По 1-м стихосло́вии седа́льны умили́тельны Осмогла́сника. По 2-м же стихосло́вии седа́лен, гла́с 1.

Подо́бен: Ка́мени запеча́тану:

Ка́мень отвали́л еси́ ожесточе́ния Го́споди, от моего́ се́рдца, умерщвле́нную страстьми́ воздви́гни ду́шу мою́ Благи́й, принести́ Тебе́ ва́иа доброде́телей: я́ко победи́телю а́да, во умиле́нии Влады́ко сподо́би, я́ко да ве́чный живо́т улучу́, песносло́вя Твою́ держа́ву, и благоутро́бие Твое́, еди́не Человеколю́бче. [Два́жды.]

Богоро́дичен: Чу́до Чуде́с Благода́тная, в Тебе́ зря́щи тва́рь ра́дуется: зачала́ бо еси́ безсе́менно, и родила́ еси́ неизрече́нно, Его́же чинонача́лия А́нгелов ви́дети не мо́гут: того́ Богоро́дице, моли́ о душа́х на́ших.

По 3-м стихосло́вии седа́лен, гла́с 1.

Подо́бен: Ка́мени запеча́тану:

Шесту́ю седми́цу поста́ иму́ще, предпра́зднственное пе́ние, ва́иа принесе́м Христу́, гряду́щему на́с ра́ди все́сти на жребя́ти о́сли, язы́ческое подклони́ти я́ко Ца́рь безслове́сие Роди́телю: ве́тви доброде́телей Тому́ вси́ угото́вим, я́ко да Воскресе́ние Его́ ра́дующеся у́зрим.

Сла́ва, па́ки то́йже.

И ны́не, Богоро́дичен: Ру́це Твои́ боже́ственнии, и́миже Соде́теля носи́ла еси́ Де́во Пресвята́я, воплоще́нна Божество́м, просте́рши умоли́ изба́витися на́м от искуше́ний, и страсте́й, и бе́д, восхваля́ющым Тя́ любо́вию, и вопию́щым Тебе́: сла́ва Все́льшемуся в Тя́: сла́ва Проше́дшему из Тебе́: сла́ва Свободи́вшему на́с Рождество́м Твои́м.

Трипе́снец. Гла́с 1.

Пе́снь 1.

Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Стра́сти умертви́м воздержа́нием, и ду́х оживи́м Боже́ственными де́тельми, я́ко да у́зрим стра́сть Христо́ву честну́ю чи́стым умо́м.

Неми́лостиваго поревнова́вша бога́таго нра́вом, Ще́дре Человеколю́бче молю́ Тя, сочини́ мя Ла́зарю убо́гому, избавля́я мя́ пла́мене, и негаси́маго огня́.

От все́х пости́хся исправле́ний, в сы́тость наслади́хся прегреше́ний, Го́споди: ны́не у́бо а́лчуща мя́ спаси́тельным и честны́м насы́ти бра́шном.

Богоро́дичен: Мене́ осужде́ннаго во осужде́нии, Пречи́стая Влады́чице, пове́рженнаго де́лы мои́ми, спаси́, уще́дри, всеще́драго Бо́га ро́ждшая.

И́ный, гла́с 1. Ирмо́с: Помо́гшему Богу во Еги́пте Моисе́ови, и те́м фарао́на со всево́инством погрузи́вшему, побе́дную пе́снь пои́м: я́ко просла́вися.

Светоно́сный пра́здник сря́щим ве́рнии, предпра́зднствующе его́ дне́сь све́тло, да живоно́сную сподо́бимся стра́сть ви́дети.

Гряде́т, и и́дет Христо́с ко Иерусали́му я́ко Ца́рь, седя́ на жребя́ти о́сли, язы́ческое подклони́ти безслове́сие под яре́м Отцу́.

Тро́ичен: В Божестве́ еди́ном триипоста́сная Еди́нице, О́тче нерожде́нне Бо́же, и Сы́не Единоро́дне, и Еди́не Святы́й Ду́ше, Единоца́рственная Держа́во, спаси́ вся́ ны́.

