозноси́те во вся ве́ки.

Еди́наго от души́ на земли́ я́вльшагося Бо́га взыска́л еси́/ ума́ пра́востию:/ тем был еси́ нача́ток, богоно́сне, язы́ков честны́й и Ду́ха прия́телище.

У́глием твои́х, блаже́нне, о́гненных слове́с вещество́ поже́гл еси́ су́етства:/ тем к Све́ту невече́рнему преше́л еси́,/ вся озаря́я любо́вию, тя пою́щия.

Жре́бий, и часть, и по́мощь, и Изба́витель,/ кре́пость же и хвала́, и свет тебе́ бысть Сло́во,/ вся призыва́ющее из не су́щаго,/ и руковожде́ние, Корни́лие богому́дре.

Тро́ичен: Святы́й о́тче, Святы́й Сло́ве, Всесвяты́й Ду́ше несозда́нне,/ Тро́ице неразде́льная,/ спаси́ любо́вию пою́щия Твою́ держа́ву,/ и ца́рство, и вели́чество.

Богоро́дичен: Изле́й на ны Твоя́ ми́лости обы́чно, Отрокови́це,/ и испроси́ нам, Чи́стая, проще́ние всех прегреше́ний,/ в ве́дении же и неве́дении и от невнима́ния нам прилу́чшихся.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупивши разстоя́щаяся естества́.// Тем веселя́щеся, Тя, Богоро́дице, велича́ем.

Прииди́те, чи́стым се́рдцем и тре́звенными у́мными очесы́/ Царе́вы дще́ре, Це́ркве, красоту́, па́че зла́та светя́щуюся,/ зря́ще, велича́ем.

Ра́дуйся и весели́ся, неве́сто Царя́ Вели́каго,/ зря́ щи све́тло твоего́ Жениха́ красоту́,/ с людьми́ твои́ми зову́щи:/ Тя, Жизнода́вче, велича́ем.

Е́же с высоты́ изя́щество, Спа́се, Це́ркви Твое́й пода́ждь:/ ино́го бо не весть, ра́зве Тебе́,/ за ню́же Твою́ дре́вле ду́шу поло́жшаго,/ в позна́нии велича́ющую.

Богоро́дичен: Ра́дуйся, обра́дованная Неве́сто Царя́ Вели́каго,/ я́ко Тобо́ю от кля́твы Е́вины вси, Чи́стая, изба́вихомся/ и жизнь обрето́хом в Рождестве́ Твое́м, Неневе́стная.

Ин

Ирмо́с: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́.// Тя, Богоро́дице, тем вси велича́ем.

Христо́с, на тебе́ пове́шен, мир возвы́си, па́дший поги́бели во глубину́,/ и́стинно Кре́сте Госпо́день:/ те́мже тебе́ любо́вию ны́не покланя́емся, и чтим, и сла́вим.

Ду́ши да очи́стим и сердца́/ до́брыми еди́неми дея́нии/ и, предлежа́щее посреди́ спаси́тельное зря́ще Дре́во Креста́,/ ве́рою и любо́вию богому́дренно поклони́мся.

Я́ко со́лнце вели́кое, блиста́ньми твои́ми озаря́вши су́щия во тьме/ и де́моны попаля́еши, красне́йший Кре́сте./ Те́мже вопие́м:/ просвети́ вся ве́рою покланя́ющияся тебе́.

Богоро́дичен: Све́том мя озари́ Боже́ственным, Све́та прия́телище, Ди́во,/ страсте́й мои́х тьму и сласте́й глубоча́йшую и́стинно нощь,/ Богороди́тельнице Всесвята́я, отгоня́щи.

Ин

Ирмо́с: Иса́йе, лику́й,/ Де́ва име́ во чре́ве и роди́ Сы́на Емману́ила,/ Бо́га же и Челове́ка,/ Восто́к и́мя Ему́,// Его́же велича́юще, Де́ву ублажа́ем.

Ко свяще́нному торжеству́ Це́рковь вся собира́ет в па́мять твою́ честну́ю,/ пропове́дниче Христо́в:/ ты бо равностоя́тель святы́х яви́лся еси́ ученико́в,/ Ду́ха Свята́го, я́ко они́, насле́довав.

