Вече́р

На Го́споди, воззва́х: стихи́ры пра́здника 3, глас 8.

Подо́бен: О, пресла́внаго чудесе́:

О, пресла́внаго чудесе́!/ Я́ко от безча́дна ложесна́/ и непло́дна чре́ва,/ жезл, Цвет нося́щий, прозяба́ет днесь,/ Богома́ти и Неискусобра́чная,/ от пра́ведных Иоаки́ма и Анны;/ те́мже ра́дуются проро́честии собо́ри/ и патриа́рхов весь сонм// в рождестве́ Ея́.

Днесь Дави́д ра́дуется,/ и Иессе́й лику́ет,/ и Леви́й велича́ется,/ и игра́ет ду́хом Иоаки́м пра́ведный,/ и безча́дие реши́тся А́ннино я́ве/ Твои́м рождество́м, Мари́е Чи́стая,/ о Неискусобра́чная,/ и Ангелов совокупле́ние с земны́ми все́ми// блажа́т боже́ственное чре́во Твое́.

Ра́дуйся, земны́х совокупле́ние;/ ра́дуйся, хра́ме Госпо́день;/ ра́дуйся, Ма́ти безневе́стная,/ я́же А́ннино разре́шшая пресла́вно непло́дство/ и земны́м источи́вшая оставле́ние грехо́в рождество́м Твои́м;/ ра́дуйся, Всенепоро́чная;/ ра́дуйся, Боже́ственный хра́ме;/ ра́дуйся, ски́ние,// в Ню́же всели́ся Творе́ц и Госпо́дь.

И́ны стихи́ры святы́х, глас 4.

Подо́бен: Я́ко до́бля:

Обагре́нии кро́вными/ себе́ украси́вше,/ кра́сному добро́тою де́вы отрокови́цы/ нетле́нно совокупи́стеся/ Христу́ Бо́гу на́шему,/ соблюда́ющему ва́ше де́вство нескве́рнено,/ в безсме́ртном нетле́ния неве́стнице,/ во оби́телех Небе́сных,// в черто́зе нерукотворе́ннем, му́ченицы.

Несоверше́нными у́бо телесы́/ и соверше́нным умо́м/ ве́тхаго зми́я злонача́льнаго/ победи́сте, сла́внии,/ си́лою Ду́ха/ и не́мощну того́ кре́пость показа́сте./ Тем восприя́сте венцы́ побе́ды,/ Минодо́ро, Митродо́ро и Нимфодо́ро,// Тро́ицы побо́рницы.

И на у́ды раздробля́еми,/ и огне́м снеда́еми,/ и желе́зными ногты́ терза́еми,/ и на дре́ве пове́шаеми, и мече́м ссека́еми,/ не отверго́стеся Христа́,/ страстоте́рпицы прехва́льныя./ Те́мже прия́сте вене́ц побе́ды,/ Минодо́ро, Митродо́ро и Нимфодо́ро,// Тро́ицы побо́рницы.

Сла́ва, и ны́не, глас 2:

Что шум пра́зднующих быва́ет?/ Иоаки́м и А́нна торжеству́ют та́йно:/ ра́дуйтеся с на́ми, глаго́люще, Ада́ме и Е́во, днесь,/ я́ко и́мже дре́вле преступле́нием затвори́ша рай,/ плод благосла́вен нам даде́ся,/ Богоотрокови́ца Мари́я,// отверза́ющи его́ всем вход.

На стихо́вне стихи́ры пра́здника, глас 1.

Подо́бен: Небе́сных чино́в:

Да отве́рзется дверь богоприе́мнаго хра́ма,/ храм бо всех Царя́ и престо́л,/ днесь со сла́вою внутрь прие́м,/ Иоаки́м возлага́ет, освяти́в Го́споду,/ Юже из него́ избра́нную// бы́ти Ма́терь Бо́жию.

Стих: Слы́ши, Дщи, и виждь,// и приклони́ у́хо Твое́.

Всеми́рныя ми́ру ра́дости/ возсия́ша мы́сленный лучи́,/ предвозвеща́ющия всем Со́лнце Сла́вы, Христа́ Бо́га,/ в рождестве́ Твое́м, Пречи́стая./ Ты бо Хода́таица яви́лася еси́// и́стиннаго весе́лия же и благода́ти.

Стих: Лицу́ Твоему́ помо́лятся// бога́тии лю́дстии.