Богоро́дичен: Пресла́вная возглаго́лашася о Тебе́ всю́ду, я́ко родила́ еси́ пло́тию все́х Творца́, Богоро́дице Мари́е безневе́стная и неискусобра́чная.

Сла́ва Тебе́ Бо́же на́ш, сла́ва Тебе́.

Се́ гряде́т Христо́с ко гра́ду Виффаги́и, ра́дуйся Ла́зарево оте́чество Вифа́ние, я́ко тебе́ пока́жет чу́до ве́лие, Ла́заря возставля́я из ме́ртвых.

Ирмо́с: Помо́гшему Бо́гу во Еги́пте Моисе́ови, и те́м фарао́на со всево́инством погрузи́вшему, побе́дную пе́снь пои́м: я́ко просла́вися.

Пе́снь 8.

Ирмо́с: Его́же ужаса́ются а́нгели и вся́ во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие, и превозноси́те во вся́ ве́ки.

Непло́дными обогати́хся окая́нный помышле́ньми, ду́шу оскверни́х беззако́нными сластьми́, и тьма́ окружа́ет мя́ отча́яния: озари́ мне́ сия́ние, Бо́же мо́й, покая́ния.

Я́коже дре́вле просвети́л еси́ слепа́го от рожде́ния, ду́шу мою́ озари́, не ви́дящую све́та Твоего́ ми́лостиве, но во тьме́ лю́таго забве́ния погре́бшуюся, и попече́ний жите́йских.

Пости́вся Илиа́, отве́рзе небеса́, и ту́чами напои́ жа́ждущую зе́млю: пости́мся, струи́ почерпа́юще душе́вных сле́з, я́ко да поми́луемся.

Богоро́дичен: Я́ко одушевле́нная лоза́, процвела́ еси́ на́м гро́зд зре́лый, источа́ющий на́м, Чи́стая Де́во, вино́ оставле́ния, и грехо́вное изсуша́ющее пия́нство.

И́ный.

Ирмо́с: Пе́снь Тебе́ прино́сим безпло́тных, я́коже о́троцы в пещи́, и пою́ще глаго́лем: благослови́те вся́ дела́ Госпо́дня Го́спода.

Отве́рзеся преддве́рие Ла́зарева животво́рия: Христо́с бо гряде́т, я́ко от сна́ воздви́гнути уме́ршаго, побори́ти жи́знию сме́рть.

Ве́лия тебе́ похвала́, о Вифа́ние, я́ко Зижди́теля странноприя́ти сподо́билася еси́, вопию́щи: благослови́те дела́ Госпо́дня Го́спода.

Благослови́м Отца́, и Сына, и Свята́го Ду́ха, Го́спода.

Тро́ичен: Тя́ Пресу́щная, Трегу́бая Еди́нице, совокупля́емая в разделе́нии зра́ком Ли́ц, Отца́, и Сына, и Ду́ха Боже́ственнаго сла́вим.

Богоро́дичен: Е́же ра́дуйся, веща́ем Тебе́ со А́нгелом, я́ко воздви́гла еси́ ра́дость, Спа́са Ми́ра: Его́же моли́ Де́во Всепе́тая.

Сла́ва Тебе́ Бо́же на́ш, сла́ва Тебе́.

Пе́снь Тебе́ прино́сим, я́ко на жребя́ти но́сишися, в вы́шних на Херуви́мех восходя́й, да все́х повине́ши Христе́ держа́ве Твое́й.

Хва́лим, благослови́м, покланя́емся Го́сподеви:

Ирмо́с: Пе́снь Тебе́ прино́сим безпло́тных, я́коже о́троцы в пещи́, и пою́ще глаго́лем: благослови́те вся́ дела́ Госпо́дня Го́спода.

Пе́снь 9.