Украси́лся еси́ догма́ты благоче́стия, я́ко священноде́латель,/ уподо́бился еси́ Бо́жиим боже́ственным служи́телем:/ то́чиши же враче́вств всегда́, блаже́нне, ре́ки,/ отгоня́я неду́ги челове́ков, Корни́лие свяще́ннейший.

Украси́вся ри́зою спаси́тельною,/ ю́же Христо́с истка́, воплоти́вся,/ ны́не прера́достно вы́шняя ца́рства обхо́диши,/ зря чи́сто добро́ту недомы́сленную Женихо́ву, достосла́вне.

Честна́я ра́ка твоя́,/ я́ко исто́чник, то́чит ве́рным врачевства́ оби́льно,/ и отгоня́ет, Корни́лие, ду́хи лука́выя,/ и просвеща́ет всех очеса́, ве́рою благохва́лящих тя.

Богоро́дичен: Просвеще́ние ми испроси́,/ ро́ждшая Свет, от Све́та возсия́вший,/ омраче́ние дале́че от мене́ отгоня́щи и сласте́й, и искуше́ний,/ Пречи́стая Влады́чице, Предста́тельнице непосты́дная.

Свети́лен обновле́ния.

Подо́бен: Ду́хом во святи́л ищи:

Ю́же пречи́стою Кро́вию искупи́л еси́, Сло́ве,/ всечу́дную и всечестну́ю и Святу́ю Це́рковь обнови́ Ду́хом, Бла́же,/ и удобри́ заря́ми боже́ственнейшими, сла́вою прославля́я/ досто́йно Твоего́ хра́ма обновле́ние соверша́ющих.

Сла́ва, и ны́не, предпра́зднства.

Подо́бен то́йже:

Светода́тельными сия́ньми Крест Госпо́день, в того́ вознесе́ние,/ вся любо́вию боже́ственною, предлежа́, призыва́ет:/ прииди́те, сего́ вси ра́достию, и любо́вию, и стра́хом целу́ем ве́рно/ и просла́вим Еди́наго Творца́ и Влады́ку.

На хвали́тех стихи́ры обновле́ния на 6, глас 4.

Подо́бен: Дал еси́ зна́мение:

Днесь боже́ственный,/ и свяще́нный, и честны́й Христо́ва Воскресе́ния/ све́тло обновля́ется светоно́сный дом,/ и дае́т ми́ру Гроб/ Боже́ственный Живо́т,/ и вруча́ет исто́чник безсме́ртный,/ то́чит струй благода́ти чуде́с,/ оби́лует во́ды, и да́рует исцеле́ния// того́ ве́рою пою́щим.

Возсия́ свы́ше светови́дная заря́, сия́ющи/ и вся просвеща́ющи;/ ве́рно у́бо почти́м Христа́ Соде́теля Воскресе́ние вси/ и обновле́ний свяще́нных живоно́сное/ боже́ственное торжество́,/ в пе́снех воспра́зднуим/ и во псалме́х воскли́кнем,/ я́ко да ми́лостива обря́ щем// Спа́са и Го́спода.

Посреде́ земли́ возноси́ма/ предуви́дети жела́юще/ Креста́ скиптр святы́й,/ ду́ши предочи́стим и озари́м ра́зумы,/ све́том просвеща́ющеся;/ и, си́лою Боже́ственною облиста́еми, Христа́ воспои́м,/ Дре́вом честны́м Его́ свяще́ние подаю́щаго/ ве́рою взыва́ющим// и те́пле Того́ пою́щим.

И́ны стихи́ры, глас 1, самогла́сны.

Иоа́нна Мона́ха: Обновля́йся, обновля́йся, но́вый Иерусали́ме,/ прии́де бо твой свет, и сла́ва Госпо́дня на тебе́ возсия́:/ сей дом Оте́ц созда́,/ сей дом Сын утверди́,/ сей дом Дух Святы́й обнови́,// просвеща́яй и утвержда́яй и освяща́яй ду́ши на́ша.