Всечестна́я сия́ сла́ва Твоя́, Чи́стая,/ провозвеща́ет всем лю́дем/ Твоего́ благосе́рдаго благоде́тельства:/ Ты бо ны́нешняго весе́лия Хода́таица еси́/ и бу́дущия ра́дости вина́, Чи́стая,// моли́твою Твое́ю яви́ся нам.

Сла́ва, и ны́не, глас 2. Самогла́сен:

Пронарече́нная всех Цари́ца,/ Бо́жие оби́телище,/ от непло́дныя днесь утро́бы про́йде А́нны сла́вныя,/ Присносу́щнаго Существа́ Боже́ственное пребыва́лище,/ Е́юже безсту́дный ад попра́ся/ и всеро́дная Е́ва в тве́рдую жизнь вво́дится./ Той досто́йно возопии́м:// блаже́нна Ты в жена́х, и Плод чре́ва Твоего́ благослове́н.

Тропа́рь пра́здника: Рождество́ Твое́, Богоро́дице Де́во:

На у́трени

По 1-м стихосло́вии седа́лен, глас 4.

Подо́бен: Ско́ро предвари́:

Иу́до, велича́йся, и да веселйи́тся Дави́д,/ Ада́ме, обнови́ся, и да крепи́тся Леви́й,/ от ни́хже мне роди́ся Христо́с./ Дви́гни цевни́цу, песнопи́сче, и глаго́ли:/ кто есть роди́вшаяся, ю́же нарица́еши Дщерь?/ Пита́тельница есть Жи́зни на́шея, Ма́ти Христа́ Бо́га.

Сла́ва, и ны́не, то́йже.

По 2-м стихосло́вии седа́лен, глас 8.

Подо́бен: Повеле́нное та́йно:

Обнови́ся, Ада́ме, ра́дуйся, Е́во, весели́ся, Дави́де, благоду́шствуй, А́нно,/ и́бо Ма́ти Зижди́теля твоего́ ражда́ется пресла́вно;/ лику́ет, обно́вльшися, вся земля́ и ра́дуется, оде́яна во оде́жду;/ всяк язы́к, лику́я, да вопие́т ны́не Мари́и:/ блаже́н дом Дави́дов, я́ко пита́ет Пита́тельницу Жи́зни на́шея.

Сла́ва, и ны́не, то́йже.

Кано́н пра́здника, со ирмосо́м на 8, и му́чениц на 4.

Кано́н пра́здника, глас 8.

Песнь 1

Ирмо́с: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре/ пои́м Ему́, я́ко Изба́вителю на́шему Бо́гу,// я́ко просла́вися.

Свята́я Святы́х, во свято́м святи́лищи Младе́нец возлага́ется/ воспита́тися от руки́ А́нгеловы./ Вси у́бо ве́рно спра́зднуем в рождестве́ Ея́.

Да ликовству́ет вся тварь, да весели́тся же и Дави́д,/ я́ко от коле́на и от Се́мене его́ произы́де жезл,/ Цвет нося́щи, Го́спода, Творца́ вся́ческих.

Непло́ды неражда́ющая А́нна, но не безча́дна Бо́гу:/ се бо пронарече́ся от родо́в Чи́стая Де́ва Ма́ти./ Те́мже естества́ израсти́ Зижди́теля в ра́бии о́бразе.

Тя, незло́бивую А́гницу,/ А́гнца Христа́ Младе́нца от чре́ва Твоего́ приве́дшую в на́ше существо́,/ вси от А́нны рожде́нную Тя пе́сньми почита́ем.

Тро́ичен: Три Безнача́льна сла́влю,/ Три Свя́та пою́,/ Три Соприсносу́щна в Существе́ Еди́ном пропове́дую:/ Еди́н бо во Отце́, и Сы́не, и Ду́се славосло́вится Бог.

Богоро́дичен: Кто ви́де Отроча́, Его́же не все́я Оте́ц, млеко́м пита́емое?/ Или́ где ви́дена бысть Де́ва Ма́ти?/ Истинно па́че ума́ обоя́, Богороди́тельнице Чи́стая.

Ин кано́н святы́х жен, его́же краегране́сие: Трех сестре́ниц и́скренних страда́ния чту. Ио́сиф. Глас 4.

Песнь 1

Ирмо́с: Отве́рзу уста́ моя́,/ и напо́лнятся ду́ха,/ и сло́во отры́гну Цари́це Ма́тери,/ и явлю́ся све́тло торжеству́я,// и воспою́, ра́дуяся, Тоя́ чудеса́.

