На Бог Госпо́дь: тропарь воскресен дважды, глас 3:
Да веселя́тся небе́сная, / да ра́дуются земна́я; / я́ко сотвори́ держа́ву мы́шцею Свое́ю Госпо́дь, / попра́ сме́ртию смерть, / пе́рвенец ме́ртвых бысть; / из чре́ва а́дова изба́ви нас, / и подаде́ ми́рови ве́лию ми́лость.
Сла́ва и ны́не: Богородичен:
Тя хода́тайствовавшую Спасе́ние ро́да на́шего, / воспева́ем, Богоро́дице Де́во; / пло́тию бо от Тебе́ восприя́тою Сын Твой и Бог наш, / Кресто́м восприи́м страсть, / изба́ви нас от тли, я́ко Человеколю́бец.
По 1-м стихословии седален, глас 3:
Христо́с от ме́ртвых воста́, нача́ток усо́пших: / перворожде́н тва́ри, и Соде́тель всех бы́вших, / истле́вшее естество́ ро́да на́шего в Себе́ Само́м обнови́. / Не ктому́ сме́рте облада́еши: / и́бо всех Влады́ка держа́ву твою́ разруши́.
Стих: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.
Пло́тию сме́рти вкуси́в, Го́споди, / го́ресть сме́рти пресе́кл еси́ воста́нием Твои́м, / и челове́ка на ню укрепи́л еси́, / пе́рвыя кля́твы одоле́ние призыва́я: / Защи́тниче жи́зни на́шея, Го́споди, сла́ва Тебе́.
Слава, и ныне, Богородичен: Красоте́ де́вства Твоего́, и пресве́тлой чистоте́ Твое́й, / Гаврии́л удиви́вся, вопия́ше Ти, Богоро́дице: / ку́ю Ти похвалу́ принесу́ досто́йную; / что же возимену́ю Тя; недоумева́ю и ужаса́юся. / Те́мже я́ко повеле́н бых, вопию́ Ти: / ра́дуйся, Благода́тная.
По 2-м стихословии седален, глас 3.
Подобен: Красоте́ де́вства:
Вся челове́ческая восприи́м, вся на́ша присво́ив, / на Кресте́ пригвозди́тися благоволи́л еси́, Тво́рче мой, / смерть прии́м претерпе́ти, я́ко Челове́к, / да челове́ческое от сме́рти изба́виши, я́ко Бог. / Те́мже, я́ко Жизнода́вцу, вопие́м Ти: / сла́ва, Христе́, благоутро́бию Твоему́.
Стих: Испове́мся Тебе́ Го́споди всем се́рдцем мои́м, / пове́м вся чудеса́ Твоя́.
Непостижи́мое распя́тия, и несказа́нное воста́ния, / богосло́вствуем ве́рнии, та́инство неизрече́нное: / днесь бо смерть и ад плени́ся, / род же челове́ческий в нетле́ние облече́ся. / Тем благодаря́ще вопие́м Ти: / сла́ва, Христе́, воста́нию Твоему́.
Слава, и ныне, Богородичен: Небе́сная любо́вию веселя́хуся, / и земна́я тре́петом ужаса́хуся, / егда́ пречи́стый глас на́йде на Тя, Богоро́дице: / еди́но бо торжество́ обои́м возсия́, / егда́ первозда́ннаго от сме́рти изба́ви. / Тем со а́нгелом вопие́м Ти: / ра́дуйся, Чи́стая Де́во Ма́ти.
По Непорочнах, Благослове́н еси́ Го́споди:
Таже ипакои, глас 3:
Удивля́я виде́нием, / ороша́я глаго́лании, / блиста́яйся А́нгел мироно́сицам глаго́лаше: / что жива́го и́щете во гро́бе; / воста́ истощи́вый гро́бы. / Тли Премени́теля разуме́йте Непреме́ннаго. / Рцы́те Бо́гови: коль стра́шна дела́ Твоя́, / я́ко род спасл еси́ челове́ческий.
Степенна, глас 3. Антифон 1:
Плен Сио́нь Ты изъя́л еси́ от Вавило́на: / и мене́ от страсте́й к животу́ привлецы́, Сло́ве.
В юг се́ющии слеза́ми Боже́ственными, / жнут кла́сы ра́достию присноживо́тия.
Слава: Свято́му Ду́ху вся́кое благода́рие, / я́коже Отцу́ и Сы́ну сооблиста́ет, / в Не́мже вся живу́т и дви́жутся.
И ныне: тойже.
Антифон 2:
А́ще не Госпо́дь сози́ждет дом доброде́телей, всу́е тружда́емся: / ду́шу же покрыва́ющу, никто́же наш разори́т град.
Плода́ чре́вна Ду́хом сынотворе́ное / Тебе́, Христу́, я́коже и Отцу́, святи́и всегда́ суть.
Слава: Святы́м Ду́хом прозри́тся вся́кая святы́ня, прему́дрость: / осуществу́ет бо вся́кую тварь: Тому́ послу́жим: / Бог бо, я́ко Отцу́ же и Сло́ву.
И ныне: тойже.
Антифон 3:
Боя́щиися Го́спода блаже́ни, в пути́ ходя́ще за́поведей: / снедя́т бо живо́тное всепло́дие.
О́крест трапе́зы Твоея́ возвесели́ся, / зря Твоя́, Пастыренача́льниче, исча́дия, нося́ща ве́тви благоде́лания.
Слава: Святы́м Ду́хом вся́кое бога́тство сла́вы, / от Него́же благода́ть, и живо́т вся́кой тва́ри: / со Отце́м бо воспева́емь есть, и с Сло́вом.
И ныне: тойже.
Таже прокимен, глас 3: Рцы́те во язы́цех, я́ко Госпо́дь воцари́ся, / и́бо испра́ви вселе́нную, я́же не подви́жится. Стих: Воспо́йте Го́сподеви песнь но́ву, воспо́йте Го́сподеви вся земля́.
Таже другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.
Евангелие от Луки, 4 воскресное, зачало 112. [Лк. 24:1-12.]
Во вре́мя о́но, во еди́ну от суббо́т, зело́ ра́но, приидо́ша жены́ на гроб, нося́ще я́же угото́ваша арома́ты, и други́я с ни́ми. Обрето́ша же ка́мень отвале́н от гро́ба, и вше́дше, не обрето́ша телесе́ Го́спода Иису́са. И бысть не домышля́ющимся им о сем, и се му́жа два ста́ста в них в ри́зах блеща́щихся. Пристра́шным же бы́вшим им, и покло́ншим ли́ца на зе́млю, реко́ста к ним: что и́щете жива́го с ме́ртвыми? Несть зде, но воста́. Помяни́те, я́коже глаго́ла вам, еще́ сый в Галиле́и, глаго́ля, я́ко подоба́ет Сы́ну Челове́ческому пре́дану бы́ти в ру́це челове́к гре́шник, и про́пяту бы́ти, и в тре́тий день воскре́снути. И помяну́ша глаго́лы Его́. И возвра́щшася от гро́ба, возвести́ша вся сия́ единомуна́десяте и всем про́чим. Бя́ше же Магдали́на Мари́я, и Иоа́нна, и Мари́я Иа́ковля, и про́чия с ни́ми, я́же глаго́лаху ко апо́столом сия́. И яви́шася пред ни́ми я́ко лжа глаго́лы их, и не ве́роваху им. Петр же воста́в тече́ ко гро́бу, и прини́к ви́де ри́зы еди́ны лежа́ща, и оты́де, в себе́ дивя́ся бы́вшему.