Ирмо́с: Живоприе́мный исто́чник приснотеку́щий, светоно́сный свети́льник благода́ти, хра́м одушевле́нный, се́нь пречи́стую, небесе́ и земли́ простра́ннейшую, Богородицу ве́рнии велича́ем.

Умерщвле́н бы́в мно́гими прегреше́ньми, небреже́ния во гро́бе одержи́мь е́смь, ка́мень отча́яния име́яй надлежа́щий: его́же расто́рг Христе́ Твое́ю ми́лостию, я́коже Ла́заря дре́вле, ны́не воскреси́ мя.

Бога́таго убежи́м подража́ния, осужде́ннаго в пла́мень неугаси́мый: и Ла́зарево возлю́бим в боле́знех терпе́ние, я́ко да отсю́ду на́с отше́дших Авраа́м в не́дро восприи́мет.

Страстоуби́йцу по́ст возлю́бим, в моли́твах приле́жно упраздни́мся, пла́чим, рыда́им, и те́пле воздо́хнем, я́ко да на́с Иису́с уте́шит, и Ца́рствия прича́стники соде́лает.

Богоро́дичен: Де́вства боже́ственное сокро́вище, пра́отец еди́ное исправле́ние, исто́чник точа́щий благоутро́бия бе́здну, добро́ту Иа́ковлю, Богоро́дицу, Е́юже спаса́емии воспои́м.

И́ный. Ирмо́с: Тебе́ Ви́денную две́рь Иезеки́илем проро́ком, Е́юже никто́же про́йде, то́кмо Бо́г еди́н, Богоро́дице Де́во, пе́сньми почита́ем.

Дне́сь Христу́ явля́ется, об ону́ страну́ Иорда́на ходя́щу, боле́знь Ла́зарева, и я́ко прове́дец глаго́лет: боле́знь сия́ не́сть ны́не к сме́рти.

Благоугото́вися Вифа́ние, украси́ Твоя́ Боже́ственныя вхо́ды, разшири́ преддве́рия: се́ бо Влады́ка прихо́дит со апо́столы, овча́ свое́ оживля́я.

Тро́ичен: Тя́ Триипоста́сную Еди́ницу, и Неразде́льное Существо́, е́же шестокри́льная славосло́вят во́инства, и челове́ческий ро́д пе́сньми велича́ем.

Богоро́дичен: Тя́ от Отца́ безле́тно, и от ма́тере несказа́нно, в ле́то ро́ждшагося во все́х спасе́ние, я́ко Творца́ и Влады́ку пе́сньми велича́ем.

Сла́ва Тебе́ Бо́же на́ш, сла́ва Тебе́.

С добротворе́ния ве́твьми, и чистоты́ нося́ще ва́иа, угото́вимся вси́ Христа́ сре́сти, ко Иерусали́му гряду́щаго я́ко Бо́га на́шего.

Ирмо́с: Тебе́ Ви́денную две́рь Иезеки́илем проро́ком, Е́юже никто́же про́йде, то́кмо Бо́г еди́н, Богоро́дице Де́во, пе́сньми почита́ем.

Досто́йно е́сть: И свети́лен гла́са.

На стихо́вне самогла́сен два́жды, гла́с 5.

Не осуди́ мене́ Христе́ в пла́мени гее́нстем, я́коже бога́таго, ра́ди Ла́заря: но да́руй и мне́ пла́чем прося́щу, ка́пли человеколю́бия, Бо́же, и поми́луй мя́.

Му́ченичен: Благослове́нно во́инство Царя́ Небе́снаго, а́ще бо и земноро́днии бы́ша страстоте́рпцы, но а́нгельский са́н потща́шася дости́гнути, о телесе́х небре́гше, и страстьми́ свои́ми безпло́тных че́сти сподо́бишася: моли́твами и́х Го́споди, спаси́ ду́шы на́шя.

Сла́ва, и ны́не, Богоро́дичен гла́с то́йже:

Обра́дованная, хода́тайствуй Твои́ми моли́твами, и испроси́ душа́м на́шым мно́жество щедро́т, и очище́ние мно́гих прегреше́ний, мо́лимся.