Тро́ицу несозда́нную, ю́же благоче́стно пропове́даете,/ ми́лостиву нам сотвори́те, му́ченицы сла́внии,/ ны́не чту́щим ва́ша боже́ственныя стра́сти и исправле́ния, богоблаже́нныя.

О глаго́лех небрего́ша мучи́теля отрокови́цы,/ боже́ственным огражда́емы ору́жием ве́ры,/ и подъя́ша мук треволне́ние/ и смерть непра́ведну за вся́ческих Жизнь.

Си́лою укрепля́емы всемо́щною Зижди́теля,/ му́жеский прия́ша нрав всечестны́я/ и зми́я стропти́ваго и велича́ваго нога́ми попра́ша/ и на зе́млю низложи́ша.

Богоро́дичен: Я́ко одушевле́н храм, я́ко нетле́нну ски́нию,/ я́ко дверь Небе́сную, я́ко Боже́ственную трапе́зу,/ я́ко пала́ту и Престо́л Влады́чень,/ Мари́ю Чи́стую пе́сньми почти́м.

Песнь 3

Ирмо́с: Утверди́ся се́рдце мое́ во Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,// возвесели́хся о спасе́нии Твое́м.

Воспита́вшися во Свята́я Святы́х,/ Де́во Пречи́стая Богоро́дице,/ вы́шши яви́лася еси́ тва́ри,/ Зижди́теля пло́тию поро́ждши.

Благослове́нно чре́во твое́, целому́дренная А́нно,/ плод бо израсти́ла еси́ де́вства,/ ю́же безсе́менно Пита́теля тва́ри ро́ждшую/ и Изба́вителя Иису́са.

Тя блажи́т, Присноде́во, вся тварь,/ от А́нны днесь ро́ждшуюся,/ от ко́рене Иессе́ева жезл,/ пречи́ст цвет, Христа́, израсти́вшую.

Тя вы́шшу всей тва́ри, Богоро́дице,/ показу́я, Чи́стая, Сын Твой,/ е́же от А́нны вели́чит Твое́ рождество́/ и всех весели́т днесь.

Тро́ичен: Тебе́ покланя́емся, О́тче, Безнача́льне Существо́м,/ пое́м Безле́тнаго Сы́на Твоего́/ и чтем Соприсносу́щнаго Ду́ха Твоего́,/ я́ко Еди́наго Тро́е естество́м Бо́га.

Богоро́дичен: Светода́вца и Нача́льника жи́зни челове́ческия ро́ждшая, Чи́стая Богоро́дице,/ яви́лася еси́ сокро́вище жи́зни на́шея/ и дверь непристу́пнаго Све́та.

Ин

Ирмо́с: Не му́дростию и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́:// несть бо свят, па́че Тебе́, Человеколю́бче.

Умерщвле́нный умо́м пребеззако́нный мучи́тель/ Жи́зни на́шея, Христа́, лю́те отврещи́ся понужда́ше тя,/ му́ченице Минодо́ро, ураня́я.

Взира́ющия к Бо́гу мучи́тель не пощаде́,/ но же́злием неми́лостивно сокруши́ у́ды твоя́,/ вене́ц тебе́ плеты́й ве́чный, му́ченице, неувяда́ющий.

Му́ками, требога́тыя святы́я му́ченицы,/ сокро́вище на Небесе́х и ве́чнующую сла́ву обрето́ша,/ я́сно Бо́гу прибли́жишася.

Богоро́дичен: Я́вльшися, души́ моей тьму отжени́/ и грехо́вныя плени́цы расто́ргни, Чи́стая Де́во,/ и спаси́ мя, ро́ждшая Всеще́драго.

Конда́к му́чениц, глас 4.

Подо́бен: Вознесы́йся:

За Тро́ицу терпели́вно страда́льчествовавшия,/ многоко́зненнаго врага́ победи́сте,/ бра́тски обле́кшеся Ду́хом;/ те́мже водвори́стеся с пятьми́ де́вами/ в Небе́сном, страстоте́рпицы, черто́зе,/ и со А́нгелы Всецарю́// в весе́лии непреста́нно предстоите́.

Седа́лен, глас 4.

Подо́бен: Удиви́ся:

Удиви́шася ва́шему терпе́нию мно́гому Небе́снии ли́цы безпло́тных Сил:/ я́коже бо ино́му стра́ждущу пребыва́ете,/ го́лени и соста́вы сокруша́емы,/ смерть го́рькую терпя́ще/ и же́нским те́лом зми́я отсту́пника сокруша́юще,/ де́вы, неве́сты Жизнода́вца, ве́ры побо́рницы.