Таже глаголем:
Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному. / Кресту́Твоему́покланя́емся, Христе́, / и свято́е Воскресе́ние Твое́ пое́м и сла́вим. / Ты бо еси́ Бог наш, / ра́зве Тебе́ ино́го не зна́ем, / и́мя Твое́ имену́ем. / Прииди́те, вси ве́рнии, / поклони́мся Свято́му Христо́ву Воскресе́нию: / се бо прии́де Кресто́м ра́дость всему́ми́ру. / Всегда́благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию смерть разруши́ . [Трижды.]
Псалом 50. И целование Евангелиа.
Таже глаголем по 50-м псалме, по обычаю:
Слава: Моли́твами апо́столов, / Ми́лостиве, очи́сти / мно́жества согреше́ний на́ших.
И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.
Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.
Посем стихира: Воскре́с Иису́с от гро́ба, / я́коже прорече́, / даде́ нам живо́т ве́чный / и ве́лию ми́лость.
Таже, Спаси́ Бо́же лю́ди Твоя́:
Таже канон Пасхи, со ирмосы и с Богородичнами его, на 8. И о разслабленном на 6. Катавасия: Воскресе́ния день: оба лика вкупе.
Канон Пасхи. Глас 1.
Песнь 1.
Ирмос: Воскресе́ния день, / просвети́мся, лю́дие. / Па́сха, Госпо́дня Па́сха: / от сме́рти бо к жи́зни, / и от земли́ к небеси́, / Христо́с Бог нас преведе́, / побе́дную пою́щия.
Припев: Христо́с воскре́се из ме́ртвых.
Очи́стим чу́вствия, и у́зрим / непристу́пным све́том / Воскресе́ния, Христа́ / блиста́ющася, / и ра́дуйтеся, реку́ща, / я́сно да услы́шим, / побе́дную пою́ще.
Припев: Христо́с воскре́се из ме́ртвых.
Небеса́ у́бо досто́йно да веселя́тся, / земля́ же да ра́дуется, / да пра́зднует же мир, / ви́димый же весь и неви́димый: / Христо́с бо воста́, / весе́лие ве́чное.
Иный канон Богородичен, подобен. Егоже краестрочие на первых тропарех: Феофа́нус. Глас тойже.
Припев: Пресвята́я Богоро́дице, спаси́ нас.
Умерщвле́ния преде́л сломи́ла еси́, / ве́чную жизнь ро́ждшая Христа́, / из гро́ба возсия́вшаго днесь, / Де́во Всенепоро́чная, / и мир просвети́вшаго.
Припев: Пресвята́я Богоро́дице, спаси́ нас.
Воскре́сшаго ви́девши Сы́на Твоего́ и Бо́га, / ра́дуйся со апо́столы Богоблагода́тная Чи́стая: / и е́же ра́дуйся пе́рвее, / я́ко всех ра́дости вина́, восприя́ла еси́, / Богома́ти Всенепоро́чная.
Иный канон о разслабленном, глас 3.
Песнь 1.
Ирмос: Ди́вно, сла́вно творя́й чудеса́. Ты еси́, Бо́же, / бе́здну оземлени́вый, и колесни́цы потопи́вый, / и лю́ди спасы́й пою́щия Тебе́, / я́ко Царю́ на́шему и Бо́гу.
Де́йствуяй зна́мения, творя́й чудеса́ еди́не Царю́, / распя́тие во́лею претерпе́л еси́, я́ко Щедр, / и смерть сме́ртию умертви́в, оживотвори́л еси́ нас.
Во Христо́ве воста́нии лю́дие днесь лику́им ве́рно, / плене́н бысть ад, / ю́зники я́же содержа́ше, отдаде́ со тща́нием, / пою́щия вели́чия Бо́жия.
Си́лою Боже́ственною, / иногда́ разсла́бленнаго сло́вом Твои́м Христе́ стягну́вый, / и повеле́вый ему́ одр взя́ти, / мно́гим вре́менем немощству́ющую лю́те ду́шу мою́ исцели́.
В купе́ль иногда́ о́вчую А́нгел схожда́ше, / и еди́наго исцелева́ше на вся́кое ле́то: / креще́нием же Боже́ственным ны́не очища́ет / безчи́сленная мно́жества Христо́с.
Архангелу Михаилу: Нача́льниче а́нгелов, архистрати́же вы́шних служи́телей, / собра́вшияся в честне́м хра́ме твое́м, и Бо́га воспева́ющия, / покрыва́й и сохраня́й от вся́ких искуше́ний.
Слава, Троичен: В трие́х Ли́цех, еди́ном же Естестве́ / безнача́льнаго Бо́га пои́м непреста́нно со безпло́тными, / Отца́, Сло́ва и Ду́ха, / Ца́рство и держа́ву иму́ща неразде́льную.
И ныне, Богородичен: Чту́щий сей, Чи́стая, град Твой всегда́ ве́рно, / спаса́й от бед, плене́ния ва́рварскаго, междоусо́бныя бра́ни, и меча́, / и вся́каго ино́го преще́ния.
Катавасия: Воскресе́ния день, / просвети́мся, лю́дие. / Па́сха, Госпо́дня Па́сха, / от сме́рти бо к жи́зни, / и от земли́к небеси́, / Христо́с Бог нас преведе́, / побе́дную пою́
Песнь 3.
Ирмос: Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник / из гро́ба одожди́вша Христа́, / в Не́мже утвержда́емся.
Припев: Христо́с воскре́се из ме́ртвых.
Ны́не вся испо́лнишася све́та, / не́бо же и земля́, и преиспо́дняя: / да пра́зднует у́бо вся тварь / воста́ние Христо́во, / в не́мже утвержда́ется.
Припев: Христо́с воскре́се из ме́ртвых.
Вчера́ спогребо́хся Тебе́ Христе́, / совостаю́ днесь / воскре́сшу Тебе́, / сраспина́хся Тебе́ вчера́, / Сам мя спросла́ви Спа́се во Ца́рствии Твое́м.
Припев: Пресвята́я Богоро́дице, спаси́ нас.
На нетле́нную жизнь прихожду́ днесь / бла́гостию ро́ждшагося из Тебе́, Чи́стая, / и всем конце́м свет облиста́вшаго.
Припев: Пресвята́я Богоро́дице, спаси́ нас.
Бо́га, Его́же родила́ еси́ пло́тию, / из ме́ртвых, я́коже рече́, / воста́вша ви́девши, Чи́стая, лику́й, / и Сего́ я́ко Бо́га Пречи́стая возвелича́й.
Ин.