На 6-м часе́ тропа́рь проро́чества, гла́с 6:

Се́й е́сть Бо́же, стра́шный де́нь, его́же дости́гнути ве́чера не наде́емся: и сего́ ви́дети на́с человеколю́бно, сподо́бил еси́ Трисвяты́й, сла́ва Тебе́.

Проки́мен, псало́м 104, гла́с 6: Да возвесели́тся се́рдце и́щущих Го́спода.

Сти́х: Испове́дайтеся Го́сподеви, и призыва́йте и́мя его́.

Проро́чества Иса́иина чте́ние. [Ис. 48:17–22, 49:1–4.]

Та́ко глаго́лет Госпо́дь, изба́вивый тя́ святы́й Изра́илев: А́з е́смь Госпо́дь Бо́г тво́й, научи́х тя́ е́же обрести́, тебе́ пу́ть, по нему́же по́йдеши. И а́ще бы еси́ послу́шал за́поведей Мои́х, то бы́л бы у́бо а́ки река́ ми́р тво́й, и пра́вда твоя́ я́ко волна́ морска́я. И бы́ло бы я́ко песо́к се́мя твое́, и исча́дия чре́ва твоего́ я́ко пе́рсть земли́: ниже́ ны́не потреби́шися, ниже́ поги́бнет и́мя твое́ предо Мно́ю. Изы́ди от Вавило́на бежа́й от Халде́ев: гла́с ра́дости возвести́те, и да слы́шано бу́дет сие́, возвести́те да́же до после́дних земли́: глаго́лите, изба́ви Госпо́дь раба́ своего́ Иа́кова. И а́ще вжа́ждут, пусты́нею проведе́т и́х, и во́ду из ка́мене изведе́т и́м, разся́дется ка́мень, и потече́т вода́, и испию́т лю́дие Мои́. Не́сть ра́доватися нечести́вым, глаго́лет Госпо́дь. Послу́шайте Мене́ о́строви, и внемли́те язы́цы, вре́менем мно́гим стоя́ти бу́дет, глаго́лет Госпо́дь: от чре́ва Ма́тере Моея́ нарече́ И́мя Мое́. И положи́ уста́ моя́ я́ко ме́чь о́стр, и под кро́вом руки́ Своея́ скры́ мя: положи́ мя я́ко стрелу́ избра́нну, и в ту́ле свое́м скры́ мя. И рече́ ми: ра́б Мо́й еси́ ты́ Изра́илю, и в тебе́ просла́влюся. А́з же реко́х: вотще́ труди́хся, всу́е и ни во что́ да́х кре́пость мою́: сего́ ра́ди су́д мо́й пред Го́сподем, и тру́д мо́й пред Бо́гом мои́м.

Проки́мен, псало́м 105, гла́с 6: Благослове́н Госпо́дь в Изра́илев от ве́ка и до ве́ка.

Сти́х: Испове́дайтеся Го́сподеви, я́ко бла́г:

 

по обы́чном стихосло́вии, на Го́споди воззва́х, поста́вим стихо́в 6: и пое́м настоя́щыя подо́бны трипе́снца, творе́ние господи́на Ио́сифа. Гла́с 6:

Подо́бен: Всю́ отложи́вше:

Мно́гими прегреше́нии, и сластьми́ жития́, неду́гующую стяжа́х ду́шу окая́нный, и лежу́ на одре́ всегда́ ле́ности, Влады́ко, и вопию́ Ти: Ми́лостиве, прише́д посети́, здра́вие мне́ подая́ и ми́лость, и не оста́ви мя́, да не когда́ усну́ в сме́рть, и возра́дуется вра́г о поги́бели мое́й, иски́й всегда́, Спа́се, во а́дову глубину́ низвести́ мя.