Сла́ва, и ны́не, пра́здника, глас то́йже:

От ко́рене Иессе́ева и от чресл Дави́довых/ Богоотрокови́ца Мариа́м ражда́ется днесь нам;/ ра́достию бо ра́дуются вся́ческая и обновля́ются./ Сра́дуйтеся ку́пно, Не́бо и земля́./Восхвали́те Ю, оте́чествия язы́к./ Иоаки́м весели́тся, и А́нна торжеству́ет, зову́щи:/ непло́ды ражда́ет Богоро́дицу и Пита́тельницу Жи́зни на́шея.

Песнь 4

Ирмо́с: Проро́к Авваку́м у́мныма очи́ма/ прови́де, Го́споди, прише́ствие Твое́, / тем и вопия́ше: от ю́га прии́дет Бог./ Сла́ва си́ле Твое́й,// сла́ва снизхожде́нию Твоему́.

Патриа́рх Иа́ков, прови́дев, Спа́се, вели́чия я́сно строе́ния Твоего́,/ вопия́ше Ду́хом, ко Иу́де глаго́ля та́йно:/ от ле́торасли возше́л еси́, Сы́не мой,/ возвеща́я Тя от Де́вы Бо́га.

Ны́не жезл Ааро́нов, от ко́рене Дави́дова прозя́бший,/ ны́не Де́ва Чи́стая происхо́дит,/ и сликовству́ет Не́бо и земля́, и вся оте́чествия язы́ков,/ и А́нна и Иоаки́м та́инственно.

Ны́не да веселя́тся Не́бо, да ра́дуется же земля́, и да лику́ет Иоаки́м и Дави́д:/ ов у́бо я́ко роди́тель Твой, и́стинно ро́ждшия Бо́га,/ ов же я́ко пра́отец Твой,/ пропове́дал Твоя́ вели́чествия, Чи́стая.

Сра́дуется Тебе́ днесь, богому́дренная А́нно, вселе́нная:/ Изба́вителя бо тоя́ Ма́терь процвела́ еси́,/ ю́же от ко́рене прозя́бшую Дави́дова,/ жезл си́лы, нам нося́щую Цвет, Христа́.

Тро́ичен: Сла́влю Безнача́льна Бо́га, Отца́ и Сы́на и Свята́го Ду́ха,/ Единосу́щную Тро́ицу Несозда́нную,/ Е́йже предстоя́т Серафи́ми благогове́йно, зову́ще:/ Свят, Свят, Свят еси́, Бо́же.

Богоро́дичен: Пребезнача́льное Нача́ло нача́ло прие́млет из Тебе́, Богороди́тельнице, плотски́м вре́менем/ и пребыва́ет собезнача́лен и вопло́щься Сло́во о́тчее и Ду́ху соприсносу́щное,/ сохраня́я Боже́ственное досто́инство.

Ин

Ирмо́с: Седя́й в сла́ве/ на Престо́ле Божества́,/ во о́блаце ле́гце/ прии́де Иису́с Пребоже́ственный,/ нетле́нною дла́нию,/ и спасе́ зову́щия:// сла́ва, Христе́, си́ле Твое́й.

Сия́ющи луча́ми Креста́,/ присноблаже́нная Митродо́ра, к дре́ву привя́зана,/ терпя́ше о́гненную му́ку,/ пре́лести у́глие росо́ю любве́ Христо́вы погаша́ющи.

Явле́нным виде́нием по́мысл простира́ющи,/ зря́щи Жениха́ добро́ты недомы́сленныя,/ бие́ма же́злием, присноблаже́нная Митродо́ра/ терпя́ше до́блественне боле́зни.

Украси́стеся, де́вы, и све́тло просла́вистеся,/ препросла́вленное Сло́во вся́чески возлюби́вше,/ Его́же уя́звлены любо́вию,/ претерпе́сте страсте́й наше́ствия кре́пце.

Богоро́дичен: Умерщвле́на мя зло́бою льсти́ваго, Всенепоро́чная,/ Жизнь ро́ждшая, оживи́, к Тебе́ бо прибего́х;/ и впа́дшася во глубину́ грехо́вную/ возведи́, я́ко ми́лостива, Всенепоро́чная.

Песнь 5

Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́ ино́го не ве́мы,// Имя Твое́ имену́ем.