Ирмос: Непло́дная душе́ и безча́дная, / стяжи́ плод благосла́вный, / веселя́щися возопи́й: / утверди́хся Тобо́ю Богоро́дице, / несть свят, несть пра́веден, па́че Тебе́ Го́споди.
Зря Тебе́ иногда́ со́лнце, на дре́ве ви́сяща, Сло́ве, свет скры, / и тряса́шеся земля́ вся, / ме́ртвии воста́ша, / ме́ртву бы́вшу Тебе́, Всеси́льне.
С душе́ю прише́дшу Тебе́ во утро́бу земли́, / ду́ши, я́же стяжа́ ад, издава́ше со тща́нием, / вопию́щия держа́ве Твое́й песнь благода́рную, еди́не Го́споди.
В ле́тех мно́гих немощству́ющую лю́те ду́шу мою́, Преблаги́й, / исцели́, я́коже разсла́бленнаго пре́жде, / я́ко да после́дую Твои́м стезя́м, / я́же показа́л еси́ лю́бящим Тя.
Архангелу Михаилу: С вы́шними чи́нми Бо́жии, арха́нгеле, / мольбу́ сотвори́ о ве́рою пою́щих тя, / соблюда́я и храня́ нас, / жите́йскими страстьми́ напада́емых.
Слава, Троичен: Сла́ва Отцу́, возопии́м, Сы́ну, и Ду́ху, / Еди́н бо есть Естество́м Бог, / Его́же си́лы вся небе́сныя со стра́хом сла́вят, / Свят, Свят, Свят еси́, зову́ще.
И ныне, Богородичен: Безсе́менное име́ла еси́ зача́тие, / и па́че ума́ Рождество́, Де́во Ма́ти Чи́стая: / де́ло стра́шное, чу́до преве́лие, / а́нгелы почита́емое и челове́ки сла́вимое, Отрокови́це Влады́чице.
Катавасия: Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник / из гро́ба одожди́вша Христа́, / в Не́мже утвержда́емся.
Таже кондак Пасце, глас 8:
А́ще и во гроб снизше́л еси́, Безсме́ртне, / но а́дову разруши́л еси́ си́лу, / и воскре́сл еси́, я́ко победитель, Христе́ Бо́же, / жена́м мироно́сицам веща́вый: ра́дуйтеся, / и Твои́м апо́столом мир да́руяй, / па́дшим подая́й воскресе́ние.
Икос: Е́же пре́жде со́лнца Со́лнце заше́дшее иногда́ во гроб, / предвари́ша ко у́тру, и́щущия я́ко дне мvроно́сицы де́вы, / и друга́ ко друзе́й вопия́ху: / о други́ни! Прииди́те, воня́ми пома́жем те́ло живоно́сное и погребе́ное, / плоть воскреси́вшаго па́дшаго Ада́ма, лежа́щую во гро́бе. / И́дем, потщи́мся я́коже волсви́, и поклони́мся, / и принесе́м мv́ра я́ко да́ры, не в пелена́х, но в плащани́це обви́тому, / и пла́чим, и возопии́м: о Влады́ко, воста́ни, / па́дшим подая́й воскресе́ние.
И седален, глас 3:
Глаго́л разсла́бленнаго то́кмо стягну́, / я́ко всеми́рное Сло́во еди́но, / нас ра́ди на земли́ я́вльшагося за благоутро́бие. / Те́мже и одр нося́, мимохожда́ше, / а́ще и кни́жницы зре́ти соде́янное не терпя́ху, / зло́бы содержи́ми за́вистию, ду́ши разслабля́ющею.
Слава, и ныне, Богородичен: Красоте́ де́вства Твоего́, и пресве́тлой чистоте́ Твое́й, / Гаврии́л удиви́вся, вопия́ше Ти, Богоро́дице: / ку́ю Ти похвалу́ принесу́ досто́йную; / что же возимену́ю Тя; недоумева́ю и ужаса́юся. / Те́мже я́ко повеле́н бых, вопию́ Ти: / ра́дуйся, Благода́тная.
Песнь 4.
Ирмос: На Боже́ственней стра́жи / богоглаго́ливый Авваку́м / да ста́нет с на́ми, и пока́жет / светоно́сна А́нгела, / я́сно глаго́люща: / днесь спасе́ние ми́ру, / я́ко воскре́се Христо́с, / я́ко всеси́лен.
Припев: Христо́с воскре́се из ме́ртвых.
Му́жеский у́бо пол, / я́ко разве́рзый де́вственную утро́бу, / яви́ся Христо́с: / я́ко челове́к же, / А́гнец нарече́ся: / непоро́чен же, / я́ко невку́сен скве́рны, / на́ша Па́сха, / и я́ко Бог и́стинен / соверше́н рече́ся.
Припев: Христо́с воскре́се из ме́ртвых.
Я́ко единоле́тный а́гнец, / благослове́нный нам вене́ц Христо́с, / во́лею за всех закла́н бысть, / Па́сха чисти́тельная, / и па́ки из гро́ба кра́сное / пра́вды нам возсия́ Со́лнце.
Припев: Христо́с воскре́се из ме́ртвых.
Богооте́ц у́бо Дави́д / пред се́нным ковче́гом скака́ше игра́я, / лю́дие же Бо́жии святи́и, / образо́в сбытие́ зря́ще, / весели́мся Боже́ственне, / я́ко воскре́се Христо́с, / я́ко Всеси́лен.
Припев: Пресвята́я Богоро́дице, спаси́ нас.
Созда́вый Ада́ма, Твоего́ пра́отца, Чи́стая, / зи́ждется от Тебе́, / и сме́ртное жили́ще разори́ Свое́ю сме́ртию днесь, / и озари́ вся / боже́ственными блиста́ньми воскресе́ния.
Припев: Пресвята́я Богоро́дице, спаси́ нас.
Его́же родила́ еси́ Христа́, / прекра́сно из ме́ртвых возсия́вша, Чи́стая, зря́щи, / до́брая и непоро́чная в жена́х и кра́сная, / днесь во спасе́ние всех, / со апо́столы ра́дующися, Того́ прославля́й.
Ин.
Ирмос: Приосене́нную го́ру, Авваку́м прозря́ше / пречи́стую Твою́ утро́бу, Чи́стая. / Тем взыва́ше: от ю́га прии́дет Бог, / и Святы́й от горы́ приосене́нныя ча́щи.
Евре́йский собо́р, за́вистию растаява́емь, / на Дре́ве распя́т Тя, Го́споди: / и разори́в осужде́ние сме́рти, / я́ко си́лен воста́л еси́, / мир с Собо́ю совоздви́гнув.
С ми́ры жены́, что неистощи́мое Ми́ро и́щете? / Воста́л есть, мироно́сицам рече́, седя́й в бе́лых ри́зах, / поднебе́сную испо́лнив мы́сленнаго благоуха́ния.
Ра́бий нося́ о́браз, за мно́гое благоутро́бие / ходя́й прише́л еси́, и здра́ва показа́л еси́, / во мно́гих ле́тех лежа́щаго, Сло́ве, / повеле́в и одр взя́ти.