Анато́лия: Дре́вле у́бо обновля́я храм, Соломо́н/ безслове́сных живо́тных же́ртвы/ и всесожже́ния принесе́, Го́споди./ Егда́ же благоволи́л еси́, Спа́се,/ образо́м у́бо упраздни́тися, позна́тися же и́стине,/ безкровныя же́ртвы ро́ди челове́честии прино́сят сла́ве Твое́й,/ все́ми бо влады́чествуяй,// вся́ческая освяща́вши Святы́м Ду́хом.

Глас 4. Иоа́нна Мона́ха:

Обновля́ется днесь я́же от язы́к Це́рковь/ честно́ю и живото́чною Кро́вию от пречи́стых и нетле́нных ребр/ вопло́щшагося от Святы́я Де́вы/ Христа́, Бо́га на́шего./ Те́мже, собра́вшеся ве́рных ли́цы,/ просла́вим Отца́ и Сы́на и Свята́го Ду́ха,// Еди́но Божество́, содержа́щее вся́ческая.

Сла́ва, глас 3. Самогла́сен:

К себе́ восходи́, челове́че,/ бу́ди нов вме́сто ве́тхаго/ и души́ пра́зднуй обновле́ния,/ до́ндеже вре́мя жития́;/ да обновля́ется тебе́ вся́каго жития́ путь,/ дре́вняя бо преидо́ша, се бы́ша вся но́ва./ Сие́ пра́зднику плодопринеси́,/ до́брым измене́нием изменя́ем:/ си́це обновля́ется челове́к,// та́ко чти́тся обновле́ний день.

И ны́не, предпра́зднства, глас то́йже, Иоа́нна Мона́ха:

Христе́, Бо́же наш, во́льное Твое́ распя́тие/ во о́бщее воскресе́ние ро́да челове́ческаго восприе́мый/ и тро́стию Креста́ обагре́нием червле́ным Твоя́ пе́рсты окровави́вый,/ оста́вительная нам ца́рски подписа́ти человеколю́бствовав,/ не пре́зри нас, бе́дствующих,/ и па́ки е́же от Тебе́ разстоя́ния./ Но уще́дри, Еди́не Долготерпели́ве, су́щия во обстоя́нии лю́ди Твоя́/ и воста́ни, побори́ борю́щия ны,// я́ко Всеси́лен.

Славосло́вие вели́кое и отпу́ст.

На литурги́и

Блаже́нны от кано́на Обновле́ния, пе́сни 3-я и 6-я. Проки́мен, глас 4: До́му Твоему́ подоба́ет святы́ня, Го́споди,// в долготу́ дний. Стих: Госпо́дь воцари́ся, в ле́поту облече́ся. Апо́стол ко Евре́ем, зача́ло 307. Аллилу́йя, глас 2: Основа́ния его́ на гора́х святы́х. Стих: Пресла́вная глаго́лашася о тебе́, гра́де Бо́жий. Ева́нгелие от Матфе́я, зача́ло 67. Прича́стен: Го́споди, возлюби́х благоле́пие до́му Твоего́ и ме́сто селе́ния сла́вы Твоея. Аллилу́йя, три́жды.

Ве́домо же бу́ди и сие́:

Аще прилучи́тся Воздви́жение честна́го Креста́ в Неде́лю.

В суббо́ту же пред Воздви́жением на Литурги́и: проки́мен и аллилу́йя обновле́ния еди́н, а проки́мен суббо́ты пред Воздви́жением оставля́ется. Апо́стол же и Ева́нгелие чте́тся пре́жде обновле́ния и пото́м суббо́ты пред Воздви́жением. Прича́стен обновле́ния. Рядовы́й же апо́стол и Ева́нгелие вычита́ем на преди́, а Неде́ли пред Воздви́жением чте́тся апо́стол и Ева́нгелие в мимоше́дшую Неде́лю.

Подоба́ет ве́дати: я́ко а́ще случи́тся обновле́ния, 13-й день, в Неде́лю:

Оставля́ется слу́жба свята́го Корни́лия, и пое́тся, егда́ разсу́дит екклисиа́рх. Пое́тся же воскре́сная слу́жба со обновле́нием и с предпра́зднством честна́го Креста́.

На ма́лей вече́рни: Стихи́ры воскре́сны, и Богоро́дицы, по обы́чаю. Тропа́рь воскре́сен. Сла́ва, и ны́не, Богоро́дичен.