Пречи́стое Твое́ рождество́, Де́ва Непоро́чная, несказа́нное,/ и зача́тие неизглаго́ланно, и рожде́ние Твое́,/ Неве́сто неневе́стная,/ Бог бо бе, весь в мя облеки́йся.

Днесь да веселя́тся а́нгельстии чи́ни,/ пе́сньми да лику́ют су́щии из Ада́ма:/ роди́ся бо жезл, Цвет возрасти́вший, Христа́,/ Еди́наго Изба́вителя на́шего.

Днесь Ева разреша́ется осужде́ния,/ разреша́ется же и непло́дство,/ и Ада́м дре́вния кля́твы о рождестве́ Твое́м,/ Тобо́ю бо от тли изба́вихомся.

Сла́ва Тебе́, Просла́вльшему непло́дную днесь:/ роди́ся бо жезл присноцвету́щий от обеща́ния,/ от него́же прозябе́ Христо́с,/ Цвет жизни на́шея.

Тро́ичен: Сла́ва Тебе́, о́тче Святы́й, Бо́же Нерожде́нне;/ сла́ва Тебе́, Сы́не Безле́тне, Единоро́дне;/ сла́ва Тебе́, Ду́ше Боже́ственный и Сопресто́льный,/ от Отца́ происходя́й и в Сы́не пребыва́яй.

Богоро́дичен: Бысть чре́во Твое́ Со́лнца носи́ло,/ пребы́сть чистота́ Твоя́, я́коже пре́жде, невреди́ма, Де́во,/ Христо́с бо Со́лнце,/ я́ко от черто́га жени́х, яви́ся из Тебе́.

Ин

Ирмо́с: Ты, Го́споди мой, Свет/ в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Нрав терпели́в и непобеди́м смысл/ му́ченицы пред суди́щем показа́вше,/ побе́ды вене́ц себе́ исплето́ша.

Ны́не терпи́т желе́зных ногте́й терза́ния кре́пко/ пове́шена Нимфодо́ра,/ Жениха́ возлюби́вши Безсме́ртнаго.

Трисве́тлыя свещи́,/ трикро́вная хра́мина, селе́ние Тро́ицы,/ да похва́лятся пе́сньми де́вы богому́дрыя.

Богоро́дичен: Тя еди́ну избра́нну и добру́ и непоро́чну обре́т,/ воплоща́ется Пребоже́ственное Сло́во из Тебе́, Богора́дованная.

Песнь 6

Ирмо́с: Я́ко во́ды морски́я, Человеколюбче,/ волна́ми жите́йскими обурева́юся,/ те́мже, я́ко Ио́на, та́ко вопию́ Ти:/ возведи́ от тли живо́т мой,// Благоутро́бне Го́споди.

Святу́ю Святы́х су́шу,/ целому́дреннии роди́тели Твои́, Чи́стая,/ возложи́ша Тя в хра́ме Госпо́дни воспита́тися че́стно/ и угото́ватися в Ма́терь Ему́.

Непло́ды и ма́тери, лику́йте,/ дерза́йте и игра́йте, безча́дныя:/ безча́дна бо непло́ды Богоро́дицу прозяба́ет,/ Я́же изба́вит от боле́зней Еву и кля́твы Ада́ма.

Слы́шу Дави́да, пою́ща Тебе́:/ приведу́тся де́вы во след Тебе́,/ приведу́тся в храм Царе́в./ И с ним Тя и аз, Дщерь Царе́ву, воспева́ю.

Пое́м свято́е Твое́ рождество́,/ чтим и непоро́чное зача́тие Твое́,/ Неве́сто Богозва́нная и Де́во;/ сла́вят же с на́ми А́нгелов чи́ни и святы́х ду́ши.

Тро́ичен: В Тебе́ Тро́ическое та́инство пое́тся и сла́вится, Чи́стая:/ Оте́ц бо благоволи́,/ и Сло́во всели́ся в Тя,/ и Боже́ственный Дух Тебе́ осени́.

Богоро́дичен: Злата́я кади́льница была́ еси́,/ Огнь бо во утро́бе Твое́й всели́ся, Сло́во от Ду́ха Свя́та,/ и челове́ческим зра́ком в Тебе́ ви́деся,/ Богороди́тельнице Чи́стая.

Ин

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.

Ви́дети жела́юще Твою́ добро́ту недомы́сленную,/ уязвля́емы любо́вию Твое́ю сладча́йшею, Безнача́льне Сло́ве,/ мук лю́тость до́блественне претерпе́ша.