А́нгел у́бо Госпо́день, на вся́кое ле́то схожда́я, / во́ду в купе́ли возмуща́ше, соверша́я здра́ва еди́наго то́чию: / Христо́с же мно́жество безчи́сленное Боже́ственным креще́нием спаса́ет.
Архангелу Михаилу: Нача́льниче а́нгелов и наста́вниче заблужда́ющих, / Госпо́день нача́льный воево́до, / в час сей посреде́ нас прииди́, и моли́твы всех принеси́ / еди́ному Творцу́ и Влады́це.
Слава, Троичен: Соединя́емая Естество́м, и разделя́емая Ли́цы, есть Свята́я Тро́ица, / Оте́ц пресу́щный, соприсносу́щный же Сын, и Святы́й и еди́ный всеси́льный Дух.
И ныне, Богородичен: Чи́стая, ка́ко дои́ши; / ка́ко же родила́ еси́ Младе́нца, Ада́ма дре́внейшаго; / ка́ко на руку́ но́сиши Сы́на, су́щаго на ра́му херуви́мску, / я́ко зна́ет, я́коже весть, вся осуществова́вый.
Катавасия: На Боже́ственней стра́жи / богоглаго́ливый Авваку́м / да ста́нет с на́ми и пока́жет / светоно́сна А́нгела / я́сно глаго́люща: / днесь спасе́ние ми́ру, / я́ко воскре́се Христо́с, / я́ко всеси́лен.
Песнь 5.
Ирмос: У́тренюем у́треннюю глубоку́, / и вме́сто ми́ра песнь принесе́м Влады́це, / и Христа́ у́зрим / пра́вды Со́лнце, / всем жизнь возсия́юща.
Припев: Христо́с воскре́се из ме́ртвых.
Безме́рное Твое́ благоутро́бие, / а́довыми у́зами содержи́мии зря́ще, / к све́ту идя́ху, Христе́, / весе́лыми нога́ми, / Па́сху хва́ляще ве́чную.
Припев: Христо́с воскре́се из ме́ртвых.
Присту́пим свещено́снии, / исходя́щу Христу́ из гро́ба, я́ко жениху́, / и спра́зднуем любопра́зднственными чи́нми / Па́сху Бо́жию спаси́тельную.
Припев: Пресвята́я Богоро́дице, спаси́ нас.
Просвеща́ется боже́ственными луча́ми и живоно́сными / воскресе́ния Сы́на Твоего́, / Богома́ти Пречи́стая, / и ра́дости исполня́ется благочести́вых собра́ние.
Припев: Пресвята́я Богоро́дице, спаси́ нас.
Не разве́рзл еси́ врата́ де́вства в воплоще́нии, / гро́ба не разруши́л еси́ печа́тей, Царю́ созда́ния: / отону́дуже воскре́сшаго Тя зря́щи, Ма́ти, ра́довашеся.
Ин.
Ирмос: Све́том Твои́м невече́рним, Христе́, / озари́, Бо́же, смире́нную мою́ ду́шу, / и наста́ви на страх Твой, / зане́ свет повеле́ния Твоя́.
Вознесы́йся на Дре́ве кре́стнем, и совознесы́й мир весь, / и быв в ме́ртвых Бо́же, / от ве́ка ме́ртвыя воздвиза́еши.
Воскре́се, я́коже рече, Христо́с, / истощи́вый вся а́дова ца́рствия, / и явля́ется апо́столом, / ра́дость подава́я ве́чнующую.
Белообра́зен ви́ден бысть жена́м блиста́яйся А́нгел: / не ктому́ пла́чите, Жизнь ва́ша воста́, / су́щия во гробе́х ме́ртвыя оживи́вшая.
Разсла́бленнаго я́ко воздви́гл еси́, Христе́, / разсла́бленную мою́ ду́шу преступле́ньми оздра́ви, / и ше́ствовати мне Твоя́ пра́выя стези́ споспешеству́й.
Архангелу Михаилу: А́нгелов наста́вниче, Михаи́ле, / собира́ющияся в хра́ме твое́м лю́ди днесь, / и пропове́дающия Бо́жия вели́чия спаса́й.
Слава, Троичен: Равноче́стная тричи́сленная Еди́нице, / разделя́емая у́бо ве́рно Ипоста́сьми, / соединя́емая же Естество́м есть, / Оте́ц, Сын и Боже́ственный Дух.
И ныне, Богородичен: Безсе́менное Рождество́ Твое́, Чи́стая, / непостижи́мое пое́м рожде́ние, / блажа́ще Тя, я́ко Ма́терь Творца́ всех и Влады́ки.
Катавасия: У́тренюем у́треннюю глубоку́, / и вме́сто ми́ра песнь принесе́м Влады́це, / и Христа́у́зрим / пра́вды Со́лнце, / всем жизнь возсия́юща.
Песнь 6.
Ирмос: Снизше́л еси́ в преиспо́дняя земли́, / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от гро́ба.
Припев: Христо́с воскре́се из ме́ртвых.
Сохрани́в це́ла зна́мения Христе́, / воскре́сл еси́ от гро́ба, / ключи́ Де́вы не вреди́вый в рождестве́ Твое́м, / и отве́рзл еси́ нам ра́йския две́ри.
Припев: Христо́с воскре́се из ме́ртвых.
Спа́се мой, / живо́е же и неже́ртвенное заколе́ние, / я́ко Бог Сам Себе́ / во́лею приве́л Отцу́, / совоскреси́л еси́ всеро́днаго Ада́ма, / воскре́с от гро́ба.
Припев: Пресвята́я Богоро́дице, спаси́ нас.
Возведе́ся дре́вле держи́мое сме́ртию и тле́нием, / воплоти́вшимся от Твоего́ пречи́стаго чре́ва, / к нетле́нней и присносу́щней жи́зни, / Богоро́дице Де́во.
Припев: Пресвята́я Богоро́дице, спаси́ нас.
Сни́де в преиспо́дняя земли́, / в ложесна́ Твоя́, Чи́стая, сше́дый, / и всели́выйся и воплоти́выйся па́че ума́, / и воздви́же с Собо́ю Ада́ма, / воскре́с от гро́ба.
Ин.
Ирмос: Глубина́ страсте́й воста́ на мя, / и бу́ря проти́вных ве́тров: / но предвари́в мя Ты спаси́, Спа́се, и изба́ви от тли, / я́ко спасл еси́ от зве́ря проро́ка.
Вознесы́йся во́лею на Дре́во, / положи́лся еси́ я́ко мертв во гро́бе, / и су́щия во а́де ме́ртвыя вся вку́пе оживи́в, Христе́, / воскреси́л еси́ Боже́ственною си́лою.
Ад срет Тя Ще́дре до́ле, огорчи́ся, / свя́занныя отдава́я со тща́нием, / Твое́ стра́шное пою́щия, Спа́се, Воскресе́ние, / во гла́сех немо́лчных.
Боже́ственнии ученицы́, / ви́девше Жизнь всех из гро́ба воста́вша, Христа́, / любо́вию мно́гою, и нра́вом пра́вым, / и весе́лием душе́вным покланя́хуся.
Дре́вле на одре́ боле́зненном, в ле́тех мно́зех слежа́й, / Твои́м, Христе́, повеле́нием исцеле́в, сла́вит, / воспева́я благоутро́бие Твое́, Жизнода́телю.