На вели́цей вече́рни: Блаже́н муж, кафи́зма вся. На Го́споди, воззва́х: стихи́ры воскре́сны 3, и Анато́лиева еди́на, и обновле́ния 3, и Креста́ 3, глас 5. Подо́бен: Ра́дуйся: пи́саны на стихо́вне. Сла́ва, обновле́ния. И ныне, Богоро́дичен 1-й гла́са. Вход. И чте́ния 3, обновле́ния. На лити́и стихи́ра хра́ма, и обновле́ния хвали́тныя, глас 1: Обновля́йся, обновля́йся: и глас 4: Обновля́ется днесь: глас то́йже: Посреде́ земли́ возноси́ма:

Сла́ва, глас 5:

И́же в не́дрех Оте́ческих/ препочива́яй, Сло́ве,/ Ду́хом Твои́м Святы́м обнови́ храм,// и́же во йи́мя Твое́ воздви́женый.

И ны́не, глас 6: Днесь Дре́во яви́ся: На стихо́вне стихи́ры воскре́сны гла́са. Сла́ва, глас 2: Обновле́ние соверша́юще: И ны́не Креста́, глас то́йже: Боже́ственное сокро́вище: На благослове́нии хле́бов, тропа́рь Богоро́дице, Де́во: два́жды. И обновле́ния, еди́ножды. И чте́ние в Посла́ниих апо́стольских.

На у́трени: На Бог Госпо́дь, тропа́рь воскре́сен, два́жды: Сла́ва, обновле́ния: И ны́не, Креста́. По кафи́зме, седа́льны воскре́сны. Сла́ва, и ны́не, обновле́ния; Богоро́дичны же оставля́ются. И чте́ние во Ева́нгелии, Неде́ля пред Воздви́жением. По непоро́чнах ипакои́. И чтем во Ева́нгелии Неде́лю рядову́ю. Степе́нна, и проки́мен гла́са. Вся́кое дыха́ние: Ева́нгелие воскре́сное. Воскресе́ние Христо́во: и псало́м 50-й. Стихи́ра воскре́сна. Кано́н воскре́сен со ирмосо́м на 4, и Богоро́дицы на 2, и обновле́ния на 4, и Креста́ на 4. Катава́сия: Крест начерта́в: По 3-й пе́сни конда́к и и́кос обновле́ния и седа́лен. Сла́ва, и ны́не, Креста́. И чте́ние. По 6-й пе́сни конда́к воскре́сен и и́кос. И про́лог. На 9-й пе́сни пое́м Честне́йшую: Свети́лен воскре́сен. Сла́ва, обновле́ния. И ны́не, Креста́.

На хвали́тех стихи́ры воскре́сны 4, и обновле́ния, глас 4. Подо́бен: Дал еси́ зна́мение: две, и самогла́сны две, глас 3: К себе́ восходи́, челове́че: Други́й: Христе́ Бо́же наш:

Пе́рвый припе́в: До́му Твоему́ подоба́ет святы́ня, Го́споди,// в долготу́ дний. Други́й: Госпо́дь воцари́ся,// в ле́поту облече́ся. Сла́ва, стихи́ра ева́нгельская. И ны́не: Преблагослове́нна еси́, Богоро́дице Де́во: Славосло́вие вели́кое. Тропа́рь воскре́сен, и ектении́, и отпу́ст, и оглаше́ние; и обы́чное исхожде́ние в притво́р, и час 1-й.

На часе́х тропа́рь воркре́сен. Сла́ва, обновле́ния. И ны́не, Богоро́дичен часо́в. По о́тче наш: конда́к воскре́сен, и обновле́ния, глаго́лем пременя́юще.

На Литурги́и: Блаже́нна воскре́сна гла́са на 6, и обновле́ния песнь 3-я, на 4.

По вхо́де тропа́рь воскре́сен, и обновле́ния, и Креста́.

Конда́к воскре́сен. Сла́ва, и ны́не, обновле́ния.

Проки́мен, апо́стол, аллилу́йя и Ева́нгелие пре́жде Неде́ли пред Воздви́жением, и ряд под зача́ло, та́же обновле́ния.

Прича́стен: Хвали́те Го́спода с Небе́с: и обновле́ния.