Я́ко кри́ны в ве́рте страда́льцев,/ процвето́ша пресла́вныя отрокови́цы/ и Це́рковь воня́ми разли́чных мук облагово́ниша/ Ду́ха благода́тию.

Жениха́ Безсме́ртнаго Еди́наго жела́юще,/ неви́димою си́лою укрепля́емы,/ ви́димую смерть явле́нно преоби́деша де́вы отрокови́цы.

Богоро́дичен: Свят всели́выйся в ложесна́ Твоя́ Госпо́дь,/ Святе́йшу обре́т Тя и Чисте́йшу тва́ри всея́,/ Богома́ти Господоимени́тая, Пречи́стая Влады́чице.

Конда́к пра́здника, глас 4:

Иоаки́м и А́нна поноше́ния безча́дства/ и Ада́м и Е́ва от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины́ прегреше́ний изба́вльшеся,/ внегда́ зва́ти Ти:// непло́ды ражда́ет Богоро́дицу и Пита́тельницу Жи́зни на́шея.

И́кос:

Моли́тва ку́пно и воздыха́ние непло́дства и безча́дства Иоаки́ма же и А́нны благоприя́тное/ и во у́ши Госпо́дни вни́де, и прозябе́ плод живоно́сен ми́ру./ Ов бо моли́тву на горе́ творя́ше, о́ва же в саде́ поноше́ние ноша́ше,/ но с ра́достию непло́ды ражда́ет Богоро́дицу и Пита́тельницу Жи́зни на́шея.

Песнь 7

Ирмо́с: Халде́йская пещь, огне́м раслала́емая,/ ороша́шеся Ду́хом,/ Бо́жиим предстоя́нием,/ о́троцы поя́ху:// благослове́н еси́, Бо́же оте́ц на́ших.

Пра́зднуем, Чи́стая,/ и ве́рно покланя́емся свято́му Твоему́ Рождеству́,/ пою́ще Сы́на Твоего́,/ и́мже изба́вихомся дре́вняго Ада́мова ны́не осужде́ния.

Ны́не А́нна весели́тся и вопие́т, хва́лящися:/ непло́ды су́щи, роди́х Бо́жию Ма́терь,/ Е́я́же ра́ди осужде́ние Е́вино разреши́ся/ и я́же в печа́лех боле́знь.

Ада́м свободи́ся, и Е́ва лику́ет,/ и вопию́т ду́хом к Тебе́, Богоро́дице:/ Тобо́ю изба́вихомся первородныя кля́твы,/ я́вльшуся Христу́.

О чре́во, вмести́вшее Бо́жие селе́ние! О утро́бо, носи́вшая Небе́с ши́ршую, престо́л святы́й,/ мы́сленный киво́т свяще́ния!

Тро́ичен: Отца́ просла́вим, Сы́на и Ду́ха/ во Еди́нстве Божества́,/ Тро́ицу Пресвяту́ю, Неразде́льную, Несозда́нную,/ и Соприсносу́щную, и Единосу́щную.

Богоро́дичен: Ты Бо́га еди́на родила́ еси́, Де́во, пресла́вно,/ Ты естество́ обнови́ла еси́ Рождество́м Твои́м, Мари́е,/ Ты Е́ву разреши́ла еси́ перворо́дныя кля́твы,/ Богороди́тельнице Чи́стая.

Ин

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:// оте́ц на́ших Бо́же, благослове́н еси́.

Жре́ти и́долом глухи́м злочести́ваго мучи́теля повелева́юща/ оплева́сте, вопию́ще, отрокови́цы:/ отцо́в на́ших Бо́же, благослове́н еси́.

Просвеще́нныя умо́м богонача́льными заря́ми,/ мглу и́дольскую очерни́сте, всехва́льныя, пою́ще:/ отцо́в на́ших Бо́же, благослове́н еси́.

Ни отсече́ния уде́с, ни гоне́ние, ни скорбь/ Христа́ отлучи́ти отню́д возмого́ша, вопию́щим му́ченицам:/ отцо́в на́ших Бо́же, благослове́н еси́.

Богоро́дичен: Преесте́ственно Зижди́теля от утро́бы Твоей, Де́во, роди́ти сподо́билася еси́,/ земны́я назида́юща, пою́щия ве́рою:/ Бо́же, благослове́н еси́.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь, // я́ко Соде́телю всех во ве́ки.