Архангелу Михаилу: А́нгелов наста́вниче, Михаи́ле, / предстоя́й престо́лу Влады́чню, / прииди́ посреде́ нас, наставля́я к стезя́м жи́зни, / тебе́ предста́теля те́пла стяжа́вших.
Слава, Троичен: Тро́ицу Ли́цы Тя чту, / Еди́ницу же Существо́м пропове́даю, / безнача́льне О́тче, Сы́не, Ду́ше Пра́вый: Бо́же всех, / с вы́шними стра́шными во́инствы.
И ныне, Богородичен: Вся Боже́ственным манове́нием нося́й, / держи́мь есть, Богоро́дице Де́во, во объя́тиях Твои́х, / всех нас восхища́я, от руки́ рабо́ты лука́ваго, я́ко Щедр.
Катавасия: Снизше́л еси́ в преиспо́дняя земли́, / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от гро́ба.
Кондак, глас 3: Подобен:
Ду́шу мою́, Го́споди, во гресе́х вся́ческих, / и безме́стными дея́ньми лю́те разсла́блену, / воздви́гни Боже́ственным Твои́м предста́тельством, / я́коже и разсла́бленнаго воздви́гл еси́ дре́вле, / да зову́ Ти, спаса́емь: / Ще́дрый, сла́ва Христе́, держа́ве Твое́й.
Икос: Руки́ Твоея́ го́рстию содержа́й концы́, Иису́се Бо́же, / Отцу́ собезнача́льный, и Ду́ху Свято́му совлады́чествуяй все́ми, / пло́тию яви́лся еси́, / неду́ги исцеля́я, и стра́сти отгна́л еси́: / слепцы́ просвети́л еси́, / и разсла́бленнаго сло́вом Боже́ственным Ты возста́вил еси́, / сему́ напра́сно ходи́ти повеле́в, / и сего́ носи́вший одр на ра́му взя́ти. / Те́мже вси с ним воспева́ем, и возопии́м: / Ще́дрый, сла́ва Христе́, держа́ве Твое́й.
Синаксарий в Неделю четвертую по Пасце, о разслабленном.
Песнь 7.
Ирмос: О́троки от пе́щи изба́вивый, / быв Челове́к, / стра́ждет я́ко сме́ртен, / и стра́стию сме́ртное, / в нетле́ния облачи́т благоле́пие, / Еди́н благослове́н / отце́в Бог, и препросла́влен.
Припев: Христо́с воскре́се из ме́ртвых.
Жены́ с ми́ры богому́дрыя в след Тебе́ теча́ху: / Его́же, я́ко ме́ртва, со слеза́ми иска́ху, / поклони́шася ра́дующияся Живо́му Бо́гу, / и Па́сху та́йную / Твои́м, Христе́, ученико́м благовести́ша.
Припев: Христо́с воскре́се из ме́ртвых.
Сме́рти пра́зднуем умерщвле́ние, / а́дово разруше́ние, / ино́го жития́ ве́чнаго нача́ло, / и игра́юще пое́м Вино́внаго, / Еди́наго благослове́ннаго / отце́в Бо́га, и препросла́вленнаго.
Припев: Христо́с воскре́се из ме́ртвых.
Я́ко вои́стинну свяще́нная, / и всепра́зднственная сия́ спаси́тельная нощь, / и светоза́рная, / светоно́снаго дне, / воста́ния су́щи провозве́стница: / в не́йже безле́тный Свет из гро́ба пло́тски всем возсия́.
Припев: Пресвята́я Богоро́дице, спаси́ нас.
Умертви́в Сын Твой смерть, Всенепоро́чная, днесь, / всем сме́ртным пребыва́ющий живо́т / во ве́ки веко́в дарова́, / еди́н благослове́нный / отце́в Бог и препросла́вленный.
Припев: Пресвята́я Богоро́дице, спаси́ нас.
Всем ца́рствуяй созда́нием, быв челове́к, / всели́ся в Твою́, Богоблагода́тная, утро́бу, / и распя́тие претерпе́в и смерть, / воскре́се боголе́пно, / совозста́вив нас я́ко всеси́лен.
Ин.
Ирмос: Пла́мень ороси́вый пе́щный, / и о́троки неопали́мы спасы́й, / благослове́н еси́ во ве́ки, / Го́споди Бо́же оте́ц на́ших.
Просте́рта Тя на Дре́ве я́ко зря́ше, / свет скры со́лнце, не могу́щее ми́рови свети́ти, / Тебе́ во́лею заше́дшу Всецарю́, на просвеще́ние всех язы́ков.
Воскре́сл еси́ истощи́вый гро́бы, / и плени́вый ад си́лою всеси́льною: / те́мже пое́м честно́е Твое́, Христе́, и Боже́ственное воста́ние.
Я́ко ме́ртва что Жива́го и́щете? / Воста́, несть во гро́бе, мироно́сицам вопия́ше дре́вле, / блиста́яйся зра́ком боже́ственный А́нгел.
Слежа́ща в ле́тех мно́зех разсла́бленнаго сло́вом исцели́вый, вопия́л еси́: / возми́ одр твой и ходи́, поя́ вели́чия Бо́жия.
Архангелу Михаилу: Михаи́ле, нача́льный воево́до Госпо́день, / ве́рно в Боже́ственнем твое́м хра́ме собира́ющихся, / во хвале́ние Бо́жие наставля́й, / покрыва́й от вся́ческих зол хода́тайством твои́м.
Слава, Троичен: О Тро́ице, ве́рою пою́щия Тя, / я́ко Бо́га всех и Влады́ку, / от вся́ких бед спаса́й, / и Твои́х благ прича́стники сотвори́.
И ныне, Богородичен: Де́вствуеши, ро́ждши па́че сло́ва, / пре́жде всех век роди́вшагося от безнача́льна Отца́ нетле́нно: / сего́ ра́ди, Чи́стая, Тебе́ ублажа́ем.
Катавасия: О́троки от пе́щи изба́вивый, / быв Челове́к, / стра́ждет я́ко сме́ртен, / и стра́стию сме́ртное, / в нетле́ния облачи́т благоле́пие, / Еди́н благослове́н / отце́в Бог, и препросла́влен.
Песнь 8.
Ирмос: Сей нарече́нный и святы́й день, / Еди́н суббо́т Царь и Госпо́дь, / пра́здников пра́здник / и торжество́ есть торже́ств, / во́ньже благослови́м Христа́ во ве́ки.
Припев: Христо́с воскре́се из ме́ртвых.
Прииди́те, но́ваго виногра́да рожде́ния, / Боже́ственнаго весе́лия, / в наро́читом дни Воскресе́ния, / Ца́рствия Христо́ва приобщи́мся, / пою́ще Его́, / я́ко Бо́га, во ве́ки.
Припев: Христо́с воскре́се из ме́ртвых.
Возведи́ о́крест о́чи твои́, Сио́не, и виждь: / се бо приидо́ша к тебе́, / я́ко богосве́тлая свети́ла, / от за́пада, и се́вера, и мо́ря, / и восто́ка ча́да твоя́, / в тебе́ благословя́щая Христа́ во ве́ки.