Немилосе́рдому бога́тому в безу́мии поревнова́в, сла́достно веселю́ся, сластьми́ и страстьми́ погружа́яся. и ви́дя лежа́ща всегда́ пред две́рьми покая́ния, я́коже Ла́заря ума́ моего́, Го́споди, сего́ нечу́вственно прехожду́, гла́дом же боле́знующа, и острупля́ема страстьми́. Те́мже гее́нскому пови́нен е́смь пла́мени, от него́же изба́ви мя́ Влады́ко, Еди́не Многоми́лостиве.

И́на стихи́ра господи́на Фео́дора, гла́с 5.

Подо́бен: Го́споди при Моисе́и:

Го́споди, об ону́ страну́ Иорда́на, пло́тию проходя́, проре́кл еси́ Ла́зареву боле́знь к сме́рти не бы́ти, но о Твое́й Бо́га на́шего сла́ве быва́ти. сла́ва вели́чию де́л Твои́х, и вседержи́тельству Твоему́: я́ко низложи́л еси́ сме́рть, за мно́гую ми́лость Человеколю́бче.

И мине́и. Сла́ва: И ны́не, Богоро́дичен.

Проки́мен, псало́м 106, гла́с 4: Испове́дайтеся Го́сподеви, я́ко бла́г, я́ко в ве́к ми́лость Его́.

Сти́х: Да реку́т изба́вленнии Го́сподем:

Бытия́ чте́ние. [Быт.27:1–41.]