Сотвори́вый пресла́вная непло́дней утро́бе,/ отве́рзый А́нны неражда́ющая ложесна́ и плод ей дав,/ Ты, Бо́же Святы́й, Ты, Сы́не Де́вы,/ Ты от Сея́ Плоть прия́л еси́,/ присноцвету́щия Де́вы и Богоро́дицы.

Затворя́яй бе́здну и отверза́яй ю,/ вознося́й во́ду во о́блацех и дая́й дождь,/ Ты, да́вый, Го́споди, от непло́днаго ко́рене/ прозя́бнути А́нны святы́я пречи́ст плод/ и роди́ти Богоро́дицу.

Де́лателю мы́слей на́ших/ и Насади́телю душ на́ших,/ Ты, непло́дную зе́млю благопло́дну показа́вый,/ Ты дре́вле суху́ю родови́ту, благокла́сну, бразду́ плодоно́сну соде́лал еси́ А́нну святу́ю,/ пречи́ст плод израсти́ти, Богоро́дицу.

Прииди́те, вси у́зрим,/ я́ко от черто́га ма́ла, Бо́жий град, ны́не ражда́емый,/ и́же от две́ри утро́бныя исхо́д иму́щую,/ вход же не ве́дущу обще́ния:/ Еди́н Бог Зижди́тель Се́ю про́йде стезе́ю стра́нною.

Тро́ичен: О Тро́ице Пресу́щная, Еди́нице Собезнача́льная!/ Тя пое́т и трепе́щет мно́жество А́нгел,/ Не́бо и земля́ и бе́здны ужаса́ются,/ челове́цы благословя́т, огнь рабо́тает,/ вся послу́шают Тебе́, Тро́ице Свята́я, со стра́хом, я́же в тва́ри.

Богоро́дичен: О нове́йшаго слы́шания: Бог Сын Жены́!/ О безсе́меннаго Рождества́! Безму́жная Ма́ти и рожде́нное Бог! / О ужа́снаго виде́ния! О зача́тия стра́ннаго Де́выя! О несказа́ннаго Рождества́! / И́стинно па́че ума́ вся и виде́ния.

Ин

Ирмо́с: Избави́телю всех Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:// вся дела́, благослови́те, по́йте Го́спода.

Изостри́вшеся любо́вию Творца́,/ притупи́сте жа́ла змии́ная,/ в же́нстем телеси́ му́жеския восприе́мше по́двиги,/ и венцы́ Небе́сными венча́стеся.

Спле́тшеся посреде́ по́двига,/ неви́димыя враги́ с пло́тию безпло́тныя победи́ша/ богому́дрыя отрокови́цы, вопию́ще:/ благослови́те, вся дела́ Госпо́дня, Го́спода.

О Бо́зе Спа́се вжиля́емы,/ о Христе́ Иису́се возмога́юще,/ вра́жию некре́пкую погуби́сте держа́ву, воспева́юще:/ вся́кая дела́, благослови́те, Госпо́дня, Го́спода.

Ца́рство вы́шнее получи́сте,/ со Христо́м Иису́сом ца́рствующе,/ испещре́ны ра́нами мук, добро́тою укра́шены,/ досточу́дныя отрокови́цы.

Богоро́дичен: Я́ко Бо́жие нескве́рное жили́ще,/ Его́же прия́ла еси́ воплоща́ема/ и во дву естеству́ зна́ема, Отрокови́це,/ Ему́же пое́м: благослови́те, вся дела́ Госпо́дня, Го́спода.

Песнь 9

Ирмо́с: Чу́жде ма́терем де́вство,/ и стра́нно де́вам деторожде́ние;/ на Тебе́, Богоро́дице,/ обоя́ устро́ишася./ Тем Тя, вся племена́ земна́я,// непреста́нно велича́ем.

Досто́йное, Богома́ти,/ Твоея́ чистоты́ рождество́ насле́довала еси́ чрез обеща́ние:/ иногда́ бо непло́дней богопрозябе́н плод вдала́ся еси́./ Тем Тя, вся племена́ земна́я, непреста́нно велича́ем.

Испо́лнися вопию́щаго проро́чество,/ глаго́лет бо: возста́влю ски́нию па́дшую свяще́ннаго Дави́да,/ в Тебе́, Чи́стая, прообрази́вшуюся,/ Ея́же ра́ди всех челове́ков персть в Те́ло созда́ся Бо́жие.

Пелена́м покланя́емся Твои́м, Богоро́дице,/ сла́вим Да́вшаго плод пре́жде непло́дней/ и Отве́рзшаго ложесна́ неражда́ющей пресла́вно./ Твори́т бо вся, ели́ка хо́щет, Бог сый самовла́стен.