Припев: Пресвята́я Тро́ице, Бо́же наш, сла́ва Тебе́.
Троичен: О́тче Вседержи́телю, и Сло́ве, и Ду́ше, / треми́ соединя́емое во Ипоста́сех Естество́, / Пресу́щественне и Пребоже́ственне, / в Тя крести́хомся, / и Тя благослови́м во вся ве́ки.
Припев: Пресвята́я Богоро́дице, спаси́ нас.
Прии́де Тобо́ю в мир Госпо́дь, Де́во Богоро́дице, / и чре́во а́дово расто́рг, / сме́ртным нам воскресе́ние дарова́: / Те́мже благослови́м Его́ во ве́ки.
Припев: Пресвята́я Богоро́дице, спаси́ нас.
Всю низложи́в сме́рти держа́ву Сын Твой, Де́во, / Свои́м воскресе́нием, / я́ко Бог кре́пкий совознесе́ нас и обожи́: / те́мже воспева́ем Его́ во ве́ки.
Ин.
Ирмос: А́нгельми немо́лчно в вы́шних сла́вимаго Бо́га, / небеса́ небе́с, земля́ и го́ры, / и хо́лми, и глубина́, и весь род челове́ческий, / пе́сньми Того́, я́ко Созда́теля и Изба́вителя / благослови́те и превозноси́те во вся ве́ки.
Заве́са раздра́ся, распе́ншуся Тебе́, Спа́се наш, / и отдава́ше ме́ртвыя, я́же пожре́, смерть: / и ад обнажи́ся, Тебе́ зря в преиспо́дних земли́ бы́вша.
Где твое́ жа́ло есть, сме́рте; / где твоя́, а́де, ны́не побе́да? / Воскре́сшу Царю́, умертви́лся еси́ и поги́бл, не ктому́ ца́рствуеши: / Кре́пкий бо взят, я́же име́л еси́ свя́занныя.
Тецы́те ско́ро, возвести́те апо́столом Воскресе́ние, / мироно́сицам явле́йся ю́ноша веща́ше: / воскре́се Влады́ка, / и с Ним и́же от ве́ка ме́ртвии пресла́вно.
Ле́ты мно́гими слежа́й разсла́бленный, взыва́ше: / поми́луй мя, Изба́вителю, недоуме́нием содержи́ма. / Сей же повелева́ет ему́ взя́ти тща́тельно одр, и пра́во ступа́ти.
Архангелу: Я́ко невеще́ственных предводи́тель, архистрати́же сил, / с на́ми проси́ нам прегреше́ний избавле́ние, / исправле́ние же жития́, / и та́мошних наслажде́ние благ ве́чных.
Благослови́м Отца́, и Сы́на, и Свята́го Ду́ха, Го́спода.
Несозда́нное, непресеко́мое Существо́, Триипоста́сное Божество́, / Отца́ безнача́льна Бо́га, и Сы́на, и Ду́ха Свята́го / воспои́м согла́сно, серафи́мскую зову́ще стра́шную песнь.
И ны́не и при́сно и во ве́ки веко́в, ами́нь.
Богородичен: Сви́ток Тя дре́вле зря́ше Иса́иа, Присноде́во, / в не́мже пе́рстом О́тчим Сло́во безле́тное написа́ся, / от вся́каго безслове́сия спаса́ющее нас, / словесы́ Тя свяще́нными воспева́ющих.
Хва́лим, благослови́м, покланя́емся Го́сподеви, / пою́ще и превознося́ще во вся ве́ки.
И Катавасия: Сей нарече́нный и святы́й день, / Еди́н суббо́т Царь и Госпо́дь, / пра́здников пра́здник / и торжество́ есть торже́ств, / во́ньже благослови́м Христа́ во ве́ки.
Честне́йшую не поем.
Песнь 9.
Ирмос: Свети́ся, свети́ся, / но́вый Иерусали́ме: / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.
Припев: Христо́с воскре́се из ме́ртвых.
О Боже́ственнаго, о любе́знаго, / о сладча́йшаго Твоего́ гла́са! / С на́ми бо нело́жно / обеща́лся еси́ бы́ти, / до сконча́ния ве́ка, Христе́: / Его́же, ве́рнии, / утвержде́ние наде́жди иму́ще, ра́дуемся.
Припев: Христо́с воскре́се из ме́ртвых.
О Па́сха ве́лия и свяще́ннейшая, Христе́! / О му́дросте, и Сло́ве Бо́жий, и си́ло! / Подава́й нам и́стее Тебе́ причаща́тися, / в невече́рнем дни Ца́рствия Твоего́.
Припев: Пресвята́я Богоро́дице, спаси́ нас.
Согла́сно, Де́во, Тебе́ блажи́м ве́рнии: / ра́дуйся, две́ре Госпо́дня: / ра́дуйся, гра́де одушевле́нный: / ра́дуйся, Ея́же ра́ди нам ны́не возсия́ свет, / из Тебе́ Рожде́ннаго из ме́ртвых Воскресе́ния.
Припев: Пресвята́я Богоро́дице, спаси́ нас.
Весели́ся и ра́дуйся боже́ственная две́ре Све́та: / заше́дый бо Иису́с во гроб возсия́, / просия́в со́лнца светле́е, / и ве́рныя вся озари́в, / Богора́дованная Влады́чице.
Ин.
Ирмос: На Сина́йстей горе́ ви́де Тя в купине́ Моисе́й, / неопа́льно огнь Божества́ заче́ншую во чре́ве: / Дании́л же Тя ви́де, го́ру несеко́мую: / жезл прозя́бший, Иса́иа взыва́ше, от ко́рене Дави́дова.
Иису́се, на Дре́ве возвыша́емь, совозне́сл еси́ нас, / и положи́вся во́лею во гро́бе, / из гробо́в ме́ртвыя воскреси́л еси́ вся, / пою́щия держа́ву Твою́ непостижи́мую, / и си́лу Твою́ непобеди́мую.
Красне́йший от гро́ба возсия́л еси́, / я́ко жени́х от черто́га, красне́йший Сло́ве, / и разруши́л еси́ а́да мра́чное, / и ю́зники изве́л еси́, согла́сно зову́щия: / сла́ва сла́ве Твое́й, / сла́ва, Иису́се Бо́же, воста́нию Твоему́.
Воздыха́ния же и сле́зы нося́щя, / с ми́ры во тща́нии всесвяты́й гроб достиго́ша жены́, / и Христо́ву учи́ми бя́ху ве́рою сла́вному воста́нию, / е́же пра́зднуем в ра́дости душе́вной веселя́щеся.
После́доваше здра́вие те́ла, / повеле́нию Твоему́, Христе́ / и ви́димь бя́ше пре́жде разсла́бленный, / теки́й со тща́нием, и одр нося́й, / на не́мже возлежа́ше ле́ты мно́гими, / песносло́вя мно́гую си́лу Твою́.