Бы́сть же, повнегда́ состаре́тися Исаа́кови, и притупи́шася о́чи его́ е́же ви́дети: и призва́ Иса́ва сы́на своего́ старе́йшаго, и рече́ ему́: сы́не мо́й. и рече́: се́ а́з. И рече́ Исаа́к: се́ состаре́хся, и не ве́м дне́ сконча́ния моего́. Ны́не у́бо возми́ ору́дие твое́, ту́л же и лу́к, и изы́ди на по́ле, и улови́ ми ло́в: И сотвори́ ми сне́ди, я́коже люблю́ а́з: и принеси́ ми, да я́м, я́ко да благослови́т тя́ душа́ моя́, пре́жде да́же не умру́. Реве́кка же слы́ша глаго́люща Исаа́ка ко Иса́ву сы́ну своему́: изы́де же Иса́в на по́ле улови́ти ло́в отцу́ своему́. Реве́кка же рече́ ко Иа́кову сы́ну своему́ ме́ньшему: се́, а́з слы́шах отца́ твоего́ бесе́дующа ко Иса́ву бра́ту твоему́, глаго́люща: Принеси́ ми ло́в, и сотвори́ ми сне́ди, да яды́й благословлю́ тя пред Го́сподем, пре́жде не́же умре́ти ми́. Ны́не у́бо сы́не мо́й, послу́шай мене́, я́коже а́з запове́даю ти́. И ше́д во о́вцы, пойми́ мне́ отту́ду два́ ко́злища мя́гка и добра́, и сотворю́ я́ сне́ди отцу́ твоему́, я́коже лю́бит: И внесе́ши отцу́ твоему́, и бу́дет я́сти, я́ко да благослови́т тя́ оте́ц тво́й, пре́жде да́же не у́мрет. Рече́ же Иа́ков к Реве́кце ма́тери свое́й: Иса́в бра́т мо́й е́сть му́ж косма́т, а́з же му́ж гла́дкий: Да не ка́ко ося́жет мя́ оте́ц мо́й, и бу́ду пред ни́м я́ко презира́яй, и наведу́ на себе́ кля́тву, а не благослове́ние. Рече́ же ему́ ма́ти: на мне́ кля́тва твоя́, ча́до: то́чию послу́шай гла́са моего́, и ше́д принеси́ ми. Ше́д же взя́, и принесе́ ма́тери, и сотвори́ ма́ти его́ сне́ди, я́коже любля́ше оте́ц его́. И взе́мши Реве́кка оде́жду Иса́ва сы́на своего́ старе́йшаго до́брую, я́же бы́сть у нея́ в дому́, облече́ о́ною Иа́кова сы́на своего́ ме́ньшаго. И ко́жицами козля́чиими обложи́ мы́шцы его́, и наго́е вы́и его́. И даде́ сне́ди и хле́бы, я́же сотвори́, в ру́це Иа́кову сы́ну своему́. И внесе́ отцу́ своему́, и рече́: о́тче. о́н же рече́: се́ а́з. кто́ еси́ ты́, ча́до? И рече́ Иа́ков отцу́: а́з Иса́в пе́рвенец тво́й, сотвори́х, я́коже ре́кл ми́ еси́: воста́в ся́ди, и я́ждь от ло́ва моего́, я́ко да благослови́т мя́ душа́ твоя́. Рече́ же Исаа́к сы́ну своему́: что́ сие́, е́же ско́ро обре́л еси́ о ча́до? о́н же рече́: е́же даде́ Госпо́дь Бо́г тво́й предо мно́ю. Рече́ же Исаа́к Иа́кову: прибли́жися ко мне́, и осяжу́ тя́ ча́до, а́ще ты́ еси́ сы́н мо́й Иса́в, или́ ни́? Прибли́жися же Иа́ков ко Исаа́ку отцу́ своему́, и осяза́ его́, и рече́: гла́с у́бо, гла́с Иа́ковль: ру́це же, ру́це Иса́вове. И не позна́ его́, бе́сте бо ру́це его́, я́ко ру́це Иса́ва бра́та его́ косма́те: и благослови́ его́. И рече́: ты́ ли еси́ сы́н мо́й Иса́в? о́н же рече́: а́з. И рече́: принеси́ ми, и я́м от ло́ва твоего́ ча́до, да благослови́т тя́ душа́ моя́. и принесе́ ему́, и яде́: и принесе́ ему́ вино́, и пи́. И рече́ ему́ Исаа́к оте́ц его́: прибли́жися ко мне́, и облобыза́й мя́ ча́до. И прибли́жився лобыза́ его́: и обоня́ воню́ ри́з его́, и благослови́ его́, и рече́: се́ воня́ сы́на моего́, я́ко воня́ ни́вы испо́лнены, ю́же благослови́ госпо́дь. И да да́ст тебе́ Бо́г от росы́ небе́сныя, и от ту́ка земли́, и мно́жество пшени́цы и вина́: И да порабо́тают тебе́ язы́цы, и да покло́нятся тебе́ кня́зи, и бу́ди господи́н бра́ту твоему́, и покло́нятся тебе́ сы́нове отца́ твоего́: проклина́яй тя́, про́клят: благословля́яй же тя́, благослове́н. И бы́сть по е́же преста́ти Исаа́ку благословля́ющу Иа́кова сы́на своего́: и бы́сть егда́ изы́де Иа́ков от лица́ Исаа́ка отца́ своего́, и Иса́в бра́т его́ прии́де с лови́твы. Сотвори́ же и то́й сне́ди, и принесе́ отцу́ своему́, и рече́ отцу́: да воста́нет оте́ц мо́й, и да я́ст от ло́ва сы́на своего́, я́ко да благослови́т мя́ душа́ твоя́. И рече́ ему́ Исаа́к оте́ц его́: кто́ еси́ ты́? о́н же рече́: а́з е́смь сы́н тво́й пе́рвенец Иса́в. ужасе́ся же Исаа́к у́жасом ве́лиим зело́, и рече́: кто́ у́бо улови́вый мне́ ло́в, и принесы́й ми́, и ядо́х от все́х, пре́жде не́же приити́ тебе́? и благослови́х его́, и благослове́н бу́дет. Бы́сть же егда́ услы́ша Иса́в глаго́лы отца́ своего́ Исаа́ка, возопи́ гла́сом ве́лиим и го́рьким зело́, и рече́: благослови́ у́бо и мене́, о́тче. Рече́ же ему́: прише́д бра́т тво́й с ле́стию, взя́ благослове́ние твое́. И рече́ [Иса́в] пра́ведно нарече́ся и́мя ему́ Иа́ков: запя́ бо мя́ се́ уже́ втори́цею, и пе́рвенство мое́ взя́, и ны́не взя́ благослове́ние мое́. и рече́ иса́в отцу́ своему́: не оста́вил ли еси́ [и] мне́ благослове́ния, о́тче? Отвеща́в же Исаа́к, рече́ Иса́ву: а́ще господи́на его́ сотвори́х тебе́, и всю́ бра́тию его́ сотвори́х рабы́ ему́, пшени́цею и вино́м утверди́х его́: тебе́ же что́ сотворю́, ча́до? Рече́ же Иса́в ко отцу́ своему́: еда́ еди́но е́сть благослове́ние у тебе́ о́тче? благослови́ у́бо и мене́ о́тче. умили́вшуся же Исаа́ку, возопи́ гла́сом ве́лиим Иса́в, и воспла́кася. Отвеща́в же Исаа́к оте́ц его́, рече́ ему́: се́ от ту́ка земли́ бу́дет вселе́ние твое́, и от росы́ небе́сныя свы́ше: И мече́м твои́м жи́ти бу́деши, и бра́ту твоему́ порабо́таеши: бу́дет же [вре́мя] егда́ низложи́ши и отреши́ши яре́м его́ от вы́и твоея́. И враждова́ше Иса́в на Иа́кова о благослове́нии, и́мже благослови́ его́ оте́ц его́.