Я́ко дар Тебе́, Богоро́дице, песнопе́ние, от А́нны ро́ждшейся, ве́рно дароно́сим:/ ма́тери Ма́терь, де́вы же Де́ву еди́ну,/ славосло́вяще, покланя́емся Тебе́, пое́м и сла́вим.

Тро́ичен: Чу́жде есть беззако́нным сла́вити Безнача́льную Тро́ицу,/ Отца́, и Сы́на же, и Свята́го Ду́ха,/ несозда́нное Вседержа́вство,/ Е́юже мир весь содержи́тся ма́нием держа́вы Ея́.

Богоро́дичен: Вмести́ла еси́ во утро́бе Твое́й, Де́во Ма́ти, Еди́наго от Тро́ицы, Христа́ Царя́,/ Его́же пое́т вся тварь и трепе́щут вы́шнии чи́ни:/ Того́ моли́, Всечи́стая, спасти́ся душа́м на́шим.

Ин

Ирмо́с: Ка́мень нерукосе́чный,/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́.// Тем, веселя́щеся, Тя, Богоро́дице, велича́ем.

Ви́дети жела́юще добро́ту Жениха́,/ всеобра́зным ма́нием к Нему́, богоно́сицы,/ безсме́ртию поучи́стеся в ме́ртвеннем телеси́./ Тем досто́йно ублажа́етеся.

Яви́стеся мучи́телей посреде́,/ а́ки в во́лцех суро́вых, а́гницы нескве́рныя,/ сих зверови́дное пребора́ющия,/ и Христу́, благоприя́тна я́ко же́ртва, принесо́стеся.

Вене́ц исплето́сте ку́пно неветша́ющ, де́вы,/ Боже́ственныя улучи́вше сла́вы,/ и Ца́рствия и́стинно непоколеби́маго прийти,/ я́ко му́ченицы, с му́ченики сподо́бистеся.

Ея́же сподо́бистеся сла́вы,/ е́же получи́сте ликова́ние,/ соверша́ющим любо́вию ва́шу па́мять улучи́ти моли́теся,/ я́ко дерзнове́ние иму́ще ко Влады́це, честны́я де́вы.

Богоро́дичен: Пощади́ мя, Христе́,/ егда́ хо́щеши суди́ти мир со сла́вою,/ разори́ мглу страсте́й мои́х/ моли́твами Рождшия Тя и честны́х му́чениц Твои́х,/ я́ко Благ и Многоми́лостив.

Свети́лен.

Подо́бен: Све́те неизме́нный:

Со́лнце отню́дуже произы́де мы́сленное по пло́ти/ днесь озари́ мир от непло́дных ложе́сн./ Те́мже, игра́юще, вопие́м:/ ра́дуйся, Мари́е, пра́отцев избавле́ние.

Сла́ва, и ны́не, то́йже.

На стихо́вне стихи́ры, глас 2.

Подо́бен: До́ме Евфра́фов:

Дом Бо́жий,/ еди́на Богоро́дица/ от непло́дове и безча́дныя происхо́дит,/ и ра́дуется Ада́м,/ обновля́емый.

Стих: Слы́ши, Дщи, и виждь,/ и приклони́ у́хо Твое́.

Днесь ра́дость/ ражда́ется от А́нны,/ возвеща́ющи ми́ру/ разреше́ние кля́твы,/ возра́дуйтеся, вся́ческая.

Стих: Лицу́ Твоему́ помо́лятся/ бога́тии лю́дстии.

Ра́дуйся, Иоаки́ме,/ и А́нно богому́драя,/ я́ко ро́ждшая ми́ру/ ра́дость и весе́лие/ и спасе́ния Хода́таицу.

Сла́ва, и ны́не, глас 4:

Всеми́рная ра́дость от пра́ведных возсия́ нам,/ от Иоаки́ма и А́нны, Всепе́тая Де́ва,/ Я́же премно́гия ра́ди чистоты́/ храм Бо́жий одушевле́нный быва́ет/ и еди́на вои́стину Богоро́дица познава́ется./ Тоя моли́твами, Христе́ Бо́же,/ мир ми́ру низпосли́/ и душа́м на́шим ве́лию ми́лость.

На литурги́и

Блаже́нны пра́здника, пе́сни 4-я и 5-я, на 8.

Преподо́бнаго Иоаса́фа Ка́менскаго, чудотво́рца