Архангелу Михаилу: Просвеще́ние нам испроси́, вели́кий Архистрати́же, / при́сно Све́ту вели́кому предстоя́й, / и умири́ нашу жизнь, / напа́стьми всегда́ змие́выми и обстоя́ньми жития́ / зы́блемую при́сно, достохва́льне.
Слава: Свет и Све́тове, Жизнь же и Жи́зни, сла́влю Тя всеблагоче́стно, / О́тче, Сло́ве и Ду́ше Святы́й, / Триипоста́сная Еди́нице, нераздели́мая держа́во, Божество́ несли́тное, / Свят, Свят, Свят, вопия́ с вы́шними си́лами.
И ныне: От светоно́сных про́йде ложе́сн Твои́х вели́кое Со́лнце Христо́с, / и мир просвети́, Пречи́стая, осия́ньми све́тлыми, и тму отъя́т преступле́ния: / те́мже пое́м Тя, я́ко вину́ всех до́брых, Богоневе́сто.
Катавасия: Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.
Таже, Свят Госпо́дь Бог наш: трижды, на глас 3.
Ексапостиларий. Самогласен:
Пло́тию усну́в, / я́ко мертв, / Царю́ и Го́споди, / тридне́вен воскре́сл еси́, / Ада́ма воздви́г от тли, / и упраздни́в смерть: / Па́сха нетле́ния, / ми́ра спасе́ние. [Единожды.]
Слава: другий.
Подобен: Жены́ услы́шите:
Предста́ Человеколю́бец и всеще́дрый Госпо́дь О́вчей купе́ли, е́же исцели́ти неду́ги: / обре́те же челове́ка слежа́ща мно́гими ле́ты, и к нему́ возопи́: / возми́ одр, и иди́ на пути́ пра́выя.
И ныне: тойже.
На хвалитех поставим стихов, 8. И поем стихиры воскресны, глас 3:
Прииди́те вси язы́цы, / уразуме́йте стра́шныя та́йны си́лу: / Христо́с бо Спас наш, Е́же в нача́ле Сло́во, / распя́тся нас ра́ди, и во́лею погребе́ся, / и воскре́се из ме́ртвых, е́же спасти́ вся́ческая: / Тому́ поклони́мся.
Пове́даша вся чудеса́ / стра́жие Твои́, Го́споди, / но собо́р суеты́ испо́лни мздо́ю десни́цу их, / скры́ти мня́ше воскресе́ние Твое́, / е́же мир сла́вит: поми́луй нас.
Ра́дости вся испо́лнишася / воскресе́ния иску́с прии́мша: / Мари́я бо Магдали́на ко гро́бу прии́де, / обре́те а́нгела на ка́мени седя́ща, / ри́зами блиста́ющася и глаго́люща: / что и́щете жива́го с ме́ртвыми? / Несть зде, но воста́, я́коже рече́, / предваря́я вы в Галиле́и.
Во све́те Твое́м, Влады́ко, / у́зрим свет, Человеколю́бче: / воскре́сл бо еси́ из ме́ртвых, / Спасе́ние ро́ду челове́ческому да́руя: / да Тя вся тварь славосло́вит Еди́наго Безгре́шнаго, / поми́луй нас.
И восточны , глас тойже:
Песнь у́треннюю мироно́сицы жены́ / со слеза́ми приноша́ху Тебе́, Го́споди, / благоуха́ния бо арома́ты иму́ща, / гро́ба Твоего́ достиго́ша, / пречи́стое те́ло Твое́ пома́зати тща́щася. / А́нгел седя́й на ка́мени тем благовести́: / что и́щете жива́го с ме́ртвыми; / смерть бо попра́в воскре́се я́ко Бог, / подая́ всем ве́лию ми́лость.
Блиста́яся А́нгел на гро́бе Твое́м животво́рнем, / мироно́сицам глаго́лаше: / истощи́в гро́бы Изба́витель, плени́ а́да, / и воскре́се тридне́вен, / я́ко Еди́н Бог и Всеси́лен.
Во гро́бе Тя иска́ше, / прише́дши во еди́ну от суббо́т Мари́я Магдали́на, / не обре́тши же рыда́ше с пла́чем вопию́щи: / увы́ мне, Спа́се мой! / Укра́ден был еси́, всех Ца́рю. / Супру́г же живоно́сных а́нгел внутрь гро́ба вопия́ше: / что пла́чеши о же́но; / пла́чу, глаго́лет, я́ко взя́ша Го́спода моего́ от гро́ба, / и не вем, где положи́ша Его́. / Сия́ же обра́щшися вспять, / я́ко ви́де Тя, а́бие возопи́: / Госпо́дь мой и Бог мой, сла́ва Тебе́.
Евре́и затвори́ша во гро́бе Живо́т, / разбо́йник же отве́рзе язы́ком наслажде́ние, / зовы́й и глаго́ля: / И́же со мно́ю мене́ ра́ди распны́йся: / сообе́си ми ся на дре́ве, / и яви́ся мне на престо́ле со Отце́м седя́: / Той бо есть Христо́с Бог наш, / име́яй ве́лию ми́лость.
Слава, глас 8: Го́споди, разсла́бленнаго не купе́ль исцели́, / но Твое́ сло́во обнови́, / и ниже́ многоле́тный запя́т ему́ неду́г: / я́ко гла́са Твоего́ скоре́йшее де́йство показа́ся, / и неудобоноси́мую тя́жесть отве́рже, / и бре́мя одра́ понесе́, во свиде́тельство / мно́жества щедро́т Твои́х, сла́ва Тебе́.
И ныне: Преблагослове́нна еси́:
Славословие великое. Тропарь воскресен, ектении, и отпуст, и исхождение в притвор.
Слава, и ныне: Стихира евангельская, глас 3:
Магдали́не Мари́и / Спа́сово благовеству́ющей из ме́ртвых Воскресе́ние и явле́ние, / не ве́рующе же ученицы́, поноси́ми бы́ша о жестосе́рдии: / но зна́меньми воору́жшеся и чудесы́, / ко пропове́данию посыла́хуся, / и Ты у́бо, Го́споди, к нача́льному све́ту возне́слся еси́ Отцу́, / они́ же пропове́даша всю́ду сло́во, чудесы́ уверя́юще. / Те́мже просвети́вшеся те́ми, / сла́вим Твое́ е́же из ме́ртвых воскресе́ние, / человеколю́бче Го́споди.
И поучение Студитово. И конечный отпуст. Час 1. На часех тропарь воскресен. По Трисвятом кондак Триоди: Ду́шу мою́ Го́споди:
На Литургии
Блаженна гласа, глас 3, на 4:
Отве́ргша, Христе́, за́поведь Твою́, / пра́отца Ада́ма из рая́ изгна́л еси́: / разбо́йника же ще́дре испове́давша Тя на кресте́, / в онь всели́л еси́, зову́ща: / помяни́ мя, Спа́се, во ца́рствии Твое́м.
Воскре́с из ме́ртвых, совоскреси́л еси́ нас от страсте́й / воскресе́нием Твои́м, Го́споди: / сме́ртную же всю си́лу погуби́л еси́, Спа́се. / Сего́ ра́ди ве́рою Ти зове́м: / помяни́ и нас во ца́рствии Твое́м.