Проки́мен, псало́м 107, гла́с 7: Вознеси́ся на небеса́ Бо́же, и по все́й земли́ сла́ва Твоя́. Сти́х: Гото́во се́рдце мое́ Бо́же, гото́во се́рдце мое́.

При́тчей чте́ние. [Притч.19:16–25.]

И́же храни́т за́поведи, соблюда́ет свою́ ду́шу: а нерадя́й о свои́х путе́х, поги́бнет. Ми́луяй ни́ща, взаи́м дае́т Бо́гови: по дая́нию же его́ возда́стся ему́. Наказу́й сы́на твоего́, та́ко бо бу́дет благонаде́жен: в досажде́ние же не взе́млися душе́ю твое́ю. Злоу́мен му́ж мно́го отщети́тся: а́ще же губи́тель е́сть, и ду́шу свою́ приложи́т. Слу́шай сы́не отца́ твоего́ наказа́ния, да му́др бу́деши в после́дняя твоя́. Мно́ги мы́сли в се́рдцы му́жа: сове́т же Госпо́день во ве́к пребыва́ет. Пло́д му́жеви, ми́лостыня: лу́чше же ни́щ пра́ведный, не́жели бога́т лжи́в. Стра́х Госпо́день в живо́т му́жеви: а безстра́шный водвори́тся на ме́стех, иде́же не наблюда́ется ра́зум. Скрыва́яй в не́дрех ру́це свои́ непра́ведно, ниже́ ко усто́м свои́м принесе́т я́. Губи́телю ра́ны прие́млющу, безу́мный кова́рнее бу́дет: а́ще же облича́еши му́жа разу́мна, уразуме́ет чу́вство.

На стихо́вне самогла́сен дне́, два́жды. Гла́с 4:

Душевре́днаго лихои́мства свободи́ Спа́се, и с Ла́зарем убо́гим в не́дрех Авраа́мовых причти́ на́с: Ты́ бо в ми́лостех бога́т сы́й, во́лею на́с ра́ди обнища́л еси́, и от тли́ на нетле́ние преве́л еси́, я́ко ми́лостив Бо́г, и Человеколю́бец.

Му́ченичен: Святы́х му́ченик прие́мый терпе́ние, и от на́с приими́ пе́ние Человеколю́бче, да́руй на́м те́х моли́твами ве́лию ми́лость.

Сла́ва, и ны́не, Богоро́дичен: Изба́ви на́с от ну́жд на́ших, Ма́ти Христа́ Бо́га, ро́ждшая все́х Творца́, да вси́ зове́м Ти́: ра́дуйся Еди́но Предста́тельство ду́ш на́ших.