Тридне́вным Твои́м погребе́нием, / и́же во а́де умерщвле́нныя, я́ко Бог, оживотвори́вый, совоздви́гл еси́, / и нетле́ние всем, я́ко Благ, источи́л еси́ нам, ве́рою зову́щим всегда́: / помяни́ и нас во ца́рствии Твое́м.
Согре́шших нас сме́ртною осуди́л еси́ кля́твою, Живода́вче и Го́споди, / те́лом же Твои́м, безгре́шне Влады́ко, пострада́в, / сме́ртныя оживи́л еси́ зову́щия: / помяни́ и нас во ца́рствии Твое́м.
И от канона песнь 6-я, на 4.
По входе тропарь воскресен, глас 3:
Да веселя́тся небе́сная, / да ра́дуются земна́я; / я́ко сотвори́ держа́ву мы́шцею Свое́ю Госпо́дь, / попра́ сме́ртию смерть, / пе́рвенец ме́ртвых бысть; / из чре́ва а́дова изба́ви нас, / и подаде́ ми́рови ве́лию ми́лость.
Слава, кондак Триоди, глас 3: Подобен:
Ду́шу мою́, Го́споди, во гресе́х вся́ческих, / и безме́стными дея́ньми лю́те разсла́блену, / воздви́гни Боже́ственным Твои́м предста́тельством, / я́коже и разсла́бленнаго воздви́гл еси́ дре́вле, / да зову́ Ти, спаса́емь: / Ще́дрый, сла́ва Христе́, держа́ве Твое́й.
И ныне, кондак Пасце, глас 8:
А́ще и во гроб снизше́л еси́, Безсме́ртне, / но а́дову разруши́л еси́ си́лу, / и воскре́сл еси́, я́ко победитель, Христе́ Бо́же, / жена́м мироно́сицам веща́вый: ра́дуйтеся, / и Твои́м апо́столом мир да́руяй, / па́дшим подая́й воскресе́ние.
Храма же Христова, и Богородицы, и святых, тропаря и кондака не глаголем.
Прокимен, глас 1:
Бу́ди Го́споди ми́лость Твоя́ на нас, / я́коже упова́хом на Тя. Стих: Ра́дуйтеся пра́веднии о Го́споде: пра́вым подоба́ет похвала́.
Апостол Деяний, зачало 23. [Деян. 9, 32 – 42.]
Во дни о́ны, бысть Петру́, посеща́ющу всех, сни́ти и ко святы́м живу́щим в Ли́дде: Обре́те же та́мо челове́ка не́коего, и́менем Ене́а, от осми́ лет лежа́ща на одре́, и́же бе разсла́блен. И рече́ ему́ Петр: Ене́е, исцеля́ет тя Иису́с Христо́с, воста́ни с посте́ли твоея́. И а́бие воста́: И ви́деша его́ вси живу́щии в Ли́дде и во Ассаро́не, и́же обрати́шася ко Го́споду. Во Иоппи́и же бе не́кая учени́ца, и́менем Тави́фа, я́же сказа́ема глаго́лется, се́рна: сия́ бя́ше испо́лнена благи́х дел и ми́лостынь, я́же творя́ше. Бысть же во дни ты́я, боле́вшей ей умре́ти: омы́вше же ю́, положи́ша в го́рнице. Близ же су́щей Ли́дде Иоппи́и, ученицы́ слы́шавше, я́ко Петр есть в ней, посла́ша два му́жа к нему́, моля́ще его́ не облени́тися приити́ до них. Воста́в же Петр и́де с ни́ма, его́же прише́дша возведо́ша в го́рницу, и предста́ша ему́ вся вдови́цы пла́чуща, и показу́юща ри́зы и оде́жды, ели́ка творя́ше, с ни́ми су́щи, Се́рна. Изгна́в же вон вся Петр, прекло́нь коле́на помоли́ся, и обра́щься к те́лу, рече́: Тави́фо, воста́ни. Она́ же отве́рзе о́чи свои́, и ви́девши Петра́, се́де. Пода́в же ей ру́ку, воздви́же ю́, и призва́в святы́я и вдови́цы, поста́ви ю́ жи́ву. Уве́дано же бысть се по всей Иоппи́и, и мно́зи ве́роваша в Го́спода.
Аллилуиа, глас 5: Ми́лости Твоя́ Го́споди во век воспою́. Стих: Зане́ рекл еси́: в век ми́лость сози́ждется.
Евангелие Иоанна, зачало 14. [Ін. 5:1-15.]
Во вре́мя о́но, взы́де Иису́с во Иерусали́м. Есть же во Иерусали́мех на О́вчей купе́ли, я́же глаго́лется евре́йски Вифесда́, пять притво́р иму́щи. В тех слежа́ше мно́жество боля́щих, слепы́х, хромы́х, сухи́х, ча́ющих движе́ния воды́. А́нгел бо Госпо́день на вся́ко ле́то схожда́ше в купе́ль, и возмуща́ше во́ду: и и́же пе́рвее вла́зяше по возмуще́нии воды́, здрав быва́ше, яце́м же неду́гом одержи́мь быва́ше. Бе же ту не́кий челове́к, три́десять и осмь лет имы́й в неду́зе свое́м. Сего́ ви́дев Иису́с лежа́ща, и разуме́в, я́ко мно́га ле́та уже́ имя́ше в неду́зе, глаго́ла ему́: хо́щеши ли цел бы́ти? Отвеща́ Ему́ неду́жный: ей, Го́споди, челове́ка не и́мам, да егда́ возмути́тся вода, вве́ржет мя в купе́ль: егда́ же прихожду́ аз, ин пре́жде мене́ сла́зит. Глаго́ла ему́ Иису́с: воста́ни, возми́ одр твой, и ходи́. И а́бие здрав бысть челове́к, и взем одр свой, и хожда́ше. Бе же суббо́та в той день. Глаго́лаху же жи́дове изцеле́вшему: суббо́та есть, и не досто́ит ти взя́ти одра́ твоего́. Он же отвеща́ им: И́же мя сотвори́ це́ла, Той мне рече́: возми́ одр твой и ходи́. Вопроси́ша же его́: кто есть Челове́к реки́й ти: возми́ одр твой и ходи́? Изцеле́вый же не ве́дяше, кто есть: Иису́с бо укло́нься, наро́ду су́щу на ме́сте. Пото́м же обре́те его́ Иису́с в це́ркви, и рече́ ему́: се здрав бысть, ктому́ не согреша́й, да не го́рше ти что бу́дет. И́де же челове́к, и пове́да иуде́ом, я́ко Иису́с есть, И́же мя сотвори́ це́ла.
Вместо же Достойно: поем:
А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся.
Таже ирмос, глас 1: Свети́ся, свети́ся, / но́вый Иерусали́ме: / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.
Причастный:
Те́ло Христо́во приими́те, исто́чника безсме́ртнаго вкуси́те. Другий: Хвали́те Го́спода с Небе́с, хвали́те Его́ в вы́шних.
Подобает ведати, яко воследование разслабленнаго поется в Неделю, в понедельник: во вторник же отдается.
